EMBO LAJESAJA

1 Emoniko olo Jesaja,* omonamati waAmos, a mona li na sha naJuda naJerusalem, pefimbo laUssia, Jotam, Ahas naHiskia, eehamba daJuda:

2 Alikana, eulu, pwilikina, alikana, edu, yandja elitulemo,

Osheshi Jehova okwa popya a ti:

“Onda tekula, nonda kulika ovanamati,

Ashike ova tukululila nge oshibofa.

3 Ongobe yomhedi oi shii oo e i landa,

Nondongi oi shii etemba lamwene wayo;

Ndele Israel ke shii nge,*

Ovanhu vange kave udite ko.”

4 Woo! Oshiwana osho oshilunde,

Ovanhu ovo hava nyono luhapu,

Oludalo lovanhu ovakolokoshi; ounona va nyonauka!

Ove liteeka po Jehova;

Inava fimaneka omuyapuki waIsrael;

Ove mu pilamena.

5 Openi vali tamu dengwa, eshi tamu weda ko kounashibofa weni?

Omutwe aushe otau vele,

Nomutima aushe ou na omukifi.

6 Okudja koshi yomhadi fiyo okomutwe, kape na osho shi na oukolele.

Ope na oipute, omadidimika noipute italala

Inai hakulwa,* yo inai mangwa, noinai pupalekwa nomaadi.

7 Oshilongo sheni osha ninga eputu.

Oilando yeni oya xwikwa po nomundilo.

Ovanailongo ova xwaka po oshitukulwa sheni moipafi yeni.

Osha fa ombuwa, oyo ya hanaunwa po kovanailongo.

8 Omonakadona waSion okwa fyaala po a fa etala* li li moshikunino shomandjebele,

Ngaashi onduda mepya leekukumba,*

Ngaashi oshilando sha kondekwa.

9 Ngeno Jehova womatangakwaita ka efele pa xupe vamwe vanini,

Ngeno otwa ninga ngaashi Sodom,

Notwa kala ngaashi Gomorra.

10 Udeni ondjovo yaJehova, nye ovaleli* vomuSodom.

Yandjeni elitulemo komhango* yaKalunga ketu, nye ovanhu vomuGomorra.

11 “Omayambo eni mahapu otaa etele nge ouwa washike?” Jehova osho ta ti.

“Onda loloka omaxwikiloyambo eni eedi deendume nosho yo oinghene yoinamwenyo ya paluka nawa,

Noinandi hokwa ohonde yeendumetana, yeedjona noyoikombo.

12 Eshi tamu uya okuholoka koshipala shange,

Olyelye e mu pula mu ninge oshinima eshi,

Okulyataula omikala dange?

13 Inamu eta vali eendjayambo dongaho.

Oitwiminifo yeni yedimba liwa oitondifa kwaame.

Eemwedi dipe, omashabata neshivo loyoongalele

Itandi dulu okulididimikila elongifo loumhulile moshoongalele sheni shiyapuki.

14 Onda* loloka eemwedi deni dipe noivilo yeni.

Oya ninga omutengi kwaame;

Onda loloka oku i lididimikila.

15 Nongeenge mwa yelula omake eni,

Ohandi alula ko omesho ange kunye.

Nonande omu ilikane omailikano mahapu,

Ame itandi pwilikine;

Omake eni oku yadi ohonde.

16 Likosheni; kaleni mwa yela;

Kufei ko oilonga yeni ii koshipala shange;

Inamu longa vali owii.

17 Lihongeni okulonga ouwa, kongeni ouyuki,

Pukululeni omuhepeki,

Popileni oufemba wokaana, oko kehe na xe,*

Nokupopila oshikoya shomufiyekadi.”

18 “Ileni, tu yukifeni oinima pokati ketu,” Jehova osho ta ti.

“Nonande omatimba eni oku kale atilyana

Otaa ka ningwa atoka, ngaashi olumi;*

Nonande oku kale atilyana a fa elapi leengodi ditilyana,

Otaa ka kala ngaashi olududi leedi litoka.

19 Ngeenge omwa ulike kutya omu na ehalo nomwa pwilikine,

Otamu ka lya oinima iwa yomoshilongo.

20 Ashike ngeenge omwa anye, ndele tamu tukula ounashibofa,

Otamu ka fya keongamukonda,

Osheshi okanya kaJehova oke shi popya.”

21 Oshilando shidiinini osha ninga ombwada.

Sho osha li shi yadi ouyuki;

Musho omwa li hamu kala osho sha yuka,

Ashike paife ovadipai.

22 Oshisilveri sheni osha ninga olushu,

Nobiila* yeni oya haulwa nomeva.

23 Omalenga eni oku na omitwe dikukutu, noku li ookaume keembudi.

Keshe umwe womuvo oku hole ombubo, nota lalakanene okupewa sha.

Ihava ulikile ovo vehe na ooxe* ouyuki,

Nekemo lomufiyekadi ihali fiki ko kuvo.

24 Onghee hano, Omwene washili, Jehova womatangakwaita,

Omunaenghono waIsrael, ota ti:

“Osha wana! Ohandi ke likanyuna ovakondjifi vange.

Nohandi ka handukila ovatondi vange.

25 Ohandi ke mu handukila neke lange,

Ohandi ka kufa po olushu leni nomeva omute,

Nohandi ka kufa po onyata yeni aishe.

26 Ohandi ka nangeka po vali ovatokoli, ngaashi sha li pehovelo

Novayandjimayele voye, ngaashi sha li nale.

Konima yaasho, oto ka ifanwa Oshilando shOuyuki, nOdoolopa Idiinini.

27 Sion otashi ka kulilwa nouyuki,

Novanhu vasho, ovo tava aluka, onaasho sha yuka.

28 Ovanashibofa novalunde otava ka hanauninwa po oshita,

Naavo tava efa po Jehova otava ka xula po.

29 Osheshi otava ka fya ohoni omiti da kula, odo mwa li mwa hala,

Nanye otamu ka lengifwa omolwoikunino* oyo mwa hoolola.

30 Osheshi otamu ka kala ngaashi omuti wa kula u na omafo taa lembe,

Nongaashi oshikunino shihe na omeva.

31 Omunhu, oo e na eenghono, ota ka ninga oluhoni,*

Noilonga yaye ohandje;

Aishe otai ka ya pombada ya tema,

Nopehe na oo te i dimi.”

2 Eshi osho Jesaja, omonamati waAmos, a mona shi na sha naJuda nosho yo Jerusalem:

2 Pexulilo lomafiku,*

Omhunda yeumbo laJehova

Otai ka kala ya pamenenena kombada yeemhunda,

Notai ka yeluka kombada yoikulundudu,

Noiwana aishe oko tai ka mbobolokela.

3 Novanhu vahapu oko tava ka ya, ndele tava ti:

“Ileni, tu londeni komhunda yaJehova,

Keumbo laKalunga kaJakob.

Ote ke tu honga eendjila daye,

Nohatu ka enda momalila aye.”

Osheshi omhango* otai ka dja muSion,

Nondjovo yaJehova omuJerusalem.

4 Ota ka tokola pokati koiwana,

Nota ka yukifa oinima* i na sha novanhu vahapu.

Otava ka hambula omaongamukonda avo a ninge omatemo oipululo,

Nomaonga avo a ninge oikashulifo.

Oiwana itai ka yelulila vali oiwana ikwao eongamukonda,

Noitai ke lihonga vali oita.

5 Akutu, eumbo laJakob, ila,

Natu endeni mouyelele waJehova.

6 Osheshi ove owa ekalashi ovanhu voye, eumbo laJakob,

Molwaashi ove yadi oinima ya dja koushilo;

Ohava longifa oupule ngaashi Ovafilisti,

Nova panga oukaume novana vovanailongo.

7 Edu lavo oli yadi oshisilveri noshingoli,

Nomamona avo itaa dulu okuvalulwa.

Edu lavo oli yadi eenghambe,

Nomatemba avo itaa dulu okuvalulwa.

8 Edu lavo oli yadi oikalunga yongaho.

Ohave linyongamene oshilonga shomake avo,

Oinima oyo ominwe davo da ninga.

9 Onghee omunhu oo he i linyongamene ota fifwa ohoni,

Noito ke va dimina po nandenande.

10 Indeni memanya, ndele tamu hondama mondwi

Omolwokukala po kwaJehova kutilifa,

Noshinge shaye shinene.

11 Omesho omulinenepeki otaa ka fifwa ohoni,

Novanhu ovo ve na ounhwa otava ka tulwa pedu.*

Jehova mwene ota ka tumbalekwa mefiku olo.

12 Osheshi efiku olo olaJehova womatangakwaita.

Otali ka hanga omulinenepeki keshe nosho yo oo e na ounhwa,

Keshe umwe, kutya nee okwa tumbalekwa, ile okwa dinika,

13 Otali ka hanga omisederi adishe domuLibanon odo da fimana noda tumbalekwa,

Notali ka hanga omiti adishe da kula domuBasan,

14 Otali ka hanga eemhunda adishe da fimana,

Notali ka hanga oikulundudu aishe ile,

15 Otali ka hanga oshungongulu keshe ile, nakeshe ekuma la pama,

16 Otali ka hanga eeskepa adishe dokuTarsis,

Notali ka hanga eewato adishe diwa.

17 Omunhu omulinenepeki ota ka xulifwa po,

Novanhu ovo ve na ounhwa otava ka tulwa pedu.*

Jehova mwene ota ka tumbalekwa mefiku olo.

18 Oikalunga yongaho otai ka xula po filufilu.

19 Novanhu otava ka ya momakololo omamanya

Nomomalambo, oo e li koshi yedu,

Omolwokukala po kwaJehova kutilifa,

Noshinge shaye shinene,

Eshi ta ka kakamifa edu, nokutilifa ovanhu.

20 Mefiku olo, ovanhu otava ka kufa oikalunga yavo yongaho yoshisilveri noyoshingoli,

Oyo ve liningila vo vene, ve i linyongamene,

Noku i umbila keemhuku* nokomalimalima,

21 Opo va dule okuya momakololo omamanya

Nomomifya domamanya,

Omolwokukala po kwaJehova kutilifa,

Noshinge shaye shinene,

Eshi ta ka kakamifa edu, nokutilifa ovanhu.

22 Efei po okulineekela momunhu oo ehe kwete okufya omolwouwa weni vene,

Oo e li ashike omufudo womomayulu aye.*

Omolwashike e na okutalika ko a fimana?

3 Osheshi tala, Omwene washili, Jehova womatangakwaita,

Ota ka xulifa po ekwafo neyambidido keshe muJerusalem nomuJuda,

Omakwafo aeshe omungome noomeva,

2 Omulumenhu omunaenghono nomukwaita omuladi,

Omutokoli nomuprofeti, omupopi neemhepo nomunamido,

3 Elenga tali pashukile omi-50, omufimanekwa nomuyandjimayele,

Kapyoko moumhulile nomudeuli omunawino moulodi.

4 Ovamati ohandi ke va ninga omalenga avo,

Naava vehe na ondjele* otave ke va pangela.

5 Ovanhu otava ka fininikafana,

Keshe umwe omunhu mukwao.

Okamati otaka ka denga omulumenhu omunamido,

Nomunhu oo ina fimana ota ka dina omufimanekwa.

6 Keshe umwe ota ka kwata omumwainamati womeumbo laxe, ndele ta ti:

“Ou na ondjafa, ninga omuwiliki wetu.

Pashukila onduba yoikulukuma ei ya hanaunwa po.”

7 Ashike ota ka anya mefiku olo ta ti:

“Itandi ningi omumangululi woipute yeni;*

Kandi na oikulya, ile oikutu meumbo lange.

Inamu ninga nge omuwiliki wovanhu.”

8 Osheshi Jerusalem osha hanaunwa po,

Na Juda osha teka po,

Molwaashi ova ulika meendjovo nomoilonga kutya ove li omhinge naJehova;

Ova tukula oshibofa moipafi yoshinge shaye.*

9 Omalinyengo avo okoshipala otae shi ulike,

Nohava hepaulula oulunde wavo, ngaashi Sodom;

Ihava kendabala oku u holeka.

Woo vo,* molwaashi otave lietele oupyakadi vo vene!

10 Lombwela ovayuki kutya otashi ke va endela nawa;

Otava ka pewa ondjabi omolwoilonga yavo.*

11 Woo omukolokoshi!

Ota ka hangwa koshiponga,

Osheshi osho a longa nomake aye osho ta ka ningilwa yo!

12 Shi na sha novanhu vange, ovayandji vavo voilonga ovakwanyanya,

Notava pangelwa kovakainhu.

Ovanhu vange, ovawiliki veni otave mu elaelifa,

Notava pukifa eendjila deni.

13 Jehova ota katuka onghatu a tokole;

Ota fikama, a handukile ovanhu.

14 Jehova ota ka tokola ovakulunhu nomalenga oshiwana shaye.

“Omwa xwika po oikunino yomandjebele,

Naashi mwa vaka kohepele oshi li momaumbo eni.

15 Omolwashike mwa nyanyaulila ovanhu vange, nokudedaula medu oipala yeehepele?”

Omwene Omunamapangelo aeshe, Jehova womatangakwaita, osho ta ti.

16 Jehova ota ti: “Molwaashi oukadona vomuSion ove na ounhwa,

Tava ende va yelula omitwe davo pombada,*

Tava ilaula omesho avo, tava ende tava ndingula,

Tava kwelengedjifa oivela yopeemhando davo,

17 Jehova ota ka denga yo omitwe dovanakadona vaSion di ninge eembole,

Na Jehova ote ke va ninga eengwala meembaba doipala.

18 Mefiku olo, Jehova ota ka kufa po ewapalo loivela yavo yopoikesho,

Oukaiwa nosho yo oivela i li molupe lomwedi,

19 Outenda vomomatwi, oivela yoposhikesho nomaluviluvi,

20 Omambale, oivela yopeemhando nosho yo omapaya oponhulo* okufeweka,

Oukende vomaadi edimba liwa* nosho yo oiketi,*

21 Eelinga dokominwe neelinga domomayulu,

22 Oikutu yoivilo, oikutu yokombada, eendjafa noundjato vopeke,

23 Omasipili opeke noikutu yoliina,*

Omambale nosho yo omaluviluvi.

24 Ponhele yomaadi o-balsam, otapa ka kala edimba tali nyika nai;

Ponhele yomwiya, ongodi;

Ponhele yomapando mawa, ongwala;

Ponhele yoshikutu shondilo, oshikutu shoshako;

Noshihako, ponhele yewapalo.

25 Ovalumenhu voye otava ka fya keongamukonda,

Novalumenhu ovanaenghono otava ka fila molwoodi.

26 Oivelo yasho otai ka lila nokunyika oluhodi,

Notashi ka kala omutumba pedu sha mbuwapala.”

4 Novakainhu vaheyali otava ka kwata omulumenhu umwe mefiku olo tava ti:

“Ohatu ka lya omungome wetu vene,

Nohatu ka djala oikutu yetu vene;

Tu pitika ashike tu ifanwe nedina loye,

Opo tuha kale twa fya ohoni.”*

2 Mefiku olo, osho Jehova a ningifa shi twiyuke otashi ka kala shikumwifi nosha tumbala, noiimati yomoshilongo otai ka kala etumba newapalo koshixupe shOvaisrael. 3 Keshe oo ta kala muSion nota fyaala muJerusalem ota ka ifanwa omuyapuki, aveshe ovo ve li muJerusalem va shangwa va ka mone omwenyo.

4 Jehova ota ka kosha po onyata* yovanakadona vaSion, nota ka kufa po etimba lohonde yaJerusalem mokati kasho nomhepo yetokolo nosho yo nomhepo ya xwama.* 5 Jehova ota ka tula yo konhele aishe yOmhunda Sion nosho yo konhele yoyoongalele yasho oshilemo nosho yo omwifi omutenya, nouyelele womundilo wa tema oufiku; osheshi koinima aishe ya tumbala otaku ka kala omudile. 6 Notapa ka kala etwali lomudile omutenya omolwoupyu nosho yo ehondameno neameno omolwoshikungulu nodula.

5 Alikana, nandi imbile po omuholike wange

Eimbilo li na sha naao ndi hole nosho yo oshikunino shaye shomandjebele.

Omuholike wange oku na oshikunino shomandjebele shi li komunghulo woshikulundudu hashi mene nawa.

2 Okwa fa mo, nokwa tuta mo omamanya.

Okwa kuna mo omandjebele mawa atilyana,

Ta tungile mo oshungongulu mokati kasho,

Nokwa hokela mo oshikolelo shomaviinyu musho.

Opo nee okwa kala a teelela shi ime omandjebele mawa,

Ndele osha ima ashike omandjebele omofuka.

3 “Ndele paife, nye ovakalimo vomuJerusalem novanhu vomuJuda,

Alikana, tokoleni pokati kange noshikunino shange shomandjebele.

4 Oshike vali nda li handi dulu okuningila oshikunino shange shomandjebele,

Osho inandi ninga nale?

Omolwashike eshi nda li nda teelela shi ime omandjebele mawa,

Sha ima ashike omandjebele omofuka?

5 Alikana, paife nandi mu lombwele

Osho handi ka ningila oshikunino shange shomandjebele:

Ohandi kufa po ongubu yasho,

Notai ka xwikwa po.

Ohandi ka hanauna po ekuma lasho lomamanya,

Notashi ka lyataulwa.

6 Ohandi ke shi ninga ombuwa;

Itashi ka kokolwa, ile shi limwe.

Otashi ka mena omano noimbodi ihapu,

Nohandi ka lombwela oilemo ihe shi tumine odula nandenande.

7 Osheshi oshikunino shomandjebele shaJehova womatangakwaita osho eumbo laIsrael;

Ovalumenhu vomuJuda ovo oshikunino,* osho a li e hole.

Okwa kala a teelela ouyuki,

Ndele tala! opa li okuhe na ouyuki;

Osho sha yuka

Ashike tala! omalilaano omolwoudjuu.”

8 Woo ovo hava tula kumwe eumbo neumbo,

Naavo hava tula kumwe epya nepya,

Fiyo osheshi pehe na vali onhele

Nonye ashike hamu kala moshilongo!

9 Jehova womatangakwaita okwa ana momatwi ange

Kutya omaumbo mahapu, nonande omanene nomawa,

Otaa ka ninga oshinima shitilifi,

Ehe na ovakalimo.

10 Osheshi eehekta nhee* doshikunino shomandjebele otadi ka dja ashike obata imwe,*

No-homer imwe* yombuto otai ka dja ashike oefa imwe.*

11 Woo ovo hava meneke ongula inene, va nwe oikolwifa,

Ovo hava kala po fiyo omokati koufiku, fiyo omaviinyu e va kola!

12 Ove na okaxumbafeta noshishikomwa sheengodi,

Okangoma, onyalilo nomaviinyu poivilo yavo;

Ashike ihava konakona oilonga yaJehova,

Noihava mono oilonga yomake aye.

13 Onghee ovanhu vange otava ka ya moukwatwa

Omolwokuhe na eshiivo;

Ovanhu vavo ovo va fimanekwa otava ka fya ondjala,

Novanhu vavo aveshe otava ka fya enota.

14 Onghee Ombila* oye litamununa mo*

Noya makula okanya kayo ka pwa ko filufilu nopehe na ongaba;

Newapalo loshilando osho,* eengudu dasho odo hadi weelele, naavo hava kala musho va hafa

Otava ka ya shili muyo.

15 Novanhu otave ke linyongamena;

Ovanhu otava ka ninipikwa,

Nomesho ovalinenepeki otaa ka fifwa ohoni.

16 Jehova womatangakwaita ota ka tumbalekwa ketokolo* laye;

Kalunga kashili, Omuyapuki, ote ke liyapulifa pauyuki.

17 Needjona otadi ka lya da fa di li moulifilo wado;

Ovanailongo otava ka lya meenhele odo da ninga omaputu, omo hamu kala oinamwenyo oyo ya paluka nawa.

18 Woo ovo hava shili omatimba avo neengodi doukengeleledi,

Noulunde wavo oneengodi detemba;

19 Ovo hava ti: “Na endelelife oilonga yaye;

Nai uye diva, opo tu i mone.

Elalakano* lomuyapuki waIsrael nali wanifwe,

Opo tu li shiive!”

20 Woo ovo hava ti ouwa oo owii, nowii oo ouwa,

Ovo hava pingakanifa omulaulu nouyelele, nouyelele onomulaulu,

Ovo hava ningi oululu ounyenye, nounyenye oululu!

21 Woo ovo ovanongo momesho avo vene

Novanaendunge moipafi yavo vene!

22 Woo kwaavo hava nu omaviinyu sha pitilila,

Nokovanhu ovo va pyokoka mokulumbakanifa omaviinyu,

23 Ovo hava mangulula omukolokoshi omolwombubo,

Naavo hava anye okuulikila omuyuki ouyuki!

24 Onghee hano, ngaashi ashike elaka lomundilo hali lungwinifa po oshihati,

Nomwiidi mukukutu hau lungwina po momalaka omundilo,

Omidi davo vene otadi ka ola,

Neenhemo davo otadi ke lihana ngaashi ombudu,

Molwaashi ova anya omhango* yaJehova womatangakwaita

Noinava fimaneka ondjovo yOmuyapuki waIsrael.

25 Nomolwaashi Jehova ota ka handukila neenghono oshiwana shaye,

Note ke shi yelulila eke laye, noku shi dipaa.

Eemhunda otadi ka kakama,

Noimhu yavo otai ka kala ya fa oimbodi i li momapandavanda.

Omolwoinima aishe oyo, ehandu laye inali lota,

Ashike natango eke laye ola yeluka, opo e shi dipae.

26 Okwa yelulila oshiwana shokokule edidiliko;*

Okwe va shikila omwilwa ve uye tava di kominghulo dedu;

Ndele tala! ove uya tava endelele.

27 Kape na umwe mokati kavo a loloka, ile a punduka.

Kape na umwe a kwatwa keemhofi, ile a kofa.

Eemwiya domoiya yavo inadi yululuka,

Neemwiya deenghaku davo inadi tokoka.

28 Oikuti yavo aishe oya honga,

Nomauta avo aeshe okwa lukilwa.*

Omakondo eenghambe davo okwa fa emanya li na eemhemo,

Nomalola avo okwa fa oshikungulu shomhepo.

29 Okukumba kwavo okwa fa kwonghoshi;

Ohava kumbu ngaashi eenghoshi deenyasha.*

Ohava ono, nokukwata po oshihakanwa,

Nohava i nasho nopehe na oo te shi xupifa.

30 Mefiku olo, otava ka ona, konima eshi ve shi kwata ko

Ngaashi okupopoma kwefuta.

Keshe oo ta ka tala oshitukulwa osho ota ka mona omulaulu utilifa;

Nokuli nouyelele otau ka ninga omulaulu omolwoilemo.

6 Modula oyo ohamba Ussia ya fya, onda mona Jehova e li omutumba kolukalwapangelo laye la tumbala nolinene, noshikutu shaye osha li sha yalalala motembeli. 2 Ovaserafi ova li ve li ofika kombada yaye; keshe umwe okwa li e na omavava ahamano. Keshe umwe* okwa li a uvika oshipala shaye naavali, nokwa uvika eemhadi daye naavali, nakeshe umwe okwa li ta tuka naavali.

3 Naumwe okwa ingida mukwao ta ti:

“Omuyapuki, omuyapuki, omuyapuki oJehova womatangakwaita.

Edu alishe ola yadifwa noshinge shaye.”

4 Nomakandula omivelo okwa kakama kewi tali ingida,* neumbo ola li la yadifwa omwifi.

5 Opo nee onda tya: “Woo ame!

Ohandi fi shili,*

Osheshi ame omunhu e na omilungu da nyata,

Nohandi kala mokati kovanhu ve na omilungu da nyata;

Osheshi omesho ange okwa mona Ohamba, Jehova womatangakwaita mwene!”

6 Opo nee umwe womovaserafi okwa tukila kwaame, nomeke laye omwa li ekala la hanya, olo a kufa noshikwatifo koaltari. 7 Okwa kuma okanya kange, ndele ta ti:

“Tala! Ola kuma omilungu doye.

Etimba loye ola kufwa po,

Nenyono loye ola dimwa po.”

8 Opo nee onda uda ondaka yaJehova tai ti: “Olyelye handi mu tumu, nolyelye te tu ile ko?” Nonda ti: “Aame ou! Tume nge!”

9 Nokwa nyamukula a ti: “Inda, ndele to ti kovanhu ava:

‘Otamu ka kala tamu pwilikine lwoikando noikando,

Ashike itamu ka uda ko;

Otamu ka kala tamu tale lwoikando noikando,

Ashike itamu ka mona eshiivo lasha.’

10 Kukutika omitima dovanhu ava,

Fitika omatwi avo,

Nokufifikinifa omesho avo,

Opo vaha dule okumona ko nomesho avo,

Novaha ude ko nomatwi avo,

Opo omitima davo diha ude ko,

Novehe lialuluke nokuvelulwa.”

11 Onda ti: “Fiyo onaini, O! Jehova?” Opo nee okwa tya:

“Fiyo osheshi oilando ya hanaunwa po filufilu muhe na ovakalimo,

Nomaumbo muhe na ovanhu,

Nedu la hanaunwa po, nola ninga ombuwa;

12 Fiyo osheshi Jehova a taataelashi ovanhu,

Noshitukulwa sha kula shedu otashi ka mbuwapala filufilu.

13 “Ashike nande ongaho, natango otapa ka fyaala oshitimulongo shomulo, notashi ka xwikwa po natango, ngaashi omuti wa kula nongaashi omuti munene, odo lwanima ngeenge da tetwa po, tapa ka fyaala oshifidi; oludalo liyapuki otali ka tutuma moshifidi.”

7 Pefimbo laAhas, omonamati waJotam, omonamati waUssia, ohamba yaJuda, Resin, ohamba yaSiria nosho yo Peka, omonamati waRemalia, ohamba yaIsrael, ove uya okulwifa Jerusalem, ashike ina* dula oku shi kwata ko. 2 Eumbo laDavid ola li la lombwelwa kutya: “Siria okwe limanga kumwe naEfraim,”

Nomutima waAhas nosho yo omitima doshiwana shaye oda li da hovela okukakama, ngaashi omiti domomufitu tadi shikwa komhepo.

3 Opo nee Jehova okwa lombwela Jesaja ta ti: “Alikana, inda u ka shakeneke Ahas, ove nomonamati woye Sear-jasub,* koxulo yomukangha* wetale, olo li li komulondo, pondjila oyo ya finda konhele yovakoshi voikutu. 4 Ou na oku mu lombwela kutya, ‘Kendabala u kale wa ngungumana. Ino tila, noino teka omukumo omolwoifidi, oyo ivali tai twimaana omwifi, omolwehandu la xwama laResin naSiria nosho yo lomonamati waRemalia. 5 Osheshi Siria naEfraim nosho yo omonamati waRemalia ove ku pangelela omhangela ii tava ti: 6 “Natu ye, tu ka lwife Juda, noku shi teyaula po,* noku shi finda,* shi ninge shetu, ndele hatu hoolola omonamati waTabeel, a ninge ohamba yasho.”

7 “‘Eshi osho Omwene Jehova Omunamapangelo aeshe ta ti:

“Itai ka pondola,

Noitai ka wanifwa.

8 Osheshi omutwe waSiria oDamaskus,

Nomutwe waDamaskus oResin.

Moule ashike weedula 65,

Efraim otashi ka hanaunwa po filufilu, noitamu ka kala vali ovanhu.

9 Omutwe waEfraim oSamaria,

Nomutwe waSamaria omonamati waRemalia.

Itamu ka kala mwa pamenenena,

Shapo ongeenge mu na eitavelo la kola.”’”

10 Jehova okwa twikila okupopya naAhas ta ti: 11 “Pula edidiliko kuJehova Kalunga koye; otali dulu okukala la ya moule ngaashi Ombila,* ile li li pombada ngaashi ewangadjo.” 12 Ashike Ahas okwa ti: “Itandi pula, noitandi yeleke Jehova.”

13 Opo nee Jesaja okwa tya: “Alikana, pwilikina, ove eumbo laDavid. Mbela inashi wana, eshi mwa yeleka elididimiko lovanhu? Mbela omu na yo okuyeleka elididimiko laKalunga? 14 Onghee hano, Jehova ye mwene ote ke ku pa edidiliko: Tala! Omukainhu omunyasha* ota ka ninga oufimba, ndele ta ka dala okaana kokamati, note ke ka luka Immanuel.* 15 Otaka ka lya ombuta nomaadi eenyiki pefimbo olo taka ka kala ke shii nghee ke na okuhenuka owii, nokuhoolola osho shiwa. 16 Osheshi fimbo okamati oko inaka shiiva nghee ke na okuhenuka owii, nokuhoolola osho shiwa, edu leehamba mbali, odo wa tila, otali ka ninga eputu filufilu. 17 Jehova ote ke ku etela, ove, noshiwana shoye nosho yo eumbo laxo, efimbo olo inali kala ko nande onale, okudja ngoo efiku olo Efraim e litukula ko kuJuda, osheshi ota ka eta ohamba yaAssiria.

18 “Mefiku olo, Jehova ota ka shikila omwilwa eedi okudja komakungulukilo okokule omulonga waNil womuEgipiti neenyiki domedu laAssiria, 19 naadishe otadi ke uya, ndele tadi kala momukulambo womafilu nomomifya demanya, komano aeshe naapeshe opo hapa kala omeva.

20 “Mefiku olo, Jehova ota ka longifa okambi ka ehelwa koshitukulwa shokomulonga,* okupitila mohamba yaAssiria, opo a kulule omutwe nolundele lokomaulu, notaka ka yeleka po yo eendjedi.

21 “Mefiku olo, omunhu ota ka kaleka nomwenyo ongobe yondema yomoufita nosho yo eedi mbali. 22 Nomolwouhapu womashini, ota ka lya ombuta, osheshi keshe umwe, oo ta ka fyaala medu olo, ota ka lya ombuta nomaadi eenyiki.

23 “Mefiku olo, keshe opo pa li hapa kala omindjebele 1 000, dongushu yoisilveri 1 000, otapa ka kala ashike omano noimbodi. 24 Ovanhu otava ka ya ko nomauta nosho yo oikuti, molwaashi edu alishe otali ka mena omano noimbodi. 25 Neemhunda adishe, odo da li hadi longwa netemo, ito ka ya popepi nado, osheshi oto ka kala wa tila omano noimbodi; otadi ka ninga oulifilo weengobe deemhedi, noshilyatelo sheedi.”

8 Jehova okwa lombwela nge ta ti: “Kufa oshipelende sha kula, ndele to shange ko noshishangifo shakwalukeshe,* ‘Maher-Saalal-Has-Bas.’* 2 Ndele to shi eta ndi shi kolekife pakushanga* keendombwedi mbali dashili, omupristeri Uria nosho yo Sakaria, omonamati waJeberekia.”

3 Opo nee onda nangala* nomuprofeti omukainhu,* ndele ta ningi oufimba, nomokweendela ko kwefimbo, okwa dala okaana okamati. Opo nee Jehova okwa lombwela nge ta ti: “Ka luka Maher-saalal-has-bas, 4 osheshi ofimbo okamati oko inaka shiiva okutya, ‘Tate!’ nosho yo ‘Meme!’ omaliko aDamaskus nosho yo oixuulwa yaSamaria otai ka iwa nayo kohamba yaAssiria.”

5 Jehova okwa popya vali naame ta ti:

6 “Molwaashi ovanhu ava ova anya omeva taa kunguluka nawa omuSiloa,*

Nova hafela Resin nosho yo omonamati waRemalia,

7 Onghee hano, tala, Jehova ote ke va tumina

Omeva e na eenghono nosho yo mahapu omulonga,*

Ohamba yaSiria nefimano layo alishe.

Otai ke uya komakungulukilo ayo aeshe omeva,

Notaa ka pitilila ominghulo daye adishe domulonga,

8 Nokupanukila muJuda.

Otaa ka yelula nokupita mo, taa tu fiyo opofingo;

Omavava aye ote ke a xwaananeka kombada yoshilando shoye,

Ove Immanuel!”*

9 Etifeni oshiponga, nye ovanhu, ashike nye otamu ka nyanyaulwa moinhimbu.

Pwilikineni, nye amushe, ovo mwa dja koitukulwa yokokule yedu!

Lilongekidileni olwoodi,* ashike nye otamu ka nyanyaulwa moinhimbu!

Lilongekidileni olwoodi, ashike nye otamu ka nyanyaulwa moinhimbu!

10 Pangeleni omhangela, ashike otai ka ponya!

Popyeni osho mwa hala, ndele itashi ka pondola,

Osheshi Kalunga oku li pamwe nafye!*

11 Jehova okwa kwata nge neke laye li na eenghono ta londwele nge ndi kale kokule nondjila yovanhu ava ta ti:

12 “Osho ovanhu tava ti omhangela inamu shi tala ko shi li omhangela.

Inamu tila osho va tila;

Inashi mu kakamifa.

13 Jehova womatangakwaita oye mu na okutala ko omuyapuki,

Oye mu na okutila,

Noye e na oku mu kakamifa.”

14 Ota ka kala ngaashi onhele iyapuki,

Ashike ongaashi emanya lokulipuma mulo,

Nongaashi endangalati lepundukifo

Komaumbo aeshe aIsrael,

Ngaashi omwiyo nosho yo elulo,

Kovakalimo vomuJerusalem.

15 Vahapu vomuvo otava ka punduka nokuwila po, ndele tava teka;

Otava ka yulwa nokukwatwa.

16 Tonya omukanda weshilipaleko;*

Pata omhango* mokati kovahongwa vange.

17 Ohandi kala nda teelela* Jehova, oo a holeka oshipala shaye eumbo laJakob, nohandi lineekele muye.

18 Tala, ame nounona, ovo Jehova a pa nge, otwa fa omadidiliko nosho yo oikumwifilonga muIsrael, oyo ya dja kuJehova womatangakwaita, oo ha kala kOmhunda Sion.

19 Nongeenge ova ti kunye: “Kongeni ekwafo keemhepo, ile kovaxunganeki vonakwiiwa, ovo hava sheketa nohava ngungutula,” mbela ovanhu kave na okukonga ekwafo kuKalunga kavo? Mbela ove na okukonga ekwafo koonakufya, ponhele yovanamwenyo? 20 Ponhele yaasho, ove na okukonakona omhango nosho yo omukanda weshilipaleko.*

Ngeenge itava popi metwokumwe nomhango ei, kave na ouyelele.* 21 Keshe umwe ota ka pita moshilongo a hepekwa, nokwa fya ondjala; ndele molwaashi okwa fya ondjala, nokwa lulilwa, ota ka tuka ohamba yaye nosho yo Kalunga kaye, eshi ta tale pombada. 22 Opo nee ota ka tala kedu, nota ka mona ko ashike oudjuu nomilaulu, oinima yongaho nomafimbo madjuu, omilaulu fokofoko, nokape na ouyelele.

9 Ashike omilaulu itadi ka kala ngaashi eshi edu la li moudjuu, ngaashi pomafimbo onale, eshi edu laSebulon nedu laNaftali a li taa ungaungwa nao nodino. Ndele mokweendela ko kwefimbo, ote ke a fimanekifa, ondjila oyo ya enda pefuta moshitukulwa shokomulonga waJordan, Galilea shoiwana.

2 Ovanhu ovo va li hava ende momilaulu,

Ova mona ouyelele wa twa.

Naavo hava kala koshitukulwa shomudidimbe mulaula fokofoko,

Ouyelele owe va minikila.

3 Owa hapupalifa oiwana;

Owe i ningifa i kale ya hafa unene.

Oya hafa koshipala shoye,

Ngaashi ovanhu hava kala va hafa pefimbo leteyo,

Ngaashi ovo hava kala va hafa, ngeenge tava tukula oixuulwa.*

4 Osheshi ondjoko youdjuu wavo owe i nyanyaula moipambu,

Odibo, oyo i li komapepe avo, onhaili yamwene wavo,

Ngaashi mefiku laMidian.

5 Onghaku keshe hai linyengifa edu, eshi tai ende,

Noshikutu keshe sha tuta kohonde,

Otai ka ninga omahooli omundilo.

6 Osheshi okaana oke tu dalelwa,

Otwa pewa okaana okamati;

Nokupangela* otaku ka kala komapepe ako.

Nedina lako otali ka kala Omuyandjimayele Mukumwifi, Kalunga Omunaenghono, Xe yaAlushe, Ohamba yOmbili.

7 Okupangela* kwako itaku ka kala ku na ongaba,

Nombili itai ka xula po,

Ota ka kala kolukalwapangelo laDavid nomouhamba waye,

Opo e u dike po wa pamenenena, noku u kaleka po

Mokutokola pauyuki nokulonga osho sha yuka,

Okudja paife nofiyo alushe.

Ouladi waJehova womatangakwaita otau ke shi ninga.

8 Jehova okwa tumina Jakob etumwalaka letokolo,

Nola hanga yo Israel.

9 Novanhu aveshe otave ke shi shiiva,

Efraim nosho yo ovakalimo vomuSamaria,

Ovo hava popi nelinenepeko nosho yo nodino momitima davo tava ti:

10 “Eedopi oda ngumauka po,

Ashike ohatu ka tunga nomamanya a hongwa.

Omiti da fa omikwiyu* oda tetwa po,

Ashike ohatu ke di pingena po nomisederi.”

11 Jehova ote ke mu pendulila ovakondjifi vaResin

Nota ka ningifa ovatondi vaye va katuke onghatu,

12 Siria, okudja koushilo, nOvafilisti, okudja kouninginino,*

Otava ka xwaka po Israel nomakanya a ekama.

Omolwoinima aishe oyo, ehandu laye inali lota,

Ashike natango eke laye ola yeluka, opo e va dipae.

13 Osheshi ovanhu inava alukila kwaao e va denga;

Inava konga Jehova womatangakwaita.

14 Jehova ota ka teta mo muIsrael

Omutwe nomushila, oshitai nomwiidi mule,* mefiku limwe.

15 Omukulunhu naao a fimanekwa unene oye omutwe,

Nomuprofeti, oo ta yandje elombwelo loipupulu, oye omushila.

16 Ovo tava kwatele komesho ovanhu ava otave va elaelifa,

Naavo tava kwatelwa komesho ova ngwangwana.

17 Nomolwaashi Jehova ita ka hafela ovalumenhu vavo ovanyasha,

Noita ka fila onghenda ounona vavo, ovo vehe na ooxe,* nosho yo ovafiyekadi vavo,

Molwaashi aveshe ovashunimonima novalongi vowii,

Nokanya keshe ota ka popi oinima yongaho.

