EMBO LAMATEUS

1 Eli embo li na sha nondjokonona yaJesus Kristus,* omona waDavid, omona waAbraham:

17 Omapupi aeshe, okudja kuAbraham fiyo okuDavid opa pita omapupi 14; okudja kuDavid fiyo opefimbo lokutwalwa kuBabilon omapupi 14; nokudja pokutwalwa kuBabilon fiyo okuKristus omapupi 14.

18 Okudalwa kwaJesus Kristus okwa li ngaha: Eshi Maria, ina yaJesus, a li a valekwa kuJosef, okwa ninga oufimba keenghono domhepo iyapuki, ofimbo va li inava hombola. 19 Ndele molwaashi omushamane* waye Josef okwa li omuyuki noka li a hala oku mu fifa ohoni moipafi, okwa li a diladila oku mu efa po meholeko. 20 Ndele eshi a diladila ngaho, omweengeli waJehova* okwe mu holokela mondjodi, ndele ta ti: “Josef, omona waDavid, ino tila okuhombola po Maria,* molwaashi oufimba oo e na owomhepo iyapuki. 21 Ota ka dala okaana okamati ndele to ke ka luka Jesus,* osheshi Jesus ota ka xupifa ovanhu moulunde wavo.” 22 Aishe oyo oya ningwa opo ku wanifwe osho Jehova a popya okupitila momuprofeti waye, a ti: 23 “Tala, okakadona otaka ka ninga oufimba, ndele taka dala okaana kokamati, ndele tave ka luku Immanuel,” olo tali ti: “Kalunga oku li pamwe nafye.”

24 Ndele eshi Josef a penduka meemhofi okwa ninga ngaashi a lombwelwa komweengeli waJehova, ndele ta hombola Maria.* 25 Ashike ina nangala naye fiyo osheshi a dala okaana kokamati, opo nee Josef okwe ka luka Jesus.

2 Eshi Jesus a dalelwa muBetlehem shomuJudea pefimbo lohamba Herodes,* ovanyanekeli veenyofi va dja koushilo ova li ve uya kuJerusalem, 2 tava ti: “Ohamba yOvajuda ei opo ya dalwa oi li peni? Osheshi otwa mona onyofi yayo eshi twa li koushilo, notwe uya okulinyongamena* ohamba oyo.” 3 Eshi ohamba Herodes ye shi uda, oya haluka unene pamwe novanhu vomuJerusalem aveshe. 4 Opo nee oya ongela ovapristeri ovakulunhu aveshe novanongo vomishangwa, ndele tai va pula kutya Kristus* okwa li ta ka dalelwa peni. 5 Ove i nyamukula tava ti: “OmuBetlehem shomuJudea, ngaashi sha shangwa komuprofeti, oo a ti: 6 ‘Ndele oove Betlehem shomuJuda, oove kamwe komoudoolopa ovo inava tumbala mokati kovapangeli vaJuda, mwoove otamu ka dja omupangeli oo ta ka wilika oshiwana shange shaIsrael.’”

7 Opo nee Herodes okwa ifana meholeko ovanyanekeli veenyofi, ndele te va pula kutya onyofi oya holoka efimbo peni kondadalunde. 8 Eshi e va tuma kuBetlehem, okwe va lombwela ta ti: “Indeni ko hano mu ka konge okaana, ndele ngeenge mwe ka mono, alukilei nge mu lombwele nge opo naame yo ndi ke ke linyongamene.” 9 Konima eshi va lombwelwa kohamba, ove lidenga ondjila, opo nee onyofi inya va monene eshi va li koushilo oye va kwatela komesho fiyo otai kanghama pombada yeumbo omo mwa li okaana. 10 Eshi va mona onyofi ya kanghama, ova li va hafa neenghono. 11 Ndele eshi va ya meumbo, ova mona okaana ke li naina, Maria, ndele tave ka twile eengolo nokulinyongamena kuko. Opo nee ova tuula omilongelo davo ndele tave ka pe eeshali ngaashi oshingoli, oidimba iwa noimbodi ilula.* 12 Ndele molwaashi Kalunga okwa li e va londwela mondjodi vaha shune kuHerodes, ova shuna koshilongo shavo nondjila imwe i lili.

13 Eshi va ya, omweengeli waJehova okwa holokela Josef mondjodi, ta ti: “Fikama, kufa okaana naina ndele tamu i onhapo kuEgipiti, ndele tamu kala oko fiyo handi ku pe elombwelo, osheshi Herodes okwa hala okukonga okaana e ka dipae.” 14 Opo nee Josef okwa penduka oufiku ndele ta kufa okaana naina nokuya kuEgipiti. 15 Okwa kala oko fiyo osheshi Herodes a fya. Kungaho, osho Jehova a popya okupitila momuprofeti waye osha li sha wanifwa po, eshi a ti: “Omona wange onde mu ifana mo muEgipiti.”

16 Eshi Herodes a mona kutya ovanyanekeli veenyofi ove mu kengelela, okwa li a handuka neenghono. Opo nee okwa tuma ovanhu kuBetlehem nomoitukulwalongo yasho aishe va dipae ounona aveshe voumati okudja pomido mbali okuyuka pedu, metwokumwe nefimbo lokondadalunde olo a li a lombwelwa kovanyanekeli veenyofi. 17 Kungaho, osho osha li sha wanifa po osho Kalunga a popya okupitila momuprofeti Jeremia, oo a ti: 18 “Ondaka oya li ya udika muRama, okukwena nokulila kuhapu. Rakel ta lili ovana vaye noka li a hala okuhekelekwa molwaashi kave po vali.”

19 Eshi Herodes a fya, omweengeli waJehova okwa holokela Josef mondjodi muEgipiti, 20 ndele ta ti: “Fikama, kufa okaana naina mu ye kedu laIsrael, molwaashi ovo va li va hala oku ka dipaa* ova fya.” 21 Opo nee okwa fikama, ndele ta kufa okaana naina, nova ya kedu laIsrael. 22 Ndele eshi a uda kutya Arkelaus oye ta pangele Judea ponhele yaxe Herodes, okwa li a tila okuya ko. Ashike molwaashi Kalunga okwa li a popya naye mondjodi, okwa li a ya kuGalilea. 23 Okwa ya a ka kale moshilando shedina Nasaret, opo ku wanifwe eendjovo dovaprofeti ovo va ti: “Ota ka ifanwa Omunasaret.”*

3 Ndele Johannes Omuninginifi okwa holoka, nokwa udifila mombuwa yaJudea, 2 ta ti: “Lidilululeni, osheshi Ouhamba womeulu owa ehena popepi.” 3 Oye tuu ou a popiwa komuprofeti Jesaja, a ti: “Ondaka otai ingida mombuwa, tai ti: ‘Longekidileni Jehova ondjila! Lalakanifeni omalila aye.’” 4 Johannes okwa li ha djala oshikutu sholududi longamelo nekwamo loshipa moshiya shaye. Oikulya yaye oya li oshipaxu nomaadi eenyiki. 5 Ndele ovanhu vomuJerusalem nomuJudea ashishe nosho yo moitukulwa aishe oyo ya dingilila Jordan, ova li ve uya kuye, 6 opo nee okwe va ninginifa momulonga waJordan nova hepaulula moipafi omatimba avo.

7 Eshi Johannes a mona Ovafarisai nOvasadukai tave uya keninginifo, okwa tya kuvo: “Oludalo lomayoka omauta nye, olyelye e mu londwela mu ye onhapo efiku lehandu laKalunga? 8 Onghee hano, imikeni oiimati oyo tai ulike elidilululo. 9 Inamu diladila momitima deni kutya, ‘Fye otu na tate yetu Abraham.’ Osheshi ame ohandi mu lombwele kutya Kalunga ota dulu okushitila Abraham ovana okudja momamanya aa. 10 Ekuva ola tulwa nale pefina lomuti. Omuti keshe oo ihau ima oiimati iwa otau kewa po ndele tau ekelwa momundilo. 11 Ame ohandi mu ninginifa momeva molwaashi omwe lidilulula, ashike ou te uya konima yange oku na eenghono e dule nge, noinandi wana nokuli okudula ko eenghaku daye. Ye ote ke mu ninginifa nomhepo iyapuki nosho yo nomundilo. 12 Oku na oshiyelifo* meke laye, ndele ta kombo nawanawa oshipale shaye, noilya ote ke i tuvikila momaanda, ashike olungu ote ke li xwika po momundilo oo ihau dimi.”

13 Ndele Jesus okwa dja mo muGalilea nokwa ya kuJordan opo a ka ninginifwe kuJohannes. 14 Ashike Johannes okwa li ta anye, ta ti: “Aame ngeno nda wana okuninginifwa kwoove, ndele oove to uya kwaame?” 15 Jesus okwe mu nyamukula ta ti: “Itavela ashike, molwaashi okuninga ngaho ohatu wanifa po ashishe osho sha yuka.” Opo nee Johannes okwa dimina. 16 Konima eshi Jesus a ninginifwa, okwa dja diva koshi yomeva, ndele tala, eulu ola yeuluka, opo nee okwa mona omhepo yaKalunga ya fa onghuti tai kulukile kuye. 17 Ndele meulu omwa dja yo ondaka tai ti: “Ou Omona wange, omuholike, ou nde mu hokwa.”

4 Jesus okwa twalwa mombuwa komhepo iyapuki, ndele ta hongaulwa kOndiaboli. 2 Okwa li a fya ondjala neenghono molwaashi okwa li e lidilika oikulya omafiku 40. 3 Ndele Ondiaboli oye uya kuye ndele tai mu hongaula tai ti: “Ove ngeenge omona waKalunga, lombwela omamanya aa a shituke omingome.” 4 Jesus okwa ti: “Omishangwa oda ti: ‘Omunhu ita kala nomwenyo komungome auke, ndele okondjovo keshe tai di mokanya kaJehova.’”

5 Opo nee Ondiaboli oye mu twala koshilando shiyapuki,* ndele tai mu londeke pombada yekuma lotembeli, 6 ndele tai ti: “Ove ngeenge omona waKalunga, nhukila pedu, molwaashi Omishangwa oda ti: ‘Ote ku tumine ovaengeli vaye, notave ke ku amena uha pume omhadi yoye kemanya.’” 7 Jesus okwa ti: “Natango Omishangwa oda ti: ‘Ino yeleka Jehova Kalunga koye.’”

8 Opo nee Ondiaboli oye mu twala vali komhunda ileile, ndele tai mu ulikile omauhamba aeshe omounyuni newapalo lao. 9 Oya ti kuye: “Oinima aishe ei ohandi i ku pe ngeenge owa twile nge eengolo nokulinyongamena nge.” 10 Jesus okwa tya kuyo: “Dja po Satana! Omishangwa oda ti: ‘Jehova Kalunga koye oye aeke u na okulinyongamena noye aeke u na okulongela oilonga iyapuki.’” 11 Opo nee Ondiaboli oya dja po puye, novaengeli ove uya kuye ndele tave mu kwafele.

12 Eshi Jesus a uda kutya Johannes okwa kwatwa po, okwa ya kuGalilea. 13 Konima eshi a dja muNasaret, okwa ya a ka kale kuKapernaum, osho shi li popepi nefuta moshitukulwa shOvasebulon nOvanaftali, 14 opo ku wanifwe osho sha popiwa komuprofeti Jesaja, oo a ti: 15 “Ovasebulon nOvanaftali ovo ve li popepi nefuta, ovo ve li kouninginino waJordan nosho yo Ovagalilea ovo va dja moiwana imwe; 16 ovanhu ovo ve li momilaulu ova mona ouyelele, naavo ve li moshitukulwa shomudidimbe wefyo, ouyelele owe va minikila.” 17 Okudja opo, Jesus okwa hovela okuudifa ta ti: “Lidilululeni, osheshi Ouhamba womeulu owa ehena popepi.”

18 Ofimbo a li ta ende komunghulo wefuta laGalilea, okwa mona ovamwainafana vavali, Simon, oo ha ifanwa Petrus, nosho yo Andreas, ovo va li ovayuli veeshi, tava umbile onete yavo mefuta. 19 Ndele ta ti kuvo: “Shikulei nge, opo ndi ke mu ninge ovayuli vovanhu.” 20 Ova fiya po diva eenete davo ndele tave mu shikula. 21 Fimbo tava ende, okwa mona vali ovamwainafana vavali, Jakob naJohannes, ve li mowato naxe Sebedeus tava hondjo eenete davo, ndele te va ifana. 22 Ova fiya po diva xe nowato, ndele tave mu shikula.

23 Opo nee okwa enda muGalilea ashishe, ta hongo meeshinagoga davo nokuudifa onghundana iwa yOuhamba nokuvelula omikifi di lili noku lili nosho yo ounghundi keshe. 24 Eshi ovanhu vomuSiria ashishe va uda kombinga yaye, ova eta kuye aveshe ovo va li ve na omikifi nomauyahame e lili noku lili, ovo ve na eendemoni, ovo ve na oshinhona notava vele ombada, nokwe va velula. 25 Opo nee eengudu dovanhu oda li de mu shikula da dja kuGalilea, kuDekapolis,* kuJerusalem, kuJudea nosho yo koushilo waJordan.

5 Eshi Jesus a mona eengudu dovanhu, okwa ya komhunda ndele ta kala omutumba, novahongwa vaye ove uya kuye. 2 Ndele okwa hovela oku va honga, ta ti:

3 “Ovo ve shii kutya ova pumbwa ewiliko laKalunga otava kala va hafa, osheshi Ouhamba womeulu owavo.

4 “Ovo va nyika oluhodi otava kala va hafa, osheshi otava ka hekelekwa.

5 “Ovo ve na omwenyo muwa* otava kala va hafa, osheshi otava ka fyuulula edu.

6 “Ovo va fya ondjala nenota louyuki otava kala va hafa, osheshi otava ka kutifwa.

7 “Ovananghenda otava kala va hafa, osheshi otava ka filwa onghenda.

8 “Ovo ve na omitima da yela otava kala va hafa, osheshi otava ka mona Kalunga.

9 “Ovo hava pange ombili* otava kala va hafa, osheshi otava ka ifanwa ovana vaKalunga.

10 “Ovo tava hepekelwa ouyuki otava kala va hafa, osheshi Ouhamba womeulu owavo.

11 “Nonande ovanhu otave mu sheke, tave mu hepeke noku mu popila mowii aushe omolwange, otamu kala mwa hafa. 12 Hafeni nokunyakukwa, osheshi ondjabi yeni oinene meulu; novaprofeti ve mu tetekela osho ve va hepeka ngaho.

13 “Onye omongwa wedu, ndele ngeenge omongwa owa tutuka, otau dulu ngoo vali okukala u na eenghono? Itau ka kala vali u na oshilonga, ndele otau ekelwashi u ka lyatwe kovanhu.

14 “Onye ouyelele wounyuni. Oshilando sha tungilwa komhunda itashi dulu okuhondama. 15 Ovanhu ngeenge va tema olamba, ihave i tula koshi yoshimbale,* ndele okoshikwatelwalamba, nohai minikile aveshe ovo ve li meumbo. 16 Sha faafana, nanye ouyelele weni nau minikile ovanhu opo va mone oilonga yeni iwa nova hambelele Xo yeni womeulu.

17 “Inamu diladila kutya onde uya okuxulifa po Omhango ile eendjovo dovaprofeti. Inandi uya oku di xulifa po, ndele oku di wanifa. 18 Oshili ohandi mu lombwele kutya nande ngeno eulu nedu oi xule po, mOmhango itamu di nande okandada kamwe ile okanghwanyu kamwe kondada fiyo osheshi aishe ya wanifwa. 19 Keshe tuu ou ta tauluka shimwe shomoipango ei inini, ndele ta hongo vakwao va ninge sha faafana ina wana okuya mOuhamba womeulu. Ashike keshe ou te i wanifa po, ndele te i hongo vakwao okwa wana okuya mOuhamba womeulu. 20 Onghee ohandi mu lombwele, ouyuki weni ngeenge kau dule wovanongo vomishangwa nowOvafarisai, itamu ka ya mo mOuhamba womeulu.

21 “Omwa uda osho ooxokulululwa va lombwelwa kwa tiwa: ‘Ino dipaa, osheshi keshe tuu ou ta dipaa ota ka twalwa komhangu.’ 22 Ndele ohandi mu lombwele kutya keshe ou ta kala a handukila omumwaxe ota ka twalwa komhangu, naau ta ula omumwaxe eendjovo dii ota twalwa kOmhangu yoPombada, nakeshe tuu ou ta ti, ‘Elai ove,’ ota ka ya muGehenna.*

23 “Ngeenge to twala oshali yoye koaltari, ndele oko wa dimbulukila kutya ope na sha pokati keni nomumwaxo, 24 fiya ko oshali yoye koaltari ndele to i mu ka paafane tete ombili nomumwaxo, opo nee to aluka u uye u yandje oshali yoye.

25 “Paafaneni diva ombili nomutamaneki woye fimbo mu li naye mondjila, opo ehe ku yandje momake omupanguli, nomupanguli ehe ku twale komupiya womomhangu, ndele to tulwa modolongo. 26 Oshili ohandi ku lombwele, ito ka dja mo nandenande fiyo osheshi wa futa oimaliwa aishe oyo u na.*

27 “Omwa uda kwa tiwa: ‘Ino nyona ohombo.’ 28 Ndele ame ohandi mu lombwele kutya keshe ou ha tale omukainhu nokahalu, oye okwe mu haela nale momutima waye. 29 Hano ngeenge eisho loye lokolulyo otali ku hongaula, li kolola mo ndele to li ekeleshi. Osheshi oshixwepo okukanifa oshilyo shoye shimwe sholutu shi dulife olutu loye alishe tali ekelwa muGehenna.* 30 Natango, ngeenge eke loye lokolulyo otali ku hongaula, li teta ko ndele to li ekeleshi. Osheshi oshixwepo okukanifa oshilyo shoye shimwe sholutu shi dulife olutu loye alishe tali ekelwa muGehenna.*

31 “Shimwe vali, okwa tiwa: ‘Keshe ou ta teya ohombo nomukulukadi waye, ne mu pe ombapila yeteyohombo.’ 32 Ndele ame ohandi mu lombwele kutya keshe ou ta teya ohombo nomukulukadi waye omolwoshinima shimwe shihe fi oluhaelo,* ote mu twalifa moluhaelo, naau ta hombola omukainhu a tya ngaho, ota haele.

33 “Natango omwa uda ooxokulululwa va lombwelwa kutya: ‘Ino ana oipupulu, ndele wanifa po osho wa udanekela Jehova.’ 34 Ndele ame ohandi mu lombwele: Inamu ana nandenande, kutya nee okeulu, osheshi olo olukalwa laKalunga, 35 ile kedu, osheshi olo oshilyatelo sheemhadi daye, ile kuJerusalem, osheshi osho oshilando shOhamba inene. 36 Ino ana komutwe woye, osheshi ito dulu okulundulula nande oxwiki imwe i ninge itoka ile ilaula. 37 Eendjovo deni ‘Heeno,’ nadi kale heeno, nosho yo ‘Ahowe,’ nai kale ahowe; edi da wedwa po oda dja momunawii.

38 “Omwa uda eshi kwa tiwa: ‘Eisho omeisho neyoo omeyoo.’ 39 Ndele ohandi mu lombwele: Ngeenge ope na ou te ku shindi, ino mu lwifa, naau te ku denge kolupanda lokolulyo mu pa yo likwao. 40 Ngeenge ope na ou a hala oku ku twala komhangu e ku kufe oshikutu shoye shokoshi, mu pa yo oshikutu shoye shokombada; 41 ndele ngeenge umwe ote ku kondjifa u mu findikile oshinano shokilometa imwe, mu findikila oshinano sheekilometa mbali. 42 Yandja kwaau te ku ehela, ndele ino anyena ou a hala okulya oshikolo* kwoove.

43 “Omwa uda eshi kwa tiwa: ‘Hola mukweni, ndele tonda omutondi woye.’ 44 Ndele ohandi mu lombwele kutya: Kaleni mu hole ovatondi veni nokwiilikanena ovo have mu hepeke, 45 opo mu ulike shili kutya nye ovana vaXo yeni womeulu, osheshi etango laye ohe li pitifile ovo hava longo owii naavo hava longo ouwa, nodula yaye ohe i lokifile ovayuki naavo vehe fi ovayuki. 46 Ngeenge omu hole ashike ovo ve mu hole, omwa teelela oku ka mona ondjabi yashike? Mbela novafendelifi ihava ningi yo sha faafana? 47 Ndele ngeenge ohamu popifa ashike ovamwaxo, mbela omu shii otamu ningi oshinima shiwa mu dule vamwe? Ovanhu vomoiwana mbela navo hasho hava ningi ngaho? 48 Kaleni hano mwa wanenena, ngaashi Xo yeni womeulu a wanenena.

6 “Kaleni mwa lungama opo muha kale tamu limonikifa kovanhu kutya omuvayuki, osheshi ngeenge omwa ningi ngaho, Xo yeni womeulu ite ke mu pa ondjabi. 2 Onghee hano, ngeenge to yandje oikwafa,* ino shika enghuma tete ngaashi ovanaihelele hava ningi moinagoga nomomapandavanda opo va fimanekwe kovanhu. Oshili ohandi mu lombwele, vo ova mona nale ondjabi yavo aishe. 3 Ndele ove ngeenge to yandje oikwafa, ino efa eke loye lokolumosho li shiive osho eke lokolulyo tali ningi, 4 opo oikwafa yoye i kale meholeko, naXo, ou ha mono meholeko, ote ke ku pa ondjabi.

