Hesekiel
13 Nondjovo yaJehova oye uya vali kwaame tai ti: 2 “Omona womunhu, xunganeka shi na sha novaprofeti vaIsrael, ndele to lombwele ovo va eta po omaxunganeko avo vene,* to ti, ‘Udeni ondjovo yaJehova. 3 Eshi osho Omwene Omunamapangelo aeshe, Jehova, ta ti: “Woo, ovaprofeti omalai, ovo hava shikula omhepo yavo vene, ofimbo inava mona nande osha! 4 Ove Israel, ovaprofeti voye ova ninga ngaashi ookavandje ve li mokati koikulukuma. 5 Itamu ka ya keenhele da ngumaunwa po momakuma omamanya, opo mu di tungulule omolweumbo laIsrael, opo Israel aha shune monima molwoodi mefiku laJehova.” 6 “Ova mona omamoniko oipupulu nova xunganeka oipupulu, ovo tava ti, ‘Ondjovo yaJehova oyo,’ ofimbo Jehova ye mwene ine va tuma, nova kala va teelela ondjovo yavo i wanifwe po. 7 Mbela kali fi emoniko loipupulu olo mwa mona, noipupulu oyo mwa xunganeka, eshi mwa ti, ‘Ondjovo yaJehova oyo,’ ofimbo inandi popya sha?”’
8 “‘Onghee eshi osho Omwene Omunamapangelo aeshe, Jehova, ta ti: “‘Molwaashi omwa popya osho shihe fi shoshili, nomaxunganeko eni ooipupulu, ondi li omhinge nanye,’ Omwene Omunamapangelo aeshe, Jehova, osho ta ti.” 9 Eke lange otali ka lwifa ovaprofeti, ovo hava mono omamoniko oipupulu, nohava xunganeke oipupulu. Itava ka kala mokati kovanhu, ovo nde lineekela, noitava ka shangwa membo leumbo laIsrael; ile va shune kedu laIsrael; notamu ka shiiva kutya aame Omwene Omunamapangelo aeshe, Jehova. 10 Oinima aishe oyo oya ningwa, molwaashi ova twalaatwalifa ovanhu vange, eshi va ti, “Ope na ombili!” ofimbo pehe na ombili. Ngeenge ekuma, olo la tukula ko eenduda, ola tungwa, ohave li kolonga nomunoko mutoka.’*
11 “Lombwela ovo tava kolongifa omunoko mutoka kutya otau ka wa ko. Odula inene otai ke uya, eemhawe* otadi ka wila poshi, noikungulu inene otai ke li teyaula po. 12 Nongeenge ekuma ola u po, otamu ka pulwa kutya, ‘Omunoko, oo mwa kolongifa, ou li peni?’
13 “Onghee eshi osho Omwene Omunamapangelo aeshe, Jehova, ta ti: ‘Omolwehandu lange, ohandi ka eta oikungulu inene yomhepo, nomolwehandu lange ohandi ka lokifa odula inene nosho yo eemhawe tadi hanauna omolwonya yange. 14 Ohandi ka teyaula po ekuma olo mwa kolonga nomunoko mutoka, notali ka wila pedu, nekanghameno lalo otali ka monika. Ngeenge oshilando osha teka po, nanye otamu ka teka po pamwe nasho; notamu ka shiiva kutya aame Jehova.’
15 “‘Ngeenge onda fululukile nehandu lange mekuma nosho yo ovo ve li kolonga nomunoko mutoka, ohandi ka tya kunye: “Ekuma kali po vali, naavo tave li kolonga kave po vali. 16 Ovaprofeti vaIsrael kave po vali, ovo hava xunganeke shi na sha naJerusalem, naavo hava mono omamoniko e na sha nombili yaye, ofimbo pehe na ombili,”’ Omwene Omunamapangelo aeshe, Jehova, osho ta ti.
17 “Ashike ove, omona womunhu, taalelifa oshipala shoye kovanakadona vovanhu voye, ovo va eta po omaxunganeko avo vene, nokuxunganeka u li omhinge navo. 18 Va lombwela kutya, ‘Eshi osho Omwene Omunamapangelo aeshe, Jehova, ta ti: “Woo, ovakainhu ovo hava hondjele kumwe oukenya komaoko aeshe* nokuninga omaluviluvi okomutwe ounene wa yoolokafana, opo mu dule okuyula eemwenyo dovanhu! Mbela otamu yulu eemwenyo dovanhu vange nokukendabala okuxupifa eemwenyo deni? 19 Osheshi omwa nyateka nge mokati kovanhu vange omolwomake e yadi oilya yo-barley nosho yo oundjaumukile vomungome. Mokulombwela ovanhu vange oipupulu, ovo tava pwilikine koipupulu yeni, omwa dipaa ovo* vehe na okufya, nokukaleka nomwenyo ovo* vehe na okukala nomwenyo.”’
20 “Onghee eshi osho Omwene Omunamapangelo aeshe, Jehova, ta ti: ‘Nye ovakainhu, apa ondi li omhinge noukenya veni, ovo hamu longifa okuyula ovanhu* va fa oudila, nohandi ke va tokaula ko komaoko eni, nokumangulula ovo tamu yulu ngaashi oudila. 21 Ohandi ka pombaula omaluviluvi eni, nokuxupifa ovanhu vange momake eni, noitava ka kala ve li oshinima osho tamu yulu molukongo leni; nomu na oku ka shiiva kutya aame Jehova. 22 Osheshi omwa nyikifa oluhodi omuyuki noipupulu yeni, eshi nda li itandi mu nyikifa oluhodi,* nomwa pameka omake omukolokoshi, opo aha aluke ko kondjila yaye yowii nokukala nomwenyo. 23 Onghee nye ovakainhu, itamu ka mona vali omamoniko nokukufa ombinga moumhulile; nohandi ka xupifa ovanhu vange momake eni, notamu ka shiiva kutya aame Jehova.’”