DEUTERONOMION

1 Edi eendjovo odo Moses a lombwela Ovaisrael aveshe mombuwa, koushilo womulonga waJordan, momaluhaela oo e li popepi naSuf, pokati kaParan, Tofel, Laban, Haserot naDisahab. 2 Ohapa endwa oule womafiku 11, okudja kuHoreb fiyo okuKades-barnea, to endele nondjila yokomhunda yaSeir. 3 Mefiku lotete lomwedi 11, momudo omuti-40, Moses okwa lombwela Ovaisrael* oinima aishe oyo Jehova a ti kutya ne va lombwele. 4 Osho osha ningwa konima eshi a finda Sihon, ohamba yOvaamori, oo a li ha di muHesbon, nosho yo Og, ohamba yaBasan, oo a li ha di muAstarot, muEdrei. 5 Moses okwa li a katuka onghatu, opo a yelife Omhango ei koushilo womulonga waJordan, medu laMoab, a ti:

6 “Jehova, Kalunga ketu, okwe tu lombwela muHoreb kutya: ‘Moshitukulwa eshi shokeemhunda omwa kala mo efimbo lile. 7 Tanaukeni mu ye koshitukulwa shokeemhunda shOvaamori nokovashiinda shavo aveshe kuAraba, koshitukulwa shokeemhunda, kuShefela, kuNegeb nokomunghulofuta, kedu lOvakaanan nokuLibanon* fiyo okomulonga munene, omulonga waEufrat. 8 Taleni, onde mu longekidila edu. Indeni mo, ndele tamu kufa ko edu olo Jehova a ana kutya ote li pe ooxokulululwa, Abraham, Isak naJakob nosho yo oludalo lavo olo tali shikula ko.’

9 “Pefimbo opo, onde mu lombwela kutya: ‘Ame itandi dulu oku mu wilika aame andike. 10 Jehova, Kalunga keni, okwe mu hapupalifa, nopaife omwa hapupala neenghono ngaashi eenyofi dokeulu. 11 Jehova, Kalunga kooxokulululwa, ne mu hapupalife lweyovi noku mu nangeka noupuna ngaashi ashike e mu udanekela. 12 Ongahelipi handi dulu okuhumbata omutengi weni nomaudjuu eni, nokuungaunga nanye, eshi tamu tangunine nge? 13 Hoololeni ovalumenhu ovanaendunge, ve na eendunge dokuyoolola nove na owino, nohandi ke va nangeka po ve mu wilike.’ 14 Omwa nyamukula nge mwa ti: ‘Osho we tu lombwela tu ninge oshiwa.’ 15 Onghee onda kufa ovawiliki momapata eni, ovalumenhu ovanaendunge nove na owino, nonde va nangeka po ve mu wilike, omalenga taa pashukile omayovi, omalenga taa pashukile omafele, omalenga taa pashukile omilongo nhano, nomalenga taa pashukile omilongo nosho yo ovaleli vomapata eni.

16 “Pefimbo opo, onda lombwela ovatokoli veni kutya: ‘Ngeenge tamu pwilikine oupyakadi oo u li pokati kovamwaxo, omu na okutokola pauyuki pokati komulumenhu namumwaina, ile nomunailongo. 17 Inamu kala mu na okatongo ngeenge tamu tokola. Omu na okupwilikina ehokololo laavo inava fimanekwa, ngaashi tamu pwilikine laavo va fimanekwa. Inamu tilifwa kovanhu, osheshi Kalunga oye ta tokola, nongeenge oupyakadi oudjuu kunye, u shiivifilei nge, nohandi ke u pwilikina.’ 18 Pefimbo opo, onde mu lombwela oinima aishe oyo mu na okuninga.

19 “Opo nee otwa dja po puHoreb notwa taulula ombuwa oyo inene noitilifa, oyo mwa mona mondjila oyo ya finda koshitukulwa shokeemhunda shOvaamori, ngaashi Jehova, Kalunga ketu, e tu lombwela, ndele xuuninwa, otwa ya kuKades-barnea. 20 Onde mu lombwela kutya: ‘Omwe uya koshitukulwa shokeemhunda shOvaamori, osho Jehova, Kalunga ketu, te tu pe. 21 Taleni, Jehova, Kalunga keni, okwe mu pa edu. Indeni, li kufei ko, ngaashi Jehova, Kalunga kooxokulululwa, e mu lombwela. Inamu kala mwa tila, ile mu mbadapale.’

22 “Onghee amushe omwe uya kwaame, ndele tamu ti: ‘Tu tumeni ovalumenhu ve tu tetekele ve ke tu konakonene edu noku tu alukila ve tu lombwele kutya ondjila ilipi tu na okuya nayo noilando ilipi hatu i kuyo.’ 23 Eetepo olo ola li liwa kwaame, onghee onda hoolola ovalumenhu 12, mepata keshe omulumenhu umwe. 24 Ova dja po, ndele tava i koshitukulwa shokeemhunda nova fika kEfilu laEskol, ndele tave shi ndaada. 25 Ova kufa imwe yomoilikolomwa yomedu olo, ndele tave i tu etele, nove tu lombwela kutya: ‘Edu olo Jehova, Kalunga ketu, te tu pe oliwa.’ 26 Ashike omwa anya okuya ko, noinamu dulika kelombwelo laJehova, Kalunga keni. 27 Omwa kala momatwali eni tamu ngongota tamu ti: ‘Jehova oku tu tonde, nomolwaasho e tu kufa mo medu laEgipiti e tu yandje kOvaamori ve tu xulife po. 28 Ohatu i konhele ya tya ngahelipi? Ovamwatate ove tu mbadapaleka,* eshi va ti: “Oku na ovanhu vanene novale ve tu dule, noilando yavo oinene noya dingililwa komakuma a twa keulu,* notwa mona ko ovanamati vOvaanak.”’

29 “Onghee onde mu lombwela kutya: ‘Inamu tila, nye inamu kakama omolwavo. 30 Jehova, Kalunga keni, ote mu pitile komesho nota ka lwa ponhele yeni, ngaashi ashike e shi ninga moipafi yeni muEgipiti. 31 Omwa mona nghee Jehova, Kalunga keni, e mu fila oshisho mombuwa, ngaashi omulumenhu ta file oshisho omonamati waye, apeshe opo mwa enda, fiyo osheshi mwe uya ponhele ei.’ 32 Ndele nande omwa ningilwa oinima aishe oyo, inamu itavela muJehova, Kalunga keni, 33 oo e mu tetekela komesho mondjila, opo a tale onhele omo tamu dulu okudika onhanda. Oufiku okwa kala te mu holokele okupitila momundilo, nomutenya okupitila moluudi loshilemo, opo e mu ulikile ondjila oyo mu na okweenda nayo.

34 “Jehova okwa uda oinima aishe oyo mwa popya, nokwa li a handuka neenghono, ndele ta ane, ta ti, 35 ‘Kape na nande omulumenhu umwe womepupi eli likolokoshi ta ka mona edu liwa olo nda ana ndi li pe ooxo, 36 kakele kuKaleb, omonamati waJefunne. Ote ke li mona, nohandi mu pe edu, omo a enda, pamwe novanamati vaye, molwaashi okwa dulika nomutima aushe* kuJehova. 37 (Jehova okwa li a handukila nge omolweni, nokwa ti: “Naave ito i mo. 38 Josua, omonamati waNun, oo a fikama pwoove, oye ta i mo medu olo. Mu pameka,* molwaashi oye ta ka kwatela komesho Ovaisrael va ye medu olo.”) 39 Ndele ovana veni, ovo mwa ti kutya otava ka kwatwa ko, novanamati veni ovo kunena vehe shii ouwa nowii, ovo tava ka ya mo, nohandi ke li va pa li ninge emona lavo. 40 Ashike nye shuneni, indeni mombuwa, tamu endele nondjila yokEfuta Litilyana.’

41 “Opo nee omwa lombwela nge kutya: ‘Otwa nyona kuJehova. Paife ohatu i tu ka lwe, ngaashi Jehova, Kalunga ketu, e tu lombwela.’ Onghee keshe umwe womunye okwa homata oilwifo yomoita, nomwa li tamu diladila kutya oshipu okulonda komhunda. 42 Ashike Jehova okwa lombwela nge, a ti: ‘Va lombwela kutya: “Inamu ya mu ka lwe, osheshi itandi ka kala pamwe nanye. Ngeenge omwe shi ningi, otamu ka findwa kovatondi veni.”’ 43 Onghee onda popya nanye, ndele inamu pwilikina nge. Ponhele yaasho, inamu dulika kelombwelo laJehova nomwa kukutika omitwe deni, ndele tamu kendabala okuya komhunda. 44 Opo nee Ovaamori, ovo va li hava di komhunda oyo, ove uya nove mu shakeneka, ndele tave mu taataa ngaashi eenyiki hadi ningi, nove mu lihanifila muSeir fiyo okuHorma. 45 Onghee omwa aluka nomwa hovela okulila koshipala shaJehova, ashike Jehova ine mu uda noine mu nyamukula. 46 Osho osho she mu ningifa mu kale muKades efimbo lile.

2 “Opo nee otwa tanauka ko, ndele hatu i kombuwa nondjila oyo ya finda kEfuta Litilyana, ngaashi Jehova a lombwela nge, notwa enda po oule womafiku mahapu hatu kunghula nomhunda yaSeir. 2 Xuuninwa, Jehova okwa lombwela nge, a ti: 3 ‘Omwa kala tamu kunghula nomhunda ei efimbo lile. Paife tanaukileni kolundume. 4 Ovanhu va lombwela ngaha: “Otamu ka pita peengaba dovamwaxo, oludalo laEsau, ovo hava di muSeir, notava ka kala ve mu tila, nomu na okukala mwa lungama filufilu. 5 Inamu va tonda,* molwaashi itandi ke mu pa nande oshipambu shimwe shomedu lavo, nokuli nonhele i fike pomhadi,* molwaashi onda yandja omhunda Seir kuEsau i li emona laye. 6 Omu na oku va pa oimaliwa yoikulya oyo tamu ka lya, nomu na okufuta omeva oo tamu ka nwa. 7 Jehova, Kalunga koye, okwe ku nangeka noupuna mwaaishe oyo wa ninga. Oku shi shii filufilu nghee wa enda mombuwa ei inene. Jehova, Kalunga koye, okwa kala pamwe naave eedula odo 40, ndele kwa li wa pumbwa sha.”’ 8 Otwa pita po povamwameme, oludalo laEsau, ovo hava di muSeir, tu li kokule nondjila yaAraba, yaElat noyaEsion-geber.

“Opo nee otwa tanauka, ndele hatu i nondjila oyo ya finda kombuwa yaMoab. 9 Jehova okwa lombwela nge, a ti: ‘Ino tonda Moab, ile u lwe naye, osheshi itandi ke ku pa nande oshitukulwa shasha shedu laye shi ninge po shoye, molwaashi onda yandja koludalo laLot oshitukulwa shaAr shi ninge shavo. 10 (Ovaemim ova li ovanaenghono, vahapu neenghono novale ngaashi Ovaanak. 11 Ovarefaim navo ova li va talika ko va fa Ovaanak, nOvamoab ova li have va ifana Ovaemim. 12 Ovahori nale ova li hava di muSeir, ashike oludalo laEsau ole va taataa mo noku va hanauna po, ndele tali kala monhele yavo, ngaashi ashike Israel ta ka ningila edu olo li li emona laye, olo Jehova te ke mu pa filufilu.) 13 Indeni paife, ndele tamu tauluka efilu laSered. Opo nee otwa tauluka Efilu laSered. 14 Otwa enda po eedula 38, okudja kuKades-barnea fiyo twa tauluka Efilu laSered, fiyo epupi alishe olo la wana okuya moita la xula po monhanda, ngaashi Jehova a li e va lombwela. 15 Jehova okwe va yelulila eke laye, opo e va hanaune po monhanda fiyo va xula po.

16 “Diva eshi ovalumenhu aveshe ovo va wana okuya moita va fya, 17 Jehova okwa lombwela nge vali, a ti: 18 ‘Nena ou na okupita moshitukulwa shaMoab, sha hala okutya, muAr. 19 Ngeenge owe uya popepi nOvaammoni, ino va hepeka, ile u va shinde, osheshi itandi ke ku pa nande oshitukulwa shasha shedu lOvaammoni, molwaashi onde li yandja koludalo laLot li ninge lalo. 20 Nalo ola li la talika ko yo li li edu lOvarefaim. (Ovarefaim oko va li hava di oko, nOvaammoni ova li have va ifana Ovasamusumi. 21 Ova li ovanaenghono, vahapu novale ngaashi Ovaanak, ashike Jehova okwe va hanauna po moipafi yOvaammoni, nove va taataa mo, ndele tava kala hava di monhele yavo. 22 Osho osho a ningila oludalo laEsau, olo paife hali di muSeir, eshi a hanauna po Ovahori moipafi yavo, opo ve va taatae mo nokukala hava di meenhele davo fiyo okunena. 23 Ovaavim ova li hava di komikunda daGasa fiyo osheshi Ovakaftori ovo va dja muKaftori,* ve va hanauna po, ndele tava kala hava di monhele yavo.)

24 “‘Fikameni, ndele tamu tauluka Efilu laArnon. Taleni, Sihon, Omuamori, ohamba yaHesbon, onde mu yandja momake eni. Kufei ko edu laye, ndele tamu mu lwifa. 25 Nena ohandi ka ningifa ovanhu aveshe, ovo ve li kombada yedu, ovo tava udu ehokololo kombinga yoye, va tile nokukakama. Otava ka piyaanekwa nokudekweta* omolwoye.’

26 “Opo nee ohandi ka tuma ovatumwa tava di mombuwa yaKedemot kuSihon, ohamba yaHesbon, neendjovo edi dombili: 27 ‘Kwafele nge ndi pite medu loye. Ohandi ka enda mondjila, noitandi ka kandukila kolulyo, ile kolumosho. 28 Ohandi ka lya ashike oikulya nokunwa omeva oo handi ka landa kwoove. Pitike nge ashike ndi ende mo kolupadi. 29 Osho osho oludalo laEsau olo hali di muSeir, nOvamoab ovo hava di muAr va ningila nge, fiyo nda tauluka omulonga waJordan, nokuya medu olo Jehova Kalunga te tu pe.’ 30 Ndele Sihon, ohamba yaHesbon, ine tu efa tu pite mo, molwaashi Jehova, Kalunga koye, okwe mu efa a tangalale, noku kukutike omutima waye, opo e mu yandje momake eni ngaashi e shi ninga paife.

31 “Jehova okwa lombwela nge, a ti: ‘Tala, onda hovela nale okuyandja Sihon nosho yo edu laye kwoove. Kufa ko edu laye li ninge loye.’ 32 Eshi Sihon netangakwaita laye alishe ve uya oku tu shakeneka molwoodi puJahas, 33 Jehova, Kalunga ketu, okwe mu yandja kufye, opo tu mu finde, ovanamati vaye novanhu vaye aveshe. 34 Pefimbo opo otwa li twa kwata ko oilando yaye aishe, ndele hatu hanauna po oilando aishe, mwa kwatelwa ovalumenhu, ovakainhu nounona. Inatu xupifa mo nande omunhu. 35 Otwa nyeka ko ashike oimuna i ninge yetu, pamwe noixuulwa* oyo ya dja moilando oyo twa kwata ko. 36 Okudja muAroer, osho shi li komunghulo wEfilu laArnon (mwa kwatelwa oshilando osho shi li mefilu), fiyo okuGilead, kapa li odoolopa oyo twa li inatu finda. Jehova, Kalunga ketu, okwe va yandja aveshe kufye. 37 Ashike inamu ya medu lOvaammoni, Efilu alishe laJabbok nomoilando, oyo i li koshitukulwa shokeemhunda, ile keenhele dimwe oko Jehova, Kalunga ketu, e tu lombwela tuha ye ko.

3 “Opo nee otwa aluka ko, ndele hatu i nondjila oyo ya finda kuBasan. Og, ohamba yaBasan, okwe uya pamwe netangakwaita laye alishe ve tu shakeneke molwoodi muEdrei. 2 Onghee Jehova okwa lombwela nge, a ti: ‘Ino mu tila, osheshi ame ohandi ke mu yandja netangakwaita laye alishe nosho yo edu laye meke loye, noto ke mu ningila ngaashi naanaa wa ningila Sihon, ohamba yOvaamori, oo a li ha di muHesbon.’ 3 Jehova, Kalunga ketu, okwa yandja yo momake etu Og, ohamba yaBasan, novanhu vaye aveshe, notwa kala hatu va dipaa fiyo aveshe va pwa po. 4 Opo nee otwa kwata ko oilando yaye aishe. Otwa li twe va kufa eedoolopa davo adishe, oilando 60, oyo i li moshitukulwa shaArgob, sha hala okutya, ouhamba waOg, muBasan. 5 Oilando aishe oyo oya li i na omakuma malemale, omivelo noihakifo. Otwa li yo twa kwata ko eedoolopa odo da li inadi dingililwa komakuma. 6 Ashike oinima aishe oyo otwe i hanauna po ngaashi ashike twa ningila Sihon, ohamba yaHesbon, eshi twa hanauna po oilando aishe, mwa kwatelwa ovalumenhu, ovakainhu nounona. 7 Otwa kwata ko oimuna aishe noixuulwa* yomoilando oyo.

8 “Pefimbo opo, otwa li twa kwata ko edu leehamba mbali dOvaamori, odo da li hadi di moshitukulwa shaJordan, okudja kEfilu laArnon fiyo okomhunda yaHermon, 9 (oyo Ovasidon va li have i ifana Sirion, nOvaamori ova li have i ifana Senir), 10 oilando aishe oyo ya tungilwa komhunda ya lalakana, Gilead ashishe nosho yo Basan ashishe fiyo okuSalka nokuEdrei, oilando yomouhamba waOg, muBasan. 11 Og, ohamba yaBasan, oye a li waxuuninwa a xupa po mOvarefaim. Olutala* olo la li la humbatifwa oshimhu shaye ola li la longwa moshivela shilaula,* noli li natango muRabba shOvaammoni. Oule walo omaludimbo* omuwoi, nounene omaludimbo ane, she likolelela koludimbo olo la li tali longifwa pefimbo opo. 12 Pefimbo opo, otwa li twa kwata ko edu eli: Okudja kuAroer, osho shi li mEfilu laArnon, netata loshitukulwa shokeemhunda shaGilead, nonda li nda yandja oilando yasho kOvaruben nokOvagad. 13 Oshitukulwa shikwao shaGilead noshaBasan ashishe, osho sha li ouhamba waOg, onde shi yandja ketata lepata laManasse. Oshitukulwa ashishe shaArgob, osho sha li shaBasan, osha li sha shiivika shi li edu lOvarefaim.

14 “Jair, omonamati waManasse, okwa kufa ko oshitukulwa ashishe shaArgob fiyo okeengaba dOvagesur nodOvamaakati, ndele te lilukile omikunda domuBasan, Havvot-jair,* osho hadi ifanwa ngaho fiyo okunena eli. 15 Onda yandja Gilead kuMakir. 16 Ovaruben nOvagad onde va pa okudja kuGilead fiyo okEfilu laArnon, nongaba oyo oya dja pokati kefilu fiyo okuJabbok, nefilu olo ola li eengaba dOvaammoni, 17 naAraba nomulonga waJordan nosho yo eengaba, okudja kuKinneret fiyo okefuta laAraba, Efuta lOmongwa,* pefina lomhunda yaPisga, kombinga yokoushilo.

18 “Opo nee onde mu lombwela, nda ti: ‘Jehova, Kalunga keni, okwe mu pa edu eli li ninge leni. Ovalumenhu aveshe ovo ve na ouladi otava ka kufa oilwifo yavo, nokupita komesho ovamwaxo, Ovaisrael. 19 Ovakulukadi veni, ovana veni noimuna yeni (ondi shi shii filufilu kutya omu na oufita munene woimuna) oyo ashike tai ka twikila okukala moilando oyo nde mu pa. 20 Otamu ka kala mo fiyo osheshi Jehova a pa ovamwaxo onhele yetulumuko ngaashi e mu ningila, nokukufa ko edu olo Jehova, Kalunga keni, te ke va pa kombinga ikwao yomulonga waJordan. Opo nee otamu ka aluka ko, nakeshe umwe ota ka shuna konhele oyo nde mu pa.’

21 “Pefimbo olo, onda lombwela Josua, nda ti: ‘Owa mona nomesho oye osho Jehova, Kalunga keni, a ningila eehamba odo mbali. Jehova ota ka ningila yo sha faafana omauhamba aeshe oo tamu ka hanga kombinga ikwao yomulonga waJordan. 22 Inamu va tila, osheshi Jehova, Kalunga keni, oye ta ka lwa ponhele yeni.’

23 “Pefimbo opo, onda lilila Jehova, nda ti: 24 ‘Omwene Jehova, Omunamapangelo aeshe, owa hovela okuulikila omupiya woye ounene woye, nokwooko kwoye ku na eenghono, osheshi okalunga elipi meulu, ile kombada yedu ta dulu okulonga oilonganghono ngaashi oyo wa longa? 25 Alikana, pitike nge ndi tauluke ndi mone edu liwa olo li li kombinga ikwao yomulonga waJordan, oshitukulwa shiwa shokeemhunda, nosho yo Libanon.’ 26 Ashike Jehova okwa li natango a handukila nge unene omolweni, noka li a pwilikina nge. Ponhele yaasho, Jehova okwa tya kwaame: ‘Xulila opo! Ino popya vali naame kombinga yoshinima osho. 27 Inda koxulo yomhunda yaPisga, ndele to tale kouninginino, kolundume, kolukadi nokoushilo, nokutala edu olo nomesho oye, osheshi ove ito ka tauluka omulonga waJordan. 28 Nangeka po Josua, ndele to mu tu omukumo noku mu pameka, molwaashi oye ta ka kwatela komesho ovanhu va tauluke omulonga waJordan nokuya medu olo to ka mona.’ 29 Oinima aishe oyo oya ningwa, eshi twa li mefilu olo li li popepi naBet-peor.

4 “Akutu, Israel, pwilikineni komaufomhango nomatokolo oo handi mu hongo mu a diinine, opo mu kale nomwenyo, nomu dule okuya mu ka kale medu olo Jehova, Kalunga kooxokulululwa, te mu pe. 2 Meendjovo odo handi mu lombwele inamu weda mo sha noinamu kufa mo sha, opo mu dule okudiinina oipango yaJehova, Kalunga keni, oyo handi mu lombwele.

