EMBO LAMARKUS

1 Ehovelo longhundana iwa i na sha naJesus Kristus, Omona waKalunga. 2 Omishangwa oda ti: “Tala, ame ohandi tumu omutumwa wange e ku tetekele,* oo te ke ku longekidila ondjila.”* Ngaashi ashike sha shangwa komuprofeti Jesaja: 3 “Ondaka otai ingida mombuwa, tai ti: ‘Longekidileni Jehova ondjila! Lalakanifeni omalila aye.’” 4 Johannes Omuninginifi okwa ya mombuwa, ndele ta udifile ovanhu kutya ove na okuninginifwa va ulike kutya ove lidilulula opo va diminwe po omatimba avo. 5 Opo nee ovanhu vomuJudea ashishe novakalimo aveshe vomuJerusalem ova ya kuye, nova hepaulula moipafi omatimba avo nokuninginifwa momulonga waJordan. 6 Johannes okwa li ha djala oshikutu sholududi longamelo nekwamo loshipa moshiya shaye. Oikulya yaye oya li oshipaxu nomaadi eenyiki. 7 Okwa li ta udifa ta ti: “Otaku di umwe oo e na eenghono e dule nge, oo inandi wana nokuli okumangulula eemwiya deenghaku daye. 8 Ame ohandi mu ninginifa momeva, ndele ye ote ke mu ninginifa nomhepo iyapuki.”

9 Moule womafiku oo, Jesus okwa dja kuNasaret shomuGalilea ndele ta ninginifwa kuJohannes momulonga waJordan. 10 Ndele diva eshi a dja momeva, okwa mona eulu la yeuluka, nomhepo iyapuki ya fa onghuti oye uya kombada yaye. 11 Opo nee meulu omwa dja ondaka tai ti: “Ove Omona wange omuholike; onde ku hokwa.”

12 Ndele diva omhepo iyapuki oye mu twala mombuwa. 13 Onghee okwa kala mombuwa omafiku 40, ndele ta hongaulwa kuSatana. Mombuwa omwa li yo oifitukuti, ashike ovaengeli ova li tave mu kwafele.

14 Konima eshi Johannes a kwatwa po, Jesus okwa ya kuGalilea, ta udifa onghundana iwa ya dja kuKalunga, 15 ta ti: “Eufwafimbo ola wanifwa, nOuhamba waKalunga owa ehena popepi. Lidilululeni, nye mu itavele onghundana iwa.”

16 Ofimbo a li ta ende pomunghulo wefuta laGalilea, okwa mona Simon nomumwaina Andreas tava umbile eenete davo mefuta, osheshi ova li ovayuli veeshi. 17 Ndele Jesus okwa tya kuvo: “Shikulei nge, opo ndi ke mu ninge ovayuli vovanhu.” 18 Opo nee ova fiya po diva eenete davo, ndele tave mu shikula. 19 Eshi va ya komesho kanini, okwa mona vali Jakob naJohannes, ovana vaSebedeus, ve li mowato tava hondjo eenete davo, 20 ndele te va ifana diva. Onghee ova fiya xe mowato novanailonga vaye, ndele tave mu shikula. 21 Opo nee ova ya kuKapernaum.

Ndele ye okwa ya moshinagoga mefiku lEshabata, nokwa hovela okuhonga. 22 Ovanhu ova li va kuminwa onghedi yaye yokuhonga, osheshi okwa li e va honga ngaashi ou e na eenghono, ndele hangaashi ovanongo vomishangwa. 23 Moshinagoga shavo omwa li omulumenhu e na omhepo ya nyata, tai ingida pombada tai ti: 24 “Owe tu halela shike Jesus Omunasaret? Owe uya oku tu hanauna po? Ondi shi shii lela kutya oove lyelye, oove Omuyapuki waKalunga!” 25 Jesus okwe i hanyena, ta ti: “Mwena, ndele to di mo muye!” 26 Opo nee omhepo ya nyata oya pundula omulumenhu oo noya ingida pombada, ndele tai di mo muye. 27 Ovanhu aveshe ova li va kumwa ndele tava hovele okupopya tava ti: “Oshike eshi? Ehongo eli kali kumwifi tuu! Oku na nokuli eenghono dokuta mo eemhepo da nyata ndele tadi dulika kuye.” 28 Ndele ehokololo li na sha naye ola tandavela diva moshitukulwa ashishe shaGalilea.

29 Opo nee ova dja mo moshinagoga, ndele tava i naJakob naJohannes keumbo looSimon naAndreas. 30 Ndele ova hanga inamweno yaSimon a nangala e kwetiwe koshidu, nova lombwela diva Jesus. 31 Opo nee okwa ya puye, te mu kwata keke noku mu yambula po. Ndele okwa veluka, nokwa hovela oku va yakula.

32 Efimbo lokonguloshi, eshi etango la ningina, ovanhu ova hovela okweeta kuye aveshe ovo va li tava vele naavo va li ve na eendemoni; 33 novanhu aveshe vomoshilando ova li va ongala poshivelo sheumbo. 34 Onghee okwa velula vahapu ovo va li tava vele omikifi di lili noku lili, nokwa ta mo eendemoni dihapu, ashike ina efa nande eendemoni di popye kombinga yaye, osheshi odi mu shii kutya oye Kristus.*

35 Ongula inene, fimbo eluwa inali tenda, okwa penduka nokwa ya pondje ndele ta i konhele ye likalela, opo nee okwa hovela okwiilikana. 36 Ndele Simon naavo va li pamwe naye ova konga Jesus 37 nove mu mona, opo nee ova tya kuye: “Ovanhu aveshe otave ku kongo.” 38 Ndele okwa tya kuvo: “Tu yeni pamwe pe lili, moitukulwa oyo i li popepi opo yo ndi ka udifile ko, osheshi osho nda endela.” 39 Opo nee okwa ya, ndele ta udifile meeshinagoga davo muGalilea ashishe nokwa ta mo eendemoni.

40 Kuye okwe uya vali omunashilundu, te mu indile a twa eengolo, ta ti kuye: “Ngeenge owa hala, oto dulu okuvelula nge.” 41 Onghee okwa li e mu uditile olukeno, nokwa yelula eke laye noku mu kwata, ndele ta ti kuye: “Onda hala! Veluka.” 42 Opo nee okwa veluka diva koudu waye woshilundu. 43 Ndele okwe mu kunghilila nokwe mu lekela diva, 44 a ti: “Tala, ino lombwela nande oumwe, ashike inda u ke liulike komupristeri nokuyandja omayambo oye eveluko ngaashi sha popiwa kuMoses, shi ninge oumbangi kuvo.” 45 Ndele omulumenhu oo eshi a ya, okwa hovela okutandavelifa ehokololo olo apeshe, onghee Jesus ka li vali a dula okuya moshilando osho moipafi, ndele okwa kala ashike kondje yasho, ta udifile moitukulwa oyo ye likalela. Ashike natango ovanhu ova kala tave uya kuye okudja keembinga adishe.

2 Ndele konima yomafiku onhumba, Jesus okwa li vali a ya kuKapernaum, novanhu ova li va uda kutya oku li meumbo limwe. 2 Opo nee meumbo olo omwa li mwa ongala ovanhu vahapu neenghono fiyo oposhivelo, nokwa li a hovela oku va lombwela onghundana iwa. 3 Ndele ova eta kuye oshingudu sha humbatwa kovalumenhu vane. 4 Ashike molwaashi kava li va dula okuya opo pa li Jesus omolwouhapu wovanhu, ova twa ombululu pombada yeumbo ndele tava kulukifa olutala oko kwa li kwa nangala oshingudu. 5 Eshi Jesus a mona kutya ove na eitavelo, okwa lombwela oshingudu ta ti: “Omumwange, omatimba oye okwa dimwa po.” 6 Ovanongo vomishangwa vamwe ovo va li po, ve li omutumba, ove lipopila momitima davo, tava ti: 7 “Omolwashike omulumenhu ou ta popile ngaha? Ota sheke Kalunga. Olyelye vali ta dulu okudima po omatimba ehe fi ashike Kalunga?” 8 Eshi Jesus a didilika diva kutya osho tava diladila ngaho, okwa tya kuvo: “Omolwashike tamu diladila ngaho momitima deni? 9 Shilipi po shipu; okutya koshingudu, ‘Omatimba oye okwa dimwa po,’ ile okutya, ‘Fikama, kufa olutala loye ndele to ende’? 10 Ndele opo mu shiive kutya Omona womunhu oku na eenghono dokudima po omatimba kombada yedu . . . ” okwa tya koshingudu: 11 “Ohandi ku lombwele, fikama, kufa olutala loye, ndele to i keumbo leni.” 12 Opo nee omulumenhu oo okwa fikama nokwa kufa diva olutala laye, ndele ta ende komesho yavo aveshe. Onghee aveshe ova li va kumwa, ndele tava hambelele Kalunga, tava ti: “Inatu mona nande onale oshinima sha tya ngaha.”

13 Natango Jesus okwa ya komunghulofuta, ndele ongudu yovanhu aishe oye uya kuye, nokwa li a hovela oku va honga. 14 Ndele fimbo a li ta ende pombelewa yomafutilo oifendela, okwa mona Levi, omonamati waAlfeus, e li po omutumba, nokwa tya kuye: “Ninga omushikuli wange.” Opo nee okwa fikama diva ndele te mu shikula. 15 Lwanima, Jesus okwa li ta li* meumbo laLevi, pamwe novahongwa vaye nosho yo ovafendelifi novalunde vahapu, osheshi opa li vahapu vomuvo ovo va li tave mu shikula. 16 Ndele eshi ovanongo vomishangwa vomOvafarisai va mona kutya ota li pamwe novalunde nosho yo novafendelifi, ova tya kovahongwa vaye: “Omolwashike ta li pamwe novafendelifi nosho yo ovalunde?” 17 Eshi Jesus e shi uda, okwa tya kuvo: “Ovanhu ovo ve na oukolele inava pumbwa omuhakuli, ndele ovovo ashike tava vele. Ame inandi endela ovayuki, ndele ovalunde.”

18 Pefimbo olo ovahongwa vaJohannes nOvafarisai ova li have lidilike oikulya. Onghee ove uya kuye ndele tava ti: “Omolwashike ovahongwa vaJohannes novahongwa vOvafarisai have lidilike oikulya, ndele ovahongwa voye ihave lidilike?” 19 Opo nee Jesus okwa tya kuvo: “Ookaume komuhomboli mbela ova pumbwa ngoo okulidilika fimbo omuhomboli e li navo? Kave na okulidilika fimbo omuhomboli e li pamwe navo. 20 Ndele omafiku otae uya eshi omuhomboli te ke va kufwa, opo nee otave ke lidilika mefiku olo. 21 Kape na omunhu ta vandeke oshikutu shikulu noshivando shipe. Ngeenge okwa ningi ngaho, oshivando shipe otashi pombola oshikutu shikulu, nombululu otai ningi inene. 22 Natango, kape na omunhu ha tula omaviinyu mape momakutu makulu. Ngeenge okwa ningi ngaho, omakutu otaa pomboka ndele omaviinyu taa tika mo, nomakutu otaa nyonauka. Ndele omaviinyu mape ohaa tulwa momakutu mape.”

23 Fimbo ye novahongwa vaye va li tava tavakana momapya mefiku lEshabata, ovahongwa vaye ova enda tava pweya oilya, ndele tava li. 24 Opo nee Ovafarisai ova tya kuye: “Tala, omolwashike tava ningi osho inashi pitikwa pamhango okuningwa mefiku lEshabata?” 25 Ndele okwa tya kuvo: “Hamba inamu lesha osho David a li a ninga eshi ye novalumenhu ovo va li pamwe naye va li va fya ondjala? 26 Inamu lesha hamba mehokololo li na sha nomupristeri omukulunhu Abjatar, nghee David a ya meumbo laKalunga ndele ta li omingome detaliko, nokwa pa yo ovalumenhu ovo a li navo nonande oda li ashike di na okuliwa kovapristeri?” 27 Opo nee okwa tya kuvo: “Kalunga okwa tula po Eshabata omolwouwa wovanhu ndele ina shita omunhu a kale ta diinine Eshabata. 28 Onghee hano, Omona womunhu oye Omwene wEshabata.”

3 Ndele okwa ya vali moshinagoga omo mwa li omulumenhu e na eke la fya. 2 NOvafarisai ova li tave mu tale nokukonenena va tale ngeenge ota velula omulumenhu oo mefiku lEshabata, opo va dule oku mu hokololifa. 3 Okwa tya komulumenhu oo e na eke la fya: “Fikama ndele to uya pokati apa.” 4 Ndele okwa tya kuvo: “Oilonga ilipi i na okulongwa pamhango mefiku lEshabata: okulonga ouwa ile okulonga owii, okuxupifa omwenyo ile okudipaa?” Ashike inava nyamukula sha. 5 Konima eshi e va tala a handuka nokwa nyika oluhodi neenghono omolwoukukutu womitima davo, okwa tya komulumenhu: “Yukililifa eke loye.” Opo nee omulumenhu okwa yukililifa eke laye, nola veluka. 6 Okudja opo, Ovafarisai ova ya pondje nova hovela diva okupangela omhangela novayambididi vaHerodes, opo ve mu dipae.

7 Ndele Jesus okwa ya pamwe novahongwa vaye kefuta, nokwa shikulwa kongudu yovanhu va dja kuGalilea nokuJudea. 8 Vamwe ova dja kuJerusalem nokuIdumea nosho yo moitukulwa yokoushilo waJordan nomoitukulwa oyo ya dingilila Tirus naSidon; ovanhu vahapu ove uya kuye eshi va uda oinima ihapu oyo a li ta ningi. 9 Opo nee okwa lombwela ovahongwa vaye ve mu longekidile okawato opo ongudu yovanhu ihe lifininike muye. 10 Molwaashi okwa li a velula vahapu, aveshe ovo va li ve na omikifi da kwata moiti ova li ve mu dingilila opo ve mu kume. 11 Nokuli naavo va li ve na eemhepo da nyata, eshi ve mu mona ove mu linyongamena ndele tava ingida tava ti: “Ove Omona waKalunga!” 12 Ashike okwe va kunghilila lwoikando vaha lombwele vamwe kombinga yaye.