5 “Natango, ngeenge tamu ilikana, inamu ninga ngaashi ovanaihelele, osheshi ove hole okwiilikana ve li ofika meeshinagoga nopomashakeneno eendjila opo va monike kovanhu. Oshili ohandi mu lombwele, vo ova mona nale ondjabi yavo aishe. 6 Ngeenge to ilikana, inda monduda yoye ndele to idile omuvelo, opo nee to ilikana kuXo womeulu. Kungaho, Xo ou ha mono meholeko ote ke ku pa ondjabi. 7 Ndele ngeenge to ilikana, ino endulula oinima ya faafana ngaashi ovanhu vomoiwana imwe hava ningi, osheshi ohava diladila kutya otava ka udika ngeenge ova ilikana omailikano malemale. 8 Onghee hano, inamu va fa, osheshi Xo yeni oku shii osho mwa pumbwa ofimbo nokuli inamu mu indila.

9 “Hano omu na okwiilikana ngaha:

“‘Tate yetu ou u li meulu, edina loye nali yapulwe.* 10 Ouhamba woye nau uye. Ehalo loye nali wanifwe yo kombada yedu ngaashi meulu. 11 Tu pa nena omungome wefiku keshe; 12 tu dimina po omatimba etu ngaashi nafye hatu dimine po ovo va nyona kufye. 13 Ino efa tu ye momayeleko,* ndele tu xupifa komunawii.’

14 “Ngeenge ohamu dimine po ovanhu omanyono avo, Xo yeni womeulu naye ote ke mu dimina po yo, 15 ndele ngeenge ihamu dimine po ovanhu omanyono avo, Xo yeni naye ite ke mu dimina po.

16 “Ngeenge tamu lidilike oikulya, inamu kala mu na oipala ya nyemata ngaashi ovanaihelele, shaashi ohava lulike oipala yavo* opo va monike kovanhu kutya ove lidilika. Oshili ohandi mu lombwele, ova mona ondjabi yavo aishe. 17 Ndele ove ngeenge to lidilike oikulya, likosha moshipala nokulivaeka omaadi momutwe, 18 opo uha monike kovanhu kutya owe lidilika, ndele okuXo ashike ou ha mono meholeko. Opo nee Xo ou ha mono meholeko ote ke ku pa ondjabi.

19 “Ino liongelela omamona kombada yedu, oko eenhwishi nolushu hali nyonauna, naako eembudi hadi teya nokuvaka. 20 Ponhele yaasho, liongelela omamona meulu, omo muhe na eenhwishi nolushu olo hali nyonauna, nomuhe na eembudi odo hadi teya nokuvaka. 21 Osheshi oko ku na emona loye oko yo ku na omutima woye.

22 “Eisho olo ouyelele wolutu. Ngeenge eisho loye ola tala koshinima shimwe ashike,* olutu loye alishe otali ka kala mouyelele. 23 Ndele ngeenge eisho loye otali tale koinima ii,* olutu loye alishe otali ka kala momilaulu. Ngeenge osho shi li mwoove kashi fi ouyelele ndele omilaulu, ito ka kala tuu momilaulu fokofoko!

24 “Kape na ou ta dulu okulongela oovene vavali, osheshi ota tondo umwe ndele ta kala e hole mukwao, ile ta kanyatele kuumwe ndele ta dini mukwao. Itamu dulu okulongela Kalunga pamwe nemona.

25 “Onghee hano, ohandi mu lombwele: Inamu kala mu noshisho shi na sha nokukalamwenyo kweni,* kutya otamu li shike, ile otamu nu shike, ile kutya otamu djala shike. Mbela omwenyo inau fimana u dule oikulya, nolutu inali fimana li dule oikutu? 26 Taleni nokukonenena eedila dokeulu; ihadi kunu, ihadi teya noihadi tuvikile momaanda, ndele Xo yeni womeulu ohe di palula. Mbela inamu fimana unene mu di dule? 27 Olyelye womunye ta dulu okuweda ko nande okanini* koule wokukalamwenyo kwaye mokukala e na oshisho? 28 Natango, omolwashike mu na oshisho shoikutu? Lihongeni keengala domoixwa nghee hadi kulu; ihadi hodile noihadi hondjo, 29 ndele ohandi mu lombwele, nokuli naSalomo moshinge shaye ashishe ka djalele ngaashi imwe yomudo. 30 Ngeenge Kalunga oha dike oimeno yomoixwa oyo i li po ashike nena ndele mongula oya ekelwa mediko, mbela ite ke mu dika, nye ovo mu na eitavelo linini? 31 Onghee hano, inamu kala mu na oshisho, mu tye, ‘Ohatu li shike?’ ile, ‘Ohatu nu shike?’ ile, ‘Ohatu djala shike?’ 32 Osheshi ovanhu vomoiwana imwe i lili ohava lalakanene oinima aishe oyo. Ndele Xo yeni womeulu oku shii kutya omwa pumbwa oinima aishe oyo.

33 “Hano kaleni tamu kongo tete Ouhamba nouyuki waye, noinima aishe ikwao otamu ke i wedelwa ko. 34 Onghee, inamu kala noshisho shefiku lomongula, osheshi nalo otali ka kala noisho yalo. Efiku keshe oli na oudjuu walo.

7 “Inamu tokola vakweni, opo muha tokolwe; 2 etokolo olo tamu va tokolifa olo tamu ka tokolifwa, noshiyelekifo osho tamu shi yelekifa osho tamu ka yelekifwa. 3 Omolwashike u wete okambodi ke li meisho lomumwaxo, ndele ku wete endangalati olo li li meisho loye? 4 Ile oto dulu ngahelipi okulombwela omumwaxo kutya, ‘Handi uya ndi kufe mo okambodi meisho loye,’ ofimbo ove u na endangalati meisho loye? 5 Omunaihelele ove! Kufa mo tete endangalati olo li li meisho loye, opo u mone nawa nghee to dulu okukufa mo okambodi meisho lomumwaxo.

6 “Osho shiyapuki inamu shi yandja keembwa, noilanda yeni inamu i yandja koingulu, opo ihe i lyate nomakondo ayo, ndele tai mu pilukile po noku mu monifa oshiponga.

7 “Kaleni hamu indile, opo nee otamu pewa; kaleni hamu kongo, opo nee otamu mono; kaleni hamu konghola, opo nee otamu yeululwa. 8 Osheshi keshe ou ta indile ota pewa, nakeshe ou ta kongo ota mono, naau ta konghola, ota yeululwa. 9 Ndele olyelye womunye ngeenge omona te mu indile omungome, te ke mu pa emanya? 10 Ile ngeenge ote mu indile oshi, mbela ote ke mu pa eyoka? 11 Hano ngeenge nye ovalunde, ndele omu shii okupa ovana veni oinima iwa, Xo yeni womeulu ita ka yandja tuu oinima iwa kwaavo tave mu indile!

12 “Ndele keshe osho mwa hala ovanhu ve mu ningile, osho mu va ningila yo. Osheshi eshi osho lela Omhango nOvaprofeti tava ti.

13 “Piteni moshivelo sha finana, osheshi oshivelo shinene nondjila ya mbwalangadja otai twala mehanauno, naava tava ende mo ovahapu; 14 ofimbo oshivelo shinini nondjila ya finana otai twala komwenyo waalushe, naava tave i mono ovanini.

15 “Lungameni ovaprofeti ovanaipupulu ovo have uya kunye ve li moikafa yeedi, ndele meni lavo omambungu haa lyana. 16 Otamu va koneke koiimati yavo. Mbela ovanhu ohava likola omandjebele ile eenghwiyu komano? 17 Sha faafana, omuti keshe muwa ohau ima oiimati iwa, ndele omuti keshe mwii ohau ima oiimati ii. 18 Omuti muwa itau dulu okwiima oiimati ii, nomuti mwii itau dulu okwiima oiimati iwa. 19 Omuti keshe oo ihau ima oiimati iwa otau kewa po ndele tau ekelwa momundilo. 20 Onghee hano, ovaprofeti ovo otamu va koneke koiimati yavo.

21 “Hakeshe umwe ou ta ti kwaame, ‘Omwene, Omwene,’ ta ka ya mOuhamba womeulu, ndele ou ha longo ehalo laTate womeulu oye ashike ta ka ya mo. 22 Mefiku olo vahapu otava ka tya kwaame: ‘Omwene, Omwene, hafye twa li hatu xunganeke medina loye, twa taataa mo eendemoni medina loye notwa longa oikumwifilonga ihapu medina loye?’ 23 Ndele ohandi ke va lombwela kutya: ‘Kandi mu shii nandenande! Djei po pwaame, ovalongi vowii nye!’

24 “Keshe hano ou ta udu eendjovo edi dange ndele te di wanifa, ota ka kala ngaashi omulumenhu omunaendunge oo a tungila eumbo laye kemanya. 25 Ndele odula oya loka neenghono, nefundja ole uya, nomhepo inene oya pepa noye lidenga meumbo olo, ndele inali teka po molwaashi ola tungilwa kemanya. 26 Kakele kaasho, keshe ou ta udu eendjovo dange ndele ite di wanifa, ota ka kala ngaashi omulumenhu ehe neendunge oo a tungila eumbo laye pehenge. 27 Ndele odula oya loka neenghono, nefundja ole uya, nomhepo inene oya pepa noye lidenga meumbo olo, ndele tai li teya po noku li hanauna po filufilu.”

28 Eshi Jesus a mana okupopya eendjovo odo, eengudu dovanhu oda li da kuminwa ehongo laye, 29 osheshi okwa li e va honga ngaashi ou e na eenghonopangelo, ndele hangaashi ovanongo vomishangwa.

8 Konima eshi Jesus a londoloka komhunda, ongudu yovanhu oya li ye mu shikula. 2 Ndele tala, kuye okwe uya omunashilundu nokwe linyongamena puye,* ta ti: “Omwene, ngeenge owa hala, oto dulu okuvelula nge.” 3 Okwa yelula eke laye, nokwe mu kuma, ndele ta ti: “Onda hala! Veluka.” Opo nee okwa veluka diva koudu waye woshilundu. 4 Ndele Jesus okwa tya kuye: “Tala, ino lombwela nande oumwe, ashike inda u ke liulike komupristeri nokuyandja omayambo ngaashi sha popiwa mOmhango yaMoses, shi ninge oumbangi kuvo.”

5 Eshi Jesus a fika muKapernaum, kuye okwe u ya omukulunhu wetangakwaita, te mu indile, 6 ta ti: “Omufimanekwa, ondi na omupiya wange a nangala keumbo ta vele ombada, ndele ota vele neenghono.” 7 Okwa tya kuye: “Ohandi uya paife ndi mu velule.” 8 Omukulunhu wetangakwaita okwa nyamukula ta ti: “Omufimanekwa, ame inandi wana oku ku tambula meumbo lange; popya ashike ondjovo ndele omupiya wange ta veluka. 9 Ame naame omupangelwa, nondi na yo ovakwaita handi va wilike; ngeenge nda ti kuumwe, ‘Inda!’ ota i, nongeenge onda ti kumukwao, ‘Ila!’ ote uya, ile ngeenge onda ti komupiya wange, ‘Ninga shonhumba!’ ote shi ningi.” 10 Ndele Jesus eshi e shi uda, okwa li a kumwa, ndele ta ti kwaavo ve mu shikula: “Ohandi mu lombwele oshili, muIsrael inandi mona mo nande oumwe e na eitavelo la kola la tya ngaho. 11 Ndele ohandi mu lombwele kutya vahapu otava ka dja koushilo nokouninginino, ndele tava ka kala omutumba poshitaafula naAbraham, Isak naJakob mOuhamba womeulu; 12 ofimbo ovana vOuhamba tava ka umbilwa pondje momilaulu, omo tava ka kala tava lilaana nokulikwesha komayoo.” 13 Opo nee Jesus okwa tya komukulunhu wetangakwaita: “Inda keumbo loye. Molwaashi owa ulika eitavelo, osho wa popya osho tashi ningwa.” Nomupiya okwa veluka pefimbo opo tuu opo.

14 Ndele eshi Jesus e uya keumbo laPetrus, okwa hanga inamweno yaPetrus a nangala e kwetiwe koshidu. 15 Okwa kwata eke laye, ndele ta veluka, opo nee omukainhu oo okwa fikama, nokwa hovela oku mu yakula. 16 Ndele konguloshi, kuye okwa etwa ovanhu vahapu ve na eendemoni; ndele eemhepo odo okwe di ta mo nondjovo, nokwa velula aveshe ovo va li tava vele, 17 opo ku wanifwe osho sha popiwa okupitila momuprofeti Jesaja, oo a ti: “Okwa kufa po omauyahame etu nokwa humbata omikifi detu.”

18 Eshi Jesus a mona ongudu yovanhu ye mu dingilila, okwa lombwela ovahongwa vaye opo va ye pamwe naye kombinga ikwao yefuta. 19 Ndele umwe womovanongo vomishangwa okwe uya kuye, ndele ta ti: “Omuhongi, ohandi ke ku shikula keshe apa to i.” 20 Jesus okwa tya kuye: “Ookavandje ove na omikwena, needila dokeulu odi na oihadi, ndele Omona womunhu ke na apa ta tenheke omutwe waye.” 21 Ndele omuhongwa umwe okwa tya kuye: “Omwene, pitike nge manga ndi ye ndi ka pake tate.” 22 Jesus okwa tya kuye: “Twikila okushikula nge, efa ovafi va pake ovafi vavo.”

23 Opo nee Jesus okwa londa mowato ndele ta i pamwe novahongwa vaye. 24 Ndele tala, oshikungulu shinene osha tukuluka mefuta, nowato oya li pokutuvikwa komakufikufi; ashike Jesus okwa li a kofa. 25 Opo nee ove uya nove mu pendula, tava ti: “Omwene, tu xupifa, otu li pokufya!” 26 Ndele okwa tya kuvo: “Omolwashike mwa tila?* Kamu na tuu eitavelo linini!” Opo nee okwa fikama nokwa hanyena omhepo nefuta, ndele oya lota filufilu. 27 Ovahongwa ova li va kumwa, ndele tava ti: “Ou omunhu a tya ngahelipi eshi omhepo nefuta tai dulika kuye?”

28 Eshi e uya kombinga imwe moshitukulwa shOvagadara, okwa shakenekwa kovalumenhu vavali va dja momaendo ve na eendemoni. Ova li ve na eenghono nova tilifa, onghee kapa li oo ta dulu okweenda pondjila oyo. 29 Ndele tala, ova ingida tava ti: “Oto kongo shike apa Omona waKalunga? Owe uya oku tu hepeka, omanga efimbo olo la ufwa inali fika?” 30 Opa li oufita woingulu ihapu, i li kokule navo, tai li. 31 Ndele eendemoni ode mu indila tadi ti: “Ngeenge oto tu te mo, tu tumina moufita woingulu.” 32 Okwa tya kudo: “Djei mo!” Opo nee oda dja mo noda ya moingulu, ndele tala, oufita aushe owa lotokela komunghulo womhunda, ndele tau wile mefuta. 33 Opo nee ovafita ova ya onhapo, eshi va fika moshilando, ova hepaulula aishe, mwa kwatelwa ehokololo li na sha novalumenhu ovo va li ve na eendemoni. 34 Ndele tala, ovanhu aveshe vomoshilando ova ka shakeneka Jesus, naashi ve mu mona, ove mu lombwela a dje mo moshitukulwa shavo.

9 Okudja opo Jesus okwa londa mowato, ta taulula efuta, nokwa ya koshilando shavo. 2 Ndele tala, ovanhu ova eta kuye oshingudu sha nangala kolutala.* Eshi Jesus a mona kutya ove na eitavelo, okwa lombwela oshingudu ta ti: “Ino tila omumwange! Omatimba oye okwa dimwa po.” 3 Okudja opo ovanongo vomishangwa vamwe ove lipopila tava ti: “Omulumenhu ou ota sheke.” 4 Molwaashi Jesus okwa li e shii osho tava diladila, okwa ti: “Omolwashike tamu diladila oinima ii momitima deni? 5 Shilipi po shipu; okutya, ‘Omatimba oye okwa dimwa po,’ ile okutya, ‘Fikama ndele to ende’? 6 Ndele opo mu shiive kutya Omona womunhu oku na eenghono dokudima po omatimba kombada yedu . . . ” okwa tya koshingudu: “Fikama, kufa olutala loye, ndele to i keumbo leni.” 7 Opo nee okwa fikama, ndele ta i keumbo lavo. 8 Eshi eengudu dovanhu de shi mona, oda li da tila unene, ndele tadi hambelele Kalunga, oo ha yandje eenghono da tya ngaho kovanhu.

9 Konima eshi Jesus a dja po opo a li, okwa mona omulumenhu wedina Mateus, e li omutumba pombelewa yomafutilo oifendela, ndele ta ti kuye: “Ninga omushikuli wange.” Mateus okwa fikama diva ndele te mu shikula. 10 Lwanima, fimbo Jesus novahongwa vaye va li tava li* meumbo laMateus, tala, ovafendelifi novalunde vahapu ova li ve uya mo, ndele tava li* pamwe navo. 11 Ndele Ovafarisai eshi ve shi mona, ova tya kovahongwa vaye: “Omolwashike omuhongi weni ta li pamwe novafendelifi nosho yo ovalunde?” 12 Eshi e va uda, okwa ti: “Ovanhu ovo ve na oukolele inava pumbwa omuhakuli, ndele ovovo ashike tava vele. 13 Indeni mu ke lihonge kutya eshi osha hala okutya shike: ‘Onda hala efilonghenda ndele hayambo.’ Osheshi ame inandi endela ovayuki, ndele ovalunde.”

14 Opo nee ovahongwa vaJohannes ove uya kuye ndele tave mu pula tava ti: “Omolwashike fye nOvafarisai hatu lidilike oikulya ndele ovahongwa voye ihave lidilike?” 15 Jesus okwa tya kuvo: “Ookaume komuhomboli mbela ova pumbwa ngoo okunyika oluhodi fimbo omuhomboli e li navo? Ndele omafiku otae uya eshi omuhomboli te ke va kufwa, opo nee otave ke lidilika. 16 Kape na omunhu ta vandeke oshikutu shikulu noshivando shipe, osheshi oshivando shipe otashi pombola oshikutu, nombululu otai ningi inene. 17 Natango, ovanhu ihava tula omaviinyu mape momakutu makulu. Ngeenge ova ningi ngaho, omakutu otaa pomboka ndele omaviinyu taa tika mo, nomakutu otaa nyonauka. Ndele ovanhu ohava tula omaviinyu mape momakutu mape, naaishe otai amenwa.”

18 Fimbo a li te va lombwele oinima oyo, tala, omupangeli umwe okwe uya kuye nokwe mu linyongamena,* ndele ta ti: “Osho omumwangekadona okwa fya, ashike ila u ke mu tenheke eke loye opo a kale nomwenyo.”

19 Opo nee Jesus okwa fikama, novahongwa vaye ove mu shikula. 20 Ndele tala, omukainhu umwe a kala ta vele etiko lohonde oule womido 12 okwa ya konima yaye, ndele ta kwata keenyemba doshikutu shaye shokombada, 21 osheshi okwa kala te lipopile ta ti: “Ngeenge onda kwata ashike koshikutu shaye shokombada, ohandi veluka.” 22 Jesus okwa piluka nokwe mu mona, ndele ta ti: “Ino tila omumwangekadona! Eitavelo loye ole ku velula.” Nomukainhu okwa veluka pefimbo opo tuu opo.

23 Okudja opo eshi Jesus e uya meumbo lomupangeli, okwa hanga ovanhu tava imbi omaimbilo eefya* nongudu yovanhu tai lilaana mokule, 24 ndele ta ti: “Djei mo monhele ei, osheshi okakadona inaka fya, ndele oka kofa.” Opo nee ova hovela oku mu yola ve mu yemba. 25 Diva eshi ongudu yovanhu ya ya pondje, okwa ya monhele omo mwa li okakadona ndele ta kwata eke lako, nokakadona oka penduka. 26 Nehokololo olo ola tandavela moshitukulwa ashishe.

27 Eshi Jesus a dja po opo, ovalumenhu vavali ovapofi ove mu shikula, tava ingida tava ti: “Omona waDavid, tu fila onghenda.” 28 Konima eshi Jesus a ya meumbo limwe, ovalumenhu ovo ovapofi ova ya kuye, ndele te va pula: “Omu na ngoo eitavelo kutya ohandi dulu oku mu twikulula?” Ove mu nyamukula: “Heeno, Omwene.” 29 Opo nee okwa kuma omesho avo, ndele ta ti: “Shi ningilweni paitavelo leni.” 30 Nomesho avo okwa pashuka. Ndele Jesus okwe va kunghilila, ta ti: “Taleni, inamu shi lombwela nande omunhu.” 31 Ndele eshi va ya pondje, ova hepaulula kombinga yaye moshitukulwa osho ashishe.

32 Fimbo ovalumenhu ovo tava i, tala, ovanhu ova eta kuye omulumenhu omufitandaka e na ondemoni; 33 ndele eshi ondemoni ya tewa mo, okwa hovela okupopya. Ongudu yovanhu oya li ya kumwa, ndele tai ti: “Oshinima sha tya ngaha inashi monika mo nale muIsrael.” 34 Ndele Ovafarisai ova ti: “Eendemoni ote di te mo kekwafo lomupangeli weendemoni.”

35 Jesus okwa li ta talele po oilando nomikunda adishe, ta hongo meeshinagoga davo, ta udifa onghundana iwa yOuhamba nokuvelula omikifi nomaunghundi aeshe. 36 Eshi a mona eengudu dovanhu, okwe di kenukila molwaashi oda li da hepekwa noda ekelwashi da fa eedi dihe na omufita. 37 Opo nee okwa tya kovahongwa vaye: “Oilonga yokuteya oihapu, ndele ovateyi ovanini. 38 Onghee hano, indileni Mwene weteyo a tume ovateyi keteyo laye.”

