EMBO LAJOHANNES

1 Pehovelo opa li Ondjovo, nOndjovo oya li puKalunga, nOndjovo oya li ya fa Kalunga.* 2 Ondjovo oyo oya kala naKalunga okudja pehovelo. 3 Oinima aishe oya shitwa okupitila muyo, kape na nande oshimwe she uya po inashi pitila muyo.

4 Omwenyo owe uya po okupitila muyo, nomwenyo owa li ouyelele wovanhu. 5 Ouyelele otau minikile momilaulu, nouyelele owa finda omilaulu.

6 Opa li omulumenhu umwe a tumwa e li omukalelipo waKalunga, nedina laye oJohannes. 7 Omulumenhu oo okwe uyile e li ombangi, a yandje oumbangi kombinga youyelele, opo ovanhu vomaludi aeshe va dule okwiitavela okupitila muye. 8 Haye a li ouyelele oo, ndele okwa li ashike ta yandje oumbangi kombinga yao.

9 Ouyelele washili oo wa li tau ka yandja ouyelele kovanhu vomaludi aeshe owa li pokuuya mounyuni. 10 Okwa li mounyuni, nounyuni owe uya po okupitila muye, ashike inau mu shiiva. 11 Okwe uyile moshitukulwa shavo, ndele ovanhu vomoshitukulwa shavo inave mu tambula ko. 12 Onghee aveshe ovo ve mu tambula okwe va pitika va ninge ovana vaKalunga molwaashi ova li va itavela edina laye.* 13 Ashike inava dalwa pambelela nohonde ile pahalo lovanhu, ndele ova dja kuKalunga.

14 Opo nee Ondjovo oya ninga omunhu* nokwa kala pamwe nafye, nefimano laye otwe li mona, efimano la fa olo omonamati ewifa a pewa kuxe; nokwa li alushe ha popi oshili noku yadi efilonghenda laKalunga. 15 (Johannes okwa hepaulula kombinga yaye, eshi a ingida ta ti: “Ou oye nda popile nda tile, ‘Ou te uya konima yange oku dule nge, osheshi okwa kala ko nale.’”) 16 Atushe ohatu mono efilonghenda laye linene, molwaashi oku yadi efilonghenda. 17 Omhango oya li ya yandjwa okupitila muMoses, ndele efilonghenda noshili oye uya po okupitila muJesus Kristus. 18 Kape na nande omunhu a mona Kalunga; omona ewifa oo a fa Kalunga* noha kala puXe* oye e mu hepaulula.

19 Johannes okwa yandja oumbangi ou eshi Ovajuda va li va tuma ovapristeri nOvalevi va dja kuJerusalem ve ke mu pule tava ti: “Oove lyelye?” 20 Ndele ina ongaonga okunyamukula; okwa popya oshili ta ti: “Ame haame Kristus.” 21 Opo nee ove mu pula tava ti: “Oove lyelye hano? Oove Elia?” Okwa nyamukula ta ti: “Ahowe.” Ova ti: “Oove Omuprofeti?” Okwa ti: “Ahowe!” 22 Onghee ova tya kuye: “Oove lyelye hano? Tu lombwela opo tu ka yandje enyamukulo kwaava ve tu tuma. Ove mwene oto ti ngahelipi?” 23 Okwa ti: “Aame ondaka yaau ta ingida mombuwa, ta ti: ‘Lalakanifeni ondjila yaJehova,’ ngaashi sha popiwa komuprofeti Jesaja.” 24 Ovanhu ovo va li tava pula ova li va tumwa kOvafarisai. 25 Onghee ove mu pula tava ti: “Omolwashike hano ho ninginifa ngeenge haave Kristus, Elia ile Omuprofeti?” 26 Johannes okwa tya kuvo: “Ame ohandi ninginifa momeva. Ndele mokati keni omu na ou muhe mu shii, 27 ou te uya konima yange noinandi wana okumangulula eemwiya deenghaku daye.” 28 Oinima oyo oya ningilwa muBetania, koushilo waJordan, oko Johannes a li ta ninginifile.

29 Efiku la shikula ko, Johannes okwa mona Jesus, ndele ta ti: “Taleni Odjona yaKalunga oyo tai kufa po omatimba ounyuni! 30 Ou oye nda popile nda ti: ‘Ou te uya konima yange oku dule nge, osheshi okwa kala ko nale.’ 31 Naame kanda li ndi mu shii, ashike onde uya okuninginifa momeva opo a shiivike muIsrael.” 32 Johannes okwa hepaulula vali ta ti: “Onda mona omhepo iyapuki ya fa onghuti ya dja meulu, ndele tai kala kombada yaye. 33 Naame kanda li ndi mu shii, ashike Ou a tuma nge ndi ninginife momeva okwa lombwela nge ta ti: ‘Ou to mono omhepo tai uya kombada yaye, oye ou te uya okuninginifa nomhepo iyapuki.’ 34 Onde i mona, ndele handi hepaulula kutya ou oye Omona waKalunga.”

35 Natango mefiku la shikula ko, Johannes okwa li a fikama novahongwa vaye vavali, 36 ndele eshi a mona Jesus ta ende po, okwa ti: “Taleni Odjona yaKalunga!” 37 Eshi ovahongwa ovo vavali va uda osho a ti, ova shikula Jesus. 38 Opo nee Jesus okwa piluka, ndele eshi e va mona tave mu shikula okwa tya kuvo: “Otamu kongo shike?” Ova tya kuye: “Rabbi (osho tashi ti “Omuhongi”), oho di peni?” 39 Okwa tya kuvo: “Ileni mu ka tale po.” Opo nee ova ya nova mona opo a li ha di, ndele tava kala naye efiku olo; nosha li onhee yokomatango lwaapo.* 40 Andreas, omumwaina waSimon Petrus, okwa li umwe womovahongwa vavali ovo va uda osho Johannes a popya nova shikula Jesus. 41 Tete okwa ya kumumwaina Simon, ndele ta ti kuye: “Otwa mona Messias” (sha hala okutya “Kristus”), 42 opo nee okwe mu twala kuJesus. Eshi Jesus e mu mona, okwa ti: “Simon, omona waJohannes, oto ka ifanwa Kefas” (sha hala okutya “Petrus”).

43 Efiku la shikula ko, Jesus okwa li a hala okuya kuGalilea, opo nee okwa shakeneka Filippus ndele ta ti kuye: “Ninga omushikuli wange.” 44 Filippus okwa dja kuBetsaida, koshilando oko yo kwa dja Andreas naPetrus. 45 Eshi Filippus a shakena naNatanael okwa tya kuye: “Otwa mona oo a popiwa mOmhango yaMoses nomomambo Ovaprofeti, Jesus omona waJosef wokuNasaret.” 46 Ndele Natanael okwa tya kuye: “MuNasaret otamu dulu ngoo okudja sha shiwa?” Filippus okwa tya kuye: “Ila u ka tale.” 47 Eshi Jesus a mona Natanael a finda kuye okwa ti: “Taleni Omuisrael washili ehe na oukengeleledi washa.” 48 Natanael okwe mu pula ta ti: “Owa shiiva nge ngahelipi?” Jesus okwe mu nyamukula ta ti: “Onde ku mona eshi wa li momukwiyu ofimbo Filippus ine ku ifana.” 49 Natanael okwa ti: “Muhongi,* ove Omona waKalunga, Ohamba yaIsrael.” 50 Opo nee Jesus okwa tya kuye: “Owa itavela molwaashi nde ku lombwela kutya onde ku mona momukwiyu? Oto ka mona oinima ikumwifi i dule ei.” 51 Okwa tya vali kuye: “Oshili ohandi mu lombwele, otamu ka mona eulu la yeuluka novaengeli vaKalunga tava londo notava londoloka ve uye kOmona womunhu.”

2 Ndele mefiku etitatu muKana shaGalilea omwa li oshivilohombolo, naina yaJesus oko a li. 2 Jesus novahongwa vaye navo ova li va shivwa koshivilohombolo osho.

3 Ndele eshi omaviinyu a li pokupwa po, ina yaJesus okwa tya kuye: “Omaviinyu avo okwa pwa po.” 4 Opo nee Jesus okwa tya kuye: “Osho kashi fi oshinakuwanifwa shetu naave.* Efimbo lange inali fika natango.” 5 Ina okwa lombwela ovayakuli ta ti: “Ningeni keshe osho te mu lombwele.” 6 Ndele opa li oitoo ihamano yomamanya yokukwatela omeva oyo ya li ya pumbiwa omolweenghulunghedi dOshijuda dokulikosha, oshitoo keshe osha li hashi wana omeva eelitela 44 fiyo 66 lwaapo. 7 Jesus okwa tya kuvo: “Yadekeni oitoo omeva.” Opo nee ove i yadeka. 8 Okwa tya vali kuvo: “Kufei mo amwe ndele tamu a twala komuwiliki woshivilo.” Ndele osho va ninga. 9 Eshi omuwiliki woshivilo a makela omeva oo a li a shitukifwa omaviinyu, nonande ka li e shii kutya okwa dja peni (ashike ovayakuli ovo ve a eta ove shi shii), okwa ifana omuhomboli, 10 ndele ta ti kuye: “Ovanhu ohava yandje tete omaviinyu aa mawa, opo nee ngeenge ovanhu va kolwa, ohave va pe aa mai. Ashike ove owa tuvikila omaviinyu aa mawa fiyo opaife.” 11 Jesus okwa longa oshikumwifilonga shaye shotete muKana shaGalilea, naasho osha holola oshinge shaye, opo nee ovahongwa vaye ove mu itavela.

12 Konima yaasho, Jesus, ina, ovamwainamati nosho yo ovahongwa vaye ova ya kuKapernaum, ashike inava kala ko omafiku mahapu.

13 Ndele eshi Opaasa yOvajuda ya li popepi, Jesus okwa ya kuJerusalem. 14 Eshi a ya motembeli, okwa hanga ovanhu tava landifa eengobe, eedi neenghuti. Okwa hanga mo yo ovakumaani voimaliwa ve li omutumba. 15 Konima eshi a ninga ongola yeengodi, okwa ta mo eedi neengobe motembeli naavo va li tave di landifa, ndele ta undulile pedu oitaafula yovakumaani nokutilashi oimaliwa yavo. 16 Opo nee okwa tya kwaavo va li tava landifa eenghuti: “Kufei mo oinima ei omu! Inamu ninga eumbo laTate onhele yomalandifilo!” 17 Ovahongwa vaye ova dimbuluka kutya opa shangwa: “Ouladi omolweumbo loye otau twaalele nge.”

18 Opo nee Ovajuda ova tya kuye: “Tu ulikila edidiliko olo tali ulike kutya ou na oufemba wokuninga oinima oyo.” 19 Jesus okwa tya kuvo: “Ngumaunei po otembeli ei, nohandi ke i tungulula moule womafiku atatu.” 20 Opo nee Ovajuda ova ti: “Otembeli ei oya tungwa oule womido 46, ongahelipi to ke i tungulula moule womafiku atatu?” 21 Ashike Jesus eshi a popya otembeli okwa li ta popi kombinga yolutu laye. 22 Ndele eshi Jesus a nyumunwa koufi, ovahongwa vaye ova li va dimbuluka kutya okwa li ha popi ngaho, nova li va itavela omishangwa naasho a li ha popi.

23 Eshi a li muJerusalem koshivilo shOpaasa, ovanhu vahapu ova li ve mu itavela eshi va mona oikumwifilonga oyo a li a longa. 24 Ndele Jesus ka li e ve lineekela filufilu molwaashi okwa li e shii osho shi li momitima dovanhu, 25 noka li a pumbwa umwe e mu lombwele kombinga yovanhu shaashi oku va shii nawa.

3 Opa li omulumenhu Omufarisai wedina Nikodemus, umwe womovawiliki vOvajuda. 2 Opo nee okwe uya kuJesus oufiku, ndele ta ti kuye: “Muhongi,* otu shi shii kutya ove omuhongi a dja kuKalunga, osheshi kaku na omunhu ta dulu okulonga oikumwifilonga oyo to longo, okuninga a pewa eenghono kuKalunga.” 3 Jesus okwa tya kuye: “Oshili ohandi ku lombwele, kape na omunhu ta dulu okuya mOuhamba waKalunga okuninga a dalululwa.”* 4 Nikodemus okwa tya kuye: “Ngeenge omunhu okwa kula nale, ongahelipi ta dulu okudalululwa? Mbela ota dulu ngoo okushuna moshidalelo shaina ndele ta dalwa vali?” 5 Jesus okwe mu nyamukula ta ti: “Oshili ohandi ku lombwele, kape na ou ta dulu okuya mOuhamba waKalunga okuninga ta ninginifwa momeva nokupewa omhepo iyapuki.* 6 Osho sha dalwa kombelela osho ombelela, naasho sha dalwa komhepo osho omhepo. 7 Ino kumwa eshi handi ku lombwele kutya: Omu na okudalululwa. 8 Omhepo otai pepe oku ya hala nou i udite, ashike ku shii oku tai di naako ya finda. Hano osho osho shi li ngaho kwaavo va dalwa komhepo.”

