JEREMIA
1 Edi eendjovo daJeremia,* omonamati waHilkia, umwe womovapristeri vomuAnatot, medu laBenjamin. 2 Ondjovo yaJehova oye uya kuye pefimbo laJosia, omonamati waAmon, ohamba yaJuda, momudo omuti-13 wepangelo laye. 3 Oye uya yo pefimbo laJehoiakim, omonamati waJosia, ohamba yaJuda, fiyo opexulilo lomudo omuti-11 waSedekia, omonamati waJosia, ohamba yaJuda, fiyo osheshi Jerusalem a ya moukwatwa momwedi omutitano.
4 Ondjovo yaJehova oye uya kwaame tai ti:
5 “Ofimbo inandi ku shitila moshidalelo, onda kala ndi ku shii,*
Onde ku ninga omuprofeti koiwana.”
6 Ashike onda ti: “Woo ame, akutu! Omwene Omunamapangelo aeshe, Jehova!
Kandi shii okupopya, osheshi ame okamatyona* ashike.”
7 Opo nee Jehova okwa lombwela nge ta ti:
“Ino tya, ‘Ame okamatyona ashike.’
Osheshi ou na okuya kwaaveshe ovo handi ku tumu kuvo,
Nou na okupopya keshe shimwe osho handi ku lombwele.
8 Ino kala wa tila omolweholokepo lavo,
Osheshi ‘Ame ondi li pamwe naave ndi ku xupife,’ Jehova osho ta ti.”
9 Opo nee Jehova okwa nana eke laye nokwa kuma okanya kange. Na Jehova okwa lombwela nge ta ti: “Onda tula eendjovo dange mokanya koye. 10 Tala, onde ku tula po nena eli kombada yoiwana nokombada yomauhamba, u dude nou dikulule, u hanaune nou teyaule, u tunge nou twike.”
11 Ondjovo yaJehova oye uya natango kwaame tai ti: “Jeremia, ou wete shike?” Opo nee onda ti: “Ondi wete oshitai shomuti wo-almond.”*
12 Jehova okwa lombwela nge a ti: “Owe shi mona shili, osheshi ame ohandi kala oupafi filufilu shi na sha nondjovo yange, opo i wanifwe po.”
13 Ondjovo yaJehova oye uya kwaame oshikando oshitivali tai ti: “Ou wete shike?” Opo nee onda ti: “Ondi wete ombiya* tai fuluka,* nokanya kayo oka pungululwa ko kolundume.” 14 Opo nee Jehova okwa lombwela nge ta ti:
“Kolundume otaku ka dja oupyakadi
Tau hange ovakalimo aveshe vomedu olo.
15 Osheshi ‘Ame ohandi ongele omapata aeshe omauhamba okolundume,’ Jehova osho ta ti,
‘Notae ke uya; keshe umwe ota ka dika olukalwapangelo laye
Poivelo yaJerusalem,
Otava ka ponokela omakuma asho aeshe, oo e shi dingilila,
Notava ka ponokela oilando aishe yaJuda.
16 Nohandi ke va shiivifila omatokolo ange omolwoukolokoshi wavo aushe,
Molwaashi ova efa nge po,
Notava yambele omatwiminoyambo ookalunga vamwe,
Nokulinyongamena oilonga yomake avo vene.’
17 Ashike ou na okulilongekida, u katuke onghatu,*
Nou na okufikama noku va lombwela ashishe osho nde ku lombwela.
Ino kala we va tila,
Opo ndihe ke ku tilife moipafi yavo.
18 Osheshi nena onde ku ninga oshilando shomakuma a pama,
Ongudi yoshivela shilaula nomakuma ongopolo, u kondjife oilongo aishe,
Eehamba daJuda nomalenga asho,
Ovapristeri vasho novanhu vomedu olo.
19 Notave ke ku lwifa shili,
Ashike itave ke ku dula,*
Osheshi ‘Ame ondi li pamwe naave,’ Jehova osho ta ti, ‘ndi ku xupife.’”
2 Ondjovo yaJehova oye uya kwaame tai ti: 2 “Inda noku ka popila momatwi aJerusalem, ‘Eshi osho Jehova ta ti:
“Ohandi dimbuluka nawa oudiinini* womounyasha woye,
Ohole, oyo wa ulika, eshi wa valekwa, u hombolwe,
Nghee wa shikula nge mombuwa,
Medu olo inali kunwa eembuto.
3 Israel okwa li omuyapuki kuJehova, oilikolomwa yotete yeteyo laye.”’
‘Keshe oo te mu xwake po ota kala e na ondjo.
Oshiponga otashi va hange,’ Jehova osho ta ti.”
4 Akutu! eumbo laJakob, pwilikineni ondjovo yaJehova,
Nosho yo omaukwaneumbo aeshe eumbo laIsrael.
5 Eshi osho Jehova ta ti:
“Owii washike ooxokulululwa va mona mwaame,
Opo va kale nge kokule,
Nova shikula oikalunga ihe na ekwafo lasha, nokuninga ovanhu vongaho?
6 Inava pula kutya, ‘Jehova oku li peni,
Oo e tu kufa mo medu laEgipiti,
Oo e tu kwatela komesho mombuwa,
Medu lomombuwa nosho yo momalambo,
Medu likukutu nolomudidimbe mulaula fokofoko,
Medu olo inamu endwa nande onale komunhu,
Noinamu kalwa nande onale kovanhu?’
7 Opo nee onde mu eta medu loikunino yomiti doiimati,
Mu lye oiimati yamo noinima yasho iwa.
Ashike nye omwe uya mo, ndele tamu nyateke edu lange;
Efyuululo lange omwe li ninga oshinima shitondifa.
8 Ovapristeri inava pula kutya, ‘Jehova oku li peni?’
Ovo hava ungaunga nOmhango kava li ve shii nge,
Ovafita ova tukululila nge oshibofa,
Ovaprofeti ova li hava xunganeke medina laBaal,
Nohava shikula ovo vehe na ekwafo lasha.
9 ‘Onghee natango ohandi ke mu kondjifa,’ Jehova osho ta ti,
‘Nohandi ka kondjifa ovanamati vovanamati veni.’
10 ‘Ndele taulukeni muye kedu lokomunghulofuta* lOvakittim nokutala.
Heeno, tumeni kuKedar nokukonakona noukeka;
Mu tale ngeenge okwa ningilwe nale oshinima sha fa eshi.
11 Mbela oshiwana osha lundululile ngoo nande onale ookalunga kasho, shi shikule oinima oyo ihe fi ookalunga?
Ashike ovanhu vange mwene ova kumaana efimano lange naasho shihe na ekwafo lasha.
12 Taleni nonghumwe kwaashi, nye omaulu;
Kakameni mwa tila unene,’ Jehova osho ta ti,
13 ‘Molwaashi ovanhu vange ova ninga oinima ivali ii:
Ova efa nge po, ou ndi li odjo yomeva omanamwenyo,
Nove lixupila* eendungu,
Eendungu da tenda omifya, odo itadi dulu okukala omeva.’
14 ‘Mbela Israel omupiya, ile omupika a dalwa meumbo?
Hano omolwashike a yandjelwa kovanyeki?
15 Eenghoshi deenyasha* otadi mu kumbile;
Oda yelula omawi ado.
Oda ningifa oshilando shaye shi kale shitilifa.
Noilando yaye oya tomekwa omundilo, opo muha kale nande omunhu.
16 Ovanhu vokuNof* novokuTapanes otava li koshikoroni shokomutwe woye.
17 Mbela oshinima eshi inamu shi lietela nye vene,
Eshi mwa efa po Jehova Kalunga keni,
Ofimbo a li te mu wilike mondjila?
18 Mbela paife omolwashike mwa hala okuya nondjila yokuEgipiti,
Mu nwe omeva aSihor?*
Omolwashike mwa hala okuya nondjila yokuAssiria,
Mu nwe omeva omulonga?*
19 Owii woye nau ku pukulule,
Nokuhe na oudiinini kwoye naku ku hanyene.
U shiive nokudidilika nghee shii nosha nyika oshiponga
Okweefa po Jehova Kalunga koye;
Owa ulika kutya iho tila nge,’ Omwene Omunamapangelo aeshe, Jehova womatangakwaita, osho ta ti.
20 ‘Osheshi onda nyanyaula po ondjoko yoye nalenale,
Nonda teyaula po omalyenge oye.
Ndele owa ti: “Itandi ke ku longela,”
Osheshi koshikulundudu keshe nokoshi yomuti keshe wa kula
Oko wa li wa nangala ongali, we lininga ombwada.
21 Onde ku twika u li omundjebele utilyana wa denga mbada, ombuto yao aishe iwa;
Ndele osha enda ngahelipi u shitukile moitai ii yomundjebele wokoilongo imwe moipafi yange?’
22 ‘Nonande ou likoshe nomongwa,* nou longife omute* muhapu,
Ondjo yoye otai kala edilo koshipala shange,’ Omwene Omunamapangelo aeshe, Jehova, osho ta ti.
23 Oto dulu ngahelipi okutya, ‘Inandi linyateka.
Inandi shikula ooBaal’?
Tala kondjila yoye yomefilu.
Diladila kwaasho wa ninga.
Owa fa ongamelo yonghadi onyasha hai endelele,
Tai tondoka epwanga meendjila dayo,
24 Ondongi yoshondolo ya ikilila mombuwa,
Tai fimbula momhepo ya hala okulondwa.*
Olyelye ta dulu oku i kelela, ngeenge i li pefimbo lokulondwa?
Ovo tave i kongo inava pumbwa okulilolola.
Otave ke i mona ashike pefimbo layo.*
25 Kanghama, ofimbo ino enda eemhadi kombada,
Nomunino woye inau fya enota.
Ashike owa ti, ‘Kashi na ekwafo lasha!
Ahawe, ondi hole ovanailongo,*
Nohandi ke va shikula.’
26 Ngaashi ombudi hai kala ya fya ohoni, ngeenge ya kwatwa,
Eumbo laIsrael nalo osho tali ka fifwa ohoni,
Vo, eehamba davo nosho yo omalenga avo,
Ovapristeri vavo novaprofeti vavo.
27 Ohava ti komuti, ‘Oove tate,’
Nokemanya, ‘Oove wa dala nge.’
Ashike ova pa nge eembuda davo, ndele haipala yavo.
Nongeenge va hangwa koupyakadi ohava ti,
‘Fikama, ndele to tu xupifa!’
28 Paife ookalunga ovo we liningila ove li peni?
Nava fikame, ngeenge otava dulu oku ku xupifa pefimbo loye loudjuu,
Osheshi ookalunga voye ova ninga vahapu moilando yoye, akutu Juda.
29 ‘Omolwashike tamu kala nokukondjifa nge?
Omolwashike amushe mwa tukululila nge oshibofa?’ Jehova osho ta ti.
30 Onda handukila ovanamati voye oshimha.
Ihava tambula ko outekuduliko;
Eongamukonda loye mwene ola dipaa ovaprofeti voye,
Ngaashi onghoshi ya handuka.
31 Akutu epupi, diladileni nye vene ondjovo yaJehova.
Mbela onda kala ngaashi ombuwa kuIsrael,
Ile edu lomilaulu fokofoko?
Omolwashike ovanhu vange ava tava ti, ‘Ohatu endaenda twa manguluka.
Itatu uya ko vali kwoove’?
32 Mbela okakadona elela otaka dimbwa oulyenge vako,
Omufuko omapaya aye oponhulo?*
Ndele nande ongaho, ovanhu vange mwene ova dimbwa nge oule womafiku itaa dulu okuvalulwa.
33 Akutu omukainhu, ino konga tuu nomakoto ondjila u konge ohole!
Owe lideula ove mwene meendjila dovakolokoshi.
34 Nokuli neefulukweva doye odi na omavala ohonde yeehepele* dihe na etimba,
Nonande inandi hanga tadi teya,
Oi li keefulukweva doye adishe.
35 Ashike owa ti, ‘Kandi na ondjo.
Ehandu laye ola dja po shili pwaame.’
Paife ohandi ke ku tokola,
Molwaashi owa ti, ‘Inandi nyona.’
36 Omolwashike uhe na ko nasha nondjila yoye ya ngolyauka?
Oto ka fya yo ohoni Egipiti,
Ngaashi ashike wa fya ohoni Assiria.
37 Omolwetomheno olo, naave yo oto ka ya u likwete ombadamutwe,
Osheshi Jehova okwa ekelashi ovo we lineekela;
Itave ke ku etela ouwa washa.”
3 Ovanhu otava pula tava ti: “Ngeenge omulumenhu okwa lekele omukulukadi waye, ndele omukulukadi te mu efa, nokuninga womulumenhu umwe, mbela omulumenhu oo oku na okushuna vali kuye?”
Mbela edu olo inali nyatekwa tuu unene?
“Ove owa haela nookaume vahapu,
Ndele mbela paife ou na vali okwaalukila kwaame?” Jehova osho ta ti.
2 “Yelula omesho oye koikulundudu ihe na sha, ndele to tale.
Openi ino kwatelwa onghonga?
Owe va kalela omutumba pominghulo deendjila
Ngaashi omweendanandjila* mombuwa.
Owa twikila okunyateka edu
Noumbwada woye nosho yo noukolokoshi woye.
3 Onghee omata odula okwa kalekwa,
Nokape na odula pefimbo lokulombo.
Ou na eholokepo lififa ohoni* la fa lomukulukadi ombwada;
Iho fi ohoni.
4 Ashike paife oto ifana nge,
‘Tate, oove kaume komounyasha wange!
5 Mbela ope na ngoo oo ta dulu okukala a handuka fiyo alushe,
Ile a kale alushe a kwata onghone?’
Osho osho wa ti,
Ashike ove oho twikile okuninga oinima aishe ii oyo to dulu okuninga.”
6 Pefimbo lohamba Josia, Jehova okwa lombwela nge ta ti: “‘Wa mona tuu eshi Israel, osho shihe fi oshidiinini, sha ninga? Osha ya komhunda keshe ile nosho yo koshi yomuti keshe wa kula mutalala, shi haele. 7 Nokuli nokonima eshi sha ninga oinima aishe oyo, onda twikila oku shi lombwela shi alukile kwaame, ashike inashi alukila ko; na Juda osha twikila okutala omumwainakadona washo omukengeleledi. 8 Eshi nde shi mona, onda lekela Israel, osho shihe fi oshidiinini, nombapila yeteyohombo omolwokuhaela kwasho. Ashike omumwainakadona washo omukengeleledi, Juda, ka li a tila; naye yo okwa ya, ndele ta ka haela. 9 Kasha li shi na ko nasha noumbwada washo, nosha twikila okunyateka edu nokuhaela nomamanya nosho yo nomiti. 10 Kakele koinima aishe oyo, omumwainakadona washo omukengeleledi, Juda, ina alukila kwaame nomutima aushe, ndele okwe liningifa ashike,’ Jehova osho ta ti.”
11 Opo nee Jehova okwa lombwela nge ta ti: “Israel, osho shihe fi oshidiinini, osha ulika kutya sho* oshiyuki unene shi dule Juda omukengeleledi. 12 Inda, ndele to shiivifa eendjovo edi kolundume to ti:
“‘“Aluka, akutu Israel omutangalali,” Jehova osho ta ti.’ ‘“Itandi ke ku tala nda handuka,* osheshi ame omudiinini,” Jehova osho ta ti.’ ‘“Itandi kala nda handuka fiyo alushe. 13 Dimina ashike etimba loye, osheshi owa tukululila Jehova Kalunga koye oshibofa. Owa twikila okunangala* novaendanandjila* koshi yomuti keshe wa kula mutalala, ndele ino dulika kondaka yange,” Jehova osho ta ti.’”
14 “Alukeni, nye ovanamati ovatangalali,” Jehova osho ta ti. “Osheshi onda ninga mwene weni washili,* nohandi ke mu kufa, umwe moshilando navavali moukwaneumbo, ndele handi ke mu twala kuSion. 15 Nohandi ke mu pa ovafita she likolelela komutima wange mwene, notave ke mu palula neshiivo nosho yo nounongo. 16 Otamu ka ninga muvahapu, notamu ka ima oiimati medu olo pefimbo olo,” Jehova osho ta ti. “Itava ka tya vali, ‘Oshikefa shehangano laJehova!’ Itashi ke uya mo vali momitima, noitave ke shi dimbuluka, ile ve shi djuulukwe, noitashi ka ningwa vali. 17 Pefimbo olo, otava ka ifana Jerusalem olukalwapangelo laJehova; noiwana aishe otai ka etwa pamwe, i tange edina laJehova kuJerusalem, noitava ka tangalala vali nokushikula omutima wavo mwii.”
18 “Pefimbo olo otava ka enda pamwe, eumbo laJuda pamwe neumbo laIsrael, naaveshe otave ke uya okudja medu lokolundume va finda kedu, olo nda pa ooxokulululwa li li efyuululo. 19 Nonda diladila ‘nghee nde mu tula mokati kovanamati noku mu pa edu liwa, efyuululo la denga mbada unene mokati koiwana.’* Onda diladila yo kutya otamu ka ifana nge ‘Tate!’ nonokutya itamu ka efa po okushikula nge. 20 ‘Oshoshili, ngaashi omukulukadi omukengeleledi ta fiye po omushamane* waye, nanye yo, akutu eumbo laIsrael, osho mwa ungaunga naame noukengeleledi,’ Jehova osho ta ti.”
21 Koikulundudu ihe na sha okwa udika ondaka,
Ovanhu vomuIsrael tava lili, notava pula ekwafo,
Osheshi ova pengifa ondjila yavo;
Ova dimbwa Jehova, Kalunga kavo.
22 “Alukeni, nye ovanamati ovatangalali.
Ohandi ka velula onghalo yeni youtangalali.”
“Ofye ava, otwe uya kwoove,
Osheshi ove, akutu! Jehova, oove Kalunga ketu.
23 Oshoshili, oikulundudu neuyaano olo li li keemhunda oyongaho elela.
Oshoshili, exupifo laIsrael otali di kuJehova, Kalunga ketu.
24 Ashike oshinima shififa ohoni* osha lya po oinima yootatekulululwa okudja kounyasha wetu,
Oufita wavo noimuna yavo,
Ovanamati vavo novanakadona vavo.
25 Natu nangaleni twa fya ohoni,
Nelengwa letu nali tu uvike,
Osheshi otwa nyona kuJehova, Kalunga ketu,
Fye nootate okudja kounyasha wetu fiyo okefiku eli,
Noinatu dulika kondaka yaJehova Kalunga ketu.”
4 “Akutu Israel, ngeenge owa aluka,” Jehova osho ta ti,
“Ngeenge owa alukile kwaame
Nowa kufa po oihongwafano oyo itondifa koshipala shange,
Opo nee ito ka kala vali onhauki.
2 Nongeenge owa ane to ti:
‘Oshili, ofimbo Jehova e na omwenyo!’ moshili, mouyuki nomwaasho sha yuka,
Kungaho, oiwana otai ke limonena omanangeko noupuna omolwaye,
Notai ke litanga omolwaye.”
3 Osheshi eshi osho Jehova ta lombwele ovalumenhu vomuJuda naJerusalem ta ti:
“Pululeni edu olo ihali longwa
Noinamu kala tamu kunu momakiya.
4 Lipitifeni etanda nye vene omolwaJehova,
Nokukufa ko oipa yokeexulo domitima deni,
Nye ovalumenhu vomuJuda novakalimo vomuJerusalem,
Opo ehandu lange lihe mu xwamene ngaashi omundilo,
Nokukala la xwama nopehe na oo te li dimi,
Omolwoilonga yeni ii.”
5 Shi hepaululeni muJuda, noku shi shiivifa muJerusalem.
Ingideni nokushika enghuma medu alishe.
Ifaneni mokule, ndele tamu ti: “Ongaleni pamwe,
Natu ye onhapo koilando yomakuma a pama.
6 Yeluleni edidiliko* la taalela kuSion
Kongeni onhele yokuhondama, noinamu kala mwa mwena,”
Osheshi ame ohandi eta oupyakadi okudja kolundume, ehanauno linene.
7 Okwa shituluka ngaashi onghoshi tai di mengade layo;
Omuhanauni woiwana okwe lilongekida.
Okwa dja mo monhele yaye a ninge edu leni oshinima shitilifi.
Oilando yeni otai ka ninga oikulukuma, ihe na ovakalimo.
8 Onghee hano, djaleni eeshako,
Nyikeni oluhodi* nokulilaana,
Osheshi ehandu laJehova inali dja po pufye.
9 “Mefiku olo,” Jehova osho ta ti, “omutima* wohamba otau ka tyololoka,
Nosho yo omutima* womalenga;
Ovapristeri otava ka tilifwa, novaprofeti otava ka kumwa.”
10 Opo nee onda ti: “Woo ame, akutu! Omunamapangelo aeshe, Jehova! Oshoshili kutya owa kengelela filufilu ovanhu ava nosho yo Jerusalem, eshi wa ti: ‘Otamu ka kala mu na ombili,’ ofimbo eongamukonda li li pominino detu.”*
11 Pefimbo olo, ovanhu ava nosho yo Jerusalem otava ka lombwelwa taku ti:
“Omhepo ipyu tai di koikulundudu ihe na sha yomombuwa
Otai kombolola po kombada yomonakadona* woshiwana shange;
Itai uya okuyela, ile okukoshola.
12 Omhepo idjuu otai uya tai di keenhele edi palombwelo lange.
Paife ohandi ke va tokola.
13 Tala, ote uya ngaashi oilemo yodula,
Nomatemba aye okwa fa oshikungulu shomhepo.
Eenghambe daye odi na onhapo di dule eenhwa.
Woo fye, osheshi ohatu xulifwa po!
14 Kosha omutima woye, u kale wa yela koukolokoshi, akutu Jerusalem, opo u dule okuxupifwa.
Fiyo onaini to kala u na omadiladilo mai?
15 Osheshi ondaka otai popi onghundana tai di kuDan,
Notai shiivifa oshiponga okudja keemhunda daEfraim.
16 I lombweleni oiwana, heeno;
I shiivifileni Jerusalem.”
“Ovakwaita* otava di kedu lokokule,
Notava ka yelulila eendaka davo oilando yaJuda.
17 Otave uya oku shi lwifa okudilila keembinga adishe ngaashi ovanangeli vomoluhaela,
Molwaashi osha tukululila nge oshibofa,” Jehova osho ta ti.
18 “Eendjila doye neenghatu doye otadi ka etwa kombada yoye.
Oudjuu woye kau ehameka tuu,
Osheshi owa hanga filufilu omutima woye!”
19 Woo! oudjuu wange,* oudjuu wange!
Ondi udite ouyehame momutima wange.*
Omutima wange otau denge mwaame.
20 Okwa lopotwa oshiponga noshiponga,
Osheshi edu alishe ola hanaunwa po.
Omatwali ange okwa hanaunwa po ombadilila,
Nomalapi etwali lange omepakumo leisho.
21 Fiyo onaini handi twikile okumona edidiliko,*
Handi twikile okuuda ewi lenghuma?
22 Osheshi ovanhu vange omalai;
Ihava dimbuluka nge.
Vo ovanamati omalai, vehe na eudeko.
Ove na eendunge,* ngeenge tashi uya pokulonga owii,
Ashike kave shii okulonga ouwa.
23 Onda tala edu, ndele tala! kala li li na sha, nola mbuwapala.
Onda tala keulu, nomaminikilo alo kaa li ko vali.
24 Onda mona eemhunda, ndele tala! oda li tadi kakama,
Noikulundudu oya li tai tengauka.
25 Onda mona, ndele tala, kapa li omunhu,
Needila adishe dokeulu oda tuka po.
26 Onda mona, ndele tala, oshikunino shomiti doiimati osha ninga ombuwa,
Noilando yasho oya hanaunwa po filufilu.
Osho osha ningwa omolwaJehova,
Omolwehandu laye linene.
27 Osheshi eshi osho Jehova ta ti: “Edu alishe otali ka ninga ombuwa,
Ashike itandi ke li hanauna po filufilu.
28 Omolwoshinima osho, edu otali ka nyika oluhodi,
Neulu, olo li li pombada, otali ka laula.
Oshi na okuningwa, molwaashi onda popya, onda tokola,
Noitandi ka lundulula omadiladilo ange,* ile ndi lialuluke omolwasho.
29 Oshilando ashishe osha ya onhapo
Kewi lovalondinghambe nolovaumbi vomauta.
Ova ya momangade,
Nova londa komamanya.
Oshilando keshe osha haulukwa,
Noihamu kala omunhu.”
30 Paife oto ka ninga po shike, eshi wa hanaunwa po?
Owa li ho djala oikutu itilyana,
Ho liwapeke noulyenge voshingoli,
Noho feweke omesho oye nombapeka ilaula.*
Ashike owe lifeweka oshimha,
Molwaashi ovo va li ve ku fila ondjala ove ku liteeka;
Paife otava kongo omwenyo woye.
31 Osheshi onda uda ondaka ya fa yomukainhu ta vele,
Oudjuu wa fa womukainhu oo ta dala okaana kaye koshiveli,
Ondaka yomonakadona waSion, oo ta twikile okufuda noudjuu.
Eshi a yelula omake aye ota ti:
“Woo ame, osheshi onda* loloka omolwovadipai!”
5 Endaendeni momapandavanda aJerusalem.
Talaataleni keshe pamwe nokudidilika.
Kongeni momahalandjadja asho, mu tale,
Ngeenge otamu mono mo omunhu, oo ha longo ouyuki,
Oo a hala okukala omudiinini,
Nohandi ke shi dimina po.
2 Nokuli nonande ova tye: “Oshili, ofimbo Jehova e na omwenyo!”
Natango otava ka ana kwaasho shihe fi shoshili.
3 Akutu! Jehova, mbela omesho oye ihaa tale ovo ve li ovadiinini?
Owe va denga, ashike inashi va kwafela sha.*
Owe va finda, ashike ova anya okutambula ko outekuduliko.
Ova kukutika oipala yavo shi dulife emanya,
Nova anya okwaaluka.
4 Ashike onde lipopila nda ti: “Oshili, ava ove na okukala ovadinwa.
Ova katuka shihe li pandunge, osheshi kave shii ondjila yaJehova,
Etokolo laKalunga kavo.
5 Ohandi ka ya kovanenenhu nokupopya navo,
Osheshi ove na okukala va didilika ondjila yaJehova,
Etokolo laKalunga kavo.
Ashike aveshe ova teyaula ondjoko,
Nova tokaula eemhango.”*
6 Nomolwaashi onghoshi yomofuka tai va ponokele,
Embungu lomombuwa otali twikile oku va hanauna po,
Ongwe otai ka nangala i li oupafi moilando yavo.
Keshe umwe womuvo ta ka dja mo, ota ka nyanyaulwa moinhimbu.
Osheshi omatimba avo omahapu;
Oilonga yavo ihe fi youdiinini itai dulu okuvalulwa.
7 Ongahelipi handi dulu oku mu dimina po omolwoshinima eshi?
Ovanamati veni ova efa nge,
Nohava ane kwaasho shihe fi Kalunga.
Onda wanifa po eemhumbwe davo,
Ashike otava twikile okuhaela,
Nohava mbobolokele keumbo lombwada.
8 Ova fa eenghambe da halelela okulonda,
Keshe umwe a lambalala omukulukadi wamukwao.
9 “Mbela kandi na oku va hokololifa omolwoinima ei?” Jehova osho ta ti.
“Mbela kandi* na okukatukila onghatu oshiwana sha tya ngaha ame mwene?
10 “Indeni moimhungu yoikunino yasho yomandjebele noku i hanauna po,
Ashike inamu i hanauna po filufilu.
Kufei ko oitai yasho, oyo ya tandavela,
Osheshi kai fi yaJehova.
11 Osheshi eumbo laIsrael neumbo laJuda
Okwa kala filufilu taa kengelele nge,” Jehova osho ta ti.
12 “Ove lidimbika Jehova, nova kala tava ti,
‘Ita ka ninga po sha.*
Kape na oshiponga tashi ke tu hanga;
Itatu ka hangwa keongamukonda, ile kondjala.’
13 Ovaprofeti ohava popi oinima yongaho,
Nondjovo* kai mo muvo.
Eshi nashi va ningilwe!”
14 Onghee hano, eshi osho Jehova, Kalunga komatangakwaita, ta ti:
“Molwaashi ovanhu ava otava ti ngaha,
Eendjovo dange ohandi ke di ninga omundilo mokanya koye,
Novanhu ava ovo oikuni,
Notadi ke va lungwinifa po.”
15 “Ohandi ku etele oshiwana shokokule, akutu eumbo laIsrael,” Jehova osho ta ti.
“Oshiwana osho sha kala po efimbo lile.
Oshiwana osho sha dja nale,
Oshiwana osho uhe shii elaka lasho,
Neendjovo dasho ito dulu oku di uda ko.
16 Eembalukutu davo oda fa ombila ya ekama;
Aveshe vomuvo ovakwaita ovaladi.
17 Otava ka xwaka po eteyo loye nosho yo omungome woye.
Otava ka xwaka po ovanamati voye nosho yo ovanakadona voye.
Otava ka xwaka po oufita woye noimuna yoye.
Otava ka xwaka po omindjebele doye nomikwiyu doye.
Otava ka hanauna po neongamukonda oilando yoye yomakuma a pama, oyo we lineekela.”
18 “Ndele nokuli nomomafiku oo,” Jehova osho ta ti, “itandi ke mu hanauna po filufilu. 19 Nongeenge ova pula tava ti, ‘Omolwashike Jehova Kalunga ketu e tu ningila oinima aishe ei?’ Ou na oku va nyamukula to ti, ‘Ngaashi ashike mwa efa nge po, mu longele kalunga kokoilongo medu leni, osho yo tamu ka longela ovanailongo medu olo lihe fi leni.’”
20 Shi hepaululeni meumbo laJakob,
Noku shi shiivifa muJuda, tamu ti:
21 “Pwilikineni kwaashi, nye ovanhu omalai nomuhe na eendunge:*
Ove na omesho, ashike ihava mono ko;
Ove na omatwi, ashike ihava udu ko.
22 ‘Mbela ihamu tila nge?’ Jehova osho ta ti,
‘Mbela ihamu kakama moipafi yange?
Aame ou nda tula po ehekedu li li ongaba yefuta,
Eufomhango laalushe olo itali dulu okutaulukwa.
Nonande omakufikufi alo naa ndwafuke, itaa dulu oku i pitilila;
Nonande naa popome, natango itaa dulu oku i koyelela.
23 Ashike ovanhu ava ove na omutima mukukutu novatangalali;
Ova fiya po ondjila yange nova ya nondjila yavo vene.
24 Noihava ti momitima davo:
“Paife natu tileni Jehova Kalunga ketu,
Ou he tu lokifile odula pefimbo layo,
Odula yopokufu nosho yo odula yopokulombo,
Ou ha shilipaleke kutya ohatu teya moivike oyo ya tulwa po.
25 Omanyono eni vene okwa kelela oinima ei ihe uye;
Omatimba eni vene okwe mu imba osho shiwa.
26 Osheshi mokati kovanhu vange omu na ovakolokoshi.
Ohava kala tava hondjaunine, ngaashi ovateli voudila tave likoko.
Ova tela omwiyo wa nyika oshiponga.
Ohava yulu ovanhu.
27 Ngaashi okakuku ke yadi oudila,
Omaumbo avo nao osho e yadi omakoto.
Nomolwaashi va ninga ovanaenghono nova punapala.
28 Ova ondoka notava vema;
Otava xunga owii.
Ihava popile oshikoya shokaana kehe na xe,
Opo va dule okupondola;
Nohava anye okuningila ohepele ouyuki.’”
29 “Mbela kandi na oku va hokololifa omolwoinima ei?” Jehova osho ta ti.
“Mbela kandi* na okukatukila onghatu oshiwana sha tya ngaha ame mwene?
30 Moshilongo omwa holoka oshinima shonhumba sha nyika oshiponga noshitilifi:
31 Ovaprofeti ohava xunganeke oipupulu,
Novapristeri ohava pangele keenghonopangelo davo vene.
Novanhu vange mwene osho ve hole ngaho.
Ndele mbela otamu ka ninga po shike, ngeenge exulilo ole uya?”
6 Kongeni eameno, akutu ovanamati vaBenjamin, kokule naJerusalem.
Shikeni enghuma muTekoa;
Temeni omundilo wedidiliko muBet-hakerem!
Osheshi oudjuu otau di kolundume, ehanauno linene.
2 Omonakadona waSion okwa fa omukainhu muwa, nokwa lundukifwa.
3 Ovafita nomaufita avo otave ke uya.
Otava ka dika omatwali avo ve mu dingilila,
Keshe umwe ta lifa oimuna yaye i li mepashukilo laye.
4 “Lilongekidileni* oita mu mu lwife!
Fikameni, natu mu ponokeleni mokati komutenya!”
“Woo fye, osheshi otaku toko,
Molwaashi omididimbe dokomatango otadi ningi dile!”
5 “Fikameni, ndele hatu ponoka mokati koufiku,
Nokuhanauna po eeshungongulu daye domakuma a pama.”
6 Osheshi eshi osho Jehova womatangakwaita ta ti:
“Teteni oiti, ndele tamu i diki ekondeka la dingilila Jerusalem.
Sho oshilando osho shi na okuhandukilwa;
Musho kamu na sha, kakele komafininiko.
7 Ngaashi ondungu hai kaleke omeva ayo matalala,*
Naasho osho hashi kaleke oukolokoshi washo mutalala.*
Elongifo leenghono nehanauno oya udika musho;
Ouyahame noshiponga oi li alushe koshipala shange.
8 Londwelwa, akutu Jerusalem, ngeenge hasho, ame ohandi* ke ku liteeka po monghedi ififa ohoni;
Ohandi ke ku ninga eputu, edu lihe na ovakalimo.”
9 Eshi osho Jehova womatangakwaita ta ti:
“Otava ka pupudulula filufilu oshixupe shaIsrael, ngaashi omandjebele axuuninwa komundjebele.
Longifa vali eke loye ngaashi oo ta ongele omandjebele okudja komindjebele.”
10 “Ondi na okupopya nalyelye nokuyandja elondwelo?
Olyelye ta ka pwilikina?
Tala, omatwi avo okwa fita,* onghee itava dulu okuyandja elitulemo.
Tala, ondjovo yaJehova oya ninga oshinima shesheko kuvo;
Ihava mono mo ouwa.
11 Onghee ondi yadi onya yaJehova,
Nonda loloka oku i kwatela mo.”
“I tila kokaana mepandavanda,
Kongudu yovalumenhu ovanyasha va ongala pamwe.
Aveshe otava ka kwatwa po, omulumenhu pamwe nomukulukadi waye,
Ovalumenhu ovanamido pamwe novakulupe elela.*
12 Omaumbo avo otaa ka yandjwa po kuvamwe,
Pamwe nomapya avo nosho yo ovakulukadi vavo.
Osheshi ohandi ka yelulila eke lange ovakalimo vomedu olo,” Jehova osho ta ti.
13 “Osheshi okudja kohepele fiyo okoshipuna, keshe umwe ote likongele eliko tali di moipupulu;
Okudja komuprofeti fiyo okomupristeri, keshe umwe ota kengelele.
14 Notava kendabala okuvelula nouhasha* oshiwana shange, osho sha teka,* tava ti,
‘Ope na ombili! Ope na ombili!’
Ofimbo pehe na ombili.
15 Mbela ohava fi ngoo ohoni oinima ii oyo va ninga?
Ihava fi ohoni nandenande!
Kave shii nokuli kutya okufya ohoni oshinima sha tya ngahelipi!
Onghee otava ka wila mokati kaavo va wila po.
Otava ka punduka, eshi handi ke va handukila,” Jehova osho ta ti.
16 Eshi osho Jehova ta ti:
“Fikameni pomashakeneno eendjila mu tale.
Puleni kombinga yeendjila donale,
Puleni kutya ondjila iwa oi li peni, ndele tamu ende muyo,
Nokulimonena* etulumuko.”
Ashike ova ti: “Itatu ende mo muyo.”
17 “Nonda nangeka po ovanangeli ovo va ti,
‘Yandjeni elitulemo kewi lenghuma!’”
Ashike ova ti: “Itatu yandje elitulemo.”
18 “Onghee hano, pwilikineni, akutu oiwana!
Nokushiiva, akutu ovo mwa ongala,
Osho tashi ke va ningilwa.
19 Pwilikina, akutu edu!
Ovanhu ava ohandi va etele oupyakadi
U li oshiimati sheemhangela davo vene,
Osheshi inava yandja elitulemo keendjovo dange,
Nove liteeka po omhango* yange.”
20 “Mbela ondi na ko nasha, eshi hamu eta eka ledimba liwa okudja kuSheba,
Nokalamus* okudja kedu lokokule?
Omaxwikiloyambo eni aeshe inaa tambulwa ko,
Nomayambo eni itaa hafifa nge.”
21 Onghee hano, eshi osho Jehova ta ti:
“Ovanhu ava ohandi va tulile po omamanya epundukifo,
Notava ka punduka omolwao,
Aveshe, ooxe novanamati,
Omunhu nakaume kaye,
Notava ka xula po aveshe.”
22 Eshi osho Jehova ta ti:
“Tala! Ovanhu otave ke uya tava di kedu lokolundume,
Noshiwana shinene otashi ka pendulwa okudja koitukulwa ye likalela yokombada yedu.
23 Ove kwete outa nosho yo eonga.
Ovakwanyanya noitava ka kala ve na onghenda.
Ewi lavo otali ka popoma ngaashi efuta,
Nova londa keenghambe.
Ngaashi omukwaita, ove lilongekidila olwoodi ve ku lwife, akutu omonakadona waSion.”
24 Otwa uda ehokololo kombinga yasho.
25 Ino ya mepya,
Noino enda mondjila,
Osheshi omutondi oku na eongamukonda;
Outile ou li keshe pamwe.
26 Akutu omonakadona woshiwana shange,
Djala oshako nokulidedaula momute.
Lila ngaashi to lili omonamati ewifa, nokulililila,
Osheshi omuhanauni ote ke uya pufye ombadilila.
27 “Onde ku* ninga omuhemuni woivela mokati koshiwana shange,
Oo ta ningi omakonakono noukeka;
Ou na okudidilika nokukonakona ondjila yavo.
28 Aveshe ovalumenhu ovatangalali unene,
Tava endaenda ngaashi ovalundili.
Ova fa ongopolo noshivela shilaula;
Aveshe ova nyonauka.
29 Omipepo dokupepela oda tema.
Momundilo wavo otamu di ashike ofunda.
Umwe ota twikile okuhemuna noudiinini oshimha,
Naavo vai inava yoololwa mo.
30 Ovanhu otave ke va ifana oshisilveri she liteekwa,
Osheshi Jehova okwe ve liteeka.”
7 Ei oyo ondjovo oyo ye uya kuJeremia ya dja kuJehova tai ti: 2 “Kala ofika poshivelo sheumbo laJehova nokuudifila po etumwalaka eli, ‘Pwilikineni ondjovo yaJehova, ovanhu nye amushe vomuJuda ovo hamu piti poivelo ei mu ke linyongamene Jehova. 3 Eshi osho Jehova womatangakwaita, Kalunga kaIsrael, ta ti: “Lundululeni eendjila deni nosho yo eenghatu deni, nohandi ke mu pitika mu twikile okukala monhele ei. 4 Inamu lineekela meendjovo domapukifo, ndele tamu ti, ‘Ei oyo* otembeli yaJehova, otembeli yaJehova, otembeli yaJehova!’ 5 Ndele ngeenge omwa lundulula shili eendjila deni nosho yo eenghatu deni; ngeenge omwa diinine shili ouyuki pokati komunhu namukwao; 6 ngeenge itamu fininike ovanailongo, eefiye* nosho yo ovafiyekadi; ngeenge itamu tileshi ohonde ihe na etimba monhele ei; nongeenge itamu shikula ookalunga vamwe mu liyehameke nye vene; 7 opo ashike handi ke mu pitika mu kale monhele ei, medu olo nda pa ooxokulululwa fiyo alushe.”’”*
8 “Ashike omwa tula elineekelo leni meendjovo domapukifo . . . itadi eta nandenande ouwa washa. 9 Mbela otamu dulu okuvaka, okudipaa, okuhaela, okwaana oipupulu, okuyambela Baal omayambo* nokushikula ookalunga ovo muhe shii, 10 ndele tamu uya nokukala ofika moipafi yange meumbo eli la lukilwa edina lange, ndele tamu ti, ‘Ohatu ka xupifwa,’ nonande omwa ninga oinima aishe ei itondifa? 11 Mbela eumbo eli la lukilwa edina lange ola ninga ekololo lovanyeki momesho eni? Onde shi limonena ame mwene,” Jehova osho ta ti.
12 “‘Onghee hano, inda paife konhele yange muSilo, oko nda ningifa tete edina lange li fimanekwe, nokutala osho nde i ningila omolwowii woshiwana shange, Israel. 13 Ashike omwa kala nokuninga oinima aishe ei,’ Jehova osho ta ti, ‘nokuli nonande onda kala nokupopya nanye oikando noikando,* inamu pwilikina. Onda kala handi mu ifana, ndele inamu nyamukula. 14 Onghee osho handi ka ningila eumbo olo la lukilwa edina lange, olo mwe lineekela, nonhele ei nde mu pa nosho yo ooxokulululwa, ngaashi ashike nda ningila Silo. 15 Ohandi ke mu ekelashi mu dje nge momesho, ngaashi ashike nda ekelashi ovamwaxo aveshe, oludalo alishe laEfraim.’
