NEHEMIA

1 Eendjovo daNehemia,* omonamati waHakalia, tadi ti: Momwedi Kislev,* momudo 20, onda li muSusan,* moshilando sha dingililwa komakuma.* 2 Pefimbo opo, Hanani, umwe womovamwaina vange, okwe uya pamwe novalumenhu vamwe va dja kuJuda, nonde va pula kombinga yoshixupe shOvajuda, osho sha dja moukwatwa, nosho yo kombinga yaJerusalem. 3 Ova nyamukula va ti: “Ovo va fyaala moshitukulwalongo, ovo va dja moukwatwa, ove li monghalo ii neenghono noififa ohoni. Omakuma aJerusalem okwa teka po, nomivelo dasho oda xwikwa po nomundilo.”

4 Diva eshi nda uda eendjovo odo, onda kala omutumba handi kwena nonda kala nda nyika oluhodi oule womafiku. Onda kala handi lidilike nokwiilikana koshipala shaKalunga komeulu. 5 Onda ti: “Jehova, Kalunga komeulu, Kalunga munene nomukumwifi, oo ha diinine ehangano laye, noha ulikile ohole i na oudiinini ovo ve mu hole nohava diinine oipango yaye, 6 alikana, omesho oye naa pashuke, nomatwi oye naa pwilikine nelitulemo komailikano omupiya woye, oo handi ilikana nena, omutenya noufiku, shi na sha novapiya voye, Ovaisrael. Ohandi hokolola omatimba Ovaisrael, oo va nyona kwoove. Fye otwa nyona, ame nosho yo eumbo latate. 7 Otwa nyona kwoove sha kwata moiti, eshi inatu diinina oipango, omaufomhango nomatokolo oye, oo wa yandja komupiya woye, Moses.

8 “Alikana, dimbuluka eendjovo, odo wa lombwela* omupiya woye, Moses, kutya: ‘Ngeenge omwa kala muhe fi ovadiinini, ohandi ke mu lihanifila mokati koiwana. 9 Nongeenge omwa alukile kwaame, ndele tamu diinine oipango yange nokudulika kuyo, nonande omu kale mwe lihanifilwa kominghulo dedu, ohandi ke mu ongela ko oko, noku mu twala monhele oyo nda hoolola mu fimanekelwe edina lange.’ 10 Vo ovapiya voye noshiwana shoye, osho wa xupifa* neenghono doye dinene nosho yo neke loye linaenghono. 11 Jehova, alikana, omatwi oye naa pwilikine nelitulemo keilikano lomupiya woye nokeilikano lovapiya voye, ovo hava tila edina loye. Alikana, linyengifa ohamba i file nge onghenda noi pitike nge ndi ninge osho handi i pula nena.”

Onda li omupindili wohamba.

2 Momudo 20, momwedi waNisan,* ohamba Artasasta oya li ya hala okunwa omaviinyu, ndele ngaashi handi ningi shito, onda kufa omaviinyu noku a yandja kohamba. Ashike kandi na fiku nda kalele nda nyika oluhodi moipafi yayo. 2 Opo nee ohamba oya tya kwaame: “Omolwashike to monika wa nyika oluhodi neenghono ove ito vele? Ondi wete kutya oto lipula nasha.” Okudja opo, onda li nda tila unene.

3 Onda tya kohamba: “Ohamba nai kale nomwenyo mule! Ohandi kala inandi nyika oluhodi ngahelipi, ngeenge oshilando, onhele omo mwa pakwa ootatekulululwa, osha hanaunwa po, nomivelo dasho oda xwikwa po nomundilo?” 4 Ohamba oya tya kwaame: “Owa hala ndi ku ningile shike?” Opo nee onda ilikana kuKalunga komeulu. 5 Onda tya kohamba: “Ngeenge otashi wapalele ohamba, nongeenge omupiya woye owe mu hokwa, tume nge kuJuda, koshilando oko kwa pakwa ootatekulululwa, opo ndi ke shi tungulule.” 6 Ofimbo ohamba i li omutumba nomumbada wayo, oya pula nge ya ti: “Oto ka kala ko efimbo li fike peni, noto ka aluka naini?” Onghee ohamba oya li ya dimina okutuma nge, nonde i lombwela kutya ohandi ka aluka naini.

7 Opo nee onda tya kohamba: “Ngeenge otashi wapalele ohamba, nandi pewe eenhumwafo doongoloneya voshitukulwa shoKombada yOmulonga,* opo ndi ende nda amenwa, fiyo nda fika muJuda, 8 nosho yo onhumwafo yaAsaf, omupashukili wOfuka yOhamba, opo a dule oku pa nge oipilangi yomivelo dOhotengulu yOtembeli,* yomakuma oshilando nosho yo yotembeli, oko handi ka ya.” Onghee ohamba oya pa nge eenhumwafo odo, molwaashi eke liwa laKalunga kange ola li pamwe naame.

9 Opo nee onde uya koongoloneya voshitukulwa shoKombada yOmulonga, nonde va pa eenhumwafo, odo da dja kohamba. Ohamba oya tuma nge yo pamwe neendjai detangakwaita nosho yo ovalondinghambe. 10 Eshi Sanballat, Omuhoroni, naTobia, omupiya Omuammoni, va uda kombinga yaasho, kava li va hafa nandenande, eshi umwe e uya okuningila ouwa oshiwana shOvaisrael.

11 Onda li nda ya kuJerusalem, nonda kala ko oule womafiku atatu. 12 Onda penduka oufiku nonda li nda ya pamwe novalumenhu vanini, ashike kanda li nda lombwela nande omunhu osho Kalunga a tula momutima wange, osho ndi na okuningila Jerusalem, nokapa li oshimuna shimwe vali, kakele kaasho nda li nda londa. 13 Onda dja mo oufiku nda pita mOshivelo shEfilu, ndele handi piti popepi nOfifiya yEyoka la Kula nda finda kOshivelo shOnduba yOmute. Opo nee onda konakona omakuma aJerusalem, oo a li a teka po, nomivelo dasho, odo da li da xwikwa po nomundilo. 14 Onda pita pOshivelo shOfifiya nda finda kEtale lOhamba, ndele kapa li onhele ya wana okupitwa koshinamwenyo, oko nda li nda londa. 15 Onda twikila oufiku nda shikula efilu, nonda kala handi konakona ekuma. Konima yaasho, onda aluka nda pitila pOshivelo shEfilu, ndele handi shuna.

16 Ovapangeli veendodo dopedu kava li ve shi shii kutya onda ya peni, nonda li handi ningi shike, osheshi inandi lombwela sha Ovajuda, ovapristeri, omalenga, ovapangeli veendodo dopedu nosho yo ovanailonga aveshe. 17 Xuuninwa, onda tya kuvo: “Omu wete oupyakadi, oo tu li muo, nghee Jerusalem sha hanaunwa po, nanghee omivelo dasho da xwikwa po nomundilo. Ileni tu ka tungululeni omakuma aJerusalem, opo oshinima eshi shififa ohoni shiha twikile.” 18 Onde va lombwela nghee eke liwa laKalunga kange la kala pamwe naame nosho yo eendjovo, odo nda lombwelwa kohamba. Opo nee ova ti: “Natu fikameni tu tungeni.” Onghee ova pamekafana,* opo va wanife po oilonga iwa.

19 Eshi Sanballat, Omuhoroni, Tobia, omupiya Omuammoni naGesem, Omuarabia, ve shi uda, ova hovela oku tu sheka nokuulika kutya ove tu dina, tava ti: “Otamu ningi shike? Otamu tukululile ohamba oshibofa?” 20 Onde va nyamukula nda ti: “Kalunga komeulu ote ke tu kwafela tu pondole. Nafye tu li ovapiya vaye ohatu fikama tu tunge, ndele nye kamu na oshitukulwa, ile oufemba, ile edimbulukifo muJerusalem.”

3 Omupristeri munene Eliashib, novamwaina vaye ovapristeri, ova fikama va tunge Oshivelo shEedi. Ove shi yapula, ndele tava tula po omivelo dasho. Ove shi yapula okudja koshungongulu yaMea fiyo okoshungongulu yaHananel. 2 Ovalumenhu vomuJeriko ova li tava tungu ve li popepi navo. Opo nee taku shikula Sakkur, omonamati waImri.

3 Ovanamati vaHassenaa ova tunga Oshivelo shEeshi. Ova tula po eelama dasho, omivelo dasho, omakumba asho noihakifo yasho. 4 Opo nee okwa shikula Meremot, omonamati waUria, omonamati waHakkos, oo a li ta longo oilonga yokuwapekulula. Okwa shikula yo Mesullam, omonamati waBerekia, omonamati waMesesabel, oo a li yo ta longo oilonga yokuwapekulula; taku shikula Sadok, omonamati waBaana, oo a li yo ta longo oilonga yokuwapekulula. 5 Opo nee okwa shikula Ovatekoa, ovo va li tava longo oilonga yokuwapekulula, ashike ovanenenhu vomuvo kava li va hala okulininipika va kufe ombinga* moilonga yoovene vavo.

6 Jehoiada, omonamati waPasea, naMesullam, omonamati waBesodeia, ova wapekulula Omuvelo wOshilando Shikulu. Ova ninga eelama, ndele tava tula po omivelo dasho, omakumba asho noihakifo yasho. 7 Opo nee okwa shikula Melatia, Omugibeon, naJadon, Omumeroni, ovo va li tava longo oilonga yokuwapekulula. Ova li ovalumenhu vomuGibeon naMispa, va li ve li koshi yepashukilo* langoloneya woshitukulwa shoKombada yOmulonga.* 8 Okwa shikula vali Usiel, omonamati waHarhaia, umwe womovahambwidi voshingoli, oo a li ta longo oilonga yokuwapekulula; taku shikula Hanania, umwe womovalongi vomaadi,* oo a li yo ta longo oilonga yokuwapekulula. Ova tula muJerusalem omamanya pedu fiyo okEkuma Linene. 9 Opo nee okwa shikula Refaja, omonamati waHur, elenga letata loshitukulwa shaJerusalem, oo a li ta longo oilonga yokuwapekulula. 10 Okudja opo, okwa shikula Jedaia, omonamati waHarumaf, oo a li ta longo oilonga yokuwapekulula komesho yeumbo laye; taku shikula Hattus, omonamati waHashabneia, oo a li yo ta longo oilonga yokuwapekulula.