10 Okudja opo okwa ifana ovahongwa vaye 12 ndele te va pe eenghono dokufinda eemhepo da nyata, opo va dule oku di ta mo nokuvelula omikifi di lili noku lili noungone keshe.

2 Omadina ovayapostoli ovo 12 oo aa: Simon, oo ha ifanwa Petrus, nomumwaina Andreas; Jakob omona waSebedeus, nomumwaina Johannes; 3 Filippus naBartolomeus; Tomas naMateus omufendelifi; Jakob omona waAlfeus; Tadeus; 4 Simon Omukanaan;* naJudas Iskariot, oo lwanima a ka kengelela Jesus.

5 Eshi Jesus a tuma ovayapostoli 12, okwe va pa omalombwelo aa: “Inamu ya kovanhu vomoiwana imwe, noinamu ya nande omoshilando shimwe shomuSamaria. 6 Ndele ponhele yaasho, indeni ashike mu ka konge eedi odo da kana domeumbo laIsrael. 7 Eshi tamu i, udifeni tamu ti: ‘Ouhamba womeulu owa ehena popepi.’ 8 Veluleni ovanaudu, nyumuneni ovafi, yelifeni ovanashilundu, tei mo eendemoni. Omwa pewa oshali, yandjeni yo oshali. 9 Inamu ya noimaliwa yoshingoli, yoshisilveri ile yongopolo, 10 ile nondjato yoikulya yomolweendo, ile noikutu ivali,* ile neenghaku ile nodibo, molwaashi omulongi okwa wana okupewa oikulya.

11 “Moshilando ile momukunda keshe tamu i mo, kongeni oo e na ehalo loku mu tambula, ndele tamu kala meumbo laye fiyo osheshi mwa dja mo moshitukulwa osho. 12 Ngeenge tamu i meumbo, popifeni ovaneumbo. 13 Ndele ngeenge ovaneumbo ove mu tambula, ombili yeni nai kale navo, ashike ngeenge inave mu tambula, shuneni nombili yeni. 14 Ngeenge kape na oo e mu tambula ile a pwilikina keendjovo deni, djei mo meumbo olo ile moshilando osho, nokupupula ondwi keemhadi deni. 15 Oshili ohandi mu lombwele, ehandukilo loshilando osho mEfiku lEtokolo otali ka kala linene li dulife laSodom naGomorra.

16 “Taleni, ohandi mu tumu ngaashi eedi mokati komambungu; kaleni hano mwa lungama ngaashi omayoka nomuhe na oshipo ngaashi eenghuti. 17 Lungameni ovanhu, molwaashi otave ke mu twala keemhangu ndele tave mu dengele meeshinagoga davo. 18 Otamu ka twalwa yo komesho yovapangeli noyeehamba omolwange, opo shi ninge oumbangi kuvo nokoiwana. 19 Onghee hano, ngeenge ove mu twala kovapangeli, inamu kala mu noshisho kutya otamu ka popya ngahelipi ile mu tye shike, molwaashi osho tamu ka popya otamu ke shi pewa pefimbo opo; 20 osheshi hanye ashike vene tamu ka popya, ndele omhepo yaXo yeni oyo tai ka popya munye. 21 Natango, omumwaxe ota ka yandja omumwaxe a dipawe, naxe omona waye, nounona otava ka kala ve li omhinge novadali vavo, ndele tave va dipaifa. 22 Ndele otamu ka tondwa kovanhu aveshe omolwedina lange, ashike ou te lididimike fiyo okexulilo ota ka xupifwa. 23 Ngeenge tave mu hepeke moshilando shimwe, indeni onhapo kushikwao; osheshi ohandi mu lombwele oshili kutya itamu mane okuudifila moilando aishe yaIsrael fiyo Omona womunhu ote uya.

24 “Omuhongwa ke dule omuhongi waye, nomupiya ke dule omwene waye. 25 Omuhongwa oku na okukala ngaashi omuhongi waye, nomupiya ongaashi omwene waye. Ngeenge ovanhu ova ifana mwene weumbo Belsebul,* osha yela kutya novaneumbo laye osho tave va ifana. 26 Onghee hano, inamu va tila, osheshi kaku na osho sha tuvikilwa itashi ka tuvikululwa, nokaku na oshiholekwa itashi ka shiivika. 27 Osho handi mu lombwele momilaulu, shi popyeni mouyelele, naasho tamu udu tashi nongofolwa, shi udifeni moipafi yaaveshe. 28 Ndele inamu tila ovo tava dipaa olutu, osheshi itava dulu oku mu imba oku ka kala nomwenyo monakwiiwa; mepingafano naasho, tileni ou ta dulu oku mu hanauna po muGehenna.* 29 Mbela oiyandja ivali ihai landwa nokapeni kamwe* kongushu inini? Ashike kape na nande oshimwe shomuyo tashi wile pedu Xo yeni ine shi didilika. 30 Ndele nokuli neexwiki adishe dokomitwe deni oku shii omuvalu wado. 31 Hano inamu tila; nye omwa fimana unene mu dule oiyandja ihapu.

32 “Ndele keshe ou ta hepaulula nge moipafi yovanhu, naame ohandi ke mu hepaulula yo moipafi yaTate oo e li meulu. 33 Ashike ou te lidimbike nge moipafi yovanhu, naame ohandi ke mu lidimbika yo moipafi yaTate oo e li meulu. 34 Inamu diladila kutya onde uya okweeta ombili kombada yedu; inandi uya okweeta ombili, ndele eongamukonda. 35 Osheshi onde uya okweeta etukauko; omulumenhu ota pataneke xe, omonakadona ota pataneke ina, noshitenya shomukainhu otashi pataneke inamweno. 36 Ndele novaneumbo vomunhu mwene otave ke mu tonda. 37 Keshe ou e hole unene xe ile ina komesho yange, ina wapalela nge; nakeshe ou e hole unene omonamati ile omonakadona komesho yange, ina wapalela nge. 38 Nakeshe ou ita kufa omuti waye womahepeko,* ndele ta shikula nge, ina wapalela nge. 39 Keshe ou ta kendabala okuxupifa omwenyo waye ote u kanifa, ndele keshe ou ta kanifa omwenyo waye omolwange ote ke u mona.

40 “Keshe ou te mu tambula, aame yo a tambula, nakeshe ou a tambula nge, okwa tambula yo Ou a tuma nge. 41 Ndele keshe ou ta tambula omuprofeti molwaashi e li omuprofeti, ota ka pewa ondjabi yomuprofeti, nakeshe ou ta tambula omuyuki molwaashi e li omuyuki, ota ka pewa ondjabi yomuyuki. 42 Keshe ou ta pe umwe womwaava vanini nande eholo ashike lomeva okunwa, molwaashi e li omuhongwa, oshili ohandi mu lombwele, ita kala ina pewa ondjabi yaye.”

11 Eshi Jesus a mana okuyandja omalombwelo kovahongwa vaye 12, okwa ya moilando yopoushiinda opo a ka honge nokuudifila ovanhu.

2 Ofimbo Johannes a li modolongo, okwa uda oilonga yaKristus, ndele ta tumu ovahongwa vaye 3 ve ke mu pule kutya: “Oove tuu ou u na okuuya, ile otu na okuteelela umwe e lili?” 4 Jesus okwe va nyamukula ta ti: “Indeni mu ka lombwele Johannes osho mwa uda naasho mwa mona: 5 Ovapofi paife ove wete ko, oingudu otai ende, ovanashilundu otava velulwa, ovafitamatwi ove udite ko, ovafi otava nyumunwa neehepele otadi udifilwa onghundana iwa. 6 Ou ita limbililwa nge* ota kala a hafa.”

7 Fimbo tava i, Jesus okwa hovela okupopya neengudu dovanhu kombinga yaJohannes ta ti: “Omwa ka talele shike mombuwa? Mbela olumbungu tali telaanifwa komhepo? 8 Oshike naanaa mwa ka talele? Mbela omulumenhu a djala oikutu yondilo?* Ovo hava djala oikutu yondilo ohava kala momaumbo eehamba. 9 Omolwashike hano mwa ile mombuwa? Kamwa li mwa ka tala hamba omuprofeti? Ashike ohandi mu lombwele, ye oku dule kokule omuprofeti. 10 Oye a popiwa eshi kwa shangwa taku ti: ‘Tala, ame ohandi tumu omutumwa wange e ku tetekele,* oo te ke ku longekidila ondjila!’ 11 Oshili ohandi mu lombwele, mwaava va dalwa kovakainhu kamu na nande oumwe e dule Johannes Omuninginifi, ashike omunhu ou munini mOuhamba womeulu oku mu dule. 12 Okudja pefimbo laJohannes Omuninginifi fiyo opaife, ovanhu otava kendabala okuya mOuhamba womeulu, naavo tava kendabala noudiinini otava i mo. 13 Omhango nOvaprofeti aveshe ova xunganeka fiyo opefimbo laJohannes; 14 kutya nee omwa hala oku shi itavela ile hasho, Johannes oye ‘Elia oo a popiwa kovaprofeti kutya ote uya.’ 15 Ou e na omatwi, na ude ko.

16 “Epupi eli ohandi li yelekanifa nashike? Ola fa ounona ve li omutumba pomalandifilo tava ingida vakwao, 17 tava ti: ‘Otwe mu shikila eenyalilo, ndele inamu dana; otwa imba omaimbilo eenghali, ashike inamu lila.’* 18 Sha faafana, Johannes okwe uyile ita li noita nu, ndele ovanhu ova ti, ‘Oku na ondemoni.’ 19 Omona womunhu okwe uya ta li nota nu, ndele ovanhu ova ti, ‘Tala, omulumenhu ou omufukenhu nongholwe,* kaume kovafendelifi nokovalunde.’ Ashike ounongo ohau hololwa koilonga* yao ya yuka.”

20 Opo nee okwa hovela okuyandja oushima koilando omo a longa oikumwifilonga ihapu, molwaashi inai lidilulula. 21 Okwa ti: “Woo ovanhu vomuKorasin! Woo ovanhu vomuBetsaida! Molwaashi ngeno ovanhu vomoilando yaTirus naSidon ova monene oikumwifilonga oyo, ngeno ove lidilulula nale ndele tava djala eeshako nokulivaeka omute. 22 Ndele ohandi mu lombwele, mEfiku lEtokolo, ehandukilo leni otali ka kala linene li dulife laTirus naSidon. 23 Ove Kapernaum, mbela oto ka tumbalekwa u ye meulu? Oto ka kulukila mOmbila,* molwaashi oikumwifilonga oyo ya longwa mwoove ngeno oya longelwe muSodom, ngeno oko e li fiyo okefiku eli. 24 Ndele ohandi ku lombwele, mEfiku lEtokolo, ehandukilo loye otali ka kala linene li dulife laSodom.”

25 Opo nee Jesus okwa popya pefimbo olo a ti: “Tate, Omwene weulu nedu, ohandi ku tange moipafi yaaveshe, molwaashi oinima ei owe i holeka ovanaendunge novahongwanhu, ndele owe i hololela ounona vanini. 26 Heeno Tate, molwaashi eshi oshe ku wapalela. 27 Oinima aishe Tate okwe i pa nge, ndele kape na nande ou e shii Omona filufilu kakele kuTate; kape na yo ou e shii filufilu Tate, kakele kOmona nakeshe oo Omona a hala oku mu hololela Xe. 28 Ileni kwaame amushe ava hamu longo nomwa lolokifwa, opo ndi mu tulumukife. 29 Humbateni ondjoko yange nokulihonga kwaame, osheshi ame ondi na omwenyo muwa, nomomutima onde lininipika, opo nee otamu ke limonena etulumuko. 30 Osheshi ondjoko yange oiwa,* nomutengi wange omupu.”

12 Pomhito imwe Jesus novahongwa vaye ova li tava tavakana momapya mefiku lEshabata. Ovahongwa vaye ova li va fya ondjala nova hovela okupweya oilya, ndele tava li. 2 Ovafarisai eshi ve shi mona, ova tya kuye: “Tala, ovahongwa voye otava ningi osho inashi pitikwa pamhango okuningwa mefiku lEshabata.” 3 Okwa tya kuvo: “Hamba inamu lesha osho David a li a ninga eshi ye novalumenhu ovo a li navo va li va fya ondjala? 4 Mbela ina ya meumbo laKalunga ndele tava li omingome detaliko, odo ye naavo a li navo va li inava pitikwa pamhango oku di lya, ndele oda li ashike da pitikilwa ovapristeri? 5 Ile inamu lesha mOmhango kutya mOmashabata ovapristeri ova li hava longo motembeli,* ndele kava li hava kala ve na etimba? 6 Ndele ohandi mu lombwele, ou e li apa okwa fimanenena e dule otembeli. 7 Kakele kaasho, ngeenge omu udite ko eityo lomushangwa ou tau ti, ‘Onda hala efilonghenda, ndele hayambo,’ itamu dulu okutokola ovo vehe na etimba. 8 Osheshi Omona womunhu oye Omwene wEshabata.”

9 Konima eshi a dja po ponhele oyo, okwa ya moshinagoga shavo, 10 ndele tala, omwa li omulumenhu e na eke la fya. Onghee Ovafarisai ova pula Jesus opo ngeno ve mu tokole, tava ti: “Oshi li ngoo pamhango okuvelula mEshabata?” 11 Okwa tya kuvo: “Ngeenge umwe mokati keni oku na odi imwe aike ndele tai wile melambo mefiku lEshabata, mbela ita i ndele te ke i kufa mo? 12 Omunhu ina fimanenena tuu e dule odi! Onghee hano, osha pitikwa pamhango okulonga osho shiwa mEshabata.” 13 Ndele okwa tya komulumenhu oo: “Yukililifa eke loye.” Opo nee omulumenhu okwa yukililifa eke laye, nola veluka ndele tali kala ngaashi likwao. 14 Ndele Ovafarisai ova ya pondje nova pangela omhangela va dipae Jesus. 15 Eshi Jesus e shi didilika mo, okwa fiya po onhele oyo. Ovanhu vahapu ove mu shikula yo ndele te va velula aveshe, 16 ashike okwe va kunghilila vaha lombwele vamwe kombinga yaye, 17 opo ku wanifwe osho sha popiwa okupitila momuprofeti Jesaja, oo a ti:

18 “Omupiya wange ou nda hoolola, omuholike wange, onde* mu hokwa. Ohandi tula omhepo yange kombada yaye, nota ka shiivifila oiwana osho sha yuka. 19 Ita ka tanguna ile a ingide mokule, nokape na oo ta ka uda ondaka yaye momapandavanda. 20 Olumbungu la tenda ite li nyanyaula, nolamba i li pokudima ite i dimi, fiyo osheshi a wanifa ouyuki. 21 Onghee hano, oiwana otai ke lineekela edina laye.”

22 Ndele ova eta kuye omulumenhu e na ondemoni, oo a li omupofi nomufitandaka, ndele okwe mu velula, opo nee omulumenhu oo omufitandaka okwa dula okupopya nokumona ko. 23 Eengudu adishe dovanhu oda li da kumwa, ndele tadi ti: “Pamwe ou oye Omona waDavid?” 24 Eshi Ovafarisai ve shi uda, ova ti: “Omulumenhu ou eendemoni ote di te mo naBelsebul,* omupangeli weendemoni.” 25 Eshi Jesus a shiiva omadiladilo avo, okwa ti: “Ouhamba keshe tau lipilukile po otau teka po, noshilando ile eumbo keshe tali lipilukile po itali kala po. 26 Sha faafana, ngeenge Satana ota te mo Satana, okwe lipilukila po; hano ongahelipi ouhamba waye tau dulu okukala po? 27 Kakele kaasho, ngeenge eendemoni ohandi di te mo naBelsebul, ovana veni otave di te mo nalyelye? Onghee otave ke mu tokola. 28 Ndele ngeenge eendemoni ohandi di te mo nomhepo yaKalunga, osha hala okutya Ouhamba waKalunga owe uya ndele inamu shi didilika. 29 Ile ongahelipi umwe ta dulu okupumina meumbo lomulumenhu omunaenghono ndele ta kufa mo oinima yaye? Tete oku na okumanga omulumenhu oo, opo nee ta dulu okukufa mo oinima meumbo laye. 30 Keshe oo ina ama kombinga yange, oku li omhinge naame, naau ita ongele ovanhu pamwe naame, ota halakanifa.

31 “Onghee ohandi mu lombwele, omunhu ota diminwa po enyono nesheko keshe, ndele ou ta sheke omhepo iyapuki ita diminwa po. 32 Pashihopaenenwa, keshe ou ta popile mowii Omona womunhu, ota diminwa po; ndele ou ta popile mowii omhepo iyapuki, ita diminwa po, kutya nee omounyuni ou* ile omwaao tau uya.

33 “Ngeenge omuti owe u file oshisho, otau ka ima oiimati iwa, nongeenge ino u fila oshisho, otau ka ima oiimati ii, osheshi omuti ohau limonikila koiimati yao. 34 Oludalo lomayoka omauta nye, ongahelipi tamu dulu okupopya oinima iwa ngeenge nye ovakolokoshi? Osheshi osho shi yadi momutima okanya osho taka popi. 35 Omunhu muwa oha pitifa mo oinima iwa memona laye liwa, ofimbo omunhu omukolokoshi ha pitifa mo oinima ii memona laye lii. 36 Ohandi mu lombwele kutya ovanhu va tya ngaho otave ke lihokolola mEfiku lEtokolo omolwoinima ii oyo va popya; 37 osheshi eendjovo doye odo tadi ka ufa kutya Kalunga ote ke ku tala ko omuyuki ile ote ke ku handukila.”

38 Opo nee ovanongo vomishangwa nOvafarisai ova tya kuye: “Omuhongi, otwa hala okumona edidiliko la dja kwoove.” 39 Okwe va nyamukula a ti: “Epupi likolokoshi nohali nyono ohombo* otali kongo edidiliko, ndele itali pewa edidiliko lasha, kakele kedidiliko lomuprofeti Jona. 40 Osheshi ngaashi ashike Jona a li medimo loshi inene omafiku atatu,* Omona womunhu naye ota ka kala koshi yedu omafiku atatu. 41 Ovaninive otava ka nyumunwa pamwe nepupi eli mEfiku lEtokolo, ndele tave li tokola, molwaashi ova li ve lidilulula keudifo laJona. Ndele tala, ou e li apa okwa fimanenena e dule Jona. 42 Ohambakainhu yokolukadi otai ka nyumuka pamwe nepupi eli mEfiku lEtokolo, ndele tai li tokola molwaashi oya dile kokule opo i ka pwilikine ounongo waSalomo. Ndele tala, ou e li apa okwa fimanenena e dule Salomo.

43 “Ngeenge omhepo ya nyata ya dja momunhu, ohai tavakana mombuwa tai kongo onhele yetulumuko, ndele itai i mono. 44 Opo nee tai ti, ‘Ohandi shuna keumbo lange oku nda dile,’ ndele eshi ya aluka, oya hanga eumbo lihe na sha, ashike ola kombwa nawa nola fewekwa. 45 Opo nee ohai i ndele tai ka tala eemhepo dikwao heyali da yoolokafana nodikolokoshi neenghono di i dule; shimha da i momunhu oo, ihadi di mo vali; nonghalo yaye yaxuuninwa ohai kala ii neenghono i dule yotete. Osho osho tashi ka ningilwa yo epupi eli likolokoshi.”

46 Fimbo a li ta popi neengudu dovanhu, ina novamwainamati ova li pondje, va hala okupopya naye. 47 Onghee umwe okwa tya kuye: “Tala, nyoko novamwanyoko ove li pondje va hala okupopya naave.” 48 Okwa nyamukula ou e shi mu lombwela, ta ti: “Meme olyelye, novamwamememati ovo oolyelye?” 49 Opo nee okwa ulika kovahongwa vaye, ndele ta ti: “Meme novamwamememati ovava. 50 Osheshi keshe tuu ou ta longo ehalo laTate womeulu, oye omumwamememati, omumwamemekadona nameme.”

13 Ndele mefiku olo Jesus okwa dja mo meumbo olo, ndele ta ka kala omutumba pefuta. 2 Opo nee eengudu dinene dovanhu oda ongala puye, ndele ta londo nokukala omutumba mowato, nongudu aishe oya li ofika komunghulofuta. 3 Ndele okwe va lombwela oinima ihapu ta longifa omafaneko, ta ti: “Taleni, omukuni okwa ya a ka kune. 4 Eshi a li ta kunu, eembuto dimwe oda wila mondjila, noudila ove uya, ndele tave di li po. 5 Dimwe oda wila momamanya, ndele tadi mene diva molwaashi kapa li edu lihapu. 6 Eshi etango la pita, oda lemba, noda kukuta molwaashi kada li di na omidi da ya moule. 7 Dimwe oda wila meeshosholo, neeshosholo eshi da kula ode di fininika. 8 Dikwao vali oda wila medu liwa, ndele tadi hovele okudala, dimwe 100, dimwe 60, nadikwao 30. 9 Ou e na omatwi, na ude ko.”

10 Opo nee ovahongwa ove uya, ndele tava ti kuye: “Omolwashike to popi navo to longifa omafaneko?” 11 Okwa nyamukula a ti: “Nye omwa pitikilwa okushiiva oiholekwa iyapuki yOuhamba womeulu, ndele vo inave shi pitikilwa. 12 Osheshi keshe ou e na, ota ka pewa shihapu, ndele ta ka kala e na sha wana; ashike ou ehe na sha, ota ka kufwa nokuli naashi e shi kwete. 13 Onghee ohandi popi navo handi longifa omafaneko; molwaashi ohava tale, ndele ihava mono ko, nohava pwilikine, ndele kave udite ko eityo laasho tashi popiwa. 14 Kungaho, exunganeko laJesaja ole va wanifilwa, olo la ti: ‘Otamu ka uda, ndele itamu ka uda ko nandenande eityo laasho tashi popiwa, notamu ka tala, ndele itamu ka mona ko. 15 Osheshi ovanhu ava ove na omitima dikukutu, nomatwi avo ove a fitika,* nomesho avo ove a fifikinifa opo vaha mone ko nomesho avo novaha ude ko nomatwi avo, opo vaha koneke nomitima davo, ndele tave lidilulula opo ndi va velule.’