13 Lwanima okwa ka londa komhunda nokwa hoolola ovo a hala, ndele tave mu shikula. 14 Opo nee okwa hoolola* ovalumenhu 12 nokwe va luka ovayapostoli. Okwa li ha ende navo, nokwa li e va tuma va ka udife. 15 Okwa li yo e va pa eenghono dokuta mo eendemoni.

16 Ndele 12 ovo a hoolola* ovo ava: Simon, oo a luka yo Petrus, 17 Jakob naJohannes, ovana vaSebedeus (ovo a luka yo Boanerges, olo tali ti “Ovana vEngungumo”), 18 Andreas, Filippus, Bartolomeus, Mateus, Tomas, Jakob omona waAlfeus, Tadeus, Simon Omukanaan* 19 naJudas Iskariot, oo lwanima a ka kengelela Jesus.

Opo nee Jesus okwa ya meumbo lonhumba, 20 nongudu yovanhu oya li ye mu ongalela vali, onghee ye novahongwa vaye kava li va mona omhito yokulya. 21 Ndele eshi ovapambele vaye va uda kombinga yaasho, ova ya ko ve ke mu kwate po, osheshi ova li tava ti: “Ota i eenghwengu.” 22 Ovanongo vomishangwa ovo va dja kuJerusalem navo ova li tava ti: “Oku na Belsebul,* neendemoni ote di te mo neenghono domupangeli weendemoni.” 23 Konima eshi e va ifana kuye, okwa popya navo ta longifa omafaneko ta ti: “Ongahelipi Satana ta dulu okuta mo Satana? 24 Ngeenge ouhamba owe lipilukile po, ouhamba wa tya ngaho itau kala po; 25 neumbo ngeenge ole lipilukile po, eumbo olo itali kala po. 26 Satana naye ngeenge okwe lipilukile po nokulikondjifa, ita dulu okukala po, ndele ota xulu po. 27 Onghee kape na ou ta dulu okupumina meumbo lomulumenhu omunaenghono ndele ta kufa mo oinima yaye, okuninga shapo ta mange tete omulumenhu oo. Opo nee ta dulu okukufa mo oinima meumbo laye. 28 Oshili ohandi mu lombwele, ovanhu otava diminwa po enyono keshe, neendjovo desheko keshe tava popi. 29 Ashike keshe ou ta sheke omhepo iyapuki ita diminwa po nandenande, ndele ota kala e na etimba fiyo alushe.” 30 Okwa popya ngaho molwaashi ova li tava ti: “Oku na omhepo ya nyata.”

31 Ndele ina yaJesus novamwainamati ove uya, nova kala ofika pondje, ndele tava tumu umwe e mu ifane. 32 Opo nee ongudu yovanhu oyo ya li omutumba ye mu ongalela oya tya kuye: “Tala, nyoko novamwanyoko ove li pondje tave ku pula.” 33 Ndele okwe va nyamukula a ti: “Meme olyelye, novamwamememati ovo oolyelye?” 34 Opo nee okwa tala kwaavo ve li omutumba popepi naye, ndele ta ti: “Taleni, meme novamwamememati ovava. 35 Keshe tuu ou ta longo ehalo laKalunga, oye omumwamememati, omumwamemekadona nameme.”

4 Okwa hovela natango okuhonga ovanhu pomunghulofuta, opo nee ongudu inene oye uya ndele tai ongala puye. Opo a dule okuhonga ongudu oyo, okwa londa mowato nokwa ehena kanini mefuta, ndele ongudu aishe oya kala i li komunghulofuta. 2 Ndele okwa hovela oku va honga oinima ihapu ta longifa omafaneko. Fimbo a li te va hongo, okwa tya kuvo: 3 “Pwilikineni nawa! Taleni, omukuni okwa ya a ka kune. 4 Eshi a li ta kunu, eembuto dimwe oda wila mondjila, noudila ove uya, ndele tave di li po. 5 Dimwe oda wila momamanya, ndele tadi mene diva molwaashi kapa li edu lihapu. 6 Eshi etango la pita, oda lemba, noda kukuta molwaashi kada li di na omidi da ya moule. 7 Eembuto dimwe oda wila meeshosholo, neeshosholo eshi da kula ode di fininika, onghee inadi dala. 8 Dikwao vali oda wila medu liwa noda mena, ndele tadi kulu noda hovela okudala, dimwe 30, dimwe 60, nadikwao 100.” 9 Opo nee okwa weda ko a ti: “Ou e na omatwi, na ude ko.”

10 Ndele fimbo a li oye aeke, ovahongwa vaye mwa kwatelwa ovayapostoli omulongo navavali ove uya kuye, ndele tava hovele oku mu pula kombinga yomafaneko oo a popya. 11 Okwa tya kuvo: “Nye omwa pitikilwa okushiiva oiholekwa iyapuki yOuhamba waKalunga, ndele kwaavo vehe fi ovahongwa, oinima aishe oi li momafaneko, 12 opo nonande ova kale va fa tava tale, kave wete ko, nonande ova kale va fa tava pwilikine, kave udite ko eityo laasho tashi popiwa; nokave na efiku ve lialuluke opo va diminwe po.” 13 Okwa tya vali kuvo: “Ngeenge kamu udite ko efaneko eli, ongahelipi tamu ka uda ko omafaneko makwao aeshe?

14 “Omukuni okwa kuna eendjovo. 15 Odo da kunwa mondjila ovovo va uda eendjovo, ndele diva eshi ve di uda, Satana okwe uya ndele ta duda mo eendjovo odo da kunwa muvo. 16 Sha faafana, odo da kunwa momamanya otadi ulike kwaavo va uda eendjovo, ndele tave di tambula ko diva nehafo. 17 Ndele molwaashi inadi mena omidi momitima davo, ova twikila okafimbo kanini, ndele diva eshi va hangwa komaudjuu nomahepeko, ova sholola. 18 Dimwe vali oda wila mokati keeshosholo. Odo otadi ulike kwaavo va uda eendjovo, 19 ndele oisho younyuni ou* neheka loupuna nouhalu u lili naku lili oya fininika nokufifa oshuunguungu eendjovo, onghee inadi imika sha muvo. 20 Naado da kunwa medu liwa otadi ulike kwaavo va uda eendjovo ndele tave di tambula ko nehalo liwa nova imika oiimati, vamwe 30, vamwe 60 navamwe 100.”

21 Okwa tya vali kuvo: “Mbela olamba ohai temwa ndele tai tulwa koshi yoshimbale* ile koshi yombete? Mbela ihai temwa ndele tai tulwa koshikwatelwalamba? 22 Osheshi kaku na osho sha holekwa itashi ka shiivika, nokaku na osho sha tuvikilwa itashi ka tuvikululwa. 23 Ou e na omatwi, na ude ko.”

24 Ndele okwa tya vali kuvo: “Pwilikineni nawa kwaasho handi mu lombwele. Oshiyelekifo osho tamu yeleke nasho, osho tamu ka yelekifilwa yo, notamu ka wedelwa ko shihapu. 25 Osheshi keshe ou e na ota ka pewa shihapu, ndele ou ehe na sha, nokuli nakanini oko e na ote ke ka kufwa.”

26 Ndele okwa popya ta ti: “Ouhamba waKalunga otau faafanifwa nomulumenhu a kuna eembuto medu. 27 Opo nee okwa ka nangala konguloshi. Eshi a penduka ongula, eembuto daye oda mena noda kula, ashike ke shii kutya osha enda ngahelipi. 28 Edu olo vene la menifa eembuto odo kanini nakanini, tete omino, lwanima oilya, oilya tai dala omitwe, opo nee omitwe tadi tula ko eemuma. 29 Ndele diva eshi oilya ya pya, okwa hovela okuteya osheshi efimbo leteyo ola fika.”

30 Okwa weda ko vali a ti: “Ouhamba waKalunga ohatu dulu oku u faafanifa nashike, ile oku u yelifa hatu longifa efaneko lilipi? 31 Otau faafanifwa nombuto yoshinapi, oyo eshi ya kunwa ya li inininini keembuto adishe kombada yedu. 32 Ngeenge ya kunwa, ohai kulu ndele tai ningi omuti u dule oimeno ikwao aishe, nohau kala noitai inene omo eedila dokeulu hadi tungile oihadi yado.”

33 Okwe va honga ta longifa omafaneko mahapu a yukila oko, she likolelela keudeko lavo. 34 Okwa kala alushe ha popi navo ta longifa omafaneko, nokwa li ha yelifile ovahongwa vaye oinima aishe ngeenge ve li ovo aveke.

35 Efiku olo eshi etango la ningina, okwa tya kovahongwa vaye: “Natu yeni kombinga ikwao yefuta.” 36 Konima eshi va lekela ongudu yovanhu, ova ya pamwe naye mowato, ashike opa li yo eewato dimwe molweendo olo. 37 Opo nee opa tukuluka oshikungulu shinenenene, nomakufikufi okwa li tae lidenge mowato, nowato oya li tai hale okutenguka. 38 Ndele ye okwa li a kofela mowato konima, a wila koshiwilo. Onghee ove mu pendula ndele tava ti kuye: “Omuhongi, ino tila tu fye omeva?” 39 Opo nee okwa fikama nokwa hanyena omhepo, ndele ta lombwele efuta ta ti: “Shii! Mwena!” Nomhepo oya dulika kuye, nefuta ola lotela filufilu. 40 Opo nee okwa tya kuvo: “Omolwashike mwa tila?* Kamu na eitavelo hano?” 41 Ndele ova li va tila neenghono, nova pulafana tava ti: “Omunhu ou okwa tya naanaa ngahelipi? Nokuli nomhepo nefuta otai dulika kuye.”

5 Ndele ove uya kombinga ikwao yefuta moshitukulwa shOvagerasa. 2 Diva eshi Jesus a dja mowato, okwa shakenekwa komulumenhu a dja momaendo e na omhepo ya nyata. 3 Omulumenhu oo okwa li ha kala momaendo, ndele kapa li nande oumwe a dula oku mu manga nelyenge aha dje mo. 4 Okwa li ha mangwa luhapu nomalyenge keemhadi nokomaoko, ndele omalyenge okwa li he a tokaula, nokapa li oo e na eenghono doku mu kelela. 5 Okwa kala ha ingida oufiku nomutenya momaendo nokeemhunda nokulitetaula nomamanya. 6 Eshi a mona Jesus ta di kokule, okwa tondoka a finda kuye ndele te mu twile eengolo. 7 Opo nee okwa ingida mokule ta ti: “Jesus, Omona waKalunga Omukombadambada, oto kongo shike apa? Ohandi ku anifa kuKalunga uha hepeke nge.” 8 Okwa ingida ngaho molwaashi Jesus okwa kala ta lombwele ondemoni oyo i li muye, ta ti: “Omhepo ya nyata ove, dja mo momulumenhu.” 9 Ndele Jesus okwe i pula ta ti: “Oove lyelye?” Opo nee oya nyamukula ya ti: “Aame Ongudu ya kula, osheshi otu li mo vahapu.” 10 Omhepo oyo ya nyata oya kala tai indile Jesus opo ehe di te mo moshilongo.

11 Ndele popepi navo opa li oufita munene woingulu i li komhunda tai li. 12 Onghee eemhepo ode mu indila tadi ti: “Tu tuma tu ye moingulu.” 13 Opo nee okwe di pa epitikilo. Okudja opo eemhepo da nyata oda dja mo momulumenhu oo noda ya moingulu, ndele oufita aushe woingulu, 2 000 lwaapo, owa lotokela komunghulo womhunda, ndele tau wile mefuta. 14 Ovafita vayo ova ya onhapo, ndele tave ke shi hepaululila ovanhu moshilando nomomudingonoko washo, novanhu ova li ve uya okutala osho sha ningwa po. 15 Eshi ovanhu ve uya kuJesus, ova mona omulumenhu oo a li e na eendemoni e li omutumba a djala nawa noku na omadiladilo e li ponhele, nova li va tila neenghono. 16 Natango, ovo va mona osho sha ningwa po ove va hokololela osho sha ningilwa oingulu nosho yo omulumenhu oo a li e na eendemoni. 17 Eshi ve shi uda, ova lombwela Jesus a dje mo moshitukulwa shavo.

18 Ndele fimbo Jesus a li ta londo mowato, omulumenhu oo a li e na eendemoni okwe mu indila va ye pamwe naye. 19 Ashike ine mu pitika a ye naye. Ponhele yaasho, okwa tya kuye: “Inda keumbo kovapambele voye, ndele to va hokololele oinima aishe oyo Jehova e ku ningila nanghee e ku fila onghenda.” 20 Omulumenhu oo okwa ya kuDekapolis* ndele ta hovele okuhokolola oinima aishe oyo Jesus e mu ningila, novanhu aveshe ova li va kumwa.

21 Konima eshi Jesus a taulula vali efuta nowato ndele ta ka kala kombinga ikwao, ongudu inene yovanhu oye uya noya ongala puye. 22 Opo nee omupashukili umwe woshinagoga wedina Jairus okwe uya po, ndele eshi a mona Jesus, okwa twa eengolo peemhadi daye. 23 Okwe mu indila lwoikando ihapu, ta ti: “Okamonakadona kange otaka vele neenghono.* Ila u ke ka tenheke omake alikana, opo ka veluke.” 24 Opo nee Jesus okwa ya pamwe naye, nongudu inene yovanhu oye mu shikula noya li tai lifininike muye.

