EIMBILOELELA LASALOMO
2 “Na xupite nge nexupito lomilungu daye,
Molwaashi okuulikilwa ohole kwoove, oku dulifile nge omaviinyu.
3 Edimba lomaadi oye ohali nyika nawa.
Edina loye ola fa edimba lomaadi a tilwashi.
Nomolwaashi ovakainhu ovanyasha ve ku hole.
4 Nandi ye naave;* natu tondoke.
Ohamba oya twala nge meenduda dayo domeni!
Natu hafe nokunyakukwa omolwoye.
Natu tange* onghedi omo ho ulike ohole shi dulife omaviinyu.
Oshoshili ove* ku hole.
5 Nye oukadona vaJerusalem, ondimulaula, ashike ondimuwa,
Nda fa omatwali aKedar, nda fa omalapi etwali laSalomo.
6 Inamu dakamena nge omesho, molwaashi ndimulaula,
Osheshi onda pya omutenya.
Ovanamati vameme ova li va handukila nge;
Ova li va pa nge oshinakuwanifwa shokufila oshisho oikunino yomandjebele,
Ashike oshikunino shange shomandjebele inandi shi fila oshisho.
Omolwashike ndi na okukala ngaashi omukainhu a uvikwa eluviluvi*
Mokati koufita wookaume koye?”
8 “Ngeenge ku shi shii, ove ou umuwa u dule ovakainhu aveshe,
Shikula omakondo oufita,
Ndele to lifa oukombwena voye popepi nomatwali ovafita.”
9 “Omuholike wange, ohandi ku faafanifa nonghambe i li mokati komatemba aFarao.
10 Eemhanda doye otadi monika nawa, eshi di li koshi youlyenge,*
Nofingo yoye, eshi i na omaludimbo oilanda.
11 Ohatu ku ningile oulyenge voshingoli*
Kwa tulwa oshisilveri.”
12 “Ofimbo ohamba i li omutumba poshitaafula shayo shongonga,
Omaadi* ange otaa nyika nawa.
13 Kwaame, omuholike wange okwa fa edimba lokakutu komaadi omirha,
Oko haka kala oufiku pokati komavele ange.
14 Kwaame, omuholike wange okwa fa eshila leenhemo dohenna
Mokati koikunino yomandjebele yomuEn-gedi.”
15 “Tala! Oumuwa omuholike wange.
Tala! Oumuwa. Omesho oye okwa fa oo eenghuti.”
16 Tala! Oumuwa* omuholike wange, nowa wapala.
Ombete yetu oi li mokati komafo.
17 Oipilangi yeumbo* letu oyomisederi,
Oiti yomeembuli detu oyomidjenipa.
2 “Ngaashi onhemo mokati komakiya,
Omuholike wange naye osho e li mokati koukadona.”
3 “Ngaashi omuapula u li mokati komiti domofuka,
Omuholike wange naye osho e li mokati kovamati.
Onda halelela okukala omutumba momudidimbe waye,
Noshiimati shaye oshinyenye mokanya kange.
4 Okwa twala nge meumbo li na oitendele,*
Nohole yaye oya li edidiliko kwaame.
5 Tulumukifei nge noikuki yomandjebele;
Hekelekei nge nomaapela,
Osheshi onda djuulukwa omuholike wange.
6 Eke laye lokolumosho oli li koshi yomutwe wange,
Neke laye lokolulyo ola papatela nge.
7 Ohandi mu anifa, nye oukadona vomuJerusalem,
Keemenye nokeenyapi deenghadi domofuka:
Inamu kendabala okupendula, ile okutukulula ohole mwaame, fiyo osheshi oyo vene ye uya.
8 Oyo ondaka yomuholike wange!
Tala! Oye winya ta di kwii,
Ota londo keemhunda, ta nhuka koxulo yoikulundudu.
9 Omuholike wange oku li ngaashi omenye, ngaashi onyati yondume yonyasha,
Oye winya a fikama konima yekuma letu,
Ota vandamene momakende,
Ota talele meemalungushu.
10 Omuholike wange ota popi ta lombwele nge, ta ti:
‘Fikama, omuholike wange,
Okangala kange, natu ye naave.