16 “Ndele nye otamu kala mwa hafa molwaashi omesho eni oku wete ko, nomatwi eni oku udite ko. 17 Oshili ohandi mu lombwele, ovaprofeti novayuki vahapu ova li va halelela okumona oinima oyo hamu mono, ndele inave i mona, nokuuda oinima oyo hamu udu, ashike inave i uda.

18 “Paife pwilikineni keyelifo lefaneko lomukuni. 19 Odo da kunwa mondjila, oye ou ta udu etumwalaka* lOuhamba, ndele ke li udite ko, osho sha kunwa momutima waye omunawii okwe uya, ndele te shi kufa mo. 20 Ndele odo da kunwa momamanya, oye ou ta udu etumwalaka olo, ndele te li tambula ko nehafo. 21 Molwaashi ke na omidi, ota twikile ashike oule wokafimbo, ndele shimha pa holoka oudjuu ile ehepeko omolwetumwalaka olo, ota sholola. 22 Ndele odo da wila meeshosholo, oye ou ta udu etumwalaka olo, ashike oshisho shounyuni ou* neheka loupuna otali fininike etumwalaka, ndele itali imike sha muye. 23 Odo da kunwa medu liwa, oye ou ta udu etumwalaka, ndele ta udu ko eityo lalo; ou oye lela ta imike nokulikola oiimati, umwe 100, umwe 60 namukwao 30.”

24 Okwe va pa vali efaneko limwe, a ti: “Ouhamba womeulu otau dulu okufaafanifwa nomulumenhu oo a kuna ombuto iwa mepya laye. 25 Fimbo ovanhu va kofa, omutondi waye okwe uya nokwa kuna eu mokati koilya, ndele ta i. 26 Opo nee oilya eshi ya mena, ndele tai dala, eu nalo ola holoka. 27 Ndele ovapiya vamwene weumbo ove uya, ndele tava ti kuye, ‘Omwene, hamba ino kuna ombuto iwa mepya loye? Hano osha enda ngahelipi opo mu kale eu?’ 28 Opo nee okwa tya kuvo, ‘Omutondi oye e shi ninga.’ Ovapiya ova tya kuye, ‘Owa hala tu ye tu ke li dude mo?’ 29 Okwa ti, ‘Ahowe, onda tila kutya pamwe otamu duda mo oilya pamwe neu. 30 Efeni aishe i kulile mumwe fiyo efimbo leteyo, nopefimbo leteyo, ohandi ka lombwela ovateyi: Ongeleni tete eu, ndele tamu li mange moipandi opo li xwikwe po; ndele tamu tuvikile oilya momaanda ange.’”

31 Okwe va pa vali efaneko limwe, a ti: “Ouhamba womeulu owa fa ombuto yoshinapi oyo omulumenhu a kufa, ndele te i kunu mepya laye. 32 Nonande oinininini keembuto adishe, ngeenge ya kulu, ohai ningi oshimeno sha kula osho hashi ka ninga omuti, opo nee eedila dokeulu ohadi uya nokutungila oihadi moitai yao.”

33 Okwe va lombwela vali efaneko likwao: “Ouhamba womeulu owa fa efulika olo omukainhu a kufa, ndele te li lumbakanifa mumwe noufila tau yada oiyelekifo itatu ya kula* fiyo osheshi olumbololo alishe la fula.”

34 Jesus okwa lombwela eengudu dovanhu oinima aishe oyo ta longifa omafaneko. Okwa kala alushe ha popi navo ta longifa omafaneko, 35 opo ku wanifwe osho sha popiwa okupitila momuprofeti oo a ti: “Ohandi popi handi longifa omafaneko; ohandi shiivifa oinima oyo ya kala ya holekwa okudja nale.”*

36 Konima eshi a lekela eengudu dovanhu, okwa ya meumbo. Ovahongwa vaye ove uya kuye, ndele tava ti: “Tu fatululila efaneko li na sha neu.” 37 Okwa nyamukula a ti: “Omukuni oo a kuna ombuto iwa oye Omona womunhu; 38 epya olo ounyuni. Ombuto iwa, oyo ovana vOuhamba, ndele eu olo ovana vomunawii, 39 nomutondi oo e li kuna oye Ondiaboli. Eteyo otali ulike komafiku axuuninwa ounyuni ou,* novateyi ovaengeli. 40 Onghee hano, ngaashi ashike eu la ongelwa, ndele tali xwikwa po momundilo, osho tashi ka kala yo pomafiku axuuninwa ounyuni ou.* 41 Omona womunhu ota ka tuma ovaengeli vaye, notava ka kufa mo mOuhamba waye ovanhu aveshe ovo hava nyonifa* vakwao naavo hava longo oukolokoshi, 42 notave ke va ekela mediko lomundilo. Omo tava ka kala tava lilaana nokulikwesha komayoo. 43 Pefimbo olo ovayuki otava ka vilima ngaashi etango mOuhamba waXe. Ou e na omatwi, na ude ko.

44 “Ouhamba womeulu owa fa emona la holekwa mepya, olo omulumenhu e li mona, ndele te li holeke; ndele molwaashi okwa tunhukwa, okwa ya nokwa landifa po oinima aishe oyo a li e na, ndele ta lande po epya olo.

45 “Natango Ouhamba womeulu owa fa omushingifi omweendi ta kongo okawe kondilo. 46 Eshi a mona ko okawe kamwe kondilo, okwa ya, ndele ta landifa po diva oinima aishe oyo a li e na, ndele te ka lande po.

47 “Ouhamba womeulu owa fa vali onete yokukwata eeshi ya umbilwa mefuta, ndele tai ongele eeshi domaludi aeshe. 48 Eshi ya yada, ove i nanena komunghulofuta, ndele tava kala omutumba, opo nee odo diwa ove di tula moikwatelwa, ashike odo dii ove di ekelashi. 49 Osho osho tashi ka ningwa pomafiku axuuninwa ounyuni ou.* Ovaengeli otava ka ya, ndele tava ka yoolola mo ovakolokoshi mokati kovayuki 50 noku va ekela mediko lomundilo. Omo tava ka kala tava lilaana nokulikwesha komayoo.

51 “Omwa uda ko tuu eityo loinima aishe oyo?” Ova tya kuye: “Heeno.” 52 Opo nee okwa tya kuvo: “Molwaashi omwa uda ko eityo, omuhongi keshe oo ha hongo moipafi kombinga yOuhamba womeulu okwa fa mwene weumbo, oo ta holola melimba laye emona lipe naali likulu.”

53 Eshi Jesus a mana okupopya omafaneko oo, okwa dja po ponhele oyo. 54 Eshi e uya moshitukulwa shavo, okwa hovela oku va honga moshinagoga shavo, ndele molwaashi ova li va kumwa, ova ti: “Omulumenhu ou openi a hanga ounongo oo neenghono dokulonga oikumwifilonga oyo? 55 Ou hano ke fi omona womuhongi womiti? Ina ke fi hano Maria, novamwainamati kave fi ooJakob, Josef, Simon naJudas? 56 Novamwainakadona aveshe kave li pamwe nafye? Openi hano a hanga oinima aishe oyo?” 57 Onghee kava li ve mu itavela. Ndele Jesus okwa tya kuvo: “Omuprofeti oha fimanekwa keshe pamwe, kakele moshitukulwa shavo nosho yo meumbo lavo.” 58 Ndele omolwokuheneitavelo kwavo, ina longa mo oikumwifilonga ihapu.

14 Pefimbo opo Herodes, omupangeli woshitukulwalongo* shaGalilea, okwa uda onghundana i na sha naJesus, 2 ndele ta lombwele ovapiya vaye ta ti: “Oo oJohannes Omuninginifi. Okwa nyumuka koufi, nomolwaasho ta dulu okulonga oikumwifilonga ya tya ngaho.” 3 Herodes* okwa li a kwatifa po Johannes noku mu tulifa modolongo omolwaHerodias, omukulukadi wamumwaina, Filippus. 4 Johannes okwa li ha lombwele Herodes ta ti: “Ohamba, kashi li pamhango u hombole omukainhu oo.” 5 Ndele nonande okwa li a hala okudipaa Johannes, okwa li a tila ongudu yovanhu, molwaashi ova li va tala ko Johannes e li omuprofeti. 6 Fimbo kwa li taku danwa edalo laHerodes, okamonakadona kaHerodias oka li ka dana oshidano ndele taka hafifa unene Herodes. 7 Opo nee okwa udaneka nokwaana kutya ote ke ka pa keshe osho taka pula. 8 Ndele oka popya osho ka lombwelwa kuina, ka ti: “Pe nge omutwe waJohannes Omuninginifi moshiyaxa.” 9 Ashike nonande ohamba oya li ya nyika oluhodi omolweano olo ya ninga moipafi yovaenda vayo, oya yandja elombwelo ke u pewe. 10 Opo nee oya tuma omukwaita a ka tete ko omutwe waJohannes modolongo. 11 Omutwe waye owa li wa etwa u li moshiyaxa, ndele tau pewa okakadona, opo nee oke u twaalela ina. 12 Konima yaasho, ovahongwa vaye ova ya ndele tava kufa po oshimhu shaye, noku shi paka. Opo nee ova ya ndele tave shi lombwele Jesus. 13 Eshi Jesus e shi uda, okwa londa mowato nokwa ya konhele ye likalela opo a ka kale oye aeke. Ndele eshi eengudu dovanhu de shi uda, ode mu shikula kolupadi da dja moilando i lili noku lili.

14 Eshi e uya komunghulofuta, okwa mona ongudu inene yovanhu, ndele okwa li e va uditile olukeno nokwa velula ovanaudu vavo. 15 Ndele eshi taku toko, ovahongwa vaye ove uya kuye ndele tava ti: “Onhele ei oye likalela, nokwa toka; lekela eengudu dovanhu, opo di ye momikunda di ke lilandele oikulya.” 16 Opo nee Jesus okwa tya kuvo: “Inava pumbwa okuya; va peni oikulya.” 17 Ova tya kuye: “Katu na po sha apa, kakele komingome nhano neeshi mbali.” 18 Okwa ti: “Di eteni kwaame.” 19 Okwa lombwela eengudu dovanhu di kale omutumba pomwiidi. Opo nee okwa kufa omingome odo nhano neeshi mbali, ta tale keulu, ndele ta ilikana, nokonima eshi e di pambula, okwe di pa ovahongwa, novahongwa ove di yandja keengudu dovanhu. 20 Ndele aveshe ova lya nova kuta, opo nee ova toola po oundjaumukile vomingome, va yadeka oimbale 12. 21 Ovo va lya ova li ovalumenhu 5 000 lwaapo nosho yo ovakainhu nounona. 22 Ndele okwa lombwela diva ovahongwa vaye va londe mowato opo ve mu tetekele kombinga ikwao yefuta, ofimbo ye ta lekele eengudu dovanhu.

23 Konima eshi a lekela eengudu dovanhu, okwa ya komhunda oye aeke a ka ilikane. Ndele okwa kala ko oye aeke fiyo osheshi kwa toka. 24 Ashike owato oya li kokule unene nomutunda, noya li tai monifwa oixuna komakufikufi omolwomhepo oyo ya li tai va dilile komesho. 25 Opo nee okwe uya kuvo ongula youfiku,* ta ende kombada yomeva. 26 Eshi ovahongwa ve mu mona ta ende kombada yomeva, ova li va tila unene, ndele tava ti: “Oshike osho tashi di oko?”* Ova ingida mokule omolwoumbada. 27 Opo nee Jesus okwe va lombwela, a ti: “Ngungumaneni, aame; inamu tila.” 28 Petrus okwe mu nyamukula ta ti: “Omwene, ngeenge oove, lombwele nge ndi uye kwoove handi ende kombada yomeva.” 29 Jesus okwa ti: “Ila!” Opo nee Petrus okwa dja mo mowato, ndele ta ende kombada yomeva a finda kuye. 30 Ndele eshi a tala koshikungulu shomhepo, okwa kwatwa koumbada. Naashi a hovela okuningina, okwa ingida ta ti: “Omwene, xupife nge!” 31 Jesus okwa nana diva eke laye, te mu kwata, ndele ta ti kuye: “Omunaitavelo linini ove, omolwashike wa limbililwa?” 32 Konima eshi va ya mowato, oshikungulu shomhepo osha lota. 33 Opo nee ovahongwa ovo va li mowato ove linyongamena kuye,* tava ti: “Ove Omona waKalunga shili.” 34 Ova taulula efuta ndele tava ka fika kuGenesaret.

35 Eshi ovanhu vomoshitukulwa osho ve mu dimbuluka, ova tuma etumwalaka moshitukulwa ashishe, novanhu ova li ve mu etela ovanaudu vavo aveshe. 36 Opo nee ove mu indila va kwate ashike nande okeenyemba doshikutu shaye shokombada, naaveshe ovo va kwata ko, ova li va veluka filufilu.

15 Opo nee kuJerusalem okwa dja Ovafarisai novanongo vomishangwa vamwe, ndele tave uya kuJesus, tava ti: 2 “Omolwashike ovahongwa voye hava tauluka eenghulunghedi dovakulu vonale? Pashihopaenenwa, ngeenge tava li ihave likosho keenyala.”*

3 Okwe va nyamukula ta ti: “Omolwashike hamu tauluka oipango yaKalunga omolweenghulunghedi deni? 4 Pashihopaenenwa, Kalunga okwa ti, ‘Fimaneka xo nanyoko,’ nosho yo kutya, ‘Keshe ou ta tuku* xe ile ina na dipawe.’ 5 Ndele nye otamu ti, ‘Ou ta ti kuxe ile kuina: “Ashishe osho ndi na, handi dulu ngeno oku ku yambidida nasho, oshi li oshali ya yapulilwa Kalunga,” 6 ita pumbwa okufimaneka xe nandenande.’ Onghee hano, omwa hekula eendjovo daKalunga omolweenghulunghedi deni. 7 Ovanaihelele nye, Jesaja okwa xunganeka sha yuka shi na sha nanye eshi a ti: 8 ‘Ovanhu ava ohava fimaneke nge nomilungu davo, ndele omitima davo odi li kokule naame. 9 Ohava longele nge oshimha, molwaashi omahongo avo okwa kanghamena koipango yovanhu.’” 10 Diva konima yaasho, okwa lombwela ongudu yovanhu i ehene popepi, ndele ta ti kuyo: “Pwilikineni nokuuda ko eendjovo edi: 11 Osho hashi i mokanya komunhu hasho hashi mu nyateke, ndele oha nyatekwa kwaasho hashi di mokanya kaye.”

12 Opo nee ovahongwa vaye ove uya kuye, ndele tava ti: “Owa didilika ngoo kutya Ovafarisai ova uda nai kwaasho wa popya?” 13 Okwe va nyamukula a ti: “Omuti keshe oo inau twikwa kuTate womeulu otau ka dudwa mo. 14 Va efeni, ovo ovakwatiketi ovapofi. Ngeenge omupofi oku kwete omupofi mukwao komhango, aveshe otava ka wila melambo.” 15 Petrus okwa ti: “Tu fatululila efaneko olo wa popya metetekelo.” 16 Opo nee Jesus okwa ti: “Tashi ti mboli nanye kamu udite ko natango? 17 Hamba kamu shi shii kutya keshe osho hashi i mokanya ohashi i medimo ndele tashi piti mo vali? 18 Ndele keshe osho hashi di mokanya ohashi di komutima, naasho osho hashi nyateke omunhu. 19 Pashihopaenenwa, momutima omo hamu di omadiladilo mai, omadipao, omanyonohombo, oluhaelo,* oulunga, omalundilafano nomasheko. 20 Oinima oyo oyo hai nyateke omunhu, ndele okulya neenyala inadi koshwa* ihaku nyateke omunhu.”

21 Eshi Jesus a dja opo, okwa ya koshitukulwa shaTirus naSidon. 22 Ndele tala, omukainhu Omufoinikia womoshitukulwa osho okwe uya, ndele ta ingida ta ti: “Omwene, Omona waDavid, file nge onghenda! Omonakadona wange ota monifwa oixuna neenghono kondemoni.” 23 Ndele Jesus ine mu nyamukula sha. Onghee ovahongwa vaye ove uya ndele tave mu indile, tava ti: “Mu lombwela a ye, shaashi ota ingida ashike e tu shikula.” 24 Jesus okwa nyamukula, a ti: “Inandi tumwa ndi ye kovanhu vamwe, kakele keedi odo da kana domeumbo laIsrael.” 25 Ndele omukainhu okwe uya nokulinyongamena* puye, ta ti: “Omwene, kwafele nge!” 26 Okwa nyamukula, a ti: “Inashi yuka okukufa omungome wounona ndele to u ekele koumbwena.” 27 Omukainhu okwa ti: “Ou li mondjila Omwene, ashike oumbwena ohava li oundjaumukile ovo hava u koshitaafula shoovene vavo.” 28 Opo nee Jesus okwe mu nyamukula ta ti: “Eitavelo loye olinene; ningilwa ngaashi wa hala.” Nopefimbo opo tuu opo, okamonakadona kaye oka veluka.

29 Eshi Jesus a dja oko, okwe uya popepi nEfuta laGalilea, nokonima okwa londa komhunda, ndele ta kala ko omutumba. 30 Opo nee eengudu dinene dovanhu ode uya kuye, de mu etela oingudu, oilema, ovapofi, ovafitandaka navakwao vahapu, node va tula peemhadi daye, ndele te va velula. 31 Onghee hano, ongudu yovanhu oya li ya kumwa, ndele tai hambelele Kalunga kaIsrael, eshi ya mona ovafitandaka tava popi, oingudu ya velulwa, oilema tai ende novapofi ve wete ko.

32 Jesus okwa ifana ovahongwa vaye, ndele ta ti: “Ondi uditile olukeno ongudu ei yovanhu, molwaashi ova kala pwaame omafiku atatu, nokave na sha vali oikulya. Inandi hala oku va lekela va fya ondjala opo vaha pundile mondjila.” 33 Ndele ovahongwa ova tya kuye: “Openi hatu ka hanga omingome da wana okukutifa ongudu yovanhu i fike apa monhele ei ye likalela?” 34 Jesus okwa tya kuvo: “Omu na po omingome ngapi?” Ova ti: “Heyali neeshi dinini.” 35 Konima eshi a lombwela ongudu yovanhu i kale omutumba pedu, 36 okwa kufa omingome heyali neeshi, nokonima eshi a pandula Kalunga, okwe di pambula, ndele ta hovele oku di pa ovahongwa, novahongwa ove di yandja keengudu dovanhu. 37 Aveshe ova lya nova kuta, opo nee ovahongwa ova toola po oundjaumukile va yadeka oimbale ya kula iheyali. 38 Ovo va lya ova li ovalumenhu 4 000 nosho yo ovakainhu nounona. 39 Xuuninwa, eshi a lekela eengudu dovanhu, okwa londa mowato ndele ta i koshitukulwa shaMagadan.

16 Ovafarisai nOvasadukai ove uya kuJesus, nove mu pula e va ulikile edidiliko la dja meulu, opo ve mu yeleke. 2 Okwe va nyamukula ta ti: “Onguloshi ohamu ti, ‘Itaku lokwa molwaashi eulu ola tilyana,’ 3 nongula ohamu ti, ‘Molwaashi eulu ola tilyana, noku na oilemo, odula otai ka loka nena, notaku ka kala kwa talala.’ Omu shii okunongonona onghalo yomhepo mokutala keulu, ndele kamu shii okunongonona omadidiliko omafimbo. 4 Epupi likolokoshi nohali nyono ohombo* otali kongo edidiliko, ndele itali pewa edidiliko lasha, kakele kedidiliko lomuprofeti Jona.” Opo nee okwa dja po puvo.

5 Ndele ovahongwa ova taulukila kombinga ikwao yefuta, nova dimbwa okuya nomingome. 6 Jesus okwa tya kuvo: “Pashukileni nokulungamena efulika lOvafarisai nolOvasadukai.” 7 Opo nee ova hovela okukundafana, tava ti: “Kashiimba ota popi ngaho molwaashi inatu etelela omingome.” 8 Eshi Jesus e shi didilika, okwa ti: “Omolwashike tamu kundafana kutya kamu na omingome, ovanaitavelo linini nye? 9 Mboli kamu udite ko natango eshi nda hala okutya? Itamu dimbuluka nghee nda li nda kutifa ovalumenhu 5 000 nomingome nhano, nosho yo kutya oimbale ingapi youndjaumukile mwa toolele? 10 Ile itamu dimbuluka nghee nda li nda kutifa ovalumenhu 4 000 nomingome heyali, nosho yo kutya oimbale ingapi ya kula youndjaumukile mwa toolele? 11 Omolwashike inamu shi didilika kutya itandi popi shi na sha nomingome, ndele oshi na sha nokulungamena efulika lOvafarisai nOvasadukai?” 12 Opo nee ova uda ko kutya okwa li ta popi shi na sha nokulungamena omahongo Ovafarisai nOvasadukai, ndele hafulika lomingome.