25 Ndele opa li omukainhu umwe oo a kala e na etiko lohonde oule womido 12. 26 Omukainhu oo okwa monifwa oixuna neenghono* kovahakuli vahapu nokwa manena mo oiniwe yaye aishe. Ndele ponhele yokuxwepopala, onghalo yaye oya naipala ashike. 27 Eshi a uda onghundana i na sha naJesus, okwe lifininika mongudu yovanhu e li konima yaye nokwa kwata koshikutu shaye shokombada, 28 osheshi okwa kala te lipopile ta ti: “Ngeenge onda kwata ashike koshikutu shaye shokombada, ohandi veluka.” 29 Diva etiko lohonde ola oka, nokwa uda molutu laye kutya okwa veluka koudu oo wa kala noku mu hepeka neenghono.

30 Jesus okwa didilika diva kutya molutu laye omwa dja eenghono, ndele ta piluka nokwa pula ongudu yovanhu, ta ti: “Olyelye a kwata koshikutu shange shokombada?” 31 Ndele ovahongwa vaye ova tya kuye: “Ou wete ongudu yovanhu tai lifininike mwoove, ndele oto pula kutya, ‘Olyelye a kuma nge?’” 32 Ashike natango okwa li ta lengalenga a tale kutya olyelye e mu kuma. 33 Ndele omukainhu oo okwa li a tila ta kakama molwaashi okwa li e shii osho a ningilwa. Opo nee okwe uya ndele ta tu eengolo puye noku mu lombwela ashishe osho sha ningwa po. 34 Jesus okwa tya kuye: “Omumwangekadona, eitavelo loye ole ku velula. Inda nombili, osheshi owa veluka koudu oo wa li we ku hepeka neenghono.”

35 Fimbo a li natango ta popi, ope uya ovalumenhu vamwe va dja keumbo lomupashukili woshinagoga, ndele tava ti komupashukili: “Okamonakadona koye oka fya! Omolwashike to piyaaneke vali Omuhongi?” 36 Eshi Jesus a uda osho tava popi, okwa lombwela omupashukili woshinagoga a ti: “Ino tila, shimha ashike u na eitavelo.” 37 Eshi a dja opo, ka li a pitika nande oumwe e mu shikule kakele kaPetrus, Jakob naJohannes omumwaina waJakob.

38 Opo nee ova ya keumbo lomupashukili woshinagoga, nova hanga ovanhu tava lili eefya notava kuwaana mokule. 39 Eshi va ya meumbo, Jesus okwa tya kuvo: “Omolwashike tamu lili nokukuwaana? Okaana inaka fya, ndele oka kofa.” 40 Opo nee ovanhu ova hovela oku mu yola ve mu yemba. Konima eshi e va lombwela aveshe va ye pondje, okwa ya pamwe naxe naina yokaana nosho yo ovahongwa vaye opo pa nangala okaana. 41 Opo nee okwa kwata okaana meke, ndele ta ti kuko: “Talita kuum,” osho tashi ti: “Okakadona, ohandi ku lombwele, penduka!” 42 Okakadona oka penduka diva, ndele taka hovele okweenda. (Oka li ke na omido 12.) Ovadali vako ova li va hafa neenghono kwaasho sha ningwa po. 43 Ashike okwe va kunghilila filufilu vehe shi lombwele nande oumwe, ndele ta ti kutya okaana naka pewe oikulya.

6 Ndele eshi Jesus a dja opo, okwa ya koshitukulwa shavo pamwe novahongwa vaye. 2 Eshi efiku lEshabata la fika, okwa hovela okuhonga moshinagoga, navahapu ovo va li ve mu uda ova li va kumwa, ndele tava ti: “Omulumenhu ou openi e lihonga oinima ei? Nokwa hanga peni ounongo neenghono dokulonga oikumwifilonga? 3 Hano ou ke fi omuhongi womiti, omona waMaria, novamwainamati kave fi ooJakob, Josef, Judas naSimon? Novamwainakadona havovo ve li mokati ketu?” Onghee kava li ve mu itavela. 4 Ndele Jesus okwa tya kuvo: “Omuprofeti oha fimanekwa keshe pamwe, kakele moshitukulwa shavo ile kovapambele vaye nosho yo meumbo lavo.” 5 Onghee ka li a longa oikumwifilonga ihapu moshitukulwa osho; okwa tenheka ashike ovanaudu vanini omake noku va velula. 6 Ndele okwa li a kumwa eshi ovanhu vomoshitukulwa osho va li vehe na eitavelo. Opo nee okwa enda ta hongo ovanhu momikunda dasho.

7 Okwa ifana ovayapostoli 12, ndele te va tumu oovavali, nokwe va pa eenghono dokuta mo eemhepo da nyata. 8 Natango, okwe va lombwela vaha ye nomungome, nondjato yoikulya ile noimaliwa,* shapo onodibo ashike. 9 Ponhele yaasho, okwa li ashike e va lombwela va ye neenghaku nosho yo oikutu oyo va li va djala.* 10 Okwe va lombwela vali a ti: “Shimha mwa tambulwa meumbo lonhumba, kaleni hamu di omo fiyo osheshi mwa dja mo moshitukulwa osho. 11 Ndele ngeenge moshitukulwa inamu tambulwa mo ile inamu pwilikinwa mo, djei mo nokupupula ondwi keemhadi deni va mone kutya ova ninga nai.”* 12 Opo nee ova ya ndele tava udifile ovanhu ve lidilulule. 13 Ova ta mo eendemoni dihapu, nova vaeka ovanaudu omaadi noku va velula.

14 Opo nee ohamba Herodes oya li ya uda kutya Jesus okwa shiivika keshe pamwe, novanhu ova li tava ti: “Johannes Omuninginifi okwa nyumuka koufi nomolwaasho ta longo oikumwifilonga.” 15 Ndele vamwe ova li tava ti: “Oye Elia.” Navamwe ova li tava ti: “Omuprofeti ngaashi ashike ovaprofeti vonale.” 16 Eshi Herodes e shi uda, okwa tya: “Johannes ou nda tetifa omutwe oye a nyumuka.” 17 Molwaashi Herodes okwa li a hombola Herodias, oo a li omukulukadi wamumwaina Filippus, okwa li a kwatifa po Johannes noku mu tulifa modolongo. 18 Johannes okwa li ha lombwele Herodes ta ti: “Kashi li pamhango okuhombola omukulukadi wamumwanyoko.” 19 Onghee Herodias okwa li a kwatela onghone Johannes, nokwa li a hala oku mu dipaifa, ashike ka li a dula oku shi ninga. 20 Osheshi Herodes okwa li a amena Johannes nokwa li a tila oku mu ningila owii molwaashi okwa li e shii kutya omupiya waKalunga omuyuki. Shimha a udu eendjovo daJohannes, ka li ha kala e shii kutya na ninge po shike, ndele okwa kala e na ohokwe yokupwilikina kuye.

21 Ndele Herodias okwa li a mona omhito iwa eshi Herodes a ningila omalenga aye, ovawiliki vomatangakwaita nosho yo ovanenenhu vomuGalilea oitendele mefiku ledalo laye. 22 Opo nee omonakadona waHerodias okwe uya ndele te va danene po oshidano, nokwa li a hafifa Herodes nosho yo ovo a li ta li navo.* Ohamba oya lombwela okakadona ya ti: “Indile nge keshe osho wa hala, opo nee ohandi shi ku pe.” 23 Ohamba oya ana ya ti: “Keshe eshi to indile nge, ohandi shi ku pe, kutya nee etata louhamba wange.” 24 Okudja opo, oka ya kuina, ndele taka ti: “Nandi indile shike?” Ina okwa ti: “Indila omutwe waJohannes Omuninginifi.” 25 Opo nee oka ya diva kohamba, ndele taka ti: “Onda hala u pe nge paife omutwe waJohannes Omuninginifi moshiyaxa.” 26 Nonande ohamba oya li ya nyika oluhodi neenghono, kaya li ya hala oku ka anyena osho ka indila omolweano layo nomolwovaenda vayo.* 27 Ndele ohamba oya tuma diva omukwaita wayo e i etele omutwe waJohannes. Onghee okwa ya, nokwa teta ko omutwe waJohannes oo a li modolongo 28 ndele te u eta u li moshiyaxa. Okwe u pa okakadona, nokakadona oke u yandja kuina. 29 Eshi ovahongwa vaJohannes ve shi uda, ove uya ndele tava kufa po oshimhu shaye noku shi paka mombila.*

30 Ndele ovayapostoli vaJesus ova ongala puye noku mu lombwela oinima aishe oyo va ninga nanghee va honga. 31 Opo nee okwa tya kuvo: “Itu yeni konhele ye likalela opo mu ka fude po kanini.” Osheshi opa li vahapu tave uya notava i, nokava li nokuli va mona omhito yokulya. 32 Okudja opo ova londa mowato ndele tava i konhele ye likalela, ve ke likalele. 33 Ndele ovanhu vahapu eshi ve va mona nova uda kutya otava i, ove va shikula kolupadi tava tondoka va dja moilando aishe nova ka fika ko tete. 34 Eshi Jesus a fika, okwa mona ongudu inene yovanhu, nokwa li e va uditile olukeno molwaashi ova li va fa eedi dihe na omufita. Opo nee okwa hovela oku va honga oinima ihapu.

35 Efimbo lokomatango, ovahongwa vaye ove uya kuye, ndele tava ti: “Onhele ei oye likalela, nokwa toka. 36 Lekela ovanhu opo va ye ve ke lilandele oikulya momikunda odo di li popepi.” 37 Okwa tya kuvo: “Va peni oikulya.” Opo nee ove mu pula tava ti: “Natu ke va landele omingome deedenari 200, ndele hatu va pe va lye?” 38 Okwa tya kuvo: “Omu na omingome ngapi? Taleni kutya omu na ngapi.” Eshi va shilipaleka, ova tya kuye: “Otu na omingome nhano neeshi mbali.” 39 Opo nee okwa lombwela ovanhu aveshe va kale omutumba paengudu pomwiidi mutalala. 40 Onghee ova kala omutumba paengudu, dimwe 100 nadimwe 50. 41 Okwa kufa omingome nhano neeshi mbali, nokwa tala keulu ndele ta ilikana. Opo nee okwa pambula omingome, ndele te di pe ovahongwa vaye ve di yandje kovanhu. Okwa tukulila yo aveshe eeshi odo mbali. 42 Ndele aveshe ova lya nova kuta, 43 opo nee ova toola po oundjaumukile vomingome, va yadeka oimbale 12, inamu kwatelwa eeshi. 44 Ovo va lya omingome ova li ovalumenhu 5 000.

45 Ndele okwa lombwela diva ovahongwa vaye va londe mowato opo ve mu tetekele kombinga ikwao yefuta lwokuBetsaida, ofimbo ye ta lekele ongudu yovanhu. 46 Konima eshi e i lekela, okwa ya komhunda a ka ilikane. 47 Eshi kwa toka, owato oya li mokati kefuta, ndele ye okwa li komutunda. 48 Eshi a mona tava kendabala okuyukililifa owato omolwomhepo oyo ya li tai va dilile komesho, okwe uya kuvo ta ende kombada yomeva lwoponhatu yokeengulasha,* ndele okwa li a hala oku va pitilila.* 49 Eshi ve mu mona ta ende kombada yomeva, ova ingida mokule, tava ti: “Oshike osho tashi di oko?”* 50 Aveshe eshi ve mu mona, ova li va tila unene. Ndele diva Jesus okwe va lombwela, a ti: “Ngungumaneni, aame; inamu tila.” 51 Opo nee okwa londa mowato omo va li, nomhepo oya li ya lota. Ova li va kuminwa unene oshinima osho, 52 molwaashi kava li va uda ko eityo lomingome, nomitima davo kada li natango da patuluka.

53 Eshi va fika komutunda waGenesaret, ova li va pandeka owato komunghulofuta. 54 Ndele diva eshi va dja mowato, ovanhu ova li va dimbuluka Jesus. 55 Opo nee ovanhu vomoshitukulwa ashishe ova tondoka nove mu etela ovanaudu vavo ve va humbata komalutala. 56 Ndele keshe momukunda ile moshilando a ya, ovanhu ova eta ovanaudu vavo peenhele domalandifilo, nove mu indila va kwate ashike nande okeenyemba doshikutu shaye shokombada. Naaveshe ovo va kwata ko, ova li va veluka.

7 Ndele Jesus okwa ongalelwa kOvafarisai nokovanongo vomishangwa vamwe va dja kuJerusalem. 2 Opo nee ova mona ovahongwa vamwe vaJesus tava li inave likosha keenyala.* 3 (Ovafarisai nOvajuda aveshe ihava li ofimbo inave likosha keenyala fiyo opeengolo domaoko, osheshi ova kanyatela keenghulunghedi dovakulu vonale. 4 Nongeenge va di keenhele domalandifilo ihava li ofimbo inave likosha olutu alishe. Opa li natango eenghulunghedi dihapu odo va li va tambula ko nova kanyatela kudo, ngaashi okuyaveka* momeva omakopi, oitoo noikwatelwa ya longwa mongopolo.) 5 Ndele Ovafarisai novanongo vomishangwa ove mu pula tava ti: “Omolwashike ovahongwa voye ihava diinine eenghulunghedi dovakulu vonale, eshi hava li inave likosha keenyala?” 6 Okwa tya kuvo: “Jesaja okwa xunganeka sha yuka shi na sha nanye ovanaihelele, eshi a ti, ‘Ovanhu ava ohava fimaneke nge nomilungu davo, ndele omitima davo odi li kokule naame. 7 Ohava longele nge oshimha, molwaashi omahongo avo okwa kanghamena koipango yovanhu.’ 8 Ohamu lipwililikile oipango yaKalunga ndele tamu kanyatele keenghulunghedi dovanhu.”

