EMBO LALUKAS

1 Ovanhu vahapu ova ninga eenghendabala va shange oinima aishe oyo ya ningwa, oyo nafye yo twa itavela. 2 Vamwe ovo ve i mona nomesho nova udifa etumwalaka laKalunga ove i tu lombwela. 3 Onghee omufimanekwa Teofilus, onda konakona oinima aishe ei, nonda tokola yo ndi ku shangele kombinga yayo palandulafano layo. 4 Onde ku shangela ngaho opo u shiive kutya oinima oyo wa hongwa nale oi li paushili.

5 Ndele pefimbo laHerodes,* ohamba yaJudea, opa li omupristeri wedina Sakaria, oshilyo shongudu yovapristeri hai ifanwa Abia. Sakaria okwa li a hombola omukainhu womepata laAron, wedina Elisabet. 6 Aveshe ova li ovayuki koshipala shaJehova, hava ende vehe noshipo metwokumwe noipango neemhango daye adishe. 7 Ndele kava li ve na okaana molwaashi Elisabet okwa li ongadji, naaveshe ova li ovanamido.

8 Sakaria okwa li ta longo e li omupristeri koshipala shaKalunga molwaashi osha li olufo longudu yavo okulonga motembeli. 9 Onghee okwa ya motembeli yaJehova, ndele ta xwike oitwimifo ngaashi sha li onghedindjikilile yovapristeri. 10 Ndele ongudu yovanhu aishe oya li pondje tai ilikana pefimbo lomatwiminoyambo. 11 Opo nee omweengeli waJehova okwe mu holokela, e li ofika kolulyo loaltari yokutwimina omayambo. 12 Eshi Sakaria e mu mona okwa haluka, nokwa li a tila unene. 13 Ndele omweengeli okwa tya kuye: “Sakaria, ino tila molwaashi omailikano oye okwa udika kuKalunga. Omukulukadi woye Elisabet ote ke ku dalela okaana okamati, noto ke ka luka Johannes. 14 Ndele ove oto ka hafa nokunyakukwa neenghono, navahapu otava ka hafela okudalwa kwaye, 15 osheshi ota ka ninga munene koshipala shaJehova. Ashike ke na okunwa omaviinyu ile oshikolwifa keshe, nota ka yadifwa omhepo iyapuki nokuli fimbo ina dalwa.* 16 Ota ka kwafela Ovaisrael vahapu va alukile kuJehova Kalunga kavo. 17 Ota ka tetekela yo Kalunga e na eenghono ngaashi Elia, nota ka lundulula omitima dooxe di kale ngaashi dounona. Ovo ihava dulika ote ke va kwafela va longe osho sha yuka, opo a longekidile Jehova oshiwana.”

18 Opo nee Sakaria okwa tya komweengeli: “Osho otashi shiiva ngahelipi? Osheshi fye nomukulukadi wange ovanamido.” 19 Omweengeli okwa tya kuye: “Aame Gabriel, ou handi kala alushe koshipala shaKalunga, nonda tumwa ndi popye naave noku ku lombwela onghundana ei iwa. 20 Ndele tala, ito ka dula okupopya fiyo osheshi oinima oyo ya ningwa, molwaashi ino itavela eendjovo dange odo tadi ka wanifwa peufwafimbo lado.” 21 Onghee ovanhu ova kala va teelela Sakaria, nova li va kumwa eshi a kala motembeli efimbo lile. 22 Eshi a dja mo, ka li ta dulu okupopya navo, nova li va didilika kutya okwa mona emoniko motembeli. Okwa kala ta ningi omaudi, ndele ka li ta popi. 23 Eshi omafiku oilonga yaye iyapuki a pwa ko, okwa shuna keumbo laye.

24 Konima yomafiku onhumba, omukulukadi waye Elisabet okwa ninga oufimba, nokwa kala iha di mo meumbo oule weemwedi nhano, ta ti: 25 “Eshi osho Jehova a ningila nge. Okwa fila nge onghenda opo ndiha kale vali nda dinika kovanhu.”

26 Eshi eteelelo laElisabet la wanifa eemwedi hamano, Kalunga okwa li a tuma omweengeli Gabriel koshilando shedina Nasaret shomuGalilea, 27 kokakadona kedina Maria oko ka li ka valekwa komulumenhu wedina Josef womepata laDavid. 28 Eshi omweengeli a fika, okwa tya kuye: “Jehova okwe ku hokwa neenghono Maria, note ku nangeke noupuna.” 29 Ndele Maria okwa haluka unene keendjovo odo nokwa li ta kendabala okuuda ko kutya oda hala okutya ngahelipi. 30 Opo nee omweengeli okwa tya kuMaria: “Ino tila, Kalunga okwe ku fila onghenda. 31 Tala, oto ka ninga oufimba, ndele to ka dala okaana kokamati, nou na oku ka luka Jesus. 32 Ndele ota ka kala a tumbala nota ka ifanwa Omona wOmukombadambada, na Jehova Kalunga ote ke mu pa olukalwapangelo laxe David. 33 Ota ka pangela e li Ohamba mepata laJakob fiyo alushe, nOuhamba waye itau ka xula po.”

34 Maria okwa tya komweengeli: “Osho otashi shiiva ngahelipi, osheshi inandi nangala nande onale nomulumenhu?” 35 Opo nee omweengeli okwa tya kuye: “Omhepo iyapuki otai ke uya kombada yoye, neenghono dOmukombadambada otadi ke ku tuvikila. Onghee hano, oo ta ka dalwa ota ka ifanwa omuyapuki, Omona waKalunga. 36 Ndele tala, omupambele woye Elisabet, oo a li ongadji nomunamido, naye oku na eteelelo lokaana kokamati leemwedi hamano; 37 osheshi Kalunga iha nyengwa kusha.” 38 Maria okwa ti: “Tala, ame omupiya waJehova okakadona. Nandi ningilwe ngaashi wa popya.” Opo nee omweengeli okwa dja po puye.

39 Konima yaasho, Maria okwa ya diva koshitukulwa shokeemhunda, koshilando shomuJuda. 40 Opo nee okwe uya meumbo laSakaria, ndele ta popifa Elisabet. 41 Eshi Elisabet a uda epopifo laMaria, okaana oko ka li medimo laye oka nhuka, naElisabet okwa li a yadifwa omhepo iyapuki, 42 ndele ta popi mokule ta ti: “Owa nangekwa noupuna mokati kovakainhu, nokaana aka to ka dala oka nangekwa noupuna! 43 Oshi li oufembanghenda kwaame eshi ina yOmwene wange e uya okutalela nge po. 44 Tala, eshi nda uda epopifo loye, okaana aka ke li medimo lange oka nhuka kehafo. 45 Omukainhu oo a itavela oinima ei ota ka kala yo a hafa, osheshi Jehova ota ka wanifa po oinima aishe oyo e mu udanekela.”

46 Opo nee Maria okwa ti: “Omwenyo wange* otau hambelele Jehova, 47 nomutima wange otau kala alushe wa hafela Kalunga Omuxupifi wange. 48 Osheshi okwa dimbuluka omupiya waye okakadona, nonande oke li omunhu wongaho. Ndele tala, okudja paife omapupi aeshe otaa ka tala nge ko nda nangekwa noupuna, 49 osheshi Omunaenghono okwa longela nge oilonga inene, nedina laye oliyapuki. 50 Ota file onghenda ovo have mu tila, okudja kepupi fiyo okepupi. 51 Okwa longa aishe nokwooko kwaye ku na eenghono, nokwa halakanifa ovo ve linenepeka momitima davo. 52 Okwa kufa ovalumenhu ovanaenghono komalukalwapangelo, nokwa nenepeka ovalininipiki. 53 Ovo va fya ondjala okwe va kutifa noinima iwa, noipuna okwe i lekela eenyala dongaho. 54 Okwa dimbuluka omupiya waye Israel, a file onghenda 55 Abraham noludalo laye* fiyo alushe ngaashi ashike a li a lombwela ootatekulululwa.” 56 Maria okwa kala naElisabet oule weemwedi nhatu lwaapo, nolwanima okwa ka shuna keumbo lavo.

57 Ndele efimbo laElisabet lokumona okaana eshi la fika, okwa mona okaana kokamati. 58 Eshi ovashiinda novapambele vaye va uda kutya Jehova okwe mu fila onghenda inene, ova li va hafa pamwe naye. 59 Ndele ove uya mefiku etihetatu eshi okaana ka li taka pitifwa etanda, nova li va hala oku ka lukila xe Sakaria. 60 Ina yako okwa nyamukula a ti: “Ahowe, edina lako oJohannes.” 61 Ova tya kuye: “Kape na nande oumwe womovapambele voye e na edina olo.” 62 Opo nee ova udikila xe yokaana tave mu pula kutya okwa hala ka lukwe lyelye. 63 Onghee okwa pula okapelende ndele ta shange ko: “Edina lako oJohannes.” Ndele aveshe ova li ve shi kuminwa. 64 Diva okanya kaye oka makuka, nelaka laye ola li la manguluka ndele ta hovele okupopya, ta tange Kalunga. 65 Ovashiinda shavo aveshe ova li va tila, novanhu aveshe muJudea, moshitukulwa shokeemhunda, ova li tava popi kombinga yoinima aishe oyo. 66 Aveshe ovo ve shi uda ove lipula momitima davo, tava ti: “Okaana aka otaka ka kala omunhu a tya ngahelipi?” Osheshi eke laJehova ola kala kombada yako.

67 Opo nee xe yako Sakaria okwa yadifwa omhepo iyapuki ndele ta xunganeke ta ti: 68 “Jehova na hambelelwe, Kalunga kaIsrael, molwaashi okwa kenukila oshiwana shaye nokwe shi etela exupifo. 69 Okwe tu pa omuxupifi omunaenghono* a dja mepata laDavid omupiya waKalunga. 70 Osho osho a li a udaneka, ngaashi sha popiwa kovaprofeti vaye ovayapuki vonale. 71 Okwe tu udanekela e tu xupife kovatondi vetu aveshe. 72 Ote ke tu fila onghenda ngaashi a udanekela ootatekulululwa, nota ka dimbuluka ehangano laye liyapuki. 73 Eudaneko olo okwa li e li lombwela tatekulululwa Abraham. 74 Eshi Kalunga e tu xupifa kovatondi vetu, okwe tu pitika tu mu longele tuhe na oumbada, 75 opo tu kale ovadiinini nokulonga osho sha yuka mokukalamwenyo kwetu akushe. 76 Ndele ove omumwange, oto ka ifanwa omuprofeti wOmukombadambada, osheshi oto ka tetekela Jehova u mu longekidile ondjila yaye, 77 noto ka udifila oshiwana shaye etumwalaka lexupifo opo shi diminwe po omatimba asho 78 omolwolukeno laKalunga ketu. Olukeno olo la dja pombada otali ke tu minikila ngaashi etango tali piti, 79 olo tali yandje ouyelele kwaavo ve li momilaulu nomomudidimbe wefyo, nokuyukifa eemhadi detu mondjila yombili.”

80 Ndele Johannes okwa ninga omukulunhu meedula nomomadiladilo,* nokwa kala e li mombuwa fiyo osheshi a dja mo a ka udifile oshiwana shaIsrael.

2 Pefimbo olo, Omukesari Augustus okwa li a yandja elombwelo opo ovanhu aveshe ovo ve li mouhamba waye* ve ke lishangife. 2 (Omalishangifo oo otete okwa ningwa pefimbo olo Kirenius a li ngoloneya waSiria.) 3 Opo nee keshe umwe okwe ke lishangifa koshilando oko a dalelwa. 4 Molwaashi Josef okwa li womepata laDavid, naye okwa dja moshilando Nasaret shomuGalilea ndele ta i kuJudea, koshilando shaDavid shedina Betlehem. 5 Okwa li e ke lishangifa nomukulukadi waye, Maria, oo a li pokumona okaana. 6 Ofimbo va li oko, efimbo laMaria lokumona okaana ola li la fika. 7 Opo nee Maria okwa mona okaana kokamati, oshiveli shaye, ndele te ka tonyene melapi noku ka nangeka metemba lokulila oimuna molwaashi kava li va mona onduda monhele yovaenda.

8 Moshitukulwa osho omwa li yo ovafita va nangela oimuna yavo moixwa oufiku. 9 Ohaluka, ova holokelwa komweengeli waJehova, nouyelele woshinge shaJehova owe va minikila, nova li va tila unene. 10 Opo nee omweengeli okwa tya kuvo: “Inamu tila, taleni, ondi mu na onghundana iwa oyo tai ka etela ovanhu aveshe ehafo linene. 11 Nena eli omwa dalelwa omuxupifi, Kristus Omwene, moshilando shaDavid. 12 Otamu ka mona edidiliko eli: Otamu ka hanga okahanana ka tonyenwa melapi noka nangekwa metemba lokulila oimuna.” 13 Ohaluka, pomweengeli oo ope uya ongudu yovaengeli,* tava tange Kalunga tava ti: 14 “Efimano olaKalunga Omukombadambada, nombili kombada yedu otai ka kala mokati kovanhu ovo a hokwa.”

15 Eshi ovaengeli va dja po puvo va shuna meulu, ovafita ova lombwelafana tava ti: “Natu yeni paife kuBetlehem tu ka tale kutya oshike sha ningwa ko, ngaashi Jehova e tu hololela.” 16 Opo nee ova ya diva, nova mona Maria naJosef nosho yo okahanana ka nangala metemba lokulila oimuna. 17 Ndele eshi va mona aishe oyo, ova hepaulula etumwalaka olo va lombwelwa li na sha nokaana oko. 18 Aveshe ovo va li va uda osho va lombwelwa kovafita ova li va kumwa unene. 19 Ndele Maria okwa li a tuvikila oinima aishe oyo momutima waye nokudilonga kuyo. 20 Opo nee ovafita ova shuna nova hambelela nokutanga Kalunga omolwoinima aishe oyo va uda nova mona, ngaashi va li va lombwelwa.

21 Eshi okaana ka pitifwa etanda konima yomafiku ahetatu, oka lukwa Jesus, edina olo la li la popiwa komweengeli ofimbo Maria ina ninga oufimba.

22 Eshi efimbo lokukosholwa paMhango yaMoses la fika, ova twala okaana kuJerusalem opo ve ke ka yandje kuJehova, 23 ngaashi ashike sha shangwa mOmhango yaJehova oyo ya ti: “Okaana keshe okamati oko taka dalwa tete,* oke na okuyapulilwa Jehova.” 24 Ndele ova yamba eyambo ngaashi sha popiwa mOmhango yaJehova, oyo ya ti: “Omu na okuyandja eenghuti mbali ile ounghutyona vavali.”

25 Ndele tala, muJerusalem omwa li omulumenhu wedina Simeon, omuyuki noha tila Kalunga. Omulumenhu oo okwa li ta wilikwa komhepo iyapuki, nokwa li a teelela efimbo olo Kalunga a li ta ka hekeleka Israel. 26 Natango, omulumenhu oo okwa li a hololelwa kuKalunga okupitila momhepo iyapuki kutya ita ka fya fimbo ina mona Omuvaekwa* waJehova. 27 Opo nee okwe uya motembeli, ta wilikwa komhepo iyapuki, ndele eshi ovadali vokaana* ve ka eta mo va ninge ngaashi hashi ningwa metwokumwe nOmhango, 28 okwa kufa okaana ndele te ka ukata nokutanga Kalunga, ta ti: 29 “Omwene Omunamapangelo aeshe, paife oto dulu okweefa omupiya woye a fye nombili ngaashi wa popya. 30 Osheshi omesho ange okwa mona exupifo 31 olo wa longekida opo li monike kovanhu aveshe. 32 Oli li ouyelele oo tau minikile oiwana oyo i li momulaulu notali ka etela oshiwana shoye shaIsrael efimano.” 33 Ndele xe naina yokaana ova li va kumwa omolwoinima oyo ya li tai popiwa kombinga yako. 34 Kakele kaasho, Simeon okwe va nangeka noupuna ndele ta ti kuMaria, ina yako: “Tala, okaana aka oka nangekwa po ka pundukife nokupendula po yo Ovaisrael vahapu. Ndele nande Kalunga ota ka holola omadidiliko oo taa ka ulika kutya oku li pamwe nako, vahapu otave ke ka popila mowii 35 opo omadiladilo omitima davahapu a hololwe. Naave mwene* oto ka tyuulwa keongamukonda lile.”

36 Ndele opa li omuprofeti omukainhu, Anna, omona waFanuel, womepata laAsser. Omukainhu oo okwa li omunamido. Okwa hombolwa eshi a li okakadona, nokwa kala nomushamane waye oule womido heyali. 37 Pefimbo olo okwa li omufiyekadi womido 84. Omukainhu oo okwa kala alushe ha i kotembeli, nokwa li ha longele Kalunga omutenya noufiku he lidilike nokwiilikana. 38 Omukainhu oo okwe uya popepi naJosef naMaria ndele ta pandula Kalunga nokulombwela aveshe ovo va li va teelela exupifo laJerusalem kombinga yokaana oko.

39 Ndele eshi va mana okuninga oinima aishe metwokumwe nOmhango yaJehova, ova shuna koshilando shavo Nasaret shomuGalilea. 40 Opo nee okaana oko oka enda taka kulu, noka yadifwa ounongo, na Kalunga okwa kala noku ka yambidida.

41 Ovadali vaJesus ova li hava i omudo keshe kuJerusalem opo va ka dane oshivilo shOpaasa. 42 Eshi Jesus a li e na omido 12, ova ya kuJerusalem va ka dane oshivilo osho ngaashi hashi ningwa shito. 43 Eshi oshivilo sha pwa, ova shuna keumbo lavo, ndele Jesus okwa li a fyaala muJerusalem, ashike ovadali vaye kava li ve shi didilika. 44 Molwaashi ova li tava diladila kutya oku li mokati kaavo va li tava ende pamwe navo, ova ya oule woshinano shefiku limwe, ndele tava hovele oku mu konga mokati kovapambele nosho yo ovashiivikile. 45 Ashike inave mu mona, onghee ova shuna kuJerusalem noku mu konga keshe pamwe. 46 Konima yomafiku atatu, ove mu hanga motembeli e li omutumba mokati kovahongimhango ta pwilikine kuvo noku va pula omapulo. 47 Ndele aveshe ovo va li tava pwilikine kuye, ova li va kuminwa neenghono eendunge nomanyamukulo aye. 48 Eshi ovadali vaye ve mu mona, ova li va kumwa, ndele ina ta ti kuye: “Mumwange, omolwashike we tu ningila ngaha? Fye naxo otwa kala hatu ku kongo neenghono.” 49 Ndele Jesus okwa tya kuvo: “Omolwashike mwa li tamu kongo nge? Hamba kamu shii kutya ondi na okukala meumbo laTate?” 50 Ashike kava li ve udite kutya okwa hala okutya shike.

51 Opo nee okwa shuna navo kuNasaret, nokwa kala ha dulika kuvo. Ndele ina okwa tuvikila eendjovo adishe odo momutima waye. 52 Jesus okwa enda ta kulu, nounongo waye owa hapupala nokwa kala a hokiwa kuKalunga nokovanhu.

3 Momudo 15 wepangelo lOmukesari Tiberius, Pontius Pilatus okwa li ngoloneya waJudea, Herodes* okwa li omupangeli woshitukulwalongo* shaGalilea, omumwaina Filippus okwa li omupangeli woshitukulwalongo shaIturea naTrakonitis, Lisanias okwa li omupangeli woshitukulwalongo shaAbilene, 2 Hannas okwa li omupristeri omukulunhu, naKajafas omupristeri munene. Pefimbo opo Kalunga okwa li a yandja etumwalaka kuJohannes omona waSakaria eshi a li mombuwa.

3 Opo nee Johannes okwa ya moitukulwa aishe oyo ya dingilila Jordan, ndele ta udifile ovanhu kutya ove na okuninginifwa va ulike kutya ove lidilulula opo va diminwe po omatimba avo, 4 ngaashi sha shangwa membo lomuprofeti Jesaja, a ti: “Ondaka otai ingida mombuwa, tai ti: ‘Longekidileni Jehova ondjila! Lalakanifeni omalila aye. 5 Omalufilu aeshe naa fufilwe, eemhunda adishe noikulundudu nai lalakanifwe, eendjila da ngolyoka nadi yukililifwe, neendjila domalambo nadi lalakanifwe; 6 opo ovanhu aveshe* va mone nghee Kalunga te ke va xupifa.’”

7 Opo nee okwa lombwela eengudu dovanhu odo da li de uya okuninginifwa kuye, ta ti: “Oludalo lomayoka omauta nye, olyelye e mu londwela mu ye onhapo efiku lehandu laKalunga? 8 Onghee hano, imikeni oiimati oyo tai ulike elidilululo. Inamu tya, ‘Fye otu na tate yetu Abraham.’ Osheshi ame ohandi mu lombwele kutya Kalunga ota dulu okushitila Abraham ovana okudja momamanya aa. 9 Ekuva ola tulwa nale pefina lomuti. Omuti keshe oo ihau ima oiimati iwa otau kewa po ndele tau ekelwa momundilo.”

10 Ndele eengudu dovanhu ode mu pula da ti: “Otu na okuninga po shike?” 11 Opo nee okwa tya kuvo: “Keshe ou e na oikutu ivali* na yandje shimwe kwaau ehe na sha, naau e na oikulya na ninge sha faafana.” 12 Nokuli novafendelifi ovo va li ve uya okuninginifwa ova tya kuye: “Omuhongi, oshike tu na okuninga po?” 13 Okwa tya kuvo: “Inamu futifa oifendela ya pitilila pwaayo ya tulwa po.” 14 Ovakwaita navo ove mu pula va ti: “Oshike tu na okuninga po?” Johannes okwa tya kuvo: “Inamu nyeka ovanhu ile mu va lundile opo mu pewe ombubo, ndele kaleni mwa wanenwa kwaasho mu na.”*

15 Molwaashi ovanhu ova li va teelela Kristus, aveshe ova li tave lipula kombinga yaJohannes tava ti, “Pamwe ou oye Kristus?” 16 Johannes okwe va nyamukula aveshe a ti: “Ame ohandi mu ninginifa momeva, ashike ou te uya konima yange oku na eenghono e dule nge, noinandi wana nokuli okumangulula eemwiya deenghaku daye. Ye ote ke mu ninginifa nomhepo iyapuki nosho yo nomundilo. 17 Oku na oshiyelifo* meke laye, ndele ta kombo nawanawa oshipale shaye, noilya ote ke i tuvikila momaanda, ashike olungu ote ke li xwika po momundilo oo ihau dimi.”

18 Onghee okwe va lombwela oinima ikwao ihapu opo e va twe omukumo, nokwa twikila oku va udifila onghundana iwa. 19 Ndele Herodes, omupangeli woshitukulwalongo, okwa pewa omayele kuJohannes e na sha noilonga yaye aishe ii, naashi a kufa po Herodias, omukulukadi wamumwaina. 20 Herodes okwa longa yo omunyonena eshi a idililifa Johannes modolongo.

21 Konima eshi Johannes a ninginifa vahapu, okwa ninginifa yo Jesus. Fimbo Jesus a li ta ilikana, eulu ola yeuluka, 22 nomhepo iyapuki ya fa onghuti oya kulukila kuye. Opo nee meulu omwa dja ondaka tai ti: “Ove Omona wange omuholike; onde ku hokwa.”