11 Tala! Okufu* okwa pita.
Odula oya sheka, noya ya.
12 Eengala oda sheneka moshitukulwa,
Efimbo lokukokola ola fika,
Newi longhuti yetende oli uditike moshitukulwa shetu.
13 Eenghwiyu dotete domukwiyu oda pya;
Omindjebele oda temuna notadi nyika nawa.
Omuholike wange, fikama, ndele to uya.
Okangala kange, natu ye naave.
14 Onghuti yange i li momakololo emanya,
I li momambulukwena oshikulundudu,
Nandi ku mone, nokuuda ondaka yoye,
Osheshi ondaka yoye oiwa kuhe na vali, neholokepo loye oliwa.’”
15 “Tu kwateleni ookavandje,
Ookavandje vanini, ovo hava nyono po oikunino yomandjebele,
Osheshi oikunino yetu yomandjebele oya temuna.”
16 “Omuholike wange owange mwene, naame ondaye.
Ota lifa mokati keengala.
17 Fimbo inaku pepa,* nomidile inadi ya,
Aluka diva, omuholike wange,
Ngaashi omenye, ile onyapi yondume yonyasha i li keemhunda, odo di li pokati ketu.*
3 “Oufiku, kombete yange,
Onda konga oo ndi hole.*
Onde mu konga, ashike inandi mu mona.
2 Onda ti: ‘Nandi fikame, nokweendaenda moshilando;
Momapandavanda nomomahalandjadja,
Ndi ka konge oo ndi hole.’*
Onde mu konga, ashike inandi mu mona.
3 Ovanangeli, tava undju* oshilando, ova hanga nge,
Nonde va pula, nda ti: ‘Inamu mona oo ndi hole?’*
4 Diva, eshi nde va koyelela,
Onda mona oo ndi hole.*
Onde mu dama, itandi mu efa a ye,
Fiyo osheshi nde mu eta meumbo lameme,
Meni londuda yaao a dala nge.
5 Ohandi mu anifa, nye oukadona vomuJerusalem,
Keemenye nokeenyapi deenghadi domofuka:
Inamu kendabala okupendula, ile okutukulula ohole mwaame, fiyo osheshi oyo vene ye uya.”
6 “Oshike osho tashi di kombuwa sha fa omwifi tau lundumuka,
Shi na edimba lomirha nosho yo leka ledimba liwa,
Noimbodi yedimba liwa ya kwanghulwa yovashingifi?”
7 “Tala! Osho oshipundi shaSalomo.
Osha dingililwa kovalumenhu ovanaenghono omilongo hamano,
Vomovalumenhu ovanaenghono vomuIsrael,
8 Aveshe ova homata omaongamukonda,
Aveshe ova deulilwa oita,
Keshe umwe okwa homata eongamukonda laye
Ve mu amene koiponga youfiku.”
9 “Osho oshipundi shomouhamba* shohamba Salomo,
Osho e liningila ye mwene nomiti dokuLibanon.
10 Omaulu asho okwa longwa moshisilveri,
Oiyaameno yasho omoshingoli.
Omutumba washo omolududi leedi lopeepela;
Meni lasho omwa fewekwa nawa
Koukadona vomuJerusalem.”
11 “Pitei mo, nye oukadona vomuSion,
Taleni ohamba Salomo
Ya djala oshikoroni* shehombolo, osho ya ningilwa kuina
Mefiku omo ya hombola,
Mefiku omo omutima wayo wa li wa nyakukwa.”
4 “Tala! Oumuwa omuholike wange.
Tala! Oumuwa.
Omesho oye okwa fa oo eenghuti, eshi e li koshi yeluviluvi.
Eexwiki doye oda fa oufita woikombo
We lihanena keemhunda daGilead.
2 Omayoo oye okwa fa oufita weedi opo da kululwa,
Odo opo da koshwa,
Odo adishe da dala epasha,
Nokape na imwe ya kanifa okadjona kayo.
3 Omilungu doye oda fa ongodi itilyana,
Neendjovo doye odiwa.