9 Opo nee Nikodemus okwa tya kuye: “Ongahelipi osho tashi dulu okuningwa?” 10 Jesus okwa ti: “Ove omuhongi womuIsrael, ndele omolwashike uhe shii oinima ei? 11 Oshili ohandi ku lombwele, ohatu popi osho tu shii nokuhepaulula osho twa mona, ashike nye inamu tambula ko ehepaululo olo twe mu pa. 12 Ngeenge ohandi mu lombwele oinima yokombada yedu ndele itamu itavele, ongahelipi tamu ka itavela ngeenge onde mu lombwele ei yomeulu? 13 Ndele kape na omunhu a londa a ya meulu, kakele kOmona womunhu ou a dja meulu. 14 Ngaashi Moses a li a endjelelifa eyoka mombuwa, Omona womunhu naye ota ka endjelelifwa, 15 opo keshe ou te mu itavele* a ka mone omwenyo waalushe.

16 “Molwaashi Kalunga oku hole ounyuni neenghono, okwa yandja Omona waye ewifa, opo keshe ou te mu itavele* aha hanaunwe po ndele a ka mone omwenyo waalushe. 17 Kalunga ina tuma Omona waye mounyuni e u tokole, ndele opo ounyuni u xupifwe okupitila muye. 18 Keshe ou a itavela muye ita tokolwa. Ndele ou ina itavela okwa tokolwa nale, molwaashi ina itavela medina lOmona waKalunga ewifa. 19 Onghee ouyelele owe uya mounyuni, ndele ovanhu ponhele yokukala ve hole ouyelele, ove hole omilaulu shaashi oilonga yavo oii, nomolwaasho otava ka tokolwa. 20 Keshe ou ha longo owii oku tonde ouyelele, noihe uya pouyelele opo oilonga yaye iha monike.* 21 Ndele keshe ou ha longo osho sha yuka ohe uya pouyelele, opo oilonga yaye i monike kutya oi li metwokumwe nehalo laKalunga.”

22 Konima yaasho, Jesus novahongwa vaye ova ya komikunda daJudea, oko a kala oule wefimbo pamwe navo nova li tava ninginifa. 23 Ndele Johannes naye okwa li ta ninginifa muAinon popepi naSelim, molwaashi omwa li omeva mahapu novanhu ova li tave uya kuye va ninginifwe. 24 Pefimbo opo Johannes ka li natango a tulwa modolongo.

25 Ovahongwa vaJohannes ova li tava tu eemhata nOmujuda umwe shi na sha nanghee omunhu e na okukala a koshoka koshipala shaKalunga. 26 Opo nee ove uya kuJohannes ndele tava ti kuye: “Omuhongi,* omulumenhu winya wa li naye koushilo waJordan, oo wa li ho hepaulula, ota ninginifa, novanhu aveshe otava i kuye.” 27 Johannes okwa ti: “Omunhu ita dulu okukala na sha okuninga e shi pewa kuKalunga. 28 Omwa uda eshi nda popile kutya, ‘Ame haame Kristus, ndele Kalunga okwa tuma nge ndi tetekele Kristus.’ 29 Keshe oo e na omuhombolwa oye omuhomboli. Ndele kaume komuhomboli ngeenge e li ofika popepi naye ndele ta udu ta popi, oha kala a hafa unene. Onghee naame onda hafa unene. 30 Oilonga yaye otai hapupala ofimbo yange tai ninipala.”

31 Ou a dja pombada oku dule vakwao aveshe. Ou a dja kedu owokedu noha popi oinima yokedu. Ndele ou a dja meulu oku dule vakwao aveshe. 32 Okwa hepaulula osho a mona nokwa uda, ashike kape na nande oumwe a tambula ko ehepaululo laye. 33 Keshe oo a tambula ko ehepaululo laye okwa dimina kutya Kalunga omunashili. 34 Ndele ou a tumwa kuKalunga oha popi eendjovo daKalunga osheshi Kalunga iha ngungunine* omhepo yaye. 35 Xe oku hole Omona nokwa yandja oinima aishe momake aye. 36 Keshe ou a itavela* Omona oku na omwenyo waalushe, ashike ou iha dulika kOmona ita ka mona omwenyo, ndele ota ka hangwa kehandu laKalunga.

4 Eshi Jesus* a didilika kutya Ovafarisai ova uda kutya oku na ovahongwa vahapu nokwa li a ninginifa ovanhu vahapu e dule Johannes 2 (nonande Jesus mwene ina ninginifa nande omunhu, ndele ovahongwa vaye ovo va ninginifa), 3 okwa dja mo muJudea ndele ta shuna vali kuGalilea. 4 Ndele okwa li e na okupitila muSamaria. 5 Opo nee okwe uya popepi nepya olo Jakob a yandjele komona Josef, moshilando shomuSamaria shedina Sikar. 6 Moshitukulwa osho omwa li ondungu yaJakob. Ndele Jesus okwa kala omutumba pondungu* oyo molwaashi okwa dja molweendo a loloka, nosha li omulongo nambali womutenya lwaapo.*

7 Ndele omukainhu umwe Omusamaria okwa li e uya okuteka omeva, na Jesus okwa tya kuye: “Pe nge omeva okunwa.” 8 (Ovahongwa vaye ova hangwa va ya moshilando va ka landa oikulya.) 9 Opo nee omukainhu Omusamaria okwe mu pula ta ti: “Omolwashike to ehela nge omeva okunwa nonande ove Omujuda ofimbo ame omukainhu Omusamaria?” (Ovajuda kava li ve na ekwatafano nOvasamaria.) 10 Jesus okwe mu nyamukula ta ti: “Ngeno owa li u shii oshali yaKalunga nonokutya olyelye ta ti kwoove, ‘Pe nge omeva okunwa,’ ngeno owe mu pula ndele te ku pe omeva e na omwenyo.” 11 Omukainhu okwa tya kuye: “Omufimanekwa, omeva e na omwenyo aa to pe nge oto a hange peni ove uhe na evela lokuteka omeva, yo nondungu oile? 12 Mbela ove ou dule tatekulululwa Jakob ou e tu pa ondungu omo ye novana vaye nosho yo eengobe daye da kala hadi nu?” 13 Jesus okwe mu nyamukula ta ti: “Keshe ou ta nu omeva oo ota fi vali enota. 14 Ashike keshe ou ta nu omeva oo handi mu pe ita fi vali enota nandenande, ndele omeva oo otaa ka kala ngaashi ofifiya i li muye oyo tai mu pe omwenyo waalushe.” 15 Omukainhu okwa tya kuye: “Omufimanekwa, pe nge omeva oo opo ndiha fye vali enota nondiha kale vali handi uya okuteka omeva konhele ei.”

16 Jesus okwa tya kuye: “Inda u ka ifane omushamane woye e uye oku.” 17 Omukainhu okwa nyamukula ta ti: “Nghi na omushamane.” Jesus okwa tya kuye: “Ou li mondjila eshi wa ti, ‘Nghi na omushamane.’ 18 Osheshi owa li u na ovashamane vatano, nomulumenhu oo u na paife ke fi omushamane woye. Onghee osho wa popya oshoshili.” 19 Omukainhu okwa tya kuye: “Omufimanekwa, ondi wete kutya ove omuprofeti. 20 Ootatekulululwa ova li hava longele Kalunga komhunda ei, ashike nye ohamu ti kutya ovanhu ove na oku ka longela Kalunga kuJerusalem.” 21 Jesus okwa tya kuye: “Itavela eshi handi ku lombwele, efimbo otali uya eshi itamu ka longela vali Tate komhunda ei ile kuJerusalem. 22 Nye ohamu longele osho muhe shii, ashike fye ohatu longele osho tu shii, osheshi exupifo otali hovele mOvajuda. 23 Ndele efimbo ola fika opo ovalongelikalunga vashili va longele Tate momhepo nomoshili, osheshi Tate okwa hala ovanhu ve mu longele monghedi ya tya ngaho. 24 Kalunga oye Omhepo, naava tave mu longele ove na oku mu longela momhepo nomoshili.” 25 Omukainhu okwa tya kuye: “Ondi shi shii kutya Messias oo ha ifanwa Kristus ote uya. Ndele ngeenge okwe uya, ote ke tu fatululila oinima aishe.” 26 Jesus okwa tya kuye: “Oye ngaha, ou ta popi naave.”

27 Fimbo va li tava kundafana, ovahongwa vaye ova aluka, nova li va kumwa eshi va hanga ta popi nomukainhu oo. Ndele kape na nande oumwe a tya: “Owa hala okukwafelwa shike?” ile “Omolwashike to popi nomukainhu ou?” 28 Opo nee omukainhu okwa fiya po oshitoo shaye shomeva nokwa ya moshilando ndele ta lombwele ovanhu ta ti: 29 “Ileni mu ka tale omulumenhu umwe oo a lombwela nge oinima aishe ei nda ninga. Ile pamwe omulumenhu ou oye Kristus?” 30 Opo nee ovanhu ova dja mo moshilando ndele tave uya kuJesus.

31 Pefimbo opo tuu opo ovahongwa ove mu lombwela tava ti: “Muhongi,* lya.” 32 Okwa tya kuvo: “Ondi na nale oikulya oyo muhe shii.” 33 Opo nee ovahongwa ova pulafana tava ti: “Ope na mbela ou e mu etela oikulya?” 34 Jesus okwa tya kuvo: “Oikulya yange oyo okulonga ehalo laau a tuma nge nokumanifa oshilonga shaye. 35 Ohamu ti kutya oku na eemwedi nhee opo eteyo li hovele. Ndele ohandi mu lombwele, taleni, omapya okwa pya nale okuteywa. 36 Omuteyi ota mono nale ondjabi nota ongele oiimati oyo tai ka kala fiyo alushe, opo omukuni a hafele pamwe nomuteyi. 37 Osheshi eendjovo edi odi li mondjila kutya: Umwe omukuni naumwe omuteyi. 38 Onde mu tuma mu ka teye osho inamu kuna. Vamwe ova kuna, ndele nye omwa mona ouwa moilonga yavo.”

39 Ovasamaria vahapu vomoshilando osho ove mu itavela omolweendjovo domukainhu oo e va hepaululila ta ti: “Okwa lombwela nge oinima aishe ei nda ninga.” 40 Eshi Ovasamaria ve uya kuye, ove mu pula a kale pamwe navo, opo nee okwa kala po omafiku avali. 41 Oshidjemo, ovanhu vahapu ova itavela omolwoinima oyo a popya, 42 nova tya komukainhu oo: “Paife inatu itavela ashike osho we tu lombwela, ndele otwe shi liudila fye vene notu shi shii kutya omulumenhu ou oku li shili omuxupifi wounyuni.”

43 Konima yomafiku avali, okwa dja po puvo ndele ta i kuGalilea. 44 Jesus okwa popya mwene kutya omuprofeti iha fimanekwa moshilando shavo. 45 Ndele eshi a fika muGalilea, Ovagalilea ova li ve mu tambula ko molwaashi ova mona oinima aishe oyo a li a longa koshivilo muJerusalem, osheshi navo koshivilo osho oko va li.

46 Jesus okwa shuna vali kuKana shaGalilea oko a li a shitukifa omeva omaviinyu. Ndele opa li elenga limwe li na omonamati ta vele e li kuKapernaum. 47 Eshi omulumenhu oo a uda kutya Jesus okwa dja ko kuJudea a ya kuGalilea, okwa ya kuye ndele te mu pula va ye naye a ka velule omonamati waye, molwaashi okwa li e li pokufya. 48 Jesus okwa tya kuye: “Nye ihamu itavele ofimbo inamu mona omadidiliko noikumwifilonga.” 49 Elenga ola tya kuye: “Omwene, ila tu ye fimbo okaana kange inaka fya.” 50 Jesus okwa tya kuye: “Shuna keumbo, omonamati woye okwa veluka.” Opo nee omulumenhu oo okwa itavela osho Jesus e mu lombwela ndele ta i. 51 Fimbo a li mondjila, ovapiya vaye ove mu shakeneka nove mu lombwela kutya omonamati waye okwa veluka. 52 Onghee okwe va pula kutya okwa veluka efimbo peni. Ova nyamukula va ti: “Okwa veluka onghela poimwe yomutenya lwaapo.”* 53 Xe yomumati oo a li ta vele okwa didilika kutya povili oyo opo naanaa Jesus e mu lombwela ta ti: “Omonamati woye okwa veluka.” Opo nee ye novaneumbo laye aveshe ova itavela muJesus. 54 Eshi osho sha li oshikumwifilonga oshitivali osho Jesus a longa eshi a dja kuJudea e uya kuGalilea.

5 Eshi oshivilo shOvajuda sha fika, Jesus okwa li a ya kuJerusalem. 2 Ndele muJerusalem, pomuvelo wokupitila eedi opa li etale hali ifanwa mOshiheberi Betesda, olo la li li na omikala nhano. 3 Momikala omo omwa li hamu kala ongudu inene yovanhu ovo tava vele, ovapofi, oilema nosho yo ovo ve na omake neemhadi da fya omolwoudu wombada. 4 —— 5 Petale opo opa li yo omulumenhu umwe oo a kala ta vele oule womido 38. 6 Eshi Jesus a mona omulumenhu oo a nangala noku shii kutya okwa kala ta vele oule wefimbo lile, okwe mu pula ta ti: “Ino hala okuveluka?” 7 Omulumenhu oo a li ta vele okwa nyamukula ta ti: “Omufimanekwa, kape na ou ta tula nge metale ngeenge omeva tae linyenge, ndele shimha handi i, vamwe ohava piti nge komesho.” 8 Jesus okwa tya kuye: “Fikama! Kufa olutala loye,* ndele to ende.” 9 Opo nee omulumenhu oo okwa veluka diva, ta kufa olutala laye* nokwa hovela okweenda.