4 Eshi Jesus a dja pomulonga waJordan, okwa yadifwa omhepo iyapuki ndele tai mu twala mombuwa, 2 nokwa kala mo omafiku 40. Molwaashi ka li a lya sha moule womafiku oo, okwa li a fya ondjala neenghono. Opo nee Ondiaboli oye mu hongaula, 3 tai ti: “Ove ngeenge omona waKalunga, lombwela emanya eli li shituke omungome.” 4 Jesus okwe i nyamukula ta ti: “Omishangwa oda ti: ‘Omunhu ita kala nomwenyo komungome auke.’”

5 Opo nee oye mu twala komhunda ndele tai mu ulikile omauhamba aeshe okombada yedu mepakumo leisho. 6 Ndele Ondiaboli oya tya kuye: “Ohandi ku pe omauhamba aeshe oo nefimano lao, osheshi onde a pewa, nohandi a pe keshe ou nda hala oku a pa. 7 Onghee hano, ngeenge owe linyongamene nge, aishe otai ningi yoye.” 8 Jesus okwa tya kuyo: “Omishangwa oda ti: ‘Jehova Kalunga koye oye aeke u na okulinyongamena noye aeke u na okulongela oilonga iyapuki.’”

9 Opo nee oye mu twala kuJerusalem noku mu londeka pombada yekuma lotembeli, ndele tai ti: “Ove ngeenge omona waKalunga, nhukila pedu, 10 molwaashi Omishangwa oda ti: ‘Ote ku tumine ovaengeli vaye, notave ke ku amena. 11 Otave ke ku yakela opo uha pume omhadi yoye kemanya.’” 12 Jesus okwa ti: “Okwa tiwa: ‘Ino yeleka Jehova Kalunga koye.’” 13 Eshi Ondiaboli ya mana oku mu hongaula, oya dja po puye ndele tai teelele i mone omhito imwe vali tai wapalele.

14 Opo nee Jesus okwa shuna kuGalilea a yadifwa omhepo iyapuki. Ndele ehokololo li na sha noilonga yaye iwa ola li la tandavela moitukulwa aishe yopoushiinda. 15 Okwa li yo a hovela okuhonga meeshinagoga davo, novanhu aveshe ova li tave mu tange.

16 Ndele okwa ya kuNasaret, oko a kulila, nokwa ya moshinagoga ngaashi ha ningi shito mefiku lEshabata, ndele ta fikama a ka leshe Omishangwa. 17 Opo nee okwa pewa omushangwatonywa womuprofeti Jesaja ndele te u tonyununa, nokwa ya opo pa shangwa: 18 “Omhepo yaJehova oi li kombada yange, osheshi okwa vaeka nge ndi udifile eehepele onghundana iwa. Okwa tuma nge ndi udifile eenghwate emanguluko novapofi etwikuluko, okumangulula ovafininikwa, 19 nokuudifa kutya efimbo laJehova lokufila ovanhu onghenda ola fika.” 20 Konima eshi e u lesha, okwe u tonya nokwe u pa omuyakuli ndele ta kala omutumba; novanhu aveshe moshinagoga ova li va tala kuye. 21 Opo nee okwa tya kuvo: “Paife omushangwa oo opo mwa udu owa wanifwa.”

22 Ndele ovanhu aveshe ova li va hovela okuyandja oundombwedi muwa kombinga yaye nova li va kuminwa eendjovo daye diwa tadi kumu omutima, nove lipula tava ti: “Hano ou ke fi omonamati waJosef?” 23 Opo nee Jesus okwa tya kuvo: “Ondi wete kutya omwa hala okuula nge eendjovo edi, ‘Omuhakuli, lihakula ove mwene. Longa yo moshitukulwa sheni oilonga oyo twa uda wa longa muKapernaum.’” 24 Okwa tya vali kuvo: “Oshili ohandi mu lombwele kutya kape na omuprofeti ha tambulwa ko moshitukulwa shavo. 25 Ndele ohandi mu lombwele oshili, muIsrael omwa li ovafiyekadi vahapu pefimbo laElia eshi odula ya li inai loka oule womido nhatu neemwedi hamano; nomoshilongo ashishe omwa li ondjala. 26 Ashike Elia ka li a tumwa nande a ye kuumwe womovakainhu ovo, ndele okwa li a tumwa a ye komufiyekadi wokuSarefat, muSidon. 27 Natango, muIsrael omwa li ovanashilundu vahapu pefimbo lomuprofeti Elisa; ashike kape na nande oumwe womuvo a li a velulwa,* ndele oNaeman aeke Omusiria.” 28 Aveshe ovo va li moshinagoga ova li va handuka unene eshi va uda oinima oyo, 29 nova fikama ndele tave mu taataa mo moshilando shavo. Ova li ve mu twala koxulo yomhunda oko kwa li kwa tungilwa oshilando shavo opo ngeno ve mu undulile pedu. 30 Ashike Jesus okwa pita mokati kavo, ndele ta i.

31 Opo nee okwa ya kuKapernaum, oshilando shomuGalilea. Ndele okwa li ta hongo ovanhu mefiku lEshabata, 32 nova li va kuminwa onghedi yaye yokuhonga, osheshi okwa popya ngaashi ou e na eenghonopangelo. 33 Ndele moshinagoga omwa li mu na omulumenhu e na omhepo ya nyata, noya ingida mokule tai ti: 34 “Wuu! Owe tu halela shike Jesus Omunasaret? Owe uya oku tu hanauna po? Ondi shi shii lela kutya oove lyelye, oove Omuyapuki waKalunga.” 35 Jesus okwe i hanyena, ta ti: “Mwena, ndele to di mo muye.” Konima eshi ya undulila pedu omulumenhu oo mokati kavo, oya dja mo muye, ashike inai mu yahameka. 36 Ovanhu aveshe ova li va kumwa nova hovela okulombwelafana tava ti: “Eendjovo odo kadi na tuu eenghono, eshi a popya ashike kutya eemhepo da nyata nadi dje mo, ndele tadi di mo!” 37 Onghee ehokololo kombinga yaye ola li la tandavela moshilongo ashishe.

38 Eshi a dja moshinagoga, okwa ya meumbo laSimon, nokwa hanga inamweno yaSimon a etwa mo koshidu, nova pula Jesus a kwafele omukainhu oo. 39 Opo nee okwa ya puye ndele te mu velula. Diva omukainhu oo okwa fikama, nokwa hovela oku va yakula.

40 Ndele etango eshi la li pokuningina, aveshe ovo va li ve na ovanaudu tava vele omikifi di lili noku lili ove va eta kuye. Opo nee okwa tenheka keshe umwe womuvo omake ndele tava veluka. 41 Okwa li yo a ta mo eendemoni movanhu vahapu, noda li tadi ingida tadi ti: “Ove Omona waKalunga!” Ndele okwe di hanyena, noina efa nande di popye kombinga yaye, osheshi odi mu shii kutya oye Kristus.

42 Okwa dja po puvo ongula inene nokwa ya konhele ye likalela. Ndele eengudu dovanhu oda li tadi mu kongo noda ya konhele oko a li, ndele kada li da hala a dje po pudo. 43 Okwa tya kudo: “Ondi na yo okuudifila oilando imwe onghundana iwa yOuhamba waKalunga, molwaashi eshi osho nda tuminwa.” 44 Opo nee okwa ya, ndele ta udifa meeshinagoga daJudea.

5 Pomhito imwe eshi Jesus a li ofika petale laGenesaret,* ongudu yovanhu oya li tai lifininike i ehene popepi naye opo i pwilikine keendjovo daKalunga. 2 Opo nee okwa mona eewato mbali di li komunghulo wetale, ashike ovayuli veeshi ova li va dja mo tava kosho eenete davo. 3 Okwa londa muimwe yomeewato odo, ndele ta lombwele mwene wayo, Simon, e i ehenife kanini momeva. Opo nee Jesus okwa kala omutumba mowato ndele ta hovele okuhonga eengudu dovanhu. 4 Eshi a mana okupopya nado, okwa tya kuSimon: “Ehenifa owato mokati ketale, ndele tamu umbile eenete deni momeva.” 5 Ndele Simon okwe mu nyamukula ta ti: “Omuhongi, otwa longa oufiku aushe, ndele inatu kwata sha, ashike eenete ohandi di umbile mo omolweendjovo doye.” 6 Eshi va ninga ngaho, ova kwata eeshi dihapu unene, neenete davo oda li da hovela okutokauka. 7 Onghee ova lapa ovo va li mowato ikwao ve uye ve va kwafele, ndele eshi ve uya ova yadeka eewato adishe, hanga nokuli di ningine. 8 Eshi Simon Petrus e shi mona, okwa twila Jesus eengolo, ndele ta ti: “Omwene, inandi wana okukala popepi naave osheshi ame omulunde.” 9 Opo nee Simon naavo va li pamwe naye ova li va kumwa neenghono eshi va kwata eeshi dihapu. 10 Jakob naJohannes, ovana vaSebedeus, ovo va li ovalandifi veeshi pamwe naSimon, navo ova li yo va kumwa. Ndele Jesus okwa tya kuSimon: “Ino tila, osheshi okudja paife oto ka ninga omuyuli wovanhu.” 11 Onghee ova eta eewato komutunda, nova fiya po oinima aishe ndele tava shikula Jesus.

12 Pomhito vali imwe eshi Jesus a li moshilando shonhumba, tala, opa li omulumenhu ta vele neenghono oudu woshilundu. Eshi omulumenhu oo a mona Jesus, okwe linyongamena kuye, ndele te mu indile ta ti: “Omwene, ngeenge owa hala, oto dulu okuvelula nge.” 13 Okwa yelula eke laye, nokwe mu kuma, ndele ta ti: “Onda hala! Veluka.” Opo nee okwa veluka diva koudu waye woshilundu. 14 Ndele Jesus okwe mu londwela ehe shi lombwele nande omunhu, ta ti: “Inda u ke liulike komupristeri, nokuyandja omayambo oye eveluko ngaashi sha popiwa kuMoses, shi ninge oumbangi kuvo.” 15 Opo nee ehokololo li na sha naye ola li la tandavela, neengudu dinene dovanhu oda li da ongala opo di pwilikine kuye nokuvelulwa. 16 Jesus okwa kala ha i lwoikando keenhele de likalela opo a ka ilikane.

17 Ndele efiku limwe fimbo a li ta hongo, puye opa li yo pa ongala Ovafarisai novahongimhango va dja momikunda adishe daGalilea, daJudea nodaJerusalem. Okwa li yo a pewa kuJehova eenghono dokuvelula. 18 Ndele tala, opa li ovalumenhu va humbata omulumenhu kolutala a vela ombada, nova li tava kendabala oku mu twala monhele omo mwa li Jesus. 19 Molwaashi kava li va dula oku mu twala monhele oyo omolwouhapu wovanhu, ova li va londa kombada yonduda, ndele tava ningi po ombululu nokukulukifa olutala meni opo pa li Jesus. 20 Eshi a mona kutya ove na eitavelo, okwa tya komulumenhu oo a vela ombada: “Omatimba oye okwa dimwa po.” 21 Ndele ovanongo vomishangwa nOvafarisai ova hovela okukundafana tava ti: “Olyelye ou ta popi eendjovo desheko? Olyelye ta dulu okudima po omatimba ehe fi ashike Kalunga?” 22 Eshi Jesus a didilika osho tava diladila, okwa tya kuvo: “Omolwashike tamu diladila ngaho momitima deni? 23 Shilipi po shipu; okutya, ‘Omatimba oye okwa dimwa po,’ ile okutya, ‘Fikama ndele to ende’? 24 Ndele opo mu shiive kutya Omona womunhu oku na eenghono dokudima po omatimba kombada yedu . . .” okwa tya komulumenhu oo a vela ombada: “Ohandi ku lombwele, fikama, kufa olutala loye, ndele to i keumbo leni.” 25 Opo nee okwa fikama moipafi yavo, nokwa kufa olutala oko a li a nangala ndele ta i keumbo lavo, ta hambelele Kalunga. 26 Aveshe ova li va kumwa neenghono, nova hovela okuhambelela Kalunga. Ova kwatwa koumbada ndele tava ti: “Otwa mona oinima ikumwifi nena!”

27 Konima yaasho, eshi Jesus a dja mo monhele oyo, okwa mona omufendelifi wedina Levi e li omutumba pombelewa yomafutilo oifendela, ndele ta ti kuye: “Ninga omushikuli wange.” 28 Opo nee okwa fiya po oinima aishe, nokwa fikama ndele te mu shikula. 29 Ndele Levi okwa li a ningila Jesus oshivilo shinene meumbo laye, nopa li ongudu inene yovafendelifi nosho yo vamwe vali ovo va li tava li* pamwe navo. 30 Eshi Ovafarisai novanongo vavo vomishangwa ve shi mona, ova hovela okungongotela ovahongwa vaye tava ti: “Omolwashike tamu li nokunwa pamwe novafendelifi nosho yo ovalunde?” 31 Jesus okwa tya kuvo: “Ovanhu ovo ve na oukolele inava pumbwa omuhakuli, ndele ovovo ashike tava vele. 32 Ame inandi endela ovayuki, ndele ovalunde, opo ve lidilulule.”

33 Ova tya kuye: “Ovahongwa vaJohannes novOvafarisai ohave lidilike luhapu nokwiilikana va mana mo, ndele voye ohava li ashike nokunwa.” 34 Jesus okwa tya kuvo: “Otamu dulu ngoo okuningifa ookaume komuhomboli ve lidilike fimbo omuhomboli e li navo? 35 Ndele omafiku otae uya eshi omuhomboli te ke va kufwa, opo nee otave ke lidilika momafiku oo.”

36 Okwe va lombwela yo efaneko ta ti: “Kape na omunhu ta tete oshivando koshikutu shokombada shipe, ndele te shi vandeke koshikutu shikulu. Ngeenge okwa ningi ngaho, oshivando shipe otashi ka pombola oshikutu shikulu, noshivando osho sha dja koshikutu shipe itashi ka kala sha faafana noshikutu shikulu. 37 Natango, kape na omunhu ha tula omaviinyu mape momakutu makulu. Ngeenge okwa ningi ngaho, omaviinyu mape otaa pombola omakutu ndele taa tika mo, nomakutu otaa nyonauka. 38 Ndele omaviinyu mape ohaa tulwa momakutu mape. 39 Kape na oo a ika okunwa omaviinyu makulu ndele ta hale oo mape, osheshi ota ti, ‘Makulu omawa.’”

6 Fimbo Jesus va li tava tavakana momapya mefiku lEshabata, ovahongwa vaye ova li tava pweya oilya noku i fengela pomake avo, ndele tava li eemuma dayo. 2 Opo nee Ovafarisai vamwe ova tya: “Omolwashike tamu ningi osho inashi pitikwa pamhango okuningwa mefiku lEshabata?” 3 Ndele Jesus okwa tya kuvo: “Hamba inamu lesha osho David a li a ninga eshi ye novalumenhu ovo a li navo va li va fya ondjala? 4 Ile inamu lesha eshi a li a ya meumbo laKalunga, ndele ta pewa omingome detaliko, nokwa lya ndele ta pe yo ovalumenhu ovo a li navo nonande pamhango oda li ashike di na okuliwa kovapristeri?” 5 Opo nee Jesus okwa tya kuvo: “Omona womunhu oye Omwene wEshabata.”

6 Ndele mefiku vali limwe lEshabata, okwa ya moshinagoga nokwa li a hovela okuhonga. Moshinagoga omo omwa li omulumenhu e na eke lokolulyo la fya. 7 Ovanongo vomishangwa nOvafarisai ova li tava tale nokukonenena Jesus va tale ngeenge ota velula omulumenhu oo mefiku lEshabata, opo va dule oku mu hokololifa. 8 Eshi Jesus a didilika osho tava diladila, okwa tya komulumenhu oo e na eke la fya: “Fikama ndele to uya pokati apa.” Omulumenhu oo okwa fikama, ndele ta kala ofika opo a lombwelwa. 9 Opo nee Jesus okwe va pula ta ti: “Oilonga ilipi i na okulongwa pamhango mefiku lEshabata: okulonga ouwa ile okulonga owii, okuxupifa omwenyo ile oku u hanauna po?” 10 Jesus okwe va tala aveshe, ndele ta ti komulumenhu oo: “Yukililifa eke loye.” Opo nee okwe li yukililifa, nola veluka. 11 Ndele ova li va handuka unene, nova hovela okukundafana kutya oshike ve na okuningila Jesus.

12 Efiku limwe Jesus okwa li a ya komhunda a ka ilikana kuKalunga, nokwa kala ko oufiku aushe ta ilikana. 13 Eshi kwa sha, okwa ifana ovahongwa vaye, ndele ta hoolola mo mokati kavo 12, ovo a luka ovayapostoli. 14 Omadina avo oyaa: Simon oo e mu luka Petrus, nomumwaina Andreas; Jakob, Johannes, Filippus, Bartolomeus, 15 Mateus, Tomas, Jakob omona waAlfeus, Simon oo ha ifanwa “omuladi,” 16 Judas omona waJakob naJudas Iskariot, oo lwanima e ke mu kengelela.

17 Opo nee ova londoloka komhunda, nokwa ya poima pa lalakana, ndele opa li ongudu inene yovahongwa vaye nosho yo ovanhu vahapu neenghono ovo va li ve uya okupwilikina nokuvelulwa kuye, va dja muJudea nomuJerusalem ashishe, nomoshitukulwa shokomunghulofuta shaTirus naSidon. 18 Nokuli naavo va li tava hepekwa keemhepo da nyata ova li va velulwa. 19 Molwaashi muye omwa li tamu di eenghono dokuvelula keshe ou te mu kumu, ongudu yovanhu aishe oya li ya halelela oku mu kuma.

20 Opo nee okwa tala kovahongwa vaye, ndele ta ti:

“Ovo mwa hepa otamu kala mwa hafa osheshi Ouhamba waKalunga oweni.

21 “Ovo mwa fya ondjala paife, otamu kala mwa hafa osheshi otamu ka kutifwa.

“Ovo tamu lili paife, otamu kala mwa hafa osheshi otamu ka yola.

22 “Ngeenge ovanhu tave mu tondo, tave mu taataa, tave mu sheke noku mu popila mowii omolwOmona womunhu, otamu kala mwa hafa. 23 Taleni, hafeni nokunyakukwa mefiku olo, osheshi ondjabi yeni oinene meulu. Ooxekulululwa navo ova li hava ningile ovaprofeti oinima ya tya ngaho.

24 “Ndele woo nye ovo mwa punapala, osheshi omwa hekelekwa nale sha wana.

25 “Woo nye ovo mwa kuta paife, osheshi otamu ka fya ondjala.

“Woo nye ovo tamu yolo paife, osheshi otamu ka nyika oluhodi nokulila.

26 “Woo nye ngeenge tamu popilwa mouwa kovanhu aveshe, osheshi ooxekulululwa navo osho va li va ningila ovaprofeti ovanaipupulu.

27 “Ndele amushe ovo tamu pwilikine ohandi mu lombwele kutya: Kaleni mu hole ovatondi veni, ningileni ouwa ava ve mu tonde, 28 nangekeni noupuna ovo tave mu halele owii nokwiilikanena ovo tave mu sheke. 29 Ndele ou te ku denge kolupanda limwe, mu pa yo likwao, naau te ku kufa oshikutu shoye shokombada, mu pa yo shokoshi. 30 Yandjeni kukeshe oo te mu ehela, naao ta kufa po oinima yeni, inamu mu pula e i alule.

31 “Ndele osho mwa hala ovanhu ve mu ningile, osho mu va ningila yo.

32 “Ngeenge omu hole ashike ovo ve mu hole, otashi mu etele ouwa washike? Osheshi novalunde ove hole ashike ovo ve va hole. 33 Nongeenge ohamu ningile ashike ouwa ovo have mu ningile ouwa, otashi mu etele ouwa washike? Ovalunde navo ohava ningi sha faafana. 34 Shimwe vali, ngeenge ohamu yandje ashike* kwaavo mu shii kutya otava ka alula osho va li ve mu indila, otashi mu etele ouwa washike? Ovalunde navo ohava yandje ashike kovalunde vakwao opo va alulilwe shi fike pwaasho va yandjele. 35 Mepingafano naasho, kaleni mu hole ovatondi veni nokulonga ouwa. Kaleni yo hamu yandje nopehe na okuteelela mu alulilwe sha, opo mu ka mone ondjabi inene notamu ka ninga ovana vOmukombadambada, osheshi oha file onghenda ovakolokoshi naavo ihava pandula. 36 Kaleni mu na onghenda ngaashi Xo omunanghenda.

37 “Ndele inamu tokola, opo muha ka tokolwe. Inamu yandja oushima, opo muha ka pewe oushima. Kaleni hamu dimine po, opo mu diminwe po yo. 38 Kaleni hamu yandje opo ovanhu va kale have mu pe yo. Otave ke mu tulila meendjato doikutu yeni oshiyelekifo sha yeleka, sha fendwa notashi xunga. Osheshi oshiyelekifo osho tamu shi yelekifa osho tamu ka yelekifwa yo.”

39 Opo nee okwe va lombwela yo efaneko a ti: “Omupofi ota dulu ngoo okukwata omupofi mukwao komhango? Aveshe mbela itava ka wila melambo? 40 Omuhongwa ke dule omuhongi waye, ndele keshe ou a hongekeka ota ka kala a fa omuhongi waye. 41 Omolwashike u wete okambodi ke li meisho lomumwaxo, ndele ku wete endangalati olo li li meisho loye? 42 Oto dulu ngahelipi okulombwela omumwaxo kutya, ‘Omumwatate, handi uya ndi kufe mo okambodi meisho loye,’ ofimbo ove uhe wete endangalati meisho loye? Omunaihelele ove! Kufa mo tete endangalati olo li li meisho loye, opo u mone nawa nghee to dulu okukufa mo okambodi meisho lomumwaxo.

43 “Kape na omuti muwa hau ima oiimati ii, nokape na omuti mwii hau ima oiimati iwa. 44 Osheshi omuti keshe ohau shiivikila koiimati yao. Pashihopaenenwa, ovanhu ihava likola eenghwiyu ile omandjebele komano. 45 Omunhu muwa oha pitifa mo oinima iwa memona liwa lomomutima waye, ndele omunhu omukolokoshi oha pitifa mo oinima ii memona laye lii. Osheshi osho shi yadi momutima okanya osho taka popi.

46 “Omolwashike hamu ifana nge ‘Omwene! Omwene!’ ndele ihamu longo osho handi mu lombwele? 47 Keshe oo te uya kwaame, ndele ta udu eendjovo dange noku di wanifa, ohandi mu lombwele kutya ota faafanifwa nashike: 48 Okwa fa omulumenhu a tungila eumbo laye kemanya nokwe li fela ekanghameno la ya moule. Eshi efundja le uya, omeva okwe lidenga meumbo olo, ndele inaa dula oku li teya po molwaashi ola tungwa la kola. 49 Mepingafano naasho, keshe ou ta udu eendjovo dange, ndele ite di wanifa, okwa fa omulumenhu a tunga eumbo lihe na ekanghameno. Omeva okwe lidenga meumbo olo, ndele ola teka po diva nokuhanauka po filufilu.”