3 “Omwa mona nomesho eni osho Jehova a li a ninga omolwaBaal womuPeor. Jehova, Kalunga keni, okwa hanauna po ovanhu aveshe mokati keni ovo va li va longela Baal womuPeor. 4 Ndele ovo mwa kala ovadiinini kuJehova, Kalunga keni, amushe omu na omwenyo fiyo opaife. 5 Taleni, onde mu pa omaufomhango noku mu honga omatokolo, ngaashi naanaa Jehova, Kalunga kange, a lombwela nge, opo mu ke a diinine medu omo tamu ka kala. 6 Kaleni noku a diinina filufilu, molwaashi kungaho otamu ka ulika kutya omu na ounongo neendunge moipafi yovanhu ovo tava ka uda omaufomhango aeshe oo. Opo nee otava ka tya: ‘Oshiwana eshi shinene oshi na filufilu ounongo neendunge.’ 7 Mbela ope na ngoo oshiwana shinene osho ookalunga kasho ve li popepi nasho ngaashi Jehova, Kalunga ketu, he tu nyamukula ngeenge hatu mu ilikana? 8 Oshiwana vali shilipi shinene shi na omaufomhango e li pauyuki nomatokolo ngaashi eemhango adishe odo handi mu pe nena eli?

9 “Kala wa lungama nokulipashukila nawa,* opo uha dimbwe oinima oyo wa mona nomesho noiha dje mo momutima woye mokukalamwenyo kwoye akushe. Ou na yo oku i honga ovana voye novatekulu voye. 10 Mefiku olo wa li wa fikama koshipala shaJehova, Kalunga koye, muHoreb, Jehova okwa lombwela nge, a ti: ‘Ongela ovanhu pwaame va ude eendjovo dange, opo ve lihonge okukala hava tila nge mokukalamwenyo kwavo akushe kombada yedu, nova dule yo okuhonga ovana vavo.’

11 “Onghee omwa li mwe uya popepi nomwa fikama pefina lomhunda, nomhunda oya li tai lundumuka* omundilo wa twa keulu; okwa li ku na oilemo nomilaulu, kwa laula fokofoko. 12 Jehova okwa li a hovela okupopya nanye okupitila momundilo. Omwa uda eendjovo daye, ndele inamu mu mona komudidi, ewi ashike mwa uda. 13 Okwe mu lombwela ehangano olo li li pokati keni naye, olo e mu lombwela mu diinine, sha hala okutya, Oipango Omulongo.* Konima yaasho, okwe i shanga koipelende ivali yomamanya. 14 Jehova okwa lombwela nge pefimbo opo kutya nandi mu honge omaufomhango nomatokolo, oo mu na oku ka diinina medu omo tamu ka ya mu ka kale.

15 “Onghee, lipashukileni nawa,* molwaashi inamu mona sha mefiku olo Jehova a popya nanye muHoreb okupitila mokati komundilo, 16 opo muha nyone mokulihongela oshihongwafano shi li molupe loshinima shonhumba, molupe lomulumenhu, ile lomukainhu, 17 molupe loshinamwenyo keshe osho shi li kombada yedu, ile molupe loudila aveshe ovo hava tuka mewangadjo, 18 molupe loshinima keshe osho tashi linyenge kombada yedu, ile molupe leeshi adishe odo di li momeva kombada yedu. 19 Ndele ngeenge mwa yelula omesho mu tale keulu, ndele tamu mono etango, omwedi neenyofi, omatangakwaita aeshe okeulu, inamu pukifwa mu i twile eengolo nomu i longele. Jehova, Kalunga keni, okwe i yandja aishe kovanhu aveshe ovo ve li kombada yedu alishe. 20 Ndele Jehova okwe mu kufa muEgipiti, omo mwa li tamu hepekwa neenghono mwa fa mu li mediko la hanya lokuhemuna oshivela shilaula, mu ninge oshiwana shaye she likalekelwa,* ngaashi naanaa mu li kunena.

21 “Jehova okwa handukila nge omolweni, nokwaana kutya itandi tauluka omulonga waJordan, ile ndi ye medu liwa olo Jehova, Kalunga keni, te mu pe li li efyuululo. 22 Ame ohandi file medu eli, itandi ka tauluka omulonga waJordan, ashike nye otamu ka tauluka omulonga waJordan, nedu olo liwa otali ka ninga leni. 23 Kaleni mwa lungama muha dimbwe ehangano olo Jehova, Kalunga keni, a ninga nanye, noinamu liningila nande oshihongwafano, ile oshinima keshe osho Jehova, Kalunga keni, e mu shilika. 24 Osheshi Jehova, Kalunga keni, oku li ngaashi omundilo oo hau lungwinifa; Kalunga oo a teelela okulongelwa oye aeke.

25 “Ngeenge omwa ka kala mu na ounona novatekulu, nongeenge omwa kala efimbo lile medu olo, inamu nyona, nye inamu lihongela oshihongwafano sholudi keshe nokuninga osho inashi yuka moipafi yaJehova, Kalunga keni, opo muhe mu nyemateke, 26 ngeenge omwa ningi ngaho, aveshe ovo ve li meulu nokombada yedu otava ningi eembangi nena kutya otamu ka xulifwa po filufilu meendelelo medu olo tamu ka ya, ngeenge mwa tauluka Jordan. Itamu ka kala mo efimbo lile, ndele otamu ka hanaunwa po filufilu. 27 Jehova ote ke mu lihanifila mokati koiwana, novanini ashike vomunye tava ka xupa moiwana oyo Jehova te ke mu taataela. 28 Moiwana oyo, otamu ka longela ookalunga voiti novomamanya, ovo va ningwa kovanhu, ookalunga ovo ihava mono ko, ihava udu ko, ihava li noihava udu edimba lasha.

29 “Ngeenge omwa kongo Jehova, Kalunga keni, eshi mu li oko, otamu ke mu mona filufilu, ngeenge omwe mu kongo nomutima weni aushe nosho yo nomwenyo* weni aushe. 30 Ngeenge omwe ke lihanga moupyakadi munene nomwa ningilwa oinima aishe ei, otamu ka alukila kuJehova, Kalunga keni, notamu ka pwilikina kondaka yaye. 31 Osheshi Jehova, Kalunga keni, omunanghenda. Ite ke mu efa, ile e mu hanaune po, ile a dimbwe ehangano olo a anena ooxokulululwa.

32 “Diladileni shi na sha nefimbo lonale, eshi mwaha li po, okudja eshi Kalunga a shitila omunhu kombada yedu; puleni okudja kombinga imwe yeulu fiyo okombinga ikwao yeulu. Mbela opa ningwa ngoo nale oshinima shinene, ile pa udika oshinima sha fa eshi? 33 Mbela ope na ngoo ovanhu va uda nale ondaka yaKalunga ta popi okupitila momundilo, ngaashi mwe i uda, ndele tamu twikile okukala nomwenyo? 34 Mbela Kalunga okwa hetekela ngoo nale okulikufila oshiwana moshiwana shikwao, te shi ningi nomatokolo,* nomadidiliko, noikumwifilonga, noita, neke li na eenghono, nokwooko kwa yeluka nonoilonga itilifa, ngaashi Jehova, Kalunga keni, e shi mu ningila moipafi yeni muEgipiti? 35 Omwa ulikilwa oinima oyo, opo mu shiive kutya Jehova oye Kalunga kashili, nokape na vali umwe, kakele kuye. 36 Okwe mu ningifa mu ude ondaka yaye okudja meulu, opo e mu pukulule, nokwe mu ningifa mu mone omundilo munene kombada yedu, nomwa uda eendjovo daye okudja momundilo oo.

37 “Molwaashi okwa kala e hole ooxokulululwa, nokwa hoolola oludalo lavo olo le va shikula, okwe mu kufa mo muEgipiti neenghono daye dinene, neisho laye tali mu pashukile. 38 Okwa taataa moipafi yeni oiwana inene noi na eenghono i mu dule, opo e mu ete oku noku mu pe edu layo li li efyuululo, ngaashi shi li kunena. 39 Onghee kaleni mu shi shii noku shi koneka okudja nena eli kutya, Jehova oye Kalunga kashili meulu nokombada yedu. Kape na vali umwe. 40 Kaleni nokudiinina omaufomhango aye noipango yaye oyo handi mu lombwele nena, opo shi mu endele nawa nosho yo ovana veni, nopo mu kale efimbo lile medu olo Jehova, Kalunga keni, te mu pe.”

41 Pefimbo opo, Moses okwa hoolola oilando itatu kombinga yokoushilo womulonga waJordan. 42 Ngeenge omunhu a dipaa mukwao shihe fi oshiningilewina noina kala shito e mu tonde, oku na oku ka hondama kushimwe shomoilando oyo, opo a kale nomwenyo. 43 Oilando oyo oBeser shOvaruben, osho shi li mombuwa komhunda ya lalakana, Ramot shOvagad, osho shi li muGilead, nosho yo Golan shOvamanasse, osho shi li muBasan.

44 Ei Omhango oyo Moses a pa Ovaisrael. 45 Aa omadimbulukifo, omaufomhango nomatokolo oo Moses a lombwela Ovaisrael konima eshi va dja muEgipiti. 46 Oinima oyo okwe i va lombwelela popepi nomulonga waJordan, molufilu olo li li popepi naBet-peor, medu laSihon, ohamba yOvaamori, oo a li ha di muHesbon, oo a findwa kuMoses nOvaisrael, eshi va dja muEgipiti. 47 Opo nee ova kufa ko edu laye, nedu laOg, ohamba yaBasan, eehamba mbali dOvaamori odo da li koushilo womulonga waJordan, 48 okudja kuAroer, osho shi li komunghulo wEfilu laArnon, fiyo okomhunda Sion, sha hala okutya, Hermon, 49 naAraba ashishe, osho shi li koushilo womulonga waJordan, fiyo okefuta laAraba* olo li li pefina lomhunda yaPisga.

5 Moses okwa ongaleka Ovaisrael aveshe, ndele ta ti kuvo: “Israel, pwilikineni komaufomhango nokomatokolo oo handi mu lombwele nena, nomu na oku a koneka noku a diinina filufilu. 2 Jehova, Kalunga ketu, okwa ninga ehangano nafye muHoreb. 3 Jehova ina ninga ehangano eli nootatekulululwa, ndele okwe li ninga nafye, atusheni ava tu li apa nena eli. 4 Jehova okwa popya nanye oshipala noshipala komhunda, okudja momundilo. 5 Pefimbo opo, onda li nda fikama pokati keni naJehova, opo ndi mu lombwele eendjovo daJehova, molwaashi omwa li mwa tila omundilo noinamu ya komhunda. Opo nee Kalunga okwa ti:

6 “‘Aame Jehova, Kalunga koye, ou nde ku kufa medu laEgipiti, meumbo loupika. 7 Aame ashike u na okulongela, ndele ku na okulongela nandenande ookalunga vamwe.*

8 “‘Ino liningila oshihongwafano, ile efano loshinima keshe shi li pombada meulu, ile shi li kombada yedu, ile momeva kombada yedu. 9 Inamu i twila eengolo noinamu efa mu pukifwe mu i longele, osheshi ame, Jehova, Kalunga keni, aame Kalunga ou a teelela okulongelwa oye aeke, ou ta handukile ovana omolwomanyono ooxe, epupi etitatu nepupi etine laavo ve tonde nge, 10 ashike omapupi omayovi aavo ve hole nge nohava diinine oipango yange, ohandi a ulikile ohole i na oudiinini.

11 “‘Edina laKalunga koye, Jehova, ino li longifa moinima yongaho, osheshi Jehova ita kala ina handukila keshe ou ha longifa edina laye moinima yongaho.

12 “‘Dimbuluka efiku leshabata, opo u li kaleke liyapuki, ngaashi Jehova, Kalunga koye, e ku lombwela. 13 Ou na okulonga oilonga idjuu, noilonga ikwao aishe momafiku ahamano, 14 ashike efiku etiheyali eshabata laJehova, Kalunga keni. Onghee ino longa sha nande, kutya nee oove, omonamati woye, omonakadona woye, omupiya woye omulumenhu, omupiya woye okakadona, ongobe yoye yomhedi, ondongi yoye, oshimuna shoye keshe, omunailongo, oo ha di moilando* yeni, opo omupiya woye omulumenhu nomupiya woye okakadona va fude po ngaashi ove. 15 Dimbuluka kutya owa li omupika medu laEgipiti nonokutya Jehova, Kalunga koye, okwe ku kufa mo neke li na eenghono nosho yo nokwooko kwa yeluka. Nomolwaasho Jehova, Kalunga koye, e ku lombwela u diinine efiku lEshabata.

16 “‘Fimaneka xo nanyoko, ngaashi Jehova, Kalunga koye, e ku lombwela, opo u kale nomwenyo efimbo lile nou pondole* medu olo Jehova, Kalunga koye, te ku pe.

17 “‘Ino dipaa.

18 “‘Ino nyona ohombo.

19 “‘Ino vaka.

20 “‘Ino koleka oumbangi woipupulu u na sha namukweni.

21 “‘Ino haluka omukulukadi wamukweni. Ino haluka nandenande eumbo lamukweni, epya laye, omupiya waye omulumenhu, omupiya waye okakadona, ongobe yaye yomhedi, ondongi yaye, ile oinima yamukweni aishe.’

22 “Ei oipango* oyo Jehova a lombwela eongalo leni alishe komhunda, okupitila momundilo, moshilemo nomomilaulu fokofoko, newi li li pombada, noina weda ko sha vali nandenande. Opo nee okwe i shanga koipelende ivali yomamanya, ndele te i pe nge.

23 “Diva ashike eshi mwa uda ondaka tai di momilaulu, nomhunda tai lundumuka omundilo, omitwe domapata eni adishe novakulunhu ove uya kwaame. 24 Onghee omwa tya: ‘Paife Jehova, Kalunga ketu, okwe tu ulikila oshinge shaye nounene waye, notwa uda ondaka yaye okudja momundilo. Nena otwa mona kutya Kalunga ota dulu okupopya nomunhu, ndele omunhu ta kala nomwenyo. 25 Ashike fye inatu hala okufya. Molwaashi omundilo oo munene otau dulu oku tu lungwinifa po. Ngeenge otwa kala nokuuda ondaka yaJehova Kalunga, ohatu ka fya filufilu. 26 Olyelye movanhu aveshe a uda ondaka yaKalunga omunamwenyo ta popi okupitila momundilo, ngaashi twe i uda, ndele ta kala nomwenyo? 27 Ou na okweehena popepi, opo u ude ashishe osho Jehova, Kalunga ketu, ta ka popya, nou tu lombwele ashishe osho Jehova, Kalunga ketu, te ku lombwele, nohatu ka pwilikina noku shi wanifa po.’

28 “Onghee Jehova okwa uda eendjovo odo mwa lombwela nge, na Jehova okwa lombwela nge, a ti: ‘Onda uda eendjovo odo ovanhu ve ku lombwela. Ashishe osho va popya oshiwa. 29 Ngeno ova li hava tila nge alushe nomutima wavo aushe, nokudiinina oipango yange aishe, ngeno otashi va endele nawa nosho yo ovana vavo fiyo alushe. 30 Inda u ke va lombwele kutya: “Shuneni komatwali eni.” 31 Ove ou na okufyaala naame apa, opo ndi dule oku ku lombwela oipango aishe, omaufomhango nomatokolo oo u na oku va lombwela nove na oku ke a diinina medu olo handi va pe va kale mo.’ 32 Omu na okukala mwa lungama, opo mu ninge naanaa ngaashi Jehova, Kalunga keni, e mu lombwela. Kamu na okukandukila kolulyo, ile kolumosho. 33 Omu na okushikula filufilu ondjila oyo Jehova, Kalunga keni, e mu lombwela mu ende, opo mu dule okukala nomwenyo, mu pondole nomu hapupalife omafiku eni medu omo tamu ka kala.

6 “Aa omalombwelo, omaufomhango nomatokolo oo Jehova, Kalunga keni, e mu honga, opo mu dule oku ke a diinina, ngeenge omwa tauluka mu ye medu olo te ke mu pa, 2 opo mu tile Jehova, Kalunga keni, nokudiinina eenghedimhango daye adishe nomalombwelo aye oo handi mu lombwele, nye novana veni novatekulu veni, onghalamwenyo yeni aishe, opo mu kale nomwenyo efimbo lile. 3 Israel, ou na okupwilikina nokudiinina filufilu oinima oyo, opo u pondole nou hapupale medu tali kunguluka omashini nomaadi eenyiki, ngaashi Jehova, Kalunga kooxokulululwa, e ku udanekela.

4 “Israel, pwilikina, Jehova, Kalunga ketu, oye aeke Jehova. 5 Hola Jehova, Kalunga koye, nomutima woye aushe nomwenyo* woye aushe neenghono doye adishe.* 6 Eendjovo edi handi ku lombwele nena eli odi na okukala momutima woye, 7 nou na oku di honga* ovana voye, noku di popya ngeenge u li omutumba meumbo loye, to ende mondjila nongeenge wa nangala, ile to penduka. 8 Di mangela keke loye, opo u kale noku di dimbuluka, do nadi kale ngaashi edidiliko mombaba yoshipala* shoye. 9 Di shanga koikulo yomuvelo weumbo loye nokomivelo doshilando.

10 “Ngeenge Jehova, Kalunga keni, okwe mu twala medu olo a anena ooxokulululwa, Abraham, Isak naJakob kutya ote li mu pe, oilando inene noiwa oyo inamu tunga, 11 omaumbo e yadi oinima aishe oyo iwa inamu longela, eendungu domamanya, odo inamu xupa,* oikokola yomandjebele nomiti deemono, odo inamu twika, ndele tamu li fiyo mwa kuta, 12 lungameni muha dimbwe Jehova oo e mu kufa medu laEgipiti, meumbo loupika. 13 Omu na okutila Jehova, Kalunga keni, noye aeke mu na okulongela, nomu na okwaana medina laye. 14 Inamu shikula ookalunga vamwe, ookalunga aveshe ovo hava longelwa kovanhu ovo ve mu dingilila, 15 osheshi Jehova, Kalunga keni, oo e li mokati keni, oye Kalunga oo a teelela okulongelwa oye aeke. Ngeenge omwa shikula ookalunga vamwe, Jehova, Kalunga keni, ote ke mu handukila neenghono note ke mu hanauna po kombada yedu.

16 “Inamu yeleka Jehova, Kalunga keni, ngaashi mwe mu yeleka muMassa. 17 Omu na okudiinina filufilu omalombwelo aJehova, Kalunga keni, omadimbulukifo aye nomaufomhango aye oo e mu lombwela mu diinine. 18 Omu na okuninga osho shi li mondjila noshiwa momesho aJehova, opo mu pondole nomu ye mu ka kale medu olo liwa, olo Jehova a udanekela ooxokulululwa. 19 Otamu ka taataa mo ovatondi veni aveshe, ngaashi ashike Jehova a udaneka.

20 “Ngeenge ovana veni ove ke mu pula monakwiiwa kutya: ‘Omadimbulukifo, omaufomhango nomatokolo oo Jehova, Kalunga keni, e mu lombwela otaa ti shike?’ 21 Otamu ke va nyamukula kutya: ‘Otwa li twa ninga ovapika vaFarao muEgipiti, ashike Jehova okwe tu kufa mo muEgipiti neke li na eenghono. 22 Onghee Jehova okwa kala ta ningi omadidiliko moipafi yetu nokulonga oikumwifilonga inene muEgipiti noya nyika oshiponga kuFarao nosho yo koukwaneumbo waye aushe. 23 Okwe tu kufa mo, ndele te tu eta oku, opo e tu pe edu olo a anena ootatekulululwa. 24 Opo nee Jehova okwe tu lombwela tu diinine omaufomhango aeshe oo, notu tile Jehova, Kalunga ketu, omolwouwa wetu tau kalelele, opo tu kale nomwenyo, ngaashi naanaa tu li kunena. 25 Ngeenge otwa diinine filufilu omalombwelo aeshe oo mokudulika kuJehova, Kalunga ketu, ngaashi e tu lombwela, ohatu ka talika ko ovayuki.’

7 “Ngeenge Jehova, Kalunga keni, okwe mu twala medu olo mu li pokuya mo mu ka kale mo, ota ka hanauna po yo moipafi yeni oiwana ei ya fimana: Ovaheti, Ovagirgas, Ovaamori, Ovakaanan, Ovaperesi, Ovahevi nOvajebusi, oiwana iheyali oyo ihapu unene noi na eenghono i mu dule. 2 Jehova, Kalunga keni, ote ke va yandja kunye notamu ke va finda. Omu na oku va hanauna po filufilu. Kamu na okuninga ehangano navo, ile mu va file onghenda. 3 Inamu ninga eudafano, opo ngeno ovanhu vomoshiwana sheni va hombolafane navo. Inamu yandja ovanakadona veni kovanamati vavo, nye inamu kufa ovanakadona vavo va ninge vovanamati veni. 4 Otava ka amuna ko ovana veni kwaame, opo va longele ookalunga vamwe, na Jehova ote ke mu handukila neenghono note ke mu hanauna po meendelelo.

5 “Ponhele yaasho, omu na oku va ningila ngaha: Hanauneni po eealtari neengudimanya davo, tatauleni po eengudimanya davo diyapuki, tetauleni po eepala davo diyapuki* nokuxwika po oihongwafano yavo. 6 Omu li ovanhu vayapuki kuJehova, Kalunga keni, na Jehova, Kalunga keni, okwe mu hoolola mu ninge ovanhu vaye, ovanhu vaye ve likalekelwa* mokati kovanhu aveshe ovo ve li kombada yedu.

7 “Jehova ine mu ulikila ohole noku mu hoolola, molwaashi ngeno muvahapu mu dule ovanhu aveshe, osheshi nye omwa li muvanini mu dulike kovanhu aveshe. 8 Ponhele yaasho, Jehova okwe mu hoolola, molwaashi oku mu hole, nopo a diinine eano olo a anena ooxokulululwa, eshi Jehova e mu kufa mo muEgipiti neke li na eenghono, e mu xupife meumbo loupika, kohamba inaenghono yaEgipiti, Farao. 9 Omu shi shii nawa kutya Jehova, Kalunga keni, oKalunga kashili, Kalunga omudiinini, ha diinine ehangano laye noha ulikile ohole i na oudiinini omapupi omayovi aavo ve mu hole nohava diinine oipango yaye. 10 Ndele ota ka hanauna po filufilu ovo ve mu tonde. Ita ka ongaonga okukatukila onghatu ovo ve mu tonde; ote ke va handukila filufilu. 11 Onghee twikileni okudiinina oipango, omaufomhango nomatokolo oo handi mu lombwele nena mu dulike kuo.