Omolwoinima aishe oyo, ehandu laye inali lota,

Ashike natango eke laye ola yeluka, opo e va dipae.

18 Osheshi oukolokoshi ohau xwike ngaashi omundilo,

Tau lungwinifa omano noimbodi.

Otau ka xwameka omufitu wa fita,

Notau ka ya pombada moilemo yomwifi.

19 Omolwehandu laJehova womatangakwaita,

Edu ola xwamekwa omundilo,

Novanhu otava ka ninga omahooli omundilo.

Kape na oo ta ka xupifa nokuli namumwaina.

20 Umwe ota ka teta kolulyo,

Ashike ota ka kala natango a fya ondjala;

Naumwe ota ka lya kolumosho,

Ndele ita ka kuta.

Keshe umwe ota ka xwaka po ombelela yokwooko kwaye,

21 Manasse ota ka xwaka po Efraim,

Na Efraim, oManasse.

Aveshe otava ka ponokela Juda.

Omolwoinima aishe oyo, ehandu laye inali lota,

Ashike natango eke laye ola yeluka, opo e va dipae.

10 Woo ovo hava tula po omaufomhango a nyika oshiponga,

Ovo hava shange alushe eemhango didjuu,

2 Opo va anyene eehepele oufemba wado,

Va lumbule ovadinwa mokati kovanhu vange ouyuki,

Ovafiyekadi ove va ninga oixuulwa* yavo,

Nova nyeka ounona, ovo vehe na ooxe,* oinima yavo.

3 Otamu ka ninga po shike mefiku letokolo,*

Eshi ehanauno tali ke uya tali di kokule?

Otamu ka ya onhapo kulyelye, e mu kwafele,

Nolyelye tamu ka fiila omaliko* eni?

4 Kape na osho tashi ka fyaala po, kakele kokulikoka mokati kovanadolongo,

Ile okuwila mokati kovadipawa.

Omolwoinima aishe oyo, ehandu laye inali lota,

Ashike natango eke laye ola yeluka, opo e va dipae.

5 “Aha! Ovaassiria,

Odibo yokuholola ehandu lange,

Nonhaili, oyo i li meke lavo, etokolo lange!

6 Ohandi ke mu tuma koshiwana oshishunimonima,

Kovanhu ovo va handukifa nge;

Ohandi ke mu lombwela a kufe oixuulwa ihapu, noku nyeke ko oinima ihapu,

Noku va lyataula ngaashi onhata momapandavanda.

7 Ashike ye ita ka kala a hala okuninga ngaho,

Nomutima waye hasho tau ka diladila ngaho;

Osheshi oshi li momutima waye a hanaune po,

Nokuxulifa po oiwana ihapu, ndele hainini.

8 Osheshi ota ti,

‘Mbela omalenga ange aeshe kae fi eehamba?

9 Hano Kalno ina fa Karkemis?

Ye Hamat ina fa Arpad?

Mbela Samaria ina fa Damaskus?

10 Eke lange ola kwata ko omauhamba oikalunga ihe na ekwafo lasha,

Oo oihongwafano yao ya li ihapu i dule yomuJerusalem nomuSamaria.

11 Mbela itandi ka ningila Jerusalem noikalunga yasho

Ngaashi nda ningila Samaria noikalunga yasho ihe na ekwafo lasha?’

12 “Ngeenge Jehova okwa manifa oilonga yaye aishe kOmhunda Sion nomuJerusalem, ota* ka handukila ohamba yaAssiria omolwokulinenepeka momutima wayo, ounhwa wayo nosho yo okutala nodino. 13 Osheshi otai ti,

‘Eshi ohandi ke shi ninga keenghono deke lange,

Nounongo wange, osheshi ame omunaendunge.

Ohandi ka kufa po eengaba dovanhu,

Nokunyeka ko omaliko avo,

Nohandi ka finda ovakalimo, ngaashi omunaenghono.

14 Ngaashi omunhu ta lovelele moshihadi,

Eke lange osho tali ka kwata ko omamona ovanhu;

Nongaashi omunhu ta ongele omai a fiwa po,

Osho handi ka ongela edu alishe!

Kape na oo ta ka papamifa omavava aye, ile a ekameke okanya kaye, ile a shekete.’”

15 Mbela ekuva otali ke litumbalekela ngoo oo he li kefa?

Mbela oshishaaxa otashi ke litumbalekela ngoo oo he shi shaaxifa?

Mbela onhaili otai dulu ngoo okuvikaavikila oo he i yelula?

Ile mbela odibo otai dulu tuu okufikamena oo ina longwa moshiti?

16 Onghee hano, Omwene washili, Jehova womatangakwaita,

Ota ka utamifa ovanhu vaye ovo va ondoka,

Nokoshi yefimano laye ota ka xwameka ko omundilo tau lungwinifa.

17 Ouyelele waIsrael otau ka ninga omundilo,

NOmuyapuki waye omalaka omundilo;

Otau ka xwama, notau ka lungwinifa po oimbodi yaye nomano aye mefiku limwe.

18 Ota ka hanauna po filufilu* efimano lomufitu waye noikunino yaye yomiti doiimati;

Otali ka kala ngaashi omunhu ta vele, oo ta nangatele.

19 Omiti adishe domomufitu waye

Otadi ka ninipala, nokamati otaka ka dula nokuli oku di valula.

20 Mefiku olo, ovo tava fyaala muIsrael,

Naavo tava xupu po meumbo laJakob

Itave ke lineekela vali mwaao he va ponokele;

Ashike otave ke lineekela muJehova,

Omuyapuki waIsrael, nokukala ovadiinini.

21 Oshixupe ashike tashi ka shuna,

Oshixupe shaJakob, kuKalunga Omunaenghono.

22 Osheshi nonande ovanhu voye, ove Israel,

Ova fa ehekedu lopomunghulo wefuta,

Oshixupe ashike shomuvo tashi ka shuna.

Ehanauno ola tokolwa nale,

Nouyuki* otau ke va hanga.

23 Heeno, ehanauno olo la tokolwa kOmwene Omunamapangelo aeshe, Jehova womatangakwaita,

Otali ka hanga oshilongo ashishe.

24 Onghee hano, eshi osho Omwene Omunamapangelo aeshe, Jehova womatangakwaita, ta ti: “Ovanhu vange, ovo hamu kala muSion, inamu tila omolwOmuassiria, oo a kala noku mu ponokela nodibo, noku mu yelulila onhaili yaye, ngaashi Egipiti a ningile. 25 Osheshi etokolo otali ke uya pexulilo meni lefimbo lixupi; ehandu lange otali ka yukifwa kehanauno lavo. 26 Jehova womatangakwaita ote ke mu denga nongola, ngaashi a finda Midian pemanya laOreb. Nonhaili yaye otai ka kala kombada yefuta, note ke i yelula, ngaashi a ningila Egipiti.

27 Mefiku olo, omutengi waye otau ka dja ko kepepe loye,

Nondjoko yaye otai ka dja ko kofingo yoye,

Nondjoko otai ka teyaulwa po omolwomaadi.”

28 Okwe uya kuAiyat;

Okwa pitila muMigron;

PuMikmas opo a tula eendongelwa daye.

29 Ova tauluka omulonga;

Oufiku ova kala puGeba;

Rama osha kakama, Gibea shaSaul osha ya onhapo.

30 Lila nokukuwa, ove omonakadona waGallim!

Yandja elitulemo, ove Laisa!

Akutu, ove Anatot!

31 Madmena osha ya onhapo.

Ovakalimo vomuGebim ova konga eenhele.

32 Mefiku eli, ota ka tula muNob.

Okwa tumbila eengonyo daye omhunda yomonakadona waSion,

Oshikulundudu shaJerusalem.

33 Tala! Omwene washili, Jehova womatangakwaita,

Ota tete ko oitai monghedi tai halwifa;

Omiti diledile otadi tetwa po,

Nomiti diledile unene oda ufwa po.

34 Okwa ponokela omufitu, oo wa fita, noshilongifo shoshivela shilaula,*

Na Libanon ota ka wifwa po komunaenghono.

11 Oshitutumine otashi ka kula okudja moshifidi shaIsai,

Noshitai sha dja momidi daye otashi ka ima oiimati.

2 Nomhepo yaJehova otai ka kala kombada yaye,

Omhepo younongo nosho yo yeendunge,

Omhepo yomayele nosho yo yeenghono,

Omhepo yeshiivo nosho yo yokutila Jehova.

3 Nota ka mona ehafo mokutila Jehova.

Ita ka tokola she likolelela kwaasho omesho aye e wete,

Noita ka pukulula she likolelela kwaasho omatwi aye taa udu.

4 Ota ka tokola ovadinwa pauyuki,

Nota ka yandja epukululo pauyuki ponhele yovalidiiniki* vokombada yedu.

Ota ka denga edu nodibo yokanya kaye,

Nota ka dipaa ovakolokoshi nomufudo* womilungu daye.

5 Ouyuki otau ka kala omwiya womoshiya shaye,

Noudiinini omwiya womeenho daye.

6 Embungu nodjona otai ka kala hai kala pamwe omafimbo amwe,

Nokakombwena nongwe otai ka nangala pamwe,

Nokatana nonghoshi* noshinamwenyo sha ondoka aishe otai ka kala pamwe;*

Notai ka lifwa kokamatyona.

7 Ongobe yodidi nemwangha otai ka lila pamwe,

Nounimwena vayo otava ka nangala pamwe.

Onghoshi otai ka lya omwiidi ngaashi ongobe yomhedi.

8 Okaana haka nyamu otaka ka danauka pomukwena wongolonyoka,

Nokaana ka tova otaka ka tula onyala yako komututu weyoka li na oudiyo.

9 Itava ka eta oshiponga shasha,

Ile oupyakadi washa komhunda yange aishe iyapuki,

Molwaashi edu otali ka kala li yadi filufilu eshiivo lokushiiva Jehova,

Ngaashi omeva a tuvikila efuta.

10 Mefiku olo, omudi waIsai otau ka fikama ngaashi edidiliko* lovanhu.

Oiwana otai ka konga ewiliko kuye,*

Nonhele yaye yetulumuko otai ka kala ya fimana.

11 Mefiku olo, Jehova ota ka yandja vali eke laye oshikando oshitivali, opo a xupife natango oshixupe shovanhu vaye, ovo va fyaala muAssiria, muEgipiti, muPatros, muKus, muElami, muSinar,* muHamat nosho yo kounhunhu vomefuta. 12 Ota ka yelulila oiwana edidiliko* nokwoongela Ovaisrael, ovo va halakanifwa, nota ka ongela Ovajuda, ovo ve lihanifwa, okudja keembinga nhee dedu.

13 Ondubo yaEfraim itai ka kala po vali,

Nosho yo ovo ve tonde Juda otava ka hanaunwa po.

Efraim ita ka twila vali Juda ondubo,

Na Juda ita ka kala vali e tonde Efraim.

14 Otava ka nhukanhuka koikulundudu* yOvafilisti kouninginino;

Otava ka kwata ko ovanhu vokoushilo.

Otava ka yelulila omake avo* Edom naMoab,

NOvaammoni otava ka kala koshi yepangelo lavo.

15 Jehova ota ka tukula* omunghulofuta* wefuta laEgipiti,

Note ke linyenganyengifa eke laye kombada yomulonga.*

Ota ka denga omakungulukilo ao* aheyali nomufudo* waye mupyu,

Nota ka ningifa ovanhu ve u tauluke neenghaku davo.

16 Notapa ka kala ondjila ya kula ya dja muAssiria yoshixupe shovanhu vaye, ovo va fyaala po,

Ngaashi sha li mefiku olo Ovaisrael va dja medu laEgipiti.

12 Mefiku olo, oto ka tya shili:

“Akutu! Jehova, ohandi ku pandula,

Osheshi nonande owa li wa handukila nge,

Ehandu loye ola lota diva, nowa hekeleka nge.

2 Tala! Kalunga oye exupifo lange.

Ohandi lineekele muye, noitandi tila sha;

Osheshi Jah* Jehova oye eenghono dange nomafa ange,

Nokwa ninga exupifo lange.”

3 Oto ka teka omeva nehafo

Meefifiya dexupifo.

4 Nomefiku olo oto ka tya:

“Panduleni Jehova, ifaneni edina laye,

Shiivifeni oilonga yaye mokati kovanhu!

Shiivifeni kutya edina laye ola tumbala.

5 Jehova mu imbileni omaimbilohambelelo,* osheshi okwa longa oinenelonga.

Nashi shiivifwe kombada yedu alishe.

6 Kuwilileni nokwiingida pombada nehafo, nye ovakalimo* vomuSion,

Osheshi Omuyapuki waIsrael, oo e li mokati keni, omunene.”

13 Etumwalaka letokolo li na sha naBabilon, olo Jesaja, omonamati waAmos, a mona memoniko, tali ti:

2 “Dika edidiliko* komhunda ihe na sha.

Va ingida, linyenganyengifa eke loye,

Opo ve uye moivelo yovaleli.

3 Onda yandja elombwelo kwaavo nda hoolola.*

Onda ongela ovakwaita vange, ndi holole ehandu lange,

Ovanhu vange ovo va hafa unene.

4 Pwilikina! Ongudu i li keemhunda;

Otai linyenge ya fa ovanhu vahapu!

Pwilikina! Euyaano lomauhamba,

Loiwana ya ongala pamwe!

Jehova womatangakwaita ota ongele etangakwaita omolwoita.

5 Otave uya tava di kedu lokokule,

Okudja komingenge deulu.

Jehova noilwifo yehandu laye,

Opo a hanaune po edu alishe.

6 Lileni, osheshi efiku laJehova oli li popepi!

Otali uya ngaashi ehanauno la dja kOmunaenghono adishe.

7 Nomolwaashi omake aeshe otaa ka mongoshoka,

Nomutima womunhu keshe otau ka mbadapala.

8 Ovanhu ova kwatwa kehaluko.

Ova hangwa koutile nokouyehame,

Ngaashi omukainhu ta fetwa.

Otava talafana nehaluko,

Nouyehame ou liwetikile koipala yavo.

9 Tala! Efiku laJehova otali uya,

Ekeshuko pamwe nonya nosho yo ehandu linene,

Opo a ninge edu oshinima shitilifa,

Nokuhanauna po ovanyoni vedu kombada yalo.

10 Osheshi eenyofi dokeulu neengudu dado*

Itadi ka minikila;

Etango otali ka laula, eshi tali piti,

Nomwedi itau ka yandja ouyelele wao.

11 Ohandi ka hokololifa edu omolwowii walo,

Novalongi vowii omolwomapuko avo.

Ohandi ka xulifa po ounhwa wovalinenepeki,

Nohandi ka ninipika elinenepeko lovalongi vowii.

12 Ohandi ka ningifa omunhu wongaho, a kale a pumba e dule oshingoli elela,

Novanhu va kale va pumba ve dule oshingoli shokuOfir.

13 Nomolwaashi ohandi ka kakamifa eulu,

Nedu otali ka kakama, li dje ponhele yalo

Kehandu laJehova womatangakwaita, mefiku lehandu laye la xwama.

14 Ngaashi omenye tai faduka po omukongo nongaashi oufita uhe na oo te u ongele,

Keshe umwe ota ka shuna koshiwana shavo;

Keshe umwe ota ka ya onhapo kedu lavo.

15 Keshe oo ta hangika ota ka tyuulwa,

Nakeshe oo ta kwatwa ota ka dipawa neongamukonda.

16 Ounona vavo otava ka tetaulwa moinhimbu moipafi yavo,

Omaumbo avo otaa ka kufwa oinima keenghono,

Novakulukadi vavo otava ka kwatwa onghonga.

17 Apa ohandi va pendulile Ovamedia,

Ovo va tala ko oshisilveri oshinima shongaho,

Noinava hokwa oshingoli.

18 Omauta avo otaa ka hanauna po ovalumenhu ovanyasha;

Itava ka fila onghenda oshiimati shoshidalelo,

Noitava kenukile ounona.

19 Na Babilon, oo e li etumba* linene lomauhamba,

Ewapalo netumbalo lOvakaldea,

Ota ka kala ngaashi Sodom naGomorra, eshi Kalunga e va hanauna po.

20 Itashi ka kalwa nandenande,

Noitashi ka kala vali onhele yokukala komapupi aeshe.

Omuaraba ita ka dika mo etwali laye,

Novafita itava ka ombifila mo omaufita avo.

21 Oinamwenyo yomombuwa omo tai ka kala hai nangala omo;

Omaumbo avo otaa ka yada omaxuvi.

Eemho omo tadi ka kala hadi di,

Noikombo yomoixwa* oko tai ka nhukauka oko.

22 Omawi oifitukuti otaa ka udika meeshungongulu dasho,

Nookavandje omeembala dasho diwa elela.

Efimbo lasho ola fika, nomafiku asho itaa ka lelepekwa.”

14 Osheshi Jehova ota ka fila onghenda Jakob, nota ka hoolola natango Israel. Ote ke va tula* medu lavo, novanailongo otave ke va waimina nokulimangela keumbo laJakob. 2 Novanhu otave ke va kufa noku va twala konhele yavo vene; neumbo laIsrael otali ke va kwata ko ve li onga ovapika ovalumenhu novakainhu medu laJehova; otava ka kwata ko ovo va kala ve va tula moukwatwa, notava ka pangela ovo va kala have va fininikile oilonga.*

3 Mefiku olo, eshi Jehova te ke ku pa etulumuko kouyahame woye nosho yo koupyakadi woye, nokoilonga idjuu youpika oyo wa kala muyo, 4 oto ka popya eyeletumbulo* li na sha nohamba yaBabilon to ti:

“Oo ha fininikile vakwao oilonga* okwa fika ngahelipi pexulilo laye?

Omafininiko okwa xula po ngahelipi?

5 Jehova okwa teyaula odibo yomukolokoshi,

Onhaili yovapangeli,

6 Ou ta denge ovanhu nonyanya nopehe na olufuwo,

Ou ta findi oiwana nehandu nomahepeko taa twikile.

7 Edu alishe paife ola tulumukwa, la manguluka ko komapiyaaneko.

Ovanhu otava ingida pombada nehafo.

8 Nokuli nomiti domidjenipa oda hafa omolwoye,

Pamwe nomisederi domuLibanon.

Otadi ti, ‘Nghee ngoo wa tekele po,

Kape na vali omuteti womiti e uya oku tu ka po.’

9 Nokuli nOmbila* otai ka duduluka

I ku shakeneke.

Omolwoye, otai ka pendula ovo va fya,

Ovawiliki* aveshe ovakwanyanya vokombada yedu.

Otai ka ningifa eehamba adishe doiwana di dje ko komalukalwa ado.

10 Aveshe otava ka popya, notava ka tya kwoove,

‘Hano naave owa nghundipala yo ngaashi fye?

Hamba naave owa ninga ngaashi fye?

11 Ounhwa woye owa tulwa mOmbila,*

Omikwelengedjo doishikomwa yoye yeengodi.

Omainyo otaa ka kala koshi yoye onga ombete,

Neenhwishi otadi ke ku tuvikila.’

12 Owa wa mo ngahelipi meulu?

Ove ou to vema, omonamati weluwa!

Owa kewa po ngahelipi u uye kombada yedu?

Ove ou wa finda oiwana!

13 Owe lipopila momutima woye to ti, ‘Ohandi ka londa keulu.

Kombada yeenyofi daKalunga oko handi ka tula olukalwapangelo lange,

Nohandi ka kala omutumba komhunda yokwoongalela,

Koitukulwa ye likalela yokolundume.

14 Ohandi ka ya pombada kombada yoilemo;

Ohandi ke lininga nda fa Omukombadambada.’

15 Ponhele yaasho, oto ka undulilwa mOmbila,*

Keenhele domoule mwii delambo.

16 Ovo tave ke ku mona otave ke ku dakamena omesho;

Otave ke ku konenena tava ti,

‘Omulumenhu ou oye ngoo a li ha kakamifa edu,

Oo a ningifa omauhamba a dekwete?

17 Oo a ninga edu olo la li hali kalwa li kale ngaashi ombuwa,

Nokwa hanauna po oilando yalo,

Oo a anya okumangulula ovanadolongo vaye va ye komaumbo?’

18 Eehamba dikwao adishe doiwana,

Heeno, adishe, oda pakwa monghedi yefimaneko,

Keshe imwe omombila* yayo.

19 Ashike ove owa ekelwashi uhe li mombila

Ngaashi oshitutumine* shongaho,

U li koshi yomidimba daavo va tuwa neongamukonda,

Ovo tava kulukile melambo lomamanya,

Ngaashi omudimba wa lyataulwa.

20 Ove ito ke va waimina mombila,

Osheshi owa hanauna po oshilongo shoye mwene,

Ove owa dipaa ovanhu voye mwene.

Oludalo lovalongi vowii itali ka tumbulwa vali nandenande.

21 Longekideni onhele yokudipaela ovanamati vaye,

Omolwondjo yooxekulululwa,

Opo vaha nghonopale, nokukwata ko edu,

Ndele tava yadifa oshilongo noilando yavo.”

22 “Ohandi ke va katukila onghatu,” Jehova womatangakwaita osho ta ti.

“Nohandi ka komba mo muBabilon edina noshixupe, noludalo nosho yo epupi lokomesho,” Jehova osho a ti.

23 “Nohandi ke shi ninga onhele yooshinyengu, noshitukulwa shomadiva, nohandi ke shi komba noshikombe shehanauno,” Jehova womatangakwaita osho ta ti.

24 Jehova womatangakwaita okwa ana ta ti:

“Ngaashi ashike nda diladila, osho tashi ka ningwa,

Nosho yo ngaashi ashike nda tokola, osho osho tashi ka wanifwa shili.

25 Ohandi ka nyanyaulila Ovaassiria medu lange,

Nohandi ke mu lyataulila keemhunda dange.

Ondjoko yaye otai ka kufwa ko kuvo,

Nomutengi waye otau ka kufwa ko komapepe avo.”

26 Eshi osho sha tokolelwa* edu alishe,

Naali olo eke, olo la yelulilwa* oiwana aishe.

27 Osheshi Jehova womatangakwaita okwe shi tokola,

Nolyelye ta dulu oku shi ya moshipala?

Eke laye ola yeluka,

Nolyelye ta dulu oku li shunifa pedu?

28 Momudo omo ohamba Ahas ya fya, okwa ningwa eshiivifo eli:

29 “Ino hafa, Filistia, nande oumwe womwoove,

Molwaashi ashike onhaili yaao he ku denge ya teka.

Osheshi momudi weyoka otamu ka dja eyoka li na oudiyo,

Noludalo lalo otali ka kala eyoka hali tuka oshikuti.*

30 Ofimbo oiveli yovadinwa tai li

Nosho yo eehepele da nangala di li meameno,

Omudi woye ohandi ke u dipaa nondjala,

Nakeshe osho tashi xupu po shoye otashi ka dipawa.

31 Lila, ove oshivelo! Lila pombada, ove oshilando!

Amushe otamu ka mbadapala, ove Filistia!

Osheshi omwifi otau ka dilila kolundume,

Nomeengudu daye kape na ovo tava fyaala monima.”

32 Ongahelipi tava ka nyamukula ovatumwa voshiwana?

Kutya Jehova okwa dika po ekanghameno muSion,

Nosho yo kutya ovadinwa vomoshiwana shaye otava ka konga eameno musho.

15 Etumwalaka letokolo li na sha naMoab tali ti:

Ar shomuMoab osha mwenekwa,

Molwaashi osha hangwa koupyakadi oufiku.

Kir shomuMoab osha mwenekwa,

Molwaashi osha hangwa koupyakadi oufiku.

2 Okwa ya keumbo* nokuDibon,

Keenhele dokoikulundudu, a ka lile.

Moab ota lili omolwaNebo nomolwaMedeba.

Omutwe keshe owa kululwa ongwala, neendjedi adishe oda kululwa ko.

3 Ova djala eeshako momapandavanda asho.

Aveshe otava lili ve li kombada yomaumbo avo nomomahalandjadja avo;

Otava londoloka tava lili.

4 Hesbon naEleale otai lili;

Omawi ayo okwa udika kokule fiyo okuJahas.

Nomolwaasho ovalumenhu vomuMoab, ovo va homata, tava twikile okwiingida.

Ye* ota dekweta.

5 Omutima wange otau lili omolwaMoab.

Eenghwate dasho oda ya onhapo kokule fiyo okuSoar nokuEglat-selisia.

Otava kwena, eshi tava londo koshikulundudu shaLuhit;

Otava lili omolwoupyakadi, eshi ve li mondjila oyo ya finda kuHoronaim.

6 Osheshi omeva omuNimrim okwa pwiinina po;

Omwiidi mutalala owa kukuta,

Omwiidi kau po vali, nokape na sha shitalala sha fyaala po.

7 Nomolwaasho tava i naasho sha fyaala po shomeemhungulilo davo nomomamona avo;

Otava tauluka efilu lomiti da hapa nawa.

8 Osheshi okulila oku uditike moshitukulwa ashishe shaMoab,

Okukwena okwa fika kuEglaim;

Okulila okwa fika kuBeer-elim.

9 Osheshi omeva omuDimon oku yadi ohonde,

Nonda tuvikilila shihapu Dimon:

Onghoshi oyOvamoab ovo tava i onhapo,

Noyaavo tava fyaala moshilongo.

16 Tumina omupangeli woshilongo odi yondume,

Okudja kuSela to pitile mombuwa

Fiyo okomhunda yomonakadona waSion.

2 Ngaashi okadila ka tewa poshihadi shako,

Novanakadona vaMoab osho tava ka kala ngaho pomataulukilo aArnon.

3 “Yandja omayele; wanifa po etokolo.

Lelepeka omudidimbe woye pokati komutenya ngaashi oufiku.

Holeka ovo ve lihanifwa, noino kengelela ovo tava i onhapo.

4 Ovanhu vange ovo ve lihanifwa nava kale mwoove, ove Moab.

Ninga onhele yavo yokuhondama omolwomuhanauni.

Omufininiki ota ka fika pexulilo laye,

Ehanauno otali ke uya pexulilo,

Naavo tava lyataulile vakwao pedu otava ka xulifwa ko kombada yedu.

5 Opo nee olukalwapangelo otali ka dikwa po la pamenenena omolwohole i na oudiinini.

Oo e li omutumba kulo metwali laDavid ota ka kala omudiinini;

Ota ka tokola pauyuki, nota ka wanifa po diva osho sha yuka.”

6 Otwa uda kombinga younhwa waMoab; oku udite unene etumba.

Elinenepeko laye, ounhwa waye nonya yaye;

Ashike eendjovo daye dongaho otadi ka xula po.

7 Onghee Moab ota ka lilila Moab;

Aveshe otava ka lilaana.

Ovo va findwa otava ka nyikila oluhodi oikuki yomandjebele yokuKir-hareset.

8 Osheshi omapya omuHesbon okwa lemba,

Omundjebele womuSibma,

Ovapangeli voiwana ova lyataula oitai yao itilyana tye;*

Oya ya kokule fiyo okuJaser;

Oya tandavela fiyo okombuwa.

Eexulo dayo ode lihana, noda ya fiyo okefuta.

9 Nomolwaasho handi lilile omundjebele waSibma nda fa handi lilile Jaser.

Ohandi ku tutike nomahodi ange, ove Hesbon naEleale,

Molwaashi eingido omolwoiimati yoye yopokwenye, neteyo loye ola xula.*

10 Ehafo nenyaku oya kufwa mo moshikunino shomiti doiimati,

Nokape na omaimbilo ehafo, ile euyaano moikunino yomandjebele.

Omukoli ita kolo vali omaviinyu moikolelo,

Osheshi onda xulifa po euyaano.

11 Nomolwaasho ohandi kakama meni lange omolwaMoab,

Ngaashi omutono wokaxumbafeta,

Nomeni lange omolwaKir-hareset.

12 Nonande Moab oku lilolole konhele yokoshikulundudu, noku ye a ka ilikane monhele yaye iyapuki, ita ka pondola sha.

13 Ei oyo ondjovo oyo Jehova a popya nale i na sha naMoab. 14 Ndele paife Jehova ota ti: “Moule weedula nhatu, ngaashi eedula domunailonga, oo a kutwa,* etumbalo laMoab otali ka fifwa ohoni neuyaano linene loludi keshe, naavo tava fyaala mo otava ka kala vanini, nokave na eenghono.”

17 Etumwalaka letokolo li na sha naDamaskus tali ti:

“Tala! Damaskus ita ka kala vali oshilando,

Nota ka ninga onduba yoikulukuma.

2 Oilando yaAroer otai ka fiwa po;

Otai ka ninga eenhele dokwoomba omaufita

Nopehe na oo te a tilifa.

3 Oilando yomakuma a pama itai ka kala mo vali muEfraim,

Nouhamba muDamaskus;

Naava va xupa po muSiria

Otava ka kala ngaashi efimano lOvaisrael,”* Jehova womatangakwaita osho ta ti.

4 “Mefiku olo, efimano laJakob otali ka xula po,

Nolutu laye li na oukolele* otali ka utama.

5 Otali ka kala ngaashi omuteyi ta ongele oilya oyo ya fikama

Nokwooko kwaye otaka teya omitwe doilya

Ngaashi oo ta pupudulula oilya mEfilu laRefaim.

6 Oipupudululwa oyo ashike tai ka fyaala po,

Ngaashi ashike olumono la nyemwa:

Eemono ashike mbali, ile nhatu da pya da fyaala koshitai osho shi li pombada elela,

Nhee ashike, ile nhano odo di li koitai yado oyo hai ima,” Jehova Kalunga kaIsrael osho ta ti.

7 Mefiku olo, omunhu ota ka tala pombada kOmumi waye, nomesho aye otaa ka dakamena Omuyapuki waIsrael. 8 Ita ka tala keealtari, oilonga yomake aye; noita ka dakamena kwaasho ominwe daye da longa, kutya nee okeepala diyapuki,* ile okeealtari dokutwimina.

9 Mefiku olo, oilando yaye yeehotengulu otai ka kala ngaashi eputu li li mofuka,

Ngaashi oshitai sha efiwa moipafi yOvaisrael;

Otai ka ninga ombuwa.

10 Osheshi owa dimbwa Kalunga kexupifo loye;

Owa dopa okudimbuluka Emanya lohotengulu yoye.

Nomolwaashi wa kuna oikunomwa ya wapala*

Nowa twika ko oshitai shokoilongo.*

11 Mokati kefiku, oto ka tula nawanawa oikunomwa yoye moluumbo,

Ongula oto ka menifa eembuto doye,

Ashike eteyo otali ka kana po mefiku lomukifi nolouyehame itau dulu okuhakulwa.

12 Pwilikina! Ope na euyaano lovanhu vahapu,

Ovo tava weelele ngaashi omafuta!

Ope na eweelelo loiwana,

Oyo tai linyenge ngaashi epopomo lomeva e na eenghono!

13 Oiwana otai ke linyenga ngaashi epopomo lomeva mahapu.

Ote ke i hanyena, notai ka ya onhapo kokule,

Tai tewatewa ngaashi olungu lokeemhunda tali pepwa komhepo,

Ngaashi oshimbodi sha kukuta* shi li moshikungulu shomhepo.

14 Konguloshi ope na omatilifo.

Ofimbo inaku sha kae po vali.

Eshi osho oshitukulwa shaavo tave tu kwata ko

Noshihoololifo shaavo tave tu nyeke.

18 Woo edu olo li na oipuka hai weelele

Moshitukulwa shomilonga daEtiopia!

2 Ohali tumu ovatumwa kefuta,

Tava taulula omeva ve li meewato da longwa momanenge, tali ti:

“Indeni, nye ovatumwa hava endelele,

Koshiwana shile noshi na oshipa shipu,*

Kovanhu ovo hava tilika keshe pamwe,

Koshiwana shi na eenghono noshifindani,*

Osho edu lasho la kombololwa po komilonga.”

3 Nye ovakalimo amushe vomoshilongo, nanye ovakalimo vokombada yedu,

Osho mu wete otashi ka kala ngaashi edidiliko* la dikwa keemhunda

Notamu ka uda ewi la fa lenghuma tali shikwa.

4 Osheshi eshi osho Jehova a lombwela nge a ti:

“Ohandi ka kala inandi piyaanekwa nokutala konhele yange ya pama,

Ngaashi etokopya lomutenya pamwe neenhe detango,

Ngaashi oshilemo shomume mepupyu leteyo.

5 Osheshi fimbo eteyo inali fika,

Eshi okutemuna kwa pwa, naashi eenhemo da ninga omandjebele a pya,

Oitai otai ka tetwa ko noikashulifo

Noitutumine otai ka tetwa ko nokuhanaunwa po.

6 Aishe otai ka fiwa po i ninge yeedila dokeemhunda odo hadi li ombelela

Noyoifitukuti yokombada yedu.

Eedila odo hadi li ombelela otadi ka kala puyo pokwenye,

Noifitukuti aishe yokombada yedu otai ka kala puyo pefimbo leteyo.

7 Pefimbo olo, Jehova womatangakwaita ota ka etelwa oshali,

Okudja koshiwana shile noshi na oshipa shipu,*

Okudja kovanhu ovo hava tilika keshe pamwe,

Okudja koshiwana shi na eenghono noshifindani,*

Osho edu lasho la kombololwa po komilonga

Tadi etwa konhele oyo ya lukilwa edina laJehova womatangakwaita, Omhunda Sion.”

19 Etumwalaka letokolo li na sha naEgipiti tali ti:

Tala! Jehova okwa londa koshilemo hashi endelele, note uya muEgipiti.

Ookalunga vehe na ekwafo vomuEgipiti otava ka kakama moipafi yaye,

Nomutima waEgipiti otau ka hengumukila musho.

2 “Ohandi ka hongaifa Ovaegipiti va lwife Ovaegipiti,

Notava ka lwifafana,

Keshe umwe ota ka lwifa omumwaina nomushiinda shaye,

Oshilando otashi ka lwifa oshilando, ouhamba otau ka lwifa ouhamba.

3 Nomhepo yaEgipiti otai ka pwidauka musho,

Nohandi ka ponyifa eemhangela dasho.

Otava ka ama kookalunga vehe na ekwafo,

Kovadeuli ovanawino moulodi, nokwaavo hava kwatafana neemhepo nokovaxunganeki vonakwiiwa.

4 Ohandi ka yandja Egipiti komwene mudjuu,

Nohamba ikwanyanya otai ke va pangela,” Omwene washili, Jehova womatangakwaita, osho a ti.

5 Omeva efuta otaa ka pwiinina,

Nomulonga otau ka pwiinina nokukukuta.

6 Nomilonga otadi ka nyika;

Omakungulukilo aNil womuEgipiti otaa ka pwiinina nokukukuta.

Eembungu nomwiidi mule otai ka ola.

7 Oimeno, oyo i li komukunghulo womulonga waNil, pokanya kaNil,

Nedu alishe olo li li komukunghulo waNil la kunwa eembuto otali ka kukuta.

Otali ka pepelwashi, noitali ka kala po vali.

8 Novakwati veeshi otava ka nyika oluhodi,

Ovo tava umbile eendjolo davo muNil otava ka lila,

Naavo hava umbile eenete davo momeva otava ka ninipala.

9 Ovo hava longo momundele

Naavo hava nduluka oiyata itoka otava ka fifwa ohoni.

10 Ovatungi vasho otava ka nyanyaulwa;

Ovanailonga aveshe, ovo va kutwa, otava ka nyika oluhodi.*

11 Omalenga omuSoan omalai.

Ovayandjimayele ovanaendunge elela vaFarao otava yandje omayele ehe li pandunge.

Otamu ka tya ngahelipi kuFarao:

“Ame oludalo lovanaendunge,

Oludalo leehamba donale”?

12 Ovalumenhu veni ovanaendunge ove li peni?

Nave mu lombwele, ngeenge ove shii osho Jehova womatangakwaita a tokola shi na sha naEgipiti.

13 Omalenga aSoan inaa katuka pandunge;

Omalenga aNof* okwa pukifwa;

Omalenga omapata aye okwa pukifa Egipiti.

14 Jehova okwe mu tilila omhepo yengwangwano;

Nova pukifa Egipiti mukeshe osho ta ningi,

Ngaashi ongholwe tai alangata monghungo yayo.

15 Na Egipiti ita ka kala vali e na osho ta longo,

Kutya nee oshi na sha nomutwe, ile onomushila, oshitai, ile omwiidi mule.*

16 Mefiku olo, Egipiti otashi ka kala ngaashi ovakainhu, tashi dekweta nosha tilifwa omolwomatilifo eke laJehova womatangakwaita, olo e shi yelulila. 17 Nedu laJuda otali ka ninga oshinima shitilifa kuEgipiti. Otava ka haluka, ngeenge ola tumbulwa omolwetokolo, olo Jehova womatangakwaita e va tokolela.

18 Mefiku olo, otapa ka kala oilando itano medu laEgipiti tai popi elaka lOshikaanan, notai ane kutya otai ka kala idiinini kuJehova womatangakwaita. Oshilando shimwe otashi ka lukwa Oshilando Tashi Hanauna.

19 Mefiku olo, otapa ka kala oaltari yaJehova mokati kedu laEgipiti, nongudi yaJehova keengaba dasho. 20 Otashi ka kala edidiliko nondombwedi kuJehova womatangakwaita medu laEgipiti; osheshi otava ka kuwa kuJehova omolwovafininiki, note ke va tumina omuxupifi, oo munene, oo te ke va xupifa. 21 Na Jehova ota ka shiivika kOvaegipiti, nOvaegipiti otava ka shiiva Jehova mefiku olo, notava ka yamba omayambo nokuyandja eeshali nokuninga eano kuJehova noku li wanifa po. 22 Jehova ota ka denga Egipiti, te shi denge noku shi velula; notava ka alukila kuJehova, nota ka uda omaindilo avo noku va velula.

23 Mefiku olo, otapa ka kala ondjila inene ya dja muEgipiti ya finda kuAssiria. Opo nee Assiria ote ke uya muEgipiti, na Egipiti omuAssiria; na Egipiti ota ka longela Kalunga pamwe naAssiria. 24 Mefiku olo, Israel ota ka kala omutitatu pamwe naEgipiti naAssiria, enangekonoupuna mokati kovanhu, ovo ve li kombada yedu, 25 osheshi Jehova womatangakwaita ote ke shi nangeka noupuna ta ti: “Ovanhu vange nava nangekwe noupuna, Egipiti, noshilonga shomake ange, Assiria, nefyuululo lange, Israel.”