7 Eshi Jesus a mana okupopya osho a li ta lombwele ovanhu, okwa ya kuKapernaum. 2 Ndele umwe womovapiya vomukulunhu wetangakwaita okwa li ta vele unene nokwa li e li pokufya, nomupiya oo okwa li e holike komwene waye. 3 Eshi a uda kombinga yaJesus, okwa tuma ovakulunhu vamwe vOvajuda ve ke mu ifane e uye a velule omupiya waye. 4 Ovakulunhu ovo ove uya kuJesus nova hovela oku mu indila va mana mo, tava ti: “Owa wana oku mu kwafela, 5 osheshi oku hole oshiwana shetu nokwe tu tungila oshinagoga.” 6 Opo nee Jesus okwa ya pamwe navo. Ndele fimbo a li pokufika meumbo, omukulunhu wetangakwaita okwa tuma ookaume kaye ve mu lombwele tava ti: “Omufimanekwa, ino lihepeka osheshi ame inandi wana oku ku tambula meumbo lange. 7 Onda mona yo kutya inandi wana okuuya kwoove. Popya ashike ondjovo ndele omupiya wange ta veluka. 8 Ame naame omupangelwa, nondi na yo ovakwaita handi va wilike; ngeenge nda ti kuumwe, ‘Inda!’ ota i, nongeenge onda ti kumukwao, ‘Ila!’ ote uya, ile ngeenge onda ti komupiya wange, ‘Ninga shonhumba!’ ote shi ningi.” 9 Ndele eshi Jesus a uda oinima oyo, okwa li a kumwa, ndele ta piluka nokwa tya kongudu yovanhu oyo ya li ye mu shikula: “Ohandi mu lombwele, muIsrael inandi mona mo nande oumwe e na eitavelo la kola la tya ngaho.” 10 Eshi ovo va li va tumwa va alukila keumbo, ova hanga omupiya oo a veluka.

11 Ndele diva konima yaasho, Jesus okwa ya pamwe novahongwa vaye nosho yo ongudu inene yovanhu koshilando shedina Nain. 12 Eshi a ehena popepi noshivelo shoshilando, okwa mona ovanhu va humbata omudimba. Nakufya oo okwa li ewifa lomufiyekadi. Omufiyekadi oo okwa li yo pamwe nongudu inene yovanhu ya dja moshilando osho. 13 Eshi Jesus a mona omufiyekadi oo, okwe mu kenukila, ndele ta ti kuye: “Ino lila vali.” 14 Okwa ehena popepi ndele ta kwata kolutala, naavo ve li humbata ova kanghama. Okwa tya komumati oo a fya: “Omunyasha, ohandi ku lombwele, penduka!” 15 Opo nee nakufya okwa nyumuka nokwa fikama ndele ta hovele okupopya, na Jesus okwe mu yandja kuina. 16 Ovanhu ova li va tila unene ndele tava hovele okuhambelela Kalunga tava ti: “Mokati ketu omwa holoka omuprofeti munene,” nonokutya, “Kalunga okwa dimbuluka oshiwana shaye.” 17 Ndele ehokololo li na sha naJesus ola tandavela muJudea ashishe nomoitukulwa aishe oyo ye shi dingilila.

18 Ovahongwa vaJohannes ove mu hokololela oinima aishe oyo. 19 Opo nee Johannes okwa ifana ovahongwa vaye vavali ndele te va tumu kuJesus ve mu pule tava ti: “Oove tuu ou e na okuuya, ile otu na okuteelela umwe e lili?” 20 Eshi ve uya kuJesus, ova tya kuye: “Johannes Omuninginifi okwe tu tuma kwoove tu ku pule kutya, ‘Oove tuu ou e na okuuya, ile otu na okuteelela umwe e lili?’” 21 Ndele pefimbo opo tuu opo, okwa velula ovanhu vahapu ovo va li ve na omaudu e lili noku lili, a twikulula ovapofi vahapu nokwa ta mo eemhepo da nyata. 22 Jesus okwe va nyamukula ta ti: “Indeni mu ka lombwele Johannes osho mwa uda naasho mwa mona: Ovapofi paife ove wete ko, oingudu otai ende, ovanashilundu otava velulwa, ovafitamatwi ove udite ko, ovafi otava nyumunwa neehepele otadi udifilwa onghundana iwa. 23 Ou ita limbililwa nge* ota kala a hafa.”

24 Fimbo ovo va li va tumwa kuJohannes tava i, Jesus okwa hovela okupopya neengudu dovanhu kombinga yaJohannes ta ti: “Omwa ka talele shike mombuwa? Mbela olumbungu tali telaanifwa komhepo? 25 Oshike naanaa mwa ka talele? Mbela omulumenhu a djala oikutu yondilo?* Ovo hava djala oikutu yondilo ohava kala meenhele diwa, momaumbo eehamba. 26 Omolwashike hano mwa ile mombuwa? Kamwa li mwa ka tala hamba omuprofeti? Ashike ohandi mu lombwele, ye oku dule kokule omuprofeti. 27 Oye a popiwa eshi kwa shangwa taku ti: ‘Tala, ame ohandi tumu omutumwa wange e ku tetekele,* oo te ke ku longekidila ondjila.’ 28 Ohandi mu lombwele, mwaava va dalwa kovakainhu kamu na nande oumwe e dule Johannes, ashike omunhu ou munini mOuhamba waKalunga oku mu dule.” 29 (Eshi ovanhu aveshe mwa kwatelwa ovafendelifi ve shi uda, ova popya kutya Kalunga omuyuki, molwaashi ova li va ninginifwa kuJohannes. 30 Ndele Ovafarisai novanongo vomhango kava li va hala okudulika komayele aKalunga oo va li tava pewa kuJohannes, molwaashi kava li va ninginifwa kuye.)

31 Jesus okwa twikila ko ta ti: “Epupi eli ohandi li yelekanifa nashike, nola fa oolyelye? 32 Ola fa ounona ve li omutumba pomalandifilo tava ingida vakwao, tava ti: ‘Otwe mu shikila eenyalilo, ndele inamu dana; otwa imba omaimbilo eenghali, ashike inamu lila.’ 33 Sha faafana, Johannes Omuninginifi okwe uyile ita li omungome noita nu omaviinyu, ndele otamu ti: ‘Oku na ondemoni.’ 34 Omona womunhu okwe uya ta li nota nu, ndele otamu ti: ‘Tala, omulumenhu ou omufukenhu nongholwe,* kaume kovafendelifi nokovalunde!’ 35 Ashike ounongo ohau hololwa koilonga* yao ya yuka.”

36 Umwe womOvafarisai okwa pula Jesus va ka lye pamwe naye. Opo nee Jesus okwa ya meumbo lOmufarisai oo, ndele ta kala omutumba poshitaafula. 37 Ndele tala, omukainhu umwe oo a li a shiivika moshilando ashishe kutya omulunde, eshi a uda kutya Jesus ota li* meumbo lOmufarisai oo, okwa ya ko e na oshanga yomaadi edimba liwa. 38 Okwa twa eengolo konima yaJesus, ta lili ndele ta hovele okututika eemhadi daye nomahodi, noku a pushula ko neexwiki daye. Okwe mu xupita yo keemhadi nokwe di vaeka omaadi edimba liwa. 39 Eshi Omufarisai oo a li e mu ifana e shi mona, okwe lipopila ta ti: “Omulumenhu ou ngeno okwa li omuprofeti shili, ngeno okwa didilika kutya omukainhu ou te mu kumu okwa tya ngahelipi. Ngeno oku shii kutya omulunde.” 40 Jesus okwa tya kuye: “Simon, onda hala oku ku lombwela sha.” Simon okwa tya: “Eewa Muhongi, popya.”

41 “Opa li ovalumenhu vavali va lya oikolo komulumenhu wonhumba; umwe okwa lya oikolo yeedenari 500, ofimbo mukwao 50. 42 Ndele eshi va li va nyengwa oku i shunifa, okwe va dimina po aveshe. Mbela olyelye womwaava vavali ta ka kala e mu hole unene?” 43 Simon okwa nyamukula ta ti: “Ondi wete kutya oyou a diminwa po oikolo ihapu.” Jesus okwa tya kuye: “Owa nyamukula sha yuka.” 44 Opo nee Jesus okwa tala komukainhu, ndele ta ti kuSimon: “Ou wete omukainhu ou? Onde uya meumbo loye ndele ino pa nge omeva okulikosha keemhadi. Ndele omukainhu ou okwa tutika eemhadi dange nomahodi nokwe a pushula ko neexwiki daye. 45 Ove ino xupita nge, ndele omukainhu ou, okudja ngoo eshi nde uya omu, ina efa okuxupita eemhadi dange. 46 Ove ino vaeka omutwe wange omaadi, ndele omukainhu ou okwa vaeka eemhadi dange omaadi edimba liwa. 47 Onghee ohandi ku lombwele, omatimba aye nonande omahapu, okwa dimwa po, osheshi oku hole nge unene. Ndele ou a diminwa po manini, ohole yaye oinini.” 48 Opo nee okwa tya komukainhu: “Omatimba oye okwa dimwa po.” 49 Ovo va li omutumba naye poshitaafula ova li va hovela okupulafana tava ti: “Omulumenhu ou okwa tya naanaa ngahelipi, ta dimi po nokuli nomatimba?” 50 Jesus okwa tya komukainhu oo: “Eitavelo loye ole ku xupifa; inda nombili.”

8 Diva konima yaasho, Jesus okwa ya moilando noilando nosho yo momikunda nomikunda, ta udifa onghundana iwa yOuhamba waKalunga. Okwa li pamwe novayapostoli 12 2 nosho yo ovakainhu ovo a velula nokwa ta mo eemhepo da nyata muvo, ngaashi: Maria oo ha ifanwa Magdalena, oo muye mwa dja eendemoni heyali; 3 Johanna, omukulukadi waKuusa elenga laHerodes; Susanna nosho yo ovakainhu vakwao vahapu ovo va li have va yakula tava longifa oiniwe yavo.

4 Ndele eshi ongudu inene yovanhu ya li ya ongala pamwe naavo va li ve uya kuye va dja moilando noilando, okwa popya navo ta longifa efaneko ta ti: 5 “Omukuni okwa ya a ka kune eembuto daye. Eshi a li ta kunu, dimwe oda wila mondjila, ndele tadi lyatwa noda lika po keedila dokeulu. 6 Dimwe oda wila kemanya noda mena, ndele tadi lembe molwaashi kapa li omeva. 7 Dimwe oda wila meeshosholo, neeshosholo eshi da kula ode di fininika. 8 Dikwao vali oda wila medu liwa noda mena, ndele tadi dala 100.” Eshi a mana okupopya oinima oyo, okwa popya mokule ta ti: “Ou e na omatwi, na ude ko.”

9 Ovahongwa vaye ove mu pula kutya efaneko olo otali ti shike. 10 Okwa tya kuvo: “Nye omwa pitikilwa okushiiva oiholekwa iyapuki yOuhamba waKalunga, ndele kuvo oinima aishe oi li momafaneko, opo nonande ova kale va fa tava tale, kave wete ko, nonande ova kale va fa tava pwilikine, kave udite ko eityo. 11 Efaneko otali ti ngaha: Eembuto odo eendjovo daKalunga. 12 Odo da wila mondjila ovovo va uda eendjovo ndele Ondiaboli tai uya noku di kufa mo momitima davo opo vaha itavele novaha ka xupifwe. 13 Odo da kunwa kemanya ovovo tava udu eendjovo ndele tave di tambula ko nehafo, ashike kave na omidi. Ohava itavele oule wokafimbo, ndele ngeenge va hangika komayeleko ohava efa po eitavelo. 14 Odo da wila meeshosholo otadi ulike kwaavo va uda eendjovo, ndele oshisho, oupuna nomalihafifo ounyuni ou tai di fininike, ndele itava imike oiimati iwa. 15 Odo da kunwa medu liwa ovanamitimadiwa ovo va tambula ko eendjovo nove di diinina, ndele tava imike oiimati nelididimiko.

16 “Kape na ou ha tema olamba, ndele te i tuvikile noshitoo ile te i tula koshi yombete, ashike ohe i tula koshikwatelwalamba, opo i minikile ovo tave uya meumbo. 17 Osheshi kaku na osho sha holekwa itashi ka hololwa, nokaku na osho sha tuvikilwa itashi ka shiivika noitashi ke uya pouyelele. 18 Onghee hano, pwilikineni nawa osho handi mu lombwele, osheshi keshe oo e na ota ka pewa shihapu, ndele ou ehe na sha ota ka kufwa nokuli naasho ta diladila kutya oku shi kwete.”

19 Ndele ina novamwainamati vaJesus ove uya kuye, ashike kava li va dula okweehena popepi naye omolwongudu yovanhu. 20 Opo nee okwa lombwelwa taku ti: “Nyoko novamwanyoko ove li pondje va hala okupopya naave.” 21 Okwa tya kuvo: “Meme novamwamememati ovava tava pwilikine eendjovo daKalunga noku di wanifa.”

22 Efiku limwe Jesus novahongwa vaye ova londa mowato, ndele ta ti kuvo: “Natu taululeni efuta tu yeni kombinga ikwao.” Onghee osho va ninga. 23 Jesus okwa li a kofa fimbo va li tava taulula efuta. Opo nee mefuta omwa tukuluka oshikungulu shomhepo shinene, nova li moudjuu eshi owato yavo ya li ya hovela okuyada omeva. 24 Onghee ova ya kuye ndele tave mu pendula, tava ti: “Muhongi, Muhongi, otu li pokufya!” Opo nee okwa fikama nokwa hanyena omhepo nomakufikufi efuta, ndele oya lota filufilu. 25 Okwa tya kuvo: “Omu na ngoo eitavelo?” Ndele ova li va tila neenghono nova kumwa, nova pulafana tava ti: “Omunhu ou okwa tya naanaa ngahelipi? Osheshi okwa hanyena omhepo nomeva, ndele tai dulika kuye.”

26 Ndele ova tula komunghulofuta moshitukulwa shOvagerasa, osho sha li kombinga ikwao yaGalilea. 27 Eshi Jesus a ya komutunda, okwa shakenekwa komulumenhu e na ondemoni ta di moshilando. Omulumenhu oo okwa kala oule wefimbo e li hamunghele, noka li ha kala meumbo, ndele omomaendo. 28 Eshi a mona Jesus, okwe mu twila eengolo, nokwa ingida mokule, ta ti: “Jesus, Omona waKalunga Omukombadambada, oto kongo shike apa? Ohandi ku indile, ino hepeka nge.” 29 (Jesus okwa kala ta lombwele omhepo ya nyata i dje mo momulumenhu oo. Omhepo oyo oya kala hai hepeke omulumenhu oo lwoikando,* nokwa kala ha mangwa luhapu nomalyenge noha pashukilwa, ashike omalyenge ohe a tokaula. Ondemoni oya li yo hai mu twala keenhele de likalela.) 30 Jesus okwe mu pula ta ti: “Oove lyelye?” Okwa ti: “Ongudu ya kula,” osheshi muye omwa li mu na eendemoni dihapu. 31 Opo nee eendemoni oda kala tadi mu indile ehe di umbile mombwili. 32 Ndele opa li oufita munene woingulu tai li komhunda, neendemoni oda indila Jesus e di pitike di ye moingulu, nokwe di pitika. 33 Opo nee eendemoni oda dja mo momulumenhu oo ndele tadi i moingulu, noufita aushe owa lotokela komunghulo womhunda, ndele tau wile mefuta. 34 Eshi ovafita va mona osho sha ningwa po, ova ya onhapo ndele tave ke shi hepaulula moshilando nomomikunda.

35 Opo nee ovanhu ova ya va ka tale kutya oshike sha ningwa po. Eshi ve uya kuJesus, ova hanga omulumenhu oo a li e na eendemoni e li omutumba peemhadi daye, a djala nawa noku na omadiladilo e li ponhele, nova li va tila neenghono. 36 Ovo va mona osho sha ningwa po ove va hokololela nghee omulumenhu oo a li e na eendemoni a velulwa. 37 Ndele ovanhu vahapu ovo va dja moshitukulwa shOvagerasa ova lombwela Jesus a dje mo moshitukulwa shavo, molwaashi ova li va tila unene. Opo nee okwa londa owato ndele ta i. 38 Omulumenhu oo a li e na eendemoni okwa kala ta pula Jesus opo va ye naye, ashike Jesus okwe mu lekela, ta ti: 39 “Inda keumbo, ndele to ka hepaulula osho Kalunga e ku ningila.” Onghee okwa ya, nokwa hepaulula moshilando ashishe osho Jesus e mu ningila.

40 Eshi Jesus a shuna kuGalilea, ongudu yovanhu oya li ye mu tambula ko nohamu, osheshi aveshe ova li ve mu teelela. 41 Ndele tala, kuye okwe uya omulumenhu wedina Jairus, oo a li omupashukili woshinagoga. Opo nee Jairus okwa twa eengolo peemhadi daJesus, ndele te mu indile va ye naye keumbo laye, 42 osheshi okamonakadona kaye ewifa, oko ka li ke na omido 12 lwaapo, oka li ke li pokufya.

Ofimbo Jesus a li ta i, eengudu dovanhu oda li tadi lifininike muye. 43 Ndele opa li omukainhu umwe oo a kala ta vele etiko lohonde oule womido 12, ashike kapa li nande oumwe a dula oku mu velula. 44 Okwe uya kuJesus ta dilile konima nokwa kwata keenyemba doshikutu shaye shokombada, ndele diva etiko lohonde ola oka. 45 Jesus okwa pula ta ti: “Olyelye a kuma nge?” Ndele aveshe eshi va anya, Petrus okwa ti: “Muhongi, owa dingililwa keengudu dovanhu notadi lifininike mwoove.” 46 Jesus okwa ti: “Ope na umwe a kuma nge, osheshi ondi udite mwaame mwa dja eenghono.” 47 Eshi omukainhu oo a didilika kutya okwa monika, okwe uya kuJesus ta kakama, ndele ta tu eengolo puye nokwa hepaululila ovanhu aveshe kutya omolwashike e mu kuma nanghee a veluka diva. 48 Opo nee Jesus okwa tya kuye: “Omumwangekadona, eitavelo loye ole ku velula. Inda nombili.”

49 Fimbo a li natango ta popi, ope uya omukalelipo womupashukili woshinagoga, ndele ta ti komupashukili: “Okamonakadona koye oka fya; ino piyaaneka vali Omuhongi.” 50 Eshi Jesus e shi uda, okwa tya kuye: “Ino tila, shimha ashike u na eitavelo, okamonakadona koye otaka kala vali nomwenyo.”* 51 Eshi va fika peumbo olo, Jesus okwa li ashike a pitika va ye mo naPetrus, Johannes, Jakob nosho yo xe naina yokakadona oko. 52 Ovanhu aveshe ova li tava lili unene* omolwefyo lako. Onghee okwa tya kuvo: “Inamu lila vali, osheshi okakadona inaka fya, ndele oka kofa.” 53 Opo nee ova hovela oku mu yola ve mu yemba, molwaashi ova li ve shi shii kutya okaana oka fya. 54 Ndele okwe ka kwata meke, nokwe ka ifana ta ti: “Kakadona, penduka!” 55 Opo nee oka nyumuka* noka penduka diva, ndele Jesus ta yandje elombwelo ka pewe oikulya. 56 Ovadali vako ova li va hafa unene, ashike okwe va kunghilila vaha lombwele nande omunhu kombinga yaasho sha ningwa po.

9 Jesus okwa ifana ovayapostoli 12, ndele te va pe eenghono nosho yo eenghonopangelo dokuta mo eendemoni nokuvelula omikifi. 2 Opo nee okwe va tuma va ka udife kombinga yOuhamba waKalunga nokuvelula ovanaudu. 3 Ndele okwa tya kuvo: “Inamu ya nasha mondjila, kutya nee odibo, ondjato yoikulya, omungome, oimaliwa* ile oikutu ivali.* 4 Shimha mwa tambulwa meumbo lonhumba, kalei mo fiyo osheshi mwa dja mo moshilando osho. 5 Ndele ngeenge ovanhu inave mu tambula, djei mo moshilando osho nokupupula ondwi keemhadi deni shi va ningile oumbangi.” 6 Opo nee ova ya momikunda tava udifa onghundana iwa keshe pamwe nokuvelula ovanaudu.

7 Ndele Herodes,* omupangeli woshitukulwalongo,* eshi a uda ashishe osho sha ningwa po, okwa li a limbililwa unene molwaashi vamwe ova li tava ti kutya Johannes oye a nyumuka koufi, 8 vamwe ova li tava ti kutya oElia a aluka, ofimbo vamwe va li tava ti kutya oumwe womovaprofeti vonale a nyumuka. 9 Herodes okwa ti: “Johannes onde mu tetifa omutwe. Hano olyelye ndi udite ta popiwa ta ningi oinima ya tya ngaha?” Onghee okwa li a hala oku mu mona.

10 Eshi ovayapostoli va aluka, ova hokololela Jesus ashishe osho va longa. Opo nee okwa dja po navo ndele tava i ve ke likalele koshilando shedina Betsaida. 11 Eengudu dovanhu eshi de shi uda, ode mu shikula. Opo nee okwe di tambula ko nohamu, ndele ta hovele oku di lombwela kombinga yOuhamba waKalunga, nokuvelula ovo va li tava vele. 12 Eshi taku toko, ovayapostoli 12 ove uya kuJesus ndele tava ti kuye: “Lekela ongudu yovanhu opo i ye momikunda i ke likongele oikulya naapa tai ka nangala, molwaashi otu li ponhele ye likalela.” 13 Okwa tya kuvo: “Va peni oikulya.” Opo nee ova tya: “Otu na po ashike omingome nhano neeshi mbali, okuninga shapo hatu i tu ka landele ovanhu aveshe ovo oikulya.” 14 Ndele opa li ovalumenhu 5 000 lwaapo. Opo nee okwa tya kovahongwa vaye: “Va lombweleni va kale omutumba paengudu; keshe ongudu ovanhu 50 lwaapo.” 15 Ova ninga ngaashi va lombwelwa, novanhu aveshe ova kala omutumba. 16 Jesus okwa kufa omingome nhano neeshi mbali, nokwa tala keulu ndele ta ilikana. Opo nee okwe di pambula, ndele te di pe ovahongwa ve di yandje kongudu yovanhu. 17 Ndele aveshe ova lya nova kuta, opo nee ova toola po oundjaumukile vomingome, oimbale 12.

18 Lwanima, fimbo Jesus a li oye aeke ta ilikana, ovahongwa ove uya kuye, ndele te va pula ta ti: “Eengudu dovanhu ohadi ti aame lyelye?” 19 Ova tya kuye: “Vamwe ohava ti oJohannes Omuninginifi, vamwe ohava ti oElia, navakwao ohava ti oumwe womovaprofeti vonale a nyumuka.” 20 Opo nee okwa tya kuvo: “Nye ohamu ti aame lyelye?” Petrus okwa nyamukula ta ti: “Oove Omuvaekwa waKalunga.” 21 Ndele Jesus okwe va kunghilila vehe shi lombwele nande omunhu. 22 Okwe va lombwela ta ti: “Omona womunhu ota ka hepekwa nonyanya noita ka tambulwa ko kovakulunhu voshiwana, kovapristeri ovakulunhu nokovanongo vomishangwa; ota ka dipawa, nota ka nyumuka mefiku etitatu.”

23 Ndele okwa tya kwaaveshe: “Ngeenge oku na ou a hala okushikula nge, ne lixupule ye mwene nokuhumbata omuti waye womahepeko* efiku keshe, ndele ta kala nokushikula nge. 24 Keshe ou a hala okuxupifa omwenyo waye ote u kanifa, ndele keshe ou ta kanifa omwenyo waye omolwange ote u xupifa. 25 Otashi kwafa shike omunhu ngeenge okwe lilikolele ounyuni aushe, ndele ta kanifa omwenyo waye ile a nyone po onghalamwenyo yaye? 26 Keshe ou ta fi nge ohoni nosho yo eendjovo dange, Omona womunhu naye ote ke mu lidimbika eshi te uya moshinge shaye, shaXe noshovaengeli vayapuki. 27 Oshili ohandi mu lombwele, ope na vamwe vomwaava ve li ofika apa itava ka makela nandenande efyo fiyo osheshi tava mono tete Ouhamba waKalunga.”