9 Okwa tya vali kuvo: “Ohamu lipwililikile owina oipango yaKalunga nokudiinina eenghulunghedi deni. 10 Pashihopaenenwa, Moses okwa ti, ‘Fimaneka xo nanyoko,’ nosho yo kutya, ‘Keshe ou ta tuku* xe ile ina na dipawe.’ 11 Ndele nye otamu ti, ‘Ou ta ti kuxe ile kuina: “Ashishe osho ndi na, handi dulu ngeno oku ku yambidida nasho, oshi li okorban (sha hala okutya, oshali ya yapulilwa Kalunga).”’ 12 Onghee ihamu efa vali nande omunhu a tya ngaho a yambidide xe ile ina. 13 Kungaho omwa hekula eendjovo daKalunga omolweenghulunghedi deni odo mwa tota po, nohamu ningi oinima ihapu ya fa oyo.” 14 Okwa ifana vali ongudu yovanhu, ndele ta ti kuvo: “Pwilikineni amushe nokuuda ko eityo laasho handi popi. 15 Omunhu iha nyatekwa koinima oyo hai i meni laye, ndele oha nyatekwa kwaayo hai di meni laye.” 16 ——

17 Eshi a dja pongudu yovanhu okwa ya meumbo limwe, ndele ovahongwa vaye tava hovele oku mu pula kombinga yefaneko olo. 18 Opo nee okwa tya kuvo: “Hano nanye mboli kamu udite ko? Hamba kamu shi shii kutya omunhu iha nyatekwa kwaasho hashi i meni laye? 19 Osho hashi i muye, ihashi i momutima waye, ashike ohashi i medimo ndele tashi piti mo.” Nomolwaasho oikulya aishe Jesus okwe i tala ko ya koshoka. 20 Okwa tya vali: “Omunhu oha nyatekwa kwaasho hashi di muye. 21 Osheshi momutima womunhu omo hamu di omadiladilo mai: oluhaelo,* oulunga, omadipao, 22 enyonohombo, olwisho, oukolokoshi, oukengeleledi, okunyona uhe nouxwenge,* efupa, omasheko, elinenepeko nelihumbato lii. 23 Oinima aishe oyo ii ohai di meni lomunhu nohai mu nyateke.”

24 Okudja opo Jesus okwa ya koshitukulwa shaTirus naSidon. Opo nee okwa ya meumbo lonhumba, ndele ka li a hala okumonika nande okomunhu, ashike osho kasha li tashi shiiva. 25 Omukainhu umwe oo a li e na okamonakadona ke na omhepo ya nyata okwa uda diva kombinga yaye ndele te uya kuye nokulinyongamena peemhadi daye. 26 Omukainhu oo okwa li Omugreka a dalelwa muFoinikia shomuSiria, nokwa kala ta indile Jesus opo a te mo ondemoni mokamonakadona. 27 Jesus okwa tya kuye: “Teelela manga ounona va kute, osheshi inashi yuka okukufa omungome wounona ndele to u ekele koumbwena.” 28 Omukainhu okwa nyamukula a ti: “Ou li mondjila omufimanekwa, ashike oumbwena navo ohava li oundjaumukile ovo hava wile koshi yoshitaafula shounona.” 29 Jesus okwa tya kuye: “Omolweendjovo odo wa popya, inda nombili, ondemoni oya dja mo mokamonakadona koye.” 30 Opo nee omukainhu oo okwa ya keumbo laye nokwa hanga okamona ka nangala kombete; nondemoni oya li ya dja mo muko.

31 Eshi Jesus a aluka kuTirus okwa pitila muSidon, nokwa ya kEfuta laGalilea a pitila moshitukulwa shaDekapolis.* 32 Ndele kuye okwa etwa omulumenhu ombolo, oo iha dulu okupopya nawa, naavo ve mu eta ove mu indila opo e mu tenheke omake. 33 Opo nee okwe mu kufa po pongudu yovanhu, ndele tave ke likalela. Okwa tula ominwe daye momatwi omulumenhu oo nokwa fiya omate, ndele te mu kwata kelaka. 34 Opo nee okwa tala keulu nokwa fuda mokule, ndele ta ti kuye: “Efata,” sha hala okutya, “Fituluka.” 35 Omatwi omulumenhu oo okwa li a fituluka, nelaka laye ola li la manguluka ndele ta hovele okupopya nawa. 36 Ndele okwe va kunghilila vehe shi lombwele nande omunhu. Ashike nande okwa li e va kelela vehe shi ninge, ova kala noku shi hepaulula. 37 Ovanhu ova li ve shi kuminwa neenghono, ndele tava ti: “Oilonga yaye aishe oya wapala. Okwa fitulula omatwi eembolo nokwa ningifa ovafitandaka va popye.”

8 Eshi Jesus a li muDekapolis, ongudu imwe vali inene yovanhu oya li ya ongala puye nokaya li i na eshi tai li. Onghee okwa ifana ovahongwa vaye, ndele ta ti kuvo: 2 “Ondi uditile olukeno ongudu ei yovanhu, molwaashi ova kala pwaame omafiku atatu, nokave na sha vali oikulya. 3 Ngeenge onde va lekele va ye komaumbo va fya ondjala,* otava ka pundila mondjila, osheshi vamwe vomuvo ova dja kokule.” 4 Ndele ovahongwa vaye ova tya kuye: “Openi hatu ka hanga omingome dihapu tadi dulu okukutifa ovanhu ava monhele ei ye likalela?” 5 Ndele okwe va pula a ti: “Omu na po omingome ngapi?” Ova ti: “Heyali.” 6 Opo nee okwa lombwela ongudu yovanhu i kale omutumba pedu. Okwa kufa omingome heyali, ta pandula Kalunga, te di pambula, ndele ta hovele oku di pa ovahongwa, novahongwa ove di yandja kongudu yovanhu. 7 Okwa kufa yo eeshi dinini odo ovahongwa va li ve na, ta pandula Kalunga, ndele te va lombwele ve di yandje kovanhu. 8 Ovanhu ova lya nova kuta, opo nee ovahongwa ova toola po oundjaumukile va yadeka oimbale ya kula iheyali. 9 Ovalumenhu ovo va lya ova li 4 000 lwaapo. Konima yaasho, okwe va lekela va ye.

10 Okwa londa diva mowato pamwe novahongwa vaye ndele tava i koshitukulwa shaDalmanuta. 11 Opo nee Ovafarisai ove uya ndele tave mu likundifa, noku mu pula e va ulikile edidiliko la dja meulu, opo ve mu yeleke. 12 Okwa fuda mokule ndele ta ti: “Omolwashike epupi eli tali pula edidiliko? Ohandi mu lombwele, epupi eli itali pewa edidiliko lasha.” 13 Opo nee okwe va fiya po, ndele ta londo vali mowato nokuya kombinga ikwao yefuta.

14 Ndele ovahongwa ova li ashike ve na omungome umwe auke mowato molwaashi ova dimbwa okuya nomingome. 15 Opo nee okwe va londwela ta ti: “Pashukileni efulika lOvafarisai nolaHerodes.” 16 Ndele ova hovela okulipa oushima eshi inava etelela omingome. 17 Eshi e shi didilika, okwa tya kuvo: “Omolwashike tamu lipe oushima eshi inamu etelela omingome? Hano inamu koneka nokamu udite ko natango? Omitima deni inadi patuluka natango opo mu ude ko? 18 ‘Omu na omesho, ndele kamu wete ko, nomu na omatwi, ndele kamu udite ko.’ Itamu dimbuluka hano? 19 Eshi nda li nda tukulila ovalumenhu 5 000 omingome nhano, oimbale ingapi youndjaumukile mwa toolele po?” Ova tya kuye: “Omulongo naivali.” 20 “Eshi nda li nda tukulila ovalumenhu 4 000 omingome heyali, oimbale ingapi ya kula youndjaumukile mwa toolele po?” Opo nee ova tya kuye: “Iheyali.” 21 Ndele okwa tya kuvo: “Kamu udite ko hano natango?”

22 Ndele eshi va tula muBetsaida, ovanhu ova etela Jesus omulumenhu omupofi, nove mu indila opo e mu twikulule. 23 Opo nee okwa kwata omupofi mokwooko ndele te mu twala kondje yoshilando. Konima eshi e mu vaeka omate pomesho, okwe mu tenheka omake, ndele te mu pula ta ti: “Ou wete shike?” 24 Omulumenhu oo okwa yelula oshipala, ndele ta ti: “Ondi wete ovanhu, ashike otava monika va fa omiti tadi ende.” 25 Ndele Jesus okwe mu kwata vali komesho, opo nee omulumenhu oo okwa li a twikuluka nokwa li e wete ko nawanawa. 26 Eshi e mu lekela, okwa ti: “Ino shuna mo nande vali moshilando osho.”

27 Okudja opo Jesus novahongwa vaye ova ya komikunda daKesarea Filippi, ndele fimbo ve li mondjila, okwa pula ovahongwa vaye ta ti: “Ovanhu ohava ti aame lyelye?” 28 Ova tya kuye: “Vamwe ohava ti oJohannes Omuninginifi, vamwe ohava ti oElia, navakwao ohava ti oumwe womovaprofeti.” 29 Opo nee okwe va pula ta ti: “Nye ohamu ti aame lyelye?” Petrus okwe mu nyamukula ta ti: “Oove Kristus.” 30 Ndele Jesus okwe va kunghilila vaha lombwele nande omunhu kombinga yaye. 31 Okwa li e va lombwela* kutya Omona womunhu ota ka hepekwa nonyanya noita ka tambulwa ko kovakulunhu voshiwana, kovapristeri ovakulunhu nokovanongo vomishangwa. Okwa li yo e va lombwela kutya ota ka dipawa, nonokutya ota ka nyumuka mefiku etitatu. 32 Ndele okwa popya eendjovo odo nopehe na oku va holeka sha. Opo nee Petrus okwe mu ifana po ndele ta hovele oku mu hanyena. 33 Jesus okwa punguluka nokwa tala kovahongwa vaye, ndele ta hanyene Petrus, ta ti: “Inda konima yange Satana, molwaashi ito diladila ngaashi Kalunga, ndele oto diladila panhu.”

34 Opo nee okwa ifana ongudu yovanhu novahongwa vaye, ndele ta ti kuvo: “Ngeenge oku na ou a hala okushikula nge, ne lixupule ye mwene nokuhumbata omuti waye womahepeko,* ndele ta kala nokushikula nge. 35 Keshe ou a hala okuxupifa omwenyo waye ote u kanifa, nakeshe ou ta kanifa omwenyo waye omolwange nomolwonghundana iwa ote ke u mona. 36 Otashi kwafa shike ngeenge omunhu okwe lilikolele ounyuni aushe, ndele ta kanifa omwenyo waye? 37 Ile oshike osho omunhu ta dulu okuyandjela omwenyo waye? 38 Keshe ou ta fi nge ohoni nosho yo eendjovo dange mepupi eli lihe fi lidiinini kuKalunga* nolikolokoshi, Omona womunhu naye ote ke mu lidimbika eshi te uya moshinge shaXe pamwe novaengeli vayapuki.”

9 Ndele Jesus okwa twikila ko ta ti: “Oshili ohandi mu lombwele kutya ope na vamwe vomwaava ve li ofika apa itava ka makela nandenande efyo fiyo osheshi tava mono tete Ouhamba waKalunga wa dikwa po.” 2 Konima yomafiku ahamano, Jesus okwa ya pamwe naPetrus, Jakob naJohannes ovo aveke komhunda ileile. Opo nee okwa shituluka moipafi yavo, 3 noshikutu shaye shokombada osha toka tootoo nosha li tashi vema, nokape na omunhu kombada yedu ta dulu oku shi tokeka ngaho. 4 Ohaluka ova holokelwa kuMoses naElia tava kundafana naJesus. 5 Opo nee Petrus okwa tya kuJesus: “Muhongi,* osha wapala kufye okukala apa. Natu dikeni omatwali atatu apa, limwe oloye, limwe olaMoses nalikwao olaElia.” 6 Petrus ka li e shii kutya na tye shike, molwaashi ova li va tila unene. 7 Opo nee opa holoka oshilemo, ndele tashi va tuvikile, nomwa dja ondaka tai ti: “Ou Omona wange omuholike. Mu udeni.” 8 Ndele diva eshi va keuka ova mona ashike Jesus oye aeke.

9 Ofimbo va li tava londoloka komhunda, okwe va kunghilila vaha hokololele nande omunhu osho va mona, fiyo osheshi Omona womunhu a nyumunwa koufi. 10 Ndele eendjovo odo ove di tuvikila momitima davo,* ashike ova li tave lipula kutya okwa hala kutya shike eshi a ti ota ka nyumunwa koufi. 11 Opo nee ove mu pula, tava ti: “Omolwashike ovanongo vomishangwa tava ti kutya Elia oku na okuuya tete kuKristus?” 12 Okwa tya kuvo: “Elia ote uya tete nota ka tula oinima aishe peenhele. Ndele ongahelipi shi na sha naasho sha popiwa mOmishangwa kombinga yOmona womunhu kutya ota ka hepekwa nonyanya nokudinwa? 13 Ashike ohandi mu lombwele kutya Elia okwe uyile, nova li ve mu ningila keshe osho va hala, ngaashi sha popiwa mOmishangwa kombinga yaye.”

