NUMERI

1 Mefiku lotete lomwedi omutivali, momudo omutivali, eshi Ovaisrael va dja muEgipiti, Jehova okwa popya naMoses, mombuwa yaSinai, metwali lokwoongalela, a ti: 2 “Valula ongudu aishe yOvaisrael* pauhandimwe* pamaludi avo, pamaukwaneumbo omapata avo, she likolelela komuvalu womadina ovalumenhu aveshe. 3 Nye naAron omu na oku va shanga paengudu davo,* aveshe ovo ve na eedula okudja 20 okuyuka pombada, ovo tava dulu okulonga metangakwaita muIsrael.

4 “Kufa omulumenhu mepata keshe; keshe umwe oku na okuninga omutwe wepata lavo. 5 Omadina ovalumenhu ovo tave ke ku yambidida oo aa: mepata laRuben otamu di Elisur, omonamati waSedeur; 6 mepata laSimeon otamu di Selumiel, omonamati waSurisaddai; 7 mepata laJuda otamu di Nashon, omonamati waAminadab; 8 mepata laIsaskar otamu di Netanel, omonamati waSuar; 9 mepata laSebulon otamu di Eliab, omonamati waHelon; 10 movanamati vaJosef: mepata laEfraim otamu di Elisama, omonamati waAmmihud; mepata laManasse otamu di Gamaliel, omonamati waPedasur; 11 mepata laBenjamin otamu di Abidan, omonamati waGideoni; 12 mepata laDan otamu di Ahieser, omonamati waAmmisaddai; 13 mepata laAsser otamu di Pagiel, omonamati waOkran; 14 mepata laGad otamu di Eliasaf, omonamati waDeuel; 15 mepata laNaftali otamu di Ahira, omonamati waEnan. 16 Ovo ovo va hoololwa mo mongudu oyo. Ove li omalenga omapata ooxe, omitwe dOvaisrael omayovi.”

17 Onghee Moses naAron ova kufa ovalumenhu ovo va tumbulwa komadina. 18 Ova ongela ongudu aishe mefiku lotete lomwedi omutivali, opo ve va shange pauhandimwe komadina, pamaludi nopamaukwaneumbo omapata avo, okudja peedula 20 okuyuka pombada, 19 ngaashi ashike Jehova a li a lombwela Moses. Onghee okwe va shangela mombuwa yaSinai.

20 Ovanamati vaRuben, oludalo loshiveli shaIsrael, ova li va shangwa pamadina, pamaludi nopamaukwaneumbo omapata avo. Ovalumenhu aveshe, ovo ve na eedula okudja 20 okuyuka pombada, ovo tava dulu okulonga metangakwaita, ova li va valulwa pauhandimwe, 21 nomuvalu waavo ve lishangifa vomepata laRuben owa li 46 500.

22 Oludalo laSimeon ola li la shangwa pamadina, pamaludi nopamaukwaneumbo omapata avo. Ovalumenhu aveshe, ovo ve na eedula okudja 20 okuyuka pombada, ovo tava dulu okulonga metangakwaita ova li va valulwa pauhandimwe, 23 nomuvalu waavo ve lishangifa vomepata laSimeon owa li 59 300.

24 Oludalo laGad ola li la shangwa pamadina, pamaludi nopamaukwaneumbo omapata avo. Ovalumenhu aveshe, ovo ve na eedula okudja 20 okuyuka pombada, ovo tava dulu okulonga metangakwaita ova li va valulwa, 25 nomuvalu waavo ve lishangifa vomepata laGad owa li 45 650.

26 Oludalo laJuda ola li la shangwa pamadina, pamaludi nopamaukwaneumbo omapata avo. Ovalumenhu aveshe, ovo ve na eedula okudja 20 okuyuka pombada, ovo tava dulu okulonga metangakwaita ova li va valulwa, 27 nomuvalu waavo ve lishangifa vomepata laJuda owa li 74 600.

28 Oludalo laIsaskar ola li la shangwa pamadina, pamaludi nopamaukwaneumbo omapata avo. Ovalumenhu aveshe, ovo ve na eedula okudja 20 okuyuka pombada, ovo tava dulu okulonga metangakwaita ova li va valulwa, 29 nomuvalu waavo ve lishangifa vomepata laIsaskar owa li 54 400.

30 Oludalo laSebulon ola li la shangwa pamadina, pamaludi nopamaukwaneumbo omapata avo. Ovalumenhu aveshe, ovo ve na eedula okudja 20 okuyuka pombada, ovo tava dulu okulonga metangakwaita ova li va valulwa, 31 nomuvalu waavo ve lishangifa vomepata laSebulon owa li 57 400.

32 Oludalo laJosef, olo la dja muEfraim, ola li la shangwa pamadina, pamaludi nopamaukwaneumbo omapata avo. Ovalumenhu aveshe, ovo ve na eedula okudja 20 okuyuka pombada, ovo tava dulu okulonga metangakwaita ova li va valulwa, 33 nomuvalu waavo ve lishangifa vomepata laEfraim owa li 40 500.

34 Oludalo laManasse ola li la shangwa pamadina, pamaludi nopamaukwaneumbo omapata avo. Ovalumenhu aveshe, ovo ve na eedula okudja 20 okuyuka pombada, ovo tava dulu okulonga metangakwaita ova li va valulwa, 35 nomuvalu waavo ve lishangifa vomepata laManasse owa li 32 200.

36 Oludalo laBenjamin ola li la shangwa pamadina, pamaludi nopamaukwaneumbo omapata avo. Ovalumenhu aveshe, ovo ve na eedula okudja 20 okuyuka pombada, ovo tava dulu okulonga metangakwaita ova li va valulwa, 37 nomuvalu waavo ve lishangifa vomepata laBenjamin owa li 35 400.

38 Oludalo laDan ola li la shangwa pamadina, pamaludi nopamaukwaneumbo omapata avo. Ovalumenhu aveshe, ovo ve na eedula okudja 20 okuyuka pombada, ovo tava dulu okulonga metangakwaita ova li va valulwa, 39 nomuvalu waavo ve lishangifa vomepata laDan owa li 62 700.

40 Oludalo laAsser ola li la shangwa pamadina, pamaludi nopamaukwaneumbo omapata avo. Ovalumenhu aveshe, ovo ve na eedula okudja 20 okuyuka pombada, ovo tava dulu okulonga metangakwaita ova li va valulwa, 41 nomuvalu waavo ve lishangifa vomepata laAsser owa li 41 500.

42 Oludalo laNaftali ola li la shangwa pamadina, pamaludi nopamaukwaneumbo omapata avo. Ovalumenhu aveshe, ovo ve na eedula okudja 20 okuyuka pombada, ovo tava dulu okulonga metangakwaita ova li va valulwa, 43 nomuvalu waavo ve lishangifa vomepata laNaftali owa li 53 400.

44 Ovo ova li va shangwa kuMoses, kuAron nokomalenga 12 aIsrael, keshe limwe li lile po epata lavo. 45 Ovaisrael aveshe, ovo ve na eedula okudja 20 okuyuka pombada, ovo tava dulu okulonga metangakwaita muIsrael, ova li va shangwa she likolelela komaukwaneumbo omapata avo, 46 nomuvalu waaveshe ovo ve lishangifa owa li 603 550.

47 Ashike Ovalevi kava li va shangwa she likolelela komapata ooxe. 48 Onghee Jehova okwa lombwela Moses, a ti: 49 “Epata laLevi olo ashike uhe na okushanga, noku na okukwatela mo omuvalu walo momuvalu wOvaisrael vakwao. 50 Ou na okunangeka po Ovalevi va pashukile etwalihangano, omo mu na oshikefa shOipelende yOumbangi, noilongifo yalo aishe nosho yo oinima yamo aishe. Otava ka humbata etwalihangano noilongifo yalo aishe, notava ka yakula mulo, nokwoonga onhanda va dingilila etwalihangano olo. 51 Ngeenge etwalihangano tali tembulwa, Ovalevi ovo ve na oku li dikulula po, nongeenge ola fiki oko tali tembulilwa, Ovalevi ovo ve na oku li dika. Omunhu keshe oo ina pitikwa* ta ehene popepi nalo, oku na okudipawa.

52 “Omuisrael keshe oku na okudika etwali laye ponhele oyo a pewa monhanda, keshe umwe she likolelela komapata avo, oo a tukulwa ooatatu,* paengudu davo.* 53 Ovalevi ove na okwoonga onhanda va dingilila etwalihangano, omo mu na oshikefa shOipelende yOumbangi, opo ndiha handukile ongudu yOvaisrael; Ovalevi ove na oshinakuwanifwa shokufila oshisho* etwalihangano, omo mu na oshikefa shOipelende yOumbangi.”

54 Ovaisrael ova ninga ashishe osho Jehova a li a lombwela Moses. Osho naanaa va ninga.

2 Jehova okwa popya naMoses naAron, a ti: 2 “Ovaisrael ove na okwoonga onhanda ponhele opo pe na omapata avo, oo a tukulwa ooatatu, keshe omulumenhu e li popepi nedidiliko lepata lavo. Ove na okwoonga onhanda va taalela ketwali lokwoongalela, ve li dingilila alishe.

3 “Ovo tava ongo onhanda kombinga yokoushilo, oko haku piti etango, ovovo vomapata, oo a tukulwa ooatatu omonhanda yaJuda paengudu davo;* elenga lomovanamati vaJuda oNashon, omonamati waAminadab. 4 Ovo ve lishangifa metangakwaita laye ove li 74 600. 5 Ovo tava ka onga onhanda popepi naye ovomepata laIsaskar; elenga lomovanamati vaIsaskar oNetanel, omonamati waSuar. 6 Ovo ve lishangifa metangakwaita laye ove li 54 400. 7 Taku shikula epata laSebulon; elenga lomovanamati vaSebulon oEliab, omonamati waHelon. 8 Ovo ve lishangifa metangakwaita laye ove li 57 400.

9 “Aveshe ovo ve lishangifa metangakwaita lonhanda yaJuda ove li 186 400. Ovo ve na okudikulula po tete onhanda yavo.

10 “Omapata, oo a tukulwa ooatatu, omonhanda yaRuben otaa ka onga onhanda kombinga yokolukadi paengudu dao;* elenga lomovanamati vaRuben oElisur, omonamati waSedeur. 11 Ovo ve lishangifa metangakwaita laye ove li 46 500. 12 Ovo tava ka onga onhanda popepi naye ovomepata laSimeon; elenga lomovanamati vaSimeon oSelumiel, omonamati waSurisaddai. 13 Ovo ve lishangifa metangakwaita laye ove li 59 300. 14 Taku shikula epata laGad; elenga lomovanamati vaGad oEliasaf, omonamati waRehuel. 15 Ovo ve lishangifa metangakwaita laye ove li 45 650.

16 “Aveshe ovo ve lishangifa metangakwaita lonhanda yaRuben ove li 151 450. Ovo ovativali okudikulula po onhanda.

17 “Ngeenge etwali lokwoongalela tali tembulwa, onhanda yOvalevi oi na okukala pokati keenhanda dikwao.

“Ove na okweenda va landulafana ngaashi hava ongo onhanda, keshe umwe ponhele yaye, she likolelela komapata avo, oo a tukulwa ooatatu.

18 “Omapata, oo a tukulwa ooatatu, omonhanda yaEfraim otaa ka onga onhanda kombinga yokouninginino paengudu dao;* elenga lomovanamati vaEfraim oElisama, omonamati wAmmihud. 19 Ovo ve lishangifa metangakwaita laye ove li 40 500. 20 Opo nee taku shikula epata laManasse; elenga lomovanamati vaManasse oGamaliel, omonamati waPedasur. 21 Ovo ve lishangifa metangakwaita laye ove li 32 200. 22 Taku shikula epata laBenjamin; elenga lomovanamati vaBenjamin oAbidan, omonamati waGideoni. 23 Ovo ve lishangifa metangakwaita laye ove li 35 400.

24 “Aveshe ovo ve lishangifa metangakwaita lonhanda yaEfraim ove li 108 100. Ovo va li ovatitatu okudikulula po onhanda yavo.

25 “Omapata, oo a tukulwa ooatatu, omonhanda yaDan otaa ka onga onhanda kombinga yokolundume paengudu dao;* elenga lomovanamati vaDan oAhieser, omonamati waAmmisaddai. 26 Ovo ve lishangifa metangakwaita laye ove li 62 700. 27 Ovo tava ka onga onhanda popepi naye ovomepata laAsser; elenga lomovanamati vaAsser oPagiel, omonamati waOkran. 28 Ovo ve lishangifa metangakwaita laye ove li 41 500. 29 Taku shikula epata laNaftali; elenga lomovanamati vaNaftali oAhira, omonamati waEnan. 30 Ovo ve lishangifa metangakwaita laye ove li 53 400.

31 “Aveshe ovo ve lishangifa monhanda yaDan ove li 157 600. Ovo ve na okudikulula po onhanda xuuninwa, she likolelela komapata avo, oo a tukulwa ooatatu.”

32 Ovo Ovaisrael aveshe ovo ve lishangifa she likolelela komitwe domaukwaneumbo avo; omuvalu waavo va li meenhanda ve lishangifa metangakwaita owa li 603 550. 33 Ashike Ovalevi inave lishangifa pamwe nOvaisrael vakwao, ngaashi ashike Jehova a lombwela Moses. 34 Ovaisrael ova ninga ashishe osho Jehova a lombwela Moses. Osho va onga onhanda ngaho, she likolelela komapata avo, oo a tukulwa ooatatu, nanghee va dikulula eenhanda davo keshe umwe paukwaneumbo, she likolelela komitwe domaukwaneumbo avo.

3 Ou omusholondodo woludalo* laAron naMoses pefimbo opo Jehova a li a popya naMoses komhunda yaSinai. 2 Omadina ovanamati vaAron oo aa: oshiveli oNadab, Abihu, Eliaser naItamar. 3 Oo omadina ovapristeri, ovanamati vaAron, ovo va vaekwa nova nangekwa po* va longe ve li ovapristeri. 4 Nadab naAbihu ova fila koshipala shaJehova, eshi va yambela Jehova omundilo inau pitikwa mombuwa yaSinai, nokava li ve na ovanamati nandenande. Ndele Eliaser naItamar ova twikila okulonga ve li ovapristeri pamwe naxe Aron.

5 Jehova okwa lombwela Moses, a ti: 6 “Eta epata laLevi komesho, ndele to li fikameke koshipala shomupristeri Aron, notave ke mu kwafela. 7 Ove na okuwanifa po oinakuwanifwa yavo moku mu yakula nosho yo ongudu aishe yOvaisrael komesho yetwali lokwoongalela mokuwanifa po oilonga yavo i na sha netwalihangano. 8 Ove na okufila oshisho oilongifo aishe yometwali lokwoongalela, nokuwanifa po oinakuwanifwa yavo oyo tava longo ponhele yOvaisrael, mokufila oshisho oilonga i na sha netwalihangano. 9 Ou na okuyandja Ovalevi kuAron nokovanamati vaye. Ova yandjwa va ninge vaKalunga, ve mu pewa okudja mOvaisrael. 10 Ou na okunangeka po Aron novanamati vaye, nove na okuwanifa po oinakuwanifwa yavo youpristeri, nomunhu keshe oo ina pitikwa,* oo ta ehene popepi, oku na okudipawa.”

11 Jehova okwa twikila okupopya naMoses, ta ti: 12 “Tala, ame ohandi kufa Ovalevi mokati kOvaisrael ponhele yoiveli aishe* yOvaisrael, nOvalevi otava ningi vange. 13 Oshiveli keshe oshange. Mefiku olo nda dipaa oiveli aishe yomuEgipiti, onde liyapulila oiveli aishe yomuIsrael, okudja komunhu fiyo okoshinamwenyo. Yo otai ningi yange. Aame Jehova.”

14 Jehova okwa popya vali naMoses mombuwa yaSinai, a ti: 15 “Shanga ovanamati vaLevi pamaukwaneumbo omapata avo nopamaludi avo. Ou na okushanga omulumenhu keshe e na omwedi umwe okuyuka pombada.” 16 Onghee Moses okwe va shanga palombwelo laJehova, ngaashi naanaa e mu lombwela. 17 Omadina ovanamati vaLevi oo aa: Gerson, Kohat naMerari.

18 Omadina ovanamati vaGerson pamaludi avo oo aa: Libni naSimei.

19 Ovanamati vaKohat pamaludi avo ovo: Amram, Ishar, Hebron naUsiel.

20 Ovanamati vaMerari pamaludi avo ovo: Mahli naMushi.

Oo omaludi Ovalevi pamaukwaneumbo omapata avo.

21 MuGerson omwa dja epata lOvalibni nepata lOvasimei. Oo omapata Ovagerson. 22 Omuvalu wovalumenhu vavo aveshe, ovo ve na omwedi umwe okuyuka pombada, ovo va shangwa, owa li 7 500. 23 Omapata Ovagerson oku na okwoonga onhanda konima yetwalihangano, kombinga yokouninginino. 24 Elenga lomaukwaneumbo omapata Ovagerson oEliasaf, omonamati waLael. 25 Oinakuwanifwa yovanamati vaGerson metwali lokwoongalela oyo okufila oshisho etwalihangano, elapi, ofaila yalo yoku li uvika, oshiidilifoyata* shoposhivelo shetwali lokwoongalela, 26 omalapi oshihale, oo a endjelela, oshiidilifoyata* shoposhivelo shoshihale, osho sha dingilila etwalihangano, nosho yo oaltari, eengodi dalo noilonga aishe yamo.

27 MuKohat omwa dja epata lOvaamram, epata lOvaishar, epata lOvahebron, nepata lOvausiel. Oo omapata Ovakohat. 28 Omuvalu wovalumenhu aveshe, ovo ve na omwedi okuyuka pombada, owa li 8 600; oshinakuwanifwa shavo okufila oshisho onhele iyapuki. 29 Omapata ovanamati vaKohat oku na okwoonga onhanda kombinga yokolukadi letwalihangano. 30 Elenga lomapata Ovakohat oElisafan, omonamati waUsiel. 31 Oshinakuwanifwa shavo okupashukila Oshikefa, oshitaafula, oshikwatelwalamba, eealtari, oilongifo oyo hai longifwa okuyakula monhele iyapuki, oshiidilifoyata* nokupashukila oilonga aishe yamo.

32 Elenga ekulunhu lOvalevi oEliaser, omonamati womupristeri Aron, oo ta pashukile ovo tava wanifa po oinakuwanifwa yomonhele iyapuki.

33 MuMerari omwa dja epata lOvamahli nepata lOvamushi. Oo omapata Ovamerari. 34 Omuvalu wovalumenhu aveshe, ovo ve na omwedi okuyuka pombada, ovo va shangwa, owa li 6 200. 35 Elenga lomaukwaneumbo omapata aMerari oSuriel, omonamati waAbihail. Ova li va onga onhanda kolundume letwalihangano. 36 Ovanamati vaMerari ove na oshinakuwanifwa shokupashukila eelama detwalihangano, eenghambo dalo, eengudi dalo, oikwatelwamhadi yalo, oilongifo yalo aishe, noilonga aishe yamo 37 nosho yo eengudi adishe odo da dingilila oshihale ashishe noikwatelwamhadi yado, outenda vasho neengodi dasho.

38 Ovo tava ongo onhanda komesho yetwalihangano, kombinga yokoushilo, komesho yetwali lokwoongalela, oko haku piti etango, oMoses, Aron novanamati vaye. Ove na oshinakuwanifwa shokupashukila onhele iyapuki, shi li oshiteelelwa shavo ponhele yOvaisrael. Omunhu keshe oo ina pitikwa* ta ehene popepi, oku na okudipawa.

39 Ovalumenhu aveshe Ovalevi, ovo ve na omwedi umwe okuyuka pombada, ovo Moses naAron va shanga pamaludi avo palombwelo laJehova ova li 22 000.

40 Opo nee Jehova okwa lombwela Moses, ta ti: “Shanga ovalumenhu aveshe Ovaisrael, oiveli, ovo ve na omwedi okuyuka pombada, va valula, ndele to shange omusholondodo womadina avo. 41 Ou na okulikalekelela nge Ovalevi ponhele yoiveli aishe yOvaisrael, aame Jehova, nou na okukufa oinamwenyo yopovanhu yOvalevi ponhele yoinamwenyo yopovanhu aishe oyo ya dalwa tete yOvaisrael.” 42 Moses okwa shanga oiveli aishe oyo i li mokati kOvaisrael, ngaashi naanaa Jehova e mu lombwela. 43 Omuvalu wovalumenhu aveshe voiveli, ovo va shangwa komadina ve na omwedi okuyuka pombada, owa li 22 273.

44 Jehova okwa twikila okupopya naMoses, ta ti: 45 “Kufa Ovalevi ponhele yoiveli aishe oyo i li mokati kOvaisrael, ndele to kufa oinamwenyo yopovanhu yOvalevi ponhele yoinamwenyo yopovanhu yOvaisrael, nOvalevi ove na okuninga vange. Aame Jehova. 46 Shi na sha noiveli yOvaisrael 273, oyo inai dula okupingenwa po nOvalevi, ou na oku i futila oikulila, 47 to i yandjele eesekeli* nhano momunhu keshe, she likolelela kosekeli yomonhele iyapuki.* Osekeli imwe oi fike peegera* 20. 48 Oimaliwa yoikulila yaavo inava dula okupingenwa po ou na oku i yandja kuAron nokovanamati vaye.” 49 Onghee hano, Moses okwa ongela oimaliwa yoikulila yokukulila ovo inava dula okupingenwa po nOvalevi. 50 Okwa kufa oimaliwa koiveli yOvaisrael, eesekeli 1 365, she likolelela kosekeli* yomonhele iyapuki. 51 Opo nee Moses okwa yandja oimaliwa yoikulila kuAron nokovanamati vaye she likolelela kondjovo* yaJehova, ngaashi naanaa Jehova a li a lombwela Moses.

4 Jehova okwa popya naMoses naAron, ta ti: 2 “Valuleni ovanamati vaKohat, ovo ve li mokati kovanamati vaLevi, pamaludi avo, pamaukwaneumbo omapata avo, 3 aveshe ovo ve na eedula okudja po 30 fiyo 50, ovo ve li mongudu yaavo va pewa oshinakuwanifwa shokulonga metwali lokwoongalela.

4 “Ei oilonga oyo tai ka longwa kovanamati vaKohat metwali lokwoongalela. Oi li oshinima shiyapuki elela: 5 Aron novanamati vaye otave ke uya mo, ngeenge onhanda tai tembuka, notava ka kufa po etukulifolapi, ndele tave li uvikifa oshikefa shOipelende yOumbangi. 6 Otava ka yala ko oshipa shombwa yomomeva nosho yo elapi la kola limbulau, ndele tava tula eepala doku shi humbatifa ponhele.

7 “Otava ka yala yo elapi limbulau poshitaafula shomungome wokutalika, notava ka tula po oiyaxa, oukopi, ouyaxa nomakopi oshikunwayambo; ope na okukala omungome oo hau yambwa pandjikilile. 8 Koinima oko otava ka yala ko elapi litilyana, ndele tava uvike ko oshipa shombwa yomomeva nokutula ponhele eepala dokuhumbatifa oshitaafula. 9 Opo nee otava ka kufa elapi limbulau, ndele tava uvike oshikwatelwalamba shokuminikila, pamwe neelamba dasho, oidimifo* yasho, oikwatelwa yomundilo yasho, noikwatelwa yasho aishe yomahooli, oo haa kaleke oshikwatelwalamba sha tema. 10 Oshikwatelwalamba nosho yo oilongifo yasho aishe otave ke i dingila moshipa shombwa yomomeva, ndele tave shi tula komutengi woku shi humbatifa. 11 Otava ka yala elapi limbulau koaltari yoshingoli, ndele tave i uvike noshipa shombwa yomomeva, nokutula ponhele eepala doku shi humbatifa. 12 Opo nee otava ka kufa oilongifo aishe oyo hava longifa moilonga oyo hava longo alushe monhele iyapuki noku i tula melapi limbulau, ndele tave i uvike noshipa shombwa yomomeva noku i tula komutengi wokuhumbatifa.

13 “Otava ka kufa mo omute* moaltari, ndele tava yale ko elapi la longwa molududi leedi lipeepela. 14 Otava ka tula ko oilongifo yavo aishe, oyo hai longifwa, ngeenge ovanhu tava yakula koaltari: oikwatelwa yomundilo, omafoloko, oixupulo nouyaxa, oilongifo aishe yoaltari; otava ka yala ko oshipa shombwa yomomeva, ndele tava tula ponhele eepala doku i humbatifa.

15 “Ngeenge onhanda tai tembuka, Aron novanamati vaye ove na okumanifa oilonga yokuuvika onhele iyapuki nosho yo oilongifo aishe yomonhele iyapuki. Ngeenge ova mane, ovanamati vaKohat otave ke uya mo va humbate po oinima oyo, ashike kave na okukuma onhele iyapuki, ngeenge ove shi ningi, otava fi. Oinima oyo oi li oshinakuwanifwa* shovanamati vaKohat shi na sha netwali lokwoongalela.

16 “Eliaser, omonamati womupristeri Aron, oku na oshinakuwanifwa shokupashukila omahooli okutemifa, oitwimifo yedimba liwa, eendjayambo, odo hadi yambwa pandjikilile, nomaadi okuvaeka. Oku na okupashukila etwalihangano alishe noinima aishe oyo i li mo, mwa kwatelwa onhele iyapuki noilongifo yamo.”

17 Jehova okwa popya vali naMoses naAron, a ti: 18 “Inamu efa epata lOvakohat li dimwe mo mokati kOvalevi. 19 Omu na oku va ningila ngaha, opo va kale nomwenyo, novaha fye omolwokukuma oinima iyapuki elela. Aron novanamati vaye ove na okuya mo noku pa keshe umwe oshinakuwanifwa shaye, noku va ulikila osho ve na okuhumbata. 20 Kave na okuuya mo va mone oinima iyapuki, kutya nee okanini. Ngeenge ova ningi ngaho, otava fi.”

21 Opo nee Jehova okwa lombwela Moses, a ti: 22 “Ovanamati vaGerson nava valulwe pamaukwaneumbo omapata avo nopamaludi avo. 23 Ou na okushanga aveshe, ovo ve na eedula okudja po 30 fiyo 50, ovo ve li mongudu yaavo va pewa oshinakuwanifwa shokulonga metwali lokwoongalela. 24 Omapata Ovagerson okwa pewa oshinakuwanifwa shokufila oshisho nokuhumbata oinima ei: 25 Otava ka humbata omalapi etwalihangano, etwali lokwoongalela, elapi loku li uvika, nofaila ya longwa moipa yeembwa domomeva, oyo i li kombada yalo, oshiidilifoyata* shoposhivelo shetwali lokwoongalela, 26 omalapi, oo a endjelela momunghulo woshihale, oshiidilifoyata* shoposhivelo shoshihale, osho sha dingilila etwalihangano noaltari, eengodi dayo noilongifo yayo aishe nakeshe shimwe osho hashi longifwa moilonga yamo. Osho osho oshinakuwanifwa shavo. 27 Oilonga aishe noinakuwanifwa yOvagerson oi na okupashukilwa kuAron nokovanamati vaye; ou na oku va pa oilonga aishe oyo i li oshinakuwanifwa shavo. 28 Oyo oilonga oyo omapata Ovagerson e na okulonga metwali lokwoongalela, noinakuwanifwa yavo oi na okupashukilwa kuItamar, omonamati womupristeri Aron.

