OMAIMBILOKEMO
א [Alef]*
1 Paife, oku li omutumba oye aeke, oshilando osho sha li shi yadi ovanhu.
Okwa ninga ngaashi omufiyekadi, ye, oo a li e yadi ovanhu mokati koiwana.
Ye, oo a li omonakadona wohamba mokati koitukulwalongo,* okwa kala ta longifwa oilonga idjuu.
ב [Bet]
2 Oha kwena unene oufiku, nomahodi aye ohaa pololoka keemhanda daye.
Kape na nande oumwe womovaholike vaye aveshe e li po, e mu hekeleke.
Ookaume kaye aveshe ove mu kengelela; ova ninga ovatondi vaye.
ג [Gimel]
3 Juda okwa ya moukwatwa koshi yefininiko noloupika unyanyalifa.
Oku na okukala mokati koiwana; ina mona onhele yetulumuko.
Ovafininiki vaye aveshe ove mu hangakena pefimbo loudjuu waye.
ד [Dalet]
4 Eendjila adishe, odo da finda kuSion, oda nyika oluhodi, molwaashi kape na ou te uya koshivilo.
Oivelo yaye aishe oya hanauka po; ovapristeri vaye otava tu omadima.
Oukadona elela* vaye ova nyika oluhodi, naye oku li mouyehame neenghono.
ה [He]
5 Ovakondjifi vaye paife ova ninga mwene* waye; ovatondi vaye kave na ko nasha.
Osheshi Jehova okwe mu etela oluhodi omolwomatauluko aye mahapu.
Ovana vaye ova twalwa moukwatwa moipafi yomukondjifi.
ו [Waw]
6 Ewapalo alishe ola dja po pomonakadona waSion.
Ovana vaye veehamba ova fa eenyapi,* odo inadi mona oulifilo,
Nohava ende va loloka moipafi yomukondjifi.
] זZayin]
7 Momafiku okufininikwa kwaye nosho yo okuhe na onhele yokukala, Jerusalem okwa dimbuluka
Oinima aishe iwa, oyo ya li muye pefimbo lonalenale.
Eshi ovanhu vaye va wila meke lomutondi, naashi a li ehe na omukwafi,
Ovatondi ove mu mona, nove mu yola,* eshi ta teka po.
ח [Het]
8 Jerusalem okwa nyona neenghono.
Nomolwaasho a ninga oshinima shitondifa.
Aveshe ovo va li have mu fimaneke, paife otava ungaunga naye onga oshinima shinyanyalifa, osheshi ova mona epenge laye.
Ota keme, nokwa pilamena ko a fya ohoni.
] טTet]
9 Okuhenoukoshoki kwaye oku li moikutu yaye.
Ka li a diladila kombinga yonakwiiwa yaye.
Okuteka po kwaye okwa li kukumwifa; ka li e na oo te mu hekeleke.
Akutu! Jehova, tala okufininikwa kwange, osheshi omutondi okwe linenepeka ye mwene.
י [Yod]
10 Omutondi okwa tenheka omake aye komamona aye aeshe.
Osheshi Jerusalem okwa mona oiwana tai i monhele yaye iyapuki,
Oyo wa lombwela iha ye mo meongalo loye.
כ [Kaf]
11 Ovanhu vaye aveshe otava tu omadima; otava kongo omungome.
Ova yandja po oinima yavo i na ongushu va mone sha shokulya, opo va kale nomwenyo.*
O! Jehova, tala, nokumona kutya onda ninga ngaashi omukainhu* ehe na oshilonga.
ל [Lamed]
12 Amushe ovo tamu ende pomunghulo wondjila, mbela omu na ko ngoo nasha?
Taleni nokunongonona!
Mbela ope na ngoo ouyehame wa fa oo nda li nda etelwa,
Oo Jehova a etela nge mefiku lehandu laye la xwama?