11 Malkia, omonamati waHarim, naHassub, omonamati waPahat-moab, ova wapekulula oshitukulwa shikwao* nosho yo Oshungongulu yOmafiya. 12 Opo nee okwa shikula Sallum, omonamati waHallohes, elenga letata loshitukulwa shaJerusalem, oo a li ta longo oilonga yokuwapekulula, pamwe novanakadona vaye.

13 Hanun novakalimo vomuSanoa ova wapekulula Oshivelo shEfilu. Ove shi tunga, ndele tava tula po omivelo dasho, omakumba asho noihakifo yasho. Ova wapekulula ekuma oule womaludimbo 1 000,* fiyo okOshivelo shOnduba yOmute. 14 Malkia, omonamati waRekab, elenga loshitukulwa shaBet-hakerem, okwa wapekulula Oshivelo shOnduba yOmute. Okwe shi tunga, ndele ta tula po omivelo dasho, omakumba asho noihakifo yasho.

15 Sallun, omonamati waKolhose, elenga loshitukulwa shaMispa, okwa wapekulula Oshivelo shOfifiya. Okwe shi tunga nonduda yasho, a tula po omivelo dasho, omakumba asho noihakifo yasho. Okwa wapekulula yo ekuma lEtale lOmukangha, olo la li popepi nOshikunino shOhamba, fiyo okEetalapa, odo da dja kOshilando shaDavid.

16 Opo nee okwa shikula Nehemia, omonamati waAsbuk, elenga letata loshitukulwa shaBet-sur, oo a li ta longo oilonga yokuwapekulula komesho yOmaendo aDavid fiyo oketale, olo la tungwa, nosho yo fiyo okEumbo lOvakwaita Ovanaenghono.

17 Okudja opo, okwa shikula Ovalevi, ovo va li tava longo oilonga yokuwapekulula: Rehum, omonamati waBani; taku shikula Hashabia, elenga letata loshitukulwa shaKeila, oo a li ta longo oilonga yokuwapekulula, e lile po oshitukulwa shavo. 18 Opo nee okwa shikula ovamwainamati vavo, ovo va li tava longo oilonga yokuwapekulula: Bavai, omonamati waHenadad, elenga letata loshitukulwa shaKeila.

19 Okwa shikula yo Eser, omonamati waJesua, elenga laMispa, oo a li ta longo oilonga yokuwapekulula oshitukulwa shikwao, osho sha li komesho yondjila ya londa, oyo ya finda kOmhungulilo yOilwifo, oyo i li pOngudimanya.

20 Opo nee okwa shikula Baruk, omonamati waSabbai, oo a li ta longo nondjungu oilonga yokuwapekulula oshitukulwa shikwao, okudja pOngudimanya fiyo opomuvelo weumbo lomupristeri munene Eliashib.

21 Okudja opo, okwa shikula Meremot, omonamati waUria, omonamati waHakkos, oo a li ta longo oilonga yokuwapekulula oshitukulwa shikwao, okudja pomuvelo weumbo laEliashib fiyo okoxulo yeumbo laEliashib.

22 Opo nee okwa shikula ovapristeri, ovalumenhu vomoshitukulwa shaJordan,* ovo va li tava longo oilonga yokuwapekulula. 23 Okwa shikula yo Benjamin naHassub, ovo va li tava longo oilonga yokuwapekulula komesho yeumbo lavo. Taku shikula Asaria, omonamati waMaasea, omonamati waAnania, oo a li ta longo oilonga yokuwapekulula popepi neumbo laye. 24 Opo nee okwa shikula Binnui, omonamati waHenadad, oo a li ta longo oilonga yokuwapekulula oshitukulwa shikwao, okudja peumbo laAsaria fiyo opOngudimanya nosho yo fiyo omohuke.

25 Okudja opo, okwa shikula Palal, omonamati waUsai, oo a li ta longo oilonga yokuwapekulula komesho yOngudimanya noshungongulu, oyo ya kwatafana nEumbo* lOhamba, oyo i li mOshihale shOvanangeli. Taku shikula Pedaia, omonamati waParos.

26 Ovapiya votembeli,* ovo va li hava di muOfel, ova longa oilonga yokuwapekulula fiyo okomesho yOshivelo shOmeva, kombinga yokoushilo, nosho yo yoshungongulu, oyo ya tungilwa kekuma.

27 Opo nee okwa shikula Ovatekoa, ovo va li tava longo oilonga yokuwapekulula oshitukulwa shikwao, okudja komesho yoshungongulu inene, oyo ya tungilwa kekuma, fiyo okekuma laOfel.

28 Ovapristeri ova longa oilonga yokuwapekulula pombada yOshivelo shEenghambe, keshe umwe e li komesho yeumbo laye.

29 Opo nee okwa shikula Sadok, omonamati waImmer, oo a li ta longo oilonga yokuwapekulula komesho yeumbo laye.

Taku shikula Shemaia, omonamati waSekania, omupashukuli wOshivelo shokOushilo, oo a li yo ta longo oilonga yokuwapekulula.

30 Okudja opo, okwa shikula Hanania, omonamati waSelemia, nomonamati omutihamano waSalaf, Hanun, ovo va li tava longo oilonga yokuwapekulula oshitukulwa shikwao.

Taku shikula Mesullam, omonamati waBerekia, oo a li yo ta longo oilonga yokuwapekulula komesho yolupale laye.

31 Opo nee okwa shikula Malkia, umwe womovahambwidi voshingoli, oo a li ta longo oilonga yokuwapekulula fiyo opeumbo lovapiya votembeli* nolovalandifi, komesho yOshivelo shOmakonakono nosho yo fiyo okonduda yopombada yomohuke.

32 Ovahambwidi voshingoli novalandifi ova longa oilonga yokuwapekulula okudja ponduda yopombada yomohuke fiyo opOshivelo shEedi.

4 Diva eshi Sanballat a uda kutya ohatu tungulula ekuma, okwa li a handuka nokufula onya, nokwa kala ta sheke Ovajuda. 2 Okwa popya moipafi yovamwaxe noyetangakwaita laSamaria, a ti: “Ovajuda ava vanafangwa ova hala okweeta po shike? Mbela otava ka pondola ngoo kuvo vene? Mbela onava ka yambe ngoo omayambo? Otava mane tuu okutunga mefiku limwe? Onava ka tunge ngoo ekuma litya sha okudja monduba yoitekaukile yomamanya, oo a pya?”

3 Tobia, Omuammoni, oo a li ofika puye, okwa ti: “Nokuli nakavandje ota dulu okungumauna po ekuma lavo lomamanya, olo tava tungu.”

4 Kalunga ketu, alikana pwilikina, osheshi ohatu ungaungiwa nafye nodino. Omasheko avo nae va tanaukile po,* noku va yandja momake ovatondi vavo. 5 Ino lipwililikila enyono lavo, ile u dime po etimba lavo koshipala shoye, osheshi ova tuka ovatungi.

6 Otwa kala hatu tungulula ekuma nokufitika eembululu dalo adishe, fiyo opokati koule walo, novanhu ova twikila okulonga nouladi.

7 Diva eshi Sanballat, Tobia, Ovaarabia, Ovaammoni nOvaasdod va uda kutya okuwapekululwa kwomakuma aJerusalem otaku pula komesho nosho yo kutya eembululu oda fitikwa, ova li va handuka neenghono. 8 Ova pangela omhangela, opo ve uye okulwifa Jerusalem nokweetifa mo omapiyaano. 9 Ndele fye otwa ilikana kuKalunga ketu, notwa tula po ovanangeli va nangela omutenya noufiku ve tu amene kuvo.

10 Kakele kaasho, ovanhu vomuJuda ova ti: “Ovanailonga* ova hepifa eenghono davo, nope na oitandu ihapu yomamanya; itatu ka dula nandenande okutunga ekuma.”

11 Ovatondi vetu ova kala tava ti: “Fimbo inave shi shiiva, ile inave tu mona, ohatu ke va ponokela, hatu va dipaa nokuxulifa po oilonga.”

12 Efimbo keshe Ovajuda, ovo ve li popepi navo tave uya mo, ohave tu lombwele lwoikando* tava ti: “Otave ke uya kufye tava dilile keembinga adishe.”

13 Onda tula ovalumenhu konima yekuma, peenhele odo di li poima pa lalakana nopa nyika oluhaela; onde va tula po pamaukwaneumbo avo, ve na omaongamukonda, omaonga nomauta avo. 14 Eshi nda mona kutya ova tila, onda fikama diva, ndele handi lombwele omalenga, ovapangeli veendodo dopedu novanhu aveshe, nda ti: “Inamu va tila. Dimbulukeni Jehova, oo munene nomukumwifi; lwileni ovamwanyoko, ovanamati novanakadona veni, ovakulukadi veni nomaumbo eni.”

15 Konima eshi ovatondi vetu va uda kutya otwa shiiva osho tava ningi nosho yo kutya Kalunga kashili okwa ya moshipala eemhangela davo, atushe otwa shuna koilonga yokutungulula ekuma. 16 Okudja kefiku olo okuyuka komesho, etata lovanhu vange ola kala tali longo, ofimbo etata likwao la kala li kwete omaonga, oikelelifo, omauta nova djala oundjafa vovakwaita. Omalenga okwa li ofika konima yOvajuda, 17 ovo va li tava tungu ekuma, tae va yambidida. Ovo va li tava longo ova longa neke limwe, ofimbo ve kwete oshilwifo meke likwao. 18 Omutungi keshe okwa li a homata eongamukonda moshiya shaye, eshi ta tungu, naao a li e na okushika enghuma okwa li ofika pwaame.