12 “Ngeenge omwa kala nokupwilikina komatokolo aa, oku a diinina noku a tula moilonga, Jehova, Kalunga keni, ota ka diinina ehangano leni naye note ke mu ulikila ohole i na oudiinini, ngaashi a anena ooxokulululwa. 13 Ota ka kala e ku hole, te ku nangeke noupuna noku ku hapupalifa. Ote ke ku nangeka noupuna nounona vahapu,* oilikolomwa yomedu loye, oilya yoye, omaviinyu oye mape, nomaadi oye, noutana veengobe doye nosho yo eedjona domoufita woye medu olo a anena ooxokulululwa kutya ote li ku pe. 14 Otamu ka kala mwa nangekwa noupuna mokati kovanhu aveshe, nomokati keni itamu ka kala omulumenhu, ile omukainhu ehe na ounona, noimuna yeni aishe otai ka dala. 15 Jehova ota ka xulifa po omikifi adishe, noite ke mu etela nande oumwe womomikifi da nyika oshiponga, odo da li hadi kwata ovanhu muEgipiti. Ponhele yaasho, ote ke di etela aveshe ovo ve mu tonde. 16 Omu na okuhanauna po ovanhu aveshe ovo Jehova, Kalunga keni, ta yandje momake eni. Kamu na oku va fila onghenda nokamu na okulongela ookalunga vavo, molwaashi osho otashi ka kala omwiyo kunye.

17 “Ngeenge oto lipopile momutima woye kutya: ‘Oshiwana eshi oshinene shi tu dule. Ongahelipi handi dulu oku shi finda?’ 18 Ino va tila. Dimbuluka osho Jehova, Kalunga koye, a ningila Farao nosho yo Egipiti ashishe, 19 eshi Jehova, Kalunga koye, e ku kufa mo nomatokolo* manene, oo wa mona nomesho oye, nomadidiliko, oikumwifilonga, eke li na eenghono nosho yo okwooko kwa yeluka. Eshi osho Jehova, Kalunga koye, ta ka ningila ovanhu aveshe ovo wa tila. 20 Jehova, Kalunga koye, ote ke va ningifa va sholole,* fiyo osheshi ovo va xupa po nosho yo ovo va li ve mu hondama tava hanaunwa po. 21 Inamu va tila, osheshi Jehova, Kalunga keni, Kalunga munene oo ovanhu ve na okutila nokufimaneka, oku li pamwe nanye.

22 “Jehova, Kalunga keni, ota ka taataelashi oiwana oyo moipafi yeni kanini nakanini. Itamu ka efiwa mu va xulife po meendelelo, opo oifitukuti iha hapupale i mu etele oshiponga. 23 Jehova, Kalunga keni, ote ke va yandja momake eni notamu ke va finda, fiyo osheshi va xula po. 24 Ota ka yandja eehamba davo momake eni, notamu ka xulifa po omadina avo filufilu kombada yedu alishe. Kape na ou te ke mu lwifa, fiyo osheshi mwe va xulifa po aveshe. 25 Omu na okuxwika po oihongwafano yookalunga kavo momundilo. Inamu kala mwa hokwa oshisilveri noshingoli shavo, ile mu i kufe po, opo ihe mu yule, osheshi oi li oshinima shitondifa kuJehova, Kalunga keni. 26 Ino twala oshinima shitondifa meumbo loye, opo uha ka hanaunwe po ngaashi sho. Ou na oku shi nyanyala lela noku shi tonda filufilu, molwaashi otashi ka hanaunwa po.

8 “Omu na okudiinina filufilu omalombwelo aeshe oo handi mu pe nena eli, opo mu dule okukala nomwenyo, mu hapupale nokuya mu ka kale medu olo Jehova a anena ooxokulululwa. 2 Dimbulukeni ondjila ile, oyo Jehova Kalunga e mu endifa oule weedula 40 mombuwa, opo e mu honge elininipiko noku mu yeleka a shiive osho shi li momitima deni, noku tale ngeenge otamu ka diinina oipango yaye, ile hasho. 3 Okwe mu honga elininipiko, eshi e mu efa mu fye ondjala, ndele te mu palula nomanna, oo nye nooxo mwa li muhe shii, opo mu shiive kutya omunhu ita kala nomwenyo komungome auke, ndele okwa pumbwa yo ondjovo keshe tai di mokanya kaJehova. 4 Oikutu oyo mwa li mwa djala inai kulupa, neemhadi deni inadi dinda eedula adishe odo 40. 5 Omu shi shii momitima deni kutya Jehova, Kalunga keni, okwa kala te mu pukulula, ngaashi ashike xe ta pukulula omona.

6 “Omu na okudiinina oipango yaJehova, Kalunga keni, mokweenda meendjila daye noku mu tila. 7 Jehova, Kalunga keni, ote mu twala medu liwa, medu mu na omakungulukilo omeva, omeva taa di momamanya nomeefifiya, taa kungulukile molufilu lihe na sha nosho yo koitukulwa yokeemhunda. 8 Edu li na oilya yo-wheat noyo-barley, omiviinyu, omikwiyu, omiti dogranati, edu li na omaadi eemono nomaadi eenyiki. 9 Edu li na oikulya ya wana noitamu ka pumbwa sha; edu li na omamanya e na oshivela shilaula, nokeemhunda dalo otamu ka ninga ko omina yongopolo.

10 “Ngeenge omwa li, ndele tamu kuta, omu na okutanga Jehova, Kalunga keni, omolwedu liwa olo e mu pa. 11 Lungameni muha dimbwe Jehova, Kalunga keni, mokuhadiinina oipango yaye, omatokolo aye nosho yo eenghedimhango daye odo handi mu lombwele nena. 12 Ngeenge omwa li, ndele tamu kuta, nomwa tungu omaumbo mawa, ndele tamu kala mo, 13 nongeenge eengobe, eedi, oisilveri noingoli yeni oya hapupala nomwa kala mu na keshe shimwe, 14 inamu efa omitima deni di kwatwe kounhwa noku mu ningifa mu dimbwe Jehova, Kalunga keni, oo e mu kufa mo medu laEgipiti, meumbo loupika. 15 Kalunga okwe mu ningifa yo mu ende mombuwa inene noitilifa, mu na omayoka e na oudiyo, eendje nedu likukutu lihe na omeva. Okwa kungulukifa omeva okudja memanya likukutu 16 nokwe mu palula mombuwa nomanna oo ooxo vehe shii, opo e mu honge elininipiko noku mu yeleka, opo mu ka mone ouwa monakwiiwa. 17 Ngeenge omwe lipopile momitima deni tamu ti: ‘Oupuna ou otwe u likola kokudula kwetu nokeenghono detu vene,’ 18 dimbulukeni kutya Jehova, Kalunga keni, oye e mu pa eenghono mu punapale, opo a diinine ehangano olo a anena ooxokulululwa, ngaashi e shi ninga fiyo okunena.

19 “Ngeenge omwa dimbwa filufilu Jehova, Kalunga keni, nokushikula ookalunga vamwe, oku va longela noku ve linyongamena, ohandi mu londwele nena eli kutya otamu ka hanaunwa po filufilu. 20 Ngaashi oiwana oyo Jehova ta ka hanauna po moipafi yeni, nanye osho tamu ka hanaunwa po ngaho, molwaashi inamu pwilikina kondaka yaJehova, Kalunga keni.

9 “Israel, pwilikina, nena eli oto tauluka omulonga waJordan u ye u ka taatae mo oiwana inene noi na eenghono i ku dule, oilando inene noya dingililwa komakuma a twa keulu,* 2 ovanhu vanene novale, ovanamati vOvaanak, ovo u shii nowa uda tava popiwa kutya: ‘Olyelye ta ka lwifa ovanamati vaAnak?’ 3 Onghee hano, kaleni mu shi shii kutya mefiku olo Jehova, Kalunga keni, ote ke mu kwatela komesho. Kalunga oku li ngaashi omundilo oo hau lungwinifa filufilu, note ke va hanauna po. Kalunga ote ke va finda moipafi yeni, opo mu dule oku va taataa mo meendelelo noku va hanauna po, ngaashi ashike Jehova a udaneka.

4 “Ngeenge Jehova, Kalunga keni, e va taataa mo moipafi yeni, inamu lipopila momitima deni kutya: ‘Jehova okwe tu eta tu kale medu eli omolwouyuki wetu.’ Ponhele yaasho, Jehova okwa taataa mo oiwana oyo moipafi yeni omolwoukolokoshi wayo. 5 Hamolwouyuki weni, ile oudiinini womitima deni, eshi tamu ka kala medu lavo. Ponhele yaasho, Jehova, Kalunga keni, okwa taataa mo oiwana oyo moipafi yeni omolwoukolokoshi wayo, opo a wanife po eendjovo odo Jehova a li a anena ooxokulululwa, Abraham, Isak naJakob. 6 Shiiveni kutya Jehova, Kalunga keni, ine mu pa edu olo liwa mu kale mo omolwouyuki weni, molwaashi nye ovatangalali.*

7 “Inamu dimbwa nandenande nghee mwa li mwa handukifa Jehova, Kalunga keni, mombuwa. Okudja mefiku olo mwa fiya po edu laEgipiti fiyo osheshi mwe uya konhele ei, inamu dulika kuJehova. 8 Natango muHoreb omwa li mwa handukifa Jehova, na Jehova okwa li e mu handukila unene, nokwa li a tokola oku mu hanauna po. 9 Eshi nda ya komhunda ndi ka tale oipelende yomamanya, oipelende yehangano olo Jehova a ninga nanye, onda kala komhunda omafiku 40, omutenya noufiku, inandi lya sha noinandi nwa omeva. 10 Opo nee Jehova okwa pa nge oipelende ivali yomamanya ya shangwa nomunwe waKalunga, nokuyo okwa li kwa shangwa eendjovo adishe odo Jehova e mu lombwela komhunda okupitila momundilo mefiku loshoongalele.* 11 Pexulilo lomafiku 40, Jehova okwa pa nge oipelende yomamanya, oipelende yehangano. 12 Jehova okwa lombwela nge yo, ta ti: ‘Fikama, londoloka divadiva, molwaashi ovanhu voye ovo wa kufa muEgipiti inava dulika. Ova aluka ko diva kondjila oyo nde va lombwela va shikule. Ove liningila oshihongwafano sha hambulwa moshivela.’* 13 Jehova okwa lombwela nge, ta ti: ‘Tala, onda mona kutya ovanhu ava ovatangalali.* 14 Efe nge ndi va hanaune po nondi dime po omadina avo kombada yedu. Nandi ku ninge yo oshiwana shi na eenghono noshihapu unene shi va dule.’

15 “Onghee onda piluka nonda londoloka ko komhunda ofimbo ya li ya haka omundilo, nda humbata oipelende ivali yehangano momake ange. 16 Opo nee eshi nda tala, onda mona kutya omwa nyona kuJehova, Kalunga keni. Omwe liningila oshikalunga shonhana moshivela.* Omwa aluka ko diva kondjila oyo Jehova e mu lombwela mu shikule. 17 Onghee onda yelula oipelende ivali, ndele handi i kupula pedu nomake ange aeshe nonde i tataula po moipafi yeni. 18 Opo nee onde linyongamena kuJehova, ngaashi nda li handi shi ningi pehovelo, oule womafiku 40, omutenya noufiku. Inandi lya sha noinandi nwa omeva omolwomanyono eni aeshe oo mwa nyona, eshi mwa ninga osho shii momesho aJehova noku mu nyemateka. 19 Osheshi onda li nda tila, molwaashi Jehova okwa li e mu handukila neenghono nokwa li a tokola oku mu hanauna po. Ashike pefimbo opo, Jehova okwa li yo a uda nge.

20 “Jehova okwa li a handukila Aron neenghono nokwa li a tokola oku mu hanauna po, ashike onda li yo nda ilikanena Aron pefimbo opo. 21 Opo nee onda kufa oshinima osho she mu nyonifa, onhana, ndele handi i xwike po momundilo. Onde i teyaula po noku i nyanyaula po filufilu fiyo ya ninga ombudu ngaashi ondwi, ndele handi kupula ondwi yayo mokamulonga omo hamu kunguluka omeva taa di komhunda.

22 “Natango, omwa li yo mwa handukifa Jehova muTabera, muMassa nomuKibrot-hattava. 23 Eshi Jehova e mu tuma mu dje mo muKades-barnea, a ti: ‘Fikameni, ndele tamu ka kala medu olo handi mu pe shili.’ Natango kamwa li mwa dulika kelombwelo laJehova, Kalunga keni. Inamu ulika eitavelo noinamu dulika kuye. 24 Okudja eshi nde mu shiiva, inamu kala hamu dulika kuJehova.

25 “Onghee onda kala handi linyongamene kuJehova omafiku 40, omutenya noufiku, nonda kala handi linyongamene monghedi oyo, molwaashi Jehova okwa ti ote mu hanauna po. 26 Onda hovela okwiilikana kuJehova handi ti: ‘Omwene Jehova, Omunamapangelo aeshe, ino hanauna po ovanhu voye. Ove li oshiwana shoye she likalekelwa,* osho wa xupifa neenghono doye nowe shi kufa muEgipiti neke li na eenghono. 27 Dimbuluka ovapiya voye Abraham, Isak naJakob. Ino yandja elitulemo koutangalali wovanhu ava, kounghundi wavo nokomanyono avo. 28 Ngeenge hasho, ovanhu vomedu omo we tu twala otashi dulika va tye: “Jehova ka li ta dulu okutwala ovanhu medu olo e va udanekela. Molwaashi oku va tonde, okwe va kufa mo e ke va dipaele mombuwa.” 29 Ove li ovanhu voye noshiwana shoye she likalekelwa,* ovo wa kufa muEgipiti neenghono doye dinene nosho yo nokwooko kwoye kwa yeluka.’

10 “Jehova okwa lombwela nge pefimbo opo, a ti: ‘Lihongela oipelende ivali yomamanya ya fa inya yotete, ndele to uya kwaame komhunda; liningila yo oshikefa sha hongwa moiti. 2 Opo nee koipelende oyo ohandi ka shanga ko eendjovo odo da li koipelende yotete, oyo wa tatula, nou na oku i tula moshikefa.’ 3 Onghee onda honga oipelende ivali yomamanya ya fa inya yotete, ndele handi i komhunda noipelende oyo ivali meke lange. 4 Opo nee okwa shanga ko eendjovo odo da li da shangwa ko nale, Oipango Omulongo,* odo Jehova e mu lombwela komhunda okupitila momundilo mefiku loshoongalele,* ndele Jehova te i pe nge. 5 Opo nee onda piluka nonda londoloka ko komhunda, ndele handi tula oipelende oyo moshikefa, noya kala omo, ngaashi ashike Jehova a lombwela nge.

6 “Ovaisrael ova dja mo muBeerot bene-jaakan, ndele tava i kuMosera. Aron oko a fila oko, ye oko a pakwa. Opo nee omonamati waye, Eliaser, okwa hovela okuyakula ponhele yaye e li omupristeri. 7 Okudja opo ova ya kuGudgod, nokudja kuGudgod, ova ya kuJotbata, edu li na omakungulukilo omeva.

8 “Pefimbo opo, Jehova okwa hoolola epata laLevi li humbate oshikefa shehangano laJehova, li fikame koshipala shaJehova, opo li mu yakule, noli nangeke noupuna medina laye, ngaashi tali ningi fiyo okunena. 9 Nomolwaasho Levi ina pewa oshitukulwa, ile efyuululo pamwe novamwaxe. Jehova oye efyuululo laye, ngaashi ashike Jehova, Kalunga keni, e mu lombwela. 10 Onda kala komhunda ngaashi nda li nde shi ninga nale, omafiku 40, omutenya noufiku, na Jehova okwa li natango a uda nge pefimbo opo. Jehova ka li vali a hala oku mu hanauna po. 11 Opo nee Jehova okwa lombwela nge, ta ti: ‘Kwatela komesho ovanhu ovo, ndele tamu lilongekida mu ye molweendo, va ka kale medu olo nda anena ooxokulululwa kutya ohandi li va pe.’

12 “Israel, paife Jehova, Kalunga keni, okwa hala mu ninge shike? Okwa hala ashike mu ninge ngaha: Mu kale hamu tila Jehova, Kalunga keni, mu ende meendjila daye adishe, mu kale mu mu hole, mu longele Jehova, Kalunga keni, nomutima weni aushe nosho yo nomwenyo* weni aushe, 13 nokudiinina omalombwelo neenghedimhango daJehova odo handi mu lombwele nena eli omolwouwa weni. 14 Taleni, eulu olaJehova, Kalunga keni, neulu olo li li mombadambada olaye nosho yo edu naashishe shi li ko. 15 Ndele ooxokulululwa ovo ashike Jehova a ehena puvo, e va ulikila ohole, nanye ovo mu li oludalo lavo, okwe mu hoolola mokati kovanhu aveshe, ngaashi mu li kunena. 16 Yelifeni omitima deni noinamu tangalala* vali. 17 Osheshi Jehova Kalunga, oKalunga kookalunga, nOmwene woovene, Kalunga munene, omunaenghono, nomukumwifi, oo ehe na okatongo nomunhu noiha tambula ombubo. 18 Oha ungaunga pauyuki nokaana kehe na xe* novafiyekadi, noku hole ovanailongo, he va pe oikulya noikutu. 19 Nanye omu na okukala mu hole ovanailongo, molwaashi nanye omwa li ovanailongo medu laEgipiti.

20 “Omu na okutila Jehova, Kalunga keni, noye mu na okulongela, okukanyatela kuye nokwaana medina laye. 21 Oye mu na okutanga. Oye Kalunga keni, oo e mu longela oilonga aishe oyo inene noikumwifi, oyo mwa mona nomesho eni. 22 Ooxokulululwa ova ile muEgipiti novanhu* 70, ashike paife Jehova, Kalunga keni, okwe mu hapupalifa neenghono ngaashi eenyofi odo di li keulu.

11 “Kala u hole Jehova, Kalunga koye, nokuwanifa po alushe oiteelelwa oyo e ku pa u wanife po, okudiinina eenghedimhango daye, omatokolo aye noipango yaye. 2 Kaleni mu shi shii kutya onye handi lombwele nena eli, ndele havana veni ovo vehe shii noinava mona outekuduliko waJehova, Kalunga keni, ounene waye, eke laye li na eenghono nokwooko kwaye kwa yeluka. 3 Inava mona omadidiliko aye noilonga yaye, oyo a longa muEgipiti, e i ningila Farao, ohamba yaEgipiti, nosho yo oshilongo shaye ashishe. 4 Inava mona yo osho a ningila omatangakwaita aEgipiti, eenghambe daFarao nomatemba oita, oo a li a ningina momeva mEfuta Litilyana, eshi va li tave mu landula, na Jehova okwe va hanauna po filufilu. 5 Inava mona yo osho e mu ningila mombuwa fiyo osheshi mwe uya konhele ei, 6 ile osho a ningila Datan naAbiram, ovanamati vaEliab, omonamati waRuben, eshi edu la makula okanya kalo noku va pona po pamwe nomaukwaneumbo avo, omatwali avo noinamwenyo yavo aishe moipafi yOvaisrael aveshe. 7 Omwa mona nomesho eni oilonga inene aishe oyo Jehova a longa.

8 “Omu na okudiinina oipango aishe oyo handi mu pe nena eli, opo mu kale mwa pama nokutauluka mu ye medu omo tamu ka kala, 9 nomu dule okukala efimbo lile medu olo Jehova a ana okupa ooxokulululwa noludalo lavo, edu tali kunguluka omashini nomaadi eenyiki.

10 “Medu olo tamu i mu ka kale, inali fa edu laEgipiti omo mwa dja, omo mwa li hamu kunu eembuto momapya noku a tekela noudjuu* ngaashi omunhu ta tekele oshikunino shoikwambidi. 11 Ashike medu omo tamu i, edu li na eemhunda nomalufilu. Ohali mono omeva odula a wana. 12 Edu olo, Jehova, Kalunga keni, ote li file oshisho. Jehova, Kalunga keni, ote li tale alushe, okudja kehovelo lomudo fiyo okexulilo lao.

13 “Ngeenge omwa dulika filufilu koipango yange oyo handi mu lombwele nena nokukala mu hole Jehova, Kalunga keni, noku mu longela nomutima weni aushe nosho yo nomwenyo* aushe, 14 ohandi ke mu lokifila yo odula medu leni pefimbo la wapala, odula yopokufu noyopokwenye, notamu ka mona oikulya yeni, omaviinyu eni mape nomaadi eni. 15 Ohandi ka menifa oimeno yoimuna yeni, nanye otamu ka lya tamu kuta. 16 Lungameni, opo omitima deni diha hongaulwe mu efe po okulongela Kalunga, nokulongela ookalunga vamwe noku ve linyongamena. 17 Ngeenge omwa ningi ngaho, Jehova ote ke mu handukila neenghono, nota ka idila eulu, opo odula iha loke nedu liha menife vali oimeno yalo, notamu ka hanaunwa po diva medu liwa olo Jehova te mu pe.

18 “Ou na okufindila eendjovo dange edi momutima woye nomomwenyo* woye noku di mangela meke loye, opo u kale noku di dimbuluka, do nadi kale ngaashi edidiliko mombaba yoshipala shoye.* 19 Ou na oku di honga ovana voye, to di popi ngeenge u li omutumba meumbo loye, ngeenge to ende mondjila, nongeenge wa nangala, ile to penduka. 20 Ou na oku di shanga koikulo yomuvelo weumbo loye nokomivelo doshilando, 21 opo ove novana voye mu kale efimbo lile, efimbo alishe olo eulu li li po la uvika edu, medu olo Jehova a ana oku li pa ooxokulululwa.

22 “Ngeenge omwa dulika filufilu koipango oyo handi mu pe noku i diinina, mokukala mu hole Jehova, Kalunga keni, nokweenda meendjila daye adishe nokukanyatela kuye, 23 Jehova ota ka taataa oiwana aishe oyo moipafi yeni, notamu ka finda oiwana inene noihapu i mu dule. 24 Onhele keshe tamu ka lyata neemhadi deni otai ningi yeni. Eengaba deni otadi ka dja kombuwa fiyo okuLibanon, okudja komulonga waEufrat fiyo okefuta lokouninginino.* 25 Kape na oo te ke mu lwifa. Jehova, Kalunga keni, ota ka ningifa ovanhu ve mu tile nokukakama medu alishe olo tamu ende, ngaashi e mu udanekela.

26 “Taleni, nena eli ohandi tula po enangeko noupuna nefingo moipafi yeni: 27 Otamu ka nangekwa noupuna, ngeenge omwa dulika koipango yaJehova, Kalunga keni, oyo handi mu lombwele nena, 28 notamu ka fingwa, ngeenge omwa kala inamu dulika koipango yaJehova, Kalunga keni, nongeenge omwa aluka ko kondjila oyo handi mu lombwele nena mu shikule, ndele tamu shikula ookalunga vamwe ovo muhe shii.

29 “Ngeenge Jehova, Kalunga keni, okwe mu twala medu omo tamu ka kala, omu na okunangeka noupuna ovanhu komhunda yaGerisim, nokufinga ovanhu komhunda yaEbal. 30 Eemhunda odo odi li kombinga yokoushilo womulonga waJordan da finda kouninginino,* medu lOvakaanan, ovo ve li muAraba, popepi naGilgal, kombinga yomiti da kula daMore. 31 Omu na okutauluka omulonga waJordan nokuya medu olo Jehova, Kalunga keni, te mu pe. Ngeenge omwa i mo, ndele tamu kala mo, 32 omu na okudiinina filufilu omaufomhango nomatokolo aeshe oo handi mu lombwele nena.