14 Eshi ve uya kovahongwa vakwao, ove va hanga va ongalelwa kongudu inene yovanhu, nopa li ovanongo vomishangwa tave va twifa eemhata. 15 Ndele diva ongudu yovanhu aishe eshi ya mona Jesus, oya li ya kumwa, ndele tai tondokele kuye opo i mu popife. 16 Opo nee okwa pula ongudu oyo ta ti: “Otamu tu eemhata navo kombinga yashike?” 17 Ndele umwe womongudu oyo okwe mu nyamukula ta ti: “Omuhongi, onde ku etela omonamati wange molwaashi oku na omhepo ya nyata ye mu fitika ondaka. 18 Shimha ye mu kwata, ohai mu nate po ndele ta tutumike onhutu kokanya nokulikwesha komayoo, noha kanifa eenghono. Onda pula ovahongwa voye ve i te mo, ashike ova nyengwa.” 19 Ndele okwa tya kuvo: “Epupi eli lihe na eitavelo, fiyo onaini ndi na okukala nanye? Ondi na oku mu lididimikila fiyo onaini? Mu eteni kwaame.” 20 Opo nee ove mu etela omumati oo, ndele eshi omhepo ya nyata ya mona Jesus, oye mu denga poshi. Eshi a wila pedu, okwa kala ta alangata a tutumika onhutu kokanya. 21 Ndele Jesus okwa pula xe yomumati, ta ti: “Okwa kala ha ningi ngaho oule wefimbo li fike peni?” Xe okwa ti: “Okudja kounona waye. 22 Luhapu ohai mu undulile momundilo nosho yo momeva opo i mu dipae. Ndele ngeenge oto dulu okuninga po sha, tu kenukila nou tu kwafele.” 23 Jesus okwa tya kuye: “Omolwashike to ti kutya ‘Ngeenge oto dulu’? Osheshi oo e na eitavelo ota dulu okuninga keshe shimwe.” 24 Xe yomumati okwa ingida diva mokule ta ti: “Ondi na eitavelo! Kwafele nge u pameke eitavelo lange.”

25 Eshi Jesus a mona ongudu yovanhu tai endelele ya finda kuvo, okwa hanyena omhepo ya nyata, ta ti: “Omhepo ove ho ningifa omunhu aha popye nokuha ude ko, ohandi ku lombwele, dja mo muye ndele ino alukila mo vali nandenande!” 26 Eshi ya ingida noya kama neenghono omumati, oya dja mo muye, nomumati okwa li ta monika a fa a fya, novanhu vahapu ova li tava ti: “Okwa fya.” 27 Opo nee Jesus okwe mu kwata meke, nokwe mu yambidida ndele ta fikama. 28 Konima eshi e uya meumbo limwe, ovahongwa vaye ove mu pula ve li po ovo aveke tava ti: “Omolwashike inatu dula oku i ta mo?” 29 Okwa tya kuvo: “Eendemoni doludi olo ohadi tewa mo ashike keilikano.”

30 Okudja opo ova ya va pitila muGalilea, ashike ka li a hala nande oumwe e shi shiive. 31 Osheshi okwa li ta hongo ovahongwa vaye noku va lombwela, ta ti: “Omona womunhu ota ka yandjwa momake ovanhu,* notave ke mu dipaa, ndele nande ongaho, ota ka nyumunwa mefiku etitatu.” 32 Ashike kava li ve udite ko eendjovo daye, nova li va tila oku mu pula.

33 Okudja opo ove uya muKapernaum. Ndele fimbo a li meumbo limwe, okwe va pula ta ti: “Omwa li tamu tu eemhata kombinga yashike mondjila?” 34 Ashike inava nyamukula sha, osheshi ova li tava tu eemhata kutya olyelye munene mokati kavo. 35 Opo nee okwa kala omutumba nokwa ifana ovayapostoli vaye 12, ndele ta ti kuvo: “Ngeenge ope na ou a hala okukala wotete mokati keni, oye na ninge waxuuninwa nomuyakuli weni amushe.” 36 Ndele okwa kufa okaana, teka kaleke ofika mokati kavo, nokwe ka kwata komapepe, ndele ta ti kuvo: 37 “Keshe ou ta tambula okaana ngaashi aka medina lange, okwa tambula nge yo; nakeshe ou ta tambula nge, okwa tambula yo Ou a tuma nge.”

38 Johannes okwa tya kuye: “Omuhongi, otwa mona umwe ta te mo eendemoni ta longifa edina loye, ndele otwa kendabala oku mu kelela molwaashi iha ende nafye.” 39 Jesus okwa ti: “Inamu mu kelela, osheshi kape na ou ta dulu okulonga oikumwifilonga medina lange ndele ta popile nge vali mowii. 40 Osheshi keshe ou ehe li omhinge nafye oku li kombinga yetu. 41 Ndele keshe ou te mu pe omeva okunwa molwaashi mu li ovahongwa vaKristus, oshili ohandi mu lombwele, ita kala nande ina pewa ondjabi yaye. 42 Ashike ou ta hongaula umwe womwaava vanini, ovo ve na eitavelo mwaame, oshixwepo a mangelwe emanya loshini* mofingo yaye ndele ta ekelwa mokati kefuta.

43 “Ngeenge eke loye otali ku hongaula, li teta ko. Oshixwepo kwoove okumona omwenyo nonande oushingudu, shi dulife okukala nomake avali ndele to ekelwa muGehenna,* omo mu na omundilo ihau dimi. 44 —— 45 Ngeenge omhadi yoye otai ku hongaula, i teta ko. Oshixwepo kwoove okumona omwenyo nonande oushilema, shi dulife okukala neemhadi mbali ndele to ekelwa muGehenna.* 46 —— 47 Neisho loye ngeenge otali ku hongaula, li ekelashi. Oshixwepo kwoove okuya mOuhamba waKalunga u na eisho limwe, shi dulife okukala nomesho avali ndele to ekelwa muGehenna,* 48 omo mu na omainyo ihaa fi nomundilo ihau dimi.

49 “Ovanhu va tya ngaho otava ka lokifilwa omundilo ngaashi ashike omunhu ta undu omongwa moikulya. 50 Omongwa ouwa, ndele ngeenge owa tutuka, otau shunwa eenghono kushike? Kaleni mu na omongwa munye vene nokukala mu na ombili mokati keni.”

10 Okudja opo okwa ya keengaba daJudea a tauluka Jordan, neengudu dovanhu oda li de uya kuye noku mu ongalela natango. Okwa li a hovela oku va honga ngaashi ha ningi shito. 2 Opo nee Ovafarisai ove uya kuye, va hala oku mu yeleka, ndele tave mu pula ngeenge oshi li pamhango omulumenhu a teye ohombo nomukulukadi waye. 3 Okwe va pula a ti: “Moses okwe mu lombwela shike?” 4 Ova ti: “Moses okwa li a pitika pa yandjwe ombapila yeteyohombo ngeenge omukulukadi ta hengwa po.” 5 Jesus okwa tya kuvo: “Moses okwa yandja elombwelo olo omolwoukukutu womitima deni. 6 Ashike pehovelo, ‘Kalunga okwe va shita omulumenhu nomukainhu. 7 Nomolwaasho omulumenhu oku na okufiya po xe naina, 8 ndele ye nomukulukadi waye* tava ningi onhumba imwe.’ Onghee kave fi vali vavali, ndele onhumba imwe. 9 Hano osho Kalunga a tula kumwe, inashi kufwa kumwe komunhu.” 10 Ndele fimbo va li meumbo limwe, ovahongwa ova hovela oku mu pula kombinga yoshinima osho. 11 Okwa tya kuvo: “Keshe ou ta teya ohombo nomukulukadi waye, ndele ta hombola umwe, ota haele noke fi omudiinini kuye. 12 Nomukainhu ngeenge okwa teya ohombo nomulumenhu waye, ndele ta hombolwa kuumwe, ota haele.”

13 Ndele ovanhu ova hovela okweeta ounona kuye opo e va tenheke omake, ashike ovahongwa ova li tave va kelele. 14 Eshi Jesus e shi mona, ka li e shi hafela, nokwa tya kuvo: “Efeni ounona ve uye kwaame, inamu va kelela ko. Osheshi Ouhamba waKalunga owaava ve li ngaashi vo. 15 Oshili ohandi mu lombwele, keshe ou ita tambula Ouhamba waKalunga ngaashi okaana, ita ka ya mo nandenande muo.” 16 Ndele Jesus okwa papatela ounona noku va tenheka omake, ndele te va nangeke noupuna.

17 Fimbo a li mondjila, kuye okwe uya omulumenhu ta endelele ndele te mu twile eengolo noku mu pula ta ti: “Omuhongi muwa, ondi na okulonga shike opo ndi ka mone omwenyo waalushe?” 18 Jesus okwa tya kuye: “Omolwashike to ifana nge omuhongi muwa? Kape na omunhu muwa, oKalunga aeke. 19 Oipango ei ou i shii: ‘Ino dipaa, ino nyona ohombo, ino vaka, ino popya oipupulu, ino kengelela nosho yo fimaneka xo nanyoko.’” 20 Omulumenhu oo okwa tya kuye: “Muhongi, oipango aishe oyo onda kala handi dulika kuyo okudja kounona.” 21 Jesus okwe mu tala nokwe mu hokwa, ndele ta ti kuye, “Ope na vali oshinima shimwe osho wa pumbwa okuninga: Inda u ka landife po oinima yoye ndele oimaliwa to i yandje keehepele, opo u kale u na emona meulu, ndele to uya u ninge omushikuli wange.” 22 Enyamukulo olo ola li le mu udifa nai nokwa ya a nyika oluhodi, molwaashi okwa li e na eliko lihapu.

23 Jesus okwa piluka nokwa tya kovahongwa vaye: “Kashidjuu tuu kwaavo ve na oimaliwa ihapu okuya mOuhamba waKalunga!” 24 Ndele ovahongwa ova li va kuminwa eendjovo daye. Opo nee Jesus okwa tya kuvo: “Ovamwange, kashidjuu tuu okuya mOuhamba waKalunga! 25 Oshipu kongamelo okupita meyulu longwiya shi dulife okuya kwoshipuna mOuhamba waKalunga.” 26 Natango ova li va kumwa neenghono, nova tya kuye:* “Olyelye hano ta dulu okuxupifwa?” 27 Jesus okwe va tala, ndele ta ti kuvo: “Pataleko lopanhu osho itashi shiiva, ashike kuKalunga aishe otai shiiva.” 28 Opo nee Petrus okwa tya kuye: “Tala, otwa fiya po oinima aishe ndele hatu ku shikula.” 29 Jesus okwa ti: “Oshili ohandi mu lombwele, keshe oo a fiya po eumbo, ile ovamwainamati, ile ovamwainakadona, ile xe, ile ina, ile ounona, ile omapya omolwedina lange nomolwonghundana iwa, 30 ota mono lwefele paife, omaumbo, ovamwainamati, ovamwainakadona, ooina, ounona nomapya pamwe nomahepeko, nomounyuni tau uya,* omwenyo waalushe. 31 Ndele vahapu ovo votete otava ka ninga vaxuuninwa, naavo vaxuuninwa otava ka ninga votete.”

32 Fimbo Jesus novahongwa vaye va li tava i kuJerusalem, Jesus okwa li e va pita komesho, ndele ovahongwa ova li va kumwa, navamwe ovo va li ve mu shikula ova li va tila. Opo nee okwa ifana po ovayapostoli vaye 12, ndele te va lombwele kombinga yaasho a li poku ka ningilwa. 33 Okwa ti: “Taleni, ohatu yeni kuJerusalem, ndele Omona womunhu ota ka yandjwa momake ovapristeri ovakulunhu novanongo vomishangwa. Ota ka tokolelwa efyo nota ka yandjwa momake ovanhu vomoiwana imwe i lili, 34 opo nee ota ka shekwa, ta ka fiilwa omate, ta ka dengwa nokudipawa, nomefiku etitatu ota ka nyumunwa.”

35 Ndele Jakob naJohannes, ovana vaSebedeus, ove uya kuye ndele tava ti: “Muhongi, otwa hala u tu ningile keshe osho hatu ku pula.” 36 Okwa tya kuvo: “Omwa hala ndi mu ningile shike?” 37 Ova ti: “Tu pitika tu ka kale pamwe naave mOuhamba woye,* umwe okolulyo loye naumwe okolumosho loye.” 38 Ndele Jesus okwa tya kuvo: “Nye kamu shi shii osho tamu pula. Otamu dulu ngoo okunwa meholo olo ndi li pokunwa, ile okuninginifwa neninginifo olo handi ka ninginifwa?” 39 Ova tya kuye: “Ohatu dulu.” Jesus okwa tya kuvo: “Eholo olo handi nu olo tamu ka nwa, neninginifo olo handi ninginifwa olo tamu ka ninginifwa. 40 Ashike okukala kolulyo nokolumosho lange haame handi ku yandje, ndele okwaava ve ku longekidilwa.”

41 Eshi vakwao omulongo ve shi uda, ova li va handukila Jakob naJohannes. 42 Opo nee Jesus okwe va ifana kuye, ndele ta ti kuvo: “Omu shi shii kutya ovapangeli voiwana ohave i pangele, novanaenghono ohava longifa eenghonopangelo davo oku i pangela. 43 Osho hasho shi na okukala ngaho mokati keni, ndele keshe ou a hala a kale munene mokati keni, na kale omuyakuli weni, 44 naau a hala okukala komesho mokati keni, na kale omupiya waaveshe. 45 Osheshi nokuli nOmona womunhu, ka li e uya okuyakulwa, ndele okuyakula nokuyandja omwenyo waye u ninge ekulilo lavahapu.”

