HAGGAI

1 Momudo omutivali wepangelo lohamba Darius, momwedi omutihamano, mefiku lotete lomwedi, ondjovo yaJehova oya li ye uya kuSerubbabel, omonamati waSalatiel, ngoloneya waJuda, nokuJosua, omonamati waJosadak, omupristeri munene, okupitila momuprofeti Haggai* tai ti:

2 “Jehova womatangakwaita ota ti, ‘Ovanhu ava otava ti, “Efimbo inali fika natango lokutunga* eumbo* laJehova.”’”

3 Ondjovo yaJehova oye uya natango okupitila momuprofeti Haggai, tai ti: 4 “Mbela efimbo ola fika mu kale momaumbo eni a tungikika, ofimbo ongulu ei i li mehalakano? 5 Jehova womatangakwaita ota ti ngaha, ‘Pashukileni* eenghatu deni. 6 Omwa kala tamu kunu eembuto dihapu, ndele omwa teya shinini. Omwa kala tamu li, ndele ihamu kuta. Omwa kala tamu nu, ndele ihamu kumwa. Omwa kala tamu djala oikutu, ndele ihamu di outalala. Naao ta longele ondjabi, okwa fa te i tula mokandjato ke yadi eembululu.’”

7 “Jehova womatangakwaita ota ti ngaha, ‘Pashukileni* eenghatu deni.’

8 “Jehova ota ti, ‘Indeni keemhunda mu ka ete omiti. Tungeni eumbo, opo ndi kale nde li hokwa nondi fimanekwe.’”

9 “‘Omwa li mwa teelela shihapu, ndele omwa mona shinini; naashi mwe shi eta meumbo, onde shi hanauna po. Jehova womatangakwaita ota ti: Omolwetomheno lashike?’ ‘Omolwaashi eumbo lange oli li mehalakano, ofimbo keshe umwe womunye e lipyakidila nokufila oshisho eumbo laye. 10 Onghee eulu inali wilifa omume, nedu inali mu pa oilikolomwa. 11 Onda etifa oshikukuta osho sha kuma edu, eemhunda, oilya, omaviinyu mape, omaadi, oimeno, ovanhu noinamwenyo nosho yo oilonga aishe yomake eni.’”

12 Serubbabel, omonamati waSalatiel, naJosua, omonamati waJosadak, omupristeri munene, nosho yo ovanhu aveshe, ova pwilikina kondaka yaJehova Kalunga kavo nosho yo keendjovo domuprofeti Haggai, molwaashi Jehova Kalunga kavo oye e mu tuma, novanhu ova hovela okukala va tila omolwaJehova.

13 Opo nee Haggai, omutumwa waJehova, okwa lombwela ovanhu etumwalaka e li metwokumwe noshilonga osho a pewa kuJehova, a ti: “Jehova ota ti, ‘Ondi li pamwe nanye.’”

14 Onghee Jehova okwe linyengifa Serubbabel, omonamati waSalatiel, ngoloneya waJuda, naJosua, omonamati waJosadak, omupristeri munene, nosho yo ovanhu aveshe, ndele tave uya nova hovela okutungulula eumbo laJehova womatangakwaita, Kalunga kavo. 15 Osho osha li mefiku eti-24 lomwedi omutihamano, momudo omutivali wepangelo lohamba Darius.

2 Momwedi omutiheyali, mefiku eti-21 lomwedi oo, ondjovo yaJehova oye uya okupitila momuprofeti Haggai, tai ti, 2 “Alikana, pula Serubbabel, omonamati waSalatiel, ngoloneya waJuda, naJosua, omupristeri munene, omonamati waJosadak, novanhu aveshe, to ti: 3 ‘Olyelye mokati keni a mona ewapalo lonale leumbo* eli? Paife otali monika ngahelipi kunye? Mbela itali monika lihe na oshinge moku li yelekanifa naali lonale?’

4 “Jehova ota ti: ‘Serubbabel, kala wa pama. Josua, omupristeri munene, omonamati waJosadak, kala wa pama.’

“Jehova ota ti: ‘Ovanhu aveshe moshilongo, kaleni mwa pama nokulonga.’

“Jehova womatangakwaita ota ti: ‘Ondi li pamwe nanye. 5 Dimbulukeni osho nda li nde mu udanekela, eshi mwa dja muEgipiti, nomhepo yange oya kala mokati keni.* Inamu tila.’”