12 “Aa omaufomhango nomatokolo oo mu na okudiinina filufilu omafiku aeshe oo mu li medu olo Jehova, Kalunga kooxokulululwa, te ke mu pa mu kale mo. 2 Omu na okuhanauna po filufilu eenhele adishe omo oiwana oyo mwa taataa mo ya li hai longele ookalunga kayo, kutya nee okoxulo yeemhunda, ile okoikulundudu, ile okoshi yomiti da kula. 3 Omu na okungumauna po eealtari davo nokuhanauna po eengudimanya davo diyapuki, okuxwika po eepala davo diyapuki* momundilo nokutetaula po oihongwafano yookalunga kavo, nokudima po filufilu omadina avo monhele oyo.

4 “Inamu longela Jehova, Kalunga keni, monghedi ya tya ngaho. 5 Ashike indeni konhele oyo Jehova, Kalunga keni, a hoolola ku fimanekelwe edina laye, noi li onhele yaye yokukala mokati komapata eni aeshe, naako oko tamu ke mu longela. 6 Konhele oyo oko tamu ka twala omaxwikiloyambo eni, omayambo eni, oitimulongo yeni,* omayambidido taa di momake eni, omayambo eni eano, omayambo eni ehalo liwa nosho yo eengobe, eedi noikombo yeni oyo ya dalwa tete. 7 Nye nomaukwaneumbo eni omu na okulila oko moipafi yaJehova, Kalunga keni, nokuhafela ashishe osho mwa longa, molwaashi Jehova, Kalunga keni, okwe mu nangeka noupuna.

8 “Inamu ninga ngaashi hatu ningi apa nena, keshe umwe ta ningi osho a hala,* 9 molwaashi inamu fika natango monhele yetulumuko nomedu olo Jehova, Kalunga keni, te mu pe. 10 Ngeenge omwa tauluka omulonga waJordan, ndele tamu ka kala medu olo Jehova, Kalunga keni, te mu pe mu kale mo, ote ke mu amena filufilu kovatondi veni aveshe ovo ve mu dingilila, notamu ka kala meameno. 11 Oinima aishe oyo handi mu lombwele otamu ke i twala konhele oyo Jehova, Kalunga keni, a hoolola ku fimanekelwe edina laye, omaxwikiloyambo eni, omayambo eni, oitimulongo yeni, omayambidido taa di momake eni nakeshe eyambo leano olo mwa anena Jehova. 12 Otamu ka kala mwa hafa moipafi yaJehova, Kalunga keni, nye novanamati veni, ovanakadona veni, ovapiya veni ovalumenhu novakainhu, nOmulevi oo e li moilando* yeni, osheshi ina pewa oshitukulwa, ile efyuululo pamwe nanye. 13 Lungameni muha yambe omaxwikiloyambo eni monhele keshe tamu mono. 14 Omu na ashike okuyambela omaxwikiloyambo eni monhele, oyo Jehova a hoolola mushimwe shomoitukulwa yomomapata eni, naako oko mu na okuningila keshe shimwe osho handi mu lombwele.

15 “Efimbo keshe mwa hala* okulya ombelela, dipaeni shimwe shomoinamwenyo yeni, she likolelela kenangeko noupuna olo Jehova, Kalunga keni, e mu pa moilando* yeni aishe. Omunhu oo ina koshoka nomunhu oo a koshoka otava dulu oku i lya, ngaashi ashike tamu li omenye, ile oholongo. 16 Ashike ku na okulya ohonde, ou na oku i tilashi medu ngaashi omeva. 17 Itamu ka pitikwa mu lile moilando* yeni oshitimulongo sheendjayambo deni, shomaviinyu eni, shomaadi eni, sheengobe, sheedi noikombo yeni, oyo ya dalwa tete, omayambo eni eano keshe olo mwa ana, omayambo eni ehalo liwa, ile omayambidido, oo taa di momake eni. 18 Oinima oyo otamu ke i lila moipafi yaJehova, Kalunga keni, monhele oyo Jehova, Kalunga keni, a hoolola, nye novanamati veni, ovanakadona veni, ovapiya veni ovalumenhu novakainhu, nOvalevi ovo hava di moilando* yeni, nokuhafela ashishe osho mwa longa moipafi yaJehova, Kalunga keni. 19 Lungameni muhe lidimbike Ovalevi efimbo olo mu li medu leni.

20 “Ngeenge Jehova, Kalunga keni, a tamununa mo oshitukulwa sheni, ngaashi e mu udanekela, ndele tamu ti: ‘Onda hala okulya ombelela,’ molwaashi omwa hala* okulya ombelela, otamu dulu okulya ombelela efimbo keshe mwe i hala.* 21 Ngeenge onhele oyo Jehova, Kalunga keni, a hoolola ku fimanekelwe edina laye oi li kokule nanye, omu na okudipaa dimwe domeengobe deni, ile eedi, ile oikombo imwe oyo Jehova e mu pa, ngaashi ashike nde mu lombwela, nomu na oku i lila meni loilando* yeni efimbo keshe mwe i hala.* 22 Omunhu oo ina koshoka nomunhu oo a koshoka, aveshe otava dulu oku i lya, ngaashi tamu li omenye nosho yo oholongo. 23 Kaleni mwa tokola toko muha lye ohonde, molwaashi ohonde oi lile po omwenyo,* noinamu lya omwenyo pamwe nombelela. 24 Inamu i lya. Omu na oku i tilashi medu ngaashi omeva. 25 Inamu i lya, opo shi mu endele nawa nye novana veni ovo tave mu shikula, molwaashi nye ohamu longo osho sha yuka momesho aJehova. 26 Omu na ashike okukufa oinima iyapuki oyo yeni nomayambo eni eano, ngeenge tamu i konhele oyo Jehova ta ka hoolola. 27 Konhele oyo oko tamu ka yandjela omaxwikiloyambo eni, ombelela nohonde koaltari yaJehova, Kalunga keni, nohonde yomayambo eni oi na okutilwashi koshitako shoaltari yaJehova, Kalunga keni, ashike ombelela otamu dulu oku i lya.

28 “Lungameni mu dulike keendjovo adishe edi handi mu lombwele, opo shi mu endele nawa alushe nye novana veni ovo tave mu shikula, molwaashi nye ohamu longo osho sha yuka momesho aJehova, Kalunga keni.

29 “Ngeenge Jehova, Kalunga keni, okwa hanauna po oiwana oyo tamu ka taataa mo, ndele tamu kala hamu di medu layo, 30 lungameni muha pukifwe, ngeenge ova hanaunwa po moipafi yeni. Inamu pula kombinga yookalunga kavo kutya, ‘Oiwana ei oya li hai longele ngahelipi ookalunga kayo? Naame ohandi ka ninga sha faafana.’ 31 Inamu longela Jehova, Kalunga keni, monghedi ya tya ngaho, molwaashi ohava ningile ookalunga kavo oshinima keshe shitondifa osho Jehova e tonde; ohava xwikile nokuli ookalunga kavo ovanamati vavo novanakadona vavo momundilo. 32 Lungameni mu dulike kondjovo keshe oyo handi mu lombwele. Inamu kufa mo, nye inamu weda mo.

13 “Ngeenge mokati keni omwa holoka omuprofeti, ile umwe oo ha xunganeke okupitila meendjodi, ndele te mu ulikile edidiliko, ile oshinima shikumwifi, 2 nongeenge edidiliko, ile oshinima shikumwifi osho e mu lombwela osha wanifwa, ndele te mu lombwele, ta ti: ‘Tu shikuleni ookalunga vamwe,’ ookalunga vehe shiivike, ‘notu va longeleni,’ 3 inamu pwilikina keendjovo domuprofeti, ile omutwi weendjodi oo, osheshi Jehova, Kalunga keni, ote mu yeleke, a tale ngeenge omu hole tuu Jehova, Kalunga keni, nomutima weni aushe nosho yo nomwenyo* weni aushe. 4 Omu na okushikula Jehova, Kalunga keni, oku mu tila, okudiinina oipango yaye nokupwilikina kondaka yaye; oye mu na okulongela nokukanyatela kuye. 5 Ndele omuprofeti, ile omutwi weendjodi oo oku na okudipawa, molwaashi ote mu ladipike mu tukululile oshibofa Jehova, Kalunga keni, oo e mu kufa medu laEgipiti nokwe mu xupifa meumbo loupika. Omuprofeti oo okwa hala oku mu pukifa mu dje mo mondjila oyo Jehova, Kalunga keni, e mu lombwela mu ende. Onghee omu na okukufa mo owii keshe mokati keni.

6 “Ngeenge omumwaxo, omonamati wanyoko, ile omonamati woye, ile omonakadona woye, ile omukulukadi woye omuholike, ile kaume koye kopofingo* ota kendabala oku ku pukifa meholeko, ta ti: ‘Natu ye tu ka longele ookalunga vamwe,’ ookalunga ovo nye nooxokulululwa muhe shii, 7 vamwe vomookalunga ovo hava longelwa kovanhu ovo ve mu dingilila, kutya nee ovovo ve li popepi nanye, ile ovovo ve li kokule nanye, okudja kombinga imwe yedu fiyo okombinga ikwao, 8 ino efa e ku pukife, ile u pwilikine kuye, noino mu kenukila, ile u mu file onghenda, ile u mu amene; 9 ponhele yaasho, ou na oku mu dipaa filufilu. Oove u na oku mu denga tete nomamanya u mu dipae, novanhu aveshe otave ke mu denga lwanima. 10 Ou na oku mu dipaa nomamanya, molwaashi okwa hala oku ku amuna ko kuJehova, Kalunga keni, oo e mu kufa medu laEgipiti, meumbo loupika. 11 Opo nee Ovaisrael aveshe otave ke shi uda, ndele tava kwatwa koumbada, noitava ka ninga vali oshinima shii sha tya ngaho mokati keni.

12 “Ngeenge owa udu taku popiwa mushimwe shomoilando oyo Jehova, Kalunga koye, te ku pe, u kale mo, 13 taku ti: ‘Mokati keni omwa dja ovalumenhu vongaho tava pukifa ovakalimo vomoshilando shavo, tava ti: “Natu yeni tu ka longeleni ookalunga vamwe,” ookalunga ovo muhe shii,’ 14 omu na okutala nawa oshinima osho, oku shi konakona noukeka nokupulapula, nongeenge omwa shilipaleke kutya oshinima shitondifa sha tya ngaho otashi ningwa shili mokati keni, 15 omu na okudipaa filufilu ovakalimo vomoshilando osho neongamukonda. Omu na oku shi hanauna po neongamukonda pamwe noinima aishe oyo i li mo, mwa kwatelwa oimuna yamo. 16 Opo nee ou na okwoongela oixuulwa* yamo aishe momapandavanda oshilando, ndele to i xwike po nomundilo, noixuulwa yamo otai kala ngaashi exwikiloyambo kuJehova, Kalunga koye. Otashi ka ninga onduba yomakulukuma fiyo alushe. Kashi na vali okutungululwa. 17 Eke loye kali na okukufa sha osho she likalekelelwa ehanauno,* opo ehandu laJehova li lote, e mu file onghenda, e mu kenukile noku mu hapupalife, ngaashi a anena ooxokulululwa. 18 Omu na okudulika* kuJehova, Kalunga keni, mokudiinina oipango yaye aishe oyo handi mu lombwele nena eli, nokungaho, otamu ningi osho sha yuka momesho aJehova, Kalunga keni.

14 “Nye ovana vaJehova, Kalunga keni. Inamu litetaula, ile mu likulule eengwala* omolwomunhu oo a fya. 2 Osheshi omu li ovanhu vayapuki kuJehova, Kalunga keni, na Jehova okwe mu hoolola mu ninge ovanhu vaye ve likalekelwa* mokati kovanhu aveshe ovo ve li kombada yedu.

3 “Inamu lya oinima aishe oyo itondifa. 4 Oinamwenyo ei mu na okulya oyo ei: ongobe yomhedi, odi, oshikombo, 5 oholongo, omenye, ombabi, oshikombo shomoixwa, ofino, odi yomoixwa nodi yokeemhunda. 6 Otamu dulu okulya oinamwenyo aishe oyo i na omakondo a pandjuka moitukulwa ivali nohai alula. 7 Ashike kamu na okulya oinamwenyo oyo hai alula, ile oyo i na omakondo, ile omakasha a pandjuka, ngaashi ongamelo, ndiba nokahelemani, molwaashi ohai alula, ndele kai na omakondo, ile omakasha a pandjuka. Inai koshoka kunye. 8 Kamu na yo okulya oshingulu, molwaashi oshi na omakondo a pandjuka, ndele ihashi alula. Inashi koshoka kunye. Kamu na okulya ombelela yayo nokamu na oku i kuma, ngeenge ya fya.

9 “Oinima aishe oyo hai kala momeva, oyo tamu dulu okulya ongaashi: Oinima aishe oyo i na omilenge nomapeta, otamu dulu oku i lya. 10 Ashike kamu na okulya oinima aishe oyo ihe na omilenge nomapeta. Inai koshoka kunye.

11 “Otamu dulu okulya oudila aveshe va koshoka. 12 Ndele kamu na okulya oudila ava: onhwa, oshikodinhwa, onghombenhwa, 13 ookaimbi voluvala lediya, ookaimbi valaula nomaludi amwe vali ookaimbi, 14 oludi keshe lookola, 15 omho, exuvi, kakwaya, oludi keshe lookakodi, 16 kakulu, eshikiti, hangolokanyanga, 17 onyundu, onhwa oyo ihe na omalududi komutwe, onghukuti, 18 exuwashi, oludi keshe lookandoko, depupu nelimalima. 19 Oipuka aishe oyo i na omavava inai koshoka yo kunye. Kai na okuliwa. 20 Oikwamavava aishe oyo ya koshoka otamu dulu oku i lya.

21 “Kamu na okulya oinamwenyo aishe oyo mwa hanga ye lifila. Otamu dulu oku i pa omunailongo oo e li moilando* yeni; ota dulu oku i lya, ile otamu dulu oku i landifa po komunailongo. Osheshi nye omu li ovanhu vayapuki kuJehova, Kalunga keni.

“Inamu fulukifa okakombwena momashini aina.

22 “Omu na okuyandja filufilu oshitimulongo shomoilikolomwa aishe oyo ya dja momapya eni omudo keshe. 23 Otamu ka lila moipafi yaJehova, Kalunga keni, oshitimulongo sheendjayambo deni, shomaviinyu eni mape, shomaadi eni nosho yo eengobe, eedi noikombo yeni, oyo ya dalwa tete, monhele oyo a hoolola mu fimanekelwe edina laye, opo mu kale alushe hamu tila Jehova, Kalunga keni.

24 “Ngeenge olweendo olile unene kunye, noitamu dulu oku shi twala konhele oyo Jehova, Kalunga keni, a hoolola ku fimanekelwe edina laye, molwaashi oi li kokule nanye, (shaashi Jehova, Kalunga keni, ote mu nangeke noupuna), 25 otamu dulu oku shi landifa po koimaliwa, noimaliwa oyo otamu i nayo, i li momake eni, konhele oyo Jehova, Kalunga keni, ta ka hoolola. 26 Otamu dulu okulanda noimaliwa oyo keshe shimwe osho mwa hala,* eengobe, eedi, oikombo, omaviinyu, oikolwifa ikwao nosho yo keshe shimwe osho mwa hala;* otamu ke i lila moipafi yaJehova, Kalunga keni, nokuhafa, nye nomaukwaneumbo eni. 27 Inamu lidimbika Omulevi oo e li moilando yeni, osheshi ina pewa oshitukulwa, ile efyuululo pamwe nanye.

28 “Pexulilo lomudo omutitatu keshe, omu na okweeta oshitimulongo ashishe shomoilikolomwa yeni yomudo oo, noku shi tula meni loilando yeni. 29 Opo nee Omulevi, oo ina pewa oshitukulwa, ile efyuululo pamwe nanye, ovanailongo ovo hava di mokati keni, ounona ovo vehe na ooxe* nosho yo ovafiyekadi ovo ve li moilando yeni, otave ke uya nokulya tava kuta, opo Jehova, Kalunga keni, e mu nangeke noupuna mwaashishe osho tamu ningi.

15 “Pexulilo lomudo keshe omutiheyali, ou na okumangulula vakweni meendjo. 2 Ovanhu ove na okumangululwa ngaha: Keshe oo a lilwa eendjo ota ka mangulula mukwao meendjo odo e na. Ke na okupula mukwao, ile omumwaxe ofuto kefininiko, molwaashi otaku ka ingidwa emanguluko olo, opo Jehova a fimanekwe. 3 Omunailongo oto dulu oku mu pula ofuto kefininiko, ndele omumwaxo ku na oku mu pula keshe osho e ku indila. 4 Ashike mokati keni inamu kala nande oumwe a hepa, osheshi Jehova ote ke mu nangeka noupuna filufilu medu olo Jehova, Kalunga keni, te mu pe mu kale mo li li efyuululo, 5 ndele ongeenge ashike tamu dulika filufilu kondaka yaJehova, Kalunga keni, nokudiinina filufilu oipango aishe oyo handi mu pe nena. 6 Osheshi Jehova, Kalunga keni, ote mu nangeke noupuna ngaashi e mu udanekela, notamu ka yandja eendjo* koiwana ihapu, ashike nye itamu ka pumbwa oku i ehela, notamu ka pangela oiwana ihapu, ndele yo itai ke mu pangela.

7 “Ngeenge umwe womovamwaxo okwa ningi ohepele moilando yeni yomedu olo Jehova, Kalunga keni, te mu pe, inamu kukutika omutima weni, ile mu anyene* omumwaxo oo a hepa. 8 Omu na oku mu kamutululila eke leni nehalo liwa nomu na oku mu pa eendjo* dakeshe osho a pumbwa, ile osho ehe na. 9 Lungameni muha kale nomadiladilo aa mai momitima deni kutya: ‘Omudo omutiheyali, omudo wokumangulula ovanhu meendjo, owa fika,’ ndele tamu kala inamu pa sha omumwaxo oo a hepa omolwouluva weni. Ngeenge okwa kuu kuJehova omolweni, otashi ka kala enyono kunye. 10 Omu na oku mu pa nehalo liwa, nokamu* na oku mu pa nomunyengutima, nokungaho, Jehova, Kalunga keni, ota ka nangeka noupuna oilonga yeni aishe. 11 Medu leni otamu ka kala alushe eehepele. Nomolwaasho handi mu lombwele kutya: ‘Omu na okukamutululila eke leni ovafininikwa novamwaxo ovo va hepa ve li medu leni, tamu shi ningi nehalo liwa.’

12 “Ngeenge umwe womovamwaxo, omulumenhu, ile omukainhu Omuheberi, owe mu lande po, ndele te ku longele eedula hamano, momudo omutiheyali ou na oku mu mangulula. 13 Ngeenge owe mu mangulula, ino mu lekela eenyala dongaho. 14 Ou na oku mu pa sha nehalo liwa moufita woye, moilikolomwa yoye yomepya,* momaadi oo wa henga nomomaviinyu omoshikolelo shoye. Ngaashi ashike Jehova, Kalunga koye, e ku nangeka noupuna, naave osho u na oku mu pa. 15 Dimbuluka kutya owa li omupika medu laEgipiti, na Jehova, Kalunga koye, okwe ku xupifa. Nomolwaasho handi ku lombwele u ninge ngaha nena.

16 “Ndele ngeenge okwe ku lombwele kutya: ‘Itandi di po pwoove,’ molwaashi oku ku hole novaneumbo loye, shaashi okwa kala a hafa ofimbo e li naave, 17 ou na oku mu twala komuvelo, ndele to mu tyuula nonhisho kokutwi kwaye, nota ningi omupiya woye onghalamwenyo yaye aishe. Ou na okuninga sha faafana nomupiya woye okakadona. 18 Ino shi tala ko shidjuu ngeenge we mu mangulula, ndele ta di po pwoove, molwaashi oilonga yaye oyo e ku longela oule weedula hamano oi dulife luvali pwaayo yomunailonga oo a kutwa, na Jehova, Kalunga koye, okwa kala te ku nangeke noupuna mukeshe shimwe.

19 “Ou na okuyapulila Jehova, Kalunga koye, ongobe yoye yondume keshe, oyo ya dalwa tete, nosho yo odi yondume noshikombo shoshindume keshe, osho sha dalwa tete. Ino longifa nandenande ongobe* yoye, oyo ya dalwa tete, noino kulula odi, ile oshikombo osho sha dalwa tete. 20 Ove novaneumbo loye omu na oku i lila koshipala shaJehova, Kalunga keni, omudo keshe, monhele oyo Jehova ta ka hoolola. 21 Ashike ngeenge oi na oupyakadi wa sha, ya lemana, ya twika, ile i na vali oupyakadi umwe wa kwata moiti, ku na oku i yambela Jehova, Kalunga koye. 22 Ou na oku i lila moilando* yeni; omunhu a koshoka naao ina koshoka, aveshe otava dulu oku i lya, ngaashi tamu li omenye, ile oholongo. 23 Ashike ku na okulya ohonde yayo, ndele ou na oku i tilashi medu ngaashi omeva.

16 “Dimbulukeni omwedi waAbib* nokudana Opaasa yaJehova, Kalunga keni, osheshi momwedi waAbib, omo Jehova, Kalunga keni, e mu kufa mo muEgipiti konguloshi. 2 Omu na yo okuyamba omayambo Opaasa yaJehova, Kalunga keni, taa di meedi, moikombo nomeengobe, monhele oyo Jehova a hoolola mu fimanekelwe edina laye. 3 Inamu lya sha sha ya efulika pamwe nomayambo oo, omu na okulya omungome inau ya efulika oule womafiku aheyali, molwaashi medu laEgipiti omwa dja mo meendelelo. Eshi tamu ningi ngaho, otamu dimbuluka omahepeko oo mwa li tamu piti muo, noitamu dimbwa nandenande mokukalamwenyo kweni efiku olo mwa dja muEgipiti. 4 Mokati keni inamu hangika nande olumbololo la ya efulika moitukulwa yeni aishe oule womafiku aheyali, nombelela yoshinamwenyo osho tamu yambe konguloshi mefiku lotete, inai tuvikilwa oufiku aushe fiyo efiku lomongula. 5 Itamu ka pitikwa mu yambele omayambo Opaasa moshilando keshe shomoilando oyo Jehova, Kalunga keni, te mu pe. 6 Ndele oku na okuyambelwa monhele oyo Jehova, Kalunga keni, a hoolola mu fimanekelwe edina laye. Omu na okuyamba omayambo Opaasa konguloshi diva, ngeenge etango la ningine, pefimbo* olo mwa dile muEgipiti. 7 Omu na oku a teleka noku a lila monhele oyo Jehova, Kalunga keni, ta ka hoolola, opo nee efimbo longula otamu ka shuna komatwali eni. 8 Omu na okulya omungome inau ya efulika oule womafiku ahamano, nomefiku etiheyali otaku ka kala oshoongalele shokufimanekifa Jehova, Kalunga keni. Kamu na okulonga sha mefiku olo.