29 “Ovanamati vaMerari ou na oku va shanga pamapata nopamaukwaneumbo omapata avo. 30 Ou na okushanga ovo ve na eedula okudja po 30 fiyo 50, ovo ve li mongudu yaavo va pewa oshinakuwanifwa shokulonga metwali lokwoongalela. 31 Oinima oyo ve na okuhumbata i na sha noilonga yavo yoketwali lokwoongalela oyo ei: eelama detwalihangano, eenghambo dalo, eengudi dalo, oikwatelwamhadi yalo, 32 eengudi doshihale osho she li dingilila, oikwatelwamhadi yado, ouhakifo vado, neengodi dayo pamwe noilongifo yayo aishe, nokulonga oilonga aishe oyo ya kwatela mo oinima oyo. Ou na oku va lombwela kondadalunde osho keshe umwe ta ka humbata. 33 Omapata ovanamati vaMerari osho e na okulonga ngaho metwali lokwoongalela, koshi yewiliko laItamar, omonamati womupristeri Aron.”

34 Onghee Moses naAron nosho yo omalenga ongudu yovanhu ova shanga ovanamati vOvakohat pamaludi avo nopamaukwaneumbo omapata avo, 35 aveshe ovo ve na eedula okudja po 30 fiyo 50, ovo va li mongudu yaavo va pewa oshinakuwanifwa va longe metwali lokwoongalela. 36 Omuvalu waavo ve lishangifa pamaludi avo owa li 2 750. 37 Ovo va li ve lishangifa ova dja momapata Ovakohat; aveshe ovo va li tava longo metwali lokwoongalela. Moses naAron ove va shanga palombwelo laJehova okupitila muMoses.

38 Ovanamati vaGerson ova shangwa pamaludi avo, nopamitwe domaukwaneumbo avo, 39 aveshe ovo ve na eedula okudja po 30 fiyo 50, ovo va li mongudu yaavo va pewa oshinakuwanifwa va longe metwali lokwoongalela. 40 Omuvalu waavo ve lishangifa pamaludi avo nopamaukwaneumbo omapata avo owa li 2 630. 41 Oo okwa li omalishangifo omapata ovanamati vaGerson, aveshe ovo va li tava longo metwali lokwoongalela. Moses naAron ove va shanga palombwelo laJehova.

42 Ovanamati vaMerari ova shangwa pamaludi avo nopamaukwaneumbo omapata avo, 43 aveshe ovo ve na eedula okudja po 30 fiyo 50, ovo va li mongudu yaavo va pewa oshinakuwanifwa va longe metwali lokwoongalela. 44 Omuvalu waavo ve lishangifa pamaludi avo owa li 3 200. 45 Oo okwa li omalishangifo omapata ovanamati vaMerari, ovo Moses naAron va shanga palombwelo laJehova okupitila muMoses.

46 Moses, Aron nomalenga aIsrael ova shanga Ovalevi aveshe pamaludi avo nopamaukwaneumbo omapata avo; 47 ovo va li va shangwa ovovo ve na eedula okudja po 30 fiyo 50, aveshe ovo va li va pewa oshinakuwanifwa noilonga i na sha netwali lokwoongalela. 48 Omuvalu waavo ve lishangifa owa li 8 580. 49 Ova li va shangwa palombwelo laJehova okupitila muMoses, keshe umwe she likolelela koshilonga shaye nokoshinakuwanifwa shaye osho a pewa. Ova li va shangwa ngaashi naanaa Jehova a li a lombwela Moses.

5 Jehova okwa popya vali naMoses, ta ti: 2 “Lombwela Ovaisrael va pitife mo monhanda omunhu keshe oo e na oudu woshilundu nakeshe oo ta tika sha molutu nosho yo omunhu keshe oo a nyatekwa komunhu* a fya. 3 Omu na oku va pitifa mo, kutya nee omulumenhu, ile omukainhu. Omu na oku va pitifa mo monhanda, opo vaha nyateke eenhanda odo ndi li mokati kado.” 4 Onghee Ovaisrael osho va ninga, nove va pitifa mo monhanda. Ovaisrael ova ninga naanaa ngaashi Jehova a lombwela Moses.

5 Jehova okwa twikila okupopya naMoses, ta ti: 6 “Lombwela Ovaisrael kutya, ‘Ngeenge omulumenhu, ile omukainhu okwa nyono enyono keshe, nokwa kala ehe fi omudiinini kuJehova, omunhu* oo ota kala e na etimba. 7 Oku* na okuhepaulula enyono olo a* nyona, noku na okufuta ofuto ya yeleka filufilu osho a nyona, ndele ta weda ko oshititano shongushu yoinima oyo a nyona; oku na oku i yandja kwaao a nyona kuye. 8 Ngeenge oo a ninga oshihakanwa ke na omupambele wopopepi elela a tambule ko ofuto, oi na okushunifwa kuJehova notai ningi yomupristeri, kakele kofuto yodi oyo ta ka yandja, opo e lifutile.

9 “‘Omayambo aeshe mayapuki, oo Ovaisrael tava yandje komupristeri, oku na okuninga aye. 10 Oinima iyapuki yakeshe umwe otai kala yaye. Keshe osho umwe ta yandje komupristeri, otashi ningi shomupristeri.’”

11 Jehova okwa twikila okupopya naMoses, ta ti: 12 “Popya nOvaisrael u va lombwele kutya, ‘Eshi osho shi na okuningwa, ngeenge omukulukadi okwa kengelele omushamane waye mokukala ehe fi omudiinini kuye. 13 Ngeenge omulumenhu umwe okwa nangala naye, ashike omushamane waye ine shi shiiva, noinashi monika mo, nokwe linyateka ye mwene, ndele kape na ombangi i na sha nenyono olo noina kwatwa mo: 14 Kutya nee omushamane okwa kwatwa koukodi nokufekela kutya omukulukadi waye ke fi omudiinini, eshi e linyateka ye mwene, ile kutya nee okwa kwatwa koukodi nokufekela kutya omukulukadi waye ke fi omudiinini nonande ine linyateka ye mwene, 15 omushamane oku na okutwala omukulukadi komupristeri pamwe neyambo, olo ta ka yamba omolwomukulukadi waye, oshitimulongo shoefa* shoufila woilya yo-barley. Ke na okutila ko omaadi, ile a tule ko eka ledimba liwa, molwaashi oi li eendjayambo doukodi, eendjayambo odo tadi holola kutya omukulukadi oku na ondjo, ile hasho.

16 “‘Omupristeri ota ka eta omukulukadi oo noku mu kaleka ofika koshipala shaJehova. 17 Omupristeri ota ka kufa omeva mayapuki moshiyuma shedu, nota ka kufa ondwi imwe pedu metwalihangano, ndele te i tula momeva. 18 Omupristeri ota ka kaleka ofika omukulukadi oo koshipala shaJehova nokumangulula eexwiki daye, ndele ta tula pomake omukulukadi eendjayambo di li edimbulukifo, sha hala okutya, eendjayambo doukodi, nomupristeri ota ka kala e na momake aye omeva malula oo taa eta efingo.

19 “‘Omupristeri ota ka anifa omukulukadi, ta ti: “Ngeenge ino nangala nomulumenhu umwe ofimbo u li natango koshi yeenghonopangelo domushamane woye, nongeenge ino kengelela noino linyateka oto manguluka ko koilanduliko yomeva aa malula oo taa eta efingo. 20 Ashike ngeenge owa kengelela mokulinyateka ofimbo u li natango koshi yeenghonopangelo domushamane woye, nowa nangala nomulumenhu ehe fi omushamane woye . . .” 21 Opo nee omupristeri ota ka anifa omukulukadi eano olo la kwatela mo efingo, nota ka tya komukulukadi: “Jehova ne ku ninge omufingwa omolweano olo wa ana mokati koshiwana sheni, eshi Jehova ta ka ningifa etundji* loye li we ko* nokuningifa oshinena shoye shi dinde. 22 Omeva, oo taa eta efingo, otaa ka ya momandjadja oye nokuningifa oshinena shoye shi dinde nosho yo etundji* loye li we ko.”* Opo nee omukulukadi oku na okutya kwaasho: “Amen! Amen!”*

23 “‘Onghee omupristeri ota ka shanga omafingo oo membo, note ke a kosha mo nomeva malula. 24 Opo nee ota ka nwifa omukulukadi omeva malula, oo taa eta efingo, nomeva oo otaa ka ya muye, ndele taa eta oululu. 25 Omupristeri ota ka kufa eendjayambo doukodi meke lomukulukadi oo, nokudungadungifa eendjayambo koshipala shaJehova, ndele te di eta popepi noaltari. 26 Omupristeri ota ka kufa eshambekela leendjayambo li lile po eyambo alishe, note ke li xwikila koaltari, nolwanima, ota ka nwefa omukulukadi oo omeva. 27 Ngeenge okwe mu nwefa omeva oo, ndele okwe linyateka nokwa kala ehe fi omudiinini komushamane waye, omeva, oo taa eta efingo, otaa ka ya muye, ndele taa ningi oshinima shilula, noshinena shaye otashi ka dinda, netundji* laye otali ka wa ko,* nomukulukadi oo ota ka ninga omufingwa mokati koshiwana shavo. 28 Ashike ngeenge omukulukadi ine linyateka nokwa koshoka, ota ka manguluka ko kehandukilo olo, nota ka fimbapala nokudala ounona.

29 “‘Oyo omhango i na sha noukodi, ngeenge omukulukadi okwa kengelela nokwe linyateka ofimbo e li koshi yeenghonopangelo domushamane waye, 30 ile ngeenge omushamane okwa kwatwa koukodi, ndele ta fekele kutya omukulukadi waye ke fi omudiinini; ota ka kaleka ofika omukulukadi waye koshipala shaJehova, nomupristeri ota ka ungaunga naye she likolelela komhango oyo. 31 Omushamane ita kala e na etimba, ashike omukulukadi ota ka mona oilanduliko omolwenyono laye.’”

6 Jehova okwa twikila okulombwela Moses, ta ti: 2 “Popya nOvaisrael u va lombwele kutya, ‘Ngeenge omulumenhu, ile omukainhu okwa ningi eano le likalekelwa kuJehova lokukala Omunasiri,* 3 oku na okulikaleka kokule nomaviinyu nosho yo oikolwifa ikwao. Ke na okunwa omaviinyu malula, ile oshikolwifa keshe shilula. Ke na okulya oshinima keshe sha longwa momandjebele, ile okulya omandjebele, kutya nee omatalala, ile omakukutu. 4 Omafiku aeshe Ounasiri waye, ke na okulya oshinima keshe sha longwa moiimati yomundjebele, kutya nee omandjebele inaa pya, ile oipeta yao.

5 “‘Omafiku aeshe oo a anena okukala Omunasiri, momutwe waye kamu na okweenda okambi. Oku na okukala omuyapuki mokweefa eexwiki daye di kule fiyo omafiku aye okuliyapulila Jehova a pwa ko. 6 Moule womafiku aeshe oo omunhu e likalekelelwa Jehova, ke na okweehena popepi nomunhu* oo a fya. 7 Kutya nee oxe, ile oina, ile omumwainamati, ile omumwainakadona a fya, ke na okulinyateka ye mwene, molwaashi edidiliko lokukala Omunasiri kuKalunga kaye oli li komutwe waye.

8 “‘Ota kala omuyapuki kuJehova omafiku aeshe Ounasiri waye. 9 Ashike ngeenge umwe oo e li popepi naye okwa fi ombadilila, ndele ta nyateke eexwiki odo tadi ulike kutya okwe likalekelelwa Kalunga,* oku na okukulula omutwe waye mefiku olo ta kosholwa. Oku na oku u kulula mefiku etiheyali. 10 Mefiku etihetatu oku na okutwala eenghuti mbali domatende, ile eenghutyona mbali dopovanhu komupristeri poshivelo shetwali lokwoongalela. 11 Omupristeri ota ka longekida imwe i li etimbayambo, naikwao i li exwikiloyambo nokuyamba omayambo oo, opo a kosholwe komatimba aye shi na sha naashi a kwatafana noshimhu.* Oku na okuyapula omutwe waye mefiku olo. 12 Momafiku Ounasiri oku na vali okuliyoolola mo omolwaJehova nokweeta odi yondume yomudo umwe i li elivelombediyambo. Ashike omafiku enya onale itaa valulwa, molwaashi okwa nyateka Ounasiri waye.

13 “‘Omhango i na sha nOmunasiri oyo ei: Ngeenge a mane ko omafiku Ounasiri waye, oku na okweetwa koshivelo shetwali lokwoongalela. 14 Koshivelo oko oko e na okuyandjela eyambo laye kuJehova: odi yondume ya koshoka yomudo umwe i li exwikiloyambo, odjona yonghadi ya koshoka yomudo umwe i li etimbayambo, odi yondume ya koshoka i li eyambo loukumwe, 15 oshimbale shomingome di na ombululu pokati doufila wa pilulilwa omaadi inadi ya efulika, oukuki va pepuka va xuwa omaadi inava ya efulika, nota ka eta yo eendjayambo noikunwayambo. 16 Omupristeri ote ke i yandja koshipala shaJehova, nokuyandja etimbayambo laye nexwikiloyambo laye. 17 Omupristeri ota ka yamba odi yondume i li eyambo loukumwe kuJehova pamwe noshimbale shomingome inadi ya efulika note ke i yandja yo pamwe neendjayambo nosho yo oshikunwayambo.

18 “‘Omunasiri oku na okukulula ko eexwiki dokomutwe waye* odo inadi tetwa, te shi ningile poshivelo shetwali lokwoongalela. Opo nee oku na okukufa eexwiki, odo a xunga pefimbo lOunasiri waye, noku di tula pomundilo, oo u li koshi yeyambo loukumwe. 19 Omupristeri oku na okukufa oshooko shodi yondume sha pya momeva, omungome wongonga u na ombululu pokati, inau ya efulika, wa dja moshimbale, nomungome wa pepuka inau ya efulika, ndele te i tula peke lOmunasiri konima eshi a efa edidiliko lOunasiri waye li kululwe ko. 20 Omupristeri oku na oku i dungadungifa i li edungadungifwayambo koshipala shaJehova. Oi li oshinima shiyapuki komupristeri pamwe nombadja yedungadungifwayambo nosho yo oshilama shoshitukulwa shiyapuki. Konima yaasho, Omunasiri ota dulu okunwa omaviinyu.

21 “‘Omhango i na sha nOmunasiri, oo a ninga eano, oyo ei: Ngeenge okwa ningi eano nota dulu okuyandja eyambo kuJehova li dulife poiteelelwa yOunasiri waye, oku na okuwanifa po eano laye she likolelela komhango yOunasiri waye.’”

22 Opo nee Jehova okwa tya kuMoses: 23 “Lombwela Aron novanamati vaye kutya, ‘Ei oyo onghedi oyo mu na okunangeka noupuna ovanhu vomuIsrael. Tyeni kuvo:

24 “Jehova ne mu nangeke noupuna, ye ne mu amene.

25 Jehova ne mu minikile noshipala shaye, ye na kale e mu hokwa.

26 Jehova ne mu file onghenda noku mu pa ombili.”’

27 Opo nee otava ka lombwela ovanhu vomuIsrael edina lange, opo ndi dule oku va nangeka noupuna.”

7 Mefiku olo Moses a mana okudika po etwalihangano, okwe li vaeka, ndele te li yapula pamwe noitukulwa yalo aishe, oaltari nosho yo oilongifo yalo aishe. Konima eshi a vaeka oinima oyo noku i yapula, 2 omalenga omuIsrael, oo e li omitwe domaukwaneumbo omapata avo, okwa ninga eyambo. Omalenga omapata oo a li taa kwatele komesho omalishangifo 3 okwa li a etela Jehova omayambo ao, omatemba ahamano a uvikwa, neenhani 12, omalenga avali okwa eta etemba limwe, nelenga keshe ongobe imwe yomhedi,* noku a eta komesho yetwalihangano. 4 Jehova okwa lombwela Moses, a ti: 5 “Tambula ko oinima oyo va eta, molwaashi otai ka longifwa moilonga yometwali lokwoongalela, ndele to i yandje kOvalevi, she likolelela koshinakuwanifwa shakeshe umwe.”

6 Onghee Moses okwa tambula ko omatemba neengobe, ndele te di pe Ovalevi. 7 Okwa yandja omatemba avali neenhani nhee kovanamati vaGerson, she likolelela koshinakuwanifwa shakeshe umwe. 8 Okwa yandja yo omatemba ane neenhani hetatu kovanamati vaMerari, she likolelela koshinakuwanifwa sha keshe umwe, koshi yewiliko laItamar, omonamati womupristeri Aron. 9 Ashike ka li a yandja sha kovanamati vaKohat, molwaashi oinakuwanifwa yavo oya kwatela mo oilonga yomonhele iyapuki, nohava humbata oinima iyapuki komapepe avo.

10 Omalenga okwa yandja vali omayambo ao peyapulo loaltari mefiku olo ya vaekwa. Eshi omalenga a yandja omayambo ao komesho yoaltari, 11 Jehova okwa lombwela Moses, a ti: “Efiku keshe, omafiku a shikulafana, elenga limwe otali ka yandja eyambo lalo omolweyapulo loaltari.”

12 Elenga olo la yandja eyambo lalo mefiku lotete ola li Nashon, omonamati waAminadab, womepata laJuda. 13 Eyambo laye ola li oshiyaxa shimwe shoshisilveri shondjudo yeesekeli* 130 nokayaxa kamwe koshisilveri kondjudo yeesekeli 70, she likolelela kosekeli yomonhele iyapuki,* aishe i yadi oufila wa nakwa nawa wa pilulilwa omaadi, i li eendjayambo; 14 okakopi kamwe koshingoli* kondjudo yeesekeli 10, ke yadi oitwimifo; 15 ondumetana imwe, odi imwe yondume nosho yo odjona imwe yondume yomudo umwe yexwikiloyambo; 16 okakombo kamwe ketimbayambo; 17 eyambo loukumwe, eengobe mbali, eedi nhano deendume, oikombo itano yoindume, eedjona nhano deendume, keshe imwe yomudo umwe. Olo olo la li eyambo laNashon, omonamati waAminadab.

18 Mefiku etivali, Netanel, omonamati waSuar, elenga laIsaskar, okwa yandja eyambo. 19 Okwa yandja eyambo laye, oshiyaxa shimwe shoshisilveri shondjudo yeesekeli 130 nokayaxa kamwe koshisilveri kondjudo yeesekeli 70, she likolelela kosekeli yomonhele iyapuki, aishe i yadi oufila wa nakwa nawa wa pilulilwa omaadi i li eendjayambo; 20 okakopi kamwe koshingoli kondjudo yeesekeli 10, ke yadi oitwimifo; 21 ondumetana imwe, odi imwe yondume nosho yo odjona imwe yondume yomudo umwe yexwikiloyambo; 22 okakombo kamwe ketimbayambo; 23 eyambo loukumwe, eengobe mbali, eedi nhano deendume, oikombo itano yoindume, eedjona nhano deendume, keshe imwe yomudo umwe. Olo olo la li eyambo laNetanel, omonamati waSuar.

24 Mefiku etitatu, elenga lovanamati vaSebulon, Eliab, omonamati waHelon, 25 okwa yandja eyambo laye, oshiyaxa shimwe shoshisilveri shondjudo yeesekeli 130 nokayaxa kamwe koshisilveri kondjudo yeesekeli 70, she likolelela kosekeli yomonhele iyapuki, aishe i yadi oufila wa nakwa nawa wa pilulilwa omaadi i li eendjayambo; 26 okakopi kamwe koshingoli kondjudo yeesekeli 10, ke yadi oitwimifo; 27 ondumetana imwe, odi imwe yondume nosho yo odjona imwe yondume yomudo umwe yexwikiloyambo; 28 okakombo kamwe ketimbayambo; 29 eyambo loukumwe, eengobe mbali, eedi nhano deendume, oikombo itano yoindume, eedjona nhano deendume, keshe imwe yomudo umwe. Olo olo la li eyambo laEliab, omonamati waHelon.

30 Mefiku etine, elenga lovanamati vaRuben, Elisur, omonamati waSedeur, 31 okwa yandja eyambo laye, oshiyaxa shimwe shoshisilveri shondjudo yeesekeli 130 nokayaxa kamwe koshisilveri kondjudo yeesekeli 70, she likolelela kosekeli yomonhele iyapuki, aishe i yadi oufila wa nakwa nawa wa pilulilwa omaadi i li eendjayambo; 32 okakopi kamwe koshingoli kondjudo yeesekeli 10, ke yadi oitwimifo; 33 ondumetana imwe, odi imwe yondume nosho yo odjona imwe yondume yomudo umwe yexwikiloyambo; 34 okakombo kamwe ketimbayambo; 35 eyambo loukumwe, eengobe mbali, eedi nhano deendume, oikombo itano yoindume, eedjona nhano deendume, keshe imwe yomudo umwe. Olo olo la li eyambo laElisur, omonamati waSedeur.

36 Mefiku etitano, elenga lovanamati vaSimeon, Selumiel, omonamati waSurisaddai, 37 okwa yandja eyambo laye, oshiyaxa shimwe shoshisilveri shondjudo yeesekeli 130 nokayaxa kamwe koshisilveri kondjudo yeesekeli 70, she likolelela kosekeli yomonhele iyapuki, aishe i yadi oufila wa nakwa nawa wa pilulilwa omaadi i li eendjayambo; 38 okakopi kamwe koshingoli kondjudo yeesekeli 10, ke yadi oitwimifo; 39 ondumetana imwe, odi imwe yondume nosho yo odjona imwe yondume yomudo umwe yexwikiloyambo; 40 okakombo kamwe ketimbayambo; 41 eyambo loukumwe, eengobe mbali, eedi nhano deendume, oikombo itano yoindume, eedjona nhano deendume, keshe imwe yomudo umwe. Olo olo la li eyambo laSelumiel, omonamati waSurisaddai.

42 Mefiku etihamano, elenga lovanamati vaGad, Eliasaf, omonamati waDeuel, 43 okwa yandja eyambo laye, oshiyaxa shimwe shoshisilveri shondjudo yeesekeli 130 nokayaxa kamwe koshisilveri kondjudo yeesekeli 70, she likolelela kosekeli yomonhele iyapuki, aishe i yadi oufila wa nakwa nawa wa pilulilwa omaadi i li eendjayambo; 44 okakopi kamwe koshingoli kondjudo yeesekeli 10, ke yadi oitwimifo; 45 ongobe yomhedi imwe yonyasha, odi imwe yondume nosho yo odjona imwe yondume yomudo umwe yexwikiloyambo; 46 okakombo kamwe ketimbayambo; 47 eyambo loukumwe, eengobe mbali, eedi nhano deendume, oikombo itano yoindume, eedjona nhano deendume, keshe imwe yomudo umwe. Olo olo la li eyambo laEliasaf, omonamati waDeuel.

48 Mefiku etiheyali, elenga lovanamati vaEfraim, Elisama, omonamati waAmmihud, 49 okwa yandja eyambo laye, oshiyaxa shimwe shoshisilveri shondjudo yeesekeli 130 nokayaxa kamwe koshisilveri kondjudo yeesekeli 70, she likolelela kosekeli yomonhele iyapuki, aishe i yadi oufila wa nakwa nawa wa pilulilwa omaadi i li eendjayambo; 50 okakopi kamwe koshingoli kondjudo yeesekeli 10, ke yadi oitwimifo; 51 ondumetana imwe, odi imwe yondume nosho yo odjona imwe yondume yomudo umwe yexwikiloyambo; 52 okakombo kamwe ketimbayambo; 53 eyambo loukumwe, eengobe mbali, eedi nhano deendume, oikombo itano yoindume, eedjona nhano deendume, keshe imwe yomudo umwe. Olo olo la li eyambo laElisama, omonamati waAmmihud.

54 Mefiku etihetatu, elenga lovanamati vaManasse, Gamaliel, omonamati waPedasur, 55 okwa yandja eyambo laye, oshiyaxa shimwe shoshisilveri shondjudo yeesekeli 130 nokayaxa kamwe koshisilveri kondjudo yeesekeli 70, she likolelela kosekeli yomonhele iyapuki, aishe i yadi oufila wa nakwa nawa wa pilulilwa omaadi i li eendjayambo; 56 okakopi kamwe koshingoli kondjudo yeesekeli 10, ke yadi oitwimifo; 57 ondumetana imwe, odi imwe yondume nosho yo odjona imwe yondume yomudo umwe yexwikiloyambo; 58 okakombo kamwe ketimbayambo; 59 eyambo loukumwe, eengobe mbali, eedi nhano deendume, oikombo itano yoindume, eedjona nhano deendume, keshe imwe yomudo umwe. Olo olo la li eyambo laGamaliel, omonamati waPedasur.

60 Mefiku etimuwoi, elenga lovanamati vaBenjamin, Abidan, omonamati waGideoni, 61 okwa yandja eyambo laye oshiyaxa shimwe shoshisilveri shondjudo yeesekeli 130 nokayaxa kamwe koshisilveri kondjudo yeesekeli 70, she likolelela kosekeli yomonhele iyapuki, aishe i yadi oufila wa nakwa nawa wa pilulilwa omaadi i li eendjayambo; 62 okakopi kamwe koshingoli kondjudo yeesekeli 10, ke yadi oitwimifo; 63 ondumetana imwe, odi imwe yondume nosho yo odjona imwe yondume yomudo umwe yexwikiloyambo; 64 okakombo kamwe ketimbayambo; 65 eyambo loukumwe, eengobe mbali, eedi nhano deendume, oikombo itano yoindume, eedjona nhano deendume, keshe imwe yomudo umwe. Olo olo la li eyambo laAbidan, omonamati waGideoni.

66 Mefiku etimulongo, elenga lovanamati vaDan, Ahieser, omonamati waAmmisaddai, 67 okwa yandja eyambo laye oshiyaxa shimwe shoshisilveri shondjudo yeesekeli 130 nokayaxa kamwe koshisilveri kondjudo yeesekeli 70, she likolelela kosekeli yomonhele iyapuki, aishe i yadi oufila wa nakwa nawa wa pilulilwa omaadi i li eendjayambo; 68 okakopi kamwe koshingoli kondjudo yeesekeli 10, ke yadi oitwimifo; 69 ondumetana imwe, odi imwe yondume nosho yo odjona imwe yondume yomudo umwe yexwikiloyambo; 70 okakombo kamwe ketimbayambo; 71 eyambo loukumwe, eengobe mbali, eedi nhano deendume, oikombo itano yoindume, eedjona nhano deendume, keshe imwe yomudo umwe. Olo olo la li eyambo laAhieser, omonamati wAmmisaddai.

72 Mefiku eti-11, elenga lovanamati vaAsser, Pagiel, omonamati waOkran, 73 okwa yandja eyambo laye, oshiyaxa shimwe shoshisilveri shondjudo yeesekeli 130 nokayaxa kamwe koshisilveri kondjudo yeesekeli 70, she likolelela kosekeli yomonhele iyapuki, aishe i yadi oufila wa nakwa nawa wa pilulilwa omaadi i li eendjayambo; 74 okakopi kamwe koshingoli kondjudo yeesekeli 10, ke yadi oitwimifo; 75 ondumetana imwe, odi imwe yondume nosho yo odjona imwe yondume yomudo umwe yexwikiloyambo; 76 okakombo kamwe ketimbayambo; 77 eyambo loukumwe, eengobe mbali, eedi nhano deendume, oikombo itano yoindume, eedjona nhano deendume, keshe imwe yomudo umwe. Olo olo la li eyambo laPagiel, omonamati waOkran.

78 Mefiku eti-12, elenga lovanamati vaNaftali, Ahira, omonamati waEnan, 79 okwa yandja eyambo laye oshiyaxa shimwe shoshisilveri shondjudo yeesekeli 130 nokayaxa kamwe koshisilveri kondjudo yeesekeli 70, she likolelela kosekeli yomonhele iyapuki, aishe i yadi oufila wa nakwa nawa wa pilulilwa omaadi i li eendjayambo; 80 okakopi kamwe koshingoli kondjudo yeesekeli 10, ke yadi oitwimifo; 81 ondumetana imwe, odi imwe yondume nosho yo odjona imwe yondume yomudo umwe yexwikiloyambo; 82 okakombo kamwe ketimbayambo; 83 eyambo loukumwe, eengobe mbali, eedi nhano deendume, oikombo itano yoindume, eedjona nhano deendume, keshe imwe yomudo umwe. Olo olo la li eyambo laAhira, omonamati waEnan.