Ngaashi oshipambu shogranati,
Eemhanda* doye nado osho di li koshi yeluviluvi loye.
4 Ofingo yoye oya fa oshungongulu yaDavid,
Ya tungwa nomamanya e li momikweyo,
Oko kwa lekwa oikelelifo eyovi,
Oikelelifo aishe yongonga yovalumenhu ovanaenghono.
5 Omavele oye okwa fa oumenye vavali,
Epasha lomenye,
Ovo tava li mokati keengala.”
6 “Fimbo inaku pepa,* nomidile inadi ya,
Ohandi i nondjila yange, nda finda keemhunda domirha,
Nokoikulundudu yeka ledimba liwa.”
7 “Ove oumuwa unene, omuholike wange,
Ku na nande okapefili kasha.
8 Omufuko wange, natu dje mo muLibanon,
Natu dje mo muLibanon.
Londoloka ko koxulo yaAmana,*
Koxulo yaSenir, koxulo yaHermon,
Momangade eenghoshi, keemhunda deengwe.
9 Okamwamemekadona, owa kuma omutima wange, omufuko wange,
Owa kuma omutima wange, eshi twa shakenifa omesho lwotete,
Nokamanya kamwe koshilanda shoye.
10 Kamwamemekadona, onghedi omo ho ulike ohole oiwa neenghono, omufuko wange!
Onghedi omo ho ulike ohole oi dulifile nge omaviinyu,
Nedimba lomaadi oye oli dule oshihemba keshe.
11 Omufuko wange, omilungu doye otadi ndoda omaadi eenyiki.
Omaadi eenyiki nomashini oku li koshi yelaka loye,
Nedimba loikutu yoye ola fa edimba lokuLibanon.
12 Okamwamemekadona, omufuko wange, oka fa oshikunino sha patwa,
Oshikunino sha patwa, ofifiya ya idilwa.
13 Oitai* yoye oyo oparadisa* yeegranati
I na oiimati ya denga mbada, ohenna nosho yo oimeno yedimba liwa,
14 Omaadi edimba liwa nongala, okalamus* nosinamono,
Pamwe nomiti domaludi aeshe deka ledimba liwa, omirha nomandobo
Nosho yo omaadi aeshe edimba liwa elela.
15 Ove ofifiya yomoshikunino, ondungu yomeva mawa,
Nomeva taa kunguluka okudja muLibanon.
16 Penduka, omhepo yokolundume;
Ila mo, omhepo yokoushilo.
Fudila* kombada yoshikunino shange.
Edimba lasho nali lihane.”
“Omuholike wange ne uye moshikunino shaye
Nokulya oiimati yasho ya denga mbada.”
5 “Onda ya moshikunino shange,
Okamwamemekadona, omufuko wange.
Onda kufa omirha yange nosho yo oshihemba shange.
Onda lya eshila lange lomaadi eenyiki nosho yo omaadi ange eenyiki;
Onda nwa omaviinyu ange nomashini ange.”
“Lyeni, ookaume kange.
Nweni nokukolwa keendjovo dohole.”
2 “Onda kofa, ashike omutima wange ou li oupafi.
Ondi udite omuholike wange ta konghola.”
“Yeulule nge, okamwamemekadona, omuholike wange,
Onghuti yange, ove ou uhe na okapefili kasha.
Osheshi omutwe wange owa tuta komume,
Omapando eexwiki dange okwa ninga oshituto shoufiku.”
3 “‘Onda dula mo oshikutu shange.
Nandi shi djale vali?
Onda kosha eemhadi dange.
Nandi di ningile vali omadu?’
4 Omuholike wange okwa kufa mo eke laye mombululu yomuvelo,
Nonda li nda halelela oku mu mona.
5 Onda penduka ndi ka yeulule omuholike wange;
Eenyala dange oda li tadi ndoda omirha,
Nominwe dange omaadi omirha,
Koshikwatelo shomuvelo.
6 Onda yeulula omuholike wange,
Ashike omuholike wange okwa dja po, a shuna.
Onde mu konga, ashike inandi mu mona.
Onde mu ifana, ndele ina itavela nge.