28 Konima yomafiku ahetatu okudja eshi a popya eendjovo odo, okwa ya pamwe naPetrus, Johannes naJakob ndele tava londo komhunda va ka ilikane. 29 Fimbo a li ta ilikana, oshipala shaye osha shituluka noikutu yaye oya li tai vilima. 30 Ndele tala, opa li ovalumenhu vavali, Moses naElia, tava kundafana naye. 31 Ovalumenhu ovo ova li va holoka moshinge nova li va hovela okupopya kombinga yokuya kwaJesus, osho sha li tashi ka ningilwa kuJerusalem. 32 Ndele Petrus naavo va li pamwe naye ova li va kwatwa keemhofi didjuu, eshi va penduka ova mona oshinge shaJesus novalumenhu vavali ve li ofika naye. 33 Eshi ovalumenhu ovo va li pokudja po puJesus, Petrus okwa tya kuye: “Omuhongi, osha wapala kufye okukala apa. Natu dikeni omatwali atatu apa, limwe oloye, limwe olaMoses nalikwao olaElia.” Petrus ka li e shii kutya ota popi shike. 34 Ofimbo Petrus a li ta popi eendjovo odo, opa holoka oshilemo ndele tashi va tuvike, nova li va tila unene. 35 Opo nee moshilemo omwa dja ondaka tai ti: “Ou Omona wange, omuhoololwa. Mu udeni.” 36 Eshi va uda ondaka oyo, ova ka mona ashike Jesus e li po oye aeke. Ndele ova kala ve shi mwenena noinava lombwela nande oumwe kombinga yaasho va mona pefimbo olo.

37 Mefiku la landula ko, fimbo va li tava di komhunda, ova shakenekwa kongudu inene yovanhu. 38 Ndele tala, omulumenhu umwe womongudu oyo okwa ingida ta ti: “Muhongi, ohandi ku indile u kwafele* omonamati wange, molwaashi oye aeke ndi na. 39 Tala, omhepo ya nyata ohai mu kame, noha hovele okukwena; ohai mu denge pedu ndele ta tutumike onhutu kokanya, noihai mu efa diva fimbo inai mu yahameka. 40 Onda indila ovahongwa voye ve i te mo, ashike ova nyengwa.” 41 Jesus okwa nyamukula a ti: “Epupi eli lihe na eitavelo nola nyonauka, fiyo onaini ndi na okukala nanye? Ondi na oku mu lididimikila fiyo onaini? Eta omonamati woye oku.” 42 Fimbo omumati oo e li pokufika, ondemoni oye mu denga pedu noku mu kama neenghono. Opo nee Jesus okwa hanyena omhepo oyo ya nyata, ndele ta velula omumati noku mu shunifa kuxe. 43 Ndele aveshe ova li va kuminwa eenghono dinene daKalunga.

Fimbo aveshe va li va kuminwa oinima aishe oyo a li ta longo, Jesus okwa tya kovahongwa vaye: 44 “Pwilikineni nawa nokudiinina eendjovo edi, osheshi Omona womunhu ota ka yandjwa momake ovanhu.”* 45 Ashike kava li ve udite ko eityo leendjovo odo molwaashi kava li va pitikilwa oku di uda ko. Onghee ova li va tila oku mu pula kombinga yeityo lado.

46 Ndele mokati kavo omwa tukuluka eemhata kutya olyelye munene e dule vakwao. 47 Eshi Jesus a shiiva osho va li tava diladila momitima davo, okwa kufa okaana nokwe ka kaleka ofika puye, 48 ndele ta ti kuvo: “Keshe ou ta tambula okaana ngaashi aka medina lange, okwa tambula nge yo; nakeshe ou ta tambula nge, okwa tambula yo Ou a tuma nge. Osheshi keshe ou munini mokati keni oye munene e mu dule.”

49 Johannes okwa tya kuye: “Omuhongi, otwa mona umwe ta te mo eendemoni ta longifa edina loye, ndele otwa kendabala oku mu kelela molwaashi iha ende nafye.” 50 Ndele Jesus okwa tya kuye: “Inamu mu kelela, osheshi keshe ou ehe li omhinge nanye oku li kombinga yeni.”

51 Eshi omafiku a li taa ehene popepi* Jesus a ye meulu, okwa li a tokola okuya kuJerusalem. 52 Ndele okwa tuma ovahongwa vaye ve mu tetekele komesho, opo nee ova ya momukunda wOvasamaria ve ke mu longekidile onhele. 53 Ashike Ovasamaria kava li ve mu tambula, molwaashi okwa li a tokola okuya* kuJerusalem. 54 Eshi ovahongwa vaye Jakob naJohannes ve shi mona, ova tya kuye: “Omwene, natu ifane omundilo meulu u va lungwinife po?” 55 Jesus okwa punguluka ndele te va hanyene. 56 Opo nee ova ya komukunda umwe u lili.

57 Fimbo ve li mondjila, umwe okwa tya kuye: “Ohandi ke ku shikula keshe apa to i.” 58 Jesus okwa tya kuye: “Ookavandje ove na omikwena, needila dokeulu odi na oihadi, ndele Omona womunhu ke na apa ta tenheke omutwe waye.” 59 Ndele Jesus okwa lombwela vali umwe: “Ninga omushikuli wange.” Omulumenhu oo okwa tya: “Omwene, pitike nge manga ndi ye ndi ka pake tate.” 60 Opo nee Jesus okwa tya kuye: “Efa ovafi va pake ovafi vavo, ndele ove inda u ka udife Ouhamba waKalunga keshe pamwe.” 61 Ndele mukwao vali okwa tya: “Omwene, ohandi ku shikula, ashike pitike nge tete ndi ye ndi ka lekele vambuletu.” 62 Jesus okwa tya kuye: “Kape na omunhu ha kwata oshipululo, ndele ta tale konima, ta wapalele Ouhamba waKalunga.”

10 Konima yoinima oyo, Jesus okwa hoolola ovahongwa vamwe 70, ndele te va tumu oovavali ve mu tetekele koshilando nokonhele keshe oko a li ta ka ya. 2 Opo nee okwa tya kuvo: “Oilonga yokuteya oihapu, ndele ovateyi ovanini. Onghee hano, indileni Mwene weteyo a tume ovateyi keteyo laye. 3 Indeni, ndele kaleni mwa lungama, osheshi ohandi mu tumu ngaashi eedi mokati komambungu. 4 Inamu ya nondjato yoimaliwa ile yoikulya ile neenghaku, noinamu kunda* nande omunhu mondjila. 5 Ngeenge omwa i meumbo lonhumba, tete tyeni: ‘Ombili nai kale meumbo eli.’ 6 Ngeenge ovanhu ove na ombili, ombili oyo mwe va halela nai kale navo. Ndele ngeenge kave i na, nai mu alukile. 7 Onghee hano, kaleni hamu di meumbo olo, lyeni nokunwa osho tave mu pe, osheshi omulongi okwa wana okupewa ondjabi yaye. Inamu kala tamu tembuka nomaumbo.

8 “Natango, ngeenge omwa i moshilando ndele tamu tambulwa mo, lyeni osho tamu pewa, 9 ovanaudu ovo ve li mo va veluleni noku va lombwela tamu ti: ‘Ouhamba waKalunga owa ehena popepi nanye.’ 10 Ngeenge omwa i moshilando ndele inave mu tambula, indeni momapandavanda asho ndele tamu ti: 11 ‘Otwe lipupula ondwi oyo ya li ya kanyatela keemhadi detu ya dja moshilando sheni. Ndele kaleni mu shi shii kutya Ouhamba waKalunga owa ehena popepi.’ 12 Ohandi mu lombwele kutya mefiku olo* ehandukilo loshilando osho otali ka kala linene li dulife laSodom.

13 Okwa ti: “Woo ovanhu vomuKorasin! Woo ovanhu vomuBetsaida! Molwaashi ngeno ovanhu vomoilando yaTirus naSidon ova monene oikumwifilonga oyo, ngeno ove lidilulula nale, ndele tava djala eeshako nokukala omutumba momute. 14 Onghee mEfiku lEtokolo, ehandukilo leni otali ka kala linene li dulife laTirus naSidon. 15 Ove Kapernaum, mbela oto ka tumbalekwa u ye meulu? Oto ka kulukila mOmbila!*

16 “Ou ta pwilikine kunye, ota pwilikine kwaame. Naau ite mu tambula, naame ita tambula nge yo. Ashike ou ita tambula nge, ita tambula yo Ou a tuma nge.”

17 Ndele ovahongwa 70 ova aluka nehafo, tava ti: “Omwene, nokuli neendemoni oda dulika kufye eshi twa longifa edina loye.” 18 Opo nee okwa tya kuvo: “Ondi wete nale Satana a wa meulu a fa oluvadi. 19 Taleni, onde mu pa eenghono dokulyata omayoka neendje, nodokufinda eenghono adishe domutondi, nokape na osho tashi ke mu etela oshiponga. 20 Ashike inamu hafa molwaashi eemhepo da nyata da dulika kunye, ndele hafeni eshi omadina eni a shangelwa meulu.” 21 Pefimbo opo tuu opo Kalunga okwa pa Jesus omhepo iyapuki ndele ta hafe unene nokwa ti: “Tate, Omwene weulu nedu, ohandi ku tange moipafi yaaveshe, molwaashi oinima ei owe i holeka ovanaendunge novahongwanhu, ndele owe i hololela ounona vanini. Heeno Tate, molwaashi eshi oshe ku wapalela. 22 Oinima aishe Tate okwe i pa nge, ndele kape na nande ou e shii Omona kakele kuTate; kape na yo ou e shii Tate, kakele kOmona nakeshe oo Omona a hala oku mu hololela Xe.”

23 Opo nee okwa pungulukila kovahongwa vaye ndele te va lombwele ovo aveke ta ti: “Ava omesho avo e wete oinima ei mu wete otava kala va hafa. 24 Osheshi ohandi mu lombwele, eehamba novaprofeti vahapu ova li va halelela okumona oinima oyo hamu mono, ndele inave i mona, nokuuda oinima oyo hamu udu, ashike inave i uda.”

25 Ndele tala, omulumenhu umwe omunongo womhango okwe uya kuJesus e mu yeleke, ta ti: “Omuhongi, ondi na okuninga shike opo ndi ka fyuulule omwenyo waalushe?” 26 Opo nee Jesus okwa tya kuye: “MOmhango omwa shangwa shike? Ou i udite ko ngahelipi?” 27 Omulumenhu oo okwa nyamukula ta ti: “‘Hola Jehova Kalunga koye nomutima woye aushe, nomwenyo* woye aushe, neenghono doye adishe, neendunge doye adishe’ nosho yo ‘hola mukweni ngaashi u lihole mwene.’” 28 Jesus okwa tya kuye: “Owa nyamukula mondjila; twikila okuninga ngaho opo u ka mone omwenyo waalushe.”

29 Ndele molwaashi omulumenhu oo okwa li a hala okulimonikifa kutya ye omuyuki, okwa tya kuJesus: “Olyelye naanaa omukwetu?” 30 Jesus okwe mu nyamukula a ti: “Omulumenhu wonhumba okwa li ta di muJerusalem a finda kuJeriko ndele ta hangika kovanyeki, ove mu dula oikutu aishe, tave mu denge ndele tave mu fiye po e na okamwenyo kanini. 31 Ndele omupristeri umwe oo a li ta ende mondjila oyo, eshi e mu mona, okwa ya nondjila imwe i lili. 32 Natango, Omulevi umwe naye eshi e uya ponhele oyo, okwe mu mona nokwa ya nondjila imwe i lili. 33 Ndele Omusamaria umwe oo a li naye ta ende mondjila oyo, eshi e uya ponhele oyo, okwe mu mona nokwe mu kenukila. 34 Okwa ya puye, te mu tile omaadi nomaviinyu poipute yaye ndele te i mange. Opo nee okwe mu londeka koshinamwenyo shaye ndele te mu twala meumbo lovaenda e ke mu file oshisho. 35 Mefiku la landula ko, okwa kufa eedenari mbali, ndele te di pe mwene weumbo olo, nokwa tya kuye: ‘Mu fila oshisho, nongeenge owa longifa shihapu shi dulife pwaasho, ohandi uya ndi shi fute eshi handi aluka.’ 36 Oolyelye womwaava vatatu to diladila kutya oye omukwao womulumenhu oo a li a hangika kovanyeki?” 37 Okwa ti: “Oyou e mu fila onghenda.” Opo nee Jesus okwa tya kuye: “Inda u ka ninge yo sha faafana.”

38 Ndele fimbo ve li mondjila, Jesus okwa ya momukunda wonhumba. Opo nee omukainhu umwe wedina Marta okwe mu tambula meumbo lavo. 39 Marta okwa li e na omumwainakadona wedina Maria, oo a li omutumba peemhadi dOmwene nokwa kala ta pwilikine keendjovo daye. 40 Mepingafano naasho, Marta okwa li e lipyakidila noinima ihapu. Onghee okwe uya kuJesus ndele ta ti: “Omwene, ku wete nande kutya mumwameme okwa efela nge po ashike? Mu lombwela e uye a kwafele nge.” 41 Omwene okwa tya kuye: “Marta, Marta, ou na oshisho nowe lipyakidila noinima ihapu. 42 Fye inatu pumbwa oinima ihapu, nande oinini oya wana ashike. Maria okwe lihoololela oshinima sha denga mbada* nokape na ou te shi mu kufa.”

11 Ndele eshi Jesus a mana okwiilikana monhele yonhumba, umwe womovahongwa vaye okwa tya kuye: “Omwene, tu honga nghee tu na okwiilikana ngaashi Johannes naye a honga ovahongwa vaye.”

2 Opo nee okwa tya kuvo: “Ngeenge tamu ilikana, tyeni: ‘Tate, edina loye nali yapulwe.* Ouhamba woye nau uye. 3 Tu pa omungome oo twa pumbwa efiku keshe. 4 Tu dimina po omatimba etu ngaashi nafye hatu dimine po ovo va nyona kufye. Ino efa tu ye momayeleko.’”*

5 Okwa tya vali kuvo: “Nandi tye nee umwe womunye okwa ya kukaume kaye mokati koufiku ndele ta ti kuye: ‘Kaume, kwafele nge omingome nhatu, 6 osheshi ondi na kaume kange e uya po a dja kokule, ndele kandi na eshi handi mu pe.’ 7 Ndele oo e li meni leumbo okwa ti: ‘Ino piyaaneka nge. Pomuvelo opa idilwa nale; ame novana vange otwa nangala. Itandi dulu okupenduka ndi ku pe sha.’ 8 Ohandi mu lombwele, nonande ita penduka ndele te mu pe sha omolwoukaume, ota penduka e mu pe osho a pumbwa molwaashi okwa kala ta indile ehe na olufuwo. 9 Onghee ohandi mu lombwele, kaleni hamu indile, opo nee otamu pewa; kaleni hamu kongo, opo nee otamu mono; kaleni hamu konghola, opo nee otamu yeululwa. 10 Osheshi keshe ou ta indile ota pewa, nakeshe ou ta kongo ota mono, naau ta konghola, ota yeululwa. 11 Mbela omudali olyelye womunye ngeenge omona te mu indile oshi, te ke mu pa eyoka ponhele yoshi? 12 Ile ngeenge te mu indile ei, mbela ote ke mu pa ondje? 13 Hano, ngeenge nye ovalunde, ndele omu shii okupa ovana veni oinima iwa, Xo yeni womeulu ita ka yandja tuu omhepo iyapuki kwaavo tave mu indile!”

14 Lwanima, okwa ta mo ondemoni oyo ya li ya fitika omulumenhu umwe ondaka. Eshi ondemoni ya dja mo, omulumenhu oo okwa hovela okupopya, neengudu dovanhu oda li da kumwa. 15 Ndele vamwe vomuvo ova tya: “Eendemoni ote di te mo naBelsebul,* omupangeli weendemoni.” 16 Vamwe ova li va hovela oku mu pula edidiliko la dja meulu opo ve mu yeleke. 17 Eshi Jesus a shiiva omadiladilo avo, okwa tya kuvo: “Ouhamba keshe tau lipilukile po otau teka po, neumbo keshe tali lipilukile po otali hanauka po. 18 Sha faafana, ngeenge Satana naye okwe lipilukila po, ongahelipi ouhamba waye tau dulu okukala po? Osheshi otamu ti eendemoni ohandi di tefa mo Belsebul. 19 Ngeenge eendemoni ohandi di te mo naBelsebul, ovana veni otave di te mo nalyelye? Onghee otave ke mu tokola. 20 Ndele ngeenge eendemoni ohandi di te mo neenghono daKalunga,* osha hala okutya Ouhamba waKalunga owe uya ndele inamu shi didilika. 21 Ngeenge omulumenhu omunaenghono a homata ta kelele eumbo laye, oinima yaye ohai kala meameno. 22 Ndele ngeenge okwa di umwe e na eenghono e mu dule ndele te mu lwifa noku mu finda, ote mu nyeke oilwifo yaye aishe oyo a li e lineekela, noku i tukulila vamwe. 23 Keshe oo ina ama kombinga yange, oku li omhinge naame, naau ita ongele ovanhu pamwe naame, ota halakanifa.

24 “Ngeenge omhepo ya nyata ya dja momunhu, ohai tavakana mombuwa tai kongo onhele yetulumuko, ndele eshi inai i mona, ohai ti, ‘Ohandi shuna keumbo lange oku nda dile.’ 25 Ndele eshi ya aluka, oya hanga eumbo la kombwa nawa nola fewekwa. 26 Opo nee ohai i ndele tai ka tala eemhepo dikwao heyali dikolokoshi neenghono di i dule; shimha da i momunhu oo, ihadi di mo vali. Onghee onghalo yaye yaxuuninwa ohai kala ii neenghono i dule yotete.”

27 Ndele fimbo a li ta popi oinima oyo, omukainhu umwe a dja mongudu yovanhu okwe mu ingida ta ti: “Omukainhu oo e ku humbata moshidalelo shaye nokwe ku nyamifa ota kala a hafa!” 28 Jesus okwa ti: “Ovo tava kala va hafa ovovo hava pwilikine eendjovo daKalunga noku di diinina.”

29 Eshi eengudu dovanhu da li da ongala pamwe, okwa ti: “Epupi eli likolokoshi otali kongo edidiliko, ndele itali pewa edidiliko lasha, kakele kedidiliko lomuprofeti Jona. 30 Ngaashi ashike Jona a li edidiliko kOvaninive, Omona womunhu naye ota ka kala edidiliko kepupi eli. 31 Ohambakainhu yokolukadi otai ka nyumuka pamwe nepupi eli mEfiku lEtokolo, ndele tai li tokola molwaashi oya dile kokule opo i ka pwilikine ounongo waSalomo. Ndele tala, ou e li apa okwa fimanenena e dule Salomo. 32 Ovaninive otava ka nyumunwa pamwe nepupi eli mEfiku lEtokolo, ndele tave li tokola, molwaashi ova li ve lidilulula keudifo laJona. Ndele tala, ou e li apa okwa fimanenena e dule Jona. 33 Omunhu ngeenge a tema olamba, ihe i holeke ile e i tule koshi yoshimbale,* ndele ohe i tula koshikwatelwalamba, opo i minikile ovo tave uya meumbo. 34 Eisho loye olo ouyelele wolutu. Ngeenge eisho loye ola tala koshinima shimwe ashike,* olutu loye alishe otali ka kala mouyelele. Ndele ngeenge eisho loye otali tale koinima ii,* olutu loye alishe otali ka kala momilaulu. 35 Onghee hano, lungama opo ouyelele oo u li mwoove uha ninge omilaulu fokofoko. 36 Ngeenge olutu loye alishe oli li mouyelele, alishe otali ka kala la yela ngaashi olamba tai minikile.”

37 Eshi Jesus a mana okupopya eendjovo odo, Omufarisai umwe okwe mu pula a ka lye pamwe naye keumbo laye. Onghee okwa ya ndele ta kala omutumba poshitaafula. 38 Ndele Omufarisai oo okwa li a kumwa eshi a mona Jesus ta li ine likosha keenyala.* 39 Opo nee Omwene okwa tya kuye: “Ovafarisai nye, ohamu kosho eholo netiti kombada, ndele meni leni omu yadi olwisho noukolokoshi. 40 Omalai nye! Mbela ou a shita eshi shokombada haye a shita yo shomeni? 41 Ndele kaleni hamu yandje eeshalinghenda* tashi di komutima opo mu dule okukala mwa yela filufilu. 42 Woo Ovafarisai nye! Osheshi ohamu yandje oshitimulongo shomint, shorue noshoikwambidi* aishe yomepya, ashike ohamu efa ouyuki nohole yokuhola Kalunga! Oinima oyo omwa li mu na oku i wanifa po, naikwao kamu na oku i efa po. 43 Woo Ovafarisai nye, osheshi omu hole okukala omutumba koipundi yokomesho* meeshinagoga nokupopifwa monghedi ye likalekelwa peenhele domalandifilo. 44 Woo nye, osheshi omwa fa eembila* da fufala po,* ovanhu tava ende kudo ndele inave shi didilika.”

45 Ndele umwe womovanongo vomhango okwa tya kuye: “Muhongi, eshi to popi ngaho nafye oto tu tuku.” 46 Opo nee Jesus okwa ti: “Woo nanye yo ovanongo vomhango, osheshi ohamu twike ovanhu omitengi didjuu okuhumbata, ashike nye vene ihamu di kumu nande onomunwe weni!

47 “Woo nye, osheshi omwa tunga eembila* dovaprofeti, ndele ova dipawa kooxokulululwa. 48 Onghee hano, nye eendombwedi doilonga yooxokulululwa nomwe i hokwa, osheshi ova dipaa ovaprofeti ndele nye otamu tungu eembila davo. 49 Hano Kalunga omolwounongo waye okwa ti: ‘Ohandi ke va tumina ovaprofeti nosho yo ovayapostoli, ashike otava ka dipaa nokuhepeka vamwe vomuvo, 50 opo ohonde yovaprofeti aveshe oyo ya tika okudja kehovelo lounyuni i ka pulwe epupi eli, 51 okudja kohonde yaAbel fiyo okohonde yaSakaria, oo a dipaelwa pokati koaltari notembeli.’ Ohandi mu lombwele, epupi eli olo tali ke i pulwa.

52 “Woo nye ovanongo vomhango, osheshi omwa kufa po oshapi yokupatulula omuvelo wokushiiva Kalunga. Nye vene inamu ya mo, ndele ohamu kendabala okukelela ovo tava i mo.”

53 Eshi Jesus a dja po opo a li, ovanongo vomishangwa nOvafarisai ova li va hovela okuyuka muye noku mu pula omapulo mahapu, 54 opo va dule ngeno okumona sha muye osho tashi mu pefa oushima.