Ndele efiku olo ola li Eshabata. 10 Onghee Ovajuda ova tya komulumenhu oo a velulwa: “Nena Eshabata noinashi pitikwa pamhango u humbate olutala.”* 11 Okwa tya kuvo: “Ou a velula nge okwa lombwela nge ta ti, ‘Kufa olutala loye,* ndele to ende.’” 12 Ove mu pula tava ti: “Olyelye e ku lombwela u kufe olutala ndele to ende?” 13 Ashike omulumenhu oo ka li e shii kutya olyelye e mu velula, molwaashi Jesus okwa dja po diva ndele ta i mongudu yovanhu.

14 Konima yaasho, Jesus okwe mu hanga motembeli ndele ta ti kuye: “Paife owa veluka, ndele ino nyona vali opo uha mone oilanduliko ii neenghono.” 15 Opo nee omulumenhu oo okwa ya ndele ta ka lombwela Ovajuda kutya Jesus oye e mu velula. 16 Osho osha li sha ningifa Ovajuda va kale tava pataneke Jesus molwaashi okwa li ta longo oilonga oyo mEshabata. 17 Ndele Jesus okwa tya kuvo: “Tate ota longo fiyo opaife, naame ohandi twikile okulonga.” 18 Okudja opo Ovajuda ova kala va hala oku mu dipaa, molwaashi ova li tava ti kutya ota nyono omhango yEshabata nokwa hala ovanhu va diladile kutya oku fike puKalunga eshi ta ti kutya Kalunga oye Xe.

19 Ndele Jesus okwa tya kuvo: “Oshili ohandi mu lombwele, Omona ita longo sha kuye mwene, ndele ota longo ashike osho a mona Xe ta longo. Osheshi keshe osho Xe a longa, osho tuu Omona ta longo. 20 Shaashi Xe oku hole Omona, ohe mu ulikile oinima aishe oyo a longa, note ke mu ulikila oilonga inene i dule ei, opo shi mu kumwife. 21 Ndele ngaashi ashike Xe ha nyumuna oonakufya, Omona naye oha nyumuna keshe oo a hala okunyumuna. 22 Xe iha tokola nande omunhu, ndele oilonga aishe yokutokola okwe i pa Omona, 23 opo ovanhu aveshe va fimaneke Omona ngaashi hava fimaneke Xe. Keshe ou iha fimaneke Omona, iha fimaneke yo Xe ou e mu tuma. 24 Oshili ohandi mu lombwele, keshe ou ta udu eendjovo dange ndele ta itavele ou a tuma nge oku na omwenyo waalushe; ita ka tokolwa, ndele ota kala ngaashi omunhu oo a li a fya nokwa nyumuka.

25 “Oshili ohandi mu lombwele, efimbo otali uya eshi oonakufya tava ka uda ondaka yOmona waKalunga, ndele ovo va pwilikina nokudulika kuye otava ka kala nomwenyo. 26 Ngaashi ashike Xe e na eenghono dokuyandja omwenyo,* okwa pa yo Omona eenghono dokuyandja omwenyo. 27 Okwe mu pa yo eenghonopangelo dokutokola, molwaashi ye Omona womunhu. 28 Inamu shi kuminwa, osheshi efimbo otali uya eshi aveshe ovo ve li meembiladimbuluko tava ka uda ondaka yaye, 29 ndele tava di mo, ava va longa ouwa otava ka nyumukila omwenyo, naava va longa owii otava ka nyumukila etokolo. 30 Ihandi longo sha pahalo lange. Ashike ohandi tokola ovanhu she likolelela kwaasho Tate ta lombwele nge nohandi tokola pauyuki molwaashi ihandi longo ehalo lange, ndele ehalo laTate ou a tuma nge.

31 “Ngeenge onda hepaulula kombinga yange mwene, ehepaululo lange itali kala loshili. 32 Ndele ope na umwe oo ta hepaulula kombinga yange, nondi shi shii kutya ehepaululo laye olashili. 33 Omwa tumine ovanhu kuJohannes, nokwe va hepaululila oshili. 34 Ashike ame ihandi tambula ko ehepaululo lovanhu, ndele ohandi mu lombwele oinima ei opo mu dule okuxupifwa. 35 Johannes okwa li ngaashi olamba ya tema notai minikile, nomwa li tamu hafele neenghono ouyelele waye oule wokafimbo. 36 Ndele ame ondi na ehepaululo li dule laJohannes, osheshi oilonga ei handi longo onde i pewa kuTate, notai yandje oumbangi kutya onda tumwa kuTate. 37 Tate ou a tuma nge okwa hepaulula kombinga yange. Ndele inamu uda ondaka yaye noinamu mu mona. 38 Eendjovo daye inadi kala mo munye molwaashi inamu itavela ou a tumwa.

39 “Ohamu konakona Omishangwa molwaashi otamu diladila kutya odo tadi ke mu pe fa omwenyo waalushe, ndele Omishangwa odo otadi popi kombinga yange. 40 Ndele nye inamu hala okuuya kwaame opo mu kale nomwenyo. 41 Inandi hala okupewa efimano kovanhu, 42 nondi shi shii kutya kamu hole Kalunga. 43 Onde uya medina laTate, ndele inamu tambula nge. Ndele ngeenge umwe okwe uya pahalo laye mwene, otamu mu tambula. 44 Otamu itavele ngahelipi ngeenge onye vene hamu lipe efimano, noihamu kongo efimano olo hali di kuKalunga aeke? 45 Inamu diladila kutya ohandi ke mu popya kuTate, ndele ou te mu popi oMoses ou mwe lineekela. 46 Kakele kaasho, ngeenge omwa itavela Moses, ngeno omu na yo okukala mwa itavela nge, osheshi okwa shanga kombinga yange. 47 Ndele ngeenge inamu itavela osho a shanga, ongahelipi tamu ka itavela osho handi popi?”

6 Ndele Jesus okwa taulula efuta laGalilea olo hali ifanwa yo Tiberias. 2 Opo nee ongudu inene yovanhu oya li ye mu shikula molwaashi oya mona oikumwifilonga oyo a li a longa eshi a velula ovanaudu. 3 Jesus okwa ya komhunda ndele ta kala omutumba novahongwa vaye. 4 Oshivilo shOvajuda osho hashi ifanwa Opaasa osha li popepi. 5 Eshi Jesus a yelula omesho, okwa mona ongudu inene yovanhu tai uya kuye, ndele ta ti kuFilippus: “Openi hatu ka landa omingome tu pe ovanhu ava va lye?” 6 Molwaashi Jesus okwa li e shii osho a li ta ka ninga po, okwa li ashike e mu pula nelalakano e mu tale po. 7 Filippus okwa ti: “Nonande otu lande omingome deedenari 200 itadi wana okukutifa ovanhu ava nandenande.” 8 Opo nee umwe womovahongwa vaye Andreas, omumwaina waSimon Petrus, okwa tya kuye: 9 “Apa ope na okamati ke na omingome nhano noushi vavali. Ndele mbela otai wana ngoo ovanhu vahapu ve fike opo?”

10 Jesus okwa ti: “Lombweleni ovanhu va kale omutumba.” Ponhele oyo opa li omwiidi muhapu. Onghee ova kala omutumba, nomongudu yovanhu ovo omwa li ovalumenhu 5 000 lwaapo. 11 Konima eshi Jesus a ilikana, okwa kufa omungome ndele te u tukulile ovanhu ovo va li omutumba, nokwa ninga yo sha faafana shi na sha noushi, novanhu ova li va kuta. 12 Ndele eshi ovanhu va lya va kuta, okwa tya kovahongwa vaye: “Toolei po oundjaumukile ovo va xupa po, opo paha hepe sha.” 13 Onghee ova ongela oundjaumukile va yada oimbale 12 ovo va xupifwa po kovanhu ovo va lya omingome nhano.

14 Eshi ovanhu va mona oshikumwifilonga osho a longa, ova ti: “Oshili, ou oye Omuprofeti ou a li e na okuuya mounyuni.” 15 Ndele eshi Jesus a didilika kutya ovanhu ova li va hala oku mu fininika a ninge ohamba, okwa shuna komhunda oye aeke.

16 Eshi kwa toka, ovahongwa vaye ova ya kefuta, 17 nova londa mowato ndele tava i va finda kuKapernaum. Ndele okwa li kwa laula, ashike Jesus ka li e uya kuvo natango. 18 Kakele kaasho, efuta ola li la pindjala neenghono molwaashi okwa li ku na omhepo inene. 19 Ndele eshi va ya oshinano sheekilometa nhano ile hamano lwaapo,* ova mona Jesus ta ende kombada yomeva ta ehene popepi nowato, nova li va kwatwa koumbada. 20 Opo nee okwa tya kuvo: “Aame; inamu tila!” 21 Ndele ova li va halelela a londe mowato; nokonima yefimbo lixupi ova ka fika oko va li va finda.

22 Efiku la shikula ko, ongudu yovanhu oyo ya li kombinga ikwao yefuta oya li ya didilika kutya eewato dimwe kadi po ndele opa li ashike okawato kamwe, nonokutya Jesus ina londa mowato pamwe novahongwa vaye, ndele ovahongwa ova ya ovo aveke. 23 Ndele popepi nonhele opo va lila omingome konima eshi Omwene a ilikana ope uya eewato da dja kuTiberias. 24 Eshi ongudu yovanhu ya mona kutya Jesus nosho yo ovahongwa vaye kave po, ova londa meewato ndele tava i kuKapernaum va ka konge Jesus.

25 Eshi ovanhu ve mu hanga kombinga ikwao yefuta, ove mu pula tava ti: “Muhongi,* owe uya ko naini oku?” 26 Jesus okwe va nyamukula ta ti: “Oshili ohandi mu lombwele, otamu kongo nge ashike omolwomingome odo mwa lile ndele tamu kuta, ashike hamolwaashi mwa mona oikumwifilonga. 27 Inamu longela oikulya oyo tai xulu po, ndele longeleni oyo tai mu pefa omwenyo waalushe, oyo tamu pewa kOmona womunhu; osheshi Kalunga okwa tula Omona edidiliko olo tali ulike kutya okwe mu hokwa.”

28 Opo nee ove mu pula tava ti: “Otu na okuninga shike opo tu kale twa hokiwa kuKalunga?” 29 Jesus okwe va nyamukula ta ti: “Kalunga ote mu hokwa ngeenge omwa kala mu na eitavelo* mwaau a tuma.” 30 Ova tya kuye: “Oto tu longele po oshikumwifilonga shilipi opo tu shi mone fye tu dule oku ku itavela? Owa hala oku tu longela po oshikumwifilonga shilipi? 31 Ootatekulululwa ova lile omana mombuwa, ngaashi ashike pa shangwa: ‘Ye okwe va pa omungome wa dja meulu va lye.’” 32 Jesus okwa tya kuvo: “Oshili ohandi mu lombwele, Moses ine mu pa omungome wa dja meulu, ndele Tate okwe mu pa omungome washili wa dja meulu. 33 Osheshi omungome waKalunga oye ou a dja meulu opo a yandje omwenyo kovanhu.” 34 Opo nee ova tya kuye: “Omwene, tu pa alushe omungome oo.”

35 Ndele Jesus okwa tya kuvo: “Aame omungome womwenyo. Keshe ou te uya kwaame ita fi vali ondjala nandenande, naau e na eitavelo* mwaame ita fi vali enota nandenande. 36 Ngaashi nde mu lombwela, omwa mona nge, ashike inamu itavela natango. 37 Aveshe ovo Tate ta pe nge otave uya kwaame, naavo tave uya kwaame itandi va taataa; 38 osheshi onda dja meulu ndi uye okulonga ehalo laau a tuma nge, ndele hahalo lange. 39 Ou a tuma nge ina hala ndi kanife nande oumwe womwaava a pa nge, ndele okwa hala ndi va nyumune mefiku laxuuninwa. 40 Tate okwa hala keshe ou ta tambula Omona noku na eitavelo* muye a mone omwenyo waalushe, nohandi ke mu nyumuna mefiku laxuuninwa.”

41 Opo nee Ovajuda ova hovela okungongota kombinga yaashi Jesus a ti: “Aame omungome wa dja meulu.” 42 Ova ti: “Ou ke fi hano Jesus omona waJosef, ou xe naina tu shii? Omolwashike ta ti, ‘Onda dja meulu’?” 43 Jesus okwa tya kuvo: “Inamu ngongota vali. 44 Kape na ou te uya kwaame okuninga Tate ou a tuma nge te mu nane, nohandi ke mu nyumuna mefiku laxuuninwa. 45 Ovaprofeti ova tile: ‘Aveshe otava ka hongwa kuJehova.’ Ndele keshe ou ta pwilikine nokutambula ko eendjovo daTate ote uya kwaame. 46 Kape na nande omunhu a mona Tate, kakele kaau a dja kuKalunga; ou oye a mona Tate. 47 Oshili ohandi mu lombwele, keshe ou ta itavele oku na omwenyo waalushe.