16 Ashike ove ino ilikana ponhele yovanhu ava. Ino lila, ile u ilikane, ile u indile nge ponhele yavo, osheshi itandi ke ku pwilikina. 17 Mbela ku wete osho tava ningi moilando yaJuda nosho yo momapandavanda aJerusalem? 18 Ovanamati otava tyava oikuni, ooxe otava tema omundilo, novakulukadi otava lungu olumbololo, opo va yambele Ohambakainhu yokEulu* oikuki yomayambo, notava tilileshi ookalunga vamwe oikunwayambo, opo va handukife nge. 19 ‘Ndele mbela aame ngoo tava ehameke?’* Jehova osho ta ti. ‘Mbela havo vene tave lififa ohoni?’ 20 Onghee hano, eshi osho Omwene Omunamapangelo aeshe, Jehova, ta ti, ‘Tala, ehandu lange nosho yo onya yange otai ka tilwa kombada yonhele ei, kovanhu nosho yo koinamwenyo, komiti domoixwa nosho yo koiimati yedu; otali ka xwama noitali ka dimwa.’
21 Eshi osho Jehova womatangakwaita, Kalunga kaIsrael, ta ti, ‘Puleni komesho nokuweda omaxwikiloyambo eni aeshe komayambo eni makwao, nokulya ombelela nye vene. 22 Osheshi okudja efiku olo nda kufa ooxokulululwa medu laEgipiti, inandi popya navo, ile ndi va pe oshipango shi na sha nomaxwikiloyambo aeshe nosho yo omayambo makwao. 23 Ashike onde va pa oshipango eshi: “Dulikeni kondaka yange, nohandi ka ninga Kalunga keni, notamu ka ninga oshiwana shange. Omu na okweenda mondjila aishe oyo nde mu lombwela, opo shi mu endele nawa.”’ 24 Ashike inava pwilikina, ile va pakaleke omatwi avo; ponhele yaasho, ova enda paemhangela* davo vene, tava shikula omitima davo dikolokoshi va tangalala, nova shuna monima ponhele yokuya komesho, 25 okudja mefiku olo ooxokulululwa va dja medu laEgipiti fiyo efiku eli. Onghee onda kala nokutuma ovapiya vange aveshe ovaprofeti kunye, handi va tumu efiku keshe, oikando noikando.* 26 Ashike ova anya okupwilikina kwaame, noinava pakaleka omatwi avo. Ponhele yaasho, ova li ovatangalali,* neenghatu davo odii unene di dulife dooxekulululwa!
27 “Oto ke va lombwela eendjovo adishe edi, ashike itave ke ku pwilikina; oto ke va ifana, ashike itave ke ku nyamukula. 28 Noto ka tya kuvo, ‘Eshi oshiwana osho inashi dulika kondaka yaJehova Kalunga kasho, nosha anya okutambula ko outekuduliko. Oudiinini owa xula po noihau tumbulwa mo nokuli mokati kavo.’*
29 Kululeni ko eexwiki deni odo inadi tetwa* noku di kupulashi, nokwiimba eimbilo loluhodi* koikulundudu ihe na sha, osheshi Jehova okwa ekelashi nota ka hauluka epupi eli le mu handukifa. 30 ‘Osheshi ovanhu vomuJuda ova longa osho shii momesho ange,’ Jehova osho ta ti. ‘Ova tula oihongwafano yavo itondifa meumbo olo la lukilwa edina lange, opo ve li nyateke. 31 Ova tunga eenhele dokoikulundudu daTofet, odo di li mEfilu lOmonamati waHinnom,* opo va xwike ovanamati vavo nosho yo ovanakadona vavo momundilo, oshinima osho inandi va lombwela noinashi uya mo nokuli nande onale momutima wange.’*
32 “‘Onghee hano, tala! omafiku otae uya,” Jehova osho ta ti, ‘eshi itali ka ifanwa vali Tofet, ile Efilu lOmonamati waHinnom,* ndele Efilu lOkudipaela. Otava ka paka muTofet fiyo osheshi pehe na vali onhele ya xupa po. 33 Noimhu yovanhu ava otai ka ninga oikulya yeedila dokeulu noyoifitukuti yokombada yedu, nopehe na oo te i taataa po. 34 Ohandi ka xulifa po ondaka yenyaku nosho yo ondaka yehafo, ewi lomuhomboli nosho yo ondaka yomuhombolwa moilando yaJuda nosho yo momapandavanda aJerusalem, osheshi oshilongo otashi ka ninga oikulukuma.’”
8 “Pefimbo olo,” Jehova osho ta ti, “omakipa eehamba daJuda, omakipa omalenga asho, omakipa ovapristeri, omakipa ovaprofeti nomakipa ovakalimo vomuJerusalem otaa ka kufwa mo meembila davo. 2 Otae ke lihanifilwa ketango nokomwedi nosho yo komatangakwaita aeshe okeulu, oinima oyo va li ve hole, nova longela nova shikula, nova konga nove i linyongamena. Itaa ka ongelwa noitaa ka pakwa. Otaa ka ninga ngaashi oushosho u li kombada yedu.”
3 “Noshixupe shoshiwana eshi shii, osho sha xupa po, otashi ka hoolola efyo ponhele yomwenyo meenhele adishe, omo nde shi lihanifila,” Jehova womatangakwaita osho ta ti.
4 “Nou na okutya kuvo, ‘Eshi osho Jehova ta ti:
“Mbela otava ka wila po, noitava ka penduka po vali?
Ngeenge umwe okwa aluka, mbela mukwao naye ita ka aluka yo?
5 Omolwashike ovanhu ava, Jerusalem, vehe fi ovadiinini, tava twikile okukala vehe fi ovadiinini?
Ohava kanyatele koukengeleledi;
Ohava anye okulundulula.
6 Onda yandja elitulemo, nonda kala handi pwilikine, ndele osho va popya kashi li mondjila.
Kape na ou e lidilulula omolwoukolokoshi waye, ile a pula kutya, ‘Onda ninga shike?’
Keshe umwe okwa twikila okushuna kondjila oyo hai endwa kuvahapu, ngaashi onghambe tai lotoka ya finda molwoodi.
7 Nokuli nexuwashi lokeulu oli shii efimbo lalo;*
Onghuti yetende nokandiilili nosho yo tena* ihai dimbwa efimbo layo lokushuna.*
Ashike ovanhu vange mwene kave udite ko etokolo laJehova.”’
8 ‘Ongahelipi tamu dulu kutya: “Otu na eendunge, notu na omhango* yaJehova”?
Osheshi oshishangifo* hashi fufya* shovashangululi* osha longifwa ashike moipupulu.
9 Ovanaendunge ova fifwa ohoni.
Ova tilifwa notava ka kwatwa.
Tala! Ove liteeka po ondjovo yaJehova,
Nounongo ulipi ve na?
10 Onghee ohandi ka yandja ovakulukadi vavo kovalumenhu vamwe,
Omapya avo a ninge po avamwe;
Osheshi okudja kohepele fiyo okoshipuna, keshe umwe ote likongele eliko tali di moipupulu;
Okudja komuprofeti fiyo okomupristeri, keshe umwe ota kengelele.
11 Notava kendabala okuvelula nouhasha* omonakadona woshiwana shange, oo a teka, tava ti,
“Ope na ombili! Ope na ombili!”
Ofimbo pehe na ombili.
12 Mbela ohava fi ngoo ohoni oinima ii oyo va ninga?
Ihava fi ohoni nandenande!
Kave shii nokuli kutya okufya ohoni oshinima sha tya ngahelipi!
Onghee otava ka wila mokati kaavo va wila po.
Otava ka punduka, eshi handi ke va handukila,’ Jehova osho ta ti.
13 ‘Ngeenge nde va ongele, ohandi ke va xulifa po,’ Jehova osho ta ti.
‘Itapa ka kala omandjebele a fyaala komundjebele, eenghwiyu komukwiyu, nomafo otaa ka lemba.
Naasho nde va pa, otave ke shi kanifa.’”
14 “Omolwashike tu li omutumba apa?
Natu ongaleni pamwe, ndele hatu yeni moilando yomakuma a pama nokuxula po omo.
Osheshi Jehova Kalunga ketu ote ke tu hanauna po,
Note tu pe omeva e na oudiyo, tu nwe,
Molwaashi otwa nyona kuJehova.
15 Opa li eteelelo lombili, ashike kape na sha shiwa she uya,
Efimbo lokuveluka, ndele ope na outile!
16 MuDan omwa udika eenghambe tadi pembe.
Kewi lekwenauko leenghambe daye deemhedi;
Edu alishe ola kakama.
Ove uya mo, nova xwaka po oshilongo nakeshe shimwe shi li mo,
Oshilando novakalimo vasho.”
17 “Osheshi ohandi tumu omayoka mokati keni,
Omayoka e na oudiyo itaa dulu okudeulwa komhule,
Notae ke mu lya shili,” Jehova osho ta ti.
18 Itandi dulu okuhekelekwa omolwoluhodi;
Omutima wange otau ehama.
19 Omonakadona woshiwana shange ota lilile ekwafo,
E li kedu lokokule:
“Mbela Jehova ke li muSion?
Ile ohamba yasho kai mo musho?”
“Omolwashike va nyemateka nge noihongwafano yavo,
Nookalunga vavo vokoilongo vehe na ekwafo lasha?”
20 Eteyo ola pita, okwenye okwa xula,
Ashike inatu xupifwa!”
21 “Onda mongoshoka omolwokuteka po kwomonakadona woshiwana shange;
Onda nyika oluhodi.
Oumbada owa kwata nge.
22 Mbela muGilead kamu na omaadi o-balsam?*
Ile mbela kamu na omuveluli?*
Omolwashike omonakadona woshiwana shange ina velulwa?
9 Akutu, ngeno omutwe wange owa li omeva,
Omesho ange ofifiya yomahodi,
Ngeno ohandi lili omutenya noufiku
Omolwoonakudipawa voshiwana shange.
2 Akutu, ngeno okwa li ndi na onhele yokukala ovaendanandjila mombuwa,
Ngeno ohandi fiye po oshiwana shange nokuya kokule nasho,
Osheshi vo aveshe ovahaeli,
Engafifi lovanhu ovakengeleledi.
3 Ohava lukile omalaka avo ngaashi outa;
Oipupulu, ndele haudiinini, oye lihanena moshilongo.
“Otava xumu komesho mokulonga owii nowii,
Noitava yandje elitulemo kwaame,” Jehova osho ta ti.
4 “Keshe umwe, lungamena omunhu mukweni,
Noino lineekela nokuli nomumwanyoko.
Osheshi omumwanyoko keshe omukengeleledi,
Nomunhu keshe omulundili.
5 Keshe umwe ota kengelele kaume kaye,
Nokape na ou ta popi oshili.
Ova honga omalaka avo okupopya oipupulu.
Nohave lilolola vo vene mokulonga osho shii.
6 Ou li mokati kovanaipupulu.
Nomoipupulu yavo, ova anya okushiiva nge,” Jehova osho ta ti.
7 Onghee hano, eshi osho Jehova womatangakwaita ta ti:
“Ohandi ke va hemuna noku va konakona,
Osheshi oshike vali ndi na okuninga nomonakadona woshiwana shange?
8 Omalaka avo oshikuti shidipai osho hashi popi oipupulu.
Omunhu ota popi nokanya kaye nombili nakaume kaye,
Ashike meni laye, okwe mu nangela.”
9 “Mbela kandi na oku va hokololifa omolwoinima ei?” Jehova osho ta ti.
“Mbela kandi* na okukatukila onghatu oshiwana sha tya ngaha ame mwene?
10 Ohandi ka lila nokunyika oluhodi omolweemhunda
Nohandi ka imba eimbilokemo* omolwomaulifilo omombuwa,
Osheshi okwa xwikwa po, opo muha ende nande omunhu,
Nomalinyengo oimuna kae uditike.
Eedila dokeulu noifitukuti oya ya onhapo; oya ya.
11 Ohandi ka ninga Jerusalem onduba yomamanya, omikwena dookavandje,
Nohandi ka ninga oilando yaJuda ombuwa, muhe na ovakalimo.
12 Olyelye omunaendunge unene a ude ko oshinima eshi?
Okanya kaJehova oka popya nalyelye, opo e shi shiivife?
Omolwashike oshilongo sha hanaunwa po?
Omolwashike sha dengwa koluteni, ngaashi ombuwa,
Opo muha endwe nande okuumwe?”
13 Jehova okwa nyamukula ta ti: “Omolwaashi ova ekelashi omhango* yange, oyo nde va tulila po, naashi inave i shikula nokudulika kondaka yange. 14 Ponhele yaasho, ova shikula omitima davo va tangalala, nova shikula oihongwafano yaBaal, ngaashi ooxe ve va honga va ninge. 15 Onghee hano, eshi osho Jehova womatangakwaita, Kalunga kaIsrael, ta ti, ‘Ohandi ningifa ovanhu ava va lye oshimbodi shilula nohandi va ningifa va nwe omeva oudiyo. 16 Ohandi ke va halakanifila mokati koiwana, oyo vo nosho yo ooxe vehe shii, nohandi ke va tumina eongamukonda fiyo osheshi nde va hanauna po.’
17 Eshi osho Jehova womatangakwaita ta ti,
‘Katukeni pandunge.
Ifaneni ovakainhu ovo hava imbi omaimbilokemo,*
Nokutuma ovakainhu eenghulungu ve uye,
18 Opo va endelele noku tu imbila eimbilokemo,
Opo omesho etu a kunguluke omahodi,
Neemhafu detu di ndode omeva.
19 Osheshi ondaka yekemo oya udika okudja kuSion tai ti:
“Otwa hanaunwa po filufilu!
Otwa fifwa ohoni unene!
Osheshi otwa fiya po oshilongo, nova teyaula po omaumbo etu.”
20 Ovakainhu nye, udeni ondjovo yaJehova.
Omatwi eni naa ude ondjovo yomokanya kaye.
Hongeni ovanakadona veni eimbilokemo eli,
Nokuhongafana eimbilokemo* eli.
21 Osheshi efyo ole uya la pitila momakende etu;
Le uya meeshungongulu detu domakuma a pama,
Li kufe mo ounona momapandavanda,
Novalumenhu ovanyasha momahalandjadja.’
22 Tya, ‘Eshi osho Jehova ta ti:
“Oimhu yovanhu otai ka kangavala, ngaashi oushosho u li mepya,
Ngaashi oilya opo ya tetwa komuteyi i li momukweyo,
Pehe na oo te i ongele.”’”
23 Eshi osho Jehova ta ti:
“Omunaendunge ine litangela eendunge daye;
Omunaenghono ine litangela eenghono daye;
Noshipuna inashi litangela oupuna washo.”
24 “Ashike ou te litange ne litangele oinima ei:
Eshi e na ounongo neshiivo kombinga yange,
Kutya aame Jehova, Ou handi ulike ohole i na oudiinini, ouyuki naasho sha yuka kombada yedu,
Osheshi ohandi hafele oinima ei,” Jehova osho ta ti.
25 Jehova ota ti: “Tala! Omafiku otae uya, nohandi ka handukila keshe umwe oo a pita etanda, ndele paushili ina pita etanda, 26 Egipiti naJuda naEdom nOvaammoni naMoab nosho yo aveshe ovo va kulula eexwiki davo dopeembadu, ovo hava kala mombuwa; osheshi oiwana aishe inai pita etanda, neumbo alishe laIsrael inali pita etanda momutima.”
10 Uda ondjovo oyo Jehova a popya shi na sha naave, akutu eumbo laIsrael. 2 Eshi osho Jehova ta ti:
“Ino lihonga ondjila yoiwana,
Noino tilifwa komadidiliko okeulu,
Molwaashi oiwana oya tilifwa kuo.
3 Osheshi eenghedindjikilile dovanhu kadi na oshilonga.*
Odo ashike omuti womofuka, oo wa tetwa po,
Wa longwa nomake omuhambwidi noshilongifo* shaye.
4 Ohave u feweke noshisilveri nosho yo noshingoli
Noku shi pameka nohamala nosho yo neembosha, opo uha we po.
5 Ngaashi ekumbeti mepya leekukumba,* ihai popi;
Ohai humbatwa, osheshi ihai dulu okweenda.
Inoi tila, osheshi itai dulu oku ku ehameka,
Noitai dulu okulonga ouwa washa.”
6 Akutu! Jehova, kape na ou e kufa.
Ove ou munene nedina loye olinene nohali ulike eenghono doye.
7 Mbela olyelye ehe na oku ku tila, akutu! Ohamba yoiwana, osheshi osha wapala;
Molwaashi mokati kovanongo aveshe vomoiwana nomokati komauhamba avo aeshe,
Kape na umwe e ku fa nandenande.
8 Aishe kai na eendunge noilai.
Omayele taa di komuti kae na oshilonga nandenande.*
9 Oiyaxa yoshisilveri oya tumwa okudja kuTarsis, noshingoli okudja kuUfas,
Oilonga yomuhambwidi, yomake omuhambuli woivela.
Oikutu yayo oya hondjwa neengodi dimbulau nolududi leedi lipeepela.
Aishe oya longwa kovalongi eenghulungu.
10 Ashike Jehova oye Kalunga kashili.
Oye Kalunga omunamwenyo nOhamba yaalushe.
Omolwehandu laye linene edu otali ka kakama,
Nokape na oshiwana tashi dulu okulididimikila etokolo laye.
11* Eshi osho mu na oku va lombwela kutya:
“Ookalunga ovo inava shita eulu nosho yo edu,
Otava ka xulifwa po kombada yedu nosho yo koshi yeulu eli.”
12 Oye a shita edu keenghono daye,
Oo a dika po edu liwa kounongo waye,
Noye a nyanununa eulu keendunge daye.
13 Ngeenge okwa ningifa ondaka yaye i udike,
Omeva meulu ohaa kala taa wilauka,
Noha ningifa oilemo* i litumbe okudja kominghulo dedu.
Oha shelifa okashelu* modula,
Noha kufa mo omhepo meemhungulilo daye.
14 Omunhu keshe oha katuka shihe li pandunge noke na eshiivo.
Omuhambuli woivela keshe ota ka lengifwa omolwoshihongwafano;
Osheshi oshihongwafano shaye shoshivela* osho oipupulu yongaho,
Nomuyo kamu na omhepo.*
15 Yo kai na oshilonga,* oshilonga shi shekifa.
Ngeenge efiku layo letokolo ole uya, otai xulu po.
16 Oshitukulwa shaJakob inashi fa oinima ei,
Osheshi ye Oye a shita oinima aishe,
Na Israel oye odibo yefyuululo laye.
Jehova womatangakwaita olo edina laye.
17 Kufa po oinima yoye pedu,
Ove omukainhu u li mekondeka.
18 Osheshi eshi osho Jehova ta ti:
“Apa ohandi umbileshi* ovakalimo vomedu pefimbo eli,
Nohandi ke va ningifa va mone oixuna.”
19 Woo ame omolwokuteka po kwange!
Oipute yange itai veluka.
Nonda ti: “Oshili, ou oo ouvela wange, nondi na oku u lididimikila.
20 Etwali lange ola kala la hanaunwa po, neengodi adishe detwali lange oda tokaulwa pomakati.
Ovanamati vange ova fiya nge po nokave po vali.
Kape na ou a fyaala po a dike etwali lange, ile a yukililife omalapi etwali lange.
21 Osheshi ovafita inava katuka pandunge,
Noinava pula kuJehova.
Nomolwaasho inava katuka neendunge,
Nomaufita avo aeshe okwa kala a halakanifwa.”
22 Pwilikina! Onghundana! Otai uya!
Ekakamo linene tali di kedu lokolundume,
Li ninge oilando yaJuda ombuwa, omukwena wookavandje.
23 Akutu! Jehova, ondi shi shii nawa kutya ondjila yomunhu kai li mepangelo laye mwene.
Omunhu ita dulu nokuli okuyukifa eenghatu daye mwene.
24 Pukulule nge, akutu! Jehova, netokolo,
Ashike hanehandu loye, opo uha hanaune nge po filufilu.
25 Ehandu loye li tila kombada yoiwana, oyo hai ku lidimbike,
Nokombada yomapata, oo ihaa ifana edina loye.
Osheshi okwa xwaka po Jakob,
Heeno, okwe mu xwaka po fiyo oposhitwa shoku mu hanauna po,
Nokwa mbuwapaleka eduumbo laye.
11 Ei oyo ondjovo oyo ye uya kuJeremia ya dja kuJehova, tai ti: 2 “Pwilikineni eendjovo dehangano eli, nye ovanhu!
“Di lombwela* ovalumenhu vomuJuda nosho yo ovakalimo vomuJerusalem, 3 ndele to ti kuvo, ‘Eshi osho Jehova, Kalunga kaIsrael, ta ti: “Omufingwa omunhu oo ita dulika keendjovo dehangano eli, 4 odo nda lombwela ooxokulululwa mefiku olo nde va kufa medu laEgipiti, okudja mediko lokuhemunina oshivela shilaula, nda ti, ‘Dulikeni kondaka yange nokuninga oinima aishe oyo nde mu lombwela; notamu ka ninga oshiwana shange, nohandi ka kala Kalunga keni, 5 opo ndi dule okuwanifa po eano olo nda anena ooxokulululwa, ndi va pe edu tali kunguluka omashini nomaadi eenyiki, ngaashi shi li nena eli.’”’”
Nonda nyamukula nda ti: “Amen,* akutu! Jehova.”
6 Opo nee Jehova okwa lombwela nge ta ti: “Shiivifa eendjovo adishe edi moilando yaJuda nomomapandavanda aJerusalem to ti: ‘Udeni eendjovo dehangano eli noku di wanifa po. 7 Osheshi onda kumaida filufilu ooxokulululwa mefiku olo nde va kufa medu laEgipiti nafiyo onena eli, nde va kumaida oikando noikando* nda ti: “Dulikeni kondaka yange.” 8 Ashike inava pwilikina, ile va pakaleke omatwi avo; ponhele yaasho, keshe umwe okwa twikila okushikula omutima waye mwii a tangalala. Onghee onde va etela eendjovo adishe dehangano eli, odo nde va lombwela va ninge, ndele ova anya oku di wanifa po.’”
9 Opo nee Jehova okwa lombwela nge ta ti: “Omu na oukengeleledi mokati kovalumenhu vomuJuda novakalimo vomuJerusalem. 10 Ova shuna komapuko ooxekulululwa vopefimbo lonale, ovo va anya okudulika keendjovo dange. Navo ova shikula ookalunga vamwe, nove va longela. Eumbo laIsrael neumbo laJuda okwa teya ehangano lange, olo nda ninga nooxekulululwa. 11 Onghee hano, eshi osho Jehova ta ti, ‘Ohandi va etele oudjuu oo itava dulu okuya onhapo. Ngeenge ova ifana nge ndi va kwafele, itandi ka pwilikina kuvo. 12 Opo nee oilando yaJuda novakalimo vomuJerusalem otava ka ya kookalunga ovo hava yambele* nokupula ekwafo, ashike itave ke va xupifa nandenande pefimbo loudjuu wavo. 13 Osheshi ookalunga voye ova ninga vahapu ngaashi oilando yoye, akutu Juda, nowa dikila oshinima shififa ohoni* eealtari dihapu ngaashi omapandavanda e li muJerusalem, eealtari dokuyambela Baal.’
14 “Ashike ove* ino ilikana ponhele yovanhu ava. Ino lila ponhele yavo, ile u va ilikanene, osheshi itandi ka pwilikina, ngeenge tava ifana nge omolwoudjuu wavo.
15 Omuholike wange oku na oufemba ulipi wokukala meumbo lange,
Eshi vahapu tava wanifa po eemhangela davo dii?
Mbela otava ka kelela oudjuu, ngeenge we va hange, nombelela iyapuki?*
Mbela oto ka hafa pefimbo olo?
16 Pomhito imwe Jehova okwa li e mu luka omuti wolumono hau ima nawa,
Muwa u na oiimati iwa.
Okwe shi tomeka omundilo newi linene tali nduduma,
Nova teya oitai yao.
17 “Jehova womatangakwaita, Omutwiki woye, okwa popya kutya oudjuu otau ke ku hanga omolwoinima ii, oyo ya longwa keumbo laIsrael nokeumbo laJuda, ovo va handukifa nge, eshi va yambela Baal.”
18 Jehova okwa shiivifila nge, opo ndi kale ndi shi shii;
Pefimbo olo owa ningifa nge ndi mone osho va li tava ningi.
19 Onda li nda fa odi ya mwena tai twalwa koshidipaelo.
Kanda li ndi shii kutya ova li tava pangelele nge omhangela tava ti:
“Natu hanaune po omuti noiimati yao,
Natu mu teteni mo medu lovanamwenyo,
Opo edina laye liha dimbulukiwe vali.”
20 Ashike Jehova womatangakwaita oha tokola pauyuki;
Oha konakona omadiladilo omoule* nosho yo omutima.
Nandi mone eshi to va katukile onghatu,
Osheshi oshikoya shange onde shi eta kwoove.
21 Onghee hano, eshi osho Jehova ta ti shi na sha novalumenhu vokuAnatot, ovo va hala oku ku dipaa,* notava ti: “Ino xunganeka medina laJehova, ngeenge owe shi ningi, ohatu ku dipaa nomake etu”; 22 onghee hano, eshi osho Jehova womatangakwaita ta ti: “Ohandi ke va hokololifa. Ovalumenhu ovanyasha otava ka fya keongamukonda, novanamati vavo nosho yo ovanakadona vavo otava ka fya kondjala. 23 Itapa ka fyaala nokuli noshixupe, molwaashi ovalumenhu vokuAnatot ohandi ke va etela oudjuu momudo omo tava ka hokololifwa.”
12 Akutu! Jehova, oumuyuki, ngeenge handi eta oshikoya shange kwoove,
Ngeenge handi popi naave kombinga yoinima i na sha nouyuki.
Ndele omolwashike ondjila yovakolokoshi hai pondola,
Nomolwashike ovakengeleledi ihave lipula nasha?
2 Owe va twika, nova mena omidi.
Ova kula nohava imi oiimati.
Ou li komilungu davo, ashike ou li kokule nomadiladilo avo omoule.*
3 Ashike ou shii nge nawa, akutu! Jehova, ou wete nge;
Owa konakona omutima wange nowa mona kutya owa hangana naave.
Va tongola mo, ngaashi eedi tadi ka dipawa,
Noku ve likalekelela efiku ledipao.
4 Fiyo onaini oshilongo tashi kala sha kukuta
Noimeno yomomufitu keshe tai kukuta?
Omolwowii waavo ve li mo,
Oinamwenyo needila oda hanaunwa po.
Osheshi ohava ti: “Ke wete osho tashi ke tu ningilwa.”
5 Ngeenge oho loloka okutondoka novaendi vokolupadi,
Ongahelipi to ka dula okutondoka mefiyafano leenghambe?
Nonande ou na elineekelo moshilongo shi na ombili,
Ongahelipi to ka dula okupita momangade a fita aJordan?
6 Osheshi nokuli novamwanyoko vomeumbo laxo,
Ova ungaunga naave noukengeleledi.
Ove ku yelulila eendaka davo pombada.
Ino kala we ve lineekela,
Nokuli nonande ove ku lombwele oinima iwa.
7 “Onda hauluka eumbo lange; onda fiya po efyuululo lange.
Onda yandja oo ndi hole unene* meke lovatondi vaye.
8 Efyuululo lange ola ninga ngaashi onghoshi mofuka kwaame.
Osha kumbila nge.
Onghee onde shi tonda.
9 Efyuululo lange oli li ngaashi odila yomaluvala mahapu* ya kondeka nge;
Eedila dikwao hadi li ombelela ode i dingilila node i ponokela.
Ileni, ongaleni pamwe, nye oifitukuti aishe yomofuka,
Ileni mu lye.
10 Ovafita vahapu ova hanauna po oshikunino shange shomandjebele;
Ova lyataula oshitukulwa shange shedu.
Oshitukulwa shange osho shiwa ove shi ninga ombuwa yongaho.
11 Osha ninga eputu.
Osha kukuta;*
Osha mbuwapala moipafi yange.
Oshilongo ashishe osha ninga ombuwa,
Ndele kape na omunhu e shi tula komutima.
12 Omuhanauni okwe uya a dilila meendjila adishe dii da pita mombuwa,
Osheshi eongamukonda laJehova otali ka xwaka okudja komunghulo woshilongo fiyo okomunghulo mukwao.
Nokape na oo e* na ombili.
13 Ova kuna oilya yo-wheat, ashike ova teya omakiya.
Ove lilolola, nopehe na ouwa washa.
Otava ka fya ohoni oilikolomwa yavo,
Omolwehandu laJehova la xwama.”
14 Eshi osho Jehova ta ti shi na sha novashiinda shange aveshe ovakolokoshi, ovo hava kumu efyuululo olo nda ningifa oshiwana shange, Israel, shi kale shi na: “Ohandi ke va duda mo medu lavo, nohandi ka duda mo eumbo laJuda mokati kavo. 15 Ndele konima eshi nde va duda mo, ohandi ke va fila vali onghenda, nohandi ka shunifa keshe umwe kefyuululo laye nosho yo koshilongo shavo.”
16 “Nongeenge ove lihongo shili eendjila dovanhu vange nokwaana medina lange, tava ti ‘Oshili, ofimbo Jehova e na omwenyo!’ ngaashi va honga ovanhu vange okwaana kuBaal, kungaho, opo ashike tava ka kala mokati kovanhu vange. 17 Ndele ngeenge ova anye okudulika, ohandi ka duda mo yo oshiwana osho, handi shi duda mo noku shi hanauna po,” Jehova osho ta ti.
13 Eshi osho Jehova a lombwela nge ta ti: “Inda, ndele to limangele omwiya woliina moshiya shoye, ashike ino u tula momeva.” 2 Onghee onda landa omwiya she likolelela kondjovo yaJehova nonde u djala moshiya shange. 3 Nondjovo yaJehova oye uya kwaame oshikando oshitivali tai ti: 4 “Kufa omwiya, oo wa landa, nowe u djala, ndele to fikama, inda kuEufrat, ndele to u holeke oko momufya wemanya.” 5 Onghee onda ya, nonde u holeka kuEufrat, ngaashi naanaa Jehova a lombwela nge.
6 Ashike konima yomafiku mahapu, Jehova okwa lombwela nge ta ti: “Fikama, inda kuEufrat, ndele to kufa ko omwiya, oo nde ku lombwela u holeke oko.” 7 Onghee onda ya kuEufrat nonda fa mo omwiya, ndele handi u kufa ko konhele oko nda li nde u holeka, nonda mona kutya omwiya oo owa nyonauka; kawa li vali u na oshilonga nandenande.
8 Opo nee ondjovo yaJehova oye uya kwaame tai ti: 9 “Eshi osho Jehova ta ti, ‘Ohandi ka hanauna po ounhwa waJuda nosho yo ounhwa wa pitilila waJerusalem monghedi ya faafana. 10 Ovanhu ava vai ovo hava anye okudulika keendjovo dange, ovo hava shikula omitima davo vene va tangalala, naavo hava shikula ookalunga vamwe, have va longele noku ve linyongamena, otava ka ninga naanaa ngaashi omwiya ou uhe na vali oshilonga nandenande.’ 11 ‘Osheshi ngaashi ashike omwiya hau kala wa pama moshiya shomunhu, eumbo laIsrael neumbo alishe laJuda nalo osho nde li ninga li kale la pama kwaame,’ Jehova osho ta ti, ‘li ninge kwaame oshiwana, edina, ehambelelo noshinima shiwa. Ashike inava dulika.’
12 “Nou na yo oku va shiivifila etumwalaka eli kutya, ‘Eshi osho Jehova, Kalunga kaIsrael, ta ti: “Oshitoo keshe sha kula oshi na okuyadekwa omaviinyu.”’ Notave ke ku nyamukula tava ti, ‘Mbela katu shii nale kutya oshitoo keshe sha kula oshi na okuyadekwa omaviinyu?’ 13 Opo nee va lombwela to ti, ‘Eshi osho Jehova ta ti: “Ohandi ka kolwifa filufilu ovakalimo aveshe vomedu eli, eehamba odo di li omutumba kolukalwapangelo laDavid, ovapristeri novaprofeti nosho yo ovakalimo aveshe vomuJerusalem. 14 Nohandi ke va ningifa va nyanyaulafane po, ooxe nosho yo ovanamati,” Jehova osho ta ti. “Itandi ke va fila onghenda, ile ndi va udile oukwao wananghali, ile ndi va kenukile; kape na osho tashi ka kelela nge ndihe va hanaune po.”’
15 Pwilikineni nokuyandja elitulemo.
Inamu kala nokulinenepeka, osheshi Jehova okwa popya.
16 Yandjeni efimano kuJehova, Kalunga keni,
Ofimbo ina eta omilaulu
Nofimbo inamu koyola eemhadi deni keemhunda, eshi taku wiwile.
Otamu ka teelela ouyelele,
Ashike ota ka eta omudidimbe mulaula fokofoko;
Ote ke u lundululila momulaulu fokofoko.
17 Nongeenge omwa anye okupwilikina,
Ame* ohandi ka lila meholeko omolwounhwa weni.
Ohandi ka lila omahodi mahapu, nomesho ange otaa ka pololoka omahodi,
Molwaashi oufita waJehova owa twalwa moukwatwa.
18 Lombweleni ohamba nosho yo ina yohamba* kutya, ‘Kaleni omutumba ponhele oyo inai fimana,
Osheshi oshikoroni sheni shiwa otashi ka wa ko komitwe deni.’
19 Oilando yokolukadi oya idilwa,* nopehe na oo te i yeulula.
Juda ashishe osha twalwa moukwatwa, sha twalwa moukwatwa filufilu.
20 Yeluleni omesho eni nokutala ovo tava di kolundume.
Oufita weni oo mwa li mwa pewa ou li peni, eedi deni diwa?
21 Mbela otamu ka tya shike, ngeenge ehandukilo leni ole uya
Tali di kookaume keni, ovo mwa li mwa panga navo oukaume wopofingo okudja pehovelo?
Mbela ouyehame woshifeta shokudala itau ke mu hanga, ngaashi oo womukainhu ta dala?
22 Nongeenge owe lipopile momutima woye to ti, ‘Omolwashike oinima ei ya hanga nge?’
Omolwenyono loye linene, eshi oinyafa yoye ya dulwa mo,
Noififinwa yoye ya monifwa oshiponga.
23 Mbela Omukus* ota dulu ngoo okulundulula oshipa shaye, ile ongwe okulundulula outotone vayo?
Ngeenge osho, nanye otamu dulu okulonga ouwa,
Nye ovo mwa deulilwa okulonga owii.
24 Onghee ohandi ke va halakanifa, ngaashi oihati tai pepwa komhepo yomombuwa.
25 Eshi osho oshitukulwa shoye, onhele oyo nde ku metela,” Jehova osho ta ti,
“Molwaashi owa dimbwa nge nowe lineekela moipupulu.
26 Onghee hano, ohandi ka penuna oinyafa yoye i uvike oshipala shoye,
Nepenge loye otali ka monika,
27 Okuhaela kwoye, nohole yoye yokuhola oipala,
Oumbwada woye u kenyaneka.*
Koikulundudu, moixwa,
Onda mona elihumbato loye lififa ohoni.
Woo ove, akutu Jerusalem!
Fiyo onaini to kala ino koshoka?”
14 Ei oyo ondjovo yaJehova, oyo ye uya kuJeremia, i na sha noshikukuta tai ti:
2 Juda osha nyika oluhodi, noivelo yasho oya hanauka po.
Oya li ya efiwa i kale ya wila pedu,
Nelilaano otali di muJerusalem.
3 Noovene vavo ohava tumu ovapiya vavo* va ka teke omeva.
Ohava i komifima domeva,* noihava hange ko omeva.
Ohava shuna noikwatelwa yavo ihe na sha.
Ova fya ohoni nova nyematekwa,
Nohava uvike omitwe davo.
4 Molwaashi edu ola tenda omifya,
Osheshi medu olo kamu na odula,
Ovanamapya ova teka omukumo nova uvika omitwe davo.
5 Nokuli nonyapi yonghadi oya hauluka okanimwena kayo moixwa,
Molwaashi kape na omwiidi.
6 Eendongi deeshondolo oda fikama koikulundudu ihe na sha.
Otadi fudaana ngaashi ookavandje;
Omesho ado kae wete ko nawa, molwaashi kape na oikulya.
7 Nonande omanyono etu vene otaa yandje oumbangi kombinga yetu,
Akutu! Jehova, katuka onghatu omolwedina loye.
Osheshi oilonga yetu ihe fi youdiinini oihapu,
Notu li omhinge naave, eshi twa nyona.
8 Oove eteelelo laIsrael, Omuxupifi waye pomafimbo oudjuu,
Omolwashike wa fa omunailongo moshilongo,
Ngaashi omweendanandjila oo ta kanghama a nangale mo ashike oufiku?
9 Omolwashike wa fa omunhu oo a kumwa,
Nongaashi omunhu omunaenghono oo ita dulu okuxupifa?
Osheshi ou li mokati ketu, akutu! Jehova,
Notwa ifanwa nedina loye.
Ino tu efa.
10 Eshi osho Jehova ta ti shi na sha novanhu ava: “Ove hole okweelaela; inava kelela eemhadi davo. Onghee Jehova ine va hokwa. Paife ota ka dimbuluka omatimba avo note ke va hokololifa omolwomanyono avo.”
11 Opo nee Jehova okwa lombwela nge ta ti: “Ino ilikanena ovanhu ava va mone ouwa. 12 Ngeenge tave lidilike, ihandi pwilikine komaindilo avo, nongeenge tava yambe omaxwikiloyambo aeshe neendjayambo, ihandi kala nde a hokwa, osheshi ohandi ke va hanauna po neongamukonda, nondjala nosho yo nomukifi wolutapo.”*
13 Opo nee onda tya: “Woo ame, akutu! Omunamapangelo aeshe, Jehova! Paife ovaprofeti otava ti kuvo, ‘Itamu ka hangwa keongamukonda, nondjala itai ke mu hanga, ashike ohandi ke mu pa ombili yashili monhele ei.’”
14 Opo nee Jehova okwa lombwela nge ta ti: “Ovaprofeti otava xunganeke oipupulu medina lange. Inandi va tuma, inandi va lombwela noinandi popya navo. Emoniko loipupulu nenyanekelo longaho nosho yo oipupulu yomitima davo oyo tave mu xunganekele. 15 Onghee hano, eshi osho Jehova ta ti shi na sha novaprofeti ovo hava xunganeke medina lange, nonande inandi va tuma, nohava ti kape na eongamukonda, ile ondjala tai ke uya moshilongo eshi: ‘Ovaprofeti ovo otava ka xula po keongamukonda nokondjala. 16 Novanhu ovo hava xunganekelwa otava ka umbilwa momapandavanda aJerusalem omolwondjala neongamukonda, nopehe na oo te va pake, vo, ovakulukadi vavo, ovanamati vavo, ile ovanakadona vavo, osheshi ohandi ke va etela oupyakadi oo ve lilongela.’
17 “Ou na oku va lombwela ondjovo ei,
‘Omesho ange naa kunguluke omahodi oufiku nomutenya, inaa mona olufuwo,
Osheshi omonakadona elela woshiwana shange okwa nyanyaulwa nokwa teyaulwa filufilu,
Noshipute shinene shinyanyalifi.
18 Ngeenge onda i moixwa, ndele handi tale,
Ohandi mono ovo va dipawa keongamukonda!
Nongeenge onde uya moshilando,
Ohandi mono omikifi da etifwa kondjala!
Osheshi aveshe, omuprofeti nomupristeri, ova ka elaela moshilongo, osho vehe shii.’”
19 Mbela owa efa po filufilu Juda, ile owa* tonda Sion?
Omolwashike we tu denga, opo tuha dule okuveluka?
Opa li eteelelo lombili, ashike kape na sha shiwa she uya,
Efimbo lokuveluka, ndele ope na outile!
20 Otwa dimina owii wetu, akutu! Jehova,
Netimba lootatekulululwa,
Osheshi otwa nyona kwoove.
21 Omolwedina loye, ino tu ekelashi;
Ino tonda olukalwapangelo loye la fimana.
Dimbuluka, noino teya ehangano loye nafye.
22 Mbela mokati koikalunga ihe na oshilonga yoiwana ope na ngoo osho tashi dulu okulokifa odula,
Ile mbela eulu otali dulu tuu okutuma omata odula kulo vene?
Mbela haave auke, akutu! Jehova, Kalunga ketu?
Notwe lineekela mwoove,
Osheshi oove auke wa ninga oinima aishe ei.
15 Opo nee Jehova okwa lombwela nge ta ti: “Nokuli ngeno Moses naSamuel ova li ofika koshipala shange, ngeno itandi* ka fila onghenda ovanhu ava. Va taataa ko koshipala shange, nava ye. 2 Nongeenge ova ti kwoove, ‘Natu ye peni?’ Ou na oku va lombwela to ti, ‘Eshi osho Jehova ta ti:
“Keshe ou a tokolelwa omukifi omudipai, omukifi omudipai!
Keshe ou a tokolelwa eongamukonda, eongamukonda!
Keshe ou a tokolelwa ondjala, ondjala!
Nakeshe ou a tokolelwa okuya moukwatwa, omoukwatwa!”’
3 “‘Nohandi ke va etela oiponga ine,’* Jehova osho ta ti, ‘eongamukonda lokudipaa, eembwa di kokololeleshi, needila dokeulu noifitukuti yokombada yedu i xwake po nokuhanauna. 4 Nohandi ke va ninga oshinima shitilifi komauhamba aeshe okombada yedu omolwaManasse, omonamati waHiskia, ohamba yaJuda, omolwoshinima osho a ningile muJerusalem.