84 Oinima ei oya li eyambo leyapulo loaltari eshi ya li ya vaekwa, ya dja komalenga Ovaisrael: oiyaxa 12 yoshisilveri, ouyaxa 12 voshisilveri, oukopi 12 voshingoli; 85 oshiyaxa keshe shoshisilveri oshi na ondjudo yeesekeli 130, nokayaxa keshe oke na ondjudo yeesekeli 70, oikwatelwa aishe yoisilveri oya li i fike peesekeli 2 400, she likolelela kosekeli yomonhele iyapuki; 86 oukopi 12 voshingoli ve yadi oitwimifo, keshe kamwe ke na ondjudo yeesekeli 10, she likolelela kosekeli yomonhele iyapuki, oukopi aveshe voshingoli ova li ve fike peesekeli 120. 87 Eengobe adishe dexwikiloyambo oda li eemhedi 12, eedi deendume 12, eedjona deendume 12, keshe imwe yomudo umwe pamwe neendjayambo nosho yo oukombo 12 vetimbayambo; 88 eengobe adishe deyambo loukumwe oda li eemhedi 24, eedi deendume 60, oikombo yoindume 60 needjona deendume 60, keshe imwe yomudo umwe. Olo ola li eyambo leyapulo loaltari konima eshi ya vaekwa.

89 Ngeenge Moses a i metwali lokwoongalela a ka popye naKalunga,* oha udu ondaka tai popi naye okudja kombada yoshituviko shoshikefa shOipelende yOumbangi, tai di pokati kovakerubi vavali; Kalunga okwa li ha popi naye.

8 Jehova okwa lombwela Moses, ta ti: 2 “Popya naAron u mu lombwele kutya, ‘Ngeenge wa tema eelamba, eelamba heyali odi na okuminikila oshitukulwa osho shi li komesho yoshikwatelwalamba.’” 3 Aron okwa ninga ngaha: Okwa tema eelamba doshikwatelwalamba, opo di minikile oshitukulwa osho shi li komesho yasho, ngaashi ashike Jehova a lombwela Moses. 4 Oshikwatelwalamba osha longwa ngaha: Osha li sha hambulwa moshingoli, sha li sha hambulwa okudja pefina lasho fiyo okeenhemo dasho. Oshikwatelwalamba osha li sha longwa she likolelela kemoniko olo Jehova a li a ulikila Moses.

5 Jehova okwa popya vali naMoses, a ti: 6 “Kufa mo Ovalevi mokati kOvaisrael, ndele to va koshola. 7 Ou na oku va koshola ngaha: Va shamina omeva oku va koshola komatimba, nove na okulikulula olutu alishe* nokambi, okukosha oikutu yavo nokulikosha. 8 Opo nee otava ka kufa ondumetana noufila wa nakwa nawa wa pilulilwa omaadi, weendjayambo, noto ka kufa vali ondumetana ikwao yetimbayambo. 9 Ou na okutwala Ovalevi komesho yetwali lokwoongalela nokwoongela ongudu aishe yOvaisrael. 10 Ngeenge wa twala Ovalevi koshipala shaJehova, Ovaisrael ove na okutenheka omake avo kOvalevi. 11 Aron oku na okuyandja Ovalevi koshipala shaJehova ve li edungadungifwayambo la dja kOvaisrael, nove na okulonga oilonga yaJehova.

12 “Opo nee Ovalevi otava ka tenheka omake avo komitwe deemhedi, nokuyandja imwe i li etimbayambo, naikwao i li exwikiloyambo kuJehova, opo Ovalevi va kosholwe. 13 Ou na okufikameka Ovalevi koshipala shaAron novanamati vaye noku va yandja ve li edungadungifwayambo kuJehova. 14 Ou na okukufa mo Ovalevi mokati kOvaisrael, nOvalevi otava ningi vange. 15 Okudja opo, Ovalevi otave ke uya mo va longe metwali lokwoongalela. Osho u na oku va koshola ngaho noku va yandja ve li edungadungifwayambo. 16 Ova yandjwa oshali, nde va pewa okudja mOvaisrael ponhele yaaveshe ovo ve li oiveli* yOvaisrael, ohandi ve likufile ame mwene. 17 Osheshi oshiveli keshe shi li mokati kOvaisrael oshange, kutya nee omunhu, ile oshinamwenyo. Onde i liyapulila ame mwene mefiku olo nda dipaa oiveli aishe medu laEgipiti. 18 Ohandi ka kufa Ovalevi ponhele yoiveli aishe oyo i li mokati kOvaisrael. 19 Ohandi ka yandja Ovalevi ve li eeshali kuAron nokovanamati vaye, va dja mokati kOvaisrael, opo va longe oilonga ketwali lokwoongalela ponhele yOvaisrael, nokukoshola Ovaisrael, opo vaha hangwe koshiponga, molwaashi va ehena popepi nonhele iyapuki.”

20 Moses, Aron nongudu aishe yOvaisrael osho va ningila ngaho Ovalevi. Ovaisrael ova ningila ngaho Ovalevi metwokumwe naashishe osho Jehova a lombwela Moses. 21 Onghee Ovalevi ove likoshola nova kosha oikutu yavo, nokonima Aron okwe va yandja ve li edungadungifwayambo koshipala shaJehova. Opo nee Aron okwa yandja eyambo, opo omatimba avo a dimwe po nova kosholwe. 22 Lwanima, Ovalevi ova ya mo va ka longe oilonga yavo metwali lokwoongalela moipafi yaAron noyovanamati vaye. Ove va ningila ngaashi Jehova a li a lombwela Moses shi na sha nOvalevi.

23 Jehova okwa popya naMoses, ta ti: 24 “Shi na sha nOvalevi: Omulumenhu, oo e na eedula 25 okuyuka pombada, oku na okuwaimina ongudu yaavo ve li moilonga yetwali lokwoongalela. 25 Ashike ngeenge okwa wanifa eedula 50, ota ka dja mo moilonga noita ka longa vali. 26 Ota dulu okuyakula ovamwaxe, ovo hava yakula metwali lokwoongalela, ashike ye ke na okulonga mo. Osho osho u na okuninga shi na sha nOvalevi noinakuwanifwa yavo.”

9 Jehova okwa popya naMoses mombuwa yaSinai momwedi wotete womudo omutivali, konima eshi va dja medu laEgipiti, a ti: 2 “Ovaisrael ove na okulongekida eyambo lOpaasa peufwafimbo layo. 3 Mefiku eti-14 lomwedi ou, eshi taku wiwile,* omu na oku i longekida peufwafimbo layo. Omu na oku i longekida she likolelela keenghedimhango adishe nokomilandu dayo adishe odo da tulwa po.”

4 Onghee Moses okwa lombwela Ovaisrael va longekide eyambo lOpaasa. 5 Opo nee ova longekida eyambo lOpaasa mombuwa yaSinai mefiku eti-14 lomwedi wotete, eshi taku wiwile.* Ovaisrael ova ninga naanaa ashishe osho Jehova a lombwela Moses.

6 Opa li ovalumenhu ovo va li inava koshoka, eshi va kuma oshimhu, onghee kava li tava dulu okulongekida eyambo lOpaasa mefiku olo. Ovalumenhu ovo ove litwala vo vene kuMoses naAron mefiku olo. 7 Opo nee ova tya kuMoses: “Inatu koshoka, molwaashi otwa kuma oshimhu. Omolwashike tu na okukelelwa tuha yandje eyambo kuJehova peufwafimbo lalo mokati kOvaisrael?” 8 Opo nee Moses okwa tya kuvo: “Teeleleni apa, manga handi ka pwilikina kwaasho Jehova ta ti shi na sha nanye.”

9 Jehova okwa tya kuMoses: 10 “Lombwela Ovaisrael kutya, ‘Ngeenge umwe womunye, ile womepupi leni lokomesho okwa kala ina koshoka, eshi a kuma oshimhu,* ile e li molweendo kokule, natango oku na okulongekidila Jehova eyambo lOpaasa. 11 Ove na oku li longekida mefiku eti-14 lomwedi omutivali, eshi taku wiwile.* Ove na oku li lya pamwe nomungome inau ya efulika nosho yo oimbodi ilula. 12 Kave na okuxupifa po sha fiyo ongula, nokave na okuteya nandenande ekipa layo. Ove na oku li longekida she likolelela keenghedimhango adishe di na sha nOpaasa. 13 Ashike ngeenge omunhu okwa li a koshoka, ile ka li e li molweendo, ndele te lidimbike okulongekida eyambo lOpaasa, omunhu* oo oku na okudimwa* mo moshiwana shavo, molwaashi ina yandja eyambo laJehova peufwafimbo lalo. Omunhu oo ota ka handukilwa omolwenyono laye.

14 “‘Ngeenge omunailongo oha di pamwe nanye, naye oku na okulongekidila Jehova eyambo lOpaasa. Oku na okuninga ngaho she likolelela konghedimhango yOpaasa nokomulandu wayo oo wa tulwa po. Ope na okukala pe na onghedimhango imwe yeni amushe, kutya nee omunailongo, ile omukalimo womedu olo.’”

15 Mefiku olo etwalihangano tali dikwa po, oshilemo osha li hashi uvike etwalihangano, etwali lOipelende yOumbangi, ashike konguloshi, oluudi olo la fa omundilo ola li hali kala kombada yetwalihangano fiyo ongula. 16 Osho osho sha kala hashi ningwa: Oshilemo ohashi li uvike omutenya, noluudi olo la fa omundilo oufiku. 17 Keshe efimbo oshilemo tashi di po petwali, Ovaisrael ohava di po diva, noponhele opo oshilemo tashi kanghama opo Ovaisrael hava ongo onhanda. 18 Ovaisrael ohava di po palombwelo laJehova, nohava ongo onhanda palombwelo laJehova. Ofimbo oshilemo inashi dja ko kombada yetwalihangano, ohava kala ashike va onga onhanda. 19 Ngeenge oshilemo osha kala kombada yetwalihangano oule womafiku mahapu, Ovaisrael ohava dulika kuJehova noihava di po. 20 Omafimbo amwe oshilemo ohashi kala kombada yetwalihangano omafiku manini. Ova li hava kala va onga onhanda palombwelo laJehova, nova li hava di po palombwelo laJehova. 21 Omafimbo amwe oshilemo osha li hashi kala ko okudja konguloshi fiyo ongula, nongeenge oshilemo sha di ko ongula, ohava di po. Ngeenge oshilemo sha di ko, kutya nee omutenya, ile oufiku, ova li hava di po. 22 Shimha ashike oshilemo shi li kombada yetwalihangano, kutya nee omafiku avali, omwedi, ile efimbo lile, Ovaisrael ova li hava kala va onga onhanda nokava li hava di po. Ashike ngeenge sha di ko, ova li hava di po. 23 Ova li hava kala va onga onhanda palombwelo laJehova, nova li hava di po palombwelo laJehova. Ova twikila okudulika kuJehova palombwelo laJehova okupitila muMoses.

10 Jehova okwa tya kuMoses: 2 “Liningila omanghuma avali, to a hambula moshisilveri, ndele to a longifa mokwoongela ongudu yovanhu nosho yo okudikulula po eenhanda. 3 Ngeenge aeshe a shikwa, ongudu aishe oi na okwoongala pwoove poshivelo shetwali lokwoongalela. 4 Ndele ngeenge limwe ashike la shikwa, omalenga ashike nosho yo omitwe dOvaisrael omayovi tadi ka ongala pwoove.

5 “Ngeenge omwa shiki enghuma mokule tamu kotola, eenhanda daavo ve li koushilo odi na okudja po. 6 Ngeenge omwa shiki enghuma mokule tamu kotola oshikando oshitivali, eenhanda daavo ve li kombinga yokolukadi odi na okudja po. Osho ve na okushika enghuma ngaho efimbo keshe vamwe vomuvo tava di po.

7 “Ngeenge tamu ifana eongalo li ongale, omu na okushika omanghuma, ndele kamu na oku a shika mokule tamu kotola. 8 Ovanamati vaAron, ovo ve li ovapristeri, ove na okushika omanghuma, noku a longifa otaku ka kala onghedimhango yaalushe kunye fiyo okomapupi eni aeshe.

9 “Ngeenge tamu i moita medu leni mu lwife ovatondi ovo tave mu ponokele, omu na okushika omanghuma oita, na Jehova, Kalunga keni, ote ke mu dimbuluka, noku mu xupifa kovatondi veni.

10 “Natango, peemhito deni dehafo, poivilo yeni nosho yo pehovelo leemwedi deni, omu na okushikila omanghuma popepi nomaxwikiloyambo eni nosho yo omayambo eni oukumwe; notaa ka ninga edimbulukifo kunye koshipala shaKalunga. Aame Jehova, Kalunga keni.”

11 Momafiku 20, omwedi omutivali, modula onhivali, oshilemo osha li sha dja ko kombada yetwalihangano omo mu na Oipelende yOumbangi. 12 Onghee Ovaisrael ova hovela okudja mo mombuwa yaSinai, palombwelo olo la tulwa po li na sha nokutembuka, noshilemo osha li sha kanghama mombuwa yaParan. 13 Osho osho sha li oshikando shotete tava di po tava shikula elombwelo laJehova okupitila muMoses.

14 Onghee omapata, oo a tukulwa ooatatu, omonhanda yovanamati vaJuda okwa dja po tete paengudu dao,* na Nashon, omonamati waAminadab, oye a li ta kwatele komesho ongudu yavo. 15 Netanel, omonamati waSuar, oye a li ta kwatele komesho ongudu yepata lovanamati vaIsaskar. 16 Eliab, omonamati waHelon, oye a li ta kwatele komesho ongudu yepata lovanamati vaSebulon.

17 Ngeenge etwalihangano la dikululwa po, ovanamati vaGerson novanamati vaMerari, ovo hava humbata etwalihangano, ohava di po.

18 Opo nee omapata, oo a tukulwa ooatatu, omonhanda yaRuben okwa dja po paengudu dao,* na Elisur, omonamati waSedeur, oye a li ta kwatele komesho ongudu oyo. 19 Selumiel, omonamati waSurisaddai, oye a li ta kwatele komesho ongudu yepata lovanamati vaSimeon. 20 Eliasaf, omonamati waDeuel, oye a li ta kwatele komesho ongudu yepata lovanamati vaGad.

21 Opo nee Ovakohat, ovo hava humbata oinima yomonhele iyapuki, ohava di po. Etwalihangano ola li hali dikwa pefimbo opo tava fiki.

22 Omapata, oo a tukulwa ooatatu, omonhanda yovanamati vaEfraim okwa dja po paengudu dao,* na Elisama, omonamati waAmmihud, oye a li ta kwatele komesho ongudu oyo. 23 Gamaliel, omonamati waPedasur, oye a li ta kwatele komesho ongudu yepata lovanamati vaManasse. 24 Abidan, omonamati waGideoni, oye a li ta kwatele komesho ongudu yepata lovanamati vaBenjamin.

25 Omapata, oo a tukulwa ooatatu, omonhanda yovanamati vaDan okwa dja po paengudu dao,* ovo va li vaxuuninwa keenhanda adishe, opo va amene eenhanda dikwao, na Ahieser, omonamati waAmmisaddai, oye a li ta kwatele komesho ongudu oyo. 26 Pagiel, omonamati waOkran, oye a li ta kwatele komesho ongudu yepata lovanamati vaAsser. 27 Ahira, omonamati waEnan, oye a li ta kwatele komesho ongudu yepata lovanamati vaNaftali. 28 Olo olo la li elombwelo li na sha nokudja po kwOvaisrael nosho yo eengudu davo* olo va li ve na okushikula, eshi tava di po.

29 Opo nee Moses okwa tya kuHobab, omonamati waRehuel,* Omumidian, xemweno yaMoses: “Ohatu i konhele oyo Jehova a popya kutya, ‘Ohandi ke i mu pa.’ Natu yeni pamwe, nohatu ka ungaunga naave nawa, molwaashi Jehova okwa udanekela Israel oinima iwa.” 30 Ndele okwa tya kuye: “Itandi i. Ohandi shuna koshilongo shetu nokovapambele vange.” 31 Ndele ye okwa tya kuye: “Alikana, ino tu fiya po, molwaashi ou shi shii kutya openi hatu dulu okwoonga onhanda mombuwa, noto dulu okuninga omuwiliki* wetu. 32 Ngeenge owa i nafye, ouwa aushe oo Jehova te ke tu ulikila, nafye ohatu ke u ku ulikila shili.”

33 Ova hovela okweenda okudja komhunda yaJehova olweendo loule womafiku atatu, noshikefa shehangano laJehova oshe va kwatela komesho molweendo lavo lomafiku atatu, fiyo osheshi va monenwa onhele yokutulumukwa. 34 Oshilemo shaJehova osha li kombada yavo omutenya, eshi va li tava di po opo va onga onhanda.

35 Ngeenge Oshikefa tashi tembulwa, Moses oha ti: “Jehova, kala pamwe nafye, novatondi voye nava halakanifwe po, naavo ve ku tonde nave ku ye onhapo.” 36 Ngeenge sha tula, oha ti: “Jehova, alukila kOvaisrael omayovi.”*

11 Ovanhu ova li va hovela okungongota unene koshipala shaJehova. Eshi Jehova e shi uda, ehandu laye ola xwama, nomundilo wa dja kuJehova owa hovela okutema mokati kavo, ndele tau xwike po vamwe ovo va li kondje yonhanda. 2 Eshi ovanhu va hovela okulilila Moses, okwa ilikana kuJehova, nomundilo owa li wa dima. 3 Onghee onhele oyo oya li ya lukwa Tabera,* molwaashi omundilo wa dja kuJehova owa li wa tema mokati kavo.

4 Ongudu yovanhu va lumbakana,* oyo ya li mokati kavo, oya li ya holola oikala yokulihola mwene, nOvaisrael yo ova li va hovela vali okulila tava ti: “Olyelye te ke tu pa ombelela tu lye? 5 Otwa djuulukwa neenghono eeshi, odo twa li hatu li muEgipiti inatu di landa, nosho yo eekukumba, omanuwa, eenyanga neegalika. 6 Ndele paife fye* ohatu kanifa eenghono. Ihatu mono sha vali nandenande, kakele ashike komanna aa.”

7 Ashike omanna okwa li ngaashi eemuma doshihemba hashi ifanwa korianda, nokwa li taa monika ngaashi eka lo-bdellium. 8 Ovanhu ohava ka enda noku a toola, ndele tave a tunine pokati komamanya okukweyela, ile ve a twe koshini. Opo nee ohave a fulukifa meembiya, ile ve a ninge omingome di li ongonga, nohadi kala di na omulyo wa fa woshikuki shinyenye sha tulwa omaadi. 9 Ngeenge omume ya wile monhanda oufiku, omanna nao ohaa wile mo.

10 Moses okwa li a uda ovanhu tava lili meumbo keshe, nomulumenhu keshe okwa li e li poshivelo shetwali laye. Jehova okwa li a handuka neenghono, na Moses ka li yo e shi hafela nandenande. 11 Opo nee Moses okwa tya kuJehova: “Omolwashike to hepekele omupiya woye? Omolwashike inandi filwa onghenda momesho oye, eshi wa tula omutengi wovanhu aveshe ava kwaame? 12 Mbela aame nda li nda ninga oufimba wovanhu aveshe ava? Aame mbela nde va dala, eshi to lombwele nge kutya, ‘Va humbata monhulo yoye, ngaashi ashike omuyakuli* a humbata okaana oko haka nyamu,’ ndi va twale kedu olo wa ana u li yandje kooxekulululwa? 13 Openi handi ka hanga ombelela ndi pe ovanhu aveshe ava? Osheshi otava twikile okulilila nge, tava ti, ‘Tu pa ombelela tu lye!’ 14 Itandi dulu okuungaunga novanhu aveshe ava aame andike; oshidjuu unene kwaame. 15 Ngeenge osho to ungaunga naame ngaha, alikana dipae nge paife eshi. Ngeenge onda filwa onghenda momesho oye, ino ningifa nge ndi mone vali oupyakadi muhapu.”

16 Jehova okwa nyamukula Moses, a ti: “Ongelele nge ovalumenhu 70, tava di movakulunhu vaIsrael, ovalumenhu ovo wa didilika ve li* ovakulunhu novapashukili vovanhu, ndele to va twala ketwali lokwoongalela, nova kale ofika pamwe naave oko. 17 Ohandi uya ndi popye naave oko, nohandi ka kufa mo omhepo imwe, oyo i li mwoove, noku i tula muvo notave ke ku kwafela u ungaunge nomutengi wovanhu ovo, opo uha ungaunge nao oove auke. 18 Ou na okulombwela ovanhu kutya: ‘Liyapuleni omolwefiku lomongula, osheshi otamu ka lya shili ombelela, molwaashi eshi mwa lilila Jehova, okwe mu uda, eshi mwa ti: “Olyelye te ke tu pa ombelela tu lye? Otwa li tu li nawa, eshi twa li muEgipiti.” Jehova ote ke mu pa shili ombelela notamu ka lya. 19 Otamu ka lya, hafiku limwe, hamafiku 2, hamafiku 5, hamafiku 10, hamafiku 20, 20 ndele omwedi aushe, fiyo osheshi ye mu pita momayulu noya ninga oshinima shitondifa kunye, osheshi omwa ekelashi Jehova, oo e li mokati keni, nomwa li tamu lili koshipala shaye, tamu ti: “Omolwashike twa dila mo muEgipiti?”’”

21 Moses okwa tya: “Ovanhu ava ndi li navo kolupadi 600 000, ndele ove owa ti kutya, ‘Ohandi ke va pa ombelela, notave ke i lya ya wana omwedi aushe.’ 22 Ngeenge oufita aushe weedi noweengobe owa dipawa, otai ke va wanena ngoo? Ile ngeenge eeshi adishe odo di li mefuta oda kwatwa, otadi ke va wanena tuu?”

23 Jehova okwa tya kuMoses: “Mbela eke laJehova olixupi unene? Paife oto ka mona ngeenge osho nda popya otashi ke ku ningilwa, ile hasho.”

24 Onghee Moses okwa ya, ndele ta lombwele ovanhu eendjovo daJehova. Okwa li a ongela ovalumenhu 70, va dja movakulunhu voshiwana, ndele te va fikamifa va dingilila etwali. 25 Opo nee Jehova okwe uya pedu e li moshilemo, ndele ta popi naye, nokwa kufa mo omhepo imwe oyo ya li muMoses, ndele te i tula movakulunhu aveshe 70. Diva eshi omhepo ya ya muvo, ova hovela okulihumbata ngaashi ovaprofeti,* ashike inave ke shi ninga vali.

26 Monhanda omwa li natango ovalumenhu vavali. Omadina avo oo Eldad naMedad. Omhepo oya li ya hovela okuya muvo, molwaashi ova li mokati kaavo omadina avo a shangwa, ndele kava li va dja mo metwali. Onghee ova li va hovela okulihumbata ngaashi ovaprofeti monhanda. 27 Omulumenhu umwe omunyasha okwa tondoka, ndele ta ka lombwela Moses, ta ti: “Eldad naMedad otave lihumbata ngaashi ovaprofeti monhanda!” 28 Ndele Josua, omonamati waNun, oo a kala ta yakula Moses okudja kounyasha waye, okwa nyamukula, ta ti: “Omwene wange Moses, va hanyena!” 29 Ashike Moses okwa tya kuye: “Oto lipula shi na sha naame? Ahawe, onda hala ngeno ovapiya vaJehova aveshe va kale ovaprofeti, na Jehova ngeno oku tule omhepo yaye muvo!” 30 Lwanima, Moses okwa shuna konhanda pamwe novakulunhu vaIsrael.

31 Opo nee omhepo ya dja kuJehova oya pepa, noya pepa mo oudila voimote mefuta, noku va ningifa va wile va dingilila onhanda, oshinano shefiku limwe lwaapo kombinga imwe nokombinga ikwao oshinano shefiku limwe, va dingilila onhanda aishe, okudja pedu, naapo va li opa li oshinano shoule womaludimbo* avali lwaapo. 32 Onghee ovanhu ova fikama, ndele tava ongele oudila voimote, efiku alishe noufiku aushe nosho yo efiku alishe la shikula ko. Kape na umwe a toola ve li meni lee-homer* omulongo, nova kala nokunyaneka oudila vavo monhanda aishe. 33 Ndele ofimbo ombelela ya li pokati komayoo avo, fimbo ya li inai taafinwa, ehandu laJehova ole va hanga; Jehova okwe va tumina ehandukilo lefyo la kwata moiti.

34 Opo nee ova luka onhele oyo Kibrot-hattava,* molwaashi oko va kala hava pake ovanhu ovo va li va halelela oikulya omolwokulihola mwene. 35 Ovanhu ova dja mo muKibrot-hattava, ndele tava i kuHaserot, nova kala muHaserot.

12 Miriam naAron ova hovela okupopila mowii Moses omolwomukulukadi Omukushi oo a hombola, molwaashi okwe likufila omukulukadi Omukushi. 2 Ova li tava ti: “Jehova oha popi ashike okupitila muMoses? Hano iha popi yo okupitila mufye?” Ashike Jehova okwa li ta pwilikine. 3 Moses okwa li omulidiiniki e dule filufilu ovanhu aveshe* kombada yedu.

4 Jehova okwa lombwela diva Moses, Aron naMiriam, ta ti: “Amushe vatatu, indeni ketwali lokwoongalela.” Onghee aveshe vatatu ova ya. 5 Jehova okwe uya moluudi loshilemo, ndele ta fikama poshivelo shetwali nokwa ifana Aron naMiriam, nova ya aveshe. 6 Opo nee okwa ti: “Alikana, udeni eendjovo dange. Ngeno mokati keni omwa li omuprofeti waJehova, ngeno onde mu lihololela memoniko, ndele handi popi naye mondjodi. 7 Ndele hasho shi li ngaho shi na sha nomupiya wange Moses! Okwe lineekelelwa eumbo lange alishe.* 8 Ohandi popi naye oshipala noshipala* monghedi ya yela, ndele hamomafaneko, noha kala e wete eholokepo laJehova. Omolwashike inamu tila okupopila mowii omupiya wange, okupopila mowii Moses?”

9 Onghee ehandu laJehova ole va hanga, ndele ta di po puvo. 10 Opo nee oshilemo osha dja ko kombada yetwali, ndele tala, Miriam okwa kwatwa koshilundu shitoka sha fa eemhawe. Eshi Aron a tala Miriam okwa mona kutya okwa kwatwa koshilundu. 11 Diva Aron okwa tya kuMoses: “Omwene wange, ohandi ku indile! Alikana, ino tu handukila omolwenyono eli! Inatu katuka pandunge mwaasho twa ninga. 12 Alikana, ino mu efa a kale ngaashi okaana ka fya, oko ka dalwa ka ola ombinga imwe!” 13 Onghee Moses okwa hovela okupula ekwafo kuJehova, ta ti: “Kalunga, alikana mu velula! Alikana!”

14 Jehova okwa nyamukula Moses, a ti: “Ngeenge xe okwe mu fiile omate moshipala, mbela ita ka fifwa ohoni oule womafiku aheyali? Ne likalekelwe oule womafiku aheyali kondje yonhanda, ndele konima yomafiku oo ta alulilwa mo.” 15 Miriam okwa li e likalekelwa kondje yonhanda oule womafiku aheyali, novanhu kava li va dikulula po onhanda, fiyo osheshi Miriam a alulilwa mo. 16 Opo nee ovanhu ova dja mo muHaserot nova hovela okwoonga onhanda mombuwa yaParan.

13 Jehova okwa popya naMoses, ta ti: 2 “Tuma ovalumenhu va ka ndaade* edu laKaanan, olo handi ka yandja kOvaisrael. Ou na okutuma omulumenhu umwe mepata keshe looxekulululwa; keshe umwe womuvo na kale elenga.”