20 Momudo omo Sargon, ohamba yaAssiria, a tuma Tartan* kuAsdod, okwa lwifa Asdod noku shi kwata ko. 2 Pefimbo opo, Jehova okwa popya okupitila muJesaja, omonamati waAmos, ta ti: “Inda, dula mo oshako moshiya shoye, nokudula ko eenghaku keemhadi doye.” Nokwa ninga ngaho ta ende hamunghele* nosho yo eemhadi kombada.

3 Opo nee Jehova okwa ti: “Ngaashi ashike omupiya wange Jesaja a enda hamunghele nosho yo eemhadi kombada oule weedula nhatu shi li edidiliko nosho yo oshinima shikumwifi kuEgipiti naEtiopia, 4 ohamba yaAssiria osho tai ka kwatela komesho eenghwate daEgipiti nosho yo ovo ve li moukwatwa waEtiopia, ovamati nosho yo ovalumenhu ovanamido ve li hamunghele neemhadi kombada nosho yo omatako kombada, epenge* laEgipiti. 5 Notava ka tilifwa, ndele tava ka fya ohoni Etiopia, elineekelo lavo, nosho yo Egipiti, etumba lavo.* 6 Ovakalimo vokomunghulofuta ou otava ka tya mefiku olo, ‘Tala osho sha ningilwa elineekelo letu, oko hatu tondokele, tu ka konge ekwafo nokuxupifwa omolwohamba yaAssiria! Paife ohatu ka ya onhapo peni?’”

21 Etumwalaka letokolo li na sha nombuwa yokefuta* tali ti:

Otali uya ngaashi oikungulu yomhepo, oyo tai kombolola kolukadi,

Okudja mombuwa, okudja kedu litilifi.

2 Onda lombwelwa emoniko la kwata moiti tali ti:

Omukengeleledi ota kengelele,

Nomuhanauni ota hanauna.

Ove Elami, fikama! Ove Media, kondeka!

Ohandi ka xulifa po okukema akushe oko a etifa.

3 Nomolwaasho nda nyika unene oluhodi.*

Outile owa ditika nge,

Ngaashi oo womukainhu ta dala.

Onda wililwa po neenghono oku shi uda;

Onda piyaanekwa unene oku shi mona.

4 Omutima wange owa tyololoka; ohandi kakama kehaluko.

Onguloshi, oyo nda kala nda teelela, otai kakamifa nge.

5 Yaleni oshitaafula, nokulongekida oipundi.

Lyeni, nokunwa!

Fikameni, nye omalenga, vaekeni* oshikelelifo.

6 Osheshi eshi osho Jehova a lombwela nge ta ti:

“Inda, tula po omunangeli, nokushiivifa osho ta mono.”

7 Nokwa mona etemba loita tali shilwa kongudu yeenghambe,

Etemba loita leendongi,

Etemba loita leengamelo.

Okwa tala nawanawa, a yandja elitulemo filufilu.

8 Opo nee okwa ingida mokule ngaashi onghoshi a ti:

“Onda kala nda fikama alushe efiku keshe koshungongulu, O! Jehova,

Nonda kala ponhele yange oufiku keshe.

9 Tala osho tashi uya:

Ovalumenhu ve li metemba loita tali shilwa kongudu yeenghambe!”

Opo nee okwa popya mokule a ti:

“Sha teka po! Babilon osha teka po!

Oihongwafano aishe yookalunga kasho okwe i tataulilashi pedu!”

10 Akutu! Oshiwana shange osho sha xuwa,

Oshilongwanima* shoposhipale shange,

Onde mu shiivifila osho nda uda kuJehova womatangakwaita, Kalunga kaIsrael.

11 Etumwalaka letokolo li na sha naDuma* tali ti:

Umwe ota ifana nge okudja kuSeir ta ti:

“Omunangeli, oku na efimbo li fike peni ku she?

Omunangeli, oku na efimbo li fike peni ku she?”

12 Omunangeli okwa ti:

“Otaku shi paife, noufiku otau uya yo.

Ngeenge owa hala okupula, pula.

Ila natango!”

13 Etumwalaka letokolo li na sha noluhaela lomombuwa tali ti:

Otamu ka kala oufiku mofuka, moluhaela lomombuwa,

Nye oyeendo yaDedan.

14 Eteni omeva, mu ka shakeneke oo a fya enota,

Nye ovakalimo vomedu laTema,

Nokweetela omungome oo ta i onhapo.

15 Osheshi ova ya onhapo omaongamukonda, eongamukonda la pweywa mo,

Outa wa lukilwa nosho yo oita itai nuwa omeva.

16 Osheshi eshi osho Jehova a lombwela nge a ti: “Moule wodula, ngaashi eedula domunailonga, oo a kutwa,* etumbalo laKedar otali ka xula po. 17 Ovaumbi vomauta, ovo tava ka fyaala po metangakwaita laKedar, otava ka kala vanini, osheshi Jehova, Kalunga kaIsrael, okwa popya.”

22 Etumwalaka letokolo li na sha nEfilu lEmoniko* tali ti:

Oupyakadi woye ou li peni, eshi amushe mwa londa kombada yomaumbo?

2 Owa li u yadi euyaano,

Oshilando hashi weelele, odoolopa i na ehafo,

Oonakudipawa voye kava li va dipawa neongamukonda,

Noinava fila molwoodi.

3 Ovapangeli voye aveshe ovakwanyanya ova li va ya onhapo pamwe.

Ova li va tulwa modolongo nopehe na okulongifa outa.

Aveshe ovo va monika ova tulwa modolongo,

Nonande ova li va ya onhapo kokule.

4 Nomolwaasho nda ti: “Aluleni ko omesho eni kwaame,

Nohandi ka lila unene.

Inamu kondjifa okuhekeleka nge

Omolwehanauno lomonakadona* woshiwana shange.

5 Osheshi eli efiku lengwangwano nolokufindwa nolehaluko,

Okudja kOmwene Omunamapangelo aeshe, Jehova womatangakwaita,

MEfilu lEmoniko.

Ope na ehanauno lekuma,

Nokulila okwa udika komhunda.

6 Elami okwa kufa ombalukutu,

Nokwa londa komatemba oita nokeenghambe,*

Na Kir okwa kufa mo* oshikelelifo.

7 Omafilu oye mawa elela

Otaa ka kala e yadi omatemba oita,

Neenghambe* otadi ka kala peenhele dado poshivelo,

8 Noshiidilifo* shaJuda otashi ka kufwa po.

“Mefiku olo, oto ka tala keemhungulilo doilwifo domeumbo, olo hali ifanwa Omufitu, 9 notamu ka mona omifya dihapu doshilando shaDavid. Notamu ka ongela omeva metale, olo li li mefilu. 10 Otamu ka valula omaumbo omuJerusalem, notamu ka ngumauna po omaumbo mu pameke ekuma. 11 Notamu ka ninga ombaali yomeva etale likulu pokati komakuma avali, ashike itamu ka tala kOmumi Munenenene walo, noitamu ka mona Oo e li ninga po nalenale.

12 Mefiku olo, Omwene Omunamapangelo aeshe, Jehova womatangakwaita,

Ote ke va lombwela va lile nokunyika oluhodi,

Va kulule omitwe, nokudjala eeshako.

13 Ndele ponhele yaasho, ope na enyaku nehafo,

Okutoma eengobe nokudipaa eedi,

Okulya ombelela nokunwa omaviinyu.

‘Natu lyeni nokunwa, osheshi mongula ohatu fi.’”

14 Opo nee Jehova womatangakwaita okwa popya momatwi ange ta ti: “‘Enyono eli itali ka dimwa po ponhele yeni, fiyo osheshi nye mwa fya,’ Omwene Omunamapangelo aeshe, Jehova womatangakwaita, osho a ti.”

15 Eshi osho Omwene Omunamapangelo aeshe, Jehova womatangakwaita, ta ti: “Inda kelenga eli, kuSebna, olo tali pashukile eumbo,* ndele to ti, 16 ‘Oshike osho wa panda apa, nolyelye e li po wa hokwa, opo u lihokele ombila apa?’ Ote lihokele ombila konhele yokoshikulundudu; ote lihokele onhele yetulumuko* memanya. 17 ‘Tala! Jehova ote ke ku umbilashi pedu nonyanya, omunhu ove, noku ku kwata kefininiko. 18 Ote ke ku kamena mumwe a diinina, noku ku kupulashi ngaashi etanga moshilongo shinene. Oto ka fila oko, nomatemba oye a fimana oko taa ka kala oko, osho tashi ka kala ohoni keumbo lomwene woye. 19 Nohandi ke ku kufa ondodo yoye, noku ku undula po ponhele yoye.

20 “‘Mefiku olo, ohandi ka ifana omupiya wange Eliakim, omonamati waHilkia, 21 nohandi ke mu dika oshikutu shoye nokumangela ekwamo loye nda diinina moshiya shaye, nohandi ka yandja eenghonopangelo* doye meke laye. Nota ka kala xe yovakalimo vomuJerusalem noyeumbo laJuda. 22 Nohandi ka tula oshapi yeumbo laDavid komapepe aye. Ota ka yeulula po, nokape na ou ta ka idila po. Nota ka idila po, nokape na ou ta ka yeulula po. 23 Ohandi ke mu pamela ngaashi oshiti monhele tai kalelele, nota ka ninga ngaashi olukalwapangelo lefimano leumbo laxe. 24 Otava ka tulika kuye efimano* alishe leumbo laxe, oludalo novana,* oikwatelwa aishe inini, oikwatelwa ya fa oiyaxa nosho yo oitoo aishe ya kula.

25 Jehova womatangakwaita ota ti: “‘Mefiku olo, oshiti osho sha pamelwa monhele tai kalelele otashi ka kufwa mo, notashi ka tetwa po, ndele tashi u po, naasho hashi yambididwa kusho otashi ka wa po nokuhanauka po, osheshi Jehova ye mwene okwa popya.’”

23 Etumwalaka letokolo li na sha naTirus tali ti:

Lileni, nye eeskepa dokuTarsis!

Osheshi etuliloshikepa ola hanaunwa po; itamu dulu oku i wa.

Okudja kedu laKittim, ove shi hololelwa.

2 Mweneni, nye ovakalimo vokomunghulofuta.

Ovashingifi va dja kuSidon, ovo va taulula efuta, ove mu yada emona.

3 Oilya* yaSihor* oya endifwa kombada yomeva mahapu,

Eteyo laNil, oiniwe yasho,

Tava eta oupuna woiwana.

4 Fya ohoni, ove Sidon, ove ohotengulu yefuta,

Molwaashi efuta ola ti:

“Inandi fetwa, noinandi dala,

Noinandi tekula ovalumenhu ovanyasha, ile ndi kulike ovakainhu ovanyasha.”*

5 Ngaashi ashike va li va uda onghundana i na sha naEgipiti,

Ovanhu otava ka nyika oluhodi omolwonghundana i na sha naTirus.

6 Taulukeni, mu ye kuTarsis!

Lileni, nye ovakalimo vokomunghulofuta!

7 Osho ngoo oshilando sheni osho sha li hashi kala sha hafa okudja nale, okudja pehovelo lasho?

Eemhadi dasho oda li hadi shi twala komadu okokule, oko shi ka kale.

8 Olyelye a tokolela Tirus oshinima eshi,

Omuyandji woikoroni,

Osho ovashingifi vasho va li omalenga,

Osho ovalandifi vasho va li va fimanekwa kombada yedu alishe?

9 Jehova womatangakwaita oye mwene e shi tokola,

Opo a xutule etumba lasho omolwewapalo lasho alishe,

Opo a fife ohoni aveshe ovo va li va fimanekwa kombada yedu alishe.

10 Tauluka edu loye ngaashi omulonga waNil, ove omonakadona waTarsis.

Kape na vali onhele yeeskepa.*

11 Okwa nana eke laye kombada yefuta;

Okwa kakamifa omauhamba.

Jehova okwa tokola okuhanauna po eehotengulu daFoinikia.

12 Opo nee okwa ti: “Ito ka hafa vali,

Ove omufininikwa, omonakadona elela waSidon.

Fikama, tauluka, u ye kuKittim.

Nokuli naako ito ka mona ko etulumuko.”

13 Tala! Edu lOvakaldea.

Ava ovo ovanhu . . . ndele haAssiria . . .

Onhele yaye ove i ninga yaavo hava i moukongo mombuwa.

Ova dika eeshungongulu davo dokunangela;

Ova kwata ko eeshungongulu dasho da pama,

Ve shi hanauna po shi ninge oikulukuma.

14 Lileni, nye eeskepa dokuTarsis,

Osheshi ohotengulu yeni oya hanaunwa po.

15 Mefiku olo, Tirus otashi ka dimbiwa oule weedula 70, ngaashi okukalamwenyo* kwohamba imwe. Pexulilo leedula 70, Tirus otashi ka ningilwa ngaashi shi li meimbilo lombwada, olo tali ti:

16 “Kufa okaxumbafeta, inda u ka dingonoke oshilando, ove ombwada oyo ya dimbiwa.

Shika okaxumbafeta koye nounghulungu;

Imba omaimbilo mahapu,

Opo ve ke ku dimbuluke.”

17 Pexulilo leedula 70, Jehova ota ka yandja elitulemo kuTirus, notashi ke lilandifa po, nokuhaela nomauhamba aeshe omounyuni kombada yedu. 18 Ndele emona lasho nosho yo oimaliwa oyo sha likola otai ka ninga oshinima shiyapuki kuJehova. Itali ka tuvikilwa, ile li tulwe pamwe pe lili, molwaashi oimaliwa oyo sha likola otai ka ninga yaavo hava kala koshipala shaJehova, opo va ka lye fiyo va kuta, nokudjala oikutu iwa.

24 Taleni! Jehova ota kombo mo moshilongo,* noku shi ninga ombuwa.

Ote shi pwipwike po,* nokuhalakanifa ovakalimo vasho.

2 Otashi ka ningilwa keshe umwe:

Ovanhu nosho yo omupristeri,

Omupiya nosho yo omwene waye omulumenhu,

Omupiya nosho yo omwene waye omukainhu,

Omulandi nosho yo omulandifi,

Omuyandji nosho yo omweeheli,

Omuyandji weengunga nosho yo omuli weengunga.

3 Oshilongo otashi ka kombwa shekesheke;

Otashi ka kwatwa ko filufilu,

Osheshi Jehova okwa popya ondjovo oyo.

4 Oshilongo osha nyika oluhodi;* otashi halakana po.

Edu liwa otali kashangala; otali kana po.

Ovanenenhu vomoshilongo ova lemba.

5 Edu ola nyonaunwa kovakalimo valo,

Osheshi ova tauluka eemhango,

Ova lundulula eufomhango,

Nova teya ehangano tali kalelele.*

6 Nomolwaasho efingo otali xwake po oshilongo,

Naavo ve li mo ova monika ondjo.

Nomolwaasho ovakalimo vomoshilongo va ninipala,

Nomwa fyaala ashike ovanhu vanini.

7 Omaviinyu mape okwa nyika oluhodi,* omindjebele oda lemba,

Naaveshe ovo va hafa komitima otava tu omadima.

8 Ehafo loungoma ola kana po;

Neweelelo laavo hava kala musho va hafa ola xula po;

Ewi lehafo lokaxumbafeta ola xula po.

9 Otava nu omaviinyu nopehe na eimbilo,

Noikolwifa oilula kwaavo tave i nu.

10 Odoolopa oyo ya fiwa po oya teywa po;

Eumbo keshe ola idilwa, opo muha ye nande oumwe.

11 Otava kwenene omaviinyu momapandavanda.

Enyaku alishe ola kana po;

Ehafo lomoshilongo kali po vali.

12 Oshilando osha fiwa mehalakano;

Oshivelo osha hanaunwa po fiyo sha ninga onduba yoitekaukile, oyo ya pya.

13 Osheshi eshi osho tashi ka kala moshilongo mokati kovanhu:

Ngaashi olumono la nyemwa,

Ngaashi epupudululo, eshi okulikola omandjebele kwa xula.

14 Otava ka yelula eendaka davo,

Otava ka ingida pombada nehafo.

Okudja kefuta* otava ka shiivifa ounene waJehova.

15 Nomolwaasho tava ka fimanekifa Jehova moshitukulwa shouyelele;*

Nokounhunhu vefuta, otava ka fimanekifa edina laJehova, Kalunga kaIsrael.

16 Okudja kominghulo dedu otu udite omaimbilo taa ti:

“Efimano* nali pewe Omuyuki!”

Ndele onda ti: “Ohandi xulu po, ohandi xulu po!

Woo ame! Omukengeleledi okwa kengelela;

Omukengeleledi okwa kengelela noukengeleledi.”

17 Ehaluko nomalambo neemwiyo oye mu teelela, ovakalimo vomoshilongo.

18 Keshe oo ta i onhapo kelinyengo tali halukifa ota ka wila melambo,

Nakeshe oo ta ka dja melambo ota ka yulwa komwiyo.

Osheshi omivelo domeva okeulu otadi ka yeululwa,

Nomakanghameno edu otaa ka kakama.

19 Edu ola tenda omifya;

Edu ola kakama;

Edu ola tengauka neenghono.

20 Edu otali funga ngaashi ongholwe,

Notali ndjungwaandjungwa ngaashi onduda tai pepwa komhepo.

Omatauluko alo okwe li wilila po neenghono,

Notali ka teka po, opo liha kale po vali.

21 Mefiku olo, Jehova ota ka yandja elitulemo ketangakwaita olo li li pombada,

Nokeehamba dokombada yedu odo di li kombada yedu.

22 Notadi ka ongelwa pamwe,

Ngaashi ovanadolongo va ongelwa melambo,

Notadi ka idililwa modolongo;

Konima yomafiku mahapu otadi ka pewa elitulemo.

23 Omwedi u yadi otau ka lengaifwa,

Netango tali minikile otali ka fifwa ohoni,

Osheshi Jehova womatangakwaita okwa ninga Ohamba kOmhunda Sion nomuJerusalem,

Efimano komesho yovakulunhu voshiwana shaye.*

25 O! Jehova, oove Kalunga kange.

Ohandi ku tumbaleke, ohandi tange edina loye,

Osheshi owa longa oinima ikumwifi,

Oinima oyo wa tokola* okudja nalenale,

Omolwoudiinini nomolwoulineekelwa.

2 Osheshi oshilando owe shi ninga onduba yomamanya,

Odoolopa yomakuma a pama onduba yoikulukuma.

Oshungongulu yovanailongo oshilando shihe po vali;

Itashi ka tungululwa vali nandenande.

3 Nomolwaasho ovanhu ovanaenghono otave ke ku fimanekifa;

Oshilando shoiwana ikolokoshi otashi ke ku tila.

4 Osheshi owa ninga ohotengulu komudinwa,

Ohotengulu kohepele moudjuu wayo,

Eameno koshikungulu shodula,

Nomudile komutenya.

Eshi ehandu lovakolokoshi la fa oshikungulu shodula tashi lidenge mekuma,

5 Ngaashi omutenya medu la notelwa,

Oho mweneke omaweelelo ovanailongo.

Ngaashi omutenya wa ninipikwa komudidimbe woshilemo,

Eimbilo lovakolokoshi nalo osho la mwenekwa.

6 Komhunda ei, Jehova womatangakwaita ota ka ningila ovanhu aveshe

Oshivilo shoitendele,

Oshivilo shomaviinyu mawa,*

Shoikulya i na omungo,

Shomaviinyu a dindwa nawa.

7 Komhunda ei ota ka hanauna po* oshikutu osho sha tuvikila ovanhu aveshe,

Noshiuvikifo,* osho sha hondjelwa kombada yoiwana aishe.

8 Ota ka pona po* efyo fiyo alushe,

NOmwene Omunamapangelo aeshe, Jehova, ota ka feta po omahodi moipala yaaveshe.

Nokudinwa kwovanhu vaye ote ke ku xulifa po kombada yedu alishe,

Osheshi Jehova mwene okwe shi popya.

9 Mefiku olo, otava ka tya:

“Taleni! Ou oye Kalunga ketu!

Otwa kala twe lineekela muye,

Note ke tu xupifa.

Ou oJehova!

Otwa kala twe lineekela muye.

Natu nyakukwe, nokuhafela exupifo laye.”

10 Osheshi eke laJehova otali ka kala komhunda ei,

Na Moab ota ka lyataulilwa ponhele yaye

Ngaashi omwiidi tau lyataulilwa monduba youshosho.

11 Ote ke i denga nomake aye

Ngaashi omuyowi ta denge omeva nomake aye, eshi ta yoo,

Nota ka xulifa po ounhwa wayo

Nomake aye tae linyenge nounghulungu.

12 Noshilando shomakuma a pama, nomakuma oye male eameno,

Ote ke i ngumauna po;

Ote ke shi mbonyonena pedu mondwi.

26 Mefiku olo, medu laJuda otamu ka imbwa eimbilo eli:

“Otu na oshilando sha pama.

Omakuma asho nosho yo ekondeka londuba yomadu lasho okwe i ninga exupifo.

2 Yeululeni omivelo, opo oshiwana shiyuki shi pite,

Oshiwana osho sha kala shidiinini.

3 Oto ka amena ovo ve lineekela filufilu mwoove;*

Oto ke va pa ombili tai kalelele,

Molwaashi ove lineekela mwoove.

4 Lineekeleni muJehova fiyo alushe,

Osheshi Jah* Jehova emanya laalushe.

5 Osheshi okwa tula pedu ovo hava kala pombada, oshilando sha tumbala.

Okwe shi ufa po,

E shi ufila kombada yedu;

Okwe shi kupula poshi mondwi.

6 Omhadi otai ke shi lyataula,

Eemhadi domufininikwa, omanha ovadinwa.”

7 Elila lomuyuki ola yuka.*

Molwaashi ove omuyuki,

Oto ka lalakanifa ondjila yomuyuki.

8 Eshi hatu shikula elila lomatokolo oye, O! Jehova,

Otwe lineekela mwoove.

Otwa* djuulukwa edina loye nosho yo edimbulukifo loye.*

9 Oufiku ohandi kala nde ku djuulukwa neenghono,*

Heeno, ohandi ku kongo nde lipaka mo;

Osheshi ngeenge to ningi omatokolo e na sha nedu,

Ovakalimo vokombada yedu ohave lihongo kombinga youyuki.

10 Nonande omukolokoshi na filwe onghenda,

Ite ke lihonga ouyuki.

Nokuli nomedu lovayuki* ota ka longa oukolokoshi,

Noita ka mona oshinge shaJehova.

11 Akutu! Jehova, eke loye ola yeluka, ashike kave li wete.

Otava ka mona ouladi woye omolwoshiwana shoye, notava ka fifwa ohoni.

Heeno, omundilo oo wa nuninwa ovatondi voye otau ke va lungwinifa po.

12 O! Jehova, oto ke tu pa ombili,

Molwaashi ashishe osho twa longa,

Oove we shi longa ponhele yetu.

13 Akutu! Jehova Kalunga ketu, kakele ashike kwoove, otwa kala nokupangelwa koovene vamwe,

Ndele otwa kala ashike hatu tumbula edina loye olo alike.

14 Ova fya; itava ka kala nomwenyo.

Ova fya, itava ka penduka.

Osheshi owe va katukila onghatu

U va xulife po, nokuhanauna po oinima aishe oyo tai ningifa va dimbulukiwe.

15 Owa hapupalifa oshiwana, O! Jehova,

Owa hapupalifa oshiwana;

Owe litumbalekifa ove mwene.

Owa tamununa mo neenghono eengaba adishe dedu.

16 Akutu! Jehova, pefimbo loudjuu, ohave uya kwoove;

Ohava mbubula omitima davo meilikano tava nongofola, ngeenge we va pa outekuduliko.

17 Ngaashi ashike omukainhu omufimba e li pokudala

Ha kala e na ouyahame woshifeta, noha kuu kouyahame,

Nafye osho twa kala tu udite omolwoye, O! Jehova.

18 Otwa ninga ovafimba, twa kala nouyahame woshifeta,

Ndele otwa fa ashike twa dala omhepo.

Inatu xupifa oshilongo,

Nokape na oo a dalwa a kale moshilongo.

19 “Oonakufya voye otava ka kala nomwenyo.

Oimhu yange* otai ka penduka.

Pendukeni, nokwiingida pombada nehafo,

Nye ovakalimo, ovo mu li mondwi!

Osheshi omume yeni oi li ngaashi omume yongula,*

Nedu otali ka efa ovo va fya va alukile momwenyo.*

20 Indeni, ovanhu vange, piteni mu ye meenduda deni domeni,

Nokwiidila omivelo.

Hondameni oule wokafimbo,

Fiyo osheshi ehandu* la pita po.

21 Osheshi tala! Jehova ote uya ta di konhele yaye,

A ifane ovakalimo vomedu e va hokololife omolwenyono lavo,

Nedu otali ka holola ohonde oyo ya tikila mulo,

Noitali ka tuvikila vali ovadipawa valo.”

27 Mefiku olo, Jehova, e na eongamukonda laye linene hali tyuula, noli na eenghono,

Ota ka katukila onghatu Leviatan,* eyoka hali fenhunguta,

KuLeviatan, eyoka hali ngolyauka,

Nota ka dipaa oshinamwenyo shinene, osho shi li mefuta.

2 Mefiku olo, shi* imbileni tamu ti:

“Oshikunino shomandjebele omaviinyu taa fufuma!

3 Ame, Jehova, ohandi shi amene.

Efimbo keshe ohandi shi tekele.

Ohandi shi amene oufiku nomutenya,

Opo shiha ningilwe nande owii kuumwe.

4 Inandi fula onya.

Olyelye ta dulu okukelela nge molwoodi nomano nosho yo noimbodi?

Ohandi ke va lyataula noku va tomeka omundilo aveshe.

5 Onghee hano, na kanyatele mohotengulu yange.

Na pange ombili naame;

Na pange ombili naame.”

6 Momafiku tae uya, Jakob ota ka mena omudi,

Israel ota ka temuna nokutwapuka,

Notava ka yadifa oshilando noilikolomwa.

7 Mbela oku na okudengwa nongola yaao te mu denge?

Ile mbela oku na okudipawa ngaashi ovadipawa vaye va dipawa?

8 Oto ke shi kondjifa neingido lehalukifo, eshi to shi lekele.

Ote ke shi taataa po nehandu linene mefiku lomhepo yokoushilo.

9 Nokungaho, enyono laJakob otali ka dimwa po,

Naasho otashi ka kala oshidjemo, eshi etimba laye la kufwa po:

Ota ka ninga omamanya aeshe oaltari

Ngaashi outandu vomya,

Noitapa ka fyaala eepala diyapuki,* ile eealtari dokutwimina.

10 Osheshi oshilando, osho sha dingililwa komakuma a pama, otashi ka haulukwa;

Omaulifilo otaa ka efiwa, nokufyaala po ngaashi ombuwa.

Okatana otaka ka lya nokwoomba oko,

Notaka ka lya oitai yasho.

11 Ngeenge oitai yasho oya kukuta,

Ovakainhu otave ke uya, ndele tave i tyava po;

Tave i shakalifa omundilo.

Osheshi ovanhu ava kave udite ko.

Nomolwaasho Omumi wavo ite ke va fila onghenda,

Naao e va ma ite ke va ulikila olukeno.

12 Mefiku olo, Jehova ota ka shopola ko oiimati okudja komakungulukilo Omulonga* fiyo okefilu laEgipiti, notamu ka ongelwa ko kooumwe nooumwe, nye oshiwana shaIsrael. 13 Mefiku olo, otapa ka shikwa enghuma linene, naavo tava xulu po medu laAssiria nosho yo ovo ve lihanena medu laEgipiti otave ke uya, ndele tave linyongamene Jehova komhunda iyapuki muJerusalem.

28 Woo, oshikoroni* shomalitalifa* sheengholwe domuEfraim,

Neengala tadi kukuta dewapalo loshinge shasho,

Odo di li koxulo yefilu la lyata nawa laavo va kolwa komaviinyu!

2 Tala! Jehova oku na umwe oo e na eenghono nomafa.

Ngaashi oshikungulu sheemhawe shinene, oshikungulu shomhepo tashi hanauna,

Ngaashi oshikungulu shinene shefundja tali kombolola,

Ote ke shi umbila nonyanya kombada yedu.

3 Oikoroni yomalitalifa* yeengholwe domuEfraim

Otai ka lyataulwa neemhadi.

4 Nongala yewapalo loshinge shasho tai kukuta,

Oyo i li koxulo yefilu la lyata nawa,

Otai ka kala ngaashi onghwiyu, oyo hai pi tete, ofimbo okwenye inaku fika.

Nongeenge umwe okwe i mono, shimha ya i meke laye, ohe i pona po diva.

5 Mefiku olo, Jehova womatangakwaita ota ka ninga oshikoroni sha tumbala, noshishani shiwa elela kwaavo va fyaala po moshiwana shaye. 6 Nota ka kala omhepo youyuki kwaavo ve li omutumba va tokole, nodjo yeenghono kwaavo hava kelele omaponokelo poshivelo.

7 Naava yo ohava pungauka omolwomaviinyu;

Oikunwa yavo yoikolwifa ohai va pungaukifa.

Omupristeri nomuprofeti ohava funga omolwoikolwifa;

Omaviinyu ohae va ngwangwaneke,

Nohava pungauka koikolwifa yavo;

Omamoniko avo ohae va ningifa va pungauke,

Nohava i pomunghulo, eshi tava tokola.

8 Osheshi oitaafula yavo oi yadi eenghungo ditondifa;

Kape na onhele ihe na onghungo.

9 Mbela ota ka yandja eshiivo koolyelye,

Nota ka yelifila oolyelye etumwalaka?

Mbela ovovo ashike opo va tovo,

Ovo opo ashike va kufwa ko komavele?

10 Osheshi “oshipango noshipango, oshipango noshipango,

Omukweyo nomukweyo, omukweyo nomukweyo,*

Kanini apa, kanini penya.”

11 Onghee okupitila mwaavo hava popi* tava kokoma nosho yo elaka loshinailongo, ota ka popya novanhu ava. 12 Okwe va lombwela ta ti: “Ei onhele yetulumuko. Ou a loloka na fuwe po; ei onhele yetulumuko,” ashike ova anya okupwilikina. 13 Onghee kuvo ondjovo yaJehova otai ka kala:

“Oshipango noshipango, oshipango noshipango,

Omukweyo nomukweyo, omukweyo nomukweyo,*

Kanini apa, kanini penya,”

Opo ngeenge tava ende,

Otava ka punduka nokuwila po ongali,

Notava ka teka, nokuyulwa nokukwatwa.

14 Onghee udeni ondjovo yaJehova, nye ovalitangi,

Nye ovapangeli vovanhu ava muJerusalem,

15 Osheshi nye ovanhu ohamu ti:

“Otwa ninga ehangano nEfyo,

NOmbila* otwa ninga nayo eudafanotwokumwe.*

Ngeenge efundja linene tali ndwafuka tali piti po,

Itali ke tu hanga,

Osheshi otwa ninga oipupulu eameno letu,

Notwe liholeka moipupulu itoka tootoo.”

16 Onghee hano, eshi osho Omwene Omunamapangelo aeshe, Jehova, ta ti:

“Ohandi diki emanya la pamekwa li li ekanghameno muSion,

Emanya la fimanenena lomohuke lekanghameno la kola.

Keshe ou e na eitavelo ita ka haluka.

17 Nohandi ka ninga ouyuki ongodi yokuyeleka,

Nouyuki oshilongifo shokulalakanifa.*

Eemhawe otadi ka kombolola po eameno loipupulu,

Nomeva otaa ka kungulula po onhele yokuhondama.

18 Ehangano, olo mwa ninga nEfyo, otali ka teka po,

Neudafanotwokumwe, olo mwa ninga nOmbila,* itali kalelele.

Ngeenge efundja linene tali ndwafauka tali piti po,

Otali ke mu nyanyaula po.

19 Eshi tali piti po luhapu,

Otali ke mu kombolola po;

Osheshi otali ka pita po ongula keshe,

Momukokomoko wefiku, nomomukokomoko woufiku.

Oumbada oo ashike tau ke va ningifa va ude ko osho sha li sha udika.”*

20 Osheshi ombete oixupi unene nokutandavela ko,

Nekumbafa olinini nokulitonyena.

21 Osheshi Jehova ota ka fikama a fa e li komhunda Perasim;

Ota ka kala ofika a fa e li mefilu, olo li li popepi naGibeon,

Opo a longe oilonga yaye, oilonga yaye oyo ihe shiivike,

Nopo a wanife po oilonga yaye, oilonga yaye oyo iha longo shito.

22 Inamu sheka,

Opo omalyenge, oo e mu manga, aha shililwe,

Osheshi onda uda kOmwene Omunamapangelo aeshe, Jehova womatangakwaita,

Kutya ehanauno ola tokolelwa oshilongo ashishe.*

23 Endekeni okutwi, nokupwilikina kondaka yange;

Yandjeni elitulemo, nokupwilikina kwaasho handi popi.

24 Mbela omupululi oha kala ashike ta pulula efiku alishe nopehe na okukuna ombuto?

Mbela oha twikile ashike okungumauna nokupupaleka edu laye?

25 Ngeenge a lalakanifa kombada yalo,

Mbela iha undu ko okumin ilaula, nokukuna ko okumin,

Mbela iha kunu ko oilya yo-wheat, oilya yomaludi amwe noilya yo-barley peenhele dayo,

Nokominghulo iha kunu ko okalya koludi limwe?*

26 Osheshi Ohe mu hongo* monghedi ya yuka;

Kalunga kaye ohe mu wilike.

27 Osheshi okumin ilaula ihai xuwa noshilei,

Nokombada yokumin ihaku endifwa okuulu kwetemba.

Ndele okumin ilaula ohai dengwa nodibo,

Nokumin onoshimwati.

28 Mbela omunhu oha xu oilya omolwomungome?

Ahawe, ihe i xu nakemutwaalele;

Nongeenge kombada yayo okwa endifa ko elola letemba laye leenghambe daye,

Ihe i nyanyaula.

29 Eshi osha dja yo kuJehova womatangakwaita,

Oo omayele* aye mawa,

Noha pondola alushe mwaasho ta ningi.*

29 “Woo, Ariel,* Ariel, oshilando omo David a li a onga onhanda!

Twikileni omudo nomudo;

Edingonoko loivilo nali twikile.

2 Ashike Ariel ohandi ke mu etela oupyakadi,

Notamu ka kala okulila nekemo,

Notashi ka kala kwaame onga oaltari yaKalunga yomundilo.

3 Ohandi ke ku ongela onhanda keembinga adishe,

Nohandi ke ku kondeka noluumbo,

Nohandi ke ku ningila ekondeka londuba yomadu.

4 Oto ka umbilwa pedu;

Oto ka popya okudja medu,

Naasho to ka popya otashi ka fitikwa kondwi,

Ondaka yoye otai ka dja medu.

Ngaashi ondaka yeemhepo,

Eendjovo doye nado otadi ka sheketa okudja mondwi.

5 Engafifi lovatondi* voye otali ka kala ngaashi ombudu,

Engafifi lovakolokoshi ongaashi olungu tali pepwa.

Notashi ka ningwa diva mepakumo leisho.

6 Jehova womatangakwaita ote ke ku katukila onghatu

Nomungungumo nosho yo ekakamo ledu neuyaano linene,

Noshikungulu shomhepo nosho yo efudaela linene nomalaka omundilo tau lungwinifa.”

7 Engafifi loiwana aishe oyo tai lwifa Ariel,

Aveshe ovo tave shi lwifa,

Eeshungongulu dokuhondama odo sha tungilwa,

Nosho yo ovo have shi etele oupyakadi,

Otava ka kala ngaashi ondjodi, emoniko loufiku.

8 Heeno, otashi ka kala ashike ngaashi ngeenge umwe a fya ondjala ta tu ondjodi ta li,

Ashike oha penduka a fya ondjala,*

Nongaashi ngeenge umwe a fya enota ta tu ondjodi ta nu,

Ashike oha penduka a loloka, nokwa fya enota.*

Osho tashi ka ningilwa engafifi loiwana aishe

Oyo tai lwifa Omhunda Sion.

9 Kaleni mwa kanghwa, nomwa kumwa;

Litwikifeni nokukala mwa twika.

Ova kolwa, ashike hakomaviinyu;

Otava funga, ndele hakoikolwifa.

10 Osheshi Jehova okwe mu tilila omhepo yeemhofi didjuu;

Okwa pata omesho eni, nye ovaprofeti,

Nokwa uvika omitwe deni, nye ovamonikokule.

11 Emoniko keshe kunye otali ka kala ngaashi eendjovo dembo la pata. Ngeenge ove li yandje kuumwe oo e shii okulesha tava ti: “Tu kwafela u li leshe mokule,” ota ka tya: “Itandi dulu, osheshi ola patwa.” 12 Nongeenge ova yandje embo kuumwe oo ehe shii okulesha tava ti: “Tu kwafela u li leshe,” ota ka tya: “Kandi shii okulesha nandenande.”

13 Jehova ota ti: “Ovanhu ava ohava longele nge nomakanya avo,

Nohava fimaneke nge nomilungu davo,

Ndele omitima davo odi li kokule naame;

Netilo lavo lokutila nge ola kanghamena koipango yovanhu, oyo va hongwa.

14 Onghee hano, aame natango handi ka ningila ovanhu ava oinima ikumwifa,

Oshikumwifilonga noshikumwifilonga;

Nounongo wovanaendunge otau ka xula po,

Neudeko lovanamayele otali ka holekwa.”

15 Woo, ovo hava ningi eenghendabala va mana mo, va holeke Jehova eemhangela* davo.

Oilonga yavo ohai longelwa monhele ilaula,

Ndele tava ti: “Olyelye e tu wete?

Olyelye e shii kombinga yetu?”

16 Itamu pengifa tuu oinima!*

Mbela omuhongi woiyuma oku na okutalika ko ngaashi elova?

Mbela osho sha longwa oshi na okupopya kombinga yaao e shi longa kutya:

“Ina longa nge?”

Naasho sha mewa mbela oshi na okupopya kombinga yomumi washo kutya:

“Ke na eudeko”?

17 Meni lefimbo lixupi, Libanon ota ka ninga oshikunino shomiti doiimati,

Noshikunino shomiti doiimati otashi ka talika ko sha fa ofuka.

18 Mefiku olo, eembolo otadi ka uda eendjovo domembo,

Nomesho ovapofi otaa ka mona ko momilaulu nomomilaulu fokofoko.