12 Pefimbo opo tuu opo, eshi ongudu yovanhu omayovi mahapu ya li ya ongala notai lifininike mumwe, Jesus okwa hovela okulombwela tete ovahongwa vaye ta ti: “Pashukileni efulika lOvafarisai, sha hala okutya oihelele yavo. 2 Ndele kaku na osho sha tuvikwa itashi ka hololwa, nokaku na oshiholekwa itashi ka shiivika. 3 Onghee hano, keshe osho tamu popi momilaulu otashi ka udika mouyelele, nakeshe osho tamu nongofola momaumbo eni otashi ka udifwa moipafi yaaveshe. 4 Ohandi mu lombwele ookaume, inamu tila ovo tava dipaa olutu ndele kave na vali eshi tava dulu okuninga po. 5 Ndele ohandi mu lombwele ou mu na okutila: Tileni Ou e na eenghono dokudipaa nokuumbila muGehenna.* Ohandi mu lombwele, Ou oye mu na okutila. 6 Mbela oiyandja itano ihai landwa noupeni vavali* vongushu inini? Ashike kape na nande oshimwe hashi dimbiwa* kuKalunga. 7 Ndele nokuli neexwiki adishe dokomitwe deni oku shii omuvalu wado. Hano inamu tila; nye omwa fimana unene mu dule oiyandja ihapu.

8 “Ohandi mu lombwele, keshe ou ta hepaulula nge moipafi yovanhu, nOmona womunhu ote ke mu hepaulula yo moipafi yovaengeli vaKalunga. 9 Ashike ou te lidimbike nge moipafi yovanhu, naame ohandi ke mu lidimbika moipafi yovaengeli vaKalunga. 10 Keshe ou ta popile mowii Omona womunhu, ota diminwa po, ndele keshe ou ta sheke omhepo iyapuki ita diminwa po. 11 Ngeenge tave mu twala moyoongalele* nokovapangeli, inamu kala mu na oshisho kutya otamu ka tya ngahelipi ile otamu ka popya shike opo mu lipopile, 12 osheshi omhepo iyapuki otai ke mu pa pefimbo opo osho mu na okupopya.”

13 Ndele umwe womongudu oyo okwa tya kuye: “Muhongi, lombwela omumwamememati tu tukule naye efyuululo.” 14 Jesus okwa tya kuye: “Mulumenhu ove, olyelye a tula nge po ndi ninge omutokoli ile omutukuli wefyuululo leni nye vavali?” 15 Opo nee okwa tya kongudu yovanhu: “Kaleni oupafi nokulungamena olwisho keshe, osheshi nonande omunhu oku kale e na eliko lihapu, halo tali mu kaleke nomwenyo.” 16 Okwe va lombwela efaneko limwe a ti: “Opa li omulumenhu umwe oshipuna oo a li e na epya la dala nawa. 17 Opo nee okwa hovela okulipopila ta ti: ‘Ondi na okuninga po shike shi na sha noilikolomwa yange, osheshi kandi na apa handi i tula?’ 18 Okwa ti, ‘Ohandi ningi ngaha: Ohandi hanauna po omaanda ange, handi tungu amwe manene, ndele handi tuvikile mo oilya noinima yange aishe. 19 Opo nee onde lipopila* nda ti: “Owa* tuvikililwa oinima ihapu notai kwata omido dihapu; onghee ino lipula nasha, lya, nwa nokuhafela onghalamwenyo.”’ 20 Ndele Kalunga okwa tya kuye, ‘Elai ove, omwenyo woye oto u kufwa oufiku wonena. Mbela oinima oyo wa tuvikila otai ningi yalyelye?’ 21 Osho osho tashi ningilwa omunhu oo te lituvikilile emona, ashike ke na emona kuKalunga.”

22 Ndele Jesus okwa tya kovahongwa vaye: “Onghee ohandi mu lombwele, inamu kala mu noshisho shi na sha nokukalamwenyo kweni kutya otamu li shike ile kutya otamu djala shike. 23 Osheshi omwenyo owa fimana u dule oikulya, nolutu ola fimana li dule oikutu. 24 Taleni komakola: Ihaa kunu noihaa teya; kae na omaanda, ashike Kalunga ohe a palula. Mbela inamu fimana unene mu dule oudila? 25 Olyelye womunye ta dulu okuweda ko nande okanini* koule wokukalamwenyo kwaye mokukala e na oshisho? 26 Hano ngeenge otamu nyengwa kokanima oko kanini, omolwashike mu na okukala noshisho naikwao? 27 Taleni nghee eengala hadi kulu: Ihadi hodile noihadi hondjo, ndele ohandi mu lombwele, nokuli naSalomo moshinge shaye ashishe ka djalele ngaashi imwe yomudo. 28 Ngeenge Kalunga oha dike oimeno yomoixwa oyo i li po ashike nena ndele mongula oya ekelwa mediko, mbela ite ke mu dika shi dulife po nye ovo mu na eitavelo linini? 29 Inamu kala mwa pitifa komesho okukonga osho tamu li naasho tamu nu, noinamu kala mu na oshisho sha pitilila, 30 osheshi ovanhu vomoiwana imwe i lili ohava lalakanene oinima aishe oyo. Ndele Xo yeni oku shi shii kutya omwa pumbwa oinima oyo. 31 Ponhele yaasho, kaleni nokukonga Ouhamba waye, opo nee otamu ka wedelwa ko oinima oyo.

32 “Ino tila okangudu ove kanini,* osheshi Xo okwa halelela oku mu pa Ouhamba. 33 Landifeni po oinima yeni aishe, ndele tamu yandje eeshalinghenda.* Liningileni eendjato doimaliwa ihadi kulupa, sha hala okutya emona lomeulu olo itali xulu po, omo eembudi neenhwishi ihadi dulu okuya mo. 34 Osheshi oko ku na emona loye oko yo ku na omutima woye.

35 “Kaleni mwa djala nomwe lilongekida, neelamba deni nadi kale da tema, 36 ngaashi ovanhu va teelela omwene wavo a aluke kehombolo, opo ngeenge te uya ndele ta konghola, otave mu yeulula diva. 37 Ovapiya ovo tava hangika ve li oupafi komwene wavo otava kala va hafa. Oshili ohandi mu lombwele, omwene oo ota djala oikutu yokuyakula,* ndele te va lombwele va kale omutumba opo nee te uya puvo e va yakule. 38 Ngeenge okwe uya okudja pomuwoi woufiku fiyo omokati koufiku* ile okudja mokati koufiku fiyo oponhatu yokeengula,* ndele ta hange ve lilongekida, otava kala va hafa. 39 Diladileni kwaashi: Ngeno mwene weumbo okwa li e shii kutya omulunga ote uya pongapi, ngeno ita efa eumbo laye li teywe. 40 Nanye yo kaleni mwe lilongekida, osheshi Omona womunhu ote uya pefimbo olo inamu teelela.”

41 Ndele Petrus okwa tya: “Omwene, ofye atuke to lombwele efaneko eli ile oto li lombwele yo ovanhu aveshe?” 42 Opo nee Omwene okwa ti: “Olyelye hano omupiya omudiinini nomunaendunge, oo omwene waye e mu nangeka po a pashukile ovapiya vaye noku va pa eendja da wana pefimbo la wapala? 43 Omupiya oo ita ka kala tuu a hafa ngeenge omwene waye okwe mu hange ta ningi ngaho! 44 Oshili ohandi mu lombwele, omwene waye ote ke mu nangeka po a pashukile oinima yaye aishe. 45 Ngeenge omupiya oo okwe lipopile momutima waye ta ti, ‘Omwene wange okwa kala ko,’ ndele ta hovele okudenga ovapiya vakwao, ta li nokunwa ndele ta kolwa, 46 omwene waye ote ke uya mefiku olo ine mu teelela nopovili oyo ehe shii, note ke mu handukila nehandu linene ndele te mu tula kongudu yaavo vehe fi ovadiinini. 47 Omupiya oo e shii ehalo lomwene waye ndele ite lilongekidile okuuya kwaye ile ita longo osho a teelelwa a longe,* ota ka dengwa omadengo mahapu. 48 Ndele omupiya ou ehe shii ehalo lomwene waye nokwa longa sha shoku mu dengifa, ota dengwa omadengo manini. Keshe ou a pewa shihapu ota ka pulwa shihapu, naau a tulwa po a pashukile shihapu ota ka pulwa shihapu unene.

49 “Onde uyile okuxwameka omundilo kombada yedu, ndele ngeenge omundilo owa tema nale oshike vali ndi na okuninga? 50 Ondi na eninginifo olo handi ninginifwa nalo, ndele onda nyika oluhodi fiyo osheshi la pwa. 51 Mbela otamu diladila kutya onde uya okweeta ombili kombada yedu? Ahowe, ohandi mu lombwele, onde uya okweeta etukauko. 52 Okudja paife momaumbo otamu ka kala etukauko. Ngeenge omu na ovanhu vatano, vatatu otava ka pataneka vavali, navavali otava ka pataneka vatatu. 53 Otava ka kala va tukauka; xe ota ka pataneka omonamati, nomonamati ota ka pataneka xe, ina ota ka pataneka omonakadona, nomonakadona ota ka pataneka ina, inamweno ota ka pataneka oshitenya shomukainhu, noshitenya shomukainhu otashi ka pataneka inamweno.”

54 Okwa tya vali keengudu dovanhu: “Ngeenge mwa mono omwaamba u li kouninginino, ohamu ti, ‘Otaku di oshikungulu shodula,’ naasho osho hashi ningwa. 55 Ndele ngeenge omwa mono omhepo tai pepe okudja kolukadi ohamu ti, ‘Otaku ka kala kwa pupyala unene,’ naasho osho hashi ningwa. 56 Ovanaihelele nye, omu shii okunongonona nghee onghalo yomhepo tai ka kala, ndele omolwashike muhe shii okunongonona eityo laasho tashi ningwa pefimbo eli? 57 Omolwashike ihamu tokola nye vene osho sha yuka? 58 Pashihopaenenwa, ngeenge tamu i komupangeli nye nomutamaneki woye, pongololeni po okuhaudafana pokati keni fimbo mu li mondjila, opo ehe ku yandje momake omupanguli, nomupanguli ehe ku twale komupiya womomhangu, ndele omupiya womomhangu te ku tula modolongo. 59 Ohandi ku lombwele, ito ka dja mo nandenande fiyo osheshi wa futa oimaliwa aishe oyo u na.”*

13 Pefimbo opo opa li vamwe ovo va li ve mu lombwela kutya Pilatus okwa dipaa Ovagalilea ovo va li tava yambe omayambo. 2 Jesus okwa tya kuvo: “Mbela otamu diladila kutya Ovagalilea ovo eshi va ningilwa oshinima osho ova li ovalunde ve dule Ovagalilea vakwao aveshe? 3 Hasho nandenande, nanye otamu ka hanaunwa po ngaashi vo ngeenge itamu lidilulula. 4 Ile otamu diladila kutya ovanhu 18 ovo va li va wilwa koshungongulu yomuSiloa, ndele tava fi ova li ovalunde unene ve dule Ovajerusalem vakwao aveshe? 5 Hasho nandenande, amushe otamu ka hanaunwa po ngaashi vo ngeenge itamu lidilulula.”

6 Ndele okwe va lombwela efaneko ta ti: “Opa li omulumenhu a twika omukwiyu moshikunino shaye shomandjebele, nokwa li e uya okukonga ko eenghwiyu ashike ina hanga ko sha. 7 Opo nee okwa tya komulongi womoshikunino, ‘Komukwiyu ou onde uya ko omido nhatu paife handi kongo eenghwiyu, ndele ihandi hange ko sha. Nau tetwe po molwaashi otau kulu ashike ndele itau ima sha.’ 8 Omulongi womoshikunino okwa tya kuye, ‘Omwene, u efa u kale po omudo umwe fimbo handi u palele nokutula po oushosho. 9 Otashi ka kala shiwa ngeenge owa ka ima monakwiiwa, ndele ngeenge itau ima sha, nau tetwe po.’”

10 Jesus okwa li ta hongo moshinagoga shimwe mefiku lEshabata. 11 Ndele tala, opa li omukainhu umwe a li e na omhepo ya nyata oyo ya li ye mu ningifa a kale ta vele oule womido 18. Okwa li ha ende a petama noka li ha dulu okuyukilila nandenande. 12 Eshi Jesus a mona omukainhu oo, okwa tya kuye: “Owa velulwa koudu woye.” 13 Opo nee okwe mu tenheka omake, nombuda yomukainhu oo oya yukilila diva nokwa hovela okutanga Kalunga. 14 Ndele omupashukili woshinagoga okwa li a handuka unene eshi Jesus a velula mEshabata, onghee okwa lombwela ongudu yovanhu ta ti: “Ope na omafiku ahamano oilonga; hano ileni momafiku oo opo mu velulwe, ashike hamefiku lEshabata.” 15 Opo nee Omwene okwa tya kuye: “Ovanaihelele nye, mbela keshe umwe womunye iha pandekulula mo ongobe ile ondongi yaye mefiku lEshabata ndele te i twala i ka nwe? 16 Mbela omukainhu ou, oo e li oludalo laAbraham nokwa kala a mangwa kuSatana oule womido 18, ke na okumangululwa meemhango odo mefiku lEshabata?” 17 Eshi a popya oinima oyo, ovapataneki vaye aveshe ova li va fya ohoni, ofimbo ongudu yovanhu ya li ya hafela oinima iwa aishe oyo a li a longa.

18 Ndele Jesus okwa tya vali: “Ouhamba waKalunga owa fa shike, nohandi u faafanifa nashike? 19 Owa fa ombuto yoshinapi oyo omulumenhu a kufa, ndele te i kunu mepya laye; oya kula noya ninga omuti, needila dokeulu oda tungila oihadi moitai yao.”

20 Okwa tya vali: “Ouhamba waKalunga ohandi u faafanifa nashike? 21 Owa fa efulika olo omukainhu a kufa, ndele te li lumbakanifa mumwe noufila tau yada oiyelekifo itatu ya kula* fiyo osheshi olumbololo alishe la fula.”

22 Eshi Jesus a li ta i kuJerusalem, okwa pita moilando noilando nosho yo momikunda nomikunda, ta hongo ovanhu. 23 Ndele omulumenhu umwe okwa tya kuye: “Omwene, hano ovanini ashike tava xupifwa?” Jesus okwa tya kuvo: 24 “Kondjeni mwa mana mo mu pite moshivelo sha finana, osheshi ohandi mu lombwele, vahapu otava ka kendabala okuya mo ndele otava ka nyengwa. 25 Ngeenge mwene weumbo okwa pate omuvelo, otamu ka kala pondje tamu konghola, tamu ti, ‘Omwene, tu yeulula.’ Opo nee ota ka tya kunye: ‘Kandi mu shii kutya onye oolyelye.’ 26 Ndele otamu ka tya, ‘Otwa lile notwa nwine moipafi yoye, nowa hongele momapandavanda etu.’ 27 Opo nee ota ka tya kunye, ‘Kandi mu shii kutya onye oolyelye. Djei po pwaame ovakolokoshi nye!’ 28 Otamu ka lilaana nokulikwesha komayoo ngeenge omwa mono Abraham, Isak, Jakob novaprofeti aveshe ve li mOuhamba waKalunga, ndele nye omwa ekelwa pondje. 29 Ndele ovanhu otava ka dja koushilo, kouninginino, kolundume nokolukadi, notava ka kala omutumba poshitaafula mOuhamba waKalunga. 30 Ndele tala, ope na vaxuuninwa ovo tava ka ninga votete, nope na votete ovo tava ka ninga vaxuuninwa.”

31 Pefimbo opo tuu opo, Ovafarisai vamwe ove uya po ndele tave mu lombwele tava ti: “Fiya po onhele ei, molwaashi Herodes okwa hala oku ku dipaa.” 32 Jesus okwa tya kuvo: “Indeni mu ka lombwele kavandje oo, tamu ti, ‘Tala, ohandi te mo eendemoni nokuvelula ovanhu nena nomongula, nohandi ka mana mefiku etitatu.’ 33 Ndele ohandi twikile okulonga oilonga yange nena, mongula nomefiku la landula ko, osheshi itashi shiiva omuprofeti a dipaelwe kondje yaJerusalem. 34 Jerusalem, Jerusalem, ovaprofeti owe va dipaa, naavo wa tuminwa owe va denga nomamanya fiyo va fya. Olungapi nda kala nda hala okwoongela ovamwoye ngaashi oxuxwa tai ongele ouxuxwena vayo koshi yomavava ayo, ashike ino shi hala? 35 Taleni, eumbo leni otamu li fiilwa ongaho. Ohandi mu lombwele, itamu ka mona nge vali fiyo osheshi tamu ka tya: ‘Na nangekwe noupuna ou te uya medina laJehova!’”

14 Pomhito vali imwe, Jesus okwa li ta li meumbo laumwe womovawiliki velongelokalunga lOvafarisai mefiku lEshabata, naavo va li mo ova li tave mu tale noku mu konenena. 2 Ndele tala, komesho yaye okwa li ku na omulumenhu ta vele oudu wodindo. 3 Opo nee Jesus okwa pula ovanongo vomhango nOvafarisai ta ti: “Oshi li ngoo pamhango okuvelula mEshabata?” 4 Ndele inava nyamukula sha. Opo nee Jesus okwa kwata omulumenhu oo, te mu velula nokwe mu lekela a ye. 5 Okwa tya kuvo: “Olyelye womunye e na omonamati ile ongobe yaye ya wila mondungu mefiku lEshabata ndele ta kala ine i kufa mo diva?” 6 Ashike inava nyamukula sha.

7 Eshi a mona nghee ovanhu ovo va shivwa tave lihoololele oipundi yokomesho, okwe va lombwela* ta ti: 8 “Ngeenge wa shivwa kuumwe koshivilohombolo, ino kala omutumba koipundi yokomesho. Otashi dulika ku ka dje umwe a fimana e ku dule, oo naye yo a shivwa. 9 Ndele oo e mu shiva te uya kwoove ta ti, ‘Oshipundi osho u li omutumba oshomulumenhu ou.’ Opo nee oto ka ya koshipundi shokonima wa fya ohoni. 10 Ngeenge wa shivwa, inda ndele to kala koipundi yokonima opo oo e ku shiva eshi te uya, ota ka tya kwoove, ‘Kaume, inda koipundi yokomesho.’ Opo nee oto ka fimanekwa moipafi yovaenda vakweni aveshe. 11 Keshe ou te linenepeke ota ka ninipikwa, nakeshe ou te lininipike ota ka nenepekwa.”

12 Jesus okwa tya yo komulumenhu oo a li e mu shiva: “Ngeenge to ningi oshivilo, ino shiva ashike ookaume koye, ovamwaxo, ovapambele nosho yo ovashiinda shoye oipuna, osheshi ngeenge wa ningi ngaho otashi dulika navo ve ke ku shive u ka lye komaumbo avo. 13 Ndele ngeenge to ningi oshivilo, shiva eehepele, oingudu, oilema novapofi, 14 noto ka kala wa hafa shaashi kave na sha shoku ku alulila. Opo nee oto ka mona ondjabi menyumuko lovayuki.”

15 Eshi umwe womovaenda e shi uda, okwa tya kuJesus: “Ou ta li* mOuhamba waKalunga ota kala a hafa.”

16 Jesus okwa tya kuye: “Opa li omulumenhu umwe oo a li ta ningi oshivilo shinene, nokwa li a shiva ovanhu vahapu. 17 Eshi efimbo loshivilo la fika, okwa tuma omupiya waye a lombwele ovo va shivwa ta ti, ‘Ileni, osheshi oinima aishe paife oya pwa okulongekidwa.’ 18 Ndele aveshe ova hovela okuninga omalipopilo. Ou wotete okwa tya kuye, ‘Onda landa epya, nonda pumbwa okuya ko ndi ke li tale; pitike nge ndi ye.’ 19 Omutivali okwa ti, ‘Onda landa eenani omulongo, nonda hala ndi ka tale kutya otadi nane ngahelipi, onghee pitike nge ndi ye.’ 20 Mukwao vali okwa ti, ‘Opo ashike nda hombola, onghee itandi dulu okuuya.’ 21 Ndele omupiya okwe uya, nokwa lombwela omwene waye oinima oyo. Opo nee mwene weumbo okwa handuka unene nokwa tya komupiya waye, ‘Inda diva komapandavanda a kula nokwaao manini oshilando, ndele to eta ko eehepele, oingudu, ovapofi noilema.’ 22 Eshi omupiya a aluka okwa ti, ‘Omwene, onda ninga ngaashi wa lombwela nge, ashike natango omu na onhele.’ 23 Opo nee omwene okwa lombwela omupiya ta ti, ‘Inda keendjila oko taku ende ovanhu ndele to va lombwele ve uye, opo meumbo lange mu kale mu yadi. 24 Onghee ohandi mu lombwele, mwaavo va shivwa kape na nande oumwe ta ka lya oitendele yange.’”

25 Ndele okwa pungulukila keengudu dinene dovanhu odo a li ta ende pamwe nado, nokwa tya kudo: 26 “Ngeenge ope na ou a hala okuninga omuhongwa wange oku na okukala e hole nge shi dulife xe, ina, omukulukadi waye, ovana vaye, ovamwainamati, ovamwainakadona, nokuli nomwenyo waye. Ngeenge hasho, ita dulu okuninga omuhongwa wange. 27 Keshe ou ita humbata omuti waye womahepeko,* ndele ta shikula nge, ita dulu okuninga omuhongwa wange. 28 Olyelye womunye ngeenge a hala okutunga oshungongulu ita kala omutumba tete ndele ta valula a tale ngeenge oku na oitungifo ya wana? 29 Ngeenge hasho, otashi dulika a tunge ekanghameno layo, ndele ta nyengwa oku i mana, naaveshe ovo ve mu mona otava hovele oku mu sheka, 30 tava ti: ‘Omulumenhu ou okwa hovela okutunga oshungongulu, ndele okwa nyengwa oku i mana.’ 31 Ngeenge ohamba tai ka lwifa ohamba ikwao, mbela kai na okukala omutumba tete nokukundafana navakwao ngeenge otai dulu ngoo okuya moita novakwaita 10 000 opo va finde ohamba oyo tai uya novakwaita 20 000? 32 Ndele ngeenge itai dulu olwoodi olo, otai tumu ko ovakalelipo vayo fimbo ohamba ikwao i li kokule opo va pange ombili. 33 Sha faafana, ngeenge ope na ou a hala okuninga omuhongwa wange, na fiye po oinima yaye aishe.

34 “Oshoshili kutya omongwa ouwa. Ndele ngeenge owa tutuka, otau shunwa eenghono kushike? 35 Ovanhu otave u ekeleshi, osheshi itau wapalele okulumbakanifwa nedu ile noushosho. Ou e na omatwi, na ude ko.”

15 Ndele ovafendelifi novalunde aveshe ova li va ongalela Jesus va pwilikine kuye. 2 Opo nee Ovafarisai novanongo vomishangwa ova ngongota tava ti: “Omulumenhu ou okaume kovalunde noha li pamwe navo.” 3 Jesus okwe va lombwela efaneko ta ti: 4 “Mbela olyelye womunye e na eedi 100, ngeenge pa kana imwe, ita fiye eedi 99 mombuwa ndele ta i a ka konge oyo ya kana fiyo ote i mono? 5 Ndele ngeenge okwe i mono, ota kala a hafa note i humbata komapepe aye. 6 Shimha e uya keumbo, ota ifana ookaume novashiinda shaye, ndele ta ti kuvo, ‘Tu hafeleni pamwe, osheshi odi yange oyo ya li ya kana onde i mona.’ 7 Ohandi mu lombwele, ngeenge omulunde umwe e lidilulula, meulu namo ohamu kala ehafo linene li dule olo lokuhafela ovayuki 99 ovo inava pumbwa okulidilulula.