3 Onghee Moses okwe va lekela mo mombuwa yaParan palombwelo laJehova. Ovalumenhu aveshe ovo ova li omitwe dOvaisrael. 4 Omadina avo oo aa: mepata laRuben oShammua, omonamati waSakkur; 5 mepata laSimeon oShafat, omonamati waHori; 6 mepata laJuda oKaleb, omonamati waJefunne; 7 mepata laIsaskar oIgal, omonamati waJosef; 8 mepata laEfraim oHosea, omonamati waNun; 9 mepata laBenjamin oPalti, omonamati waRafu; 10 mepata laSebulon oGaddiel, omonamati waSodi; 11 mepata laJosef, sha hala okutya mepata laManasse, oGaddi, omonamati waSusi; 12 mepata laDan oAmmiel, omonamati waGemali; 13 mepata laAsser oSetur, omonamati waMikael; 14 mepata laNaftali oNahbi, omonamati waVofsi; 15 mepata laGad oGehuel, omonamati waMaki. 16 Oo omadina ovalumenhu ovo Moses a li a tuma va ka ndaade edu olo. Hosea, omonamati waNun, okwa lukwa Josua* kuMoses.

17 Eshi Moses a li te va tumu va ka ndaade edu laKaanan, okwe va lombwela, a ti: “Indeni kuNegeb, ndele tamu i koshitukulwa shokeemhunda. 18 Omu na okutala kutya edu ola tya ngahelipi, nonokutya ovanhu ovo ve li mo ove na eenghono, ile kave na eenghono, ovanini, ile ovahapu, 19 kutya edu oliwa, ile kaliwa, nonokutya moilando omo ve li inai dingililwa komakuma, ile oya dingililwa. 20 Taleni yo ngeenge edu ola punapala,* ile ola hepa* nongeenge omu na omiti, ile kamu na sha. Omu na okukala mu na ouladi nokukufa oiimati yomedu olo.” Osha li opefimbo lomandjebele, oo haa pi tete.

21 Opo nee ova ya, ndele tava ka ndaada edu, okudja mombuwa yaSin fiyo okuRehob, popepi naLebo-hamat.* 22 Eshi va ya kuNegeb, ova ya muHebron, omo mwa li hamu di Ahiman, Sheshai naTalmai, oludalo laAnak. Ashike Hebron osha li sha tungwa omido heyali, ofimbo Soan shaEgipiti inashi tungwa. 23 Eshi ve uya kEfilu laEskol, ova teta oshitai shi na eshila limwe lomandjebele, osho sha li shi na okuhumbatwa kovalumenhu vavali komutengi nosho yo oiimati imwe yomuti wogranati neenghwiyu. 24 Ova luka onhele oyo Efilu laEskol,* molwaashi Ovaisrael oko va li va tetela eshila.

25 Konima yomafiku 40, ova aluka kedu olo va li va ka ndaada. 26 Onghee ove uya kuMoses naAron nosho yo kongudu aishe yOvaisrael mombuwa yaParan, kuKades. Ova yandja ehokololo kongudu aishe, nove va ulikila oiimati yokedu olo. 27 Ova lombwela Moses, va ti: “Otwa ile kedu oko we tu tumine, notali kunguluka filufilu omashini nomaadi eenyiki, naai oyo oiimati yalo. 28 Ndele ovanhu ovo hava di kedu olo ovanaenghono, noilando oyo ya dingililwa komakuma a pama oinenenene. Otwa mona ko yo Ovaanak. 29 Ovaamalek ohava di medu laNegeb, nOvaheti, Ovajebusi nOvaamori ohava di koshitukulwa sheemhunda, nOvakaanan ohava di popepi nefuta va ama kuJordan.”

30 Opo nee Kaleb okwa kendabala okungungumaneka ovanhu, ofimbo va fikama koshipala shaMoses, a ti: “Natu ye i ko divadiva, molwaashi otu shi shii kutya ohatu ka nyeka ko emona lamo, notu shi shii kutya ohatu ke va finda.” 31 Ashike ovalumenhu ovo va li va ya pamwe naye, ova ti: “Itatu dulu oku ka lwifa ovanhu ovo, molwaashi ove na eenghono ve tu dule.” 32 Ova kala tava yandje ehokololo lii kOvaisrael kombinga yedu olo va li va ka ndaada, tava ti: “Edu olo twa li twa ka ndaada, edu la nyika oshiponga kovakalimo, novanhu aveshe ovo twa mona mo ovalumenhu vanene neenghono. 33 Otwa mona ko yo Ovatongolume, ovanamati vaAnak, ovo va dja* mOvatongolume, mokuliyelekanifa navo otwa fa oshipaxu kufye atushe nokuvo.”

14 Ovaisrael aveshe ova hovela okukuwaana, novanhu ova twikila okulila pombada oufiku aushe. 2 Ovaisrael aveshe ova hovela okungongotela Moses naAron. Ongudu aishe yOvaisrael oye va ula nai, tai ti: “Ngeno otwa file ashike medu laEgipiti, ile ngeno otu file ashike mombuwa omu! 3 Omolwashike Jehova e tu etela kedu oku tu fye keongamukonda? Ovakulukadi vetu nounona vetu otava ka kwatwa po. Oshi li xwepo tu shune kuEgipiti.” 4 Ova li nokuli tava lombwelafana tava ti: “Natu hoololeni omuwiliki, ndele hatu shuna kuEgipiti.”

5 Opo nee Moses naAron ova fidimika oipala yavo pedu moipafi yeongalo alishe lOvaisrael, olo la li la ongala. 6 Josua, omonamati waNun, naKaleb, omonamati waJefunne, ovo va li mokati kaavo va li va ka ndaada edu olo, ova pombaula oikutu yavo, 7 nova lombwela Ovaisrael aveshe, tava ti: “Edu olo twa li twa ka ndaada, edu liwa neenghono adishe. 8 Ngeenge Jehova okwe tu hokwa, ote ke tu twala filufilu medu olo, note ke li tu pa, edu tali kunguluka omashini nomaadi eenyiki. 9 Ndele inamu tukululila Jehova oshibofa, noinamu tila ovanhu vomedu olo, molwaashi ohatu ke va finda.* Eameno lavo ove li kufwa, na Jehova oku li pamwe nafye. Inamu va tila.”

10 Onghee Ovaisrael aveshe ova li tava ti kutya otave va denge nomamanya. Ndele oshinge shaJehova osha holoka kombada yetwali lokwoongalela, olo hali ongalele Ovaisrael aveshe.

11 Opo nee Jehova okwa tya kuMoses: “Ofiyo onaini ovanhu ava tava kala inava fimaneka nge, nofiyo onaini tava kala vehe na eitavelo mwaame, nonande onda ninga omadidiliko mahapu mokati kavo? 12 Ohandi ke va handukila noudu wolutapo, ndele handi va taataa mo, nohandi ke ku ninga oshiwana shinene noshinaenghono shi va dule.”

13 Ashike Moses okwa tya kuJehova: “Ovaegipiti, omo wa kufa ovanhu ava keenghono doye, otave ke shi uda, 14 ndele tave ke shi lombwela ovakalimo vomedu eli. Ovanhu ovo ova uda yo kutya ove, Jehova, ou li mokati kovanhu ava nowe ve lihololela oshipala noshipala. Oove Jehova, noshilemo shoye osha fikama kombada yavo, noho va kwatele komesho noluudi loshilemo omutenya, noufiku onoluudi lomundilo. 15 Ngeenge owa dipaa ovanhu aveshe ovo poshikando shimwe,* oiwana oyo ya uda efimano loye otai ka tya: 16 ‘Jehova ka li ta dulu okutwala ovanhu medu olo e va anena kutya ote li va pe, onghee okwe va dipaela mombuwa.’ 17 Alikana, Jehova, ulika ounene weenghono doye paife, ngaashi wa udaneka, eshi wa ti: 18 ‘Jehova iha handuka diva, oku na filufilu ohole i na oudiinini* noha dimi po omanyono nomatauluko, ashike ita kala ina handukila nandenande ovo va nyona, ta handukile ovana, epupi etitatu nepupi etine omolwomanyono ooxe.’ 19 Alikana, dima po enyono lovanhu ava omolwohole yoye inene i na oudiinini, ngaashi ashike wa kala noku va dimina po okudja kuEgipiti fiyo opaife.”

20 Opo nee Jehova okwa tya: “Onde va dimina po metwokumwe neendjovo doye. 21 Ndele mepingafano naasho, ngaashi ame ndi na omwenyo, edu alishe otali ka yadifwa oshinge shaJehova. 22 Ashike kape na nande omunhu umwe, oo a mona oshinge shange nomadidiliko ange, oo nda ninga muEgipiti nomombuwa, ndele ta twikile okuyeleka nge lwoikando omulongo, noita pwilikine kondaka yange, 23 ta ka ya medu olo nda ana kutya ohandi li yandje kooxe. Kape na nandenande oumwe oo ina fimaneka nge te ke li mona. 24 Ndele molwaashi omupiya wange Kaleb okwa li a yooloka ko kuvakwao,* nokwa kala ha dulika kwaame nomutima aushe, ohandi ke mu twala kedu oko a ile, notali ka ninga emona loludalo laye. 25 Molwaashi Ovaamalek nOvakaanan ohava di mefilu, omu na okushuna mongula, ndele tamu i kombuwa, tamu endele nondjila inya yokEfuta Litilyana.”

26 Opo nee Jehova okwa tya kuMoses naAron: 27 “Ofiyo onaini Ovaisrael ava ovakolokoshi tava twikile okungongotela nge? Onda uda eshi Ovaisrael tava ngongotele nge. 28 Va lombwela kutya, ‘Jehova okwa ti: “Ngaashi ame ndi na omwenyo, ohandi ke mu ningila naanaa ngaashi nda uda mwa popya. 29 Omidimba deni otadi ka wila mombuwa omu, amushe ovo mu na eedula okudja po 20 okuyuka pombada, ovo mwa shangwa, amushe ovo mwa li tamu ngongotele nge. 30 Kape na nande oumwe womunye ta ka ya medu olo nda ana* mu ka kale mo, kakele kuKaleb, omonamati waJefunne, naJosua, omonamati waNun.

31 “‘“Ohandi ka twala mo yo ovana veni, ovo mwa ti kutya otava ka kwatwa po, notava ka shiiva edu olo mwa anya. 32 Ndele nye omidimba deni otadi ka wila mombuwa omu. 33 Ovanamati veni otava ka ninga ovafita voimuna mombuwa oule weedula 40, notava ka handukilwa omolwoilonga yeni yokuhenoudiinini,* fiyo osheshi omidimba deni adishe da wila mombuwa. 34 Metwokumwe nomuvalu womafiku oo mwa ka ndaadele edu olo, omafiku 40, otamu ka handukilwa omolwomanyono eni omido 40, efiku omudo umwe, efiku omudo umwe, notamu ka shiiva kutya osha hala okutya shike okukala omhinge naame.*

35 “‘“Aame Jehova nde shi popya. Eshi osho handi ka ningila ongudu aishe ei yOvaisrael ovakolokoshi ovo va ongala, opo va tukululile nge oshibofa: Ohandi ke va xulifa po mombuwa omu, nomo tava ka fila. 36 Ovalumenhu ovo Moses a li a tuma va ka ndaade edu olo nova ningifa ovanhu aveshe ve mu ngongotele, eshi va aluka nehokololo lii li na sha nedu olo, 37 heeno, ovalumenhu ovo va etelela ehokololo lii li na sha nedu olo otava ka dipawa nokufila koshipala shaJehova. 38 Ndele Josua, omonamati waNun, naKaleb, omonamati waJefunne, ovo va li mokati kovalumenhu ovo va li va ka ndaada edu olo, otava kala nomwenyo.”’”

39 Eshi Moses a lombwela Ovaisrael aveshe eendjovo odo, ovanhu ova li va nyika oluhodi neenghono. 40 Onghee ova penduka ongula inene, ndele tava kendabala okuya koxulo yomhunda, tava ti: “Paife otwe lilongekida okuya konhele oyo Jehova a popya, osheshi otwa nyona.” 41 Ashike Moses okwa ti: “Omolwashike tamu tauluka elombwelo laJehova? Itamu ka pondola. 42 Inamu ya po pombada, osheshi Jehova ke li pamwe nanye; otamu ka findwa kovatondi veni. 43 Osheshi Ovaamalek nOvakaanan otave ke mu lwifa, notamu ka fya keongamukonda. Molwaashi omwa efa po okudulika kuJehova, Jehova ita ka kala pamwe nanye.”

44 Onghee ova kukutika omitwe davo, ndele tava i koxulo yomhunda, ashike oshikefa shehangano laJehova inashi dja po pokati konhanda, na Moses ina dja po. 45 Opo nee Ovaamalek nOvakaanan, ovo va li hava di komhunda oyo, ove uya nove va finda, ndele tave va te fiyo okuHorma.

15 Jehova okwa popya vali naMoses, a ti: 2 “Popya nOvaisrael u va lombwele kutya, ‘Ngeenge omwa i medu olo handi mu pe mu kale mo, 3 ndele tamu yandje eyambo kuJehova, la yambwa okupitila momundilo la dja meengobe, ile la dja meedi, kutya exwikiloyambo, ile eyambo lokuninga eano le likalekelwa, ile eyambo lehalo liwa, ile eyambo tali yandjwa pefimbo loivilo yeni yokomudo, opo li kale edimba liwa* kuJehova. 4 Oo ta yandje eyambo laye oku na yo okuyandja kuJehova eendjayambo doufila wa nakwa nawa, oshitimulongo shoefa,* wa lumbakanifwa mumwe noshitine sho-hin* shomaadi. 5 Ou na yo okuyamba omaviinyu e li oshikunwayambo, oshitine sho-hin, pamwe nexwikiloyambo, ile eyambo lodjona keshe yondume. 6 Ile ngeenge eyambo lodi yondume, ou na okuyandja eendjayambo doitimulongo ivali yoshiyelekifo shoefa shoufila wa nakwa nawa, wa lumbakanifwa noshititatu sho-hin shomaadi. 7 Ou na okuyandja omaviinyu e li oshikunwayambo, oshititatu sho-hin, e li edimba liwa* kuJehova.

8 “‘Ashike ngeenge oto yandje ongobe yondume i li exwikiloyambo, ile eyambo lokuninga eano le likalekelwa, ile eyambo loukumwe kuJehova, 9 ou na yo oku li yandja pamwe nongobe yondume, i li eendjayambo doitimulongo itatu yoshiyelekifo shoefa shoufila wa nakwa nawa wa lumbakanifwa netata lo-hin yomaadi. 10 Ou na yo okuyamba omaviinyu, e li oshikunwayambo, etata lo-hin e li eyambo la yambwa okupitila momundilo, li li edimba liwa* kuJehova. 11 Osho osho shi na okuningilwa ongobe yomhedi keshe, ile odi keshe yondume, ile eedjona deendume, ile oikombo. 12 Kashi na nee mbudi kutya otamu yandje omayambo oinamwenyo i fike peni, osho osho mu na okuningila keshe shimwe, she likolelela komuvalu wayo. 13 Omuisrael keshe pakudalwa osho e na okuyamba ngaho, eyambo la yambwa okupitila momundilo, li li edimba liwa* kuJehova.

14 “‘Ngeenge omunailongo oo ha di punye, ile umwe oo a kala mokati keni efimbo lile ota yandje yo eyambo la yambwa okupitila momundilo li li edimba liwa* kuJehova, oku na okuninga ngaashi tamu ningi. 15 Nye ovo mu li meongalo nosho yo ovanailongo ovo hava di punye, otamu kala mu na onghedimhango imwe. Oi na okukala onghedimhango yaalushe komapupi eni aeshe. Ovanailongo ove na okukala ngaashi nye koshipala shaJehova. 16 Ope na okukala omhango imwe netokolo limwe kunye nokovanailongo ovo hava di punye.’”

17 Jehova okwa twikila okupopya naMoses, ta ti: 18 “Popya nOvaisrael u va lombwele kutya, ‘Ngeenge omwa i medu omo handi mu twala, 19 ndele tamu li umwe womomungome* womedu olo, omu na okuyandja omayambidido kuJehova. 20 Omu na okuyandja omayambidido omingome, di li ongonga di na ombululu pokati, da ningwa moufila inau nakwa woilya, oyo ya pya tete. Omu na oku di yandja ngaashi omayambidido oposhipale haa yandjwa. 21 Omu na alushe okukala hamu yandje omayambidido kuJehova okudja moufila inau nakwa nawa woilya, oyo ya pya tete fiyo okomapupi eni aeshe.

22 “‘Ngeenge omwa ningi epuko nomwa dopa okudulika koipango aishe, oyo Jehova a lombwela Moses, 23 koinima aishe, oyo Jehova e mu lombwela okupitila muMoses, okudja kefiku olo Jehova a yandja oipango fiyo okomapupi eni, 24 nongeenge osha li sha ningwa papuko nopehe na eshiivo lOvaisrael, Ovaisrael aveshe ove na okuyamba ondumetana imwe i li exwikiloyambo ledimba liwa* kuJehova, pamwe neendjayambo dalo noshikunwayambo shalo, she likolelela kwaasho hashi ningwa nosho yo okakombo kamwe ketimbayambo. 25 Omupristeri ota ka koshola Ovaisrael aveshe, notava ka diminwa po, molwaashi osha li epuko, nova li va eta eyambo lavo, eyambo la yambelwa Jehova okupitila momundilo, nosho yo etimbayambo lavo koshipala shaJehova omolwepuko lavo. 26 Ovaisrael aveshe otava ka diminwa po nosho yo ovanailongo, ovo ve li mokati kavo, molwaashi ovanhu aveshe ova li va ninga epuko.

27 “‘Ngeenge omunhu* okwa nyono papuko, oku na okuyamba okakombo kokandema komudo umwe ketimbayambo. 28 Omupristeri ota ka koshola omunhu,* oo a ninga epuko, eshi a nyona koshipala shaJehova shihe fi oshiningilewina, onghee ota ka kosholwa note ke li diminwa po. 29 Ovaisrael pakudalwa nosho yo ovanailongo ovo hava di mokati kavo, ove na okukala ve na omhango imwe, ngeenge tashi uya pokuninga oshinima shihe fi oshiningilewina.

30 “‘Ashike omunhu* oo ta ningile oshinima owina, kutya nee Omuisrael pakudalwa, ile omunailongo, ota sheke Jehova noku na okudimwa* mo moshiwana shavo. 31 Molwaashi okwa tonda ondjovo yaJehova nokwa nyona oshipango shaye, omunhu* oo oku na okudimwa po filufilu. Ota handukilwa omolwenyono laye.’”

32 Eshi Ovaisrael va li mombuwa, ova li va hanga omulumenhu umwe ta tyava oikuni mefiku lEshabata. 33 Ovo va li va hanga ta tyava oikuni ove mu twala kuMoses naAron nokOvaisrael aveshe. 34 Ove mu tulifa modolongo, molwaashi kakwa li kwa popiwa kondadalunde osho e na okuningilwa.

35 Jehova okwa tya kuMoses: “Omulumenhu oo oku na okudipawa filufilu, nOvaisrael aveshe ove na oku mu denga nomamanya kondje yonhanda.” 36 Ovaisrael aveshe ove mu twala kondje yonhanda, ndele tave mu denge nomamanya fiyo a fya, ngaashi ashike Jehova a li a lombwela Moses.

37 Jehova okwa twikila okupopya naMoses, ta ti: 38 “Popya nOvaisrael u va lombwele kutya, ove na okuningila komingenge doikutu yavo eenyemba fiyo okomapupi avo aeshe, nove na okutula ko ongodi imbulau i li pombada yeenyemba odo di li komingenge doikutu. 39 ‘Omu na okukala mu na eenyemba edi nongodi imbulau, opo ngeenge mwe di mono mu dimbuluke oipango aishe yaJehova nokudulika kuyo. Inamu shikula omitima deni nomesho eni, oyo tai mu ningifa mu haele pamhepo. 40 Osho otashi ke mu kwafela mu dimbuluke oipango yange aishe nomu dulike kuyo, nokukala ovayapuki kuKalunga keni. 41 Aame Jehova, Kalunga keni, oo e mu pitifa mo medu laEgipiti, opo ndi ulike kutya aame Kalunga keni. Aame Jehova, Kalunga keni.’”

16 Kora, omonamati waIshar, omonamati waKohat, omonamati waLevi, ova ya pamwe naDatan naAbiram, ovanamati vaEliab, nosho yo On, omonamati waPelet, vomoludalo laRuben. 2 Ova tukululila Moses oshibofa pamwe novalumenhu Ovaisrael 250, omalenga Ovaisrael, ovo va hoololwa meongalo, ovalumenhu ovo va fimanekwa. 3 Opo nee ova ongala pamwe nova tangunina Moses naAron, tava ti: “Otwe mu loloka! Ongudu aishe, sha hala okutya, ovanhu aveshe, oiyapuki, na Jehova oku li mokati kavo. Ndele omolwashike nye tamu litumbaleke nye vene meongalo laJehova?”

4 Eshi Moses eshi uda, okwe linyongamena pedu. 5 Opo nee okwa tya kuKora nokovayambididi vaye aveshe: “Ongula Jehova ota ka shiivifa kutya olyelye a ama kombinga yaye, naao omuyapuki, oo e na okuya kuye, nakeshe oo a hoolola ota ka ehena popepi naye. 6 Ningeni ngaha: Kora novayambididi voye aveshe, 7 kufeni oikwatelwa yomundilo, ndele tamu tula mo omundilo nokutula mo oitwimifo koshipala shaJehova mongula, naao Jehova ta ka hoolola oye omuyapuki. Nye ovanamati vaLevi otamu ningi oinima itamu dulu oku i kalela po!”

8 Opo nee Moses okwa tya kuKora: “Alikana, pwilikineni, nye ovanamati vaLevi. 9 Mbela omu wete oshinima shanafangwa, eshi Kalunga kaIsrael e mu yoolola mo mongudu yOvaisrael noku mu efa mu ye kuye, opo mu dule okulonga oilonga yoketwalihangano laJehova nomu fikame mokati kongudu mu i yakule? 10 Ile omu wete oshinima shanafangwa, eshi e mu eta popepi naye pamwe novamwanyoko, ovanamati vaLevi? Omolwashike mwa hala okukondjela oupristeri? 11 Omolwetomheno olo, ove novayambididi voye aveshe, ovo mwa ongala pamwe navo, omu li omhinge naJehova. Ashike Aron oye lyelye, opo mu mu ngongotele?”

12 Lwanima, Moses okwa tuma a ifanenwe Datan naAbiram, ovanamati vaEliab, ndele ova tya: “Itatu uya ko! 13 Mbela oshinima shanafangwa, eshi we tu kufa medu tali kunguluka omashini nomaadi eenyiki u uye u tu dipaele mombuwa? Paife owa hala yo okulininga kanyamukulwa?* 14 Ino tu twala nokuli medu tali kunguluka omashini nomaadi eenyiki, ile u tu pe epya, ile oshikunino shomandjebele. Owa hala ashike okuungaunga novalumenhu ovo wa fa u li novapofi? Itatu uya ko oko!”

15 Onghee osho osha handukifa Moses neenghono, ndele ta ti kuJehova: “Ino tambula ko eendjayambo davo. Inandi va kufa nande ondongi imwe, noinandi ehameka nande oumwe womuvo.”

16 Opo nee Moses okwa tya kuKora: “Inda pamwe novayambididi voye aveshe koshipala shaJehova mongula, nye navo nosho yo Aron. 17 Keshe umwe na kufe oshikwatelwa shaye shomundilo, ndele ta tula po oitwimifo, nakeshe umwe na yandje oshikwatelwa shaye shomundilo koshipala shaJehova, oikwatelwa yomundilo 250, notave ke i yandja pamwe naave naAron, keshe umwe e na oshikwatelwa shaye shomundilo.” 18 Onghee keshe umwe okwa kufa oshikwatelwa shaye shomundilo, ndele tava tula po omundilo noitwimifo, nokufikama poshivelo shetwali lokwoongalela pamwe naMoses naAron. 19 Eshi Kora a ongaleka ovayambididi vaye, ovo navo ve li omhinge naMoses naAron, poshivelo shetwali lokwoongalela, oshinge shaJehova osha holokela Ovaisrael aveshe.

20 Jehova okwa lombwela Moses naAron, a ti: 21 “Liyoololeni mo mokati kOvaisrael ovo, opo ndi va hanaune po meendelelo.” 22 Onghee ove linyongamena pedu, ndele tava ti: “Kalunga, Kalunga oo a yandja omwenyo kovanhu aveshe,* mbela enyono lomunhu umwe otali ku ningifa u handukile ovanhu aveshe ovo?”

23 Jehova okwa tya kuMoses: 24 “Popya nOvaisrael u va lombwele kutya, ‘Djeni po popepi netwali laKora, laDatan nolaAbiram!’”

25 Opo nee Moses okwa fikama, ndele ta i kuDatan naAbiram, novakulunhu vaIsrael ova ya pamwe naye. 26 Okwa lombwela ongudu a ti: “Alikana, djeni po pomatwali ovalumenhu ovo ovakolokoshi, noinamu kwata oshinima shavo keshe, opo muha hanaunwe po omolwomanyono avo aeshe.” 27 Diva ova dja po petwali laKora, laDatan nolaAbiram keembinga adishe, na Datan naAbiram ova dja mo, ndele tava fikama poivelo yomatwali avo, pamwe novakulukadi vavo, ovanamati vavo nounona vavo.

28 Opo nee Moses okwa tya: “Kungaho otamu ka shiiva kutya Jehova oye a tuma nge ndi longe oinima aishe oyo, ndele inashi dja komutima wange mwene:* 29 Ngeenge ovanhu ava ova fi ngaashi ovanhu aveshe hava fi, nongeenge ova handukilwa ngaashi ovanhu aveshe, osha yela kutya Jehova ina tuma nge. 30 Ashike ngeenge Jehova okwe va ningile oshinima shikumwifi, ndele edu tali makula okanya kalo noku va pona po nosho yo oinima yavo aishe, ndele tava i nomwenyo mOmbila,* otamu ka shiiva filufilu kutya ovalumenhu ovo kava li va fimaneka Jehova.”

31 Diva eshi a mana okupopya eendjovo adishe odo, edu opo va li ola makuka. 32 Onghee edu ola makula okanya kalo noku va pona po pamwe nomaukwaneumbo avo nosho yo aveshe ovo va ama kombinga yaKora noinima yavo aishe. 33 Onghee ovanhu ovo naaveshe ovo va ama kombinga yavo, ova ya nomwenyo mOmbila,* nedu ole va uvika nova xulifwa po mokati keongalo. 34 Ovaisrael aveshe ovo va li ve va dingilila ova faduka po tava kuu, tava ti: “Otwa tila kutya pamwe edu otali tu pona po!” 35 Opo nee kuJehova okwa dja omundilo, ndele tau lungwinifa po ovalumenhu 250, ovo va li ve uya okuyamba oitwimifo.

36 Jehova okwa tya kuMoses: 37 “Lombwela Eliaser, omonamati womupristeri Aron, a kufe mo oikwatelwa yomundilo momundilo, molwaashi oiyapuki. Mu lombwela yo a ekeleshi omundilo oo kokule. 38 Oikwatelwa yomundilo yovalumenhu ovo va nyona, enyono olo la kanififa eemwenyo davo,* oi na okuhambulwa moipapa ya pepuka, opo i natekwe koaltari, molwaashi ove i yandja koshipala shaJehova noya ninga iyapuki. Oi na okukala edidiliko kOvaisrael.” 39 Onghee omupristeri Eliaser okwa kufa oikwatelwa yomundilo yongopolo, oyo ya yandjwa kwaavo va xwikwa po, ndele te i hambula, opo i natekwe koaltari, 40 ngaashi ashike Jehova a li e mu lombwela okupitila muMoses. Osha li edimbulukifo kOvaisrael kutya omunhu keshe oo ehe na epitikilo,* oo ehe fi womoludalo laAron, ke na oku ka xwika oitwimifo koshipala shaJehova, nokape na umwe e na okukala ngaashi Kora novayambididi vaye.