19 Ovalidiiniki* otava ka hafa unene omolwaJehova,

Neehepele, odo di li mokati kovanhu, otadi ka nyakukwa omolwOmuyapuki waIsrael.

20 Osheshi omukolokoshi ita ka kala po vali,

Omulitangi ota ka xula po,

Naaveshe ovo hava kala komalwilo va longe owii otava ka hanaunwa po,

21 Ovo hava popi eendjovo doipupulu, opo va ningife vakwao va kale ve na ondjo,

Ovo hava tele omwiyo omupopili* poshivelo shoshilando,

Nosho yo ovo hava tomhafana nomatomhafano ongaho, opo va anye okuulikila omuyuki ouyuki.

22 Onghee hano, eshi osho Jehova, omukulili waAbraham, a popya shi na sha neumbo laJakob a ti:

“Jakob ita ka kala vali a fya ohoni,

Noshipala shaye itashi ka kala vali shihe na ombili.*

23 Osheshi ngeenge ta mono ovana vaye,

Ovo ve li oilonga yomake ange mokati kaye,

Otava ka yapulifa edina lange;

Heeno, otava ka yapulifa Omuyapuki waJakob,

Notava ka fikama va kuminwa Kalunga kaIsrael.

24 Ovo va puka otava ka mona eudeko,

Naavo hava ngongota otava ka tambula ko ewiliko.”

30 Jehova ota ti, “Woo, kovanamati ovatangalali,

Ovo hava wanifa po eemhangela, odo dihe fi dange,

Ovo have limange oukunikumwe,* ndele hakomhepo yange,

Opo va wede etimba ketimba.

2 Ohava i kuEgipiti inava pula ekwafo kwaame,*

Va ka konge omudile koshi yeameno laFarao*

Nova ka konge eameno momudidimbe waEgipiti!

3 Ashike eameno laFarao otali ke mu fifa ohoni,

Neameno lomudidimbe waEgipiti otali ke mu lengifa.

4 Osheshi omalenga aye oku li muSoan,

Novatumwa vaye ova fika kuHanes.

5 Aveshe otava ka fifwa ohoni

Kovanhu ovo itave va etele ouwa washa,

Ovo itave va kwafele, noku va etela ouwa,

Ohoni ashike nelengwa.”

6 Etumwalaka letokolo li na sha noifitukuti yokolukadi tali ti:

Okupitila medu loupyakadi noloudjuu,

Longhoshi, onghoshi tai kumbu,

Leuta, noleyoka hali tuka oshikuti,*

Ohava humbateke omaliko avo keembuda deendongi,

Noinima yavo keenhunda deengamelo.

Ashike oinima ei itai etele ovanhu ouwa.

7 Osheshi ekwafo laEgipiti olongaho elela.

Onghee onde va luka: “Rahab, oo natango e li omutumba.”

8 “Paife inda, li shanga koshipelende moipafi yavo,

Noku li shanga membo,

Opo li ka dule okulongifwa efiku limwe monakwiiwa

Li li ondombwedi yaalushe.

9 Osheshi ovo ovanhu ovanashibofa, ovanamati ovakengeleli,

Ovanamati ovo inava hala okuuda omhango* yaJehova.

10 Ohava lombwele ovamonikokule tava ti, ‘Inamu mona ko,’

Nokovamoni vomamoniko tava ti, ‘Inamu tu lombwela omamoniko oshili.

Tu lombweleni oinima tai nyuwifa omatwi;* omamoniko taa pukifa.

11 Yapukei mo mondjila, kandukei mo melila.

Inamu tu lombwela vali kombinga yOmuyapuki waIsrael.’”

12 Onghee hano, eshi osho Omuyapuki waIsrael ta ti:

“Molwaashi omwa anya ondjovo ei,

Nomwe lineekela moukengeleledi nomomakoto,

Nomwe liameka koinima ei,

13 Omolwepuko leni, omwa fa ekuma la teka,

Ngaashi ekuma lile la tenda omufya, li li pokuwa po.

Otali ka ngumauka po diva mepakumo leisho.

14 Otali ka teywa po, ngaashi oshitoo sha kula shomuhongi woiyuma

Sha nyanyaulwa po filufilu, noinapa fyaala okakangwa kasho

Kokukufa omundilo pediko,

Ile kokutekifa omeva mondobe.”*

15 Osheshi eshi osho Omwene Omunamapangelo aeshe, Jehova, Omuyapuki waIsrael, ta ti:

“Ngeenge omwa alukile kwaame nokutulumukwa, otamu ka xupifwa;

Eenghono deni otadi di mokukala mwa ngungumana nomu na elineekelo.”

Ashike kamwa li mwa hala.

16 Ponhele yaasho, omwa ti: “Ahawe, ohatu i onhapo neenghambe!”

Onghee otamu ka ya onhapo.

“Notamu ka londa keenghambe hadi tondoka onhapo yoshidudu.”

Onghee ovo tave mu taataa otava ka kala ve na onhapo yoshidudu.

17 Eyovi otava ka dekweta komatilifo omunhu umwe;

Otamu ka ya onhapo komatilifo ovanhu vatano,

Fiyo osheshi ovo vomunye va fyaala po va ninga ngaashi opala koxulo yomhunda,

Ngaashi opala yedidiliko koxulo yoshikulundudu.

18 Ashike Jehova okwa teelela nelididimiko* e mu file onghenda,

Nota ka fikama, e mu ulikile olukeno.

Osheshi Jehova oKalunga kouyuki.

Ovo tava kala va hafa ovovo tava kala ve mu teelela.*

19 Ngeenge ovanhu ova kala muSion, muJerusalem, ito ka lila nandenande. Ote ke ku fila onghenda, shimha a udu ondaka yoye, eshi to lilile ekwafo; ote ke ku nyamukula diva, shimha e i udu. 20 Nonande Jehova oku ku pe omungome woudjuu nomeva efininiko, Omuhongi woye Munenenene ita ka hondama vali, noto ka mona Omuhongi woye Munenenene nomesho oye mwene. 21 Nomatwi oye otaa ka uda ondaka tai di konima yoye tai ti, “Ei oyo ondjila. Enda muyo,” ngeenge wa pumbwa okuya kolulyo, ile ngeenge wa pumbwa okuya kolumosho.

22 Noto ka nyateka oshisilveri, osho sha vaekwa koihongwafano yeni, noshingoli, osho sha vaekwa koihongwafano yeni ya hambulwa moshivela.* Otamu ke i kupulashi ngaashi oshilapi shi na ohonde yomafimbo, ndele tamu ti kuyo, “Indeni!”* 23 Nota ka lokifila odula eembuto, odo mwa kuna medu, nedu otali ka menifa oikulya ihapu noiwa.* Mefiku olo, oufita weni otau ka lya moulifilo wa andjuka. 24 Neengobe neendongi, odo hadi pulula edu, otadi ka lya oikulya ya lumbakanifwa nomutete, oyo ya yelwa nawa noshixupulo nosho yo nefoloko. 25 Nokomhunda keshe ile nosho yo koshikulundudu keshe shile otaku ka kala omakungulukilo omeva nomatondokelo omeva, mefiku ledipao linene, eshi eeshungongulu tadi ka teka po. 26 Nouyelele womwedi otau ka kala ngaashi ouyelele wetango; nouyelele wetango otau ka kala wa twa lwomapa aheyali, ngaashi ouyelele womafiku aheyali; mefiku olo, Jehova ta ka manga ovanhu vaye, ovo va teka, nokuvelula oipute ya kula yaavo a denga.

27 Tala! Edina laJehova otali uya tali di kokule,

La xwama nehandu laye nosho yo noilemo ilaula.

Omilungu daye oda fula onya,

Nelaka laye ola fa omundilo tau lungwinifa.

28 Omhepo* yaye oya fa omulonga tau kunguluka, oo tau tu fiyo opofingo,

I kakamife oiwana nomushalo wehanauno;*

Novanhu otava ka kala ve na oitomo meehamama davo, oyo tai va yukifa koima kwa puka.

29 Ashike eimbilo leni otali ka kala ngaashi olo tali imbwa oufiku,

Eshi tamu lilongekidile* oshivilo,

Nomitima deni otadi ka hafa

Da fa oo ta ende ta shiki* onyalilo,

Eshi e li mondjila yaye a finda komhunda yaJehova, Emanya laIsrael.

30 Jehova ota ka ningifa ewi laye linene li udike,

Nota ka holola okwooko kwaye, eshi taku koloka moupyu wehandu laye,

Nomalaka omundilo taa lungwinifa,

Oilemo tai ndwafuka nomipwalakato nosho yo eemhawe.

31 Osheshi omolwewi laJehova, Assiria ota ka hangwa kehaluko;

Ota ka dengwa nodibo.

32 Nedengo keshe lodibo yaye yehandukilo,

Olo Jehova ta denge nalo Assiria,

Otali ka endela pamwe noungoma nosho yo nouxumbafeta,

Eshi e va yelulila okwooko kwaye molwoodi.

33 Osheshi Tofet* shaye osha longekidwa;

Osha longekidilwa yo ohamba.

Okwa ninga onduba yoiti ya ya moule noinene,

Nomundilo nosho yo oikuni ihapu.

Omufudo waJehova, ngaashi omulonga wosulfuri,

Otau ke shi tomeka.

31 Woo, ovo hava i kuEgipiti va ka konge ekwafo,

Ovo ve lineekela meenghambe,

Ovo ve lineekela momatemba oita, molwaashi mahapu,

Nomeenghambe doita,* molwaashi di na eenghono.

Ashike ihava kongo ekwafo kOmuyapuki waIsrael,

Noihava kongo Jehova.

2 Ndele naye yo omunaendunge, nota ka eta oupyakadi,

Noite ke lialuluka kwaasho a popya.

Ota ka fikama a kondjife eumbo lovalongi vowii.

Nota ka kondjifa ovo hava kwafele ovo hava longo osho shii.

3 Osheshi Ovaegipiti ovanhu ashike ovo vehe kwete okufya, ndele kave fi Kalunga;

Eenghambe davo odopambelela, ndele kadi fi dopamhepo.

Ngeenge Jehova okwa nane eke laye,

Keshe oo ha yandje ekwafo ota ka punduka,

Nakeshe oo a kwafelwa ota ka wila po;

Otava ka xula po oshita.

4 Osheshi eshi osho Jehova a lombwela nge ta ti:

“Ngaashi ashike onghoshi, onghoshi onyasha inaenghono,* tai kumbile oshihakanwa shayo,

Eshi ya ifanenwa ongudu aishe yovafita i ke i lwife,

Inai tilifwa komawi avo,

Ile i mbadapalekwe keuyaano lavo,

Jehova womatangakwaita naye osho te ke uya kedu, a lwe oita

KOmhunda Sion nokoshikulundudu shaye.

5 Ngaashi eedila hadi kulukile poshi, Jehova womatangakwaita naye ota ka amena Jerusalem.

Ote ke mu popila, noku mu xupifa.

Ote ke mu amena, noku mu xupifa.”

6 “Shuneni kwaao mwa tukululila oshibofa owina, nye ovanhu vomuIsrael. 7 Osheshi mefiku olo, keshe umwe ota ka efa po ookalunga vaye vongaho voshisilveri, nookalunga vaye vehe na ekwafo lasha voshingoli, ovo mwa ninga nomake eni omolwoulunde.

8 NOvaassiria otava ka wila po keongamukonda, ndele kali fi lomunhu;

Neongamukonda, olo lihe fi lomunhu, otali ke va hanauna po.

Otava ka ya onhapo omolweongamukonda,

Novalumenhu vavo ovanyasha otava ka longifwa oilonga idjuu.

9 Emanya laye otali ka xula po omolwoumbada muhapu neenghono,

Nomalenga aye otaa ka tilifwa omolwopala yedidiliko,” Jehova osho a ti,

Oo ouyelele* waye u li muSion, naao ediko laye li li muJerusalem.

32 Tala! Ohamba otai ka pangela pauyuki,

Nomalenga otaa ka lela pauyuki.

2 Nakeshe umwe ota ka kala ngaashi onhele yokuhondama* omhepo,

Onhele yokuhondama* oshikungulu shodula,

Ngaashi omakungulukilo omeva medu lihe na omeva,

Ngaashi omudidimbe wemanya linene medu la notelwa.

3 Opo nee omesho aavo hava mono ko itaa ka twika vali,

Nomatwi aavo hava udu ko otaa ka yandja elitulemo.

4 Omitima daavo ihava diladila nawa otadi ka dilonga keshiivo,

Nelaka hali kokoma otali ka popya la manguluka nosho yo oinima ya yela.

5 Elai itaku ka tiwa vali ohali yandje,

Nomunhu, oo iha wilikwa komafinamhango, ita ka ifanwa vali elenga;

6 Osheshi elai otali ka popya oulai,

Nomutima walo otau ka diladila oinima ya nyika oshiponga,

Opo li xumife komesho oushunimonima* nokupopya osho shi li omhinge naJehova,

Opo li ningife oo a fya ondjala* a ye ina lya,

Nokwaanyena sha shokunwa oo a fya enota.

7 Eemhangela domunhu, oo iha wilikwa komafinamhango, odii;

Oha xumifa komesho elihumbato tali fifa ohoni,

Opo a nyone po omufininikwa noipupulu,

Nokuli nongeenge ohepele tai popi osho sha yuka.

8 Ashike oo ha yandje nehalo liwa oku na omalinyengotomheno mawa okuyandja,

Nota twikile okuyandja nehalo liwa.

9 “Ovakainhu nye, ovo ihamu lipula, fikameni, ndele tamu pwilikine kondaka yange!

Oukadona nye, ovo muhe na ko nasha, yandjeni elitulemo kwaasho handi popi!

10 Moule wodula nomafiku manini, nye ovo muhe na ko nasha, otamu ka kakama,

Molwaashi itapa ka kala oiimati ya ongelwa, ngeenge efimbo lokulikola omandjebele ola xulu.

11 Dekweteni, ovakainhu nye ihamu lipula!

Kakameni, nye ovo muhe na ko nasha!

Liduleni, ndele tamu kala hamunghele,

Nokudjala eeshako moiya yeni.

12 Kweneni tamu lidenge meenhulo

Omolwomapya mawa nomolwoikunino yomandjebele hai ima nawa.

13 Osheshi edu lovanhu vange otali ka yadifwa omakiya nosho yo eeshosholo;

Otai ka kala momaumbo aeshe e na ehafo,

Heeno, oshilando shehafo.

14 Osheshi ongulu ya pama oya fiwa po;

Oshilando, omo mwa li hamu kala omaweelelo, osha haulukwa.

Ofel nosho yo oshungongulu oya ninga eputu laalushe,

Onhele yokukala eendongi deeshondolo,

Oulifilo womaufita,

15 Fiyo osheshi omhepo ya tililwa kombada yetu okudja pombada,

Nombuwa ya ninga oshikunino shomiti doiimati,

Noshikunino shomiti doiimati otashi ka talika ko sha fa ofuka.

16 Opo nee ouyuki otau ka kala mombuwa,

Naasho sha yuka otashi ka kala moshikunino shomiti doiimati.

17 Oshidjemo shouyuki washili otashi ka kala ombili,

Noshiimati shouyuki washili otashi ka kala ombili tai kalelele neameno.

18 Ovanhu vange otava ka kala monhele i na ombili yaalushe,

Momalukalwa a amenwa nomeenhele di na ombili dokutulumukila.

19 Ashike eemhawe otadi ka tokeka ofuka,

Noshilando otashi ka lalakanifwa filufilu.

20 Ovo tava kala va hafa ovovo hava kunu eembuto keshe opo pe na omeva,

Ovo hava pitifa* mo ongobe yomhedi nosho yo ondongi.”

33 Woo ove, ove omuhanauni oo ina hanaunwa po;

Ove omukengeleledi, ou ina kengelelwa!

Ngeenge owa mane okuhanauna, oto ka hanaunwa po.

Ngeenge owa mane okukengelela, oto ka kengelelwa.

2 Akutu! Jehova, tu fila onghenda.

Oove elineekelo letu.

Ninga okwooko* kwetu ongula keshe,

Heeno, exupifo letu pefimbo loudjuu.

3 Ovanhu otava i onhapo keuyaano.

Ngeenge wa fikama, oiwana otai lihane.

4 Ngaashi oshipaxu sha nyika oshiponga sha ongala, oixuulwa* yeni nayo osho tai ka ongelwa;

Ovanhu otave ke i lihakana ngaashi eengudu doshipaxu.

5 Jehova ota ka tumbalekwa,

Osheshi oha kala pombadambada.

Ota ka yadeka Sion nouyuki nosho yo naasho sha yuka.

6 Oye te mu ngungumaneke pefimbo leni;

Oku yadi exupifo, ounongo, eshiivo nosho yo etilo lokutila Jehova,

Olo olo emona laye.

7 Tala! Omapendafule avo otaa ingida mepandavanda;

Ovatumwa vombili otava lili unene.

8 Eendjila kadi na ovanhu;

Kape na oo ta ende momalila.

Okwa* teya ehangano;

Okwa hauluka oilando;

Ke na ko nasha nomunhu wongaho.

9 Edu ola nyika oluhodi,* notali lembe.

Libanon okwa fifwa ohoni; okwa ola.

Sharon okwa ninga ngaashi ombuwa,

Na Basan naKarmel otava yaumuna ko omafo avo.

10 Jehova ota ti: “Paife, ohandi ka fikama,

Paife ohandi ke litumbalekifa;

Paife ohandi ke lifimanekifa.

11 Omu na oufimba womwiidi mukukutu, nomwa dala oihati.

Omhepo yeni otai ke mu lungwinifa po ngaashi omundilo.

12 Novanhu otava ka ninga ngaashi omute.

Ngaashi omakiya a tetwa, otava ka tomekwa omundilo.

13 Nye ovo mu li kokule, pwilikineni kwaasho handi ka ninga!

Naavo mu li popepi, shiiveni eenghono dange!

14 Ovalunde vomuSion ove li moumbada;

Ovashunimonima ova kwatwa kehaluko tava ti:

‘Olyelye womufye ta dulu okuxupa komundilo tau lungwinifa?

Olyelye womufye ta dulu okuxupa komalaka omundilo taa hanauna?’

15 Oye oo ha ende alushe pauyuki,

Oye oo ha popi osho sha yuka,

Oye oo ha henuka oipupulu, okulikola moukengeleledi,

Oye oo omake aye haa anye ombubo ponhele yoku i tambula ko,

Oye oo ha fitike omatwi aye, aha ude eendjovo di na sha netileshi lohonde

Naao ha fifikinifa omesho aye, a henuke okutala osho shii,

16 Ota ka kala ha di pombadambada;

Ouhondameno waye wa amenwa* otau ka kala meehotengulu demanya,

Ota ka pewa alushe omungome,

Nomeva aye itaa ka pwiinina.”

17 Omesho eni otaa ka tala ohamba mewapalo layo;

Otaa ka mona oshilongo shi li kokule.

18 Momitima deni, otamu ka dimbuluka* omatilifo tamu ti:

“Hamushanga oku li peni?

Ou kwa li ha yeleke eemhale* oku li peni?

Ou kwa li ha valula eeshungongulu oku li peni?”

19 Itamu ka mona vali ovanhu ovatangalali,

Ovanhu ovo hava popi elaka lidjuu* okuudiwa ko,

Itamu ka uda vali ovo hava popi tava kokoma.

20 Tala Sion, oshilando shoivilo yetu!

Omesho oye otaa ka tala ko Jerusalem ngaashi onhele yokukala yombili,

Etwali olo itali ke linyengifwa.

Outenda valo itava ka dudwa mo,

Neengodi dalo itadi ka tokoka.

21 Ashike oko, Omunaenghono, Jehova,

Ota ka kala kufye oshitukulwa shomilonga, shomakungulukilo omeva a mbwalangadja,

Oko itaku ka ya oyeendo yeewato,

Nokape na eeskepa dinene tadi ka tauluka ko.

22 Osheshi Jehova oye Omutokoli wetu,

Jehova oye Omuyandjimhango wetu,

Jehova oye Ohamba yetu;

Oye te ke tu xupifa.

23 Eengodi doye otadi ka yululuka;

Itadi ka dula okukwata opala yoskepa, noku i endifa.

Pefimbo olo, oixuulwa* ihapu otai ka tukulwa;

Nokuli noshingudu otashi ka kufa oinima ihapu, oyo ya nyekwa ko.

24 Nokape na omukalimo* ta ka tya: “Ohandi vele.”

Ovanhu, ovo tava ka kala medu olo, otava ka diminwa po omatimba avo.

34 Eheneni popepi, mu pwilikine, nye oiwana,

Nokuyandja elitulemo, nye ovanhu.

Edu noinima, oyo i li ko, pwilikineni,

Edu noinima aishe, oyo i li ko.

2 Osheshi ehandu laJehova otali hange oiwana aishe,

Nonya yaye otai hange omatangakwaita ayo aeshe.

Ote ke i tokolela ehanauno;

Ote ke i yandja, i dipawe.

3 Ovadipawa vavo otava ka ekelwashi,

Nedimba loimhu yavo otali ke lihanena pombada;

Eemhunda otadi ka hengumuka* omolwohonde yavo.

4 Omatangakwaita aeshe okeulu otaa ka ola,

Neulu otali ka tonywa ngaashi omushangwatonywa.

Omatangakwaita ayo aeshe otaa ka xula po,

Ngaashi efo la lemba tali u komundjebele

Nonghwiyu ya ngata tai u komukwiyu.

5 “Osheshi eongamukonda lange otali ka tutikwa meulu.

Otali ka kolokela muEdom li tokole,

Ovanhu ovo nda tokolela ehanauno.

6 Jehova oku na eongamukonda; otali ka kala li yadi ohonde.

Otali ka kala li yadi oinghene,

Ohonde yeedjona deendume noyoikombo,

Oinghene yeedi deendume yokeefiyo.

Osheshi Jehova okwa ninga eyambo muBosra,

Edipao linene medu laEdom.

7 Eemhedi domoixwa otadi ka dipawa pamwe navo,

Eendumetana pamwe novanaenghono.

Edu lavo otali ka tuta kohonde,

Nondwi yavo otai ka kala ya hekela koinghene.”

8 Osheshi Jehova oku na efiku lokuhandukila,

Odula yonghone omolwoshikoya shi na sha naSion.

9 Omakungulukilo asho* otaa ka lundululilwa momunoko,*

Nondwi yasho omosulfuri,

Nedu lasho otali ka kala ngaashi omunoko tau pi.

10 Itashi ka dimwa kutya nee oufiku, ile omutenya;

Omwifi washo otau ka kala tau lundumuka wa finda pombada fiyo alushe.

Okudja kepupi fiyo okepupi, otashi ka kala eputu;

Kape na oo ta ka tavakana mo musho alushe fiyo alushe.

11 Onyundu nashinyengu otai ke shi nangala,

Omaxuvi omatwi male nosho yo omakola otaa ka kala haa di musho.

Ota ka nana ongodi yokuyelekifa yokumbuwapaleka kombada yasho

Nosho yo ongodi yokutunga* yehanauno.

12 Movawiliki vasho kape na oo ta ka ningwa ohamba,

Nomalenga asho aeshe itaa ka kala mo vali.

13 Omakiya otaa ka mena meeshungongulu dasho da pama,

Eeshosholo noimbodi yomakiya omeehotekuma dasho.

Otashi ka ninga omikwena dookavandje,

Onhele yeemho.

14 Oinamwenyo yomombuwa otai ka shakena noinamwenyo hai kwena,

Noshikombo shomoixwa* otashi ka ifana shikwao.

Heeno, oko shilumbaba oko ta ka kala, nokumona ko onhele yaye yokutulumukwa.

15 Eyoka hali endelele oshikuti oko tali ka longekidila onhele yokudalela omai noku a nangela,

Notali ke a tendula noku va amena.

Heeno, ookaimbi oko tava ka ongala, keshe umwe namukwao.

16 Kongeni membo laJehova noku li lesha mokule kutya:

Kape na shimwe shomuyo tashi ka kana;

Kape na shimwe shomuyo tashi ka kala shihe na shikwao,

Osheshi okanya kaJehova oko ka yandja elombwelo,

Nomhepo yaye oyo ye i ongela pamwe.

17 Oye e i umbila oshihoololifo,

Neke laye mwene ola meta onhele yayo yokukala.*

Otai ke shi nangala fiyo alushe;

Otai ka kala hai di oko okudja komapupi aeshe.

35 Ombuwa nedu la kukuta otai ka nyakukwa,

Noluhaela lomombuwa otali ka hafa nokutemuna ngaashi eengala.*

2 Otali ka temuna neenghono;

Otali ka nyakukwa nokuhafa pombada.

Efimano laLibanon otali ka yandjwa kulo,

Ewapalo laKarmel nolaSharon.

Otava ka mona efimano laJehova, ewapalo laKalunga ketu.

3 Pamekeni omake oo a nghundipala,

Nokupameka eengolo odo tadi kakama.

4 Lombwela ovo ve na oshisho komutima to ti:

“Kaleni mwa pama. Inamu tila.

Taleni! Kalunga keni ote ke uya nehandu,

Kalunga ote ke uya nonghone.

Ote ke uya, ndele te mu xupifa.”

5 Pefimbo olo, omesho ovapofi otaa ka mona ko,

Nomatwi eembolo otaa ka fituluka.

6 Pefimbo olo, oshingudu otashi ka nuka ngaashi onyapi,

Nelaka laau iha popi otali ka kuwilila kehafo.

Osheshi omeva otaa ka ndwafuka mombuwa,

Nomakungulukilo omeva omoluhaela lomombuwa.

7 Edu la kukuta otali ka ninga etale lomeva li na eembungu,

Nedu la notelwa otali ningi eefifiya domeva.

Momikwena omo hamu kala ookavandje va omba,

Otamu ka kala omwiidi mutalala, eembungu nomanenge.

8 Notaku ka kala ondjila ya kula,

Heeno, ondjila hai ifanwa Ondjila Iyapuki.

Ovo inava koshoka itava ka enda mo.

Oye likalekelelwa ovo tava ka enda mondjila oyo;

Kape na elai tali ka enda mo.

9 Itamu ka kala onghoshi,

Noifitukuti ya nyika oshiponga itai ke uya mo.

Itai ka monika mo;

Ovovo ashike va kulilwa tava ka enda mo.

10 Ovo va kulilwa kuJehova otava ka aluka, ndele tave uya kuSion ve na ehafo linene.

Ehafo laalushe otali ka kala komitwe davo.

Enyaku nehafo otai ka kala yavo,

Noluhodi nokutwa omadima otai ka ya onhapo.

36 Momudo omuti-14 wepangelo lohamba Hiskia, Sanheerib, ohamba yaAssiria, okwe uya okulwifa oilando aishe yaJuda ya dingililwa komakuma a pama, ndele te i kwata ko. 2 Opo nee ohamba yaAssiria oya tuma Rabsake* pamwe netangakwaita linene, la dja kuLakis, va ye kohamba Hiskia, muJerusalem. Ova fikama pomukangha wetale, olo li li komulondo, pondjila oyo ya finda konhele yovakoshi voikutu. 3 Opo nee Eliakim, omonamati waHilkia, oo a li ha pashukile eumbo,* hamushanga Sebna nosho yo Joa, omonamati waAsaf, omushangi wondjokonona, ova ya kuye.

4 Onghee Rabsake okwa tya kuvo: “Alikana, lombweleni Hiskia kutya, ‘Ohamba inene, ohamba yaAssiria, otai ti ngaha: “Owe lineekela mushike? 5 Oto ti, ‘Ondi na omhangela neenghono doku ka lwa moita,’ Ashike odo eendjovo dongaho. Owe lineekela mulyelye, opo u tukululile nge oshibofa? 6 Tala! Owe lineekela mekwafo laEgipiti, oo e li olumbungu la tenda, oko ngeenge omunhu te likolele ko tali mu tu meke noku li tyuula. Farao, ohamba yaEgipiti, osho e li ngaho kwaaveshe ovo tave mu lineekele. 7 Nongeenge otamu lombwele nge tamu ti, ‘Otwe lineekela muJehova, Kalunga ketu,’ haye ngoo oo eenhele daye dokoikulundudu neealtari daye da hanaunwa po kuHiskia, ofimbo ta lombwele Juda naJerusalem ta ti, ‘Omu na okulinyongamena koaltari ei’?”’ 8 Alikana, ninga paife eudafanotwokumwe nomwene wange, ohamba yaAssiria: Ohandi ku pe eenghambe 2 000, ngeenge oto dulu oku di kongela ovalondi va wana. 9 Ongahelipi hano to ka dula okufinda nande ongoloneya, oo munini movapiya vomwene wange, ofimbo to lineekele Egipiti omolwomatemba nomolwovalondinghambe? 10 Mbela onde uya inandi pewa epitikilo kuJehova, eshi nde uya okulwifa oshilando eshi noku shi hanauna po? Jehova okwa lombwela nge ye mwene a ti, ‘Inda u ka lwife oshilando osho noku shi hanauna po.’”

11 Opo nee Eliakim, Sebna naJoa ova lombwela Rabsake va ti: “Alikana, popya novapiya voye melaka lOshiaramea,* molwaashi fye ohatu shi udu; ino popya nafye melaka lOshijuda, opo ovanhu ovo ve li omutumba kekuma vaha ude ko.” 12 Ashike Rabsake okwa nyamukula a ti: “Mbela omwene wange okwa tuma nge ashike ndi popye nanye nosho yo nomwene weni eendjovo edi? Mbela ina tuma nge yo ndi popye novalumenhu, ovo ve li omutumba kekuma, ovo tava ka lya omatudi avo nokunwa omaxu avo vene pamwe nanye?”

13 Opo nee Rabsake okwa fikama, ndele ta ingida mokule melaka lOshijuda ta ti: “Udeni eendjovo dohamba inene, ohamba yaAssiria. 14 Ohamba otai ti ngaha, ‘Inamu pukifwa kuHiskia, molwaashi ita dulu oku mu xupifa. 15 Inamu efa yo Hiskia e mu ningife mu lineekele muJehova, eshi ta ti: “Jehova ote ke tu xupifa filufilu, noshilando eshi itashi ka yandjwa momake ohamba yaAssiria.” 16 Inamu pwilikina kuHiskia, molwaashi ohamba yaAssiria otai ti: “Ningeni ombili naame nokuliyandja,* nakeshe umwe womunye ota ka lya komundjebele waye mwene nokomukwiyu waye mwene, nota ka nwa omeva omondungu yaye mwene, 17 fiyo handi uya, ndele handi mu twala kedu olo li li ngaashi leni, edu loilya nolomaviinyu mape, edu lomungome noloikunino yomandjebele. 18 Inamu pukifwa kuHiskia, eshi ta ti, ‘Jehova ote ke tu xupifa.’ Mbela ope na ngoo ookalunga voiwana va xupifa oilando yavo meke lohamba yaAssiria? 19 Ookalunga vaHamat novaArpad ove li peni? Ookalunga vaSefarvaim ove li peni? Nova dula tuu okuxupifa Samaria momake ange? 20 Olyelye mokati kookalunga aveshe voilando oyo a dula okuxupifa oshilando shaye meke lange, opo Jehova a dule okuxupifa Jerusalem meke lange?”’”

21 Ashike ova kala va mwena, noinave mu nyamukula nande onondjovo imwe, molwaashi ohamba oya yandja elombwelo tali ti, “Inamu mu nyamukula.” 22 Ashike Eliakim, omonamati waHilkia, oo a li ta pashukile eumbo,* hamushanga Sebna naJoa, omonamati waAsaf, omushangi wondjokonona, ove uya kuHiskia va djala oikutu ya pombauka, ndele tave mu lombwele eendjovo daRabsake.

37 Diva eshi ohamba Hiskia ya uda oshinima osho, oya pombaula oikutu yayo, ndele tai djala oshako, noya ya meumbo laJehova. 2 Opo nee oya tuma Eliakim, oo a li ta pashukile eumbo,* hamushanga Sebna novakulunhu vovapristeri va djala eeshako, va ye komuprofeti Jesaja, omonamati waAmos. 3 Ova tya kuye: “Eshi osho Hiskia a popya, ‘Efiku eli efiku loudjuu, lehandu* nolokufifwa ohoni. Otwa fa omukainhu, oo e li pokudala,* ashike ke na eenghono dokudala. 4 Pamwe Jehova, Kalunga koye, ota ka uda eendjovo daRabsake, oo a tumwa komwene waye, ohamba yaAssiria, a sheke Kalunga omunamwenyo, note ke lihokolola omolweendjovo odo Jehova, Kalunga koye, a uda. Onghee ilikana ponhele yoshixupe, osho sha xupa po.’”

5 Onghee ovapiya vohamba Hiskia ova ya kuJesaja, 6 na Jesaja okwa tya kuvo: “Eshi osho mu na okulombwela omwene weni, ‘Eshi osho Jehova ta ti: “Inamu kala mwa tila omolweendjovo odo mwa uda, eendjovo odo ovapiya vohamba yaAssiria va ula nge. 7 Ohandi tula ediladilo momutima waye,* nota ka uda onghundana, ndele ta shuna koshilongo shavo, nohandi ke mu ningifa a file moshilongo shavo keongamukonda.”’”

8 Konima eshi Rabsake a uda kutya ohamba yaAssiria oya dja mo muLakis, okwa shuna kuyo, nokwa hanga tai lwifa Libna. 9 Ohamba oya uda taku ti: “Tirhaka, ohamba yaEtiopia, okwe uya oku ku lwifa.” Eshi ye shi uda, oya tuma vali ovatumwa kuHiskia tai ti: 10 “Lombwela Hiskia, ohamba yaJuda, to ti, ‘Ino efa Kalunga koye, oo we lineekela e ku pukife, eshi ta ti: “Jerusalem itashi ka yandjwa momake ohamba yaAssiria.” 11 Tala! Owa uda osho eehamba daAssiria da ningila oilongo aishe moku i hanauna po. Mbela oove nee auke to ka xupifwa? 12 Mbela ookalunga voiwana, oyo ootatekulululwa va hanauna po, ove va xupifa? Gosan, Haran, Resef nosho yo ovanhu vomuEden, ovo va li muTelassar, ove li peni? 13 Ohamba yaHamat, ohamba yaArpad nohamba yoilando yaSefarvaim, yaHena noyaIva odi li peni?’”

14 Hiskia okwa kufa eenhumwafo momake ovatumwa, ndele te di lesha. Opo nee Hiskia okwa ya keumbo laJehova, ndele te di* nyanununa mo moipafi yaJehova. 15 Na Hiskia okwa hovela okwiilikana kuJehova ta ti: 16 “Akutu! Jehova womatangakwaita, Kalunga kaIsrael, ou u li omutumba kolukalwapangelo pombada* yovakerubi, oove auke Kalunga kashili komauhamba aeshe okombada yedu. Oove wa shita eulu nedu. 17 Akutu! Jehova, pwilikina, ndele to udu ko! Akutu! Jehova, patulula omesho oye, u mone ko! Uda eendjovo adishe odo Sanheerib a tuma, opo a sheke Kalunga omunamwenyo. 18 Akutu! Jehova, oshoshili kutya eehamba daAssiria oda hanauna po oilongo aishe nosho yo oshilongo shado. 19 Noda umbila ookalunga kado momundilo, molwaashi kava li ookalunga kashili, ndele oilonga yomake ovanhu, oiti nomamanya. Nomolwaashi da dula oku va hanauna po. 20 Ashike paife, Akutu! Jehova, Kalunga ketu, tu xupifa momake aye, opo omauhamba aeshe kombada yedu a shiive kutya oove ashike Kalunga, Akutu! Jehova.”

21 Opo nee Jesaja, omonamati waAmos, okwa tuma etumwalaka kuHiskia tali ti: “Eshi osho Jehova, Kalunga kaIsrael, ta ti, ‘Molwaashi owa ilikana kwaame shi na sha naSanheerib, ohamba yaAssiria, 22 Jehova okwa popya shi na sha naSanheerib a ti:

“Omonakadona elela waSion ote ku tondo, note ku sheke.

Omonakadona waJerusalem ote ku pukaapukile omutwe waye.

23 Olyelye wa kembaula nowe mu tuka?

Olyelye wa hanyena

Nowe mu tala neisho lii?

Owe shi ningila omuyapuki waIsrael!

24 Owa kembaula Jehova okupitila movapiya voye wa ti,

Nomatemba ange oita mahapu,

‘Ohandi ka londa koxulo yeemhunda,

Oitukulwa ye likalela yaLibanon.

Ohandi ka tetaula po omisederi dasho dile nosho yo omiti dasho diwa domidjenipa.

Ohandi ka ya keenhele dasho dokokulekule, komifitu dasho da fita.

25 Ohandi ka fa eendungu nokunwa omeva;

Ohandi ka pwiininika oumulonga* vaEgipiti neemhadi dange.’

26 Mbela ino shi uda? Osha tokolwa* okudja nale.

Onde shi longekida* okudja pomafiku onale.

Paife ohandi ke shi wanifa po.

Oilando yomakuma a pama oto ke i ninga onduba yoikulukuma ya haulukwa.

27 Ovakalimo vamo otava ka kala vehe na ekwafo lasha;

Otava ka mbadapalifwa nokufifwa ohoni.

Otava ka kala ngaashi oimeno yomoixwa nomwiidi mutalala,

Ngaashi omwiidi u li kombada yeumbo wa kukutikwa komhepo yokoushilo.

28 Ashike ondi ku shii nawa, ngeenge u li omutumba, ngeenge to di mo, ile ngeenge to uya mo,

Nongeenge wa handukila nge,

29 Molwaashi owa handukila nge, neendjovo dehandu loye oda fika momatwi ange.

Onghee ohandi ka tula ongona meyulu loye noshitomo shange pokati komilungu doye,

Nohandi ke ku shunifa nondjila oyo we uya nayo.”

30 “‘Naashi osho tashi ningi edidiliko loye:* Modula ei otamu ka lya osho sha mena kusho vene;* nomodula onhivali, otamu ka lya oilya, oyo ya twiyuka; ashike modula onhinhatu, otamu ka kuna eembuto nokuteya, notamu ka kuna oikunino yomandjebele, ndele tamu li oiimati yayo. 31 Ovanhu vomeumbo laJuda, ovo va faduka po, ovo va xupa po, otava ka kala ngaashi omuti u na omidi da ya moule, notau imi oiimati ihapu. 32 Osheshi oshixupe otashi ka dja mo muJerusalem, naavo va xupa po otava ka dja ko kOmhunda Sion. Ouladi waJehova womatangakwaita otau ke shi ninga.