מ [Mem]
13 Okwa tuma omundilo okudja pombada u uye momakipa ange, nakeshe limwe okwe li finda.
Okwa yalela eemhadi dange onete; okwa fininika nge ndi shune monima.
Okwa ninga nge omukainhu e likalela.
Efimbo alishe, ohandi ehama.
נ [Nun]
14 Omatauluko ange okwa mangwa ngaashi ondjoko, a mangelwa kumwe neke laye.
Okwa tulwa kofingo yange, neenghono dange oda kana po.
Jehova okwa yandja nge momake aavo itandi dulu okulwifa.
ס [Samek]
15 Jehova okwa ekelashi ovalumenhu aveshe ovanaenghono ovo ve li mokati kange.
Okwa tumina nge ongudu i nyanyaule ovalumenhu vange ovanyasha.
Jehova okwa tyanghaulila okakadona elela kaJuda moshikolelo shomaviinyu.
ע [Ayin]
16 Ohandi lili omolwoinima ei; omesho ange otaa pololoka omahodi.
Osheshi keshe oo a li ta dulu okuhekeleka nge, ile okutulumukifa nge* oku li kokule naame.
Ovanamati vange kave na eteelelo, osheshi omutondi okwe va finda.
פ [Pe]
17 Sion okwa yelula omake aye pombada; ke na ou te mu hekeleke.
Jehova okwa yandja elombwelo, opo ovakondjifi aveshe vaJakob, ovo ve mu dingilila, ve mu pilukile po.
Jerusalem okwa ninga oshinima shitondifa kuvo.
צ [Tsade]
18 Jehova omuyuki, osheshi eshi nda tukula oshibofa oshi li omhinge nomalombwelo* aye.
Ovanhu nye amushe, pwilikineni nokutala ouyehame wange.
Oukadona elela* vange novalumenhu vange ovanyasha ova ya moukwatwa.
ק [Kof]
19 Onda ifana ovaholike vange, ashike ova kengelela nge.
Ovapristeri vange novakulunhu vange ova xula po moshilando,
Ofimbo tava kongo oikulya, opo va kale nomwenyo.*
ר [Res]
20 O! Jehova, tala, ondi li mouyehame neenghono.
Meni* lange otamu fetukununwa.
Omutima wange owa wilauka meni lange, osheshi onda kala omunashibofa filufilu.
Pondje ope na eongamukonda; meni leumbo omwa fa efyo.
ש [Shin]
21 Ovanhu ova uda eshi handi tu omadima, kape na oo ta hekeleke nge.
Ovatondi vange aveshe ova uda oupyakadi wange.
Ova hafa, molwaashi owa etela nge oupyakadi.
Ashike oto ka eta efiku, olo wa popya, eshi tava ka kala ngaashi ame.
ת [Taw]
22 Owii wavo aushe nau fike kwoove, nou ungaunge navo nai,
Ngaashi ashike wa ungaunga nai naame omolwomatauluko ange aeshe.
Osheshi okutwa omadima kwange okuhapu, nomutima wange otau ehama.
א [Alef]
2 Jehova ina tuvika tuu omonakadona waSion moshilemo shehandu laye!
Okwa ekela ewapalo laIsrael kombada yedu okudja meulu.
Ina dimbuluka oshilyatelo sheemhadi daye mefiku lehandu laye.
ב [Bet]
2 Jehova okwa pona po omalukalwa aeshe aJakob nopehe na olukeno.
Monya yaye okwa hanauna po eenhele domonakadona waJuda da dingililwa komakuma a pama.
Okwa ninipika nokufifa ohoni ouhamba nosho yo ovawiliki vaye.
ג [Gimel]
3 Omolwoupyuhandu, okwa kufa Israel eenghono daye adishe.*
Okwa shunifa mo eke laye lokolulyo, eshi omutondi a li te uya,
Nokwa twikila okuxwika muJakob, ngaashi omundilo tau lungwinifa po keshe osho she shi dingilila.