9 “Omu na okuvalula oivike iheyali. Noivike oyo iheyali omu na oku i valula okudja pefimbo olo mwa hovela okuteya oilya momapya noshikashulifo. 10 Opo nee omu na okudana Oshivilo shOivike omolwaJehova, Kalunga keni, nokuyandja omayambo ehalo liwa taa di momake eni, she likolelela komanangeko noupuna oo mwa pewa kuJehova, Kalunga keni. 11 Otamu ka kala yo mwa hafa moipafi yaJehova, Kalunga keni, nye novanamati veni, ovanakadona veni, ovapiya veni ovalumenhu, ovapiya veni ovakainhu, Ovalevi ovo hava di moilando* yeni, ovanailongo, ounona ovo vehe na ooxe,* novafiyekadi ovo ve li mokati keni, monhele oyo Jehova, Kalunga keni, a hoolola mu fimanekelwe edina laye. 12 Dimbulukeni kutya omwa li ovapika muEgipiti, nomwa li hamu diinine nokudulika komaufomhango aa.

13 “Omu na okudana Oshivilo shOmatwali* oule womafiku aheyali, eshi tamu ongele oilikolomwa oyo ya dja momapya eni,* moikolelo yeni yomaviinyu nosho yo omaadi oo mwa henga. 14 Kaleni mwa hafa pefimbo loshivilo sheni, nye novanamati veni, ovanakadona veni, ovapiya veni ovalumenhu, ovapiya veni ovakainhu, Ovalevi, ovanailongo, ounona ovo vehe na ooxe novafiyekadi, ovo ve li moilando yeni. 15 Oshivilo osho tashi fimanekifa Jehova, Kalunga keni, omu na oku shi danena monhele oyo Jehova ta hoolola, molwaashi Jehova, Kalunga keni, ota ka nangeka noupuna oilikolomwa yeni aishe nakeshe osho tamu ningi, notamu ka kala mwa hafa neenghono.

16 “Ovalumenhu aveshe ovo ve li mokati keni ove na okuholoka lutatu momudo koshipala shaJehova, Kalunga keni, monhele oyo a hoolola: pOshivilo shOmingome inadi ya Efulika, pOshivilo shOivike nopOshivilo shOmatwali,* ashike kape na nande oumwe womuvo e na okuholoka koshipala shaJehova e li eenyala dongaho. 17 Keshe umwe oku na okweeta eeshali, she likolelela komanangeko noupuna oo Jehova Kalunga e mu pa.

18 “Omu na okuhoolola ovatokoli novaleli vepata keshe moilando* aishe oyo Jehova, Kalunga keni, te mu pe, nove na okutokola ovanhu netokolo li li pauyuki. 19 Inamu pengifa ouyuki, noinamu kala mu na okatongo, ile mu tambule ombubo, osheshi ombubo ohai twikifa omesho omunaendunge nohai pengifa eendjovo domuyuki. 20 Lalakaneneni ouyuki, ndele hashinima shimwe, opo mu kale nomwenyo nomu ka kale medu olo Jehova, Kalunga keni, te mu pe.

21 “Inamu twika omuti woludi keshe u li opala iyapuki* popepi noaltari oyo mwa ningila Jehova, Kalunga keni.

22 “Inamu lidikila nande ongudimanya iyapuki, oshinima osho Jehova, Kalunga keni, e tonde.

17 “Ino yambela Jehova, Kalunga koye, ongobe yomhedi, ile odi i na oulema, ile i na oupyakadi washa, osheshi otai ka kala oshinima shitondifa kuJehova, Kalunga koye.

2 “Ngeenge omulumenhu, ile omukainhu, oo ha di mushimwe shomoilando, oyo Jehova, Kalunga keni, te mu pe, okwa ningi osho shii momesho aJehova, Kalunga keni, nokwa nyono ehangano laye, 3 nongeenge okwa efa po okulongela Kalunga, ndele ta longele ookalunga vamwe, noku ve linyongamena, ile etango, ile omwedi, ile omatangakwaita aeshe okeulu, oshinima osho inandi shi mu lombwela; 4 ngeenge omwe shi lombwelwa, ile omwe shi uda, omu na okukonakona oshinima osho nawanawa. Ngeenge omwa shilipaleke kutya oshinima osho shitondifa osha ningwa shili muIsrael, 5 omu na okutwala omulumenhu, ile omukainhu oo a longa oilonga oyo ii koivelo yoshilando, nomulumenhu, ile omukainhu oo oku na okudipawa nomamanya. 6 Omunhu oku na okudipawa paendjovo* deendombwedi mbali, ile nhatu. Ke na okudipawa paendjovo dondombwedi imwe aike. 7 Eendombwedi odo odo di na oku mu denga tete nomamanya di mu dipae, opo nee ovanhu aveshe otave ke mu denga. Omu na okukufa mo osho shii mokati keni.

8 “Ngeenge mushimwe shomoilando yeni omwa holoka oupyakadi oo mudjuu kunye okutokola, kutya nee owa kwatela mo etiko lohonde, ile oinima yopamhangu, ile pa longwa oilonga youkolokoshi, ile oinima imwe ya kwatela mo eenhamanana, omu na okufikama nokuya konhele oyo Jehova, Kalunga keni, a hoolola. 9 Indeni kovapristeri Ovalevi nokomutokoli, oo e li ko pefimbo opo, noku va pula, notave ke mu shiivifila osho va tokola. 10 Omu na okukatuka metwokumwe netokolo olo ve mu shiivifila monhele oyo Jehova a hoolola. Ningeni filufilu ashishe osho ve mu lombwela. 11 Omu na okukatuka metwokumwe nomhango oyo tave mu lombwele, nometwokumwe netokolo olo tave mu lombwele. Inamu dina etokolo olo tave mu lombwele. Inamu kandukila kolulyo, ile kolumosho. 12 Omulumenhu oo te lihumbata nai mokuhapwilikina komupristeri oo ta yakula Jehova, Kalunga keni, ile komutokoli, oku na okufya. Omu na okukufa mo osho shii muIsrael. 13 Ovanhu aveshe otave ke shi uda notava ka kala va tila, noitave ke lihumbata vali nai.

14 “Ngeenge omwa i medu olo Jehova, Kalunga keni, te mu pe mu kale mo, ndele eshi mu li mo, tamu ti: ‘Natu lihoololeleni ohamba ngaashi oiwana aishe oyo ye tu dingilila,’ 15 moshinima osho, omu na okuhoolola filufilu ohamba oyo Jehova, Kalunga keni, a hoolola. Omu na okuhoolola ohamba mokati kovamwaxo. Inamu pitikwa mu lihoololele omunailongo oo ehe fi omumwaxo. 16 Ke na okulikongela eenghambe dihapu, ile a shunife ovanhu kuEgipiti, opo ve ke likongele eenghambe dihapu, molwaashi Jehova okwe mu lombwela, a ti: ‘Inamu shuna ko vali kuEgipiti nelalakano olo.’ 17 Ke na yo okulikongela ovakulukadi vahapu, opo omutima waye uhe mu hongaule; noke na okulikongela oisilveri noingoli ihapu. 18 Ngeenge okwa kala omutumba kolukalwapangelo louhamba waye, oku na okulishangela embo,* ta tape mOmhango oyo ya li ya tuvikilwa kovapristeri Ovalevi.

19 “Oku na oku i diinina, noku i lesha onghalamwenyo yaye aishe, opo e lihonge okutila Jehova, Kalunga kaye, a diinine eendjovo adishe odo di li mOmhango nokudulika komaufomhango oo. 20 Kungaho, omutima waye itau ke linenepekela ovamwaxe, noita ka yapuka mo momalombwelo, a ye kolulyo, ile kolumosho, opo a kale efimbo lile mouhamba waye, ye novanamati vaye mokati kOvaisrael.

18 “Ovapristeri Ovalevi nepata alishe lOvalevi, itali ka pewa oshitukulwa, ile efyuululo pamwe naIsrael. Otava ka lya omayambo, oo a yambelwa Jehova okupitila momundilo, e li efyuululo laye. 2 Itava ka mona efyuululo mokati kovamwaxe. Jehova oye efyuululo lavo, ngaashi ashike e va lombwela.

3 “Oinima oyo ovanhu ve na okuyandja kovapristeri oyo ei: Ngeenge omunhu ta yandje eyambo, kutya nee ongobe yomhedi, ile odi, oku na okupa omupristeri oshipepeti, eehamama netangala. 4 Oilya yeni oyo ya pya tete, omaviinyu eni mape, omaadi eni nosho yo olududi leedi olo mwa kulula ko tete keedi deni, omu na oku i yandja kuye. 5 Jehova, Kalunga keni, okwa hoolola omupristeri oo pamwe novanamati vaye, momapata eni aeshe, va yakule alushe medina laJehova.

6 “Ashike ngeenge Omulevi okwa di mo mushimwe shomoilando yeni, oyo i li muIsrael omo a kala ha di, nokwa* hala okuya konhele oyo Jehova a hoolola,* 7 oku na okuyakula konhele oyo medina laJehova, Kalunga kaye, ngaashi ovamwaxe aveshe, Ovalevi, ovo tava yakula moipafi yaJehova. 8 Oku na okupewa oikulya i fike pamwe noyavo, tai wedwa koinima oyo a mona, eshi a landifa po efyuululo laye.

9 “Ngeenge omwa i medu olo Jehova, Kalunga keni, te mu pe, inamu hopaenena oilonga itondifa yoiwana oyo. 10 Mokati keni inamu kala nande oumwe oo ta endifa omonamati waye, ile omonakadona waye momundilo, omunyanekeli, omhulile, omunhu oo ha tale momukonda, omulodi, 11 omunhu oo ha fingaele vamwe, omunhu oo ha pula ekwafo kovanhu ovo hava kwatafana neemhepo, ile kovaxunganeki vonakwiiwa, ile ha kongo ekwafo koonakufya. 12 Ovanhu ovo hava longo oinima oyo ova tondifa kuJehova, nomolwoilonga oyo itondifa, Jehova, Kalunga keni, ote ke va taataa mo moipafi yeni. 13 Omu na okukala mwa koshoka filufilu koshipala shaJehova, Kalunga keni.

14 “Osheshi oiwana oyo tamu taataa mo oya li hai pwilikine keemhulile nokovanyanekeli, ashike Jehova, Kalunga keni, ine mu pitika mu longe oshinima sha tya ngaho. 15 Jehova, Kalunga keni, ote ke mu pa omuprofeti ngaashi ame, ta di mokati kovamwaxo. Omu na okupwilikina kuye. 16 Jehova, Kalunga keni, okwa nyamukula osho mwe mu indila muHoreb mefiku loshoongalele,* eshi mwa ti: ‘Ino tu efa tu ude ondaka yaJehova, Kalunga ketu, ile tu mone vali omundilo oo munene, opo tuha fye.’ 17 Opo nee Jehova okwa lombwela nge, a ti: ‘Osho va popya oshiwa. 18 Ohandi ke va pa omuprofeti e ku fa, tadi mokati kovamwaxe, nohandi ka tula eendjovo dange mokanya kaye, ndele ye ote ke va lombwela ashishe osho nde mu lombwela. 19 Ohandi ka katukila onghatu filufilu omunhu oo ita pwilikine keendjovo dange odo ta ka popya medina lange.

20 “‘Ngeenge omuprofeti okwa popi kuye mwene ondjovo medina lange, oyo inandi mu lombwela a popye, ile a popi medina lookalunga vamwe, omuprofeti oo oku na okufya. 21 Ndele otashi dulika mu lipopile momitima deni kutya: “Ohatu ka shiiva ngahelipi kutya Jehova haye a popya ondjovo oyo?” 22 Ngeenge omuprofeti okwa popi medina laJehova, ndele ondjovo oyo inai wanifwa, Jehova haye a popya ondjovo oyo. Omuprofeti oo okwa popya kuye mwene. Inamu mu tila.’

19 “Ngeenge Jehova, Kalunga keni, okwa hanauna po ovanhu vomoiwana yomedu olo Jehova, Kalunga keni, te mu pe, nomwe va taataa mo, ndele tamu kala hamu di moilando yavo nomomaumbo avo, 2 omu na okuhoolola oilando itatu medu olo Jehova, Kalunga keni, te mu pe mu kale mo. 3 Edu olo Jehova, Kalunga keni, e mu pa mu kale mo, omu na oku li tukula moitukulwa itatu, nomu na okulongekida eendjila, opo omunhu oo a dipaa a dule oku ka hondama kushimwe shomoilando oyo.

4 “Eshi osho shi na okuningilwa omunhu oo a dipaa, oo ta ka hondama koilando oyo, opo a kale nomwenyo: Ngeenge okwa dipaa mukwao shihe fi oshiningilewina noina kala e mu tonde; 5 ngaashi ngeno va ya namukwao momufitu va ka tyava oikuni, nokwa yelula omake aye a tete omuti nekuva, ndele ekuva tali u ko komupini nola denga mukwao, ndele ta fi, omunhu oo a dipaa mukwao oku na oku ka hondama kushimwe shomoilando oyo, opo a kale nomwenyo. 6 Ngeenge oshilando osho oshi li kokule unene, omupuli wohonde otashi dulika a taatae omudipai oo, ndele ngeenge e mu hange, te mu dipaa, molwaashi okwa handuka neenghono,* ashike ina wana okufya, molwaashi ina kala e tonde mukwao. 7 Nomolwaasho handi mu lombwele kutya: ‘Hoololeni oilando itatu.’

8 “Jehova, Kalunga keni, ota ka tamununa mo oshitukulwa sheni, ngaashi a anena ooxokulululwa, note ke mu pa edu alishe olo e va udanekela. 9 Ndele opo a ninge ngaho, omu na okudulika filufilu komalombwelo aeshe, oo handi mu lombwele nena eli, okukala mu hole Jehova, Kalunga keni, nokweenda alushe meendjila daye, opo nee koilando ei itatu otamu ka weda ko vali oilando ikwao itatu. 10 Kungaho, medu leni olo Jehova, Kalunga keni, te mu pe, li li efyuululo, itamu ka tikila ohonde ihe na etimba, nanye itamu ka kala mu na etimba lohonde.

11 “Ngeenge omunhu okwa kala e tonde mukwao, nokwa kala a hala oku mu ponokela, nokwe mu* monifa oshiponga, ndele ta fi, na nakudipaa mukwao ta ka hondama kushimwe shomoilando oyo, 12 ovakulunhu voshilando shavo ove na oku mu tuma a dje ko, nota ka yandjwa momake omupuli wohonde, opo nee ote ke mu dipaa. 13 Inamu* mu fila onghenda, nomu na okukufa mo oo a tilashi ohonde ihe na etimba muIsrael, opo shi mu endele nawa.

14 “Ngeenge omwa mono efyuululo leni, medu olo Jehova, Kalunga keni, te mu pe mu kale mo, inamu lundulula edidiliko longaba yeni namushiinda sheni, olo la tulwa po kooxokulululwa la tenda ko ongaba.

15 “Omunhu ita dulu okuhokololifwa* kondombwedi imwe omolwepuko, ile enyono lonhumba olo tashi dulika a nyona. Oshinima osho otashi dulu ashike okukolekwa paendjovo* deendombwedi mbali, ile deendombwedi nhatu. 16 Ngeenge ondombwedi yoipupulu otai hokololifa omunhu notai ti kutya okwa nyona, 17 ovanhu vavali ovo ve na eenhamanana otava ka fikama koshipala shaJehova, shovapristeri noshovatokoli ovo ve li ko pefimbo opo. 18 Ovatokoli otava ka konakona nawanawa oshinima osho, nongeenge omunhu oo ota yandje oumbangi woipupulu, noshinima osho ta hokololifa omumwaxe kashi fi shoshili, 19 omu na oku mu ningila naanaa osho a li ta lundilile omumwaxe, nomu na okukufa mo osho shii mokati keni. 20 Ovo tava xupu po otave ke shi uda, ndele tava kwatwa koumbada, noitava ka ninga vali oshinima shii sha tya ngaho mokati keni. 21 Inamu* mu fila onghenda: Omwenyo omomwenyo, eisho omeisho, eyoo omeyoo, eke omeke nomhadi omomhadi.

20 “Ngeenge omwa ka lwifa ovatondi veni, ndele tamu mono eenghambe davo, omatemba avo nomatangakwaita avo mahapu e dule eni, inamu va tila, molwaashi Jehova, Kalunga keni, oo e mu kufa mo medu laEgipiti oku li pamwe nanye. 2 Eshi mu li pokuya molwoodi, omupristeri oku na okuuya nokupopya novanhu. 3 Oku na oku va lombwela, ta ti: ‘Israel, pwilikina, ou li poku ka lwifa ovatondi voye. Ino kala wa tila, ile u mbadapale, ile u kakame omolwavo, 4 molwaashi Jehova, Kalunga keni, ote ke mu wilika nota ka lwifa ovatondi veni ponhele yeni noku mu xupifa.’

5 “Ovaleli navo ove na okulombwela ovanhu tava ti: ‘Keshe oo a tunga eumbo lipe, ndele ine li nangala,* mu efeni, ndele ta shuna keumbo lavo. Osheshi otashi dulika a file molwoodi, ndele omunhu umwe te li nangala. 6 Ou a twika oshikunino shomandjebele, ndele ina hovela okulikola mo oilikolomwa, mu efeni, ndele ta shuna keumbo lavo. Osheshi ota dulu okufila moita, ndele tai likolwa mo kuumwe. 7 Naao a valeka omukainhu, ndele ine mu hombola, mu efeni, ndele ta shuna keumbo lavo. Osheshi otashi dulika a file moita, ndele omukainhu oo ta hombolwa po komulumenhu umwe.’ 8 Ovaleli ove na yo okulombwela ovanhu, tava ti: ‘Ngeenge umwe okwa kala a tila nokwa limbililwa, oku na okushuna keumbo laye, opo aha ningife ovamwaxe va mbadapale ngaashi ye.’* 9 Ngeenge ovaleli va mane okupopya novanhu ovo, ove na okuhoolola omalenga omatangakwaita a wilike ovanhu.

10 “Ngeenge omwa ehene popepi noshilando osho tamu ka lwifa, tete omu na oku shi shiivifila nghee tashi dulu okupanga ombili nanye. 11 Ngeenge ove mu nyamukula nombili, ndele tave mu efele mo, ovanhu aveshe ovo tamu hange mo otava ka ninga ovapika veni notave ke mu longela. 12 Ngeenge ova anye okupanga ombili nanye, ndele tave mu lwifa, omu na oku va ponokela, 13 na Jehova, Kalunga keni, ote ke va yandja filufilu momake eni, nomulumenhu keshe e li mo, omu na oku mu dipaa neongamukonda. 14 Ashike ovakainhu, ounona, oimuna nakeshe osho shi li moshilando, oixuulwa* aishe yasho, otamu dulu oku i kufa ko i ninge yeni, notamu ka lya oixuulwa yovatondi veni oyo Jehova, Kalunga keni, e mu pa.

15 “Osho mu na okuningila oilando aishe oyo i li kokule nanye, oyo ihe fi imwe yomoilando yoiwana oyo i li popepi nanye. 16 Ashike moilando yovanhu ovo, oyo Jehova, Kalunga keni, te mu pe i li efyuululo, inamu efa mu kale oshinima shi na omwenyo. 17 Ponhele yaasho, omu na oku va hanauna po filufilu, Ovaheti, Ovaamori, Ovakaanan, Ovaperesi, Ovahevi nOvajebusi, ngaashi Jehova, Kalunga keni, e mu lombwela, 18 opo vehe mu nwefe mo mu shikule oilonga yavo aishe itondifa oyo hava longele ookalunga kavo, noku mu ningifa mu nyone kuJehova, Kalunga keni.

19 “Ngeenge omwa nangele oshilando, opo mu shi kwate ko, nomwa kala tamu shi lwifa omafiku mahapu, inamu hanauna po omiti dasho moku di teta po nomakuva. Otamu dulu okulya oiimati yado, ashike inamu di teta po. Inamu hanauna po omiti ngaashi tamu hanauna po ovanhu. 20 Otamu dulu ashike okuhanauna po omiti odo mu shii kutya ihadi imi oiimati hai liwa. Otamu dulu oku di teta po noku di tungifa oluumbo lokukondeka oshilando osho tashi mu lwifa, fiyo mwe shi kwata ko.

21 “Ngeenge umwe okwa hangwa a fila moixwa medu olo Jehova, Kalunga keni, te mu pe mu kale mo, ndele kaku shiivike kutya olyelye e mu dipaa, 2 ovakulunhu novatokoli veni otava ka ya nokumeta oshinano okudja poshimhu fiyo omoilando oyo i li popepi nasho. 3 Opo nee ovakulunhu voshilando osho shi li popepi elela noshimhu otava ka kufa ongobe yondema oyo inai longa sha nande onale, inai nana ondjoko nandenande. 4 Ovakulunhu voshilando osho otava ka shinga ondema oyo fiyo omefilu tali kunguluka omeva, omo inamu pululwa noinamu kunwa eembuto nande onale, notava ka teyela ofingo yondema oyo mefilu olo.

5 “Ovalevi, ovo ve li ovapristeri, opo tava ka kala, molwaashi Jehova, Kalunga keni, okwe va hoolola ve mu yakule, va shiivife omanangeko noupuna medina laJehova. Otava ka shiivifa nghee eenhamanana keshe da kwatela mo elongifo leenghono di na okukandulwa po. 6 Opo nee ovakulunhu aveshe voshilando osho shi li popepi elela noshimhu otava ka koshela omake avo kombada yondema, oyo ofingo yayo ya teyelwa mefilu, 7 notava ka popya kutya: ‘Omake etu inaa tilashi ohonde ei, nomesho etu inae i mona eshi tai tilwashi. 8 Jehova, ino handukila oshiwana shoye shaIsrael osho wa kulila, noino efa oo a tilashi ohonde ihe na etimba a kale mokati koshiwana shoye shaIsrael.’ Kungaho, itava ka kala ve na etimba lohonde. 9 Monghedi ya tya ngaho, otamu ke likosha etimba lohonde ihe na ondjo mokati keni mokuninga osho sha yuka momesho aJehova.