33 “‘Onghee hano, eshi osho Jehova a popya shi na sha nohamba yaAssiria a ti:

“Ite ke uya mo moshilando eshi,

Ile a umbe mo oshikuti,

Ile a ye mo noshikelelifo,

Ile e shi ningile ekondeka londuba yomadu.”’

34 ‘Ondjila oyo e uya nayo, oyo ta ka shuna nayo;

Ite ke uya mo moshilando eshi,’ Jehova osho ta ti.

35 ‘Ohandi ka lwila oshilando eshi, noku shi xupifa omolwedina lange

Nomolwomupiya wange, David.’”

36 Nomweengeli waJehova okwa ya, ndele ta dipaa ovalumenhu 185 000 monhanda yOvaassiria. Eshi ovanhu va penduka ongula inene, ova mona oimhu yaaveshe ovo va fya. 37 Opo nee Sanheerib, ohamba yaAssiria, okwa dja ko, ndele ta shuna kuNinive, naako oko a kala. 38 Nofimbo a li te linyongamene meumbo* lakalunga kaye, Nisrok, ovanamati vaye, Adrammelek naShareser, ove mu dipaa neongamukonda, ndele tava i onhapo kedu laArarat. Nomonamati waye Esar-haddon okwa ninga ohamba ponhele yaye.

38 Pefimbo olo, Hiskia okwa li ta ehama nokwa li e li pokufya. Omuprofeti Jesaja, omonamati waAmos, okwe uya, ndele ta ti kuye, “Jehova ota ti ngaha: ‘Yandja omalombwelo koukwaneumbo woye, molwaashi oto ka fya; ito ka veluka.’” 2 Opo nee Hiskia okwa taalela mekuma, ndele ta hovele okwiilikana kuJehova ta ti: 3 “Akutu! Jehova, ohandi ku indile, alikana, dimbuluka nghee nde ku longela noudiinini nomutima aushe, nanghee nda longa osho shiwa momesho oye.” Na Hiskia okwa hovela okulila neenghono.

4 Opo nee ondjovo yaJehova oye uya kuJesaja tai ti: 5 “Shuna, ndele to lombwele Hiskia kutya, ‘Eshi osho Jehova, Kalunga kaDavid, xokulululwa, ta ti: “Onda uda eindilo loye. Onda mona omahodi oye. Paife ohandi ku wedele ko eedula 15 kokukalamwenyo* kwoye, 6 nohandi ku xupifa nosho yo oshilando eshi momake ohamba yaAssiria, nohandi ka lwila oshilando eshi. 7 Eli olo edidiliko la dja kuJehova, olo tali ku ulikile kutya Jehova ota ka wanifa po ondjovo oyo a popya: 8 Paife, ohandi ka shunifa monima omudidimbe wetango, oo u li keetalapa* daAhas, u shune monima omana omulongo.”’” Onghee etango ola shuna monima omana omulongo keetalapa, opo la hangwa nale la pitilila.

9 Eshangelo* lohamba Hiskia yaJuda, eshi ya li tai vele, naashi ya veluka koudu wayo.

10 Onda ti: “Mounyasha wange,

Ondi na okuya moivelo yOmbila.*

Ohandi ka anyenwa eedula dange, odo da xupa ko.”

11 Onda ti: “Itandi ka mona Jah,* Jah, medu lovanamwenyo.

Itandi ka mona vali ovanhu,

Eshi ndi li pamwe novakalimo vomonhele, omo keshe shimwe sha xula po.

12 Onhele yange mwene oya hanaunwa po, nonde i kufwa

Ngaashi etwali lomufita.

Onda tonya onghalamwenyo yange ngaashi omunduluki woiyata;

Okwa teta nge po ngaashi eengodi dokutunga oiyata.

Okudja omutenya fiyo oufiku, owa kala nokuxulifa nge po.

13 Onde lidiinika fiyo ongula.

Ngaashi onghoshi, okwa kala nokuteyaula omakipa ange aeshe;

Okudja omutenya fiyo oufiku, owa kala nokuxulifa nge po.

14 Ngaashi okandiilili, ile tena,* osho nda kala nokusheketa;

Onda kala handi kwena ngaashi onghuti.

Omesho ange otaa tale pombada a loloka:

‘Akutu! Jehova, ondi li moudjuu munene;

Kala omuyambididi wange!’*

15 Ondi popye vali shike?

Okwa popya naame, nokwa katuka onghatu.

Ohandi ende nde lininipika* eedula dange adishe

Omolwoudjuu wange munene.*

16 ‘O! Jehova, omunhu keshe oku na omwenyo omolwoinima ei,*

Nomuyo omu na omwenyo womhepo yange.

Oto ka shunifa nge vali moukolele nokukaleka nge nomwenyo.

17 Tala! Ponhele yombili, ondi na oudjuu munene;

Ndele molwaashi owa hafela nge,*

Owa xupifa nge melambo lehanauno.

Owa kupulashi omanyono ange aeshe konima yoye.*

18 Osheshi Ombila* itai dulu oku ku fimaneka,

Efyo itali dulu oku ku tanga.

Ovo hava i melambo itava dulu okumona oudiinini woye.

19 Ovanamwenyo, ovanamwenyo otava dulu oku ku tanga.

Ngaashi ashike ame handi dulu nena eli.

Xe omudali ota dulu okuhonga ovanamati vaye kombinga youdiinini woye.

20 Akutu! Jehova, xupife nge,

Nohandi ka shika omaimbilo ange noishikomwa yeengodi

Omafiku etu aeshe okukalamwenyo meumbo laJehova.’”

21 Opo nee Jesaja okwa tya: “Etelei nge oshikuki sheenghwiyu da kukutikwa, ndele tamu shi vaeke poshitumba, opo a dule okuveluka.” 22 Hiskia okwa pula a ti: “Edidiliko lilipi tali ka ulika kutya ohandi ka ya keumbo laJehova?”

39 Pefimbo olo, ohamba yaBabilon, Merodak-Baladan, omonamati waBaladan, oya tumina Hiskia eenhumwafo nosho yo oshali, molwaashi oya uda kutya Hiskia okwa li ta ehama, nokwa veluka. 2 Hiskia okwe va tambula ko nehafo,* ndele te va ulikile eemhungulilo domeumbo laye, oshisilveri, oshingoli, omaadi o-balsam nomaadi akwao ondilo, ponhele apeshe opo hapa kala oilwifo yaye, nakeshe shimwe osho shi li meemhungulilo daye. Kape na nande oshinima shimwe osho Hiskia ine va ulikila meumbo* laye nosho yo mouhamba waye aushe.

3 Konima yaasho, omuprofeti Jesaja okwe uya kohamba Hiskia, ndele te i pula ta ti: “Ovalumenhu ava ova popya shike, nova dja peni?” Opo nee Hiskia okwa ti: “Ova dja kedu lokokule, kuBabilon.” 4 Okwa pula vali a ti: “Ova mona mo shike meumbo* loye?” Hiskia okwa nyamukula a ti: “Ova mona oinima aishe oyo i li meumbo* lange. Kape na nande oshinima shimwe inandi va ulikila meemhungulilo dange.”

5 Opo nee Jesaja okwa lombwela Hiskia ta ti: “Uda ondjovo yaJehova womatangakwaita, 6 ‘Tala! Omafiku otae uya, noinima aishe oyo i li meumbo* loye nosho yo oinima aishe oyo ooxokulululwa va tuvikila fiyo okunena, otai ka twalwa kuBabilon. Kape na nande oshimwe tashi ka fiwa po,’ Jehova osho ta ti. 7 ‘Navamwe vomovanamati voye, ovo to ka dala, otava ka kufwa po, notava ka ninga omalenga omombala, mombala yohamba yaBabilon.’”

8 Opo nee Hiskia okwa lombwela Jesaja a ti: “Ondjovo yaJehova oyo a popya oiwa.” Okwa weda ko a ti: “Molwaashi otapa ka kala ombili nonghalonawa* pefimbo* lokukalamwenyo kwange.”

40 Kalunga keni ota ti: “Hekelekeni, hekelekeni oshiwana shange.”

2 “Popyeni, mu hange omutima* waJerusalem,

Noku mu shiivifila kutya oilonga yaye idjuu oya wanifwa po,

Kutya etimba laye ola futwa.

Eke laJehova ole mu pa pauyadi* omolwomanyono aye aeshe.”

3 Ondaka yaao ta ingida mombuwa tai ti:

“Wapalekeni* ondjila yaJehova!

Ningeni ondjila ya kula ya yukilila ya pita mombuwa yaKalunga ketu.

4 Efilu keshe nali yelulwe,

Nomhunda noshikulundudu keshe nashi xupipalekwe.

Edu lomangolongonyo nali lalakanifwe,

Nedu lomamanya nali ninge oluhaela lefilu.

5 Oshinge shaJehova otashi ka hololwa,

Nombelela aishe* otai ke shi mona,

Osheshi okanya kaJehova oke shi popya.”

6 Pwilikineni, umwe ota ti: “Lalekida!”

Umwe vali okwa pula a ti: “Ohandi lalekida shike?”

“Ombelela aishe oyo* omwiidi mutalala.

Ohole yavo aishe i na oudiinini oya fa eengala domoixwa.

7 Omwiidi mutalala otau kukuta,

Eengala otadi lembe,

Molwaashi omufudo* waJehova owe i fudila.

Oshoshili, ovanhu ovo omwiidi mutalala.

8 Omwiidi mutalala otau kukuta,

Eengala otadi lembe,

Ndele ondjovo yaKalunga ketu otai kala po fiyo alushe.”

9 Londeni komhunda ile,

Nye ovakainhu, ovo tamu etele Sion onghundana iwa.

Yeluleni eendaka deni pombada elela,

Nye ovakainhu, ovo tamu etele Jerusalem onghundana iwa.

Di yeluleni, inamu kala mwa tila.

Shiivifileni oilando yaJuda tamu ti: “Kalunga keni oye ou.”

10 Tala! Omwene Omunamapangelo aeshe, Jehova, ote ke uya e na eenghono,

Nokwooko kwaye otaku ka pangela ponhele yaye.

Tala! Ondjabi yaye oi li puye,

Nofuto, oyo ha futu, oi li koshipala shaye.

11 Ngaashi omufita, ota ka fila oshisho* oufita waye.

Ota ka ongela eedjona nokwooko kwaye,

Note ke di humbata ponhulo yaye.

Ota ka fila oshisho nawa odo tadi nyamifa oudjona vado.

12 Olyelye a yeleka omeva, oo e li pondabo yeke laye

Nokwa kufa omuvalu* weulu nomutamo weke laye?*

Olyelye a ongela omuvalu wondwi yedu,

Ile a yeleka eemhunda koiyelekifo

Noikulundudu koiyelekifo?

13 Olyelye a valula* omhepo yaJehova,

Nolyelye ta dulu oku mu wilika e li omuyandjimayele waye?

14 Okwa kundafana nalyelye, a mone ounongo,

Ile olyelye e mu honga elila louyuki,

Ile e mu honga a kale e na eshiivo,

Ile e mu ulikila ondjila younongo washili?

15 Tala! Oiwana oi li ngaashi eta lomeva la dja mevela,

Nongaashi ondwi i li koiyelekifo ipu neenghono.

Tala! Oha yelula ounhunhu ngaashi ondwi.

16 Nokuli naLibanon ina wana okukaleka omundilo wa tema,*

Noifitukuti yasho inai wana exwikiloyambo.

17 Oiwana aishe oi li ngaashi oshinima, osho shihe po moipafi yaye;

Ohe i tale ko ihe fi sha, ya fa ihe fi yoshili.

18 Olyelye to dulu okuyelekanifa naKalunga?

Oshike she mu fa, osho to dulu oku mu faafanifa nasho?

19 Omuhambwidi okwa hambula oshikalunga,*

Omulongi woivela okwe shi vaeka noshingoli,

Nokwe shi hambulila oulyenge voshisilveri.

20 Oha hoolola omuti u li onga eyambo laye,

Omuti oo itau ka ola.

Oha kongo omuhambwidi onghulungu,

E u honge oshihongwafano osho itashi ka wa po.

21 Hamba nye kamu shi shii?

Hamba nye inamu shi uda?

Inamu shi lombwelwa okudja pehovelo?

Inamu shi uda ko okudja pomakanghameno edu?

22 Ope na oo ha kala pombada yongonga* yedu,

Novakalimo vako ova fa oshipaxu.

Ota nyanununa eulu ngaashi elapi liwa,

Note li yale ngaashi etwali lokukala.

23 Oha ninipike omalenga, oo e na eendodo dopombada,

Noha ningifa ovatokoli* vokombada yedu va kale vehe po nandenande.

24 Ihava twikwa noupu;

Ohava kunwa noudjuu,

Nefina lavo ihali mene diva omidi medu,

Nohava pepwa komhepo, ndele tava kukuta,

Nomhepo ohai va pepeleshi ngaashi oihati ikukutu.

25 Omuyapuki ota ti: “Olyelye to dulu okuyelekanifa nge naye, u ningife nge ndi kale ndi fike puye?”

26 “Yeluleni omesho eni keulu, mu tale.

Olyelye a shita oinima aishe oyo?

Oye oo ta pitifa mo etangakwaita lado pamivalu;

Ohe di ifana adishe komadina.

Omolwomafa aye a shiya ko, neenghono daye dikumwifi,

Kape na nande oimwe tai kala ihe po.

27 Akutu, Jakob, omolwashike to ti, naave Israel, omolwashike to popi kutya,

‘Ondjila yange oya holekwa Jehova,

Noihandi mono ouyuki okudja kuKalunga’?

28 Hamba ku shi shii? Hamba ino shi uda?

Jehova, Omushiti wominghulo dedu, oye Kalunga kaalushelushe.

Iha loloka, ile a kenyanane.

Ounongo waye otau nyengana.*

29 Oha yandje eenghono kwaao a loloka,

Nomafa kwaavo vehe na eenghono.*

30 Ovamati ohava loloka, nohava kenyanana,

Novalumenhu ovanyasha ohava punduka, nohava wile po,

31 Ashike ovo tave lineekele muJehova otava ka mona vali eenghono.

Otava ka tuka ngaashi eenhwa.

Otava ka lotoka, ndele itava tyololoka;

Otava ka enda, ndele itava loloka.”

41 “Pwilikineni kwaame mwe limwenenena,* nye ounhunhu;

Oiwana nai mone vali eenghono dayo.

Nai uye, ndele tai popi.

Natu uyeni pamwe omolwetokolo.

2 Olyelye a yandja eenghono kwaao e li oko haku piti etango,*

Te mu ifana peemhadi daye, a longe ouyuki,*

A yandje oiwana kuye

Noku mu ningifa a finde eehamba?

Oo e i hanaunina mondwi neongamukonda laye,

Ngaashi oshihati tashi pepwa komhepo omolwouta waye?

3 Ohe i taataa nopehe na osho tashi mu i moshipala

Momalila omo eemhadi daye inadi enda nande onale.

4 Olyelye a katuka nokulonga ngaha,

Ta ongele omapupi okudja pehovelo?

Ame Jehova, aame Ndotete;

Nokwaao waxuuninwa, ohandi ka kala ndi li ngaashi ndi li.”

5 Ounhunhu ove shi mona, nova kwatwa koumbada.

Ominghulo dedu oda hovela okukakama.

Ova ehena popepi nova ya komesho.

6 Keshe umwe okwa kwafela mukwao,

Nokwa lombwela omumwaina ta ti: “Kala wa pama.”

7 Onghee omuhambwidi ota pameke omulongi woivela;

Ou he i pepula nohamala yokuhambulifa

Ota pameke oo ha hambulile koshihambulilo.

Okwa popya shi na sha naapo sha shakenena a ti: “Osha wapala.”

Opo nee osha patelwa ko neemboxa, opo shiha kale tashi linyengaanyenga.

8 “Ashike ove, ove Israel, omupiya wange,

Ove, ove Jakob, ou nda hoolola,

Oludalo laAbraham kaume kange,

9 Ove, ove ou nde ku kufa kominghulo dedu,

Naave, ove ou nde ku ifana koitukulwa yalo yokokulekule.

Onda ti kwoove, ‘Ove omupiya wange;

Onde ku hoolola; itandi ku efa.

10 Ino kala wa tila, osheshi ondi li pamwe naave.

Ino kala u na oshisho, osheshi aame Kalunga koye.

Ohandi ke ku pameka, heeno, ohandi ke ku kwafela,

Ohandi ke ku kwata filufilu neke lange lokolulyo louyuki.’

11 Tala! Aveshe ovo tave ku handukile otava ka fifwa ohoni nokulengaifwa.

Ovo tave ku lwifa otava ka ninga oinima yongaho nokuxula po.

12 Oto ka konga ovanhu, ovo ve ku lwifa, ashike ito ke va mona;

Ovanhu, ovo va li tave ku lwifa moita, otava ka kala ngaashi oshinima shihe po, shihe po nandenande.

13 Osheshi ame, Jehova Kalunga koye, ohandi kwata eke loye lokolulyo,

Ou handi ti kwoove, ‘Ino kala wa tila. Ohandi ke ku kwafela.’

14 Ino kala wa tila, ove einyo* Jakob,

Nye ovanhu vaIsrael, ohandi ke mu kwafela,” Jehova, Omukulili weni, Omuyapuki waIsrael, osho ta ti.

15 “Tala! Ohandi ku ningi oshilei shokuxwifa,

Oshilongifo shipe shokuxwifa shomikweyo mbali domayoo.

Oto ka lyataula eemhunda noku di nyanyaula,

Noto ka ninga oikulundudu ngaashi olungu.

16 Oto ke i xwa,

Nomhepo otai ke i pepelashi;

Oshikungulu shomhepo otashi ke i lihanifa.

Oto ka hafa omolwaJehova,

Noto ke litanga omolwOmuyapuki waIsrael.”

17 “Omapongo novakwanaluhepo otava ka konga omeva, ashike kape na sha.

Omalaka avo okwa kukuta kenota.

Ame, Jehova, ohandi ke va nyamukula.

Ame, Kalunga kaIsrael, itandi ke va efa.

18 Ohandi ka ningifa omilonga di kungulukile kombada yoikulundudu ihe na sha,

Neefifiya omomafilu.

Ombuwa ohandi ke i ninga etale lomeva li na eembungu

Noitukulwa ihai kala omeva otai ka ninga eefifiya domeva.

19 Mombuwa ohandi ka twika mo omuti womusederi,

Omwoonde, omumirti nomuti womaadi.

Mombuwa ohandi ka twika mo omuti womudjenipa,

Pamwe nomuti womudile* nomusipresi,

20 Opo ovanhu aveshe va mone nova shiive

Nova yandje elitulemo nokuuda ko kutya

Eke laJehova olo la ninga ngaho,

NOmuyapuki waIsrael oye e i shita.”

21 “Eteni oihokolola yeni,” Jehova osho ta ti.

“Eteni eenhamanana deni,” Ohamba yaJakob osho tai ti.

22 “Kongeni oumbangi noku tu lombwela oinima oyo tai ka ningwa.

Tu lombweleni kombinga yoinima yonale,*

Opo tu dule okudilonga kuyo* nokushiiva oidjemo yayo.

Ile tu lombweleni oinima oyo tai uya.

23 Tu lombweleni osho tashi ka ningwa monakwiiwa,

Opo tu shiive kutya nye ookalunga.

Heeno, ningeni po sha, kutya nee oshiwa, ile oshii,

Opo tu dule okukala twa kumwa, ngeenge otwe shi mono.

24 Taleni! Nye oinima ihe po,

Nokupondola kweni okwongaho.

Keshe oo te mu hoolola oku li oshinima shitondifa.

25 Onda pa eenghono umwe oo e li kolundume, note ke uya,

Oo e li oko haku piti etango,* oo ta ka ifana edina lange.

Ota ka lyataula ovapangeli* va fa ngeno elova,

Ngaashi omuhongi woiyuma oo ta myanghe elova la tuta.

26 Olyelye a popya kombinga yoshinima eshi okudja pehovelo, opo tu dule oku shi shiiva,

Ile meedula donale, opo tu dule okutya, ‘Oku li mondjila’?

Oshoshili, kape na ou e shi shiivifa!

Kape na ou e shi popya!

Kape na oo a uda sha kunye!”

27 Aame ndotete okulombwela Sion kutya: “Tala! Ovo ava!”

Nohandi ka tuma oo ta twala onghundana iwa kuJerusalem.

28 Ashike onda kala handi tale, ndele kapa li nande oumwe;

Kapa li nande oumwe womuvo a yandje omayele.

Nonda kala handi va pula va nyamukule.

29 Tala! Aveshe ovongaho elela.*

Oilonga yavo oyongaho.

Oihongwafano yoivela* yavo oyo omhepo, nokai fi yoshili.

42 Tala! Omupiya wange, oo handi yambidida!

Omuhoololwa wange, oo nde* mu hokwa!

Onda tula omhepo yange muye;

Ota ka etela oiwana ouyuki.

2 Ita ka ingida, ile a yelule ondaka yaye,

Noita ka ningifa ondaka yaye i udike mepandavanda.

3 Olumbungu la nyanyauka ite li teyaula,

Nolamba i li pokudima ite i dimi.

Ota ka eta ouyuki omolwoudiinini.

4 Ita ka loloka, ile a sholole, ofimbo ina etifa ouyuki kombada yedu;

Nounhunhu ova kala va teelela omhango* yaye.

5 Eshi osho Kalunga kashili, Jehova, ta ti,

Omushiti weulu nosho yo oo Munenenene, oo te li nyanununa mo,

Oo a shita edu noilikolomwa yalo,

Oo a yandja omufudo kovanhu, ovo ve li ko,

Nomhepo kwaavo tava ende kulo:

6 “Ame, Jehova, onde ku ifana pauyuki;

Onda kwata eke loye.

Ohandi ke ku amena noku ku yandja u li ehangano kovanhu

Nongaashi ouyelele koiwana,

7 Opo u pashule omesho omupofi,

U mangulule omunadolongo meemango,

Naavo ve li omutumba momilaulu va dje mo modolongo.

8 Aame Jehova, olo olo edina lange;

Ihandi pitike umwe e lili a tangwe ponhele yange,*

Noihandi yandje okutangwa kwange koihongwafano.

9 Taleni, oinima yotete oya xula po;

Paife ohandi shiivifa oinima ipe.

Fimbo inai uya, ohandi mu lombwele kombinga yayo.”

10 Imbileni Jehova eimbilo lipe,

Ehambelelo laye nali dje kominghulo dedu;

Nye ovo hamu i mefuta naashishe osho shi li mo,

Nye ounhunhu novakalimo vamo.

11 Ombuwa noilando yayo nai yelule ondaka yayo,

Eenhele omo hamu kala Kedar.

Ovakalimo vokemanya nava nyakukwe unene;

Nava ingide okudja keexulo deemhunda.

12 Nava yandje efimano kuJehova,

Nokushiivifa ehambelelo laye kounhunhu.

13 Jehova ota ka ya ngaashi omulumenhu omunaenghono.

Ota ka pendula ouladi waye ngaashi omukwaita omuladi.

Ota ka ingida, heeno, ota ka ingida eingido loita;

Ota ka ulika kutya ye omunaenghono unene e dule ovatondi vaye.

14 “Onda kala nda mwena oule wefimbo.

Onda kala nda mwena, nonde lididimika.

Ngaashi omukainhu ta dala,

Ohandi ka kema, handi fudaana nokuhefaana poshikando shimwe.

15 Ohandi ka hanauna po eemhunda noikulundudu,

Nohandi ka kukutika oimeno yako aishe.

Ohandi ka lundululila omilonga mounhunhu,*

Nohandi ka pwiininika omatale omeva, oo e na eembungu.

16 Ohandi ka wilika ovapofi mondjila, oyo vehe shii,

Nohandi ke va ningifa va lyate momalila, oo vehe shii.

Omilaulu, odo di li puvo, ohandi ke di lundululila mouyelele,

Nohandi ka lundululila edu lomangolongonyo medu la lalakana.

Osho osho handi ke va ningila, noitandi ke va efa po.”

17 Otava ka shunifwa nokufifwa ohoni filufilu,

Ovo ve lineekela moihongwafano,

Ovo hava ti koihongwafano yoshivela:* “Onye ookalunga ketu.”

18 Pwilikineni, nye eembolo;

Taleni nokumona ko, nye ovapofi.

19 Olyelye omupofi a fa omupiya wange,

Ombolo ngaashi omutumwa, oo nda tuma?

Olyelye omupofi ngaashi oo a pewa ondjabi,

Omupofi ngaashi omupiya waJehova?

20 Ohamu mono oinima ihapu, ndele ihamu kala oupafi.

Ohamu shoko omatwi eni, ndele ihamu pwilikine.

21 Omolwouyuki waye,

Jehova oha kala a hafa mokufimanekifa omhango,* noku i tumbalekifa.

22 Ava ovo ovanhu ovo va nyekwa ko nova kwatwa ko;

Aveshe ova yulwa momalambo, nova holekwa meedolongo.

Ova nyekwa ko nopehe na oo te va xupifa,

Nova kwatwa ko nopehe na oo ta ti: “Va alula!”

23 Olyelye mokati keni ta ka uda oshinima eshi?

Olyelye ta ka yandja elitulemo nokupwilikina kwaasho tashi ka ningwa monakwiiwa?

24 Olyelye a yandja Jakob, a kwatwe po,

Na Israel kovanyeki?

Mbela ke fi Jehova, oo twa nyona kuye?

Ova anya okweenda meendjila daYe,

Noinava dulika komhango* yaYe.

25 Onghee okwa kala he mu katukile onghatu omolwonya,

Ehandu laye nosho yo onyati yaye yomolwoodi.

Oya hanauna po keshe shimwe osho sha li puye, ndele ina yandja elitulemo.

Oye mu xwamena, ashike ka li e shi tula komutima.

43 Paife eshi osho Jehova,

Omushiti woye, ove Jakob, oo e ku ma, ove Israel, ta ti:

“Ino kala wa tila, osheshi onde ku kulila.

Onde ku ifana kedina.

Ove owange.

2 Ngeenge to piti momeva, ohandi ka kala pamwe naave,

Nongeenge to taulula omilonga, itadi ku kungulula po.

Ngeenge to ende momundilo, ito ka lungwina,

Nelaka lomundilo itali ku xwike.

3 Osheshi aame Jehova Kalunga koye,

Omuyapuki waIsrael, Omuxupifi woye.

Onda yandja Egipiti onga eyambo omolwoye,

Etiopia naSeba ponhele yoye.

4 Osheshi paife ou na ondilo momesho ange,

Owa li wa fimanekwa, nonda kala ndi ku hole.

Onghee ohandi yandje ovanhu ponhele yoye,

Noiwana omolwomwenyo woye.

5 Ino kala wa tila, osheshi ondi li pamwe naave.

Oludalo loye ohandi ke li tala ko koushilo,

Nohandi ke ku ongela pamwe okudja kouninginino.

6 Ohandi lombwele olundume, ‘Va yandja.’

Nolukadi, ‘Ino va anyena.

Eteni ovanamati vange okudja kokulekule, novanakadona vange okudja kominghulo dedu,

7 Keshe oo ha ifanwa nedina lange,

Naao nda shita omolwefimano lange,

Oo nda shita, nonda ma.’

8 Pitifeni mo ovanhu, ovo ovapofi, nonande ove na omesho,

Neembolo, nonande ove na omatwi.

9 Oiwana aishe nai ongelwe ponhele imwe,

Novanhu nava ongelwe pamwe.

Olyelye mokati kavo ta dulu oku tu lombwela oshinima eshi?

Ile ta dulu oku tu ningifa tu ude oinima yotete?*

Nava ete eendombwedi davo, va ulike kutya ove li mondjila,

Ile nava ude, ndele tava ti, ‘Oshoshili!’”

10 “Onye eendombwedi dange,” Jehova osho ta ti,

“Heeno, omupiya wange, oo nda hoolola,

Opo mu shiive, nomu kale mu na eitavelo mwaame*

Nokuuda ko kutya ondi li ngaashi Nda kala.

Kape na Kalunga a shitwa komesho yange,

Nokonima yange, kaku na umwe.

11 Ame, aame Jehova, nokape na vali omuxupifi umwe ehe fi ame.”

12 “Aame nda shiivifa, nonda xupifa, nonda holola,

Ofimbo paha li kalunga wokoilongo mokati keni.

Onghee onye eendombwedi dange,” Jehova osho ta ti, “nAame aame Kalunga.

13 Natango ondi li ngaashi Nda kala alushe;

Nokape na ou ta nyeke mo sha meke lange.

Ngeenge handi longo sha, olyelye ta dulu oku shi kelela?”

14 Eshi osho Jehova, Omukulili weni, Omuyapuki waIsrael, ta ti:

“Omolweni, ohandi tumu kuBabilon noku ka tala ko oihakifo aishe yomivelo,

NOvakaldea, ve li meeskepa davo, otava ka lila omolwoudjuu.

15 Aame Jehova, Omuyapuki weni, Omushiti waIsrael, Ohamba yeni.”

16 Eshi osho Jehova ta ti,

Oo ta ningi ondjila mefuta,

Nokuli nelila momeva taa ndwafuka,

17 Oo ta shi li mo etemba loita nosho yo onghambe,

Etangakwaita pamwe novakwaita ovanaenghono:

“Otava wile po, noitava fikama po.

Otava dimwa po, tava dimwa po ngaashi olamba tai dimwa.”

18 “Inamu dimbuluka oinima yonale,

Noinamu lipula nonakudiwa.

19 Taleni! Ohandi ningi oshinima shipe;

Notashi hovele paife nokuli.

Mbela inamu shi didilika?

Ohandi ningi ondjila ya enda mombuwa,

Nomilonga da pita mombuwa.

20 Oifitukuti otai ka fimaneka nge,

Ookavandje neemho,

Osheshi onda tula omeva mombuwa,

Omilonga mombuwa,

Opo ovanhu vange, ovahoololwa vange, va nwe,

21 Ovanhu ovo nde lishitila,

Opo va dule okutanga nge.

22 Ashike ino ifana nge, ove Jakob,

Molwaashi owa loloka nge, ove Israel.

23 Ino etela nge eedi domaxwikiloyambo oye aeshe,

Ile u fimanekife nge nomayambo oye.

Inandi ku fininika u etele nge oshali,

Noinandi ku lolokifa mokukomangela eka ledimba liwa.

24 Ino landela nge okalamus* noimaliwa yoye,

Noino kutifa nge noinghene yomayambo oye.

Ponhele yaasho, owa twika nge oudjuu nomanyono oye,

Nowa lolokifa nge nomapuko oye.

25 Ame, aame oo handi dimi po omatauluko* oye omolwedina lange,

Noitandi dimbuluka omanyono oye.

26 Dimbulukifei nge; natu lihokololifeni;

Popyeni ehokololo leni, mu ulike kutya omu li mondjila.

27 Xokulululwa weni wotete okwa nyona,

Novapopikalelipo* veni ova tukululila nge oshibofa.

28 Onghee omalenga omonhele iyapuki ohandi ke a tala ko inaa koshoka,

Nohandi ka yandja Jakob, a hanaunwe po,

Na Israel ohandi ke mu efa a tukwe.

44 “Paife pwilikina, ove Jakob, omupiya wange,

Naave, ove Israel, ou nda hoolola.

2 Eshi osho Jehova,

Omushiti woye, Naao e ku ma,

Oo e ku kwafela okudja moshidalelo,* ta ti:

‘Ino kala wa tila, omupiya wange Jakob,

Naave, Jesurun,* oo nda hoolola.

3 Osheshi ohandi ka tila omeva kombada yaao a fya enota,*

Nomakungulukilo omeva medu likukutu.

Ohandi ka tilila omhepo yange kombada yoludalo loye,

Nenangekonoupuna lange kombada yoludalo loye.

4 Notava ka twiyuka va fa ve li momwiidi mutalala,

Ngaashi omiti da hapa nawa* di li pomatondokelo omeva.

5 Umwe ota ka tya: “Ame ondaJehova.”

Mukwao ote ke liifana nedina laJakob,

Naumwe vali ota ka shanga peke laye ta ti: “OndaJehova.”

Note ke liluka edina laIsrael.’

6 Eshi osho Jehova,

Ohamba yaIsrael nOmukulili waye, Jehova womatangakwaita, ta ti:

‘Aame ndotete nondaxuuninwa.

Kape na Kalunga umwe ehe fi ame.

7 Olyelye e li po a fa nge?

Ne shi shiivife, noku shi popya noku shi hololela nge!

Okudja efimbo olo nda shita ovanhu omido donale,

Nava popye kombinga yoinima oyo tai ke uya

Nosho yo oyo tai ka ningwa.

8 Inamu kala mwa tila,

Noinamu fya ombabanghukuta koumbada.

Mbela inandi lombwela keshe umwe womunye komesho yefimbo noku shi shiivifa?

Onye eendombwedi dange.

Mbela ope na ngoo vali Kalunga umwe ehe fi ame?

Ahowe, kape na vali Emanya limwe; kape na limwe ndi shii.’”

9 Aveshe ovo hava hongo oihongwafano ovongaho elela,

Noinima yavo, oyo va lenga, kai na ekwafo lasha.

Ngaashi eendombwedi dayo, ihai* mono ko, nokai shii sha,

Onghee ovo ve i ninga otava ka fifwa ohoni.

10 Olyelye ta ka honga oshikalunga, ile okuhambula oshihongwafano moshivela*

Osho itashi dulu okweeta ouwa washa?

11 Taleni! Aveshe ovo hava endafana naye otava ka fifwa ohoni!

Ovo have i hongo ovanhu vongaho.

Aveshe nava ongale nokukala ofika.

Otava ka tilifwa nokufifwa ohoni pamwe.

12 Omuhambwidi oha longele oshivela shilaula pomakala noshilongifo* shaye.

Ohe shi hambula neehamala,

Ohe shi longo nokwooko kwaye ku na eenghono.

Opo nee oha fi ondjala, noha kanifa eenghono;

Iha nu omeva, noha kala a loloka.

13 Omuhongi woiti oha nane ongodi yokumetifa, a tende omifinda nomya itilyana.

Ohe shi longo noshilongifo shokulalakanifa oiti nosho yo shokudidilikifa.

Ohe shi hongo molupe lomunhu,

Shi na ouwa wa fa womunhu,

Shi kale meumbo.*

14 Ope na umwe oo oilonga yaye okuteta omiti domisederi.

Oha hoolola omuti wonhumba, omuti munene,

Nohe u efa u kule mokati komiti dikwao domofuka.

Okwa twika omuti, oo hau kala alushe wa hapa, nodula oye u kulika.

15 Opo nee ohau ningi oikuni yomunhu, a teme omundilo.

Oha kufa imwe yomuyo, a xuxumukwe;

Oha tema omundilo nokuteleka omungome.

Oha hongo mo yo oshikalunga noku shi longela.

Oha hongo mo oshihongwafano, nohe shi twile eengolo.

16 Etata lomuyo ohe i tema omundilo;

Netata lomuyo ohe i yofifa po ombelela oyo ta li, ndele ta kuta.

Oha xuxumukwa yo, ndele ta ti:

“Ah! Onda dja outalala, eshi handi tale omundilo.”

17 Ashike ei ya xupa po ohe i ningi oshikalunga, oshihongwafano shaye.

Ohe shi linyongamene noku shi longela.

Oha ilikana kusho, ndele ta ti:

“Xupife nge, osheshi oove kalunga kange.”

18 Kave na eshi ve shii, kave udite ko,

Molwaashi omesho avo okwa fifikinifwa, nokave wete ko,

Nomutima wavo kau na ounongo.

19 Kape na umwe ta diladila momutima waye,

Ile e na eshiivo, ile eudeko ta ti:

“Etata lomuyo onde i tema po omundilo,

Nokomakala ayo onda teleka ko omungome, nonda yofa ko ombelela ndi lye.

Mbela ei ya xupa po nandi i ninge oshinima shitondifa?

Mbela nandi longele oshitetela* shoshiti sha dja komuti?”

20 Oha li omute.

Omutima waye u na omakoto owe mu twalaatwala.

Ita dulu okulixupifa ye mwene,* noita ti:

“Mbela osho shi li meke lange lokolulyo kashi fi oipupulu?”

21 “Dimbuluka oinima ei, ove Jakob, nosho yo ove, ove Israel,

Osheshi ove omupiya wange.

Onde ku shita, nou li omupiya wange.

Ove Israel, itandi ke ku dimbwa.

22 Ohandi dimi po omanyono oye, a fa a uvikwa noshilemo,

Nomatimba oye a fa a uvikwa noshilemo shilaula.

Alukila kwaame, osheshi ohandi ke ku kulila.

23 Ingida nehafo, ove eulu,

Osheshi Jehova okwa katuka onghatu!

Ingideni omolwefindano, nye oule wedu!

Ingideni omolwehafo, nye eemhunda,

Nye eefuka nomiti deni adishe!

Osheshi Jehova okwa kulila Jakob,

Nokwa holola efimano laye okupitila muIsrael.”

24 Eshi osho Jehova, Omukulili woye,

Oo e ku ma, ofimbo wa li moshidalelo, ta ti:

“Aame Jehova, ou nda shita oinima aishe.

Onda nyanununa mo eulu ame mwene,

Nonda yala edu.

Olyelye a li pamwe naame?

25 Ohandi ka xulifa po omadidiliko ovanhu, ovo hava popi oinima yongaho,*

Naame aame handi ka ningifa ovanyanekeli va katuke ngaashi omalai;

Oo handi ka ngwangwaneka ovalumenhu ovanaendunge

Nokulundululila eshiivo lavo moulai;

26 Ou ta ningifa ondjovo yomupiya waye i wanifwe

Nokuwanifa filufilu osho ovatumwa vaye va xunganeka;

Oo ta ti kuJerusalem, ‘Otashi ka kalwa,’

Nokoilando yaJuda, ‘Otai ka tungululwa,

Nohandi ka tungulula oikulukuma yasho’;

27 Oo ta ti komeva malemale, ‘Pwiinina,

Nohandi ka pwiininika omilonga doye adishe’;

28 Oo ta ti kuKores, ‘Oye omufita wange,

Nota ka wanifa po filufilu keshe osho nda hala’;

Oo ta ti kuJerusalem, ‘Otashi ka tungululwa,’

Nokotembeli, ‘Ekanghameno loye otali ka dikwa.’”