19 Onda lombwela omalenga, ovapangeli veendodo dopedu novanhu aveshe, nda ti: “Ope na oilonga ihapu ya pumbwa okulongwa, nohatu longo twe lihanena ekuma tu li li komakule. 20 Ngeenge omwa udu enghuma tali shikwa, ongaleni apa tu li. Kalunga ketu ota ka lwa ponhele yetu.”

21 Otwa kala hatu longo, ofimbo etata limwe la kala li kwete omaonga, okudja eshi eluwa tali tende, fiyo okonguloshi eshi eenyofi da pita. 22 Pefimbo opo, onda lombwela ovanhu nda ti: “Ovalumenhu pamwe novapiya vavo, ove na okunangala muJerusalem, opo ve tu pashukile oufiku nokulonga momukokomoko wefiku.” 23 Onghee ame, ovamwameme, ovapiya vange novapashukili, ovo va li va shikula nge, inatu dula mo nande oikutu yetu, nakeshe umwe okwa kala e na oshilwifo shaye meke laye lokolulyo.

5 Ovashamane novakulukadi vavo ova li tava lilaana mokule omolwovamwaina Ovajuda. 2 Vamwe ova li tava ti: “Otuvahapu fye novana vetu ovamati noukadona. Otwa pumbwa oikulya, opo tu kale nomwenyo.” 3 Vakwao ova li tava ti: “Fye ohatu yandje po omapya etu, oikunino yomandjebele nomaumbo etu i li onga eshilipaleko tu mone oikulya pefimbo londjala.” 4 Natango, vamwe ova li tava ti: “Ohatu ningi omapya noikunino yetu yomandjebele eshilipaleko lokukalela po omikuli doimaliwa, odo hatu li, opo tu fute eemhale* dohamba. 5 Fye ombelela nohonde imwe novamwameme,* novana vavo ongaashi ashike ovana vetu, ndele ohatu fininikwa tu yandje ovanamati novanakadona vetu moupika, novana vetu vamwe oukadona ove li nale moupika. Ashike katu na eenghono dokuxulifa po oshinima eshi, molwaashi omapya etu noikunino yetu yomandjebele oya ninga po yavamwe.”

6 Onda handuka neenghono, eshi nda uda ekemo lavo nosho yo eendjovo odo. 7 Onghee onda kala handi diladila oinima oyo momutima wange nonda tangunina omalenga novapangeli veendodo dopedu, nda ti: “Keshe umwe womunye ota pula mumwaina oishoshela.”

Onda unganeka oshoongalele shinene omolwavo. 8 Onda tya kuvo: “Otwa ninga ngaashi hatu dulu, opo tu lande ko ovamwameme Ovajuda, ovo va li va landifwa po koiwana imwe; ndele mbela omu na vali okulandifa po ovamwanyoko, notu na vali oku va landa kunye, opo va kale va manguluka?” Okudja opo, ova kala va mwena noinava nyamukula sha. 9 Onda ti vali: “Osho tamu ningi kashiwa. Mbela kamu na okuulika etilokalunga mukeshe osho tamu ningi,* opo oiwana, ovatondi vetu, ihe tu sheke? 10 Shikwao vali, ame, ovamwameme novapiya vange ohatu va pe oimaliwa noikulya. Onghee hano, natu efei po oku va pula oishoshela mwaasho twe va pa. 11 Alikana, shunifeni nena kuvo omapya avo, oikunino yavo yomandjebele, omiti davo deemono nomaumbo avo. Shunifeni oishoshela* yoimaliwa, yoikulya, yomaviinyu mape noyomaadi, oyo hamu va pula.”

12 Ova nyamukula va ti: “Fye ohatu ke va shunifila oinima oyo, noitatu ka pula sha kuvo. Ohatu ka ninga naanaa ngaashi wa popya.” Opo nee onda ifana ovapristeri nonda anifa ovalumenhu ovo va wanife po eudaneko lavo. 13 Konima yaasho, onda tukumuna oshikutu shange, ndele handi ti: “Kalunga kashili naye na tukumune mo ngaha momaumbo eni omulumenhu keshe, oo ita wanifa po eudaneko laye, a kale kokule nomaliko aye. Kalunga ote ke mu tukumuna mo ngaha, opo a kale hamakasha.” Opo nee eongalo alishe ola ti: “Amen!”* Ova hambelela Jehova, novanhu aveshe ova wanifa po eudaneko lavo.

14 Shikwao vali, okudja ngoo kefiku olo ohamba ya nangeka nge po ndi ninge ngoloneya wavo moshitukulwa shaJuda, okudja momudo 20 fiyo 32 wepangelo lohamba Artasasta, sha hala okutya, omido 12, ame nosho yo ovamwameme inatu lya oikulya, oyo i na okupewa ngoloneya. 15 Ashike oongoloneya, ovo va tetekela nge, ova li va twika ovanhu omutengi nova li have va kufa eesekeli* doisilveri 40 efiku keshe va ka lande omungome nomaviinyu. Natango, ovapiya vavo ova li hava fininike ovanhu. Ashike ame inandi shi ninga, molwaashi ohandi tila Kalunga.

16 Onda kufa yo ombinga moilonga yokutunga, noinatu kufa eehepele omapya ado. Ovapiya vange aveshe ova li yo tava longo. 17 Onda li handi li pamwe nOvajuda 150, ovapangeli veendodo dopedu nosho yo vamwe ovo ve uya kufye va dja moiwana. 18 Efiku keshe, onda li handi lande ongobe yomhedi, eedi hamano da ondoka noudila, i tu longekidilwe, nopa li yo hapa etwa omaviinyu mahapu omaludi aeshe mefiku etimulongo keshe. Ashike nande ongaho, inandi kala handi pula oimaliwa yoikulya, oyo i na okupewa ngoloneya, molwaashi ovanhu ova li va wililwa po nale koilonga yavo. 19 Kalunga kange, alikana, ino dimbwa nge; nangeke nge noupuna omolwaaishe oyo nda ninga omolwoshiwana eshi.

6 Diva eshi Sanballat, Tobia, Gesem Omuarabia novatondi vetu aveshe va lombwelwa kutya onda tungulula ekuma nonokutya kala li la fyaala ombululu, (nonande pefimbo opo kanda li nda tula po omivelo), 2 Sanballat naGesem ova tumina nge diva etumwalaka eli, tali ti: “Ila tu tulei po efimbo tu shakeneni pomikunda, odo di li mOluhaela lomEfilu laOno.” Ashike ova li tava pangele omhangela va ningile nge owii. 3 Onghee onde va tumina ovatumwa, nda ti: “Ame ohandi kufa ombinga moilonga inene, noitandi dulu okudja po. Omolwashike oilonga i na okukanghama noku i fiya po ndi uye kunye?” 4 Ova tumina nge etumwalaka la faafana oikando ine, noshikando keshe, onde va pa enyamukulo la faafana.

5 Opo nee Sanballat okwa tumina nge omupiya waye oshikando oshititano, e na etumwalaka la faafana, nonhumwafo ya patuluka i li meke laye. 6 Oya li ya shangwa ngaha: “Osha udika mokati koiwana, na Gesem ote shi popi yo kutya ove nOvajuda otamu pangele omhangela mu tukule ounashibofa. Nomolwaasho to tungu ekuma; she likolelela komahokololo oo, oove to ningi ohamba yavo. 7 Natango, owa nangeka po ovaprofeti va shiivife kombinga yoye muJerusalem ashishe kutya: ‘MuJuda omu na ohamba!’ Paife oinima ei otai ka lombwelwa ohamba. Onghee, ila, tu shi kundafaneni pamwe.”

8 Ashike onde mu tumina enyamukulo eli: “Kape na nande oshimwe shomoinima, oyo wa popya, sha ningwa; owe i tota ashike ove mwene.”* 9 Aveshe ova li tava kendabala oku tu tilifa, tava ti: “Omake avo otaa ka loloka koilonga, noitai ka pwa.” Paife, ohandi ilikana, Kalunga, pameka omake ange.

10 Opo nee onda ya keumbo laShemaia, omonamati waDelaia, omonamati waMehetabel, pefimbo olo a li iha di mo meumbo laye. Okwa ti: “Tu tule po efimbo tu shakene keumbo laKalunga kashili motembeli, ndele hatu idile omivelo dotembeli, molwaashi otave uya ve ku dipae. Otave uya ve ku dipae oufiku.” 11 Ndele onda tya: “Mbela omulumenhu ngaashi ame ota dulu ngoo okuya onhapo? Mbela omulumenhu ngaashi ame ota dulu tuu okuya motembeli, ndele ta kala e na omwenyo? Itandi i mo!” 12 Opo nee onda didilika kutya Kalunga kashili ine mu tuma, ndele Tobia naSanballat ovo ve mu futa a popye exunganeko olo li li omhinge naame. 13 Okwa li a kutwa, opo a tilife nge noku nyonife nge, opo va kale ve na omatomheno okunyona po edina lange liwa nokusheka nge.

14 Kalunga kange, dimbuluka Tobia, Sanballat, oilonga ei nosho yo Noadia, omuprofeti omukainhu, novaprofeti aveshe, ovo va li alushe hava kendabala okutilifa nge.

