Esra
10 Ofimbo Esra a li ta ilikana nokuhokolola omatimba oshiwana shavo, ta kwena nokwa nangala eombe popepi notembeli yaKalunga kashili, ongudu inene yovalumenhu, ovakainhu nounona Ovaisrael, oya ongala ye mu dingilila, molwaashi ovanhu ova li tava kwena neenghono. 2 Opo nee Sekania, omonamati waJehiel, womovanamati vaElami, okwa lombwela Esra, a ti: “Inatu kala ovadiinini kuKalunga ketu, eshi twa hombola* ovakainhu ovanailongo va dja movanhu vomedu olo. Ndele nande ongaho, Ovaisrael ove na natango eteelelo. 3 Paife natu ningeni ehangano naKalunga ketu, tu lekele ovakulukadi aveshe nounona ovo twe va dalifa, metwokumwe newiliko laJehova nolaavo va fimaneka* oshipango shaKalunga ketu. Natu katukeni metwokumwe nOmhango. 4 Fikama, molwaashi oshinima eshi oshi li oshinakuwanifwa shoye, nafye otu li pamwe naave. Kala wa pama nokukatuka eenghatu.”
5 Opo nee Esra okwa fikama, ndele ta anifa ovapristeri ovo tava kwatele komesho, Ovalevi nOvaisrael aveshe va ninge osho sha popiwa. Onghee ova li va ninga eano. 6 Esra okwa dja po popepi notembeli yaKalunga kashili, ndele ta i monduda* yaJohanan, omonamati waEliashib. Nonande okwa ya mo, ina lya sha noina nwa omeva, osheshi okwa li a nyika oluhodi, molwaashi ovanhu, ovo va li moukwatwa, kava li ovadiinini.
7 Onghee ova ninga eshiivifo muJuda nomuJerusalem ashishe, kutya aveshe ovo va li moukwatwa nava ongale pamwe muJerusalem; 8 she likolelela ketokolo lomalenga nolovakulunhu, keshe umwe oo ta ka kala ine uya moule womafiku atatu, oinima yaye aishe ote ke i kufwa* nota ka tewa mo mongudu yovanhu, ovo va li moukwatwa. 9 Onghee ovalumenhu aveshe vomuJuda novomuBenjamin ova ongala pamwe muJerusalem meni loule womafiku atatu, sha hala okutya, momafiku 20 omwedi omutimuwoi. Ovanhu aveshe ova li omutumba moshihale shotembeli yaKalunga kashili, tava kakama omolwoshinima osho nomolwodula inene oyo ya li tai loko.
10 Opo nee omupristeri Esra okwa fikama, ndele ta ti kuvo: “Nye inamu kala ovadiinini kuKalunga ketu, eshi mwa hombola ovakainhu ovanailongo, onghee omwa weda ko kenyono laIsrael. 11 Paife lihokololeni kuJehova, Kalunga kooxokulululwa, nokulonga ehalo laye. Liyoololeni mo movanhu vomedu eli nokweefa po ovakulukadi ovo ovanailongo.” 12 Ovanhu aveshe, ovo va li va ongala, ova nyamukula newi lopombada va ti: “Oshi li oshinakuwanifwa shetu okuninga naanaa ngaashi wa popya. 13 Ndele ope na ovanhu vahapu nodula otai loko. Itatu dulu okufikama pondje, noshinima eshi itashi ka kwata ashike efiku limwe, ile avali, molwaashi otwa nyona sha kwata moiti moshinima eshi. 14 Onghee alikana, pitika omalenga a kalele po eongalo alishe, pitika aveshe ovo ve li moilando yetu, ovo va hombola ovakainhu ovanailongo, ve uye peufwafimbo pamwe novakulunhu nosho yo ovatokoli voshilando keshe, fiyo osheshi twa loteka ehandu laKalunga ketu moshinima eshi.”
15 Ndelenee Jonatan, omonamati waAsahel, naJakseja, omonamati waTikva, ova li omhinge nasho, nOvalevi, Mesullam naSabbetai, ove va yambidida. 16 Ashike ovo va li nale moukwatwa ova ninga osho sha li sha diminwa; omupristeri Esra nomitwe domaukwaneumbo omapata avo, adishe da tumbulwa komadina, ova ongala va tukauka mefiku lotete lomwedi omutimulongo, va konakone oshinima osho; 17 mefiku lotete lomwedi wotete, ova li va manifa okuungaunga noupyakadi wovalumenhu aveshe ovo va li va hombola ovakainhu ovanailongo. 18 Okwa li kwa monika kutya vamwe vomovanamati vovapristeri ova hombola ovakainhu ovanailongo: movanamati vaJesua, omonamati waJosadak, novamwainamati vaye oMaasea, Elieser, Jarib naGedalia. 19 Ashike ova li va udaneka* okulekela ovakulukadi vavo, ndele molwaashi ova li ve na etimba, keshe umwe okwa li e na okuyandja odi yondume omolwetimba laye.
20 Movanamati vaImmer, oHanani naSebadia; 21 movanamati vaHarim, oMaasea, Elia, Shemaia, Jehiel naUssia; 22 movanamati vaPashur, oElioenai, Maasea, Ismael, Netanel, Josabad naEleasa. 23 MOvalevi, oJosabad, Simei, Kelaja, (sha hala kutya, Kelita), Petahja, Juda naElieser; 24 movaimbi, oEliashib; movapashukili vopoivelo, oSallum, Telem naUri.
25 MOvaisrael, movanamati vaParos, oRamia, Issia, Malkia, Miyamin, Eliaser, Malkia naBenaia; 26 movanamati vaElami, oMattania, Sakaria, Jehiel, Abdi, Jeremot naElia; 27 movanamati vaSattu, oElioenai, Eliashib, Mattania, Jeremot, Sabad naAsisa; 28 movanamati vaBebai, oJohanan, Hanania, Sabbai naAtlai; 29 movanamati vaBani, oMesullam, Malluk, Adaja, Jasub, Seal naJeremot; 30 movanamati vaPahat-moab, oAdna, Kelal, Benaia, Maasea, Mattania, Besaleel, Binnui naManasse; 31 movanamati vaHarim, oElieser, Issia, Malkia, Shemaia, Simeon, 32 Benjamin, Malluk naShemaria; 33 movanamati vaHasum, oMattenai, Mattatta, Sabad, Elifelet, Jeremai, Manasse naSimei; 34 movanamati vaBani, oMaadai, Amram, Uel, 35 Benaia, Bedeia, Keluhu, 36 Vania, Meremot, Eliashib, 37 Mattania, Mattenai, naJaasu; 38 movanamati vaBinnui, oSimei, 39 Selemia, Natan, Adaja, 40 Maknadbai, Sasai, Sarai, 41 Asareel, Selemia, Shemaria, 42 Sallum, Amaria naJosef; 43 movanamati vaNebo, oJeiel, Matitia, Sabad, Sebina, Jaddai, Joel naBenaia. 44 Aveshe ovo ova li va hombola ovakulukadi ovanailongo, nova li va lekela ovakulukadi vavo pamwe novana vavo.