46 Opo nee ova ya kuJeriko. Eshi Jesus novahongwa vaye nosho yo ongudu inene yovanhu va li tava di muJeriko, Bartimeus (omona waTimeus), omweeheli omupofi, okwa li e li omutumba pomunghulo wondjila. 47 Eshi a uda kutya ou ta ende po oJesus Omunasaret, okwa hovela okwiingida ta ti: “Jesus, Omona waDavid, file nge onghenda!” 48 Ndele ovanhu vahapu ove mu hanyena noku mu lombwela a mwene, ashike okwa twikila okwiingida mokule ta ti: “Omona waDavid, file nge onghenda!” 49 Opo nee Jesus okwa kanghama, ndele ta ti: “Mu ifaneni e uye kwaame.” Onghee ova ifana omulumenhu oo omupofi nova tya kuye: “Ino tila, fikama; ote ku ifana.” 50 Okwa dula mo oshikutu shaye shokombada, nokwa fikama diva ndele ta i kuJesus. 51 Opo nee Jesus okwa tya kuye: “Owa hala ndi ku ningile shike?” Omulumenhu oo omupofi okwa ti: “Muhongi,* kwafele nge u twikulule nge.” 52 Jesus okwa tya kuye: “Inda nombili, eitavelo loye ole ku velula.” Ndele diva omulumenhu oo okwa twikuluka, nokwa hovela oku mu shikula.

11 Eshi Jesus novahongwa vaye va ehena popepi naJerusalem, Betfage naBetania, ove uya pOmhunda yEemono, na Jesus okwa tuma ovahongwa vaye vavali, 2 ndele te va lombwele ta ti: “Indeni komukunda oo u li komesho yeni. Shimha mwa i mo, otamu ka hanga mo okandongi ka mangwa, oko inaka londwa nande onale komunhu. Ka mangululeni ndele tamu ka eta kwaame. 3 Ngeenge umwe okwe mu pula ta ti, ‘Omolwashike tamu mangulula okandongi?’ tyeni, ‘Omwene okwe ka pumbwa, note ke ka alula diva.’” 4 Eshi va ya, ova hanga okandongi ka mangwa ke li poshivelo sheumbo shi li popepi nondjila, ndele tave ka mangulula. 5 Ndele vamwe ovo va li po ofika ova tya kuvo: “Omolwashike tamu mangulula okandongi?” 6 Opo nee ova popya osho Jesus e va lombwela, novanhu ovo ove va efa va ye.

7 Ova eta okandongi kuJesus, nova yala ko oikutu yavo yokombada, ndele ta kala ko omutumba. 8 Vahapu ova li yo va yala oikutu yavo yokombada mondjila, ofimbo vamwe va teta oitai komiti. 9 Ndele ovo va li komesho yaye, naavo ve mu shikula ova kala tava ingida tava ti: “Ohatu ilikana a xupifwe! Na nangekwe noupuna ou te uya medina laJehova! 10 Na nangekwe noupuna ou te uya okupangela mOuhamba watate David! Ohatu ku indile, ou u li pombadambada, mu xupifa!” 11 Ndele eshi Jesus a fika muJerusalem, okwa ya motembeli nokwa tala oinima aishe, ndele molwaashi okwa li kwa toka, okwa ya novayapostoli vaye 12 kuBetania.

12 Efiku la landula ko, fimbo va li tava di muBetania, okwa li a fya ondjala. 13 Opo nee okwa mona omukwiyu u na omafo u li kokule, ndele ta i ko a tale ngeenge ota hange ko sha. Ndele eshi e uya puo, okwa hanga ko ashike omafo, molwaashi kasha li efimbo leenghwiyu. 14 Onghee okwa tya kuo: “Ito ima vali oiimati.” Ndele ovahongwa vaye ova uda osho a ti.

15 Okudja opo ove uya kuJerusalem. Opo nee Jesus okwa ya motembeli, ndele ta taataa mo ovo va li tava lande notava landifile mo. Ndele okwa undulila poshi oitaafula yovakumaani voimaliwa noipundi yaavo va li tava landifa eenghuti, 16 noka li a efa nande oumwe a pitile motembeli a humbata sha. 17 Okwa honga yo ovanhu ta ti: “Inapa shangwa hano kutya, ‘Eumbo lange otali ka ifanwa eumbo lokwiilikanena oiwana aishe?’ Ndele nye omwe li ninga ekololo lovanyeki.” 18 Eshi ovapristeri ovakulunhu novanongo vomishangwa ve shi uda, ova hovela okupangela omhangela ve mu dipae, molwaashi ova li ve mu tila, osheshi ongudu yovanhu oya li ya kuminwa ehongo laye.19 Eshi kwa toka, Jesus novahongwa vaye ova li va dja mo moshilando. 20 Ndele fimbo va li molweendo ongula inene, ova mona omukwiyu wa fya fiyo okomidi. 21 Eshi Petrus e u dimbuluka, okwa tya kuye: “Omuhongi,* tala, omukwiyu winya wa finga owa fya.” 22 Jesus okwa tya kuvo: “Kaleni mu na eitavelo muKalunga. 23 Oshili ohandi mu lombwele kutya keshe ou ta lombwele omhunda ei, ‘Litumba po, ndele to liumbile mefuta,’ ndele ita limbililwa momutima waye noku na eitavelo kutya osho ta popi otashi ka ningwa, oshi na okuningwa shili. 24 Onghee ohandi mu lombwele kutya oinima aishe oyo tamu i indile, kaleni mu na eitavelo kutya omwe i pewa, notamu ka kala mu i na. 25 Ngeenge tamu ilikana, diminei po keshe oo e mu ninga nai opo Xo womeulu naye e mu dimine po omanyono eni.” 26 ——

27 Opo nee ove uya vali kuJerusalem. Ndele fimbo Jesus a li ta ende a yuka motembeli, ovapristeri ovakulunhu, ovanongo vomishangwa novakulunhu voshiwana ove uya kuye, 28 ndele tave mu pula tava ti: “Okeenghonopangelo dalyelye to longo oinima ei? Nolyelye e ku pa eenghonopangelo odo?” 29 Jesus okwa tya kuvo: “Naame onda hala oku mu pula, ndele ngeenge omwa nyamukula nge, naame ohandi ke mu lombwela kutya okeenghonopangelo dalyelye handi longo oinima ei. 30 Eninginifo laJohannes ola dja meulu ile omovanhu?* Nyamukulei nge.” 31 Ndele ova hovela okukundafana tava ti: “Ngeenge otwa ti, ‘Omeulu,’ ota ka tya, ‘Omolwashike hano inamu mu itavela?’ 32 Ongahelipi ngeenge otwa ti, ‘Omovanhu’?” Ova li va tila ongudu yovanhu, molwaashi ongudu aishe oya li ya tala ko Johannes e li omuprofeti washili. 33 Onghee ova nyamukula Jesus tava ti: “Katu shi shii.” Jesus okwa tya kuvo: “Naame itandi mu lombwele kutya okeenghonopangelo dalyelye handi longo oinima ei.”

12 Ndele okwa hovela okupopya navo ta longifa omafaneko, ta ti: “Opa li omulumenhu umwe oo a li e na oshikunino shomandjebele nokwe shi umbila ongubu, ndele ta fe mo elambo loshikolelo shomaviinyu nokutunga mo oshungongulu. Opo nee okwa kongela mo ovanailonga, ndele ta i kondje yoshilongo. 2 Eshi omandjebele a pya, okwa tuma omupiya waye umwe kovanailonga vomoshikunino e ke mu talele ko oiimati. 3 Opo nee ove mu kwata, nove mu denga, ndele tave mu shunifa eenyala dongaho. 4 Natango okwa tuma ko omupiya umwe, ndele naye tave mu denge eembole momutwe noku mu tukaela. 5 Ndele okwa tuma ko vali mukwao, nove mu dipaa; navakwao vahapu ovo a tuma ko, vamwe ove va denga navamwe ove va dipaa. 6 Opo nee mwene woshikunino shomandjebele okwa tuma ko omonamati waye omuholike, ta ti: ‘Omonamati wange otave ke mu fimaneka.’ 7 Ndele ovanailonga vomoshikunino ova kundafana tava ti, ‘Ou oye omufyuululi. Natu mu dipaeni opo efyuululo li ninge letu.’ 8 Onghee hano, ove mu kwata nove mu dipaa, ndele tave mu kokolola mo moshikunino. 9 Mwene woshikunino osho ngeenge okwe uya, ota ka ninga po shike? Ote ke va dipaa, ndele moshikunino ta kongele mo ovanailonga vamwe. 10 Hamba inamu lesha omushangwa ou tau ti: ‘Emanya olo ovatungi va ekelashi ola ninga emanya la fimanenena?* 11 Emanya olo ola dja kuJehova, nolikumwifi momesho etu.’”

12 Eshi va didilika kutya Jesus ota popi kombinga yavo eshi a longifa efaneko olo, ova li va hala oku mu kwata po. Ashike ova li va tila ongudu yovanhu. Onghee ova ya, ve mu fiya po.

13 Natango ova tuma kuJesus vamwe vomOvafarisai novayambididi vaHerodes opo va dule oku mu yula meendjovo. 14 Eshi va fika, ova tya kuye: “Omuhongi, otu shi shii kutya ove omunashili noiho lalakanene okupandika kovanhu, osheshi iho tale eholokepo lokombada lovanhu, ndele oho hongo oshili kombinga yaKalunga. Osha yuka tuu* okufuta oifendela kOmukesari? 15 Mbela otu na okufuta ile hasho?” Eshi Jesus a didilika oihelele yavo, okwa tya kuvo: “Omolwashike tamu yeleke nge? Etelei nge odenari ndi i tale.” 16 Opo nee ove i eta, ndele ta ti kuvo: “Efano neshangelo eli olalyelye?” Ova tya kuye: “OlOmukesari.” 17 Jesus okwa ti: “Hano eshi shOmukesari shi peni Omukesari, naasho shaKalunga shi peni Kalunga.” Onghee ova li va kuminwa eendjovo daye.

18 Ovasadukai ovo hava ti kaku na enyumuko, ove uya kuye, ndele tava ti: 19 “Omuhongi, Moses okwa ti kutya ngeenge umwe okwa filwa omumwaina omulumenhu a fiya po omukulukadi, ndele ina fiya po oludalo, mumwaina na kufe po omukulukadi oo, ndele ta dalele mumwaina ounona. 20 Ndele opa li ovamwainafana ovalumenhu vaheyali. Wotete okwa li a hombola, ndele ta fi ehe na oludalo. 21 Omutivali okwa li a hombola po omukulukadi oo, ndele naye ta fi ehe na oludalo, nomutitatu osho tuu. 22 Ndele aveshe vaheyali osho va ningilwa ngaho. Xuuninwa, omukainhu naye okwa ka fya. 23 Ngeenge va nyumunwa, omukulukadi oo ota ka ninga walyelye? Osheshi okwa li omukulukadi wavo aveshe vaheyali.” 24 Jesus okwa tya kuvo: “Nye omwa puka, shaashi kamu shii Omishangwa nanghee eenghono daKalunga hadi longo. 25 Osheshi eshi tava ka nyumunwa, ovalumenhu itava ka hombola, novakainhu itava ka hombolwa, ashike otava ka kala ngaashi ovaengeli vomeulu. 26 Ndele shi na sha novafi ovo tava ka nyumunwa, hamba inamu lesha membo laMoses, mehokololo li na sha noshixwa sheno, eshi Kalunga a ti kuMoses: ‘Aame Kalunga kaAbraham naKalunga kaIsak naKalunga kaJakob’? 27 Oye Kalunga kovanamwenyo, ndele ke fi Kalunga kovafi. Nye omwa puka filufilu.”

28 Ndele umwe womovanongo vomishangwa eshi a uda tava kundafana, nokwa didilika kutya Jesus okwe va nyamukula mondjila, okwe uya puye ndele te mu pula ta ti: “Oshipango shotete* oshilipi po?” 29 Jesus okwa ti: “Shotete osheshi, ‘Pwilikina Israel, Jehova Kalunga ketu oye aeke Jehova. 30 Ndele hola Jehova Kalunga koye nomutima woye aushe, nomwenyo* woye aushe, nomadiladilo oye aeshe neenghono doye adishe.’ 31 Oshitivali osheshi: ‘Kala u hole mukweni ngaashi u lihole mwene.’ Kape na vali oshipango shimwe sha fimana shi dule ei.” 32 Ndele omunongo womishangwa oo okwa tya kuye: “Omuhongi, owa popya oshili, ‘Oye aeke, nokape na vali umwe e mu fa.’ 33 Onghee okukala tu mu hole nomutima aushe, nomadiladilo etu aeshe,* neenghono detu adishe, nokukala tu hole vakwetu ngaashi tu lihole fye vene, osha fimanenena shi dule omaxwikiloyambo nomayambo aeshe.” 34 Eshi Jesus a mona kutya omulumenhu oo okwa popya sha yuka, okwa tya kuye: “Ove ku li kokule nOuhamba waKalunga.” Konima yaasho, aveshe ova li va tila oku mu pula sha vali.

35 Ndele eshi Jesus a twikila okuhonga ovanhu motembeli, okwa ti: “Omolwashike hano ovanongo vomishangwa tava ti kutya Kristus omona waDavid? 36 David eshi a nwefwa mo komhepo iyapuki okwa ti, ‘Jehova okwa lombwela Omwene wange, a ti: “Kala omutumba kolulyo lange fiyo ohandi tula ovatondi voye koshi yeemhadi doye.”’ 37 Hano ngeenge David okwe mu ifana Omwene, ongahelipi e li omona waye?”

Ongudu inene yovanhu oya li tai pwilikine kuye nehafo. 38 Fimbo a li ta hongo, okwa ti: “Lungameni ovanongo vomishangwa ovo ve hole okweendaenda va djala oikutu ile, nove hole okupopifwa monghedi ye likalekelwa peenhele domalandifilo. 39 Ove hole yo okukala omutumba koipundi yokomesho* meeshinagoga nopeenhele odo da nuninwa ovaenda ovo va fimana poivilo. 40 Ohava kufa ovafiyekadi oinima yavo,* nokwiilikana omaindilo malemale opo ve limonikife. Ovanhu va tya ngaho otava ka mona ehandukilo la kwata moiti.”