13 Eshi Jesus e uya moshitukulwa shaKesarea Filippi, okwa pula ovahongwa vaye ta ti: “Ovanhu ohava ti Omona womunhu oye lyelye?” 14 Ova ti: “Vamwe ohava ti oJohannes Omuninginifi, vamwe ohava ti oElia, navakwao ohava ti oJeremia ile umwe womovaprofeti.” 15 Opo nee okwa tya kuvo: “Nye ohamu ti aame lyelye?” 16 Simon Petrus okwa nyamukula ta ti: “Oove Kristus, Omona waKalunga omunamwenyo.” 17 Jesus okwe mu nyamukula ta ti: “Simon, omona waJona, kala wa hafa, molwaashi hambelela nohonde* ye shi ku hololela, ndele oTate womeulu. 18 Ohandi ku lombwele yo Petrus: Oivelo yOmbila* itai ka finda eongalo lange, molwaashi ohandi ke li tungila kemanya. 19 Ohandi ke ku pa eeshapi dOuhamba womeulu, nakeshe eshi to shi mange kombada yedu, otashi kala sha mangwa yo nomeulu, naashi to mangulula kombada yedu, otashi kala yo sha mangululwa nomeulu.” 20 Opo nee okwa kunghilila ovahongwa vaha lombwele nande oumwe kutya oye Kristus.

21 Okudja pefimbo opo, Jesus okwa hovela okuyelifila ovahongwa vaye kutya oku na okuya kuJerusalem nokuhepekwa nonyanya kovakulunhu voshiwana, kovapristeri ovakulunhu nokovanongo vomishangwa nokudipawa, nonokutya ota ka nyumuka mefiku etitatu. 22 Opo nee Petrus okwe mu ifana po ndele ta hovele oku mu hanyena, ta ti: “Omwene, ino popya oinima ya tya ngaho; ito ka ningilwa nandenande oinima oyo.” 23 Okwa punguluka, ndele ta ti kuPetrus: “Inda konima yange Satana! Ove endangalati mondjila yange, molwaashi ito diladila ngaashi Kalunga, ndele oto diladila panhu.”

24 Ndele Jesus okwa lombwela ovahongwa vaye ta ti: “Ngeenge oku na ou a hala okushikula nge, ne lixupule ye mwene nokuhumbata omuti waye womahepeko,* ndele ta kala nokushikula nge. 25 Keshe ou a hala okuxupifa omwenyo waye ote u kanifa, ndele keshe ou ta kanifa omwenyo waye omolwange ote ke u mona. 26 Otashi kwafa shike omunhu ngeenge okwe lilikolele ounyuni aushe, ndele ta kanifa omwenyo waye? Ile oshike osho omunhu ta dulu okuyandjela omwenyo waye? 27 Osheshi Omona womunhu ote uya moshinge shaXe pamwe novaengeli vaye, nota ka futa keshe umwe she likolelela koilonga yaye. 28 Oshili ohandi mu lombwele kutya ope na vamwe vomwaava ve li ofika apa itava ka makela nandenande efyo fiyo osheshi tava mono tete Omona womunhu te uya mOuhamba waye.”

17 Konima yomafiku ahamano, Jesus okwa kufa Petrus, Jakob nomumwaina Johannes, ndele ta i navo ovo aveke komhunda ileile. 2 Opo nee okwa shituluka moipafi yavo; oshipala shaye osha vilima ngaashi etango, noshikutu shaye shokombada osha yela* sha fa ouyelele. 3 Ndele tala, ova holokelwa kuMoses naElia, tava kundafana naJesus. 4 Opo nee Petrus okwa tya kuJesus: “Omwene, osha wapala kufye okukala apa. Ngeenge owa hala, ohandi diki omatwali atatu apa, limwe oloye, limwe olaMoses nalikwao olaElia.” 5 Ofimbo natango a li ta popi, tala, ova uvikwa koshilemo shiyela, ndele tala, moshilemo omwa dja ondaka tai ti: “Ou Omona wange omuholike, ou nde mu hokwa. Mu udeni.” 6 Ovahongwa eshi ve shi uda, ova li va tila neenghono ndele tava fidimike oipala yavo pedu. 7 Opo nee Jesus okwa ehena puvo, te va kumu, ndele ta ti: “Fikameni, inamu tila.” 8 Eshi va fikama, ova mona ashike Jesus oye aeke. 9 Ofimbo va li tava londoloka komhunda, Jesus okwe va lombwela a ti: “Emoniko eli inamu li lombwela nande omunhu, fiyo osheshi Omona womunhu a nyumunwa koufi.”

10 Ndele ovahongwa ove mu pula: “Omolwashike ovanongo vomishangwa tava ti kutya Elia oku na okuuya tete kuKristus?” 11 Okwa nyamukula a ti: “Elia oku na okuuya shili, ndele ta ka tula oinima aishe peenhele. 12 Ashike ohandi mu lombwele kutya Elia okwe uyile nale, ndele vo inave mu didilika mo. Ponhele yaasho, ova li ve mu ningila keshe osho va hala. Sha faafana, Omona womunhu naye otave ke mu hepeka.” 13 Opo nee ovahongwa ova uda ko kutya ote va lombwele shi na sha naJohannes Omuninginifi.

14 Eshi ve uya popepi nongudu yovanhu, kuye okwe uya omulumenhu, te mu twile eengolo, ndele ta ti: 15 “Omwene, fila onghenda omonamati wange, molwaashi oku na oshinhona, nota vele unene. Omafimbo amwe oha wile momundilo, nomafimbo amwe omomeva. 16 Onde mu etele kovahongwa voye, ashike ova nyengwa oku mu velula.” 17 Jesus okwa nyamukula a ti: “Epupi eli lihe na eitavelo nola nyonauka, fiyo onaini ndi na okukala nanye? Ondi na oku mu lididimikila fiyo onaini? Mu eteni oku kwaame.” 18 Opo nee Jesus okwa hanyena ondemoni, ndele tai di mo momumati, nokwa veluka pefimbo opo tuu opo. 19 Ndele ovahongwa ove uya kuJesus ovo aveke, ndele tava ti: “Omolwashike inatu dula oku i ta mo?” 20 Okwa tya kuvo: “Omolweitavelo leni linini. Oshili ohandi mu lombwele, ngeno omwa li mu na eitavelo li fike pombuto yoshinapi, ngeno otamu dulu okulombwela omhunda ei, ‘Lunduluka po apa u ye kwinya,’ ndele yo tai lunduluka po; nokape na eshi tashi mu nyenge.” 21 ——

22 Ndele fimbo va li va ongala muGalilea, Jesus okwa tya kuvo: “Omona womunhu ota ka yandjwa momake ovanhu,* 23 notave ke mu dipaa, nomefiku etitatu ota ka nyumunwa.” Onghee ovahongwa ova li va nyika oluhodi neenghono.

24 Konima eshi va fika muKapernaum, ovalumenhu ovo hava futifa oifendela yotembeli,* ove uya kuPetrus tava ti: “Omuhongi weni oha futu ngoo oifendela yotembeli?” 25 Okwa ti: “Heeno, oha futu.” Opo nee eshi Petrus a ya meumbo, Jesus okwa fikila te mu pula ta ti: “Simon, oto ti ngahelipi? Olyelye e na okuyandja oifuta yokeengaba ile oifendela keehamba dokombada yedu? Ovana ile ovanailongo?” 26 Eshi a tya: “Ovanailongo,” Jesus okwa tya kuye: “Oshoshili, ovana ihava futu sha. 27 Ashike opo tuhe va handukife, inda pefuta, to umbile mo ondjolo, ndele to kufa oshi oyo to kwata tete, nongeenge owa makula okanya kayo, oto hange mo oshimaliwa shoshisilveri.* Shi kufa mo ndele to futu oifendela yoye noyange.”

18 Pefimbo opo ovahongwa ove uya puJesus, ndele tava ti: “Olyelye hano munenenene mOuhamba womeulu?” 2 Opo nee okwa ifana okaana kuye, te ka kaleke ofika mokati kavo, 3 ndele ta ti: “Oshili ohandi mu lombwele, itamu ka ya mo nandenande mOuhamba womeulu, okuninga shapo tamu lidilulula,* ndele tamu kala ngaashi ounona. 4 Onghee hano, keshe ou te lininipike ngaashi okaana aka oye omunenenene mOuhamba womeulu, 5 ndele keshe ou ta tambula okaana ngaashi aka medina lange, okwa tambula nge yo. 6 Ashike ou ta hongaula umwe womwaava vanini, ovo ve na eitavelo mwaame, oshixwepo a mangelwe emanya loshini* mofingo yaye ndele ta ekelwa mokati kefuta.

7 “Woo ounyuni eshi tau hongaula ovanhu! Oshoshili kutya omahongaulo otae ke uya, ndele woo komunhu ou te a etifa! 8 Ngeenge eke loye ile omhadi yoye otai ku hongaula, i teta ko ndele to i ekeleshi. Oshixwepo kwoove okumona omwenyo nonande oushingudu ile oushilema, shi dulife okukala nomake avali neemhadi mbali ndele to ekelwa momundilo waalushe. 9 Natango, ngeenge eisho loye otali ku hongaula, li kolola mo ndele to li ekeleshi. Oshixwepo kwoove okumona omwenyo nonande ou na eisho limwe, shi dulife okukala nomesho avali ndele to ekelwa muGehenna.* 10 Inamu dina nande oumwe womwaava vanini, osheshi ohandi mu lombwele kutya ovaengeli vavo meulu ove li mo va tala alushe koshipala shaTate womeulu. 11 ——

12 “Otamu ti ngahelipi? Ngeenge omunhu oku na eedi 100, ndele imwe yomudo tai kana, mbela ita fiye odo 99 keemhunda, ndele ta i a ka konge oyo ya kana? 13 Oshili ohandi mu lombwele, ngeenge okwe i mono, ota ka kala e i hafela neenghono shi dulife 99 odo inadi kana. 14 Sha faafana, Tate womeulu ina hala pa kane nande oumwe womwaava vanini.

15 “Ndele ngeenge omumwaxo okwa nyona kwoove, inda u ke mu pukulule mu li po onye amuke. Ngeenge okwe ku pwilikine, owa kwafela omumwaxo a longe osho sha yuka. 16 Ashike ngeenge ina pwilikina, kufa ondombwedi imwe ile mbali. Opo ku kolekwe oushili woshinima shonhumba, ope na okukala eembangi* mbali ile nhatu. 17 Ngeenge ina pwilikina kudo, shi lombwela eongalo. Ngeenge ina pwilikina nokuli nokeongalo, mu tala ko ngaashi omunhu womoiwana imwe nongaashi omufendelifi.

18 “Oshili ohandi mu lombwele, keshe eshi tamu shi mange kombada yedu, otashi kala sha mangwa yo nomeulu, naashi tamu mangulula kombada yedu, otashi kala yo sha mangululwa nomeulu. 19 Natango ohandi mu lombwele, ngeenge vavali vomunye kombada yedu ova udafana va indile Tate womeulu oshinima keshe sha fimana, ote shi va pe. 20 Osheshi apa pa ongala vavali ile vatatu medina lange, ohandi kala mokati kavo.”

21 Opo nee Petrus okwe uya, ndele ta ti kuye: “Omwene, olungapi ndi na okudimina po omumwatate oo ta nyono kwaame? Mbela olwoikando ashike iheyali?” 22 Jesus okwa tya kuye: “Ohandi ku lombwele, halwoikando ashike iheyali ndele olwo-⁠77.

23 “Onghee hano, Ouhamba womeulu otau dulu okufaafanifwa nohamba oyo ya hala okuvalula oikolo novapiya vayo. 24 Eshi ya hovela oku i valula, omwa etwa omulumenhu oo a li e na oikolo yayo oitalenti 10 000.* 25 Ndele molwaashi ka li ta dulu oku i shunifa, omwene waye okwe mu lombwela opo ye, omukulukadi waye, ounona vaye noinima aishe oyo a li e na i landifwe po, opo a fute. 26 Onghee omupiya okwa wila poshi ndele te mu linyongamene* ta ti: ‘Lididimikile nge, ohandi ka futa oinima yoye aishe.’ 27 Omwene womupiya oo okwe mu kenukila nokwe mu kufila po oikolo yaye, ndele te mu efa a ye. 28 Ndele omupiya oo eshi a ya pondje, okwa mona omupiya mukwao umwe, oo e na oikolo yaye yeedenari 100, okwe mu kwata noku mu ponda, ta ti: ‘Futa oinima yange aishe oyo u na.’ 29 Onghee omupiya mukwao okwa wila poshi ndele ta hovele oku mu indila, ta ti: ‘Lididimikile nge, ohandi ka futa oinima yoye.’ 30 Ashike ka li a hala, ndele okwa ya nokwe mu tulifa modolongo fiyo osheshi a futa oikolo yaye. 31 Eshi ovapiya vakwao va mona osho sha ningwa po, ova uda nai neenghono, ndele tava i va ka lombwele omwene wavo ashishe osho sha ningwa po. 32 Opo nee omwene wavo okwe mu ifana ndele ta ti kuye: ‘Omupiya ove omukolokoshi, eshi wa lilila nge onde ku kufila po oikolo yoye aishe. 33 Mbela naave kwa li u na okufila onghenda omupiya mukweni ngaashi ame nde ku fila onghenda?’ 34 Opo nee omwene waye okwa handuka, ndele te mu yandje kovakeleli vodolongo fiyo osheshi a futa oikolo yaye aishe. 35 Tate womeulu naye ota ka ungaunga nanye monghedi ya faafana ngeenge keshe umwe womunye ita dimine po omumwaxe tashi di komutima.”

19 Eshi Jesus a mana okupopya oinima oyo, okwa dja ko kuGalilea ndele ta i keengaba daJudea a tauluka Jordan. 2 Okwa li yo a shikulwa keengudu dinene dovanhu, ndele ta velula ovo va li tava vele.

3 Opo nee Ovafarisai ove uya kuye, ndele tave mu pula va hala oku mu yeleka, tava ti: “Oshi li tuu pamhango omulumenhu a teye ohombo nomukulukadi waye omolwoshinima keshe?” 4 Okwa nyamukula a ti: “Hamba inamu lesha kutya ou e va shita pehovelo okwe va shita omulumenhu nomukainhu? 5 Nokwa ti: ‘Nomolwaasho omulumenhu oku na okufiya po xe naina, ndele ta kanyatele komukulukadi waye, ndele tava ningi onhumba imwe.’ 6 Onghee kave fi vali vavali, ndele onhumba imwe. Hano osho Kalunga a tula kumwe, inashi kufwa kumwe komunhu.” 7 Ova tya kuye: “Omolwashike hano Moses a yandja elombwelo opo pa yandjwe ombapila yeteyohombo ngeenge omukulukadi ta hengwa po?” 8 Okwa tya kuvo: “Moses okwe mu pitika mu teye ohombo novakulukadi veni omolwoukukutu womitima deni, ashike osho hasho sha li ngaho okudja pehovelo. 9 Ohandi mu lombwele kutya keshe ou ta teya ohombo nomukulukadi waye omolwoshinima shimwe shihe fi oluhaelo,* ndele ta hombola umwe, ota haele.”

10 Ovahongwa ova tya kuye: “Ngeenge omulumenhu osho e na okukala nomukulukadi waye ngaho, mboli inashi wapala okuhombola.” 11 Okwa tya kuvo: “Havanhu aveshe tava dulu okuninga ngaho, ndele ovovo ashike ve na oshali.* 12 Osheshi ope na ovo nghee va dalwa ovalutulwa, naavo va ningwa ovalutulwa kovanhu, nope na yo ovalutulwa ovo ve lininga vo vene ovalutulwa omolwOuhamba womeulu. Ou ta dulu oku shi ninga ne shi ninge.”

13 Ndele kuye okwa li kwa etwa ounona e va tenheke omake* nokwiilikana, ashike ovahongwa ova li tave va kelele. 14 Onghee hano, Jesus okwa ti: “Efeni ounona ve uye kwaame, inamu va kelela ko. Osheshi Ouhamba womeulu owaava ve li ngaashi vo.” 15 Opo nee okwe va tenheka omake, ndele ta i.

16 Ndele tala, kuye okwe uya omulumenhu omunyasha, ndele ta ti: “Omuhongi, ondi na okulonga shike shiwa opo ndi ka mone omwenyo waalushe?” 17 Okwa tya kuye: “Omolwashike to pula nge kombinga yaasho shiwa? Kalunga oye aeke ta dulu okuufa osho shiwa.* Ndele ngeenge owa hala okumona omwenyo, kala ho dulika koipango.” 18 Okwa ti kuye: “Ilipi po?” Jesus okwa ti: “Ino dipaa, ino nyona ohombo, ino vaka, ino popya oipupulu, 19 fimaneka xo nanyoko, nokukala u hole mukweni ngaashi u lihole mwene.” 20 Omulumenhu oo omunyasha okwa tya kuye: “Aishe oyo onda kala handi dulika kuyo; oshike vali ndi na okuninga?” 21 Jesus okwa tya kuye: “Ngeenge owa hala okukala wa wanenena,* inda u ka landife po oinima yoye ndele oimaliwa to i yandje keehepele, opo u kale u na emona meulu, ndele to uya u ninge omushikuli wange.” 22 Omulumenhu oo omunyasha eshi e shi uda, okwa ya a nyika oluhodi, molwaashi okwa li e na eliko lihapu. 23 Opo nee Jesus okwa lombwela ovahongwa vaye, a ti: “Oshili ohandi mu lombwele kutya oshidjuu koshipuna okuya mOuhamba womeulu. 24 Natango ohandi mu lombwele, oshipu kongamelo okupita meyulu longwiya shi dulife okuya kwoshipuna mOuhamba waKalunga.”

25 Eshi ovahongwa ve shi uda, ova li va kumwa neenghono, nova tya: “Olyelye hano ta dulu okuxupifwa?” 26 Jesus okwe va tala, ndele ta ti kuvo: “Pataleko lopanhu osho itashi shiiva, ashike kuKalunga aishe otai shiiva.”

27 Opo nee Petrus okwe mu pula ta ti: “Tala, otwa fiya po oinima aishe ndele hatu ku shikula; mbela oshike hatu ka mona?” 28 Jesus okwa tya kuvo: “Oshili ohandi mu lombwele, meshitululo, ngeenge Omona womunhu a kala omutumba kolukalwapangelo laye liyapuki, ovo mwa shikula nge otamu ka kala omutumba komalukalwa 12, ndele tamu ka tokola omapata 12 aIsrael. 29 Ndele aveshe ovo va fiya po omaumbo, ile ovamwainamati, ile ovamwainakadona, ile ooxe, ile ooina, ile ounona, ile omapya omolwedina lange, otava ka mona oinima oyo lwefele, notava ka fyuulula omwenyo waalushe.

30 “Ndele vahapu ovo votete otava ka ninga vaxuuninwa, naavo vaxuuninwa otava ka ninga votete.

20 “Osheshi Ouhamba womeulu owa fa mwene weumbo, oo a pita ongula inene a ka konge ovanailonga vomoshikunino shaye shomandjebele. 2 Konima eshi a udafana novanailonga e va fute odenari imwe mefiku, okwe va tuma moshikunino shaye shomandjebele. 3 Okwa pita mo vali pomuwoi wongula lwaapo,* nokwa mona vamwe ve li ofika pomalandifilo vehe na oilonga, 4 ndele ta ti kuvo, ‘Nanye indeni mu ka longe moshikunino, nohandi ke mu pa ondjabi i li pauyuki.’ 5 Opo nee ova ya mo. Natango okwa li a pita mo vali pomulongo nambali womutenya lwaapo* nosho yo ponhatu yomutenya,* ndele ta ningi sha faafana. 6 Xuuninwa, okwa pita mo vali ponhano yokomatango lwaapo,* ndele ta hange vamwe ve li ofika, nokwa tya kuvo, ‘Omolwashike mwa kala apa efiku alishe muhe na oilonga?’ 7 Ova nyamukula va ti: ‘Osheshi kape na ou e tu pa oilonga.’ Okwa tya kuvo: ‘Nanye yo indeni moshikunino mu ka longe.’

8 “Eshi kwa toka, mwene woshikunino shomandjebele okwa lombwela elenga laye, ta ti: ‘Ifana ovanailonga ndele to va futu ondjabi yavo; hovela naava vaxuuninwa ndele to xuuninwa naava votete.’ 9 Ndele eshi ovanailonga ovo va longa okudja ponhano yokomatango ve uya, keshe umwe okwa pewa odenari imwe. 10 Eshi votete ve uya, ova li ve shii otava pewa shihapu, ndele navo ova li va futwa ashike odenari imwe. 11 Opo nee eshi ve i tambula, ova hovela okungongotela mwene weumbo 12 tava ti: ‘Ovalumenhu ava vaxuuninwa ova longa ovili imwe, ndele owe va pa shi fike pamwe nafye ava twa longa noudiinini efiku alishe moshanga shomutenya.’ 13 Ndele okwa nyamukula umwe womuvo ta ti: ‘Kaume, inandi ungaunga naave shihe li pauyuki. Hamba inandi udafana nanye odenari imwe? 14 Tambula ondjabi yoye ndele to i. Onda hala okupa ou waxuuninwa ondjabi i fike pwaai yoye. 15 Nghi na hano oufemba wokuninga eshi nda hala noinima yange? Ile owa twa ondubo molwaashi nde va ningila ouwa?’* 16 Kungaho, ovo vaxuuninwa otava ka ninga votete, naavo votete otava ka ninga vaxuuninwa.”

17 Fimbo Jesus ve li mondjila tava i kuJerusalem, okwa ifana po ovahongwa 12 ovo aveke, ndele te va lombwele ta ti: 18 “Taleni, ohatu yeni kuJerusalem, ndele Omona womunhu ota ka yandjwa momake ovapristeri ovakulunhu novanongo vomishangwa. Ota ka tokolelwa efyo 19 nota ka yandjwa momake ovanhu vomoiwana imwe i lili opo a shekwe, a dengwe nokuvalelwa komuti; nomefiku etitatu ota ka nyumunwa.”