ד [Dalet]
4 Okwa lukila* outa waye onga omutondi; eke laye lokolulyo ole lilongekidila okuponoka ngaashi omukondjifi;
Okwa twikila okudipaa aveshe ovo a hokwa nomesho aye.
Nokwa tilashi ehandu laye ngaashi omundilo u li metwali lomonakadona waSion.
ה [He]
5 Jehova okwa ninga onga omutondi;
Okwa pona po Israel.
Okwa pona po eeshungongulu daye adishe;
Okwa hanauna po eenhele dasho adishe da dingililwa komakuma a pama.
Nokwa hapupalifa oluhodi nosho yo ekemo momonakadona waJuda.
ו [Waw]
6 Oha ungaunga netwali laye nonyanya, ngaashi onduda i li moshikunino.
Okwa xulifa po* oshivilo shaye.
Jehova okwa ningifa oshivilo nosho yo eshabata li dimbiwe muSion,
Nomehandu laye la xwama, okwa ulika kutya ke na ko nasha nohamba nosho yo omupristeri.
ז [Zayin]
7 Jehova okwa efa po oaltari yaye;
Okwa ekelashi onhele yaye iyapuki.
Okwa efela omakuma eeshungongulu daye da pama momake omutondi.
Ova ingida mokule meumbo laJehova, ngaashi mefiku loshivilo.
ח [Het]
8 Jehova okwa tokola okuhanauna po ekuma lomonakadona waSion.
Okwa tamununa mo ongodi yokuyeleka.
Ina shunifa mo eke laye aha etife ehanauno.*
Okwa ningifa ekondeka londuba yomadu nosho yo ekuma i lile.
Aishe kumwe oya nghundipalekwa.
ט [Tet]
9 Omivelo daye oda ningina medu.
Kalunga okwa hanauna po nokuteyaula oihakifo yaye.
Ohamba yaye novawiliki vaye ove li mokati koiwana.
Kape na omhango;* nokuli novaprofeti vaye inava mona emoniko okudja kuJehova.
י [Yod]
10 Ovakulunhu vomonakadona waSion ove li omutumba pedu va mwena.
Ove lifundila ondwi komitwe davo nokudjala eeshako.
Oukadona elela vaJerusalem ova nyongameka omitwe davo pedu.
כ [Kaf]
11 Omesho ange okwa loloka okudja omahodi.
Meni* lange otamu fetukununwa.
Exuli lange ola tilwashi pedu omolwokuteyauka po kwomonakadona* wovanhu vange,
Omolwounona nouhanana tava ngabukile momahalandjadja odoolopa.
ל [Lamed]
12 Ohava pula ooina tava ti, “Oilya nomaviinyu oi li peni?”
Eshi tava ngabuka ngaashi omunhu a ehamekelwa momapandavanda oshilando,
Eshi onghalamwenyo* yavo tai xulu po, ofimbo va ukatwa kooina.
מ [Mem]
13 Oshike handi dulu okulongifa shi li ondombwedi,
Ile ohandi ku yelekanifa nashike, ove omonakadona waJerusalem?
Ohandi ku faafanifa nashike, opo ndi ku hekeleke, ove okakadona elela kaSion?
Osheshi okuteka po kwoye okunene ngaashi efuta. Olyelye ta dulu oku ku velula?
נ [Nun]
14 Omamoniko, oo ovaprofeti voye ve ku monena, ooipupulu noongaho,
Noinava nyaneka pomutenya epuko loye, opo uha twalwe moukwatwa,
Ashike ova kala tave ku monene omamoniko oipupulu notaa pukifa.
ס [Samek]
15 Aveshe ovo tava ende pondjila pwoove ohava pandula omake avo tava sheke.
Ohava shiki omwilwa va kumwa, nohava pukaapukile omitwe davo omonakadona waJerusalem, tava ti:
“Mbela eshi osho oshilando osho va popya va ti, ‘Osha wanenena mewapalo, ehafo lokombada yedu alishe’?”