41 Fimbo Jesus a li omutumba a taalela koshikefa shomayambidido ta tale nghee ongudu yovanhu tai tula mo oimaliwa, okwa mona oipuna ihapu tai tula mo oimaliwa ihapu. 42 Opo nee okwa dja omufiyekadi umwe ndele ta tula mo oumaliwa vavali vongushu inininini.* 43 Onghee Jesus okwa ifana ovahongwa vaye, ndele ta ti kuvo: “Oshili ohandi mu lombwele, omufiyekadi oo ohepele okwa tula mo shihapu e dule aveshe ovo va tula oimaliwa moshikefa shomayambidido. 44 Osheshi aveshe ova tula mo oixupe yeliko lavo, ndele omufiyekadi oo, nonande okwa li ohepele, okwa tula mo ashishe osho a li e na.”

13 Fimbo Jesus a li ta di motembeli, umwe womovahongwa vaye okwa tya kuye: “Omuhongi, tala omamanya nomatungo oo mawa.” 2 Opo nee Jesus okwa tya kuye: “Omatungo oo manene ou a wete? Kape na nande emanya tali ka fiwa la londa kulikwao inali ngumaunwa po.”

3 Ndele fimbo a li omutumba kOmhunda yEemono, a taalela kotembeli, Petrus, Jakob, Johannes naAndreas ove mu pula ve li po ovo aveke, tava ti: 4 “Tu lombwela, oinima oyo otai ka ningwa naini, noshike tashi ka kala edidiliko olo tali ulike kutya exulilo layo aishe oli li popepi?” 5 Jesus okwe va lombwela ta ti: “Taleni, inamu pukifwa nande okomunhu. 6 Vahapu otave ke uya medina lange, tava ti, ‘Aame Kristus,’ notava ka pukifa vahapu. 7 Onghee hano, ngeenge omwa mono oita nokuuda eenghundana di na sha noita, inamu mbadapala, osheshi oinima oyo oi na okuningwa, ashike olo halo exulilo.

8 “Osheshi oiwana otai ka lwifafana, omauhamba otaa ka kondjifafana, notaku ka kala omakakamo edu keembinga neembinga nosho yo ondjala. Oinima aishe oyo oi li ngaashi ehovelo loshifeta shokudala.

9 “Ndele lungameni, osheshi ovanhu otave ke mu twala keemhangu ndele tave mu dengele meeshinagoga, notamu ka twalwa yo komesho yovapangeli noyeehamba omolwange, opo shi va pe oumbangi. 10 Onghundana iwa oi na yo okuudifilwa tete oiwana aishe. 11 Ngeenge ove mu twala keemhangu, inamu kala mu na oshisho kutya otamu ka popya shike. Ndele popyeni osho omhepo iyapuki tai ke mu pa pefimbo opo, osheshi hanye vene tamu ka popya, ndele oyo tai ka popya munye. 12 Shikwao vali, omumwainamati ota ka dipaifa omumwainamati, naxe ota ka dipaifa omona, nounona otava ka kala ve li omhinge novadali vavo noku va dipaifa. 13 Ndele otamu ka tondwa kovanhu aveshe omolwedina lange. Ashike ou te lididimike fiyo okexulilo ota ka xupifwa.

14 “Onghee hano, ngeenge omwa mono oixuna oyo tai etifa ehanauno i li ofika opo ihe na okukala (omuleshi na longife eendunge dokuyoolola), opo nee ovo ve li muJudea nava ye onhapo keemhunda. 15 Ou ta hangika kombada yeumbo ina londoloka ko a ka pitule oinima yaye meumbo, 16 naau ta hangika mepya ina shuna meumbo a ka pitule mo oshikutu shaye shokombada. 17 Woo ovo tava ka hangika ovafimba novamwali pefimbo olo! 18 Kaleni tamu ilikana opo efimbo olo lokuya onhapo lihe uye pokufu. 19 Osheshi pefimbo olo otaku ke uya oudjuu oo inau kala ko nale okudja eshi Kalunga a hovela okushita ounyuni, noitau ka kala ko vali. 20 Ngeno Jehova ka li a xupipika omafiku oo, ngeno kape na ou ta ka xupifwa. Ndele omolwovahoololwa vaye, omafiku oo ote ke a xupipika.

21 “Ndele ngeenge umwe okwa ti kunye, ‘Tala, Kristus oye ou,’ ile, ‘Tala, oye winya!’ inamu shi itavela. 22 Osheshi otaku ka holoka ookristus novaprofeti ovanaipupulu notava ka longa oikumwifilonga opo va pukife nokuli novahoololwa. 23 Onghee hano, kaleni oupafi, osheshi onde mu londwela kombinga yoinima aishe oyo fimbo inai holoka.

24 “Ndele pefimbo olo, konima youdjuu oo, etango otali ka laula, omwedi itau ka minikila vali, 25 neenyofi otadi ka wa ko keulu, noikwaulu otai ka kakama. 26 Opo nee otava ka mona Omona womunhu te uya moilemo e na eenghono dinene noshinge. 27 Ndele ota ka tuma ovaengeli notava ka ongela ovahoololwa vaye okudja keembinga nhee domhepo, okudja komunghulo wedu fiyo okomunghulo weulu.

28 “Lihongeni kefaneko eli li na sha nomukwiyu: Diva shimha oitai yao ya tende, ndele tai twiyuka omafo, omu shii kutya okwenye oku li popepi. 29 Sha faafana, nanye ngeenge omwa mono oinima oyo tai ningwa, shiiveni kutya Omona womunhu oku li popepi, poshivelo. 30 Oshili ohandi mu lombwele kutya epupi eli itali xulu po nandenande fiyo oinima aishe oyo ya ningwa. 31 Eulu nedu otali ka xula po, ashike eendjovo dange kadi na nande efiku di xule po.

32 “Ndele shi na sha nefiku olo novili, kape na nande oumwe e i shii, kutya nee ovaengeli vomeulu ile Omona, ndele oTate aeke. 33 Onghee hano, kaleni oupafi osheshi kamu shii efimbo olo oinima oyo tai ka ningwa. 34 Osho otashi dulu okufaafanifwa nomulumenhu ta i kondje yoshilongo, ndele eumbo laye te li fiile ovapiya vaye. Opo nee okwa pa keshe umwe oshinakuwanifwa shaye, nokwa lombwela omupashukili weumbo a kale oupafi. 35 Onghee hano, kaleni oupafi osheshi kamu shii efimbo olo mwene weumbo te uya. Kamu shii ngeenge ote uya omutenya ile omokati koufiku ile ofimbo inaku sha* ile ongula inene, 36 opo ehe mu hange mwa kofa ngeenge okwe uya ombadilila. 37 Osho handi mu lombwele, ohandi shi lombwele yo aveshe kutya: Kaleni oupafi.”

14 Eshi kwa li ku na omafiku avali opo ku danwe Opaasa nosho yo oshivilo shomingome inadi ya efulika, ovapristeri ovakulunhu novanongo vomishangwa ova li tava kongo omhito va kwate po Jesus moku mu ningifa* a popye sha sha puka opo va dule oku mu dipaa. 2 Ndele ova tya: “Inatu mu kwata po pefimbo loshivilo opo paha holoke epiyaano mokati kovanhu.”

3 Fimbo Jesus a li ta li* muBetania meumbo laSimon, oo a li omunashilundu, kuye okwe uya omukainhu umwe e na oshanga yomaadi* ondilo edimba liwa, onarde yo venevene. Opo nee omukainhu oo okwa patulula oshanga ndele ta hovele okutila omaadi momutwe waJesus. 4 Vamwe ova pulafana va handuka tava ti: “Omolwashike omaadi aa edimba liwa taa hepifwa? 5 Ngeno okwa landifilwe po oimaliwa i dulife peedenari 300, ndele tai pewa eehepele.” Onghee ova li va handukila neenghono omukainhu oo. 6 Opo nee Jesus okwa ti: “Mu efeni. Omolwashike mwa hala oku mu handukifa? Okwa longela nge oshilonga shiwa. 7 Eehepele odi li punye alushe notamu dulu oku di ningila ouwa efimbo keshe, ndele ame itandi ka kala alushe punye. 8 Omukainhu oo okwa ninga ngaashi ta dulu. Okwa vaeka olutu lange omaadi edimba liwa opo e li longekidile epako. 9 Oshili ohandi mu lombwele, keshe apa onghundana iwa tai udifwa mounyuni aushe, oshilonga eshi omukainhu ou a longa nasho otashi ka hepaululwa opo a dimbulukiwe.”

10 Ndele Judas Iskariot, umwe womwaavo omulongo navavali, okwa ya kovapristeri ovakulunhu opo a yandje Jesus momake avo.* 11 Ovapristeri ova li va hafa neenghono eshi ve shi uda, nova li ve mu udanekela ve mu pe oimaliwa yoisilveri. Opo nee okwa li a konga omhito a kengelele Jesus.

12 Ndele mefiku lotete lomingome inadi ya efulika, omo va li hava yambe eyambo lOpaasa, ovahongwa vaye ova tya kuye: “Openi wa hala tu ke ku longekidile ouvalelo wOpaasa?” 13 Opo nee okwa tuma ovahongwa vaye vavali, ndele ta ti kuvo: “Indeni moshilando, notamu ka shakeneka mo omulumenhu a humbata oshitoo shomeva. Mu landuleni, 14 nongeenge okwa i meumbo, tyeni kumwene weumbo, ‘Omuhongi okwa ti: “Onduda yovaenda oi li peni opo ndi danene mo Opaasa novahongwa vange?”’ 15 Opo nee ote ke mu ulikila onduda ya kula yopombada, ya longekidilwa ovaenda. Omo mu longekidila ouvalelo wOpaasa.” 16 Okudja opo ovahongwa ova ya moshilando osho, nova mona oinima aishe ngaashi Jesus e va lombwela, ndele tava longekida Opaasa.

17 Eshi kwa toka, Jesus okwe uya monduda oyo novayapostoli vaye 12. 18 Ndele fimbo ve li omutumba poshitaafula tava li, Jesus okwa ti: “Oshili ohandi mu lombwele, umwe womunye oo ta li pamwe naame ota ka kengelela nge.” 19 Opo nee ova nyika oluhodi, ndele keshe umwe te mu pula, ta ti: “Haame ndi shii?” 20 Okwa tya kuvo: “Oumwe womunye omulongo navavali, ou ta velele oshita naame metiti. 21 Osheshi Omona womunhu ota ka fya ngaashi pa shangwa kombinga yaye, ndele woo omunhu ou te mu kengelele! Oshixwepo ngeno ka dalelwe.”

22 Ofimbo va li tava li, Jesus okwa kufa omungome, ta ilikana, ndele te u pambula, nokwe u va pa, ta ti: “Tambuleni; omungome ou otau faneke olutu lange.” 23 Opo nee okwa kufa eholo, ta pandula Kalunga, nokwe li va pa, ndele aveshe tava nu mo. 24 Okwa tya kuvo: “Eholo eli otali faneke ‘ohonde yange yehangano,’ oyo tai tilwashi omolwavahapu. 25 Oshili ohandi mu lombwele, itandi ka nwa vali nandenande omaviinyu aa fiyo efiku olo handi ke a nwa mape mOuhamba waKalunga.” 26 Xuuninwa, eshi va imba omaimbilohambelelo,* ova dja mo ndele tava i kOmhunda yEemono.

27 Opo nee Jesus okwa tya kuvo: “Amushe otamu ka fiya nge po, osheshi opa shangwa: ‘Ohandi ka denga omufita, needi otadi ke lihana.’ 28 Ndele shimha nda nyumuka, ohandi ke mu tetekela kuGalilea.” 29 Petrus okwa tya kuye: “Nande vakwetu aveshe nave ku fiye po, ame itandi ku fiye po.” 30 Jesus okwa tya kuye: “Oshili ohandi ku lombwele, oufiku wonena, fimbo ekondobolo inali kwena oshikando oshitivali, oto ke lidimbika nge lutatu.” 31 Ndele Petrus okwa kala ta endulula lwoikando ta ti: “Kutya nee otashi pula ndi fye pamwe naave, itandi ke ku lidimbika nande.” Ovahongwa vakwao aveshe navo ova popya sha faafana.

32 Ndele ove uya konhele hai ifanwa Getsemane, opo nee okwa tya kovahongwa vaye: “Kaleni omutumba apa fimbo handi ka ilikana.” 33 Opo nee okwa ya pamwe naPetrus, Jakob naJohannes, nokwa hovela okunyika oluhodi neenghono. 34 Okwa tya kuvo: “Onda* nyika oluhodi neenghono, nokuli fiyo okufya. Kaleni apa, nokukala oupafi.” 35 Ndele okwa ehena komesho kanini, te linyongamene pedu, ndele ta ilikana kutya ngeenge otashi dulika, ina pita monghalo oyo. 36 Opo nee okwa ti: “Abba,* Tate, kwoove oinima aishe otai shiiva; kufe nge eholo eli. Ashike hangaashi ame nda hala, ndele ongaashi ove wa hala.” 37 Eshi a aluka, okwa hanga va kofa, ndele ta ti kuPetrus: “Simon, owa kofa hano? Ito dulu okukala oupafi nande ovili imwe? 38 Kaleni oupafi nokukala tamu ilikana opo muha ye momayeleko. Oshoshili kutya omhepo oya halelela, ndele ombelela oi na ounghundi.” 39 Opo nee okwa ya vali ndele ta ilikana, a popya eendjovo da faafana. 40 Ndele okwe uya vali nokwe va hanga va kofa, osheshi ova li ve kwetiwe unene keemhofi. Onghee kava li ve shii kutya nava tye shike. 41 Opo nee okwa shuna ko vali oshikando oshititatu, ndele ta ti kuvo: “Pendukeni! Eli halo efimbo lokukofa nokufuda po! Taleni! Efimbo ola fika Omona womunhu a yandjwe momake ovalunde. 42 Fikameni tu yeni. Taleni! Ou ta kengelele nge oku li popepi.”