5 Olyelye te ke ku kenukila, akutu Jerusalem,
Olyelye te ke ku udila oukwao wananghali,
Nolyelye ta ka kanghama a pule kombinga yonghalonawa yoye?’
6 ‘Owa hauluka nge,’ Jehova osho ta ti.
‘Owa kala nokupilamena nge.*
Onghee ohandi ke ku yelulila eke lange noku ku hanauna po.
Onda loloka oku ku fila onghenda.*
7 Nohandi ke va yela nolukoolo poivelo yoshilongo.
Ohandi ke va kufa ovana vavo.
Ohandi ka hanauna po oshiwana shange,
Molwaashi osha anya okwaaluka ko keendjila dasho.
8 Ovafiyekadi vavo otava ka ninga vahapu neenghono moipafi yange ve dulife ehekedu lopominghulofuta.
Ohandi ke va etela omuhanauni moshanga shomutenya, a ponokele ooina nosho yo ovalumenhu ovanyasha.
Ohandi ke va etela oshisho nosho yo outile ombadilila.
9 Omukainhu oo a dala ounona vaheyali okwa ngabuka;
Ota* fuda noudjuu.
Etango laye ola ningina, ofimbo kuyela,
La etifa ohoni nosho yo elengwa.’*
‘Naavo vanini vomuvo va xupa po,
Ohandi ke va yandja keongamukonda moipafi yovatondi vavo,’ Jehova osho ta ti.”
10 Woo ame! Akutu, meme, eshi wa dala nge,
Ovanhu aveshe moshilongo otava tanguna nokulwifa nge.
Inandi ehela sha, ile nda ehelwa sha;
Ashike aveshe otava fingaele nge.
11 Jehova ota ti: “Oshili, ohandi ke ku ningila ouwa;
Ohandi ke ku popila shili pefimbo loupyakadi,
Pefimbo loudjuu omolwomutondi.
12 Mbela ope na ou ta dulu okuteyaula oshivela shilaula moitandu,
Oshivela shilaula sha dja kolundume nosho yo ongopolo?
13 Omaliko eni nosho yo omamona eni ohandi ke a efa a nyekwe ko,
Itaa ka landwa, ndele omolwomatimba eni aeshe, oo e li moitukulwa yeni aishe.
14 Ohandi ke a yandja kovatondi veni
A twalwe kedu olo muhe shii.
Osheshi omundilo owa xwamekwa kehandu lange,
Nola xwama omolweni.”
15 Ou shi shii, akutu! Jehova,
Dimbuluke nge nokuyandja elitulemo kwaame.
Handukila ovahepeki vange ponhele yange.
Ino efa ndi xule po,* molwaashi iho handuka diva.
Shiiva kutya omolwoye handi lididimikile esheko eli.
16 Eendjovo doye ode uya kwaame nonde di lya;
Nondjovo yoye oya ninga kwaame enyaku nosho yo ehafo lomutima wange,
Osheshi onda ifanwa nedina loye, akutu! Jehova, Kalunga komatangakwaita.
17 Ihandi kala omutumba mokati kaavo ve hole eenhingo nokuhafa.
Molwaashi eke loye oli li kombada yange, ohandi kala omutumba aame andike,
Osheshi owa yadifa nge nehandu.*
18 Omolwashike ouyehame wange wa kolonda, noshipute shange itashi ti po xwepo?
Otashi anye okuveluka.
Mbela oto kala kwaame ngaashi odjo yomeva oipupulu,
Oyo itai dulu okulineekelwa?
19 Onghee hano, eshi osho Jehova ta ti:
“Ngeenge owe lidilulula, opo ashike handi ke ku alula,
Noto ka kala ofika moipafi yange.
Ngeenge owa yoolola mo osho shi na ondilo mwaasho shihe na oshilonga,
Oto ka ninga ngaashi okanya kange mwene.*
Otave ke uya kwoove,
Ashike ove ito ka ya kuvo.”
20 “Ame ohandi ku ningi ekuma longopolo la pama kovanhu ava.
Otave ke ku lwifa shili,
Ashike itave ke ku dula,*
Osheshi ame ondi li pamwe naave, ndi ku amene noku ku xupifa,” Jehova osho ta ti.
21 “Nohandi ke ku xupifa meke lovakolokoshi,
Noku ku kulila meke lovakwanyanya.”
16 Ondjovo yaJehova oye uya vali kwaame tai ti: 2 “Ino likongela omukulukadi, noino kala u na ovanamati novanakadona monhele ei. 3 Osheshi eshi osho Jehova ta ti shi na sha novanamati novanakadona, ovo tava dalelwa omu, noshi na sha nooina ovo ve va dala, noshi na sha nooxe, ovo ve va ningifa va dalelwe medu eli: 4 ‘Otava ka fya komikifi di dipai, ashike kape na oo te ke va lila eenghali, ile e va pake; otava ka ninga ngaashi oushosho u li kombada yedu. Otava ka xula po keongamukonda nokondjala, noimhu yavo otai ka ninga oikulya yeedila dokeulu noyoifitukuti yokombada yedu.’
5 Osheshi eshi osho Jehova ta ti,
‘Ino ya meumbo olo li na oshivilo shovalilanghali,
Noino ya u ka lile eenghali, ile u va udile oukwao wananghali.’
‘Osheshi onda kufa po ombili yange povanhu ava,’ Jehova osho ta ti,
‘Nosho yo ohole yange i na oudiinini nonghenda.
6 Ovakulunhu nounona aveshe vomedu eli otava ka fya.
Itava ka pakwa,
Kape na oo te ke va lila,
Nokape na oo te ke lilengula, ile e likulule ongwala omolwavo.*
7 Nokape na oo ta ka yandja oikulya kwaavo tava lili eenghali,
Opo ve va hekeleke omolwanakufya wavo;
Nokape na oo te ke va pa eholo lehekeleko
Va nwe, molwaashi va filwa xe, ile ina.
8 Noino ya meumbo li na oitendele,
U kale omutumba pamwe navo u lye nou nwe.’
9 “Osheshi eshi osho Jehova womatangakwaita, Kalunga kaIsrael, ta ti, ‘Omu monhele ei, pefimbo leni nomoipafi yeni, ohandi ka xulifa po ondaka yenyaku noyehafo, ewi lomuhomboli newi lomuhombolwa.’
10 “Ngeenge owa lombwele ovanhu ava eendjovo adishe odo, otave ke ku pula tava ti, ‘Omolwashike Jehova a popila kutya ote ke tu etela oudjuu aushe oo munene? Epuko nenyono lilipi twa nyona koshipala shaJehova Kalunga ketu?’ 11 Nou na oku va nyamukula ngaha, ‘“Omolwaashi ooxokulululwa ova fiya nge po,” Jehova osho ta ti, “nova shikula ookalunga vamwe noku va longela noku ve linyongamena. Ashike ame ova fiya nge po, nomhango yange inave i diinina. 12 Ndele nye omwa longa unene owii mu dule ooxokulululwa, nakeshe umwe womunye okwa shikula omutima waye ukolokoshi a tangalala, ponhele yokudulika kwaame. 13 Onghee ohandi ke mu umba mo medu eli noku mu kupula medu, olo nye, ile ooxokulululwa inava shiiva, naako oko tamu ka longela ookalunga vamwe omutenya noufiku, molwaashi itandi ke mu fila onghenda.”’
14 “‘Ashike omafiku otae uya,’ Jehova osho ta ti, ‘eshi itava ka tya vali: “Oshili, ofimbo Jehova e na omwenyo, oo a kufa oshiwana shaIsrael medu laEgipiti!” 15 ndele ponhele yaasho, otava ka tya: “Oshili, ofimbo Jehova e na omwenyo, oo a kufa oshiwana shaIsrael medu lokolundume nokomadu aeshe, oko a li e va halakanifila!” nohandi ke va alulila medu lavo, olo nda pa ooxekulululwa.’
16 ‘Paife ohandi ka tuma ovayuli veeshi vahapu,’ Jehova osho ta ti,
‘Notave ke va yula.
Nokonima yaasho ohandi ka tuma ovakongo vahapu,
Notave ke va konga komhunda keshe nokoshikulundudu keshe,
Nomomifya domamanya.
17 Osheshi omesho ange oku wete oinima aishe oyo tava longo.*
Inai holekwa nge,
Nomapuko avo inaa holekwa omesho ange.
18 Tete, ohandi ke va shunifila shi fike pomapuko avo nopomanyono avo,
Osheshi ova nyateka edu lange noinima ihe na omwenyo* yoihongwafano yavo itondifa,
Nova yadifa efyuululo lange noinima yavo inyanyalifi.’”
19 Akutu! Jehova, eenghono dange nohotengulu yange,
Onhele yange yokutondokela mefiku loudjuu,
Kwoove oiwana oko tai uya okudja kominghulo dedu,
Notai ka tya: “Ootatekulululwa ova fyuulula oipupulu yongaho,
Oinima yongaho ihe na oshilonga, ihe na ouwa washa.”
20 Omunhu ota dulu tuu okuliningila ookalunga,
Ofimbo vo vehe fi ookalunga vashili?
21 “Onghee ohandi ke va honga,
Paife ohandi ke va ningifa va shiive eenghono dange nomafa ange,
Nove na okushiiva kutya edina lange oJehova.”
17 “Enyono laJuda ola shangwa noshishangifo shoshivela shilaula.
Ola hokelwa moshipelende shomutima wavo noxulo yokawe,
Nosho yo keembinga deealtari davo,
2 Ofimbo ovanamati vavo tava dimbuluka eealtari davo neepala davo diyapuki,*
Odo di li popepi nomuti wa kula mutalala, koikulundudu,
3 Keemhunda odo di li koitukulwa yokomikunda.
Omaliko eni, omamona eni aeshe ohandi ke a yandja a nyekwe ko;
Heeno, eenhele deni dokoikulundudu, omolwokunyona oko ku li moitukulwa yeni.
4 Otamu ke likanifila efyuululo nye vene, olo nde mu pa.
Nohandi ke mu ningifa mu longele ovatondi veni medu olo muhe shii,
Osheshi omwa xwameka ehandu lange, ngaashi omundilo.*
Otali ka kala la xwama fiyo alushe.”
5 Eshi osho Jehova ta ti:
“Omufingwa omunhu* oo te lineekele movanhu vongaho,
Oo e lineekela meenghono dovanhu,*
Naao omutima waye wa amuka ko kuJehova.
6 Ota ka ninga ngaashi omuti u lilile mombuwa.
Ita ka mona ouwa oo tau ke uya,
Ashike ota ka kala meenhele da kukuta mombuwa,
Medu lomongwa, omo muhe na oo ta dulu okukala mo.
8 Ota ka kala ngaashi omuti wa twikwa pomeva,
Oo hau tandaveleke omidi dao pomatondokelo omeva.
Ngeenge oupyu we uya, ite ke u uda,
Ndele omafo aye otaa ka kala alushe a hapa.
Nomomudo woshikukuta ita ka kala e na oshisho,
Noita ka efa po okwiimika oiimati.
9 Omutima ou na unene omakoto* u dule keshe shimwe, nowa nyonauka.*
Olyelye ta dulu oku u shiiva?
10 Ame, Jehova, ohandi konakona omutima,
Handi konakona omadiladilo omoule,*
Opo ndi pe keshe umwe she likolelela keendjila daye,
She likolelela koiimati yoilonga yaye.
11 Ngaashi ekonghola tali ongele osho inali nangela,
Oo he likongele oupuna uhe fi woshili* naye osho e li.
Otau ke mu fiya po lwopokati kwokukalamwenyo kwaye,
Nopexulilo, ota ka ulika kutya ke na eendunge.”
12 Olukalwapangelo loshinge la tumbalekwa okudja pehovelo,
Olo onhele yetu iyapuki.
13 Akutu! Jehova, elineekelo laIsrael,
Aveshe ovo ve ku fiya po otava ka fifwa ohoni.
Ovo tava amuka ko kwoove* otava ka shangwa mondwi,
Molwaashi ova efa po Jehova, odjo yomeva omanamwenyo.
14 Velule nge, akutu! Jehova, nohandi ka veluka.
Xupife nge, nohandi ka xupifwa,
Osheshi oove elitango lange.
15 Tala! Ope na ovo tava pula nge tava ti:
“Ondjovo yaJehova oi li peni?
Nai uye, alikana!”
16 Ashike ame inandi efa po oku ku shikula u li omufita,
Noinandi teelela nodjuulufi efiku loupyakadi.
Ou shii nawa keshe shimwe osho omilungu dange da popya;
Ashishe osha ningwa koshipala shoye!
17 Ino kala umutilifa kwaame.
Oove eameno lange mefiku loudjuu.
18 Ovahepeki vange nava fifwe ohoni,
Ashike ino efa nge, ndi fifwe ohoni.
Nava hangwe koumbada,
Ashike ino efa nge ndi hangwe koumbada.
Va etela efiku loudjuu,
Ndele to va nyanyaula noku va hanauna po filufilu.*
19 Eshi osho Jehova a lombwela nge ta ti: “Inda, ndele to fikama poshivelo shovanamati vovanhu opo hapa pitile eehamba daJuda, ngeenge tadi i mo notadi di mo, nopoivelo aishe yaJerusalem. 20 Ou na oku va lombwela to ti, ‘Pwilikineni ondjovo yaJehova, nye eehamba daJuda, ovanhu aveshe vomuJuda novakalimo aveshe vomuJerusalem, ovo hamu pitile poivelo ei. 21 Eshi osho Jehova ta ti: “Lipashukileni,* noinamu humbata eendongelwa mefiku lEshabata, ile mu di ete mo okupitila poivelo yaJerusalem. 22 Inamu eta eendongelwa tadi di komaumbo eni mefiku lEshabata; noinamu longa sha nandenande. Kalekeni efiku lEshabata liyapuki, ngaashi ashike nda lombwelele ooxokulululwa. 23 Ashike inava pwilikina, ile va pakaleke omatwi avo, ndele ova anya va tangalala* okudulika, ile okutambula ko outekuduliko.”’
24 “‘“Ashike ngeenge omwa dulika filufilu kwaame,” Jehova osho ta ti, “noinamu eta mo eendongelwa okupitila poivelo yoshilando eshi mefiku lEshabata, nomwa kaleke efiku lEshabata liyapuki mokuhalonga mo sha, 25 opo nee eehamba nomalenga, oo e li omutumba kolukalwapangelo laDavid, nao otae ke uya mo taa pitile poivelo yoshilando eshi, a londa momatemba nokeenghambe, do nomalenga ado, ovalumenhu vomuJuda novakalimo vomuJerusalem; noshilando eshi otashi ka kaliwa fiyo alushe. 26 Novanhu otave ke uya tava di moilando yaJuda, meenhele odo da dingilila Jerusalem, medu laBenjamin, moshitukulwa shomafilu, moshitukulwa shokeemhunda nokuNegeb,* tava eta omaxwikiloyambo aeshe, omayambo, eendjayambo, eka ledimba liwa nomapanduloyambo meumbo laJehova.
27 “‘“Ndele ngeenge inamu dulika kwaame mokukaleka efiku lEshabata liyapuki, nomokuhahumbata eendongelwa nomokuhe di eta mo tamu di pitifile poivelo yaJerusalem mefiku lEshabata, ohandi ka tomeka oivelo yasho omundilo, notau ka lungwinifa po filufilu eeshungongulu da pama daJerusalem noitau ka dimwa.”’”
18 Ei oyo ondjovo oyo ye uya kuJeremia ya dja kuJehova tai ti: 2 “Fikama nokuya kondjibololo yomuhongi woiyuma, naako oko handi ke ku ningifa u ude eendjovo dange.”
3 Onghee onda ya kondjibololo yomuhongi woiyuma nokwa li ta hongele poshihongelo. 4 Ashike oshiyuma osho omuhongi a li ta me nelova osha nyonaukila momake aye. Onghee omuhongi okwe shi hongulula moshiyuma shimwe, osho a li e wete tashi wapalele.*
5 Opo nee ondjovo yaJehova oye uya kwaame tai ti: 6 “‘Mbela itandi dulu oku ku ninga ngaashi omuhongi ou woiyuma a ninga, akutu eumbo laIsrael?’ Jehova osho ta ti. ‘Tala, ngaashi elova li li meke lomuhongi woiyuma, osho yo u li meke lange, akutu eumbo laIsrael. 7 Alushe ngeenge handi popi kombinga yokududa mo nokushila mo, nokuhanauna po oshiwana, ile ouhamba, 8 noshiwana osho osha efa po oukolokoshi oo nda tokola, naame ohandi ka lundulula omadiladilo ange e na sha* noupyakadi oo nda li nda hala oku shi etela. 9 Ashike alushe ngeenge handi popi kombinga yokutunga nokutwika oshiwana, ile ouhamba, 10 ndele tashi longo osho shii momesho ange noitashi dulika kondaka yange, ohandi ka lundulula omadiladilo ange e na sha* nouwa oo nda li nda hala oku shi ningila.’
11 “Alikana, paife lombwela ovalumenhu vomuJuda novakalimo vomuJerusalem to ti, ‘Eshi osho Jehova ta ti: “Paife ohandi longekida* oudjuu noku mu pangelela omhangela. Alikana, alukei mo meendjila deni dii nokulundulula eendjila deni nosho yo oilonga yeni.”’”
12 Ashike ova ti: “Kashi na ekwafo lasha! Osheshi ohatu ka enda twa shikula omadiladilo etu vene, nakeshe umwe womufye ota ka katuka she likolelela komutima waye mwii wa tangalala.”
13 Onghee hano, eshi osho Jehova ta ti:
“Lipuleni nye vene, alikana, mokati koiwana.
Olyelye a uda oshinima sha fa eshi?
Omonakadona elela waIsrael okwa ninga oshinima osho shii neenghono.
14 Mbela olumi* lokeemhunda daLibanon otali dulu tuu okuhengumuka ko komamanya asho?
Ile omeva matalala, oo taa kunguluka okudja kokule, otaa dulu ngoo okupwiinina po?
15 Ashike ovanhu vange ova dimbwa nge.
Osheshi ohava yambele oshinima shongaho omayambo,*
Nohava ningifa ovanhu va punduke meendjila davo, eendjila donale,
Va ende meendjila di lili, odo da ngolyauka, noinadi lalakana,*
16 Opo va ninge oshilongo shavo oshinima shitilifi
Noshinima shokushikilwa omwilwa fiyo alushe.
Keshe oo ta ende po pusho xuuninwa ota ka tala a tila nokupukapuka omutwe waye.
17 Ngaashi omhepo yokoushilo, ohandi ke ve lihanifa moipafi yomutondi.
Ohandi ke va pa ombuda yange, ndele hashipala shange, mefiku loudjuu wavo.”
18 Ndele ova ti: “Ileni, natu pangeleleni Jeremia omhangela, osheshi omhango* itai xulu po movapristeri vetu, ile omayele movalumenhu ovanaendunge, ile ondjovo movaprofeti. Ileni nokupopya tu mu pataneke,* noinatu yandja elitulemo kwaasho ta ti.”
19 Akutu! Jehova, yandja elitulemo kwaame
Nokupwilikina osho ovapataneki vange tava ti.
20 Mbela ouwa otau dulu okushunifilwa owii?
Osheshi ova fela omwenyo wange elambo.
Dimbuluka nghee nda kala ofika moipafi yoye ndi va popile mouwa,
U kufe po onya yoye puvo.
21 Onghee yandja ovanamati vavo kondjala,
Noku va yandja keenghono deongamukonda.
Ovakulukadi vavo nava nyike oluhodi omolwovana, nokuninga ovafiyekadi.
Ovalumenhu vavo nava dipawe komukifi omudipai,
Ovalumenhu vavo ovanyasha nava dipawe keongamukonda molwoodi.
22 Elilaano nali udike okudja momaumbo avo,
Eshi to ke va tumina ovanyeki ombadilila.
Osheshi ova fela nge elambo,
Nova tela eemhadi dange eemwiyo.
23 Ashike ove, akutu! Jehova,
Ou shii eemhangela adishe odo va pangelela nge va dipae nge.
Ino holeka enyono lavo,
Noino dima po etimba lavo koshipala shoye.
Nava wile po koshipala shoye,
Eshi to ke va katukila onghatu mehandu loye.
19 Eshi osho Jehova a ti: “Inda, ndele to lande oshitoo shedu komuhongi woiyuma. Kufa ovakulunhu voshiwana vamwe novakulunhu vovapristeri vamwe, 2 ndele tamu i kEfilu lOmonamati waHinnom, pOshivelo shOikangwa. Naako shiivifa eendjovo odo nde ku lombwela. 3 Oto ka tya, ‘Pwilikineni ondjovo yaJehova, nye eehamba daJuda nosho yo ovakalimo vomuJerusalem. Eshi osho Jehova womatangakwaita, Kalunga kaIsrael, ta ti:
“‘“Ondi li pokweeta oupyakadi monhele ei, nakeshe oo te ke shi uda ota ka kwatwa kehaluko.* 4 Molwaashi ova efa nge po, nova ningifa onhele ei iha dimbulukiwe. Ohava yambele mo ookalunga vamwe, ovo vo nooxekulululwa nosho yo eehamba daJuda va kala vehe shii, nova yadifa onhele ei nohonde yaavo vehe na etimba. 5 Ova tunga eenhele dokoikulundudu daBaal, opo va xwikile ko ovanamati vavo momundilo ve li omaxwikiloyambo aeshe kuBaal, oshinima osho inandi va lombwela, ile inandi popya noinashi uya mo nokuli nandenande momutima wange.”’*
6 “‘“Onghee hano, tala! omafiku otae uya,” Jehova osho ta ti, “eshi onhele ei itai ka ifanwa vali Tofet, ile Efilu lOmonamati waHinnom, ndele Efilu lOkudipaela. 7 Ohandi ka ponyifa eemhangela daJuda nodaJerusalem monhele ei, nohandi ke va ningifa va wile po keongamukonda moipafi yovatondi vavo nomeke laavo tava kongo omwenyo wavo. Nohandi ka yandja oimhu yavo i li oikulya keedila dokeulu nokoifitukuti yokombada yedu. 8 Nohandi ka ninga oshilando eshi oshinima shitilifi, noshinima shokushikilwa omwilwa. Keshe oo ta ende po pusho xuuninwa ota ka tala a tila nokushikila omwilwa oupyakadi washo aushe. 9 Ohandi ke va ningifa va lye ombelela yovanamati noyovanakadona vavo, nakeshe umwe ota ka lya ombelela yamukwao omolwekondeka noudjuu wavo, eshi va kondekelwa mo kovatondi vavo nokwaavo tava kongo omwenyo wavo.”’
10 “Opo nee tataula oshitoo moipafi yovalumenhu ovo va ya pamwe naave, 11 ndele to ti kuvo, ‘Eshi osho Jehova womatangakwaita ta ti: “Ovanhu ava osho handi ke va teyaula ngaha nosho yo oshilando eshi, ngaashi umwe oo ta tataula oshiyuma shomuhongi woiyuma, opo shiha dule vali okuhongululwa; notava ka paka ovafi muTofet, fiyo osheshi muhe na vali onhele yoku va paka.”’
12 “‘Osho osho handi ka ningila onhele ei,’ Jehova osho ta ti, ‘novakalimo vayo, ndi ninge oshilando eshi ngaashi Tofet. 13 Nomaumbo omuJerusalem nosho yo omaumbo eehamba daJuda otaa ka kala inaa koshoka ngaashi onhele ei, Tofet, heeno, omaumbo aeshe oo kombada yao va yambela etangakwaita alishe lokeulu omayambo, naako va tililashi ookalunga vamwe oikunwayambo.’”
14 Eshi Jeremia a aluka kuTofet, oko Jehova a li e mu tuma a ka xunganeke, okwa fikama momukala weumbo laJehova, ndele ta lombwele ovanhu aveshe ta ti: 15 “Eshi osho Jehova womatangakwaita, Kalunga kaIsrael, ta ti, ‘Paife ohandi etele oshilando eshi needoolopa dasho adishe oudjuu aushe oo nda ti ohandi shi etele, molwaashi ova anya filufilu* okudulika keendjovo dange.’”
20 Ndele nee Pashur, omonamati waImmer, omupristeri, oo a li yo omuwiliki omukulunhu meumbo laJehova, okwa li ta pwilikine, eshi Jeremia ta xunganeke oinima ei. 2 Opo nee Pashur okwa denga omuprofeti Jeremia, noku mu tula meti, olo la li pOshivelo shoPombada shaBenjamin, osho sha li meumbo laJehova. 3 Ashike mefiku la shikula ko, eshi Pashur a mangulula Jeremia meti, Jeremia okwe mu lombwela a ti:
“Jehova ine ku luka Pashur, ashike okwe ku luka Oumbada Wa Dingilila. 4 Osheshi eshi osho Jehova ta ti, ‘Ohandi ke ku ninga oshinima shitilifi kwoove mwene nokookaume koye aveshe, notava ka fya keongamukonda lovatondi vavo, ofimbo omesho oye taa tale; nohandi ka yandja Juda ashishe meke lohamba yaBabilon, notai ke va twala moukwatwa muBabilon noku va dipaa neongamukonda. 5 Nohandi ka yandja oupuna aushe woshilando eshi, omaliko asho aeshe, oinima yasho aishe yondilo nomamona aeshe eehamba daJuda meke lovatondi vavo, notave ke i nyeka ko noku i kwata ko, ndele tave i twala kuBabilon. 6 Ndele shi na sha naave, Pashur, nosho yo aveshe ovo hava di meumbo loye otamu ka ya moukwatwa. Oto i kuBabilon, ndele to file oko, naako oko to ka pakwa pamwe nookaume koye aveshe, molwaashi owe va xunganekela oipupulu.’”
7 Owa heka nge, akutu! Jehova, nonda hekwa.
Owa ulika kutya ou na eenghono u dule nge, nowa findana.
Efiku alishe onda ninga oshinima shiyolifa;
Keshe umwe ota lengaifa nge.
8 Osheshi alushe ngeenge handi popi, ondi na okwiingida nokushiivifa,
“Elongifo leenghono nehanauno!”
Osheshi ondjovo yaJehova oya kala nokutukifa nge nokushekifa nge efiku alishe.
9 Onghee onda ti: “Itandi ke mu tumbula vali,
Noitandi ka popya vali edina laye.”
Ashike momutima wange omwa ninga ngaashi omundilo wa xwama wa tomekwa momakipa ange,
Nonda li nda loloka oku u kwatela mo;
Inandi dula vali oku shi lididimikila.
10 Osheshi onda uda omitotolombo dihapu dii;
Oumbada owa dingilila nge.
“Mu lundileni; natu mu lundileni!”
Omunhu keshe ta halele nge ombili okwa li a teelela ndi punduke ta ti:
“Pamwe ota ka ninga oshinima sha nyika oulai,
Nohatu ka dula okupondola, ndele hatu mu shunifile owii.”
11 Ashike Jehova oku li pwaame, ngaashi omukwaita omunaenghono iha tila sha.
Nomolwaashi ovo tava hepeke nge tava ka wila po, noitava ka pondola.
Otava ka fifwa ohoni inene, molwaashi itava ka pondola.
Elengwa lavo laalushe itali ka dimbiwa.
12 Ashike ove, akutu! Jehova womatangakwaita, oto konakona omuyuki;
Ou wete omadiladilo omoule* nosho yo omutima.
Nandi mone eshi to va katukile onghatu,
Osheshi oshikoya shange onde shi eta kwoove.
13 Imbileni Jehova! Tangeni Jehova!
Osheshi okwa xupifa ohepele* meke lovalongi vowii.
14 Efiku olo nda dalwa nali fingwe!
Efiku olo meme a dala nge inali nangekwa noupuna!
15 Omunhu ou a etela tate onghundana iwa na fingwe, ou a ti:
“Owa dalelwa omonamati, omumati!”
E mu hafife neenghono.
16 Omunhu oo na ninge ngaashi oilando oyo Jehova a hanauna po, nopehe na onghenda.
Na ude elilaano ongula nosho yo ondaka yelondwelo moshanga shomutenya.
17 Omolwashike ina dipaela nge moshidalelo,
Opo meme a ninge ombila yange
Noshidalelo shaye shi kale alushe shi na oufimba?
18 Omolwashike nda li ndi na okudja mo moshidalelo
Ndi mone oudjuu noluhodi,
Ndi mane ko omafiku ange nda fya ohoni?
21 Jeremia okwa yakula ondjovo ya dja kuJehova, eshi ohamba Sedekia ya tuma kuye Pashur, omonamati waMalkia, nosho yo Sefania, omonamati waMaasea, omupristeri, e mu pule ta ti: 2 “Alikana, pula Jehova ponhele yetu, molwaashi ohamba yaBabilon, Nebukadnesar,* oya shinga oita, i tu lwife. Pamwe Jehova ta ka longa shimwe shomoikumwifilonga yaye ponhele yetu, opo i dje po pufye.”
3 Jeremia okwe va lombwela a ti: “Eshi osho mu na okulombwela Sedekia, 4 ‘Eshi osho Jehova Kalunga kaIsrael ta ti: “Paife ohandi mu pilukile po* noilwifo yoita oyo i li momake eni vene, oyo tamu lwifa nayo ohamba yaBabilon nosho yo Ovakaldea, ovo ve li kondje yekuma ve mu kondeka. Nohandi ke va ongela mokati koshilando eshi. 5 Nohandi ke mu lwifa ame mwene neke la yeluka nosho yo nokwooko ke na eenghono nehandu, nonya nosho yo nehandu linene. 6 Ohandi ka denga ovakalimo vomoshilando eshi, ovanhu noinamwenyo. Otava ka fya koudu* wolutapo munene.”’
7 “‘“Nokonima yaasho,” Jehova osho ta ti, “ohandi ka yandja ohamba yaJuda, Sedekia, nosho yo ovapiya vayo novanhu vomoshilando eshi, ovo va xupa koudu wolutapo, keongamukonda nosho yo kondjala meke lohamba yaBabilon, Nebukadnesar,* meke lovatondi vavo nosho yo meke laavo tava kongo omwenyo wavo. Ote ke va dipaa neongamukonda. Ite ke va fila onghenda, noite ke va kenukila noita ka kala e na olune.”’
8 “Novanhu ava ou na oku va lombwela to ti, ‘Eshi osho Jehova ta ti: “Taleni, ohandi mu tulile po ondjila yomwenyo nosho yo ondjila yefyo. 9 Ovo tava kala moshilando eshi otava ka fya keongamukonda, kondjala nosho yo koudu wolutapo. Ashike keshe oo ta i nokuliyandja kOvakaldea, ovo ve mu kondeka, ota ka kala nomwenyo, note ke lixupifila omwenyo waye u li onga oshixuulwa.”’*
10 “‘“Osheshi oshipala shange onde shi taalelifa oshilando eshi omolwoudjuu, ndele hamolwouwa,” Jehova osho ta ti. “Otashi ka yandjwa meke lohamba yaBabilon, notai ke shi xwika po nomundilo.”
11 “‘Kovaneumbo vohamba yaJuda: Udeni ondjovo yaJehova. 12 Akutu eumbo laDavid, eshi osho Jehova ta ti:
“Diinineni ouyuki ongula keshe,
Nokuxupifa oo ta nyekulwa meke lomukengeleledi,
Opo ehandu lange liha xwame ngaashi omundilo,
Noliha kale la xwama nopehe na oo te li dimi,
Omolwoilonga yeni ii.”’
13 ‘Taleni, ohandi mu handukile, akutu ovakalimo vomefilu,
Akutu emanya lomedu la lalakana,’ Jehova osho ta ti.
‘Shi na sha nanye ovo hamu ti: “Olyelye te ke tu handukila?
Nolyelye ta ka ponokela omalukalwa etu?”
14 Ohandi ke ku handukila
Shi fike poilonga yoye,’ Jehova osho ta ti.
‘Nohandi ka tomeka ofuka yasho omundilo,
Notau ka lungwinifa po oinima aishe, oyo ye shi dingilila.’”
22 Eshi osho Jehova ta ti: “Inda keumbo* lohamba yaJuda, ndele to yandje etumwalaka eli. 2 Ou na okutya, ‘Uda ondjovo yaJehova, akutu ohamba yaJuda, ove ou ho kala omutumba kolukalwapangelo laDavid, ove pamwe novapiya voye nosho yo ovanhu voye, ovo hava pitile moivelo ei. 3 Eshi osho Jehova ta ti: “Longeni ouyuki naasho sha yuka. Xupifa oo ta nyekwa meke lomukengeleledi. Ino ungaunga nai nomunailongo keshe, noino ehameka okaana keshe kehe na xe,* ile omufiyekadi. Noino tilashi ohonde ihe na etimba monhele ei. 4 Osheshi ngeenge owa wanifa po nawa ondjovo ei, opo nee eehamba, odo hadi kala omutumba kolukalwapangelo laDavid, otadi ka pitila poivelo yeumbo eli, da londa momatemba nokeenghambe, do novapiya vado nosho yo ovanhu vado.”’
5 “‘Ashike ngeenge itamu dulika keendjovo edi, ohandi ane kwaame mwene,’ Jehova osho ta ti, ‘kutya eumbo eli otali ka ninga onduba yomakuma.’
6 “Osheshi eshi osho Jehova ta ti shi na sha nohamba yaJuda,
‘Ove ou li ngaashi Gilead kwaame,
Ngaashi oxulo yaLibanon.
Ashike ohandi ke ku ninga ombuwa;
Nokape na shimwe shomoilando yoye tamu ka kalwa.
7 Nohandi ke mu tumina* ovahanauni,
Keshe umwe e na oilwifo yaye.
Otava ka teta po omisederi deni odo diwa elela
Noku di ekela momundilo.
8 “‘Noiwana ihapu otai ka enda poshilando eshi, ndele tai pulafana tai ti: “Omolwashike Jehova a ningila ngaha oshilando eshi shinene?” 9 Notai ka nyamukula tai ti: “Omolwaashi ova efa po ehangano laJehova, Kalunga kavo, ndele tave linyongamene ookalunga vamwe noku va longela.”’
10 Inamu lila omolwaao a fya,
Noinamu mu udila oukwao wananghali.
Ponhele yaasho, lileni unene omolwaao ta i,
Osheshi ita ka aluka vali a mone edu omo a dalelwa.
11 “Osheshi eshi osho Jehova ta ti shi na sha naSallum,* omonamati waJosia, ohamba yaJuda, oo ta pangele ponhele yaxe, Josia, naao a dja mo monhele ei kutya, ‘Ita ka aluka vali. 12 Osheshi ota ka fila monhele omo ve mu twala moukwatwa, noita ka mona vali edu eli.’
13 Woo oo te litungile eumbo nopehe na ouyuki
Neenduda dopombada mokuhenouyuki,
Oo ta longifa omunhu mukwao epwanga,
Oo ta anye okufuta ondjabi yaye;
14 Oo ta ti, ‘Ohandi litungile eumbo la kula
Li na eenduda dopombada da andjuka.
Ohandi li tula omakende
Nohandi li dengele omisederi noku li painda noluvala litilyana.’
15 Mbela oto ka twikila okupangela, molwaashi wa longifa omisederi dihapu u dule vamwe?
Xo okwa li yo ha li nokunwa,
Ashike okwa longa ouyuki naasho sha yuka,
Noshe mu endela nawa.
16 Okwa popila oshikoya shomufininikwa noshohepele,
Onghee osha enda nawa.
‘Mbela okushiiva nge hasho sha hala okutya ngaho?’ Jehova osho ta ti.
17 ‘Ndele omesho nomutima woye otai yandje ashike elitulemo keliko loye loipupulu,
Kokutilashi ohonde ihe na etimba,
Nokokukengelela nokunyokoma.’
18 “Onghee hano, eshi osho Jehova ta ti shi na sha naJehoiakim, omonamati waJosia, ohamba yaJuda,
‘Itave ke mu lila tava ti:
“Woo omumwatate! Woo omumwameme!”
Itave ke mu lila tava ti:
“Woo, akutu! Omwene! Woo, etumbalo laye!”
19 Ota ka pakwa ngaashi ondongi,
Ta ka kokololwa nokukupulwashi
Kondje yoivelo yaJerusalem.’
20 Inda kuLibanon, ndele to ingida,
Yelula ondaka yoye muBasan,
Nokulalekida okudja muAbarim,
Osheshi aveshe ovo u hole unene ova nyanyaulwa po.
21 Onda popya naave, eshi wa li u udite u li meameno.
Ashike owa ti, ‘Itandi dulika.’
Ondjila oyo oyo wa kala to shikula okudja kounyasha,
Osheshi ove ino dulika kondaka yange.
22 Omhepo otai ka lifa ovafita voye aveshe,
Naavo u hole unene otava ka ya moukwatwa.
Opo nee oto ka fifwa ohoni nokulengaifwa omolwoudjuu woye aushe.
23 Akutu ove ou ho kala muLibanon,
Wa tungila oshihadi mokati komisederi,
Ngeenge wa hangwa koudjuu ito ka kema tuu,
Kouyehame* ngaashi oo womukainhu ta dala!”
24 “‘Oshili, ofimbo ame ndi na omwenyo,’ Jehova osho ta ti, ‘nokuli nonande ngeno Konia,* omonamati waJehoiakim, ohamba yaJuda, okwa li olinga yoshihako i li keke lange lokolulyo, ngeno ohandi ke ku xukula ko! 25 Ohandi ke ku yandja meke laavo tava kongo omwenyo woye, meke laavo ho tila, meke lohamba yaBabilon, Nebukadnesar,* nomeke lOvakaldea. 26 Nohandi ke ku umbila, ove nosho yo nyoko oo e ku dala, medu limwe omo ino dalelwa, nomo tamu ka fila. 27 Noitava ka shuna vali nandenande kedu, olo va li va halelela.*
28 Mbela omulumenhu ou Konia oku tondike, ngaashi oshitoo sha tatuka,
Oshiyuma osho pehe na oo e shi hala?
Omolwashike ye noludalo laye va ekelwashi,
Nova umbilwa medu olo vehe shii?’
29 Akutu edu,* edu, edu, uda ondjovo yaJehova.
30 Eshi osho Jehova ta ti:
‘Shanga omulumenhu ou onga oo ehe na ovana,
Ngaashi omulumenhu oo ina pondola nandenande pefimbo* lokukalamwenyo kwaye,
Osheshi kape na nande oumwe womoludalo laye ta ka pondola
Mokukala omutumba kolukalwapangelo laDavid nomokupangela vali muJuda.’”
23 “Woo ovafita, ovo tava hanauna po nokuhalakanifa eedi doulifilo wange!” Jehova osho ta ti.
2 Onghee hano, eshi osho Jehova, Kalunga kaIsrael, ta ti shi na sha novafita, ovo tava lifa ovanhu vange: “Omwa halakanifa eedi dange; omwa twikila oku di halakanifa, noinamu di pa elitulemo.”
“Onghee ohandi ke mu handukila omolwoilonga yeni ii,” Jehova osho ta ti.
3 “Opo nee ohandi ka ongela pamwe oshixupe sheedi dange okudja koilongo aishe, oko nde di halakanifila, nohandi ke di alulila koulifilo wado, notadi ka dalafana nokuhapupala. 4 Nohandi ke di kongela ovafita, ovo tave ke di lifa shili. Itadi ka mbadapala vali, ile di tilifwe, nokape na nande oimwe tai ka kana,” Jehova osho ta ti.
5 “Tala! Omafiku ota e uya,” Jehova osho ta ti, “eshi handi ka tutumifila David oshitai* shouyuki, nohamba otai ka pangela nokuulika eendunge nokulonga ouyuki naasho sha yuka moshilongo. 6 Pefimbo layo, Juda ota ka xupifwa, na Israel ota ka kala meameno. Naali olo edina olo ta ka ifanwa: Jehova Oye Ouyuki Wetu.”
7 “Ashike omafiku ota e uya,” Jehova osho ta ti, “eshi itava ka tya vali, ‘Oshili, ofimbo Jehova e na omwenyo, oo a kufa oshiwana shaIsrael medu laEgipiti!’ 8 Ndele ponhele yaasho, otava ka tya, ‘Oshili, ofimbo Jehova e na omwenyo, oo a kufa mo nokwaalula oludalo lomeumbo laIsrael medu lokolundume nokomadu aeshe, oko nda li nde va halakanifila,’ notava ka kala medu lavo vene.”
9 Shi na sha novaprofeti ohandi ti:
Omutima wange owa teyauka mwaame.
Omakipa ange aeshe otaa kakama.
Onda fa omunhu a kolwa
Nonda fa omunhu a dulika eenghono komaviinyu,
OmolwaJehova nomolweendjovo daye diyapuki.
10 Osheshi edu oli yadi ovahaeli;
Edu ola nyika oluhodi omolwefingo
Nomaulifilo omombuwa okwa kukuta.
Ondjila yavo oii nohava longifa nai eenghono davo.
11 “Aveshe, omuprofeti nomupristeri, ova nyonauka.*
Nokuli nomeumbo lange onda hanga mo owii wavo,” Jehova osho ta ti.
12 “Onghee elila lavo otali ka ninga omufenu nomulaulu;
Otava ka undulwa, ndele tava wile po.
Osheshi ohandi ke va tumina oupyakadi
Momudo wetokolo,” Jehova osho ta ti.
13 “Nomovaprofeti vomuSamaria onda mona mo oshinima shitondifa.
Omaxunganeko avo okwa nwefwa mo kuBaal,
Nohava pukifa oshiwana shange, Israel.
14 Nomovaprofeti vomuJerusalem onda mona mo oinima inyanyalifi.
Kwaame aveshe ova fa Sodom,
Novakalimo vamo ova fa Gomorra.”