45 Eshi osho Jehova ta lombwele omuvaekwa waye, Kores,

Oo ndi kwete eke laye lokolulyo,

Ndi finde oiwana, oyo i li komesho yaye,

Ndi kufe mo oilwifo* yeehamba,

Ndi yeulule omivelo, odo di li komesho yaye,

Opo oivelo iha idilwe, handi ti:

2 “Ohandi ke ku tetekela,

Nohandi ka lalakanifa oikulundudu.

Omivelo dongopolo ohandi ke di teyaula moipambu,

Noihakifo yoshivela shilaula ohandi ke i teyaula po.

3 Ohandi ke ku pa omamona momilaulu,

Nomamona a holekwa meenhele domeholeko,

Opo u shiive kutya aame Jehova,

Kalunga kaIsrael, oo handi ku ifana kedina.

4 Omolwomupiya wange, Jakob naIsrael, omuhoololwa wange,

Ohandi ku ifana kedina.

Ohandi ka fimanekifa edina loye, nonande ku shii nge.

5 Aame Jehova; kape na vali umwe.

Kape na vali Kalunga umwe ehe fi ame.

Ohandi ke ku pameka,* nonande ku shii nge,

6 Opo ovanhu ve shi shiive

Okudja oko haku piti etango fiyo okoko hali ningine,*

Kutya kape na vali umwe ehe fi ame.

Aame Jehova, nokape na vali umwe.

7 Onda shita ouyelele, nonda shita omilaulu,

Ohandi kaleke po ombili, nohandi eta oupyakadi;

Ame, Jehova, ohandi ningi oinima aishe oyo.

8 Ove eulu, lokifa odula okudja pombada;

Oilemo nai tileshi ouyuki.

Edu nali ekame nokukala li yadi exupifo,

Nopefimbo opo tuu opo nali menife ouyuki.

Ame, Jehova, onde i shita.”

9 Woo, oo ta kondjifa* Omumi waye,*

Osheshi oku li ashike okakangwa koshiyuma

Mokati koikangwa ikwao yoiyuma, oyo i li pedu!

Mbela elova otali ka tya kOmumi:* “Oto ningi shike?”

Ile oilonga yoye otai ka tya: “Ke na eenyala”?*

10 Woo, oo ta ti kuxe: “Owa dala shike?”

Nokomukainhu: “Oto dala shike?”*

11 Eshi osho Jehova, Omuyapuki waIsrael, Oo e mu shita, ta ti:

“Mbela oto ka pula nge kombinga yoinima, oyo tai ke uya,

Nokulombwela nge kombinga yovanamati vange nosho yo yoilonga yomake ange?

12 Onda shita edu, nonda shitila ko omunhu.

Onda nyanununa mo eulu nomake ange mwene,

Nonda yandja omalombwelo komatangakwaita aeshe alo.”

13 “Onde linyengifa omunhu a katuke pauyuki,

Nohandi ka yukililifa eendjila daye adishe.

Oye ta ka tunga oshilando shange,

Nota ka mangulula eenghwate dange nopehe na ofuto, ile ombubo,” Jehova womatangakwaita osho ta ti.

14 Eshi osho Jehova ta ti:

“Oyuuyemo* yaEgipiti nosho yo oilandifomwa* yaEtiopia noyOvasaba, ovo vale,

Otave ke uya pwoove, notava ka ninga voye.

Otava ka enda konima yoye ve li momalyenge.

Otave ke uya noku ku linyongamena.

Otava ka tya kwoove meilikano, ‘Oshili, Kalunga oku li pamwe naave,

Nokape na vali umwe; kape na vali Kalunga umwe.’”

15 Oshili, oove Kalunga, oo he liholeke,

Omwene Kalunga kaIsrael, Omuxupifi.

16 Aveshe otava ka fifwa ohoni nokulengaifwa;

Ovalongi voikalunga aveshe otava ka ya va fya ohoni.

17 Ashike Israel ota ka xupifwa kuJehova nexupifo laalushelushe.

Ito ka fifwa ohoni, ile u lengaifwe fiyo alushe.

18 Osheshi eshi osho Jehova ta ti,

Omushiti weulu, Kalunga kashili,

Oo a shita edu, Omumi walo, oo e li pameka,

Oo ine li shita li kale ongaho,* ndele okwe li shita li kalwe, ta ti:

“Aame Jehova, nokape na vali umwe.

19 Inandi popila monhele yomeholeko medu lomilaulu;

Inandi lombwela oludalo laJakob kutya,

‘Kongei nge ongaho.’*

Aame Jehova, oo handi popi osho shi li pauyuki, nohandi shiivifa osho sha yuka.

20 Liongeleni, ndele tamu uya.

Ileni oshita, nye ovo mwa ya onhapo oiwana.

Ovo hava humbata oihongwafano kave na eshi ve shii,

Nohava ilikana kukalunga, oo ita dulu oku va xupifa.

21 Eteni ehokololo leni; eteni oshibofa sheni.

Nava kundafane pamwe ve li moukumwe.

Olyelye a xunganeka oinima ei pefimbo lonale,

Nokwe i shiivifa monakudiwa?

Mbela haame, Jehova?

Kape na vali Kalunga umwe, aame ashike;

Kalunga omuyuki nOmuxupifi; kape na vali umwe ehe fi ame.

22 Alukileni kwaame nokuxupifwa, ominghulo adishe dedu,

Osheshi aame Kalunga, ndele kape na vali umwe.

23 Onda ana kwaame mwene;

Ondjovo i li pauyuki oya dja mokanya kange,

Noitai ka alukila mo, nda ti:

Omunhu keshe oku na okutwila nge eengolo;

Elaka keshe otali ka ana moudiinini,

24 Notali ka tya, ‘Oshoshili, Jehova oku na ouyuki washili nosho yo eenghono.

Aveshe ovo ve mu handukila otave ke uya koshipala shaye va fya ohoni.

25 KuJehova, oludalo alishe laIsrael otali ka ulika kutya oli li mondjila,

Notali ke litanga omolwaye.’”

46 Bel okwa petama; Nebo okwa nyongama.

Oikalunga yavo oya londekwa koinamwenyo, koinamwenyo oyo hai humbata eendongelwa,

Ngaashi omitwalo da wilila po oinamwenyo, oyo ya loloka.

2 Ova nyongama nova petama pamwe;

Itava dulu okuxupifa eendongelwa,*

Navo vene* otava i moukwatwa.

3 “Pwilikina kwaame, ove eumbo laJakob, naamushe ovo mwa fyaala po vomeumbo laIsrael,

Ovo nda yambidida okudja pedalo, nonda humbata, eshi mwa dja moshidalelo.

4 Fiyo osheshi tamu kulupa, ohandi ka kala ndi li ngaashi nda kala;

Fiyo osheshi mwa ninga eenghwakutoka, ohandi ka twikila noku mu kuminina.

Ngaashi nda kala handi ningi, ohandi ke mu humbata, nohandi ke mu kuminina noku mu xupifa.

5 Olyelye tamu dulu okufaafanifa nge naye, ile okufikifa nge pamwe naye, ile okuyeleka nge naye,

Opo tu kale twa faafana?

6 Ope na ovo hava tukumuna oshingoli moundjato vavo;

Ohava yeleke oshisilveri koshiyelekifo.

Ohava kutu omulongi woitenda, nohe shi ningi oshikalunga.

Opo nee ohave shi linyongamene, heeno, have shi longele.*

7 Ohave shi tula komapepe avo;

Ohave shi humbata noku shi tula ponhele yasho, nohashi kala ashike sha fikama opo.

Ihashi di po ponhele yasho.

Ohava kwena moipafi yasho, ashike ihashi nyamukula;

Itashi dulu okuxupifa nande oumwe moudjuu.

8 Dimbulukeni oshinima eshi nokukala ovaladi.

Shi tuleni komitima, nye ovanyoni.

9 Dimbulukeni oinima ikulu* yonalenale,

Kutya aame Kalunga,* nokape na vali umwe.

Aame Kalunga, nokape na umwe a fa nge.

10 Okudja kehovelo, onda xunganeka oinima oyo tai ke uya,

Nokudja pefimbo lonale, oinima oyo inai ningwa natango.

Onda ti, ‘Etokolo* lange otali ka wanifwa,

Nohandi ka ninga keshe osho nda hala.’

11 Ohandi ifana odila hai li ombelela oko haku piti etango,*

Omunhu okudja kedu lokokule, a wanife po etokolo* lange.

Onda popya, nohandi ke shi ninga.

Onde shi tokola, nohandi ke shi wanifa po yo.

12 Pwilikineni kwaame, nye ovo mu na omitwe dikukutu,*

Nye ovo mu li kokule nouyuki.

13 Onda eta ouyuki wange popepi;

Kau li kokule,

Nexupifo lange itali kala ko.

Ohandi ka yandja exupifo muSion, ewapalo lange muIsrael.”

47 Londoloka nokukala omutumba mondwi,

Ove omonakadona elela waBabilon.

Kala omutumba pedu opo pehe na olukalwapangelo,

Ove omonakadona wOvakaldea,

Osheshi ovanhu itave ke ku ifana vali omona wohamba.

2 Kufa oshini shokukweya nokutwa oufila.

Kufa ko eluviluvi loye.

Dula mo ofulukweva yoye, uvukulula omaulu oye.

Taulula omilonga.

3 Epenge loye otali ka uvukululwa.

Ohoni yoye otai ka hololwa.

Ohandi ke ku handukila, nokape na omunhu ta ka kelela nge mondjila yange.*

4 “Ou te ke tu kulila,

Jehova womatangakwaita olo edina laye,

Oye Omuyapuki waIsrael.”

5 Kala omutumba opo wa mwena nokuya momilaulu,

Ove omonakadona wOvakaldea;

Itave ke ku ifana vali omwene* womauhamba.

6 Onda handukila neenghono ovanhu vange.

Onda fifa ohoni efyuululo lange,

Nonde va yandja momake oye.

Ashike ino va fila onghenda.

Nokuli novanamido, owe va twika ondjoko idjuu.

7 Owa ti: “Ohandi ka kala omwene* fiyo alushe.”

Kwa li wa diladila oinima ei momutima;

Kwa li wa diladila exulilo loinima oyo.

8 Paife pwilikina kwaashi, ove ou u hole omalihafifo,

Ou ho kala omutumba meameno, ou ho lipopile momutima to ti:

“Aame andike, nokape na vali umwe.

Itandi ka ninga omufiyekadi.

Itandi ka kala ndi shii okufilwa ovana nandenande.”

9 Ndele oinima oyo ivali otai ke ku hanga ombadilila mefiku limwe:

Okufilwa ovana nokukala omufiyekadi.

Otai ke ku hanga filufilu

Omolwovalodi* voye vahapu nosho yo eemhule doye adishe di na eenghono.

10 Owe lineekela moukolokoshi woye.

Oho ti: “Kape na ou e wete nge.”

Ounongo neshiivo loye oyo ye ku pukifa,

Noho lipopile momutima woye to ti: “Aame andike, nokape na vali umwe.”

11 Ashike oupyakadi otau ke ku hanga,

Nokape na nande omhule yoye imwe tai ka dula oku u ya moshipala.*

Oudjuu otau ke ku hanga; ito ka dula oku u kelela.

Ehanauno lombadilila otali ke ku hanga, ngaashi oshinima osho uhe shii nande onale.

12 Pula komesho neemhule doye nosho yo novalodi voye vahapu,

Ovo we lilolola navo okudja kounyasha woye.

Pamwe oto ka dula okumona mo ouwa;

Pamwe oto ka dula okuningifa ovanhu va kanghwe.

13 Owe lilolola neengudu dovayandjimayele voye.

Nadi fikame paife, ndele tadi ku xupifa,

Ovo hava longele eulu,* ovo hava tale keenyofi,

Ovo hava yandje omayele she likolelela keemwedi dipe,

Kombinga yoinima oyo tai ke ku hanga.

14 Tala! Ova fa oshihati shikukutu.

Omundilo otau va xwike po.

Itava dulu okulixupifa vo vene* keenghono domalaka omundilo.

Aa kae fi omakala okuxuxumukwa,

Nokau fi omundilo wokukala po omutumba.

15 Onghee eemhule doye osho tadi ka kala kwoove,

Ovo we lilolola navo okudja kounyasha woye.

Otava ka ya, keshe umwe a finda kombinga yaye.*

Itapa ka kala oo te ku xupifa.

48 Nye eumbo laJakob, udeni oshinima eshi,

Nye ovo hamu liifana nedina laIsrael,

Nanye ovo mwa dja momeva* aJuda,

Nye ovo mwa ana medina laJehova,

Nanye ovo hamu ifana Kalunga kaIsrael,

Nonande ihamu shi ningi moshili nopauyuki.

2 Osheshi ove lilukila oshilando shiyapuki,

Nohava kongo ekwafo kuKalunga kaIsrael,

Oo edina laye Jehova womatangakwaita.

3 “Oinima ikulu,* oyo nde mu lombwela efimbo lonale,

Oya dja mokanya kange mwene,

Nonde i shiivifa.

Onda katuka onghatu diva, noya wanifwa po.

4 Molwaashi ondi shi shii kutya nye ovatangalali,

Nonokutya eefingo deni odo omifipa doshivela shilaula nosho yo eembaba doipala yeni odo ongopolo,

5 Onde mu lombwela nalenale.

Ofimbo inashi ningwa, onde mu ningifa mu shi ude,

Opo muha ka tye, ‘Oshikalunga shange osha ninga ngaha;

Oshihongwafano nosho yo oshihongwafano shange sha hambulwa moshivela* oye shi popya.’

6 Owa uda, nowa mona oinima aishe ei.

Mbela itamu ke i shiivifa?

Okudja paife, ohandi ku shiivifile oinima ipe,

Oiholekwa oyo ya kala ya holekwa uhe i shii.

7 Opo ashike tai shitwa ngaha, ndele inai shitwa nalenale,

Oinima oyo ino uda fiyo opaife,

Opo uha dule okutya, ‘Tala! Onda kala ndi i shii nale.’

8 Ahawe, ino i uda; ino i shiiva,

Nomatwi oye kaa li a fituluka monakudiwa.

Osheshi ondi shi shii kutya oumunamakoto unene,

Nowa kala ho ifanwa omunyoni okudja pedalo.

9 Ndele omolwedina lange, ohandi loteke ehandu lange;

Omolwokutangwa kwange ohandi likelele, ndihe ku handukile,

Noitandi ke ku hanauna po.

10 Tala! Onde ku hemuna, ndele hamonghedi yoshisilveri.

Onde ku yeleka* mediko lokuhemunina loudjuu.

11 Omolwedina lange, omolwedina lange, ohandi ka katuka,

Osheshi ongahelipi handi dulu okweefa ndi dinike?

Ihandi pitike umwe e lili a tangwe ponhele yange.*

12 Pwilikina kwaame, ove Jakob nosho yo Israel, ove ou nda ifana.

Ondi li ngaashi Nda kala. Aame ndotete; Aame yo ndaxuuninwa.

13 Eke lange mwene ola dika po ekanghameno ledu,

Neke lange lokolulyo ola nyanununa mo eulu.

Ngeenge handi a ifana, ohaa fikama pamwe.

14 Ongaleni pamwe amushe, ndele tamu pwilikine.

Olyelye mokati kavo a shiivifa oinima ei?

Jehova okwa kala e mu hole.

Ota ka wanifa po ehalo laye mokuhandukila Babilon,

Nokwooko kwaye otaku ka handukila Ovakaldea.

15 Onda popya ame mwene, nonde mu ifana.

Onde mu eta nota ka pondola mondjila yaye.

16 Eheneni popepi naame nokupwilikina oshinima eshi.

Okudja pehovelo, inandi popya meholeko.

Okudja pefimbo opo sha ningwa, opo nda li.”

Nopaife, Omwene Omunamapangelo aeshe, Jehova, okwa tuma nge nomhepo yaye.*

17 Eshi osho Jehova, Omukulili weni, Omuyapuki waIsrael, ta ti:

“Ame, Jehova, aame Kalunga koye,

Ou handi ku hongo osho tashi ku etele ouwa,

Ou handi ku udikile ondjila, oyo u na okweenda nayo.

18 Ngeno ou yandje ashike elitulemo koipango yange,

Ngeno ombili yoye otai ka kala ngaashi omulonga,

Nouyuki woye ongaashi omakufikufi efuta.

19 Oludalo loye otali ka hapupala ngaashi ehekedu,

Noludalo loye ongaashi omawe alo.

Edina lavo itali ka dimwa po nandenande, ile li xulifwe po koshipala shange.”

20 Djeni mo muBabilon!

Indeni onhapo Ovakaldea!

Shi shiivifeni nehafo linene! Shi shiivifeni!

Shi shiivifileni ominghulo dedu.

Tyeni: “Jehova okwa kulila omupiya waye Jakob.

21 Inava fya enota, eshi e va endifa meembuwa.

Okwe va kungulukifila omeva okudja memanya;

Okwa panda emanya, nokwa ningifa omeva a ndwafuke mo.”

22 Jehova ota ti: “Ovakolokoshi kave na ombili.”

49 Pwilikineni, nye ounhunhu,

Nokuyandja elitulemo, nye oiwana yokokule.

Jehova okwa ifana nge, ofimbo inandi dalwa.*

Okudja pefimbo eshi nda li moshidalelo shameme, okwa tumbula edina lange.

2 Okanya kange okwe ka ninga ngaashi eongamukonda la honga;

Okwa holeka nge momudidimbe weke laye.

Okwa ninga nge oshikuti sha upikwa;

Okwa holeka nge mombalukutu yaye.

3 Okwa lombwela nge a ti: “Oove omupiya wange, ove Israel,

Ohandi ka ulika etumbalo lange okupitila mwoove.”

4 Ashike onda ti: “Onde lilolola epwanga.

Onda longifa eenghono dange moshinima shihe fi shoshili, oshimha.

Ashike Jehova oye ta ka tokola nge shili,*

Na Kalunga kange oye ta ka pa nge ondjabi* yange.”

5 Ndele paife, Jehova, oo a mela nge moshidalelo onga omupiya waye,

Okwa lombwela nge ndi alulile Jakob kuye,

Opo Israel a ongelwe puye.

Ohandi ka fimanekwa momesho aJehova,

Na Kalunga kange ota ka kala eenghono dange.

6 Nokwa ti: “Inashi wana, eshi u li omupiya wange,

U pameke omapata aJakob,

Nokwaalula ovo va xupifwa vomuIsrael.

Onde ku yandja yo u li ouyelele koiwana,

Opo exupifo lange li fike kombada yedu alishe.”

7 Eshi osho Jehova, Omukulili waIsrael, Omuyapuki waye, ta lombwele oo e tondike,* oo e yelike koshiwana, komupiya wovapangeli, ta ti:

“Eehamba otadi ke shi mona nokufikama,

Nomalenga otaa ka twa eengolo

OmolwaJehova, oo e li omudiinini,

Omuyapuki waIsrael, oo e ku hoolola.”

8 Eshi osho Jehova ta ti:

“Onde ku nyamukula pefimbo la wapala,*

Nonde ku kwafa mefiku lexupifo;

Onda kala noku ku amena ndi ku yandje u li ehangano kovanhu,

U tungulule edu,

Noku va ningifa va nangale efyuululo lavo, olo la ninga eputu,

9 U lombwele ovanadolongo, ‘Djeni mo!’

Nokwaavo ve li momilaulu, ‘Ileni poluhaela!’

Otava ka lya, fimbo ve li mondjila,

Nomalila aeshe, aa ehe na sha,* otaa ka ninga omaulifilo avo.

10 Itava ka fya ondjala, ile va fye enota,

Netokopya lomutenya, ile etango itali ke va xwika,

Osheshi ou e va fila onghenda ote ke va kwatela komesho,

note ke va twala keefifiya domeva.

11 Eemhunda dange adishe ohandi ke di ninga ondjila,

Neendjila dange da kula otadi ka yelulwa.

12 Tala! Ava ova dja kokule neenghono,

Ndele tala! Ava ova dja kolundume nokouninginino,

Naava ova dja kedu laSinim.”

13 Ingida pombada nehafo, ove eulu, nokunyakukwa, ove edu.

Eemhunda nadi nyakukwe nehafo linene.

Osheshi Jehova okwa hekeleka oshiwana shaye,

Nokwa fila onghenda ovafininikwa vaye.

14 Ashike Sion okwa kala ta ti:

“Jehova okwa efa nge, na Jehova okwa dimbwa nge.”

15 Mbela omukainhu ota dulu ngoo okudimbwa okaana kaye, oko haka nyamu,

Ile a kale ehe na olukeno nomonamati womoshidalelo shaye?

Nonande ovakainhu ava nava dimbwe, ame kandi na efiku ndi ku dimbwe.

16 Tala! Onda takela edina loye momake ange.

Omakuma oye oku li alushe koshipala shange.

17 Ovanamati voye otava aluka tava endelele.

Ovo ve ku teyaula po noku ku hanauna po otave ku fiye po.

18 Yelula omesho oye nokutalaatala.

Aveshe otava ongala pamwe.

Otave uya kwoove.

Jehova ota ti: “Oshili, ofimbo ndi na omwenyo,

Aveshe oto ke va djala ngaashi oinima yokufeweka,

Noto ke ve liditika, ngaashi omufuko ha ningi.

19 Nonande eenhele deni oda li da hanaunwa po noda ninga omaputu, nedu leni ola li la ninga oikulukuma,

Paife ovo hava di mo otava ka kala va finana mo unene,

Naavo va li ve mu pona po otave ke mu kala kokule.

20 Ovanamati ovo va dalwa, eshi mwa li muhe na oludalo, otava ka popya momatwi eni tava ti,

‘Onhele ei oya finana neenghono kwaame.

Ningile nge onhele yokukala apa.’

21 Notamu ke lipopila momitima deni tamu ti,

‘Olyelye a dalela nge ounona ava,

Osheshi ame omukainhu, oo a filwa ovana, noitandi dulu vali okudala,

Nda li moukwatwa, nonda tulwa modolongo?

Olye a tekulila nge ava?

Tala! Onda li nda fiwa po hautuka.

Mbela ava ova dja peni?’”

22 Eshi osho Omwene Omunamapangelo aeshe, Jehova, ta ti:

“Tala! Ohandi ka yelulila oiwana eke lange,

Nohandi ka yelulila ovanhu edidiliko* lange.

Otava ka eta ovanamati voye ve va ukata momaoko* avo,

Nokuhumbata ovanakadona voye komapepe avo.

23 Eehamba otadi ka ninga ovafilishisho voye,

Novanakadona vado otava ka ninga ovapiya voye.

Otave ke ku twila eengolo, oipala yavo ya twa medu

Nokulafa ondwi yeemhadi doye,

Noto ka shiiva kutya aame Jehova;

Ovo tave lineekele nge itava ka fifwa ohoni.”

24 Mbela ovo va kwatwa nale otava dulu ngoo okumangululwa ko komulumenhu omunaenghono,

Ile eenghwate domukwanyanya otadi dulu ngoo okuxupifwa?

25 Ashike eshi osho Jehova ta ti:

“Nokuli neenghwate domulumenhu omunaenghono otadi ka mangululwa.

Naavo va kwatwa komulumenhu omukwanyanya otava ka xupifwa.

Ohandi ka kondjifa oo te ku kondjifa,

Nohandi ka xupifa ovanamati voye.

26 Ovo tava ungaunga nai naave ohandi ke va lifa ombelela yavo vene,

Notava ka kolwa kohonde yavo vene ngaashi komaviinyu manyenye.

Novanhu aveshe* otava ka shiiva kutya aame Jehova,

Omuxupifi woye nOmukulili woye,

Omunaenghono waJakob.”

50 Eshi osho Jehova ta ti:

“Ombapila yeteyohombo yanyoko, oo nda lekela, oi li peni?

Ile onde mu landifa po kulyelye omolweendjo daye, odo ndi na?

Taleni! Onde mu landifa po omolwomanyono eni vene,

Nomolwomatauluko eni, onda lekela nyoko.

2 Omolwashike paha li nande oumwe, eshi nde uya?

Omolwashike pehe na nande oumwe a nyamukula, eshi nda ifana?

Mbela eke lange olixupi unene nokukulila,

Ile mwaame kamu na mbela eenghono dokuxupifa?

Taleni! Ohandi pwiininike efuta nehanyeno lange;

Omilonga ohandi di ningi ombuwa.

Eeshi damo otadi ka ola omolwomeva oo a pwiinina mo,

Nohadi fi omolwenota.

3 Eulu ohandi li dike omilaulu,

Nohandi ningi eeshako oshuuvikifo shalo.”

4 Omwene Omunamapangelo aeshe, Jehova, okwa pa nge elaka la hongwa,*

Opo ndi shiive okunyamukula* oo a loloka nondjovo ya yuka.*

Oha pendula nge ongula keshe;

Oha pendula okutwi kwange ku pwilikine, ngaashi ovo va hongwa.

5 Omwene Omunamapangelo aeshe, Jehova, okwa fitulula okutwi kwange,

Nokanda li omunashibofa.

Inandi ya nondjila imwe.

6 Ombuda yange onde i yandja kwaavo tava denge nge,

Neemhanda dange kwaavo tave di nane, di kale ngaho.*

Oshipala shange inandi shi holeka koinima ififa ohoni nokokufiilwa omate.

7 Ashike Omwene Omunamapangelo aeshe, Jehova, ota ka kwafela nge.

Nomolwaashi kandi udite nda fifwa ohoni.

Nomolwaashi oshipala shange nde shi ninga ngaashi emanya la pama,

Nondi shii kutya itandi ka fifwa ohoni.

8 Ou a ti ondimuyuki oku li popepi.

Olyelye ta dulu okutamaneka* nge?

Natu fikame.*

Olyelye e na oshikoya naame?

Ne uye kwaame.

9 Tala! Omwene Omunamapangelo aeshe, Jehova, ota ka kwafela nge.

Olyelye ta dulu okupopya kutya ondi na ondjo?

Tala! Aveshe otava ka pomboka ngaashi oshikutu.

Onhwishi otai ke va lya po.

10 Olyelye womunye ha tila Jehova,

Noha pwilikine kondaka yomupiya waye?

Oo a enda momilaulu fokofoko dihe na ouyelele washa?

Ne lineekele medina laJehova nokulikolelela* kuKalunga kaye.

11 “Taleni! Amushe ovo hamu tema omundilo,

Hamu u ningifa u dje eehandje,

Endeni mouyelele womundilo weni,

Nomokati keehandje domundilo, oo mwa tema.

Eshi osho eke lange tali ke mu ningila:

Otamu ka nangala pedu mouyahame munene.

51 “Pwilikineni kwaame, nye ovo tamu lalakanene ouyuki,

Nye ovo tamu kongo Jehova.

Taleni kemanya, olo mwa hongwa mulo,

Nokelambo omo mwa fewa mulo.

2 Taleni kuAbraham, xo yeni,

NokuSara, oo e mu dala.*

Osheshi oye aeke a li po, eshi nde mu ifana,

Nonde mu nangeka noupuna noku mu hapupalifa.

3 Osheshi Jehova ota ka hekeleka Sion.

Ota ka hekeleka omakulukuma asho aeshe,

Nombuwa yasho ote ke i ninga ngaashi Eden,

Nomalufilu asho ongaashi oshikunino shaJehova.

Enyaku nehafo otai ka kala musho,

Omaimbilopandulo momikwelengedjo dao.

4 Yandjeni elitulemo kwaame, nye ovanhu vange,

Nokweendekela okutwi kwaame, oshiwana shange.

Osheshi omhango otai ka dja kwaame,

Nohandi ka tula po ouyuki wange u li ngaashi ouyelele kovanhu.

5 Ouyuki wange owa ehena popepi.

Exupifo lange otali ka ya,

Nokwooko kwange otaku ka tokola ovanhu.

Ounhunhu otave ke lineekela mwaame,

Notava ka teelela okwooko* kwange.

6 Yeluleni omesho eni keulu,

Nokutala kedu.

Osheshi eulu otali ke lihana moitandu ngaashi omwifi;

Edu otali ka kulupa ngaashi oshikutu,

Novakalimo valo otava ka fya ngaashi eemwe.*

Ashike exupifo lange otali kala po alushe,

Nouyuki wange otau kala po alushe.*

7 Pwilikineni kwaame, nye ovo mu shii ouyuki,

Ovanhu, ovo ve na omhango* yange momitima davo.

Inamu tila omasheko ovanhu, ovo vehe kwete okufya,

Noinamu tilifwa omolwomatukano avo.

8 Osheshi onhwishi otai ke va lya po ngaashi ashike oshikutu;

Onhwishi yomoikutu* otai ke va xwaka po ngaashi olududi leedi.

Ashike ouyuki wange otau kala fiyo alushe,

Nexupifo lange okomapupi aeshe.”

9 Penduka! Penduka! Djala eenghono,

Ove okwooko kwaJehova!

Penduka ngaashi pomafiku onale, ngaashi pomafimbo omapupi omonakudiwa.

Mbela haave wa li wa teyaula Rahab* moinhimbu,

Ou wa tyuula oshinamwenyo shinene shomefuta?

10 Hamba haave wa li wa pwiininika efuta, omeva mahapu male?

Ove ou wa ninga ondjila moule wefuta, opo mu dule okweendwa kwaavo wa kulila?

11 Ovo va kulilwa kuJehova otava ka aluka.

Otave uya kuSion ve na ehafo linene,

Nehafo laalushe otali ka kala komitwe davo.*

Enyaku nehafo otai ka kala lavo.

Noluhodi nokutwa omadima otai ka ya onhapo.

12 “Aame mwene handi ku hekeleke.

Omolwashike u na okutila omunhu, oo ehe kwete okufya,

Nomona womunhu, oo ta lembe ngaashi omwiidi mutalala?

13 Omolwashike ho dimbwa Jehova, Omumi woye,

Oo a nyanununa eulu, nokwa dika omakanghameno edu?

Efimbo alishe owa li alushe moumbada wokutila ehandu lomufininiki,*

A fa e na eenghono doku ku hanauna po.

Ehandu lomufininiki paife oli li peni?

14 Ou a mangwa nomalyenge oku li pokumangululwa;

Ita ka fya, noita ka ya melambo,

Ota ka kala alushe e na omungome.

15 Ashike aame Jehova Kalunga koye,

Ou ta pindjaleke efuta nokuningifa omakufikufi alo a popome.

Jehova womatangakwaita olo edina laye.

16 Ohandi ka tula eendjovo dange mokanya koye,

Nohandi ke ku uvika nomudidimbe weke lange,

Opo ndi dule okuyala eulu nokudika omakanghameno edu

Nohandi ka lombwela Sion kutya, ‘Nye oshiwana shange.’

17 Penduka! Penduka! Fikama, ove Jerusalem,

Ove ou wa nwa meke laJehova, meholo lehandu laye.

Owa nwa meholo;

Owa mana eholo, olo tali pungaukifa.

18 Movanamati vaye aveshe, ovo a dala, kape na nande oumwe e li po, e mu wilike,

Nomovanamati vaye aveshe ovo a tekula kape na nande oumwe e mu kwate keke.

19 Oinima ei ivali oye ku hanga.

Olyelye te ke ku udila oukwao wananghali?

Ehanauno nosho yo oupyakadi, ondjala neongamukonda!

Olyelye te ke ku hekeleka?

20 Ovanamati voye ova ngabuka.

Ova kangavala mokolonela yepandavanda keshe*

Ngaashi eedi domoixwa di li monete.

Ova pewa pauyadi ehandukilo laJehova, ehanyeno laKalunga koye.”

21 Onghee pwilikina kwaashi,

Ove omukainhu omufininikwa, nowa kolwa, nonande hakomaviinyu.

22 Eshi osho Omwene Jehova Kalunga koye, oo ha popile oshiwana shaye, ta ti:

“Tala! Ohandi ka kufa meke loye eholo, olo hali fungifa,

Eholo, eholo lehandu;

Ito ka nwa mo vali nandenande.

23 Ohandi ke li tula meke lovahepeki voye,

Ovo hava ti kwoove,* ‘Nangala eombe, opo tu ende kombada yoye!’

Onghee owa ninga ombuda yoye ngaashi edu,

Ngaashi epandavanda, va ende kuyo.”

52 Penduka! Penduka! Lidika eenghono, ove Sion!

Djala oikutu yoye iwa, ove Jerusalem, oshilando shiyapuki!

Osheshi oo ina pita etanda nosho yo oo ina koshoka ite ke uya mo vali mwoove.

2 Lipupula ondwi, fikama, ndele to kala omutumba, ove Jerusalem.

Kufa mo omalyenge,* oo a manga ofingo yoye, ove omonakadona waSion onghwate.

3 Osheshi eshi osho Jehova ta ti:

“Owa li wa landifwa po nopehe na ofuto yasha,

Noito ka kulilwa noimaliwa.”

4 Osheshi eshi osho Omwene Omunamapangelo aeshe, Jehova, ta ti:

“Pehovelo, oshiwana shange osha ya kuEgipiti shi ka kale oko shi li ovanailongo;

Opo nee Assiria okwe shi fininika nopehe na etomheno lasha.”

5 Jehova ota ti: “Nandi ninge po shike?”

“Osheshi ovanhu vange ova kufwa po nopehe na ofuto.

Ovo tave va pangele ova kala nokuuyaana omolwefindano,” Jehova osho ta ti,

“Nedina lange ola kala alushe nokushekwa.

6 Osheshi omolwetomheno olo, oshiwana shange otashi ka shiiva edina lange;

Osheshi omolwetomheno olo, otava ka shiiva mefiku olo kutya aame handi popi.

Tala, Aame!”

7 Eemhadi daao ta eta onghundana iwa inadi fewa tuu keemhunda,

Oo ta udifa ombili,

Oo ta eta onghundana iwa yoshinima shiwa,

Oo ta shiivifa exupifo,

Oo ta ti kuSion: “Kalunga koye okwa ninga Ohamba!”

8 Pwilikineni, ovanangeli veni ova yelula eendaka davo.

Otava ingida nehafo ve li moukumwe,

Osheshi otave ke shi tala filufilu,* eshi Jehova ta ongele Sion.

9 Hafeni nokunyakukwa pombada mu li moukumwe, nye oikulukuma yaJerusalem,

Osheshi Jehova okwa hekeleka oshiwana shaye; okwa kulila Jerusalem.

10 Jehova okwa holola okwooko kwaye kuyapuki moipafi yoiwana aishe;

Ominghulo dedu adishe otadi ka mona oilonga yexupifo* yaKalunga ketu.

11 Shi fiyei po, shi fiyei po, djeni mo musho, inamu kuma sha inashi koshoka!

Djeni mo mokati kasho, likalekeni mwa koshoka,

Nye ovo hamu humbata oilongifo yaJehova.

12 Osheshi itamu ka ya kehaluko,

Noitamu ka ya onhapo,

Osheshi Jehova ote ke mu tetekela komesho,

Na Kalunga kaIsrael ote ke mu kala konima.

13 Tala! Omupiya wange ota ka katuka pandunge.

Ota ka yelulwa pombada,

Ota ka yelwaayelwa, nota ka tumbalekwa unene.

14 Ngaashi ashike pa li vahapu ovo tave mu tale va kumwa,

. . . Osheshi eholokepo laye ola lunduluka inali fa lovanhu vakwao,

Nolupe laye inali fa nandenande lovanhu . . .

15 Osheshi ota ka kumwifa oiwana ihapu.

Eehamba otadi ka pata omakanya ado* moipafi yaye,

Molwaashi otadi ka mona osho inadi lombwelwa,

Notadi ka yandja elitulemo kwaasho inadi uda.

53 Olyelye a itavela osho a uda kufye?*

Nolyelye a hololelwa eenghono dokwooko kwaJehova?

2 Ota holoka ngaashi oshitutumine koshipala shaye,* ngaashi omudi medu la notelwa.

Ke na efimano lasha, ile etumbalo;

Nongeenge otwe mu mono, eholokepo laye itali tu nanene kuye.*

3 Okwa li a tondika, nokwa li ha henukwa kovanhu,

Omulumenhu oo a mona* ouvela nokwa li e shii ouyahame.

Oshipala shaye osha li sha fa she tu holekwa.*

Okwa li a tondika, notwe mu tala ko ehe na oshilonga.

4 Oshoshili, ye mwene okwa humbata omauyahame etu,

Nokwe lididimikila omauvela etu.

Ashike otwe mu tala ko a hepekwa, a dengwa kuKalunga, nokwa monifwa oixuna.

5 Ashike okwa tyuulwa omolwomatauluko etu;

Okwa nyanyaulwa omolwomapuko etu.

Okwe lididimikila ehandukilo, opo tu kale tu na ombili,

Notwa velulwa omolwoipute yaye.

6 Atushe otwa kala nokweelaela ngaashi eedi,

Keshe umwe okwa ya nondjila yaye,

Na Jehova okwa ningifa omapuko etu aeshe e uye kombada yaye.

7 Okwa hepekwa, nokwe liyandja a fininikwe,

Ashike ina makula nande okanya kaye.

Okwa twalwa koshidipaelo ngaashi odi,

Ngaashi odi yonghadi hai kala ya mwena ngeenge tai ka kululwa,

Ashike ina makula nande okanya kaye.

8 Omolwengabeko* netokolo, okwa li a kufwa po;

Nolyelye te lipula vali shi na sha nouyelele wonakudiwa yaye?*

Osheshi okwa li a xulifwa po medu lovanamwenyo;

Okwa dengwa* omolwomatauluko ovanhu vange.

9 Nokwa li a pewa ombila* povakolokoshi,

Ndele eshi a fya, okwa pakwa poipuna,*

Nonande ina ninga sha sha puka,*

Nomokanya kaye inamu dja oipupulu nandenande.

10 Ashike osha li ehalo laJehova,* a nyanyaulwe, nokwa efa a ehame.

Ngeenge okwa yandje omwenyo waye u li elivelombediyambo,

Ota ka mona oludalo laye, ota ka hapupalifa omafiku aye,

Nokupitila muye, ehalo* laJehova otali ka wanifwa.

11 Omolwoudjuu waye,* ota ka mona nota ka kala a wanenwa.

Omolweshiivo laye, omuyuki, omupiya wange,

Ota ka kwafela ovanhu vahapu va kale ovayuki,

Note ke lididimikila omatimba avo.

12 Omolwetomheno olo, ohandi ke mu pa oshitukulwa mokati kavahapu,

Nota ka tukula oixuulwa* novanaenghono,

Molwaashi okwa yandja omwenyo waye, nokuli fiyo omefyo,

Nokwa li a valulilwa mokati kovanyoni;

Okwa humbata omatimba avahapu,

Nokwa ninga omupopiliko wovanyoni.