15 Onghee ekuma ola li la pwa mo 25 aElul,* moule womafiku 52.

16 Diva eshi ovatondi vetu ve shi uda noiwana aishe oyo ye tu dingilila ye shi mona, ova li va fya ohoni neenghono nova li va mona kutya oilonga oyo oya pwa ashike kekwafo laKalunga ketu. 17 Pefimbo olo, omalenga omuJuda okwa li haa tumine Tobia eenhumwafo, na Tobia okwa li he di nyamukula. 18 Vahapu muJuda ova li va ana kutya otava kala tave mu yambidida, molwaashi okwa li oshitenya shaSekania, omonamati waArah, nomonamati waJohanan okwa li a hombola omonakadona waMesullam, omonamati waBerekia. 19 Natango, ova li hava lombwele nge alushe oinima iwa kombinga yaye nohave mu lombwele osho nda popya. Opo nee Tobia oha tumu eenhumwafo a tilife nge.

7 Diva konima eshi ekuma la pwa okutungululwa, onda tula po omivelo; opo nee opa nangekwa ovapashukili vopoivelo, ovaimbi nOvalevi. 2 Onda nangeka po omumwameme Hanani a pashukile muJerusalem pamwe naHanania, omukulunhu wOhotengulu, osheshi okwa li omulumenhu e shii okulineekelwa filufilu noha tila Kalunga kashili e dule vakwao vahapu. 3 Onghee onda tya kuvo: “Omivelo daJerusalem odi na okukala da idila fiyo omoshanga shomutenya, nofimbo ovapashukili vopoivelo inava manifa oshilonga shavo, ove na okwiidila omivelo nokutula po oipatifo. Nangekei po ovakalimo vomuJerusalem ve li ovanangeli, keshe umwe ta pashukile opo a tulwa, keshe umwe popepi neumbo laye.” 4 Oshilando osha kula noshi na eenhele da andjuka, mwa li ovanhu vanini nomaumbo kaa li a tungululwa.

5 Kalunga kange okwe linyengifa nge ndi ongaleke omalenga, ovapangeli veendodo dopedu novanhu ovo tave ke lishangifa pashikulafano lomapata avo. Opo nee onda mona embo lomusholondodo womadina aavo ve lishangifa pashikulafano lomapata avo, ovo va dja tete moukwatwa, nonda hanga mwa shangwa ngaashi tashi shikula:

6 Ava ovanhu vomoshitukulwalongo, ovo va dja moukwatwa, ovo ohamba Nebukadnesar yaBabilon ya twalele moukwatwa, ovo lwanima va ka shuna kuJerusalem naJuda, keshe umwe koshilando shavo, 7 ovo ve uya pamwe naSerubbabel, Jesua, Nehemia, Asaria, Raamia, Nahamani, Mordekai, Bilsan, Misperet, Bigvai, Nehum naBaana.

Omuvalu wovalumenhu Ovaisrael owa kwatela mo: 8 ovanamati vaParos, 2 172; 9 ovanamati vaSefatia, 372; 10 ovanamati vaArah, 652; 11 ovanamati vaPahat-moab, womovanamati vaJesua naJoab, 2 818; 12 ovanamati vaElami, 1 254; 13 ovanamati vaSattu, 845; 14 ovanamati vaSakkai, 760; 15 ovanamati vaBinnui, 648; 16 ovanamati vaBebai, 628; 17 ovanamati vaAsgad, 2 322; 18 ovanamati vaAdonikam, 667; 19 ovanamati vaBigvai, 2 067; 20 ovanamati vaAdin, 655; 21 ovanamati vaAter vomoludalo laHiskia, 98; 22 ovanamati vaHasum, 328; 23 ovanamati vaBesai, 324; 24 ovanamati vaHarif, 112; 25 ovanamati vaGibeon, 95; 26 ovalumenhu vomuBetlehem novomuNetofa, 188; 27 ovalumenhu vokuAnatot, 128; 28 ovalumenhu vomuBet-asmavet, 42; 29 ovalumenhu vomuKiriat-jearim, Kefira novomuBeerot, 743; 30 ovalumenhu vomuRama novomuGeba, 621; 31 ovalumenhu vokuMikmas, 122; 32 ovalumenhu vokuBetel novokuAi, 123; 33 ovalumenhu vokuNebo shikwao, 52; 34 ovanamati vaElami mukwao, 1 254; 35 ovanamati vaHarim, 320; 36 ovanamati vaJeriko, 345; 37 ovanamati vaLod, Hadid naOno, 721; 38 ovanamati vaSenaa, 3 930.

39 Ovapristeri: ovanamati vaJedaia, womeumbo laJesua, 973; 40 ovanamati vaImmer, 1 052; 41 ovanamati vaPashur, 1 247; 42 ovanamati vaHarim, 1 017.

43 Ovalevi: ovanamati vaJesua, womeumbo laKadmiel, womovanamati vaHodeva, 74. 44 Ovaimbi: ovanamati vaAsaf, 148. 45 Ovapashukili vopoivelo: ovanamati vaSallum, ovanamati vaAter, ovanamati vaTalmon, ovanamati vaAkkub, ovanamati vaHatita novanamati vaSobai, 138.

46 Ovapiya votembeli:* ovanamati vaSiha, ovanamati vaHasufa, ovanamati vaTabbaot, 47 ovanamati vaKeros, ovanamati vaSia, ovanamati vaPadon, 48 ovanamati vaLebana, ovanamati vaHagaba, ovanamati vaSalmai, 49 ovanamati vaHanan, ovanamati vaGiddel, ovanamati vaGahar, 50 ovanamati vaReaja, ovanamati vaResin, ovanamati vaNekoda, 51 ovanamati vaGassam, ovanamati vaUssa, ovanamati vaPasea, 52 ovanamati vaBesai, ovanamati vaMeunim, ovanamati vaNefusim, 53 ovanamati vaBakbuk, ovanamati vaHakufa, ovanamati vaHarhur, 54 ovanamati vaBaslit, ovanamati vaMehida, ovanamati vaHarsa, 55 ovanamati vaBarkos, ovanamati vaSisera, ovanamati vaTema, 56 ovanamati vaNesia, ovanamati vaHatifa.

57 Ovanamati vovapiya vaSalomo: ovanamati vaSotai, ovanamati vaSoferet, ovanamati vaPerida, 58 ovanamati vaJaala, ovanamati vaDarkon, ovanamati vaGiddel, 59 ovanamati vaSefatia, ovanamati vaHattil, ovanamati vaPokeret-hassebaim novanamati vaAmon. 60 Ovapiya votembeli* aveshe novanamati vovapiya vaSalomo ova li 392.

61 Ava ova dja muTel-melah, Tel-harsa, Kerub, Addon naImmer, ndele kava li va dula okupopya kutya ova dja momapata elipi nosho yo oudilo wavo, nongeenge ova li tuu Ovaisrael: 62 ovanamati vaDelaia, ovanamati vaTobia, ovanamati vaNekoda, 642. 63 Ovapristeri: ovanamati vaHabaia, ovanamati vaHakkos, ovanamati vaBarsillai, oo a li a kufa omukulukadi movanakadona vaBarsillai, Omugilead, nokwa li ha ifanwa nedina lavo. 64 Ova li va konga omadina avo momashangelo, opo va shilipaleke epata omo va dja, ndele kava li ve a mona mo, onghee kava li va wana okukala ovapristeri.* 65 Ngoloneya* okwa li e va lombwela kutya inava lya oinima iyapuki elela, fiyo osheshi pe uya omupristeri, oo ta dulu okupula ekwafo okupitila muUrim naTummim.

66 Omuvalu aushe kumwe weongalo owa li 42 360, 67 inamu kwatelwa ovapiya vavo ovalumenhu novakainhu, ovo va li 7 337; ova li yo ve na ovaimbi ovalumenhu novakainhu 245. 68 Ova li ve na eenghambe 736, omamwili avo, 245, 69 eengamelo davo, 435 neendongi davo, 6 720.

70 Omitwe dimwe domaukwaneumbo omapata oda yambidida oilonga. Ngoloneya* okwa tula moshikefa eedrakma* doshingoli 1 000, ouyaxa vanini 50 nosho yo oikutu yovapristeri 530. 71 Omitwe dimwe domaukwaneumbo omapata oda tula moshikefa shoilonga yokutunga eedrakma doshingoli 20 000 neemina* doshisilveri 2 200. 72 Ovanhu aveshe ova yandja eedrakma doshingoli 20 000, eemina doshisilveri 2 000 noikutu yovapristeri 67.

73 Ovapristeri, Ovalevi, ovapashukili vopoivelo, ovaimbi, ovapiya votembeli* novanhu aveshe ova li moilando yavo. Eshi omwedi omutiheyali we uya ko, Ovaisrael aveshe ova li moilando yavo.

8 Opo nee ovanhu aveshe ova ongala mehalandjadja loshilando, ve na elalakano limwe, popepi nOshivelo shOmeva, nova lombwela omushangululi* Esra a ete embo lOmhango yaMoses, olo Jehova a lombwela oshiwana shaIsrael shi landule. 2 Onghee omupristeri Esra okwa eta embo lOmhango mefiku lotete lomwedi omutiheyali komesho yeongalo lovalumenhu novakainhu, naaveshe ovo tava dulu okupwilikina nokuuda ko. 3 Okwe li lesha mokule mehalandjadja loshilando, popepi nOshivelo shOmeva, okudja ongula fiyo omoshanga shomutenya, okwe li leshela ovalumenhu, ovakainhu naaveshe ovo tava dulu okuuda ko; ovanhu ova li tava pwilikine nelitulemo kembo lOmhango. 4 Omushangululi* Esra okwa li a fikama koshilyatelelo sheemhadi shoshiti, osho sha li sha longekidilwa oshiningwanima osho; puye opa li pa fikama Matitia, Shema, Anaia, Uria, Hilkia naMaasea, ve li kolulyo laye, ofimbo kolumosho laye kwa li Pedaia, Mishael, Malkia, Hasum, Hasum-hasbaddana, Sakaria naMesullam.