48 “Aame omungome womwenyo. 49 Ooxokulululwa ova lile omana mombuwa ndele nande ongaho ova fya. 50 Ou omungome wa dja meulu, nakeshe ou te u li ita fi. 51 Aame omungome u na omwenyo oo wa dja meulu. Keshe ou ta li omungome ou ota kala fiyo alushe, osheshi omungome ou handi yandje oo olutu lange omolweemwenyo dovanhu.”*

52 Opo nee Ovajuda ova hovela okungongota tava ti: “Omulumenhu ou ota dulu ngahelipi oku tu pa olutu laye tu li lye?” 53 Ndele Jesus okwa tya kuvo: “Oshili ohandi mu lombwele, ngeenge itamu li olutu lOmona womunhu nokunwa ohonde yaye, itamu kala nomwenyo. 54 Keshe ou ta li olutu lange nokunwa ohonde yange oku na omwenyo waalushe, nohandi ke mu nyumuna mefiku laxuuninwa; 55 osheshi olutu lange olo oikulya yashili, nohonde yange oyo oshikunwa shashili. 56 Keshe ou ta li olutu lange nota nu ohonde yange ohandi ka kala ndi na ekwatafano la kola naye. 57 Ngaashi ashike Tate omunamwenyo a tuma nge nondi li po omolwaye, keshe ou ta li olutu lange ota kala yo nomwenyo omolwange. 58 Ou omungome wa dja meulu. Inau fa oo ooxokulululwa va lile ashike ova ka fya. Keshe ou ta li omungome ou ota ka kala nomwenyo fiyo alushe.” 59 Oinima oyo okwe i popya eshi a li ta hongo moshinagoga* muKapernaum.

60 Ovahongwa vaye eshi ve shi uda, vahapu vomuvo ova ti: “Eendjovo odo inadi wapala, inatu hala oku di pwilikina.” 61 Ndele eshi Jesus a didilika kutya ovahongwa vaye ova li tava ngongota kombinga yasho, okwa tya kuvo: “Hano eendjovo odo ode mu udifa nai? 62 Ongahelipi ngeenge omwa mono Omona womunhu ta shuna oku a dile? 63 Omhepo oyo hai yandje omwenyo; olutu kali na ekwafo lasha. Eendjovo odo nde mu lombwela oda dja momhepo iyapuki notadi yandje omwenyo. 64 Ndele ope na vamwe vomunye ovo inava itavela.” Jesus okwa kala nale e shi shii kutya oolyelye inava itavela nonokutya olyelye te ke mu kengelela. 65 Opo nee okwa ti: “Nomolwaasho nde mu lombwela kutya kape na ou ta dulu okuuya kwaame okuninga Tate oye a hala oku mu eta kwaame.”

66 Omolwoshinima osho, vahapu vomovahongwa vaye ova efa po oku mu shikula ndele tava shuna koinima oyo va li va fiya po. 67 Ndele Jesus okwa tya kovayapostoli vaye 12: “Nye inamu hala okuya?” 68 Opo nee Simon Petrus okwa tya kuye: “Omwene, otu ye vali kulyelye? Oove u na eendjovo domwenyo waalushe. 69 Otwa itavela notu shi shii kutya oove Omuyapuki waKalunga.” 70 Jesus okwa tya kuvo: “Hano haame nde mu hoolola nye omulongo navavali? Ndele umwe womunye omunaipupulu.”* 71 Jesus okwa li ta popi kombinga yaJudas omona waSimon Iskariot, molwaashi oye a li te ke mu kengelela nonande okwa li umwe womovayapostoli 12.

7 Jesus okwa kala ta udifile muGalilea molwaashi ka li a hala okuudifila muJudea, shaashi Ovajuda ova li va hala oku mu dipaa. 2 Ndele Oshivilo shOmatwali shOvajuda osha li popepi. 3 Opo nee ovamwainamati ova tya kuye: “Inda kuJudea opo ovahongwa voye navo va mone oilonga oyo to longo. 4 Kaku na oo ha longo sha meholeko ngeenge okwa hala okushiivika moipafi. Ngeenge oto longo oinima oyo, i longa moipafi yovanhu aveshe.” 5 Ovamwainamati kava li ve mu itavela.* 6 Onghee Jesus okwa tya kuvo: “Efimbo lange inali fika natango, ndele nye otamu dulu okuya efimbo keshe. 7 Ounyuni itau dulu okukala u mu tonde, ndele ou tonde nge shaashi ohandi popi kutya oilonga yao oii. 8 Nye indeni ashike koshivilo, ame itandi i ko paife molwaashi efimbo lange inali fika natango.” 9 Konima eshi a popya oinima oyo, okwa fyaala muGalilea.

10 Ndele eshi ovamwainamati va ya koshivilo osho, naye okwa ya ko meholeko. 11 Opo nee Ovajuda ova hovela oku mu konga moshivilo tava ti: “Omulumenhu winya oku li peni?” 12 Ndele opa li eengudu dovanhu tadi nongofola kombinga yaye. Vamwe ova li tava ti: “Omulumenhu e li nawa.” Ofimbo vamwe tava ti: “Omulumenhu oo ke li nawa, ota pukifa ovanhu.” 13 Ndele kapa li nande oumwe a popya kombinga yaye moipafi molwaashi ova li va tila Ovajuda.

14 Eshi oshivilo osho sha li pokupwa, Jesus okwa ya motembeli ndele ta hovele okuhonga. 15 Ovajuda ova li va kumwa, ndele tava ti: “Osha enda ngahelipi opo omulumenhu ou a kale e na eshiivo lOmishangwa ye ina hongwa keefikola dopalongelokalunga?”* 16 Jesus okwe va nyamukula ta ti: “Ehongo olo handi hongo kali fi lange, ndele ola dja kwaau a tuma nge. 17 Ngeenge oku na ou a hala okulonga ehalo laKalunga, ota ka shiiva kutya osho handi hongo osha dja kuKalunga ile ohandi popi omadiladilo ange mwene. 18 Keshe ou ta popi omadiladilo aye mwene ota kongo efimano laye mwene, ashike ou ta kongo efimano laau e mu tuma, oye omunashili nomuyuki. 19 Hamba Moses ine mu pa Omhango? Ndele kape na nande oumwe womunye ha dulika kuyo. Omolwashike mwa hala okudipaa nge?” 20 Ongudu yovanhu oya nyamukula ya ti: “Ou na ondemoni. Olyelye a hala oku ku dipaa?” 21 Opo nee Jesus okwa tya kuvo: “Onda longa ashike oshikumwifilonga shimwe, ndele oshe mu kumwifa amushe. 22 Moses okwe mu pa Omhango i na sha nepitotanda, ashike inai dja kuye, ndele oya dja kooxokulululwa, nohamu pitifa ovalumenhu etanda meshabata. 23 Ngeenge ovalumenhu ohava pitifwa etanda meshabata opo ku diininwe Omhango yaMoses, omolwashike mwa handukila nge unene eshi nda velula omunhu meshabata? 24 Inamu tokola vali she likolelela keholokepo lokombada, ndele tokoleni etokolo la yuka.”

25 Ndele Ovajerusalem vamwe ova ti: “Hano omulumenhu ou haye va li va hala okudipaa? 26 Taleni, ota popi moipafi, ashike itava ti sha kuye. Mbela ovapangeli ove shi shii kutya ou oye Kristus? 27 Mepingafano naasho, fye otu shii apa pa dja omulumenhu ou, ashike Kristus ngeenge okwe uya, kape na ou ta ka shiiva apa a dja.” 28 Ndele fimbo Jesus a li ta hongo motembeli, okwa popya mokule ta ti: “Omu shii nge nomu shii apa nda dja. Ashike inandi uya kwaame mwene, ndele Ou a tuma nge oko e li shili, ashike kamu mu shii. 29 Ame ondi mu shii, molwaashi oye a tuma nge nondi li omukalelipo waye.” 30 Ndele ova li tava kongo omhito ve mu kwate po, ashike kapa li nande oumwe e mu kwata molwaashi efimbo laye kala li la fika natango. 31 Vahapu vomongudu oyo ova li ve mu itavela, nova li tava ti: “Ngeenge Kristus okwe uya, mbela ota ka longa ngoo oikumwifilonga ihapu i dule ei ya longwa komulumenhu ou?”

32 Ndele Ovafarisai eshi va uda ongudu yovanhu tai ngongota kombinga yaJesus omolwoinima oyo, ovapristeri ovakulunhu nOvafarisai ova tuma ovakeleli votembeli ve ke mu kwate po. 33 Opo nee Jesus okwa ti: “Ohandi kala nanye okafimbo kanini fimbo inandi shuna kwaau a tuma nge. 34 Otamu ka konga nge, ndele itamu ka mona nge, naako handi i itamu dulu okuuya ko.” 35 Onghee Ovajuda ova pulafana tava ti: “Omulumenhu ou okwa diladila okuya peni, opo tuha dule oku mu mona? Mbela okwa diladila okuya kOvajuda ovo ve lihanena mokati kOvagreka nokuhonga Ovagreka? 36 Okwa hala okutya ngahelipi eshi ta ti, ‘Otamu ka konga nge, ndele itamu ka mona nge, naako handi i itamu dulu okuuya ko’?”

37 Ndele mefiku laxuuninwa la fimanenena loshivilo osho, Jesus okwa fikama nokwa popya mokule ta ti: “Ngeenge oku na ou a fya enota, ne uye kwaame a nwe omeva. 38 Keshe ou ta itavele nge, ngaashi omushangwa wa ti: ‘Meni laye otamu ka kala omeva e na omwenyo taa kunguluka.’” 39 Jesus okwa popya ngaho shi na sha nomhepo iyapuki oyo ya li poku ka pewa ovo ve mu itavela, osheshi kaya li ya yandjwa molwaashi Jesus ka li a tumbalekifwa natango. 40 Vamwe vomongudu yovanhu eshi va uda eendjovo odo ova ti: “Oshili ou Omuprofeti.” 41 Vamwe vali ova ti: “Ou oye Kristus.” Ndele vakwao ova ti: “Mbela Kristus ota di ngoo muGalilea? 42 Hano omushangwa inau tya kutya Kristus ota ka dja moludalo laDavid nosho yo muBetlehem, momukunda omo mwa li David?” 43 Onghee mongudu yovanhu omwa li mwa holoka eenhamanana kombinga yaye. 44 Nonande vamwe vomuvo ova li va hala oku mu kwata po, kapa li nande oumwe e shi ninga.

45 Ndele ovakeleli votembeli ova shuna kovapristeri ovakulunhu nokOvafarisai nova pulwa kutya: “Omolwashike inamu mu eta oku?” 46 Opo nee ovakeleli ovo ova nyamukula tava ti: “Kape na nande omunhu ha popi ngaashi winya.” 47 Ovafarisai ova ti: “Hano nanye omwa pukifwa? 48 Ope na tuu nande omupangeli umwe ile Omufarisai e mu itavela? 49 Ovanhu ava vehe shii Omhango ova fingwa.” 50 Nikodemus, umwe womuvo oo e uyile kuJesus okwa tya kuvo: 51 “Mbela pamhango yetu fimbo inatu tokola omunhu ihatu mu pula tete opo tu shiive osho a longa?” 52 Ova tya kuye: “Hano naave ku fi Omugalilea? Ka konge mOmishangwa u mone kutya muGalilea itamu di nande omuprofeti.”*

8 12 Jesus okwe va lombwela ta ti: “Aame ouyelele wounyuni. Keshe ou ta shikula nge ita ka enda nandenande momilaulu, ndele ota ka mona ouyelele oo tau yandje omwenyo.” 13 Opo nee Ovafarisai ova tya kuye: “Ove oto hepaulula kombinga yoye mwene, nehepaululo loye kali fi loshili.” 14 Jesus okwa tya kuvo: “Nonande ohandi hepaulula kombinga yange mwene, ehepaululo lange oloshili, molwaashi ondi shii apa nda dja nondi shii apa handi i. Ndele nye kamu shii apa nda dja naapa handi i. 15 Nye ohamu tokola pambelela,* ashike ame ihandi tokola nande omunhu. 16 Ashike ngeenge handi tokola, etokolo lange ola yuka, molwaashi ihandi tokola aame andike, ndele ohandi tokola naTate ou a tuma nge. 17 Natango, mOmhango yeni omwa shangwa taku ti: ‘Ehepaululo lovanhu vavali olashili.’ 18 Ame ohandi hepaulula kombinga yange mwene, na Tate ou a tuma nge ota hepaulula kombinga yange.” 19 Opo nee ove mu pula tava ti: “Xo oku li peni?” Jesus okwe va nyamukula ta ti: “Kamu shii nge, na Tate kamu mu shii. Ngeno omwa li mu shii nge, ngeno naTate omu mu shii yo.” 20 Eendjovo odo okwe di popya fimbo a li ta hongo motembeli e li monhele omo hamu kala oikefa yomayambidido. Ndele kapa li nande oumwe e mu kwata po, molwaashi efimbo laye kala li la fika natango.