פ [Pe]
16 Ovatondi voye aveshe ove ku ekamekela omakanya avo.
Ohava shiki omwilwa nokulikwesha komayoo avo tava ti: “Otwe mu pona po.
Efiku eli olo twa li twa teelela! Ola fika, notwe shi mona!”
ע [Ayin]
17 Jehova okwa ninga osho a li a lalakanena; okwa wanifa po osho a popya,
Osho a popile nalenale.
Okwa hanauna po nopehe na olukeno.
Okwa efa omutondi a hafe omolwoye; okwa nenepeka eenghono* dovakondjifi voye.
צ [Tsade]
18 Akutu ekuma lomonakadona waSion, omitima davo ohadi lilile Jehova.
Omahodi naa kunguluke ngaashi oshikungulu omutenya noufiku.
Ino fuda po, ino tulumukifa eisho* loye.
ק [Kof]
19 Fikama! Lila mokule oufiku, pehovelo lomanangelo.
Tilashi omutima woye ngaashi omeva komesho yoshipala shaJehova.
Yelula omake oye kuye omolweemwenyo dovana voye,
Ovo tava ngabukile pomashakeneno epandavanda keshe omolwondjala.
ר [Res]
20 Akutu! Jehova, tala, nokumona oo wa ungaunga naye nai.
Mbela ovakainhu nava twikile okulya po ounona* vavo, ounona vavo ovo va shitikika,
Ile mbela ovapristeri novaprofeti nava dipaelwe monhele iyapuki yaJehova?
ש [Shin]
21 Ovamati ovanyasha nosho yo ovalumenhu ovakulunhu ova nangala pedu momapandavanda va fya.
Oukadona elela* vange nosho yo ovalumenhu ovanyasha vange ova dipawa neongamukonda.
Owe va dipaa mefiku lehandu loye; owe va dipaa nopehe na olukeno.
ת [Taw]
22 Ngaashi efiku loshivilo, owa ifana omatilifo okudja keembinga adishe.
Mefiku lehandu laJehova kape na oo a ya onhapo, ile a xupa;
Ovo nda dala* nokutekula ova hanaunwa po komutondi wange.
א [Alef]
3 Aame omulumenhu, oo a mona okufininikwa omolwodibo yehandu laye.
2 Okwa taataela nge shi, nokwa ningifa nge ndi ende momulaulu, ndele hamouyelele.
3 Oshoshili kutya eke laye ola kala alushe li li omhinge naame efimbo alishe.
ב [Bet]
4 Okwa lolokifa ombelela yange nosho yo oshipa shange;
Okwa teyaula omakipa ange.
5 Okwa kondeka nge; okwa dingilila nge noudiyo ulula nosho yo noudjuu.
6 Okwa fininika nge ndi kale omutumba meenhele domilaulu, ngaashi ovanhu ovo va fya nalenale.
ג [Gimel]
7 Okwa dingilila nge nekuma, opo ndiha dule okuya onhapo;
Okwa manga nge nomalyenge ongopolo madjuu.
8 Naashi nda lila neenghono, ndi kwafelwe, ina tambula ko* eilikano lange.
9 Okwa fitika omalila ange nomamanya a hongwa;
Okwa ngolyola eendjila dange.
ד [Dalet]
10 Okwa nangela nge ngaashi emwangha, nongaashi onghoshi ya hondama.
11 Okwa fininika nge ndi dje mo momalila, nokwa taula nge moinhimbu;*
Okwa ningifa nge ndi kale nde likalela.
12 Okwa lukila* outa waye, nokwa ninga nge oshishonekwa shoshikuti.
ה [He]
13 Okwa tyuula eefiyo dange noikuti* yomombalukutu yaye.
14 Onda ninga oshiyolifa kovanhu aveshe, oshinima shokwiimbwa meimbilo lavo efiku alishe.
15 Okwa kutifa nge noinima ilula, nokwa tutika nge noshimeno shilula.
ו [Waw]
16 Okwa teya omayoo ange noumanya;
Nokwa undulila nge momute.