41 Mefiku la shikula ko, ongudu aishe yOvaisrael oya hovela okungongotela Moses naAron, tai ti: “Nye vavali omwa dipaifa ovanhu vaJehova.” 42 Ongudu oyo ya li ya ongala pamwe i li omhinge naMoses naAron, eshi ya piluka ya taalela ketwali lokwoongalela, tala, oshilemo oshe li uvika, noshinge shaJehova osha holoka.

43 Moses naAron ova ya komesho yetwali lokwoongalela, 44 na Jehova okwa tya kuMoses: 45 “Ovalumenhu nye, liyoololeni mo mokati kongudu oyo, opo ndi i hanaune po mepakumo leisho.” Opo nee ove linyongamena pedu. 46 Moses okwa tya kuAron: “Kufa oshikwatelwa shomundilo, ndele to tula mo omundilo wa dja koaltari nokutula mo oitwimifo, ndele to i divadiva kongudu noku i koshola, molwaashi ehandu laJehova ole uya. Ehandukilo ola hovela!” 47 Opo nee Aron okwe shi kufa ngaashi Moses a li e mu lombwela, ndele ta tondokele mokati keongalo, ndele tala, ehandukilo ola hovela mokati kovanhu. Onghee okwa tula oitwimifo moshikwatelwa shomundilo, ndele ta hovele okukoshola ovanhu. 48 Okwa kala a fikama pokati kovafi novanamwenyo, opo nee ehandu ola lota. 49 Ovo va fya omolwehandukilo ove fike po 14 700, kakele kaavo va fya omolwaKora. 50 Eshi ehandukilo la lota, Aron okwa shuna kuMoses poshivelo shetwali lokwoongalela.

17 Jehova okwa tya kuMoses: 2 “Popya nOvaisrael, ndele tave ku pe odibo yepata keshe, tai di kelenga lepata keshe, eedibo adishe kumwe odi na okukala 12. Shanga edina lakeshe umwe kodibo yaye. 3 Ou na okushanga edina laAron kodibo yaLevi, molwaashi odibo imwe oi lile po omutwe wepata keshe. 4 Eedibo odo ou na oku di tula metwali lokwoongalela popepi noshikefa shOipelende yOumbangi, opo handi ku lihololele pandjikilile. 5 Odibo yomulumenhu oo handi hoolola otai ka tutuma, nohandi ka mweneka Ovaisrael ovo tava ngongotele nge, notave mu ngongotele yo.”

6 Onghee Moses okwa popya nOvaisrael, nomalenga aeshe okwe mu pa eedibo, odibo yelenga lepata keshe, eedibo 12, nodibo yaAron oya li mokati keedibo davo. 7 Opo nee Moses okwa tula eedibo odo koshipala shaJehova metwali omo mu na oshikefa shOipelende yOumbangi.

8 Mefiku la shikula ko, eshi Moses a ya metwali omo mu na oshikefa shOipelende yOumbangi, tala, odibo yaAron, yomeumbo laLevi, oya li ya tutuma, ya tula ko eenhemo, ya ninga eengala noya ima ee-almond da pya. 9 Opo nee Moses okwa kufa po eedibo adishe koshipala shaJehova, nokwe di etela Ovaisrael aveshe. Ove di tala, nomulumenhu keshe okwa kufa po odibo yaye.

10 Jehova okwa lombwela Moses, a ti: “Shuna odibo yaAron koshikefa shOipelende yOumbangi i kale edidiliko lovanashibofa, opo okungongotela nge kwavo ku xule po, novaha fye.” 11 Moses okwa ninga divadiva ngaashi Jehova e mu lombwela. Osho naanaa a ninga.

12 Opo nee Ovaisrael ova tya kuMoses: “Paife ohatu fi, ohatu xulu po filufilu, atushe ohatu ka xula po filufilu! 13 Keshe oo te uya popepi netwalihangano laJehova ota ka fya! Mbela osho ashike tu na okufya ngaho?”

18 Jehova okwa tya kuAron: “Ove, ovanamati voye nepata loye otamu ka handukilwa omolwenyono keshe tamu nyono shi na sha nonhele iyapuki nosho yo ove novanamati voye otamu ka handukilwa omolwenyono keshe tamu nyono li na sha noupristeri. 2 Eta yo popepi ovamwaxo vomepata laLevi, epata looxokulululwa, opo va dule oku ku waimina nove ku yakule nosho yo ovanamati voye komesho yetwali omo mu na oshikefa shOipelende yOumbangi. 3 Ove na okuwanifa po oilonga aishe oyo to va pe nosho yo oilonga aishe yometwali. Ashike kave na okuuya popepi noilongifo yomonhele iyapuki noyoaltari, opo nye navo muha fye. 4 Otave ke ku waimina notava ka wanifa po oinakuwanifwa yavo i na sha netwali lokwoongalela noilonga aishe yometwali, ndele omunhu oo ina pitikwa* ina ehena popepi nanye. 5 Omu na okuwanifa po oinakuwanifwa yeni i na sha nonhele iyapuki noaltari, opo ovanhu vOmuisrael vaha hangwe vali kehandukilo limwe. 6 Onda kufa ovamwaxo Ovalevi mokati kOvaisrael ve li oshali yoye. Ova yandjwa va ninge vaJehova, opo va file oshisho oilonga yometwali lokwoongalela. 7 Ove novanamati voye omu na oshinakuwanifwa shoupristeri shi na sha noaltari, noyaasho shi li meni letukulifolapi, nomu na okulonga oilonga oyo. Onde mu pa oilonga youpristeri i li eeshali kunye, nomunhu keshe ina pitikwa,* oo ta ehene popepi, oku na okudipawa.”

8 Jehova okwa popya vali naAron, a ti: “Ame onde ku pa oshinakuwanifwa shokupashukila omayambidido oo handi pewa. Onde ku pa pamwe novanamati voye oshitukulwa moinima aishe iyapuki oyo Ovaisrael va yambidida shi kale oshipambuliko sheni shaalushe. 9 Oinima oyo ya dja momayambo mayapuki elela, oo a yambwa okupitila momundilo, otai ningi yoye; eyambo keshe tava yambe, mwa kwatelwa eendjayambo davo, omatimbayambo avo nelivelombediyambo lavo oo va etela nge. Oku li oshinima shiyapuki elela kwoove nokovanamati voye. 10 Ou na oku i lila monhele iyapuki elela. Omulumenhu keshe ota dulu oku i lya. Otai kala oshinima shiyapuki kwoove. 11 Oinima ei nayo oyoye: eeshali odo va yambidida nosho yo omadungadungifwayambo aeshe Ovaisrael. Onde i ku pa novanamati novanakadona voye i li oshipambuliko shaalushe. Keshe oo a koshoka meumbo loye ota dulu oku i lya.

12 “Omaadi aeshe mawa elela, omaviinyu aeshe mape mawa elela noilya, oiimati yavo, oyo ya pya tete, oyo va yandja kuJehova, ohandi i ku pe. 13 Oiimati yoludi keshe, oyo ya pya tete, yomedu lavo, oyo tava etele Jehova, otai ningi yoye. Keshe umwe oo a koshoka meumbo loye ota dulu oku i lya.

14 Oshinima keshe sha yapulwa* muIsrael otashi ningi shoye.

15 “Oiveli aishe yoinima aishe i na omwenyo,* oyo tava yambele Jehova, kutya omunhu, ile oshinamwenyo, otai ningi yoye. Ashike ou na okukulila filufilu oshiveli shomunhu, noshinamwenyo osho sha dalwa tete inashi koshoka ou na oku shi kulila. 16 Ou na okukulila oiveli nondado ya yeleka, ngeenge oi na omwedi umwe okuyuka pombada, i fike pongushu oyo ya tengenekwa yeesekeli* nhano doshisilveri she likolelela kosekeli* yomonhele iyapuki.* Oyo i fike peegera* 20. 17 Ongobe oyo ya dalwa tete, ile odjona yondume oyo ya dalwa tete, ile oshikombo osho sha dalwa tete, oyo ashike uhe na okukulila. Oi li oinima iyapuki. Ou na okushamina ohonde yayo koaltari nokuxwika oinghene yayo i li eyambo la yambwa okupitila momundilo ledimba liwa* kuJehova. 18 Ombelela yayo otai ningi yoye. Ombelela oyo i na okuninga yoye ongaashi ombadja yedungadungifwayambo noshilama shokolulyo. 19 Omayambidido aeshe mayapuki, oo Ovaisrael tava yambele Jehova, onde e ku pa novanamati voye novanakadona voye e li oshipambuliko shaalushe. Osho oshi li ehangano laalushe lomongwa* koshipala shaJehova, kwoove nokoludalo loye.”

20 Jehova okwa twikila okulombwela Aron, ta ti: “Medu lavo ito ka fyuulula mo sha, nokape na oshitukulwa shedu shi li mokati kavo tashi ka ninga shoye. Aame oshitukulwa shoye nefyuululo loye mokati kOvaisrael.

21 “Tala kutya onda pa ovanamati vaLevi oshitimulongo keshe muIsrael shi li efyuululo omolwoilonga oyo tava wanifa po, oilonga yometwali lokwoongalela. 22 Ovanhu vomuIsrael itava ka ehena vali popepi netwali lokwoongalela, ngeenge ove shi ningi, otava nyono, ndele tava fi. 23 Ovalevi ove na okuwanifa po oilonga yometwali lokwoongalela; ovo tava ka handukilwa omolwomanyono avo. Kave na okukufa oshitukulwa medu omo mu na Ovaisrael; osho oshi li onghedimhango yaalushe komapupi eni aeshe. 24 Ame onda pa Ovalevi oshitukulwa shoshitimulongo, osho sha yandjwa kovanhu vomuIsrael shi li efyuululo, osho tava ka yandja kuJehova. Nomolwaasho nde va lombwela kutya, ‘Mokati kOvaisrael kave na okukufa mo oshitukulwa shefyuululo.’”

25 Opo nee Jehova okwa tya kuMoses: 26 “Ou na okulombwela Ovalevi kutya, ‘Omu na okupewa kOvaisrael oshitukulwa oshitimulongo osho nde mu pa sha dja kuvo shi li efyuululo leni, nomu na okukufa mo osho tamu yandje oshitukulwa oshitimulongo shi li omayambidido kuJehova. 27 Otashi ka talwa ko shi li omayambidido eni ngaashi, oilya yoposhipale, ile omaviinyu mahapu omoshikolelo, ile omaadi a hengwa. 28 Kungaho, otamu ka yandja yo omayambidido kuJehova a dja moitimulongo aishe, oyo mwa pewa kOvaisrael, nomuyo otamu ka kufa mo omayambidido aJehova mu a yandje komupristeri Aron. 29 Omayambidido aeshe aJehova, oo a dja meeshali adishe diwa elela odo mwa pewa, omu na oku a yandja e li oshinima shiyapuki.’

30 “Ou na oku va lombwela kutya, ‘Ngeenge nye Ovalevi omwa yandje omayambidido omuo a denga mbada, otaa ka talwa ko onga oilya yoposhipale, omaviinyu omoshikolelo, ile omaadi a hengwa. 31 Ove nosho yo ovaneumbo loye otamu dulu oku i lila ponhele keshe, molwaashi oi li ondjabi yeni omolwoilonga oyo hamu longo ketwali lokwoongalela. 32 Itamu ka kala mu na etimba mwaashi, ngeenge omwa yandje omayambidido omuo a denga mbada, nokamu na okunyateka oinima iyapuki yOvaisrael, opo muha fye.’”

19 Jehova okwa popya vali naMoses naAron, ta ti: 2 “Ei omhango oyo Jehova a yandja, a ti, ‘Lombwela Ovaisrael kutya nave ku etele ongobe yonghadi itilyana ya koshoka ihe na oupyakadi washa noinai humbata nande ondjoko. 3 Omu na oku i yandja komupristeri Eliaser, note ke i twala kondje yonhanda, ndele tai dipawa moipafi yaye. 4 Opo nee omupristeri Eliaser ota ka kufa ohonde yayo imwe nomunwe waye, ndele ta shamine ohonde yayo luheyali lwoposhivelo shetwali lokwoongalela. 5 Ongobe oyo otai ka xwikwa po moipafi yaye. Oshikafa shayo, ombelela yayo, ohonde yayo nosho yo oshandja shayo otai ka xwikwa po. 6 Omupristeri ota ka kufa oikuni yomusederi, oshixwa shaisopi noshiyata shitilyana, ndele te i ekele momundilo, opo ongobe tai xwikilwa. 7 Opo nee omupristeri ota ka kosha oikutu yaye note ke likosha* nomeva, nokonima yaasho ota dulu okuya monhanda, ndele omupristeri ota kala ina koshoka fiyo okonguloshi.

8 “‘Ou ta xwike po ongobe oyo ota ka kosha oikutu yaye nomeva note ke likosha* nomeva, ndele ota kala ina koshoka fiyo okonguloshi.

9 “‘Omulumenhu oo a koshoka ota ka ongela omute wongobe oyo note ke u twala kondje yonhanda ponhele ya koshoka, notau ka tuvikilwa kongudu yOvaisrael, opo ve u pilulile mumwe nomeva oo taa longifwa okukoshola. Oi li etimbayambo. 10 Ou ta ongele omute wongobe oyo ota ka kosha oikutu yaye nota kala ina koshoka fiyo okonguloshi.

“‘Oyo oi na okukala onghedimhango yaalushe kOvaisrael nokovanailongo ovo hava di mokati kavo. 11 Keshe oo ta kumu omunhu keshe a fya ota kala ina koshoka omafiku aheyali. 12 Omunhu oo oku na okulikoshola nomeva* mefiku etitatu, nomefiku etiheyali ota kala a koshoka. Ndele ngeenge ine likoshola mefiku etitatu, mefiku etiheyali ita kala a koshoka. 13 Keshe oo ta kumu oshimhu shomunhu keshe a fya, ndele ine likoshola, okwa nyateka etwalihangano laJehova, nomunhu* oo oku na okudimwa* mo muIsrael. Molwaashi ina shaminwa nomeva okukoshola, ota twikile okukala ina koshoka. Ota kala ina koshoka.

14 “‘Ei omhango oyo i na okushikulwa, ngeenge omunhu a file metwali: Keshe oo ta i metwali, nakeshe oo a hangika mo metwali ota kala ina koshoka omafiku aheyali. 15 Oshikwatelwa keshe sha patuluka shihe na oshituviko sha mangelwa ko inashi koshoka. 16 Keshe oo ta kumu omunhu a dipawa neongamukonda, ile oshimhu, ile ekipa lomunhu, ile ombila kondje yonhanda, ota kala ina koshoka omafiku aheyali. 17 Opo ku kosholwe omunhu oo ina koshoka, ove na okukufa omute umwe wetimbayambo olo la xwikwa po, ndele tave u tile omeva moshikwatelwa taa kunguluka. 18 Opo nee omulumenhu oo a koshoka ota ka kufa oshixwa shaisopi, ndele te shi yaveke momeva, nota ka shamina ketwali, koikwatelwa aishe nokovanhu* ovo va li po nokomunhu oo a kwata ekipa, ile omunhu oo a dipawa, ile oshimhu, ile ombila. 19 Omunhu oo a koshoka ote ke a shamina komunhu oo ina koshoka mefiku etitatu nomefiku etiheyali, note ke mu koshola ketimba laye mefiku etiheyali, opo nee oku na okukosha oikutu yaye, ndele te likosho nomeva, nota ka kala a koshoka konguloshi.

20 “‘Ndele omulumenhu oo ina koshoka noite likoshola, omunhu* oo oku na okudimwa* mo meongalo, molwaashi okwa nyateka onhele iyapuki yaJehova. Ina koshoka, molwaashi ina shaminwa omeva okukoshola.

21 “‘Ei oi na okukala onghedimhango yavo yaalushe: Oo ta shamine nomeva okukoshola, oku na okukosha oikutu yaye, naao ta kumu omeva okukoshola ota kala ina koshoka fiyo okonguloshi. 22 Keshe osho tashi kumwa komunhu oo ina koshoka, otashi kala inashi koshoka, nomunhu* oo te shi kumu ota kala ina koshoka fiyo okonguloshi.’”

20 Momwedi wotete, ongudu aishe yOvaisrael oye uya mombuwa yaSin, noya hovela okukala hai di muKades. Miriam omo a fila omo, nomo a pakwa.

2 Ovaisrael kava li ve na omeva nova li va ongalela Moses naAron va handuka. 3 Ovanhu ova li tava tangunine Moses, tava ti: “Ngeno nafye otwa file, eshi vakwetu va fila koshipala shaJehova. 4 Omolwashike wa eta eongalo laJehova mombuwa omu, opo fye noinamwenyo yetu tu file omu? 5 Omolwashike we tu kufa mo muEgipiti u tu ete konhele ei ii? Monhele omu ito dulu okukuna mo eembuto, omikwiyu, omindjebele nomiti dogranati, nokamu na omeva okunwa.” 6 Opo nee Moses naAron ova dja ko komesho yeongalo, ndele tava i koshivelo shetwali lokwoongalela nove linyongamena pedu, noshinge shaJehova osha hovela oku va holokela.

7 Jehova okwa tya kuMoses: 8 “Kufa odibo, ndele to ongaleke Ovaisrael, ove nomumwaxo Aron, ndele to popi nemanya moipafi yavo, opo li yandje omeva alo, noto ke va kufila mo omeva memanya, ndele to va pe va nwe nosho yo oimuna yavo.”

9 Onghee Moses okwa kufa odibo koshipala shaJehova, ngaashi ashike e mu lombwela. 10 Opo nee Moses naAron ova ongaleka eongalo komesho yemanya, ndele Moses ta ti kuvo: “Ovanashibofa nye, pwilikineni! Natu mu kufile mo omeva memanya eli?” 11 Onghee Moses okwa yelula eke laye pombada, ndele ta denge emanya luvali nodibo yaye, nomwa li mwa dja omeva mahapu, nOvaisrael ova hovela okunwa nosho yo oimuna yavo.

12 Lwanima, Jehova okwa tya kuMoses naAron: “Molwaashi inamu ulika eitavelo mwaame noinamu yapulifa nge moipafi yOvaisrael, itamu ka twala eongalo medu olo handi ke li pa.” 13 Oo omeva omuMeriba,* opo Ovaisrael va ngongotela Jehova, opo nee okwe liyapulifa mokati kavo.

14 Moses okwa tuma ovatumwa va dja kuKades va ye kohamba yaEdom va tye kuyo: “Eshi osho omumwaxo Israel, ta ti, ‘Ove ou shii nawanawa oupyakadi aushe oo twa pita muo. 15 Ootatekulululwa ova ile kuEgipiti, notwa kala muEgipiti omido* dihapu, nOvaegipiti ova ungaunga nafye nai nosho yo nootatekulululwa. 16 Onghee otwa kuwa kuJehova nokwe tu uda, ndele ta tumu omweengeli nokwe tu kufa mo muEgipiti, paife otu li muKades, oshilando shi li peengaba doshitukulwa shoye. 17 Alikana, tu kwafela tu ende medu loye. Itatu ka enda nande mepya limwe, ile moshikunino shomandjebele, noitatu ka nwa omeva omondungu nande oimwe. Ohatu ka enda mondjila yohamba noitatu ka kanduka mo tu ye kolulyo, ile kolumosho, fiyo osheshi twa pita mo moshitukulwa shoye.’”

18 Onghee Edom okwa tya kuvo: “Inamu pita moshitukulwa shetu, ngeenge omwe shi ningi, ohandi ka dja mo neongamukonda ndi mu shakeneke.” 19 Ovaisrael ova tya kuye: “Ohatu ka ya nondjila oyo ya kula, nongeenge fye noimuna yetu otwa nu omeva oye, ohatu ke a futa. Katu na vali shimwe twa hala, okupita mo ashike kolupadi.” 20 Natango okwa tya: “Itamu taulula mo.” Onghee Edom okwa dja mo e ke va shakeneke pamwe novanhu vahapu nosho yo etangakwaita* enaenghono. 21 Edom okwa anya okweefa Ovaisrael va pite moshitukulwa shaye; onghee Ovaisrael ova aluka ko kuye.

22 Ovanhu vomuIsrael, ongudu aishe yOvaisrael, ova dja mo muKades, ndele tava i komhunda Hor. 23 Jehova okwa lombwela Moses naAron komhunda Hor, peengaba dedu laEdom, a ti: 24 “Aron ota ka pakwa povakwao.* Ita ka ya mo medu olo handi ka pa Ovaisrael, molwaashi nye amushe inamu dulika kelombwelo lange li na sha nomeva opuMeriba. 25 Kufa Aron nomonamati waye Eliaser, ndele to va eta pomhunda Hor. 26 Kufa mo oikutu yaAron, ndele to i dike omonamati waye, Eliaser, na Aron oko ta ka fila oko.”*

27 Moses okwa ninga naanaa ngaashi Jehova e mu lombwela, nova londa komhunda Hor moipafi yOvaisrael aveshe. 28 Onghee Moses okwa kufa mo oikutu yaAron, ndele te i dike omonamati waye Eliaser. Konima yaasho, Aron okwa fila koxulo yomhunda. Opo nee Moses naEliaser ova dja ko komhunda. 29 Eshi Ovaisrael aveshe va mona kutya Aron okwa fya, eumbo alishe laIsrael ola lila Aron omafiku 30.

21 Eshi Omukaanan, ohamba yaArad, oo ha di muNegeb, a uda kutya Ovaisrael otava ende mondjila yaAtarim, okwa ponokela Ovaisrael, ndele ta kwata po vamwe vomuvo ve li eenghwate. 2 Opo nee Ovaisrael ova ninga eano eli kuJehova, va ti: “Ngeenge owa yandje oshiwana eshi meke letu, ohatu ka hanauna po oilando yasho filufilu.” 3 Jehova okwa pwilikina kondaka yOvaisrael, ndele ta yandje Ovakaanan kuvo nove va hanauna po nosho yo oilando yavo. Onghee ova luka onhele oyo Horma.*

4 Eshi va twikila nolweendo lavo okudja pomhunda Hor, va ya nondjila yokEfuta Litilyana, opo va ka kunghule nedu laEdom, ovanhu* ova li va loloka kolweendo. 5 Ovanhu ova twikila okupopila mowii Kalunga nosho yo Moses, tava ti: “Omolwashike mwe tu kufila mo muEgipiti tu file mombuwa? Kamu na oikulya nomeva, nafye* otu tonde* omungome ou mwii.” 6 Jehova okwa tuma omayoka e na oudiyo* mokati kovanhu, nokwa kala taa li ovanhu, nOvaisrael vahapu ova fya.

7 Onghee ovanhu ova ya kuMoses, ndele tava ti: “Otwa nyona, eshi twa popila mowii Jehova nosho yo eshi twe ku popila mowii. Ilikana kuJehova a kufe po omayoka pufye.” Moses okwa ilikana ponhele yovanhu. 8 Opo nee Jehova okwa tya kuMoses: “Ninga eyoka la fela keyoka olo li na oudiyo,* ndele to li tula kopala. Ngeenge umwe a lika, ota ka tala kulo, opo a kale nomwenyo.” 9 Moses okwa li a ninga eyoka longopolo, ndele te li tula kopala, nongeenge omunhu okwa lika keyoka, ndele ta tale keyoka olo longopolo, oha xupu.

10 Konima yaasho, Ovaisrael ova dja po, ndele tava ka onga onhanda muObot. 11 Opo nee ova dja mo muObot, ndele tava ka onga onhanda muIye-abarim, mombuwa oyo ya li popepi naMoab, osho sha li koushilo. 12 Ova dja po opo, ndele tava ka onga onhanda mEfilu laSered. 13 Eshi va dja opo, ova ka onga onhanda moshitukulwa shaArnon, osho shi li mombuwa oyo ya dja keengaba dOvaamori, osheshi Arnon osha li eengaba daMoab, shi li pokati kaMoab nOvaamori. 14 Nomolwaasho embo loita yaJehova la popya kombinga “yaVaheb shomuSufa nosho yo omalufilu omuArnon, 15 nomakungulukilo* omalufilu, oo a dja koshitukulwa shaAr nokwa kwatakanifa eengaba daMoab.”

16 Okudja opo, ova ya kuBeer. Jehova okwa li a lombwela Moses shi na sha nondungu oyo, a ti: “Ongela ovanhu, opo ndi va pe omeva.”

17 Pefimbo opo, Ovaisrael ova imba eimbilo eli:

“Ondungu, fuluka omeva, i nyamukuleni!*

Opo nee ova dja mo mombuwa nova ya kuMattana, 19 eshi va dja muMattana ova ya kuNahaliel, naashi va dja kuNahaliel ova ya kuBamot. 20 Ova dja mo muBamot nova ya kefilu, olo li li moshitukulwa* shaMoab, koxulo yaPisga, oko to dulu okumonena Jeshimon.*

21 Ovaisrael ova tuma ovatumwa kuSihon, ohamba yOvaamori, va ti: 22 “Tu kwafela tu endele medu loye. Itatu ka kanduka tu ye mepya, ile moshikunino shomandjebele. Itatu ka nwa omeva omondungu nande oimwe. Ohatu ka enda mOndjila yOhamba, fiyo osheshi twa pita mo moshitukulwa shoye.” 23 Ashike Sihon ka li a efa Ovaisrael va pite moshitukulwa shaye. Ponhele yaasho, Sihon okwa li a ongela ovanhu vaye aveshe, ndele tava i va ka lwife Ovaisrael mombuwa, nova ya kuJahas, ndele tava hovele okulwifa Ovaisrael. 24 Ndele Ovaisrael ove mu finda neongamukonda nova kufa ko oinima yomedu laye, okudja kuArnon fiyo okuJabbok, popepi nOvaammoni, osheshi Jaser oku li eengaba doshitukulwa shOvaammoni.

25 Onghee Ovaisrael ova kufa ko oilando ei aishe, nova hovela okukala hava di moilando aishe yOvaamori, muHesbon nosho yo needoolopa dasho adishe.* 26 Hesbon osha li oshilando shaSihon, ohamba yOvaamori, oo a lwifa ohamba yaMoab, ndele te i kufa edu layo alishe fiyo okuArnon. 27 Osho osho sha etifa po omupopyo wopaitevo womusheko tau ti:

“Ileni kuHesbon.

Oshilando shaSihon nashi tungwe sho nashi pamekwe.

28 Osheshi muHesbon omwa dja omundilo, elaka lomundilo la dja modoolopa yaSihon.

Owa lungwinifa po Ar shaMoab, ovapangeli vokeenhele dokoikulundudu yaArnon.

29 Woo nye Ovamoab! Otamu ka hanaunwa po, akutu ovanhu vaKemosh!

Okwa ningifa ovanamati vaye eenhauki novanakadona vaye eenghwate daSihon, ohamba yOvaamori.

31 Onghee Ovaisrael ova hovela okukala hava di medu lOvaamori. 32 Opo nee Moses okwa tuma ovalumenhu vamwe va ka ndaade Jaser. Ova li va kwata ko eedoolopa dasho,* ndele tava taataa mo Ovaamori ovo va li mo. 33 Konima yaasho ova aluka ko, ndele tava i nondjila ya finda kuBasan. Og, ohamba yaBasan, okwe uya pamwe novanhu vaye aveshe ve va shakeneke molwoodi muEdrei. 34 Jehova okwa lombwela Moses, a ti: “Ino mu tila, osheshi ame ohandi ke mu yandja novanhu vaye aveshe nosho yo edu laye meke loye, noto ke mu ningila ngaashi naanaa wa ningila Sihon, ohamba yOvaamori, oo a li ha di muHesbon.” 35 Onghee ova kala noku va dipaa, pamwe novanamati vaye novanhu vaye aveshe, fiyo aveshe va pwa po, nova kufa ko emona lomedu laye.