6 “Eshi osho Jehova womatangakwaita a udaneka, a ti: ‘Natango, ngeenge pa piti okafimbo, ohandi ka kakamifa eulu nedu nosho yo efuta noukukutu wedu.’

7 “Jehova womatangakwaita ota ti: ‘Ohandi ka kakamifa oiwana aishe, noinima i na ondilo* tai di moiwana aishe otai ke uya omu, nohandi ka yadifa eumbo eli noshinge.’

8 “Jehova womatangakwaita ota ti: ‘Oshisilveri oshange, noshingoli oshange.’

9 “Jehova womatangakwaita ota ti: ‘Ewapalo lomonakwiiwa leumbo eli otali ka kala linene li dule lonale.’

“Jehova womatangakwaita ota ti: ‘Monhele ei, ohandi ka eta mo ombili.’”

10 Mefiku eti-24 lomwedi omutimuwoi, modula onhivali yepangelo laDarius, ondjovo yaJehova oye uya komuprofeti Haggai, tai ti: 11 “Eshi osho Jehova womatangakwaita a ti, ‘Alikana, pula ovapristeri kombinga yomhango: 12 “Ngeenge omunhu okwa humbatele ombelela iyapuki moshikutu shaye, ndele oshikutu tashi kumu omungome, ile omunghoka, ile omaviinyu, ile omaadi, ile keshe oshikulya, mbela oinima oyo otai ka ninga iyapuki?”’”

Ovapristeri ova nyamukula va ti: “Ahawe.”

13 Opo nee Haggai okwa pula a ti: “Ngeenge omunhu oo ina koshoka, molwaashi a kwatafana noshimhu, okwa kumu shimwe shomoinima oyo, mbela otai kala ngoo ya koshoka?”

Ovapristeri ova nyamukula va ti: “Otai kala inai koshoka.”

14 Onghee Haggai okwa tya, “Jehova ota ti: ‘Ovanhu ava navo osho ve li ngaho. Naasho osho oshiwana eshi shi li moipafi yange. Noilonga yomake avo aishe osho i li ngaho; keshe osho tava yambe inashi koshoka.’

15 “‘Ashike okudja paife, alikana, lipuleni* momitima deni kutya: Fimbo emanya inali tenhekwa kemanya motembeli yaJehova, 16 onghalo oya li ya tya ngahelipi? Eshi omunhu te uya ponduba yoilya ta diladila kutya ota di po noimbale 20, okwa li ha di po ashike noimbale 10; eshi ta i koshikolelo shomaviinyu ta diladila kutya ota di ko noitoo 50, okwa li ha di ko ashike noitoo 20. 17 Onde mu denga, nda hanauna po oilonga aishe yomake eni nomhepo ipyu nosho yo neemhawe, nonda kukutika oimeno, ashike kape na nande oumwe a alukila kwaame,’ Jehova osho ta ti.

18 “‘Alikana, okudja nena eli, lipuleni* momitima deni, okudja mefiku eti-24 lomwedi omutimuwoi, mefiku olo ekanghameno lotembeli yaJehova la dikwa po; kaleni tamu lipula momitima deni kutya: 19 Mbela omo hamu tuvikilwa* omu na ngoo vali eembuto? Mbela omindjebele, omikwiyu, omiti dogranati nomiti deemono oda imine ngoo? Okudja nena, ohandi ke mu pa omanangeko noupuna.’”

20 Ondjovo yaJehova oye uya oshikando oshitivali kuHaggai, mefiku eti-24 lomwedi oo, tai ti: 21 “Lombwela Serubbabel, ngoloneya waJuda, kutya, ‘Ohandi ka kakamifa eulu nedu. 22 Ohandi ka hanauna po omalukalwapangelo omauhamba, nohandi ka xulifa po eenghonopangelo domauhamba oiwana. Ohandi ka hanauna po omatemba novalondi vao nosho yo eenghambe novalondi vado. Keshe umwe ota hanaunwa po keongamukonda lomumwaxe.’”

23 “Jehova womatangakwaita okwa ti, ‘Mefiku olo, ohandi ke ku kufa, omupiya wange, Serubbabel, omonamati waSalatiel.’ Jehova osho a ti ngaho. Jehova womatangakwaita ota ti, ‘Ohandi ke ku ninga ngaashi olinga yokudenga oihako, molwaashi oove nda hoolola.’”