5 Esra okwa pandja embo moipafi yovanhu aveshe, molwaashi okwa li a londa koshilyatelelo. Eshi e li pandja, ovanhu aveshe ova fikama. 6 Opo nee Esra okwa hambelela Jehova Kalunga kashili nOmunene, novanhu aveshe ova nyamukula va ti, “Amen!* Amen!” nova yelula omake avo. Opo nee ova twa eengolo nokulinyongamena kuJehova, oipala yavo ya twa pedu. 7 Jesua, Bani, Serebia, Jamin, Akkub, Sabbetai, Hodia, Maasea, Kelita, Asaria, Josabad, Hanan naPelaja, ovo va li Ovalevi, ova li tava yelifile ovanhu Omhango, ofimbo ovanhu va li va fikama. 8 Ova twikila okulesha mokule membo, mOmhango yaKalunga kashili, tave i yelifa nawa nokufatulula osho tai ti; ova kwafela ovanhu va ude ko osho sha li tashi leshwa.

9 Nehemia, oo a li ngoloneya,* omupristeri nomushangululi* Esra nOvalevi, ovo va li tava hongo ovanhu, ova lombwela ovanhu aveshe tava ti: “Efiku eli oliyapuki kuJehova Kalunga keni. Inamu lila, ile mu nyike oluhodi.” Ovanhu aveshe ova li tava lili, eshi va uda eendjovo dOmhango. 10 Okwe va lombwela a ti: “Indeni, ka lyeni oinima iwa elela* nokunwa oinima inyenye, nokutumina ovo inava longekida sha, molwaashi efiku eli oliyapuki kOmwene wetu, inamu nyika oluhodi, molwaashi ehafo omolwaJehova olo eenghono deni.” 11 Ovalevi ova li tava hekeleke ovanhu aveshe tava ti: “Ngungumaneni, osheshi efiku eli oliyapuki, inamu nyika oluhodi.” 12 Opo nee ovanhu aveshe ova ya va ka lya nokunwa, va tumina vakwao oikulya nova kala va hafa unene, molwaashi ova uda ko eendjovo odo va yelifilwa.

13 Opo nee mefiku etivali, omitwe domaukwaneumbo omapata aeshe, ovapristeri nOvalevi ova ongala pomushangululi* Esra, opo va ude ko eendjovo dOmhango moule. 14 MOmhango, oyo Jehova a yandja okupitila muMoses, ova hanga mwa shangwa kutya Ovaisrael ove na okukala momatwali* pefimbo loshivilo momwedi omutiheyali. 15 Ove na okushiivifa nokwiingida moilando yavo aishe nomuJerusalem ashishe, tava ti: “Indeni koshitukulwa shokeemhunda, ndele tamu eta oitai i na omafo, ya dja komiti deemono, komiti domipaina, komiti damirti nokomilunga, noitai yomafo yomiti dikwao, opo mu ninge omatwali, she likolelela kwaasho sha shangwa.”

16 Onghee ovanhu ova ya ve ke i tale, opo ve liningile omatwali, keshe umwe okombada yeumbo laye nosho yo moihale yavo, moihale yeumbo laKalunga kashili, mehalandjadja pOshivelo shOmeva, nomehalandjadja pOshivelo shaEfraim. 17 Okudja opo, aveshe ovo va aluka moukwatwa ova ninga omatwali va dane oshivilo, sha hala okutya, va kale mo pefimbo loshivilo. Ovaisrael aveshe ova li va hafa, molwaashi okudja pefimbo laJosua, omonamati waNun, osho osho sha li oshikando shotete oshivilo osho sha danwa monghedi ya tya ngaho. 18 Efiku nefiku, opa li hapa leshwa membo lOmhango yaKalunga kashili, okudja kefiku lotete fiyo efiku laxuuninwa. Ova dana oshivilo osho oule womafiku aheyali, nomefiku etihetatu ova dana oshivilo shiyapuki, ngaashi sha li sha teelelwa.

9 Momafiku 24 omwedi omutiheyali, Ovaisrael ova li va ongala. Ova li ve lidilika va djala eeshako notave lifufile edu. 2 Ovo va dja moludalo lOvaisrael ove liyoolola mo movanailongo aveshe, ndele tava fikama nokuhepaulula omatimba avo vene nosho yo omanyono ooxe. 3 Opo nee ova fikama peenhele davo nokulesha mokule membo lOmhango yaJehova, Kalunga kavo, efimbo lomutenya oule weevili nhatu lwaapo,* neevili nhatu dikwao ova li tava hokolola omatimba avo nokulinyongamena Jehova, Kalunga kavo.

4 Jesua, Bani, Kadmiel, Sebania, Bunni, Serebia, Bani naKenani ova li ofika komutune wOvalevi nova ingida mokule kuJehova, Kalunga kavo. 5 Ovalevi: Jesua, Kadmiel, Bani, Hashabneia, Serebia, Hodia, Sebania naPetahja ova ti: “Fikameni nokutanga Jehova, Kalunga keni, fiyo alushe.* Nava tange edina loye la tumbala, olo linene li dule omanangeko noupuna nomahambelelo aeshe, oo ovanhu tava dulu okuyandja.

6 “Oove auke Jehova; oove wa shita eulu, heeno, eulu olo li li pombadambada nomatangakwaita alo aeshe, edu noinima aishe oyo i li ko nosho yo efuta noinima aishe oyo i li mo. Aishe owe i kaleka nomwenyo, nomatangakwaita omeulu otae ku linyongamene. 7 Oove Jehova, Kalunga kashili, ou wa hoolola Abram nowe mu kufa muUr shOvakaldea noku mu luka edina Abraham. 8 Owa mona kutya omudiinini kwoove momutima waye, onghee owa ninga ehangano naye, opo u mu pe edu lOvakaanan, lOvaheti, lOvaamori, lOvaperesi, lOvajebusi nolOvagirgas, li ninge loludalo laye. Owa diinina omaudaneko oye, molwaashi oumuyuki.

9 “Owa mona eshi ootatekulululwa va li tava fininikwa muEgipiti, nowa uda ekemo lavo pEfuta Litilyana. 10 Opo nee owa ninga omadidiliko nowa longa oikumwifilonga, opo u handukile Farao, ovapiya vaye aveshe novanhu aveshe vomedu laye, osheshi ou shi shii kutya ova ungaunga nootatekulululwa nai. Owe liningila edina, olo li li ko fiyo okunena. 11 Owa tukaula efuta moipafi yavo, opo va dule okutauluka efuta poukukutu, novataatai vavo owe va ekela moule ngaashi emanya la ekelwa momeva taa ndwafuka. 12 Ootatekulululwa owe va kwatela komesho omutenya noluudi loshilemo, noufiku onoluudi lomundilo, opo li minikile ondjila, oyo ve na okuya nayo. 13 Owe uya komhunda yaSinai, wa popya navo okudja meulu nowe va pa omatokolo e li pauyuki, eemhango doshili,* omaufomhango mawa noipango. 14 Owe va shiivifila Eshabata loye liyapuki, we va pa oipango, omaufomhango nomhango okupitila momupiya woye Moses. 15 Eshi va li va fya ondjala, owe va pa omungome okudja meulu, naashi va li va fya enota, owe va pa omeva okudja memanya nowe va lombwela va ye nova fyuulule edu, olo wa ana* oku va pa.

16 “Ndele vo, ootatekulululwa, ova kukutika omitwe davo nova tangalala* noinava pwilikina koipango yoye. 17 Kava li va hala okupwilikina, noinava dimbuluka oikumwifilonga yoye, oyo wa longa mokati kavo, ndele ova tangalala* nokunangeka po omukwatelikomesho, opo va shune moupika wavo muEgipiti. Ndele ove, oove Kalunga, oo e lilongekida okudimina po, omunalukeno,* nomunanghenda noku na filufilu ohole i na oudiinini* noino va efa. 18 Nonande ova hambula oshihongwafano shonhana moshivela,* ndele tava ti: ‘Ou oKalunga koye, ou e ku kufa mo muEgipiti,’ nova ulika filufilu kutya inave ku fimaneka, 19 ino va efa, eshi va li mombuwa omolwonghenda yoye inene. Oluudi loshilemo inali dja po puvo omutenya, opo li va wilike mondjila yavo, noluudi lomundilo oufiku, opo li minikile ondjila, oyo ve na okuya nayo. 20 Owe va pa omhepo yoye iyapuki i va pe eendunge; ino va anyena omanna nowe va pa omeva, eshi va li va fya enota. 21 Owa kala to va pe oikulya, eshi va li mombuwa oule womido 40. Inava hepa sha. Oikutu yavo inai pombauka neemhadi davo inadi dinda.

22 “Owe va pa omauhamba novanhu, nowe va tukulila oitukulwa yedu, opo va fyuulule edu laSihon, sha hala okutya, edu lohamba yaHesbon nosho yo edu laOg, ohamba yaBasan. 23 Owa hapupalifa oludalo lavo ngaashi eenyofi dokeulu. Opo nee owe va twala medu, olo wa udanekela ooxekulululwa kutya otava ka ya mo noku li fyuulula po. 24 Onghee ovana vavo ova ya mo nokufyuulula edu olo, nowa finda Ovakaanan moipafi yavo, ovo va li medu olo, nowe va yandja momake avo, mwa kwatelwa eehamba davo novanhu vomedu olo, opo ve va ningile keshe osho tashi va wapalele. 25 Ova kwata ko oilando oyo ya dingililwa komakuma a pama nedu la lyata nawa,* nokukufa po omaumbo e yadi oinima iwa yomaludi aeshe, eendungu, odo da xupwa nale, oikunino yomandjebele, omiti deemono nomiti doiimati dihapu. Onghee ova lya, va kuta, va ondoka nova hafela ouwa woye munene.