22 Opo nee Ovaisrael ova dja po opo, ndele tava ka onga onhanda momaluhaela aMoab popepi naJordan, okudja kuJeriko. 2 Balak, omonamati waSippor, okwa mona oinima aishe oyo Israel a ningila Ovaamori, 3 na Moab okwa li a tila unene ovanhu, molwaashi ova li vahapu neenghono, onghee Moab okwa li ta kakama koumbada omolwOvaisrael. 4 Moab okwa lombwela ovakulunhu vomuMidian, a ti: “Paife eongalo eli otali ka xwaka po oitukulwa yetu aishe oyo ye tu dingilila, ngaashi ashike omhedi tai li omwiidi mofuka.”

Pefimbo opo, Balak, omonamati waSippor, oye a li ohamba yaMoab. 5 Okwa tuma ovatumwa kuBileam, omonamati waBeor, kuPetor, osho shi li pomulonga* medu lavo. Okwa tuma kuye, ta ti: “Tala, ovanhu ova dja mo muEgipiti. Tala, ove lihanena edu alishe* keshe ashike apa to tale, nova tula popepi elela naame. 6 Alikana, ila paife, ndele to fingile nge ovanhu ava, osheshi ove na eenghono ve dule nge. Kungaho, pamwe ohandi ka dula oku va finda, ndele handi va taataa mo medu eli osheshi ondi shi shii kutya ou wa nangeka noupuna, ota kala a nangekwa noupuna, naau to fingi, ota kala a fingwa.”

7 Onghee ovakulunhu vomuMoab, novakulunhu vomuMidian ova ya kuBileam ve na ofuto yokunyanekela momake avo, ndele tave mu lombwele etumwalaka laBalak. 8 Opo nee okwa tya kuvo: “Kaleni apa oufiku ou, nohandi mu etele ondjovo keshe oyo Jehova ta lombwele nge.” Onghee omalenga aMoab okwa kala pamwe naBileam.

9 Kalunga okwe uya kuBileam, ndele ta ti: “Ovalumenhu ovo u li navo ovo oolyelye?” 10 Bileam okwa tya kuKalunga kashili: “Balak, omonamati waSippor, ohamba yaMoab, okwa tumina nge etumwalaka, ta ti: 11 ‘Tala, ovanhu ovo va dja muEgipiti ove lihanena edu alishe, keshe ashike apa to tale.* Ila paife u va fingile nge. Pamwe ohandi ka dula oku va lwifa, ndele handi va te mo.’” 12 Kalunga okwa tya kuBileam: “Ino ya pamwe navo. Ino finga ovanhu ovo, osheshi ova nangekwa noupuna.”

13 Bileam okwa penduka ongula inene, ndele ta lombwele omalenga aBalak, ta ti: “Indeni kedu leni, osheshi Jehova ina pitika nge ndi ye pamwe nanye.” 14 Opo nee omalenga aMoab okwa dja po nokwa shuna kuBalak, ndele taa ti: “Bileam okwa anya okuuya pamwe nafye.”

15 Ashike Balak okwa tuma natango omalenga mahapu nokwa fimanekwa e dule enya otete. 16 Okwe uya kuBileam, ndele taa ti kuye: “Balak, omonamati waSippor, okwa ti: ‘Alikana, ino efa nande osha shi ku imbe okuuya kwaame, 17 osheshi ohandi ke ku tumbalekifa unene nohandi ka ninga keshe osho to lombwele nge ndi ninge. Alikana, ila, ndele to fingile nge ovanhu ava.’” 18 Ndele Bileam okwa nyamukula ovapiya vaBalak, ta ti: “Nonande ngeno Balak oku pe nge eumbo laye mwene li yadi oshisilveri noshingoli, itandi ningi nande osha, kutya nee oshinini, ile oshinene, osho shi li omhinge nelombwelo laJehova, Kalunga kange. 19 Alikana, kaleni apa natango oufiku ou, opo ndi ude kutya Jehova ota lombwele nge vali shike.”

20 Opo nee Kalunga okwe uya oufiku kuBileam, ndele ta ti kuye: “Ngeenge ovalumenhu ovo ove ku ila, inda pamwe navo. Ndele oto ka popya ashike eendjovo odo handi ku lombwele u popye.” 21 Onghee Bileam okwa penduka ongula nokwa longekida ondongi* yaye, ndele ta i pamwe nomalenga aMoab.

22 Ndele ehandu laKalunga ola li la xwama, molwaashi Bileam okwa li ta i, nomweengeli waJehova okwa li e li ofika mondjila te mu kelele. Bileam okwa li a londa kondongi yaye nokwa li pamwe novapiya vaye vavali. 23 Eshi ondongi ya mona omweengeli waJehova a fikama mondjila e na eongamukonda meke laye, oya kendabala okukanduka mo mondjila i ye moixwa. Ndele Bileam okwa hovela okudenga ondongi i shune mondjila. 24 Opo nee omweengeli waJehova okwa fikama pondjila ya finana i li pokati koikunino ivali yomandjebele, opo pe na omakuma keembinga adishe. 25 Eshi ondongi ya mona omweengeli waJehova, oya hovela okuyaamena kekuma noya felekenyena omhadi yaBileam kekuma, ndele Bileam ta hovele vali oku i denga.

26 Omweengeli waJehova okwa pita po natango, ndele ta ka fikama ponhele opo pehe na omhito yokukandukila kolulyo, ile kolumosho. 27 Eshi ondongi ya mona omweengeli waJehova oya nangala ofimbo Bileam a londa kuyo, na Bileam okwa li a handuka unene nokwa kala ta denge ondongi nodibo yaye. 28 Xuuninwa, Jehova okwa ningifa ondongi i popye,* ndele tai ti kuBileam: “Onde ku ninga shike, opo u denge nge lwoikando aishe oyo itatu?” 29 Bileam okwa nyamukula ondongi, a ti: “Omolwaashi oto nyikifa nge oulai. Ngeno onda li neongamukonda meke lange, ngeno ohandi ku dipaa!” 30 Ondongi oya tya kuBileam: “Nghi fi ondongi yoye hano oyo wa kala ho londo onghalamwenyo yoye aishe fiyo okunena? Onda ungaungile ngoo naave ngaho nande onale?” Okwa nyamukula, a ti: “Ahawe!” 31 Opo nee Jehova okwa pashula omesho aBileam nokwa mona omweengeli waJehova e li ofika mondjila e na eongamukonda meke laye. Onghee okwa twa eengolo nokwe linyongamena pedu.

32 Omweengeli waJehova okwa tya kuye: “Omolwashike wa dengela ondongi yoye lwoikando aishe oyo itatu? Tala, onde uya ndi ku alule, molwaashi olweendo loye oli li omhinge nehalo lange. 33 Ondongi oya mona nge, ndele tai kendabala okuhenuka nge lwoikando oyo itatu. Ngeno kaya li ya henuka nge, ngeno onde ku dipaa, ndele handi efa ondongi i kale nomwenyo.” 34 Bileam okwa tya komweengeli waJehova: “Onda nyona, molwaashi kanda li ndi shi shii ngeenge oove wa fikama mondjila u shakeneke nge. Ashike ngeenge oshii momesho oye, ohandi shuna.” 35 Ndele omweengeli waJehova okwa tya kuBileam: “Inda novalumenhu, ndele oto ka popya ashike eendjovo odo handi ku lombwele.” Opo nee Bileam okwa twikila okuya nomalenga aBalak.

36 Eshi Balak a uda kutya Bileam okwa fika, okwe uya divadiva oku mu shakeneka poshilando shaMoab osho shi li pomunghulo wefilu laArnon peengaba doshitukulwa. 37 Balak okwa tya kuBileam: “Inandi ku tuma u uye kwaame? Omolwashike ino uya kwaame? Mbela oto diladila kutya itandi dulu oku ku tumbalekifa unene?” 38 Bileam okwa nyamukula Balak, a ti: “Onde uya kwoove. Ndele ohandi ka pitikwa ngoo ndi popye sha? Ohandi dulu ashike okupopya odo Kalunga a tula mokanya kange.”

39 Onghee Bileam okwa ya naBalak, ndele tava i kuKiriat-husot. 40 Balak okwa yamba eengobe needi, ndele imwe te i tumine Bileam nosho yo omalenga oo a li naye. 41 Ongula inene Balak okwa kufa Bileam, ndele te mu eta kuBamot-baal, naashi a li oko okwa li e wete ovanhu aveshe.

23 Ndele Bileam okwa tya kuBalak: “Tungila ponhele apa eealtari heyali, ndele to longekidile nge eemhedi heyali needi heyali deendume.” 2 Balak okwa ninga diva ngaashi ashike Bileam e mu lombwela. Balak naBileam ova yambela koaltari keshe omhedi nodi yondume. 3 Bileam okwa tya kuBalak: “Kala pexwikiloyambo loye opo, ame ohandi i. Pamwe Jehova ota ka popya naame. Keshe osho ta ka hololela nge, ohandi ke shi ku lombwela.” Opo nee okwa ya koxulo yoshikulundudu.

4 Opo nee Kalunga okwa popya naBileam, oo a ti kuKalunga: “Onda tunga eealtari heyali di li momikweyo, nokoaltari keshe onda yambela ko omhedi nodi yondume.” 5 Jehova okwa tula ondjovo ei mokanya kaBileam: “Shuna kuBalak, naashi osho u na okupopya.” 6 Onghee okwa shuna nokwa mona Balak nosho yo omalenga aeshe aMoab a fikama pexwikiloyambo laye. 7 Opo nee okwa popya omupopyo ou wopaitevo a ti:

‘Ila u fingile nge Jakob.

Ila u handukile Israel.’

 8 Ohandi dulu ngahelipi okufinga ovo Kalunga ina finga?

Ongahelipi handi dulu okuhandukila ovo Jehova ina handukila?

11 Balak okwa tya kuBileam: “Owa ninga nge ngahelipi ngaha? Onde ku eta u finge ovatondi vange, ndele ku na eshi wa ninga po apa, owe va nangeka ashike noupuna.” 12 Okwa nyamukula, a ti: “Hano kandi na okupopya keshe osho Jehova a tula mokanya kange?”

13 Balak okwa tya kuye: “Alikana, ila tu ye konhele imwe oko to dulu oku va mona. Oto ka mona ashike vamwe vomuvo; ito ke va mona aveshe. Va fingile nge fimbo u li oko.” 14 Onghee okwe mu twala mofuka yaSofim, koxulo yaPisga, ndele ta tungu eealtari heyali nova yambela koaltari keshe ongobe yomhedi nodi yondume. 15 Bileam okwa tya kuBalak: “Kala pexwikiloyambo loye apa, ofimbo handi ka popya naKalunga kwinya.” 16 Jehova okwa popya naBileam, ndele ta tula mokanya kaye ondjovo ei: “Shuna kuBalak, naashi osho u na okupopya.” 17 Opo nee okwe uya kuye nokwa mona kutya okwa li a teelela e li pexwikiloyambo laye, nomalenga omuMoab okwa li pamwe naye. Balak okwe mu pula, a ti: “Jehova okwa ti ngahelipi?” 18 Opo nee okwa popya omupopyo ou wopaitevo a ti:

“Fikama Balak, ndele to pwilikine.

Akutu omonamati waSippor, ude nge.

Mbela ngeenge okwa ti sha, ota kala ine shi ninga?

Mbela ngeenge okwa popi sha, ota kala ine shi wanifa?

22 Kalunga oye e va kufa mo muEgipiti.

Ohe va kwafele neenghono daye odo di li ngaashi eembinga domhedi yomoixwa.

Pefimbo eli ovanhu otava dulu okupopya kombinga yaJakob naIsrael, tava ti:

‘Tala osho Kalunga a ninga!’

25 Balak okwa tya kuBileam: “Ngeenge ito dulu oku mu finga nandenande, kala ino mu nangeka noupuna.” 26 Bileam okwa nyamukula Balak, a ti: “Inandi ku lombwela kutya: ‘Ohandi ka ninga ashishe osho Jehova a popya’?”

27 Balak okwa tya kuBileam: “Alikana, ila ndi ku twale konhele vali imwe. Otashi dulika tashi ka kala sha wapala momesho aKalunga kashili u mu fingile nge konhele oyo.” 28 Onghee Balak okwa twala Bileam koxulo yaPeor osho sha taalelafana naJeshimon.* 29 Bileam okwa tya kuBalak: “Tungila ponhele apa eealtari heyali, ndele to longekidile nge eemhedi heyali needjona heyali deendume.” 30 Onghee Balak okwa ninga naanaa ngaashi Bileam e mu lombwela, nokoaltari keshe okwa yambela ko omhedi nosho yo odi yondume.

24 Eshi Bileam a mona kutya osha li sha hafifa* Jehova okunangeka noupuna Israel, ina ya vali a ka konge oo ha tale momukonda, ndele okwa taalelifa oshipala shaye kombuwa. 2 Eshi Bileam a yelula omesho aye nokwa mona Ovaisrael va onga onhanda pamapata avo, omhepo yaKalunga oya li ya ya muye. 3 Opo nee okwa popya omupopyo wopaitevo, a ti:

10 Opo nee Balak okwa handukila unene Bileam. Balak okwa pandula nomake aye a handuka, ndele ta ti kuBileam: “Onda li nde ku ifana u finge ovatondi vange, ashike paife ku na eshi wa ninga po, ndele owe va nangeka noupuna oikando aishe itatu. 11 Paife inda keumbo meendelelo. Onda li nda hala oku ku tumbalekifa unene, ndele tala, Jehova okwe ku imba etumbalo.”

12 Bileam okwa nyamukula Balak, a ti: “Hano inandi lombwela ovatumwa voye ava wa tumine kutya, 13 ‘Nonande ngeno Balak oku pe nge eumbo laye li yadi oshisilveri noshingoli, itandi ningi sha kehalo* lange mwene shi li omhinge nelombwelo laJehova, kutya nee oshiwa, ile oshii, nonokutya ohandi ka popya ashike osho Jehova ta lombwele nge’? 14 Paife ohandi shuna kovanhu vange. Ila ndi ku lombwele osho ovanhu ava tava ka ningila ovanhu voye monakwiiwa.”* 15 Opo nee okwa popya omupopyo wopaitevo, a ti:

20 Eshi a mona Amalek, okwa twikila nomupopyo waye wopaitevo, ta ti:

21 Eshi a mona Ovakeni, okwa twikila nomupopyo waye wopaitevo, ta ti:

“Olukalwa loye ola amenwa, nonhele yoye oya tungilwa kemanya.

22 Ashike umwe ota ka xwika po Kain.

Otashi kwata efimbo li fike peni ofimbo Asiria ine ku twala moukwatwa?”

23 Okwa twikila nomupopyo waye wopaitevo, ta ti:

“Woo! Olyelye ta ka xupa, eshi Kalunga ta ka ninga ngaha?

Ashike naye ota ka hanaunwa po filufilu.”

25 Opo nee Bileam okwa fikama, ndele ta i nokwa shuna konhele yaye. Balak naye okwa ya nondjila yaye.

25 Eshi Israel a li ha di muSittim, ovanhu ova li va hovela okuhaela novakainhu vomuMoab. 2 Ovakainhu ovo ova shiva ovanhu va ye komayambo ookalunga vavo, novanhu ova hovela okulya nokulinyongamena ookalunga vavo. 3 Onghee Israel okwa waimina elongelokalunga* laBaal womuPeor, na Jehova okwa li a handukila neenghono Israel. 4 Jehova okwa lombwela Moses, a ti: “Kufa ovawiliki* aveshe vovanhu, ndele to va endjelelifa moipafi yaJehova moshanga shomutenya,* opo ehandu laJehova la xwama liha hange vali Israel.” 5 Opo nee Moses okwa tya kovatokoli vomuIsrael: “Keshe umwe womunye na dipae ovalumenhu vaye ovo va waimina elongelokalunga* laBaal womuPeor.”

6 Konima yaasho, ope uya Omuisrael umwe, ndele ta eta popepi novamwaxe omukainhu Omumidian moipafi yaMoses noyongudu aishe yOvaisrael, ofimbo va li tava lili ve li poshivelo shetwali lokwoongalela. 7 Eshi Pinehas, omonamati waEliaser, omonamati womupristeri Aron, e shi mona, okwa fikama diva mokati kongudu oyo, ndele ta kufa eonga meke laye. 8 Okwa shikulila mo omulumenhu Omuisrael metwali, nokwe va twa aveshe, omulumenhu Omuisrael nomukainhu. Omukainhu okwe mu twa moshinena. Opo nee ehandukilo olo la li li na okuhanga Ovaisrael inali va hanga vali. 9 Ovo va fya kehandukilo olo ove li 24 000.

10 Opo nee Jehova okwa tya kuMoses: 11 “Pinehas, omonamati waEliaser, omonamati womupristeri Aron, okwa loteka ehandu lange ndiha handukile Ovaisrael, molwaashi ine lididimikila nandenande ovo va tukululila nge oshibofa mokati kavo. Onghee inandi hanauna po Ovaisrael, nonande onda teelela va longele nge aame andike. 12 Mu lombwela kutya: ‘Ohandi ningi naye ehangano lombili. 13 Otali ningi ehangano laalushe loupristeri kuye nokoludalo laye olo tali mu shikula, molwaashi ine lididimikila ovo vehe fi ovadiinini kuKalunga kaye nokwa koshola Ovaisrael.’”

14 Edina lomulumenhu Omuisrael, oo a dipawa pamwe nomukainhu Omumidian, oSimri, omonamati waSalu, elenga lepata laSimeon. 15 Edina lomukainhu Omumidian, oo a dipawa oKosbi, omonakadona waSur; Sur okwa li omuwiliki womaludi omapata omuMidian.

16 Lwanima, Jehova okwa tya kuMoses: 17 “Hepekeni Ovamidian noku va dipaa, 18 molwaashi ova kala noku mu hepeka noku mu kengelela moshinima shi na sha naPeor nomolwaKosbi, omumwainakadona wavo, omona welenga lomuMidian, oo a dipawa mefiku lehandu omolwoshiningwanima shi na sha naPeor.”

26 Konima yehandukilo, Jehova okwa lombwela Moses naEliaser, omonamati womupristeri Aron, a ti: 2 “Valula ongudu aishe yOvaisrael, okudja pwaavo ve na eedula 20 okuyuka pombada, pamaukwaneumbo omapata avo, to valula aveshe ovo tava dulu okulonga metangakwaita muIsrael.” 3 Onghee Moses nomupristeri Eliaser ova popya navo momaluhaela aMoab puJordan, popepi naJeriko, va ti: 4 “Valuleni ovanhu, ovo ve na eedula 20 okuyuka pombada, ngaashi naanaa Jehova a lombwela Moses.”

Ovanamati vaIsrael, ovo va dja medu laEgipiti, ovo: 5 Ruben oye oshiveli shaIsrael. Ovanamati vaRuben ovo: muHanok omwa dja epata lOvahanok; muPallu omwa dja epata lOvapallu; 6 muHesron omwa dja epata lOvahesron; muKarmi omwa dja epata lOvakarmi. 7 Oo okwa li omapata Ovaruben, naavo va shangwa ova li 43 730.

8 Omonamati waPallu oEliab. 9 Ovanamati vaEliab ovo: Nemuel, Datan naAbiram. Datan naAbiram ovo va li va hoololwa mongudu yaavo va lwifa Moses naAron pamwe nongudu yaKora, eshi va li tava lwifa Jehova.

10 Opo nee edu ola makula okanya kalo, ndele tali va pona po. Ashike Kora okwa fya pamwe novayambididi vaye, eshi omundilo wa xwika po ovalumenhu 250. Ova ninga oshihopaenenwa shelondwelo. 11 Ashike ovanamati vaKora inava fya.

12 Ovanamati vaSimeon pamaludi avo ovo: muNemuel omwa dja epata lOvanemuel; muJamin omwa dja epata lOvajamin; muJakin omwa dja epata lOvajakin; 13 muSera omwa dja epata lOvaserahi; muShaul omwa dja epata lOvashaul. 14 Oo okwa li omapata Ovasimeon, naavo va shangwa ova li 22 200.

15 Ovanamati vaGad pamaludi avo ovo: muSefon omwa dja epata lOvasefon; muHaggi omwa dja epata lOvahaggi; muSuni omwa dja epata lOvasuni; 16 muOsni omwa dja epata lOvaosni; muEri omwa dja epata lOvaeri; 17 muArod omwa dja epata lOvaarod; muAreeli omwa dja epata lOvaareeli. 18 Oo okwa li omapata ovanamati vaGad, naavo va shangwa ova li 40 500.

19 Ovanamati vaJuda ovo: Er naOnan. Ashike Er naOnan ova fila medu laKaanan. 20 Ovanamati vaJuda pamaludi avo ovo: muShela omwa dja epata lOvashela; muPeres omwa dja epata lOvaperes; muSera omwa dja epata lOvaserahi. 21 Ovanamati vaPeres ovo: muHesron omwa dja epata lOvahesron; muHamul omwa dja epata lOvahamul. 22 Oo okwa li omapata Ovajuda, naavo va shangwa ova li 76 500.

23 Ovanamati vaIsaskar pamaludi avo ovo: muTola omwa dja epata lOvatola; muPua omwa dja epata lOvapuni; 24 muJasub omwa dja epata lOvajasub; muSimron omwa dja epata lOvasimron. 25 Oo okwa li omapata Ovaisaskar, naavo va shangwa ova li 64 300.

26 Ovanamati vaSebulon pamaludi avo ovo: muSered omwa dja epata lOvasered; muElon omwa dja epata lOvaelon; muJagleel omwa dja epata lOvajagleel. 27 Oo okwa li omapata Ovasebulon, naavo va shangwa ova li 60 500.

28 Ovanamati vaJosef pamaludi avo ovo: Manasse naEfraim. 29 Ovanamati vaManasse ovo: muMakir omwa dja epata lOvamakir; na Makir oye a li xe yaGilead; muGilead omwa dja epata lOvagilead. 30 Ovanamati vaGilead ovo: muIeser omwa dja epata lOvaieser; muHelek omwa dja epata lOvahelek; 31 muAsriel omwa dja epata lOvaasriel; muSekem omwa dja epata lOvasekem; 32 muSemida omwa dja epata lOvasemida; muHefer omwa dja epata lOvahefer. 33 Selofad, omonamati waHefer, ka li e na ovanamati, okwa li ashike e na ovanakadona, nomadina ovanakadona vaSelofad oo: Mahla, Noa, Hogla, Milka naTirsa. 34 Oo okwa li omapata Ovamanasse, naavo va shangwa ova li 52 700.

35 Ovanamati vaEfraim pamaludi avo ovo: muSutela omwa dja epata lOvasutela; muBeger omwa dja epata lOvabeger; muTahan omwa dja epata lOvatahan. 36 Ovanamati vaSutelah ovo: muEran omwa dja epata lOvaeran. 37 Oo okwa li omaludi ovanamati vaEfraim, naavo va shangwa ova li 32 500. Ovo ovanamati vaJosef pamaludi avo.

38 Ovanamati vaBenjamin pamaludi avo ovo: muBela omwa dja epata lOvabela; muAsbel omwa dja epata lOvaasbel; muAhiram omwa dja epata lOvaahiram; 39 muSefufam omwa dja epata lOvasufami; muHufam omwa dja epata lOvahufami. 40 Ovanamati vaBela ovo: Ard naNaeman: muArd omwa dja epata lOvaard; muNaeman omwa dja epata lOvanaeman. 41 Ovo ovanamati vaBenjamin pamaludi avo, naavo va shangwa ova li 45 600.

42 Ovanamati vaDan pamaludi avo ovo: muSuham omwa dja epata lOvasuham. Aa okwa li omapata omoludalo laDan. 43 Omapata aeshe Ovasuham, aavo va shangwa, okwa li 64 400.

44 Ovanamati vaAsser pamaludi avo ovo: muImna omwa dja epata lOvaimna; muIsvi omwa dja epata lOvaisvi; muBeria omwa dja epata lOvaberia; 45 movanamati vaBeria: muHeber omwa dja epata lOvaheber; muMalkiel omwa dja epata lOvamalkiel. 46 Edina lomonakadona waAsser oSera. 47 Oo okwa li omapata ovanamati vaAsser, naavo va shangwa ova li 53 400.

48 Ovanamati vaNaftali pamaludi avo ovo: muJakseel omwa dja epata lOvajakseel; muGuni omwa dja epata lOvaguni; 49 muJeser omwa dja epata lOvajeser; muSillem omwa dja epata lOvasillem. 50 Oo okwa li omaludi omoludalo laNaftali, naavo va shangwa ova li 45 400.

51 Omuvalu aushe kumwe wOvaisrael ovo va shangwa: 601 730.

52 Lwanima, Jehova okwa lombwela Moses, ta ti: 53 “Nava tukulilwe edu li li efyuululo she likolelela komusholondodo womadina.* 54 Eengudu odo da kula, ou na okuhapupalifa efyuululo lado, neengudu odo dinini, ou na okuninipika efyuululo lado. Efyuululo longudu keshe oli na okuyandjwa she likolelela komuvalu waavo va shangwa. 55 Ashike edu oli na okutukulwa pashihoololifo. Ove na okumona omafyuululo avo she likolelela komadina omapata ooxe. 56 Efyuululo laavo vahapu nolaavo vanini, otali ke likolelela koshihoololifo.”

57 Ovalevi ovo va shangwa pamaludi avo ovo: muGerson omwa dja epata lOvagerson; muKohat omwa dja epata lOvakohat; muMerari omwa dja epata lOvamerari. 58 Aa omapata Ovalevi: epata lOvalibni, epata lOvahebron, epata lOvamahli, epata lOvamushi nepata lOvakora.

Kohat oye a li xe yaAmram. 59 Edina lomukulukadi waAmram oJokebed, omonakadona waLevi, oo Levi a dalelwa komukulukadi waye muEgipiti. Jokebed naAmram ova dala Aron, Moses nomumwainakadona Miriam. 60 Aron okwa dalelwa Nadab, Abihu, Eliaser naItamar. 61 Ashike Nadab naAbihu ova fya, eshi va yambela koshipala shaJehova omundilo inau pitikwa.

62 Omuvalu waaveshe ovo va shangwa owa li 23 000, ovalumenhu aveshe okudja pomwedi umwe okuyuka pombada. Kava li va shangelwa mokati kOvaisrael, molwaashi kava li ve na okupewa efyuululo mokati kOvaisrael.

63 Ovo ovovo va li va shangwa kuMoses nokomupristeri Eliaser, eshi va li va shangela Ovaisrael momaluhaela aMoab, puJordan, popepi naJeriko. 64 Ashike mokati kavo kamwa li nande oumwe a shangwa kuMoses nokomupristeri Aron, eshi va li tava valula Ovaisrael mombuwa yaSinai. 65 Jehova okwa popya shi na sha navo, a ti: “Otava ka fila filufilu mombuwa.” Kape na nande omunhu a li a xupa, kakele kuKaleb, omonamati waJefunne, naJosua, omonamati waNun.

27 Ovanakadona vaSelofad, omonamati waHefer, omonamati waGilead, omonamati waMakir, omonamati waManasse, vomepata laManasse, omonamati waJosef, ove uya kuMoses. Omadina ovanakadona vaye oo: Mahla, Noa, Hogla, Milka naTirsa. 2 Ova li va fikama komesho yaMoses, yomupristeri Eliaser, yomalenga noyongudu aishe oyo ya li poshivelo shetwali lokwoongalela, ndele tava ti: 3 “Tate okwa fila mombuwa, ndele ka li mokati kongudu oyo ya li ya ongala i tukululile Jehova oshibofa, ovayambididi vaKora, ashike okwa fya omolwenyono laye mwene noke na nande ovanamati. 4 Omolwashike edina latate li na okukana mo mepata laye, molwaashi ashike meumbo laye ehe na mo omonamati? Tu pa oshitukulwafyuululo pamwe novamwainamati vatate.” 5 Onghee Moses okwa ka lombwela Jehova eendjovo davo.