21 Okwa tya vali kuvo: “Ohandi i, notamu ka konga nge; ndele otamu ka fila moulunde weni. Apa handi i itamu dulu okuuya po.” 22 Opo nee Ovajuda ova ti: “Mbela ote ke lidipaa? Molwaashi ota ti, ‘Apa handi i itamu dulu okuuya po.’” 23 Jesus okwa tya kuvo: “Nye ovokedu; ame onda dja pombada. Nye ovomounyuni ou; ame nghi fi womounyuni ou. 24 Nomolwaasho nde mu lombwela nda ti: Otamu ka fila moulunde weni. Ngeenge inamu itavela kutya aame oo a li e na okuuya, otamu ka fila moulunde weni.” 25 Ndele ove mu pula tava ti: “Oove lyelye hano?” Jesus okwa tya kuvo: “Otashi kwafa shike handi popi nanye ndele kamu udite ko? 26 Ondi na oinima ihapu okupopya nokutokola kombinga yeni. Kakele kaasho, ou a tuma nge oha popi oshili, nohandi lombwele ounyuni oinima oyo nda uda kuye.” 27 Ndele kava li va didilika kutya okwa li te va lombwele kombinga yaXe womeulu. 28 Opo nee Jesus okwa ti: “Ngeenge Omona womunhu omwe mu endjelelifa pombada, otamu ka shiiva kutya aame oo a li e na okuuya, nonokutya ihandi longo sha pahalo lange; ndele ohandi popi ashike oinima oyo Tate a honga nge. 29 Ou a tuma nge oku li pamwe naame; ina efa nge, molwaashi ohandi longo alushe osho tashi mu hafifa.” 30 Eshi a popya oinima oyo, vahapu ove mu itavela.

31 Ndele Jesus okwa tya kOvajuda ovo ve mu itavela: “Ngeenge omwa diinine eendjovo dange, nye ovahongwa vange shili, 32 notamu ka shiiva oshili, noshili otai ke mu mangulula.” 33 Vamwe ova tya kuye: “Fye oludalo laAbraham nokatu na efiku twa li ovapika vaumwe. Omolwashike to ti, ‘Otamu ka mangululwa’?” 34 Jesus okwe va nyamukula ta ti: “Oshili ohandi mu lombwele, keshe ou ta longo oulunde omupika woulunde. 35 Kakele kaasho, omupika iha kala meumbo lamwene waye fiyo alushe, ndele omona waye oha kala mo fiyo alushe. 36 Onghee Omona ngeenge okwe mu mangulula, otamu ka kala mwa manguluka shili. 37 Ondi shi shii kutya nye oludalo laAbraham. Ndele omwa hala okudipaa nge molwaashi inamu tambula ko ehongo lange. 38 Ohandi popi oinima oyo nda mona eshi nda li puTate, ndele nye ohamu ningi oinima oyo mwa uda kuxo.” 39 Opo nee ova tya kuye: “Fye tate oAbraham.” Jesus okwa tya kuvo: “Ngeno omwa li ovana vaAbraham, ngeno otamu shikula oshihopaenenwa shaye. 40 Ndele paife omwa hala okudipaa nge, ame ou nde mu lombwela oshili oyo nda uda kuKalunga. Abraham ngeno ita ningi oshinima sha tya ngaho. 41 Nye otamu longo oilonga yaxo.” Ova tya kuye: “Fye inatu dalwa moluhaelo; otu na Tate umwe aeke, Kalunga.”

42 Jesus okwa tya kuvo: “Ngeno Kalunga okwa li oXo, ngeno omu hole nge, osheshi onda dja kuKalunga nondi li apa omolwaye. Inandi uya pahalo lange, ndele oye a tuma nge. 43 Inamu hala okutambula ko ehongo lange nomolwaasho muhe udite ko eendjovo dange. 44 Nye omu na xo yeni Ondiaboli, nomwa hala okulonga ehalo laye. Ye omudipai nghee a dja pehovelo, noina diinina oshili molwaashi ke na oshili. Ngeenge ta popi oipupulu, ota popi osho shi li muye, molwaashi ye omunaipupulu naxe yayo. 45 Ndele molwaashi ame ohandi mu lombwele oshili, inamu hala okwiitavela nge. 46 Olyelye womunye ta dulu okutya ame omulunde? Ngeenge ohandi popi oshili, omolwashike inamu hala okwiitavela nge? 47 Ou womuKalunga oha pwilikine keendjovo daKalunga. Ndele nye ihamu pwilikine molwaashi kamu fi vomuKalunga.”

48 Ovajuda ova tya kuye: “Inatu popya sha yuka eshi twa ti, ‘Ove Omusamaria nou na ondemoni’?” 49 Jesus okwa ti: “Ame nghi na ondemoni; ohandi fimaneke Tate, ndele nye otamu fifa nge ohoni. 50 Ashike itandi likongele efimano; ndele ope na ou a hala oku li pa nge noku li omutokoli. 51 Oshili ohandi mu lombwele, ou ta diinine eendjovo dange ita ka fya nandenande.” 52 Ovajuda ova tya kuye: “Paife otu wete lela kutya ou na ondemoni. Abraham okwa fya nosho yo ovaprofeti, ndele ove oto ti, ‘Ou ta diinine eendjovo dange ita ka fya nandenande.’ 53 Mbela ou dule tate Abraham oo a fya nale? Ovaprofeti navo ova fya nale. Oto diladila kutya oove lyelye?” 54 Jesus okwe va nyamukula ta ti: “Ngeenge onde lifimanekifa, efimano lange olongaho. Tate oye ta fimanekifa nge, ou tamu ti kutya oye Kalunga keni. 55 Ashike kamu mu shii, ndele ame ondi mu shii. Ngeenge onda ti kandi mu shii, ohandi ningi omunaipupulu ngaashi nye. Ndele ondi mu shii nohandi diinine eendjovo daye. 56 Xo Abraham okwa li a teelela nodjuulufi efiku olo nda li handi ke uya; okwe li mona nokwa li a hafa.” 57 Opo nee Ovajuda ova tya kuye: “Mbela Abraham owe mu mona, ove uhe na natango omido 50?” 58 Jesus okwa tya kuvo: “Oshili ohandi mu lombwele, fimbo Abraham ina dalwa, ame opo ndi li nale.” 59 Onghee ova kufa omamanya ve mu kupule, opo nee Jesus okwa hondama, ndele ta di mo motembeli.

9 Fimbo Jesus a li ta ende, okwa mona omulumenhu a dalwa omupofi. 2 Opo nee ovahongwa vaye ove mu pula tava ti: “Omuhongi,* olyelye a nyona opo omulumenhu ou a dalwe omupofi, oye mwene ile ovadali vaye?” 3 Jesus okwe va nyamukula ta ti: “Omulumenhu oo ile ovadali vaye inava nyona, ashike osho osha ningwa opo oilonga yaKalunga i hololwe okupitila muye. 4 Otu na okulonga oilonga yaau a tuma nge fimbo omutenya; oufiku otau uya ndele kape na vali omunhu ta dulu okulonga sha. 5 Ofimbo ndi li mounyuni, aame ouyelele wounyuni.” 6 Konima eshi a popya oinima oyo, okwa fiila omate pedu nokwe a lunga a ninge onhata ndele te i vaeke pomesho omulumenhu oo. 7 Opo nee okwa tya kuye: “Inda u ke likoshe ketale laSiloa” (sha hala okutya “Omeva taa ndwafuka”). Okwa ya ndele te likosho, nokwa aluka e wete ko.

8 Ndele ovashiinda naavo va li hava mono omulumenhu oo eshi a li ha ehela, ova ti: “Hano omulumenhu ou haye a li ha kala omutumba ta ehela?” 9 Vamwe ova li tava ti: “Oye.” Ofimbo vakwao va li tava ti: “Haye, ndele oumwe ashike e mu fa.” Omulumenhu oo okwa kala ta ti: “Aame.” 10 Onghee ove mu pula tava ti: “Osha enda ngahelipi opo u twikuluke?” 11 Okwa nyamukula ta ti: “Omulumenhu umwe ha ifanwa Jesus okwa lunga onhata nokwe i vaeka nge pomesho, ndele ta ti, ‘Inda kuSiloa u ke likoshe.’ Opo nee onda ya, ndele handi likosho nonda twikuluka.” 12 Ove mu pula tava ti: “Omulumenhu oo oku li peni?” Okwa ti: “Nghi shii apa e li.”

13 Ndele ova twala omulumenhu oo a li omupofi kOvafarisai. 14 Efiku olo Jesus a lunga onhata nokwa twikulula omulumenhu oo ola li Eshabata. 15 Eshi omulumenhu oo a twalwa kOvafarisai, navo ova hovela oku mu pula kutya osha enda ngahelipi opo a twikuluke. Opo nee okwa tya kuvo: “Okwa vaeka nge onhata pomesho nonde likosha ndele handi twikuluka.” 16 Vamwe vomOvafarisai ova ti: “Omulumenhu a tya ngaho ina dja kuKalunga, molwaashi iha diinine Eshabata.” Vamwe vali vomuvo ova ti: “Ongahelipi omulumenhu omulunde ta dulu okulonga oikumwifilonga ya tya ngaho?” Onghee mokati kavo omwa li omashilafano. 17 Ova pula vali omulumenhu oo a li omupofi tava ti: “Ove oto ti ngahelipi kombinga yaye eshi e ku twikulula?” Omulumenhu oo okwa ti: “Omuprofeti.”

18 Ndele Ovajuda kava li va itavela kutya omulumenhu oo okwa li omupofi nokwa twikuluka, fiyo osheshi va ifana ovadali vaye. 19 Opo nee ove va pula tava ti: “Ou oye omonamati weni ou mwa ti okwa li a dalwa omupofi? Osha enda ngahelipi opo a kale e wete ko paife?” 20 Ovadali vaye ova nyamukula va ti: “Oshoshili kutya ou omona wetu nonokutya okwa dalwa omupofi. 21 Ndele katu shi shii kutya osha enda ngahelipi a twikuluke; nokatu shi shii kutya olyelye e mu twikulula. Mu puleni, okwa kula. Na popye ye mwene.” 22 Ovadali vaye ova popya ngaho molwaashi ova li va tila Ovajuda, osheshi Ovajuda ova li va ninga eudafano kutya keshe oo ta ti kutya omulumenhu oo oKristus oku na okukondwa mo moshinagoga. 23 Osho osho sha ningifa ovadali vaye va tye: “Okwa kula, mu puleni.”

24 Ova ifana vali omulumenhu oo a li omupofi ndele tava ti kuye: “Fimaneka Kalunga; otu shi shii kutya omulumenhu oo omulunde.” 25 Okwa ti: “Ngeenge omulunde, kandi shi shii. Osho ndi shii osheshi kutya onda li omupofi, ndele paife ondi wete ko.” 26 Opo nee ova tya kuye: “Okwa ninga po shike? Okwe ku twikulula ngahelipi?” 27 Okwa tya kuvo: “Onde mu lombwela nale, ndele inamu hala okupwilikina. Omwa hala vali okuuda shike? Hano nanye omwa hala okuninga ovahongwa vaye?” 28 Ndele ove mu sheka tava ti: “Ove omuhongwa womulumenhu oo, ashike fye ovahongwa vaMoses. 29 Otu shi shii kutya Kalunga okwa popya naMoses, ndele omulumenhu oo katu shi shii kutya okwa dja peni.” 30 Omulumenhu oo okwa tya kuvo: “Osho oshikumwifi shili eshi omulumenhu oo a twikulula nge, ndele kamu shi shii kutya okwa dja peni. 31 Otu shi shii kutya Kalunga iha pwilikine omailikano ovalunde, ndele keshe oo he mu tila noha longo ehalo laye, ote mu udu. 32 Okudja nale inatu uda nande omunhu a li a dalwa omupofi ndele ta twikululwa. 33 Ngeno okwa li omulumenhu oo ina dja kuKalunga, ngeno ina dula okuninga po sha.” 34 Ova tya kuye: “Nye amushe omwa dalwa moulunde, ndele paife owa hala oku tu honga?” Opo nee ove mu ta mo moshinagoga.

35 Ndele Jesus okwa uda kutya omulumenhu oo okwa tewa mo, opo nee eshi e mu mona okwa tya kuye: “Ou na ngoo eitavelo mOmona womunhu?” 36 Omulumenhu oo okwa ti: “Omufimanekwa, Omona womunhu olyelye opo ndi mu itavele?” 37 Jesus okwa tya kuye: “Owe mu mona; oye ou to popi naye.” 38 Okwa ti: “Omwene, onde mu itavela.” Opo nee okwe linyongamena kuye.* 39 Jesus okwa ti: “Onde uya mounyuni opo ounyuni u tokolwe, opo ovo ihava mono ko va dule okumona ko, naavo ve wete ko vaha mone ko.” 40 Eshi Ovafarisai ovo va li puye va uda oinima oyo, ove mu pula tava ti: “Mbela nafye ovapofi?” 41 Jesus okwa tya kuvo: “Ngeno nye omwa li ovapofi, ngeno kamu na etimba. Ndele paife otamu ti, ‘Otu wete ko.’ Omatimba eni itaa dimwa po.”