8 “Ile omukainhu olyelye oo e na oimaliwa oisilveri 10, ngeenge a kanifa po shimwe, ita tema olamba ndele ta kombo meumbo laye noku shi konga lelalela fiyo ote shi mono? 9 Shimha e shi mono, ota ifana ookahewa novashiinda shaye, ndele ta ti, ‘Tu hafeleni pamwe, osheshi oshimaliwa shange osho sha li sha kana onde shi mona.’ 10 Onghee ohandi mu lombwele, ovaengeli vaKalunga navo ohava kala va hafa ngeenge omulunde umwe e lidilulula.”

11 Jesus okwa ti vali: “Opa li omulumenhu umwe e na ovanamati vavali. 12 Ou munini okwa tya kuxe, ‘Tate, pe nge oshipambuliko osho ndi na okupewa.’ Opo nee okwe va tukulila eliko laye. 13 Konima yomafiku manini, omonamati ou munini okwa ongela oinima yaye aishe ndele ta i koshilongo shokokule oko a ka hanaunina eliko laye nokukala nonghalamwenyo inai koshoka.* 14 Eshi a mana po oinima yaye aishe, oshilongo osho ashishe osha li sha hangika kondjala inene, nokwa li ta mono oixuna. 15 Opo nee okwa ya komunhu umwe womoshilongo osho, oo e mu tuma moixwa a ka life oingulu yaye. 16 Okwa li a hala okulya omahakashala oo a li haa liwa koingulu, ndele ine a pewa nande okomunhu.

17 “Eshi a didilika kutya ina katuka pandunge, okwa ti: ‘Ovanailonga vatate ove na oikulya ihapu, ofimbo ame ndi li apa handi fi ondjala. 18 Ohandi shuna kutate, ndele handi mu lombwele handi ti: “Tate, onda nyona kuKalunga* nokwoove. 19 Inandi wana vali okwiifanwa omonamati woye. Nandi kale ngaashi umwe womovanailonga voye.”’ 20 Opo nee okwa fikama ndele ta i kuxe. Fimbo ta di kokule, xe okwe mu mona nokwe mu kenukila. Okwa tondoka ndele te mu papatele* noku mu xupita. 21 Okwa tya kuxe, ‘Tate, onda nyona kuKalunga nokwoove. Inandi wana vali okwiifanwa omonamati woye.’ 22 Ndele xe okwa tya kovapiya vaye, ‘Endeleleni mu ete oshikutu shinya shiwa elela ndele tamu shi mu dike, mu dikeni yo olinga komunwe neenghaku keemhadi. 23 Eteni vali onhana inya ya ondoka, i tomeni, tu lyeni nokuhafela pamwe, 24 osheshi omonamati wange okwa li a fya, ndele okwa nyumuka; okwa li a kana, ndele okwa monika.’ Opo nee ova hovela okuhafela pamwe.

25 “Ndele omonamati oo a kula okwa hangika mepya, eshi a fika popepi neumbo, okwa uda ovanhu tava imbi notava dana. 26 Opo nee okwa ifana umwe womovapiya, ndele te mu pula kutya oshike shi li meumbo. 27 Omupiya oo okwa tya kuye, ‘Mumwanyoko okwe uya, naxo okwe mu tomena onhana ya ondoka molwaashi okwa aluka e li nawa.’ 28 Ndele omonamati oo okwa handuka noka li a hala okuya meumbo. Opo nee xe okwe uya kuye ndele te mu ladipike va ye naye meumbo. 29 Okwa tya kuxe, ‘Tala, onde ku longela omido dihapu nonda kala alushe handi dulika kwoove, ndele ku na fiku wa pele nge ngoo nande okakombwena ndi hafele pamwe nookaume kange. 30 Ndele omonamati woye oo a hanauna po eliko loye neembwada, owe mu tomena diva onhana ya ondoka eshi a aluka.’ 31 Opo nee xe okwa tya kuye: ‘Mumwange, ove owa kala alushe pwaame, noinima yange aishe oyo ngoo yoye. 32 Otwa ninga ashike oshivilo nokuhafela pamwe, osheshi mumwanyoko okwa li a fya, ndele okwa nyumuka; okwa li a kana, ndele okwa monika.’”

16 Ndele Jesus okwa lombwela yo ovahongwa vaye ta ti: “Opa li omulumenhu oshipuna, nokwa lombwelwa taku ti, ‘Elenga olo hali pashukile eumbo loye otali longifa nai oinima yoye.’ 2 Oshipuna osho osha ifana elenga ndele tashi ti, ‘Osho nda uda ovanhu tava popi kombinga yoye kashiwa. Onghee inda u ka shange omukanda u na sha nanghee wa longifa oimaliwa yange, shaashi ito kala vali omupashukili weumbo lange.’ 3 Opo nee elenga olo ole lipopila tali ti, ‘Ondi na okuninga po shike eshi omwene wange a kufa nge oshinakuwanifwa shokukala elenga? Itandi dulu oilonga yomepya nonda fya ohoni oku ka ehela. 4 Ondi shii kutya ohandi ningi po shike opo ovanhu va ka tambule nge momaumbo avo ngeenge nda kufwa oshinakuwanifwa shokukala elenga.’ 5 Opo nee okwa ifana keshe oo e na oikolo yomwene waye, ndele ta ti kwaau wotete, ‘Ou na oikolo yomwene wange i fike peni?’ 6 Okwa ti, ‘Omaadi eemono eelitela 2 200.’* Opo nee elenga ola tya kuye, ‘Kufa omukanda woye weudafanotwokumwe, kala omutumba ndele to shange po divadiva eelitela 1 100.’ 7 Okwa tya yo komutivali, ‘Ove ou na oikolo i fike peni?’ Okwa ti, ‘Oilya eendoloma* efele limwe.’ Elenga ola tya kuye, ‘Kufa omukanda woye weudafanotwokumwe, ndele to shange po eendoloma 80.’ 8 Ndele molwaashi elenga olo ola li la katuka pandunge, omwene walo okwa li e li pandula nonande kala li hali longo ouyuki. Ovana vounyuni ou ohava ungaunga pandunge navakwao ve dule ovana vouyelele.

9 “Ohandi mu lombwele yo kutya: Likongeleni nemona loulunde ookaume, opo ngeenge ola xulu po ve mu tambule meenhele daalushe. 10 Omunhu ou mudiinini moinima inini, omudiinini yo nomwaai ihapu, ndele ou ehe fi omudiinini moinima inini, ke fi yo omudiinini nomwaai ihapu. 11 Onghee hano, ngeenge ihamu ulike oudiinini weni shi na sha nemona loulunde, olyelye te ke mu lineekelela e li lashili? 12 Ndele ngeenge ihamu ulike oudiinini mokuungaunga noinima yavamwe, olyelye te ke mu pa osho mwa tuvikililwa? 13 Kape na omupiya ta dulu okulongela oovene vavali, osheshi ota tondo umwe ndele ta kala e hole mukwao, ile ta kanyatele kuumwe ndele ta dini mukwao. Itamu dulu okulongela Kalunga pamwe nemona.”

14 Ndele Ovafarisai ovo va li ve hole oimaliwa ova li tava pwilikine koinima aishe oyo Jesus a li ta popi, nova li va hovela oku mu sheka. 15 Opo nee okwa tya kuvo: “Nye ohamu limonikifa ovayuki moipafi yovanhu, ashike Kalunga oku shii osho shi li momitima deni. Osheshi osho ovanhu va tala ko sha fimana, kuKalunga oshongaho elela.

16 “Omhango nOvaprofeti ova xulila muJohannes. Ndele okudja opo, onghundana iwa yOuhamba waKalunga otai udifwa, novanhu vomaludi aeshe otava ningi eenghendabala va ye mOuhamba oo. 17 Eulu nedu otai dulu okuxula po, ndele mOmhango itamu di nande okapambu kamwe kondada inaka wanifwa.

18 “Keshe ou ta teya ohombo nomukulukadi waye ndele ta hombola umwe ota haele, naau ta hombola omukainhu oo a teya ohombo nomushamane waye, ota haele.

19 “Opa li omulumenhu umwe oshipuna oo a li ha djala oikutu yoluvala lopeepela noyoliina nokwa kala ta hafele onghalamwenyo youdjeko. 20 Ndele omweeheli umwe wedina Lasarus okwa li ha tulwa poshivelo shoshipuna osho, nokwa li e na oipute olutu laye alishe. 21 Okwa li ha kala a hala okulya oundjaumukile ovo tava u koshitaafula shoshipuna osho. Nokuli neembwa oda li hadi uya di lafe oipute yaye. 22 Mokweendela ko kwefimbo, omweeheli okwa ka fya, ndele ta twalwa kovaengeli mekolo laAbraham.

“Oshipuna nasho osha ka fya, ndele tashi pakwa. 23 Ndele eshi sha li mOmbila* tashi yahama, osha yelula omesho asho, nosha mona Abraham e li kokule naLasarus e li mekolo laye. 24 Onghee oshipuna osha ingida sha ti, ‘Tate Abraham, file nge onghenda, nou tume Lasarus a yaveke omunwe waye momeva a talaleke nge kelaka, osheshi ohandi luluma unene momundilo ou wa hanya.’ 25 Opo nee Abraham okwa ti, ‘Omumwange, dimbuluka kutya ove owa li u yadi oinima iwa monghalamwenyo yoye, ashike Lasarus okwa kala ta mono oixuna. Ndele paife oku li apa ta hekelekwa, ofimbo ove u li mouyahame. 26 Kakele kaasho, ope na elambo lile pokati ketu nanye, opo ovo ve li kufye va hala okuuya kunye vaha dule oku shi ninga, naavo ve li kunye vaha dule okuuya kufye.’ 27 Oshipuna osha ti, ‘Ngeenge osho shi li ngaho, ohandi ku indile tate, u mu tume keumbo latate, 28 osheshi ondi na ovamwamememati vatano, e ke va londwele, opo vehe uye yo monhele ei youyahame.’ 29 Ndele Abraham okwa ti, ‘Ove na omishangwa daMoses nodOvaprofeti; odo nava pwilikine kudo.’ 30 Opo nee oshipuna osha ti, ‘Ahowe tate Abraham, ngeenge okwa i umwe a nyumuka koufi, otave ke lidilulula.’ 31 Abraham okwa tya kuye, ‘Ngeenge itava pwilikine komishangwa daMoses nodOvaprofeti, itava ka itavelifwa yo komunhu ou a nyumuka koufi.’”

17 Jesus okwa tya kovahongwa vaye: “Otapa ka kala alushe omahongaulo,* ndele woo omunhu ou te a etifa! 2 Oshiwa komunhu a tya ngaho a mangelwe emanya loshini mofingo ndele ta ekelwa mefuta opo aha hongaule nande oumwe womwaavo vanini. 3 Lipashukileni nye vene. Ngeenge omumwaxo okwa nyono kwoove, mu pukulula, ndele ngeenge okwe livele ombedi, mu dimina po. 4 Nonande okwa nyono kwoove lwoikando iheyali mefiku, ndele te uya kwoove lwoikando iheyali, ta ti, ‘Dimine nge po,’ mu dimina po.”

5 Ndele ovayapostoli ova tya kOmwene: “Tu wedela eitavelo.” 6 Omwene okwa ti: “Ngeno okwa li mu na eitavelo li fike pombuto yoshinapi, ngeno otamu dulu okulombwela omuti* ou, ‘Liduda mo ndele to litwike mefuta!’ Opo nee otau dulika kunye.

7 “Olyelye womunye e na omupiya ta pulula ile ta lifa ndele eshi e uya meumbo ta ti kuye, ‘Ila oku diva ndele to kala omutumba poshitaafula u lye’? 8 Ponhele yaasho, ota ka tya kuye, ‘Djala okatetahema nokulongekidila nge oikulya, ndele to yakula nge fiyo nda mana okulya nokunwa, opo nee naave to dulu okulya nokunwa.’ 9 Onghee ita ka pandula omupiya oo, molwaashi okwa wanifa po ashike oilonga yaye. 10 Sha faafana, ngeenge mwa wanifa po ashishe osho mwa lombwelwa, tyeni: ‘Fye ovapiya vongaho. Otwa longa ashike osho twa li tu na okulonga.’”

11 Eshi Jesus a li ta i kuJerusalem, okwa enda peengaba daSamaria naGalilea. 12 Ndele eshi e uya momukunda wonhumba, okwa shakenekwa kovalumenhu omulongo ve na oudu woshilundu, ashike ova li kokule naye. 13 Opo nee ova ingida mokule tava ti: “Jesus, Omuhongi, tu fila onghenda!” 14 Eshi e va mona, okwa tya kuvo: “Indeni mu ke liulike kovapristeri.” Ndele ova veluka fimbo ve li mondjila. 15 Umwe womuvo eshi a mona kutya okwa veluka, okwa aluka ndele ta tange Kalunga newi lopombada. 16 Okwe linyongamena peemhadi daJesus, ndele te mu pandula. Omulumenhu oo okwa li Omusamaria. 17 Jesus okwa ti: “Ovo va velulwa kave li omulongo hano? Vakwao omuwoi ove li peni? 18 Kape na vali oo a aluka a tange Kalunga kakele komulumenhu ou womoiwana imwe.” 19 Jesus okwa tya kuye: “Fikama ndele to i; eitavelo loye ole ku velula.”

20 Eshi Ovafarisai ve mu pula kutya Ouhamba waKalunga otau uya naini, okwe va nyamukula a ti: “Itau ka didilikwa mo kwaaveshe eshi tau uya, 21 novanhu itava ka tya, ‘Tala oye ou!’ Ile, ‘Oye winya!’ Osheshi taleni, Ouhamba waKalunga ou li mokati keni.”

22 Ndele Jesus okwa tya kovahongwa: “Efimbo otali ke uya eshi tamu ka kala mwa halelela okumona limwe lomomafiku Omona womunhu, ashike itamu ke li mona. 23 Opo nee ovanhu otava ka tya kunye, ‘Tala kwinya!’ Ile, ‘Tala oku!’ Inamu va itavela ile mu va shikule. 24 Ngaashi oluvadi hali shela okudja kombinga imwe yeulu fiyo okuikwao, osho tashi ka kala yo mefiku lOmona womunhu. 25 Ndele tete ota ka pita momahepeko mahapu noita ka tambulwa ko kepupi eli. 26 Ngaashi ashike sha li pefimbo laNoa, osho tashi ka kala yo pomafiku Omona womunhu. 27 Osheshi pefimbo olo, ovanhu ova li hava li nokunwa, ovalumenhu tava hombola, novakainhu tava hombolwa, fiyo efiku olo Noa a ya monguluwato, ndele Eyelu ole uya nole va hanauna po aveshe. 28 Sha faafana, ngaashi ashike sha li pefimbo laLot: ovanhu ova li hava li, hava nu, hava lande nokulandifa, hava twike oimeno nohava tungu. 29 Ndele eshi Lot a dja muSodom, omundilo nosulfuri oya loka ya dja meulu ndele tai va hanauna po aveshe. 30 Osho tashi ka kala ngaho mefiku olo Omona womunhu te ke liholola.

31 “Mefiku olo, ou ta hangika kombada yeumbo ndele oinima yaye oi li meumbo ina londoloka ko e ke i pitule mo, naau ta hangika mepya ina shuna meumbo a ka pitule mo oinima yaye. 32 Dimbulukeni omukulukadi waLot. 33 Keshe ou a hala okuxupifa omwenyo waye ote u kanifa, nakeshe ou ta kanifa omwenyo waye ote u xupifa. 34 Ndele ohandi mu lombwele, moufiku oo ovanhu vavali va nangala pombete imwe; umwe ota kufwa po, namukwao ota fiwa po. 35 Otapa ka kala ovakainhu vavali tava tu poshini; umwe ota kufwa po, ndele umwe ota fiwa po.” 36 ⁠—— 37 Opo nee ovahongwa ova tya kuye: “Omwene, osho otashi ka ningilwa peni?” Okwa tya kuvo: “Oko ku na oshimhu, oko yo taku ka ongala eenhwa.”

18 Ndele Jesus okwa lombwela ovahongwa vaye efaneko olo tali ulike kutya ova pumbwa okukala hava ilikana nopehe na okusholola, 2 a ti: “Moshilando shimwe omwa li omutokoli iha tila Kalunga nokwa dina ovanhu. 3 Moshilando osho omwa li yo omufiyekadi umwe oo a kala ha i komutokoli oo, ta ti, ‘Tokola pauyuki pokati ketu nomutamaneki wange.’ 4 Omutokoli oo okwa kala ina hala oule wefimbo, ndele lwanima okwe lipopila ta ti, ‘Nonande ihandi tila Kalunga nokandi na ko nasha novanhu, 5 omufiyekadi ou molwaashi ota piyaaneke nge unene, ondi na oku mu tokolela pauyuki opo ehe uye ko vali kwaame a kenyaneke nge.’” 6 Opo nee Omwene okwa ti: “Omwa uda ngoo osho omutokoli a popya, nonande ke fi omuyuki? 7 Mbela Kalunga ita ka yukifila oinima ovahoololwa vaye ovo have mu ifana omutenya noufiku, noku ve lididimikila? 8 Ohandi mu lombwele, ote ke va yukifila diva oinima. Ndele mbela eshi Omona womunhu te ke uya, ota ka hanga ko ngoo ovanhu ve na eitavelo la tya ngaho kombada yedu?”

9 Okwa lombwela vali vamwe, ovo ve lishii ouyuki nova dina vakwao, efaneko a ti: 10 “Opa li ovalumenhu vavali va ya motembeli va ka ilikana, umwe Omufarisai namukwao omufendelifi. 11 Omufarisai okwa fikama ndele ta hovele okwiilikana momutima waye ta ti: ‘Kalunga, ohandi ku pandula eshi inandi fa ovanhu vamwe ngaashi ovanyeki, ovahenouyuki novanyoni vohombo, ile nokuli ngaashi omufendelifi ou. 12 Ohandi lidilike oikulya luvali moshivike, nohandi yandje oshitimulongo shoinima yange aishe.’ 13 Ndele omufendelifi oo a li kokule kanini, ka li a hala nokuli okuyelula oshipala shaye, ashike okwa kala te lidenge monhulo ta ti, ‘Kalunga, file nge onghenda osheshi ame omulunde.’ 14 Ohandi mu lombwele, omulumenhu oo okwa shuna keumbo lavo omuyuki e dule Omufarisai. Osheshi keshe ou te linenepeke ota ka ninipikwa, nakeshe ou te lininipike ota ka nenepekwa.”

15 Ovanhu ova li yo va eta ouhanana kuJesus e va kume, ndele eshi ovahongwa ve shi mona ova hovela oku va hanyena. 16 Ashike Jesus okwa lombwela ovanhu va ete ouhanana kuye, ndele ta ti: “Efeni ounona ve uye kwaame, inamu va kelela ko, osheshi Ouhamba waKalunga owaava ve li ngaashi vo. 17 Oshili ohandi mu lombwele, keshe ou ita tambula Ouhamba waKalunga ngaashi okaana, ita ka ya mo nandenande muo.”

18 Ndele omupangeli umwe okwe mu pula ta ti: “Omuhongi muwa, ondi na okulonga shike opo ndi ka mone omwenyo waalushe?” 19 Jesus okwa tya kuye: “Omolwashike to ifana nge omuhongi muwa? Kape na omunhu muwa, oKalunga aeke. 20 Oipango ei ou i shii: ‘Ino nyona ohombo, ino dipaa, ino vaka, ino popya oipupulu nosho yo fimaneka xo nanyoko.’” 21 Okwa tya kuye: “Aishe oyo onda kala handi dulika kuyo okudja kounona.” 22 Eshi Jesus a uda ngaho, okwa tya kuye, “Ope na vali oshinima shimwe osho wa pumbwa okuninga: Inda u ka landife po oinima yoye aishe ndele oimaliwa to i yandje keehepele, opo u kale u na emona meulu, ndele to uya u ninge omushikuli wange.” 23 Eshi e shi uda, okwa li a nyika oluhodi neenghono, molwaashi okwa li e na eliko lihapu.

24 Jesus okwe mu tala ndele ta ti: “Kashidjuu tuu kwaavo ve na oimaliwa ihapu okuya mOuhamba waKalunga! 25 Oshipu kongamelo okupita meyulu longwiya shi dulife okuya kwoshipuna mOuhamba waKalunga.” 26 Ovo ve shi uda ova ti: “Olyelye hano ta dulu okuxupifwa?” 27 Jesus okwa ti: “Oinima oyo ovanhu tava diladila kutya itai shiiva, kuKalunga otai shiiva.” 28 Opo nee Petrus okwa ti: “Tala, otwa fiya po oinima yetu, ndele hatu ku shikula.” 29 Jesus okwa tya kuvo: “Oshili ohandi mu lombwele, keshe oo a fiya po eumbo, omukulukadi, ovamwainamati, ovadali ile ovana omolwOuhamba waKalunga, 30 ota mono shihapu paife, nomounyuni tau uya,* omwenyo waalushe.”

31 Ndele okwa ifana po ovayapostoli 12 nokwa tya kuvo: “Taleni, ohatu yeni kuJerusalem, noinima aishe oyo ya shangwa kovaprofeti kombinga yOmona womunhu otai ka wanifwa. 32 Pashihopaenenwa, ota ka yandjwa momake ovanhu vomoiwana imwe i lili, opo nee ota ka shekwa, ta ka tukwa nokufiilwa omate. 33 Ndele konima eshi ve mu denga, otave ke mu dipaa, nomefiku etitatu ota ka nyumunwa.” 34 Ashike ovayapostoli kava li ve udite ko oinima oyo molwaashi ova li va holekwa eityo layo.

35 Eshi Jesus a li pokufika muJeriko, okwa hanga omulumenhu umwe omupofi e li omutumba pomunghulo wondjila ta ehela. 36 Ndele eshi a uda omaweelelo ongudu yovanhu tai ende po, okwa pula kutya omaweelelo oashike. 37 Ove mu lombwela va ti: “Jesus Omunasaret oye ta ende po.” 38 Opo nee okwa ingida mokule ta ti: “Jesus, Omona waDavid, file nge onghenda!” 39 Ndele ovo va li komesho ova hovela oku mu hanyena, noku mu lombwela a mwene, ashike okwa twikila okwiingida mokule ta ti: “Omona waDavid, file nge onghenda!” 40 Opo nee Jesus okwa kanghama, ndele ta yandje elombwelo opo omulumenhu oo a etwe kuye. Eshi e uya popepi, Jesus okwe mu pula ta ti: 41 “Owa hala ndi ku ningile shike?” Okwa ti: “Omwene, kwafele nge u twikulule nge.” 42 Jesus okwa tya kuye: “Twikuluka; eitavelo loye ole ku velula.” 43 Opo nee okwa twikuluka diva, nokwa hovela okushikula Jesus, ta tange Kalunga. Novanhu aveshe eshi ve shi mona ova hovela okutanga Kalunga.