6 Opo nee Jehova okwa lombwela Moses, a ti: 7 “Ovanakadona vaSelofad ove li mondjila. Ou na oku va pa filufilu oshitukulwafyuululo pamwe novamwainamati vaxe noku va efa va fyuulule oinima yaxe. 8 Lombwela Ovaisrael kutya, ‘Ngeenge omulumenhu okwa fi ehe na omonamati, omu na okuyandja efyuululo laye komonakadona waye. 9 Ngeenge ke na omonakadona, otamu ka yandja efyuululo laye kovamwainamati. 10 Ndele ngeenge ke na ovamwainamati, otamu ka yandja efyuululo laye kovamwainamati vaxe. 11 Ashike ngeenge xe ke na ovamwainamati, otamu ka yandja efyuululo laye komupambele wopopepi elela mepata laye. Note ke li kufa po li li oshitukulwafyuululo. Etokolo olo otali kala onghedimhango kOvaisrael ngaashi ashike Jehova a lombwela Moses.’”

12 Opo nee Jehova okwa lombwela Moses, a ti: “Inda komhunda oyo yaAbarim, ndele to tale edu olo handi ka pa Ovaisrael. 13 Ngeenge we li mono, naave oto ka pakwa povakweni,* ngaashi ashike omumwaxo Aron, 14 molwaashi eshi ongudu ya li tai tangunine nge mombuwa yaSin, ino dulika kelombwelo lange lokuyapulifa nge moipafi yavo shi na sha nomeva. Oo omeva omuMeriba puKades, mombuwa yaSin.”

15 Moses okwa tya kuJehova: 16 “Jehova, Kalunga keemhepo dovanhu aveshe,* na hoolole mongudu omulumenhu, 17 oo ta kala ta di mo note uya kuvo naao ta kala te va wilike, eshi tava di mo naashi tave uya mo, opo ongudu yoshiwana shaJehova iha kale ngaashi eedi dihe na omufita.” 18 Jehova okwa tya kuMoses: “Kufa Josua, omonamati waNun, oo e na ondjungu,* ndele to mu tenheke eke loye. 19 Mu fikameka moipafi yomupristeri Eliaser nomoipafi yongudu aishe, ndele to mu nangeke po moipafi yavo. 20 Ou na oku mu pa eenghonopangelo* doye dimwe, opo ongudu aishe yOvaisrael i pwilikine kuye. 21 Josua ota ka fikama moipafi yomupristeri Eliaser, oo ta ka pula Jehova, ponhele yaJosua, opo a ulike okupitila moUrim kutya etokolo laye olilipi. Palombwelo laye otava ka dja mo, nopalombwelo laye otave ke uya mo, ye nOvaisrael aveshe ovo e li pamwe navo nosho yo ongudu aishe.”

22 Onghee Moses okwa ninga naanaa ngaashi Jehova e mu lombwela. Okwa kufa Josua, ndele te mu fikameke moipafi yomupristeri Eliaser nomoipafi yongudu aishe 23 nokwe mu tenheka omake, ndele te mu nangeke po, ngaashi ashike Jehova a popya okupitila muMoses.

28 Jehova okwa lombwela vali Moses, a ti: 2 “Popya nOvaisrael u va lombwele kutya, ‘Shilipalekeni kutya omwa pa nge eyambo lange, omungome wange. Omayambo ange edimba liwa,* oo handi ka yambelwa okupitila momundilo, oku na okuyambwa peufwafimbo lao.’

3 “Va lombwela kutya, ‘Omayambo a yambwa okupitila momundilo, oo mu na okupa Jehova, oo aa: omu na okuyamba exwikiloyambo pandjikilile, eedjona mbali deendume domudo umwe da koshoka, efiku keshe. 4 Odjona imwe yondume otamu i yambe ongula, nodjona ikwao otamu i yambe, eshi taku wiwile,* 5 pamwe noshitimulongo shoefa* shoufila wa nakwa nawa noshitine sho-hin* shomaadi a hengwa i li eendjayambo. 6 Oli li exwikiloyambo tali yambwa pandjikilile, olo la li la yambwa komhunda yaSinai li li edimba liwa,* eyambo olo la yambelwa Jehova okupitila momundilo, 7 pamwe noshikunwayambo shalo, oshitine sho-hin shodjona yondume keshe. Ou na okutila oshikunwa shoshikolwifa monhele iyapuki shi li oshikunwayambo kuJehova. 8 Ou na okuyamba odjona ikwao yondume, eshi taku wiwile.* Ou na oku i yandja neendjayambo da faafana naado wa yandja ongula noshikunwayambo shayo sha faafana to i yandje i li eyambo ledimba liwa* la yambelwa Jehova okupitila momundilo.

9 “‘Ndele mefiku leshabata, oku na okuyambwa eedjona mbali deendume domudo umwe da koshoka noitimulongo ivali yoshiyelekifo shoefa shoufila wa nakwa nawa wa pilulilwa omaadi, i li eendjayambo pamwe noshikunwayambo shado. 10 Olo exwikiloyambo lEshabata pamwe nexwikiloyambo olo hali yambwa pandjikilile noshikunwayambo shalo.

11 “‘Pehovelo lomwedi keshe* omu na okuyandja exwikiloyambo kuJehova leendumetana mbali, odi imwe yondume, needjona heyali deendume da koshoka, keshe imwe yomudo umwe, 12 noitimulongo itatu yoiyelekifo yoefa youfila wa nakwa nawa wa pilulilwa omaadi u li eendjayambo dongobe yomhedi keshe noitimulongo ivali yoiyelekifo yoefa youfila wa nakwa nawa wa pilulilwa omaadi, u li eendjayambo dodi imwe yondume, 13 noshitimulongo shoshiyelekifo shoefa shoufila wa nakwa nawa wa pilulilwa omaadi u li eendjayambo dodjona yondume keshe, di li exwikiloyambo, edimba liwa,* eyambo la yambelwa Jehova okupitila momundilo. 14 Oikunwayambo yavo oi na okukala etata lo-hin yomaviinyu mongobe yomhedi, noshititatu sho-hin modi yondume, noshitine sho-hin modjona yondume. Olo olo eyambo olo ve na okuyandja omwedi keshe momukokomoko womudo. 15 Ope na yo okuyambwa okakombo ke li etimbayambo kuJehova ta ka wedwa pexwikiloyambo olo hali yandjwa pandjikilile pamwe noshikunwayambo shalo.

16 “‘Opaasa yaJehova otai ka kala ko momafiku 14 omwedi wotete. 17 Mefiku eti-15 lomwedi oo, otamu ka kala oshivilo. Omingome inadi ya efulika otadi ka liwa oule womafiku aheyali. 18 Mefiku lotete otamu ka kala oshoongalele shiyapuki. Kamu na nande okulonga oshilonga shidjuu. 19 Omu na okuyandja eendumetana mbali, odi imwe yondume, needjona heyali deendume keshe imwe yomudo umwe, di li exwikiloyambo la yambelwa Jehova okupitila momundilo. Omu na okuyandja oinamwenyo ya koshoka. 20 Omu na oku i yandja pamwe neendjayambo dayo doufila wa nakwa nawa wa pilulilwa omaadi, oitimulongo itatu yoiyelekifo yoefa mongobe yomhedi, noitimulongo ivali yoiyelekifo yoefa modi yondume. 21 Ou na okuyandja oshitimulongo shoshiyelekifo shoefa modjona keshe yondume yomeedjona odo heyali deendume 22 noshikombo shimwe shomudo umwe shi li etimbayambo, opo u kosholwe. 23 Kakele kexwikiloyambo longula, lomexwikiloyambo olo hali yambwa pandjikilile, ou na okuyandja oinima ei. 24 Ou na oku i yandja monghedi ya faafana efiku keshe, oule womafiku aheyali i li eendja,* eyambo la yambwa okupitila momundilo li li edimba liwa* kuJehova. Oli na okuyambwa pamwe nexwikiloyambo olo hali yambwa pandjikilile noshikunwayambo shalo. 25 Omu na okuninga oshoongalele shiyapuki mefiku etiheyali. Kamu na nande okulonga oshilonga shidjuu.

26 “‘Mefiku loiimati oyo ya pya tete, eshi tamu yandje eendjayambo dipe kuJehova, omu na okuninga oshoongalele shiyapuki moshivilo sheni shoivike. Kamu na okulonga nande oshilonga shidjuu. 27 Omu na okuyandja eendumetana mbali, odi yondume needjona heyali deendume, keshe imwe yomudo umwe i li exwikiloyambo ledimba liwa* kuJehova, 28 neendjayambo dao doufila wa nakwa nawa wa pilulilwa omaadi, oitimulongo itatu yoiyelekifo yoefa mongobe yomhedi keshe, oitimulongo ivali yoiyelekifo yoefa modi yondume 29 noshitimulongo shoshiyelekifo shoefa modjona keshe yondume yomeedjona odo heyali deendume 30 nokakombo kamwe ke li etimbayambo, opo mu kosholwe. 31 Omu na oku i yandja tamu i weda pexwikiloyambo olo hali yambwa pandjikilile pamwe neendjayambo dalo. Oinamwenyo oi na okukala ya koshoka pamwe noikunwayambo yayo.

29 “‘Mefiku lotete lomwedi omutiheyali, omu na okuninga oshoongalele shiyapuki. Kamu na nande okulonga oshilonga shidjuu. Mefiku olo omo mu na okushika enghuma. 2 Omu na okuyandja ondumetana imwe, odi imwe yondume needjona heyali deendume, keshe imwe yomudo umwe, adishe da koshoka, di li exwikiloyambo ledimba liwa* kuJehova, 3 neendjayambo dao doufila wa nakwa nawa wa pilulilwa mumwe nomaadi, oitimulongo itatu yoshiyelekifo shoefa mongobe yomhedi, oitimulongo ivali yoshiyelekifo shoefa modi yondume, 4 oshitimulongo shimwe shoshiyelekifo shoefa modjona keshe yondume yomeedjona heyali deendume 5 nosho yo oshikombo shimwe shetimbayambo, opo mu kosholwe. 6 Oinima oyo otai wedwa kexwikiloyambo neendjayambo dalo nosho yo exwikiloyambo olo hali yandjwa pandjikilile neendjayambo dalo omwedi keshe, pamwe noikunwayambo yayo, she likolelela kwaasho hashi ningwa pandjikilile, e li edimba liwa,* eyambo la yambelwa Jehova okupitila momundilo.

7 “‘Nomefiku etimulongo lomwedi oo omutiheyali, omu na okuninga oshoongalele shiyapuki nomu na okunyika oluhodi.* Kamu na nande okulonga oshilonga shidjuu. 8 Omu na okuyandja ondumetana imwe, odi imwe yondume needjona heyali deendume, keshe imwe yomudo umwe, adishe da koshoka, di li exwikiloyambo ledimba liwa* kuJehova. 9 Eendjayambo dao doufila wa nakwa nawa wa pilulilwa omaadi, oitimulongo itatu yoiyelekifo yoefa mongobe yomhedi, oitimulongo ivali yoiyelekifo ivali yoefa modi imwe yondume 10 noshitimulongo shoshiyelekifo shoefa modjona keshe yondume yomeedjona heyali deendume. 11 Kakele kexwikiloyambo olo hali yambwa pandjikilile, neendjayambo dalo pamwe noikunwayambo yalo, omu na yo okuyandja oshikombo shimwe shi li etimbayambo.

12 “‘Nomefiku eti-15 lomwedi omutiheyali, omu na okuninga oshoongalele shiyapuki. Kamu na nande okulonga oshilonga shidjuu, nomu na okudana oshivilo oule womafiku aheyali omolwaJehova. 13 Omu na okuyandja eendumetana 13, eedi deendume 2, eedjona deendume 14, keshe imwe yomudo umwe, adishe da koshoka di li exwikiloyambo, eyambo la yambwa okupitila momundilo ledimba liwa* kuJehova. 14 Eendjayambo dao doufila wa nakwa nawa wa pilulilwa omaadi, oitimulongo itatu yoshiyelekifo shoefa momhedi keshe yomeemhedi 13, oitimulongo ivali yoshiyelekifo shoefa modi keshe yondume yomeedi 2 deendume 15 noshitimulongo shoshiyelekifo shoefa modjona keshe yondume yomeedjona 14 deendume. 16 Kakele kexwikiloyambo olo hali yambwa pandjikilile, neendjayambo dalo pamwe noikunwayambo yalo, omu na yo okuyandja oshikombo shimwe shi li etimbayambo.

17 “‘Nomefiku etivali, eendumetana 12, eedi 2 deendume, eedjona 14 deendume, keshe imwe yomudo umwe, adishe da koshoka 18 neendjayambo dayo pamwe noikunwayambo yado, eengobe deemhedi, eedi deendume, eedjona deendume, pamuvalu wado, she likolelela kwaasho hashi ningwa pandjikilile. 19 Kakele kexwikiloyambo olo hali yambwa pandjikilile, neendjayambo dalo pamwe noikunwayambo yalo, omu na yo okuyandja oshikombo shimwe shi li etimbayambo.

20 “‘Nomefiku etitatu, eengobe deemhedi 11, eedi 2 deendume nosho yo eedjona 14 deendume, keshe imwe yomudo umwe, adishe da koshoka 21 neendjayambo dayo pamwe noikunwayambo yado, eengobe deemhedi, eedi deendume, eedjona deendume, pamuvalu wado, she likolelela kwaasho hashi ningwa pandjikilile. 22 Kakele kexwikiloyambo olo hali yambwa pandjikilile, neendjayambo dalo pamwe noikunwayambo yalo, omu na yo okuyandja oshikombo shimwe shi li etimbayambo.

23 “‘Nomefiku etine, eengobe deemhedi 10, eedi 2 deendume nosho yo eedjona 14 deendume, keshe imwe yomudo umwe, adishe da koshoka 24 neendjayambo dayo pamwe noikunwayambo yado, eengobe deemhedi, eedi deendume, eedjona deendume pamuvalu wado, she likolelela kwaasho hashi ningwa pandjikilile. 25 Kakele kexwikiloyambo olo hali yambwa pandjikilile, neendjayambo dalo pamwe noikunwayambo yalo, omu na yo okuyandja oshikombo shimwe shi li etimbayambo.

26 “‘Nomefiku etitano, eengobe deemhedi 9, eedi 2 deendume nosho yo eedjona 14 deendume, keshe imwe yomudo umwe, adishe da koshoka, 27 neendjayambo dayo pamwe noikunwayambo yado, eengobe deemhedi, eedi deendume, eedjona deendume, pamuvalu wado, she likolelela kwaasho hashi ningwa pandjikilile. 28 Kakele kexwikiloyambo olo hali yambwa pandjikilile, neendjayambo dalo pamwe noikunwayambo yalo, omu na yo okuyandja oshikombo shimwe shi li etimbayambo.

29 “‘Nomefiku etihamano, eengobe deemhedi 8, eedi 2 deendume nosho yo eedjona 14 deendume, keshe imwe yomudo umwe, adishe da koshoka 30 neendjayambo dayo pamwe noikunwayambo yado, eengobe deemhedi, eedi deendume, eedjona deendume, pamuvalu wado, she likolelela kwaasho hashi ningwa pandjikilile. 31 Kakele kexwikiloyambo olo hali yambwa pandjikilile, neendjayambo dalo pamwe noikunwayambo yalo, omu na yo okuyandja oshikombo shimwe shi li etimbayambo.

32 “‘Nomefiku etiheyali, eengobe deemhedi 7, eedi 2 deendume nosho yo eedjona 14 deendume, keshe imwe yomudo umwe, adishe da koshoka 33 neendjayambo dayo pamwe noikunwayambo yado, eengobe deemhedi, eedi deendume, eedjona deendume pamuvalu wado, she likolelela kwaasho hashi ningwa pandjikilile. 34 Kakele kexwikiloyambo olo hali yambwa pandjikilile, neendjayambo dalo pamwe noikunwayambo yalo, omu na yo okuyandja oshikombo shimwe shi li etimbayambo.

35 “‘Nomefiku etihetatu, omu na okuninga oshoongalele shiyapuki. Kamu na nande okulonga oshilonga shidjuu. 36 Omu na okuyandja ongobe yomhedi imwe, odi imwe yondume nosho yo eedjona heyali deendume, keshe imwe yomudo umwe, adishe da koshoka, di li exwikiloyambo, eyambo la yambwa okupitila momundilo ledimba liwa* kuJehova 37 neendjayambo dayo pamwe noikunwayambo yado, ongobe yomhedi, odi yondume, eedjona deendume, pamuvalu wado, she likolelela kwaasho hashi ningwa pandjikilile. 38 Kakele kexwikiloyambo olo hali yambwa pandjikilile, neendjayambo dalo pamwe noikunwayambo yalo, omu na yo okuyandja oshikombo shimwe shi li etimbayambo.

39 “‘Oinima ei omu na oku i yandja kuJehova poivilo yeni yokomudo, tamu i weda pomayambo eni eano nosho yo pomayambo ehalo liwa e li omaxwikiloyambo eni, eendjayambo deni, oikunwayambo yeni nosho yo omayambo eni oukumwe.’” 40 Moses okwa lombwela Ovaisrael ashishe osho Jehova e mu lombwela.

30 Moses okwa lombwela omitwe domapata Ovaisrael, a ti: “Ondjovo ei oyo Jehova a popya: 2 Ngeenge omulumenhu okwa udanekele sha Jehova, ile okwa ane sha kuye mwene eano lelidiliko, ke na okutauluka ondjovo yaye. Oku na okuninga keshe shimwe osho a ana kutya ote shi ningi.

3 “Ngeenge omukainhu okwa udanekele sha Jehova, ile okwa ane sha kuye mwene eano lelidiliko, ofimbo munini noha di meumbo laxe, 4 na xe ta udu eudaneko laye, ile eano lelidiliko laye, olo e liningila ye mwene,* ndele xe ina popya ko sha, eudaneko laye keshe oku na oku li wanifa po, nakeshe eano lelidiliko, olo e liningila ye mwene, oku na oku li wanifa po. 5 Ashike ngeenge xe okwe mu kelele, eshi a uda kutya okwe liningila ye mwene eudaneko, ile e lianena eano lelidiliko, kae na okuwanifwa po. Jehova ote ke mu dimina po, molwaashi xe okwe mu kelela.

6 “Ndele ngeenge okwa hombolwa, eshi a ninga eudaneko, ile eano losheendelela, olo e liningila ye mwene, 7 nomushamane te li udu, ndele ina popya ko sha, eudaneko laye keshe, ile eano laye keshe lelidiliko, olo e liningila ye mwene, oku na oku li wanifa po. 8 Ndele ngeenge omushamane okwe mu kelele mefiku olo e li uda, ota dulu okuxulifa po eudaneko, ile eano losheendelela, olo omukulukadi e liningila ye mwene, na Jehova ote ke mu dimina po.

9 “Ndele ngeenge omufiyekadi, ile omukulukadi oo a hengwa okwa ningi eudaneko, keshe shimwe osho e lianena ye mwene oku na oku shi wanifa po ye mwene.

10 “Ashike ngeenge omukainhu okwe liningile ye mwene eudaneko, ile eano lelidiliko ofimbo e li meumbo lomushamane waye, 11 ndele omushamane waye te li udu, ashike ina popya ko sha, ile ke li omhinge nalo, eudaneko laye keshe, ile eano keshe lelidiliko, olo e liningila ye mwene, oku na oku li wanifa po. 12 Ashike omushamane waye ngeenge okwa xulifa po filufilu eudaneko keshe, ile eano lelidiliko, olo omukulukadi a ana, mefiku olo e li uda, ite ke li wanifa po. Omushamane waye okwe li xulifa po, na Jehova ote ke mu dimina po. 13 Shi na sha neudaneko keshe, ile eano keshe li na sha nokulidilika,* omushamane waye ota dulu oku li koleka, ile oku li xulifa po. 14 Ndele ngeenge omushamane iha popi ko sha nandenande efiku keshe, naye yo ota koleke eudaneko keshe lomukulukadi, ile eano laye keshe lelidiliko olo e na okuwanifa po. Okwe a koleka, molwaashi ina popya ko sha mefiku olo a uda omukulukadi te a ningi. 15 Ashike ngeenge okwe a xulifa po lwanima, konima yefiku olo e a uda, omushamane ota ka hangwa koilanduliko yenyono lomukulukadi waye.

16 “Aa omaufomhango, oo Jehova a lombwela Moses, e na sha nomushamane nomukulukadi waye nosho yo e na sha naxe nomonakadona munini oo ha di meumbo laye.”

31 Jehova okwa lombwela Moses, a ti: 2 “Handukila Ovamidian omolwOvaisrael. Lwanima, oto ka pakwa povakweni.”*

3 Opo nee Moses okwa lombwela ovanhu, ta ti: “Longekideni ovalumenhu tava di mokati keni va ka lwife* Ovamidian, nokuwanifa po elombwelo laJehova mokuhandukila Ovamidian. 4 Ou na okutuma ovanhu 1 000 mepata keshe lomomapata aeshe aIsrael va ye metangakwaita.” 5 Ovanhu omayovi ovo va dja muIsrael, mepata keshe omwa dja 1 000, novanhu 12 000 ova longekidilwa okuya molwoodi.*

6 Onghee Moses okwa tuma metangakwaita ovalumenhu 1 000 va dja mepata keshe, pamwe naPinehas, omonamati womupristeri Eliaser, oo a li e na oilongifo iyapuki nosho yo enghuma loita meke laye. 7 Ova lwifa Ovamidian, ngaashi naanaa Jehova a lombwela Moses, nova dipaa ovalumenhu aveshe. 8 Ova dipaa yo eehamba dOvamidian, Evi, Rekem, Sur, Hur naReba, eehamba nhano daMidian pamwe naavo va dipawa. Ova dipaa yo Bileam, omonamati waBeor, neongamukonda. 9 Ndele Ovaisrael ova kwata ko ovakainhu nounona Ovamidian ve va ninge eenghwate. Ova nyeka ko yo oinamwenyo yavo aishe yopovanhu, oimuna yavo aishe noiniwe yavo aishe. 10 Oilando yavo aishe omo va li hava di neenhanda davo adishe* ove di xwika po nomundilo. 11 Ova kufa oixuulwa* aishe, oinima aishe oyo va nyeka ko, ovanhu noinamwenyo. 12 Ova eta eenghwate, oinima oyo va nyeka ko noixuulwa kuMoses, komupristeri Eliaser nokongudu aishe yOvaisrael, konhanda oyo ya li momaluhaela aMoab, popepi naJordan puJeriko.

13 Opo nee Moses, omupristeri Eliaser nomalenga aeshe ongudu okwa dja mo e ke va shakeneke kondje yonhanda. 14 Ndele Moses okwa li a handukila ovalumenhu ovo va nangekwa po, ovo va li metangakwaita, omalenga oo taa pashukile omayovi, omalenga oo taa pashukile omafele, oo a li tae uya mo taa di kolwoodi. 15 Moses okwa tya kuvo: “Omolwashike mwa efa ovakainhu aveshe va kale nomwenyo? 16 Tala, ovo ovo va pukifa Ovaisrael vaha kale ovadiinini kuJehova moshinima shi na sha naPeor, palombwelo laBileam, naasho osha etifa ehandukilo mongudu yaJehova. 17 Paife ou na okudipaa okaana keshe kokamati nou na okudipaa omukainhu keshe oo a ya momilele nomulumenhu. 18 Ndele ou na okweefa oukadona aveshe ovo inava ya momilele nomulumenhu va kale nomwenyo. 19 Omu na okukala hamu di kondje yonhanda omafiku aheyali. Keshe umwe womunye oo a dipaa omunhu,* nakeshe umwe womunye oo a kuma omunhu a dipawa oku na okulikoshola ye mwene mefiku etitatu, nomefiku etiheyali, onye neenghwate deni. 20 Oshikutu keshe, oshinima keshe sha longwa moshipa, oshinima keshe sha longwa molududi loikombo noshinima keshe sha longwa moshiti, omu na oku shi koshola komatimba.”

21 Opo nee omupristeri Eliaser okwa lombwela ovalumenhu vometangakwaita, ovo va ile kolwoodi, ta ti: “Ei omhango* oyo Jehova a yandja kuMoses; 22 ‘Oivela, ngaashi oshingoli, oshisilveri, ongopolo, oshivela shilaula, oipapa noholo, 23 oyo ashike mu na okweendifa momundilo, keshe osho ihashi lungwina po komundilo, opo nee otashi kala sha koshoka. Kakele kaasho, oshi na yo okukoshwa nomeva okukoshola. Keshe osho itashi dulu okweenda momundilo, omu na oku shi endifa momeva. 24 Omu na okukosha oikutu yeni mefiku etiheyali, notamu kala mwa koshoka, opo nee otamu dulu okuuya monhanda.’”

25 Jehova okwa tya kuMoses: 26 “Valuleni oinima oyo ya kwatwa ko, ovanhu ovo ve li eenghwate nosho yo oimuna; osho shi ningeni nomupristeri Eliaser nosho yo nomitwe domaukwaneumbo omapata ongudu. 27 Tukuleni oinima oyo ya kwatwa ko moitukulwa ivali, opo i tukulilwe ovo ve li metangakwaita, ovo va li va ya kolwoodi nosho yo ongudu aishe. 28 Shi na sha noifendela yaJehova, omu na okukufa omwenyo* umwe womovakwaita keshe 500, ovo va ile kolwoodi, movanhu, meengobe, meendongi nomeedi. 29 Omu na oku i kufa moipambuliko yavo, ndele tamu i yandje komupristeri Eliaser i li omayambidido aJehova. 30 Moipambuliko oyo ya yandjwa kOvaisrael, omu na okukufa mo shimwe shomoipambuliko 50, movanhu, meengobe, meendongi, meedi nomoinamwenyo yopovanhu yoludi keshe, ndele tamu shi yandje kOvalevi ovo tava wanifa po oinakuwanifwa i na sha netwalihangano laJehova.”

31 Onghee Moses nomupristeri Eliaser ova ninga naanaa ngaashi Jehova a lombwela Moses. 32 Oixuulwa, oinima aishe oyo ovakwaita va kufa ko oya li eedi 675 000, 33 eengobe 72 000 34 neendongi 61 000. 35 Ovakainhu ovo inava ya momilele nomulumenhu ova li ovakainhu* 32 000. 36 Oshixupe osho sha li oshipambuliko shaavo va ile molwoodi osha li eedi 337 500. 37 Oifendela yaJehova, oyo ya dja meedi odo, oi li 675. 38 Meengobe 36 000 omwa dja oifendela yaJehova 72. 39 Meendongi 30 500 omwa dja oifendela yaJehova 61. 40 Movanhu* 16 000 omwa dja oifendela yaJehova, ovanhu* 32. 41 Opo nee Moses okwa yandja komupristeri Eliaser oifendela i li omayambidido aJehova, ngaashi naanaa Jehova a lombwela Moses.

42 Oipambuliko yOvaisrael, oyo Moses a tukula, ya dja moipambuliko yovalumenhu ovo va ile kolwoodi, 43 oya li eedi 337 500, 44 eengobe 36 000, 45 eendongi 30 500, 46 novanhu* 16 000. 47 Opo nee Moses okwa kufa shimwe shomoipambuliko 50 yOvaisrael movanhu nomoimuna, ndele te i pe Ovalevi, ovo va li tava wanifa po oinakuwanifwa yometwalihangano laJehova, ngaashi ashike Jehova a lombwela Moses.

48 Opo nee ovalumenhu omayovi ovo va nangekwa po metangakwaita, omalenga taa pashukile omayovi, omalenga taa pashukile omafele, ova ya kuMoses, 49 ndele tava ti kuye: “Ovapiya voye ova valula ovalumenhu ovakwaita ovo ve li koshi yepashukilo letu, ndele inapa lopotwa nande oumwe a kana po pufye. 50 Onghee keshe umwe womufye na yandje kuJehova osho a mona shi li eyambo, oshingoli, oivela yopeemhando, oivela yokoikesho, eelinga doihako, outenda vomomatwi, noikwaivela imwe, opo tu likoshole* koshipala shaJehova.”