26 “Kava li va dulika; ove ku tukulila oshibofa nova pilamena Omhango yoye.* Ova dipaa ovaprofeti voye, ovo va li tave va londwele noku va alulila kwoove, nova ulika filufilu kutya inave ku fimaneka. 27 Onghee owe va efela momake ovatondi vavo, ovo va kala tave va etele omaupyakadi. Ndele ova kala tava keme kwoove, eshi va li moudjuu, nowe va uda okudja meulu omolwonghenda yoye inene, owa kala to va tumine ovawiliki, opo ve va xupife momake ovatondi vavo.

28 “Ndele diva, ngeenge ova mangululwa, ohava hovele vali okulonga osho shii koshipala shoye, noho va efele momake ovatondi vavo, ovo have va pangele.* Opo nee ohava aluka vali va konge ekwafo kwoove, noho va udu okudja meulu noku va xupifa oikando noikando omolwonghenda yoye inene. 29 Nonande owa kala to va londwele, opo va dulike vali kOmhango yoye, omolwelinenepeko ova anya okupwilikina koipango yoye. Ohava nyono omaufomhango oye, oo haa kaleke omunhu nomwenyo, ngeenge ote a diinine. Ndele ove ku pilamena, molwaashi ova li ve na omitwe neefingo dikukutu, nova anya okupwilikina. 30 Owe ve lididimikila oule womido dihapu nowa kala to va londwele nomhepo yoye okupitila movaprofeti voye, ndele ova anya okupwilikina. Xuuninwa, owe va yandja momake ovanhu vomoilongo oyo. 31 Omolwonghenda yoye inene, ino va hanauna po, ile u va efe, molwaashi oove Kalunga omunalukeno* nomunanghenda.

32 “Paife, Kalunga ketu, Kalunga munene, omunaenghono nomukumwifi, oo a diinina ehangano laye nokwa ulika ohole i na oudiinini, ino dimbwa omaudjuu aeshe, oo e tu hanga, eehamba detu, omalenga etu, ovapristeri vetu, ovaprofeti vetu, ootatekulululwa novanhu voye aveshe okudja pefimbo leehamba daAsiria fiyo okefiku eli. 33 Owa kala omuyuki, eshi wa efa tu ningilwe oinima aishe, oyo ye tu hanga, molwaashi ove omudiinini. Ndele fye ofye twa katuka shihe li pandunge. 34 Eehamba detu, omalenga etu, ovapristeri vetu nootatekulululwa inava diinina Omhango yoye, noinava yandja elitulemo koipango yoye, ile komadimbulukifo* oye, oo we va pa. 35 Naashi va li mouhamba wavo notava hafele oinima iwa ihapu, oyo we va pa, nova li medu la andjuka nola lyata nawa,* olo we va pele, inave ku longela noinava efa po okulonga oilonga yavo ii. 36 Onghee ofye ava tu li apa nena ovapika, heeno, ovapika medu olo wa pa ootatekulululwa va lye oiimati yalo nosho yo oinima yalo iwa. 37 Oilikolomwa yalo ihapu oyeehamba, odo wa efa di tu pangele omolwomanyono etu. Otadi tu pangele* noimuna yetu ngaashi tashi di wapalele, notu li moupyakadi munene.

38 “Okutala koinima aishe oyo, ohatu shange eudafanotwokumwe, notali pamekwa noshihakifo shomalenga etu, kOvalevi vetu nokovapristeri vetu.”

10 Ovo ve li pameka mokutula ko oshihakifo shavo kulo, ovo:

9 Ovalevi ova li: Jesua, omonamati waAsania, Binnui, omonamati waHenadad, Kadmiel 10 novamwaina, Sebania, Hodia, Kelita, Pelaja, Hanan, 11 Mikka, Rehob, Hashabia, 12 Sakkur, Serebia, Sebania, 13 Hodia, Bani naBeninu.

14 Ovakwatalelikomesho vovanhu ovo: Paros, Pahat-moab, Elami, Sattu, Bani, 15 Bunni, Asgad, Bebai, 16 Adonia, Bigvai, Adin, 17 Ater, Hiskia, Assur, 18 Hodia, Hasum, Besai, 19 Harif, Anatot, Nebai, 20 Mahpias, Mesullam, Hesir, 21 Mesesabel, Sadok, Jaddua, 22 Pelatia, Hanan, Anaia, 23 Hosea, Hanania, Hassub, 24 Hallohes, Pilha, Sobek, 25 Rehum, Hasabna, Maasea, 26 Ahia, Hanan, Anan, 27 Malluk, Harim naBaana.

28 Ovanhu aveshe, ovapristeri, Ovalevi, ovapashukili vopoivelo, ovaimbi, ovapiya votembeli* naaveshe ovo ve liyoolola ko kovanhu vomoiwana, va shikule Omhango yaKalunga kashili, pamwe novakulukadi vavo, ovanamati vavo novanakadona vavo, aveshe ovo ve na eshiivo neudeko,* 29 ova waimina ovamwaina, ovalumenhu ovo va fimanekwa, va udaneka okushikula Omhango yaKalunga kashili, nova pula Kalunga e va handukile, ngeenge ova kala inava dulika. Ova dimina okushikula Omhango, oyo ya yandjwa okupitila muMoses, omupiya waKalunga kashili, nokudiinina filufilu oipango aishe yaJehova, Omwene wetu, omatokolo aye nomaufomhango aye. 30 Itatu ka yandja ovanakadona vetu kovanhu vomedu olo, noitatu ka tambula ovanakadona vavo va ninge vovanamati vetu.

31 Ngeenge ovanhu vomedu olo ova eta oinima yavo nomaludi aeshe oilya, va landife mefiku lEshabata, itatu ka landa sha kuvo mefiku lEshabata, ile mefiku liyapuki. Momudo omutiheyali, ohatu ka efa edu li tulumukwe noitatu ka pula eendjo.

32 Natango otwe lipa oshinakuwanifwa, opo keshe umwe womufye a yandje oshititatu shosekeli* omudo keshe omolwoilonga yotembeli* yaKalunga ketu, 33 tu ninge oinima tai landula: omungome wokutalika, eendjayambo, odo hadi yandjwa pandjikilile, omaxwikiloyambo, oo haa yandjwa pandjikilile mOmashabata nopeemwedi dipe omolwoivilo noinima iyapuki, omatimbayambo, opo ku kosholwe Ovaisrael, nomolwoilonga aishe yomotembeli yaKalunga ketu.

34 Natango, otwa umba oshihoololifo shi na sha nokuyandja oikuni, oyo ovapristeri, Ovalevi, novanhu ve na okweeta kotembeli yaKalunga ketu, pamapata etu, pefimbo la wapala, omudo nomudo, i temifwe koaltari yaJehova, Kalunga ketu, she likolelela kwaasho sha shangwa mOmhango. 35 Ohatu ka eta yo motembeli yaJehova oiimati, oyo ya pya tete, yomedu letu, noiimati oyo ya pya tete, yomaludi aeshe yomiti doiimati, omudo nomudo, 36 nosho yo oiveli yovanamati vetu, noimuna oyo ya dalwa tete koimuna yetu, she likolelela kwaasho sha shangwa mOmhango, naayo ya dalwa tete keengobe detu, keedi nokoikombo yetu. Ohatu ke i twala motembeli yaKalunga ketu kovapristeri, ovo tava yakula motembeli yaKalunga ketu. 37 Oufila wetu, oo inau nakwa nawa, woilya, oyo ya pya tete, omayambidido etu, oiimati yomaludi aeshe yomiti, omaviinyu mape, omaadi, otu na oku a twala kovapristeri keemhungulilo* domotembeli yaKalunga ketu, pamwe noshitimulongo sha dja medu letu, tashi i kOvalevi, molwaashi Ovalevi ovo hava pula oshitimulongo moilando yetu aishe omo hamu longwa ounamapya.

38 Omupristeri, omonamati waAron, oku na okukala pamwe nOvalevi, eshi Ovalevi tava pula oshitimulongo; Ovalevi ove na okuyamba po oshitimulongo shomoitimulongo shi ye motembeli yaKalunga ketu, meenduda* domeemhungulilo. 39 Ovaisrael novanamati vOvalevi ove na okutwala keemhungulilo* omayambidido oilya, omaviinyu mape, omaadi noilongifo yomonhele iyapuki, omo hai kala, nosho yo ovapristeri ovo tava yakula, ovapashukili vopoivelo novaimbi. Itatu ka efa po otembeli yaKalunga ketu.

11 Omalenga oshiwana okwa li haa di muJerusalem; ovanhu aveshe ova li va umba oshihoololifo, opo va ete omunhu umwe womovanhu omulongo keshe e uye a kale ha di muJerusalem, oshilando shiyapuki, ofimbo vakwao omuwoi tava kala moilando ikwao. 2 Kakele kaasho, ovanhu ova nangeka noupuna ovalumenhu aveshe, ovo ve liyamba va kale hava di muJerusalem.

3 Ava ovo ovalumenhu va fimanekwa moitukulwalongo, ovo va li hava di muJerusalem. (Ovaisrael aveshe, ovapristeri, Ovalevi, ovapiya votembeli* novanamati vovapiya vaSalomo ova li hava kala moilando ikwao yaJuda, keshe umwe monhele yaye moshilando shavo.

4 Natango, muJerusalem omwa li hamu di ovanhu vamwe vomepata laJuda nolaBenjamin.) Ovanhu vomepata laJuda ova li: Ataia, omonamati waUssia, omonamati waSakaria, omonamati waAmaria, omonamati waSefatia, omonamati waMahalalel, womovanamati vaPeres 5 nosho yo Maasea, omonamati waBaruk, omonamati waKolhose, omonamati waHasaia, omonamati waAdaja, omonamati waJojarib, omonamati waSakaria, womoludalo laShela. 6 Ovanamati aveshe vaPeres, ovo va li hava di muJerusalem, ova li ovalumenhu ovanaenghono 468.