10 “Ngeenge owa i u ka lwife ovatondi voye, na Jehova, Kalunga koye, te va findi ponhele yoye, ndele to va kwata ko ve li eenghwate, 11 nongeenge mokati keenghwate owa mono mo omukainhu muwa, we mu hokwa, nowa hala oku mu kufa a ninge omukulukadi woye, 12 oto dulu oku mu twala meumbo loye. Oku na okulikulula momutwe nokuteta oipanyala yaye. 13 Oku na yo okukufa mo oikutu oyo a kwatwa nayo, ndele ta kala ha di meumbo loye. Ota ka lila xe naina oule womwedi, nokudja opo oto dulu okunangala naye. Oto ka ninga omushamane waye, naye ota ka ninga omukulukadi woye. 14 Ashike ngeenge ino mu hokwa, ou na oku mu efa a ye keshe opo a hala. Ndele ino mu landifa po koimaliwa, ile u ungaunge naye nonyanya, osheshi owe mu ninga nai nale.

15 “Ngeenge omushamane oku na ovakulukadi vavali, ndele oku hole umwe shi dulife mukwao,* novakulukadi ovo ove mu dalela ovanamati, ashike omonamati woshiveli okwa dalwa komukulukadi oo ehe holike, 16 efiku ta yandje efyuululo kovanamati vaye, ke na okutala ko omonamati womukulukadi oo e hole e li oshiveli ponhele yomonamati woshiveli oo a dalwa komukulukadi oo ehe hole. 17 Omonamati, oo a dalwa komukulukadi oo ehe holike, oku na oku mu tala ko e li oshiveli moku mu pa lwomapa avali oshitukulwa shakeshe shimwe osho e na, molwaashi oye a dala tete, eshi a li e na omafa. Oye e na oufemba wokukala oshiveli.

18 “Ngeenge omushamane oku na omonamati oo omutangalali nomunashibofa, noiha dulika kuxe, ile kuina, nova kendabala oku mu pukulula, ashike ina pwilikina kuvo, 19 xe naina ove na oku mu kufa noku mu twala kovakulunhu koshivelo shoshilando omo ha di, 20 ndele tava lombwele ovakulunhu voshilando omo ha di, tava ti: ‘Omonamati wetu ou omutangalali nomunashibofa noiha dulika kufye. Okwa fuka,* ye ongholwe.’ 21 Ovalumenhu aveshe vomoshilando omo ha di ove na oku mu dipaa nomamanya. Omu na okukufa mo osho shii mokati keni, nOvaisrael aveshe otave ke shi uda, ndele tava kwatwa koumbada.

22 “Ngeenge omunhu okwa nyona enyono loku mu dipaifa, ndele ta dipawa, nomwe mu endjelelifa komuti, 23 oshimhu shaye kashi na okukala komuti oo oufiku aushe. Ponhele yaasho, omu na okushilipaleka kutya omwe mu paka mefiku olo, molwaashi omunhu oo a endjelelifwa oku li omufingwa pataleko laKalunga, nokamu na okunyateka edu leni olo Jehova, Kalunga keni, te mu pe li li efyuululo.

22 “Ngeenge owa mono ongobe, ile odi yomumwaxo ya kana, ino i efa ashike ngahenya owina. Ou na oku i shinga filufilu u i shunife komumwaxo. 2 Ndele ngeenge omumwaxo iha di popepi naave, ile ku mu shii, ou na okutwala oshimuna osho keumbo loye, ndele to kala nasho, fiyo osheshi omumwaxo e uya te shi kongo. Opo nee ou na oku shi mu shunifila. 3 Osho osho u na okuninga shi na sha nondongi yaye, oikutu yaye, nakeshe osho omumwaxo a kanifa, ndele to shi toola. Ku na ashike oku shi efa ngahenya.

4 “Ngeenge owa mono ondongi, ile ongobe yomumwaxo ya pundila mondjila, ino i efa ashike ngahenya owina. Ou na filufilu oku mu kwafela mokutumba po oshimuna shaye.

5 “Omukainhu ke na okudjala oikutu yomulumenhu, nomulumenhu ke na okudjala oikutu yomukainhu. Osheshi keshe ou te shi ningi, oku li oshinima shitondifa kuJehova, Kalunga keni.

6 “Ngeenge owa hange oshihadi shokadila popepi nondjila, shi na oudilona, ile omai, kutya nee okomuti, ile opedu, ndele ina opo we mu hanga poudilona, ile pomai, ina ino mu kufa po pamwe noudilona vaye. 7 Shilipaleka kutya ina owe mu efa a ye, ashike oudilona oto dulu oku va kufa po va ninge voye. Osho osho u na okuninga, opo shi ku endele nawa nou kale nomwenyo efimbo lile.

8 “Ngeenge to tungu eumbo, ou na yo okutungila kombada yalo ekuma leameno la dingilila eumbo alishe, opo kuha we omunhu, ndele to etele eumbo loye etimba lohonde.

9 “Ino kuna eembuto mbali da yoolokafana moshikunino shoye shomandjebele. Ngeenge owe shi ningi, keshe shimwe osho tashi di meembuto odo wa kuna, noiimati yoye aishe tai di moshikunino osho otai ka yapulilwa onhele iyapuki.

10 “Ino pululifa ongobe nondongi kondjoko imwe.

11 “Ino djala oshikutu sha longwa molududi leedi la lumbakanifwa mumwe noliina.

12 “Ou na okutula eenyemba dile keehuke nhee doshikutu osho to djala.

13 “Ngeenge omulumenhu okwa hombola omukulukadi nokwa nangala naye, ndele te mu tondo* 14 nokwe mu lundila kutya oku na elihumbato lii, ndele ta nyateke edina laye, ta ti: ‘Onda hombola omukainhu ou, ashike eshi nda nangala naye, inandi mona oumbangi ou tau ulike kutya ina ya nale momilele.’ 15 Xe nosho yo ina yokakadona oko ove na okuyandja oumbangi kovakulunhu ovo ve li koshivelo shoshilando, oo tau ulike kutya okakadona oko inaka ya nale momilele. 16 Xe yokakadona oko oku na okulombwela ovakulunhu voshilando, ta ti: ‘Onda yandja omonakadona wange komulumenhu ou a ninge omukulukadi waye, ashike okwe mu tonda,* 17 nokwe mu lundila kutya ke na elihumbato liwa, a ti: “Onda mona kutya omonakadona woye ke na oumbangi oo tau ulike kutya ina ya nale momilele.” Ou oumbangi oo tau ulike kutya omonakadona wange ina ya nale momilele.’ Opo nee ove na okuyala elapi moipafi yovakulunhu voshilando. 18 Ovakulunhu voshilando otava ka kufa omulumenhu oo, ndele tave mu pe outekuduliko. 19 Ove na oku mu futifa eesekeli* doshisilveri 100 te di yandje kuxe yokakadona, molwaashi omulumenhu oo okwa nyateka okakadona Okaisrael, notaka twikile okukala omukulukadi waye. Ita ka pitikwa nandenande e ka henge po ofimbo e na omwenyo.

20 “Ngeenge eendjovo odo odoshili, nokape na oumbangi oo tau ulike kutya okakadona oko inaka ya nale momilele, 21 ove na okweeta okakadona oko poshivelo sheumbo laxe, novalumenhu vomoshilando ove na oku ka dipaa nomamanya, molwaashi oka ninga oshinima shififa ohoni muIsrael, eshi ka ya moluhaelo* meumbo laxe. Onghee omu na okukufa mo osho shii mokati keni.

22 “Ngeenge omulumenhu okwa nangala nomukulukadi womulumenhu mukwao, aveshe ove na okudipawa, omulumenhu nosho yo omukainhu oo. Omu na okukufa mo osho shii muIsrael.

23 “Ngeenge okakadona oka valekwa komulumenhu umwe, ndele omulumenhu umwe vali te ka shakeneke moshilando nokunangala nako, 24 omu na oku va eta aveshe poshivelo shoshilando noku va dipaa nomamanya, molwaashi okakadona inaka kuwa ka mone ekwafo moshilando, nomulumenhu okwa fifa ohoni omukulukadi womulumenhu mukwao. Omu na okukufa mo owii keshe mokati keni.

25 “Ngeenge omulumenhu okwa shakeneke okakadona moixwa ka valekwa, ndele te ka dulu eenghono nokunangala nako, omulumenhu oo a nangala nokakadona oku na okudipawa oye aeke. 26 Ashike okakadona inamu ka ninga sha, molwaashi inaka nyona sha shoku ka dipaifa. Oshinima osho osha faafana ashike nomulumenhu a ponokela omulumenhu mukwao, ndele te mu* dipaa. 27 Nakunangala nokakadona oko ka valekwa okwe ka shakeneka moixwa, ndele taka kuu, ashike kapa li oo te ka amene.

28 “Ngeenge omulumenhu okwa shakeneke okakadona oko inaka ya nale momilele noinaka valekwa, ndele te ka kondjifa nokunangala nako, ndele tava monika, 29 omulumenhu oo a nangala nako oku na okuyandja eesekeli doisilveri 50 kuxe yokakadona, nokakadona oke na okuninga po omukulukadi waye. Molwaashi okwe ka fifa ohoni, ita pitikwa nandenande e ka henge po ofimbo e na omwenyo.

30 “Kape na omulumenhu a pitikwa a hombole po omukulukadi waxe, opo aha fife xe ohoni.*

23 “Omulumenhu oo a lutulwa, eshi omatondo aye a tyanghaulwa, ile oilyo yaye youlumenhu ya tetwa mo, ke na okuya meongalo laJehova.

2 “Omunhu oo a dalwa kondje yohombo ina pitikwa okuuya meongalo laJehova. Oludalo laye alishe, kutya nee epupi etimulongo, inali pitikwa okuya meongalo laJehova.

3 “Omuammoni, ile Omumoab, ina pitikwa okuya meongalo laJehova. Oludalo lavo, kutya nee epupi etimulongo, inali pitikwa okuya meongalo laJehova, 4 molwaashi inave mu kwafela oikulya nomeva, eshi mwa li tamu di muEgipiti, naashi va futa Bileam, omonamati waBeor, womuPetor shaMesopotamia, e mu finge.* 5 Ashike Jehova, Kalunga keni, okwa anya okupwilikina kuBileam. Ponhele yaasho, Jehova, Kalunga keni, okwa lundululila efingo menangeko noupuna leni, molwaashi Jehova, Kalunga keni, oku mu hole. 6 Onghee hano, monghalamwenyo yeni aishe inamu va kwafela va kale nombili, ile va hepuluke.

7 “Inamu tonda Omuedom, molwaashi oku li omumwaxo.

Inamu tonda Omuegipiti, molwaashi omwa li ovanailongo moshilongo shavo. 8 Epupi etitatu loludalo lavo otali dulu okuya meongalo laJehova.

9 “Ngeenge omwa ongo onhanda mu lwife ovatondi veni, omu na okuhenuka keshe osho shii.* 10 Ngeenge omulumenhu okwa kala ina koshoka, molwaashi ta di omaxu oludalo ofimbo a kofa, oku na okuya kondje yonhanda noke na okwaalukila mo. 11 Oku na okulikosha nomeva komatango, nota dulu okushuna monhanda, eshi etango tali ningine. 12 Omu na okuhoolola onhele ye likalekelwa* yokulikwafelela kondje yonhanda, naako oko mu na okuya. 13 Moilongifo yeni omu na okukala mu na okaxupulo. Ngeenge tamu ke likwafela kondje yonhanda, omu na okufa elambo nokaxupulo oko nokufufila onyata yeni. 14 Jehova, Kalunga keni, oku li mokati konhanda yeni, opo e mu xupife nokuyandja ovatondi veni momake eni. Onhanda yeni oi na okukala iyapuki, opo aha mone sha shififa ohoni mokati keni nokuha dje po punye.

15 “Kamu na okuyandja omupika komwene waye, ngeenge okwa faduka po omwene waye, ndele te uya kunye. 16 Ota dulu okukala ha di mokati keni monhele keshe oyo a hoolola okukala mushimwe shomoilando yeni, keshe opo a hala okukala. Kamu na okuungaunga naye nai.

17 “Hakakadona Okaisrael taka ningi ombwada,* nokape na omulumenhu Omuisrael e na okuninga ombwada. 18 Kamu na okutwala ofuto oyo ya futwa omukainhu ombwada, ile ofuto oyo ya futwa* omulumenhu ombwada* meumbo laJehova, Kalunga keni, opo mu wanife po eano, molwaashi aveshe ove li oshinima shitondifa kuJehova, Kalunga keni.

19 “Inamu futifa omumwaxo oishoshela, kutya nee oishoshela yoimaliwa, yoikulya, ile yakeshe osho tashi dulu okuyandjelwa oishoshela. 20 Otamu dulu okufutifa omunailongo oishoshela, ashike kamu na okufutifa omumwaxo oishoshela, opo Jehova, Kalunga keni, a nangeke noupuna oilonga yeni aishe medu omo tamu i mu ka kale.

21 “Ngeenge omwa ningi eano kuJehova, Kalunga keni, inamu ongaonga oku li wanifa po, molwaashi Jehova, Kalunga keni, okwa teelela mu li wanife po filufilu. Ngeenge hasho, otamu nyono. 22 Ngeenge omwa kala inamu ninga eano, itamu kala mu na etimba lenyono. 23 Ou na okudiinina eendjovo odo wa popya, nokuwanifa po osho wa ana nokanya koye shi li eyambo lehalo liwa kuJehova, Kalunga keni.

24 “Ngeenge owa i moshikunino shamukweni shomandjebele, oto dulu okulya omandjebele fiyo osheshi wa* kuta, ndele ku na okutula amwe moshikwatelwa u ye nao.

25 “Ngeenge owa i mepya lamukweni mu na oilya, oto dulu okupweya nomake oye oilya oyo ya pya, ndele ku na okuteta oilya yamukweni noshikashulifo.

24 “Ngeenge omulumenhu okwa hombola omukainhu, ndele omulumenhu oo ina hokwa vali omukainhu oo, molwaashi a mona sha shififa ohoni muye, oku na oku mu shangela ombapila yeteyohombo, ndele te i mu pe noku mu lekela mo meumbo laye. 2 Ngeenge okwa di mo meumbo laye, ota dulu okuya a ka hombolwe po komulumenhu umwe. 3 Ngeenge omulumenhu omutivali okwe mu tondo,* noku mu shangela ombapila yeteyohombo, ndele te i mu pe, noku mu lekela mo meumbo laye, ile ngeenge omulumenhu omutivali oo e mu hombola okwa fi, 4 omushamane waye wotete oo e mu lekela ita ka pitikwa e mu hombole po vali konima eshi a nyatekwa, osheshi osho oshinima shitondifa kuJehova. Inamu nyona sha medu olo Jehova, Kalunga keni, te mu pe li li efyuululo.

5 “Ngeenge omulumenhu opo a hombola, ke na okuya metangakwaita, ile okupewa oinakuwanifwa imwe. Ina pewa oinakuwanifwa nandenande oule womudo umwe, noku na okukala meumbo a hafife omukulukadi waye.

6 “Kape na oo e na okukufa ko oshini shokukweyela, ile emanya lasho lokombada i li eshilipaleko lokushunifa omukuli,* kungaho owa kwata ko omunhu nomwenyo* e li eshilipaleko.

7 “Ngeenge omunhu okwa kwata po ombabyona umwe* womovamwaxe Ovaisrael, ndele ta ungaunga naye nai noku mu landifa po, oo e mu kwata po ombabyona oku na okufya.

8 “Ngeenge opa holoka oudu woshilundu,* lungameni mu ninge ashishe osho Ovalevi ovo ve li ovapristeri tave mu lombwele. Lungameni mu ninge filufilu ashishe osho nde va lombwela. 9 Dimbulukeni osho Jehova, Kalunga keni, a ningila Miriam, eshi mwa li mondjila tamu di muEgipiti.

10 “Ngeenge owa pe mukweni omukuli woshinima sholudi keshe, ku na okuya meumbo laye u ke mu kufe osho ta yandje shi li eshilipaleko. 11 Ou na okufikama pondje, nomunhu oo wa pa omukuli oku na okweeta pondje osho ta yandje shi li eshilipaleko. 12 Ngeenge omunhu oo oku na omhumbwe, ku na oku ka nangala noshinima osho e ku pa shi li eshilipaleko. 13 Ou na oku mu shunifila filufilu osho e ku pa shi li eshilipaleko diva ngeenge etango la ningine, opo nee ota ka nangala noshikutu shaye, note ke ku nangeka noupuna; kungaho, Jehova, Kalunga keni, ote ke ku tala ko u li omuyuki omolwoshinima osho wa ninga.

14 “Ino kengelela omunailonga oo e na omhumbwe nokwa hepa, kutya nee oumwe womovamwaxo, ile omunailongo oo e li medu leni, meni loilando* yeni. 15 Ou na oku mu pa ondjabi yaye efiku olo ofimbo etango inali ningina, molwaashi oku na omhumbwe, nonghalamwenyo yaye oye likolelela kondjabi yaye. Ngeenge hasho, ote ke ku kuwila kuJehova noto ka kala u na etimba.

16 “Ovashamane kave na okudipawa omolwoshinima osho ovana va ninga, nounona kave na okudipawa omolwoshinima osho ooxe va ninga. Omunhu oku na ashike okudipawa omolwenyono laye mwene.

17 “Inamu pengifa etokolo lovanailongo, ile lounona ovo vehe na ooxe,* noinamu kufa ko oikutu yovafiyekadi i li eshilipaleko lokushunifa omukuli.* 18 Dimbulukeni kutya nanye omwa li ovapika medu laEgipiti, na Jehova, Kalunga keni, okwe mu xupifa, eshi mwa li mo. Nomolwaasho handi mu lombwele mu ninge ngaha.

19 “Ngeenge tamu teya oikunomwa yeni momapya eni, ndele tamu dimbwa oshipandi shimwe mepya, inamu shuna mu ke shi tale mo, omu na oku shi efa shi ninge shovanailongo, shounona ovo vehe na ooxe noshovafiyekadi, opo Jehova, Kalunga keni, a nangeke noupuna ashishe osho tamu ningi.

20 “Ngeenge omwa likola omiti deni deemono, inamu shuna ko vali mu ka likole koitai yado. Eemono odo da xupa ko otadi ningi dovanailongo, dounona ovo vehe na ooxe nosho yo dovafiyekadi.

21 “Ngeenge omwa likola omandjebele moikunino yeni yomandjebele, inamu shuna mo vali mu ka likole oo a xupa mo. Omandjebele oo a xupa mo oku na okuninga ovanailongo, ounona ovo vehe na ooxe nosho yo ovafiyekadi. 22 Dimbulukeni kutya omwa li ovapika medu laEgipiti. Nomolwaasho handi mu lombwele mu ninge ngaha.

25 “Ngeenge pa holoka oupyakadi pokati kovanhu, ove na okuya kovatokoli, novatokoli ove na oku va tokola, nove na okupopya kutya oo ehe na ondjo omuyuki nokuyelifa kutya olyelye e na ondjo. 2 Ngeenge oo e na ondjo okwa wana okudengwa, omutokoli oku na oku mu lombwela a nangale eombe, nota ka dengwa moipafi yaye. Eengola odo ta dengwa odi na okukala da yeleka oilonga yowii oyo a longa. 3 Ota dulu oku mu dengififa eengola da fika po 40, ashike kadi na okukoyelela po. Ngeenge okwa twikile oku mu dengififa eengola di dulife po, omumwaxo ota ka kala oshinima shififa ohoni momesho eni.

4 “Ino manga ongobe komulungu ngeenge tai xu oilya.

5 “Ngeenge ovalumenhu ovamwainafana ova kala hava di moshitukulwa shimwe, ndele umwe womuvo ta fi ehe na omonamati, omukulukadi wanakufya ke na okuhombolwa po komunhu ehe fi womepata olo. Omulumenhu omumwaina wanakufya oku na okuya komukulukadi oo, noku mu kufa po a ninge omukulukadi waye, ndele ta wanifa po oshinakuwanifwa shaye shokuhombola po omukulukadi oo a fiwa po kumumwaina. 6 Oshiveli shomukulukadi oo oku na oku shi lukila mumwaina oo a fya, opo edina laye liha kane mo muIsrael.

7 “Ngeenge omulumenhu ina hala okuhombola po omufiyekadi wamumwaina, omufiyekadi oo oku na okuya kovakulunhu koshivelo shoshilando, ndele ta ti: ‘Omumwaina womushamane wange ina hala okukaleka po edina lamumwaina muIsrael. Ina hala okuwanifa po oshinakuwanifwa shaye shokuhombola nge po, ndi li omufiyekadi wamumwaina.’ 8 Ovakulunhu voshilando ove na oku mu ifana, ndele tava popi naye. Ngeenge okwa twikile okupopya kutya: ‘Inandi hala oku mu hombola po,’ 9 omufiyekadi wamumwaina oku na okuya puye moipafi yovakulunhu voshilando, ndele te mu dula olukaku komhadi yaye, noku mu fiila omate moshipala, ndele ta ti: ‘Osho osho shi na okuningilwa omulumenhu oo ita kaleke po oukwaneumbo wamumwaina.’ 10 Konima yaasho, edina loukwaneumbo waye* muIsrael otali ka shiivika li li ‘Eumbo laao a dulwa olukaku.’

11 “Ngeenge ovalumenhu vavali tava lu, ndele omukulukadi ta i po a ka amene omushamane waye kwaao te mu denge nokulovelela neke laye, ndele ta kwata omulumenhu oo ehe fi waye koilyo yoludalo, 12 ou na okuteta ko eke laye. Ku* na oku mu fila onghenda.

13 “Ku na okukala u na omamanya avali okuyeleka ondjudo a yoolokafana mondjato yoye, limwe ola kula, nalimwe olinini. 14 Meumbo loye ino kala u na mo oikwatelwa ivali yokuyeleka ya yoolokafana,* shimwe osha kula, nashimwe oshinini. 15 Ou na okukala u na oshiyelekifo shondjudo sha yuka noshi li paushili, noshikwatelwa shokuyeleka sha yuka noshi li paushili, opo u ka kale nomwenyo mule medu olo Jehova, Kalunga keni, te mu pe. 16 Osheshi omunhu keshe ehe fi omuyuki, oo ta longo oilonga oyo, oku li oshinima shitondifa kuJehova, Kalunga keni.

17 “Dimbuluka osho Ovaamalek ve mu ningila, eshi mwa li mondjila tamu di kuEgipiti, 18 nghee va li ve mu shakeneka mondjila, ndele tava ponokele aveshe ovo va li konima yoye, ovo va li tava ende kanini, eshi mwa li mwa loloka nomuhe na eenghono. Kava li va tila Kalunga. 19 Ngeenge Jehova, Kalunga keni, e mu tulumukifa kovatondi veni aveshe ovo ve mu dingilila medu olo Jehova, Kalunga keni, te mu pe mu kale mo, li li efyuululo, omu na okudima po Ovaamalek, opo vaha dimbulukiwe vali kombada yedu. Inamu shi dimbwa nandenande.

