Levitikus
20 Jehova okwa twikila okupopya naMoses, ta ti: 2 “Ou na okulombwela Ovaisrael ngaha, ‘Omunhu keshe womuIsrael nomunailongo keshe oo ha di muIsrael, oo ta yandje oludalo laye kuMolek, oku na okudipawa filufilu. Ovanhu vomedu olo ove na oku mu dipaa nomamanya. 3 Ame ohandi ka handukila omunhu oo, nohandi ke mu dima* mo moshiwana shavo, molwaashi okwa yandja oludalo laye limwe kuMolek, nokwa nyateka onhele yange iyapuki nosho yo edina lange liyapuki. 4 Ngeenge ovanhu vomedu olo ove lipwililikile osho omunhu oo a ninga, eshi a yandja oludalo laye kuMolek noinave mu dipaa, 5 ame ohandi ka handukila filufilu omunhu oo novaneumbo laye. Ohandi ka dima* mo omulumenhu moshiwana shavo pamwe naaveshe ovo have mu waimine moluhaelo naMolek.
6 “‘Omunhu* oo ta ka konga ekwafo keemhepo doonakufya nokovaxunganeki vonakwiiwa, opo a haele navo pamhepo, ohandi ke mu handukila filufilu nohandi ke mu dima* mo moshiwana shavo.
7 “‘Omu na okuliyapula nokukala ovayapuki, molwaashi aame Jehova, Kalunga keni. 8 Omu na okudiinina eenghedimhango dange noku di wanifa po. Aame Jehova, oo te mu yapula.
9 “‘Ngeenge ope na oo ta tuku* xe, ile ina, oku na okudipawa filufilu. Molwaashi okwa tuka xe, ile ina, ohonde yaye oi li kombada yaye.
10 “‘Shi na sha nomulumenhu oo a ya moluhaelo nomukulukadi womulumenhu mukwao: Oo a ya moluhaelo nomukulukadi womulumenhu mukwao, oku na okudipawa filufilu, omuhaeli nomuhaelwa. 11 Omulumenhu oo a nangala nomukulukadi waxe okwa fifa xe ohoni.* Aveshe ove na okudipawa filufilu. Ohonde yavo oi li kombada yavo. 12 Ngeenge omulumenhu okwa nangala noshitenya shaye shomukainhu, aveshe ove na okudipawa filufilu. Ova nyonauna eshito. Ohonde yavo oi li kombada yavo.
13 “‘Ngeenge omulumenhu okwa nangala nomulumenhu mukwao monghedi ya faafana naayo ta nangala nomukainhu, aveshe ova ninga oshinima shitondifa. Ove na okudipawa filufilu. Ohonde yavo oi li kombada yavo.
14 “‘Ngeenge omulumenhu okwa kufa omukainhu naina, osho oshinima shitondifa.* Aveshe ove na okuxwikwa po momundilo, opo oshinima osho shitondifa shiha twikile mokati keni.
15 “‘Ngeenge omulumenhu okwa nangala noshinamwenyo, oku na okudipawa filufilu, nomu na okudipaa oshinamwenyo. 16 Ngeenge omukainhu okwa i koshinamwenyo a nangale nasho, ou na oku mu dipaa nosho yo oshinamwenyo. Ove na okudipawa filufilu. Ohonde yavo oi li kombada yavo.
17 “‘Ngeenge omulumenhu okwa nangala nomumwainakadona, okakadona ka dalwa kuxe, ile ka dalwa kuina, ndele ta mono epenge lako, nako taka mono epenge laye, oshinima shififa ohoni. Ove na okudimwa* po moipafi yovanhu vomoshiwana shavo. Okwa fifa ohoni omumwainakadona.* Oku na okuhandukilwa omolwenyono laye.
18 “‘Ngeenge omulumenhu okwa nangala nomukainhu e li komafimbo, ye nosho yo omukainhu oo inava fimaneka etiko lohonde. Aveshe ove na okudimwa* mo moshiwana shavo.
19 “‘Ino nangala nomumwainakadona wanyoko, ile nomumwainakadona waxo, molwaashi osho otashi fifa ohoni ovapambele voye vopopepi. Ovo tave shi ningi ove na okuhandukilwa omolwenyono lavo. 20 Ngeenge omulumenhu okwa nangala nomukulukadi waxekulu, okwa fifa xekulu ohoni.* Ove na okuhandukilwa omolwenyono lavo. Ove na okufya vehe na ounona. 21 Ngeenge omulumenhu okwa nangala nomukulukadi womumwainamati, oshi li oshinima shitondifa. Okwa fifa omumwainamati ohoni.* Itava ka dala ounona.
22 “‘Omu na okudiinina eenghedimhango dange adishe, nomatokolo ange aeshe nokudulika kuo, opo medu omo handi mu twala mu kale mo lihe mu kunge mo. 23 Inamu enda meenghedimhango doiwana oyo nda taataa mo moipafi yeni, molwaashi oya ninga oinima aishe oyo, nonde i tonda. 24 Nomolwaasho nde mu lombwela, nda ti: “Otamu ka kala medu lavo, nohandi ke li mu pa li li emona leni, edu tali kunguluka omashini nomaadi eenyiki. Aame Jehova, Kalunga keni, oo e mu yoolola mo moiwana.” 25 Omu na okutongola pokati koshinamwenyo osho sha koshoka naasho inashi koshoka, nopokati kokadila oko inaka koshoka naako ka koshoka; kamu na* okulinyateka noshinamwenyo, ile okadila, ile keshe osho tashi linyenge kombada yedu, osho nde mu liyoololela ko inashi koshoka. 26 Omu na okukala ovayapuki kwaame, molwaashi ame, Jehova, omuyapuki, nohandi mu kufa mo movanhu mu ninge vange.
27 “‘Omulumenhu keshe, ile omukainhu oo e li omhule,* ile ha popi neemhepo, oku na okudipawa filufilu. Ovanhu ove na oku va dipaa nomamanya. Ohonde yavo oi li kombada yavo.’”