7 Ava ovo ovanhu vomepata laBenjamin: Sallu, omonamati waMesullam, omonamati waJoed, omonamati waPedaia, omonamati waKolaja, omonamati waMaasea, omonamati waItiel, omonamati waJesaja. 8 Kakele kuSallu, opa li yo Gabbai naSallai, 928, 9 na Joel, omonamati waSikri, okwa li omupashukili wavo, na Juda, omonamati waHassenua, okwa li omupashukili omutivali woshilando.

10 Movapristeri: Jedaia, omonamati waJojarib, Jakin, 11 Seraja, omonamati waHilkia, omonamati waMesullam, omonamati waSadok, omonamati waMeraiot, omonamati waAhitub, omuwiliki womeumbo* laKalunga kashili, 12 novamwaina ovo va longa oilonga yomeumbo, 822. Adaja, omonamati waJeroham, omonamati waPelalia, omonamati waAmsi, omonamati waSakaria, omonamati waPashur, omonamati waMalkia, 13 novamwaina, omitwe domaukwaneumbo omapata, 242. Amasai, omonamati waAsareel, omonamati waAksai, omonamati waMesillemot, omonamati waImmer, 14 novamwaina, ovo va li ovalumenhu ovanaenghono novaladi, 128. Omupashukili wavo okwa li Sabdiel, oshilyo shoukwaneumbo, oo wa fimanekwa.

15 MOvalevi: Shemaia, omonamati waHassub, omonamati waAsrikam, omonamati waHashabia, omonamati waBunni, 16 naSabbetai nosho yo Josabad, omitwe dOvalevi, ovo va li hava pashukile oilonga, oyo tai longwa kondje yeumbo laKalunga kashili. 17 Mattania, omonamati waMika, omonamati waSabdi, omonamati waAsaf, oo a li ha kwatele komesho olwiimbo nosho yo omahambelelo pefimbo leilikano, naBakbukia, oo omutivali movamwaina, nosho yo Abda, omonamati waShammua, omonamati waGalal, omonamati waJedutun. 18 Ovalevi aveshe, ovo va li moshilando shiyapuki, ova li 284.

19 Ovapashukili vopoivelo ova li Akkub, Talmon novamwaina, ovo va li hava kala va nangela poivelo, 172.

20 Ovaisrael aveshe, ovapristeri nOvalevi ova li moilando ikwao aishe yaJuda, keshe umwe e li ponhele yaye, oyo a fyuulula.* 21 Ovapiya votembeli* ova li hava di muOfel, na Siha nosho yo Gispa ova li hava pashukile ovapiya votembeli.*

22 Omupashukili wOvalevi muJerusalem okwa li Ussi, omonamati waBani, omonamati waHashabia, omonamati waMattania, omonamati waMikka, womovanamati vaAsaf, ovaimbi. Okwa li ha pashukile oilonga yomeumbo laKalunga kashili. 23 Ohamba oya li ya yandja elombwelo kutya eemhumbwe dakeshe efiku dovaimbi odi na okuwanifwa po. 24 Petahja, omonamati waMesesabel, womovanamati vaSera, omonamati waJuda, okwa li omuyandjimayele wohamba* moshinima keshe shi na sha novanhu.

25 Apa otapa shikula omikunda nomapya ado; ovanhu vamwe vomuJuda ova li hava di muKiriat-arba nomeedoolopa dasho,* muDibon nomeedoolopa dasho, muJekabseel nomikunda dasho, 26 muJesua, muMolada, muBet-pelet, 27 muHasar-sual, muBer-seba needoolopa dasho,* 28 muSiklag, muMegona needoolopa dasho,* 29 muEn-rimmon, muSora nomuJarmut, 30 muSanoa, muAdullam nomikunda dasho, muLakis nomapya asho nomuAseka needoolopa dasho.* Ova kala* hava di muBer-seba fiyo okEfilu laHinnom.

31 Ovanhu vomepata laBenjamin ova li muGeba, muMikmas, muAiya, muBetel needoolopa dasho,* 32 muAnatot, muNob, muAnania, 33 muHasor, muRama, muGittaim, 34 muHadid, muSeboim, muNeballat, 35 muLod nomuOno, efilu lovahambwidi. 36 Oshitukulwa shimwe shepata lOvalevi, ovo va li muJuda, osha li moshitukulwa shaBenjamin.

12 Ava ovapristeri nOvalevi, ovo va li va ya pamwe naSerubbabel, omonamati waSalatiel, naJesua: Seraja, Jeremia, Esra, 2 Amaria, Malluk, Hattus, 3 Sekania, Rehum, Meremot, 4 Iddo, Ginnetoi, Abia, 5 Miyamin, Maadia, Bilga, 6 Shemaia, Jojarib, Jedaia, 7 Sallu, Amok, Hilkia naJedaia. Ovo ova li omitwe dovapristeri novamwaina pefimbo laJesua.

8 Ovalevi ova li Jesua, Binnui, Kadmiel, Serebia, Juda naMattania, oo a li ha kwatele komesho omaimbilopandulo pamwe novamwaina. 9 Ovamwaina vavo, Bakbukia naUnni, ova li ofika ve va taalela, opo va pashukile otembeli.* 10 Jesua okwa dala Jehoiakim, naJehoiakim okwa dala Eliashib, naEliashib okwa dala Jehoiada. 11 Jehoiada okwa dala Jonatan, na Jonatan okwa dala Jaddua.

12 Pefimbo laJehoiakim, ava ovo va li ovapristeri, omitwe domaukwaneumbo omapata: moukwaneumbo waSeraja, oMeraia; moukwaneumbo waJeremia, oHanania; 13 moukwaneumbo waEsra, oMesullam; moukwaneumbo waAmaria, oJohanan; 14 moukwaneumbo waMalluki, oJonatan; moukwaneumbo waSebania, oJosef; 15 moukwaneumbo waHarim, oAdna; moukwaneumbo waMeraiot, oHelkai; 16 moukwaneumbo waIddo, oSakaria; moukwaneumbo waGinneton, oMesullam; 17 moukwaneumbo waAbia, oSikri; moukwaneumbo waMiniamin, . . . ;* moukwaneumbo waMoadia, oPiltai; 18 moukwaneumbo waBilga, oShammua; moukwaneumbo waShemaia, oJehonatan; 19 moukwaneumbo waJojarib, oMattenai; moukwaneumbo waJedaia, oUssi; 20 moukwaneumbo waSallai, oKallai, moukwaneumbo waAmok, oEber; 21 moukwaneumbo waHilkia, oHashabia; moukwaneumbo waJedaia, oNetanel.

22 Omitwe domaukwaneumbo Ovalevi pefimbo laEliashib, laJehoiada, laJohanan naJaddua oda li da shangwa di li ovapristeri fiyo opefimbo lepangelo laDarius, Omupersia.

23 Ovalevi, ovo va li omitwe domaukwaneumbo omapata, ova li va shangwa membo, omo mwa shangwa oiningwanima yopefimbo opo, fiyo opefimbo laJohanan, omonamati waEliashib. 24 Omitwe dOvalevi oda li Hashabia, Serebia naJesua, omonamati waKadmiel, novamwaina ovapashukili ova li ofika ve va taalela ve li meengudu tava hambelele nokupandula she likolelela komalombwelo aDavid, omupiya waKalunga kashili. 25 Mattania, Bakbukia, Obadja, Mesullam, Talmon naAkkub, ovapashukili vopoivelo, ova li ofika tava pashukile eemhungulilo ve li poivelo. 26 Ovo ova longa pefimbo laJehoiakim, omonamati waJesua, omonamati waJosadak, nopefimbo langoloneya Nehemia nolomupristeri nomushangululi* Esra.

27 Pefimbo leyapulo lomakuma aJerusalem, ova konga Ovalevi noku va eta kuJerusalem okudja keembinga adishe, oko va li hava di, va dane eyapulo nehafo, pamwe nomaimbilopandulo, omayaxa, oishikomwa yeengodi nouxumbafeta. 28 Ovanamati vovaimbi* ova ongala pamwe okudja moshitukulwa,* momudingonoko aushe waJerusalem, momikunda dOvanetofa, 29 Bet-gilgal nosho yo momapya aGeba naAsmavet, molwaashi ovaimbi ova li ve likongela omikunda da dingilila Jerusalem ashishe. 30 Ovapristeri nOvalevi ove likoshola, nova koshola ovanhu, omivelo nekuma.

31 Opo nee onda twala omalenga aJuda pombada yekuma. Natango, onda nangeka po eengudu mbali da kula tadi imbi omaimbilopandulo, nakeshe imwe oya li ya landulwa kongudu yovanhu, naimwe oya li tai ende ekuma kombinga yokolulyo ya finda kOshivelo shOnduba yOmute. 32 Hosaia netata lomalenga aJuda ova li ve di shikula, 33 pamwe naAsaria, Esra, Mesullam, 34 Juda, Benjamin, Shemaia naJeremia. 35 Puvo opa li ovanamati vamwe vovapristeri ve na omanghuma: Sakaria, omonamati waJonatan, omonamati waShemaia, omonamati waMattania, omonamati waMikaia, omonamati waSakkur, omonamati waAsaf, 36 novamwaina Shemaia, Asareel, Milalai, Gilalai, Maai, Netanel, Juda, naHanani, ve na oishikomwa yaDavid, omupiya waKalunga kashili; Esra, omushangululi,* okwe va tetekela. 37 Okudja pOshivelo shOfifiya ova ya va yukilila keetalapa dOshilando shaDavid va londa ekuma pombada yEumbo laDavid nopOshivelo shOmeva kombinga yokoushilo.