43 Ndele diva ofimbo a li natango ta popi, Judas, umwe womwaavo omulongo navavali, okwe uya pamwe nongudu yovanhu i na omaongamukonda needibo, ya tumwa kovapristeri ovakulunhu, kovanongo vomishangwa nokovakulunhu voshiwana. 44 Ndele omukengeleli waye okwe va pa edidiliko, ta ti: “Ou handi xupita, oye ngaho; mu kwatei po, indeni naye, inamu mu efa.” 45 Opo nee Judas okwa ya a yukilila kuJesus, nokwa tya kuye: “Muhongi!”* Ndele te mu xupita. 46 Onghee ove mu kwata po. 47 Ndele umwe womwaavo va li po ofika okwa pweya mo eongamukonda laye, nokuteta ko okutwi kwomupiya womupristeri munene. 48 Opo nee Jesus okwa tya kuvo: “Omwe uya okukwata nge po mu na omaongamukonda needibo mwa fa mwe uya okukwata po ombudi? 49 Onda kala nanye motembeli efiku nefiku handi hongo, ashike inamu kwata nge po. Ndele aishe oyo oya ningwa opo Omishangwa di wanifwe.”

50 Opo nee ovahongwa aveshe ove mu fiya po, va ya onhapo. 51 Ndele opa li omulumenhu umwe omunyasha e likambeka elapi liwa loliina olo alike, ta shikula Jesus, novanhu ova li va kendabala oku mu kwata po. 52 Opo nee okwa fiya po elapi laye ndele ta faduka po e li hamunghele.*

53 Ndele ova twala Jesus komupristeri munene, opo nee ovapristeri ovakulunhu, ovakulunhu voshiwana novanongo vomishangwa aveshe ova ongala. 54 Petrus okwa li e mu shikula e li konima kokule fiyo omomukala womupristeri munene, nokwa kala omutumba povapiya, ta xuxumukwa pomundilo. 55 Ndele ovapristeri ovakulunhu noilyo aishe ikwao yOmhangu yoPombada yOvajuda ova li va konga ovanhu va totele Jesus omahokololo oipupulu opo va dule oku mu dipaa, ashike inava mona nande oumwe. 56 Nonande opa li pa holoka eembangi doipupulu dihapu, omahokololo ado kaa li taa tu kumwe. 57 Opa li yo vamwe ovo tava popi oipupulu kombinga yaye, tava ti: 58 “Otwe mu uda ta ti, ‘Ohandi ngumauna po otembeli ei ya tungwa nomake, ndele moule womafiku atatu ohandi tungu po imwe inai tungwa nomake ovanhu.’” 59 Ndele nopomhito oyo, omahokololo avo kaa li taa tu kumwe.

60 Opo nee omupristeri munene okwa fikama, ndele ta pula Jesus ta ti: “Ito nyamukula sha? Ku udite ko hano eshi ovalumenhu ava tave ku hokololifa?” 61 Ndele okwa kala ashike a mwena, ina nyamukula sha. Opo nee omupristeri munene okwe mu pula vali ta ti: “Oove Kristus Omona wOmukombadambada?” 62 Jesus okwa ti: “Heeno, aame; notamu ka mona Omona womunhu e li omutumba kolulyo laKalunga Omunaenghono note uya moilemo yokeulu.” 63 Opo nee omupristeri munene okwa pombaula oshikutu shaye, ndele ta ti: “Omolwashike twa pumbwa vali okukonga eembangi? 64 Omwe mu uda eshi ta sheke Kalunga. Otamu ti ngahelipi?” Aveshe ova ti kutya okwa wana okufya. 65 Opo nee vamwe ove mu fiila omate, tave mu uvike koshipala noku mu denga neengonyo, ndele tava ti kuye: “Xunganeka!” Ove mu denga nomanghava moshipala, novapiya vomomhangu ove mu kufa po.

66 Ndele fimbo Petrus a li momukala, okakadona kamwe okapiya komupristeri munene oke uya po. 67 Eshi ka mona Petrus ta xuxumukwa, oke mu tala ndele taka ti: “Naave owa li pamwe naJesus Omunasaret.” 68 Ashike okwe likala, ta ti: “Nghi mu shii, nokandi udite kutya oto popi kombinga yashike.” Opo nee okwa ya a finda koshivelo. 69 Okakadona okapiya oke mu mona vali ndele taka lombwele ovo ve li po ofika taka ti: “Ou oumwe womuvo.” 70 Natango okwe likala. Ndele konima yokafimbo, ovo va li po ofika navo ova tya kuPetrus: “Oshili naave yo oumwe womuvo, osheshi ove Omugalilea.” 71 Opo nee okwa hovela okulifingaela nokwaana ta ti: “Omulumenhu ou tamu popi nghi mu shii!” 72 Diva ekondobolo ola kwena oshikando oshitivali, na Petrus okwa dimbuluka osho Jesus a li e mu lombwela, a ti: “Fimbo ekondobolo inali kwena oshikando oshitivali, oto ke lidimbika nge lutatu.” Petrus okwa nyika oluhodi neenghono, ndele ta lili.

15 Ndele diva eshi eluwa la tenda, ovapristeri ovakulunhu, ovakulunhu voshiwana novanongo vomishangwa, sha hala kutya oilyo aishe yOmhangu yoPombada yOvajuda, oya kundafana ndele tai mange Jesus komaoko noku mu twala kuPilatus. 2 Opo nee Pilatus okwe mu pula ta ti: “Oove Ohamba yOvajuda?” Jesus okwa ti: “Osho naanaa ngaashi wa popya.” 3 Ndele ovapristeri ovakulunhu ova li tave mu hokololifa oinima ihapu. 4 Pilatus okwe mu pula vali ta ti: “Ito nyamukula sha? Ku udite ko hano oinima ihapu oyo to hokololifwa?” 5 Ashike Jesus ine mu nyamukula sha, onghee Pilatus okwa li a kumwa neenghono.

6 Poshivilo keshe shopaasa, Pilatus okwa li ha mangululile ovanhu omunadolongo umwe oo va hala. 7 Pefimbo opo omulumenhu wedina Barabas navakwao ova li modolongo eshi va twa ondubo nepangelo nova dipaa ovanhu. 8 Opo nee ongudu yovanhu oye uya kuPilatus ndele tai mu indile e i mangululile omunadolongo umwe ngaashi ha ningi shito. 9 Okwa tya kuvo: “Inamu hala ndi mu mangululile Ohamba yOvajuda?” 10 Pilatus okwa li e shi shii kutya ovapristeri ovakulunhu ova yandja Jesus momake aye omolwondubo. 11 Ashike ovapristeri ovakulunhu ova xwaxwameka ongudu yovanhu i pule i mangululilwe Barabas ponhele yaJesus. 12 Opo nee Pilatus okwe va pula vali ta ti: “Oshike ndi na okuninga po shi na sha naau taku tiwa oye Ohamba yOvajuda?” 13 Ndele ova ingida mokule tava ti: “Na valelwe komuti!” 14 Pilatus okwa tya kuvo: “Omolwashike? Okwa longa owii washike?” Ova ingida vali mokule tava ti: “Na valelwe komuti!” 15 Ndele molwaashi Pilatus okwa li a hala okupandika kongudu yovanhu, okwe va mangululila Barabas, nokonima eshi a dengifa Jesus, okwe mu yandja a ka valelwe komuti.

16 Ovakwaita ova twala Jesus momukala weumbo langoloneya, ndele tava ifana etangakwaita alishe. 17 Opo nee ove mu kambeka elapi loluvala lopeepela nova tunga oshishani shomakiya noku shi tula komutwe waye, 18 ndele tava ti kuye: “Kundwa, oove Ohamba yOvajuda!” 19 Ova li yo ve mu denga komutwe nolumbungu noku mu fiila omate, ndele tave mu twile eengolo.* 20 Konima eshi ve mu sheka, ove mu dula elapi loluvala lopeepela, ndele tave mu dike oikutu yaye yokombada noku ke mu valela komuti. 21 Ndele ova shakeneka omulumenhu Omukireni wedina Simon, xe yaAleksander naRufus, ta di komikunda, nove mu fininika a humbate omuti womahepeko* waJesus.

22 Okudja opo ove mu twala konhele hai ifanwa Golgata, sha hala okutya, “Onhele yOmakolotwe.” 23 Opo nee ova li va kendabala oku mu pa omaviinyu a lumbakanifwa noimbodi ilula,* ashike ine a nwa. 24 Onghee ove mu valela komuti, ndele tave litukulile oikutu yaye yokombada ve i ningila oshihoololifo, kutya otai ningi yalye nalye. 25 Ndele ove mu valela komuti pomuwoi wongula lwaapo.* 26 Pomutwe waye ova tula po okapapa ka shangwa etomheno kutya omolwashike a dipawa, tali ti: “Ohamba yOvajuda.” 27 Ndele ova valela ovakolokoshi vavali pamwe naye, umwe okolulyo laye naumwe okolumosho laye. 28 —— 29 Ovo tava ende po ova li tave mu sheke nokupukapuka komitwe, tava ti: “Owa tile oto ngumauna po otembeli noku i tungulula moule womafiku atatu. 30 Lixupifa ove mwene ndele to di ko komuti womahepeko.”* 31 Ovapristeri ovakulunhu novanongo vomishangwa, navo ova li ve mu sheka, tava ti: “Vakwao okwa li he va kwafa, ndele ye mwene ite likwafa! 32 Kristus ngeenge Ohamba yaIsrael, na dje ko paife komuti womahepeko* opo tu shi mone noku mu itavela.” Nokuli naavo va li va valelwa pamwe naye ova li tave mu sheke.

33 Ndele lwopokati komutenya* fiyo oponhatu yomutenya,* okwa li kwa laula fokofoko. 34 Ponhatu, Jesus okwa ingida mokule, ta ti: “Eli, Eli, lama sabaktani?” sha hala okutya: “Kalunga kange, Kalunga kange, omolwashike wa ekela nge shi?” 35 Eshi vamwe ovo va li ofika popepi ve shi uda, ova ti: “Pwilikineni! Ota ifana Elia.” 36 Diva umwe okwa tondoka, ndele ta yaveke okayavo momaviinyu malula, te ka tula kolumbungu noku mu pa a nwe, ndele ta ti: “Mu efeni, tu tale ngeenge Elia ote uya e mu xupife.” 37 Opo nee Jesus okwa ingida pombada, ndele ta fi.* 38 Ndele elapi olo la tukula otembeli ola tauka pokati, okudja pombada fiyo opedu. 39 Eshi omukulunhu wetangakwaita oo a li ofika e mu taalela a mona oiningwanima aishe oyo ya ningwa po nanghee Jesus a fya, okwa ti: “Ou okwa li shili Omona waKalunga.”

40 Ndele opa li vali ovakainhu tava tale ve li kokule. Mokati kavo omwa li Maria Magdalena, Salome nosho yo Maria ina yaJakob* naJoses, 41 ovo va li hava ende pamwe naJesus noku mu yakula eshi a li muGalilea. Opa li yo ovakainhu vakwao vahapu ovo a li e uya navo kuJerusalem.

42 Ndele komatango, molwaashi osha li efiku lelilongekido, sha hala okutya efiku olo la tetekela Eshabata, 43 Josef wokuArimatia, oshilyo sha fimana shOmhangu yoPombada yOvajuda, oo a li yo a teelela Ouhamba waKalunga, okwe linyatipaleka nokuya kuPilatus ndele ta pula a pewe oshimhu shaJesus. 44 Molwaashi Pilatus okwa li a limbililwa ngeenge Jesus okwa fya nale, okwa ifana omukulunhu wetangakwaita ndele te mu pula kombinga yaasho. 45 Eshi Pilatus a uda komukulunhu wetangakwaita kutya Jesus okwa fya, okwa yandja oshimhu kuJosef. 46 Opo nee Josef okwa landa elapi londilo loliina, ndele ta kufa ko oshimhu, noku shi dingila melapi olo. Okwe shi tula mombila* oyo ya li ya hokwa memanya, ndele ta undulile emanya poshivelo shombila. 47 Ashike Maria Magdalena naMaria ina yaJoses ova kala tava tale opo pa li pa tulwa oshimhu shaJesus.

16 Konima yefiku lEshabata, Maria Magdalena, Salome naMaria ina yaJakob ova landa oimbodi yedimba liwa opo va ka vaeke oshimhu shaJesus. 2 Ndele ongula inene eshi etango la pita, mefiku lotete koshivike, ove uya kombila.* 3 Opo nee ova pulafana tava ti: “Olyelye te ke tu kufila po emanya poshivelo shombila?” 4 Ndele eshi va tala kombila, ova mona kutya emanya ola undulwa po, nonande ola li la kula unene. 5 Eshi va ya mombila, ova hanga mo omulumenhu omunyasha e li omutumba kolulyo lavo a djala oshikutu shitoka; nova li va tila neenghono. 6 Okwa tya kuvo: “Inamu tila. Jesus Omunasaret ou tamu kongo, oo a li a valelwa komuti, okwa nyumuka. Ke mo omu. Taleni onhele opo va li ve mu nangeka. 7 Ashike indeni mu ka lombwele Petrus novahongwa vakwao kutya, ‘Ote mu tetekele kuGalilea. Oko tamu ke mu hanga ngaashi a li e mu lombwela.’” 8 Eshi va dja mo mombila, ova ya meendelelo molwaashi ova li va kwatwa koumbada notava kakama. Inava lombwela sha nande omunhu molwaashi ova li va tila.*