17 Owa anyena nge* ombili; onda dimbwa osho shiwa.
18 Onghee ohandi ti: “Ewapalo lange ola xula po nosho yo eteelelo lange muJehova.”
ז [Zayin]
19 Dimbuluka okufininikwa kwange nosho yo onghalo yange yokuhe na eumbo; dimbuluka kutya onda lya oshimeno shilula noudiyo ulula.
20 Oto* ka dimbuluka filufilu nokupetama pwaame.
21 Ohandi dimbuluka oinima oyo momutima wange; nomolwaasho handi teelele nelididimiko.
ח [Het]
22 Inatu xula po omolwohole yaJehova i na oudiinini,
Osheshi onghenda yaye ihai xulu po.
23 Oho i ulike ipe ongula keshe; oudiinini woye ou shii okulineekelwa.
24 Onda ti,* “Jehova oye oshitukulwa shange, nomolwaasho handi mu teelele nelididimiko.”
ט [Tet]
25 Jehova omuwa kwaao e lineekela muye, komunhu* oo ta twikile oku mu konga.
26 Oshiwa okuteelela melimweneneno* exupifo laJehova.
27 Oshiwa komunhu okuhumbata ondjoko pefimbo lounyasha waye.
י [Yod]
28 Mu efa a kale omutumba oye aeke nokukala melimweneneno, eshi te i mu twike.
29 Mu efa a tule okanya kaye mondwi yedu; otashi dulika a kale e na eteelelo.
30 Mu efa a yandje olupanda laye kwaao te mu denge; mu efa a shekwe sha wana.
כ [Kaf]
31 Osheshi Jehova ite ke tu ekelashi fiyo alushe.
32 Nonande okwa etifa oluhodi, ota ka ulika yo onghenda omolwohole yaye inene i na oudiinini.
33 Osheshi ina lalakanena momutima waye a fininike, ile a nyikife oluhodi ovana vovanhu.
ל [Lamed]
34 A pitike umwe a tyanghaule ovanadolongo aveshe vokombada yedu koshi yeemhadi daye,
35 A anyene omunhu ouyuki moipafi yOmukombadambada,
36 A kengelele omunhu moihokolola yaye
. . . Jehova ihe lididimikile oinima ya tya ngaho.
מ [Mem]
37 Mbela olyelye ta dulu okupopya noku shi ningifa shi ningwe, ngeenge Jehova haye ta yandje elombwelo?
38 Mokanya kOmukombadambada
Ihamu di oinima ii noinima iwa oshita.
39 Omolwashike omunhu omunamwenyo e na okungongota shi na sha noilanduliko yenyono laye?
נ [Nun]
40 Natu konakoneni nokukonenena eendjila detu, nokwaalukila kuJehova.
41 Natu yeluleni omitima detu pamwe nomake etu kuKalunga meulu, hatu ti:
42 “Otwa nyona, notwa tukula oshibofa, ndele ino tu dimina po.
ס [Samek]
43 Omolwehandu, owe tu kelela tuha ehene popepi naave;
Owe tu taataa noku tu dipaa nopehe na olukeno.
44 Owe tu kelela noshilemo tuha ehene pwoove, opo eilikano letu liha fike kwoove.
45 Owe tu ninga ovadinwa noimbodi yongaho mokati koiwana.”
פ [Pe]
46 Ovatondi vetu aveshe ove tu ekamekela omakanya avo.
47 Otwa kwatwa koumbada notwa hangwa komaupyakadi, ehanauno netekauko.
48 Omakungulukilo omeva otaa kunguluka taa di momesho ange omolwokuteka po kwomonakadona wovanhu vange.
ע [Ayin]