26 “Ngeenge omwa i medu olo Jehova, Kalunga keni, te mu pe li li efyuululo, ndele tamu li kwata ko nokukala mulo, 2 omu na okukufa imwe yomoilikolomwa* aishe yomomapya eni, oyo ya pya tete, oyo tamu ka kufa medu olo Jehova, Kalunga keni, te mu pe noku i tula moshimbale, ndele tamu i konhele oyo Jehova, Kalunga keni, a hoolola ku fimanekelwe edina laye. 3 Ou na okuya komupristeri, oo ta ka kala ta longo pefimbo opo, noku mu lombwela kutya: ‘Nena ohandi lombwele Jehova, Kalunga koye, kutya onde uya medu olo Jehova a anena ootatekulululwa kutya ote li tu pe.’

4 “Omupristeri ota ka kufa oshimbale momake oye noku shi tula popepi noaltari yaJehova, Kalunga koye. 5 Opo nee ou na okupopya moipafi yaJehova, Kalunga koye, kutya: ‘Tate okwa li omweendaendi* Omuaram, nokwa ya kuEgipiti pamwe novaneumbo laye vanini, naako oko a kala ha di e li omunailongo, ashike oko okwa ningila ko oshiwana shinene, oshinaenghono noshihapu unene. 6 Ovaegipiti ova ungaunga nafye nai, ve tu fininika, nove tu hepeka nonyanya, eshi twa li ovapika. 7 Onghee otwa hovela okukonga ekwafo kuJehova, Kalunga kootatekulululwa, na Jehova okwe tu uda nokwa mona okuhepekwa, omaudjuu etu nokufininikwa kwetu. 8 Xuuninwa, Jehova okwe tu kufa mo muEgipiti neke li na eenghono, nokwooko kwa yeluka, noilonga itilifa, nomadidiliko nosho yo noikumwifilonga. 9 Onghee okwe tu eta konhele ei nokwe tu pa onhele ei, edu tali kunguluka omashini nomaadi eenyiki. 10 Paife onda eta oilikolomwa, oyo ya pya tete, yomedu olo Jehova a pa nge.’

“Oshimbale osho ou na oku shi tula komesho yaJehova, Kalunga koye, nokutwa eengolo moipafi yaJehova, Kalunga koye. 11 Opo nee ove noukwaneumbo woye otamu ka hafela ashishe osho Jehova, Kalunga keni, e mu pa, ove nOvalevi nosho yo ovanailongo ovo ve li mokati keni.

12 “Ngeenge omwa mane okwoongela oshitimulongo ashishe shoilikolomwa yeni momudo omutitatu, omudo woshitimulongo, omu na oku shi pa Ovalevi, ovanailongo, ounona ovo vehe na ooxe* novafiyekadi, notava ka lya tava kuta moilando* yeni. 13 Opo nee oto ka popya moipafi yaJehova, Kalunga koye, kutya: ‘Onda kufa mo oshitukulwa shiyapuki meumbo lange, nonde shi yandja kOvalevi, kovanailongo, kounona ovo vehe na ooxe nokovafiyekadi, ngaashi ashike wa lombwela nge. Inandi nyona, ile ndi lipwililikile oipango yoye. 14 Inandi shi lya ofimbo nda nyika oluhodi, ile ndi kufe mo sha, eshi nda li inandi koshoka, ile ndi yandje mo sha omolwoonakufya. Onda dulika kondaka yaJehova, Kalunga kange, nonda ninga ashishe osho wa lombwela nge. 15 Onghee tala pedu okudja monhele yoye iyapuki, eulu, nokunangeka noupuna oshiwana shoye shaIsrael nosho yo edu olo we tu pa, ngaashi ashike wa anena ootatekulululwa, edu tali kunguluka omashini nomaadi eenyiki.’

16 “Nena eli Jehova, Kalunga koye, ote ku lombwele u diinine omaufomhango nomatokolo aa. Ou na oku a diinina noku a tula moilonga, to shi ningi nomutima woye aushe nosho yo nomwenyo* woye aushe. 17 Nena omwa uda eendjovo odo Jehova a popya kutya ota ningi Kalunga keni, ngeenge omwa kala tamu ende meendjila daye nokudiinina omaufomhango aye, oipango yaye nosho yo omatokolo aye, nongeenge omwa kala tamu pwilikine kondaka yaye. 18 Nena Jehova okwa uda yo eendjovo odo mwa popya kutya otamu ningi oshiwana shaye, ovanhu vaye ve likalekelwa,* ngaashi e mu udanekela, nonokutya otamu ka diinina oipango yaye aishe. 19 Okwa ti yo ote ke mu ningifa mu kale mu dule oiwana ikwao aishe oyo a shita, te mu tange, te mu fimaneke noku mu pa oshinge, eshi tamu ulike kutya omu li ovanhu vayapuki kuJehova, Kalunga keni, ngaashi ashike a udaneka.”

27 Moses pamwe novakulunhu vaIsrael okwa lombwela ovanhu, ta ti: “Diinineni oipango aishe oyo handi mu lombwele nena. 2 Mefiku olo tamu tauluka omulonga waJordan, mwa finda medu olo Jehova, Kalunga keni, te mu pe, dikeni omamanya makula, ndele tamu a kolonga.* 3 Ngeenge mwa tauluka, komamanya oo shangeni ko eendjovo adishe odo di li mOmhango ei, opo mu dule okuya medu olo Jehova, Kalunga keni, te mu pe, edu tali kunguluka omashini nomaadi eenyiki, ngaashi ashike Jehova, Kalunga kooxokulululwa, e mu udanekela. 4 Ngeenge mwa tauluka omulonga waJordan, omu na okudika omamanya oo komhunda yaEbal, ndele tamu a kolonga,* ngaashi ashike handi mu lombwele nena. 5 Omu na yo okutungila ko Jehova, Kalunga keni, oaltari yomamanya. Omamanya oo kamu na oku a teta noilongifo ya longwa moshivela shilaula. 6 Oaltari yaJehova, Kalunga keni, aishe omu na oku i tunga nomamanya, ndele tamu yambele ko omaxwikiloyambo aJehova, Kalunga keni. 7 Omu na okuyamba omayambo oukumwe, ndele tamu a lile oko, notamu ka kala mwa hafa moipafi yaJehova, Kalunga keni. 8 Komamanya oo shangeni ko eendjovo adishe dOmhango ei da yela nawa.”

9 Opo nee Moses novapristeri Ovalevi ova popya nOvaisrael aveshe, tava ti: “Israel, ngungumana nokupwilikina. Nena eli omwa ninga oshiwana shaJehova, Kalunga keni. 10 Omu na okupwilikina kondaka yaJehova, Kalunga keni, nokudulika koipango yaye nokomaufomhango aye, oo handi mu lombwele nena.”

11 Moses okwa lombwela ovanhu mefiku olo, ta ti: 12 Omapata aa taa shikula otaa ka kala ofika komhunda yaGerisim a nangeke noupuna ovanhu, ngeenge mwa tauluka omulonga waJordan: Simeon, Levi, Juda, Isaskar, Josef naBenjamin. 13 Omapata aa taa shikula otaa ka fikama komhunda yaEbal nokuhepaulula efingo: Ruben, Gad, Asser, Sebulon, Dan naNaftali. 14 Ovalevi otava ka nyamukula ovalumenhu aveshe vomuIsrael nondaka yopombada tava ti:

15 “‘Omufingwa omunhu oo ha hongo oihongwafano, ile ha hambula oihongwafano moivela,* oshinima osho shitondifa kuJehova, onghulungu oyo hai longo oilonga yokomake* nohe i holeke.’ (Opo nee ovanhu aveshe otava ka nyamukula tava ti: ‘Amen!’*)

16 “‘Omufingwa omunhu oo ha ungaunga naxe, ile naina nodino.’ (Opo nee ovanhu aveshe otava ka tya: ‘Amen!’)

17 “‘Omufingwa omunhu oo ta lundulula edidiliko longaba yamushiinda shaye.’ (Opo nee ovanhu aveshe otava ka tya: ‘Amen!’)

18 “‘Omufingwa omunhu oo ta ningifa omupofi a puke mo mondjila yaye.’ (Opo nee ovanhu aveshe otava ka tya: ‘Amen!’)

19 “‘Omufingwa omunhu oo ha pengifa etokolo lovanailongo, lounona ovo vehe na ooxe,* ile lovafiyekadi.’ (Opo nee ovanhu aveshe otava ka tya: ‘Amen!’)

20 “‘Omufingwa omunhu oo ta nangala nomukulukadi waxe, osheshi okwa fifa xe ohoni.’ (Opo nee ovanhu aveshe otava ka tya: ‘Amen!’)

21 “‘Omufingwa omunhu oo ta nangala noshinamwenyo keshe.’ (Opo nee ovanhu aveshe otava ka tya: ‘Amen!’)

22 “‘Omufingwa omunhu oo ta nangala nomumwainakadona, a dalwa kuxe, ile kuina.’ (Opo nee ovanhu aveshe otava ka tya: ‘Amen!’)

23 “‘Omufingwa omunhu oo ta nangala nainamweno.’ (Opo nee ovanhu aveshe otava ka tya: ‘Amen!’)

24 “‘Omufingwa omunhu oo ta nangele nokudipaa mushiinda shaye.’ (Opo nee ovanhu aveshe otava ka tya: ‘Amen!’)

25 “‘Omufingwa omunhu oo ha tambula ombubo, opo a dipae omunhu oo ehe na etimba.’* (Opo nee ovanhu aveshe otava ka tya: ‘Amen!’)

26 “‘Omufingwa omunhu oo iha diinine eendjovo dOmhango ei noku di wanifa po.’ (Opo nee ovanhu aveshe otava ka tya: ‘Amen!’)

28 “Ngeenge omwa pwilikine shili kondaka yaJehova, Kalunga keni, mokuwanifa po filufilu oipango yaye aishe oyo handi mu lombwele nena eli, Jehova, Kalunga keni, ote ke mu ningifa filufilu mu kale mu dule oiwana aishe oyo i li kombada yedu. 2 Omanangeko noupuna aeshe aa otae ke uya kunye notae mu hange, molwaashi omwa kala tamu pwilikine kondaka yaJehova, Kalunga keni:

3 “Otamu ka nangekwa noupuna moshilando nosho yo momudingonoko woshilando.

4 “Ovana voye,* oiimati yomedu leni, osho sha dalwa koufita woye, outana veengobe doye nosho yo oudjona veedi doye, otai ka nangekwa noupuna.

5 “Oshimbale shoye nolwiyo loye lokulungila olumbololo otai ka nangekwa noupuna.

6 “Oto ka nangekwa noupuna eshi to uya mo, noto ka nangekwa noupuna eshi to di mo.

7 “Jehova ota ka ningifa ovatondi voye ovo tave ku lwifa va findwe moipafi yoye. Otave ke ku ponokela okudja kombinga imwe, ndele tave ke ku faduka po va finda keembinga heyali da yoolokafana. 8 Jehova ota ka nangeka noupuna eemhungulilo doye noilonga yoye aishe, note ke ku nangeka noupuna shili medu olo Jehova, Kalunga koye, te ku pe. 9 Jehova ote ke mu ninga oshiwana shaye shiyapuki, ngaashi ashike e mu anena, molwaashi omwa kala tamu diinine oipango yaJehova, Kalunga keni, nomwa enda meendjila daye. 10 Ovanhu aveshe kombada yedu otava ka mona kutya omwa kala tamu ifanwa nedina laJehova, notava ka kala ve mu tila.

11 “Jehova ote ke mu ningifa mu dale ounona vahapu, mu kale mu na oimuna ihapu noilikolomwa ihapu medu olo Jehova a anena ooxokulululwa kutya ote li mu pe. 12 Jehova ote ke mu yeululila eemhungulilo daye diwa, eulu, opo odula i loke medu leni pefimbo layo, nota ka nangeka noupuna keshe osho tamu ningi. Otamu ka yandja eendjo koiwana ihapu, ashike nye itamu ka pumbwa oku i ehela. 13 Ngeenge omwa kala hamu dulika koipango yaJehova, Kalunga keni, oyo handi mu lombwele nena mu diinine nomu dulike kuyo, Jehova ote ke mu ninga omutwe, ndele hamushila, notamu ka kala pombada, ndele hapedu. 14 Inamu puka mo meendjovo adishe odo handi mu lombwele nena, mu ye kolulyo, ile kolumosho, mu ka shikule ookalunga vamwe, opo mu va longele.

15 “Ndele ngeenge itamu pwilikine kondaka yaJehova, Kalunga keni, mokudiinina filufilu oipango yaye aishe neenghedimhango daye adishe odo handi mu lombwele nena, omafingo aeshe aa otae uya kunye notae mu hange:

16 “Otamu ka kala mwa fingwa moshilando nosho yo momudingonoko woshilando.

17 “Oshimbale sheni nolwiyo leni lokulungila olumbololo otai ka fingwa.

18 “Ovana voye,* oiimati yomedu leni, outana veengobe doye nosho yo oudjona veedi doye otai ka fingwa.

19 “Otamu ka fingwa eshi tamu uya mo, notamu ka fingwa eshi tamu di mo.

20 “Jehova ote ke mu tumina efingo, engwangwano nehandukilo mukeshe osho tamu ningi, fiyo osheshi mwa hanaunwa po, notamu ka xulifwa po diva omolwoilonga yeni youkolokoshi naashi mwe mu fiya po.* 21 Jehova ote ke mu etela omukifi, fiyo osheshi e mu hanauna po filufilu medu omo tamu i mu ka kale. 22 Jehova ote mu tumine o-TB, oshidu shidjuu, oidinda, oupyu wa londa pombada omolwoshidu, eongamukonda nomhepo ipyu, noimeno yeni otai ka kukuta. Oinima oyo otai ke mu hepeka fiyo mwa hanauka po filufilu. 23 Eulu otali ka ninga ongopolo, nedu otali ka ninga oshivela shilaula. 24 Odula yomedu leni, Jehova ote ke i ninga ombudu, nondwi oyo tai ke mu loka okudja meulu fiyo osheshi mwa hanaunwa po. 25 Jehova ote ke mu ningifa mu findwe moipafi yovatondi veni. Otamu ke va ponokela okudja kombinga imwe, ashike otamu ke va faduka po mwa finda keembinga heyali da yoolokafana; otamu ka tilifa omauhamba aeshe okombada yedu. 26 Omidimba deni otadi ka ninga eendja deedila adishe dokeulu noinamwenyo yokombada yedu, nokape na oo te ke i taataa po.

27 “Jehova ote ke mu etela oitumba ngaashi oyo ya li i shiivike muEgipiti, oidinda, oudu woshipa neembulwa tadi nyuwa, noitamu ka dula okuhakula omikifi odo. 28 Jehova ote ke mu etela eenghwengu, oupofi nengwangwano.* 29 Otamu ka enda tamu pamhadala ngaashi omupofi ta pamhadala momilaulu, noitamu ka pondola nandenande mukeshe eshi tamu ningi, otamu ka kala tamu kengelelwa nokunyekwa, ndele kape na oo te mu amene. 30 Oto ka valeka omukainhu, ndele omulumenhu umwe te mu kwata onghonga. Oto ka tunga eumbo, ndele ito ka kala mo. Oto ka kokola oshikunino shomandjebele, ndele ito ke shi longa. 31 Ongobe yoye yomhedi otai ka tomwa moipafi yoye, ashike ito ka lya nandenande ombelela yayo. Ondongi yoye otai ka shingwa po moipafi yoye, ashike ito i alulilwa. Odi yoye otai ka pewa ovatondi voye, ashike kape na oo te ke ku amena. 32 Ovanamati novanakadona voye otava ka yandjwa kovanhu vamwe moipafi yoye, noto ka kala alushe we va djuulukwa, ashike ito ka dula okuninga po sha. 33 Oiimati yomedu leni noilikolomwa aishe oyo mwa longa otai ka liwa po kovanhu ovo muhe shii, notamu ka nyekwa alushe nokufininikwa. 34 Osho tamu ka mona nomesho eni otashi ke mu ifa eenghwengu.

35 “Jehova ote ke ku etela oululume noitumba, oyo itai dulu okuhakulwa, meengolo nomomaulu oye, okudja koshi yomhadi fiyo okoshikoroni osho shi li komutwe woye. 36 Jehova ote ke mu lekela pamwe nohamba oyo mwe lihoololela mu ye koshiwana osho nye nooxokulululwa muhe shii, naako otamu ka longela ko ookalunga, ookalunga voiti novomamanya. 37 Ngeenge omwa fiki koitukulwa oko Jehova te mu telaatele, oinima oyo mwa ningilwa otai ka tilifa ovanhu aveshe vaako, notai ke va ningifa ve mu yole* nove mu sheke.

38 “Oto ka kuna eembuto dihapu mepya, ashike oto ka teya shinini, molwaashi oshipaxu otashi ke i lya po. 39 Oto ka kokola nokulonga oikunino yomandjebele, ndele ito ka nwa omaviinyu noito kufa mo sha, molwaashi otai ka lika po kepuka. 40 Moshitukulwa sheni ashishe otamu ka kala omiti deemono, ndele itamu ka vava omaadi ado, molwaashi eemono otadi ka wa ko. 41 Otamu ka dala ounona, ovamati noukadona, ashike itava kala veni, molwaashi otava ka ya moukwatwa. 42 Oshihomo shoipuka* otashi ka lya po omiti deni adishe noilikolomwa yomedu leni. 43 Omunailongo oo e li mokati keni ota ka kala e na eenghono dihapu unene, ofimbo nye tamu kanifa eenghono odo mwa li mu na. 44 Ote ke mu pa eendjo, ashike nye itamu ke mu pa sha. Ota ka ninga omutwe, ofimbo nye tamu ka ninga omushila.

45 “Omafingo aeshe aa otae ke uya kunye filufilu, tae mu shikula noku mu hanga fiyo osheshi mwa hanaunwa po, ngeenge itamu pwilikine kondaka yaJehova, Kalunga keni, mokudiinina oipango yaye nosho yo eenghedimhango daye odo e mu lombwela. 46 Otaa ka twikila okukala punye nopoludalo leni e li edidiliko laalushe nosho yo oshinima shikumwifi, 47 molwaashi inamu longela Jehova, Kalunga keni, mwa nyakukwa nosho yo nomitima di na ehafo, eshi mwa li mu na oinima aishe oyo ihapu. 48 Jehova ota ka tuma ovatondi veni ve mu lwife, notamu ke va longela ofimbo mwa fya ondjala, mwa fya enota, mu na onghai nokamu na eshi mu na. Ota ka tula ondjoko yoshivela shilaula keefingo deni fiyo osheshi e mu xulifa po.

49 “Jehova ote ke mu tumina oshiwana shokokule tashi di kombinga ikwao yedu; otashi ke mu ponokela ngaashi onhwa, nelaka lasho itamu ke li uda. 50 Oshiwana oshikwanyanya osho itashi ka kala shi na ko nasha nomukulunhu, ile shi file onghenda okaana. 51 Otashi ka lya po oimuna yeni noiimati yomedu leni fiyo osheshi mwa xulifwa po. Itashi ke mu xupifila po nandenande oilya, omaviinyu mape, ile omaadi, onhana, ile odjona, fiyo osheshi she mu hanauna po. 52 Otashi ke mu ponokela noku mu idilila moilando* yeni aishe, medu leni alishe, fiyo osheshi omakuma eni malemale, oo mwe lineekela, a teka po. Otashi ke mu ponokela filufilu moilando yeni aishe, medu leni alishe olo Jehova, Kalunga keni, e mu pa. 53 Opo nee otamu ka lya po ovana veni,* ombelela yovanamati veni noyovanakadona veni ovo Jehova, Kalunga keni, e mu pa, omolwonghalo idjuu oyo ya etifwa po keponokelo lovatondi veni nosho yo oupyakadi oo ve mu etela.

54 “Nokuli nomulumenhu oo e na onghenda nomuhekeleki ita ka fila onghenda omumwaxe, ile omukulukadi waye omuholike, ile ovanamati vaye ovo va xupa po. 55 Ita ka tukulilafana navo ombelela yovanamati vaye oyo ta ka lya, molwaashi ke na vali eshi e na omolwonghalo idjuu oyo ya etifwa po keponokelo lovatondi veni nosho yo oupyakadi oo ve mu etela moilando yeni. 56 Omukainhu oo e na onghenda nomuhekeleki mokati keni, oo ina diladila nale okweenda kolupadi, molwaashi okwa lundukifwa, ita ka fila onghenda omushamane waye omuholike, ile omonamati waye, ile omonakadona waye, 57 nokuli nomashe oo a dja medimo laye nosho yo ounona ovo a dala ote ke va lya po meholeko omolwonghalo idjuu oyo ya etifwa po keponokelo lovatondi veni nosho yo oupyakadi oo ve mu etela moilando yeni.

58 “Ngeenge itamu diinine eendjovo adishe domOmhango ei, odo da shangwa membo eli, noitamu tila edina laJehova, Kalunga keni, olo la tumbala nola fimanenena, 59 Jehova ote ke mu etela omahandukilo a kwata moiti, nye pamwe noludalo leni, te ke mu etela omahandukilo manene oo itaa dulu okulididimikilwa, nomikifi da kwata moiti odo tadi ke mu hepeka. 60 Ote ke mu etela vali omikifi adishe odo mwa li hamu tila muEgipiti, noitadi ke mu efa nandenande. 61 Natango, Jehova ote ke mu etela omikifi nomahandukilo aeshe oo inaa shangwa membo lOmhango ei fiyo osheshi mwa xulifwa po. 62 Nonande omwa hapupala ngaashi eenyofi dokeulu, ovanini elela vomunye tava ka xupa po, molwaashi inamu pwilikina kondaka yaJehova, Kalunga keni.

63 “Ngaashi ashike Jehova a li a hafela oku mu punapalifa noku mu hapupalifa, Jehova osho yo ta ka hafela oku mu hanauna po noku mu xulifa po, notamu ka tewa mo medu olo mu li pokuya mulo.

64 “Jehova ote ke mu lihanifila mokati koiwana aishe, okudja komunghulo umwe wedu fiyo okomunghulo mukwao wedu, notamu ka longela ko ookalunga vamwe voiti novomamanya, ovo nye nooxokulululwa muhe shii. 65 Itamu ka kala mu na ombili mokati koiwana oyo, noitamu ka kala mu na onhele yokutulumukifa eemhadi deni. Ponhele yaasho, Jehova ote ke mu ningifa mu kale mu na oshisho shokomutima, ta ka ningifa omesho eni a ende taa twika note ke mu ningifa mu kale mu udite mwa ekelwashi.* 66 Eemwenyo deni otadi ka kala monghuwo i na onghambe, notamu ka kala mwa tila oufiku nomutenya; otamu ka kala mwa limbililwa shi na sha nexupifo leni. 67 Pefimbo longula otamu ka tya: ‘Ngeno okwa li okonguloshi!’ nefimbo lokonguloshi otamu ka tya, ‘Ngeno okwa li ongula!’ omolwoutile oo tau ka kala momitima deni nosho yo osho tamu ka mona nomesho eni. 68 Jehova ote ke mu shunifa filufilu kuEgipiti noskepa, nondjila oyo nde mu lombwela kutya: ‘Itamu ke i mona vali,’ naako otamu ke lilandifa po kovatondi veni mu li ovapika ovalumenhu novakainhu, ashike kape na oo te ke mu landa po.”