38 Ongudu ikwao, tai imbi omaimbilopandulo, oya ya kombinga ikwao,* nonde i shikula ndi li pamwe netata lovanhu, kekuma olo la finda kOshungongulu yOmafiya nokEkuma Linene 39 nosho yo kOshivelo shaEfraim nokOshivelo shOshilando Shikulu nosho yo kOshivelo shEeshi, kOshungongulu yaHananel, kOshungongulu yaMea nokOshivelo shEedi. Oye uya okukanghama pOshivelo shOvapashukili.

40 Okudja opo, eengudu mbali, tadi imbi omaimbilopandulo, oda li da fikama popepi notembeli yaKalunga kashili; ame netata lovapangeli veendodo dopedu, ve li pwaame, nafye otwa fikama opo, 41 novapristeri Eliakim, Maasea, Miniamin, Mikaia, Elioenai, Sakaria naHanania ve na omanghuma 42 nosho yo Maasea, Shemaia, Eliaser, Ussi, Johanan, Malkia, Elami, naEser. Ovaimbi ova li tava imbi mokule ve li koshi yepashukilo laIsrahia.

43 Mefiku olo, ova yandja omayambo manene nova hafa, molwaashi Kalunga kashili okwe va hafifa unene. Ovakainhu nounona ova li yo va hafa, onghee ehafo muJerusalem ola li la udika kokule.

44 Mefiku olo, ovalumenhu ova li va nangekwa po va pashukile eemhungulilo domayambidido, doiimati, oyo ya pya tete, nodoitimulongo. Ova li ve na okwoongela mo omayambidido oilikolomwa yomomapya omoilando, oo a li a popiwa mOmhango kutya oku na okupewa ovapristeri nOvalevi, osheshi muJuda omwa li ehafo, molwaashi ovapristeri nOvalevi ovo va li tava yakula. 45 Ova hovela okuwanifa po oinakuwanifwa yavo, oyo va pewa kuKalunga kavo, nosho yo oilonga yokukoshola, ngaashi ovaimbi novapashukili vopoivelo hava ningi, she likolelela komalombwelo aDavid noomonamati waye Salomo. 46 Okudja nale, pefimbo laDavid naAsaf, opa li ovawiliki* vovaimbi ovo hava imbile Kalunga omaimbilohambelelo nomaimbilopandulo. 47 Pefimbo laSerubbabel nopefimbo laNehemia, Ovaisrael aveshe ova yandja omayambidido kovaimbi nokovapashukili vopoivelo, she likolelela keemhumbwe dakeshe efiku. Ova li yo ve litulila omayambidido Ovalevi, nOvalevi ova li ve litulila omayambidido oludalo laAron.

13 Efiku olo, embo laMoses ola leshwa ovanhu ve udite ko, nova hanga mwa shangwa kutya Ovaammoni, ile Ovamoab kave na okuya nandenande meongalo laKalunga kashili, 2 osheshi kava li va shakeneka Ovaisrael ve na omungome nomeva, ndele ponhele yaasho, ova kuta Bileam e va finge. Ashike Kalunga ketu okwa li a lundulula efingo li ninge enangeko noupuna. 3 Diva eshi va uda Omhango, ova hovela okuyoolola mOvaisrael oludalo alishe lovanailongo.*

4 Ofimbo osho inashi ningwa, omupristeri, oo a li ta pashukile eemhungulilo* dotembeli* yaKalunga ketu, okwa li oEliashib, omupambele waTobia. 5 Okwa li e mu kongela onduda ya kula yokupungula,* omo mwa li nale hamu tulwa eendjayambo, omaka edimba liwa, oilongifo, oitimulongo yoilya, omaviinyu mape nomaadi, oyo ya li i na okupewa Ovalevi, ovaimbi novapashukili vopoivelo pamwe nomayambidido ovapristeri.

6 Momukokomoko wefimbo alishe olo, kanda li mo muJerusalem, molwaashi onda li nda ya kohamba momudo 32 wepangelo lohamba yaBabilon, Artasasta. Lwanima, onda ka pula ohamba, opo ndi dje po. 7 Opo nee onde uya kuJerusalem nonda didilika oshinima shii, osho Eliashib a ninga, eshi a yandja onduda yokupungula i ninge yaTobia moshihale shotembeli yaKalunga kashili. 8 Osho osha li sha udifa nge nai neenghono, onghee onda li nda ekelashi oinima aishe yomeumbo laTobia, oyo ya li monduda yokupungula.* 9 Konima yaasho, onda yandja omalombwelo, nova li va wapaleka eemhungulilo.* Onda shuna mo oilongifo yomeumbo laKalunga kashili pamwe neendjayambo nosho yo omaka edimba liwa.

10 Onda li yo nda mona kutya Ovalevi ihava pewa omayambidido avo, onghee Ovalevi novaimbi ovo va li hava longo oilonga ova li va ya, keshe umwe kepya laye. 11 Opo nee onda li nda tangunina ovapangeli veendodo dopedu, nda ti: “Omolwashike eumbo laKalunga kashili la efiwa ongaho?” Onde va ongela pamwe noku va shuna moilonga yavo. 12 Ovajuda aveshe ova li va eta oshitimulongo shoilya, shomaviinyu mape noshomaadi keemhungulilo. 13 Opo nee onda li nda tula po omupristeri Selemia, omushangululi* Sadok nOmulevi Pedaia va pashukile eemhungulilo, na Hanan, omonamati waSakkur, omonamati waMattania, okwa li te va kwafele, molwaashi ovalumenhu ovo ova li va talika ko ve shii okulineekelwa. Ova li ve na oshinakuwanifwa shokutukulila ovamwaina.

14 Alikana, dimbuluke nge, Kalunga kange, omolwoshinima eshi, noino dimbwa ohole i na oudiinini, oyo nda ulika omolwotembeli yaKalunga kashili noilonga yamo.

15 Pefimbo olo, onda li nda mona ovanhu vomuJuda tava tyanghaula omandjebele, opo va ninge omaviinyu mefiku lEshabata, tava eta mo eenduba doilya noku i londeka keendongi, nokweeta muJerusalem omaviinyu, omandjebele, eenghwiyu noinima yomaludi aeshe mefiku lEshabata. Onghee onda li nde va londwela shi na sha nokulandifa oikulya mefiku olo.* 16 Ovatirus, ovo va li moshilando, ova li tava eta mo eeshi noilandifomwa yomaludi aeshe, noku i landifa kovanhu vomuJuda novomuJerusalem mEshabata. 17 Onghee onda tangunina omalenga omuJuda, nda ti kuo: “Omolwashike tamu longo owii ou nokunyateka nokuli efiku lEshabata? 18 Hamba ooxokulululwa navo hasho va li va ninga ngaho, opo Kalunga ketu e tu etele nosho yo oshilando eshi oudjuu aushe ou? Mbela omwa hala Kalunga a handukile neenghono Israel, eshi tamu nyateke Eshabata?”

19 Onda li nda yandja elombwelo kutya omivelo daJerusalem odi na okukala da idila fimbo inaku wiwila, sha hala okutya, fimbo efiku lEshabata inali hovela. Onda li yo nde va lombwela kutya kadi na okuyeululwa, fiyo efiku lEshabata la pwa ko, nonda li yo nda tula po ovapiya vange vamwe pomivelo, opo muha etwe oinima mefiku lEshabata. 20 Onghee ovalandifi voilandifomwa yomaludi aeshe ova lele pondje yaJerusalem lumwe, ile luvali. 21 Opo nee onde va londwela, nda ti: “Omolwashike mwa lele popepi nekuma? Ngeenge omwe shi ningi vali, ohandi ke mu kufa po keenghono.” Okudja opo, ihave uya vali mefiku lEshabata.

22 Onda lombwela Ovalevi kutya ove na okukala have likoshola pandjikilile nokuuya va pashukile pomivelo, opo va kaleke efiku lEshabata liyapuki. Kalunga kange, alikana, dimbuluke nge yo omolwoshinima eshi nokufila nge onghenda omolwohole yoye inene i na oudiinini.

23 Pefimbo olo, onda mona yo Ovajuda, ovo va hombola* ovakainhu Ovaasdod, Ovaammoni nOvamoab. 24 Etata lovana vavo ola li hali popi Oshiasdod nosho yo elaka lovanhu vamwe ve lili, ndele kapa li nande oumwe womuvo e shii okupopya elaka lOvajuda. 25 Onghee onde va tangunina noku va fingaela, ndele handi denge vamwe vomovalumenhu noku va duda eexwiki, ndele handi va anifa kuKalunga handi ti: “Inamu yandja ovanakadona veni kovanamati vavo noinamu tambula ovanakadona vavo va ninge vovanamati veni, ile veni. 26 Hamba osho hasho sha li sha nyonifa Salomo, ohamba yaIsrael? Mokati koiwana aishe kamwa li ohamba ye mu fa. Okwa li e holike kuKalunga kaye, nomolwaasho Kalunga e mu ninga ohamba yaIsrael ashishe. Ndele ovakainhu ovanailongo ova li ve mu nyonifa. 27 Osho oshinima shihe fi okupwilikinwa, eshi mwa longa owii u fike opo, mwa efa po oudiinini weni kuKalunga, ndele tamu hombola ovakainhu ovanailongo.”

28 Umwe womovanamati vaJehoiada, omonamati waEliashib, omupristeri omukulunhu, okwa li oshitenya shaSanballat, Omuhoroni. Onghee onda li nde mu taataa po pwaame.

29 Kalunga kange, alikana, va dimbuluka, molwaashi ova nyona oupristeri nehangano lovapristeri nolOvalevi.

30 Onde va koshola konyata keshe yovanailongo, nonda yandja oilonga kovapristeri nokOvalevi, keshe umwe oshilonga shaye. 31 Onda ninga yo omalongekido, opo oikuni i kale tai etwa pefimbo layo nosho yo oiimati oyo ya pya tete.

Kalunga kange, alikana, ino dimbwa nge.