7 Ovanangeli tava undju* oshilando ova hanga nge.
Ova denga nge, va ninga nge oipute.
Ovanangeli vomakuma ova kufa nge eluviluvi* lange.
8 Ohandi mu anifa, nye oukadona vomuJerusalem:
Ngeenge omwa mono omuholike wange,
Mu lombweleni kutya onde mu djuulukwa.”
9 “Omuholike woye oku dule ngahelipi vakwao,
Ove ou umuwa unene u dule ovakainhu aveshe?
Omuholike woye oku dule ngahelipi vakwao,
Opo u tu anife ngaho?”
10 “Omuholike wange omuwa, ye omutilyana;
Okwe likalekelwa mokati komayovi omulongo.
11 Omutwe waye oo oshingoli, oshingoli elela.
Omapando eexwiki daye oku li ngaashi oshivale tashi pepwa komhepo,*
Alaula a fa ekola.
12 Omesho aye oku li ngaashi oo eenghuti di li pomatondokelo omeva,
Tadi likosho momashini,
Di li petale li yadi omeva.*
13 Eemhanda daye odi li ngaashi oshikunino shoimeno yedimba liwa,
Eenduba doihemba tai nyika nawa.
Omilungu daye odo eengala tadi ndoda omaadi omirha.
14 Eenyala daye odo oitetela yoshingoli sha tulwa oumanya vokrisolit.
Edimo laye olo omayoo eendjaba a kweywa, a tulwa oumanya vosafir.
15 Omaulu aye oo eengudi demanya londilo la tulwa koikwatelwamhadi yoshingoli elela.
Eholokepo laye oli li ngaashi Libanon, ngaashi omiti domisederi, itali dulu okuyelekwa nasha.
16 Okanya* kaye oka nyenye,
Nakeshe shimwe kombinga yaye oshiwa.
Ou oye omuholike wange, ou oye omumati wange, nye oukadona vomuJerusalem.”
6 “Omuholike woye okwa ya peni,
Ove ou umuwa unene u dule ovakainhu aveshe?
Omuholike woye okwa ya nondjila ilipi?
Natu mu kongeni pamwe naave.”
2 “Omuholike wange okwa ya koshikunino shaye,
Koshikunino shoimeno yedimba liwa,
A ka life mokati koikunino,
Nokutona eengala.
3 Ame ondomuholike wange,
Nomuholike wange owange mwene.
Ota lifa mokati keengala.”
4 “Ove oumuwa wa fa Tirsa,* omuholike wange,
Oumuwa wa fa Jerusalem,
Wa wapala ngaashi omatangakwaita a dingilila omapandela ao.
5 Ino tala nge,
Osheshi omesho oye otaa nane nge.
Eexwiki doye oda fa oufita woikombo,
We lihanena koikulundudu yaGilead.
6 Omayoo oye okwa fa oufita weedi,
Odo opo da koshwa,
Odo adishe da dala epasha,
Nokape na imwe ya kanifa okadjona kayo.
7 Ngaashi oshipambu shogranati
Eemhanda* doye nado osho di li koshi yeluviluvi loye.
8 Otapa dulu okukala ovambada 60,
Novakainhu vopomunghulo 80,
Novakainhu ovanyasha itava dulu okuvalulwa.
9 Ashike umwe oye aeke onghuti yange, oo ehe na okapefili kasha.
Oo e holike kuina.
Oye e holike unene* kwaao e mu dala.
Oukadona ohave mu mono, nohava ti kutya okwa hafa;
Ovambada novakainhu vopomunghulo ohave mu tange.
10 ‘Okakadona aka taka vilima* ngaashi eluwa tali tende oko lyelye,
Kawa ngaashi omwedi wa tokeka,
Ka yela ngaashi eenhe detango
Ka wapala ngaashi omatangakwaita a dingilila omapandela ao?’”
11 “Onda ya koshikunino shomiti doiimati
Ndi ka tale oimeno oyo opo ya mene mefilu,
Ndi tale ngeenge omindjebele oda twapuka,*
Ngeenge omigranati oda temuna.