10 “Oshili ohandi mu lombwele, ou te uya moshiunda sheedi ita pitile koshivelo, ombudi. 2 Ndele ou ta i mo ta pitile koshivelo oye omufita weedi. 3 Omukeleli woposhivelo shoshiunda ote mu yeulula, needi otadi udu ondaka yomufita. Eedi daye ote di ifana komadina, ndele te di pitifa mo. 4 Ngeenge e di pitifa mo adishe, ohe di kala komesho nohadi mu shikula, molwaashi odi shii ondaka yaye. 5 Itadi ka shikula nandenande umwe e lili, ndele otadi ke mu faduka po molwaashi kadi shii eendaka davamwe ve lili.” 6 Jesus okwe va lombwela efaneko olo, ashike kava li ve udite osho a hala okutya.

7 Jesus okwa tya vali: “Oshili ohandi mu lombwele, aame oshivelo omo eedi di na okupitila. 8 Aveshe ovo ve uya tave liti kutya aame, ovo eembudi; ndele eedi inadi pwilikina kuvo. 9 Aame oshivelo; keshe ou ta pitile mwaame ota ka xupifwa, note ke uya mo nokupita mo ndele ta mono oulifilo muwa. 10 Ombudi ihai endele shimwe, ndele okuvaka, okudipaa nokuhanauna. Ame onde uya opo eedi di kale nomwenyo fiyo alushe. 11 Aame omufita muwa; omufita muwa oha yandjele eedi daye omwenyo waye. 12 Ndele omunailonga oo ehe fi mwene weedi ngeenge okwa mono embungu tali uya ohe di fiye po ndele ta faduka po. Opo nee embungu ohali di ponokele nohadi lihane. 13 Ohe di fiye po molwaashi ye omunailonga ashike noke na ko nasha needi. 14 Aame omufita muwa. Eedi dange ondi di shii nado odi shii nge, 15 ngaashi Tate e shii nge naame ondi mu shii; needi dange ohandi di yandjele omwenyo wange.

16 “Ondi na eedi dimwe dihe fi domoshiunda eshi; nado ondi na oku di eta mo ndele tadi ka uda ondaka yange, notadi ka kala moshiunda shimwe, di na omufita umwe. 17 Tate oku hole nge, molwaashi ohandi ka yandja omwenyo wange opo ndi ke u pewe vali. 18 Kape na ou ta dulu okukufa nge omwenyo wange, ndele ohandi u yandje ame mwene. Ondi na oufemba woku u yandja nondi na oufemba woku u pewa vali. Oshipango eshi onde shi pewa kuTate.”

19 Ndele mokati kOvajuda omwa li vali mwa holoka omashilafano omolweendjovo odo. 20 Opo nee vahapu vomuvo ova tya: “Oku na ondemoni nota i eenghwengu. Omolwashike tamu pwilikine kuye?” 21 Vamwe vali ova ti: “Eendjovo odo kadi fi domunhu e na ondemoni. Mbela ondemoni otai dulu ngoo okutwikulula omesho ovapofi?”

22 Ndele pefimbo opo opa li oshivilo shokudimbuluka eyapulo lotembeli muJerusalem. Osha li okufu, 23 na Jesus okwa li ta ende motembeli momukala waSalomo. 24 Opo nee Ovajuda ove mu dingilila, ndele tava ti kuye: “Omolwashike ito tu kufa* momalimbililo? Ngeenge oove Kristus, tu lombwela.” 25 Jesus okwa tya kuvo: “Onde mu lombwela, ndele inamu itavela. Oilonga oyo handi longo medina laTate oyo tai hepaulula nge. 26 Ndele nye itamu itavele, molwaashi kamu fi eedi dange. 27 Eedi dange ohadi udu ondaka yange, naame ondi di shii nohadi shikula nge. 28 Ohandi di pe omwenyo waalushe, noitadi ka kana nandenande, nokape na ou te ke di vakula mo meke lange. 29 Eedi odo Tate a pa nge oda fimanenena di dule oinima aishe, nokape na ou ta dulu oku di vakula mo meke laTate. 30 Ame naTate otwa hangana.”*

31 Ndele Ovajuda ova kufa vali omamanya ve mu denge. 32 Jesus okwa tya kuvo: “Onde mu ulikila oilonga ihapu iwa ya dja kuTate. Omolwashike mwa hala okudenga nge nomamanya eshi nda longa oilonga oyo?” 33 Opo nee Ovajuda ove mu nyamukula tava ti: “Itatu ku denge nomamanya molwaashi wa longa oilonga iwa, ndele omolwaashi to sheke; osheshi nonande ove omunhu, oto liningi kalunga.” 34 Jesus okwa tya kuvo: “MOmhango yeni hano inamu shangwa taku ti, ‘Ame onda ti: “Onye ookalunga”’?* 35 Ngeenge Kalunga okwa ifana ovo va tokolwa keendjovo daye ‘ookalunga,’ nomishangwa oda popya oshili, 36 omolwashike ame ou nda yapulwa kuTate nonde uya mounyuni tamu ti, ‘Ohandi sheke’ eshi handi ti, ‘Ame Omona waKalunga’? 37 Ngeenge itandi longo oilonga yaTate, inamu itavela nge. 38 Ndele ngeenge ohandi i longo, nonande itamu itavele nge, itaveleni oilonga opo mu shiive nomu kale mu shii kutya Tate oku na ekwatafano naame, nonokutya naame ondi na ekwatafano naTate.” 39 Onghee ova kendabala vali oku mu kwata po, ndele okwe va henuka.

40 Ndele Jesus okwa ya a taulula omulonga waJordan nokwa ka kala konhele oko Johannes a li ha ninginifile ovanhu tete. 41 Opo nee ovanhu vahapu ove uya kuye, ndele tava ti: “Johannes ina longa nande oshikumwifilonga shimwe, ashike ashishe osho a popya shi na sha nomulumenhu ou oshoshili.” 42 Onghee ovanhu vahapu ova li va itavela Jesus.

11 Omulumenhu wedina Lasarus womomukunda Betania, omumwaina waMaria naMarta, okwa li ta vele. 2 Maria, omumwaina waLasarus oo a li ta vele, oye a li a vaeka eemhadi dOmwene omaadi edimba liwa nokwe di pushula neexwiki daye. 3 Ovamwainakadona vaLasarus ova tuma kuJesus tava ti: “Omwene, kaume koye kopofingo ota vele.” 4 Eshi Jesus e shi uda, okwa ti: “Ouyahame ou itau twala mefyo, ndele otau fimanekifa Kalunga opo Omona waKalunga naye a fimanekwe okupitila muo.”

5 Ndele Jesus okwa li e hole Marta, Maria naLasarus. 6 Eshi Jesus a uda kutya Lasarus ota vele, konhele oko a li okwa kala ko natango oule womafiku avali. 7 Konima yomafiku oo avali, okwa lombwela ovahongwa vaye ta ti: “Natu shuneni kuJudea.” 8 Ovahongwa ova tya kuye: “Muhongi,* Ovajudea opo ashike va li va hala oku ku denga nomamanya, ndele owa hala vali okushuna ko?” 9 Jesus okwa ti: “Hano efiku kali na eevili 12? Ngeenge omunhu ota ende mouyelele, ite likoyola kusha molwaashi oku wete ouyelele wounyuni ou. 10 Ndele ou ta ende oufiku, ote likoyola molwaashi muye kamu na ouyelele.”

11 Konima eshi a popya oinima oyo, okwa weda ko ta ti: “Kaume ketu Lasarus okwa kofa, ndele ohandi i ko ndi ke mu pendule.” 12 Opo nee ovahongwa ova tya kuye: “Omwene, ngeenge okwa kofa ota veluka.” 13 Ndele Jesus okwa li a hala kutya Lasarus okwa fya. Ashike ovahongwa ova li tava diladila kutya ota popi kombinga yeemhofi do venevene. 14 Opo nee Jesus okwe va lombwela sha yukilila ta ti: “Lasarus okwa fya, 15 ndele oshiwa eshi inandi hangika ko opo mu dule okwiitavela. Natu yeni ko kuye.” 16 Opo nee Tomas, oo ha ifanwa Omukwanambwiyu, okwa lombwela ovahongwa vakwao ta ti: “Nafye natu yeni, tu ka fyeni pamwe naJesus.”

17 Eshi Jesus a fika, okwa hanga Lasarus a kala mombila* oule womafiku ane. 18 Betania osha li popepi naJerusalem, pa li pe na eekilometa nhatu lwaapo.* 19 Ndele Ovajuda vahapu ova li ve uya okuhekeleka Marta naMaria omolwefyo lomumwainamati. 20 Eshi Marta a uda kutya Jesus oku li mondjila te uya, okwa ya e ke mu shakeneke, ndele Maria okwa fyaala meumbo. 21 Marta okwa tya kuJesus: “Omwene, ngeno opo wa li, ngeno omumwameme ina fya. 22 Ashike nande ongaho, ondi shi shii kutya keshe osho to pula Kalunga ote shi ku pe.” 23 Jesus okwa tya kuye: “Omumwanyoko ota ka nyumuka.” 24 Opo nee Marta okwa tya kuye: “Ondi shi shii kutya ota ka nyumuka mefiku laxuuninwa.” 25 Jesus okwa tya kuye: “Aame enyumuko nomwenyo. Ou ta itavele nge,* nande nafye, ota ka nyumuka. 26 Ndele keshe ou e na omwenyo noku na eitavelo* mwaame, ota kala nomwenyo fiyo alushe. Mbela osho owe shi itavela?” 27 Marta okwa tya kuJesus: “Heeno Omwene, onda itavela kutya oove Kristus, Omona waKalunga, oo a li e na okuuya mounyuni.” 28 Eshi a popya ngaho, okwa ya ndele ta ka ifana omumwaina Maria, nokwe mu lombwela ve li po ovo aveke ta ti: “Omuhongi okwe uya note ku pula.” 29 Eshi Maria e shi uda, okwa fikama diva ndele ta i kuJesus.

30 Jesus ka li a fika momukunda oo, ndele natango okwa li ponhele opo a shakenekwa kuMarta. 31 Eshi Ovajuda ovo va li meumbo tava hekeleke Maria va mona kutya okwa fikama diva ndele ta di mo, ove mu shikula, tava diladila kutya ota i a ka lilile kombila.* 32 Eshi Maria a fika opo pa li Jesus, okwe mu mona ndele ta tu eengolo peemhadi daye nokwa tya kuye: “Omwene, ngeno opo wa li, ngeno omumwameme ina fya.” 33 Eshi Jesus a mona Maria nosho yo Ovajuda ovo va li ve uya naye tava lili, oshe mu kuma komutima ndele ta nyika oluhodi. 34 Opo nee okwa ti: “Omwe mu paka peni?” Ova tya kuye: “Omwene, ila u ka tale po.” 35 Ndele Jesus okwa lila. 36 Opo nee Ovajuda ova ti: “Tala, okwa li e mu hole shili!” 37 Vamwe vomuvo ova ti: “Omolwashike omulumenhu ou a twikulula omupofi ina dula okukelela efyo laau?”

38 Ndele Jesus okwa nyika vali oluhodi, opo nee okwa ya kombila.* Ombila oyo oya li ekololo noya li ya idilwa nemanya. 39 Jesus okwa ti: “Kufei ko emanya.” Opo nee Marta, omumwaina wanakufya, okwa tya kuJesus: “Omwene, oku na okukala ta nyika, shaashi okwa ninga mo omafiku ane.” 40 Jesus okwa tya kuye: “Inandi ku lombwela kutya ngeenge owa itavele oto ka mona efimano laKalunga?” 41 Opo nee ova kufa ko emanya. Jesus okwa tala keulu, ndele ta ti: “Tate, ohandi ku pandula eshi wa uda eilikano lange. 42 Ondi shi shii kutya oho udu nge alushe, ndele ohandi popi ngaha omolwongudu yovanhu ava va dingilila nge opo va itavele kutya oove wa tuma nge.” 43 Eshi a popya ngaho, okwa ingida mokule ta ti: “Lasarus, dja mo!” 44 Opo nee omulumenhu oo a li a fya okwa dja mo a uvikwa nelapi koshipala, nokwa mangwa nomalapi komaoko fiyo okomaulu. Jesus okwa tya kuvo: “Mu mangululeni, ndele tamu mu efa a ye.”

45 Ndele Ovajuda vahapu ovo va li ve uya kuMaria nova mona osho sha ningwa po ova itavela Jesus, 46 ashike vamwe vomuvo ova ya kOvafarisai noku va lombwela osho Jesus a ninga. 47 Opo nee ovapristeri ovakulunhu nOvafarisai ova ongala pamwe noilyo yOmhangu yoPombada yOvajuda, ndele tava ti: “Molwaashi omulumenhu ou ota longo oikumwifilonga ihapu, oshike tu na okuninga po? 48 Ngeenge otwa efa a twikile okuninga ngaho, ovanhu aveshe otave ke mu itavela, nOvaroma otave ke uya ndele tave tu kufa otembeli* novanhu vetu.” 49 Ndele umwe womuvo, Kajafas, oo a li omupristeri munene omudo oo, okwa tya kuvo: “Nye onghalo kamu i udite ko. 50 Mbela kamu wete kutya oshiwa kunye omunhu umwe a fye ponhele yovanhu aveshe va hanaunwe po?” 51 Osho ine shi popya pahalo laye mwene, ndele molwaashi oye a li omupristeri munene omudo oo, okwa xunganeka kutya Jesus ota ka fila oshiwana; 52 hashiwana ashike ndele okwoongela yo ovana vaKalunga ovo va li va halakanifwa. 53 Okudja opo ova li va pangela omhangela ve mu dipae.