20 Opo nee omukulukadi waSebedeus okwe uya kuJesus pamwe novanamati vaye vavali, ndele te mu linyongamene,* a hala oku mu pula sha. 21 Jesus okwa tya kuye: “Owa hala shike?” Omukainhu okwa nyamukula ta ti: “Ohandi ku indile opo ovanamati vange vavali va ka kale pamwe naave mOuhamba woye, umwe okolulyo loye naumwe okolumosho loye.” 22 Jesus okwa ti: “Nye kamu shi shii osho tamu pula. Otamu dulu ngoo okunwa meholo olo ndi li pokunwa?” Ova tya kuye: “Ohatu dulu.” 23 Okwa tya kuvo: “Oshili otamu ka nwa meholo lange, ashike okukala kolulyo nokolumosho lange haame handi ku yandje, ndele okwaava ve ku longekidilwa kuTate.”

24 Eshi vakwao omulongo ve shi uda, ova li va handukila ovamwainafana ava vavali. 25 Opo nee Jesus okwe va ifana kuye, ndele ta ti: “Omu shi shii kutya ovapangeli voiwana ohave i pangele, novanaenghono ohava longifa eenghonopangelo davo oku i pangela. 26 Osho hasho shi na okukala ngaho mokati keni, ndele keshe ou a hala a kale munene mokati keni, na kale omuyakuli weni, 27 naau a hala okukala komesho mokati keni, na kale omupiya weni. 28 Ongaashi ashike Omona womunhu, ka li e uya okuyakulwa, ndele okuyakula nokuyandja omwenyo waye u ninge ekulilo lavahapu.”

29 Fimbo va li tava di mo muJeriko, ongudu inene yovanhu oye mu shikula. 30 Ndele tala, ovapofi vavali, ovo va li omutumba pomunghulo wondjila, eshi va uda kutya Jesus ota ende po, ova ingida mokule tava ti: “Omwene, Omona waDavid, tu fila onghenda!” 31 Ndele ongudu yovanhu oye va hanyena noku va lombwela va mwene, ashike ova ingida mokule tava ti: “Omwene, Omona waDavid, tu fila onghenda!” 32 Opo nee Jesus okwa kanghama, te va ifana, ndele ta ti: “Omwa hala ndi mu ningile shike?” 33 Ova tya kuye: “Omwene, otwa hala omesho etu a mone ko.” 34 Jesus okwe va kenukila, ta kumu omesho avo, opo nee ova twikuluka diva, ndele tave mu shikula.

21 Eshi va ehena popepi naJerusalem, ova tula muBetfage kOmhunda yEemono, ndele Jesus ta tumu ovahongwa vavali, 2 ta ti kuvo: “Indeni komukunda oo u li komesho yeni, notamu ka hanga ko ondongi ya mangwa nokandongi kayo. Di mangululeni ndele tamu di eta kwaame. 3 Ngeenge umwe okwe mu pula, tyeni, ‘Omwene okwe di pumbwa.’ Opo nee ote ke di va alulila diva.”

4 Osho osha ningwa opo ku wanifwe osho sha popiwa okupitila momuprofeti, oo a ti: 5 “Lombwela omonakadona waSion to ti: ‘Tala, ohamba yoye inambili otai uya ya londa kondongi, heeno, ya londa kokandongi.’”

6 Ndele ovahongwa ova ya nova ninga naanaa ngaashi Jesus e va lombwela. 7 Ova eta ondongi nokandongi kayo, nova yala ko oikutu yavo yokombada, ndele Jesus ta kala ko omutumba. 8 Vahapu vomongudu yovanhu ova li va yala oikutu yavo yokombada mondjila, ofimbo vamwe va li tava tete oitai komiti ndele tave i yale mondjila. 9 Ndele eengudu dovanhu ode mu tetekela komesho, naavo ve mu shikula ova kala tava ingida tava ti: “Ohatu ilikana opo Omona waDavid a xupifwe! Na nangekwe noupuna ou te uya medina laJehova! Ohatu ku indile, ou u li pombadambada, mu xupifa!”

10 Eshi Jesus a fika muJerusalem, ovanhu aveshe moshilando ova li tava uyaana, tava ti: “Olyelye ou?” 11 Ongudu yovanhu oya nyamukula tai ti: “Ou omuprofeti Jesus, a dja kuNasaret shomuGalilea!”

12 Jesus okwa li a ya motembeli, ndele ta taataa mo aveshe ovo va li tava lande notava landifile mo. Ndele okwa undulila poshi oitaafula yovakumaani voimaliwa noipundi yaavo va li tava landifa eenghuti. 13 Okwa tya kuvo: “Opa shangwa, ‘Eumbo lange otali ka ifanwa eumbo lokwiilikanena,’ ndele nye omwe li ninga ekololo lovanyeki.” 14 Ndele fimbo a li motembeli, oilema novapofi ove uya kuye, ndele te va velula.

15 Eshi ovapristeri ovakulunhu novanongo vomishangwa va mona oikumwifilonga oyo a longa, nounona voumati ovo va li tava ingida motembeli, tava ti, “Ohatu ilikana opo Omona waDavid a xupifwe!” ova li va handuka, 16 ndele tava ti kuye: “Ou udite ko ngoo ounona ava eshi tava ti?” Jesus okwa tya kuvo: “Heeno, ondi udite ko. Hamba inamu lesha eendjovo odo tadi ti: ‘Ounona, nokuli nouhanana otave ku hambelele’?” 17 Opo nee okwe va fiya po, ta di mo moshilando, ndele ta i a ka nangale kuBetania.

18 Ndele fimbo a li ta shuna koshilando ongula inene, okwa li a fya ondjala. 19 Eshi a mona omukwiyu u li pondjila, okwa ya puo, nokwa hanga ko ashike omafo, ndele ta ti kuo: “Okudja paife fiyo alushe, ito ima vali oiimati.” Diva omukwiyu owa kukuta. 20 Ovahongwa eshi ve shi mona, ova li va kumwa, ndele tava ti: “Omolwashike omukwiyu wa kukuta diva?” 21 Jesus okwe va nyamukula ta ti: “Oshili ohandi mu lombwele, ngeenge omu na eitavelo nokamu na omalimbililo, itamu ka ninga ashike ngaashi nda ningila omukwiyu, ndele nande ngeno omwa lombwele omhunda ei, ‘Litumba po, ndele to liumbile mefuta,’ otashi ka ningwa. 22 Oinima aishe oyo tamu i indile mu na eitavelo, otamu ke i pewa.”

23 Konima eshi a ya motembeli, ovapristeri ovakulunhu novakulunhu voshiwana ove uya kuye fimbo a li ta hongo ovanhu, ndele tava ti: “Okeenghonopangelo dalyelye to longo oinima ei? Nolyelye e ku pa eenghonopangelo odo?” 24 Jesus okwe va nyamukula ta ti: “Naame onda hala oku mu pula oshinima shimwe. Ngeenge omwa lombwele nge, opo nee naame ohandi ke mu lombwela kutya okeenghonopangelo dalyelye handi longo oinima ei: 25 Eninginifo laJohannes ola dja peni? Omeulu ile omovanhu?” Opo nee ova hovela okukundafana tava ti: “Ngeenge otwa ti, ‘Omeulu,’ ota ka tya kufye, ‘Omolwashike hano inamu mu itavela?’ 26 Ndele ngeenge otwa ti, ‘Omovanhu,’ otwa tila kutya ongudu yovanhu otai ke linyenga ngahelipi, molwaashi aveshe ova tala ko Johannes e li omuprofeti.” 27 Onghee ova nyamukula Jesus tava ti: “Katu shi shii.” Okwa tya yo kuvo: “Naame itandi mu lombwele kutya okeenghonopangelo dalyelye handi longo oinima ei.

28 “Otamu ti ngahelipi? Diladila nee ngeno omulumenhu e na ovanamati vavali. Okwa ya kwaau wotete, ndele ta ti, ‘Inda u ka longe nena moshikunino shomandjebele mumati wange.’ 29 Omumati okwa nyamukula ta ti, ‘Itandi i ko,’ ashike lwanima okwe ke livela ombedi, ndele ta i. 30 Eshi e uya kumukwao, okwa popya sha faafana. Ou okwa tya kuxe, ‘Eewa.’ Ndele ina ya ko. 31 Elipi po womwaava vavali a longa ehalo laxe?” Ova ti: “Oyou wotete.” Jesus okwa tya kuvo: “Oshili ohandi mu lombwele kutya ovafendelifi neembwada otadi mu tetekele okuya mOuhamba waKalunga. 32 Osheshi Johannes okwa li e uya oku mu ulikila ondjila youyuki, ashike kamwa li mwe mu itavela. Ndele ovafendelifi neembwada ode mu itavela, nokonima eshi mwa mona oinima ei, inamu livela ombedi opo ngeno mu mu itavele.

33 “Pwilikineni kefaneko limwe vali li na sha nomulumenhu oo a li e na oshikunino shomandjebele nokwe shi umbila ongubu, ndele ta fe mo elambo loshikolelo shomaviinyu nokutunga mo oshungongulu. Opo nee okwa kongela mo ovanailonga, ndele ta i kondje yoshilongo. 34 Ndele eshi omandjebele a pya, okwa tuma ovapiya vaye kovanailonga vomoshikunino ve ke mu talele ko oiimati yaye. 35 Ashike ovanailonga vomoshikunino ova kwata ovapiya vaye, umwe ove mu denga, umwe ove mu dipaa, naumwe vali ove mu denga nomamanya fiyo ota fi. 36 Natango okwa tuma ko ovapiya vamwe ve dule ongudu inya yotete, ndele ove va ningila sha faafana. 37 Xuuninwa, okwa tuma ko omonamati waye, ta ti, ‘Omonamati wange otave ke mu fimaneka.’ 38 Eshi ovanailonga vomoshikunino va mona omonamati, ova kundafana tava ti, ‘Ou oye omufyuululi. Natu mu dipaeni, ndele hatu fyuulula po oinima yaye!’ 39 Onghee hano, ove mu kwata ndele tave mu kokolola mo moshikunino shomandjebele noku mu dipaa. 40 Ngeenge mwene woshikunino shomandjebele okwe uya, ota ka ningila shike ovanailonga ovo vomoshikunino?” 41 Ova tya kuye: “Ote ke va hanauna po filufilu molwaashi ovakolokoshi, ndele ta kongo ovanailonga vamwe vomoshikunino shomandjebele, ovo tave ke mu pa oiimati ngeenge oya pi.”

42 Jesus okwa tya kuvo: “Hamba inamu lesha mOmishangwa odo da ti, ‘Emanya olo ovatungi va ekelashi ola ninga emanya la fimanenena?* Emanya olo ola dja kuJehova, nolikumwifi momesho etu.’ 43 Onghee ohandi mu lombwele kutya Ouhamba waKalunga otau mu kufwa ndele tau pewa oshiwana osho tashi imike oiimati yao. 44 Natango, omunhu keshe ta wile kemanya eli ota ka teyauka. Nakeshe ou tali wile, otali mu nyanyaula.”

45 Eshi ovapristeri ovakulunhu nOvafarisai va uda omafaneko aye, ova li va didilika kutya ota popi kombinga yavo. 46 Nonande ova li va hala oku mu kwata po, ova li va tila eengudu dovanhu shaashi oda li de mu tala ko e li omuprofeti.

22 Jesus okwa popya vali navo ta longifa omafaneko, ta ti: 2 “Ouhamba womeulu otau dulu okufaafanifwa nohamba oyo ya longekida oshivilohombolo shomonamati. 3 Opo nee oya tuma ovapiya vayo va ka ifane ovo va shivwa koshivilohombolo, ashike kava li va hala okuuya. 4 Oya tuma vali ovapiya vamwe, ya ti, ‘Lombweleni ovo va shivwa, tamu ti: “Taleni, onda mana okulongekida oikulya, onda toma eehove da ondoka, noinima aishe oi li peenhele. Ileni koshivilohombolo.”’ 5 Ashike ove lipwililikila eshivo olo ndele tava i neendjila davo; umwe okwa ya kepya laye, naumwe okongeshefa yaye; 6 navamwe ova kwata po ovapiya vayo ndele tave va denge noku va dipaa.

7 “Ohamba oya li ya handuka neenghono ndele tai tumu ovakwaita vayo va ka dipae ovadipai ovo nokuxwika po oshilando shavo. 8 Opo nee oya tya kovapiya vayo, ‘Oshivilohombolo osha pwa okulongekidwa, ashike ovo va shivwa inava wana okukala poshivilo. 9 Onghee hano, indeni neendjila odo da finda kondje yoshilando, ndele keshe oo tamu mono mu shiveni koshivilohombolo.’ 10 Ovapiya ovo ova ya komashakeneno eendjila ngaashi va lombwelwa, ndele tava shivi aveshe ovo va shakeneka, ovakolokoshi naavo hava longo ouwa; nonhele yoshivilohombolo oya li iyadi ovanhu tava li.*

11 “Eshi ohamba ye uya mo i tale ovaenda, oya mona mo omulumenhu ina djala oshikutu shoshivilohombolo. 12 Opo nee oya tya kuye, ‘Kaume, owe uya mo ngahelipi omu uhe na oshikutu shoshivilohombolo?’ Omulumenhu oo ka li a nyamukula sha. 13 Ndele ohamba oya tya kovapiya vayo, ‘Mu mangeni komaoko nokomaulu ndele tamu mu ekele momilaulu pondje. Opo ta ka kala ta lilaana nokulikwesha komayoo.’

14 “Osheshi vahapu ova shivwa, ndele ovanini ashike va hoololwa.”

15 Opo nee Ovafarisai ova ya ndele tava udafana opo va dule okuyula Jesus meendjovo daye. 16 Onghee ova tuma ovahongwa vavo kuye pamwe novayambididi vaHerodes, tava ti: “Omuhongi, otu shi shii kutya ove omunashili noho hongo oshili kombinga yaKalunga, noiho lalakanene okupandika kovanhu, osheshi iho tale eholokepo lokombada lovanhu. 17 Tu lombwela, oto ti ngahelipi? Osha yuka tuu* okufuta oifendela kOmukesari?” 18 Ndele molwaashi Jesus okwa li e shii omalinyengotomheno avo mai, okwa ti: “Omolwashike tamu yeleke nge, ovanaihelele nye? 19 Ulikilei nge oshimaliwa shefendelo.” Opo nee ove mu pa odenari. 20 Ndele ta ti kuvo: “Efano neshangelo eli olalyelye?” 21 Ova ti: “Olomukesari.” Opo nee okwa tya kuvo: “Hano eshi shOmukesari shi peni Omukesari, naasho shaKalunga shi peni Kalunga.” 22 Eshi ve shi uda, ova li va kumwa, ndele tava di po puye.

23 Mefiku olo tuu olo Ovasadukai ovo hava ti kaku na enyumuko, ove uya kuye, ndele tave mu pula tava ti: 24 “Omuhongi, Moses okwa ti: ‘Ngeenge omulumenhu a fi ehe na ounona, mumwaina oku na okuhombola po omukulukadi waye, ndele ta dalele mumwaina ounona.’ 25 Ndele opa li ovamwainafana ovalumenhu vaheyali. Wotete okwa li a hombola ndele ta fi ehe na oludalo, nokwa fiila mumwaina umwe omukulukadi waye. 26 Oshinima sha faafana osha ningilwa yo omutivali nomutitatu, fiyo aveshe vaheyali va pwa ko. 27 Xuuninwa, omukainhu naye okwa ka fya. 28 Mbela ngeenge va nyumunwa, omukulukadi oo ota ka ninga walyelye pwaavo vaheyali? Osheshi okwa li omukulukadi wavo aveshe.”

29 Jesus okwe va nyamukula a ti: “Nye omwa puka, shaashi kamu shii Omishangwa nanghee eenghono daKalunga hadi longo; 30 osheshi menyumuko ovalumenhu itava ka hombola, novakainhu itava ka hombolwa, ashike otava ka kala ngaashi ovaengeli vomeulu. 31 Hamba inamu lesha osho Kalunga e mu lombwela shi na sha nenyumuko lovafi, eshi a ti: 32 ‘Aame Kalunga kaAbraham naKalunga kaIsak naKalunga kaJakob’? Oye Kalunga kovanamwenyo, ndele ke fi Kalunga kovafi.” 33 Eshi eengudu dovanhu de shi uda, oda li da kuminwa ehongo laye.

34 Konima eshi Ovafarisai va uda nghee Jesus a mweneka Ovasadukai, ove uya kuye ve li ongudu. 35 Ndele umwe womuvo, omunongo wOmhango, okwe mu pula opo e mu yeleke, ta ti: 36 “Omuhongi, oshipango shinenenene shomOmhango oshilipi po?” 37 Okwa tya kuye: “‘Hola Jehova Kalunga koye nomutima woye aushe, nomwenyo* woye aushe nomadiladilo oye aeshe.’ 38 Eshi osho oshipango shinenenene noshotete. 39 Oshitivali sha fa shikwao, osheshi: ‘Kala u hole mukweni ngaashi u lihole mwene.’ 40 Eendjovo dOvaprofeti nOmhango aishe oko ya kanghamena koipango oyo ivali.”

41 Ndele fimbo Ovafarisai va li va ongala, Jesus okwe va pula ta ti: 42 “Otamu diladila ngahelipi shi na sha naKristus? Omona walyelye?” Ova tya kuye: “OwaDavid.” 43 Ndele Jesus okwe va pula a ti: “Omolwashike hano David a li a nwefwa mo kuKalunga e mu ifane Omwene? Eshi a ti, 44 ‘Jehova okwa lombwela Omwene wange, a ti: “Kala omutumba kolulyo lange fiyo ohandi tula ovatondi voye koshi yeemhadi doye.”’ 45 Hano ngeenge David okwe mu ifana Omwene, ongahelipi e li omona waye?” 46 Ndele kapa li nande oumwe a dula oku mu nyamukula nande ondjovo imwe, nokudja mefiku olo kapa li nande oumwe a kendabala oku mu pula sha vali.

23 Opo nee Jesus okwa popya neengudu dovanhu novahongwa vaye, ta ti: 2 “Ovanongo vomishangwa nOvafarisai ove litula pondodo yaMoses. 3 Onghee hano, ashishe osho tave mu lombwele, shi ningeni noku shi diinina, ndele inamu hopaenena oilonga yavo, osheshi ohava popi ashike, ndele ihava longo osho hava popi. 4 Ohava mange omitengi didjuu noku di tula komapepe ovanhu, ndele vo vene inava hala oku di kuma nande onomunwe wavo. 5 Oilonga aishe hava longo ohave i longo opo ve limonikife kovanhu; ohava nenepeke oundjato voshipa ve na omishangwa ovo hava djala nelalakano lokuliamena, nohava lelepeke eenyemba doikutu yavo. 6 Ove hole okukala omutumba peenhele odo da nuninwa ovaenda ovo va fimana poivilo nokukala koipundi yokomesho* meeshinagoga, 7 nove hole okupopifwa monghedi ye likalekelwa peenhele domalandifilo, nokwiifanwa Omuhongi.* 8 Ndele nye inamu ifanwa Omuhongi, osheshi omu na ashike Omuhongi umwe aeke, ndele nye amushe ovamwainafana. 9 Natango, inamu ifana nande oumwe Xo kombada yedu, osheshi omu na ashike Xo umwe aeke, oo e li meulu. 10 Inamu ifanwa yo ovawiliki, osheshi Omuwiliki weni umwe aeke, Kristus. 11 Ndele ou munene mokati keni na kale omuyakuli weni. 12 Keshe ou te linenepeke ota ka ninipikwa, nakeshe ou te lininipike ota ka nenepekwa.

13 “Woo ovanongo vomishangwa nOvafarisai, ovanaihelele nye! Osheshi omwa idilila po ovanhu oshivelo shOuhamba womeulu; molwaashi nye vene itamu i mo, notamu kelele mo ovo va hala okuya mo. 14 ——

15 “Woo ovanongo vomishangwa nOvafarisai, ovanaihelele nye! Osheshi ohamu tavakana efuta nedu opo mu likole omuhongwa umwe, ndele ngeenge mwe mu likola, ohamu mu ningi oshihakanwa shaGehenna* e mu dule.

16 “Woo ovakwatiketi ovapofi nye, ovo hamu ti, ‘Ngeenge umwe okwa ane kotembeli, ke na okuwanifa po eano olo, ndele ngeenge umwe okwa ane koshingoli shotembeli, oku na okuwanifa po eano laye.’ 17 Omalai novapofi nye! Oshilipi po sha fimanenena, oshingoli ile otembeli oyo hai yapulifa oshingoli? 18 Shikwao vali, ‘Ngeenge umwe okwa ane koaltari, kape na oupyakadi nonande ina wanifa po eano laye, ndele ngeenge umwe okwa ane koshali oyo i li ko, oku na okuwanifa po eano laye.’ 19 Ovapofi nye! Oshilipi po sha fimanenena, oshali ile oaltari oyo hai yapulifa oshali? 20 Onghee hano, keshe ou ta ane koaltari, ota ane kuyo nokukeshe shimwe shi li ko; 21 ndele keshe ou ta ane kotembeli, ota ane kuyo nokuKalunga ou ha kala motembeli; 22 naau ta ane keulu, ota ane kolukalwapangelo laKalunga noKwaau e li ko omutumba.

23 “Woo ovanongo vomishangwa nOvafarisai, ovanaihelele nye! Osheshi ohamu yandje oshitimulongo shomint, shodill noshokumin,* ashike ohamu efa oinenenima yOmhango ngaashi ouyuki, onghenda noudiinini. Oinima oyo oi na okuwanifwa po, naikwao kai na okweefiwa. 24 Ovakwatiketi ovapofi nye, omwe otamu i dindi mo, ndele ongamelo otamu i pona po!

25 “Woo ovanongo vomishangwa nOvafarisai, ovanaihelele nye! Osheshi ohamu kosho eholo netiti kombada, ndele meni leni omu yadi olwisho* noufukenhu. 26 Ovafarisai nye ovapofi, kosheni tete eholo netiti meni opo li kale yo la yela nokombada.