15 Onghee hano, eshi osho Jehova womatangakwaita ta ti shi na sha novaprofeti:
“Paife ohandi va ningifa va lye oshimbodi shilula
Nohandi va pe omeva e na oudiyo va nwe.
Osheshi oushunimonima owe lihanena moshilongo ashishe okudja kovaprofeti vomuJerusalem.”
16 Eshi osho Jehova womatangakwaita ta ti:
“Inamu pwilikina keendjovo dovaprofeti, ovo tave mu xunganekele.
Otave mu pukifa.*
Emoniko, olo tava popi, ola dja momitima davo vene,
Inali dja mokanya kaJehova.
17 Otava lombwele ovo inava fimaneka nge lwoikando noikando tava ti,
‘Jehova okwa ti: “Otamu ka hafela ombili.”’
Nokukeshe oo ha shikula omutima waye a tangalala, ohava ti,
‘Kape na oupyakadi washa tau ke mu hanga.’
18 Osheshi olyelye a li mokati kongudu yookaume kaJehova,
Opo a mone noku ude ondjovo yaye?
Olyelye a yandja elitulemo kondjovo yaye, opo e i ude?
19 Tala! Oshikungulu shomhepo shaJehova otashi tukuluka mehandu;
Ngaashi efudaela linene tali dingonoka kombada yomitwe dovakolokoshi.
20 Ehandu laJehova itali ka lota
Fiyo osheshi a wanifa po nokwa hanga omahalo omutima waye.
Pexulilo lomafiku otamu ka uda ko filufilu oshinima eshi.
21 Inandi tuma ovaprofeti, ashike ova tondoka.
Inandi popya navo, ashike ova xunganeka.
22 Ashike ngeno ova kalele mokati kongudu yookaume kange,
Ngeno ova ningifa ovanhu vange va ude eendjovo dange
Nove va ningifa ngeno va efe po ondjila yavo ii nosho yo oilonga yavo ii.”
23 “Mbela aame ashike Kalunga kopopepi,” Jehova osho ta ti, “ndele nghi fi yo Kalunga kokokule?”
24 “Mbela ope na ngoo omunhu ta dulu okuhondama monhele omo itandi dulu oku mu mona?” Jehova osho ta ti.
“Mbela kandi li yo meulu nosho yo kombada yedu?” Jehova osho ta ti.
25 “Onda uda ovaprofeti, ovo tava xunganeke oipupulu medina lange, tava ti, ‘Onda twa ondjodi! Onda twa ondjodi!’ 26 Fiyo onaini oshinima eshi tashi twikile momitima dovaprofeti, va xunganeke oipupulu? Vo ovaprofeti voukengeleledi womitima davo vene. 27 Ova hala okudimbwifa ovanhu vange edina lange okupitila meendjodi odo hava lombwelafana, ngaashi ashike ooxe va dimbwa edina lange omolwaBaal. 28 Omuprofeti, oo a twa ondjodi, na popye ondjodi, ashike oo e na ondjovo yange na popye ondjovo yange moshili.”
“Oihati oi na ekwatafano lashike noilya?” Jehova osho ta ti.
29 “Mbela ondjovo yange kai li ngaashi omundilo,” Jehova osho ta ti, “nongaashi ohamala yokuhambulifa oyo hai tataula omamanya?”
30 “Onghee paife ame ohandi ka handukila ovaprofeti,” Jehova osho ta ti, “ovo hava vake eendjovo dange kuvamwe.”
31 “Paife ame ohandi ka handukila ovaprofeti,” Jehova osho ta ti, “ovo hava longifa elaka lavo va tye, ‘Ye osho a ti!’”
32 “Paife ohandi ka handukila ovaprofeti veendjodi doipupulu,” Jehova osho ta ti, “ovo have di popi nokupukifa ovanhu vange omolwoipupulu yavo nosho yo okulitanga kwavo.”
“Ashike ame inandi va tuma, ile ndi va lombwele sha. Onghee itava ka etela ovanhu ava ouwa washa nandenande.” Jehova osho ta ti.
33 “Nongeenge ovanhu ava, ile omuprofeti, ile omupristeri ove ku pula kutya, ‘omutengi* waJehova oulipi?’ ou na oku va nyamukula to ti, ‘“Nye ovanhu onye omutengi! Nohandi ke mu ekelashi,” Jehova osho ta ti.’ 34 Shi na sha novaprofeti, ile ovapristeri, ile ovanhu ovo hava ti, ‘Ou oo omutengi* waJehova!’ ohandi ka handukila omunhu oo nosho yo ovaneumbo laye. 35 Eshi osho keshe umwe womunye ta pula mukwao nosho yo omumwaxe ta ti, ‘Jehova okwa nyamukula ngahelipi? Na Jehova okwa popya shike?’ 36 Ashike inamu tumbula vali omutengi* waJehova, osheshi omutengi* oo oo ondjovo yakeshe umwe, nomwa lundulula eendjovo daKalunga omunamwenyo, Jehova womatangakwaita, Kalunga ketu.
37 “Eshi osho u na okupula omuprofeti, ‘Jehova okwe ku nyamukula ngahelipi? Na Jehova okwa popya shike? 38 Nongeenge omwa twikile okutya, “omutengi* waJehova!” eshi osho Jehova ta ti: “Molwaashi ohamu ti, ‘Ondjovo ei oyo omutengi* waJehova,’ konima eshi nde mu lombwela kutya, ‘Inamu tya: “Omutengi* waJehova!”’ 39 Taleni! Ohandi ke mu tumba po noku mu kupulashi mu dje nge momesho, nye nosho yo oshilando, osho nde mu pa nosho yo ooxokulululwa. 40 Nohandi ke mu fifa ohoni yaalushe nosho yo elengwa laalushe, olo itali ka dimbuwa.”’”
24 Opo nee Jehova okwa ulikila nge oimbale ivali yeenghwiyu ya tulwa motembeli yaJehova, konima eshi ohamba yaBabilon, Nebukadnesar,* ya twala moukwatwa Jekonia,* omonamati waJehoiakim, ohamba yaJuda, pamwe nomalenga aJuda, ovahambwidi, novahambuli voivela;* ye va kufa kuJerusalem noku va twala kuBabilon. 2 Oshimbale shimwe osha li shi na eenghwiyu diwa lela, ngaashi eedive, ofimbo oshimbale shikwao sha li shi na eenghwiyu dii unene, dii neenghono itadi dulu okuliwa.
3 Opo nee Jehova okwa pula nge ta ti: “Jeremia ou wete shike?” Onghee onda ti: “Eenghwiyu, eenghwiyu odo diwa odiwa lela, ashike odo dii odii unene, dii neenghono itadi dulu okuliwa.”
4 Opo nee ondjovo yaJehova oye uya kwaame tai ti: 5 “Eshi osho Jehova, Kalunga kaIsrael, ta ti, ‘Ngaashi eenghwiyu edi diwa, osho handi ka tala ko nawa eenghwate daJuda, odo nda lekela okudja monhele ei, di ye kedu lOvakaldea. 6 Ohandi ke di pashukila omolwouwa wado, nohandi ke di ningifa di alukile medu eli. Ohandi ke di tunga noitandi ke di teyaula po; ohandi ke di twika noitandi ke di duda mo. 7 Nohandi ke di pa omutima wokushiiva nge kutya aame Jehova. Otadi ka ninga ovanhu vange, nohandi ka ninga Kalunga kado, osheshi otadi ka alukila kwaame nomutima wado aushe.
8 “‘Ashike shi na sha neenghwiyu odo dii neenghono itadi dulu okuliwa, eshi osho Jehova ta ti: “Onghee osho handi ka ninga ohamba yaJuda, Sedekia, omalenga ayo, ooluxupe vomuJerusalem, ovo va fyaala medu eli, nosho yo ovo hava kala medu laEgipiti. 9 Ohandi ke va ninga oshinima shitilifi nosho yo oupyakadi komauhamba aeshe okombada yedu, shodino, shomunghapo, osheetifi shesheko, nefingo meenhele adishe, omo nde va halakanifila. 10 Nohandi ke va tumina eongamukonda, ondjala noudu* wolutapo, fiyo osheshi va xula po medu olo nde va pa nosho yo ooxekulululwa.”’”
25 Ondjovo oyo ye uya kuJeremia i na sha novanhu aveshe vomuJuda momudo omutine waJehoiakim, omonamati waJosia, ohamba yaJuda, oo wa li omudo wotete wohamba yaBabilon, Nebukadnesar.* 2 Eshi osho omuprofeti Jeremia a popya shi na sha novanhu aveshe vomuJuda nosho yo novakalimo aveshe vomuJerusalem ta ti:
3 “Okudja momudo omuti-13 waJosia, omonamati waAmon, ohamba yaJuda, fiyo onena eli, eedula edi 23, ondjovo yaJehova oye uya kwaame, nonda kala nokupopya nanye lwoikando noikando,* ashike inamu pwilikina. 4 Na Jehova okwe mu tumina ovapiya vaye aveshe ovaprofeti, e va tuma lwoikando noikando,* ndele inamu pwilikina, ile mu pakaleke okutwi kweni. 5 Ohava ti, ‘Alikana, keshe umwe womunye na efe po eendjila daye dii noilonga yaye ii, opo nee nye otamu ka twikila okukala efimbo lile monakwiiwa medu olo Jehova e mu pa nalenale nye nooxokulululwa. 6 Inamu shikula ookalunga vamwe noku va longela noku ve linyongamena, mu handukife nge noilonga yomake eni; ngeenge hasho, ohandi ke mu etela oudjuu.’
7 “‘Ashike nye inamu pwilikina kwaame,’ Jehova osho ta ti. ‘Ponhele yaasho, omwa handukifa nge noilonga yomake eni, mwe lietela oudjuu nye vene.’
8 “Onghee hano, eshi osho Jehova womatangakwaita ta ti, ‘“Molwaashi inamu dulika keendjovo dange, 9 ohandi tumu omapata aeshe okolundume,” Jehova osho ta ti, “handi tumu ohamba yaBabilon, Nebukadnesar,* omupiya wange, nohandi va tumine oshilongo eshi, novakalimo vasho noiwana aishe yopopepi. Ohandi ke va hanauna po filufilu noku va ninga oshinima shitilifi, oshinima shokushikilwa omwilwa nehanauno laalushe. 10 Ohandi ka xulifa po ondaka yenyaku nosho yo ondaka yehafo puvo, ewi lomuhomboli newi lomuhombolwa, omalinyengo oshini shokukweya nouyelele wolamba. 11 Nedu alishe eli otali ka hanaunwa po notali ka ningwa oshinima shitilifi, noiwana ei otai ka longela ohamba yaBabilon oule weedula 70.”’
12 “‘Ashike ngeenge eedula 70 da wanifwa po, ohandi ka hokololifa* ohamba yaBabilon noshiwana osho omolwenyono lasho,’ Jehova osho ta ti, ‘nohandi ka ninga edu lOvakaldea eputu fiyo alushe. 13 Edu olo ohandi ke li wanifila eendjovo dange adishe odo nda popya shi na sha nalo, adishe odo da shangwa membo eli, odo Jeremia a xunganekela oiwana aishe. 14 Osheshi oiwana ihapu neehamba dinene otadi ke va ninga ovapika vavo, nohandi ke va shunifila she likolelela koilonga yavo nosho yo koilonga yomake avo.’”
15 Osheshi eshi osho Jehova, Kalunga kaIsrael, a lombwela nge a ti: “Kufa eholo eli lomaviinyu lehandu meke lange, nokunwefa mo oiwana aishe oko handi ku tumu. 16 Notai ka nwa nokufunga nokupwiduka omolweongamukonda olo handi tumu mokati kayo.”
17 Onghee onda kufa eholo meke laJehova nonda nwefa mo oiwana aishe, oko Jehova a tuma nge: 18 Nda hovela naJerusalem noilando yaJuda, eehamba dasho, nomalenga asho, ndi va hanaune po, ndi va ninge oshinima shitilifi, oshinima shokushikilwa omwilwa noshefingo, ngaashi shi li kunena; 19 opo nee taku shikula ohamba yaEgipiti, Farao, novapiya vayo, omalenga ayo nosho yo ovanhu vayo aveshe, 20 novanhu vavo aveshe va lumbakana; eehamba adishe domedu laUs; eehamba adishe domedu lOvafilisti, Askelon, Gasa, Ekron naavo va fyaala muAsdod; 21 Edom, Moab nOvaammoni; 22 eehamba adishe daTirus, eehamba adishe daSidon neehamba dokounhunhu vomefuta; 23 Dedan, Tema, Bus naaveshe ovo va kulula ko eexwiki davo dopeembadu; 24 eehamba adishe dOvaarabia neehamba adishe dovanhu va lumbakana, ovo hava kala mombuwa; 25 eehamba adishe daSimri, eehamba adishe daElami neehamba adishe dOvamedia; 26 neehamba adishe dokolundume dopopepi nodokokule da shikulafana nomauhamba makwao aeshe omounyuni oo e li kombada yedu; nohamba yaSesak* otai ka nwa konima yavo.
27 “Nou na okutya kuvo, ‘Eshi osho Jehova womatangakwaita, Kalunga kaIsrael, ta ti: “Nweni nokukolwa, nokukunga, ndele tamu punduka, opo muha dule okuyambuka po omolweongamukonda olo handi tumu mokati keni.”’ 28 Nongeenge ova anye okutambula eholo meke loye va nwe, va lombwela to ti, ‘Eshi osho Jehova womatangakwaita ta ti: “Omu na okunwa mo! 29 Osheshi taleni! Ngeenge ohandi etele tete oshilando, osho sha lukilwa edina lange, oudjuu, mbela nye otamu efiwa inamu handukilwa?”’
“‘Itamu efiwa inamu handukilwa, osheshi ohandi tumine ovakalimo aveshe vokombada yedu eongamukonda,’ Jehova womatangakwaita osho ta ti.
30 “Nou na oku va xunganekela eendjovo adishe edi, ndele to ti kuvo,
‘Jehova ota ka ndunduma okudja pombada,
Nota ka ningifa ondaka yaye i udike okudja monhele yaye iyapuki.
Ota ka ndundumina mokule onhele yaye yaalushe.
Ta ka ingida ngaashi ovo tava lyatauka moshikolelo shomaviinyu,
Ota ka imba omolwokufinda ovakalimo aveshe vokombada yedu.’
31 ‘Eweelelo otali ka udika kominghulo dedu,
Osheshi Jehova ota hokololifa oiwana.
Ota ka tokola ye mwene ovanhu aveshe.*
Nota ka hanauna po omukolokoshi neongamukonda,’ Jehova osho ta ti.
32 Eshi osho Jehova womatangakwaita ta ti:
‘Tala! Oudjuu otau ke lihana okudja koshiwana noshiwana,
Nefudaela linene otali ka tukuluka koitukulwa ye likalela yokombada yedu.
33 “‘Naavo va dipawa kuJehova mefiku olo otava ka kala va kangavala okudja komunghulo wedu umwe fiyo okomunghulo mukwao wedu. Itava ka lilwa noitava ka ongelwa, ile va pakwe. Otava ka ninga ngaashi oushosho u li kombada yedu.’
34 Lileni nye ovafita nokwiingida!
Lidedauleni nye ovanaenghono voufita,
Molwaashi efimbo lokudipawa kweni nolokuhalakanifwa kweni ola fika,
Notamu ka wa po ngaashi oshiyuma shondilo!
35 Ovafita kave na onhele oko tava i onhapo,
Novanaenghono voufita itava dulu okuya onhapo.
36 Pwilikina okukuwaana kwovafita
Nelilaano lovanaenghono voufita,
Osheshi Jehova ota hanauna po oulifilo wavo.
37 Nomalukalwa ombili okwa hanaunwa po
Omolwehandu laJehova la xwama.
38 Okwa dja mengade laye ngaashi onghoshi yonyasha,*
Osheshi edu lavo ola ninga oshinima shitilifi
Omolweongamukonda tali lapeke
Nomolwehandu laye la xwama.”
26 Pehovelo lepangelo laJehoiakim, omonamati waJosia, ohamba yaJuda, ondjovo ei oya dja kuJehova: 2 “Eshi osho Jehova ta ti, ‘Kala ofika momukala weumbo laJehova nokupopya shi na sha novanhu aveshe vomoilando yaJuda ovo tave uya okulongela Kalunga* keumbo laJehova. Va lombwela oinima aishe oyo nde ku lombwela; ino kufa po nande ondjovo imwe. 3 Pamwe otava ka pwilikina, nakeshe umwe ota ka efa po ondjila ii, nohandi ka lundulula omadiladilo ange e na sha* noupyakadi oo nda li nda diladila oku va tumina omolwoilonga yavo ii. 4 Va lombwela to ti: “Eshi osho Jehova ta ti, ‘Ngeenge itamu pwilikine kwaame mokushikula omhango* yange, oyo nda tula po moipafi yeni, 5 mokupwilikina keendjovo dovapiya vange ovaprofeti, ovo handi tumu kunye oikando noikando,* ovo inamu pwilikina kuvo, 6 opo nee ohandi ka ninga eumbo eli ngaashi Silo, nohandi ka ninga oshilando eshi oshinima shefingo koiwana aishe yokombada yedu.’”’”
7 Novapristeri, novaprofeti novanhu aveshe ova uda Jeremia ta popi eendjovo edi meumbo laJehova. 8 Onghee eshi Jeremia a mana okupopya ashishe osho Jehova e mu lombwela a lombwele ovanhu aveshe, opo nee ovapristeri novaprofeti novanhu aveshe ove mu kwata, ndele tava ti: “Oshili, ou na okufya. 9 Omolwashike wa xunganekela medina laJehova, to ti, ‘Eumbo eli otali ka ninga ngaashi Silo, noshilando eshi otashi ka hanaunwa po noitamu ka fyaala omukalimo’?” Novanhu aveshe ova ongalela Jeremia meumbo laJehova.
10 Eshi omalenga aJuda a uda eendjovo edi, okwe uya keumbo laJehova, a dja keumbo* lohamba nokwa kala omutumba poshivelo shipe shaJehova. 11 Ovapristeri novaprofeti ova lombwela omalenga novanhu aveshe tava ti: “Omulumenhu ou okwa wana okutokolelwa efyo, molwaashi okwa xunganeka e li omhinge noshilando eshi, ngaashi ashike mwe shi uda nomatwi eni vene.”
12 Opo nee Jeremia okwa lombwela omalenga aeshe novanhu aveshe ta ti: “Jehova oye a tuma nge, ndi xunganeke ndi li omhinge neumbo eli nosho yo noshilando eshi eendjovo adishe odo mwa uda. 13 Onghee paife efei po eendjila deni neenghatu deni nokudulika kondaka yaJehova, Kalunga keni, na Jehova ota ka lundulula omadiladilo aye e na sha* noudjuu aushe oo a popya kutya ote mu tumine. 14 Ashike ame ondi li meke leni. Ningilei nge osho mu wete shiwa nosha yuka momesho eni. 15 Ashike shiiveni kutya ngeenge omwa dipaa nge, otamu ke lietela kombada yeni vene ohonde ihe na etimba nokombada yoshilando eshi nokombada yovakalimo vasho, osheshi Jehova okwa tuma nge shili ndi popye eendjovo adishe edi momatwi eni.”
16 Opo nee omalenga novanhu aveshe ova lombwela ovapristeri novaprofeti tava ti: “Omulumenhu ou ina wana okutokolelwa efyo, osheshi okwa popya nafye medina laJehova, Kalunga ketu.”
17 Natango, vamwe vomovakulunhu vomoshilongo ova fikama nova hovela okulombwela ongudu aishe yovanhu tava ti: 18 “Mika wokuMoreset okwa li ta xunganeke pefimbo lohamba yaJuda, Hiskia, nokwa lombwela ovanhu aveshe vomuJuda a ti, ‘Eshi osho Jehova womatangakwaita ta ti:
“Sion otashi ka pululwa ngaashi epya,
Jerusalem otashi ka ninga onduba yoikulukuma,
Nomhunda yeumbo* otai ka kala ngaashi eenhele dokoikulundudu di li mofuka.”’*
19 “Mbela ohamba yaJuda, Hiskia, nOvajuda aveshe ove mu dipaa? Mbela inai tila Jehova nokupula Jehova ekwafo,* opo Jehova a lundulule omadiladilo aye e na sha* noudjuu, oo a li a popya kutya ote va tumine? Onghee otu li pokulietela oupyakadi munene fye vene.*
20 “Nopa li vali omulumenhu umwe ta xunganeke medina laJehova, Uria, omonamati waShemaia, wokuKiriat-jearim, oo a xunganeka e li omhinge noshilando eshi nosho yo nedu eli, neendjovo da fa odo daJeremia. 21 Ohamba Jehoiakim novakwaita vayo aveshe ovanaenghono nosho yo omalenga aeshe ova uda eendjovo daye, nohamba oya li ya hala oku mu dipaa. Eshi Uria e shi uda, okwa li a tila, ndele ta i onhapo kuEgipiti. 22 Opo nee ohamba Jehoiakim oya tuma Elnatan, omonamati waAkbor, nosho yo ovalumenhu vamwe pamwe naye kuEgipiti. 23 Ova eta Uria okudja kuEgipiti, ndele tave mu twala kohamba Jehoiakim, oyo ye mu dipaa neongamukonda, ndele tai umbile oshimhu shaye momaendo ovanhu vongaho.”
24 Ashike Ahikam, omonamati waSafan, okwa yambidida Jeremia, onghee ina yandjwa kovanhu ve mu dipae.
27 Pehovelo lepangelo laJehoiakim, omonamati waJosia, ohamba yaJuda, ondjovo ei oye uya kuJeremia ya dja kuJehova tai ti: 2 “Eshi osho Jehova a lombwela nge a ti, ‘Liningila eestropa neendjoko, ndele to di tula kofingo yoye. 3 Opo nee di tumina kohamba yaEdom, kohamba yaMoab, kohamba yOvaammoni, kohamba yaTirus nokohamba yaSidon, di li meke lovatumwa ovo ve uya kuJerusalem kohamba yaJuda, Sedekia. 4 Va pa oshipango eshi ve ke shi shiivifile oovene vavo to ti:
“‘“Eshi osho Jehova womatangakwaita, Kalunga kaIsrael, ta ti; eshi osho mu na okulombwela oovene veni, 5 ‘Aame ou nda shita edu, ovanhu noinamwenyo, oyo i li kombada yedu, keenghono dange dinene nokokwooko kwange kwa yeluka, nonde i yandja kukeshe oo nda hala. 6 Nopaife, onda yandja oilongo aishe ei meke lomupiya wange, ohamba yaBabilon, Nebukadnesar; nokuli noifitukuti yomoixwa onde i yandja kuye i mu longele. 7 Oiwana aishe otai ke mu longela nomonamati waye nosho yo omutekulu waye, fiyo efimbo loshilongo shaye mwene le uya, eshi oiwana ihapu neehamba dinene de mu ninga omupiya wado.’
8 “‘“‘Ngeenge oshiwana, ile ouhamba keshe owa anye okulongela ohamba yaBabilon, Nebukadnesar, nosha anye okutula ofingo yasho koshi yondjoko yohamba yaBabilon, ohandi ka handukila oshiwana osho neongamukonda, nondjala noudu* wolutapo,’ Jehova osho ta ti, ‘fiyo osheshi nde va mana po neke laye.’
9 “‘“‘Onghee hano, inamu pwilikina kovaprofeti veni, kovanyanekeli veni, kovatwi veendjodi veni, keemhule deni nokovalodi veni, ovo tava ti kunye: “Itamu ka longela ohamba yaBabilon.” 10 Osheshi ohave mu xunganekele oipupulu, opo mu twalwe kokule noshilongo sheni, nohandi ke mu halakanifa notamu ka xula po.
11 “‘“‘Ashike oshiwana osho tashi tula ofingo yasho koshi yondjoko yohamba yaBabilon notashi i longele, ohandi ke shi efa shi kale* medu lasho,’ Jehova osho ta ti, ‘shi li longe nokukala mo.’”’”
12 Onda popya yo sha faafana kohamba yaJuda, Sedekia, nda ti: “Tuleni eefingo deni koshi yondjoko yohamba yaBabilon, ndele tamu i longele novanhu vayo, notamu ka kala nomwenyo. 13 Omolwashike ove novanhu voye mu na okufya keongamukonda, kondjala nokoudu wolutapo, ngaashi Jehova a popya kombinga yoshiwana osho itashi longele ohamba yaBabilon? 14 Inamu pwilikina keendjovo dovaprofeti ovo tava ti kunye, ‘Itamu ka longela ohamba yaBabilon,’ molwaashi otave mu xunganekele oipupulu.
15 “‘Osheshi ame inandi va tuma,’ Jehova osho ta ti, ‘ndele otava xunganeke oipupulu medina lange, noshidjemo oshosho kutya, ohandi ke mu halakanifa, nye novaprofeti ovo tave mu xunganekele.’”
16 Nonda tya kovapristeri nosho yo kovanhu aveshe ava: “Eshi osho Jehova ta ti, ‘Inamu pwilikina keendjovo dovaprofeti veni, ovo tave mu xunganekele tava ti: “Taleni! Oikwatelwa yomeumbo laJehova otai ka etwa okudja kuBabilon mafiku!” osheshi otave mu xunganekele oipupulu. 17 Inamu pwilikina kuvo. Longeleni ohamba yaBabilon, notamu ka kala nomwenyo. Omolwashike oshilando eshi shi na okuhanauka po? 18 Ndele ngeenge vo ovaprofeti nongeenge ondjovo yaJehova oi li puvo, alikana, nava ilikane Jehova womatangakwaita, opo oikwatelwa yomeumbo laJehova oyo ya fyaala po i li meumbo* lohamba yaJuda nomuJerusalem iha kufwe mo, i twalwe kuBabilon.’
19 “Osheshi eshi osho Jehova womatangakwaita ta ti shi na sha neengudimanya, nefuta,* outemba nosho yo oikwatelwa oyo ya fyaala moshilando eshi, 20 oyo ohamba yaBabilon, Nebukadnesar, inai kufa eshi ya twala moukwatwa Jekonia, omonamati waJehoiakim, ohamba yaJuda, okudja muJerusalem okuya kuBabilon pamwe nomalenga aeshe aJuda nosho yo aJerusalem, 21 heeno, eshi osho Jehova womatangakwaita, Kalunga kaIsrael, ta ti shi na sha noikwatelwa oyo ya fyaala meumbo laJehova, i li meumbo* lohamba yaJuda nomuJerusalem: 22 ‘“Otai ka twalwa kuBabilon, naako oko tai ka kala fiyo osheshi handi ka yandja elitulemo kuvo,” Jehova osho ta ti. “Opo nee ohandi ke i tala ko noku i alulila monhele ei.”’”
28 Modula oyo tuu oyo, pehovelo lepangelo lohamba yaJuda, Sedekia, modula onhine, momwedi omutitano, omuprofeti Hanania, omonamati waAssur, wokuGibeon, okwa lombwela nge meumbo laJehova moipafi yovapristeri noyovanhu aveshe ta ti: 2 “Eshi osho Jehova womatangakwaita, Kalunga kaIsrael, ta ti, ‘Ohandi ka teyaula po ondjoko yohamba yaBabilon. 3 Meni leedula mbali,* ohandi ka alulila monhele ei oikwatelwa aishe yomeumbo laJehova, oyo ohamba yaBabilon, Nebukadnesar, ya kufa monhele ei noku i twala kuBabilon.’” 4 “‘Nohandi ka alulila monhele ei Jekonia, omonamati waJehoiakim, ohamba yaJuda, nosho yo eenghwate adishe dOvajuda, odo da ya kuBabilon,’ Jehova osho ta ti, ‘osheshi ohandi ka teyaula po ondjoko yohamba yaBabilon.’”
5 Opo nee omuprofeti Jeremia okwa popya nomuprofeti Hanania moipafi yovapristeri noyovanhu aveshe ovo va li va fikama meumbo laJehova. 6 Omuprofeti Jeremia okwa ti: “Amen!* Jehova osho na ninge. Jehova na wanife po eendjovo doye odo wa xunganeka mokwaalulila monhele ei oikwatelwa yomeumbo laJehova novanhu aveshe ovo va twalwa moukwatwa kuBabilon! 7 Ashike, alikana, pwilikina etumwalaka eli handi popi momatwi oye nomomatwi ovanhu aveshe. 8 Pefimbo lonale, ovaprofeti ovo va tetekela nge naavo ve ku tetekela ova li hava xunganeke shi na sha noilongo ihapu nosho yo omauhamba manene shi na sha noita, oudjuu noudu* wolutapo. 9 Ngeenge omuprofeti okwa xunganeke shi na sha nombili, nondjovo yomuprofeti oo oya wanifwa po, opo nee ohashi shiivika kutya Jehova oye a tuma shili omuprofeti oo.”
10 Onghee omuprofeti Hanania okwa kufa ko ondjoko kofingo yomuprofeti Jeremia, ndele te i teyaula po. 11 Opo nee Hanania okwa popya moipafi yovanhu aveshe ta ti: “Eshi osho Jehova ta ti, ‘Osho handi ka teyaula mo ngaha ondjoko yohamba yaBabilon, Nebukadnesar, meefingo doiwana aishe meni leedula mbali.’” Nomuprofeti Jeremia okwa ya nondjila yaye.
12 Konima eshi omuprofeti Hanania a teyaula mo ondjoko mofingo yomuprofeti Jeremia, etumwalaka eli laJehova ole uya kuJeremia tali ti: 13 “Inda, ndele to lombwele Hanania kutya, ‘Eshi osho Jehova ta ti: “Ove owa teyaula po eesikei* deendjoko doiti, ashike ponhele yado ove oto ka ninga eesikei deendjoko doshivela shilaula.” 14 Osheshi eshi osho Jehova womatangakwaita, Kalunga kaIsrael, ta ti: “Ohandi ka tula oskei yondjoko yoshivela shilaula mofingo yoiwana aishe ei i longele Nebukadnesar, ohamba yaBabilon, noi na oku mu longela. Nokuli noifitukuti yomofuka ohandi ke i mu pa.”’”
15 Opo nee omuprofeti Jeremia okwa tya komuprofeti Hanania: “Alikana pwilikina, akutu Hanania! Jehova ine ku tuma, ashike ove owa ningifa ovanhu ava ve lineekele moipupulu. 16 Onghee eshi osho Jehova ta ti, ‘Tala! Ame ohandi ku kufa ko kombada yedu. Oto fi modula ei, osheshi owa xwaxwameka ovanhu va tukululile Jehova oshibofa.’”
17 Onghee omuprofeti Hanania okwa fya modula oyo, momwedi omutiheyali.
29 Edi eendjovo donhumwafo oyo omuprofeti Jeremia a tumina ovakulunhu, ovo ve li mokati keenghwate, ovapristeri, ovaprofeti novanhu aveshe okudja kuJerusalem, ovo Nebukadnesar a twala moukwatwa kuBabilon va dja kuJerusalem, 2 konima eshi ohamba Jekonia, ina yohamba,* omalenga omombala, omalenga aJuda naJerusalem novahambwidi novahambuli voivela,* va dja mo muJerusalem. 3 Okwa tuma onhumwafo i li meke laEleasa, omonamati waSafan, nosho yo laGemaria, omonamati waHilkia, ovo ohamba yaJuda, Sedekia, ya tuma kuBabilon, kohamba yaBabilon, Nebukadnesar. Tai ti:
4 “Eshi osho Jehova womatangakwaita, Kalunga kaIsrael, ta ti keenghwate adishe, odo nda ningifa di ye moukwatwa kuBabilon okudja muJerusalem, 5 ‘Tungeni omaumbo nokukala muo. Twikeni oikunino nokulya oiimati yayo. 6 Kongeni ovakulukadi, ndele tamu dala ovanamati novanakadona; kongeleni ovanamati veni ovakulukadi, nokuyandja ovanakadona veni va hombolwe, opo navo va dule okukala ve na ovanamati novanakadona. Hapupaleleni oko noinamu ninipala. 7 Nokulalakanena ombili yoshilando oko nde mu twala moukwatwa, nokwiilikana kuJehova ponhele yasho, osheshi omolwombili yasho otamu ka kala mu na ombili. 8 Osheshi eshi osho Jehova womatangakwaita, Kalunga kaIsrael, ta ti: “Inamu efa ovaprofeti veni novanyanekeli veni, ovo ve li mokati keni, ve mu pukife, noinamu pwilikina keendjodi odo tava tu. 9 Osheshi ‘otave mu xunganekele oipupulu medina lange. Ame inandi va tuma,’ Jehova osho ta ti.”’”
10 “Osheshi eshi osho Jehova ta ti, ‘Ngeenge eedula 70 muBabilon da wanifwa po, ohandi ke mu pa elitulemo, nohandi ka wanifa po eudaneko lange moku mu alulila monhele ei.’
11 “‘Osheshi omadiladilo aa handi mu diladilile ondi a shii nawa,’ Jehova osho ta ti, ‘omadiladilo ombili, ndele kae fi oupyakadi, ndi mu pe onakwiiwa nosho yo eteelelo. 12 Notamu ka ifana nge, nokuuya, ndele tamu ilikana kwaame, nohandi ka pwilikina kunye.’
13 “‘Otamu ka konga nge, notamu ka mona nge, osheshi otamu ka konga nge nomutima weni aushe. 14 Nohandi ka efa mu mone nge,’ Jehova osho ta ti. ‘Nohandi ka ongela eenghwate deni noku mu ongela pamwe okudja moiwana aishe nomeenhele omo nde mu halakanifila,’ Jehova osho ta ti. ‘Nohandi ke mu alula mo monhele omo nde mu ningifa mu ye moukwatwa.’
15 “Ashike omwa ti, ‘Jehova okwe tu pendulila ovaprofeti muBabilon.’
16 “Osheshi eshi osho Jehova ta ti kohamba, oyo i li omutumba kolukalwapangelo laDavid, nokovanhu aveshe ovo ve li moshilando eshi, ovamwaxo ovo inava ya pamwe nanye moukwatwa, 17 ‘Eshi osho Jehova womatangakwaita ta ti: “Paife ohandi va tumine eongamukonda, ondjala noudu* wolutapo, nohandi va ningi ngaashi eenghwiyu da ola,* odo dii neenghono itadi dulu okuliwa.”’
18 “‘Nohandi ke va taataa neongamukonda, nondjala noudu wolutapo, nohandi va ningi oshinima shitilifi komauhamba aeshe okombada yedu, nefingo noshinima shikumwifi, oshinima shokushikilwa omwilwa, nodino mokati koiwana aishe, omo nde va halakanifila, 19 molwaashi inava pwilikina keendjovo dange, odo nde va tumina okupitila movapiya vange ovaprofeti,’ Jehova osho ta ti, ‘nde va tumina lwoikando noikando.’*
“‘Ndele inamu pwilikina,’ Jehova osho ta ti.
20 “Onghee hano udeni ondjovo yaJehova nye eenghwate amushe, nye ovo nda tumina kuBabilon okudja muJerusalem. 21 Eshi osho Jehova womatangakwaita, Kalunga kaIsrael, ta ti shi na sha naAhab, omonamati waKolaja, nosho yo shi na sha naSedekia, omonamati waMaasea, ovo tave mu xunganekele oipupulu medina lange, ‘Paife ohandi va yandje meke lohamba yaBabilon, Nebukadnesar,* notai ke va dipaa moipafi yeni. 22 Naasho tashi ke va ningilwa otashi ka kala efingo, olo tali popiwa keenghwate adishe domuJuda, odo di li muBabilon tadi ti: “Jehova ne ku ninge ngaashi Sedekia, nongaashi Ahab, ovo ohamba yaBabilon ya yofa momundilo!” 23 Osheshi ove lihumbata monghedi ififa ohoni muIsrael, tava haele novakulukadi vavakwao, notava popi eendjovo doipupulu medina lange, odo inandi va lombwela.
“‘“Aame ashike ndi shi shii, naame ondombwedi,” Jehova osho ta ti.’”
24 “NokuShemaia wokuNehelami oto ka tya, 25 ‘Eshi osho Jehova womatangakwaita, Kalunga kaIsrael, ta ti: “Molwaashi owa tuma eenhumwafo medina loye, we di tumina ovanhu aveshe ovo ve li muJerusalem, Sefania, omonamati waMaasea, omupristeri, nosho yo ovapristeri aveshe, to ti, 26 ‘Jehova okwe ku ninga omupristeri ponhele yomupristeri Jehoiada u ninge omupashukili weumbo laJehova, u pashukile omunananghwengu keshe oo te lihumbata ngaashi omuprofeti noku mu tula meti nomoipandeko;* 27 omolwashike nee ino hanyena Jeremia wokuAnatot, oo te ku lihumbatele ngaashi omuprofeti? 28 Osheshi okwe tu tumina nokuli fimbo tu li kuBabilon ta ti: “Otashi ka kwata efimbo lile. Tungeni omaumbo nokukala muo. Twikeni oikunino nokulya oiimati yayo, . . . ”’”’”
29 Eshi omuprofeti Sefania a lesha onhumwafo ei momatwi omuprofeti Jeremia, 30 ondjovo yaJehova oye uya kuJeremia tai ti: 31 “Tumina eenghwate adishe to ti, ‘Eshi osho Jehova ta ti shi na sha naShemaia wokuNehelami: “Molwaashi Shemaia okwe mu xunganekela, nonande inandi mu tuma, nokwa kendabala oku mu ningifa mu lineekele moipupulu, 32 onghee hano, eshi osho hano Jehova ta ti, ‘Paife ohandi ka handukila Shemaia wokuNehelami noludalo laye. Kape na nande umwe womovanhu vaye ta ka xupa mokati kovanhu ava, noita ka mona ouwa oo handi ka ningila ovanhu vange,’ Jehova osho ta ti, ‘osheshi okwa xwaxwameka ovanhu va tukululile Jehova oshibofa.’”’”
30 Ondjovo oyo ye uya kuJeremia ya dja kuJehova, tai ti: 2 “Eshi osho Jehova, Kalunga kaIsrael, ta ti, ‘Shanga membo eendjovo adishe odo handi ku lombwele. 3 Osheshi “tala! omafiku otae uya,” Jehova osho ta ti “eshi handi ka ongela eenghwate doshiwana shange, Israel naJuda,” Jehova osho ta ti, “nohandi ke di alulila kedu, olo nda li nda pa ooxekulululwa, notadi ke li nangala vali.”’”
4 Edi odo eendjovo odo Jehova a lombwela Israel naJuda.
5 Eshi osho Jehova ta ti:
“Otwa uda omalinyengo ekakamo;
Ope na oumbada, nokape na ombili.
6 Alikana, puleni ngeenge omulumenhu ota dulu okudala.
Omolwashike hano ndi wete omulumenhu keshe omunaenghono e likwete medimo*
Ngaashi omukainhu ta dala?
Omolwashike oshipala keshe sha pemba?
7 Woo ame! Osheshi efiku olo olitilifi.*
Kape na limwe le li fa,
Efimbo loudjuu waJakob.
Ashike ye ota ka xupifwa muo.”
8 “Nomefiku olo,” Jehova womatangakwaita osho ta ti, “ohandi ka teyaula mo ondjoko mofingo yoye neestropa* ohandi ke di teyaula moinhimbu ivali nokape na ovaendanandjila* tave ke mu* ninga ovapika vavo. 9 Otava ka longela Jehova, Kalunga kavo, nosho yo David, ohamba yavo, oo handi ke va pendulila.”
10 “Ndele ove omupiya wange Jakob ino kala wa tila,” Jehova osho ta ti,
“Noino mbadapalifwa, akutu Israel
Osheshi ohandi ke ku xupifa okudja kokule,
Noludalo loye okudja kedu oko li li moukwatwa.
Jakob ota ka aluka nota ka kala a ngungumana noita piyaanekwa,
nopehe na oo te va tilifa.”
11 “Osheshi ame ondi li pamwe naave,” Jehova osho ta ti, “ndi ku xupife.
Ndele ohandi ka eta ehanauno mokati koiwana aishe omo nde ku halakanifila;
Ashike ove itandi ke ku hanauna po.
Ohandi ke ku pa outekuduliko* wa yeleka,
Noitandi ke ku efa ino handukilwa.”
12 Osheshi eshi osho Jehova ta ti:
“Osheshi okuteka kwoye itaku dulu okuhakulwa.
Oipute yoye itai dulu okuvelulwa.
13 Kape na oo ta popile oshikoya shoye,
Kape na osho tashi dulu okuvelula oipute yoye inyanyalifi.
Ito dulu okuveluka.
14 Osheshi aveshe ovo ve ku hole ove ku dimbwa.
Ihave ku kongo vali.
Osheshi onde ku denga nongola yomutondi,
Nehandukilo lomukwanyanya,
Osheshi etimba loye olinene nomanyono oye omahapu.
15 Omolwashike ho lili omolwokuteka po kwoye?
Ouyahame woye itau dulu okuveluka!
Omolwetimba loye linene nomanyono oye mahapu,
Osho nde ku ningila ngaha.
16 Onghee hano, aveshe ovo tave ku xwake po otava ka xwakwa po yo,
Novatondi voye aveshe otava ka ya yo moukwatwa.
Ovo tave ku kwata ko navo otava ka kwatwa ko,
Nohandi ka yandja aveshe ovo tave ku nyeke ko va nyekwe ko yo.”
17 “Ashike ohandi ke ku alulila oukolele woye nokuvelula oipute yoye,” Jehova osho ta ti,
“Nonande ohave ku ifana omweekelwashi tava ti:
‘Sion, oo pehe na oo he mu kongo.’”
18 Eshi osho Jehova ta ti:
“Paife ohandi ongele eenghwate domomatwali aJakob,
Nohandi ka fila onghenda omatwalihangano aye.