49 Omesho ange otaa pololoka omahodi nopehe na okutula, nopehe na olufuwo,
50 Fiyo osheshi Jehova ta tale pedu, noku tu mona okudja meulu.
51 Omesho ange okwa etela nge* oluhodi omolwovanakadona aveshe voshilando shange.
צ [Tsade]
52 Ovatondi vange otava kongo nge ngaashi okadila, nopehe na etomheno lasha.
53 Ova ekela nge melambo, opo va mweneke omwenyo wange;* ova kala nokukupula nge nomamanya.
54 Omeva okwa kunguluka komutwe wange, nonda ti: “Onda xula po!”
ק [Kof]
55 Akutu! Jehova, onda ifana edina loye okudja moule welambo.
56 Uda ondaka yange; ino fitika okutwi kwoye, eshi handi ku lilile ekwafo, ndi mone epepelelo.
57 Owa li wa ehena popepi mefiku olo nde ku ifana. Owa ti: “Ino tila.”
ר [Res]
58 O! Jehova, owa popila nge,* nowa kulila omwenyo wange.
59 O! Jehova, owa mona owii oo nda ningilwa; alikana, tokole nge pauyuki.
60 Owa mona onghone yavo aishe, eemhangela davo adishe odo va pangelela nge.
ש [Sin], ile [Shin]
61 O! Jehova, owa uda omasheko avo, eemhangela davo adishe odo va pangelela nge,
62 Omilungu dovapataneki vange nokunongofola kwavo ku na sha naame efimbo alishe.
63 Tala kuvo; kutya nee ove li omutumba, ile ova fikama, ohava sheke nge momaimbilo avo!
ת [Taw]
64 O! Jehova, oto ke va shunifila she likolelela koilonga yavo.
65 Oto ka kukutika omitima davo, eshi to va fingi.
66 Oto ke va taataa mehandu loye noku va xulifa po koshi yeulu laJehova.
א [Alef]
4 Nghee oshingoli tashi vema sha kanifa ongushu, oshingoli elela.
Nghee omamanya mayapuki e lihanena pomashakeneno epandavanda keshe.*
ב [Bet]
2 Shi na sha novanamati vaSion, ovo va li ve na ondilo, ovo va li va yelekwa noshingoli elela,*
Ova li va talika ko ngaashi oitoo yedu,
Oilonga yomake omumi.
ג [Gimel]
3 Nokuli nookavandje ohava nyamifa ounimwena vavo,
Ashike omonakadona wovanhu vange okwa ninga omukwanyanya, ngaashi eemho di li mombuwa.
ד [Dalet]
4 Elaka lokaana, oko taka nyamu, ohali kanyatele moshihokohoko shako omolwenota.
Ounona ohava ehela omungome, ndele kape na nande oumwe he va pe.
ה [He]
5 Ovo va li hava li oikulya iwa ova nangala momapandavanda va fya ondjala.*
Ovo va li va etwa va djala oikutu itilyana, ova ukata onduba yomute.
ו [Waw]
6 Ehandukilo* lomonakadona woshiwana shange olinene neenghono li dule ehandukilo lenyono laSodom,
Osho sha li sha hanaunwa po mepakumo leisho, nopehe na eke loku shi kwafela.
ז [Zayin]
7 Ovanasiri vaye ova li va yela shekesheke ve dule olumi,* va toka tootoo ve dule omashini.
Ova li va tilyana pyuupyuu ve dule omamanya eekorali; ova li va fa omamanya osafir a pushwa.*
ח [Het]
8 Eholokepo lavo ola ninga li laula fokofoko li dule edilo;*
Ihava dimbulukiwa momapandavanda.
Oshipa shavo osha naatela komakipa avo; osha ninga ngaashi oshiti shikukutu.
ט [Tet]
9 Ovo va dipawa keongamukonda ove li xwepo ve dulife ovo va fya kondjala,
Ovo tava xulu po, ovovo va tyuulwa keongamukonda omolwokuhe na oikulya momapya.