27 “Woo ovanongo vomishangwa nOvafarisai, ovanaihelele nye! Osheshi omwa fa eembila da kolongwa, odo tadi monika nawa kombada ndele meni lado omu yadi oipongolo yovafi nosho yo onyata keshe. 28 Nanye moipafi yovanhu ohamu limonikifa mwa fa ovayuki, ndele meni leni omu yadi oihelele noukolokoshi.

29 “Woo ovanongo vomishangwa nOvafarisai, ovanaihelele nye! Osheshi ohamu tungu eembila dovaprofeti, ndele tamu wapeke eembila* dovayuki, 30 ndele tamu ti, ‘Ngeno opo twa li pefimbo lootatekulululwa, ngeno inatu tilashi pamwe navo ohonde yovaprofeti.’ 31 Onghee omwa dimina kutya nye ovana vovadipai vovaprofeti. 32 Hano manifeni oilonga oyo ya li ya hovelwa kooxokulululwa.

33 “Omayoka noludalo lomayoka omauta nye, ongahelipi tamu dulu okuya onhapo etokolo laGehenna?* 34 Onghee hano, ohandi mu tumine ovaprofeti, ovanaendunge novahongi. Ndele vamwe vomuvo otamu ke va dipaa noku va valela komiti, navamwe vomuvo otamu ke va dengela meeshinagoga deni noku va hepeka moshilando noshilando, 35 opo ohonde aishe yovayuki oyo ya tika kombada yedu i kale kombada yeni, okudja ngoo kohonde yomuyuki Abel fiyo okohonde yaSakaria omona waBarakia, oo mwe mu dipaela pokati kouyapuki noaltari. 36 Oshili ohandi mu lombwele, oinima aishe oyo otai ke uya kombada yepupi eli.

37 “Jerusalem, Jerusalem, ovaprofeti owe va dipaa, naavo wa tuminwa owe va denga nomamanya fiyo va fya. Olungapi nda kala nda hala okwoongela ovamwoye ngaashi oxuxwa tai ongele ouxuxwena vayo koshi yomavava ayo, ashike ino shi hala? 38 Taleni, eumbo leni otamu li fiilwa ongaho. 39 Osheshi ohandi mu lombwele, itamu ka mona nge vali nandenande okudja paife fiyo osheshi tamu ka tya, ‘Na nangekwe noupuna ou te uya medina laJehova!’”

24 Eshi Jesus a li ta di motembeli, ovahongwa vaye ove uya kuye ndele tave mu ulikile omatungo otembeli. 2 Okwa tya kuvo: “Oinima aishe omu i wete oyo? Oshili ohandi mu lombwele, kape na nande emanya tali ka fiwa la londa kulikwao inali ngumaunwa po.”

3 Ndele ofimbo e li omutumba kOmhunda yEemono, ovahongwa ove uya kuye ovo aveke, tava ti: “Tu lombwela, oinima oyo otai ka ningwa naini, noshike tashi ka kala edidiliko lokukala po* kwoye nolomafiku axuuninwa ounyuni ou?”*

4 Opo nee Jesus okwe va nyamukula, a ti: “Taleni, inamu pukifwa nande okomunhu, 5 osheshi vahapu otave ke uya medina lange, tava ti, ‘Aame Kristus,’ notava ka pukifa vahapu. 6 Otamu ka uda oita neenghundana di na sha noita. Ndele inamu mbadapala, osheshi oinima oyo oi na okuningwa, ashike olo halo manga exulilo.

7 “Osheshi oiwana otai ka lwifafana, omauhamba otaa ka kondjifafana, notaku ka kala ondjala nomakakamo edu keembinga neembinga. 8 Oinima aishe oyo oi li ngaashi ehovelo loshifeta shokudala.

9 “Opo nee ovanhu otave ke mu yandja mu hepekwe notave ke mu dipaa, notamu ka tondwa koiwana aishe omolwedina lange. 10 Ndele vahapu otava ka efa po eitavelo lavo, tava ka kengelelafana notava ka tondafana. 11 Otaku ka holoka ovaprofeti ovanaipupulu vahapu, ndele tava pukifa vahapu. 12 Ndele oukolokoshi otau hapupala, nohole yavahapu otai ka talala. 13 Ashike ou te lididimike fiyo okexulilo ota ka xupifwa. 14 Ndele onghundana ei iwa yOuhamba otai ka udifilwa ounyuni aushe opo ovanhu vomoiwana aishe ve i ude,* opo nee exulilo tali uya.

15 “Onghee hano, ngeenge omwa mono oixuna oyo tai etifa ehanauno i li ofika ponhele iyapuki, ngaashi sha popiwa komuprofeti Daniel, (omuleshi na longife eendunge dokuyoolola), 16 opo nee ovo ve li muJudea nava ye onhapo keemhunda. 17 Ou ta hangika kombada yeumbo ina londoloka ko a ka pitule oinima yaye meumbo, 18 naau ta hangika mepya ina shuna meumbo a ka pitule mo oshikutu shaye shokombada. 19 Woo ovo tava ka hangika ovafimba novamwali pefimbo olo! 20 Kaleni tamu ilikana opo efimbo olo lokuya onhapo lihe uye pokufu* ile mefiku lEshabata 21 molwaashi otaku ke uya oudjuu munene oo inau kala ko nale okudja pehovelo lounyuni noitau ka kala ko vali. 22 Ngeno omafiku oo kaa li a xupipikwa, ngeno kape na omunhu ta ka xupifwa; ndele omolwovahoololwa, omafiku oo otaa ka xupipikwa.

23 “Ndele ngeenge umwe okwa ti kunye, ‘Tala Kristus oye ou,’ ile, ‘Oye winya!’ inamu shi itavela. 24 Osheshi otaku ka holoka ookristus novaprofeti ovanaipupulu notava ka longa oikumwifilonga ihapu opo va pukife nokuli novahoololwa. 25 Taleni! Onde mu londwela. 26 Hano ngeenge ovanhu ova ti kunye, ‘Tala, oku li mombuwa,’ inamu ya ko; ‘Tala, oku li monduda,’ inamu shi itavela. 27 Osheshi ngaashi ashike oluvadi hali shela koushilo ndele tali minikile fiyo okouninginino, okukala po* kwOmona womunhu nako osho taku ka kala ngaho. 28 Keshe oko ku na oshimhu, oko haku ongala eenhwa.

29 “Diva konima youdjuu womomafiku oo, etango otali ka laula, omwedi itau ka minikila vali, eenyofi otadi ka wa ko keulu, noikwaulu otai ka kakama. 30 Opo nee edidiliko lOmona womunhu otali ka holoka keulu, noiwana aishe* kombada yedu otai ka lila neenghono notai ka mona Omona womunhu te uya moilemo yokeulu e na eenghono noshinge shinene. 31 Ndele ota ka tuma ovaengeli vaye ve na omanghuma e na omawi a ya pombada, notava ka ongela ovahoololwa vaye okudja keembinga nhee domhepo, okudja komunghulo umwe weulu fiyo okomunghulo mukwao.

32 “Lihongeni kefaneko eli li na sha nomukwiyu: Diva shimha oitai yao ya tende, ndele tai twiyuka omafo, omu shii kutya okwenye oku li popepi. 33 Sha faafana, nanye ngeenge omwa mono oinima aishe oyo, shiiveni kutya Omona womunhu oku li popepi, poshivelo. 34 Oshili ohandi mu lombwele kutya epupi eli itali ka xula po nandenande fiyo oinima aishe oyo ya ningwa. 35 Eulu nedu otali ka xula po, ashike eendjovo dange kadi na nande efiku di xule po.

36 “Ndele shi na sha nefiku olo novili, kape na nande oumwe e i shii, kutya nee ovaengeli vomeulu ile Omona, ndele oTate aeke. 37 Ngaashi ashike sha li pefimbo laNoa, osho tashi ka kala yo pokukala po* kwOmona womunhu. 38 Osheshi pefimbo olo la tetekela Eyelu, ovanhu ova li hava li nokunwa, ovalumenhu tava hombola, novakainhu tava hombolwa, fiyo efiku olo Noa a ya monguluwato, 39 ndele inave shi didilika fiyo osheshi Eyelu le uya nole va hanauna po aveshe. Hano osho tashi ka kala ngaho pokukala po kwOmona womunhu. 40 Ndele otapa ka kala ovalumenhu vavali ve li mepya; umwe ota kufwa po, ndele umwe ota fiwa po. 41 Otapa ka kala ovakainhu vavali tava tu poshini; umwe ota kufwa po, ndele umwe ota fiwa po. 42 Onghee hano, kaleni oupafi osheshi kamu shii efiku olo Omwene weni te uya.

43 “Diladileni kwaashi: Ngeno mwene weumbo okwa li e shii kutya omulunga ote uya pongapi, ngeno ota kala oupafi noita efa eumbo laye li teywe. 44 Onghee hano, nanye kaleni mwe lilongekida, osheshi Omona womunhu ote uya povili oyo inamu diladila.

45 “Olyelye hano omupiya omudiinini nomunaendunge, oo omwene waye e mu nangeka po a pashukile ovapiya vaye moku va pa eendja pefimbo la wapala? 46 Omupiya oo ita ka kala tuu a hafa ngeenge omwene waye okwe mu hange ta ningi ngaho! 47 Oshili ohandi mu lombwele, omwene waye ote ke mu nangeka po a pashukile oinima yaye aishe.

48 “Ndele ngeenge omupiya ou omukolokoshi okwe lipopile momutima waye ta ti, ‘Omwene wange okwa kala ko,’ 49 ndele ta hovele okudenga ovapiya vakwao, ndele ta li nokunwa pamwe neengholwe, 50 omwene waye ote ke uya mefiku olo ine mu teelela nopovili oyo ehe shii. 51 Ndele ote ke mu handukila nehandu linene, note ke mu ekela monhele imwe novanaihelele, omo ta ka kala ta lilaana nokulikwesha komayoo.

25 “Ndele Ouhamba womeulu otau dulu okufaafanifwa noukadona omulongo ovo va kufa eelamba davo, ndele tava i va ka shakeneke omuhomboli. 2 Vatano vomuvo ova li omalai, ofimbo vatano ovanaendunge. 3 Ovo omalai ova kufa eelamba davo, ndele inava kufa omahooli, 4 ofimbo ovanaendunge va kufa eelamba davo nomahooli meeshanga.* 5 Eshi omuhomboli a kala ko, oukadona aveshe ova kwatwa keemhofi, ndele tava kofa. 6 Ndele mokati koufiku, opa li pa ningwa eingido tali ti: ‘Omuhomboli okwe uya! Indeni mu ke mu shakeneke.’ 7 Opo nee oukadona aveshe ova penduka ndele tava longekida eelamba davo. 8 Ovo omalai ova tya kwaavo ovanaendunge, ‘Tu peni mo momahooli eni, osheshi eelamba detu odi li pokudima.’ 9 Oukadona ovanaendunge ova nyamukula tava ti: ‘Pamwe itae ke tu wanena atusheni. Indeni mu ke lilandele kwaavo have a landifa.’ 10 Ofimbo tava i va ka lande, omuhomboli okwe uya. Ndele oukadona ovo va li ve lilongekida ova ya pamwe naye koshivilohombolo, ndele poshivelo tapa idilwa. 11 Konima yefimbo, oukadona vakwao navo ove uya, tava ti, ‘Omuhomboli, Omuhomboli, tu yeulula!’ 12 Okwe va nyamukula a ti, ‘Oshili ohandi mu lombwele, kandi mu shii.’

13 “Onghee hano, kaleni oupafi, osheshi kamu shii efiku novili.

14 “Ouhamba otau dulu yo okufaafanifwa nomulumenhu oo e li pokuya kondje yoshilongo. Ofimbo ina ya, okwa ifana ovapiya vaye ndele te va fiile oinima yaye. 15 Umwe okwe mu pa oitalenti* itano, umwe ivali, namukwao shimwe; keshe umwe shi fike pokudula kwaye, opo nee okwa ya kondje yoshilongo. 16 Ou a pewa itano okwa ya diva e ke i landakanife, ndele ta likola itano ya wedwa po. 17 Sha faafana, ou a pewa ivali naye okwa likola ivali ya wedwa po. 18 Ndele omupiya oo a pewa shimwe okwa ya, ndele ta fe elambo nokufudika oshimaliwa* shomwene waye.

19 “Eshi pa pita efimbo lile, omwene wovapiya ovo okwe uya okutala nghee va longa. 20 Opo nee ou a li a pewa oitalenti itano okwe uya e na oitalenti itano ya wedwa po, ta ti, ‘Omwene, owa li wa pa nge oitalenti itano, tala, onda likola itano ya wedwa po.’ 21 Omwene waye okwa tya kuye: ‘Owa ninga nawa omupiya ove muwa nomudiinini! Owa li omudiinini mwaai inini, onghee ohandi ku nangeke po u file oshisho oinima ihapu. Hafa pamwe nomwene woye.’ 22 Natango, ou a li a pewa oitalenti ivali okwe uya ndele ta ti, ‘Omwene, owa li wa pa nge oitalenti ivali; tala, onda likola ivali ya wedwa po.’ 23 Omwene waye okwa tya kuye: ‘Owa ninga nawa omupiya ove muwa nomudiinini! Owa li omudiinini mwaai inini, onghee ohandi ku nangeke po u file oshisho oinima ihapu. Hafa pamwe nomwene woye.’

24 “Xuuninwa, omupiya oo a li a pewa oshitalenti shimwe okwe uya, ndele ta ti: ‘Omwene, ondi shii kutya ove omulumenhu omukwanyanya, oho teya apa ino kuna noho ongele oikunomwa oyo ino longa. 25 Onghee onda li nda tila, ndele handi fudike oshitalenti shoye medu. Osho ngaha, shi tambula.’ 26 Omwene waye okwa tya kuye: ‘Omupiya ove omukolokoshi nomundedenhu, ngeenge ou shii kutya ohandi teya apa inandi kuna nohandi ongele oikunomwa apa inandi longa, 27 omolwashike ino yandja oshimaliwa* shange kovalandakanifi, opo eshi handi aluka ndi pewe oishoshela?

28 “‘Opo nee okwa tya kovapiya vaye, mu kufeni oshitalenti ndele tamu shi yandje kwaau e na oitalenti omulongo. 29 Osheshi keshe ou e na, ota pewa shihapu, ndele ta kala e na shihapu lela. Ndele ou ehe na sha, nokuli naasho e na ote shi kufwa. 30 Omupiya oo omundedenhu mu ekeleni momilaulu pondje. Opo ta ka kala ta lilaana nokulikwesha komayoo.’

31 “Omona womunhu ote ke uya moshinge shaye pamwe novaengeli aveshe, ndele ta ka kala omutumba kolukalwapangelo laye loshinge. 32 Opo nee oiwana aishe otai ka ongelwa koshipala shaye, nota ka tongola ovanhu muvakwao, ngaashi ashike omufita ta tongola eedi moikombo. 33 Ndele eedi ote ke di ameka keke laye lokolulyo, noikombo okolumosho laye.

34 “Opo nee Ohamba otai ka tya kwaavo ve li kolulyo layo: ‘Ileni, ava mwa nangekwa noupuna kuTate, mu fyuulule Ouhamba oo mwe u longekidilwa okudja pehovelo lounyuni. 35 Osheshi onda li nda fya ondjala, ndele omwa pa nge okulya; onda li nda fya enota, ndele omwa pa nge okunwa. Onda li omweendanandjila, ndele omwa yakula nge; 36 onda li olutu longaho,* ndele omwa djaleka nge. Onda li handi vele, ndele omwa fila nge oshisho. Onda li modolongo, ndele omwa talela nge po.’ 37 Opo nee ovayuki otave ke mu nyamukula tava ti: ‘Omwene, onaini twe ku mwene wa fya ondjala, ndele hatu ku pe okulya, ile wa fya enota, ndele hatu ku pe okunwa? 38 Onaini twe ku mwene u li omweendanandjila, ndele hatu ku yakula, ile u li olutu longaho, ndele hatu ku djaleke? 39 Onaini twe ku mwene to vele ile u li modolongo, ndele hatu ku talele po?’ 40 Ohamba otai ke va nyamukula tai ti, ‘Oshili ohandi mu lombwele, keshe osho mwa ningila umwe womovamwatate ava vanini, aame mwe shi ningila.’

41 “Opo nee ota ka tya kwaavo ve li kolumosho laye: ‘Djeni po pwaame, onye ava mwa tokolelwa omundilo waalushe, oo wa longekidilwa Ondiaboli novaengeli vayo. 42 Osheshi onda li nda fya ondjala, ndele inamu pa nge okulya; onda li nda fya enota, ndele inamu pa nge okunwa. 43 Onda li omweendanandjila, ndele inamu yakula nge; onda li olutu longaho, ndele inamu djaleka nge; onda li handi vele nonda li modolongo, ndele inamu fila nge oshisho.’ 44 Ndele navo otava ka nyamukula tava ti: ‘Omwene, onaini twe ku mwene wa fya ondjala ile enota ile u li omweendanandjila ile u li olutu longaho, to vele ile u li modolongo, ndele inatu ku yakula?’ 45 Opo nee ote ke va nyamukula ta ti: ‘Oshili ohandi mu lombwele, keshe osho inamu ningila umwe womwaava vanini, aame inamu shi ningila.’ 46 Ava otava ka hanaunwa po fiyo alushe, ndele ovayuki otava ka kala nomwenyo fiyo alushe.”

26 Eshi Jesus a mana okupopya oinima aishe oyo, okwa lombwela ovahongwa vaye ta ti: 2 “Omu shi shii kutya okudja paife oku na omafiku avali opo ku danwe Opaasa, nOmona womunhu ota ka yandjwa a valelwe komuti.”

3 Opo nee ovapristeri ovakulunhu novakulunhu voshiwana ova ongala momukala weumbo lomupristeri munene wedina Kajafas, 4 ndele ova kundafana va kwate po Jesus moku mu ningifa* a popye sha sha puka opo va dule oku mu dipaa. 5 Ndele ova tya: “Inatu mu kwata po pefimbo loshivilo opo paha holoke epiyaano mokati kovanhu.”

6 Fimbo Jesus a li muBetania meumbo laSimon, oo a li omunashilundu, 7 kuye okwe uya omukainhu umwe e na oshanga yomaadi* ondilo edimba liwa, ndele ta hovele oku a tila momutwe waye fimbo a li ta li.* 8 Eshi ovahongwa ve shi mona, ova handuka ndele tava ti: “Omolwashike omaadi taa hepifwa? 9 Ngeno okwa landifilwe po koimaliwa ihapu, ndele tai pewa eehepele.” 10 Eshi Jesus a uda osho tava popi, okwa tya kuvo: “Omolwashike mwa hala okuhandukifa omukainhu ou? Okwa longela nge oshilonga shiwa. 11 Eehepele odi li punye alushe, ndele ame itandi ka kala alushe punye. 12 Eshi a tila omaadi aa edimba liwa kolutu lange, okwe shi ninga a longekide olutu lange eshi handi ka fya. 13 Oshili ohandi mu lombwele, keshe apa onghundana ei iwa tai udifwa mounyuni aushe, oshilonga eshi omukainhu ou a longa nasho otashi ka hepaululwa opo a dimbulukiwe.”

14 Ndele umwe womwaavo omulongo navavali, oo ha ifanwa Judas Iskariot, okwa ya kovapristeri ovakulunhu, 15 ndele ta ti: “Otamu pe nge shike ngeenge onda yandje Jesus momake eni?” Opo nee ove mu udanekela ve mu pe oimaliwa yoisilveri 30. 16 Okudja opo, okwa kala ta kongo omhito tai wapalele opo a kengelele Jesus.

17 Ndele mefiku lotete lomingome inadi ya efulika, ovahongwa ove uya kuJesus, tava ti: “Openi wa hala tu ke ku longekidile ouvalelo wOpaasa?” 18 Opo nee okwa tya: “Indeni moshilando komulumenhu wonhumba ndele tamu ti kuye, ‘Omuhongi okwa ti: “Eufwafimbo lange oli li popepi; ohandi ka danena Opaasa pamwe novahongwa vange meumbo loye.”’” 19 Ndele ovahongwa ova ninga naanaa ngaashi Jesus e va lombwela nova longekida Opaasa.

20 Eshi kwa toka, Jesus okwa kala omutumba poshitaafula pamwe novahongwa vaye 12. 21 Ofimbo tava li, okwa tya: “Oshili ohandi mu lombwele, umwe womunye ota ka kengelela nge.” 22 Opo nee ova nyika oluhodi unene, ndele keshe umwe ta hovele oku mu pula, ta ti: “Omwene, haame ndi shii?” 23 Okwa nyamukula a ti: “Ou ta velele oshita naame metiti, oye ta ka kengelela nge. 24 Oshili, Omona womunhu ota ka fya ngaashi pa shangwa kombinga yaye, ndele woo omunhu ou te mu kengelele! Oshixwepo ngeno ka dalelwe.” 25 Ndele Judas, oo a li poku mu kengelela, okwa ti: “Muhongi,* haame ndi shii?” Jesus okwa tya kuye: “Enyamukulo ou li shii.”

26 Ndele ofimbo va li tava li, Jesus okwa kufa omungome, nokonima eshi a ilikana okwe u pambula, ndele te u pe ovahongwa vaye, ta ti: “Tambuleni, lyeni. Omungome ou otau faneke olutu lange.” 27 Opo nee okwa kufa eholo, ta pandula noku li va pa, ta ti: “Nweni mo amushe, 28 osheshi otali faneke ‘ohonde yange yehangano,’ oyo tai tilwashi omolwokudima po omatimba avahapu. 29 Ndele ohandi mu lombwele: Okudja nena eli itandi ka nwa vali nandenande omaviinyu aa fiyo efiku olo handi ke a nwa mape pamwe nanye mOuhamba waTate.” 30 Xuuninwa, eshi va imba omaimbilohambelelo,* ova dja mo ndele tava i kOmhunda yEemono.