Oshilando otashi ka tungululwa kombada yoikulukuma yasho,
Neeshungongulu domakuma a pama otadi ka fikama peenhele dado opo di na okukala.
19 Notava ka yandja omapanduloyambo neendaka denyaku.
Ohandi ke va ninga vahapu neenghono, noitava ka kala vanini.
Ohandi ke va hapupalifa,*
Noitava ka kala vanini.
20 Ovanamati vaye otava ka kala ngaashi monakudiwa,
Noshoongalele shaye otashi ka pamekwa moipafi yange.
Ohandi ka handukila ovafininiki vaye aveshe.
21 Omunaenghono waye ota ka kala umwe womwaavo vaye,
Nomokati kaye otamu ka dja omupangeli waye.
Ohandi ke mu ningifa e uye popepi, nota ka ehena popepi naame.”
“Osheshi ngeenge hasho, olyelye ta ka hetekela* okweehena popepi naame?” Jehova osho ta ti.
22 “Ndele nye otamu ka ninga oshiwana shange, naame ohandi ka kala Kalunga keni.”
23 Tala! Oshikungulu shomhepo shaJehova otashi tukuluka mehandu;
Efudaela linene tali kombolola olo tali dingonoka kombada yomitwe dovakolokoshi.
24 Ehandu laJehova la xwama itali ka lota
Fiyo osheshi a wanifa po nokwa hanga omalalakano omutima waye.
Pexulilo lomafiku otamu ka uda ko oshinima eshi.
31 “Pefimbo olo,” Jehova osho ta ti, “ohandi ka ninga Kalunga komaukwaneumbo aeshe aIsrael, notava ka ninga oshiwana shange.”
2 Eshi osho Jehova ta ti:
“Ovanhu ovo va xupa keongamukonda ova filwa onghenda mombuwa
Eshi Israel a li ta ende a finda konhele yaye yetulumuko.”
3 Jehova okwe lihololela nge okudja kokule, ndele ta ti:
“Onda kala ndi ku hole nohole yaalushe.
Nomolwaashi nde ku nanena kwaame nohole i na oudiinini.*
4 Ashike natango ohandi ke ku tungulula noto kala wa tungululwa.
Akutu omonakadona elela waIsrael, oto ka kufa vali oungoma voye
Noto ke uya to tane nehafo.*
5 Oto ka twika vali oikunino yomandjebele keemhunda daSamaria;
Ovatwiki otava ka twika, ndele tava hafele oiimati yavo.
6 Osheshi efiku otali ke uya eshi ovanangeli vokeemhunda daEfraim tava ka ingida tava ti:
‘Fikameni, tu yeni kuSion, kuJehova, Kalunga ketu.’”
7 Osheshi eshi osho Jehova ta ti:
“Kalukileni Jakob nenyaku.
Ingideni nehafo, molwaashi omu dule oiwana.
Shi shiivifeni; hambeleleni, ndele tamu ti,
‘Akutu! Jehova, xupifa oshiwana shoye, oshixupe shaIsrael.’
8 Ohandi va alula ko kedu lokolundume.
Ohandi ke va ongela pamwe okudja koitukulwa yokokule yokombada yedu.
Mokati kavo otamu ka kala ovapofi noingudu,
Omukainhu omufimba naao ta dala, aveshe kumwe
Ngaashi ongudu inene otava ka alukila oku.
9 Otave ke uya tava lili.
Ohandi ke va wilika, eshi tava pula efilonghenda.
Ohandi ke va twala komatondokelo* omeva,
Kelila la lalakana, olo itali va pundula.
Osheshi aame xe yaIsrael, na Efraim oshiveli shange.”
10 Udeni ondjovo yaJehova nye oiwana,
Noku i shiivifa mokati kounhunhu ovo ve li kokule tamu ti:
“Oo a halakanifa Israel ote ke mu ongela pamwe.
Ote ke mu pashukila onga omufita ta pashukile oufita waye.
11 Osheshi Jehova ota ka kulila Jakob
Note ke mu xupifa* meke laao e mu dule meenghono.
12 Otave ke uya nokwiingida nehafo koxulo yaSion
Notava ka vema omolwouwa* waJehova,
Omolwoilya nomaviinyu mape nosho yo omaadi,
Nomolwoukombwena noudjona nosho yo outana.
Vo* otava ka kala ngaashi oshikunino sha tekelwa nawa,
Noitava ka mona vali oixuna.”
13 “Pefimbo olo omonakadona elela ota ka tana nehafo,
Nosho yo ovalumenhu ovanyasha pamwe novalumenhu ovanamido.
Ohandi ka lundululila oluhodi lavo mehafo.
Ohandi ke va hekeleka, nohandi ke va etela ehafo ponhele yoluhodi lavo.
14 Ohandi ka kutifa ovapristeri* noinima ihapu,*
Noshiwana shange otashi ka kutifwa nouwa wange,” Jehova osho ta ti.
15 “Eshi osho Jehova ta ti:
‘Ondaka oi uditike muRama, ekemo nelilaano linene:
Rakel ota lili omolwovanamati.*
Okwa anya okuhekelekwa omolwovanamati vaye,
Molwaashi kave po vali.’”
16 Eshi osho Jehova ta ti:
“‘Ino lila vali, nomesho oye inaa pololoka vali omahodi,
Osheshi ope na ondjabi yoilonga yoye,’ Jehova osho ta ti.
‘Otava ka aluka mo medu lomutondi.’
17 ‘Nope na eteelelo li na sha nonakwiiwa yoye,’ Jehova osho ta ti.
‘Ovanamati voye otava ka shuna koitukulwa yavo.’”
18 “Onda uda filufilu okukema kwaEfraim, eshi ta ti,
‘Owa pukulula nge, nonda pukuluka,
Ngaashi okatana, oko ka li inaka deulwa.
Alule nge nohandi ka aluka filufilu,
Osheshi oove Jehova, Kalunga kange.
19 Osheshi konima eshi nda aluka, onda li nde lipa oushima;
Konima eshi nda pukululwa onda li nde lidenga ketundji lange nda nyika oluhodi.
Onda li nda fya ohoni, nonda lengwa,
Osheshi onda kanyatela oulai wokounyasha wange.’”
20 “Mbela Efraim ke fi omonamati e na ondilo kwaame, okaana okaholike?
Osheshi luhapu ngeenge handi popi ndi li omhinge naye, natango ohandi mu dimbuluka.
Nomolwaashi omaliudo* ange hae mu tukulukile.
Nohandi ke mu fila onghenda filufilu,” Jehova osho ta ti.
21 “Litulila po omadidiliko omeendjila,
Nokutula po omadidiliko.
Yandja elitulemo kondjila ya kula, ondjila oyo u na okuya nayo.
Aluka, akutu omonakadona elela waIsrael, alukila koilando yoye.
22 Fiyo onaini to kala nokutengauka, akutu omonakadona uhe fi omudiinini?
Osheshi Jehova okwa shita oshinima shipe kombada yedu:
Omukainhu ota ka kala nokukonga omushamane waye.”
23 Eshi osho Jehova womatangakwaita, Kalunga kaIsrael, ta ti: “Otava ka popya vali eendjovo edi medu laJuda nomoilando yasho, ngeenge nda ongele eenghwate davo, tava ti: ‘Jehova ne ku nangeke noupuna, akutu onhele yokukala Ouyuki, akutu omhunda iyapuki.’ 24 Nomusho, Juda noilando yasho aishe, otai ka kala pamwe, ovanamapya naavo hava lifa omaufita. 25 Osheshi ovo* va loloka ohandi ke va pa eenghono, naavo* va nghundipala ohandi ke va wanifila po eemhumbwe davo.”
26 Opo nee onda penduka nonda pashuka, neemhofi dange oda li diwa kwaame.
27 “Tala! Omafiku ota e uya,” Jehova osho ta ti, “eshi handi ka kuna eumbo laIsrael neumbo laJuda nombuto* yomunhu nosho yo nombuto yoimuna.”
28 “Nongaashi ashike nda li nde va tala, ndi va dude mo, ndi va shile mo, ndi va teyaule po, ndi va hanaune po, nondi va nyonaune po, osho yo handi ke va tala, ndi va tunge noku va twika,” Jehova osho ta ti. 29 “Pefimbo olo, itava ka tya vali, ‘Ootate ova lile omandjebele malula, ndele omayoo ovanamati taa kwatwa kouwe.’* 30 Ashike keshe umwe ota ka fya omolwenyono laye. Omunhu keshe ta li omandjebele malula omayoo aye otaa ka kwatwa kouwe.”
31 “Taleni! Omafiku ota e uya,” Jehova osho ta ti, “eshi handi ka ninga ehangano lipe neumbo laIsrael nosho yo neumbo laJuda. 32 Itali ka kala ngaashi ehangano olo nda ningile nooxekulululwa mefiku omo nda kwata eke lavo ndi va kufe mo medu laEgipiti, ‘ehangano lange olo va teya, nonande onda li mwene wavo washili,’* Jehova osho ta ti.”
33 “Osheshi eli olo ehangano olo handi ka ninga neumbo laIsrael konima yomafiku oo,” Jehova osho ta ti. “Ohandi ka tula omhango yange muvo nohandi ke i shanga momitima davo, nohandi ka ninga Kalunga kavo notava ka ninga oshiwana shange.”
34 “Nokape na vali ou ta ka honga mukwao, nokape na oo ta ka honga omumwaxe, ta ti, ‘Shiiva Jehova!’ Osheshi ovanhu aveshe otava ka kala ve shii nge, okudja kohepele fiyo okoshipuna,” Jehova osho ta ti. “Osheshi ohandi ka dima po omatauluko avo, noitandi ka dimbuluka vali omanyono avo.”
35 Eshi osho Jehova ta ti,
Oo a yandja etango, pa kale ouyelele omutenya,
Neemhango* domwedi nodeenyofi, pa kale ouyelele oufiku,
Ou ta pindjaleke efuta nokuningifa omakufikufi alo a popome,
Oo edina laye Jehova womatangakwaita:
36 “‘Ngeenge omaufomhango aa inaa wanifwa,’ Jehova osho ta ti,
‘Opo ashike oludalo laIsrael tali ka dula okuxula po li li oshiwana moipafi yange fiyo alushe.’”
37 Eshi osho Jehova ta ti: “‘Ngeenge eulu, olo li li pombada, otali dulu okuyelekwa, nomakanghameno edu, oo e li koshi, otaa dulu okukonakonwa, opo ashike handi ka efa po oludalo alishe laIsrael omolwaashishe osho la ninga,’ Jehova osho ta ti.”
38 “Taleni! Omafiku otae uya,” Jehova osho ta ti, “eshi oshilando tashi ka tungilwa Jehova okudja kOshungongulu yaHananel fiyo opOshivelo shomOhuke. 39 Nongodi yokumetifa otai ka ya ya yukilila koshikulundudu shaGareb notai ka tanauka ya finda kuGoa. 40 Nomafilu aeshe oimhu noomute,* noimhungu aishe, oyo ya ya fiyo okEfilu laKidron, fiyo okohuke yOshivelo shOnghambe, kombinga yokoushilo, otai ka kala oshinima shiyapuki kuJehova. Itai ka dudwa po vali, ile i teyaulwe po.”
32 Ondjovo oyo ye uya kuJeremia ya dja kuJehova modula onhi-10 yohamba yaJuda, Sedekia, sha hala okutya odula onhi-18 yaNebukadnesar.* 2 Pefimbo opo, omatangakwaita ohamba yaBabilon okwa li a kondeka Jerusalem, nomuprofeti Jeremia okwa li a idililwa mOmukala wOvanangeli meumbo* lohamba yaJuda. 3 Osheshi ohamba yaJuda, Sedekia, oye mu idilila mo tai ti, “Omolwashike ho xunganekele ngaha? Oho ti, ‘Eshi osho Jehova ta ti: “Ohandi ka yandja oshilando eshi meke lohamba yaBabilon notai ke shi kwata ko, 4 nohamba yaJuda, Sedekia, itai ka ya onhapo Ovakaldea, osheshi otai ka yandjwa filufilu meke lohamba yaBabilon, notai ka popya naye oshipala noshipala noku mu mona eisho neisho.”’ 5 ‘Otai ka twala Sedekia kuBabilon, naako oko ta ka kala, fiyo osheshi handi ka tala kutya ohandi mu ningile shike,’ Jehova osho ta ti. ‘Nonande omu twikile okulwifa Ovakaldea, itamu ka pondola.’”
6 Jeremia okwa ti: “Ondjovo yaJehova oye uya kwaame tai ti, 7 ‘Paife Hanamel, omonamati waSallum, omumwainamati waxo,* ote uya kwoove ndele ta ti: “Lilandela epya lange olo li li muAnatot, molwaashi oove u na oufemba wokulilanda po tete.”’”
8 Hanamel, omonamati womumwainamati watate, okwe uya kwaame, ngaashi ashike Jehova a popya, mOmukala wOvanangeli, ndele ta ti kwaame: “Alikana, landa po epya lange, olo li li muAnatot, medu laBenjamin, osheshi oove u na tete oufemba woku li nangala nowoku li landa po. Li lilandela po.” Opo nee onda li nda didilika kutya eshi otashi ningwa pandjovo yaJehova.
9 Onghee onda landa epya muAnatot, kuHanamel, omonamati womumwainamati watate. Onde mu yelekela oimaliwa, eesekeli* heyali noisilveri omulongo. 10 Opo nee onde i shanga momukanda, handi u dengifa oshihako, handi ifana eendombwedi nokuyeleka oimaliwa koshiyelekifo. 11 Onda kufa omukanda wokulandakanifa oo nda dengifa oshihako she likolelela koipango nokoiteelelwa yopaveta nosho yo oo inau dengwa oshihako, 12 nonda yandja omukanda kuBaruk, omonamati waNeria, omonamati waMaasea, moipafi yaHanamel, omonamati womumwainamati watate, moipafi yeendombwedi odo da shanga momukanda wokulandakanifa, noyOvajuda aveshe ovo va li omutumba mOmukala wOvanangeli.
13 Opo nee onda lombwela Baruk moipafi yavo nda ti: 14 “Eshi osho Jehova womatangakwaita, Kalunga kaIsrael, ta ti, ‘Kufa omikanda edi, omukanda ou wokulandakanifa, oo wa dengwa oshihako naukwao oo inau dengwa oshihako, noku di tula moshiyuma shedu, opo di tuvikilwe efimbo lile.’ 15 Osheshi eshi osho Jehova womatangakwaita, Kalunga kaIsrael, ta ti, ‘Omaumbo nomapya noikunino yomandjebele otai ka landwa vali medu eli.’”
16 Opo nee onda ilikana kuJehova konima eshi nda yandja omukanda wokulandakanifa kuBaruk, omonamati waNeria, nda ti: 17 “Woo ame, akutu! Omunamapangelo aeshe, Jehova! Tala! Oove wa shita eulu nedu neenghono doye dinene nokokwooko kwoye kwa yeluka. Kape na eshi tashi ku nyenge, 18 ove ou to ulikile omayovi ohole i na oudiinini, ashike omanyono ooxe oto a shunifile ovanamati vavo* ovo tave va shikula, Kalunga kashili, Ove ou munene nOmunaenghono, oo edina laye Jehova womatangakwaita. 19 Oumunene momayele* noumunaenghono moilonga, ove ou omesho oye haa tale eendjila adishe dovanhu, opo u yandje kukeshe umwe she likolelela keendjila daye noshe likolelela kwaasho ta ningi. 20 Owa longa omadidiliko noikumwifilonga medu laEgipiti, oyo i shiivike fiyo okunena eli, nokungaho, owe liningila edina muIsrael nomokati kovanhu, ngaashi shi li kunena. 21 Nowa kufa oshiwana shoye, Israel, medu laEgipiti nomadidiliko, noikumwifilonga, neke loye li na eenghono, nokwooko kwoye kwa yeluka nosho yo oilonga itilifi.
22 “Mokweendela ko kwefimbo, owe va pa edu eli, olo wa ana okupa ooxekulululwa, edu tali kunguluka omashini nomaadi eenyiki. 23 Nove uya mo nove li nangala, ashike inava dulika kondaka yoye, ile va ende pamhango yoye. Inava ninga osho we va lombwela va ninge, onghee owa ningifa oupyakadi aushe ou u va hange. 24 Tala! Ovalumenhu ove uya va kondeke, opo va kwate ko oshilando, nomolweongamukonda, ondjala noudu* wolutapo, oshilando otashi i filufilu momake Ovakaldea ovo tave shi lwifa; osho wa popya osho sha ningwa filufilu, ngaashi u shi wete paife. 25 Ashike ove, akutu! Omunamapangelo aeshe, Jehova, owa lombwela nge, wa ti, ‘Lilandela epya noimaliwa, nokwiifana eendombwedi,’ nonande oshilando otashi ka yandjwa shili meke lOvakaldea.”
26 Opo nee ondjovo yaJehova oye uya kuJeremia tai ti: 27 “Aame ou, Jehova, Kalunga kovanhu aveshe.* Mbela ope na ngoo osho tashi nyenge nge? 28 Onghee eshi osho Jehova ta ti, ‘Paife ohandi yandje oshilando eshi kOvakaldea nomeke lohamba yaBabilon, Nebukadnesar,* notai ke shi kwata ko. 29 NOvakaldea, ovo tava lwifa oshilando eshi, otave uya mo noku shi tomeka omundilo, ndele tave shi xwike po pamwe nomaumbo, oo kombada yao ovanhu va yambela Baal, nova tililashi ookalunga vamwe oikunwayambo, opo va handukife nge.’
30 “‘Osheshi ovanhu vomuIsrael novomuJuda ova longa ashike osho shii momesho ange okudja kounyasha wavo; ovanhu vomuIsrael ova twikila okunyemateka nge noilonga yomake avo,’ Jehova osho ta ti. 31 ‘Osheshi oshilando eshi, okudja kefiku olo ve shi tunga fiyo okunena eli, osha kala osheetifi shehandu nosho yo shonya kwaame, onghee oshi na okukufwa po koshipala shange, 32 omolwowii aushe oo ovanhu vomuIsrael novomuJuda va ninga, opo va handukife nge; vo, eehamba davo, omalenga avo, ovapristeri vavo, ovaprofeti vavo novanhu vomuJuda nosho yo ovakalimo vomuJerusalem. 33 Ova twikila okupa nge eembuda davo, ndele haipala yavo; nonande onda kendabala oku va honga oikando noikando* kape na nande oumwe womuvo a pwilikina, opo a tambule ko outekuduliko. 34 Nova tula oihongwafano yavo itondifa meumbo olo la lukilwa edina lange, opo ve li nyateke. 35 Shikwao vali, ova tungila Baal eenhele dokoikulundudu mEfilu lOmonamati waHinnom,* opo va ningife ovanamati vavo nosho yo ovanakadona vavo va ende momundilo omolwaMolek, oshinima osho inandi va lombwela noinashi uya mo nokuli momutima wange,* ndi ninge oshinima sha tya ngaho shitondifa, ndi nyonife Juda.’
36 “Onghee hano, eshi osho Jehova, Kalunga kaIsrael, ta ti shi na sha noshilando eshi, osho mwa ti otashi yandjwa meke lohamba yaBabilon, keongamukonda, kondjala nokoudu wolutapo, 37 ‘paife ohandi ke va ongela okudja koilongo aishe, oko nde va halakanifila mehandu lange, monya yange nomehandu lange linene, nohandi ke va alulila konhele ei nokweefa va kale meameno. 38 Notava ka ninga oshiwana shange, nohandi ka kala Kalunga kavo. 39 Nohandi ke va pa omutima umwe nosho yo ondjila imwe, opo va kale alushe hava tila nge omolwouwa wavo vene nomolwouwa wovana vavo, ovo tave va shikula. 40 Nohandi ka ninga navo ehangano laalushe, olo kutya itandi ka efa oku va ningila ouwa; nohandi ka tula oumbada wokutila nge momitima davo, opo vaha efe nge po. 41 Ohandi ke va hafela, ndi va ningile ouwa nohandi ke va twika va pama medu eli nomutima wange aushe nomwenyo* wange aushe.’”
42 “Osheshi eshi osho Jehova ta ti, ‘Ngaashi ashike nda etela ovanhu ava oupyakadi aushe ou munene, osho handi ke va etela ouwa* aushe oo handi va udanekele. 43 Nomapya otaa ka landwa vali medu eli, nonande otamu ti: “Lo eputu lihe na ovanhu noinamwenyo, nola yandjwa kOvakaldea.”’
44 “‘Omapya otaa ka landwa noimaliwa, omikanda dokulandakanifa otadi ka shangwa nokudengwa oshihako, neendombwedi otadi ka ifanwa okudja medu laBenjamin, moitukulwa oyo ya dingilila Jerusalem, moilando yaJuda, moilando yokoshitukulwa shokeemhunda, moilando yomomafilu nomoilando yokolukadi, molwaashi ohandi ka alula eenghwate davo,’ Jehova osho ta ti.”
33 Ondjovo yaJehova oye uya kuJeremia oshikando oshitivali, ofimbo a li natango a idililwa mOmukala wOvanangeli, tai ti: 2 “Eshi osho Jehova, Omushiti wedu, ta ti, Jehova, oo e li shita nokwe li dika po la pama; Jehova olo edina laye, 3 ‘Ifane nge, nohandi ke ku nyamukula, nohandi kala nde lilongekida oku ku lombwela ounene nosho yo oinyengandunge, oyo wa kala uhe shii.’”
4 “Osheshi eshi osho Jehova, Kalunga kaIsrael, ta ti shi na sha nomaumbo omoshilando eshi nosho yo nomaumbo eehamba daJuda, oo a hanaunwa po omolwekondeka neongamukonda, 5 nosho yo shi na sha naavo tave uya okulwifa Ovakaldea, tava yadifa eenhele edi noimhu yaavo nda dipaa omolwehandu lange nomonya yange, ovo oilonga yavo ii ya ningifa nge ndi holeke oshipala shange oshilando eshi: 6 ‘Paife ohandi shi etele eveluko nosho yo oukolele, nohandi ke va velula noku va pa ombili inene noshili. 7 Nohandi ka alula eenghwate daJuda nosho yo eenghwate daIsrael, nohandi ke va tunga ngaashi nda ninga pehovelo. 8 Nohandi ke va koshola komatimba aeshe omanyono avo, oo va nyona kwaame, nohandi ka dima po omatimba aeshe omanyono avo nomatauluko avo kwaame. 9 Notashi ka ninga kwaame edina lenyaku, lehambelelo nolewapalo moipafi yoiwana aishe yokombada yedu oyo tai ka uda ouwa aushe oo nde va pa. Notava ka kala va tila, notava ka kakama omolwouwa aushe nombili, oyo handi ke shi pa.’”
10 “Eshi osho Jehova ta ti: ‘Monhele ei, oyo tamu ti eputu, muhe na ovanhu, ile oimuna, moilando yaJuda nomomapandavanda aJerusalem oo a mbuwapala, muhe na ovanhu, ile ovakalimo, ile oimuna otamu ka udika vali 11 ondaka yenyaku nondaka yehafo, ewi lomuhomboli newi lomuhombolwa, ewi laavo tava ti: “Panduleni Jehova womatangakwaita, osheshi Jehova omuwa; ohole yaye i na oudiinini otai kala po fiyo alushe!”’
“‘Otava ka eta omapanduloyambo meumbo laJehova, osheshi ohandi ka alula eenghwate domoshilongo, ngaashi pehovelo,’ Jehova osho ta ti.”
12 “Eshi osho Jehova womatangakwaita ta ti: ‘Meputu eli muhe na ovanhu, ile oimuna, nomoilando yalo aishe, otamu ka kala vali omaulifilo ovafita va ombifile mo omaufita avo.’
13 “‘Moilando yokoshitukulwa shokeemhunda, moilando yomefilu, moilando yokolukadi, medu laBenjamin, moitukulwa oyo ya dingilila Jerusalem nomoitukulwa yaJuda omaufita otaa ka enda vali koshi yeke laao te a valula,’ Jehova osho ta ti.”
14 “ ‘Tala! Omafiku otae uya,’ Jehova osho ta ti, ‘eshi handi ka wanifa po eudaneko liwa olo nda popya li na sha neumbo laIsrael nosho yo neumbo laJuda. 15 Pomafiku oo, nopefimbo olo, ohandi ka tutumifila David oshitutumine* shouyuki, nota ka wanifa po ouyuki naasho sha yuka moshilongo. 16 Pomafiku oo Juda ota ka xupifwa, na Jerusalem ota ka kala meameno. Notai ka ifanwa ngaha: Jehova oye Ouyuki Wetu.’”
17 “Osheshi eshi osho Jehova ta ti: ‘Kolukalwapangelo leumbo laIsrael otaku ka kala alushe omulumenhu womoludalo laDavid, 18 novapristeri Ovalevi otava ka kala alushe ve na omulumenhu a fikama moipafi yange, a yambe omaxwikiloyambo aeshe, a xwike eendjayambo noku yambe omayambo makwao.’”
19 Nondjovo yaJehova oye uya vali kuJeremia tai ti: 20 “Eshi osho Jehova ta ti, ‘Ngeenge otamu dulu okuteya ehangano lange li na sha nomutenya nosho yo ehangano lange li na sha noufiku, mu kelele omutenya noufiku ihe uye pefimbo layo, 21 opo ashike ehangano lange olo nda ninga nomupiya wange David tali teka, opo aha kale e na omonamati ta pangele e li ohamba kolukalwapangelo laye, nosho yo ehangano lange novapristeri Ovalevi, ovayakuli vange. 22 Ngaashi ashike etangakwaita lokeulu itali dulu okuvalulwa nosho yo ehekedu lopomunghulofuta itali dulu okuyelekwa, osho handi ka hapupalifa oludalo lomupiya wange, David, nOvalevi, ovo tava yakula nge.’”
23 Nondjovo yaJehova oye uya vali kuJeremia tai ti: 24 “Mbela ino didilika osho ovanhu ava tava ti, ‘Jehova ota ka efa po omapata avali oo a hoolola?’ Notava ungaunga noshiwana shaye nopehe na efimaneko, noinave va tala ko vali ve li oshiwana.
25 “Eshi osho Jehova ta ti: ‘Ngaashi ashike nda pameka ehangano lange li na sha nomutenya nosho yo noufiku, eemhango* dokeulu nodokombada yedu, 26 sha faafana, itandi ka efa po oludalo laJakob nolomupiya wange, David, nohandi ka kufa moludalo laye ovapangeli va pangele oludalo laAbraham, laIsak nolaJakob. Osheshi ohandi ka ongela eenghwate noku di fila onghenda.’”
34 Ondjovo, oyo ye uya kuJeremia ya dja kuJehova, eshi ohamba yaBabilon, Nebukadnesar,* netangakwaita layo alishe nomauhamba aeshe okombada yedu, oo e li koshi yepangelo layo, nosho yo ovanhu aveshe va li tava lwifa Jerusalem noilando yasho aishe:
2 “Eshi osho Jehova, Kalunga kaIsrael, ta ti, ‘Inda, ndele to popi nohamba yaJuda, Sedekia, noku i lombwela to ti: “Eshi osho Jehova ta ti, ‘Paife ohandi yandje oshilando eshi meke lohamba yaBabilon, notai ke shi xwika po nomundilo. 3 Noito ka dja mo meke layo u ye onhapo, osheshi ove oto ka kwatwa filufilu, ndele to yandjwa kuyo. Notamu ka talafana nohamba yaBabilon eisho neisho, notai ka popya naave oshipala noshipala, noto ka ya kuBabilon.’ 4 Onghee uda ondjovo yaJehova, ove ohamba yaJuda, Sedekia, ‘Eshi osho Jehova ta ti shi na sha naave: “Ove ito ka fya keongamukonda. 5 Ove oto fi nombili, notave ke ku xwikila oihemba, ngaashi va ningila ooxokulululwa, eehamba odo de ku tetekela, notave ke ku lila tava ti, ‘Woo, akutu omwene!’ osheshi ‘Onda popya ondjovo ei,’ Jehova osho ta ti.”’”’”
6 Opo nee omuprofeti Jeremia okwa lombwela ohamba yaJuda, Sedekia, muJerusalem, eendjovo adishe edi, 7 eshi omatangakwaita ohamba yaBabilon a li taa lwifa Jerusalem noilando aishe yaJuda, oyo ya li ya fyaala po, taa lwifa Lakis nosho yo taa lwifa Aseka; molwaashi oyo ashike oilando yomakuma a pama, oyo ya li ya fyaala po moilando yaJuda.
8 Ondjovo, oyo ye uya kuJeremia ya dja kuJehova, konima eshi ohamba Sedekia ya ninga ehangano novanhu aveshe muJerusalem i va ingidile emanguluko, 9 kutya keshe umwe na mangulule omupika waye Omuheberi, omulumenhu nomukainhu, opo paha kale umwe a ninga Omujuda mukwao omupika waye. 10 Onghee omalenga aeshe novanhu aveshe ova dulika. Ova tambula ko ehangano, olo kutya keshe umwe oku na okumangulula omupika waye, omulumenhu nomukainhu, novaha kale vali ve va ninga ovapika. Ova dulika nove va lekela. 11 Ashike lwanima, ova ka alula vali ovapika vavo, ovalumenhu novakainhu, ovo va li va mangulula nove va fininika vali va kale ovapika. 12 Onghee ondjovo yaJehova oye uya kuJeremia ya dja kuJehova tai ti:
13 “Eshi osho Jehova, Kalunga kaIsrael, ta ti, ‘Onda ninga ehangano nooxokulululwa mefiku olo nde va kufa medu laEgipiti, okudja meumbo loupika, nda ti: 14 “Pexulilo lomido heyali, keshe umwe womunye oku na okumangulula omumwaxe Omuheberi, oo wa li wa landa, naao e ku longela eedula hamano; ou na oku mu mangulula.” Ashike ooxokulululwa inava pwilikina, ile va pakalekele nge omatwi avo. 15 Nopaife* nye omwe lidilulula nomwa ninga osho sha yuka momesho ange mokwiingidila emanguluko ovanhu vakweni, nomwa ninga ehangano koshipala shange meumbo olo la lukilwa edina lange. 16 Ashike omwa ninguluka nomwa nyateka edina lange mokwaalula ovapika veni, ovalumenhu novakainhu, ovo mwa li mwa mangulula pahalo* lavo, nomwe va fininika va kale ovapika.’
17 “Onghee hano, eshi osho Jehova ta ti: ‘Nye inamu dulika kwaame eshi keshe umwe womunye a ingidila omumwaxe nosho yo mukwao emanguluko. Onghee paife ohandi ke mu ingidila emanguluko,’ Jehova osho ta ti, ‘mu fye keongamukonda, koudu* wolutapo nokondjala, nohandi ke mu ninga oshinima shitilifi komauhamba aeshe okombada yedu. 18 Naashi osho tashi ka ningilwa ovanhu ovo va nyona ehangano lange mokuhawanifa po eendjovo dehangano olo va ninga koshipala shange, eshi va teta onhana moinhimbu ivali nova pita pokati koinhimbu oyo, 19 unene tuu omalenga omuJuda, omalenga omuJerusalem, omalenga omombala, ovapristeri novanhu aveshe vomedu eli, ovo va pita pokati koinhimbu yonhana: 20 Ohandi ke va yandja kovatondi vavo nokwaavo tava kongo eemwenyo davo, noimhu yavo otai ka ninga eendja deedila dokeulu nodoifitukuti yokombada yedu. 21 Nohandi ka yandja ohamba yaJuda, Sedekia, nomalenga ayo meke lovatondi vavo nomeke laavo tava kongo eemwenyo davo nomeke lomatangakwaita ohamba yaBabilon, ovo tava efa po oku mu lwifa.’
22 “‘Paife ohandi yandje elombwelo,’ Jehova osho ta ti, ‘nohandi ke va alulila moshilando eshi, notave ke shi lwifa, ndele tave shi kwata ko noku shi xwika po nomundilo; noilando yaJuda ohandi ke i ninga eputu, muhe na ovakalimo.’”
35 Ondjovo oyo ye uya kuJeremia ya dja kuJehova pefimbo laJehoiakim, omonamati waJosia, ohamba yaJuda, tai ti: 2 “Inda keumbo lOvarekab, ndele to popi navo noku va eta meumbo laJehova, muimwe yomeenduda dokulila;* opo nee va pa omaviinyu va nwe.”
3 Onghee onda twala Jaasania, omonamati waJeremia, omonamati waHabasinia, ovamwaxe, ovanamati vaye aveshe, neumbo alishe lOvarekab 4 meumbo laJehova. Onde va eta monduda yokulila yovanamati vaHanan, omonamati waIgdalia, omupiya waKalunga kashili, oyo ya li popepi nonduda yokulila yomalenga, oyo ya li pombada yonduda yokulila yaMaasea, omonamati waSallum, omupashukili woposhivelo. 5 Opo nee onda tula omakopi nomaholo e yadi omaviinyu komesho yovalumenhu vomeumbo lOvarekab, ndele handi ti kuvo: “Nweni omaviinyu.”
6 Ashike ova ti: “Itatu nu omaviinyu, molwaashi Jehonadab,* omonamati waRekab, tatekulululwa, okwe tu pa oshipango eshi, ‘Nye novanamati veni inamu nwa nandenande omaviinyu. 7 Noinamu tunga omaumbo, inamu kuna eembuto, ile mu twike, ile mu likongele oikunino yomandjebele. Ponhele yaasho, omu na alushe okukala momatwali, opo mu dule okukala nomwenyo efimbo lile medu omo hamu di mu li ovanailongo.’ 8 Onghee otwa twikila okudulika kondaka yaJehonadab, omonamati watatekulululwa Rekab, mwaashishe osho e tu lombwela mokuhanwa nandenande omaviinyu, fye, ovakulukadi vetu, ovanamati vetu novanakadona vetu. 9 Noihatu tungu omaumbo tu kale mo, nokatu na oikunino yomandjebele, ile omapya, ile eembuto. 10 Ohatu twikile okukala momatwali nokudulika kwaashishe osho tatekulululwa Jehonadab* e tu lombwela. 11 Ndele eshi ohamba yaBabilon, Nebukadnesar,* ye uya okulwifa oshilongo, otwa ti, ‘Ileni, tu yeni muJerusalem, tu ye onhapo etangakwaita lOvakaldea nolOvaasiria, nopaife ohatu di muJerusalem.’”
12 Nondjovo yaJehova oye uya kuJeremia tai ti: 13 “Eshi osho Jehova womatangakwaita, Kalunga kaIsrael, ta ti, ‘Inda, ndele to lombwele ovanhu vomuJuda novakalimo vomuJerusalem to ti: “Mbela kamwa li hamu lombwelwa mu dulike keendjovo dange?” Jehova osho ta ti. 14 “Jehonadab, omonamati waRekab, okwa lombwela oludalo laye liha nwe omaviinyu, nola dulika keendjovo daye mokuhanwa fiyo okunena eli, tali dulika kelombwelo laxekulululwa. Ashike onda popya nanye oikando noikando,* ndele inamu dulika kwaame. 15 Nonda kala noku mu tumina ovapiya vange aveshe ovaprofeti, handi va tumu oikando noikando* handi ti, ‘Alikana, keshe umwe na efe po eendjila daye dii, nokulonga osho sha yuka. Inamu shikula ookalunga vamwe noku va longela. Opo nee otamu ka kala medu olo nde mu pa nosho yo ooxokulululwa.’ Ndele inamu pakaleka omatwi eni, ile mu pwilikine kwaame. 16 Oludalo laJehonadab, omonamati waRekab, ola dulika kelombwelo, olo xekulululwa e li pa, ashike ovanhu ava inava pwilikina kwaame.”’”
17 “Onghee hano, eshi osho Jehova, Kalunga komatangakwaita, Kalunga kaIsrael, ta ti: ‘Paife ohandi etele Juda nosho yo ovakalimo aveshe vomuJerusalem oudjuu aushe oo nde va londwela kombinga yao, osheshi onda popya navo, ndele inava pwilikina, nonda kala noku va ifana, ashike inava nyamukula.’”
18 Na Jeremia okwa lombwela ovaneumbo lOvarekab a ti: “Eshi osho Jehova womatangakwaita, Kalunga kaIsrael, ta ti, ‘Molwaashi omwa dulika kelombwelo laxokulululwa Jehonadab nomwa twikila okudiinina omalombwelo aye aeshe, mwa ninga naanaa ngaashi e mu lombwela, 19 eshi osho Jehova womatangakwaita, Kalunga kaIsrael, ta ti: “Otapa ka kala alushe oludalo laJehonadab,* omonamati waRekab, li yakule koshipala shange.”’”
36 Onghee modula onhine yaJehoiakim, omonamati waJosia, ohamba yaJuda, ondjovo ei oye uya kuJeremia ya dja kuJehova tai ti: 2 “Kufa omushangwatonywa* nokushanga mo eendjovo adishe, odo nde ku lombwela di li omhinge naIsrael, naJuda nosho yo oiwana aishe okudja kefiku lotete eshi nda popya naave pefimbo laJosia fiyo okunena eli. 3 Pamwe ovo vomeumbo laJuda ngeenge ova udu oudjuu aushe, oo nda hala oku va etela, otashi dulika va efe po eendjila davo dii, opo ndi va dimine po omanyono avo nomatimba avo.”
4 Opo nee Jeremia okwa ifana Baruk, omonamati waNeria, na Jeremia okwe mu lombwela eendjovo adishe odo Jehova e mu lombwela, na Baruk okwe di shanga momushangwatonywa.* 5 Opo nee Jeremia okwa lombwela Baruk ta ti: “Ame onda mangwa noitandi dulu okuya meumbo laJehova. 6 Onghee oove u na okuya mo nokulesha mokule eendjovo daJehova okudja momushangwatonywa oo wa shanga palombwelo lange. Di lesha ovanhu ve udite ko keumbo laJehova mefiku lelidiliko; ou na oku di leshela ovanhu aveshe vomuJuda ovo ve uya mo okudja koilando yavo. 7 Pamwe okwiindila kwavo va filwe onghenda taku fiki kuJehova, nakeshe umwe womuvo ota ka efa po eendjila daye dii, osheshi Jehova okwa tokola okuhololela ovanhu ava ehandu nosho yo onya inene.”
8 Onghee Baruk, omonamati waNeria, okwa ninga ashishe osho a lombwelwa komuprofeti Jeremia; okwa lesha mokule momushangwatonywa* eendjovo daJehova meumbo laJehova.
9 Onghee modula onhinhano yaJehoiakim, omonamati waJosia, ohamba yaJuda, momwedi omutimuwoi, ovanhu aveshe vomuJerusalem novanhu aveshe ovo ve uya kuJerusalem, va dja moilando yaJuda, ova tokola okulidilika koshipala shaJehova. 10 Opo nee Baruk okwa lesha mokule momushangwatonywa* eendjovo daJeremia meumbo laJehova monduda* yaGemaria, omonamati waSafan, omushangululi,* momukala wopombada, poshivelo shipe sheumbo laJehova, ovanhu aveshe ve udite ko.
11 Eshi Mikaia, omonamati waGemaria, omonamati waSafan, a uda eendjovo adishe daJehova okudja momushangwatonywa* 12 okwa ya keumbo* lohamba monduda yahamushanga. Omalenga* aeshe okwa li omutumba omo: hamushanga Elisama, Delaia, omonamati waShemaia, Elnatan, omonamati waAkbor, Gemaria, omonamati waSafan, Sedekia, omonamati waHanania, nomalenga aeshe makwao. 13 Mikaia okwe va lombwela eendjovo adishe, odo a uda, eshi Baruk a li ta lesha momushangwatonywa* moipafi yovanhu.
14 Opo nee omalenga aeshe okwa tuma Jehudi, omonamati waNetania, omonamati waSelemia, omonamati waKus, kuBaruk a ti: “Ila, ndele etelela omushangwatonywa omo wa lesha moipafi yovanhu.” Baruk, omonamati waNeria, okwa kufa omushangwatonywa meke laye nokwa ya mo kuvo. 15 Ova tya kuye: “Alikana, kala omutumba, ndele to tu leshele mokule.” Onghee Baruk okwe va leshela mo.
16 Diva ashike eshi va uda eendjovo adishe, ova talafana va tila, nova tya kuBaruk: “Otu na okulombwela filufilu ohamba eendjovo adishe edi.” 17 Nova pula Baruk va ti: “Alikana, tu lombwela nghee wa shanga eendjovo adishe edi. Mbela opalombwelo laye?” 18 Baruk okwe va nyamukula a ti: “Okwa lombwela nge eendjovo adishe edi, nonde di shanga nohinga momushangwatonywa* ou.” 19 Omalenga okwa lombwela Baruk a ti: “Indeni, ndele tamu ka hondama, ove naJeremia, noinamu efa nande oumwe a shiive apa mu li.”
20 Opo nee okwa ya mo kohamba momukala nokwa twala omushangwatonywa monduda yahamushaga Elisama, nokwa lombwela ohamba oinima aishe oyo a uda.
21 Onghee ohamba oya tuma Jehudi a ka tale omushangwatonywa nokwe u eta okudja monduda yahamushanga Elisama. Jehudi okwa hovela oku u lesha momatwi ohamba noomalenga aeshe, oo a li a fikama pohamba. 22 Ohamba oya li i li omutumba meumbo lopokufu momwedi omutimuwoi,* nomundilo owa li wa tema mefiya komesho yayo. 23 Shimha Jehudi a lesha ko omapandja atatu, ile anhe, ohamba ohai tete ko oshitukulwa osho nombele yahamushanga noku shi xwela momundilo, oo wa li wa tema mefiya, fiyo osheshi omushangwatonywa aushe wa tulwa momundilo oo wa li mefiya. 24 Nokava li va kwatwa koumbada; kutya nee ohamba, ile ovapiya vayo aveshe, ovo va uda eendjovo adishe edi, inava pombaula oikutu yavo. 25 Nonande Elnatan, Delaia naGemaria ova indila ohamba iha xwike po omushangwatonywa, inai pwilikina kuvo. 26 Natango, ohamba oya lombwela Jerahmeel, omonamati wohamba, Seraja, omonamati waAsriel, naSelemia, omonamati waAbdel, va ka kwate hamushanga Baruk nosho yo omuprofeti Jeremia, ashike Jehova okwa kala e va holeka.