19 Jesus okwa ya muJeriko nokwa pitilila mo. 2 Ndele muJeriko omwa li omulumenhu wedina Sakeus, oo a li umwe womovakulunhu vovafendelifi nokwa li oshipuna. 3 Sakeus okwa li ta kendabala okumona Jesus, ashike ka li ta dulu molwaashi okwa li muxupi nokwa li a viikililwa kongudu yovanhu. 4 Onghee okwa tondoka a ye komesho ndele ta londo komukwiyu opo a dule oku mu mona, osheshi Jesus opo a li ta pitile. 5 Eshi Jesus a fika pomuti oo, okwa tala pombada ndele ta ti kuye: “Sakeus, londoloka diva, ohandi i keumbo loye nena.” 6 Opo nee okwa londoloka ko meendelelo ndele te mu tambula meumbo laye nehafo. 7 Eshi ovanhu ve shi mona, aveshe ova hovela okungongota tava ti: “Okwa ka talela po meumbo lomulunde.” 8 Opo nee Sakeus okwa fikama ndele ta ti: “Omwene, tala, etata loinima yange ohandi li yandje keehepele, noinima aishe ei nda nyokoma ovanhu* ohandi i va shunifile lwomapa ane.” 9 Ndele Jesus okwa tya kuye: “Nena eli Kalunga okwa xupifa omulumenhu ou novaneumbo laye, molwaashi naye omona waAbraham. 10 Osheshi Omona womunhu okwe uya okukonga nokuxupifa ovo va li va kana.”

11 Ofimbo va li tava pwilikine koinima oyo a li ta popi, okwe va lombwela efaneko, osheshi okwa li popepi naJerusalem, novanhu ova li tava diladila kutya Ouhamba waKalunga otau uya pefimbo opo. 12 Okwa ti: “Opa li omulumenhu a dalwa kohamba, nokwa li a ya koshilongo shokokule opo a ka ninge ohamba ndele ta aluka ko. 13 Okwa ifana ovapiya vaye omulongo nokwe va pa oimaliwa oisilveri omulongo,* ndele ta ti kuvo, ‘Ka landakanifeni oimaliwa ei fiyo ohandi aluka.’ 14 Ndele ovanhu vomoshilongo shavo ova li ve mu tonde, nova li va tuma ovatumwa ve ke mu lombwele tava ti, ‘Fye inatu hala omulumenhu ou a ninge ohamba yetu.’

15 “Eshi a aluka a ninga ohamba, okwa ifana ovapiya vaye ovo a li a pa oimaliwa* opo a tale kutya ova likola shi fike peni. 16 Omupiya wotete okwe uya ndele ta ti, ‘Omwene, moshimaliwa shoye shoshisilveri onda likola mo oisilveri omulongo.’ 17 Okwa tya kuye, ‘Owa ninga nawa omupiya ove muwa. Molwaashi owa ulika oudiinini moinima inininini, oto ningi omupangeli woilando omulongo.’ 18 Omutivali okwe uya ndele ta ti, ‘Omwene, moshimaliwa shoye shoshisilveri onda likola mo oisilveri itano.’ 19 Naao okwe mu lombwela ta ti, ‘Naave pangela oilando itano.’ 20 Umwe vali okwe uya ndele ta ti, ‘Omwene, oshimaliwa shoye osho ngaha, onda kala nde shi tonyena moshilapi nonde shi holeka. 21 Onda li nde ku tila molwaashi ove omukwanyanya; oho kufa oinima opo ino tuvikila noho teya apa ino kuna.’ 22 Okwa tya kuye, ‘Ohandi ku tokola omolweendjovo doye omupiya ove mwii. Mbela ino kala u shi shii kutya ame omukwanyanya, handi kufa oinima opo inandi tuvikila nohandi teya apa inandi kuna? 23 Omolwashike oshimaliwa shange* ino shi yandja kovalandakanifi opo eshi handi aluka ndi hange kwa wedwa oishoshela?’

24 “Opo nee okwa tya kwaavo va li po, ‘Mu kufeni oshimaliwa shoshisilveri ndele tamu shi yandje kwaao e na oisilveri omulongo.’ 25 Ndele ova tya kuye, ‘Omwene, winya oku na nale oisilveri omulongo.’ 26 Okwa tya kuvo: ‘Ohandi mu lombwele, keshe ou e na, ota pewa shihapu, ndele ou ehe na sha, nokuli naasho e na ote shi kufwa. 27 Eteni nokuli ovatondi vange ovo inava hala ndi ninge ohamba yavo ndele tamu va dipaa moipafi yange.’”

28 Eshi Jesus a mana okupopya eendjovo odo, okwa twikila nolweendo laye a finda kuJerusalem. 29 Ndele eshi a ehena popepi naBetfage naBetania pomhunda hai ifanwa Omhunda yEemono, okwa tuma ovahongwa vaye vavali, 30 ta ti: “Indeni komukunda oo u li komesho yeni. Shimha mwa i mo, otamu ka hanga mo okandongi ka mangwa, oko inaka londwa nande onale komunhu. Ka mangululeni ndele tamu ka eta kwaame. 31 Ndele ngeenge umwe okwe mu pula kutya, ‘Otamu ka mangululile shike?’ tyeni, ‘Omwene okwe ka pumbwa.’” 32 Ovo va tumwa ova ya nove ka hanga ngaashi ashike va lombwelwa. 33 Ndele ofimbo va li tave ka mangulula, oovene vako ova tya kuvo: “Omolwashike tamu mangululile okandongi?” 34 Ova ti: “Omwene okwe ka pumbwa.” 35 Opo nee ove ka twala kuJesus, nova yala ko oikutu yavo yokombada, ndele Jesus ta kala ko omutumba.

36 Eshi Jesus a londa kokandongi, ovanhu ova enda tava yale oikutu yavo yokombada mondjila. 37 Ndele diva eshi va fika popepi nondjila oyo ya enda pedu lOmhunda yEemono, ongudu aishe yovahongwa oya li ya hafa nokutanga Kalunga newi lopombada omolwoikumwifilonga oyo ya mona, 38 tai ti: “Na nangekwe noupuna ou te uya e li Ohamba medina laJehova! Meulu namu kale ombili, nefimano kuKalunga omukombadambada!” 39 Ndele Ovafarisai vamwe va dja mongudu oyo ova tya kuJesus: “Omuhongi, hanyena ovahongwa voye.” 40 Okwe va nyamukula a ti: “Ohandi mu lombwele, ngeenge ova mwena, omamanya otaa ka ingida pombada.”

41 Eshi a ehena popepi naJerusalem, okwe shi tala nokwe shi nyikila oluhodi, 42 ndele ta ti: “Owa li u na okukala wa uda ko nale oinima oyo tai eta ombili, ashike paife owe i holekwa. 43 Osheshi efimbo otali uya eshi ovatondi voye tave ke ku dingilila noiti ya honga notave ke ku fininika okudilila keembinga adishe. 44 Oto ka hanaunwa po pamwe novana voye, nomwoove itamu ka fyaala emanya la londa kulikwao, osheshi Kalunga okwa li e uya oku ku tokola, ndele ino shi didilika.”

45 Opo nee Jesus okwa ya motembeli, ndele ta taataa mo ovo va li tava landifile mo, 46 ta ti: “Opa shangwa, ‘Eumbo lange otali ka ifanwa eumbo lokwiilikanena,’ ndele nye omwe li ninga ekololo lovanyeki.”

47 Ndele Jesus okwa twikila okuhonga efiku nefiku motembeli. Ashike ovapristeri ovakulunhu, ovanongo vomishangwa novawiliki voshiwana ova li tava kongo omhito ve mu dipae; 48 ndele inava dula oku shi ninga molwaashi ovanhu ova kala tave mu shikula efimbo alishe nokupwilikina kuye.

20 Efiku limwe fimbo Jesus a li ta hongo ovanhu motembeli nokuudifa onghundana iwa, ovapristeri ovakulunhu, ovanongo vomishangwa novakulunhu voshiwana ove uya kuye, 2 ndele tava ti: “Tu lombwela, okeenghonopangelo dalyelye to longo oinima ei? Nolyelye e ku pa eenghonopangelo odo?” 3 Okwe va nyamukula ta ti: “Naame onda hala oku mu pula, lombwelei nge: 4 Eninginifo laJohannes ola dja meulu ile omovanhu?” 5 Opo nee ova kundafana tava ti: “Ngeenge otwa ti, ‘Omeulu,’ ota ka tya, ‘Omolwashike hano inamu mu itavela?’ 6 Ndele ngeenge otwa ti, ‘Omovanhu,’ ovanhu otave ke tu dipaa nomamanya, molwaashi aveshe ova li va itavela kutya Johannes okwa li omuprofeti.” 7 Onghee ova nyamukula kutya kave shi shii kutya ola dja peni. 8 Jesus okwa tya kuvo: “Naame itandi mu lombwele kutya okeenghonopangelo dalyelye handi longo oinima ei.”

9 Ndele okwa hovela okulombwela ovanhu aveshe efaneko, ta ti: “Opa li omulumenhu umwe oo a li e na oshikunino shomandjebele nokwa kongela mo ovanailonga, ndele ta i kondje yoshilongo oule wefimbo lonhumba. 10 Eshi omandjebele a pya, okwa tuma omupiya waye umwe kovanailonga vomoshikunino opo e ke mu talele ko oiimati. Ndele ovanailonga vomoshikunino ove mu denga nove mu shunifa eenyala dongaho. 11 Opo nee okwa tuma ko vali omupiya mukwao. Ndele naye ove mu denga, ve mu fifa ohoni* nove mu shunifa eenyala dongaho. 12 Natango okwa tuma ko vali omutitatu, ndele naye ove mu denga nove mu shunifa. 13 Opo nee mwene woshikunino okwa ti: ‘Ohandi ningi ngahelipi? Ohandi tumu ko omonamati wange omuholike. Otashi dulika ve ke mu fimaneke.’ 14 Eshi ovanailonga vomoshikunino ve mu mona, ova kundafana tava ti, ‘Ou oye omufyuululi. Natu mu dipaeni opo efyuululo li ninge letu.’ 15 Onghee ove mu kokolola mo moshikunino noku mu dipaa. Mbela mwene woshikunino ote ke va ningila shike? 16 Ote ke va dipaa, ndele moshikunino ta kongele mo ovanailonga vamwe.”

Eshi ve shi uda, ova ti: “Osho kashi na efiku shi ningwe!” 17 Opo nee okwe va tala ndele ta ti: “Hano omushangwa ou owa hala kutya shike, ou tau ti: ‘Emanya olo ovatungi va ekelashi ola ninga emanya la fimanenena’?* 18 Keshe ou ta wile kemanya eli ota ka teyauka. Nakeshe ou tali wile, otali mu nyanyaula.”

19 Ndele ovanongo vomishangwa novapristeri ovakulunhu ova li va hala oku mu kwata po molwaashi ova li va didilika kutya ovo tava popiwa mefaneko olo, ashike ova li va tila ovanhu. 20 Konima eshi ve mu konenena, ova futa ovalumenhu vonhumba meholeko ve liningife va fa ovayuki, opo ve mu yule meendjovo nova dule oku mu twala kovapangeli. 21 Opo nee ove mu pula tava ti: “Omuhongi, otu shi shii kutya oho popi noho hongo paushili, noiho tale eholokepo lokombada lovanhu, ndele oho hongo oshili kombinga yaKalunga. 22 Osha yuka tuu* kufye okufuta oifendela kOmukesari?” 23 Eshi Jesus a didilika oihelele yavo okwa tya kuvo: 24 “Ulikilei nge odenari. Efano neshangelo eli olalyelye?” Ova ti: “OlOmukesari.” 25 Opo nee okwa tya kuvo: “Hano eshi shOmukesari shi peni Omukesari, naasho shaKalunga shi peni Kalunga.” 26 Kava li va dula oku mu yula meendjovo moipafi yovanhu, ndele molwaashi ova li va kuminwa enyamukulo laye, ova kala va mwena.

27 Opo nee vamwe vomOvasadukai ovo hava ti kutya kaku na enyumuko, ove uya kuye, ndele tava ti: 28 “Omuhongi, Moses okwa ti, ‘Ngeenge omulumenhu okwa filwa omumwaina omulumenhu a fiya po omukulukadi, ndele ina fiya po oludalo, mumwaina na kufe po omukulukadi oo, ndele ta dalele mumwaina ounona.’ 29 Ndele opa li ovamwainafana ovalumenhu vaheyali. Wotete okwa li a hombola, ndele ta fi ehe na oludalo. 30 Oshinima sha faafana osha ningilwa yo omutivali 31 nomutitatu okwe mu hombola yo. Ndele aveshe vaheyali ova ningilwa oshinima sha faafana; aveshe ova fya vehe na oludalo. 32 Xuuninwa, omukainhu naye okwa ka fya. 33 Ngeenge va nyumunwa, omukulukadi oo ota ka ninga walyelye? Osheshi okwa li omukulukadi wavo aveshe vaheyali.”

34 Jesus okwa tya kuvo: “Ovana vounyuni ou ohava hombola nohava hombolwa, 35 ndele ovo va wana okunyumuka nokuya mounyuni tau uya itava ka hombola noitava ka hombolwa. 36 Itava ka fya vali, ndele otava ka kala ngaashi ovaengeli. Molwaashi otava ka nyumunwa, otava ka kala ovana vaKalunga. 37 Ndele Moses naye okwa holola mehokololo li na sha noshixwa sheno kutya ovafi otava ka nyumuka, eshi a popya kutya Jehova ‘oKalunga kaAbraham naKalunga kaIsak naKalunga kaJakob.’ 38 Oye Kalunga kovanamwenyo, ndele ke fi Kalunga kovafi, molwaashi okwe va tala ko ve na omwenyo.” 39 Opo nee vamwe vomovanongo vomishangwa ova tya kuye: “Omuhongi, owa popya mondjila.” 40 Osheshi kava li vali tava dulu oku mu pula sha.

41 Opo nee okwe va pula ta ti: “Omolwashike hano ovanhu tava ti kutya Kristus omona waDavid? 42 Osheshi David okwa popya membo lOmapsalme a ti, ‘Jehova okwa lombwela Omwene wange ta ti: “Kala omutumba kolulyo lange 43 fiyo handi ningi ovatondi voye oshilyatelo sheemhadi doye.”’ 44 Hano ngeenge David okwe mu ifana Omwene, ongahelipi e li omona waye?”

45 Fimbo ovanhu aveshe va li tava pwilikine, Jesus okwa tya kovahongwa vaye: 46 “Lungameni ovanongo vomishangwa ovo ve hole okweendaenda va djala oikutu ile nove hole okupopifwa monghedi ye likalekelwa peenhele domalandifilo. Ove hole yo okukala omutumba koipundi yokomesho* meeshinagoga nopeenhele odo da nuninwa ovaenda ovo va fimana poivilo. 47 Ohava kufa ovafiyekadi oinima yavo,* nokwiilikana omaindilo malemale opo ve limonikife. Ovanhu va tya ngaho otava ka mona ehandukilo la kwata moiti.”

21 Ndele Jesus okwa li ta tale eshi oipuna tai tula oimaliwa moshikefa shomayambidido. 2 Opo nee okwa mona omufiyekadi ohepele ta tula mo oumaliwa vavali vongushu inininini,* 3 ndele ta ti: “Oshili ohandi mu lombwele, omufiyekadi oo ohepele okwa tula mo shihapu e va dule aveshe. 4 Osheshi aveshe ovo ova tula mo oixupe yeliko lavo, ndele omufiyekadi oo, nonande okwa li ohepele, okwa tula mo ashishe osho a li e na.”

5 Lwanima, eshi ovanhu vamwe va li tava popi kombinga yanghee otembeli ya wapekwa nomamanya mawa noneeshali odo da yandjelwa Kalunga, 6 okwa tya kuvo: “Efimbo otali uya eshi oinima aishe oyo mu wete tai ka hanaunwa po, nokape na nande emanya tali ka fiwa la londa kulikwao inali ngumaunwa po.” 7 Opo nee ove mu pula tava ti: “Omuhongi, oinima oyo otai ka ningwa naini, noshike tashi ka kala edidiliko olo tali ulike kutya oi li pokuningwa?” 8 Jesus okwe va nyamukula, ta ti: “Taleni, inamu pukifwa, osheshi vahapu otave ke uya medina lange, tava ti, ‘Aame Kristus,’ nosho yo kutya ‘Efimbo ola fika.’ Ndele inamu va landula. 9 Onghee hano, ngeenge omwa udu eenghundana di na sha noita nomapiyaano, inamu mbadapala. Osheshi oinima oyo oi na okuningwa tete, ashike exulilo inali fika natango.”

10 Okwa ti yo kuvo: “Oiwana otai ka lwifafana, nomauhamba otaa ka kondjifafana. 11 Otaku ka kala omakakamo edu manene, ondjala nomikifi dolutapo keembinga neembinga nosho yo omamoniko matilifi nomadidiliko manene keulu.

12 “Ndele fimbo oinima aishe oyo inai ningwa, ovanhu otave ke mu kwata po noku mu hepeka, notave ke mu yandja meeshinagoga noku mu tula meedolongo. Otamu ka twalwa yo komesho yeehamba noyovapangeli omolwedina lange. 13 Osho otashi ke mu pa omhito yokuyandja oundombwedi. 14 Onghee hano, kaleni mwa tokola toko momitima deni muhe lihonge momutwe kutya otamu ke lipopila ngahelipi, 15 osheshi ohandi ke mu pa eendjovo nounongo opo ovapataneki veni aveshe vaha dule oku mu twifa eemhata ile oku mu hokololifa. 16 Kakele kaasho, otamu ka kengelelwa* nokuli nokovadali veni, kovamwanyoko, kovapambele nokookaume keni, notava ka dipaa vamwe vomunye, 17 notamu ka tondwa kovanhu aveshe omolwedina lange. 18 Ndele kape na nokuli nande oxwiki imwe yokomitwe deni tai ka kana. 19 Ngeenge omwe lididimike, otamu ke lixupifila eemwenyo deni.

20 “Ndele ngeenge omwa mono Jerusalem sha kondekwa ketangakwaita, opo nee shiiveni kutya ehanauno lasho ola ehena popepi. 21 Opo nee ovo ve li muJudea nava ye onhapo keemhunda, naavo ve li mokati kasho nava dje mo nosho yo ovo ve li komikunda inava ya mo, 22 osheshi efimbo lasho lokuhandukilwa* ola fika, opo oinima aishe oyo ya shangwa i wanifwe. 23 Woo ovo tava ka hangika ovafimba novamwali pefimbo olo! Osheshi moshilando otamu ka kala oudjuu munene, novanhu otava ka hangwa kehandu. 24 Ovanhu otava ka fya keongamukonda, navamwe otava ka twalwa moukwatwa moiwana aishe; na Jerusalem otashi ka lyataulwa koiwana* fiyo eufwafimbo loiwana* la wanifwa.

25 “Natango, otaku ka kala omadidiliko ketango, komwedi nokeenyofi, noiwana kombada yedu otai ka kala ya tila eshi ihe shii kutya nai ninge shike omolwepopomo lefuta nosho yo ehandu lalo. 26 Ovanhu otava ka haluka* omolwoumbada nomolwokuteelela oinima oyo tai ka hanga ovanhu kombada yedu, molwaashi oikwaulu otai ka kakama. 27 Opo nee otava ka mona Omona womunhu te uya moilemo e na eenghono noshinge shinene. 28 Ndele shimha oinima oyo ya hovele okuningwa, kaleni ofika mwa yukilila nokuyelula omitwe deni pombada, molwaashi exupifo leni ola ehena popepi.”

29 Opo nee okwe va lombwela efaneko ta ti: “Taleni komukwiyu nosho yo komiti dikwao adishe. 30 Ngeenge tadi twiyuka omafo, ohamu kala mu shi liwetele nomu shii kutya okwenye oku li popepi. 31 Sha faafana, nanye ngeenge omwa mono oinima oyo tai ningwa, shiiveni kutya Ouhamba waKalunga ou li popepi. 32 Oshili ohandi mu lombwele kutya epupi eli itali xulu po nandenande fiyo oinima aishe oyo ya ningwa. 33 Eulu nedu otali ka xula po, ashike eendjovo dange kadi na nande efiku di xule po.

34 “Ndele lipashukileni opo muha pwile mokulya nokunwa sha pitilila nomuha wililwe po koisho yonghalamwenyo, opo efiku olo lihe mu hange ombadilila 35 ngaashi omwiyo hau kwata oinamwenyo, osheshi otali ka hanga ovanhu aveshe kombada yedu alishe. 36 Onghee hano, kaleni oupafi nokwiilikana mwa mana mo efimbo keshe opo mu dule oku ka xupa eshi oinima aishe oyo tai ka ningwa, nomu ka kale ofika koshipala shOmona womunhu.”

37 Ndele Jesus okwa kala ha hongo ovanhu motembeli omutenya, ashike konguloshi okwa li ha ka nangala komukunda u li kOmhunda yEemono. 38 Novanhu aveshe ova kala have uya ongula inene motembeli opo va pwilikine kuye.

22 Ndele oshivilo shomingome inadi ya efulika osho hashi ifanwa Opaasa osha li pokufika. 2 Opo nee ovapristeri ovakulunhu novanongo vomishangwa ova li tava kongo omhito tai wapalele opo va dipae Jesus, osheshi ova li va tila ovanhu. 3 Ndele Satana okwa nwefa mo Judas oo ha ifanwa Iskariot, umwe womwaavo omulongo navavali, 4 na Judas okwa ya a ka popye novapristeri ovakulunhu novakulunhu votembeli nghee e na okuyandja Jesus momake avo.* 5 Osho osha li she va hafifa nova li va udafana ve mu pe oimaliwa yoisilveri. 6 Judas okwa li e shi dimina nokwa li a hovela okukonga omhito tai wapalele opo e mu yandje momake avo ofimbo pehe na ovanhu vahapu.

7 Ndele eshi efiku lomingome inadi ya efulika la fika, omo mwa li hamu yambwa eyambo lOpaasa, 8 Jesus okwa tuma Petrus naJohannes ta ti: “Indeni mu ka longekide oshivilo shOpaasa tu uye tu lyeni.” 9 Ova tya kuye: “Openi wa hala tu ke shi longekidile?” 10 Okwa tya kuvo: “Taleni, ngeenge mwa i moshilando otamu ka shakeneka mo omulumenhu a humbata oshitoo shomeva. Mu landuleni fiyo omeumbo omu ta i. 11 Tyeni kumwene weumbo, ‘Omuhongi ota ti kwoove: “Onduda yovaenda oi li peni opo ndi danene mo Opaasa novahongwa vange?”’ 12 Opo nee omulumenhu oo ote ke mu ulikila onduda ya kula yopombada, ya longekidilwa ovaenda. Omo mu longekidila Opaasa.” 13 Ova ya nova mona oinima aishe ngaashi Jesus e va lombwela, ndele tava longekida Opaasa.

14 Eshi efimbo la fika, okwa kala omutumba poshitaafula novayapostoli vaye. 15 Ndele okwa tya kuvo: “Onda halelela okulya pamwe nanye ouvalelo wOpaasa ofimbo inandi ka hepekwa; 16 onghee ohandi mu lombwele, itandi ke u lya vali fiyo osheshi oinima aishe ya wanifwa mOuhamba waKalunga.” 17 Okwa tambula eholo nokwa pandula, ndele ta ti: “Tambuleni eholo eli, ndele tamu li litaambekida, 18 osheshi ohandi mu lombwele, okudja nena itandi ka nwa vali omaviinyu fiyo osheshi Ouhamba waKalunga we uya.”

19 Natango okwa kufa omungome, ta pandula, te u pambula nokwe u va pa, ta ti: “Omungome ou otau faneke olutu lange olo tali yandjwa molweni. Kaleni hamu shi ningi okudimbuluka nge.” 20 Konima eshi va mana okulya ouvalelo, okwa kufa eholo, ndele ta ningi sha faafana, nokwa ti: “Eholo eli otali faneke ehangano lipe olo la pamekwa kohonde yange oyo tai tilwashi molweni.