54 “Ingida pombada nehafo, ove omukainhu ongadji, ove ou ino dala!

Kala wa nyakukwa nokwiingida omolwehafo, ove ou uhe shii nandenande ouyehame woshifeta,

Osheshi ovanamati* vaao a haulukwa ovahapu

Ve dulife ovanamati vomukainhu, oo e na omushamane,”* Jehova osho ta ti.

2 “Tamununa mo onhele yetwali loye.

Nyanununa mo omalapi etwali, etwalihangano loye linene.

Ino ongaonga, tonyununa mo eengodi detwali loye

Nokupameka outenda vokukwata etwali loye.

3 Osheshi oto ke lihanena kolulyo nokolumosho.

Oludalo loye otali ka pangela oiwana,

Notava ka kala moilando, oyo ya ninga omaputu.

4 Ino kala wa tila, osheshi ito ka fifwa ohoni;

Noino kala wa lengwa, osheshi ito ka nyematekwa.

Osheshi oto ka dimbwa ohoni yomounyasha woye,

Nelengwa loufiyekadi woye ito ke li dimbuluka vali.”

5 “Osheshi Omumi woye munene oku li ngaashi omushamane* woye;

Jehova womatangakwaita olo edina laye,

NOmuyapuki waIsrael oye Omukulili woye.

Ota ka ifanwa Kalunga kedu alishe.

6 Osheshi Jehova okwe ku ifana wa fa wa li omukulukadi a efiwa, nokwa dengwa a lila,*

Ngaashi omukulukadi a hombolwa omunyasha, ndele ta efiwa,” Kalunga koye osho ta ti.

7 “Osheshi ohandi ke ku efa po okafimbo kanini,

Ndele omolwonghenda inene, ohandi ke ku ongela vali.

8 Mehandu linene onda li nde ku holeka oshipala shange okafimbo kanini,

Ndele omolwohole yaalushe i na oudiinini, ohandi ke ku fila onghenda,” Omukulili woye, Jehova, osho ta ti.

9 “Eshi osha faafana nopefimbo laNoa kwaame.

Ngaashi ashike nda li nda ana kutya omeva aNoa itaa ka tuvikila vali edu,

Natango ohandi ane kutya itandi ke ku handukila vali, ile ndi ku hanyene.

10 Osheshi eemhunda otadi dulu okukufwa po,

Noikulundudu otai dulu okutengauka,

Ndele ohole yange i na oudiinini itai ka kufwa po pwoove,

Nehangano lange lombili itali ka ndjungwaandjungwa,” Jehova, oo e ku fila onghenda, osho ta ti.

11 “Ove omukainhu omufininikwa, wa telaanifwa koshikungulu, ino hekelekwa,

Ohandi tula po omamanya oye nomunoko wa kola,

Nekanghameno loye onomamanya osafir.

12 Ohandi ka ninga omakuma oye eameno momamanya orubi,

Omivelo doye omomamanya taa vema,*

Neengaba doye adishe omomamanya ondilo.

13 Novanamati* voye aveshe otava ka hongwa kuJehova,

Nombili yovanamati* voye otai ka kala inene.

14 Oto ka kala wa pamenena mouyuki.

Oto ka kufwa mo filufilu momafininiko,

Ito ka tila sha, noitapa ka kala sha shoku ku etela oumbada,

Osheshi itau ka ehena pwoove.

15 Ngeenge umwe okwe ke ku ponokela,

Itashi ka kala palombwelo lange.

Keshe oo te ke ku ponokela ota ka wila po omolwoye.”

16 “Tala! Aame nda shita omuhambuli woivela,

Oo ha fudile pomakala omundilo,

Noha nduluka oshilwifo.

Aame yo nda shita omuhanauni, a ete ehanauno.

17 Kape na oshilwifo tashi hambulwa, shi ku lwife, tashi ka pondola,

Noto ka tokola elaka keshe tali ku hokololifa.

Eli olo efyuululo lovapiya vaJehova,

Nouyuki wavo owa dja kwaame,” Jehova osho ta ti.

55 Ileni, amushe ovo mwa fya enota; ileni komeva!

Nye ovo muhe na oimaliwa, ileni; landeni nokulya!

Heeno, ileni, landeni omaviinyu nomashini nopehe na oimaliwa nosho yo ofuto yasha.

2 Omolwashike mu na okufuta oimaliwa kwaasho shihe fi omungome,

Nomolwashike mu na okulongifa oiniwe yeni* kwaasho itashi mu kutifa?

Pwilikineni kwaame nelitulemo nokulya osho shiwa,

Notamu* ka hafela oikulya, oyo tai tokola elaka.*

3 Pakalekeni omatwi eni nokuuya kwaame.

Pwilikineni, notamu* ka kala nomwenyo,

Nohandi ka ninga nanye diva ehangano laalushe

Metwokumwe neendjovo dohole i na oudiinini kuDavid, odo di shii okulineekelwa.

4 Taleni! Onde mu ninga ondombwedi koiwana,

Omuwiliki nomupangeli koiwana.

5 Taleni! Otamu ka ifana oshiwana, osho muhe shii,

Naavo vomoshiwana, ovo vehe mu shii, otava ka tondokela kunye

OmolwaJehova Kalunga keni, Omuyapuki waIsrael,

Molwaashi ote ke mu tumbalekifa.

6 Kongeni Jehova, ofimbo ta monika.

Mu ifaneni, ofimbo e li popepi.

7 Omukolokoshi na efe po ondjila yaye,

Nomulongi wowii omadiladilo aye;

Na alukile kuJehova, oo te ke mu fila onghenda,

KuKalunga ketu, molwaashi ote ke mu dimina po filufilu.*

8 Jehova ota ti: “Osheshi omadiladilo ange hao omadiladilo eni,

Neendjila dange hado eendjila deni.

9 “Osheshi ngaashi eulu li li pombada li dule edu,

Eendjila dange nado odi dule eendjila deni,

Nomadiladilo ange oku dule omadiladilo eni.

10 Osheshi ngaashi odula nosho yo olumi* tai loko okudja meulu,

Noitai shuna mo, ofimbo inai tutika edu, oku li ningifa li menife noli tutumife,

Li yandje ombuto komukuni nosho yo omungome komuli,

11 Osho yo ondjovo ya dja mokanya kange tai ka kala.

Itai alukile kwaame oshimha,

Ashike otai ka wanifa keshe osho nda hala,*

Notai ka wanifa filufilu osho nde i tumina i ninge.

12 Osheshi otamu ka ya nehafo,

Notamu ka aluka nombili.

Eemhunda noikulundudu otai ka kala ya hafa unene koshipala sheni,

Nomiti adishe domoixwa otadi ka hakela omake ado.

13 Ponhele yomakiya, otapa ka mena omuti womudjenipa,

Noponhele yokalilifa, otapa ka mena omuti womumirti.

Otashi ka etela,* Jehova etumba

Edidiliko laalushe, olo itali ka hanauka po.”

56 Eshi osho Jehova ta ti:

“Diinina ouyuki nokulonga osho sha yuka,

Osheshi exupifo lange otali uya mafiku,

Nouyuki wange otau ka hololwa.

2 Oo ta kala a hafa oye ou ta ningi ngaho,

Nomona womunhu, ou te shi diinine,

Ou ta diinine Eshabata, noi te li nyateke,

Naau ta kelele omake aye, aha longe owii keshe.

3 Omunailongo, oo ha longele Jehova, ina tya,

‘Jehova ota ka yoolola nge mo filufilu moshiwana shaye.’

Nomulutulwa ina tya, ‘Tala! Ame omuti wa kukuta.’”

4 Osheshi eshi osho Jehova ta lombwele ovalutulwa ovo hava diinine omashabata ange, nosho yo ovo va hoolola okulonga osho tashi hafifa nge, nohava diinine filufilu ehangano lange, ta ti:

5 “Ohandi ke va pa meumbo lange nosho yo momakuma ange edimbulukifomanya nedina,

Oshinima osho shi dule ovanamati novanakadona.

Ohandi ke va pa edina tali kalelele,

Olo itali ka xula po.

6 Shi na sha novanailongo ovo hava longele Jehova,

Ovo ve hole edina laJehova

Nokukala ovapiya vaye,

Aveshe ovo hava diinine Eshabata, noihave li nyateke,

Naavo hava diinine filufilu ehangano lange,

7 Ohandi ke va eta komhunda yange iyapuki,

Nohandi ke va hafifa meumbo lange lokwiilikanena.

Omaxwikiloyambo avo aeshe nomayambo avo otaa ka tambulwa ko koaltari yange.

Osheshi eumbo lange otali ka ifanwa eumbo lokwiilikanena ovanhu aveshe.”

8 Omwene Omunamapangelo aeshe, Jehova, oo ta ongele Ovaisrael, ovo ve lihanifwa, ota ti:

“Ohandi ka ongela puye vakwao, kakele kaavo va ongelwa nale.”

9 Nye oifitukuti aishe yomoixwa, ileni mu lye,

Nye oifitukuti aishe yomofuka.

10 Ovanangeli vaye ovapofi, kape na nande oumwe e shi didilika.

Aveshe eembwa da mwena, itadi weda.

Otadi hefaana, noda nangala; odi hole okufuda po.

11 Ovo eembwa, odo di hole okulya unene;

Ihava kuta nandenande.

Ovo ovafita, ovo vehe na eudeko.

Keshe umwe okwa ya nondjila yaye;

Keshe umwe womuvo waxuuninwa ota kongo ouwa waye mwene, ndele ta ti:

12 “Handi ya ndi kufe omaviinyu,

Natu nweni oikunwa yetu yoalkoholi.

Naali lomongula otali ka kala la fa lonena, ile li dulife po!”

57 Omuyuki okwa kana po,

Ashike kape na umwe e shi tula komutima.

Ovadiinini ova kufwa po,*

Kape na umwe e shi didilika kutya omuyuki okwa kufwa po

Omolwoupyakadi.*

2 Okwa ya mombili.

Aveshe ovo hava ende mouyuki ova tulumukwa meembete* davo.

3 “Shi na sha nanye, eheneni popepi elela,

Nye ovanamati vondudu yomukainhu.

Nye ovana vomuhaeli nombwada:

4 Olyelye tamu fifa ohoni?

Olyelye mwa ekamekela omakanya eni a pwa ko nokulengaifa?

Hamba hanye ovana vovanyoni,

Ovana vovakengeleledi,

5 Ovo ve na omahalo a pitilila opamilele mokati komiti da kula,

Koshi yomuti keshe wa kula,

Ovo hava dipaele ovana momafilu,

Pokati komifya domamanya?

6 Omamanya inaa kola omefilu oo oshitukulwa shoye.

Heeno, oo onhele yoye.

Nokuli nokuo oko to tile oikunwayambo nokuyandja oshali.

Mbela ohandi ka kutifwa* koinima ei?

7 Ombete imwe owe i longekida komhunda ile, noya tumbala,

Nowa ya ko u ka yandje eyambo.

8 Konima yomuvelo nopongudi yomuvelo opo we lidikila edimbulukifo loye.

Owa fiya nge po noino liuvika sha;

Owa ya pombada, nowa tamununa mo ombete yoye.

Nowa ninga ehangano navo.

Ou hole okunangala kombete yavo,

Nowa dakamena omesho oilyo yoludalo youlumenhu.*

9 Owa ya pedu kuMelek* nomaadi,

Nou yadi omaadi edimba liwa.

Owa tuma ovatumwa voye kokule,

Opo u kulukile mOmbila.*

10 Owe lilolola mokushikula eendjila doye dihapu,

Ndele ino tya, ‘Kape na eteelelo!’

Oho mono eenghono dipe,

Nomolwaasho iho sholola.*

11 Olyelye ho tila,

Opo u hovele okupopya oipupulu?

Ino dimbuluka nge.

Ino tula sha komutima.

Mbela inandi kala nda mwena nokulikalela?*

Onghee owa ulika kutya ino tila nge.

12 Ouyuki woye wongaho noilonga yoye ohandi ke i shiivifa,

Noitai ke ku etela ouwa.

13 Ngeenge to lilile ekwafo,

Oihongwafano, oyo we liongelela, itai ke ku xupifa.

Omhepo otai ke i pepelashi aishe,

Omufudo wongaho otau ke i fudila kokule,

Ashike ou ta kongo eameno mwaame ota ka fyuulula edu,

Nota ka mona onhele komhunda yange iyapuki.

14 Otaku ka tiwa, ‘Wapalekeni, wapalekeni ondjila! Longekideni ondjila!

Kufei mo endangalati keshe mondjila yovanhu vange.’”

15 Osheshi eshi osho Omukombadambada nOmutumbalekwa,

Oo ta kala* po fiyo alushe, naao edina laye liyapuki, ta ti:

“Ohandi kala pombada nomonhele iyapuki,

Ndele ondi li yo pamwe naavo ve na omhepo ya nyanyaulwa novadinwa,

Ndi mwenyopaleke omhepo yovadinwa,

Nondi mwenyopaleke omutima waavo va nyanyaulwa.

16 Osheshi itandi ke va kondjifa fiyo alushe,

Ile ndi kale alushe nda fula onya;

Osheshi omhepo yomunhu otai ka nghundipala omolwange,

Nokuli noishitwa oinamufudo, oyo nda shita.

17 Onda li nda fula onya, eshi a kala a pitifa komesho oulunde waye mokulikongela eliko moukengeleledi,

Onghee onde mu denga, nde mu holeka oshipala shange, nonda li nda fula onya.

Ashike okwa kala nokweenda onga omunashibofa nokushikula ondjila yomutima waye.

18 Onda kala ndi wete eendjila daye,

Ashike ohandi ke mu velula nosho yo oku mu wilika,

Nohandi ke mu hekeleka nosho yo ovanhu vaye, ovo va nyika oluhodi.”

19 Jehova ota ti: “Ohandi shiti oshiimati shomilungu.

Ombili tai kalelele otai ka pewa oo e li kokulekule nosho yo oo e li popepi,

Nohandi ke mu velula.”

20 Ashike ovakolokoshi ove li ngaashi efuta la pindjala, olo itali loto,

Nomeva alo otaa kala nokuumba mo oimbodi nosho yo onhata.

21 Kalunga kange ota ti, “Ovakolokoshi kave na ombili.”

58 “Ingida omunino wa pwa ko; ino fitikinina!

Yelula ondaka yoye pombada ngaashi enghuma.

Lombwela ovanhu vange ounashibofa wavo,

Eumbo laJakob omatimba avo.

2 Ohava kongo nge efiku nefiku,

Nova ulika kutya ova hokwa okushiiva eendjila dange,

Va fa ngeno oshiwana, osho hashi longo ouyuki,

Noinashi efa po ouyuki waKalunga kasho.

Otava pula ndi va tokole pauyuki;

Ova hokwa okweehena popepi naKalunga tava ti:

3 ‘Omolwashike iho tu tale, eshi hatu lidilike?

Nomolwashike iho shi didilike, eshi hatu* kala twa nyika oluhodi?’

Omolwaashi mefiku leni lokulidilika, ohamu lalakanene ouwa weni vene,*

Nohamu fininike ovanailonga veni.

4 Okulidilika kweni ohaku etifa eenhangu nolwoodi,

Nohamu lidenge neengonyo mwa handuka.*

Itamu dulu okulidilika ngaashi tamu ningi nena nokuteelela ondaka yeni i udike meulu.

5 Mbela elidiliko, olo nda hoolola, osho li na okukala ngaha,

Ngaashi efiku, olo umwe te linyikifa oluhodi ye mwene,*

Ta nyongameke omutwe waye ngaashi omwiidi mule,

Ta nangala poshako nomomute?

Mbela osho osho hamu ifana elidiliko nefiku lokuhafifa Jehova?

6 Ahawe, elidiliko, olo nda hokwa, olo eli:

Okukufa mo omalyenge oukolokoshi

Okuditulula eemwiya dondjoko,

Okumangulula omufininikwa,

Nokuteya pokati ondjoko keshe;

7 Okutukula omungome woye naao a fya ondjala,

Okwiidilila meumbo loye ohepele nosho yo oo ehe na apa ha di,

Okudjaleka oo e li hamunghele, ngeenge owe mu mono,

Noino pilamena ombelela yoye mwene.

8 Opo nee ouyelele woye otau ka minikila ngaashi eluwa,

Noto ka veluka diva.

Ouyuki woye otau ke ku tetekela,

Noshinge shaJehova otashi ke ku wilika okudja konima.

9 Opo nee oto ka ifana, na Jehova ota ka nyamukula;

Oto ka lilila ekwafo, nota ka tya, ‘Aame ou!’

Ngeenge owa kufa mo ondjoko mokati keni,

Nokweefa po okuulika vamwe omunwe nokupopya eendjovo dii,

10 Ngeenge owa pe ovo va fya ondjala osho naave wa kala wa halelela*

Nokukutifa ovafininikwa,*

Opo nee ouyelele woye otau ka minikila nokuli nomomilaulu,

Nomilaulu fokofoko doye otadi ka kala ngaashi mokati komutenya.

11 Jehova ote ke ku wilika alushe,

Note ke ku kutifa* nokuli nomedu la notelwa;

Ota ka pameka omakipa oye,

Noto ka kala ngaashi oshikunino sha tekelwa nawa,

Ngaashi ofifiya, oyo hai kala alushe i na omeva.

12 Otava ka tungulula oikulukuma yonale omolwoye,

Noto ka tungulula omakanghameno omapupi onale.

Oto ka ifanwa omutungululi womakuma a mbonyauka,*

Omuwapekululi weendjila, omo tamu ka kalwa.

13 Ngeenge owa efa po* okulalakanena ouwa woye mwene* omolwEshabata, mefiku lange liyapuki,

Nowa ifana Eshabata ehafo linene, efiku liyapuki laJehova, efiku lokutumbalekwa,

Nowe li tumbaleka ponhele yokulalakanena ouwa woye mwene nokupopya eendjovo dongaho,

14 Kungaho oto ka mona ehafo linene omolwaJehova,

Nohandi ke ku ningifa u londe keenhele dokoikulundudu dokombada yedu.

Ohandi ke ku ningifa u lye* efyuululo laxokulululwa, Jakob,

Osheshi okanya kaJehova oke shi popya.”

59 Tala! Eke laJehova kali xupi unene okuxupifa,

Nokutwi kwaye inaku fita* kuha dule okuuda ko.

2 Ahawe, omapuko eni vene okwe mu tukula ko kuKalunga keni,

Omatimba eni okwe mu ningifa e mu holeke oshipala shaye,

Nokwaanya okupwilikina kunye.

3 Osheshi omake eni okwa nyatekwa nohonde

Nominwe deni onepuko.

Omilungu deni ohadi popi oipupulu, nelaka leni ohali ngungutula oinima ihe li pauyuki.

4 Kape na oo ha popile ouyuki,

Nokape na oo ha i komhangu, a ka popye oshili.

Ove lineekela moinima ihe fi yoshili* nokupopya oinima ihe na oshilonga.

Ove na oufimba woupyakadi, nohava dala osho sha nyika oshiponga.

5 Ohava tendula omai eyoka li na oudiyo,

Nohava tungu ongodi yeluviluvi.

Keshe oo ta li omai alo ota fi,

Nei, olo la tatuka, otamu di euta.

6 Ongodi yavo yeluviluvi itai ka ninga oshikutu,

Noitave ke lituvikila naasho tava tungu.

Oilonga yavo oya nyika oshiponga,

Nelongifo leenghono oi li momake avo.

7 Eemhadi davo ohadi tondoka di longe owii,

Nohava endelele va tileshi ohonde ihe na etimba.

Omadiladilo avo okwa nyika oshiponga;

Ehanauno noixuna oi li meendjila davo.

8 Inava shiiva ondjila yombili,

Nomomalila avo kamu na ouyuki;

Ohava pengifa eendjila davo;

Kape na oo ta lyata mo ta ka shiiva ombili.

9 Nomolwaasho ouyuki u tu li kokule,

Naasho sha yuka itashi ke tu hanga.

Otwa kala twa teelela ouyelele, ashike tala, ope na omilaulu;

Ouyelele wa twa, ashike ohatu ende momilaulu fokofoko.

10 Ohatu pamhadala ekuma ngaashi ovapofi;

Ngaashi ovo vehe na omesho, ohatu kala nokupamhadala.

Ohatu punduka moshanga shomutenya ngaashi konguloshi momilaulu;

Mokati kovanaenghono, otwa fa ashike ovafi.

11 Atushe ohatu kala hatu ulu ngaashi omamwangha,

Nokushukushula ngaashi onghuti.

Ohatu kala twa teelela ouyuki, ndele kau po;

Exupifo, ndele oli tu li kokule.

12 Osheshi ounashibofa wetu ouhapu koshipala shoye;

Enyono letu keshe otali holola kutya otu na ondjo.

Osheshi ounashibofa wetu ou li pufye;

Omapuko etu otu a shii nawa.

13 Otwa nyona, notwe lidimbika Jehova;

Otwa pilamena Kalunga ketu.

Otwa popya eendjovo domafininiko nodounashibofa;

Otu na oufimba woipupulu, notwa ngungutula eendjovo doipupulu momitima detu.

14 Ouyuki owa kufwa po,

Naasho sha yuka osha fikama kokule;

Osheshi oshili* oya pundukila mehalandjadja,

Naasho sha yuka itashi dulu okuya mo.

15 Oshili* oya kana po,

Nakeshe oo te lialuluka keendjila daye dii ota nyekwa.

Jehova okwe shi mona, noka li e shi panda,*

Molwaashi kapa li ouyuki.

16 Okwa mona kutya kapa li omunhu,

Nokwa li a kumwa, eshi paha li oo a ya mo olunyala,

Onghee okwooko kwaye okwa eta exupifo,*

Nouyuki waye owe mu yambidida.

17 Opo nee okwa djala ouyuki ngaashi okandjafa komukwaita,

Nembale lexupifo* komutwe waye.

Okwa djala oikutu yonghone ngaashi oshikutu shaye,

Nokwe lidingila ouladi ngaashi okandjafa.*

18 Ote ke va pa ondjabi she likolelela kwaasho va longa:

Ehandu kovakondjifi vaye, onghone kovatondi vaye.

Nounhunhu ote ke va pa osho ve na okupewa.

19 Otava ka tila Jehova okudja keningino letango

Nokudja kepito letango, oshinge shaye,

Molwaashi ote ke uya a fa omulonga tau tondoka,

Oo tau undulwa komhepo yaJehova.

20 “Omukulili ote uya muSion,

Koludalo laJakob, olo le lialuluka komatauluko alo,” Jehova osho ta ti.

21 “Ame, eli olo ehangano, olo nda ninga navo,” Jehova osho ta ti.“Omhepo yange oyo i li mwoove, neendjovo dange, odo nda tula mokanya koye, itadi kufwa mo mokanya koye, mokanya kovana voye, ile mokanya kovatekulu voye,” Jehova osho ta ti, “okudja paife nofiyo alushe.”

60 “Fikama, ove omukainhu, minikila, osheshi ouyelele woye owe ya.

Oshinge shaJehova otashi ke ku minikila.

2 Osheshi tala! omilaulu otadi ka tuvikila edu,

Nomilaulu fokofoko oiwana;

Ashike Jehova ote ke ku minikila,

Noshinge shaye otashi ke limonikila kwoove.

3 Oiwana otai ka ya kouyelele woye

Neehamba okoshinge shetumbalo loye.*

4 Yelula omesho oye nokutala keembinga adishe!

Aveshe ova ongelwa; otave uya kwoove.

Okudja kokulekule, ovanamati voye otava kala nokuuya,

Novanakadona voye ova humbatelwa monghwapa.

5 Pefimbo opo, oto ke shi mona, noto ka vilima,

Nomutima woye otau ka nuka mo, notau ka kala tau denge,

Osheshi oto ka pewa emona lomefuta;

Omaliko oiwana otae ke uya kwoove.

6 Omaufita eengamelo otae ke lihanena oshilongo shoye,*

Eengamelo deendume eenyasha dokuMidian nodokuEfa.

Aveshe ovo va dja kuSheba otave ke uya;

Va humbata oshingoli neka ledimba liwa.

Otava ka shiivifa oilonga yaJehova.

7 Omaufita aeshe okuKedar otaa ka ongelwa pwoove.

Eedi deendume dokuNebaiot otadi ke ku longela.

Otadi ke uya koaltari yange nde di hokwa,

Nohandi ka feweka eumbo lange, olo li na oshinge.*

8 Oolyelye ava tava tuka ngaashi oilemo,

Ngaashi eenghuti da finda koikuku yado?*

9 Osheshi ounhunhu otave ke lineekela mwaame;

Eeskepa dokuTarsis otadi ka kala komesho,*

Di ete ovanamati voye okudja kokulekule,

Pamwe noshisilveri shavo nosho yo oshingoli shavo,

Opo va tange edina laJehova Kalunga koye nosho yo Omuyapuki waIsrael,

Osheshi ote ke ku tumbalekifa.*

10 Ovanailongo otava ka tunga omakuma oye,

Neehamba davo otadi ke ku longela,

Osheshi omolwehandu lange, onde ku denga,

Ndele omolwonghenda* yange, ohandi ke ku fila onghenda.

11 Omivelo doye otadi ka kala alushe da yeuluka;

Itadi ka idilwa momukokomoko wefiku, ile oufiku aushe,

Opo u etelwe omamona oiwana,

Neehamba davo otadi ka kwatela komesho.

12 Osheshi oshiwana keshe nouhamba keshe, oo itau ke ku longela, otau ka xulifwa po,

Noiwana otai ka hanaunwa po filufilu.

13 Efimano lokuLibanon otali ke uya kwoove,

Pamwe nomiti domidjenipa, domi-ash nosho yo domisipresi,

di fewekife onhele yange iyapuki;

Ohandi ka tumbalekifa onhele yeemhadi dange.

14 Ovanamati vaavo have ku fininike otave ke uya noku ku linyongamena;

Aveshe ovo hava ungaunga naave nopehe na efimaneko otave ke linyongamena peemhadi doye,

Notave ke ku ifana oshilando shaJehova,

Sion wOmuyapuki waIsrael.

15 Ponhele yokweefiwa nokutondika, nopehe na oo ta piti po,

Ohandi ke ku ninga odjo yetumbalo laalushe,

Osheetifi shehafo komapupi aeshe.

16 Noto ka nwa filufilu omashini oiwana,

Oto ka nyama komavele eehamba;

Noto ka shiiva shili kutya Ame Jehova, aame Omuxupifi woye,

NOmunaenghono waJakob, Omukulili woye.

17 Ponhele yongopolo ohandi ka eta mo oshingoli,

Noponhele yoshivela shilaula ohandi ka eta mo oshisilveri,

Ponhele yoiti ongopolo,

Noponhele yomamanya oshivela shilaula;

Nohandi ka tula po ombili i li onga ovapashukili veni,

Nouyuki u li onga ovawiliki veni.

18 Moshilongo shoye itamu ka udika vali elongifo leenghono,

Ile ehanauno nomakulukuma meni leengaba doye.

Noto ka ifana omakuma oye Exupifo, nomivelo doye Efimano.

19 Osheshi etango halo vali tali ke ku pa ouyelele momukokomoko wefiku,

Nomwedi itau ke ku minikila vali,

Osheshi Jehova ota ka kala ouyelele woye waalushe,

Na Kalunga koye ota ka kala ewapalo loye.

20 Etango loye itali ka ningina vali,

Nomwedi woye itau ka fya ko,

Osheshi Jehova ota ka kala ouyelele woye waalushe,

Nomafiku oye okulila otaa ka xula po.

21 Novanhu voye aveshe otava ka kala ovayuki;

Otava ka nangala edu fiyo alushe.

Ovo oitutumine, oyo nda twika,

Oilonga yomake ange, opo ndi fimanekwe.

22 Ou muningholi ota ka ninga eyovi,

Naau munini oshiwana oshinaenghono.

Ame mwene, Jehova, ohandi ke shi endelelifa pefimbo lasho.”

61 Omhepo yOmwene Omunamapangelo aeshe, Jehova, oi li kombada yange,

Osheshi Jehova okwa vaeka nge ndi udifile ovalidiiniki* onghundana iwa.

Okwa tuma nge ndi mange omitima da teyauka,

Ndi shiivifile eenghwate emanguluko

Nokushiivifa kutya omesho ovanadolongo otaa ka pashuka a pwa mo,

2 Ndi shiivife omudo wehalo liwa* laJehova

Nefiku longhone yaKalunga ketu,

Ndi hekeleke aveshe ovo va nyika oluhodi,

3 Ndi file oshisho ovo va nyika oluhodi omolwaSion,

Noku va pa elapi lokulimanga komutwe, ponhele yomute,

Omaadi ehafo, ponhele yoluhodi,

Oshikutu shefimano, ponhele yomhepo ya nyanyauka.

Notava ka ifanwa omiti dinene douyuki,

Odo da twikwa kuJehova, opo di mu fimanekife.*

4 Otava ka tungulula oikulukuma yonale;

Otava ka tungulula eenhele domonakudiwa, odo da ninga omaputu,

Notava ka tungulula oilando, oyo ya hanaunwa po,

Eenhele odo da kala omaputu okudja kepupi nepupi.

5 “Ovanailongo otava ka fikama nokulifa omaufita eni,

Novanailongo otava ka longa omapya eni noikunino yeni yomandjebele.

6 Ndele nye, nye otamu ka ifanwa ovapristeri vaJehova;

Otave ke mu ifana ovayakuli vaKalunga ketu.

Otamu ka lya omamona oiwana,

Notamu ke litangela efimano* layo.

7 Ponhele yohoni, otamu ka kala mu na oshitukulwa lwomapa avali,

Noponhele yelengwa, otava ka hafa unene omolwoshitukulwa shavo.

Heeno, otava ka kala ve na oshitukulwa lwomapa avali medu lavo.

Ehafo laalushe otali ka kala lavo.

8 Osheshi Ame, Jehova, ondi hole ouyuki;

Ondi tonde omunyeki nosho yo okuhenouyuki,

Ohandi ke va pa filufilu ondjabi yavo,

Nohandi ka ninga ehangano laalushe navo.

9 Oludalo lavo otali ka shiivika mokati koiwana,

Noludalo lavo omokati kovanhu.

Aveshe ovo tave ke va mona otave ke va dimbuluka,

Kutya ovo oludalo, olo la nangekwa noupuna kuJehova.”

10 Ohandi ka hafa unene omolwaJehova.

Ounhu wange* aushe otau ka hafa omolwaKalunga kange.

Osheshi okwa dika nge oikutu yexupifo;

Okwa tonyena nge moshikutu* shouyuki,

Ngaashi omuhomboli oo a djala elapi lokulimanga komutwe, olo la fa lomupristeri,

Nongaashi omuhombolwa, oo e lifeweka noinima yaye yokufeweka.

11 Osheshi ngaashi edu tali menifa oimeno yalo,

Nongaashi oshikunino tashi menifa eembuto dasho,

Osho yo Omwene Omunamapangelo aeshe, Jehova,

Ta ka ningifa ouyuki nefimano li twapuke moipafi yoiwana aishe.

62 Itandi kala nda mwena omolwaSion,

Noitandi kala nda mwena omolwaJerusalem,

Fiyo osheshi ouyuki washo wa vilima ngaashi ouyelele wa twa,

Nexupifo lasho la tema ngaashi onyika.

2 “Oiwana otai ka mona ouyuki woye, ove omukainhu,

Neehamba adishe oshinge shoye.

Noto ka ifanwa edina lipe,

Olo okanya kaJehova taka ka yandja.

3 Oto ka ninga oshikoroni shewapalo meke laJehova,

Nelapi lokulimanga komutwe lomouhamba meke laKalunga koye.

4 Ove ito ka ifanwa vali omukainhu omuhengwa,

Nedu loye itali ka tiwa vali eputu.

Ashike oto ka ifanwa Ehafo Lange Oli Li Muye,

Nedu loye otali ka ifanwa Omuhombolwa.

Osheshi Jehova ota ka kala e ku hokwa,

Nedu loye otali ka kala ngaashi omuhombolwa.

5 Osheshi ngaashi ashike omulumenhu omunyasha ta hombola okakadona elela,

Ovanamati voye otave ke ku hombola.

Ehafo olo omuhomboli ha hafele nalo omuhombolwa,

Kalunga koye osho ta ka kala e ku hafela.

6 Kombada yomakuma oye, ove Jerusalem, onda tula ko ovanangeli.

Omutenya aushe noufiku aushe, kave na okukala va mwena nandenande.

Ove ou ho tumbula Jehova,

Ino fuwa po,

7 Noino mu fuwifa, fiyo osheshi a pameka Jerusalem,

Heeno, fiyo osheshi e shi ninga efimano lokombada yedu.”

8 Jehova okwa ana neke laye lokolulyo, nokwooko kwaye ku na eenghono, a ti:

“Itandi ka yandja vali oilya yoye kovatondi voye,

Novanailongo itava ka nwa vali omaviinyu oye mape, oo we likolela noudjuu.

9 Ashike ovo tave ke i ongela ovo tave i li, notava ka tanga Jehova;

Naavo tave ke a kola otave ke a nwina momikala dange diyapuki.”

10 Piteni, piteni moivelo.

Wapalekeleni ovanhu ondjila.

Tungeni, tungeni ondjila ya kula.

Kufei mo emanya.

Dikileni ovanhu edidiliko.*

11 Tala! Jehova okwa shiivifa fiyo okominghulo dedu ta ti:

“Lombweleni omonakadona waSion,

‘Tala! Exupifo loye otali uya.

Tala! Ondjabi yaye oi li puye,

Nofuto, oyo ha futu, oi li koshipala shaye.’”

12 Otava ka ifanwa ovayapuki, ovo va kulilwa kuJehova,

Noto ka ifanwa Oshilando Osho Kalunga a Konga, Oshilando Osho Inashi Haulukwa.

63 Olyelye ou te uya ta di kuEdom,

Ta di kuBosra a djala oikutu yomaluvala a twa,*

Ou a djala oikutu iwa elela,

Ta ende omolweenghono daye dinene?

“Aame Ou handi popi pauyuki,

Ou e na eenghono dinene dokuxupifa.”

2 Omolwashike oikutu yoye itilyana,

Nomolwashike oikutu yoye ya fa yaao ta lyatauka moshikolelo shomaviinyu?

3 “Onda kola omaviinyu aame andike.

Nokapa li nande oumwe womovanhu a li naame.

Onda kala handi va tyanghaula omolwehandu,

Nonda kala handi va lyataula omolwonya.

Oikutu yange oya shishila ohonde yavo,

Nonda nyateka oikutu yange aishe.

4 Osheshi efiku longhone oli li momutima wange,

Nomudo wovakulilwa vange owe ya.

5 Onda talaatala, ndele kapa li umwe a kwafela nge;

Onda li nda kumwa, eshi pehe na oo ta yambidida nge.

Onghee okwooko kwange okwa etela nge exupifo,*

Nehandu lange mwene ola yambidida nge.

6 Onda lyataula ovanhu omolwehandu lange,

Onde va kolwifa nonya yange,

Nonda tilashi ohonde yavo medu.”

7 Ohandi ka tumbula oilonga yaJehova yohole i na oudiinini,

Okutanga oilonga yaJehova,

Omolwaashishe osho Jehova e tu ningila,

Oinima ihapu iwa, oyo a ningila eumbo laIsrael,

Omolwonghenda yaye nosho yo ohole yaye inene i na oudiinini.

8 Osheshi okwa ti: “Oshili, ava ovanhu vange, ovanamati, ovo itava ka kala vehe fi ovadiinini.”*

Onghee okwa ninga Omuxupifi wavo.

9 Pefimbo lomaudjuu avo aeshe, osha li she mu wilila po.

Nomutumwa waye mwene* okwe va xupifa.

Omolwohole nolukeno laye, okwe va kulila,

Nokwe va yambula po noku va humbata omafiku avo aeshe onale.

10 Ashike ove mu tukululila oshibofa nova nyikifa oluhodi omhepo yaye iyapuki.

Opo nee okwa ninga omutondi wavo,

Nokwe va lwifa.

11 Nova dimbuluka omafiku onale,

Omafiku opefimbo lomupiya waye Moses, tava ti:

“Ou e va kufa mefuta pamwe novafita voufita waye oku li peni?

Ou a tula omhepo yaYe iyapuki muye oku li peni,

12 Ou a ningifa okwooko kwaye kwa tumbala ku ye neke lokolulyo laMoses,

Ou a tukula omeva moipafi yavo,

E liningile edina laalushe,

13 Oo e va ningifa va ende momeva taa ndwafuka,*

Opo va dule okweenda nopehe na okupunduka,

Ngaashi onghambe i li moluhaela?*

14 Ngaashi ashike oufita tau i mefilu,

Omhepo yaJehova oye va tulumukifa.”

Osho wa wilika ovanhu voye ngaho,

U liningile edina la fimana.*

15 Tala pedu okudja meulu, ndele to mono

Okudja konhele yoye iyapuki yopombada ya tumbala nosho yo iwa.*

Ouladi woye neenghono doye odi li peni,

Oumbangi u na sha nolukeno loye* nosho yo onghenda yoye?

Onde i anyenwa.

16 Osheshi oove Tate yetu;

Nonande Abraham otashi dulika ehe tu shii,

Na Israel otashi dulika ehe tu dimbuluke,

Ove, O! Jehova, oove Tate yetu,

Omukulili wetu okudja nale olo edina loye.

17 Omolwashike ove, akutu! Jehova, ho tu efa* tu yapuke mo meendjila doye?

Omolwashike ho efa* omitima detu di kukute, opo tuha kale twe ku tila?

Aluka omolwovapiya voye,

Omapata efyuululo loye.

18 Ovayapuki voye ova kala mo ashike efimbo linini.

Ovatondi vetu ova lyataula onhele yoye iyapuki.

19 Osheshi otwa kala ngaashi ovo ino pangela nandenande oule wefimbo lile,

Ngaashi ovo inava lukilwa edina loye nandenande.

64 Ngeno owa pombaulile eulu, ndele to uya pedu,

Opo eemhunda di kakame omolwoye,

2 Ngaashi omundilo tau xwike oixwapata,

Nomundilo tau fulukifa omeva,

Ngeno edina loye ola shiivika kovatondi voye,

Noiwana ngeno oya kakama koshipala shoye!

3 Eshi wa longa oikumwifilonga, oyo twa li inatu teelela,

Owe uya pedu, neemhunda oda kakama koshipala shoye.