27 Nondjovo yaJehova oye uya vali kuJeremia, konima eshi ohamba ya xwika po omushangwatonywa, oo wa li u na eendjovo odo da shangwa kuBaruk palombwelo laJeremia tai ti: 28 “Kufa vali omushangwatonywa umwe, nokushanga mo eendjovo adishe da faafana naado da li momushangwatonywa wotete, oo wa xwikwa po kohamba yaJuda, Jehoiakim. 29 Nou na okupopya u li omhinge nohamba yaJuda, Jehoiakim, to ti, ‘Eshi osho Jehova ta ti: “Ove owa xwika po omushangwatonywa nowa ti, ‘Omolwashike wa shangela mo kutya: “Ohamba yaBabilon otai ke uya shili nokuhanauna po oshilongo eshi nokuyeleka mo ovanhu noinamwenyo”?’ 30 Onghee hano, eshi osho Jehova ta ti shi na sha nohamba yaJuda, Jehoiakim: ‘Itai ka kala i na oo ta ka kala omutumba kolukalwapangelo laDavid, noshimhu shayo otashi ka efiwa shi pye omutenya efimbo lomutenya nokufya outalala oufiku. 31 Ye, oludalo laye novapiya vaye ohandi ke va handukila omolwenyono lavo, vo novakalimo vomuJerusalem novanhu vomuJuda, ohandi ke va etela oudjuu aushe oo nda popya shi na sha navo, ashike inava pwilikina.’”’”
32 Opo nee Jeremia okwa kufa vali omushangwatonywa umwe, nokwe u yandja kuBaruk, omonamati waNeria, nopalombwelo laJeremia okwa shanga mo eendjovo adishe domomushangwatonywa,* oo wa xwikwa po kohamba yaJuda, Jehoiakim. Neendjovo dihapu da fa odo oda wedwa mo.
37 Nohamba Sedekia, omonamati waJosia, oya hovela okupangela ponhele yaKonia,* omonamati waJehoiakim, osheshi ohamba yaBabilon, Nebukadnesar,* oye mu ninga ohamba moshilongo shaJuda. 2 Ashike yo novapiya vayo nosho yo ovanhu vomoshilongo inava pwilikina keendjovo daJehova, odo da popiwa okupitila momuprofeti Jeremia.
3 Nohamba Sedekia oya tuma Jukal, omonamati waSelemia, naSefania, omonamati womupristeri Maasea, komuprofeti Jeremia tai ti: “Alikana, ilikana ponhele yetu kuJehova, Kalunga ketu.” 4 Jeremia okwa li ha endaenda a manguluka mokati kovanhu, osheshi kava li natango ve mu tula modolongo. 5 Etangakwaita laFarao ola dja mo muEgipiti, nOvakaldea, ovo va li va kondeka Jerusalem, ova uda ehokololo li na sha navo. Onghee ova efa po okulwifa Jerusalem. 6 Opo nee ondjovo yaJehova oye uya komuprofeti Jeremia tai ti: 7 “Eshi osho Jehova, Kalunga kaIsrael, ta ti, ‘Eshi osho mu na okulombwela ohamba yaJuda oyo ye mu tuma kwaame, mu pule nge tamu ti: “Tala! Etangakwaita laFarao, olo tali uya oku ku kwafela, oli na okushuna koshilongo shalo, Egipiti. 8 NOvakaldea otava ka aluka nokulwifa oshilando eshi, ndele tave shi kwata ko noku shi xwika po nomundilo.” 9 Eshi osho Jehova ta ti, “Inamu lifufya nye vene* tamu ti, ‘Ovakaldea otava ka dja po filufilu pufye,’ molwaashi itava ka dja po. 10 Nokuli nonande omu dipae etangakwaita alishe lOvakaldea, olo tali mu lwifa, ndele tapa fyaala ashike ovalumenhu, ovo va ehamekwa, natango otava ka dja momatwali avo, ndele tava xwike po oshilando eshi nomundilo.”’”
11 Eshi etangakwaita lOvakaldea la efa po okulwifa Jerusalem omolwetangakwaita laFarao, 12 Jeremia okwa dja mo muJerusalem, a ya kedu laBenjamin, a ka pewe oshitukulwa shaye oko mokati koshiwana shavo. 13 Ndele eshi a fika pomuvelo waBenjamin, omupashukili wovanangeli wedina Iria, omonamati waSelemia, omonamati waHanania, okwa kwata omuprofeti Jeremia, ndele ta ti: “Ove oto ke liyandja kOvakaldea!” 14 Ashike Jeremia okwa ti: “Kashi fi shoshili! Ame itandi ke liyandja kOvakaldea.” Ndele ina pwilikina kuye. Onghee Iria okwa kwata po Jeremia, ndele te mu twala mo komalenga. 15 Omalenga okwa li a handukila neenghono Jeremia, nokwe mu denga, ndele ta e mu tula modolongo,* meumbo lahamushanga, Jehonatan, olo la ningwa odolongo. 16 Jeremia okwa li a tulwa meemhango,* meenduda dokoshi yedu, nokwa kala mo omafiku mahapu.
17 Opo nee ohamba Sedekia oye mu tuma ko, noye mu pulapula meholeko meumbo* layo. Oya pula ya ti, “Kape na ondjovo ya dja kuJehova?” Jeremia okwa ti, “Ope na!” nokwa twikila ko, “Oto ka yandjwa meke lohamba yaBabilon!”
18 Jeremia okwa pula yo ohamba Sedekia ta ti: “Onda nyona shike kwoove nokovapiya voye nosho yo kovanhu ava, opo mu tule nge modolongo? 19 Paife ovaprofeti voye, ovo ve ku xunganekela kutya ‘Ohamba yaBabilon itai uya i ku lwife nosho yo oshilongo eshi ove li peni’? 20 Alikana, paife pwilikina, akutu omwene wange, ohamba. Alikana, uda eindilo lange li na sha nokufilwa onghenda. Ino shunifa nge keumbo lahamushanga Jehonatan, ngeenge hasho ohandi ka fila ko.” 21 Onghee ohamba Sedekia oya yandja elombwelo kutya Jeremia na tulwe modolongo mOmukala wOvanangeli, nokwa li ha pewa omungome wongonga efiku keshe wa dja mepandavanda lovateleki, fiyo osheshi omingome adishe da pwa mo moshilando. Na Jeremia okwa kala mOmukala wOvanangeli.
38 Paife Sefatia, omonamati waMattan, Gedalia, omonamati waPashur, Jukal, omonamati waSelemia, naPashur, omonamati waMalkia, ova uda eendjovo odo Jeremia a lombwela ovanhu aveshe a ti: 2 “Eshi osho Jehova ta ti: ‘Oo ta kala moshilando eshi ota ka fya keongamukonda, kondjala nokoudu* wolutapo. Ashike oo te liyandje* kOvakaldea ota ka xupa nomwenyo nota ka kala nomwenyo waye onga oshixuulwa* nota kala nomwenyo.’ 3 Eshi osho Jehova ta ti, ‘Oshilando eshi otashi ka yandjwa shili meke letangakwaita lohamba yaBabilon, notai ke shi kwata ko.’”
4 Omalenga okwa tya kohamba: “Alikana, dipaifa omulumenhu ou, osheshi kungaha, ota shololifa ovakwaita va kale vehe na ondjungu,* ava va fyaala moshilando eshi nosho yo yovanhu aveshe, eshi te va lombwele eendjovo odo. Osheshi omulumenhu ou ina halela ovanhu ombili, ndele oupyakadi ashike.” 5 Ohamba Sedekia oya nyamukula ya ti: “Taleni, ye oku li momake eni, osheshi ohamba itai dulu okuninga po sha i mu kelele.”
6 Onghee ova kwata Jeremia, ndele tave mu kupula mondungu yaMalkia, omonamati wohamba, oyo ya li momukala wovanangeli. Ova kulukifila mo Jeremia neengodi. Mondungu kamwa li omeva, omwa li ashike onhata, na Jeremia okwa hovela okuningina monhata.
7 Ebed-melek, Omuetiopia, elenga* lomeumbo* lohamba, okwa uda kutya ova tula Jeremia mondungu. Ohamba oya li i li omutumba poshivelo shaBenjamin, 8 onghee Ebed-melek okwa ya keumbo* lohamba, ndele ta popi nohamba ta ti: 9 “Omwene wange ohamba, eshi ovalumenhu ava va ningila omuprofeti Jeremia oshii! Ove mu kupula mondungu, nota file mo kondjala, osheshi moshilando inamu fyaala omungome.”
10 Opo nee ohamba oya lombwela Ebed-melek, Omuetiopia, tai ti: “Kufa ovalumenhu 30 apa, ndele tamu nane mo omuprofeti Jeremia mondungu, ofimbo ina fya.” 11 Onghee Ebed-melek okwa kufa ovalumenhu nokwa ya pamwe navo meumbo* lohamba konhele i li koshi yeemhungulilo, nova kufa ko oilapi noituta ya nyanyauka, ndele tave i kulukifile neengodi kuJeremia mondungu. 12 Opo nee Ebed-melek, Omuetiopia, okwa tya kuJeremia: “Alikana, tula oituta noilapi meenghwapa doye nosho yo eengodi.” Jeremia osho a ninga, 13 nova shila mo Jeremia neengodi noku mu nana mo mondungu. Na Jeremia okwa kala mOmukala wOvanangeli.
14 Ohamba Sedekia oya tuma omuprofeti Jeremia e uye kuyo poshivelo oshititatu, osho shi li meumbo laJehova, nohamba oya tya kuJeremia: “Onda hala oku ku pula sha. Ino holeka nge sha.” 15 Opo nee Jeremia okwa tya kuSedekia: “Ngeenge onde ku lombwele, oto dipaa nge shili. Nongeenge onde ku pe omayele, ito ka pwilikina nge.” 16 Onghee ohamba Sedekia oya anena Jeremia meholeko tai ti: “Oshili, ofimbo Jehova e na omwenyo, ou e tu pa omwenyo ou,* itandi ku dipaa, noitandi ke ku yandja kovalumenhu ovo tava kongo omwenyo woye.”
17 Opo nee Jeremia okwa tya kuSedekia: “Eshi osho Jehova, Kalunga komatangakwaita, Kalunga kaIsrael, ta ti: ‘Ngeenge owe liyandje* komalenga ohamba yaBabilon, omwenyo woye otau ka xupifwa,* noshilando eshi itashi ka xwikwa po nomundilo, naave nosho yo ovaneumbo loye otamu ka xupifwa. 18 Ndele ngeenge ito liyandje* komalenga ohamba yaBabilon, oshilando eshi otashi ka yandjwa kOvakaldea, notave ke shi xwika po nomundilo, naave ito ka dja mo meke lavo.’”
19 Opo nee ohamba Sedekia oya tya kuJeremia: “Ame onda tila Ovajuda ovo va ya kOvakaldea, osheshi ngeenge onda yandjwa kuvo, otashi dulika va ungaunge naame nonyanya.” 20 Ashike Jeremia okwa ti: “Ove ito ka yandjwa kuvo. Alikana, dulika kondaka yaJehova mwaashi handi ku lombwele, notashi ke ku endela nawa, naave* oto ka twikila okukala nomwenyo. 21 Ndele ngeenge owa anye okuliyandja,* eshi osho Jehova a hololela nge: 22 Tala! Ovakainhu aveshe ovo va fyaala meumbo* lohamba yaJuda, otava twalwa komalenga ohamba yaBabilon, notava ti,
‘Ovalumenhu, ovo wa li we lineekela,* ove ku kengelela nove ku finda.
Ova ningifa omhadi yoye i ningine monhata.
Paife ova ya onhapo.’
23 Novakulukadi voye aveshe nosho yo ovanamati voye otave va twala kOvakaldea, naave ito ka dja mo meke lavo, ashike oto ka kwatwa kohamba yaBabilon, nomolwoye oshilando eshi otashi ka xwikwa po nomundilo.”
24 Opo nee Sedekia okwa tya kuJeremia: “Oshinima eshi inashi shiivika nande okomunhu, opo uha fye. 25 Nongeenge omalenga okwa udu kutya onda popya naave, ndele tae uya kwoove, nokutya kwoove, ‘Alikana, tu lombwela osho wa lombwela ohamba. Ino tu holeka sha nande, noitatu ke ku dipaa. Ohamba oye ku lombwela shike?’ 26 Ou na oku va nyamukula kutya, ‘Onda li ashike handi indile ohamba iha shunife nge keumbo laJehonatan oko ndi ka file.’”
27 Lwanima, omalenga aeshe okwe uya kuJeremia nokwe mu pula. Okwe a lombwela oinima aishe, oyo ohamba ye mu lombwela a popye. Onghee inaa popya sha vali naye, osheshi kapa li oo a uda eenghundafana davo. 28 Fiyo efiku olo Jerusalem sha kwatwa ko, Jeremia okwa kala mOmukala wOvanangeli; omo a li natango omo, eshi Jerusalem sha kwatwa ko.
39 Momwedi omutimulongo, momudo omutimuwoi wepangelo lohamba yaJuda, Sedekia, ohamba yaBabilon, Nebukadnesar,* netangakwaita layo alishe ove uya kuJerusalem, noku shi kondeka.
2 Mefiku etimuwoi lomwedi, momwedi omutine wodula onhi-11 yepangelo laSedekia, ova mbonyona ekuma loshilando. 3 Nomalenga aeshe ohamba yaBabilon okwa ya mo, ndele taa kala omutumba pOshivelo shoPokati, omadina ao oo: Nergal-shareser, Omusamgar, Nebo Sarsekim, Omurabsaris,* Nergal-Shareser, Omurabmag* nosho yo omalenga aeshe ohamba yaBabilon.
4 Eshi ohamba yaJuda, Sedekia, novakwaita aveshe ve va mona, ova faduka po, va dja mo moshilando oufiku va ya nondjila oyo ya pita moshikunino shohamba, va pitila poshivelo osho shi li pokati komakuma avali nova twikila nondjila oyo ya finda kuAraba. 5 Ashike etangakwaita lOvakaldea ole va taataa, nova kwatela Sedekia momaluhaela omombuwa yaJeriko. Ove mu kwata, ndele tave mu twala kohamba yaBabilon, Nebukadnesar,* kuRibla, medu laHamat, omo ye mu tokolela ehandukilo. 6 Ohamba yaBabilon oya dipaifa ovanamati vaSedekia moipafi yaye opo, puRibla, nohamba yaBabilon oya dipaifa ovaleli aveshe vomuJuda. 7 Opo nee oya twiyula Sedekia omesho, konima yaasho, oye mu manga nomalyenge ongopolo i mu ete kuBabilon.
8 Opo nee Ovakaldea ova xwika po eumbo* lohamba nosho yo omaumbo ovanhu, nova ngumauna po omakuma aJerusalem. 9 Nebusaradan, elenga lovanangeli, okwa twala moukwatwa kuBabilon ovanhu aveshe ovo va fyaala moshilando, ovo ve liyandja kuye, nakeshe umwe oo a fyaala po.
10 Ashike Nebusaradan, elenga lovanangeli, okwa fiya moshilongo shaJuda ovanhu vamwe, ovo va hepa neenghono, ovo vehe na sha nandenande. Mefiku olo tuu olo, okwe va pa yo oikunino yomandjebele nosho yo omapya ve a longe.*
11 Opo nee ohamba yaBabilon, Nebukadnesar,* oya pa Nebusaradan, elenga lovanangeli, omalombwelo aa, e na sha naJeremia: 12 “Mu kufa po noku mu fila oshisho; ino mu ningila owii washa, ndele mu pa keshe osho te ku pula.”
13 Onghee Nebusaradan, elenga lovanangeli, Nebusasban, Omurabsaris,* Nergal-shareser, Omurabmag,* nosho yo ovalumenhu aveshe va fimana vohamba yaBabilon ova tuma, 14 nova kufifa mo Jeremia mOmukala wOvanangeli nove mu yandja kuGedalia, omonamati waAhikam, omonamati waSafan, a e twe keumbo laye. Onghee okwa kala mokati kovanhu.
15 Ofimbo Jeremia a li a idililwa mOmukala wOvanangeli, ondjovo yaJehova oye uya kuye, tai ti: 16 “Inda, ndele to lombwele Ebed-melek, Omuetiopia, to ti: ‘Eshi osho Jehova womatangakwaita, Kalunga kaIsrael, ta ti: “Paife ohandi wanifa po eendjovo dange moshilando eshi di na sha noupyakadi, ndele hanouwa, nomefiku olo, oto ka mona eshi tashi ningwa.”’
17 “‘Ashike ohandi ke ku xupifa mefiku olo,’ Jehova osho ta ti, ‘noito ka yandjwa kovalumenhu ovo ho tila.’
18 “‘Osheshi ohandi ke ku kwafela u ye onhapo shili, noito ka fya keongamukonda. Oto ka kala u na omwenyo woye onga oshixuulwa,* molwaashi owe lineekela mwaame,’ Jehova osho ta ti.”
40 Ondjovo oyo ye uya kuJeremia ya dja kuJehova, konima eshi Nebusaradan, elenga lovanangeli, e mu efa a ye a manguluka okudja muRama. Okwe mu kufa po a tulwa moiketanga, nokwa li mokati keenghwate adishe domuJerusalem nodomuJuda, odo da li tadi twalwa kuBabilon. 2 Opo nee elenga lovanangeli ola kufa Jeremia, ndele tali ti kuye: “Jehova, Kalunga koye, okwa xunganeka oupyakadi ou u na sha nonhele ei, 3 na Jehova okwe u eta ngaashi naanaa a popya, molwaashi nye ovanhu omwa nyona kuJehova noinamu dulika kondaka yaye. Nomolwaasho eshi tashi mu ningilwa. 4 Paife ohandi ku mangulula nena eli moiketanga, oyo i li koikesho yoye. Ngeenge oto dimine okuya naame kuBabilon, ila, nohandi ke ku fila oshisho. Ashike ngeenge ino hala okuya naame kuBabilon, fyaala po. Tala! Edu alishe ololo u wete ngaho. Hoolola keshe opo wa hala okuya.”
5 Ofimbo Jeremia a li ina ya natango, Nebusaradan okwa ti: “Shuna kuGedalia, omonamati waAhikam, omonamati waSafan, oo ohamba yaBabilon ya nangeka po a pashukile oilando yaJuda, ndele to kala naye mokati kovanhu; ile u ye keshe opo wa hoolola.”
Opo nee elenga lovanangeli ole mu pa oikulya noshali, ndele tali mu efa a ye. 6 Onghee Jeremia okwa ya kuGedalia, omonamati waAhikam, kuMispa, ndele ta kala naye mokati kovanhu, ovo va li va fyaala moshilongo.
7 Lwanima, eendjai adishe detangakwaita odo da li moixwa novakwaita vado, oda uda kutya ohamba yaBabilon oya nangeka po Gedalia, omonamati waAhikam, a pashukile oshilongo nosho yo kutya okwe mu nangeka po a pashukile ovalumenhu, ovakainhu nounona, okudja keehepele domoshilongo, odo da li inadi twalwa kuBabilon. 8 Onghee ode uya kuGedalia, kuMispa. Eendjai odo oda li Ismael, omonamati waNetania, Johanan naJonatan, ovanamati vaKarea, Seraja, omonamati waTanhumet, ovanamati vaEfai, Omunetofa, naJesania, omonamati wOmumaakati, pamwe novakwaita vavo. 9 Gedalia, omonamati waAhikam, omonamati waSafan, okwe va anena nosho yo ovakwaita vavo a ti: “Inamu tila okulongela Ovakaldea. Kaleni moshilongo nokulongela ohamba yaBabilon, notashi ke mu endela nawa. 10 Ashike ame ohandi kala muMispa ndi mu kalele po* kOvakaldea, ovo ve uya kufye. Ndele nye omu na okwoongela omaviinyu, oiimati yopokwenye nomaadi, ndele tamu a tula moikwatelwa yokutuvikila nokukala moilando oyo mwa nangala.”
11 NOvajuda aveshe, ovo va li muMoab, muAmmoni nomuEdom nosho yo ovo va li moilongo ikwao aishe, ova uda yo kutya ohamba yaBabilon oya efa oshixupe shi kale muJuda nosho yo kutya oye va nangekela po Gedalia, omonamati waAhikam, omonamati waSafan, e va pashukile. 12 Onghee Ovajuda aveshe ova hovela okudja ko keenhele adishe oko va li va halakanifilwa nove uya medu laJuda, kuGedalia, puMispa. Nova ongela omaviinyu noiimati yopokwenye momuvalu munene neenghono.
13 Johanan, omonamati waKarea, neendjai adishe detangakwaita, odo da li moixwa, ove uya kuGedalia, kuMispa. 14 Oda tya kuye: “Mbela ku shii kutya Baalis, ohamba yOvaammoni, okwa tuma Ismael, omonamati waNetania, e ku dipae?”* Ashike Gedalia, omonamati waAhikam, ine di itavela.
15 Opo nee Johanan, omonamati waKarea, okwa lombwela meholeko Gedalia, muMispa, a ti: “Onda hala okuya nokudipaa Ismael, omonamati waNetania, nokape na oo te shi shiiva. Omolwashike e na oku ku dipaa,* nomolwashike ovanhu aveshe vomuJuda ovo va ongala pwoove ve na okuhalakanifwa, noshixupe shaJuda shi na okuxula po?” 16 Ndele Gedalia, omonamati waAhikam, okwa tya kuJohanan, omonamati waKarea: “Ino ninga ngaho, osheshi osho to popi kombinga yaIsmael oipupulu.”
41 Momwedi omutiheyali, Ismael, omonamati waNetania, omonamati waElisama, oo a li momusholondodo waavo tava ka ninga eehamba* nosho yo umwe womovalumenhu va fimana vohamba, okwe uya pamwe novalumenhu vakwao omulongo kuGedalia, omonamati waAhikam, muMispa. Ofimbo va li tava li muMispa, 2 Ismael, omonamati waNetania, nosho yo ovalumenhu omulongo, ovo va li pamwe naye, ova fikama, ndele tava tu neongamukonda Gedalia, omonamati waAhikam, omonamati waSafan. Onghee ova dipaa oo a li a nangekwa po kohamba yaBabilon a pashukile oshilongo. 3 Ismael okwa dipaa yo Ovajuda aveshe ovo va li naGedalia, muMispa, nosho yo ovakwaita Ovakaldea ovo va li po.
4 Mefiku etivali, konima eshi Gedalia a dipawa, ofimbo pehe na oo e shi shii, 5 ope uya ovalumenhu 80 va dja kuSekem, kuSilo nosho yo kuSamaria. Eendjedi davo oda li da kululwa ko, oikutu yavo oya li ya pombauka, ve lilengaula vo vene, nova li ve na eendjayambo nosho yo eka ledimba liwa meke lavo, ve i eta keumbo laJehova. 6 Onghee Ismael, omonamati waNetania, okwa dja mo muMispa e ke va shakeneke, ta ende ta lili. Eshi e va shakeneka, okwa tya kuvo: “Ileni kuGedalia, omonamati waAhikam.” 7 Ashike eshi ve uya moshilando, Ismael, omonamati waNetania, nosho yo ovalumenhu, ovo va li pamwe naye, ove va dipaa, ndele tave va ekele mondungu.
8 Ashike opa li ovalumenhu omulongo vomokati kavo ovo va lombwela Ismael tava ti: “Ino tu dipaa, osheshi otu na eefudika moixwa doilya yo-wheat, doilya yo-barley, domaadi nodomaadi eenyiki.” Onghee okwe lialuluka ehe va dipaele pamwe novamwaxe. 9 Opo nee Ismael okwa ekela oimhu aishe yovalumenhu ovo a dipaa mondungu inene, oyo ohamba Asa ya xupa omolwohamba Baasha yaIsrael. Ei oyo ya li ondungu oyo Ismael, omonamati waNetania, a yadifa noimhu yovalumenhu ovo va dipawa.
10 Ismael okwa kufa ovanhu aveshe vomuMispa ve li eenghwate, mwa kwatelwa ovanakadona vohamba novanhu aveshe, ovo va fyaala muMispa, ovo Nebusaradan, elenga lovanangeli, a li a tula mepashukilo laGedalia, omonamati waAhikam. Ismael, omonamati waNetania, okwe va kufa ve li eenghwate, nokwa tauluka, ndele ta i navo kOvaammoni.
11 Eshi Johanan, omonamati waKarea, neendjai adishe detangakwaita, odo da li puye, va uda owii aushe oo Ismael, omonamati waNetania, a ninga, 12 ova kufa ovanhu aveshe, nova ya va ka lwife Ismael, omonamati waNetania, nove mu hanga pomeva mahapu,* muGibeon.
13 Ovanhu aveshe, ovo va li naIsmael, ova li va hafa, eshi va mona Johanan, omonamati waKarea, neendjai adishe detangakwaita di li naye. 14 Opo nee ovanhu aveshe, ovo Ismael a kufa muMispa ve li eenghwate, ova piluka, ndele tava shuna kuJohanan, omonamati waKarea. 15 Ashike Ismael, omonamati waNetania, novalumenhu vahetatu, ovo va li pamwe naye, ova faduka po Johanan, nova ya kOvaammoni.
16 Johanan, omonamati waKarea, neendjai adishe detangakwaita, odo da li puye, ova kufa ovanhu aveshe ovo va dja kuMispa, ovo va xupifwa momake aIsmael, omonamati waNetania, konima eshi a dipaa Gedalia, omonamati waAhikam. Ova alula ovalumenhu, ovakwaita, ovakainhu, ounona nomalenga omombala okudja kuGibeon. 17 Onghee ova ya, ndele tava kala monhele yokufuwila i li muKimham popepi naBetlehem, va hala okuya muEgipiti 18 omolwOvakaldea. Osheshi ova li ve va tila, molwaashi Ismael, omonamati waNetania, okwa dipaa Gedalia, omonamati waAhikam, oo a li a tulwa po kohamba yaBabilon, a pashukile oshilongo.
42 Opo nee eendjai adishe detangakwaita naJohanan, omonamati waKarea, Jesania, omonamati waHosaia, nosho yo ovanhu aveshe, okudja kohepele fiyo okoshipuna, ove uya, 2 ndele tava ti komuprofeti Jeremia: “Alikana, uda eindilo letu, eshi hatu pula tu filwe onghenda, nokwiilikana ponhele yetu kuJehova, Kalunga koye, ponhele yoshixupe ashishe eshi, osheshi opa xupa ashike vanini vomovanhu vahapu, ngaashi u shi wete. 3 Jehova, Kalunga koye, ne tu lombwele ondjila, oyo tu na okweenda, naasho tu na okuninga.”
4 Omuprofeti Jeremia okwe va nyamukula a ti: “Onde mu uda, nohandi ka ilikana kuJehova, Kalunga keni, ngaashi mwa indila; nondjovo keshe oyo Jehova te ke mu pa, ohandi i mu lombwele. Itandi ka fiya ko nande ondjovo imwe inandi i mu lombwela.”
5 Ova nyamukula Jeremia va ti: “Jehova na kale ondombwedi idiinini noyoshili kufye, ngeenge itatu ningi filufilu osho Jehova, Kalunga koye, e tu lombwela okupitila mwoove. 6 Kutya nee oshiwa, ile oshii, ohatu ka dulika kondaka yaJehova, Kalunga ketu, oo hatu ku tumu kuye, opo shi tu endele nawa, molwaashi ohatu dulika kondaka yaJehova, Kalunga ketu.”
7 Opo nee konima yomafiku omulongo, ondjovo yaJehova oye uya kuJeremia. 8 Onghee okwa ifana Johanan, omonamati waKarea, nosho yo eendjai adishe detangakwaita, odo da li pamwe naye, novanhu aveshe, okudja kohepele fiyo okoshipuna. 9 Okwa tya kuvo: “Eshi osho Jehova, Kalunga kaIsrael, ou mwa tumine nge kuye ndi twale koshipala shaye eindilo leni li na sha nokufilwa onghenda ta ti: 10 ‘Ngeenge omwa kala shili medu eli, opo nee ohandi ke mu tunga noitandi mu teyaula po, nohandi ke mu twika, noitandi mu duda mo, osheshi ohandi ke livela ombedi* omolwoupyakadi oo nde mu tumina. 11 Inamu kala mwa tila omolwohamba yaBabilon, oyo hamu tila.’
“‘Inamu kala mwa tila omolwayo,’ Jehova osho ta ti, ‘osheshi ondi li pamwe nanye, ndi mu amene noku mu xupifa meke layo. 12 Nohandi ke mu fila onghenda, notai ke mu fila onghenda noku mu shunifa koshilongo sheni.
13 “‘Ndele ngeenge omwa ti, “Ahawe, itatu kala moshilongo eshi!” noinamu dulika kondaka yaJehova, Kalunga keni, 14 mokutya, “Ahawe, ponhele yaasho ohatu i kedu laEgipiti, oko itatu ka mona oita, ile tu ude ewi lenghuma, ile tu fye ondjala, oko oko hatu ka kala,” 15 opo nee udeni hano ondjovo yaJehova, akutu oshixupe shaJuda. Eshi osho Jehova womatangakwaita, Kalunga kaIsrael, ta ti: “Ngeenge omwa tokola shili okuya kuEgipiti, ndele tamu i oko mu ka kale ko,* 16 opo nee eongamukonda lo vene, olo hamu tila, otali ke mu hanga oko medu laEgipiti, nondjala yo vene, oyo hamu tila, otai ke mu shikulila oko kuEgipiti, naako oko tamu ka fila. 17 Novanhu aveshe, ovo tava ka tokola okuya kuEgipiti nokukala oko, otava ka fya keongamukonda, kondjala nosho yo koudu* wolutapo. Kape na nande oumwe womuvo ta ka xupa, ile ta ka ya onhapo oudjuu oo handi ke va etela.”’
18 “Osheshi eshi osho Jehova womatangakwaita, Kalunga kaIsrael, ta ti: ‘Ngaashi ashike ehandu lange nonya yange ya li ya tililwa ovakalimo vomuJerusalem, osho yo onya yange tai ke mu tililwa, ngeenge omwa i kuEgipiti, notamu ka ninga ovafingwa, oshinima shitilifi, ovadinwa novashekwa, noitamu ka mona vali onhele ei nandenande.’
19 “Jehova okwa popya nanye, akutu oshixupe shaJuda. Inamu ya kuEgipiti. Shiiveni shili kutya nena eli onde mu londwela 20 kutya omanyono eni otaa twaalele eemwenyo deni. Osheshi omwa tuma nge kuJehova, Kalunga keni, mwa ti, ‘Ilikana ponhele yetu kuJehova, Kalunga ketu, noku tu lombwela ashishe osho Jehova, Kalunga ketu, ta ti, nohatu ke shi ninga.’ 21 Nonde mu lombwela nena, ashike itamu ka dulika kondaka yaJehova, Kalunga keni, ile mu ninge keshe osho a tuma nge ndi mu lombwele. 22 Onghee hano, shiiveni filufilu kutya otamu ka fya keongamukonda, kondjala nokoudu wolutapo konhele oko mwa hala okuya noku ka kala.”
43 Eshi Jeremia a mana okupopya novanhu aveshe eendjovo adishe odo da dja kuJehova, Kalunga kavo, ondjovo keshe oyo Jehova, Kalunga kavo, e mu tumina e i va lombwele, 2 Asaria, omonamati waHosaia, Johanan, omonamati waKarea, novanhu aveshe ovalinenepeki ova tya kuJeremia: “Osho to popi oipupulu! Jehova, Kalunga ketu, ine ku tuma u tye, ‘Inamu ya kuEgipiti, mu ka kale oko.’ 3 Ashike Baruk, omonamati waNeria, ote ku heke, u kale omhinge nafye tu yandjwe kOvakaldea, tu dipawe, ile tu twalwe moukwatwa kuBabilon.”
4 Onghee Johanan, omonamati waKarea, neendjai adishe detangakwaita nosho yo ovanhu aveshe inava dulika kondaka yaJehova i na sha nokukala medu laJuda. 5 Ponhele yaasho, Johanan, omonamati waKarea, neendjai adishe detangakwaita ova kufa oshixupe ashishe shaJuda osho sha aluka shi kale medu laJuda, okudja moiwana aishe omo sha li sha halakanifilwa. 6 Ova kufa ovalumenhu, ovakainhu, ounona, ovanakadona vohamba nakeshe umwe,* ovo Nebusaradan, elenga lovanangeli, a fiila Gedalia, omonamati waAhikam, omonamati waSafan, nosho yo omuprofeti Jeremia naBaruk, omonamati waNeria. 7 Nova ya kedu laEgipiti, osheshi inava dulika kondaka yaJehova nova ya fiyo okuTapanes.
8 Opo nee ondjovo yaJehova oye uya kuJeremia, muTapanes, tai ti: 9 “Kufa omamanya makula meke loye, ndele to a holeke momunhoko pokati komikweyo deedopi poshivelo sheumbo laFarao muTapanes, moipafi yovalumenhu Ovajuda. 10 Opo nee va lombwela to ti, ‘Eshi osho Jehova womatangakwaita, Kalunga kaIsrael, ta ti: “Paife ohandi tumu ohamba yaBabilon, Nebukadnesar,* omupiya wange, nohandi ka tula olukalwapangelo laye kombada yomamanya aa nda holeka, nota ka dika etwali laye louhamba kombada yao. 11 Notai ke uya mo nokudenga edu laEgipiti. Keshe oo a tokolelwa omukifi omudipai, ota ka fya komukifi omudipai, nakeshe oo e na okuya moukwatwa ota ka ya moukwatwa, nakeshe oo e na okufya keongamukonda ota ka fya keongamukonda. 12 Nohandi ka tomeka omundilo omaumbo* ookalunga vomuEgipiti, notai ke a xwika po noku va twala moukwatwa. Otai ke lidingila edu laEgipiti, ngaashi ashike omufita he lidingile oshikutu shaye, notai ka dja po opo nombili.* 13 Notai ka teyaula moitandu eengudimanya* daBet-semes* medu laEgipiti, notai ka xwika po nomundilo omaumbo* ookalunga vomuEgipiti.”’”
44 Ondjovo oyo ye uya kuJeremia omolwOvajuda aveshe ovo ve li medu laEgipiti, ovo ve li muMigdol, muTapanes, muNof,* nomedu laPatros tai ti: 2 “Eshi osho Jehova womatangakwaita, Kalunga kaIsrael, ta ti, ‘Omwa mona oudjuu aushe oo nda etela Jerusalem noilando aishe yaJuda, nokunena oi li oikulukuma muhe na ovakalimo. 3 Omolwoinima ii oyo va ninga, opo va handukife nge, mokuya nokuyamba omayambo nokulongela ookalunga ovo inava shiiva, kutya nee onye, ile ooxokulululwa. 4 Onda kala noku mu tumina ovapiya vange aveshe ovaprofeti, handi va tumu oikando noikando,* handi ti: “Alikana inamu ninga oshinima eshi shitondifa osho ndi tonde.” 5 Ashike inava pwilikina, ile va pakaleke okutwi kwavo, va efe po owii wavo mokuhayambela ookalunga vamwe omayambo. 6 Onghee onde va tilila onya yange nehandu lange, olo la xwamena oilando yaJuda nomomapandavanda aJerusalem, noya ninga oikulukuma nomaputu, ngaashi i li kunena.’
7 “Nopaife eshi osho Jehova, Kalunga komatangakwaita, Kalunga kaIsrael, ta ti, ‘Omolwashike tamu lietele nye vene* oupyakadi munene, opo omulumenhu nomukainhu, okaana nokahanana keshe, va xule po muJuda, nye mu fyaale muhe na oshixupe? 8 Omolwashike mu na okunyemateka nge noilonga yomake eni mokuyambela ookalunga vamwe medu laEgipiti oko mwa ya mu ka kale? Otamu ka xula po nokuninga oshinima shefingo noshesheko mokati koiwana aishe yokombada yedu. 9 Mbela omwa dimbwa oilonga youkolokoshi yooxokulululwa noilonga youkolokoshi yeehamba daJuda, noilonga youkolokoshi yovakulukadi vavo nosho yo oilonga yeni vene youkolokoshi noilonga youkolokoshi yovakulukadi veni, oyo ya longwa medu laJuda nomomapandavanda aJerusalem? 10 Fiyo okefiku eli, inave lininipika vo vene,* inava ulika etilo, noinava enda momhango yange nomeenghedimhango dange, odo nde mu tulila po moipafi yeni nosho yo yooxokulululwa.’
11 “Onghee eshi osho Jehova womatangakwaita, Kalunga kaIsrael, ta ti, ‘Paife onda tokola oku mu etela oudjuu, ndi hanaune po Juda ashishe. 12 Nohandi ka kufa oshixupe shaJuda, osho sha tokola okuya kedu laEgipiti shi ka kale oko, notava ka xula po aveshe medu laEgipiti. Otava ka fya keongamukonda nokuxula po kondjala; okudja kohepele fiyo okoshipuna, otava ka fya keongamukonda nokondjala. Notava ka ninga efingo, oshinima shitilifi, odino nesheko. 13 Ohandi ka handukila ovo tava kala medu laEgipiti, ngaashi ashike nda handukila Jerusalem neongamukonda, nondjala noudu* wolutapo. 14 Noshixupe shaJuda osho sha ya shi ka kale medu laEgipiti itashi ka ya onhapo, ile shi xupe, opo shi shune kedu laJuda. Otava ka halelela* okushuna, ndele tava ka kala oko. Ashike itava ka shuna, kakele kuvanini ovo tava ka ya onhapo.’”
15 Ovalumenhu aveshe ovo ve shii kutya ovakulukadi vavo ova kala tava yambele ookalunga vamwe omayambo, novakulukadi aveshe ovo va li va fikama opo, ovo va li va ongala mengafifi linene, novanhu aveshe ovo va li hava di medu laEgipiti, muPatros, ova nyamukula Jeremia tava ti: 16 “Fye itatu pwilikine ondjovo oyo we tu lombwela medina laJehova. 17 Ponhele yaasho, fye ohatu ka wanifa po filufilu ondjovo keshe oyo okanya ketu ka popya, tu yambele Ohambakainhu yokEulu* omayambo notu i tilileshi oikunwayambo, ngaashi ashike fye, ootatekulululwa, eehamba detu nomalenga etu a ninga moilando yaJuda nomomapandavanda aJerusalem, eshi twa li twa kuta omungome nosha li tashi tu endele nawa, eshi inatu hangwa nande okoupyakadi washa. 18 Okudja kefimbo eshi twa xulifa po okuyambela Ohambakainhu yokEulu* omayambo noku i tililashi oikunwayambo, otwa li twa hepa oinima aishe, notwa xula po keongamukonda nokondjala.”
19 Ovakainhu ova weda ko tava ti: “Naashi twa li hatu yambele Ohambakainhu yokEulu* noku i tililashi oikunwayambo, mbela kasha li paefelo lovashamane vetu, eshi twe i yambela oikuki yomayambo ya mewa molupe layo, notwe i tililashi oikunwayambo?”
20 Opo nee Jeremia okwa tya kovanhu aveshe, kovalumenhu nokovakulukadi vavo nosho yo kovanhu aveshe ovo va li tava popi naye: 21 “Omayambo oo nye, ooxokulululwa, eehamba deni, omalenga eni novanhu vomoshilongo, oo va yamba moilando yaJuda nomomapandavanda aJerusalem, Jehova okwe a dimbuluka nokwe uya komutima waye. 22 Xuuninwa, Jehova ina dula vali okulididimikila oilonga yeni ii noinima itondifa oyo mwa ninga, noshilongo sheni osha ninga onduba yomamanya, oshinima shitilifi nefingo, muhe na ovakalimo, ngaashi shi li kunena. 23 Omolwaashi omwa ninga omayambo aa, nomolwaashi mwa nyona kuJehova, eshi inamu dulika kondaka yaJehova nokushikula omhango yaye, eenghedimhango daye nomadimbulukifo aye, eshi oudjuu ou we mu hanga, ngaashi shi li kunena.”
24 Jeremia okwa twikila okulombwela ovanhu aveshe novakainhu aveshe ta ti: “Udeni ondjovo yaJehova, nye Ovajuda amushe, ovo mu li medu laEgipiti. 25 Eshi osho Jehova womatangakwaita, Kalunga kaIsrael, ta ti, ‘Osho nye nosho yo ovakulukadi veni mwa popya nomakanya eni omwe shi wanifa po nomake eni, osheshi omwa ti: “Fye ohatu ka wanifa po shili eano letu lokuyambela Ohambakainhu yokEulu* omayambo noku i tililashi oikunwayambo.” Ovakainhu nye otamu ka wanifa po filufilu eano leni nokudiinina filufilu eano leni.’