54 Jesus ina kala vali ha ende moipafi mokati kOvajuda, ndele okwa ya koshilando shi li popepi nombuwa hashi ifanwa Efraim, oko a ka kala novahongwa vaye. 55 Ndele oshivilo shOvajuda hashi ifanwa Opaasa osha li popepi, novanhu vahapu ova li va ya kuJerusalem va dja komikunda ofimbo oshivilo osho inashi fika opo va ka yelifwe paMhango yaMoses. 56 Opo nee ova li tava kongo Jesus nova pulafana fimbo va li ofika motembeli tava ti: “Otamu ti ngahelipi? Mbela ote uya ngoo koshivilo?” 57 Ndele ovapristeri ovakulunhu nOvafarisai ova yandja elombwelo kutya ngeenge ope na ou e shii kutya Jesus oku li peni ne va shiivifile, opo ve ke mu kwate po.

12 Ofimbo ku na omafiku ahamano opo Opaasa i fike, Jesus okwa fika kuBetania oko kwa li Lasarus oo a nyumuna koufi. 2 Opo nee ove mu longekidila ouvalelo. Marta oye a li te va yakula, na Lasarus okwa li umwe womwaavo va li tava li* pamwe naJesus. 3 Ndele Maria okwa kufa okakende komaadi edimba liwa ketata lolitela,* onarde yo venevene i na ondilo, nokwe a tila keemhadi daJesus, ndele te a pushula ko neexwiki daye. Opo nee eumbo alishe ola kala tali nyika omaadi edimba liwa. 4 Ndele Judas Iskariot, umwe womovahongwa vaJesus, oo a li poku mu kengelela, okwa ti: 5 “Omolwashike omaadi oo edimba liwa inaa landifwa po keedenari 300, ndele tadi pewa eehepele?” 6 Osho ine shi popya shaashi e na ko nasha neehepele, ashike omolwaashi ye ombudi nokwa li ha kala nokakutu koimaliwa noha vake mo oimaliwa oyo tai tulwa mo. 7 Opo nee Jesus okwa ti: “Efeni Maria opo a longekidile olutu lange efiku lepako. 8 Eehepele odi li punye alushe, ndele ame itandi ka kala alushe punye.”

9 Ndele eshi ongudu inene yOvajuda ya uda kutya Jesus oku li kuBetania, oya ya kuye noku ka tala yo Lasarus oo a nyumuna koufi. 10 Ovapristeri ovakulunhu ova li va pangela omhangela va dipae yo Lasarus, 11 molwaashi Ovajuda vahapu ova ya kuBetania nova itavela Jesus omolwaye.

12 Efiku la landula ko, ongudu inene yovanhu ovo va li ve uya koshivilo ova uda kutya Jesus ote uya kuJerusalem. 13 Opo nee ova kufa oivale yomilunga ndele tava i ve ke mu shakeneke, nova hovela okwiingida tava ti: “Ohatu ku indile, mu xupifa! Na nangekwe noupuna ou te uya medina laJehova, Ohamba yaIsrael!” 14 Eshi Jesus a mona okandongi okwa londa kuko ngaashi pa shangwa, taku ti: 15 “Ino tila omonakadona waSion. Tala, ohamba yoye otai uya ya londa kokandongi.” 16 Ovahongwa vaye kava li ve udite ko tete oinima oyo, ndele eshi Jesus a tumbalekwa, ova dimbuluka kutya oinima aishe oyo ve mu ningila oya li ya shangwa nale shi na sha naye.

17 Ndele ovanhu ovo va li pamwe naJesus eshi a nyumuna Lasarus koufi noku mu ifana mo mombila* ova kala tava hepaulula kombinga yaye. 18 Eshi ongudu yovanhu ya uda kutya okwa longa oshikumwifilonga osho, oya ya i ke mu shakeneke. 19 Onghee Ovafarisai ova hovela okukundafana tava ti: “Taleni, eemhangela detu itadi kwafa sha. Ounyuni aushe otau mu shikula.”

20 Ndele mokati kaavo va li ve uya okulongela Kalunga koshivilo osho omwa li Ovagreka. 21 Onghee ova ya kuFilippus oo a dja kuBetsaida shaGalilea, ndele tave mu indile tava ti: “Omufimanekwa, otwa hala okumona Jesus.” 22 Filippus okwa lombwela Andreas. Opo nee Andreas naFilippus ova ya ndele tava ka lombwela Jesus.

23 Jesus okwa tya kuvo: “Efimbo ola fika opo Omona womunhu a tumbalekwe. 24 Oshili ohandi mu lombwele, omuma yoshilya ngeenge inai wila medu ndele tai file mo, otai kala oyo aike, ashike ngeenge oya file mo ndele tai mene, otai dala oilya ihapu. 25 Keshe ou e hole omwenyo waye ote u kanifa, ndele ou e tonde omwenyo waye mounyuni ou ote u xupifa opo a ka mone omwenyo waalushe. 26 Keshe ou a hala okuninga omupiya wange na shikule nge, nakeshe apa ndi li opo ta ka kala yo. Ngeenge ope na ou a hala okuninga omupiya wange, Tate ote ke mu fimaneka. 27 Paife onda* nyika oluhodi, oshike vali ndi na okutya? Tate, xupife nge mwaasho shi li pokuningilwa nge.* Kakele kaasho, eshi osho nda endela. 28 Tate, fimanekifa edina loye.” Opo nee meulu omwa dja ondaka tai ti: “Onde li fimanekifa nale, nohandi ke li fimanekifa vali.”

29 Eshi ongudu oyo ya li po ofika ya uda ondaka oyo, oya ti kutya odula ya ngunguma. Vamwe vali ova ti: “Omweengeli a popya naye.” 30 Jesus okwa ti: “Ondaka oyo inai popya molwange, ndele omolweni. 31 Ounyuni ou otau tokolwa, nomupangeli wao ota ekelwashi. 32 Ndele ame ngeenge onda endjelelifwa, ohandi ka nanena kwaame ovanhu vomaludi aeshe.” 33 Oinima oyo okwe i popya opo a holole kutya oku li poku ka fya efyo la tya ngahelipi. 34 Opo nee ongudu yovanhu oya tya kuJesus: “Omhango oya ti kutya Kristus ota kala fiyo alushe. Ndele omolwashike to ti kutya Omona womunhu ota endjelelifwa? Omona womunhu oo olyelye hano?” 35 Ndele Jesus okwa tya kuvo: “Ouyelele otau ka kala mokati keni okafimbo kanini. Onghee endeni fimbo mu li mouyelele opo omilaulu dihe mu finde; keshe ou ta ende momilaulu ita shiiva kutya okwa finda peni. 36 Ofimbo mu na ouyelele, kaleni mu na eitavelo* muo opo mu ninge ovana vouyelele.”

Eshi Jesus a mana okupopya oinima oyo, okwa ya ndele te va hondama. 37 Nonande okwa longa oikumwifilonga ihapu moipafi yavo, kava li ve mu itavela, 38 opo eendjovo domuprofeti Jesaja di wanifwe odo tadi ti: “Jehova, olyelye a itavela osho a uda kufye? Ndele olyelye a hololelwa eenghono dokwooko kwaJehova?” 39 Jesaja okwa popya vali etomheno limwe kutya omolwashike va li inava dula okwiitavela a ti: 40 “Okwa twikifa omesho avo nokwa kukutika omitima davo opo vaha mone ko novaha ude ko, ndele tave lidilulula opo ndi va velule.” 41 Jesaja okwa popya oinima oyo molwaashi okwa mona etumbalo laKristus, nokwa popya kombinga yaye. 42 Kakele kaasho, ovanhu vahapu ova li ve mu itavela, mwa kwatelwa novapangeli, ashike kava li va dula okuhepaulula eitavelo lavo omolwOvafarisai, shaashi ngeenge ova ningi ngaho, otava kondwa mo moinagoga. 43 Ova li ve hole okupandika kovanhu ponhele yokukala va hokiwa kuKalunga.

44 Ndele Jesus okwa popya mokule ta ti: “Keshe ou ta itavele nge ota itavele yo ou a tuma nge, 45 nakeshe ou a mona nge okwa mona yo ou a tuma nge. 46 Onde uya mounyuni ngaashi ouyelele, opo keshe ou ta itavele nge aha kale momilaulu. 47 Keshe ou ta udu eendjovo dange ndele ite di diinine, itandi mu tokola, osheshi inandi uya okutokola ounyuni, ashike onde uya oku u xupifa. 48 Keshe ou ita pwilikine kwaame noita tambula eendjovo dange, ope na ou te mu tokola. Eendjovo odo nda popya odo tadi ke mu tokola mefiku laxuuninwa. 49 Osheshi inandi popya kwaame mwene, ndele Tate ou a tuma nge okwa lombwela nge osho ndi na okupopya naasho ndi na okuhonga. 50 Ondi shi shii kutya osho a lombwela nge otashi twala komwenyo waalushe. Onghee keshe osho handi popi, ohandi popi ngaashi naanaa Tate a lombwela nge.”

13 Ndele fimbo oshivilo shOpaasa inashi fika, Jesus okwa li e shi shii kutya efimbo laye lokudja mo mounyuni ou a shune kuXe ola fika. Okwa li e hole ovashikuli vaye ovo a li pamwe navo, nokwa kala e va hole fiyo exulilo longhalamwenyo yaye. 2 Fimbo va li tava li ouvalelo, Ondiaboli oya li ya nwefa mo* Judas Iskariot, omona waSimon a kengelele Jesus. 3 Molwaashi Jesus okwa li e shi shii kutya okwa pewa oinima aishe kuXe nonokutya okwa dja kuye nota shuna kuye, 4 okwa fikama po pouvalelo, ndele ta dula mo oshikutu shaye shokombada. Opo nee okwa kufa oshihaduku, ndele te shi likambeke moshiya. 5 Konima yaasho, okwa tula omeva moshiyaxa, ndele ta hovele okukosha eemhadi dovahongwa vaye nokwe di pushula noshihaduku osho a li e likambeka. 6 Opo nee okwe uya kuSimon Petrus, ndele Simon Petrus ta ti kuye: “Omwene, oto kosho eemhadi dange?” 7 Jesus okwe mu nyamukula ta ti: “Eshi handi ningi ito shi udu ko paife, ashike oto ke shi uda ko nale.” 8 Petrus okwa tya kuye: “Ku na okukosha eemhadi dange nandenande.” Jesus okwa ti: “Ngeenge itandi kosho eemhadi doye, ito kala vali naame.” 9 Simon Petrus okwa tya kuye: “Omwene, ino kosha ashike eemhadi dange, ndele koshe nge yo keenyala nomomutwe.” 10 Jesus okwa tya kuye: “Keshe ou a koshwa olutu alishe okwa pumbwa ashike okukoshwa keemhadi opo a kale a yela filufilu. Ndele nye omwa yela, ashike haamushe.” 11 Jesus okwa li e shii oo a li te ke mu kengelela, nomolwaasho a ti: “Haamushe mwa yela.”

12 Konima eshi a kosha eemhadi davo, okwa djala oshikutu shaye shokombada ndele ta kala vali omutumba poshitaafula nokwe va pula ta ti: “Mbela omu shi shii kutya omolwashike nda kosha eemhadi deni? 13 Omu li mondjila eshi hamu ifana nge ‘Omuhongi’ nosho yo ‘Omwene,’ osheshi ame Omuhongi nOmwene. 14 Onghee hano, ngeenge ame, Omwene nOmuhongi onda kosha eemhadi deni, nanye kaleni yo* hamu koshafana keemhadi. 15 Osheshi onde mu tulila po oshihopaenenwa mu ninge ngaashi naanaa nde mu ningila. 16 Oshili ohandi mu lombwele, omupiya ke dule omwene waye, nomutumwa ke dule oo e mu tuma. 17 Ngeenge omu shii oinima oyo notamu i tula moilonga, otamu kala mwa hafa. 18 Ame itandi popi kombinga yeni amushe; ovo nda hoolola ondi va shii. Osho osha ningwa opo omushangwa u wanifwe, ou tau ti: ‘Ou a lya omungome wange okwa ninga omutondi wange.’* 19 Ohandi mu lombwele paife fimbo inashi ningwa, opo ngeenge sha ningwa, mu itavele kutya omushangwa oo aame tau popi. 20 Oshili ohandi mu lombwele, keshe ou ta tambula ou nda tuma, aame yo a tambula, nakeshe ou a tambula nge, okwa tambula yo Ou a tuma nge.”