13 Aluka, aluka Okasulamit!
Aluka, aluka,
Opo tu ku tale!”
“Omolwashike tamu tale kOkasulamit?”
“Oka fa eengudu mbali tadi ndanisa!”*
7 “Eemhadi doye oda wapala ngahelipi meenghaku doye,
Ove omonakadona womufimanekwa!
Eenhumba domatundji* oye oda ngolonga nawa da fa oumanya,
Oilonga yomake onghulungu.
2 Ekoto loye olo okayaxa komufima.
Naka kale alushe ke na omaviinyu a lumbakanifwa.
Edimo loye olo onduba yoilya yo-wheat,
Ya dingililwa keengala.
3 Omavele oye okwa fa oumenye vavali,
Epasha lomenye.
4 Ofingo yoye oi li ngaashi oshungongulu yomayoo eendjaba.
Omesho oye oku li ngaashi omatale e li muHesbon,
Poshivelo shaBat-rabbim.
Eyulu loye oli li ngaashi oshungongulu yaLibanon,
Oyo ya taalela kuDamaskus.
5 Oho yelula omutwe woye pombada, ngaashi Karmel,
Nomapando eexwiki doye* okwa fa olududi leedi lopeepela.
Ohamba oya fuulwa* kokweendjelela kwomapando.
6 Oumuwa ngahelipi, nowa wapala ngahelipi,
Ove okakadona okaholike, u dule oinima aishe iwa!
7 Ofika yoye oya fa yomulunga,
Nomavele oye oku li ngaashi omashila omadakala.*
8 Onda ti, ‘Ohandi londo komulunga
Ndi kufe ko omashila oiimati.’
Omavele oye naa kale ngaashi omashila omandjebele,
Omufudo woye ongaashi edimba lomaapula,
9 Nokanya* koye ongaashi omaviinyu a denga mbada.”
“Naa endele po nawa omuholike wange,
Naa kunguluke nawa komilungu daavo va kofa.
10 Ame ondomuholike wange,
Nokwa halelela nge.
11 Omuholike wange, ila;
Natu ye moixwa;
Natu ka kale mokati koimeno yoHenna.
12 Natu penduke ongula, ndele hatu i koikunino yomandjebele,
Tu ka tale ngeenge omindjebele oda twapuka,*
Ngeenge eenhemo oda sheneka,
Ngeenge omigranati oda temuna.
Oko, oko handi ke ku ulikila kutya ondi ku hole.
13 Oiimati* otai nyika nawa;
Pomivelo detu ope na oiimati ya denga mbada yomaludi aeshe,
Ipe naayo ikulu.
Omuholike wange, onda kala nde i ku tuvikilila.
8 “Ngeno owa li omumwamememati,
Oo a nyama komavele ameme,
Ngeenge onde ku hange pondje, ngeno ohandi ku xupita,
Nokape na nande oumwe ta tondo nge.
2 Ngeno ohandi ku kwatele komesho;
Ngeno ohandi ku twala meumbo lameme,
Oo a honga nge.
Ngeno ohandi ke ku pa omaviinyu a tulwa oihemba u nwe,
Omeva oiimati yogranati.
3 Eke laye lokolumosho, ngeno oli li koshi yomutwe wange,
Neke laye lokolulyo, ngeno ola papatela nge.
4 Ohandi mu anifa, nye oukadona vomuJerusalem:
Inamu kendabala okupendula, ile okutukulula ohole mwaame fiyo osheshi oyo vene ye uya.”
5 “Olyelye winya te uya tadi mombuwa,
A yaamena komuholike waye?”
“Onde ku pendula koshi yomuapula.
Nyoko oko a li ta fetelwa keteelelo loye.
Oo e ku dala oko a li ta fetelwa oko.
6 Tule nge komutima woye ngaashi oshihakifo,
Ngaashi oshihakifo kokwooko kwoye,
Osheshi ohole oi na eenghono, ngaashi ashike efyo,
Nohole ya twa kekipa, ngaashi ashike Ombila.*
Omalaka ayo oo omundilo wa tema, omalaka omundilo waJah.*
7 Omeva taa ndwafuka itaa dulu okudima ohole,
Nomilonga itadi dulu oku i kungulula po.