26 “Onghee hano, udeni ondjovo yaJehova, nye Ovajuda amushe ovo mu li medu laEgipiti: ‘“Paife ohandi ane medina lange linene,” Jehova osho ta ti, “kutya edina lange itali ka ifanwa vali meano komunhu keshe Omujuda medu alishe laEgipiti oo ta ti, ‘Oshili, ofimbo Omwene Omunamapangelo aeshe, Jehova, e na omwenyo!’ 27 Paife ohandi va tale, opo ndi va etele oupyakadi, ndele hashinima shiwa; ovanhu aveshe vomuJuda ovo ve li medu laEgipiti otava xulu po keongamukonda nokondjala fiyo osheshi va xula po filufilu. 28 Ovanini ashike tava ka ya onhapo eongamukonda nokushuna kedu laJuda okudja kedu laEgipiti. Opo nee oshixupe ashishe shaJuda, osho she uya kedu laEgipiti shi kale oko, otashi ka shiiva kutya ondjovo yalyelye ya wanifwa, oyange, ile oyavo!”’”
29 “‘Naali olo edidiliko kunye,’ Jehova osho ta ti, ‘kutya ohandi mu handukile monhele ei, opo mu shiive kutya eendjovo dange di na sha neudaneko kutya ohandi mu etele oudjuu otadi ka wanifwa shili. 30 Eshi osho Jehova ta ti: “Paife ohandi yandje ohamba yaEgipiti, Farao Hofra, meke lovatondi vayo, nolaavo va hala oku mu dipaa,* ngaashi ashike nda yandja ohamba yaJuda, Sedekia, meke lohamba yaBabilon, Nebukadnesar,* oo a li omutondi wayo, nokwa li a hala oku i dipaa.”’”*
45 Ei oyo ondjovo oyo omuprofeti Jeremia a lombwela Baruk, omonamati waNeria, eshi a shanga membo eendjovo, odo da popiwa kuJeremia, modula onhine yaJehoiakim, omonamati waJosia, ohamba yaJuda, tai ti:
2 “Eshi osho Jehova, Kalunga kaIsrael, ta ti shi na sha naave, Baruk, 3 ‘Owa ti: “Woo ame! Osheshi Jehova okwa weda ko oluhodi kouyahame wange. Onda loloka kokukema, noinandi mona onhele yetulumuko.”’
4 “Ou na oku mu lombwela to ti, ‘Eshi osho Jehova ta ti: “Tala! Osho nda tunga ohandi ke shi teyaula po, naasho nda twika, ohandi ke shi duda mo . . . moshilongo ashishe. 5 Ashike ove oto likongele* oinima inene. Efa okukonga oinima oyo.”’
“‘Osheshi ame ondi li pokweetela ombelela* aishe oupyakadi,’ Jehova osho ta ti, ‘nakeshe opo to i, ohandi ke ku pa omwenyo woye u li onga oshixuulwa.’”*
46 Ei oyo ondjovo yaJehova, oyo ye uya komuprofeti Jeremia, i na sha noiwana: 2 KuEgipiti, i na sha netangakwaita laFarao Neko, ohamba yaEgipiti, oo a li lwopomulonga waEufrat, nokwa findwa puKarkemis kohamba yaBabilon, Nebukadnesar,* modula onhine yaJehoiakim, omonamati waJosia, ohamba yaJuda, tai ti:
3 “Longekida oikelelifo yoye yongonga* noikelelifo ya kula,
Ndele to i kolwoodi.
4 Mangeni eenghambe, ndele tamu londo, nye ovalondinghambe.
Lilongekideni nokudjala omambale eni.
Upikeni omaonga, ndele tamu djala oundjafa veni vovakwaita.
5 ‘Omolwashike ndi va wete va kwatwa kehaluko?
Otava i onhapo; ovakwaita vavo ovaladi ova tyanghaulwa.
Ova ya onhapo koumbada, ovakwaita vavo ovaladi inava piluka.
Outile ou li keshe pamwe,’ Jehova osho ta ti.
6 ‘Ovo ve na onhapo itava dulu okufaduka po, novakwaita ovaladi itava dulu okuya onhapo.
Kolundume, komunghulo womulonga waEufrat,
Ova punduka nova wila po.’
7 Olyelye ou te uya ngaashi omulonga waNil,
Ngaashi omilonga domeva taa ndwafuka?
8 Egipiti okwe uya ngaashi omulonga waNil,
Ngaashi omilonga domeva taa ndwafuka,
Nota ti, ‘Ohandi i nohandi ka uvika edu.
Ohandi hanauna po oshilando naavo ve li mo.’
9 Indeni, nye eenghambe!
Shingilileni, nye omatemba!
Ovakwaita ovanaenghono nava pule komesho,
Kus naPuti ovo ve kwete oshikelelifo,
Na Ludim oo e kwete nota lukile* outa.
10 “Efiku olo olOmwene Omunamapangelo aeshe, Jehova womatangakwaita, efiku longhone lokukatukila onghatu ovatondi vaye. Neongamukonda otali ka xwaka nokulikutifa nokuliyadifa ohonde yavo, osheshi Omwene Omunamapangelo aeshe, Jehova womatangakwaita, oku na eyambo* medu lokolundume pomulonga waEufrat.
11 Fikama u ye kuGilead u ka tale omaadi o-balsam,
Ove omonakadona elela waEgipiti.
Owa hapupalifa omiti doye dokulihakula epwanga,
Osheshi ito veluka.
12 Oiwana oya uda eshi wa fifwa ohoni,
Nelilaano loye ole lihanena moshilongo.
Osheshi omukwaita omuladi ota pundukile komukwaita mukwao omuladi,
Naaveshe ohava wile po oshita.”
13 Ei oyo ondjovo oyo Jehova a lombwela omuprofeti Jeremia i na sha nokuuya kwohamba yaBabilon, Nebukadnesar,* i denge edu laEgipiti, tai ti:
14 “Shi hepaululeni muEgipiti, shi shiivifeni muMigdol.
Shi shiivifeni muNof* nomuTapanes.
Tyeni, ‘Fikama nokulilongekida,
Osheshi eongamukonda otali ka xwaka aveshe ovo ve ku dingilila.
15 Omolwashike ovalumenhu voye ovanaenghono va kombololwa po?
Inava kala ofika va pama pedu,
Osheshi Jehova okwe va undulila pedu.
16 Otava punduka nokuwila po momuvalu munene.
Otava lombwelafana tava ti:
“Tu fikameni, tu shuneni kovanhu vetu nokedu letu
Omolweongamukonda tali lapeke.”’
17 Oko oko va ingidila tava ti,
‘Farao, ohamba yaEgipiti, eweelelo ashike longaho,
Oo a xutwifa omhito.’*
18 ‘Oshili, ofimbo ame ndi na omwenyo,’ Ohamba, oyo edina layo Jehova womatangakwaita, osho tai ti,
‘Ye* ote ke uya ngaashi Tabor mokati keemhunda,
Nongaashi Karmel pefuta.
19 Longekida eendongelwa doye u ye moukwatwa,
Ove omonakadona elela u li muEgipiti.
Osheshi Nof* otashi ka ninga oshinima shitilifi;
Otashi ka tomekwa omundilo,* noitamu ka fyaala ovakalimo.
20 Egipiti oku li ngaashi ongobe yondema ya ondoka,
Ashike omawashe otae mu ponokele okudja kolundume.
21 Nokuli novakwaita vasho, ovo va kutwa ve li mokati kasho, ova fa eenhana da ondoka,
Ashike navo yo ova pilamena ko nova ya onhapo aveshe.
Itava dulu okukala ofika va pama pedu,
Osheshi efiku loudjuu wavo ole va hanga,
Efimbo lavo lokutokolwa.’
22 ‘Elinyengo lasho ola fa okweendelela kweyoka,
Osheshi ove uya kusho ve na eenghono nomakuva,
Ngaashi ovalumenhu tava ke po omiti.*
23 Otava ka ka po ofuka yasho,’ Jehova osho ta ti, ‘nonande otai monika ya fa itai dulu okupitwa.
Osheshi vo ovahapu unene ve dule oshipaxu, itava dulu okuvalulwa.
24 Omonakadona waEgipiti ota ka fifwa ohoni.
Ota ka yandjwa kovanhu vokolundume.’
25 “Jehova womatangakwaita, Kalunga kaIsrael, ota ti: ‘Paife ohandi yandje elitulemo kuAmon okudja kuNo,* kuFarao, kuEgipiti, kookalunga vasho nokeehamba dasho, heeno, kuFarao nokwaaveshe ovo ve lineekela muye.’
26 “‘Nohandi ke va yandja kwaavo va hala oku va dipaa,* kohamba yaBabilon, Nebukadnesar,* nokovapiya vayo. Ashike okudja opo otamu ka kalwa ngaashi pomafimbo onale,’ Jehova osho ta ti.
27 ‘Ashike ove omupiya wange, Jakob, ino kala wa tila,
Noino mbadapalifwa, akutu Israel.
Osheshi ohandi ke ku xupifa okudja kokule,
Noludalo loye okudja kedu oko li li moukwatwa.
Jakob ota ka aluka nota ka kala a ngungumana noita piyaanekwa.
Nopehe na oo te va tilifa.
28 Onghee ino kala wa tila, omupiya wange, Jakob,’ Jehova osho ta ti, ‘osheshi ame ondi li pamwe naave.
Ohandi ka eta ehanauno mokati koiwana aishe omo nde ku halakanifila,
Ashike ove itandi ke ku hanauna po.
Ohandi ke ku pa outekuduliko* wa yeleka,
Ashike itandi ku efa ino handukilwa.’”
47 Ei oyo ondjovo yaJehova, oyo ye uya komuprofeti Jeremia, i na sha nOvafilisti, ofimbo Farao ina finda Gasa. 2 Eshi osho Jehova ta ti:
“Tala, omeva otae uya taa di kolundume.
Otaa ningi efundja tali kungulula.
Notaa ka kungulula oshilongo nakeshe osho shi li mo,
Oshilando naavo ve li mo.
Ovalumenhu otava ka lilaana,
Nakeshe umwe oo e li moshilongo ota ka kwenauka.
3 Kewi lepulukuto lomakondo eenghambe daye deemhedi,
Kekolokoto lomatemba aye oita,
Newi lomalola aye,
Ooxe itava ka keuka nokuli ovanamati vavo,
Osheshi omake avo okwa tyololoka,
4 Molwaashi efiku, olo tali uya, otali ka hanauna po Ovafilisti aveshe;
Otali ka xulifa po keshe umwe, oo ha yambidida Tirus naSidon.
Osheshi Jehova ota ka hanauna po Ovafilisti,
Ovo va fyaala po va dja kokanhunhu kaKaftori.*
5 Gasa ota ka ninga ongwala.*
Askelon osha mwenekwa.
Ove oshixupe shomoluhaela lomefilu lavo,
Fiyo onaini to twikile okulilengaula?
6 Oh! Eongamukonda laJehova!
Fiyo onaini to kala ino ngungila?
Shuna moshilaleko shoye.
Tulumukwa nokukala wa mwena.
7 Ongahelipi tali dulu okukala la ngungila
Ngeenge Jehova okwe li pa oshipango?
Liponokele Askelon nomunghulofuta,
Oko oko e li tuma.”
48 KuMoab, eshi osho Jehova womatangakwaita, Kalunga kaIsrael, ta ti:
“Woo Nebo, osheshi osha hanaunwa po!
Kiriataim osha fifwa ohoni nosha kwatwa ko.
Ouhondameno wa amenwa* owa fifwa ohoni, nowa halukifwa.
2 Ihava tange vali Moab.
MuHesbon, omo va pangelela omhangela yokuteka po kwasho, va ti:
‘Ileni, tu shi xulife po shi li oshiwana.’
Naave yo, ove Madmena, kala wa mwena,
Osheshi eongamukonda otali ku shikula.
3 Ewi lelilaano olo ngaho tali di kuHoronaim,
Omolwehanauno nokuteka po kunene.
4 Moab osha teyaulwa po.
Novana vasho vanini otava lilaana.
5 Eshi tava londo koxulo yaLuhit otava twikile okulila.
Naashi tava londoloka okudja kuHoronaim, ove udite elilaano omolwoudjuu, oo wa etifwa kehanauno.
6 Fadukei po, indeni onhapo omolweemwenyo deni!
Omu na okukala ngaashi omuti womudjenipa u li mombuwa.
7 Molwaashi omwe lineekela moilonga yeni nomomamona eni,
Nanye otamu ka kwatwa po.
Na Kemosh ota ka ya moukwatwa,
Pamwe novapristeri vaye nosho yo omalenga aye.
8 Omuhanauni ote ke uya moshilando keshe,
Nokape na oshilando tashi ka ya onhapo.
Efilu otali ka xula po,
Nedu la lalakana* otali ka xulifwa po ngaashi ashike Jehova a ti.
9 Tulilei po Moab edidiliko,
Osheshi eshi tashi ka teka po otashi ka ya onhapo,
Noilando yasho otai ka ninga oshinima shitilifi,
Muhe na ovakalimo.
10 Omufingwa oye ou ta longo oshilonga shaJehova nouhasha!
Omufingwa oye ou ta kelele eongamukonda laye liha tileshi ohonde!
11 Ovamoab inava piyaanekwa okudja kounyasha wavo,
Ngaashi omaviinyu, oo a kala konhafi.
Inava pimununwa okudja moshitoo shimwe va yukifwa mushikwao,
Noinava ya nande onale moukwatwa.
Nomolwaasho omulyo wavo wa kala wa faafana,
Nedimba lavo inali lunduluka.
12 “‘Onghee hano, tala, omafiku otae uya,’ Jehova osho ta ti, ‘eshi handi ka tuma ovalumenhu ve va pimunune. Otave ke va pimununa noitava ka fiya mo sha moitoo yavo, noitoo yavo ya kula otai ka tataulwa. 13 NOvamoab otava ka fya ohoni Kemosh, ngaashi ashike eumbo laIsrael la fya ohoni Betel, osho va li ve lineekela.
14 Omolwashike tamu ti: “Fye ovakwaita ovaladi ovanaenghono twe lilongekidila olwoodi”?’
15 ‘Moab osha hanaunwa po,
Oilando yasho oya findwa,
Novalumenhu vavo va denga mbada ova dipawa,’
Ohamba, oyo edina layo Jehova womatangakwaita, osho tai ti.
16 Oshiponga shOvamoab otashi uya mafiku,
Nehanauno lavo oli li poduka.
17 Aveshe ovo ve va dingilila otava ka nyika oluhodi pamwe navo,
Aveshe ovo ve shii edina lavo.
Va lombweleni tamu ti: ‘Akutu, odibo i na eenghono inai teka tuu, onhaili yewapalo!’
18 Londoloka moshinge shoye,
Nokukala omutumba menota,* ove omonakadona ho kala muDibon,
Osheshi omuhanauni waMoab okwe uya e ku lwife,
Nota ka hanauna po eenhele doye domakuma a pama.
19 Kala ofika pondjila nokutala omukalimo womuAroer.
Nokupula omulumenhu oo ta faduka po, nomukainhu oo ta i onhapo, kutya, ‘Oshike sha ningwa po?’
20 Moab osha fifwa ohoni nosha kwatwa koumbada.
Lileni nokukuwaana.
Shiivifeni muArnon kutya Moab osha hanaunwa po.
21 “Kalunga okwa tokola edu la lalakana,* a tokola Holon, Jahas naMefat; 22 a tokola Dibon, Nebo naBet-diblataim; 23 a tokola Kiriataim, Bet-gamul naBet-meon; 24 a tokola Keriot naBosra; nokwa tokola oilando aishe yomedu laMoab oyo i li kokule nopopepi.
25 ‘Eenghono* daMoab oda xulifwa po;
Okwooko kwaye okwa teywa,’ Jehova osho ta ti.
26 ‘Mu kolwifeni, osheshi okwe linenepekela Jehova.
Moab ota alangata monghungo yaye,
Noku li oshinima shesheko.
27 Mbela Israel ka li oshinima shesheko kwoove?
Mbela okwa hangelwe mokati keembudi,
Opo u mu pukapukile komutwe noku mu popila mowii?
28 Djeni mo moilando nokukala momamanya, ovakalimo vomuMoab,
Nokukala ngaashi onghuti, oyo hai tungile oshihadi shayo kominghulo domambulukwena.’”
29 “Otwa uda kombinga younhwa waMoab; okwe linenepeka unene,
Kombinga yomanganga aye, ounhwa waye, elinenepeko laye nomutima waye tau lundalala.”
30 “‘Ondi shii onya yaye,’ Jehova osho ta ti,
‘Ashike eendjovo daye dongaho otadi xulu po.
Itava ningi po sha.
31 Nomolwaasho handi ka lilaana omolwaMoab,
Osheshi ohandi lili omolwaMoab ashishe,
Nonda nyika oluhodi omolwovalumenhu vomuKir-heres.
32 Ohandi ku lilile ove omundjebele womuSibma,
Shi dulife eshi handi lilile Jaser.
Oitai yoye ya hapa oya tauluka efuta.
Oya hanga fiyo okefuta, kuJaser.
Omutondi okwa hanauna po oiimati yoye yopokwenye
Neteyo loye lomandjebele.
33 Ehafo nenyaku oya kufwa mo moshikunino shomiti doiimati,
Nomedu laMoab.
Onda ningifa omaviinyu aha kunguluke moshikolelo.
Kape na ou ta ka kola ta ingida nehafo.
Okwiingida otaku ka kala ku lili.’”
34 “‘Ope na elilaano tali di muHesbon li uditike fiyo okuEleale.
Otava yelula ondaka yavo fiyo okuJahas,
Okudja kuSoar fiyo okuHoronaim nofiyo okuEglat-selisia.
Nokuli nomeva omuNimrim otaa ka pwiinina.
35 Ohandi ka xulifa po muMoab,’ Jehova osho ta ti,
‘Oo ta eta eyambo konhele yokoshikulundudu,
Naao ta yambele kalunga kaye omayambo.
36 Nomolwaasho omutima wange owa nyika oluhodi* omolwaMoab, ngaashi onyalilo,*
Nomutima wange owa nyika oluhodi* omolwovalumenhu vomuKir-heres, ngaashi onyalilo.*
Osheshi oupuna oo she likongela otau xulu po.
37 Osheshi omutwe keshe owa kululwa ongwala,
Neendjedi adishe oda kululwa ko.
Eke keshe ola lengaulwa,
Nova djala eeshako moiya yavo!’”
38 “‘Kombada yomaumbo aeshe aMoab
Nomomahalandjadja asho aeshe,
Omu na ashike elilaano.
Osheshi onda teyaula Moab,
Ngaashi oshitoo sha ekelwashi,’ Jehova osho ta ti.
39 ‘Inashi tilifwa tuu! Lileni!
Moab inashi pilamena ko tuu sha fya ohoni!
Moab osha ninga oshinima shesheko.
Oshinima shitilifi kwaaveshe ovo ve shi dingilila.’”
40 “Osheshi eshi osho Jehova ta ti:
‘Tala! Ngaashi ashike onhwa oyo tai kulukile pedu,
Ota ka xwaananeka omavava aye kombada yaMoab.
41 Eedolopa otadi ka kwatwa ko,
Neehotengulu dasho otadi ka nyekwa ko.
Mefiku olo, omitima dovakwaita ovaladi vaMoab
Otadi ka kala ngaashi omutima womukainhu ta dala.’”
42 “‘Na Moab otashi ka xulifwa po, shiha kale vali oshiwana,
Osheshi sho vene oshe linenepekela Jehova.
43 Ehaluko nelambo nosho yo omwiyo oi li komesho yoye,
Ove ou ho kala muMoab,’ Jehova osho ta ti.
44 ‘Keshe oo tai onhapo kehaluko ota ka wila melambo,
Nakeshe oo ta ka dja melambo ota ka yulwa komwiyo.’
‘Osheshi ohandi ka etela Moab omudo wehandukilo lavo,’ Jehova osho ta ti.
45 ‘Ovo tava i onhapo ova fikama vehe na eenghono momudile waHesbon.
Osheshi omundilo otau ka dja muHesbon,
Nelaka lomundilo omuSihon sho vene.
Otau ka lungwinifa po ombaba yoshipala shaMoab,
Nekolotwe loludalo alishe likolokoshi.’
46 ‘Woo ove, akutu Moab!
Ovanhu vomuKemosh ova xula po.
Osheshi ovanamati voye ova ningwa eenghwate,
Novanakadona voye ova ya moukwatwa.
47 Ashike ohandi ka ongela eenghwate daMoab pexulilo lomafiku,’ Jehova osho ta ti.
‘Apa opo pa xulila etokolo, olo tali ka hanga Moab.’”
49 Shi na sha nOvaammoni, Jehova ota ti ngaha:
“Mbela Israel ke na ovanamati?
Mbela ke na omufyuululi?
Omolwashike Malkam a kwata ko Gad?
Nomolwashike ovanhu vaye hava di moilando yaIsrael?”
2 “‘Onghee hano, tala, omafiku otae uya,’ Jehova osho ta ti,
‘Eshi handi ka ningifa elondwelo lokuya moita* li udike muRabba shOvaammoni.
Otashi ka ninga onduba yoikulukuma,
Needoolopa dasho* otadi ka tomekwa omundilo.’
‘Na Israel ota ka kufa po edu olo va li ve mu kufa,’ Jehova osho ta ti.
3 ‘Lila, akutu Hesbon, osheshi Ai osha hanaunwa po!
Kwenaukeni akutu eedolopa daRabba.
Djaleni eeshako.
Lileni nokweelaela mokati koyuunda yomamanya,*
Osheshi Malkam ota ka ya moukwatwa
Pamwe novapristeri vaye nomalenga aye.
4 Omolwashike ho litangele omafilu,
Efilu loye tali kunguluka, akutu omonakadona uhe fi omudiinini,
Ou ho lineekele momamona oye,
Noho ti: “Olyelye te uya a lwife nge?”’”
5 “‘Paife ohandi ku etele oshinima shitilifi,’ Omwene Omunamapangelo aeshe, Jehova womatangakwaita, osho ta ti,
‘Okudja kwaaveshe ovo ve ku dingilila.
Oto ka halakanifilwa keembinga adishe,
Nokape na oo ta ka ongela ovo tava i onhapo.’”
6 “‘Ashike lwanima, ohandi ka ongela eenghwate dOvaammoni,’ Jehova osho ta ti.”
7 Shi na sha naEdom, eshi osho Jehova womatangakwaita ta ti:
“Mbela muTeman kamu na vali ounongo washa?
Mbela omayele mawa okwa xula po mwaavo ve na eendunge?
Mbela ounongo wavo owa ola?
8 Fadukei po, shuneni!
Indeni nokukala poshi elela, nye ovakalimo vomuDedan!
Osheshi ohandi ka etela Esau oudjuu,
Ngeenge efimbo loku mu handukila ola fiki.
9 Ngeenge ovo hava likola omandjebele ove uya kwoove,
Mbela itava ka xupifa po amwe okupupudulula?
Ngeenge eembudi ode uya oufiku,
Otadi ka longa ashike oushada muhapu ngaashi da hala.
10 Ndele ohandi ka fiya Esau pomutenya.
Ohandi ka holola eenhele daye dokuhondama,
Opo aha dule okuhondama.
Ovana vaye novamwaina nosho yo ovanhu vakwao aveshe otava ka hanaunwa po,
Noita ka kala po vali.
11 Fiya po ovana voye ovo vehe na ooxe,
Nohandi ke va efa va kale nomwenyo,
Novafiyekadi voye otave ke lineekela nge.”
12 Osheshi eshi osho Jehova ta ti: “Tala! Ngeenge ovo inava tokolelwa okunwa meholo ove na okunwa mo, mbela oove nee to ka efiwa ino handukilwa nandenande? Ito ka efiwa ino handukilwa, osheshi ou na okunwa mo.”
13 “Osheshi onda ana kwaame mwene,” Jehova osho ta ti, “kutya Bosra otashi ka ninga oshinima shitilifi, esheko, ehanauno nefingo; noilando yasho aishe otai ka hanaunwa po fiyo alushe.”
14 Onda uda onghundana ya dja kuJehova,
Oiwana oya tuminwa etumwalaka eli:
“Ongaleni pamwe nokuuya mu shi lwife;
Lilongekidileni olwoodi.”
15 “Osheshi tala! Onde ku ninga u kale ino fimana mokati koiwana,
U tondike mokati kovanhu.
16 Outile ou wa etifa owe ku kengelela,
Elinenepeko lomutima woye,
Akutu ove ou ho kala momakololo omamanya,
Ho kala koshikulundudu shileshile.
Nonande owa tungila oshihadi shoye pombada ngaashi onhwa,
Ohandi ke ku kufa po noku ku eta pedu,” Jehova osho ta ti.
17 “Na Edom na kale oshinima shitilifi. Keshe umwe ta ende po pusho ota ka tala a tila nokushika omwilwa omolwoupyakadi washo aushe. 18 Ngaashi ashike Sodom naGomorra needoolopa dayo dopopepi da hanaunwa po filufilu,” Jehova osho ta ti, “kape na oo ta ka kala mo, nokape na omunhu ta ka tungila mo.
19 “Tala! Umwe ote uya a lwife omaufita a amenwa, ngaashi onghoshi tai di momangade a fita opomulonga waJordan, ashike ohandi ke mu taataa po pusho divadiva. Nohandi ke shi nangekela po omuhoololwa. Osheshi olyelye a fa nge, nolyelye ta dulu okukelela nge? Omufita elipi ta dulu okukala ofika koshipala shange? 20 Onghee hano, pwilikineni, akutu ovanhu, etokolo* olo Jehova a ninga li na sha naEdom nosho yo osho a diladila oku ka ningila ovakalimo vomuTeman:
Oshili oudjona voufita otava ka kokololelwashi.
Ota ka ninga onhele yavo yokukala eputu omolwavo.
21 Edu ola kakama kembolokoto lokuteka po kwasho.
Ope na ekuwaano!
Embolokoto ola udika fiyo okEfuta Litilyana.
22 Tala, ngaashi ashike onhwa, ota ka ya mombada nokukulukila pedu oshikuti,
Nota ka xwaananeka omavava aye kombada yaBosra.
Mefiku olo, omitima dovakwaita ovaladi Ovaedom,
Otadi ka kala ngaashi omutima womukainhu ta dala.”
23 Shi na sha naDamaskus:
“Hamat naArpad oya fifwa ohoni,
Osheshi oya uda onghundana ii.
Otai dekweta koumbada.
Efuta ola pindjala itali dulu okulotekwa.
24 Damaskus osha kanifa ouladi.
Osha piluka shi faduke po, ashike osha kwatwa kehaluko.
Oupyakadi nouyehame owe shi hanga.
Ngaashi omukainhu oo ta dala.
25 Ongahelipi oshilando, osho sha fimana, inashi efiwa,
Odoolopa yenyaku?
26 Osheshi ovalumenhu vasho ovanyasha otava ka wila momahalandjadja asho,
Novakwaita vasho aveshe otava ka xula po mefiku olo,” Jehova womatangakwaita osho ta ti.
27 “Ohandi ka tomeka ekuma laDamaskus omundilo,
Notau ka lungwinifa po eeshungongulu domakuma a pama daBenhadad.”
28 Shi na sha naKedar nosho yo omauhamba aHasor, oo ohamba yaBabilon, Nebukadnesar,* ya hanauna po, eshi osho Jehova ta ti:
“Fikameni, indeni kuKedar,
Nokuhanauna po ovanamati vokoushilo.
29 Omatwali avo nomaufita avo otaa ka iwa nao,
Omalapi omatwali avo nosho yo oinima yavo aishe iwa.
Eengamelo davo otadi ka shingwa po,
Notave ke i kwenena tava ti, ‘Oumbada ou li apeshe!’”
30 “Fadukei po, indeni kokule!
Indeni nokukala koshi elela, nye ovakalimo vomuHasor,” Jehova osho ta ti.
“Osheshi ohamba yaBabilon, Nebukadnesar,* oye mu pangelela omhangela,
Noye mu diladilila omhangela ii.”
31 “Fikameni, indeni mu ka lwife oshiwana osho shi na ombili,
Shi li meameno!” Jehova osho ta ti.
“Kashi na omivelo, ile oyiidilifo; ove likalela.
32 Eengamelo davo otadi ka nyekwa ko,
Noimuna yavo ihapu otai ka ninga oixuulwa.*
Ohandi ke va halakanifila keembinga adishe domhepo,*
Ovo hava kulula ko eexwiki davo dopeembadu,
Nohandi ka eta oudjuu wavo okudja keembinga adishe,” Jehova osho ta ti.
33 “Na Hasor otashi ka ninga omikwena dookavandje,
Eputu laalushe,
Kape na oo ta ka kala mo,
Nokape na omunhu ta ka tungila musho.”
34 Ei oyo ondjovo yaJehova oyo ye uya komuprofeti Jeremia i na sha naElami pehovelo lokupangela kwohamba yaJuda, Sedekia, tai ti: 35 “Eshi osho Jehova womatangakwaita ta ti, ‘Paife ohandi teya outa waElami odjo* yeenghono davo. 36 Ohandi ka pepifila muElami eemhepo nhee okudja kominghulo nhee deulu, nohandi ke va halakanifila meemhepo adishe odo. Noitapa ka kala oshiwana, inamu ya ovo va halakanifwa okudja kuElami.’”
37 “Ohandi ka ningifa Ovaelami va tile ovatondi vavo, naavo va hala oku va dipaa;* nohandi ke va etela oupyakadi, ehandu lange la xwama,” Jehova osho ta ti. “Nohandi ke va tumina eongamukonda, fiyo osheshi nde va hanauna po.”
38 “Nohandi ka dika olukalwapangelo lange muElami, nohandi ka hanauna mo musho ohamba nomalenga,” Jehova osho ta ti.
39 “Ashike pexulilo lomafiku, ohandi ka ongela eenghwate daElami,” Jehova osho ta ti.
50 Ondjovo oyo Jehova a popya i na sha naBabilon, shi na sha nedu lOvakaldea, okupitila momuprofeti Jeremia, tai ti:
2 “Shi hepaulula mokati koiwana noku shi shiivifa.
Yelula edidiliko* noku shi shiivifa.
Ino holeka sha!
Tya, ‘Babilon osha kwatwa ko.
Bel okwa fifwa ohoni.
Merodak okwa kwatwa koumbada.
Oihongwafano yasho oya fifwa ohoni.
Oikalunga yasho itondifa* oya kwatwa koumbada.’
3 Osheshi oshiwana shonhumba oshe shi ponokela okudja kolundume.
Osha ninga edu lasho oshinima shitilifi;
Kape na oo ta kala mo musho.
Ovanhu noinamwenyo aishe oya ya onhapo;
Oya ya.”
4 “Pomafiku oo nopefimbo olo,” Jehova osho ta ti, “ovanhu vomuIsrael novanhu vomuJuda otave ke uya pamwe. Otava ka lila, eshi tava ende, naaveshe otava ka konga Jehova, Kalunga kavo. 5 Otava ka pula ondjila ya finda kuSion, noipala yavo ya taalela kombinga oko, tava ti, ‘Ileni, ndele hatu waimineni Jehova mehangano laalushe, olo itali ka dimbiwa.’ 6 Ovanhu vange ova ninga oufita weedi da kana. Ovafita vavo ove va halakanifa. Ove va twala keemhunda, tava endaenda tava di komhunda va finda koshikulundudu. Ova dimbwa onhele yavo yetulumuko. 7 Aveshe ovo ve va mona ove va xwaka po, novatondi vavo ova ti, ‘Katu na etimba, molwaashi ova nyona kuJehova, konhele yavo yokukala youyuki noketeelelo looxekulululwa, Jehova.’”
8 “Djeni mo onhapo muBabilon,
Djeni mo medu lOvakaldea,
Ndele tamu kala ngaashi oimuna, oyo hai kwatele oufita komesho.
9 Osheshi paife ohandi ka fikama nokweetela Babilon
Ongudu yoiwana inene okudja kedu lokolundume.
Otave ke shi ponokela ve lilongekidila olwoodi;
Okudja opo, otashi ka kwatwa ko.
Oikuti yavo oya fa yomukwaita omuladi,
Tai nyikifa ovadali oluhodi omolwovana;
Itai aluka hamakasha.
10 Kaldea otashi ka ninga oshixuulwa.
Aveshe ovo tava kufa oixuulwa musho otava ka kuta filufilu,” Jehova osho ta ti.
11 “Osheshi omwa kala mwa hafa, omwa kala mwa nyakukwa,
Eshi mwa kwata ko efyuululo lange.
Omwa kala nokunhukanhuka ngaashi ongobe yondema i li momwiidi.
Nomwa kala nokukwena ngaashi eenghambe deemhedi.
12 Nyoko okwa fifwa ohoni.
Oo e mu dala okwa nyematekwa.
Taleni, oye munini moiwana,
Edu lihe na omeva nombuwa.
13 Omolwehandu laJehova itashi ka kalwa;
Otashi ka ninga ombuwa filufilu.
Keshe oo ta ende puBabilon ota ka tala a tila,
Nota ka shika omwilwa omolwoixuna yasho aishe.
14 Ponokeleni Babilon mwe lilongekidila olwoodi keembinga adishe,
Amushe ovo tamu lukile* outa.
Shi umbeni; inamu xupifa po nande oshikuti,
Osheshi osha nyona kuJehova.
15 Shi ingidileni eingido loita keembinga adishe.
Oshe liyandja.*
Eengudimanya dasho oda teka po, omakuma asho okwa ngumauka po,
Osheshi onghone oyaJehova.
Shi alulileni owii washo.
Shi ningileni naanaa ngaashi sho sha ninga.
16 Xulifeni po omukuni muBabilon
Naao e kwete oshikashulifo pefimbo leteyo.
Omolweongamukonda tali lapeke, keshe umwe ota ka shuna koshiwana shavo,
Keshe umwe ota ka ya onhapo kedu lavo.
17 “Ovanhu vomuIsrael ovo eedi de lihana. Eenghoshi ode va halakanifa. Tete ohamba yaAssiria oye va xwaka po; opo nee ohamba yaBabilon, Nebukadnesar,* oya kunya omakipa avo. 18 Onghee hano, eshi osho Jehova womatangakwaita, Kalunga kaIsrael, ta ti: ‘Paife ohandi ka ungaunga nohamba yaBabilon nosho yo edu layo monghedi ya faafana naayo nda ungaunga nohamba yaAssiria. 19 Nohandi ka shunifa Israel koulifilo waye, nota ka napa kuKarmel nokuBasan, nokeemhunda daEfraim nodaGilead ota* ka lya ta kuta.’”
20 “Pomafiku oo nopefimbo olo,” Jehova osho ta ti,
“Etimba laIsrael otali ka kongwa,
Ashike itapa ka kala sha,
Nomanyono aJuda itaa ka monika,
Osheshi ohandi ka dimina po ovo nda efa va kale po.”
21 “Inda u ka lwife edu laMerataim novakalimo vomuPekod.
Nava dipawe nokuhanaunwa po filufilu,”* Jehova osho ta ti.
“Ninga ashishe osho nde ku lombwela.
22 Omalinyengo oita oku uditike moshilongo,
Oupyakadi munene neenghono.
23 Ohamala yokuhambulifa ombada yedu alishe oya tetwa po noya teywa po!
Babilon ina ninga tuu oshinima shitilifi mokati koiwana!
24 Onde ku tela omwiyo nowa yulwa, akutu Babilon,
Noino shi shiiva.
Owa li wa monika nowa kwatwa,
Osheshi owa li to kondjifa Jehova.
25 Jehova okwa yeulula eemhungulilo daye,
Nokwa kufa mo oilwifo yehandu laye.
Osheshi Omwene Omunamapangelo aeshe, Jehova womatangakwaita, okwe lipyakidila
Medu lOvakaldea.
26 Shi ponokeleni okudja keenhele dokokule.
Yeululeni eemhungulilo dasho.
Shi ongeleni ngaashi eenduba doilya.
Shi hanaunei po filufilu.*
Musho inamu fyaala nande oumwe.
27 Dipaeni eendumetana dasho adishe;
Nadi ye koshidipaelo.
Woo vo, osheshi efiku lavo ole uya,
Efimbo lavo letokolo!
28 Ope na euyaano laavo tava faduka po,
Ovo tava i onhapo okudja medu laBabilon,
Va hepaulule muSion onghone yaJehova, Kalunga ketu,
Onghone omolwotembeli yaye.
29 Ongeleni ovaumbi vomauta va ponokele Babilon,
Aveshe ovo tava lukile* outa.
Shi dingilileni ashishe; inamu efa nande oumwe a ye onhapo.
Shi shunifileni owii she likolelela koilonga yasho.
Shi ningileni naanaa ngaashi sho sha ninga.
Osheshi oshe linenepekela Jehova,
Omuyapuki waIsrael.
30 Onghee ovalumenhu vasho ovanyasha otava ka wila momahalandjadja asho,
Novakwaita vasho aveshe otava ka xula po* mefiku olo,” Jehova osho ta ti.
31 “Tala! Ondi li omhinge naave, akutu omunashibofa,” Omwene Omunamapangelo aeshe, Jehova womatangakwaita, osho ta ti,
“Osheshi efiku loye oli na okuuya, efimbo olo handi ke ku hokololifa.
32 Ove, akutu omunashibofa, oto ka punduka noto ka wila po,
Nopehe na oo te ku yambula po.
Nohandi ka tomeka oilando yoye omundilo,
Notau ka lungwinifa po keshe shimwe osho she ku dingilila.”
33 Eshi osho Jehova womatangakwaita ta ti:
“Ovanhu vomuIsrael novomuJuda ova fininikwa,
Naaveshe ovo tave va twala moukwatwa ove va kanyatela.
Ova anya oku va efa va ye.
34 Ashike Omukulili wavo omunaenghono.
Jehova womatangakwaita olo edina laye.
Ota ka popila filufilu oshikoya shavo,
Opo a yandje etulumuko kedu,
Noku handukile ovakalimo vomuBabilon.”
35 “Ope na eongamukonda tali ponokele Ovakaldea,” Jehova osho ta ti,
“Tali ponokele ovakalimo vomuBabilon, notali ponokele omalenga asho notali ponokele ovanaendunge vasho.
36 Ope na eongamukonda tali ponokele ovo hava popi oinima yongaho,* noitava ka katuka pandunge.
Ope na eongamukonda tali ponokele ovakwaita vasho ovaladi, notava ka kala va tila.
37 Ope na eongamukonda tali ponokele eenghambe davo nomatemba avo oita,
Notali ponokele ovanhu aveshe va lumbakana, ovo ve li mokati kasho,
Notava ka kala ngaashi ovakainhu.
Ope na eongamukonda tali ponokele omamona asho, notaa ka nyekwa ko.
38 Momeva asho omu na oupyakadi, notaa ka pwiinina po.
Osheshi lo edu loihongwafano,
Nomolwomamoniko avo atilifi, otava twikile okulihumbata ngaashi ovanananghwengu.
39 Onghee hano, oinamwenyo yomombuwa otai ka kala pamwe noinamwenyo oyo hai kwena,
Neemho otadi ka kala musho.
Itashi ka kalwa vali nandenande,
Noitashi ka kala vali onhele yokukalwa fiyo okomapupi aeshe.”
40 “Ngaashi ashike Kalunga a hanauna po Sodom naGomorra needoolopa dasho dopopepi,” Jehova osho ta ti, “kape na oo ta ka kala mo, nokape na omunhu ta ka tungila mo.
41 Tala! Ovanhu otave ke uya mo tava di kolundume;
Oshiwana shinene neehamba dinene otadi ka pendulwa
Okudja koitukulwa ye likalela yokombada yedu.
42 Ohava longifa outa neonga.
Ovakwanyanya noitava ka fila onghenda.
Ewi lavo ola fa lefuta tali popoma,
Eshi va londa keenghambe davo.
Ova fikama momukweyo onga omunhu umwe, ve lilongekidila olwoodi ve ku lwife, akutu omonakadona waBabilon.
43 Ohamba yaBabilon oya uda ehokololo li na sha navo,
Nomake ayo okwa tyololoka.
Oya kwatwa koumbada,
Kouyahame wa fa womukainhu ta dala.
44 “Tala! Umwe ote uya a lwife omaufita a amenwa, ngaashi onghoshi tai di momangade a fita opomulonga waJordan, ashike ohandi ke va taataa po pusho divadiva. Nohandi ke shi nangekela po omuhoololwa. Osheshi olyelye a fa nge, nolyelye ta dulu okukelela nge? Omufita elipi ta dulu okukala ofika koshipala shange? 45 Onghee hano, pwilikineni, akutu ovanhu, etokolo* olo Jehova a ninga li na sha naBabilon nosho yo osho a diladila oku ka ningila edu lOvakaldea.
Oshili oudjona voufita otava ka kokololelwashi.
Ota ka ninga onhele yavo yokukala eputu omolwavo.
46 Edu otali ka kakama omolweweelelo lokukwatwa ko kwaBabilon,
Neuyaano otali ka udika mokati koiwana.”
51 Eshi osho Jehova ta ti:
“Paife ohandi pendulile omhepo tai hanauna
Babilon novakalimo vomuLeb-kamai.*
2 Ohandi ka tumina Babilon ovayeli,
Notave ke shiyela nokuyeleka edu lasho;
Otave ke shi ponokela keembinga adishe mefiku loupyakadi.
3 Omuumbi wouta ina lukila* outa waye.
Noinapa kala oo ta fikama a djala okandjafa kaye koukwaita.
Ovalumenhu vasho ovanyasha inamu va fila onghenda.
Etangakwaita lasho alishe li tokoleleni ehanauno.
4 Noimhu yavo otai ka wila medu lOvakaldea,
Va tyuulwa momapandavanda asho.
5 Osheshi Israel naJuda inava ningwa ovafiyekadi kuKalunga kavo, kuJehova womatangakwaita.
Ashike edu lavo* oli yadi etimba pataleko lOmuyapuki waIsrael.
6 Djeni mo onhapo muBabilon,
Ndele tamu faduka po omolweemwenyo deni.
Inamu xula po omolwenyono lasho.
Osheshi olo efimbo laJehova loku va katukila onghatu.