4 Okudja nale, kape na oo a uda, ile a pwilikina,

Nokape na eisho la mona Kalunga, kakele kwoove,

Ove ou ho katuka ponhele yaavo hava kala ve mu teelela.*

5 Owa shakena naavo hava longo nehafo osho sha yuka,

Ovo have ku dimbuluka, nohava shikula eendjila doye.

Tala! Owa li wa handuka, eshi twa twikila okunyona,

Otwa kala hatu ningi ngaho oule wefimbo.

Mbela paife natu xupifwe?

6 Naatushe otwa ninga ngaashi omunhu, oo ina koshoka,

Noilonga yetu aishe youyuki oi li ngaashi oshilapi shi na ohonde yomafimbo.

Atushe ohatu ka lemba ngaashi efo,

Nomapuko etu otae ke tu twaalela ngaashi omhepo.

7 Kape na ou ta ifana edina loye;

Kape na ou ta fikama, a kanyatele kwoove,

Osheshi owe tu holeka oshipala shoye,

Nowe tu ningifa tu xule* po omolwomapuko etu.*

8 Ashike paife, O! Jehova, oove Tate yetu.

Fye elova, naave Omumi wetu;*

Fye atushe oilonga yeke loye.

9 Ino kala wa handuka unene, O! Jehova,

Noino dimbuluka omanyono etu fiyo alushe.

Alikana, tu tala, osheshi fye atushe ovanhu voye.

10 Oilando yoye iyapuki oya ninga ombuwa.

Sion okwa ninga ombuwa,

Jerusalem edu la kukuta.

11 Eumbo* letu liyapuki, nola fimana,*

Omo ootatekulululwa ve ku tangela,

Ola xwikwa po nomundilo,

Noinima aishe, oyo twa li twa lenga, oya ninga oikulukuma.

12 Okutala kwaasho, mbela oto ka kala we lipwililika, O! Jehova?

Mbela oto ka kala wa mwena noku tu efa tu fininikwe nonyanya?

65 “Onda efa ndi kongwe kwaavo inava pula kombinga yange;

Onda efa ndi monike kwaavo inava konga nge.

Onda ti, ‘Aame ou, aame ou!’ koshiwana osho sha li ihashi ifana edina lange.

2 Efiku keshe, onda yelulila omake ange ovanhu, ovo ve na omitwe dikukutu,

Kwaavo hava ende mondjila, oyo ihe fi iwa,

Tava shikula omadiladilo avo vene;

3 Ovanhu, ovo hava handukifa nge alushe koshipala shange,

Tava yambele moikunino nokuningila omatwiminoyambo keedopi.

4 Ohava kala omutumba mokati keembila,

Nohava nangala oufiku meenhele da hondama,*

Tava li ombelela yoingulu,

Nomunghoka woinima itondifa* ou li momatiti avo.

5 Ohava ti, ‘Kala oko; ino uya kwaame,

Osheshi ame ondimuyapuki ndi ku dule.’*

Ou omwifi tau di momayulu ange, omundilo tau xwike efiku alishe.

6 Tala! Osha shangwa moipafi yange;

Itandi kala nda mwena,

Ashike ohandi ke va shunifila,

Ohandi ke va shunifila pauyadi,*

7 Omolwomapuko avo nomolwomapuko ooxekulululwa,”

“Osheshi ova ningila omatwiminoyambo keemhunda,

Nova shekela nge koikulundudu,

Tete, ohandi ke va yelekela ondjabi yavo pauyadi,”* Jehova osho ta ti.

8 Eshi osho Jehova ta ti:

“Ngaashi ashike omaviinyu mape haa di meshila lomandjebele,

Naumwe ota ti, ‘Ino li nyonauna po, osheshi mulo omu na sha shiwa,’*

Naame osho handi ka ninga omolwovapiya vange;

Aveshe itandi ke va hanauna po.

9 Ohandi ka kufa oludalo muJakob,

NomuJuda oyoo ta ka fyuulula eemhunda dange;

Ovahoololwa vange otave ke shi nangala,

Novapiya vange otava ka kala mo.

10 Sharon otashi ka ninga oulifilo weedi,

Nefilu laAkor onhele yokwoombela eengobe,

Omolwovanhu vange, ovo tava kongo nge.

11 Ashike ove ou li mokati kaavo tave liteeka Jehova,

Ovo tava dimbwa omhunda iyapuki,

Ovo tava longekidile kalunga kElao oshitaafula,

Naavo hava yadekele kalunga kOnakwiiwa omaholo omaviinyu a lumbakanifwa.

12 Onghee ohandi mu yandje keongamukonda,

Naamushe otamu ka twa eengolo, mu dipawe,

Molwaashi onda ifana, ashike inamu nyamukula,

Onda popya, ashike inamu pwilikina;

Omwa twikila okulonga osho shii momesho ange,

Nomwa hoolola osho inashi wapalela nge.”

13 Onghee hano, eshi osho Omwene Omunamapangelo aeshe, Jehova, ta ti:

“Tala! Ovapiya vange otava ka lya, ndele nye otamu ka fya ondjala.

Tala! Ovapiya vange otava ka nwa, ndele nye otamu ka fya enota.

Tala! Ovapiya vange otava ka hafa, ndele nye otamu ka fya ohoni.

14 Tala! Ovapiya vange otava ka hafa unene omolwehafo lokomutima,

Ndele nye otamu ka lila omolwouyehame wokomutima,

Notamu ka kwenauka omolwomhepo ya nyanyauka.

15 Otamu ka fiya po edina, olo ovahoololwa vange tava ka longifa onga efingo,

NOmwene Omunamapangelo aeshe, Jehova, ota ka dipaa keshe umwe womunye,

Ashike ovapiya vaye mwene ote ke va ifana nedina limwe;

16 Onghee keshe oo te likongele enangekonoupuna kombada yedu,

Ota ka nangekwa noupuna kuKalunga koshili,*

Nakeshe oo ta ningi eano kombada yedu,

Ota ka ana kuKalunga koshili.*

Osheshi omaudjuu* onale otaa ka dimbiwa;

Otaa ka holekwa omesho ange.

17 Osheshi tala! Ame ohandi shiti eulu lipe nedu lipe;

Noinima ikulu itai ke uya vali momadiladilo,*

Noitai ke uya vali momutima.

18 Onghee nyakukweni nokuhafela osho handi shiti fiyo alushe.

Osheshi tala! Ame ohandi shitile Jerusalem osheetifi shehafo,

Novanhu vasho osheetifi shenyaku.

19 Nohandi ka hafela Jerusalem nokunyakukilwa ovanhu vange;

Nomusho itamu ka udika vali ondaka yekweno, ile yelilo omolwoudjuu.”

20 “Monhele oyo itamu ka kala vali okahanana, oko taka kala ko ashike omafiku manini,

Nomunamido ita ka fya, ofimbo ina mana ko omafiku aye.

Osheshi keshe oo ta ka fya e na eedula efele ota ka talika ko okaana,

Nomunyoni ota ka fingwa, nonande oku na eedula efele.*

21 Otava ka tunga omaumbo, ndele tava kala mo,

Notava ka ninga oikunino yomandjebele, ndele tava li oiimati yayo.

22 Itava ka tunga, mu kale hamu di vamwe,

Noitava ka twika, vamwe va lye.

Osheshi omafiku ovanhu vange otaa ka kala ngaashi omafiku omuti,

Novahoololwa vange otava ka hafela pauyadi oilonga yomake avo.

23 Itave ke lilolola* epwanga,*

Nounona vavo itave ke va dala vali va kale tava mono oixuna,

Molwaashi ovo oludalo laavo va etwa po kwaavo va nangekwa noupuna kuJehova,

Nomaludalo avo oku li puvo.

24 Nokuli ofimbo inava ifana, ohandi ka nyamukula;

Ofimbo natango tava popi, ohandi ka uda ko.

25 Embungu nodjona otai ka lila pamwe,

Onghoshi otai ka lya omwiidi ngaashi ashike ongobe yomhedi,

Noikulya yeyoka otai ka kala ondwi.

Itai ka eta oshiponga, ile i etife oupyakadi washa komhunda yange aishe iyapuki,” Jehova osho ta ti.

66 Eshi osho Jehova ta ti:

“Eulu olo olukalwapangelo lange, nedu olo oshilyatelo sheemhadi dange.

Eumbo, olo tamu tungile nge, oli li peni,

Nonhele yange yokutulumukila oi li peni?”

2 “Eke lange mwene olo la shita oinima aishe ei,

Naaishe osho ye uya po ngaha,” Jehova osho ta ti.

“Onghee ohandi ka tala kwaau,

Oo omulininipiki noku na omhepo ya nyanyauka, oo ha kakama* kondjovo yange.

3 Ou ta tomo ongobe yomhedi ongaashi ou ta dipaa omunhu.

Ou ta yambe odi ongaashi ou ta teya ofingo yombwa.

Ou ta yandje oshali . . . ongaashi ohonde yoshingulu!

Ou ta yambe edimbulukifoyambo leka ledimba liwa ongaashi ou ta nangeke noupuna neendjovo doumhulile.*

Ohava hoolola eendjila davo vene,

Nohava hafele* osho shitondifa.

4 Onghee ohandi ka hoolola eenghedi, omo handi va handukile,

Nohandi ke va etela oshinima keshe, osho hava tila.

Molwaashi eshi nda ifana, kape na umwe a nyamukula;

Eshi nda popya, kapa li umwe, oo a pwilikina.

Ova twikila okuninga osho shii momesho ange,

Nova hoolola okuninga osho itashi wapalele nge.”

5 Pwilikineni ondjovo yaJehova, nye ovo hamu kakama* kondjovo yaye, oyo tai ti:

“Ovamwaxo ovo ve mu tonde nohave mu tongola omolwedina lange, ova ti, ‘Jehova na tumbalekwe!’

Ashike ote ke uya, note ke mu etela ehafo,

Ndele vo otava ka fifwa ohoni.”

6 Moshilando omu uditike ondaka yeuyaano, ondaka tai di kotembeli!

Ondaka oyo oyaJehova ta shunifile ovatondi vaye osho ve lilongela.

7 Okwa dala, ofimbo ina fetwa.

Okwa dala okaana okamati, ofimbo ina hangwa kouyehame woshifeta.

8 Olyelye a uda nale oshinima sha tya ngaho?

Olyelye a mona oinima oyo?

Mbela oshilando otashi ka dalwa tuu mefiku limwe?

Ile mbela oshiwana ashishe otashi ka dalwa poshikando?

Diva ashike eshi Sion a hangwa koshifeta, okwa dala ovanamati vaye.

9 “Mbela ohandi etifa okudala popepi, ndele handi ku kelele?” Jehova osho ta ti.

“Ile mbela ohandi etifa okaana poshivelo, ndele handi pate oshidalelo?” Kalunga koye osho a ti.

10 Hafeni pamwe naJerusalem nokunyakukwa pamwe nasho, amushe ovo mu shi hole.

Hafeni unene pamwe nasho, amushe ovo mwa nyika oluhodi omolwasho,

11 Osheshi otamu ka nyama, notamu ka kutifwa filufilu komavele asho ehekeleko,

Notamu ka nwa filufilu nokumona ehafo linene mefimano lasho.

12 Osheshi eshi osho Jehova ta ti:

“Ohandi ka hapupalifa ombili yasho ngaashi ashike omulonga,

Nefimano loiwana ngaashi efundja tali kunguluka.

Otamu ka nyama, notamu ka humbatelwa monghwapa,

Notamu ka tembulilwa komatundji.

13 Ngaashi ashike omudalakadi ta hekeleke omonamati,

Osho handi ka kala noku mu hekeleka;

Notamu ka hekelekwa omolwaJerusalem.

14 Eshi otamu ke shi mona, nomitima deni otadi ka hafa;

Omakipa eni otaa ka hapa, ngaashi ashike omwiidi mutalala.

Neke* laJehova otali ka shiivika kovapiya vaye,

Ashike ovatondi vaye ote ke va tokola.”

15 “Osheshi Jehova ote ke uya ngaashi omundilo,

Nomatemba aye ongaashi oshikungulu shomhepo,

E va shunifile a fula onya,

A hanyene nomalaka omundilo.

16 Osheshi Jehova ota ka tokola nomundilo,

Heeno, neongamukonda laye, ota ka tokola ombelela aishe;*

Noonakudipawa kuJehova otava ka kala vahapu.

17 “Ovo have liyapula vo vene nosho yo have likoshola vo vene, opo va ye moikunino* tava shikula oo e li pokati, ovo hava li ombelela yoingulu nosho yo oinima itondifa neemhuku, aveshe otava ka xula po oshita,” Jehova osho ta ti. 18 “Molwaashi ondi shii oilonga yavo nomadiladilo avo, ohandi uya, ndi ongele ovanhu vomoiwana novomomalaka aeshe, notave ke uya nokumona oshinge shange.”

19 “Ohandi ka tula edidiliko mokati kavo, nohandi ka tuma vamwe ovo va ya onhapo koiwana, kuTarsis, kuPul nokuLud, ovo va lukila outa kuTubal naJavan nosho yo kounhunhu vokokulekule, ovo inava uda onghundana kombinga yange, ile inava mona oshinge shange; notava ka udifila oiwana efimano lange. 20 Otava ka eta ovamwaxo aveshe okudja moiwana aishe onga oshali kuJehova, ve li keenghambe, momatemba, momatemba a uvikwa, komamwili nosho yo keengamelo hadi tondoka onhapo yoshidudu, komhunda yange iyapuki, Jerusalem,” Jehova osho ta ti, “ngaashi ashike ovanhu vomuIsrael va li hava eta oshali i li moshikwatelwa sha yela keumbo laJehova.”

21 “Ohandi ka kufa mo yo vamwe va ninge ovapristeri nosho yo Ovalevi,” Jehova osho a ti.

22 “Ngaashi ashike eulu lipe nedu lipe, olo handi shiti, tali ka kala fiyo alushe koshipala shange,” Jehova osho ta ti, “osho yo oludalo leni nosho yo edina leni tali kala fiyo alushe.”

23 “Nokudja komwedi mupe fiyo okomwedi mupe nosho yo okudja keshabata fiyo okeshabata,

Ombelela aishe* otai ke uya mo, i linyongamene* nge,” Jehova osho a ti.

24 “Notava ka ya nokutala omidimba dovalumenhu, ovo va tukululila nge oshibofa;

Osheshi omainyo, oo e li kuvo, itaa ka fya,

Nomundilo wavo itau ka dimwa,

Notava ka kala oshinima shitondifa kovanhu aveshe.”*

Tali ti “Exupifo laJehova.”

Ile “mwene waye.”

Eln., “finwa.”

Ile “etwali.”

oshinima sha fela koitila.

Ile “ovapangeli ovakwanyanya.”

Ile “kelombwelo.”

Ile “Omwenyo wange owa.”

Ile “wofiye.”

Ile “o-snow.”

Ile “Noilya yo-wheat yobiila.”

Ile “eefiye.”

Tashi dulika omiti noikunino oyo i na ekwatafano nokulongela oikalunga.

Okalapi ka fa ongodi oyo hai temifa.

Ile “Momafiku axuuninwa.”

Ile “elombwelo.”

Ile “pukulula oinima.”

Ile “ninipikwa.”

Ile “koludi leemhuku dinini molutu.”

Ile “Oo omufudo waye u li momayulu aye.”

Ile “Novatengauki.”

Ile “omuveluli weni.”

Eln., “momesho oshinge shaye.”

Ile “eemwenyo davo.”

Eln., “Otava ka lya oiimati yoilonga yavo.”

Eln., “va nana mo eefingo (ominino).”

Ile “eemwiya.”

Eln., “Omaumbo omwenyo.”

Ile “oinima yokufeweka ya longwa moipeta yeengholokofya.”

Ile “noidjalomwa yokoshi.”

Sha hala okutya, ohoni yokukala ino hombolwa nouhe na okaana.

Eln., “omatudi.”

Ile “yokukombolola po.”

Ile “oikunomwa.”

Eln., “eespana omulongo,” sha hala okutya, oshitukulwa shepya osho tashi dulu okupululwa keespana omulongo deenhani mefiku.

Tala Oshiwedelwako B14.

Ile “Sheol,” sha hala okutya, kOufi. Tala Omafatululo oitya.

Ile “omwenyo wayo.”

Ile “Nomalenga asho.”

Ile “kouyuki.”

Ile “Etokolo; Omayele.”

Ile “elombwelo.”

Ile “opala yedidiliko.”

Ile “okwa kulikwa.”

Ile “eenghoshi deendume eenyasha.”

Eln., “Ye.”

Eln., “kondaka yaao ta ingida.”

Eln., “Onda mwenekwa.”

Ile tashi dulika, “inava.”

Tali ti “Oshixupe ashike tashi ka shuna.”

Ile “yomukangha womeva.”

Ile tashi dulika, “noku shi piyaaneka.”

Ile “nokutwa omakuma asho ombululu.” Eln., “noku shi panuna.”

Ile “Sheol,” sha hala okutya, kOufi. Tala Omafatululo oitya.

Ile “ina hombolwa.”

Tali ti “Kalunga oku li pamwe nafye.”

Sha hala okutya, Eufrat.

Eln., “noshishangifo shomunhu oo ehe kwete okufya.”

Tashi dulika tali ti “Okulihakana oixuulwa, Okuuya neendelelo komamona.”

Ile “popile; pameke.”

Eln., “ya popepi.”

Sha hala okutya, omukulukadi waJesaja.

Siloa okwa li omukangha womeva.

Sha hala okutya, Eufrat.

Tala Jes 7:14

Ile “Kaleni mwa homata.”

Outumbulilo wOshiheberi oo u lile po “Kalunga oku li pamwe nafye,” oImmanuel. Tala Jes 7:14; 8:8.

Ile “wepameko.”

Ile “elombwelo.”

Ile “nokuteelela nodjuulufi.”

Ile “wepameko.”

Eln., “eluwa.”

Ile “omaliko oo a xupa po konima yolwoodi.”

Ile “Nepangelo; Nepangelo lomonamati wohamba.”

Ile “Epangelo; Epangelo lelenga.”

Ile “Omisikamore.”

Eln., “okudja konima.”

Ile tashi dulika, “epokolo lomulunga nolumbungu.”

Ile “eefiye davo.”

Ile “omaliko oo a xupa po konima yolwoodi.”

Ile “eefiye.”

Ile “lehandukilo.”

Ile “efimano.”

Eln., “ame.”

Ile “okudja komwenyo fiyo okombelela.”

Ile “Nehandukilo.”

Ile “nekuva.”

Ile “yovalininipiki.”

Ile “nomhepo.”

Ile “onghoshi yondume onyasha.”

Ile tashi dulika, “Nokatana nonghoshi otai ka lila pamwe.”

Ile “opala yedidiliko.”

Ile “Oiwana otai ke mu konga.”

Sha hala okutya, Babilon.

Ile “opala yedidiliko.”

Eln., “kepepe.”

Ile “ulikila eenghono davo.”

Ile tashi dulika, “kukutika.”

Eln., “elaka.”

Sha hala okutya, Eufrat.

Ile tashi dulika, “Ote ke u denga.”

Ile “nomhepo.”

“Jah” exupipiko ledina Jehova.

Ile “shikileni omusika.”

Eln., “ovakalimo elela,” tashi ulike kovakalimo, unene tuu ovakainhu.

Ile “opala yedidiliko.”

Eln., “kovayapulwa vange.”

Eln., “nosho yo eengudu deenyofi daKesil,” tashi dulika tashi ulike komukongo neengudu deenyofi, odo de mu dingilila.

Ile “ewapalo.”

Ile tashi dulika, “Noikombo oyo ya fa eendemoni.”

Ile “Ote ke va pa etulumuko.”

Ile “ovayandji vavo voilonga.”

Ile “esheko.”

Ile “Omuyandji woilonga.”

Ile “Sheol,” sha hala okutya, kOufi. Tala Omafatululo oitya.

Eln., “Oikombo yoindume.”

Ile “Sheol,” sha hala okutya, kOufi. Tala Omafatululo oitya.

Eln., “omeumbo.”

Ile “oshitai.”

Eln., “omayele, oo a tokolelwa.”

Ile “le lilongekida okudenga.”

Ile “eyoka li na oudiyo hau endelele.”

Ile “kotembeli.”

Ile “Omwenyo waye.”

Ile “oitai yao ya papata omandjebele atilyana.”

Ile tashi dulika, “molwaashi euyaano ola xula po koiimati yoye yopokwenye noketeyo loye.”

Ile “Da valulwa nawanawa ngaashi omunailonga, oo a kutwa ha ningi”; sha hala okutya, moule naanaa weedula nhatu.

Eln., “lovanamati vaIsrael.”

Eln., “Neondo lombelela yaye.”

Tala Omafatululo oitya.

Ile “iwa.”

Ile “kalunga wokoilongo.”

Ile “Ngaashi oshimbodi shongaho.”

Eln., “Koshiwana she likalekelwa, nosha kosholwa.”

Ile “Koshiwana shi na eenghono dinene, osho hashi lyataula.”

Ile “opala yedidiliko.”

Eln., “koshiwana she likalekelwa, nosha kosholwa.”

Ile “koshiwana shi na eenghono dinene, osho hashi lyataula.”

Ile “nyikifwa oluhodi komwenyo.”

Ile “aMefis.”

Ile tashi dulika, “epokolo lomulunga, ile olumbungu.”

Ile “ondjai.”

Ile “e li ashike mokambulukweva kokoshi.”

Ile “ohoni.”

Ile “oo va lenga ouwa waye.”

Tashi dulika tashi ulike koshitukulwa shaBabilon shonale.

Eln., “eenho dange tadi luluma neenghono.”

Ile “xweni.”

Eln., “Omonamati.”

Tali ti “Okumwena.”

Ile “da valulwa nawanawa ngaashi omunailonga oo a kutwa ha ningi”; sha hala okutya, moule naanaa wodula.

Sha hala okutya, tashi ulike kuJerusalem.

Oshitevo shokunhupeka, tashi dulika tashi holola onghenda, ile oukwao wananghali.

Ile “ovalondinghambe.”

Ile “longekida.”

Ile “Novalondinghambe.”

Ile “Neameno.”

Ile “ombala.”

Eln., “yolukalwa.”

Ile “epangelo.”

Eln., “ondjudo.”

Ile “oludi.”

Eln., “Ombuto.”

Sha hala okutya, onyapi yomulonga waNil.

Eln., “oukadona elela.”

Ile tashi dulika, “etuliloshikepa.”

Eln., “omafiku.”

Ile “medu.”

Ile “Ota taalelifa oshipala shasho pedu.”

Ile tashi dulika, “kukuta.”

Ile “lonale.”

Ile tashi dulika, “kukuta.”

Ile “kouninginino.”

Ile “shokoushilo.”

Ile “Ewapalo.”

Eln., “moipafi yovakulunhu vaye.”

Ile “pangela.”

Ile “shomaviinyu a kalekwa konhafi.”

Eln., “pona po.”

Ile “Neluviluvi.”

Ile “xulifa po.”

Ile tashi dulika, “ovo ve na omadiladilo ihaa tengauka.”

“Jah” exupipiko ledina Jehova.

Ile “lalakana.”

Ile “Neemwenyo detu otwa.”

Sha hala okutya, Kalunga nosho yo edina laye nali dimbulukiwe, nali shiivifwe.

Ile “nomwenyo wange.”

Ile “laavo hava longo osho sha yuka.”

Eln., “Oshimhu shange.”

Ile tashi dulika, “omume yoihemba.”

Ile “otali ka dala ovo va fya.”

Ile “etokolo.”

Tala Omafatululo oitya.

Tashi dulika tashi ulike kuIsrael, apa osha nhupekwa onga omukainhu nosha faafanifwa noshikunino shomandjebele.

Tala Omafatululo oitya.

Sha hala okutya, Eufrat.

Tashi dulika tashi ulike koshilandopangelo Samaria.

Ile “shelinenepeko; shounhwa.”

Ile “yelinenepeko; younhwa.”

Ile “Ongodi yokuyeleka nongodi yokuyeleka, ongodi yokuyeleka nongodi yokuyeleka.”

Eln., “ve na omilungu.”

Ile “Ongodi yokuyeleka nongodi yokuyeleka, ongodi yokuyeleka nongodi yokuyeleka.”

Ile “Sheol,” sha hala okutya, kOufi. Tala Omafatululo oitya.

Ile tashi dulika, “kuma emoniko.”

Ile “ongodi yokutunga.”

Ile “Sheol,” sha hala okutya, kOufi. Tala Omafatululo oitya.

Ile tashi dulika, “Ngeenge va udu ko, otava ka kwatwa koumbada neenghono.”

Ile “edu alishe.”

Ile “okalya ko-spelt.”

lle “pe outekuduliko; pukulula.”

Ile “elalakano.”

Ile “Naao e na ounongo munene tau longo.”

Tashi dulika tali ti “Oaltari yomundilo waKalunga,” tashi dulika tashi ulike kuJerusalem.

Eln., “lovaendanandjila.”

Ile “nomwenyo waye kau na sha.”

Ile “nomwenyo waye owa notelwa.”

Ile “omayele.”

Ile “Inamu puka tuu!”

Ile “Ovalininipiki.”

Eln., “oo ta pukulula.”

Sha hala okutya, kohoni nosho yo kenyemato.

Eln., “hava tileshi oshikunwa onga eyambo,” sha hala okutya, tashi ulike kokuninga eudafanotwokumwe.

Ile “inava pula okanya kange.”

Eln., “mohotengulu yaFarao.”

Ile “eyoka li na oudiyo hau endelele.”

Ile “elombwelo.”

Eln., “tai i omufenhu.”

Ile tashi dulika, “mondungu.”

Ile “okwa kala a teelela.”

Ile “ve mu teelela nodjuulufi.”

Ile “oihongwafano yoshivela sha hemunwa.”

Ile tashi dulika, “notamu ka tya kuyo oitondifa.”

Eln., “oinghene nomaadi a wana.”

Ile “Omufudo.”

Eln., “noshifififo shongaho.”

Ile “liyapulile.”

Ile “kewi.”

“Tofet” apa osha longifwa shi li onhele yopafaneko yokuxwikila, tashi ulike kehanauno.

Ile “Nomovalondinghambe.”

Ile “onghoshi yondume onyasha.”

Ile “omundilo.”

Ile “yokuyaama.”

Ile “Ouhondameno.”

Ile “lihumbate monghedi ya puka.”

Ile “omwenyo waao a fya ondjala.”

Ile “mangulula.”

Ile “eenghono.”

Ile “omaliko oo a xupa po konima yolwoodi.”

Tashi ulike komutondi.

Ile tashi dulika, “kukuta.”

Ile “Eameno la shiya ko.”

Ile “dilonga.”

Ile “eefuto odo hadi pewa eehamba.”

Eln., “likukutu.”

Ile “omaliko oo a xupa po konima yolwoodi.”

Ile “nakukala mo.”

Ile “kunguluka.”

Tashi dulika tashi ulike kuBosra, oshilandopangelo shaEdom.

Sha hala okutya, omunoko wa fa oo hau longifwa oteya.

Eln., “omamanya.”

Ile tashi dulika, “Noshikombo osho sha fa ondeemoni.”

Eln., “ole shi va tukulila nongodi yokumeta.”

Ile “oshidimba.”

Ile “elenga lomupindili.”

Ile “ombala.”

Ile “lOshisiria.”

Eln., “Ningeni enangekonoupuna naame, ndele tamu uya kwaame.”

Ile “ombala.”

Ile “letukano.”

Eln., “pokuyeulula oshidalelo.”

Eln., “omhepo muye.”

Eln., “i.”

Ile tashi dulika, “pokati.”

Ile “oukanala vaNil.”

Eln., “ningwa.”

Ile “ninga.”

Sha hala okutya, Hiskia.

Ile “osho osha mena okudja meemuma doilya.”

Ile “motembeli.”

Eln., “komafiku.”

Tashi dulika eetalapa, odo da li hadi longifwa okuvalula efimbo mokutala kutya omudidimbe ou li peni.

Ile “Eimbilo.”

Ile “Sheol,” sha hala okutya, kOufi. Tala Omafatululo oitya.

“Jah” exupipiko ledina Jehova.

Ile tashi dulika, “ewanye.”

Eln., “kala omupopili wange.”

Ile “limwenenena.”

Ile “oululu womwenyo wange.”

Sha hala okutya, eendjovo noilonga yaKalunga.

Ile “omwenyo wange.”

Ile “kufa po omanyono ange aeshe koshipala shoye.”

Ile “Sheol,” sha hala okutya, kOufi. Tala Omafatululo oitya.

Eln., “okwe va hafela.”

Ile “mombala.”

Ile “noshili.”

Eln., “pomafiku.”

Ile “Popyeni nonghenda.”

Ile “ole mu pa lwomapa avali.”

Ile “Longekideni.”

Ile “Novanhu aveshe.”

Ile “Ovanhu aveshe ovo.”

Ile “omhepo.”

Ile “ota ka lifa.”

Ile “eenomola.”

Oshinano osho shi li pokati komunwe wa kula nokamunwe kanini, ngeenge eke la xwaananekwa. Tala Oshiwedelwako B14.

Ile tashi dulika, “a uda ko.”

Ile “ita dulu okudja oikuni ya wana.”

Ile “oshihongwafano shoshivela sha hemunwa.”

Ile “kombada.”

Ile “ovapangeli.”

Ile “itau dulu okukonakonwa.”

Ile “eenghono dinene.”

Ile “Kaleni mwa mwena koshipala shange.”

Ile “e li koushilo.”

Sha hala okutya, e mu longele.

Sha hala okutya, uhe na ekwafo nomudinwa.

Ile “womu-ash.”

Eln., “yotete.”

Ile “i kume omitima detu.”

Ile “koushilo.”

Ile “ovapangeli veendodo dopedu.”

Ile “oshinima shihe po.”

Ile “oihongwafano yoshivela sha hemunwa.”

Ile “omwenyo wange we.”

Ile “elombwelo.”

Ile “Efimano lange ihandi li pe umwe e lili.”

Ile “medu lokomunghulofuta.”

Ile “koihongwafano yoshivela sha hemunwa.”

Ile “elombwelo.”

Ile “kelombwelo.”

Tashi dulika tashi ulike koinima yotete oyo tai ke uya monakwiiwa.

Ile “nokulineekela nge.”

Oshimbodi shedimba liwa.

Ile “oilonga younashibofa.”

Tashi dulika tashi ulike kovahongi vOmhango.

Ile “okudja pedalo.”

Tali ti “Omuyuki,” edinafimaneko laIsrael.

Ile “yedu la notelwa.”

Ile “omiti domi-poplar.”

Sha hala okutya, oihongwafano.

Ile “oshikalunga shoshivela sha hemunwa.”

Ile “noshihongifo.”

Ile “monhele iyapuki.”

Ile “oshiti sha kukuta.”

Ile “omwenyo waye.”

Ile “ovaprofeti ovanaipupulu.”

Eln., “yululule oiya.”

Eln., “ditika filufilu.”

Ile “Okudja koushilo fiyo okouninginino.”

Ile “pataneke.”

Ile “Oo e mu shita.”

Ile “Kwaao e li shita.”

Ile tashi dulika, “Ile mbela elova otali ka tya: ‘Oilonga yoye kai na oikwatifo’?”

Ile “Ou li mouyahame wokudala shike?”

Ile tashi dulika, “ovanailonga.”

Ile tashi dulika, “ovashingifi.”

Ile tashi dulika, “liha kale lihe na sha.”

Ile “oshimha.”

Sha hala okutya, oikalunga ya londekwa koinamwenyo.

Ile “Neemwenyo davo.”

Eln., “twile eengolo.”

Eln., “yotete.”

Ile “Omunaenghono.”

Ile “Elalakano; Omayele.”

Ile “koushilo.”

Ile “elalakano; omayele.”

Eln., “di na eenghono.”

Ile tashi dulika, “nakeshe oo handi ka shakeneka itandi ke mu fila onghenda. ”

Ile “ohambakainhu.”

Ile tashi dulika, “Nonande ou na ovalodi.”

Ile “Noito ka shiiva nghee u na oku u pungulula.”

Ile tashi dulika, “Ovo hava tukula eulu; ovanyanekeli veenyofi.”

Ile “eemwenyo davo.”

Eln., “koshitukulwa shaye.”

Ile tashi dulika, “ovo oludalo la dja.”

Eln., “yotete.”

Ile “oshikalunga shoshivela sha hemunwa.”

Ile “konakona.” Ile tashi dulika, “hoolola.”

Ile “Efimano lange ihandi li pe umwe e lili.”

Ile “pamwe nomhepo yaye.”

Eln., “okudja moshidalelo.”

Ile “Jehova ota ka yukipalifa nge.”

Ile “ofuto.”

Ile “e tondike komwenyo.”

Ile “lehalo liwa.”

Ile tashi dulika, “oikulundudu iyela.”

Ile “opala yedidiliko.”

Eln., “peenhulo.”

Eln., “Nombelela aishe.”

Ile “elaka la deulwa nawa.”

Ile tashi dulika, “okupameka.”

Eln., “nondjovo.”

Ile “kwaavo tave di shi li eendjedi.”

Ile “okukondjifa.”

Ile “taalelafane.”

Ile “nokuliameka.”

Ile “e mu eta po mouyahame woshifeta.”

Ile “eenghono.”

Oludi leemwe, olo la li la sha muEgipiti.

Ile “itau ka xula po.”

Ile “elombwelo.”

Ile tashi dulika, “Epuka.”

Tala Omafatululo oitya.

Eln., “otali ka kala kombada yomitwe davo.”

Ile “oo te ku dingilile.”

Eln., “koxulo yomapandavanda aeshe.”

Ile “komwenyo woye.”

Ile “eengodi.”

Ile “eisho neisho.”

Ile “yefindano.”

Ile “itadi ka kala di na eendjovo.”

Ile tashi dulika, “mwaasho twa uda.”

“Ye” otashi dulika ta ulike komutalinomesho, ile kuKalunga.

Ile “eholokepo laye inali likalekelwa, opo tu kale twe mu hokwa.”

Ile “a uda ko.”

Ile tashi dulika, “Okwa li a fa omunhu oo ovanhu va alula ko oipala yavo.”

Ile “Omolwefininiko.”

Ile “nonghedi yaye yokukalamwenyo?”

Ile “dipawa.”

Ile “Naumwe ota ka yandja ombila yaye.”

Eln., “omulumenhu oshipuna.”

Ile “owii washa.”

Ile “Ashike Jehova okwa hokwa.”

Ile “ehafo.”

Ile “Omolwoupyakadi womwenyo waye.”

Ile “omaliko oo a xupa po konima yolwoodi.”

Ile “ovana.”

Ile “mwene.”

Eln., “a ehamekwa momhepo.”

Ile “omomamanya omundilo.”

Ile “Novana.”

Ile “yovana.”

Ile “oimaliwa oyo mwa longela noudjuu.”

Ile “Neemwenyo deni.”

Eln., “oyo ya ondoka.”

Ile “neemwenyo deni.”

Ile “ota ka dimina po nehalo liwa.”

Ile “o-snow.”

Ile “ehalo lange.”

Ile “Otashi ka ningila edina.”

Sha hala okutya, mefyo.

Ile tashi dulika, “okudja moupyakadi.”

Sha hala okutya, mombila.

Ile “Mbela ohandi lihekeleke.”

Tashi dulika tashi ulike kokulongela oikalunga.

Ile tashi dulika, “kohamba.”

Ile “Sheol,” sha hala okutya, kOufi. Tala Omafatululo oitya.

Eln., “iho loloka.”

Ile “nokuholeka oinima.”

Ile “e li.”

Ile “eemwenyo detu.”

Ile “osho mwa hokwa.”

Eln., “Nohamu lidenge nongonyo youkolokoshi.”

Ile “omwenyo waye.”

Ile “omwenyo woye wa halelela.”

Ile “eemwenyo da fininikwa.”

Ile “Nota ka kutifa omwenyo woye.”

Eln., “eembululu.”

Eln., “alula ko omhadi yoye.”

Ile “osho u na ohokwe musho.”

Ile “u hafele.”

Eln., “djuupala.”

Ile “yongaho.”

Ile “ounashili.”

Ile “Ounashili.”

Eln., “nosha li shii momesho aye.”

Ile “efindano kuye.”

Ile “lefindano.”

Ile “okandjafa oko kehe na omaoko.”

Ile “okouyelele weluwa loye.”

Eln., “ove.”

Ile “eumbo lange lewapalo.”

Ile “poivelo yoikuku yado.”

Ile “da fa dotete.”

Ile “fimanekifa.”

Ile “omolwehalo liwa.”

Ile “ovalininipiki.”

Ile “wonghenda.”

Ile “tumbalekife.”

Ile “oupuna.”

Ile “Omwenyo wange.”

Ile “mokandjafa kehe na omaoko.”

Ile “opala yedidiliko.”

Ile tashi dulika, “itilyana pyu.”

Ile “efindano.”

Ile “itava ka kala ovanaipupulu.”

Ile “Nomweengeli, oo ha kala koshipala shaye.”

Ile “momeva male.”

Ile “mombuwa.”

Ile “liwa.”

Ile “ya wapala.”

Eln., “Ehandu loitukulwa yoye yomeni.”

Ile “ho tu ningifa.”

Eln., “ningifa.”

Ile “va teelela nelididimiko.”

Eln., “tu hengumuke.”

Eln., “keke lomapuko etu.”

Ile “Oove we tu shita.”

Ile “Otembeli.”

Ile “wapala.”

Ile tashi dulika, “meenduda dokunangela.”

Ile “inai koshoka.”

Ile tashi dulika, “Osheshi ohandi ke ku pa ouyuki wange.”

Eln., “meenhulo davo.”

Eln., “enangekonoupuna.”

Ile “koudiinini.” Eln., “Amen.”

Ile “omaupyakadi.”

Ile “dimbulukiwa.”

Ile tashi dulika, “Naao ta ka nyona e na eedula efele ota ka talika ko a fingwa.”

Ile “longa noudiinini.”

Ile “oshimha.”

Ile “e na oshisho.”

Ile tashi dulika, “umwe oo ta fimaneke oshikalunga.”

Ile “Neemwenyo davo ohadi hafele.”

Ile “mu na oshisho.”

Ile “Neenghono.”

Ile “ovanhu aveshe.”

Sha hala okutya, oikunino ye likalekelwa hai longifwa mokulongela oikalunga.

Ile “ovanhu aveshe.”

Ile “va longele.”

Eln., “kombelela aishe.”