Hesekiel
25 Ondjovo yaJehova oye uya vali kwaame tai ti: 2 “Omona womunhu, taalelifa oshipala shoye kOvaammoni, nokuxunganeka u li omhinge navo. 3 Ou na okupopya shi na sha nOvaammoni kutya, ‘Udeni ondjovo yOmwene Omunamapangelo aeshe, Jehova. Eshi osho Omwene Omunamapangelo aeshe, Jehova, ta ti: “Molwaashi owa ti ‘Aha!’ u li omhinge nonhele yange iyapuki, eshi ya li ya nyatekwa, nou li omhinge nedu laIsrael, eshi la li la mbuwapalekwa, nou li omhinge neumbo laJuda, eshi la li la ya moukwatwa, 4 onghee hano, ohandi ke ku yandja kovanhu vokoushilo u ninge ovanhu vavo. Otava ka onga eenhanda* davo mwoove, nokudika omatwali avo mokati koye. Otava ka lya oiimati yoye, notava ka nwa omashini oye. 5 Ohandi ka ninga Rabba oshitukulwa shoulifilo weengamelo, nedu lOvaammoni onhele yokwoombela eedi; nou na oku ka shiiva kutya aame Jehova.”’”
6 “Osheshi eshi osho Omwene Omunamapangelo aeshe, Jehova, ta ti: ‘Molwaashi owa pandula omake oye, nowa denga eemhadi doye pedu, nowa* hafela edu laIsrael nodino inene, 7 onghee hano, ohandi ke ku yelulila eke lange, ndi ku yandje koiwana u li oshinima osho tava dulu okukwata ko. Ohandi ke ku kufa mo movanhu, noku ku hanauna po moilongo. Ohandi ke ku komba po, nou na oku ka shiiva kutya aame Jehova.’
8 “Eshi osho Omwene Omunamapangelo aeshe, Jehova, ta ti: ‘Molwaashi Moab naSeir ova ti, “Tala! Eumbo laJuda ola fa oiwana ikwao aishe,” 9 ohandi nyaneke pomutenya ominghulo* daMoab, odo di li komesho elela yoilando yaye, ewapalo* ledu laye, Bet-Jesimot, Baal-meon, nofiyo okuKiriataim. 10 Ohandi ke li yandja pamwe nOvaammoni, i ninge yovanhu vokOushilo, opo Ovaammoni vaha dimbulukiwe vali mokati koiwana. 11 Nohandi ka tokola muMoab, nove na oku ka shiiva kutya aame Jehova.’
12 “Eshi osho Omwene Omunamapangelo aeshe, Jehova, ta ti: ‘Edom okwa kwatela eumbo laJuda onghone, nokwe lietela etimba linene, eshi e li handukila; 13 onghee hano, eshi osho Omwene Omunamapangelo aeshe, Jehova, ta ti: “Ohandi ka yelulila yo Edom eke lange, nokukufa mo musho ovanhu noinamwenyo, nohandi ke shi ninga ombuwa. Otava ka fya keongamukonda okudja kuTeman fiyo okuDedan. 14 ‘Ohandi ka handukila Edom neke lovanhu vange, Israel. Otava ka hololela Edom ehandu lange nosho yo onya yange, opo va mone ehandu lange mwene,’ Omwene Omunamapangelo aeshe, Jehova, osho ta ti.”’
15 “Eshi osho Omwene Omunamapangelo aeshe, Jehova, ta ti: ‘Omolwoutondwe wavo tau twikile, Ovafilisti ova diladila okuulika ehandu nokweeta ehanauno omolwoutondwe.* 16 Onghee hano, eshi osho Omwene Omunamapangelo aeshe, Jehova, ta ti: “Aame ou handi ka yelulila Ovafilisti eke lange, ndele handi va kufa mo mOvakereti, nohandi ka hanauna po ovakalimo ovo tava ka xupa komunghulofuta. 17 Ohandi ke va tumina ehandu linene nomahandukilo a kwata moiti, nove na oku ka shiiva kutya aame Jehova, eshi handi ke va hololela ehandu lange.”’”