Ote shi shunifile omolwoilonga yasho.
7 Babilon osha kala eholo loshingoli meke laJehova;
Osha kolwifa edu alishe.
Oiwana oya kolwa komaviinyu asho;
Nomolwaashi oiwana ya pwiduka.
8 Ohaluka, Babilon osha wila po nosha teka.
Lileni omolwasho!
Kufeni omaadi o-balsam omolwouyahame washo; pamwe tashi veluka.”
9 “Otwa kendabala okuvelula Babilon, ashike itashi dulu okuvelulwa.
Shi efeni, ndele hatu yeni, keshe umwe kedu lavo.
Osheshi etokolo lasho ola hanga keulu;
Oli li pombada ngaashi oilemo.
10 Jehova okwe tu longela ouyuki.
Ileni, natu hokololeni muSion oilonga yaJehova, Kalunga ketu.”
11 “Upikeni oikuti; kufeni oikelelifo yongonga.*
Jehova okwa pendula omhepo yohamba yOvamedia,
Molwaashi okwa hala okuhanauna po Babilon.
Osheshi eshi osho onghone yaJehova, onghone omolwotembeli yaye.
12 Yelulileni omakuma aBabilon edidiliko.*
Pamekeni omukeleli; tulei po ovanangeli.
Longekideni ovo va nangela.
Osheshi Jehova okwa pangela omhangela,
Nota ka wanifa po osho a udanekela ovakalimo vomuBabilon.”
13 “Akutu omukainhu, ou ho kala kombada yomeva mahapu,
U na omamona mahapu,
Exulilo loye ole uya, ongaba* yokulikola oupuna woye.
14 Jehova womatangakwaita okwa ana kuye mwene,*
‘Ohandi ke ku yadifa ovalumenhu vahapu ngaashi oshipaxu,
Notava ka ingida, eshi ve ku finda.’
15 Oye a shita edu keenghono daye,
Oo a dika po edu liwa kounongo waye,
Noye a nyanununa eulu keendunge daye.
16 Ngeenge okwa ningifa ondaka yaye i udike,
Omeva omeulu ohaa kala taa wilauka,
Noha ningifa oilemo* i litumbe okudja kominghulo dedu.
Oha shelifa okashelu* modula,
Noha kufa mo omhepo meemhungulilo daye.
17 Omunhu keshe oha katuka shihe li pandunge noke na eshiivo.
Omuhambuli woivela keshe ota ka lengifwa omolwoshihongwafano;
Osheshi oshihongwafano shaye shoshivela* osho oipupulu yongaho,
Nomuyo kamu na omhepo.*
18 Yo kai na oshilonga,* oshilonga shi shekifa.
Ngeenge efiku layo letokolo ole uya, otai xulu po.
19 Oshitukulwa shaJakob inashi fa oinima ei,
Osheshi ye Oye a shita oinima aishe,
Nokuli nodibo yefyuululo laye.
Jehova womatangakwaita olo edina laye.”
20 “Ove odibo yomoita kwaame, oshilwifo shomolwoodi,
Osheshi ohandi ku nyanyaulifa po oiwana.
Ohandi ku hanaunifa po omauhamba.
21 Ohandi ku nyanyaulifa po onghambe nomulondi wayo.
Ohandi ku nyanyaulifa po etemba loita nomulondi walo.
22 Ohandi ku nyanyaulifa po omulumenhu nomukainhu.
Ohandi ku nyanyaulifa po omulumenhu omunamido nokamati.
Ohandi ku nyanyaulifa po omulumenhu omunyasha nomukainhu omunyasha.
23 Ohandi ku nyanyaulifa po omufita noufita waye.
Ohandi ku nyanyaulifa po omunamapya neenani daye.
Ohandi ku nyanyaulifa po oongoloneya novapangeli veendodo dopedu.
24 Nohandi ka shunifila owii Babilon nosho yo ovakalimo aveshe vomuKaldea
Omolwowii aushe oo va ninga muSion moipafi yeni,” Jehova osho ta ti.
25 “Paife ondi li omhinge naave, ove omhunda ihanauni,” Jehova osho ta ti,
“Ove omuhanauni wedu alishe.
Ohandi ke ku yelulila eke lange noku ku undula ko komamanya
Noku ku ninga omhunda ya lungwina po.”
26 “Ovanhu itava ka kufa mwoove emanya lokolonela lomohuke, ile emanya lekanghameno,
Molwaashi oto ka ninga eputu fiyo alushe,” Jehova osho ta ti.
27 “Yeluleni edidiliko* moshilongo.
Shikeni enghuma mokati koiwana.
Shi nangekelei po* oiwana.
Shi ongeleleni omauhamba okuArarat, okuMinni nookuAskenas.
Shi nangekelei po omukwaita.
Longekideni eenghambe dihapu di uye ngaashi oshipaxu opo sha tendulwa.
28 Shi nangekelei po* oiwana,
Eehamba daMedia, oongoloneya vasho novapangeli vasho aveshe veendodo dopedu
Noilongo aishe oyo hava pangele.
29 Nedu otali ka kakama nokundjungaandjunga,
Osheshi omadiladilo aJehova okukala omhinge naBabilon otaa ka wanifwa
A ninge edu laBabilon oshinima shitilifi, muhe na omukalimo.
30 Ovakwaita ovaladi vomuBabilon ova efa po okulwa.
Ove li omutumba meehotengulu davo.
Eenghono davo oda pwa po.
Ova ninga ngaashi ovakainhu.
Omaumbo asho okwa tomekwa omundilo.
Oiidilifo yasho oya teyaulwa po.
31 Onhondoki imwe otai tondoka i ka shakeneke onhondoki ikwao,
Nomutumwa umwe ota ka shakeneka omutumwa mukwao,
Va ka shiivifile ohamba yaBabilon kutya oshilando shayo osha kwatwa ko keembinga adishe,
32 Kutya omataulukilo okwa nyekwa ko,
Kutya eembautu da longwa momanenge oda xwikwa po nomundilo,
Nonokutya ovakwaita ova tila.”
33 Osheshi eshi osho Jehova womatangakwaita, Kalunga kaIsrael, ta ti:
“Omonakadona waBabilon oku li ngaashi oshipale.
Efimbo loku mu kolonga ola fika.
Mafiku efimbo leteyo otali mu hange.”
34 “Ohamba yaBabilon, Nebukadnesar,* oya xwaka nge po;
Oya lyalyakaneka nge neenghono.
Oya tula nge pedu, ngaashi oshikwatelwa shihe na sha.
Oya pona nge po, ngaashi eyoka la kula;
Oya yadifa edimo layo noinima yange iwa.
Oya kombolola nge po.
35 ‘Oushada oo nda longelwa nosho yo olutu lange nau hange Babilon!’ omukalimo womuSion osho ta ti.
‘Nohonde yange nai pulwe ovakalimo vomuKaldea!’ Jerusalem osho ta ti.”
36 Onghee hano, eshi osho Jehova ta ti:
“Paife ohandi popile oshikoya shoye,
Nohandi ke va katukila onghatu ponhele yoye.
Ohandi ka pwiininika efuta lasho, nokupwiininika eendungu dasho.
37 Na Babilon otashi ka ninga onduba yomamanya,
Omikwena dookavandje,
Oshinima shitilifi noshinima shokushikilwa omwilwa,
Muhe na omukalimo.
38 Aveshe otava ka kumba pamwe, ngaashi eenghoshi deenyasha.*
Otava ka ona ngaashi ounghoshona.”
39 “Ofimbo va halelela okulya nokunwa, ohandi ka longekida oitendele yavo noku va kolwifa,
Opo va hafe;
Opo nee otava ka kofa eemhofi daalushe,
Omo itava ka penduka mo vali,” Jehova osho ta ti.
40 “Ohandi ke va eta, ngaashi eedjona da finda koshidipaelo,
Ngaashi eedi deendume pamwe noikombo.”
41 “Akutu, Sesak* osha kwatwa ko,
Efimano lokombada yedu alishe ola nyekwa ko!
Babilon osha ninga oshinima shitilifi mokati koiwana!
42 Efuta ola pwipwika Babilon.
Osha uvikwa komakufikufi alo mahapu.
43 Oilando yasho oya ninga oshinima shitilifi, edu lihe na omeva nombuwa.
Edu omo itamu ka kala omunhu, naamo itamu ka endwa komunhu.
44 Ohandi ka handukila Bel, muBabilon,
Nohandi ka kufa mokanya kaye osho a pona.
Oiwana itai mbobolokele vali kuye,
Nekuma laBabilon otali ka ngumauka po.
45 Djeni mo musho, ovanhu vange!
Indeni onhapo ehandu laJehova la xwama omolweemwenyo deni!
46 Inamu tyololoka, ile mu tile omolwehokololo, olo tali ka udika moshilongo.
Ehokololo otali uya modula imwe,
Nomodula tai shikula ko, ehokololo likwao,
Li na sha noushada moshilongo nosho yo lomupangeli ta lwifa omupangeli.
47 Onghee hano, tala! omafiku otae uya
Eshi handi ka hanauna po oihongwafano yaBabilon.
Edu lasho alishe otali ka fifwa ohoni,
Noimhu yasho aishe otai ka nangala mokati kasho.
48 Eulu nedu naashishe osho shi li mo
Otai ka ingida nehafo omolwaBabilon,
Osheshi ovahanauni otave ke uya musho tava di kolundume,” Jehova osho ta ti.
49 “Babilon ina ningifa ashike oonakudipawa vomuIsrael va wile po
Ashike oonakudipawa vokombada yedu alishe ova wila yo muBabilon.
50 Nye ovo mwa ya onhapo eongamukonda, twikileni okuya onhapo; inamu kala ofika mwa mwena!
Dimbulukeni Jehova okudja kokule,
Na Jerusalem nashi uye momitima deni.”
51 “Otwa fifwa ohoni, notwa uda omasheko.
Elengwa ola uvika oipala yetu,
Osheshi ovanailongo* ova ponokela eenhele diyapuki domeumbo laJehova.”
52 “Onghee hano, tala! omafiku otae uya,” Jehova osho ta ti,
“Eshi handi ka hanauna po oihongwafano yasho,
Nomedu lasho alishe, ovo va ehamekwa otava ka kema.”
53 “Nonande Babilon oshi londe keulu,
Nonande oshi pameke eehotengulu dasho,
Ohandi ka tuma ovahanauni vasho,” Jehova osho ta ti.
54 “Pwilikineni! Ope na euyaano tali di kuBabilon,
Eweelelo omolwoudjuu munene tali di kedu lOvakaldea,
55 Osheshi Jehova ota hanauna po Babilon,
Ota ka mweneka ondaka yasho inene,
Nomakufikufi avo otaa ka popoma ngaashi omeva mahapu.
Omaweelelo eendaka davo otaa ka udika.
56 Osheshi omuhanauni ota hange Babilon;
Ovakwaita vasho ovaladi otava ka kwatwa ko,
Omauta avo otaa ka teyaulwa po,
Osheshi Jehova oKalunga konghone.
Ote shi shunifile filufilu.
57 Ohandi ka kolwifa omalenga asho novalumenhu vasho ovanaendunge,
Oongoloneya vasho, novapangeli vasho veendodo dopedu novakwaita vasho ovaladi,
Notava ka kofa eemhofi daalushe,
Omo itava ka penduka mo vali,” Ohamba, oyo edina layo Jehova womatangakwaita, osho tai ti.
58 Eshi osho Jehova womatangakwaita ta ti:
“Ekuma laBabilon, nonande olinene, otali ka ngumaunwa po filufilu,
Nomivelo dasho, nonande odile, otadi ka tomekwa omundilo.
Ovanhu otave ke lilolola epwanga;
Oiwana otai ke lilolola yo vene, i palule ashike omundilo.”
59 Ei oyo ondjovo oyo omuprofeti Jeremia a yandja i li oshipango kuSeraja, omonamati waNeria, omonamati waMaasea, eshi a ya pamwe nohamba yaJuda, Sedekia, kuBabilon modula onhine yepangelo laye; Seraja okwa li omupashukili woinima yohamba. 60 Jeremia okwa shanga membo limwe oupyakadi aushe, oo tau ka hanga Babilon, eendjovo adishe odo oda shangelwa Babilon. 61 Natango, Jeremia okwa lombwela Seraja a ti: “Ngeenge owe uya kuBabilon noku shi mona, ou na okulesha mokule eendjovo adishe edi. 62 Opo nee tya, ‘Akutu! Jehova, owa popya kutya onhele ei otai ka hanaunwa po nokufiwa ihe na omukalimo, omunhu, ile oshinamwenyo, nonokutya otai ka ninga eputu fiyo alushe.’ 63 Nongeenge owa mane okulesha embo eli, li mangela emanya, ndele to li kupula pokati komulonga waEufrat. 64 Opo nee tya, ‘Babilon osho tashi ka ningina mo ngaha, noitashi ka djuuka mo vali omolwoupyakadi, oo handi shi etele; notave ke lilolola.’”
Apa opo pa xulila eendjovo daJeremia.
52 Sedekia okwa ninga ohamba, eshi a li e na eedula 21, nokwa pangela muJerusalem oule weedula 11. Edina laina oHamutal, omonakadona waJeremia, a dja kuLibna. 2 Okwa twikila okulonga osho shii momesho aJehova, she likolelela kwaashishe osho Jehoiakim a ninga. 3 Omolwehandu laJehova, eshi oinima oyo ya ningwa muJerusalem nomuJuda, fiyo osheshi e i hanauna po koshipala shaye. Na Sedekia okwa tukululila ohamba yaBabilon oshibofa. 4 Mefiku etimulongo lomwedi omutimulongo, momudo omutimuwoi wepangelo laSedekia, Nebukadnesar,* ohamba yaBabilon, okwe uya pamwe netangakwaita laye alishe a lwife Jerusalem. Ova onga onhanda e shi lwife, nokwa tunga ekuma lekondeka le shi dingilila. 5 Noshilando osha kala sha dingililwa fiyo omomudo omuti-11 wepangelo lohamba Sedekia.
6 Mefiku etimuwoi lomwedi, momwedi omutine, ondjala oya li ya kwata moiti moshilando, novanhu moshilongo kava li ve na oikulya. 7 Xuuninwa, Ovakaldea ova li va mbonyona ekuma loshilando, novakwaita aveshe ova faduka po oufiku va dja mo moshilando, va pita moshivelo osho shi li pokati komakuma avali, popepi noshikunino shohamba, ofimbo Ovakaldea va li va dingilila oshilando; nova twikila okuya nondjila, oyo ya finda kuAraba. 8 Ashike etangakwaita lOvakaldea ola shikula ohamba, ndele tali pitilile Sedekia momaluhaela aJeriko, netangakwaita layo alishe ole lihana. 9 Opo nee ova kwata po ohamba, ndele tave i twala kohamba yaBabilon, kuRibla, medu laHamat, ndele tai i tokola. 10 Nohamba yaBabilon oya dipaa ovanamati vaSedekia moipafi yaye. Noya dipaela yo omalenga aeshe aJuda oko kuRibla. 11 Opo nee ohamba yaBabilon oya twiyula Sedekia omesho, ye mu manga nomalyenge ongopolo, ye mu twala kuBabilon, noye mu kaleka modolongo, fiyo osheshi a fya.
12 Mefiku etimulongo lomwedi, momwedi omutitano, sha hala okutya momudo omuti-19 wepangelo laNebukadnesar,* ohamba yaBabilon, Nebusaradan, elenga lovanangeli, oo a li omuyakuli wohamba yaBabilon, okwe uya muJerusalem. 13 Okwa xwika po eumbo laJehova, eumbo* lohamba nosho yo omaumbo aeshe omuJerusalem; okwa xwika po yo omaumbo ovanhu ovo va fimana. 14 Nomakuma, oo a li a dingilila Jerusalem, okwa mbonyaunwa po ketangakwaita alishe lOvakaldea, olo la li pamwe nelenga lovanangeli.
15 Nebusaradan, elenga lovanangeli, okwa twala moukwatwa ovadinwa vamwe novanhu aveshe, ovo va li va fyaala moshilando. Okwa kufa yo ovo ve liyandja kohamba yaBabilon nosho yo oovene aveshe vovahambwidi. 16 Ashike Nebusaradan, elenga lovanangeli, okwa fiya mo ovanhu vamwe, ovo va hepa neenghono, moshilongo, opo va kale tava longo moikunino yomandjebele nosho yo oilonga youpika.
17 NOvakaldea ova teyaula eengudi dongopolo deumbo laJehova moipambu, outemba nosho yo Efuta longopolo, olo la li motembeli yaJehova, ndele tava twala ongopolo aishe kuBabilon. 18 Ova kufa yo oikwatelwa, oixupulo, oidimifo yomundilo, ouyaxa, oukopi nosho yo oilongifo aishe yongopolo, oyo hai longifwa moilonga yomotembeli. 19 Elenga lovanangeli ola kufa oiyaxa, oikwatelwa yomundilo, ouyaxa, oikwatelwa, oikwatelwalamba, oukopi nosho yo ouyaxa va longwa moshingoli elela nomoshisilveri. 20 Ondjudo yongopolo, oyo ya longifwa mokuninga eengudi mbali, efuta, eengobe 12 dongopolo odo di li koshi yEfuta nosho yo outemba, ovo va ningwa kohamba Salomo vomeumbo laJehova, kaya li tai dulu okuvalulwa.
21 Shi na sha neengudi, ongudi keshe oya li i na oule wopombada womaludimbo* 18, ongodi yokumetifa yomaludimbo 12 otai dulu oku i dingilila, ounene wayo owa li u fike pomutamo wominwe* nhee, noya li i na omututu. 22 Nomutwe, oo wa li koxulo yongudi, owa li wa longwa mongopolo; omutwe wongudi ou na oule wopombada womaludimbo atano nosho yo okanete noiimati yogranati, oyo ya dingilila omutwe wongudi, aishe oya li ya longwa mongopolo. Ongudi onhivali oya li ye i fa nosho yo oiimati yogranati. 23 Mominghulo omwa li oiimati yogranati 96; kumwe aishe, oiimati yogranati, oyo ya li ya dingilila okanete, oya li 100.
24 Elenga lovanangeli ola kufa yo Seraja, omupristeri omukulunhu, Sefania, omupristeri omutivali, nosho yo ovapashukili vopoivelo vatatu. 25 Nola kufa moshilando elenga lomombala, olo la li tali pashukile ovakwaita, ovalumenhu vaheyali, ovo va li popepi nohamba, ovo va hangika moshilando, nosho yo hamushanga wondjai yetangakwaita, oo a li ha ongele ovanhu moshilongo, nosho yo ovalumenhu 60, va dja movanhu vongaho vomoshilongo, ovo va hangika moshilando. 26 Nebusaradan, elenga lovanangeli, okwe va kufa, ndele te va twala kohamba yaBabilon, kuRibla. 27 Ohamba yaBabilon oye va dipaela kuRibla, moshilongo shaHamat. Ovajuda osho va ya moukwatwa ngaho, va dja moshilongo shavo.
28 Ava ovo ovanhu ovo Nebukadnesar* a twala moukwatwa: momudo omutiheyali, Ovajuda 3 023.
29 Momudo omuti-18 waNebukadnesar,* ovanhu* 832 ova li va kufwa muJerusalem.
30 Momudo omuti-23 waNebukadnesar,* Nebusaradan, elenga lovanangeli okwa twala Ovajuda moukwatwa, ovanhu* 745.
Aveshe kumwe, ovo va twalwa moukwatwa, ovanhu* 4 600.
31 Opo nee momudo omo Evil-merodak, ohamba yaBabilon, a ninga ohamba, okwa mangulula mo* Jehoiakin, ohamba yaJuda, modolongo. Osha li omomafiku 25 omwedi 12, momudo omuti-37 woukwatwa waJehoiakin. 32 Okwa popya naye nonghenda, ndele olukalwapangelo laye te li ningi linene li dule omalukalwapangelo eehamba dikwao, odo da li pamwe naye muBabilon. 33 Onghee Jehoiakin okwa dula mo oikutu yaye yomodolongo, nokwa kala alushe ha li pamwe naye onghalamwenyo yaye aishe. 34 Okwa kala alushe ha pewa oikulya tai di kohamba yaBabilon efiku keshe, onghalamwenyo yaye aishe, fiyo efiku olo a fya.
Tashi dulika tali ti “Jehova oha tumbaleke.”
Ile “nde ku hoolola.”
Eln., “Nofimbo ino dja mo moshidalelo.”
Ile “likalekela.”
Ile “omunyasha.”
Eln., “womupenduli.”
Ile “ombiya yokutelekela i na okanya ka kula.”
Eln., “pepelwa,” tashi ulike komundilo wa temwa koshi.
Eln., “mange oshiya shoye.”
Ile “finda.”
Ile “ohole i na oudiinini.”
Ile “lokounhunhu.”
Ile “lihokela,” tashi dulika memanya.
Ile “Eenghoshi deendume eenyasha.”
Ile “vokuMemfis.”
Sha hala okutya, okamomolonga komulonga waNil.
Sha hala okutya, Eufrat.
Ile “no-alkali.”
Ile “ofewa.”
Ile “omolwomahalo omwenyo wayo.”
Eln., “pomwedi wayo.”
Ile “ookalunga vokoilongo.”
Ile “epaya laye lohango.”
Ile “yeemwenyo.”
Eln., “Omuarabia.”
Eln., “ombaba yoshipala.”
Ile “omwenyo washo.”
Eln., “nda fidimika oshipala shange.”
Ile “okuhaela.”
Ile “nookalunga vokoilongo.”
Ile tashi dulika, “omushamane weni.”
Eln., “komatangakwaita oiwana.”
Eln., “kaume.”
Ile “kalunga kohoni.”
Ile “opala yedidiliko.”
Ile “Lidengeni meenhulo.”
Ile “ouladi.”
Ile “ouladi.”
Ile “ofimbo eongamukonda la hanga eemwenyo detu.”
Enhupeko lopaitevo, tashi dulika tali holola onghenda, ile oukwao wananghali.
Eln., “Ovanangeli,” sha hala okutya, ovo hava nangele oshilando va mone kutya onaini ve na okuponoka.
Eln., “omandjadja ange.”
Eln., “meenhumba domutima wange.”
Ile “omwenyo wange owa.”
Ile tashi dulika, “ondaka yeingido lokuya molwoodi.”
Ile “opala yedidiliko.”
Ile “ounongo.”
Ile “livele ombedi.”
Ile “ombapeka yopomesho.”
Ile “omwenyo wange.”
Eln., “inava nghundipala.”
Eln., “eemwiya.”
Ile “omwenyo wange kau.”
Ile tashi dulika, “ke ko.”
Sha hala okutya, Nondjovo yaKalunga.
Eln., “nye ovanhu omalai muhe na omutima.”
Ile “omwenyo wange kau.”
Eln., “Liyapulileni.”
Ile “mawa.”
Ile “muwa.”
Ile “omwenyo wange otau.”
Eln., “omatwi avo inaa pita etanda.”
Eln., “ovo ve na omafiku mahapu.”
Ile “nopehe na onge.”
Ile “fonghoka.”
Ile “Nokumonena eemwenyo deni.”
Ile “elombwelo.”
Oshimbodi shedimba liwa.
Eln., “Ouyehame woshifeta.”
Sha hala okutya, Jeremia.
Eln., “Aa oo,” taa ulike komatungo aeshe otembeli.
Ile “ounona ovo vehe na ooxe.”
Ile “okudja nale fiyo alushe.”
Ile “omatwiminoyambo.”
Eln., “nokupenduka ongula nokupopya.”
Edinafimaneko loshikalungakainhu osho sha li hashi longelwa kOvaisrael ovashunimonima; tashi dulika oshikalungakainhu sholudalo.
Ile “handukifa; ningile nai.”
Ile “pamayele.”
Eln., “penduka ongula inene efiku keshe nokutuma.”
Eln., “va kukutika eefingo davo.”
Eln., “nowa tetwa mo momakanya avo.”
Ile “yapulwa.”
Tala Omafatululo oitya.
Tala Omafatululo oitya, Gehenna.
Ile “inashi uya mo nandenande momadiladilo ange.”
Tala Omafatululo oitya, Gehenna.
Ile “efimbo lalo olo la tulwa po.”
Ile tashi dulika, “ewanye.”
Ile “letembu.”
Ile “elombwelo.”
Ile “opena.”
Ile “shi na oipupulu.”
Ile “shoohamushanga.”
Ile “nopehe na onge.”
Ile “omaadi okupupaleka.”
Ile “omuhakuli.”
Ile, “omwenyo wange kau”
Ile “eimbilo loluhodi.”
Ile “elombwelo.”
Ile “omaimbilo oluhodi.”
Ile “eimbilo loluhodi.”
Ile “odongaho.”
Ile “noshihongifo.”
Oshinima sha fela koitila.
Ile “oongaho.”
Ovelishe 11 oya li ya shangwa tete mOshiaramea.
Ile “omuku.”
Ile tashi dulika, “kungulukifa omeva.”
Ile “oshihongwafano shoshivela sha hemunwa.”
Ile “omufudo.”
Ile “oyongaho.”
Ile “kupulashi.”
Tashi dulika Jeremina oye ta lombwelwa.
Ile “Nashi kale ngaho.”
Eln., “penduka ongula noku va kumaida.”
Ile “yambele omatwiminoyambo.”
Ile “kalunga kohoni.”
Sha hala okutya, Jeremia.
Sha hala okutya, omayambo oo a yambwa motembeli.
Ile “omaliudo omoule.” Eln., “eefiyo.”
Ile “tava kongo omwenyo woye”
Ile “nomaliudo avo omoule.” Eln., “neefiyo.”
Ile “omuholike womwenyo wange.”
Ile “youtotone.”
Ile tashi dulika, “Osha nyika oluhodi.”
Eln., “Nombelela keshe kai.”
Ile “Omwenyo wange.”
Ile “omukainhu.”
Ile “kondekwa.”
Ile “Omuetiopia.”
Ile “u fifa ohoni.”
Ile “ovadinwa vavo.”
Ile “komikangha; keendungu.”
Ile “nomukifi.”
Ile “omwenyo woye owa.”
Ile “omwenyo wange itau.”
Ile tashi dulika, “omaludi ane etokolo.” Eln., “omapata ane.”
Ile tashi dulika, “Owa kala nokweenda shamunimanima.”
Ile “okulivela ombedi.”
Ile “Omwenyo waye otau.”
Ile tashi dulika, “Ola ninga ohoni nosho yo elengwa.”
Eln., “Ino kufa nge po.”
Ile “netumwalaka letokolo.”
Ile “Oto ka ninga omupopikalelipo wange.”
Ile “finda.”
Eenghedindjikilile dokunyika oluhodi doshipaani odo tashi dulika da li hadi landulwa kOvaisrael ovashunimonima.
Eln., “eendjila davo adishe.”
Eln., “nomidimba.”
Tala Omafatululo oitya.
Ile tashi dulika, “Osheshi ngaashi omundilo, omwa xwameka ehandu lange.”
Ile “omunhu omunaenghono.”
Eln., “a ninga ombelela okwooko kwaye.”
Ile “omunhu omunaenghono.”
Ile “oukengeleledi.”
Ile tashi dulika, “itau dulu okuvelulwa.”
Ile “omaliudo omoule.” Eln., “eefiyo.”
Ile “ndele kau li pauyuki.”
Eln., “kwaame,” tashi dulika tashi ulike kuJehova.
Ile “va hanauna po lwoikando ivali.”
Ile “Pashukileni eemwenyo deni.”
Eln., “ova kukutika eefingo davo.”
Ile “nokolukadi.”
Eln., “ngaashi sha yuka momesho omuhongi okuninga.”
Ile “livele ombedi shi na sha.”
Ile “livele ombedi shi na sha.”
Eln., “shiti”
Ile “o-snow.”
Ile “etwiminoyambo.”
Ile “inadi tungwa.”
Ile “elombwelo.”
Eln., “tu mu denge nelaka.”
Eln., “omatwi aye otaa ka uma.”
Ile “noinashi uya mo nandenande momadiladilo ange.”
Eln., “ova kukutika eefingo davo vaha.”
Ile “omaliudo omoule.” Eln., “eefiyo.”
Ile “omwenyo wohepele.”
Eln., “Nebukadresar,” oyo onghedi imwe yokushanga edina olo.
Ile “tanaukile.”
Ile “komukifi.”
Eln., “Nebukadresar;” oyo onghedi imwe yokushanga edina olo.
Ile “ota ka xupa nomwenyo waye.”
Ile “kombala.”
Ile “ofiye keshe.”
Eln., “yapulila.”
Ha ifanwa yo Joahas.
Eln., “Kouyahame wokudala.”
Ha ifanwa yo Jehoiakin nosho yo Jekonia.
Eln., “Nebukadresar;” oyo onghedi imwe yokushanga edina olo.
Ile “kedu olo va li va yelulila eemwenyo davo.”
Ile “oshilongo.”
Eln., “pomafiku.”
Ile “omufyuululi.”
Ile “ovashunimonima.”
Eln., “Ohava pameke omake.”
Ile “Otave mu yada eteelelo longaho.”
Ile “etumwalaka lidjuu.” Oshitya shOshiheberi oshi na omaityo opavali: “etokolo laKalunga lidjuu,” ile “oshinima shidjuu.”
Ile “etumwalaka lidjuu.”
Ile “etumwalaka lidjuu.”
Ile “etumwalaka lidjuu.”
Ile “etumwalaka lidjuu.”
Ile “etumwalaka lidjuu.”
Ile “Etumwalaka lidjuu.”
Eln., “Nebukadresar;” oyo onghedi imwe yokushanga edina olo.
Ha ifanwa yo Jehoiakin naKonia.
Ile tashi dulika, “ovatungi vekuma leameno.”
Ile “nomukifi.”
Eln., “Nebukadresar,” oyo onghedi imwe yokushanga edina olo.
Eln., “nokupenduka ongula nokupopya.”
Eln., “a penduka ongula nokutuma.”
Eln., “Nebukadresar,” oyo onghedi imwe yokushanga edina olo.
Ile “handukila.”
Olo edina likwao laBabel (Babilon).
Eln., “ombelela aishe.”
Ile “onghoshi yondume yonyasha.”
Ile “okulinyongamena.”
Ile, “livele ombedi shi na sha.”
Ile “elombwelo.”
Eln., “pendula ongula nokutuma.”
Ile “kombala.”
Ile “livela ombedi shi na sha.”
Ile “Nomhunda yotembeli.”
Ile “ngaashi onhele i yadi omiti.”
Ile “nokukendabala okupupaleka oshipala shaJehova.”
Ile “livele ombedi shi na sha.”
Ile “eemwenyo detu.”
Ile “nomukifi.”
Eln., “fuwe.”
Ile “mombala.”
Sha hala okutya, efuta longopolo lotembeli.
Ile “mombala.”
Eln., “leedula domafiku.”
Ile “Nashi kale ngaho!”
Ile “nomukifi.”
Sha hala okutya, outi ovo hava xwekelwa mondjoko.
Ile “omunyekadi.”
Ile tashi dulika, “ovatungi vekuma leameno.”
Ile “nomukifi.”
Ile tashi dulika, “da pasha.”
Eln., “penduka ongula nokutuma.”
Eln., “Nebukadresar,” oyo onghedi imwe yokushanga edina olo.
Ile “moivela ilaula yomofingo.”
Ile “pekalo.”
Eln., “olinene.”
Eln., “neemhango.”
Ile “ovanailongo.”
Ile “va.”
Ile “epukululo.”
Ile tashi dulika, “fimanekifa.”
Eln., “yandja omutima waye meendjo.”
Ile “nda twikila oku ku ulikila ohole i na oudiinini.”
Ile “to piti komesho to tane mokati kaavo hava yolo.”
Ile “komafilu.”
Ile “alula.”
Ile “omolwoinima iwa ya dja.”
Ile “Eemwenyo davo.”
Ile “eemwenyo dovapristeri.”
Eln., “noinghene.”
Ile “ovana vaye.”
Eln., “omandjadja.”
Ile “eemwenyo.”
Ile “neemwenyo.”
Ile “noludalo.”
Eln., “taa ngudu.”
Ile tashi dulika, “omushamane wavo.”
Ile “Neenghedimhango.”
Ile “omute womaadi,” sha hala kutya, omute oo wa ndodelwa komaadi omayambo.
Eln., “Nebukadresar,” oyo onghedi imwe yokushanga edina olo.
Ile “mombala.”
Sha hala okutya, xekulu yepata.
Osekeli imwe oi fike peegrama 11,4. Tala Oshiwedelwako B14.
Eln., “meenhulo dovanamati vavo.”
Ile “Oumunene ngeenge tashi uya pomalalakano oye.”
Ile “nomukifi.”
Eln., “kombelela aishe.”
Eln., “Nebukadresar,” oyo onghedi imwe yokushanga edina olo.
Eln., “okupenduka ongula noku va honga.”
Tala Omafatululo oitya, “Gehenna.”
Ile “inashi uya mo momadiladilo ange.”
Tala Omafatululo oitya.
Ile “oinima iwa.”
Ile “omufyuululi.”
Ile “eenghedimhango.”
Eln., “Nebukadresar,” oyo onghedi imwe yokushanga edina olo.
Eln., “Nokunena.”
Ile “pamwenyo.”
Ile “komukifi.”
Ile “yomeenduda.”
Eln., “Jonadab,” exupipiko ledina Jehonadab.
Eln., “Jonadab,” exupipiko ledina Jehonadab.
Eln., “Nebukadresar,” oyo onghedi imwe yokushanga edina olo.
Eln., “penduka ongula nokupopya.”
Eln., “penduka ongula nokutuma.”
Eln., “Jonadab,” exupipiko ledina Jehonadab.
Eln., “omushangwatonywa wembo.”
Eln., “momushangwatonywa wembo.”
Ile “membo”
Ile “membo.”
Ile “monduda yokulila.”
Ile “omushangi.”
“membo.”
Ile “kombala.”
Ile “Omalenga omombala.”
Ile “membo.”
Ile “membo.”
Oshitukulwa shaxuuninwa shaNovemba noshitukulwa shotete shaDesemba. Tala Oshiwedelwako B15.
Ile “domembo.”
Oha ifanwa yo Jehoiakin naJekonia.
Eln., “Nebukadresar;” oyo onghedi imwe yokushanga edina olo.
Ile “eemwenyo deni.”
Eln., “ta e mu tula meumbo lomalyenge.”
Eln., “meumbo londungu.”
Ile “mombala.”
Ile “komukifi.”
Eln., “ta i.”
Ile “ota ka xupa nomwenyo waye.”
Eln., “omake.”
Ile “elenga lomombala.”
Ile “lomombala.”
Ile “kombala.”
Ile “mombala.”
Ile “e tu shitila omwenyo ou.”
Eln., “owa i.”
Ile “oto ka kala nomwenyo.”
Eln., “ito i.”
Ile “nomwenyo woye.”
Eln., “okuya.”
Ile “mombala.”
Eln., “Ovalumenhu vombili yoye.”
Eln., “Nebukadresar,” oyo onghedi imwe yokushanga edina olo.
Ile she likolelela kokutukula oitya kwa yoolokafana kwomashangelo Oshiheberi, “Nergal-Shareser, Samgar-Nebo, Sarsekim, Rabsaris.”
Ile “omhule dingi (omunyanekeli weenyofi).”
Eln., “Nebukadresar;” oyo onghedi imwe yokushanga edina olo.
Ile “ombala.”
Ile tashi dulika, “oilonga youpika.”
Eln., “Nebukadresar,” oyo onghedi imwe yokushanga edina olo.
Ile “elenga ekulunhu lomombala.”
Ile “omhule dingi (omunyanekeli weenyofi).”
Ile “oto ka ya onhapo nomwenyo woye.”
Eln., “ndi fikame komesho.”
Ile “a dipae omwenyo woye?”
Ile “okudipaa omwenyo woye.”
Ile “womoludalo leehamba.”
Ile tashi dulika, “petale linene.”
Ile “ohandi ka nyika oluhodi.”
Ile “mu ka kale ko oule wokafimbo.”
Ile “komukifi.”
Ile “nomwenyo keshe.”
Eln., “Nebukadresar,” oyo onghedi imwe yokushanga edina olo.
Ile “eetembeli.”
Ile “inai ehamekwa.”
Ile “omadimbulukifomanya.”
Ile “dEumbo (dOtembeli) letango,” sha hala okutya, Heliopolis.
Ile “eetembeli.”
Ile “Memfis.”
Eln., “penduka ongula nokutuma.”
Ile “eemwenyo deni.”
Ile “kave udite va nyanyaulwa.”
Ile “nomukifi.”
Ile “yelulila eemwenyo davo.”
Edinafimaneko loshikalungakainhu osho sha li hashi longelwa kOvaisrael ovashunimonima; tashi dulika oshikalungakainhu sholudalo.
Edinafimaneko loshikalungakainhu osho sha li hashi longelwa kOvaisrael ovashunimonima; tashi dulika oshikalungakainhu sholudalo.
Edinafimaneko loshikalungakainhu osho sha li hashi longelwa kOvaisrael ovashunimonima; tashi dulika oshikalungakainhu sholudalo.
Edinafimaneko loshikalungakainhu osho sha li hashi longelwa kOvaisrael ovashunimonima; tashi dulika oshikalungakainhu sholudalo.
Ile “tava kongo omwenyo waye.”
Eln., “Nebukadresar,” oyo onghedi imwe yokushanga edina olo.
Ile “a li ta kongo omwenyo wayo.”
Ile “lihalele.”
Ile “ovanhu.”
Ile “ohandi ke ku efa u ye nomwenyo woye.”
Eln., “Nebukadresar,” oyo onghedi imwe yokushanga edina olo.
Oikelelifo inini, naluhapu ohai humbatwa kovaumbi.
Eln., “tifula.”
Ile “etomo.”
Eln., “Nebukadresar,” oyo onghedi imwe yokushanga edina olo.
Ile “muMemfis.”
Eln., “efimbo la wapala.”
Sha hala okutya, Omufindi waEgipiti.
Ile “Memfis.”
Ile tashi dulika, “Otashi ka ninga eputu.”
Ile “tava ongele oiti.”
Sha hala okutya, Tebes.
Ile “tava kongo eemwenyo davo.”
Eln., “Nebukadresar,” oyo onghedi imwe yokushanga edina olo.
Ile “epukululo.”
Sha hala okutya, kaKreta.
Sha hala okutya, otava ka kulula omitwe davo va nyika oluhodi nova fya ohoni.
Ile “eameno la shiya ko.”
Ile “Nomhunda ya lalakana.”
Ile tashi dulika, “medu la kukuta.”
Ile “omhunda ya lalakana.”
Eln., “Oluvinga.”
Ile “otau kakama.”
Sha hala okutya, onyalilo oyo hai shikwa momaimbilokemo opepako.
Ile “otau kakama.”
Sha hala okutya, onyalilo oyo hai shikwa momaimbilokemo opepako.
Ile tashi dulika, “ondaka yeingido lokuya molwoodi.”
Ile “odo de shi dingilila.”
Ile “oyuunda yeedi.”
Ile “omayele.”
Eln., “Nebukadresar,” oyo onghedi imwe yokushanga edina olo.
Eln., “Nebukadresar,” oyo onghedi imwe yokushanga edina olo.
Ile “omaliko oo a xupa po konima yolwoodi.”
Ile “kombinga keshe.”
Eln., “ehovelo.”
Ile “tava kongo omwenyo wavo.”
Ile “opala yedidiliko.”
Oshitya shOshiheberi otashi dulika sha pambafana noshitya “onyata,” nohashi longifwa okuyukifwa koinima itondifa.
Eln., “tifula.”
Eln., “Osha yandja eke lasho.”
Eln., “Nebukadresar,” oyo onghedi imwe yokushanga edina olo.
Ile “omwenyo waye.”
Ile “noku va tokolela ehanauno.”
Ile “Shi tokoleleni ehanauno.”
Eln., “tifula.”
Eln., “mwenekwa.”
Ile “ovaprofeti ovanaipupulu.”
Ile “omayele.”
Osha fa shi li ngaha kutya olo edina likwao laKaldea.
Eln., “tifula.”
Sha hala okutya, edu lOvakaldea.
Ile tashi dulika, “yadekeni eembalukutu.”
Ile “opala yedidiliko.”
Eln., “exulilo.”
Ile “komwenyo waye.”
Ile “omhuku.”
Ile tashi dulika, “kungulukifa omeva.”
Ile “oshihongwafano shoshivela sha hemunwa.”
Ile “omufudo.”
Ile “oyongaho.”
Ile “opala yedidiliko.”
Eln., “yapulileni.”
Eln., “yapulileni.”
Eln., “Nebukadresar,” oyo onghedi imwe yokushanga edina olo.
Ile “eenghoshi deendume eenyasha.”
Osha fa shi li ngaha kutya olo edina likwao laBabel (Babilon).
Ile “ovaendanandjila.”
Eln., “Nebukadresar,” oyo onghedi imwe yokushanga edina olo.
Eln., “Nebukadresar,” oyo onghedi imwe yokushanga edina olo.
Ile “ombala.”
Oludimbo limwe oli fike peesendimeta 44,5. Tala Oshiwedelwako B14.
Omutamo womunwe ou fike posendimeta 1,85. Tala Oshiwedelwako B14.
Eln., “Nebukadresar,” oyo onghedi imwe yokushanga edina olo.
Eln., “Nebukadresar,” oyo onghedi imwe yokushanga edina olo.”
Ile “eemwenyo.”
Eln., “Nebukadresar,” oyo onghedi imwe yokushanga edina olo.
Ile “eemwenyo.”
Ile “eemwenyo.”
Eln., “okwa yelula omutwe.”