י [Yod]
10 Omake ovakainhu ovanalukeno okwa fulukifa ovana vavo vene.
Ova ninga oikulya yavo yeefya pefimbo lokuteka po kwomonakadona wovanhu vange.
כ [Kaf]
11 Jehova okwa ulika ehandu laye;
Okwa tilashi ehandu laye la xwama.
Nokwa xwameka omundilo muSion, oo wa xwika po omakanghameno asho.
ל [Lamed]
12 Eehamba dokombada yedu novakalimo aveshe vomedu liwa inave shi itavela
Kutya omupataneki nomutondi ota ka pita moivelo yaJerusalem.
מ [Mem]
13 Osha li sha ningwa omolwomanyono ovaprofeti vaye, omapuko ovapristeri vaye,
Ovo va tilashi ohonde yovayuki mokati kaye.
נ [Nun]
14 Ova kala ovapofi tava elaela momapandavanda.
Ova nyatekwa nohonde,
Opo paha kale nande oumwe ta dulu okukuma oikutu yavo.
ס [Samek]
15 Ova ifana kuvo tava ti: “Djeni mo mondjila! Inamu koshoka! Djeni mo mondjila! Djeni mo mondjila! Inamu tu kuma!”
Osheshi ova ya vehe na apa tava di, notava elaela.
Ovanhu ova popya mokati koiwana tava ti: “Itava dulu okukala apa pamwe nafye.*
פ [Pe]
16 Oshipala shaJehova oshe va halakanifa;
Ite ke va tala vali nohokwe.
Ovanhu itava ka fimaneka ovapristeri, noitava ka fila onghenda ovakulunhu.”
ע [Ayin]
17 Nokuli paife, omesho etu okwa loloka kokutala epwanga omolwekwafo.
Otwa tala, notwa konga ekwafo koshiwana, osho itashi dulu oku tu xupifa.
צ [Tsade]
18 Onghatu keshe twa katuka, ove tu konga, opo tuha dule okweenda momahalandjadja etu.
Exulilo letu ola ehena popepi; omafiku etu okwa pwa ko, osheshi exulilo letu ole uya.
ק [Kof]
19 Ovataatai vetu ove na onhapo ve dule eenhwa domewangadjo.
Ohave tu taataa keemhunda; ove tu ponokela mombuwa.
ר [Res]
20 Omufudo womomayulu etu, omuvaekwa waJehova, okwa kwatelwa melambo lavo la kula,
Oo twa popya shi na sha naye twa ti: “Ohatu ka kala hatu di mokati koiwana momudile waye.”
ש [Sin]
21 Nyakukwa nokuhafa, ove omonakadona waEdom, ngaashi wa kala ho di moshilando shaUs.
Ashike eholo otali ka pita yo nopwoove, noto ka kolwa nokuholola epenge loye.
ת [Taw]
22 Akutu omonakadona waSion, ehandukilo omolwenyono loye ole uya pexulilo.
Ite ke ku twala vali moukwatwa.
Ndele ota ka yandja elitulemo laye kepuko loye, ove omonakadona waEdom.
Ota ka holola omanyono oye.
5 O! Jehova, dimbuluka osho she tu hanga.
Tala nokumona ohoni yetu.
2 Efyuululo letu ola pewa ovaendanandjila, omaumbo etu ovanailongo.
3 Otwa ninga eefiye tuhe na ootate; oomeme vetu ove li ngaashi ovafiyekadi.
4 Otu na okufuta tu nwe omeva etu vene, noikuni yetu vene ohai futilwa.
5 Ovo tave tu taataa ove li peefingo detu;*
Otwa loloka, ndele ihatu fudifwa po.