Ngeno omunhu oku yandje po eliko alishe lomeumbo laye omolwohole,
Ngeno ota* dinika filufilu.”
8 “Otu na okamwamemekadona,
Noka ke na omavele.
Ohatu ka ninga po shike shi na sha nokamwamemekadona
Mefiku omo taka endelwa?”
9 “Ngeno oka li ekuma,
Ngeno ohatu ka tungila kuko ekuma leameno loshisilveri,
Ashike ngeno oka li omuvelo,
Ngeno ohatu idile po noipilangi yomusederi.”
10 “Ame ekuma,
Nomavele ange oku li ngaashi eeshungongulu.
Onghee momesho aye, ondi li ngaashi
Oo e udite ombili.
11 Salomo oku na oshikunino shomandjebele muBaal-hamon.
Oshikunino osho okwe shi lineekelela ovanailonga.
Keshe umwe oha eta mo oisilveri eyovi omolwoiimati yasho.
12 Ondi na oshikunino shange shomandjebele.
Oisilveri eyovi* oyoye, ove Salomo,
Nomafele avali oyaavo hava file oshisho oiimati yasho.”
13 “Ove ou ho kala moikunino,
Ookaume ohava udu ondaka yoye.
Nandi i ude.”
14 “Endelela, omuholike wange,
Kala ho endelele ngaashi omenye,
Ile onyati yondume yonyasha
I li keemhunda doihemba.”
Ile “Eimbilo la denga mbada.”
Eln., “Shile nge.”
Ile “hokolole.”
Sha hala okutya, ovakainhu ovanyasha.
Ile “omwenyo wange u hole.”
Ile “oshikaiwa sheefya.”
Ile tashi dulika, “di li mokati komapando.”
Ile “vongonga.”
Eln., “Omaadi edimba liwa.”
Ile “Ou na ondjelo iwa.”
Ile “yeumbo la kula.”
Ile “oshidimba.”
Eln., “meumbo li na omaviinyu.”
Ile “Efimbo lodula.”
Eln., “efiku inali fuda.”
Ile tashi dulika, “eemhunda domifya.” Ile “meemhunda daBeter.”
Ile “omwenyo wange u hole.”
Ile “omwenyo wange u hole”
Ile “patolola.”
Ile “omwenyo wange u hole.”
Ile “omwenyo wange u hole.”
Oshipundi sha uvikwa, osho hashi longifwa mokuhumbata omunhu a fimana.
Ile “oshikoroni shiwa; oshidingo.”
Ile “Eembadu.”
Eln., “efiku inali fuda.”
Ile “komhunda yaLibanon.”
Ile tashi dulika, “Oshipa.”
Ile “oshikunino.”
Oshimbodi shedimba liwa.
Ile “Fudila nawa.”
Ile “Omwenyo wange owa nuka mo.”
Ile tashi dulika, “Omwenyo wange owa nuka mo, eshi a popya.”
Ile “patolola.”
Ile “oshikaiwa.”
Ile tashi dulika, “ngaashi omashila omadakala.”
Ile tashi dulika, “pomunghulo wofifiya.”
Eln., “Oshihokohoko.”
Ile “Oshilando shiwa.”
Ile “Eembadu.”
Eln., “a koshoka.”
Eln., “tale pedu.”
Ile “tutuma.”
Ile “Omwenyo wange.”
Ile “ovanhu vange ovo hava yakula nehalo liwa.”
Ile “ondanisa yaMahanaim.”
Ile “Omafiga.”
Eln., “Nomutwe woye.”
Ile “mangwa.”
Ile “oma-date.”
Eln., “Noshihokohoko.”
Ile “tutuma.”
“Ovakainhu ova li hava li oiimati yoshimeno osho (sho-mandrake), molwaashi ova li hava diladila kutya otai va kwafele va dale ounona.”
Sha hala okutya, kOufi. Tala Omafatululo oitya.
“Jah” exupipiko ledina Jehova.
Ile tashi dulika, “ye.”
Eln., “Eyovi.”