29 Edi eendjovo dehangano olo Jehova a lombwela Moses a ninge nOvaisrael medu laMoab, tali wedwa kehangano olo Kalunga a ninga navo puHoreb.

2 Opo nee Moses okwa ongaleka Ovaisrael aveshe, ndele ta ti kuvo: “Omwa mona ashishe osho Jehova a ninga moipafi yeni medu laEgipiti, osho a ningila Farao novapiya vaye aveshe nosho yo edu laye alishe, 3 omatokolo* manene oo mwa mona nomesho eni, omadidiliko oo manene nosho yo oikumwifilonga. 4 Ashike Jehova ine mu pa omutima mu ude ko, omesho mu mone ko, nomatwi mu ude ko fiyo okunena. 5 ‘Eshi nda kala handi mu wilike eedula 40 mombuwa, oikutu yeni inai kulupa, neenghaku deni inadi kulupa. 6 Inamu lya oikulya noinamu nwa omaviinyu, ile oshikolwifa keshe, opo mu shiive kutya Aame Jehova, Kalunga keni.’ 7 Opo nee omwe uya konhele ei, na Sihon, ohamba yaHesbon, nosho yo Og, ohamba yaBasan, ove uya oku tu shakeneka molwoodi, ashike otwe va finda. 8 Konima yaasho, otwa kufa ko edu lavo, ndele hatu li yandje kOvaruben, kOvagad nosho yo ketata lepata laManasse li li efyuululo. 9 Onghee hano, diinineni eendjovo dehangano eli, nokudulika kudo, opo keshe osho tamu ningi shi mu endele nawa.

10 “Nena eli, amushe omwa fikama moipafi yaJehova, Kalunga keni, omitwe domapata eni, ovakulunhu veni, ovaleli veni, Ovaisrael aveshe, 11 ovana veni, ovakulukadi veni nosho yo ovanailongo veni ovo ve li mokati keenhanda deni, okudja kwaao he mu tyavele oikuni fiyo okwaao he mu tekele omeva. 12 Omu li apa mu ninge eano lokukala oshitukulwa shehangano laJehova, Kalunga keni, ehangano olo Jehova, Kalunga keni, ta ningi nanye nena, 13 opo e mu ninge oshiwana shaye nena, naye ota ka ninga Kalunga keni, ngaashi a li e mu udanekela, naashi a anena ooxokulululwa, Abraham, Isak naJakob.

14 “Ehangano neano eli itandi li ningi nanye amuke, 15 ndele ohandi li ningi yo pamwe naavo va fikama apa pamwe nafye nena eli moipafi yaJehova, Kalunga ketu, nosho yo ovo vehe li pamwe nafye nena. 16 (Osheshi nye omu shi shii nawa, eshi twa li hatu di medu laEgipiti naashi twa pita mokati koiwana ya yoolokafana molweendo letu. 17 Omwa li yo hamu mono oinima yavo itondifa nosho yo oikalunga yavo itondifa* yoiti noyomamanya, yoshisilveri noyoingoli, oyo ya li mokati kavo.) 18 Lungameni, opo nena eli mokati keni muha kale omulumenhu, ile omukainhu, oukwaneumbo, ile epata, ovo omitima davo da amuka ko kuJehova, Kalunga ketu, noku ka longela ookalunga vomoiwana oyo, opo mokati keni muha kale omudi oo tau yandje oiimati i na oudiyo nosho yo ilula.

19 “Ngeenge umwe okwa udu eendjovo deano olo, ndele te linenepeke momutima waye, ta ti: ‘Itandi ka hangwa koupyakadi nonande ondi twikile okuninga keshe osho nda hala okuninga,* nokushikula omutima wange,’ nokweetifa ehanauno lakeshe shimwe* osho shi li momudingonoko waye omolweenghatu daye, 20 Jehova ita ka kala a hala oku mu dimina po. Ponhele yaasho, Jehova ota ka handukila omulumenhu oo nehandu laye linene. Nefingo alishe olo la shangwa membo eli otali ke uya kombada yaye filufilu, na Jehova ota ka xulifa po filufilu edina laye kombada yedu. 21 Jehova ote ke mu yoolola momapata aeshe aIsrael, netokolo otali ke mu hanga, metwokumwe nefingo alishe li na sha nehangano olo la shangwa membo eli lOmhango.

22 “Epupi lomonakwiiwa, ovana veni ovo tave ke mu shikula nosho yo ovanailongo ovo va dja koshilongo shokokule, otava ka mona omahandukilo oo Jehova a tuma medu olo. 23 Okwa tuma osulfuri, omongwa nomundilo, opo medu lasho alishe muha kunwe, muha mene sha, ile muha twiyuke oimeno, ngaashi a hanauna po Sodom naGomorra, Adma naSeboim, oyo Jehova a hanauna po omolwehandu laye linene. 24 Ovana veni, ovanailongo nosho yo oiwana aishe otai ka tya: ‘Omolwashike Jehova a ningila ngaha edu eli? Oshike sha etifa ehandu eli linene?’ 25 Opo nee otava ka tya: ‘Omolwaashi ova efa po ehangano laJehova, Kalunga kooxekulululwa, olo a ninga navo eshi e va kufa mo medu laEgipiti. 26 Ndele ova ya nova longela ookalunga vamwe, noku ve linyongamena, ookalunga ovo vehe shii noine va pitika ve va longele.* 27 Opo nee Jehova okwa handukila neenghono edu olo moku li etela efingo alishe olo la shangwa membo eli. 28 Molwaashi Jehova okwa li e va handukila, a fula onya nokwa nyemata neenghono, okwe va kufa mo medu lavo, ndele te va twala kedu limwe, oko ve li fiyo okunena.’

29 “Oinima oyo inai hololwa oyaJehova, Kalunga ketu, ashike oinima oyo ya hololwa oyetu nosho yo oludalo letu fiyo alushe, opo tu dule okuwanifa po eendjovo adishe dOmhango ei.

30 “Ngeenge omwa udu eendjovo adishe edi, enangeko noupuna nefingo olo nda tula po moipafi yeni, ndele tamu i dimbuluka eshi mu li moiwana aishe omo Jehova, Kalunga keni, e mu taataela, 2 ndele tamu alukile kuJehova, Kalunga keni, nokupwilikina kondaka yaye, she likolelela kwaashishe osho handi mu lombwele nena, nye novana veni, tamu shi ningi nomutima weni aushe nosho yo nomwenyo* weni aushe, 3 Jehova, Kalunga keni, ota ka alula eenghwate deni noku mu fila onghenda, ndele te mu ongele mo vali movanhu omo Jehova, Kalunga keni, e mu lihanifila. 4 Nonande ovanhu voye ove lihanifilwa kominghulo adishe dedu, Jehova, Kalunga keni, ote ke mu kongolola ko akushe oko, ndele te mu alula. 5 Jehova, Kalunga keni, ote ke mu twala medu omo mwa li hamu di ooxo, nomo tamu ka kala hamu di, note ke mu kwafela mu punapale nomu hapupale mu dulife ooxo. 6 Jehova, Kalunga keni, ota ka koshola* omitima deni nomitima doludalo leni, opo mu kale mu hole Jehova, Kalunga keni, nomutima weni aushe nosho yo nomwenyo* weni aushe, opo mu kale nomwenyo. 7 Opo nee Jehova, Kalunga keni, ota ka etela ovatondi veni omafingo aeshe aa, ovo ve mu tonda nove mu hepeka.

8 “Otamu ka aluka nokupwilikina kondaka yaJehova, ndele tamu diinine oipango yaye aishe oyo handi mu lombwele nena. 9 Jehova, Kalunga keni, ota ka nangeka noupuna unene oilonga yomake eni aishe, ta hapupalifa ovana veni, oimuna yeni noilikolomwa yomedu leni, osheshi Jehova ota ka hafela vali oku mu punapalifa, ngaashi ashike a li a hafela ooxokulululwa. 10 Otamu ka pwilikina kondaka yaJehova, Kalunga keni, nokudiinina oipango yaye neenghedimhango daye odo da shangwa membo eli lOmhango, notamu ka alukila kuJehova, Kalunga keni, nomutima weni aushe nosho yo nomwenyo* weni aushe.

11 “Oshipango eshi handi mu lombwele nena kashidjuu kunye, nokashi li kokule nanye. 12 Kashi li meulu, opo mu tye ngeno: ‘Olyelye ta londo meulu e ke shi tu talele mo, opo tu shi ude notu dulike kusho?’ 13 Kashi li kombinga ikwao yefuta, opo mu tye ngeno: ‘Olyelye ta tauluka a ye kombinga ikwao yefuta e ke shi tu talele ko, opo tu shi ude notu dulike kusho?’ 14 Ondjovo oi li popepi nanye, momakanya eni nomomitima deni, opo mu dule oku i wanifa po.

15 “Taleni, nena ohandi tula po moipafi yeni omwenyo nouwa nosho yo efyo nowii. 16 Ngeenge omwa pwilikine koipango yaJehova, Kalunga keni, oyo handi mu lombwele nena, mokukala mu hole Jehova, Kalunga keni, mokweenda meendjila daye, mokudiinina oipango yaye, eenghedimhango daye nomatokolo aye, otamu kala nomwenyo notamu hapupala, na Jehova, Kalunga keni, ote ke mu nangeka noupuna medu omo tamu i mu ka kale.

17 “Ashike ngeenge omitima deni oda amuka ko kuKalunga noinamu pwilikina, ndele tamu hongaulwa, nokulinyongamena ookalunga vamwe, ndele tamu va longele, 18 ohandi mu lombwele nena kutya otamu ka xulifwa po filufilu. Itamu ka kala nomwenyo efimbo lile medu omo tamu i mu ka kale, ngeenge omwa tauluka omulonga waJordan. 19 Onda tula po omwenyo nefyo moipafi yeni, enangeko noupuna nefingo; nena eli eulu nedu oi li eendombwedi daasho tamu ningi, nye noludalo leni omu na okuhoolola omwenyo, opo mu kale nomwenyo, 20 mokukala mu hole Jehova, Kalunga keni, mokupwilikina kondaka yaye, mokukala ovadiinini kuye, osheshi oye e mu pa omwenyo, noye te ke mu kwafela mu lididimike efimbo lile medu olo Jehova a ana oku pa ooxokulululwa Abraham, Isak naJakob.”

31 Moses okwa ya pondje, ndele ta lombwele Ovaisrael aveshe eendjovo edi, 2 ta ti: “Nena eli, ondi na eedula 120. Itandi dulu vali oku mu wilika,* osheshi Jehova okwa lombwela nge, a ti: ‘Ito tauluka omulonga ou waJordan.’ 3 Jehova, Kalunga keni, oye te ke mu tetekela, eshi tamu ka tauluka omulonga, noye mwene ta ka hanauna po oiwana oyo moipafi yeni, opo nee nye otamu ke i taataelashi. Josua oye te ke mu wilika mu tauluke omulonga, ngaashi Jehova a popya. 4 Jehova ote ke va ningila ngaashi a ningila Sihon naOg, eehamba dOvaamori, nedu lavo, eshi e va hanauna po. 5 Jehova ote ke mu kwafela mu va finde, notamu ka ungaunga navo metwokumwe noipango aishe oyo nde mu lombwela. 6 Kaleni mu na ouladi nomwa pama. Inamu kala mwa tila, ile mu mbadapale omolwavo, osheshi Jehova, Kalunga keni, oye te mu wilike molweendo leni. Ite mu efa noite mu fiye po.”

7 Opo nee Moses okwa ifana Josua, ndele te mu lombwele moipafi yOvaisrael, ta ti: “Kala u na ouladi nowa pama, osheshi oove to ka twala ovanhu ava medu olo Jehova a anena ooxekulululwa kutya ote li va pe, nou na oku li va pa li li efyuululo. 8 Jehova ote mu wilike molweendo leni, nota twikile okukala pamwe nanye. Ite mu efa noite mu fiye po. Onghee inamu kala mwa tila, ile mu mbadapale.”

9 Opo nee Moses okwa shanga Omhango ei, ndele te i yandje kOvalevi ovo ve li ovapristeri, ovo va humbata oshikefa shehangano laJehova, nokovakulunhu aveshe vaIsrael. 10 Moses okwe va lombwela, ta ti: “Pexulilo lomudo keshe omutiheyali, pefimbo la wapala, momudo wemangululo, pefimbo lOshivilo shOmatwali,* 11 eshi Ovaisrael va holoka moipafi yaJehova, Kalunga keni, monhele oyo a hoolola, ou na oku va leshela omhango ei, opo Ovaisrael aveshe ve i ude. 12 Ongela ovanhu pamwe, ovalumenhu, ovakainhu, ounona novanailongo ovo ve li moilando* yeni, opo va pwilikine nove lihonge kombinga yaJehova, Kalunga keni, va kale have mu tila, nova wanife po filufilu eendjovo adishe dOmhango ei. 13 Opo nee ovana vavo ovo vehe shii Omhango ei otava ka pwilikina notave ke lihonga okutila Jehova, Kalunga keni, efimbo alishe olo mu li medu olo tamu i mu ka kale, ngeenge mwa tauluka omulonga waJordan.”

14 Opo nee Jehova okwa lombwela Moses, ta ti: “Tala, efimbo lokufya kwoye ola ehena popepi. Ifana Josua, ndele tamu i ketwali lokwoongalela, opo ndi mu pe oshinakuwanifwa.” Onghee Moses naJosua ova ya ketwali lokwoongalela. 15 Jehova okwa holoka petwali moluudi loshilemo, noluudi olo loshilemo ola fikama poshivelo shetwali.

16 Jehova okwa lombwela Moses, a ti: “Tala, ove ou li pokufya,* novanhu ava otava ka hovela okuhaela pamhepo nookalunga vokoilongo oyo ye va dingilila medu omo tava i. Otave ke liteeka nge notava ka nyona ehangano olo nda ninga navo. 17 Ohandi ke va handukila neenghono pefimbo opo, nohandi ke va efa po noku va holeka oshipala shange fiyo osheshi va hanaunwa po. Ndele ngeenge va hangwa komaupyakadi nomaudjuu mahapu, otava ka tya: ‘Mbela omaupyakadi aa inae tu hanga molwaashi Kalunga ketu ehe li mokati ketu?’ 18 Ashike itandi ke va kwafela* mefiku olo omolwoukolokoshi aushe oo va longa, eshi va longela ookalunga vamwe.

19 “Shanga paife eimbilo leni eli, ndele to li hongo Ovaisrael. Va kwafela ve li lihonge,* opo eimbilo eli li kale ondombwedi pokati ketu nOvaisrael. 20 Ngeenge nde va twala medu olo nda anena ooxekulululwa, olo tali kunguluka omashini nomaadi eenyiki, ndele tava li va kuta nokupunapala,* otava ka ya kookalunga vamwe noku va longela, noitava ka fimaneka nge. Otava ka nyona ehangano lange. 21 Ngeenge va hangwa komaupyakadi nomaudjuu mahapu, eimbilo eli otali ka kala ondombwedi yavo (oludalo lavo itali ke li dimbwa), osheshi omahalo oo va kulika fimbo inandi va twala medu olo nde va anena ondi a shii nale.”

22 Onghee Moses okwa shanga eimbilo eli mefiku olo, ndele te li hongo Ovaisrael.

23 Opo nee okwa* yandja oshinakuwanifwa kuJosua, omonamati waNun, ndele ta ti: “Kala u na ouladi nowa pama, osheshi oove to ka twala Ovaisrael medu olo nde va anena, nohandi twikile okukala pamwe naave.”

24 Diva eshi Moses a mana filufilu okushanga eendjovo dOmhango ei membo, 25 Moses okwa lombwela Ovalevi ovo va humbata oshikefa shehangano laJehova, ta ti: 26 “Kufeni embo eli lOmhango, ndele tamu li tula kombinga oko ku na oshikefa shehangano laJehova, Kalunga keni, notali ka kala ko li li ondombwedi yeni. 27 Osheshi ondi shi shii nawa kutya nye ovanashibofa novatangalali.* Ngeenge omwa kala hamu tukululile Jehova oshibofa ofimbo ndi li momwenyo, mbela ongahelipi unene tuu ngeenge onda fi? 28 Ongelelei nge ovakulunhu vomapata eni novaleli veni aveshe, opo ndi popye eendjovo edi ve udite ko, neulu nosho yo edu otai ka ninga eendombwedi davo. 29 Osheshi ondi shi shii nawa kutya konima ngeenge onda fi, otamu ka longa filufilu oukolokoshi notamu ka dja mo mondjila oyo nde mu lombwela. Ashike otamu ka hangwa shili koupyakadi monakwiiwa, molwaashi otamu ka longa osho shii momesho aJehova notamu ke mu nyemateka noilonga yomake eni.”

30 Opo nee Moses okwa endulula eendjovo deimbilo eli, okudja pehovelo fiyo opexulilo, moipafi yeongalo alishe lOvaisrael:

 3 Ohandi ka shiivifa edina laJehova.

Ohandi ka hepaulula ounene waKalunga ketu!

 5 Ovanhu ovo ova katuka shihe li pandunge.

Kave fi ovana vaye, ve lietela oupyakadi.

Epupi la nyonauka nola pilalala.

15 Eshi Jesurun* a ondoka, okwa tukululila oshibofa omwene waye.

Owa ondoka, wa pama nowa paluka.

29 Ngeno ova li ovanaendunge, ngeno ova dilonga kwaasho.

Ngeno ova diladila koilanduliko oyo tai ke va hanga.

Nave uye ve mu kwafele.

Va efeni va ninge onhele yeni yeameno.

Ohandi dipaa nohandi yandje omwenyo.

44 Opo nee Moses okwe uya, ndele ta popi vali eendjovo adishe deimbilo olo ovanhu ve udite ko, ye naHosea,* omonamati waNun. 45 Konima eshi Moses a mana okupopya nOvaisrael aveshe eendjovo adishe odo, 46 okwa tya kuvo: “Diinineni eendjovo adishe delondwelo odo nde mu lombwela nena, opo mu dule okulombwela ovana veni va diinine eendjovo adishe dOmhango ei. 47 Eendjovo odo kadi fi ashike dongaho, ndele otadi ti omwenyo kunye, nomolweendjovo odo, otamu ka kala nomwenyo mule medu olo tamu i mu ka kale ngeenge omwa tauluka omulonga waJordan.”

48 Jehova okwa popya naMoses mefiku olo tuu olo, ta ti: 49 “Inda komhunda yaAbarim, komhunda yaNebo, oyo i li medu laMoab, i li popepi naJeriko, ndele to tale edu laKaanan, olo handi ka pa Ovaisrael va ka kale mo. 50 Opo nee oto ka fila komhunda oyo u li pokulonda, noto ka pakwa povakweni,* ngaashi omumwaxo Aron a fila komhunda yaHor, nokwa pakwa povakwao, 51 molwaashi amushe kamwa li ovadiinini kwaame mokati kOvaisrael pomeva opuMeriba, muKades, mombuwa yaSin, molwaashi inamu yapulifa nge moipafi yOvaisrael. 52 Oto ka monena edu olo kokule, ndele ito ka ya medu olo handi ka pa Ovaisrael.”

33 Aa omanangeko noupuna oo Moses, omupiya waKalunga kashili, a lombwela Ovaisrael ofimbo ina fya. 2 Okwa ti:

 7 Okwa popya shi na sha naJuda, ta ti:

 8 Shi na sha naLevi, okwa ti:

12 Shi na sha naBenjamin, okwa ti:

13 Shi na sha naJosef, okwa ti:

18 Shi na sha naSebulon, okwa ti:

19 Otava ka ifana ovanhu komhunda.

Naako otava ka yambela ko omayambo e li pauyuki.

20 Shi na sha naGad, okwa ti:

“Ou ta tamununa mo eengaba daGad na nangekwe noupuna.

Ovawiliki vovanhu otava ka ongala pamwe.

22 Shi na sha naDan, okwa ti:

“Dan okanghoshona.

Ota ka ponokela okudja muBasan.”

23 Shi na sha naNaftali, okwa ti:

Na kwate ko edu lokoushilo nolokolukadi.”

24 Shi na sha naAsser, okwa ti:

“Asser na nangekwe noupuna a kale e na ovanamati.

29 Israel, kala wa hafa!

34 Moses okwa dja mo momaluhaela aMoab, ndele ta i komhunda yaNebo, koxulo yaPisga, oyo ya taalela kuJeriko. Opo nee Jehova okwe mu ulikila edu alishe, okudja kuGilead fiyo okuDan, 2 nedu alishe laNaftali, edu laEfraim nolaManasse, nedu alishe laJuda fiyo okefuta lokouninginino,* 3 Nosho yo Negeb noshitukulwa shaJordan, olufilu laJeriko, oshilando shomilunga, fiyo okuSoar.

4 Opo nee Jehova okwe mu lombwela, ta ti: “Edu eli olo nda anena Abraham, Isak naJakob, nda ti: ‘Ohandi li yandje koludalo loye.’ Onde ku pitika u li tale nomesho oye, ashike ito tauluka omulonga u ye mo.”

5 Konima yaasho, omupiya waJehova, Moses, okwa fila medu laMoab, ngaashi ashike Jehova a popya. 6 Okwe* mu paka mefilu lomedu laMoab, popepi naBet-peor, nokape na oo e shii opo pe na ombila yaye fiyo okunena. 7 Moses okwa fya e na eedula 120. Omesho aye kaa li a twika, nokwa li natango e na eenghono. 8 Ovaisrael ova lilila Moses momaluhaela aMoab oule womafiku 30. Opo nee omafiku okulila Moses okwa pwa ko.

9 Josua, omonamati waNun, okwa li e na ounongo muhapu,* osheshi Moses okwa li e mu tenheka omake aye, nOvaisrael aveshe ova li va hovela okupwilikina kuye, nova ninga naanaa ngaashi Jehova a li a lombwela Moses. 10 Ndele muIsrael kamwa li vali mwa holoka omuprofeti ngaashi Moses, oo Jehova a li e shii nawanawa.* 11 Okwa ninga omadidiliko aeshe nokwa longa oikumwifilonga oyo Jehova a li e mu tuma a ka longe medu laEgipiti, e ke i longele Farao, ovapiya vaye aveshe nedu laye alishe 12 nosho yo oilonga inene noikumwifi oyo a longa neke laye li na eenghono moipafi yOvaisrael aveshe.