6 Ohatu yelulile eke letu kuEgipiti nokuAssiria, opo tu mone omungome wokulya wa wana.
7 Ootatekulululwa vetu, ovo va nyona, kave po vali, ashike otu na okuhumbata omanyono avo.
8 Paife, ovapiya otave tu pangele; kape na ou te tu nyeke mo meke lavo.
9 Ohatu likongele omungome wetu, twa tula onghalamwenyo* yetu moshiponga omolweongamukonda lomombuwa.
10 Oshipa shetu osha pupyala sha fa ediko omolwouyehame wondjala.
11 Ovakulukadi vomuSion ova fifwa ohoni,* oukadona elela vomoilando yaJuda.
12 Ovawiliki ova li va endjelelekwa keke lavo, novakulunhu kava li hava fimanekwa.
13 Ovalumenhu ovanyasha ova humbata oshini shokukweya, novamati ova wila koshi yonduba yoiti.
14 Ovakulunhu ova dja po poshivelo shoshilando; ovalumenhu ovanyasha inava dana omusika yavo.
15 Ehafo ola dja mo momitima detu; okudana kwetu okwa shituka oluhodi.
16 Oshikoroni osha wa ko komitwe detu. Woo kufye, molwaashi otwa nyona!
17 Omolwoshinima osho, omitima detu otadi ehama,
Nomolwoinima oyo, omesho etu otaa ende taa twika,
18 Omolwomhunda yaSion, oyo ye likalela; paife ookavandje otava endaenda kuyo.
19 O! Jehova, ove ou li omutumba kolukalwapangelo fiyo alushe.
Olukalwapangelo loye otali kala po okudja kepupi fiyo okepupi.
20 Omolwashike we tu dimbwa fiyo alushe, nowe tu ekelashi oule wefimbo lile?
21 O! Jehova, tu alulila kwoove, nohatu ka alukila kwoove diva nehalo liwa.
Tu pa vali omafiku mawa ngaashi omafiku onale.
22 Ashike owe tu ekelashi filufilu.
Owe tu handukila neenghono.
Etukulwa 1-4 oku li omaimbilo oluhodi e na omutungilo woitevo, omo eendada, odo da hovela eevelise, ile outendo da landulafana paalfabeta yOshiheberi.
Ile “koikandjo, oyo ya tulwa po pamhango.”
Ile “Ovakainhu ovanyasha.”
Eln., “omutwe.”
Apa eenyapi otadi ulike koifitukuti.
Ile “nova nyakukwa.”
Ile “va kaleke po vali omwenyo.”
Enhupeko tali ulike kuJerusalem.
Ile “omwenyo wange.”
Eln., “nokanya.”
Ile “Ovakainhu ovanyasha.”
Ile “va kaleke po vali omwenyo.”
Eln., “Momandjadja.”
Eln., “teta oluvinga keshe.”
Eln., “lyatela pedu.”
Ile “hanauna po.”
Eln., “a pone po.”
Ile “ehongo.”
Eln., “Momandjadja.”
Outumbulilo wopaitevo wokunhupeka, tashi dulika tau holola onghenda, ile oukwao wananghali.
Ile “omwenyo.”
Eln., “oluvinga.”
Eln., “omonakadona weisho.”
Ile “oiimati yavo.”
Ile “Ovakainhu ovanyasha.”
Ile “eta po ve na oukolele.”
Ile “kelela; indika.”
Ile tashi dulika, “a ningifa nge ndi nangale nda leela.”
Eln., “lyatela pedu.”
Eln., “novanamati.”
Ile “omwenyo wange.”
Ile “Omwenyo woye.”
Ile “Omwenyo wange owa ti.”
Ile “komwenyo.”
Ile “okuteelela nelididimiko.”
Ile “omwenyo wange.”
Ile “opo va dipae nge.”
Ile “oibofa yomwenyo wange.”
Eln., “komutwe womapandavanda aeshe.”
Ile “va li ve na ondilo ngaashi oshingoli elela.”
Eln., “ve likalela.”
Eln., “Epuko.”
Ile “o-snow.”
Ile “taa vema.”
Eln., “omulaulu.”
Ile “okukala hava di apa ve li ovanailongo.”
Ile “popepi elela nafye.”
Ile “omwenyo.”
Ile “kwatwa onghonga.”