21 “Ndele tala, ou ta kengelele nge oku li pamwe naame poshitaafula. 22 Osheshi Omona womunhu ota ka fya ngaashi sha xunganekwa; ndele woo omunhu ou te mu kengelele!” 23 Opo nee ova hovela okukundafana kutya olyelye womuvo a li poku mu kengelela.

24 Ndele mokati kavo omwa holoka eemhata kutya olyelye womuvo e na okutalika ko munene e dule vakwao. 25 Opo nee okwa tya kuvo: “Eehamba doiwana ohadi i pangele, naavo ve na eenghonopangelo ohava ifanwa ovafimanekwa.* 26 Ashike nye hasho mu kala ngaho. Ndele ou munene mokati keni na kale ngaashi ou munininini, nomuwiliki weni na kale ngaashi omuyakuli. 27 Osheshi olyelye munene, oye ou ta li* ile oye ou ta yakula? Mbela haye ou ta li?* Ndele ame ondi li mokati keni ngaashi omuyakuli.

28 “Ndele nye omwa kala pamwe naame naashi nda li momayeleko, 29 nohandi ningi ehangano nanye ngaashi Tate a ninga ehangano naame omolwouhamba, 30 opo mu dule okulya nokunwa poshitaafula shange mOuhamba wange, ndele tamu kala omutumba komalukalwapangelo mu tokole omapata 12 aIsrael.

31 “Simon, Simon, tala, Satana okwa indila e mu yele amushe ngaashi oilya. 32 Ashike onde ku ilikanena opo eitavelo loye liha nghundipale, ndele shimha wa aluka, pameka ovamwaxo.” 33 Petrus okwa tya kuye: “Omwene, ame onde lilongekida okufya pamwe naave nokuya naave modolongo.” 34 Jesus okwa ti: “Ohandi ku lombwele Petrus, nena eli ekondobolo fimbo inali kwena, oto lidimbike nge lutatu.”

35 Okwa ti vali kuvo: “Mbela eshi nde mu tumine muhe na eenghaku, ondjato yoimaliwa noyoikulya omwa li mwa hepa sha?” Ova ti: “Ahowe.” 36 Opo nee okwa tya kuvo: “Ndele paife ou e na ondjato yoimaliwa naao e na yoikulya ne i kufe nosho yo ou ehe na eongamukonda na landife po oshikutu shaye shokombada e lilandele eongamukonda. 37 Ndele ohandi mu lombwele kutya osho sha shangwa oshi na okuwanifilwa nge, eshi kwa tiwa: ‘Okwa valulilwa movakolokoshi.’ Onghee eshi otashi wanifilwa nge.” 38 Opo nee ova ti: “Omwene, tala, apa ope na omaongamukonda avali.” Okwa tya kuvo: “Okwa wana.”

39 Eshi a dja opo, okwa ya kOmhunda yEemono ngaashi ha ningi shito, ovahongwa vaye navo ove mu shikula. 40 Eshi va fika kOmhunda, okwa tya kuvo: “Kaleni tamu ilikana opo muha ye momayeleko.” 41 Opo nee okwa dja po puvo oshinano shinini* nokwa twa eengolo ndele ta hovele okwiilikana, 42 ta ti: “Tate, ngeenge owa hala, kufe nge eholo eli. Ashike hapahalo lange, ndele opahalo loye.” 43 Ndele okwa holokelwa komweengeli umwe a dja meulu nokwe mu pameka. 44 Eshi a li a taalela onghalo oyo idjuu neenghono, okwa kala ta ilikana a mana mo; noshinhwi shaye osha li sha fa ohonde tai ndodele pedu. 45 Ndele eshi a mana okwiilikana, okwa ya kovahongwa vaye nokwa hanga va kofa molwaashi ova li va lolokifwa kokunyika oluhodi. 46 Okwa tya kuvo: “Omolwashike tamu kofa? Pendukeni ndele tamu kala tamu ilikana opo muha ye momayeleko.”

47 Ofimbo a li natango ta popi, tala, okwa dja ongudu yovanhu i kwetelwe komesho komulumenhu ha ifanwa Judas, umwe womwaavo omulongo navavali, ndele te uya kuJesus e mu xupite. 48 Jesus okwa tya kuye: “Judas, oto kengelele Omona womunhu moku mu xupita?” 49 Eshi ovo va li pamwe naJesus va mona osho sha li pokuningwa po, ova ti: “Omwene, natu va ponokele nomaongamukonda?” 50 Umwe womuvo okwa ponokela omupiya womupristeri munene, ndele ta tete ko okutwi kwaye kwokolulyo. 51 Jesus okwa ti: “Inamu ninga ngaho.” Opo nee okwa kwata okutwi kwomupiya oo ndele te ku velula. 52 Jesus okwa tya kovapristeri ovakulunhu, kovakulunhu votembeli nokovakulunhu voshiwana ovo va li ve uya oku mu kwata po: “Omwe uya kwaame nomaongamukonda needibo mwa fa mwe uya okukwata po ombudi? 53 Onda kala nanye motembeli efiku nefiku ashike inamu kwata nge po. Ndele paife efimbo oleni nolomupangeli womilaulu.”

54 Opo nee ove mu kwata po nova ya naye ndele tave mu twala meumbo lomupristeri munene; na Petrus okwa li e va shikula e li kokule kanini. 55 Ndele ova tema omundilo momukala weumbo nova kala omutumba, na Petrus okwa li omutumba pamwe navo. 56 Opo nee okakadona kamwe okapiya oke mu mona e li omutumba pomundilo noke mu tala noku mu konenena, ndele taka ti: “Omulumenhu ou naye okwa li ha kala pamwe naJesus.” 57 Ashike okwe likala, ta ti: “Ame omulumenhu oo nghi mu shii.” 58 Konima yokafimbo kanini umwe vali okwe mu mona, ndele ta ti: “Naave oumwe womuvo.” Petrus okwa ti: “Ahowe.” 59 Eshi pa pita ovili imwe lwaapo, omulumenhu umwe vali okwa hovela okupopya nomufindo ta ti: “Oshili, omulumenhu ou naye okwa li ha kala pamwe naJesus, osheshi ye Omugalilea!” 60 Petrus okwa ti: “Nghi udite kutya oto popi shike.” Ndele diva fimbo a li natango ta popi, ekondobolo ola kwena. 61 Opo nee Omwene okwa punguluka nokwa tala Petrus, na Petrus okwa dimbuluka osho Omwene a li e mu lombwela a ti: “Nena eli ekondobolo fimbo inali kwena, oto lidimbike nge lutatu.” 62 Opo nee okwa ya pondje nokwa lila unene.

63 Ndele ovalumenhu ovo va kwata po Jesus ova hovela oku mu sheka noku mu denga. 64 Opo nee ove mu uvika koshipala ndele tava ti: “Xunganeka! Olyelye e ku denga?” 65 Ndele ove mu ula eendjovo dihapu tave mu sheke.

66 Eshi kwa sha, ovakulunhu voshiwana aveshe mwa kwatelwa ovapristeri ovakulunhu novanongo vomishangwa ova ongala ndele tava twala Jesus monhele yOmhangu yoPombada yOvajuda, ndele tava ti: 67 “Tu lombwela ngeenge oove Kristus.” Opo nee okwa tya kuvo: “Nande ndi mu lombwele itamu shi itavele nandenande. 68 Kakele kaasho, ngeenge onde mu pula itamu dulu okunyamukula. 69 Ndele okudja paife Omona womunhu ota ka kala omutumba kolulyo laKalunga omunaenghono.” 70 Opo nee aveshe ova ti: “Ove hano Omona waKalunga?” Okwa tya kuvo: “Osho naanaa ngaashi tamu ti.” 71 Ova ti: “Oumbangi washike vali twa pumbwa? Osheshi atusheni otwa uda osho sha dja mokanya kaye.”

23 Ongudu yovanhu aishe oya fikama ndele tai twala Jesus kuPilatus. 2 Opo nee oya hovela oku mu lundila tai ti: “Omulumenhu ou otwe mu hanga ta pukifa oshiwana shetu, te shi kelele shiha fute oifendela kOmukesari, nota ti kutya oye Kristus ohamba.” 3 Ndele Pilatus okwe mu pula ta ti: “Oove Ohamba yOvajuda?” Jesus okwa ti: “Osho naanaa ngaashi wa popya.” 4 Opo nee Pilatus okwa tya kovapristeri ovakulunhu nokeengudu dovanhu: “Omulumenhu ou inandi mu mona etimba.” 5 Ndele ova twikila ko tava ti: “Ota piyaaneke ovanhu nehongo laye muJudea ashishe, okudja kuGalilea fiyo okoku.” 6 Eshi Pilatus e shi uda, okwa pula ngeenge omulumenhu oo Omugalilea. 7 Eshi a mona kutya okwa dja koshitukulwa osho shi li koshi yepangelo laHerodes, okwe mu tuma kuHerodes, oo naye pefimbo opo a li muJerusalem.

8 Ndele eshi Herodes a mona Jesus, okwa li a hafa unene osheshi okwa kala a hala oku mu mona molwaashi okwa uda oinima ihapu kombinga yaye, nokwa li a hala oku mu mona ta longo oshikumwifilonga. 9 Opo nee okwa hovela oku mu pula omapulo mahapu, ashike Jesus ka li a nyamukula sha. 10 Ndele ovapristeri ovakulunhu novanongo vomishangwa ova kala tava fikama tava lundile Jesus va handuka. 11 Herodes novakwaita vaye ova ungaunga naye nonyanya. Opo nee okwe mu dika oshikutu tashi vema e mu yolife kovanhu ndele te mu shunifa kuPilatus. 12 Okudja kefiku olo Herodes naPilatus ova panga oukaume nonande ova li ve tondafane.

13 Pilatus okwa ifana ovapristeri ovakulunhu, ovapangeli novanhu vamwe, 14 ndele ta ti kuvo: “Omwa etela nge omulumenhu ou tamu ti kutya ota piyaaneke ovanhu. Ndele taleni, omulumenhu ou onde mu pula omapulo moipafi yeni ashike inandi mona etimba li na sha naasho tamu mu popile. 15 Herodes naye ine mu mona etimba nomolwaashi e mu shunifa kufye, ndele taleni, omulumenhu ou ina ninga sha shoku mu dipaifa. 16 Onghee ohandi mu dengifa ashike ndele handi mu mangulula.” 17 —— 18 Ndele ongudu yovanhu aishe oya ingida mokule tai ti: “Na dipawe,* ndele to tu mangululile Barabas!” 19 (Barabas okwa li a tulwa modolongo molwaashi okwa xwaxwameka ovanhu va twe ondubo nepangelo nokwa li omudipai.) 20 Ndele Pilatus okwe va lombwela vali eendjovo da faafana molwaashi okwa li a hala okumangulula Jesus. 21 Opo nee ova hovela okwiingida tava ti: “Na valelwe komuti! Na valelwe komuti!” 22 Okwa popya vali navo lutitatu ta ti: “Omolwashike? Omulumenhu ou okwa longa owii washike? Inandi mona sha muye shoku mu dipaifa; onghee ohandi mu dengifa ashike, ndele handi mu mangulula.” 23 Ova twikila okwiingida mokule tava ti kutya na valelwe komuti, opo nee Pilatus okwa sholola. 24 Onghee Pilatus okwa tokola opo a wanife po ehalo lavo. 25 Okwe va mangululila Barabas oo va li tava pula, oo a li a tulwa modolongo molwaashi a twa ondubo nepangelo nokwa li omudipai. Opo nee Pilatus okwa yandja Jesus momake avo ve mu ningile ngaashi va hala.

26 Fimbo tava i naJesus, ova kwata po Simon Omukireni, oo a hangika ta di komikunda, ndele tave mu humbateke omuti womahepeko* nokwa enda a shikula Jesus. 27 Opa li yo ongudu inene yovanhu ye mu shikula, mwa kwatelwa ovakainhu ovo va li va nyika oluhodi* notava lili nokulililila molwaye. 28 Jesus okwa punguluka ndele ta ti kovakainhu ovo: “Oukadona nye vomuJerusalem, inamu lila molwange, ndele lileni molweni nomolwovana veni; 29 osheshi taleni, efimbo otali uya eshi ovanhu tava ka tya, ‘Omukainhu ongadji, nomukainhu oo ina dala nosho yo oo ina nyamifa ota kala a hafa.’ 30 Opo nee otava ka lombwela eemhunda, ‘Wileni kufye!’ noikulundudu, ‘Tu tuvikileni!’ 31 Ngeenge oinima ei otave i ningi fimbo omuti mutalala, oshike tashi ka ningwa po ngeenge owa kukuta?”

32 Opa li ovalumenhu vavali ovakolokoshi ovo navo va li tava twalwa va ka valelwe pamwe naye. 33 Eshi va fika ponhele hai ifanwa Onhele yOmakolotwe, ove mu valela komuti pamwe novakolokoshi ovo, umwe okolulyo laye naumwe okolumosho laye. 34 Ndele Jesus okwa ti: “Tate, va dimina po osheshi kave shii eshi tava ningi.” Opo nee ova ninga oshihoololifo ve litukulile oikutu yaye. 35 Ovanhu ova li ofika tava tale, novapangeli ova li tave mu sheke tava ti: “Vakwao okwa li he va kwafa; ne likwafe ye mwene ngeenge ye Omuvaekwa waKalunga, Omuhoololwa.” 36 Nokuli novakwaita ove mu sheka, nove uya ndele tave mu pe omaviinyu malula, 37 tava ti: “Ove ngeenge Ohamba yOvajuda, likwafa ove mwene.” 38 Pomutwe waye opa li yo eshangelo tali ti: “Ei Ohamba yOvajuda.”

39 Ndele umwe womovakolokoshi ovo okwa hovela oku mu sheka ta ti: “Hano haave Kristus? Likwafa ove u tu kwafe yo!” 40 Mukwao okwa hanyena omukolokoshi oo, ta ti: “Iho tila Kalunga eshi atusheni twa pewa etokolo la faafana? 41 Fye ohatu pewa ondjabi yaasho twa longela, ndele omulumenhu ou ina ninga sha sha puka.” 42 Opo nee okwa ti: “Jesus, dimbulukwe nge ngeenge wa i mOuhamba woye.” 43 Jesus okwa tya kuye: “Oshili ohandi ku lombwele nena eli, oto ka kala pamwe naame mOparadisa.”

44 Ndele lwopokati komutenya* fiyo oponhatu yomutenya,* okwa li kwa laula fokofoko, 45 molwaashi etango kala li tali minikile; opo nee elapi olo la tukula otembeli ola tauka pokati. 46 Jesus okwa ingida mokule ta ti: “Tate, omwenyo wange* ohandi u yandje momake oye.” Konima eshi a popya ngaho, okwa fya.* 47 Eshi omukulunhu wetangakwaita a mona osho sha ningwa po, okwa hovela okutanga Kalunga ta ti: “Oshili, omulumenhu ou okwa li omuyuki.” 48 Ndele eengudu dovanhu adishe odo da li da ongala di tale osho tashi ningwa po, oda shuna komaumbo tadi lidenge meenhulo. 49 Aveshe ovo va li ve mu shii ova li ofika kokule. Novakainhu ovo va dja naye kuGalilea opo va li nova mona oinima oyo.

50 Ndele tala, opa li omulumenhu wedina Josef, oshilyo shOmhangu yoPombada yOvajuda, oo a li omuyuki nomunalukeno. 51 (Omulumenhu oo ka li a yambidida eemhangela neenghatu davo.) Okwa dja kuArimatia, oshilando shOvajudea, nokwa li a teelela Ouhamba waKalunga. 52 Okwa li a ya kuPilatus ndele ta pula a pewe oshimhu shaJesus. 53 Opo nee okwe shi kufa ko ndele te shi dingile melapi londilo loliina noku shi tula mombila* ya hokwa memanya, omo inamu pakwa nande onale oshimhu. 54 Ndele osha li efiku lomalilongekido, nefiku lEshabata ola li pokuhovela. 55 Opo nee ovakainhu ovo va dja naJesus kuGalilea navo ova ya kombila* va ka tale nghee oshimhu shaye tashi nangekwa mo, 56 nova shuna va ka longekide oimbodi nomaadi edimba liwa. Ndele mefiku lEshabata ova fuwa po ngaashi Omhango tai ti.

24 Mefiku lotete koshivike, ovakainhu venya ove uya ongula inene kombila,* va etelela oimbodi yedimba liwa oyo va longekida. 2 Ndele ova hanga emanya la kufwa ko kombila,* 3 naashi va ya mo, oshimhu shOmwene Jesus inave shi hanga mo. 4 Fimbo va li va limbililwa kombinga yoshinima osho, tala, puvo opa kala ofika ovalumenhu vavali va djala oikutu tai vilima. 5 Ndele ovakainhu ova kwatwa koumbada nova fidimika oipala yavo, opo nee ovalumenhu ova tya kuvo: “Omolwashike tamu kongo omunamwenyo mokati kovafi? 6 Ke mo omu, okwa nyumuka. Dimbulukeni osho a li e mu lombwela eshi a li muGalilea, 7 a tile kutya Omona womunhu ota ka yandjwa momake ovalunde nota ka valelwa komuti, nomefiku etitatu ota ka nyumunwa.” 8 Opo nee ova dimbuluka eendjovo daye, 9 ndele tava di ko kombila,* noinima aishe oyo ove i hokololela ovayapostoli 11 navakwao aveshe. 10 Ovakainhu ovo ova li: Maria Magdalena, Johanna naMaria ina yaJakob. Novakainhu vakwao ovo va li pamwe navo ova hokololela ovayapostoli oinima oyo. 11 Ashike kava li va itavela eendjovo dovakainhu ovo, molwaashi ova li ve di tala ko di li omahokololo ongaho.

12 Ndele Petrus okwa fikama nokwa tondokela kombila,* naashi a vandamena mo, okwa mona ashike omalapi oliina. Opo nee okwa shuna, te lipula kutya oshike sha ningwa po.

13 Ndele tala, mefiku olo tuu olo, ovahongwa vavali ova li tava ende va finda komukunda wedina Emaus, oko ku na oshinano sheekilometa 11 lwaapo* okudja muJerusalem, 14 nova li tava kundafana kombinga yoinima aishe oyo ya ningwa po.

15 Ofimbo va li tava kundafana oinima oyo, Jesus okwe uya puvo ndele ta ende pamwe navo, 16 ashike kava li va dula oku mu dimbuluka. 17 Opo nee okwa tya kuvo: “Oshike mwa li tamu kundafana mondjila?” Ndele ova kanghama, tava monika va nyika oluhodi. 18 Omulumenhu umwe wedina Kleopas okwe mu nyamukula ta ti: “Oove auke omunailongo muJerusalem ino uda* osho sha ningwa po omafiku aa?” 19 Jesus okwe va pula ta ti: “Oshike sha ningwa po?” Ova tya kuye: “Ino uda hano osho sha ningilwa Jesus Omunasaret? Okwa kala omuprofeti omunaenghono, e shi ulika moilonga nomeendjovo koshipala shaKalunga nomoipafi yovanhu aveshe. 20 Ndele ovapristeri ovakulunhu novapangeli ove mu yandja a tokolelwe efyo nokuvalelwa komuti. 21 Otwa li twe lineekela kutya omulumenhu ou oye ta ka mangulula Israel. Kakele kaasho, nena efiku etitatu okudja eshi oinima oyo ya ningwa. 22 Opo nee ovakainhu vamwe va dja mokati ketu ove tu limbililika, osheshi ova ile ongula inene kombila* 23 ndele oshimhu shaJesus inave shi hanga mo, nove uya yo tava ti kutya ova mona ovaengeli ovo ve va lombwela kutya okwa nyumuka. 24 Vamwe vomwaavo va li pamwe nafye ova ile kombila,* nova hanga muhe na sha ngaashi ashike ovakainhu va popya, ndele inave mu mona.”

25 Opo nee Jesus okwa tya kuvo: “Woo nye ovo muhe na eendunge noihamu itavele diva oinima aishe oyo ya popiwa kovaprofeti! 26 Mbela Kristus ka li e na okumona oixuna nokuya moshinge shaye?” 27 Jesus okwe va fatululila Omishangwa adishe odo da popya kombinga yaye, okudja kuMoses fiyo okOvaprofeti aveshe.

28 Ndele fimbo va li pokufika popepi nomukunda oko va li tava i, Jesus okwa li a fa ta pitilile po. 29 Onghee ove mu lombwela a kale puvo, va ti: “Kala pufye, molwaashi okwa toka.” Opo nee okwa ya meumbo a ka kale navo. 30 Ndele fimbo a li omutumba poshitaafula navo, okwa kufa omungome, ta ilikana, te u pambula nokwe u va pa. 31 Opo nee omesho avo okwa pashuka nove mu dimbuluka, ndele okwa dja po puvo. 32 Ndele ova lombwelafana tava ti: “Omitima detu kada li tuu da xwama eshi a li ta popi nafye mondjila, naashi e tu fatululila nawa Omishangwa!” 33 Pefimbo opo tuu opo ova fikama ndele tava shuna kuJerusalem, nova hanga ovayapostoli 11 naavo va ongala pamwe navo, 34 ovo va ti: “Oshoshili, Omwene okwa nyumuka nokwe lihololela Simon.” 35 Opo nee ove va hokololela osho sha ningwa po mondjila nanghee ve mu dimbuluka eshi a tukula omungome.

36 Fimbo va li tava popi kombinga yoinima oyo, Jesus okwa kala ofika mokati kavo ndele ta ti kuvo: “Ombili nai kale nanye.” 37 Ndele molwaashi ova li va tila neenghono, ova li tava diladila kutya ova mona oshishitwa shopamhepo. 38 Onghee okwa tya kuvo: “Omolwashike mwa tila nomwa limbililwa momitima deni? 39 Taleni omake neemhadi dange kutya aame, kumei nge nye mu tale, osheshi oshishitwa shopamhepo kashi na eenhumba nomakipa ngaashi ame ndi a na.” 40 Eshi a popya ngaho, okwe va ulikila omake neemhadi daye. 41 Ndele fimbo va li natango inave shi itavela molwaashi ova li va hafa unene nova kumwa, okwa tya kuvo: “Omu na po sha shokulya?” 42 Opo nee ove mu pa oshi ya yofwa, 43 ndele ta li moipafi yavo.

44 Ndele okwa tya kuvo: “Eendjovo edi odo nda li nde mu lombwela eshi nda li pamwe nanye kutya ashishe osho sha shangwa kombinga yange mOmhango yaMoses, momambo Ovaprofeti nomOmapsalme oshi na okuwanifwa.” 45 Opo nee okwe va kwafela va ude ko filufilu eityo lOmishangwa, 46 ndele ta ti kuvo, “Omishangwa oda ti kutya Kristus ota ka hepekwa, nomefiku etitatu ota ka nyumunwa koufi. 47 Ndele omolwedina laye, etumwalaka olo kutya ovanhu nave lidilulule opo va diminwe po omatimba avo oli na okuudifilwa oiwana aishe okuhovela muJerusalem. 48 Nye eembangi doinima oyo. 49 Ndele taleni, ohandi mu tumine osho Tate a udaneka. Onghee kaleni moshilando fiyo osheshi mwa pewa eenghono okudja meulu.”

50 Opo nee okwe va twala kuBetania, ndele ta yelula omake aye noku va nangeka noupuna. 51 Fimbo a li te va nangeke noupuna, okwa dja po puvo ndele ta twalwa meulu. 52 Opo nee ove mu linyongamena,* ndele tava shuna kuJerusalem ve na ehafo linene. 53 Ndele ova li hava kala motembeli efiku keshe, tava tange Kalunga.