31 Opo nee Jesus okwa tya kuvo: “Amushe otamu ka fiya nge po oufiku wonena, osheshi opa shangwa: ‘Ohandi ka denga omufita, needi doufita otadi ke lihana.’ 32 Ndele shimha nda nyumuka, ohandi ke mu tetekela kuGalilea.” 33 Opo nee Petrus okwe mu nyamukula ta ti: “Nande vakwetu aveshe nave ku fiye po omolwoshinima osho to ka ningilwa, ame nghi na fiku ndi ku fiye po!” 34 Jesus okwa tya kuye: “Oshili ohandi ku lombwele, oufiku ou, fimbo ekondobolo inali kwena, oto ke lidimbika nge lutatu.” 35 Petrus okwa tya kuye: “Kutya nee otashi pula ndi fye pamwe naave, itandi ke ku lidimbika nande.” Ovahongwa vakwao aveshe navo ova popya sha faafana.

36 Ndele Jesus okwa ya novahongwa vaye konhele hai ifanwa Getsemane, opo nee okwa tya kuvo: “Kaleni omutumba apa fimbo handi i kwinya ndi ka ilikane.” 37 Opo nee okwa kufa Petrus novana vaSebedeus vavali, ndele okwa hovela okunyika oluhodi neenghono. 38 Okwa tya kuvo: “Onda* nyika oluhodi neenghono, nokuli fiyo okufya. Kaleni apa, nokukala oupafi pamwe naame.” 39 Ndele okwa ehena komesho kanini, te linyongamene pedu, ndele ta ilikana, ta ti: “Tate, ngeenge otashi dulika, eholo eli nali pitilile nge po. Ashike, hangaashi ame nda hala, ndele ongaashi ove wa hala.”

40 Opo nee okwa alukila kovahongwa vaye ndele okwe va hanga va kofa, ndele ta ti kuPetrus: “Hano itamu dulu okukala oupafi nande ovili imwe pamwe naame? 41 Kaleni oupafi nokukala tamu ilikana opo muha ye momayeleko. Oshoshili kutya omhepo oya halelela, ndele ombelela oi na ounghundi.” 42 Opo nee okwa shuna ko olutivali, ndele ta ilikana ta ti: “Tate, ngeenge itashi dulika eholo eli li koye nge inandi li nwa, ehalo loye nali wanifwe.” 43 Ndele okwe uya vali nokwe va hanga va kofa, osheshi omesho avo okwa li a dinda keemhofi. 44 Okwa shuna ko vali, ndele ta ilikana olutitatu, a popyulula eendjovo da faafana. 45 Opo nee okwa alukila kovahongwa, ndele ta ti kuvo: “Eli halo efimbo lokukofa nokufuda po! Taleni! Efimbo ola fika Omona womunhu a yandjwe momake ovalunde. 46 Fikameni tu yeni. Taleni! Ou ta kengelele nge oku li popepi.” 47 Ofimbo a li natango ta popi, Judas, umwe womwaavo omulongo navavali, okwe uya pamwe nongudu inene i na omaongamukonda needibo, va tumwa kovapristeri ovakulunhu nokovakulunhu voshiwana.

48 Ndele omukengeleli waye okwe va pa edidiliko, ta ti: “Ou handi xupita, oye ngaho; mu kwateni po.” 49 Opo nee Judas okwa ya a yukilila kuJesus, nokwa tya kuye: “Muhongi,* wa tokelwa po!” Ndele te mu xupita. 50 Jesus okwa tya kuye: “Kaume, owe uya okuninga shike apa?” Opo nee ova ehena kuJesus ndele tave mu kwata po. 51 Ndele tala, umwe womwaavo va li naJesus okwa kwata eongamukonda laye ndele te li pweya mo, nokuteta ko okutwi kwomupiya womupristeri munene. 52 Opo nee Jesus okwa tya kuye: “Shunifa mo eongamukonda loye moshilaleko, osheshi aveshe ava tava longifa eongamukonda otava ka fya keongamukonda. 53 Ile oto diladila kutya itandi dulu okwiindila Tate a tumine nge mepakumo leisho ovaengeli omayovi?* 54 Ndele ngeenge onda ningi ngaho, omishangwa otadi ka wanifwa ngahelipi odo tadi ti kutya osho shi na okuningwa ngaho?” 55 Pefimbo opo tuu opo Jesus okwa tya keengudu dovanhu: “Omwe uya okukwata nge po mu na omaongamukonda needibo mwa fa mwe uya okukwata po ombudi? Efiku nefiku onda li handi kala omutumba motembeli handi hongo, ashike inamu kwata nge po. 56 Ndele aishe oyo oya ningwa, opo osho sha shangwa* kovaprofeti shi wanifwe.” Opo nee ovahongwa aveshe ove mu fiya po, va ya onhapo.

57 Ovo va kwata po Jesus ove mu twala keumbo laKajafas, omupristeri munene, oko kwa li kwa ongala ovanongo vomishangwa novakulunhu voshiwana. 58 Petrus okwa kala te mu shikula e li konima kokule fiyo omomukala womupristeri munene. Eshi a ya mo, okwa kala omutumba povapiya opo a tale osho tashi ningwa po.

59 Ndele ovapristeri ovakulunhu noilyo aishe ikwao yOmhangu yoPombada yOvajuda ova li va konga ovanhu va totele Jesus omahokololo oipupulu opo va dule oku mu dipaa. 60 Ashike inava mona nande oumwe, nonande opa li pa holoka eembangi doipupulu dihapu. Xuuninwa ope ke uya mbali, 61 ndele tadi ti: “Omulumenhu ou okwa tile, ‘Ohandi dulu okungumauna po otembeli yaKalunga noku i tungulula omafiku atatu.’” 62 Opo nee omupristeri munene okwa fikama, ndele ta ti kuye: “Ito nyamukula sha? Ku udite ko hano eshi ovalumenhu ava tave ku hokololifa?” 63 Ndele Jesus okwa kala ashike a mwena. Opo nee omupristeri munene okwa tya kuye: “Ohandi ku anifa kuKalunga omunamwenyo u tu lombwele ngeenge oove Kristus, Omona waKalunga!” 64 Jesus okwa tya kuye: “Osho naanaa ngaashi wa popya. Ndele ohandi mu lombwele: Okudja paife otamu ka mona Omona womunhu e li omutumba kolulyo laKalunga Omunaenghono note uya moilemo yokeulu.” 65 Eshi omupristeri munene eshi uda, okwa pombaula oshikutu shaye shokombada, ndele ta ti: “Omulumenhu ou okwa sheka Kalunga! Omolwashike twa pumbwa vali okukonga eembangi? Taleni! Nanye omwe mu uda eshi ta sheke Kalunga. 66 Otamu ti ngahelipi?” Ova nyamukula tava ti: “Okwa wana okufya.” 67 Opo nee ove mu fiila omate moshipala noku mu denga neengonyo. Vamwe ove mu denga nomanghava moshipala, 68 tava ti: “Kristus, tu xunganekela, olyelye e ku denga?”

69 Ndele Petrus okwa li omutumba pondje momukala, nokakadona kamwe okapiya oke uya kuye, ndele taka ti: “Naave owa li pamwe naJesus Omugalilea!” 70 Ashike okwe likala moipafi yaaveshe, ta ti: “Nghi shii kutya oto popi kombinga yashike.” 71 Eshi a ya a finda koshivelo, okakadona kamwe vali oke mu mona, ndele taka ti kwaavo ve li po: “Omulumenhu ou okwa li pamwe naJesus Omunasaret.” 72 Natango okwe shi likala nokwaana ta ti: “Omulumenhu nghi mu shii!” 73 Konima yokafimbo, ovo va li ofika ove uya, ndele tava ti kuPetrus: “Oshili naave yo oumwe womuvo, osheshi elaka loye* ole ku holola.” 74 Ndele okwa hovela okulifingaela nokwaana ta ti: “Omulumenhu nghi mu shii!” Opo nee diva ekondobolo ola kwena. 75 Petrus okwa dimbuluka osho Jesus a li e mu lombwela, a ti: “Fimbo ekondobolo inali kwena, oto ke lidimbika nge lutatu.” Opo nee okwa ya pondje nokwa lila unene.

27 Ongula eshi kwa sha, ovapristeri ovakulunhu aveshe novakulunhu voshiwana ova kundafana opo va dipae Jesus. 2 Konima eshi ve mu manga, ove mu twala kuPilatus, oo a li ngoloneya.

3 Opo nee Judas, oo e mu kengelela, eshi a mona kutya Jesus okwa tokolwa, okwe lipa oushima ndele ta shunifa oimaliwa oisilveri 30 kovapristeri ovakulunhu nokovakulunhu voshiwana, 4 ta ti: “Onda nyona eshi nda kengelela omulumenhu ehe na etimba.”* Ova ti: “Osho otu na shike nasho? Tala kutya oto ningi po shike!”* 5 Onghee okwa ekela oimaliwa yoisilveri motembeli, ndele ta i e ke limangeleke. 6 Ovapristeri ovakulunhu ova kufa po oimaliwa yoisilveri, ndele tava ti: “Kashi li pamhango oku i tula moshikefa shiyapuki, osheshi oyo ofuto yohonde.” 7 Konima eshi va kundafana, oimaliwa oyo ove i landa po epya lomuhongi woitoo li ninge onhele yokupaka ovanailongo. 8 Onghee onhele oyo ohai ifanwa Onhele yOhonde fiyo okunena. 9 Kungaho, osho sha li sha popiwa okupitila momuprofeti Jeremia osha wanifwa, eshi a ti: “Ova kufa oimaliwa oisilveri 30, ondado yomulumenhu, oyo ovana vamwe vaIsrael va dimina oku mu landa po. 10 Ndele ove i landa po onhele, ngaashi Jehova a lombwela nge.”

11 Jesus okwa li ofika koshipala shangoloneya, na ngoloneya okwe mu pula a ti: “Oove Ohamba yOvajuda?” Jesus okwa ti: “Osho naanaa ngaashi wa popya.” 12 Ndele eshi a li ta hokololifwa kovapristeri ovakulunhu nokovakulunhu voshiwana, ina nyamukula sha. 13 Opo nee Pilatus okwa tya kuye: “Ku udite ko hano oinima ihapu oyo to hokololifwa?” 14 Ashike naye ine mu nyamukula sha, onghee ngoloneya oo okwa li a kumwa neenghono.

15 Osha li onghedindjikilile poshivilo keshe shopaasa ngoloneya a mangulule omunadolongo umwe oo ongudu yovanhu ya hala a mangululwe. 16 Pefimbo opo ova hangika ve na mo omunadolongo omukolokoshi wedina Barabas. 17 Onghee eshi va ongala, Pilatus okwa tya kuvo: “Olyelye mwa hala ndi mu mangululile, oBarabas ile oJesus, ou taku tiwa oKristus?” 18 Pilatus okwa li e shi shii kutya ove mu yandja momake aye omolwondubo. 19 Ndele fimbo e li omutumba kolukalwatokolo, omukulukadi waye okwe mu tumina etumwalaka, ta ti: “Omulumenhu oo omuyuki ino mu ningila sha, osheshi onda twa ondjodi kombinga yaye, noya tilifa nge neenghono.” 20 Ashike ovapristeri ovakulunhu novakulunhu voshiwana ova xwaxwameka eengudu dovanhu di pule di mangululilwe Barabas nokudipaifa Jesus. 21 Ngoloneya okwe va pula vali ta ti: “Pwaava vavali, olyelye mwa hala ndi mu mangululile?” Ova tya: “OBarabas.” 22 Pilatus okwa tya kuvo: “Oshike ndi na okuninga po shi na sha naJesus, ou taku tiwa oKristus?” Aveshe ova ti: “Na valelwe komuti!” 23 Okwa ti: “Omolwashike? Okwa longa owii washike?” Ova twikila okwiingida mokule: “Na valelwe komuti!”

24 Eshi Pilatus a mona kutya eenghendabala daye inadi kwafa sha, ndele ponhele yaasho eweelelo ola ya ashike pombada, okwa kufa omeva ndele ta kosho omake aye moipafi yongudu yovanhu, ta ti: “Ame nghi na etimba lohonde yomulumenhu ou. Taleni kutya otamu mu ningi ngahelipi.” 25 Ovanhu aveshe ova nyamukula tava ti: “Ohonde yaye nai uye kombada yetu nokombada yovana vetu.” 26 Opo nee okwe va mangululila Barabas, ndele okwa dengifa Jesus nokwe mu yandja a ka valelwe komuti.

27 Ndele ovakwaita vangoloneya ova twala Jesus meumbo langoloneya, nova ongaleka etangakwaita alishe le mu dingilila. 28 Opo nee ove mu dula, noku mu kambeka elapi litilyana, 29 ndele tava tungu oshishani shomakiya noku shi tula komutwe waye, ndele tave mu pe olumbungu meke laye lokolulyo. Opo nee ove mu twila eengolo, tave mu sheke tava ti: “Kundwa, oove Ohamba yOvajuda!” 30 Ndele ove mu fiila omate nova kufa olumbungu ndele tava hovele oku mu denga komutwe. 31 Konima eshi ve mu sheka, ove mu dula elapi, ndele tave mu dike oikutu yaye yokombada noku mu twala a ka valelwe komuti.

32 Ndele fimbo tava i, ova shakeneka omulumenhu Omukireni wedina Simon. Omulumenhu oo ove mu fininika a humbate omuti womahepeko* waJesus. 33 Eshi va fika ponhele hai ifanwa Golgata, sha hala okutya, Onhele yOmakolotwe, 34 ova pa Jesus a nwe ngeno omaviinyu a lumbakanifwa nonyango,* ndele eshi e a makela, okwa anya oku a nwa. 35 Eshi ve mu valela komuti, ove litukulila oikutu yaye yokombada ve i ningila oshihoololifo, 36 nova kala omutumba opo, opo ve mu pashukile. 37 Pomutwe waye ova tula po yo okapapa ka shangwa etomheno kutya omolwashike a dipawa, tali ti: “Ou oJesus, Ohamba yOvajuda.”

38 Opo nee opa li ovakolokoshi vavali va valelwa pamwe naye, umwe okolulyo laye naumwe okolumosho laye. 39 Ovo va li tava ende po ova li tave mu sheke nokupukapuka komitwe, 40 tava ti: “Owa tile oto ngumauna po otembeli noku i tungulula moule womafiku atatu, lixupifa ove mwene! Ngeenge ove omona waKalunga, dja ko komuti womahepeko!”* 41 Ovapristeri ovakulunhu, ovanongo vomishangwa novakulunhu voshiwana, navo ova hovela oku mu sheka, tava ti: 42 “Vakwao okwa li he va kwafa, ndele ye mwene ite likwafa! Oye Ohamba yaIsrael; na dje ko paife komuti womahepeko,* opo nee ohatu ke mu itavela. 43 Okwe lineekela Kalunga; ne mu xupife ngeenge okwe mu hokwa, osheshi okwa ti, ‘Ame Omona waKalunga.’” 44 Nokuli novakolokoshi ovo va li va valelwa pamwe naye ova li tave mu sheke.

45 Ndele lwopokati komutenya* fiyo oponhatu yomutenya,* okwa li kwa laula fokofoko. 46 Lwoponhatu, Jesus okwa ingida mokule, ta ti: “Eli, Eli, lama sabaktani?” sha hala okutya, “Kalunga kange, Kalunga kange, omolwashike wa ekela nge shi?” 47 Eshi vamwe ovo va li po ofika ve shi uda, ova ti: “Omulumenhu ou ota ifana Elia.” 48 Diva umwe womuvo okwa tondoka ndele ta kufa okayavo noku ka yaveka momaviinyu malula ndele te ka tula kolumbungu noku mu pa a nwe. 49 Ndele vakwao ova tya kuye: “Mu efa tu tale ngeenge Elia ote uya e mu kwafele.” 50 Natango Jesus okwa ingida mokule, opo nee okwa fya.

51 Ndele tala, elapi olo la tukula otembeli ola tauka pokati, okudja pombada fiyo opedu, edu ola kakama nomamanya okwa tatauka. 52 Eembila* oda li da yeuluka, noimhu ihapu yovayapuki ovo va fya oya umbwa mo, noya monika kovanhu vahapu. 53 (Ndele ovanhu ovo va li pomaendo eshi Jesus a nyumuka, ova ya moshilando shiyapuki).* 54 Eshi omukulunhu wetangakwaita naavo va li naye va nangela Jesus va mona ekakamo ledu noinima oyo ya li tai ningwa, ova li va tila neenghono, ndele tava ti: “Ou okwa li shili Omona waKalunga.”

55 Opo nee ovakainhu vahapu ovo va li pamwe naJesus tave mu yakula okudja kuGalilea ova li tava tale ve li kokule; 56 mokati kavo omwa li Maria Magdalena, Maria ina yaJakob naJoses nosho yo omukulukadi waSebedeus, ina yaJakob naJohannes.

57 Ndele komatango, Josef omulumenhu oshipuna wokuArimatia, oo naye a li omuhongwa waJesus, 58 okwa ya kuPilatus ndele ta pula a pewe oshimhu shaJesus. Opo nee Pilatus okwa yandja elombwelo e shi pewe. 59 Josef okwa kufa oshimhu, ndele te shi dingile melapi londilo liyela loliina, 60 ndele te shi tula mombila* yaye ipe, oyo a li e i lihokela memanya. Konima eshi a undulila emanya linene poshivelo shombila,* okwa ya. 61 Ashike Maria Magdalena naMaria mukwao opo va kala, ve li omutumba pombila.

62 Efiku la landula ko, olo la li efiku lEshabata, ovapristeri ovakulunhu nOvafarisai ova li va ongala koshipala shaPilatus, 63 tava ti: “Omufimanekwa, otwa dimbuluka kutya omupukifi winya eshi a li e na omwenyo okwa tile, ‘Ohandi ka nyumuka konima yomafiku atatu.’ 64 Onghee hano, yandja elombwelo opo ombila i nangelwe fiyo efiku etitatu opo ovahongwa vaye vehe mu vake mo, ndele tava ti kovanhu, ‘Okwa nyumunwa koufi!’ Nepukifo olo laxuuninwa otali ka kala lii li dule linya lotete.” 65 Pilatus okwa tya kuvo: “Kufeni ovanangeli va ka nangele ombila.” 66 Onghee ova ya, ndele emanya olo la idila kombila tave li undulile po nawanawa nokutula po ovanangeli.

28 Konima yEshabata, mefiku lotete koshivike eshi eluwa la tenda, Maria Magdalena nosho yo Maria mukwao ove uya okutala kombila.

2 Ndele tala, opa ningwa ekakamo ledu linene, osheshi omweengeli waJehova a dja meulu okwe uya ndele ta undula po emanya, nokukala ko omutumba. 3 Omweengeli oo okwa li ta vema a fa oluvadi, noikutu yaye oya li itoka tootoo. 4 Ndele molwaashi ovanangeli vombila ova li ve mu tila, ova kakama nova fya ombabanghukuta.

5 Opo nee omweengeli okwa tya kovakainhu: “Inamu tila, osheshi ondi shi shii kutya otamu kongo Jesus oo a li a valelwa komuti. 6 Ke mo omu; okwa nyumuka ngaashi a popile. Ileni mu tale onhele apa a li a nangala. 7 Ndele indeni diva mu ka lombwele ovahongwa vaye kutya okwa nyumunwa koufi, ndele taleni, ote mu tetekele kuGalilea; oko tamu ke mu hanga. Dimbulukeni osho nde mu lombwela.”

8 Opo nee ova dja po diva pombila,* ve na oumbada nehafo linene, ndele tava tondoka va ka lombwele ovahongwa vaye. 9 Ndele tala, Jesus okwe va shakeneka nokwe va popifa. Opo nee ova ehena kuye nokukwata keemhadi daye ndele tave mu linyongamene.* 10 Jesus okwa tya kuvo: “Inamu tila! Indeni mu ka lombwele ovamwatate va ye kuGalilea, oko tava ka hanga nge.”

11 Fimbo ovakainhu va li mondjila, ovanangeli vamwe ova ya moshilando, ndele tava lombwele ovapristeri ovakulunhu aishe oyo ya ningwa po. 12 Konima eshi ovapristeri ovakulunhu va ongala novakulunhu voshiwana ndele tava kundafana, ova yandja oimaliwa yoisilveri ihapu kovakwaita, 13 ndele tava ti: “Tyeni, ‘Ovahongwa vaye ove uya oufiku ndele tave mu vake mo fimbo twa kofa.’ 14 Ndele ngeenge eshi osha udika kungoloneya, ohatu ke mu yelifila* kombinga yoshinima osho; inamu pumbwa okulipula nasha.” 15 Onghee ova tambula oimaliwa ndele tava ningi ngaashi va lombwelwa, nehokololo olo ola li la tandavela mokati kOvajuda fiyo okunena.

16 Ndele ovahongwa 11 ova ya kuGalilea komhunda oko Jesus e va lombwela a shakene navo. 17 Eshi ve mu mona, ove mu linyongamena,* ndele vamwe ova li va limbililwa. 18 Jesus okwe uya ndele ta popi navo, ta ti: “Onda pewa eenghonopangelo adishe meulu nokombada yedu. 19 Onghee hano, indeni mu ka ninge ovanhu vomoiwana aishe ovahongwa, noku va ninginifa medina laXe nolOmona nolomhepo iyapuki; 20 va hongeni okudiinina oinima aishe oyo nde mu lombwela. Ndele taleni! Ondi li pamwe nanye alushe fiyo omomafiku axuuninwa ounyuni ou.”*