51 Moses nomupristeri Eliaser ova tambula ko kuvo oshingoli noikwaivela aishe. 52 Oshingoli ashishe osho va yandja kuJehova oshi fike peesekeli* 16 750, sha dja komalenga oo taa pashukile omayovi nokomalenga oo taa pashukile omafele. 53 Omulumenhu keshe wometangakwaita okwe likufila ye mwene oinima oyo ya kwatwa ko. 54 Moses nomupristeri Eliaser ova tambula ko oshingoli osho sha dja komalenga oo taa pashukile omayovi nokomalenga oo taa pashukile omafele, nove shi twala metwali lokwoongalela shi li edimbulukifo lOvaisrael koshipala shaJehova.

32 Ovanamati vaRuben novanamati vaGad ova li ve na oimuna ihapu neenghono, nova li va mona kutya edu laJaser nolaGilead oku li oshitukulwa shiwa koimuna. 2 Ovanamati vaGad novanamati vaRuben ova ya kuMoses, komupristeri Eliaser nokomalenga ongudu, tava ti: 3 “Atarot, Dibon, Jaser, Nimra, Hesbon, Eleale, Sebam, Nebo naBehon, 4 edu olo Jehova a nyeka ko moipafi yongudu yOvaisrael, edu liwa noimuna, novapiya voye ove na oimuna ihapu.” 5 Ova twikila ko tava ti: “Ngeenge otwa filwa onghenda koshipala shoye, edu eli nali pewe ovapiya voye li li emona. Ino tu taulukifa omulonga waJordan.”

6 Opo nee Moses okwa tya kovanamati vaGad nokovanamati vaRuben: “Ovamwaxo otava i moita ofimbo nye tamu fyaala apa? 7 Omolwashike tamu shololifa Ovaisrael vaha ye medu olo Jehova te ke va pa shili? 8 Osho osho ooxo va ninga, eshi nde va tuma va dja muKades-barnea va ka tale edu. 9 Eshi va ya kEfilu laEskol nova mona edu, ova shololifa Ovaisrael vaha ye kedu olo Jehova a li poku va pa. 10 Jehova okwa li a handuka neenghono mefiku olo nokwaana ta ti: 11 ‘Ovalumenhu ovo va dja muEgipiti, okudja peedula 20 okuyuka pombada, itava ka ya mo medu olo nda li nda ana okuyandja kuAbraham, Isak naJakob, molwaashi inava dulika kwaame nomutima aushe, 12 kakele kuKaleb, omonamati waJefunne, Omukenas, naJosua, omonamati waNun, molwaashi ova dulika kuJehova nomutima aushe.’ 13 Onghee Jehova okwa li a handukila neenghono Ovaisrael, ndele te va ningifa va kale tava endaenda mombuwa oule weedula 40 lwaapo, fiyo epupi alishe, olo la li tali longo oukolokoshi momesho aJehova, la xula po. 14 Nye ovalumenhu ovakolokoshi otamu ningi naanaa ngaashi ooxo va ninga, eshi va hapupalifa ehandu laJehova shi na sha nOvaisrael. 15 Ngeenge omwa efa oku mu shikula, ote ke va efela natango filufilu mombuwa, notamu ka hanaunifa po ovanhu aveshe ava.”

16 Lwanima, ova ya kuye, ndele tava ti: “Tu tungeni oku oyuunda yomamanya yeedi detu noilando yovana vetu. 17 Ndele ohatu twikile okukala twe lilongekidila olwoodi nohatu ka tetekela Ovaisrael, fiyo osheshi twe va twala monhele yavo, ofimbo ovana vetu tava ka kala moilando oyo ya dingililwa komakuma a pama, va amenwa, opo vaha ningilwe owii kovakalimo vomedu olo. 18 Itatu shuna komaumbo etu, fiyo osheshi Omuisrael keshe a mona edu laye li li efyuululo. 19 Osheshi itatu ka mona efyuululo pamwe navo kouninginino womulonga waJordan nokombinga aishe oyo ya ama oko, molwaashi otwa mona nale efyuululo letu kombinga yokoushilo womulonga waJordan.”

20 Moses okwe va nyamukula, a ti: “Ngeenge osho tamu ningi ngaho: Kufeni oilwifo moipafi yaJehova mu ka lwe. 21 Ngeenge keshe umwe okwa kufa oilwifo, ndele ta tauluka omulonga waJordan moipafi yaJehova, eshi ta taataa ovatondi vaye moipafi yaye, 22 fiyo osheshi mwa kufa ko edu olo moipafi yaJehova. Konima yaasho, otamu dulu okushuna notamu kala mwa manguluka ko ketimba moipafi yaJehova noyOvaisrael. Opo nee edu eli otali ka ninga emona leni koshipala shaJehova. 23 Ndele ngeenge itamu ningi ngaho, otamu ka nyona kuJehova. Moshinima osho, shiiveni kutya otamu ka handukilwa omolwenyono leni. 24 Onghee otamu dulu okutunga oilando yovana veni noyuunda yeedi deni, ashike omu na okuninga osho mwa udaneka.”

25 Ovanamati vaGad novanamati vaRuben ova tya kuMoses: “Ovapiya voye otava ningi naanaa ngaashi omwene wange ta popi. 26 Ovana vetu, ovakulukadi vetu, oimuna yetu noinamwenyo yetu aishe yopovanhu otai kala moilando yaGilead, 27 ndele ovapiya voye otava ka dja mo, nakeshe omulumenhu a homata e lilongekida oku ka lwa moita moipafi yaJehova, ngaashi ashike omwene wange ta popi.”

28 Onghee Moses okwa yandja elombwelo li na sha navo komupristeri Eliaser, kuJosua, omonamati waNun, nokomitwe domaukwaneumbo omapata Ovaisrael. 29 Moses okwa tya kuvo: “Ngeenge ovanamati vaGad novanamati vaRuben ova tauluka omulonga waJordan pamwe nanye, keshe umwe oo a homata e lilongekidila oita moipafi yaJehova, nongeenge edu ola kwatwa ko moipafi yeni, omu na oku va pa edu laGilead li li emona. 30 Ashike ngeenge inava kufa oilwifo nokuya pamwe nanye, otava ka kala mokati keni medu laKaanan.”

31 Opo nee ovanamati vaGad novanamati vaRuben ova nyamukula tava ti: “Osho Jehova a lombwela ovapiya voye osho hatu ka ninga. 32 Ohatu ka kufa oilwifo nokutauluka tu ye kedu laKaanan moipafi yaJehova, ashike emona olo hatu ka fyuulula otali ka kala kombinga ei yomulonga waJordan.” 33 Moses okwa yandja ouhamba waSihon, ohamba yOvaamori, nouhamba waOg, ohamba yaBasan, edu alishe, oilando nomikunda domedu olo kovanamati vaGad, kovanamati vaRuben nosho yo ketata lepata laManasse, omonamati waJosef.

34 Ovanamati vaGad ova tunga* Dibon, Atarot, Aroer, 35 Aterot-sofan, Jaser, Jogbeha, 36 Bet-nimra naBet-haran, oilando ya dingililwa komakuma a pama, nova tunga nomamanya oyuunda yeedi. 37 Ovanamati vaRuben ova tunga Hesbon, Eleale, Kiriataim, 38 Nebo naBaal-meon (omadina ayo okwa lunduluka) naSibma. Opo nee ova hovela okulukulula oilando oyo va tungulula.

39 Ovanamati vaMakir, omonamati waManasse, ova dingilila Gilead nove shi kwata ko, ndele tava taataa mo Ovaamori ovo va li mo. 40 Onghee Moses okwa yandja Gilead kuMakir, omonamati waManasse, nokwa kala ha di omo. 41 Jair, omonamati waManasse, okwa dingilila Ovaamori nokwa kwata ko oumukunda vavo vanini, ndele ta hovele oku va ifana Havvot-jair.* 42 Noba okwe shi dingilila nokwa kwata ko Kenat needoolopa dasho,* ndele ta hovele oku shi ifana nedina laye Noba.

33 Eli olweendo lOvaisrael, eshi va dja medu laEgipiti paengudu* davo koshi yewiliko laMoses naAron. 2 Palombwelo laJehova, Moses okwa kala ta shange eenhele omo va enda molweendo lavo, naali olo la li olweendo lavo okudja konhele imwe okuya konhele ikwao. 3 Ova dja muRameses momafiku 15 omwedi wotete. Mefiku olo konima yOpaasa, Ovaisrael ova dja mo ve na omukumo* moipafi yOvaegipiti aveshe. 4 Ashike Ovaegipiti ova li tava pake oiveli aishe oyo Jehova a dipaa mokati kavo, osheshi Jehova okwa li a tokola oikalunga yavo noku i handukila.

5 Onghee Ovaisrael ova dja mo muRameses, ndele tava ka onga onhanda muSukkot. 6 Opo nee ova dja mo muSukkot, ndele tava ka onga onhanda muEtam, osho shi li komunghulo wombuwa. 7 Okudja opo, ova dja mo muEtam nova shuna va finda kuPihahirot omo to dulu okumonena Baal-sefon, ndele tava ongo onhanda popepi naMigdol. 8 Konima yaasho, ova dja mo muPihahirot, ndele tava ende mokati kefuta va yuka kombuwa, nova kala nokweenda olweendo loshinano shomafiku atatu mombuwa yaEtam, ndele tava ongo onhanda muMara.

9 Opo nee ova dja mo muMara, ndele tava i kuElim. MuElim omwa li eefifiya domeva 12 nomilunga 70, onghee ova li va onga onhanda omo. 10 Okudja opo, ova dja mo muElim, ndele tava ka onga onhanda pEfuta Litilyana. 11 Konima yaasho, ova dja po pEfuta Litilyana, ndele tava ka onga onhanda mombuwa yaSin. 12 Opo nee ova dja mo mombuwa yaSin, ndele tava ka onga onhanda muDofka. 13 Lwanima, ova dja mo muDofka, ndele tava ka onga onhanda muAlus. 14 Okudja opo, ova dja mo muAlus, ndele tava ka onga onhanda muRefidim omo mwa li muhe na omeva okunuwa kovanhu. 15 Konima yaasho, ova dja mo muRefidim, ndele tava ka onga onhanda mombuwa yaSinai.

16 Ova dja mo mombuwa yaSinai, ndele tava ka onga onhanda muKibrot-hattava. 17 Opo nee ova dja mo muKibrot-hattava, ndele tava ka onga onhanda muHaserot. 18 Konima yaasho, ova dja mo muHaserot, ndele tava ka onga onhanda muRitma. 19 Okudja opo, ova dja mo muRitma, ndele tava ka onga onhanda muRimmon-peres. 20 Opo nee ova dja mo muRimmon-peres, ndele tava ka onga onhanda muLibna. 21 Ova dja mo muLibna, ndele tava ka onga onhanda muRissa. 22 Okudja opo, ova dja mo muRissa, ndele tava ka onga onhanda muKehelata. 23 Opo nee ova dja mo muKehelata, ndele tava ka onga onhanda pomhunda Sefer.

24 Konima yaasho, ova dja mo muSefer, ndele tava ka onga onhanda muHarada. 25 Opo nee ova dja mo muHarada, ndele tava ka onga onhanda muMakhelot. 26 Okudja opo, ova dja mo muMakhelot, ndele tava ka onga onhanda muTahat. 27 Konima yaasho, ova dja mo muTahat, ndele tava ka onhanda muTera. 28 Opo nee ova dja mo muTera, ndele tava ka onga onhanda muMitka. 29 Lwanima, ova dja mo muMitka, ndele tava ka onga onhanda muHasmona. 30 Okudja opo, ova dja mo muHasmona, ndele tava ka onga onhanda muMoserot. 31 Opo nee ova dja mo muMoserot, ndele tava ka onga onhanda muBene-jaakan. 32 Ova dja mo muBene-jaakan, ndele tava ka onga onhanda muHor-hagidgad. 33 Okudja opo, ova dja mo muHor-hagidgad, ndele tava ka onga onhanda muJotbata. 34 Lwanima, ova dja mo muJotbata, ndele tava ka onga onhanda muAbrona. 35 Opo nee ova dja mo muAbrona, ndele tava ka onga onhanda muEsion-geber. 36 Konima yaasho, ova dja mo muEsion-geber, ndele tava ka onga onhanda mombuwa Sin, sha hala okutya, muKades.

37 Lwanima, ova dja mo muKades, ndele tava ka onga onhanda pomhunda Hor, peengaba daEdom. 38 Omupristeri Aron okwa londa komhunda Hor palombwelo laJehova noko a fila momudo omuti-40, konima eshi Ovaisrael va fiya po edu laEgipiti, mefiku lotete lomwedi omutitano. 39 Aron okwa li e na eedula 123, eshi a fila komhunda Hor.

40 Omukaanan, ohamba yaArad, oo a li ha di muNegeb medu laKaanan, okwa li a uda kutya Ovaisrael otave uya.

41 Lwanima, ova dja ko komhunda Hor, ndele tava ka onga onhanda muSalmona. 42 Konima yaasho, ova dja mo muSalmona, ndele tava ka onga onhanda muPunon. 43 Okudja opo, ova dja mo muPunon, ndele tava ka onga onhanda muObot. 44 Opo nee ova dja mo muObot, ndele tava ka onga onhanda muIye-abarim, peengaba daMoab. 45 Lwanima, ova dja mo muIyim, ndele tava ka onga onhanda muDibon-gad. 46 Konima yaasho, ova dja mo muDibon-gad, ndele tava ka onga onhanda muAlmon-diblataim. 47 Opo nee ova dja mo muAlmon-diblataim, ndele tava ka onga onhanda keemhunda daAbarim, odo di li popepi naNebo. 48 Xuuninwa, ova dja ko keemhunda daAbarim, ndele tava ka onga onhanda momaluhaela aMoab popepi nomulonga waJordan, puJeriko. 49 Ova twikila okwoonga onhanda pomulonga waJordan, okudja muBet-jesimot fiyo omuAbel-shittim, momaluhaela aMoab.

50 Jehova okwa popya naMoses momaluhaela aMoab popepi nomulonga waJordan, puJeriko, ta ti: 51 “Popya nOvaisrael u va lombwele kutya: ‘Otamu tauluka omulonga waJordan mwa finda medu laKaanan. 52 Omu na okutaataa mo ovakalimo aveshe vomedu olo moipafi yeni nokuhanauna po oihongwamanya yavo aishe nosho yo oihongwafano yavo aishe ya hambulwa moivela,* notamu ka hanauna po eenhele davo adishe diyapuki dokoikulundudu. 53 Otamu ka kwata ko edu olo, nomo tamu ka kala hamu di, osheshi ohandi ke mu pa shili edu olo li li emona. 54 Omu na okutukula edu olo pashihoololifo, li li emona mokati komaludi eni. Ongudu oyo ya kula omu na okuhapupalifa efyuululo layo, nongudu oyo inini omu na okuninipika efyuululo layo. Efyuululo lakeshe umwe otali kala opo oshihoololifo shaye tashi wile. Otamu ka mona oshitukulwa shedu shi li efyuululo, she likolelela komapata ooxo.

55 “‘Ngeenge inamu taataa mo ovakalimo vomedu olo moipafi yeni, ovo tamu ka efa va kale mo otava ka kala ngaashi oimbodi i li momesho nomakiya meemhadi deni, notave ke mu hepeka medu omo tamu ka kala. 56 Osho nda li nda hala oku va ningila osho handi ke mu ningila.’”

34 Jehova okwa popya vali naMoses, a ti: 2 “Lombwela Ovaisrael eendjovo edi: ‘Ngeenge mwa i medu laKaanan, edu olo otamu ke li pewa li li efyuululo, edu laKaanan, she likolelela keengaba dalo.

3 “‘Ongaba yeni yokolukadi otai ka dja kombuwa yaSin, tai kunghula naEdom, nongaba yeni yokolukadi kombinga yokoushilo otai ka dja pomunghulo wEfuta lOmongwa.* 4 Ongaba yeni otai ka tanauka i pite kolukadi laAkrabim notai ka ya ya finda kuSin, ndele tai ka xulila kolukadi laKades-barnea. Otai ka ya fiyo okuHazar-addar notai ka twikila fiyo okuAsmon. 5 Ongaba otai ka tanaukila kuAsmon ya yuka kEfilu* laEgipiti, notai ka xulila kefuta.*

6 “‘Ongaba yeni yokouninginino otai ka kala Efuta Linene* nomunghulofuta. Oyo oyo tai ningi ongaba yeni yokouninginino.

7 “‘Ongaba yeni yokolundume otai ka kala ngaha: Otamu ka tenda ongaba yeni okudja mEfuta Linene fiyo okomhunda Hor. 8 Otamu ka tenda ongaba okudja komhunda Hor fiyo okuLebo-hamat,* nongaba oyo otai ka xulila kuSedad. 9 Ongaba otai ka ya fiyo okuSifron notai ka xulila kuHasar-enan. Oyo otai ka kala ongaba yeni yokolundume.

10 “‘Opo nee otamu ka tenda ongaba yeni koushilo okudja kuHasar-enan fiyo okuSefam. 11 Ongaba otai ka dja kuSefam fiyo okuRibla, koushilo waAin, nongaba otai ka kulukila, ndele tai tauluka olufilu olo li li koushilo wefuta laKinneret.* 12 Ongaba otai ka ya fiyo okomulonga waJordan, notai ka xulila kEfuta lOmongwa. Eli otali ningi edu leni neengaba odo de li dingilila.’”

13 Onghee Moses okwa lombwela Ovaisrael, ta ti: “Edu eli olo tamu ka tukula pashihoololifo li li emona leni, ngaashi ashike Jehova a popya kutya nali yandjwe komapata omuwoi netata. 14 Epata laRuben pamaukwaneumbo omapata avo, epata laGad pamaukwaneumbo omapata avo, netata lepata laManasse ola mona nale efyuululo lalo. 15 Omapata avali netata okwa mona nale efyuululo lao koshitukulwa shokoushilo womulonga waJordan kuJeriko, kombinga oko haku piti etango.”

16 Jehova okwa popya vali naMoses, ta ti: 17 “Aa omadina ovalumenhu ovo tava ka tukula edu omo tamu ka kala: omupristeri Eliaser naJosua, omonamati waNun. 18 Omu na okukufa omalenga, mepata keshe elenga limwe, a tukule edu li li efyuululo leni. 19 Omadina ovalumenhu oo aa: mepata laJuda oKaleb, omonamati waJefunne; 20 mepata lovanamati vaSimeon oSemuel, omonamati waAmmihud; 21 mepata laBenjamin oElidad, omonamati waKislon; 22 mepata lovanamati vaDan elenga Bukki, omonamati waJogli; 23 movanamati vaJosef, ovo va dja mepata lovanamati vaManasse, elenga Hanniel, omonamati waEfod; 24 mepata lovanamati vaEfraim elenga Kemuel, omonamati waSiftan; 25 mepata lovanamati vaSebulon elenga Elisafan, omonamati waParnak; 26 mepata lovanamati vaIsaskar elenga Paltiel, omonamati waAssan; 27 mepata lovanamati vaAsser elenga Ahihud, omonamati waSelomi; 28 nomepata lovanamati vaNaftali elenga Pedael, omonamati waAmmihud.” 29 Ovo ovo Jehova a lombwela va tukulile Ovaisrael edu medu laKaanan.

35 Jehova okwa lombwela Moses momaluhaela aMoab popepi nomulonga waJordan, puJeriko, a ti: 2 “Lombwela Ovaisrael kutya ove na okupa Ovalevi oilando va kale mo tave i kufa mefyuululo lavo olo tava ka mona, nove na okuyandja kOvalevi omaulifilo a dingilila oilando. 3 Otava ka kala hava di moilando oyo, nomaulifilo otaa ka ninga oimuna yavo, oinima yavo nosho yo oinamwenyo yavo ikwao aishe. 4 Omaulifilo oilando oyo tamu ka yandja kOvalevi otai ka kwata oule womaludimbo* 1 000, okudja kekuma olo la dingilila oshilando ashishe. 5 Omu na okumeta kondje yoshilando omaludimbo 2 000 koushilo, omaludimbo 2 000 kolukadi, omaludimbo 2 000 kouninginino nomaludimbo 2 000 kolundume, oshilando nashi kale pokati. Otaa ka kala omaulifilo oilando yavo.

6 “Oilando oyo tamu ka yandja kOvalevi otai ka kala oihondamenolando 6, oko taku ka kala haku hondama ovo va dipaa nosho yo oilando ikwao 42. 7 Omu na okuyandja kOvalevi oilando aishe kumwe 48, pamwe nomaulifilo ayo. 8 Oilando oyo tamu ke va pa otai ka dja memona lOvaisrael. Mepata olo la kula otamu ka kufa mo emona lihapu nomepata olo linini otamu ka kufa mo linini. Epata keshe otali ka yandja oilando yalo imwe kOvalevi she likolelela kefyuululo olo tali mono.”

9 Jehova okwa twikila okulombwela Moses, ta ti: 10 “Popya nOvaisrael u va lombwele kutya: ‘Omu na okutauluka omulonga waJordan muye medu laKaanan. 11 Omu na okuhoolola oilando tai mu wapalele i li oihondamenolando, omo omudipai oo a dipaa umwe* shihe fi oshiningilewina e na okuhondama. 12 Oilando oyo otai ke mu amena kovapuli vohonde, opo omudipai aha fye fimbo ina pangulwa moipafi yongudu yovanhu. 13 Oihondamenolando ihamano oyo mwa yandja osho tai ka longifwa ngaho. 14 Omu na okuyandja oilando itatu koushilo womulonga waJordan, noilando itatu medu laKaanan i kale oihondamenolando. 15 Oilando oyo ihamano otai kala i li eameno kOvaisrael, kovanailongo, nokwaavo hava di mokati kavo, opo keshe umwe oo a dipaa umwe* shihe fi oshiningilewina a dule oku ka hondama ko.

16 “‘Ashike ngeenge okwa denge umwe noshivela, ndele ta fi, ye omudipai. Omudipai oku na okudipawa filufilu. 17 Ngeenge okwe mu denge nemanya olo tali dulu oku mu dipaa, ndele ta fi, ye omudipai. Omudipai oku na okudipawa filufilu. 18 Ngeenge okwe mu denge noshiti osho tashi dulu oku mu dipaa, ndele ta fi, ye omudipai. Omudipai oku na okudipawa filufilu.

19 “‘Omupuli wohonde oye e na okudipaa omudipai. Ngeenge okwe mu mono, oku na oku mu dipaa. 20 Ngeenge okwa fi, molwaashi e mu undula omolwoutondwe, ile e mu kupula sha e na elalakano lii,* 21 ile okwe mu denge neke laye omolwoutondwe, ndele ta fi, oo e mu dipaa oku na okudipawa filufilu. Ye omudipai. Omupuli wohonde ota ka dipaa omudipai ngeenge okwe mu mono.

22 “‘Ndele ngeenge kasha li sha teelelika noine mu undula omolwoutondwe, ile e mu kupula sha shihe fi oshiningilewina,* 23 ile ngeenge ine mu mona, ndele te mu wilifa emanya noka li omutondi, ile ka li a hala oku mu monifa oshiponga, ndele omunhu ta fi, 24 ongudu oi na okutokola pokati kaao e mu denga nosho yo omupuli wohonde metwokumwe neemhango odo. 25 Opo nee ongudu yovanhu oi na okuxupifa omudipai momake omupuli wohonde noku mu shunifa koshihondamenolando oko a li a ka hondama, noku na okukala oko fiyo omupristeri munene, oo a li a vaekwa nomaadi mayapuki, a fya.

26 “‘Ngeenge omudipai okwa piti mo meengaba doshihondamenolando omo a li a ka hondama, 27 ndele omupuli wohonde te mu hange kondje yeengaba doshihondamenolando osho, ndele ta dipaa omudipai, ke na etimba lohonde. 28 Oku na okukala ha di moshihondamenolando osho, fiyo osheshi omupristeri munene a fya. Konima eshi omupristeri munene a fya, omudipai ota dulu okushuna kedu lavo. 29 Oinima oyo otai kala onghedimhango yokutokola kunye fiyo okomapupi eni aeshe meenhele deni adishe.

30 “‘Keshe oo ta dipaa omunhu* oku na okudipawa e li omudipai paendjovo* deendombwedi, ndele kape na ou* e na okudipawa paendjovo dondombwedi ashike imwe. 31 Kamu na okutambula ko oifuta yomwenyo womudipai oo a wana okufya, molwaashi oku na okudipawa filufilu. 32 Kamu na okutambula oifuta yaao a li a ka hondama koshihondamenolando shaye mu mu efe a ka kale ha di vali kedu lavo ofimbo omupristeri munene ina fya.

33 “‘Kamu na okunyateka edu omo mu li, molwaashi ohonde ohai nyateke edu, edu olo itali ka kosholwa omolwohonde oyo ya tikila mo, kakele kohonde yaao e i tilashi. 34 Inamu nyateka edu omo mu li, omo yo ndi li; osheshi ame, Jehova, ondi li mokati kOvaisrael.’”

36 Omitwe domaukwaneumbo domoludalo laGilead, omonamati waMakir, omonamati waManasse, domomapata ovanamati vaJosef ode uya, ndele tadi popi moipafi yaMoses noyomalenga, oo e li omitwe domaukwaneumbo Ovaisrael. 2 Oda tya: “Jehova okwa lombwela omwene wange a tukule edu pashihoololifo li li efyuululo kOvaisrael. Omwene wange okwa lombwelwa kuJehova a yandje efyuululo lomumwameme Selofad kovanakadona vaye. 3 Ngeenge ova hombolwa kovalumenhu vomepata limwe laIsrael, efyuululo lovakainhu otali ka kufwa mo yo mefyuululo lootate, ndele tali wedwa kefyuululo lomepata omo tava hombolwa, opo liha ka kwatelwe mo, eshi taku ningwa oshihoololifo shi na sha nefyuululo letu. 4 Ngeenge Ovaisrael tava dana Omudo wEkuwililo, efyuululo lovakainhu otali ka wedwa yo kefyuululo lomepata omo va hombolwa, opo efyuululo lavo li kufwe mo mefyuululo lomepata lootate.”

5 Opo nee Moses okwa lombwela Ovaisrael palombwelo laJehova, a ti: “Osho epata lovanamati vaJosef tali popi oshi li mondjila. 6 Ei oyo ondjovo oyo Jehova a lombwela ovanakadona vaSelofad, tai ti: ‘Otava dulu okuhombolwa kukeshe oo va hala. Ashike ove na okuhombolwa kuumwe a dja moukwaneumbo womepata laxe. 7 Efyuululo lOvaisrael kali na okuyandjwa kepata nepata, molwaashi Ovaisrael ove na okudiinina efyuululo lomepata looxekulululwa. 8 Keshe okakadona ka mona efyuululo mokati komapata Ovaisrael oke na okuninga omukulukadi waumwe womoludalo lomepata laxe, opo Ovaisrael va diinine emona lefyuululo looxekulululwa. 9 Kape na efyuululo li na okuyandjwa okudja kepata limwe tali i kepata likwao, molwaashi omapata Ovaisrael oku na okudiinina efyuululo lao vene.’”

10 Ovanakadona vaSelofad ova ninga naanaa ngaashi Jehova a lombwela Moses. 11 Onghee Mahla, Tirsa, Hogla, Milka naNoa, ovanakadona vaSelofad, ova hombolwa kovamati va dalwa kovamwaina vaxe ovalumenhu. 12 Ova ninga ovakulukadi vovalumenhu va dja momapata aManasse, omonamati waJosef, opo efyuululo li kale mepata loludi laxe.

13 Oyo oipango nomatokolo oo Jehova a yandja kOvaisrael okupitila muMoses momaluhaela aMoab, popepi naJordan puJeriko.