Omayeletumbulo
4 Ovamwange, tambulei ko outekuduliko wooxo;
Yandjeni elitulemo, opo mu kale mu na eudeko,
2 Osheshi omalombwelo oo handi mu pe omawa;
Inamu ekelashi ehongo* lange.
3 Onda li handi dulika kutate,
Nameme okwa li e hole nge neenghono.
4 Tate okwa honga nge ta ti: “Omutima woye nau diinine eendjovo dange.
Dulika koipango yange, opo u kale nomwenyo.
5 Likongela ounongo nokumona eudeko.
Ino dimbwa noino efa po osho nde ku lombwela.
6 Ino efa po ounongo, molwaashi otau ke ku amena.
Kala u u hole, molwaashi otau ke ku xupifa.
7 Ounongo oo oshinima sha fimanenena, onghee likongela ounongo,
Moinima aishe oyo to likongele, kendabala okukala u na eudeko.
8 Kala wa lenga neenghono ounongo, notau ke ku tumbalekifa.
Otau ke ku fimanekifa, molwaashi owe u diinina.
9 Otau ke ku djaleka oshikoroni shiwa komutwe woye;
Otau ke ku feweka noshikoroni shewapalo.”
10 Omumwange, pwilikina nokutambula ko eendjovo dange,
Opo nee omido dokukalamwenyo kwoye otadi ka kala dihapu.
11 Ohandi ku ulikile ondjila younongo;
Ohandi ku yukifa momalila ovayuki.
12 Ngeenge to ende, kape na osho tashi ke ku inda po;
Nongeenge to tondoka, ito ka punduka.
13 Diinina outekuduliko; ino u xutwifa.
U kanyatela, osheshi otau ti omwenyo kwoove.
14 Ino lyata melila lovakolokoshi,
Noino enda mondjila yaavo hava longo owii.
15 I henuka; inoi lambalala;
Aluka ko kuyo; ino enda mo muyo.
16 Osheshi ihava dulu okukofa, ofimbo inava longa owii.
Ohava londokwa keemhofi, ngeenge inava longela umwe omunyonena.
17 Okulonga oukolokoshi oku li ngaashi omungome kuvo,
Nelongifo leenghono kuvo ongaashi tava nu omaviinyu.
18 Ndele elila lovayuki ola fa ouyelele weluwa tali tende,
Oo ohau ende tau yela fiyo osheshi kwa sha.
19 Ondjila yovakolokoshi oi li ngaashi omilaulu;
Kave shii osho hashi va pundukifa.
20 Omumwange, yandja elitulemo keendjovo dange;
Pwilikina nelitulemo* kwaasho handi popi.
21 Ino di dimbwa;
Di kaleka moule womutima woye,
22 Osheshi odo omwenyo kwaavo tave di mono,
Noukolele kolutu lavo alishe.*
23 Komesho yoinima aishe oyo u na okwaamena, amena omutima woye,
Osheshi muo omo mu na odjo yomwenyo.
24 Henuka eendjovo doukengeleledi,
Nokulikaleka kokule nomapopyo taa pukifa.
25 Omesho oye naa tale a yukilila;
Yandja elitulemo filufilu kwaasho to tale.
26 Lalakanifa* omalila eemhadi doye,
Neendjila doye adishe otadi ka kala diwa.
27 Ino kandukila kolulyo, ile kolumosho.
Alula ko eemhadi doye kokulonga owii.