21 Konima eshi Jesus a popya oinima oyo, okwa nyika oluhodi, ndele ta popi ta ti: “Oshili ohandi mu lombwele, umwe womunye ota ka kengelela nge.” 22 Opo nee ovahongwa ova talafana va limbililwa tave lipula kutya ota popi kombinga yalyelye. 23 Ndele omuhongwa umwe oo a li e holike kuJesus okwa li omutumba popepi naye.* 24 Opo nee Simon Petrus okwa komonena komutwe omuhongwa oo ndele te mu pula ta ti: “Ota popi kombinga yalyelye?” 25 Omuhongwa oo okwa yaamena ponhulo yaJesus ndele te mu pula ta ti: “Omwene, olyelye hano?” 26 Jesus okwa nyamukula ta ti: “Oye ou handi ka pa omungome nde u velela.” Konima eshi a velela omungome okwe u pa Judas, omona waSimon Iskariot. 27 Eshi Judas a tambula omungome oo, Satana okwa nwefa mo omutima waye. Opo nee Jesus okwa tya kuJudas: “Osho wa hala okuninga, shi ninga diva.” 28 Ndele aveshe ovo va li omutumba poshitaafula kava li ve shii kutya omolwashike Jesus a lombwelela Judas eendjovo odo. 29 Molwaashi Judas oye a li ha kala nokakutu koimaliwa, vamwe ova li tava diladila kutya Jesus okwa li te mu lombwele kutya, “Ka lande osho twa pumbwa poshivilo,” ile a yandje sha keehepele. 30 Eshi Judas a tambula omungome oo, okwa ya diva pondje a finda momilaulu.

31 Konima eshi Judas a ya pondje, Jesus okwa ti: “Omona womunhu paife ota fimanekwa, na Kalunga ota fimanekwa okupitila muye. 32 Kalunga mwene ote ke mu fimanekifa, note ke shi ninga diva. 33 Ookaume,* ohandi kala nanye okafimbo kaxupi. Opo nee otamu ka konga nge, ndele ngaashi nda lombwela Ovajuda, nanye ohandi shi mu lombwele yo kutya, ‘Oku handi i itamu dulu okuuya ko.’ 34 Ohandi mu pe oshipango shipe kutya kaleni mu holafane, ndele kaleni mu holafane ngaashi ame nda kala ndi mu hole. 35 Kungaho, ovanhu aveshe otava ka shiiva kutya nye ovahongwa vange ngeenge omu holafane.”

36 Simon Petrus okwa tya kuye: “Omwene, oto i peni?” Jesus okwa ti: “Oku handi i ito dulu okuya ko paife, ndele oto ke uya ko nale.” 37 Opo nee Petrus okwa tya kuye: “Omwene, omolwashike itandi dulu okuya ko paife? Onde lilongekida okufya ponhele yoye.” 38 Jesus okwa ti: “Owe lilongekida ngoo shili okufya ponhele yange? Oshili ohandi ku lombwele, fimbo ekondobolo inali kwena, oto ke lidimbika nge lutatu.”

14 “Inamu kala mwa nyika oluhodi momitima deni, ndele kaleni mu na eitavelo* muKalunga nomwaame. 2 Meumbo laTate omu na eenhele dihapu.* Ngeno hasho sha li ngaho, ngeno inandi popya ngaho. Ndele paife ohandi i ndi ke mu longekidile onhele. 3 Ngeenge onda i ndi ke mu longekidile onhele, ohandi ka aluka ndi mu twale keumbo opo nanye mu ka kale apa handi ka kala. 4 Ndele ondjila yaaku handi i omu i shii.”

5 Tomas okwa tya kuye: “Omwene, ondjila ohatu i shiiva ngahelipi ngeenge katu shii oku to i?”

6 Jesus okwa tya kuye: “Aame ondjila, noshili nomwenyo. Kape na ou te uya kuTate, ngeenge ita pitile mwaame. 7 Ngeno omwa li mu shii nge, ngeno naTate omu mu shii yo, ashike okudja paife omwe mu shiiva nomwe mu mona.”

8 Filippus okwa tya kuye: “Omwene, tu ulikila Xo opo tu kale twa mbilipalelwa.”

9 Jesus okwa tya kuye: “Filippus, onda kala nanye efimbo lile, ndele fiyo opaife ku shii nge? Keshe ou a mona nge, okwa mona yo Tate. Ndele omolwashike to ti, ‘Tu ulikila Xo’? 10 Mbela ino itavela kutya ondi na ekwatafano naTate nosho yo kutya Tate oku na ekwatafano naame? Oinima ei handi mu lombwele inai dja mwaame mwene, ndele Tate ou e na ekwatafano naame oye ta longo oilonga yaye. 11 Itavelei nge eshi handi mu lombwele kutya ondi na ekwatafano naTate nosho yo kutya Tate oku na ekwatafano naame, ngeenge hasho itaveleni omolwoilonga oyo handi longo. 12 Oshili ohandi mu lombwele, keshe ou e na eitavelo* mwaame ota ka longa yo oilonga ei handi longo; nota ka longa oilonga inene i dule ei shaashi ohandi i kuTate. 13 Ndele keshe osho tamu indile medina lange, ohandi shi mu pe, opo Omona a fimanekife Xe. 14 Ngeenge omwa indile sha medina lange, ohandi shi mu pe.

15 “Ngeenge omu hole nge, otamu ka diinina oipango yange. 16 Ndele ohandi ka indila Tate note ke mu pa vali osho tashi mu kwafele* fiyo alushe, 17 omhepo iyapuki oyo tai holola oshili. Itai pewa ounyuni, molwaashi inau i mona noinau i shiiva. Nye omu i shii, molwaashi oi li munye notai kala pamwe nanye. 18 Itandi mu fiye po onye amuke.* Ohandi aluka. 19 Mafiku ounyuni itau ka mona nge vali, ndele nye otamu ka mona nge, shaashi ondi na omwenyo, nanye otamu ka kala nomwenyo. 20 Efiku olo otamu ka shiiva kutya Tate oku na ekwatafano naame, nanye omu na ekwatafano naame nosho yo kutya ame ondi na ekwatafano nanye. 21 Keshe ou ta tambula oipango yange nokudulika kuyo oku hole nge. Keshe ou e hole nge ota ka kala e holike kuTate, naame ohandi ka kala ndi mu hole nohandi ke mu lihololela.”

22 Judas, ihe fi ei yaIskariot, okwe mu pula ta ti: “Omwene, oshike sha ningwa po opo u kale wa hala oku tu lihololela ndele haunyuni?”

23 Jesus okwe mu nyamukula ta ti: “Keshe ou e hole nge, ota diinine eendjovo dange, na Tate ota ka kala e mu hole, nohatu ke uya kuye ndele hatu kala puye. 24 Ou iha diinine eendjovo dange, ke hole nge. Eendjovo edi handi mu lombwele kadi fi dange, ndele odaTate ou a tuma nge.

25 “Oinima ei ohandi i mu lombwele fimbo ndi li nanye. 26 Ndele omhepo iyapuki, oyo Tate ta ka tuma medina lange i mu kwafele, otai ke mu honga oinima aishe noku mu dimbulukifa aishe oyo nde mu lombwela. 27 Ohandi mu fiile ombili oyo nde mu pa. Inandi i mu pa ngaashi ounyuni hau i yandje. Ndele inamu kala mwa nyika oluhodi momitima deni noinamu efa di mbadapale. 28 Omwa uda osho nde mu lombwela nda ti, ‘Ohandi i nohandi mu alukile.’ Ngeenge omu hole nge, otamu kala mwa hafa eshi handi i kuTate, osheshi Tate oku dule nge. 29 Onde mu lombwela fimbo inashi ningwa opo mu itavele eshi tashi ka ningwa. 30 Itandi ka popya vali nanye shihapu, osheshi omupangeli wounyuni ou ote uya noke na eenghono dokupangela nge.* 31 Ndele opo ounyuni u shiive kutya ondi hole Tate, ohandi ningi naanaa ngaashi Tate a lombwela nge. Fikameni, tu djeni po apa.

15 “Ame omundjebele washili, na Tate omulongi womoshikunino. 2 Oitai aishe oyo ihai ima ote i tete ko kwaame, ndele oyo hai ima ote i totola opo i ime oiimati ihapu. 3 Nye omwa yela nale omolweendjovo odo nde mu lombwela. 4 Kaleni mu na ekwatafano naame opo nee naame ohandi kala ndi na ekwatafano nanye. Ngaashi ashike oshitai ihashi dulu okwiima oiimati shihe li komuti, nanye itamu dulu okwiimika oiimati* okuninga mu na ekwatafano naame. 5 Ame omundjebele, ofimbo nye oitai yao. Keshe ou ta kala e na ekwatafano naame nondi nekwatafano naye, ota imike oiimati ihapu, ndele ngeenge kamu na ekwatafano naame itamu dulu okuninga sha nandenande. 6 Keshe ou ehe na ekwatafano naame ota kala ngaashi oshitai sha ekelwashi ndele tashi kukuta. Ovanhu ohava ongele oitai oyo mediko, ndele tave i xwike po. 7 Ngeenge omu na ekwatafano naame nohamu tuvikile eendjovo dange momitima deni, puleni keshe eshi mwa hala opo nee otamu ke shi pewa. 8 Tate ota ka fimanekwa ngeenge omwa kala hamu imike oiimati ihapu nokuulika kutya nye ovahongwa vange. 9 Ngaashi Tate a kala e hole nge, naame osho nda kala ndi mu hole; onghee kaleni mohole yange. 10 Ngeenge omwa kala hamu diinine oipango yange, ohandi kala ndi mu hole, ngaashi ashike naame handi diinine oipango yaTate noku hole nge.

11 “Oinima oyo onde i mu lombwela opo mu kale mu na ehafo ngaashi ame ndi li na. 12 Oshipango shange osho eshi, kaleni mu holafane ngaashi ame nda kala ndi mu hole. 13 Kape na ou e na ohole i dule yaau ta yandjele ookaume kaye omwenyo waye. 14 Ngeenge omwa ningi osho handi mu lombwele, onye ookaume kange. 15 Itandi mu ifana vali ovapiya molwaashi omupiya iha kala e shii osho omwene waye ta ningi. Ndele ohandi mu ifana ookaume molwaashi onde mu shiivifila oinima aishe oyo nda uda kuTate. 16 Hanye mwa hoolola nge, ndele aame nde mu hoolola opo mu twikile okwiimika oiimati oyo tai kalelele. Ndele keshe eshi tamu indile kuTate medina lange, ote shi mu pe.

17 “Onde mu lombwela oinima oyo opo mu kale mu holafane. 18 Ngeenge ounyuni ou mu tonde, kaleni mu shii kutya aame wa tonda tete. 19 Ngeno omwa li oshitukulwa shounyuni, ngeno ounyuni ou mu hole. Ndele molwaashi onde mu hoolola mo mounyuni muha kale oshitukulwa shao, ounyuni ou mu tonde. 20 Dimbulukeni eendjovo odo nde mu lombwela, nda ti: Omupiya ke dule omwene waye. Ngaashi va hepeka nge, nanye otave ke mu hepeka yo; ngeno ova li va diinina eendjovo dange, ngeno otava diinine yo eendjovo deni. 21 Ndele oinima aishe oyo otave i mu ningile omolwedina lange, molwaashi kave shii ou a tuma nge. 22 Ngeno kandi uyile ndele handi popi navo, ngeno kave na etimba. Ndele paife kave na elipopilo lasha. 23 Keshe oo e tonde nge oku tonde yo Tate. 24 Ngeno nghi longele oilonga oyo inai longwa nande okuumwe mokati kavo, ngeno kave na etimba; ashike paife ova mona nge ndele ove tonde nge nove tonde yo Tate. 25 Eshi osha ningwa opo ku wanifwe osho sha shangwa mOmhango yavo, kwa ti: ‘Ove tonde nge ongaho.’ 26 Ngeenge omukwafeli oo handi tumu okudja kuTate okwe uya, omhepo iyapuki yaTate oyo tai holola oshili, ota ka hepaulula kombinga yange. 27 Nanye otamu ka hepaulula yo kombinga yange molwaashi onda kala pamwe nanye okudja pehovelo.

16 “Onde mu lombwela oinima oyo opo muha efe po eitavelo leni.* 2 Ovanhu otave ke mu konda mo meeshinagoga. Ndele efimbo otali ke uya eshi ovo tave ke mu dipaa tava ka diladila kutya otava longele Kalunga oilonga iyapuki. 3 Otava ka ninga ngaho molwaashi kave shii Tate ile ame. 4 Kakele kaasho, onde mu lombwela oinima oyo opo ngeenge efimbo olo tai ka ningwa la fiki, otamu ka dimbuluka kutya onde i mu lombwelele.

“Oinima oyo kanda li nde i mu lombwela pehovelo molwaashi onda li punye. 5 Ndele paife ohandi i kwaau a tuma nge, ashike kape na nande oumwe womunye a pula nge kutya, ‘Oto i peni?’ 6 Paife omwa nyika oluhodi momitima deni eshi nde mu lombwela oinima oyo. 7 Oshili ohandi mu lombwele kutya ohandi i omolwouwa weni. Osheshi ngeenge inandi ya, itamu ka pewa omhepo iyapuki, ndele ngeenge onda i, ohandi ke i mu tumina. 8 Ndele ngeenge oye uya, otai ka holola kutya oulunde oshike, ouyuki oshike netokolo laKalunga kutya olilipi: 9 tete otai holola oulunde molwaashi ovanhu inava itavela nge.* 10 Opo nee otai ka holola ouyuki molwaashi ohandi i kuTate noitamu ka mona nge vali. 11 Otai ka holola yo etokolo molwaashi omupangeli wounyuni ou okwa tokolwa.

12 “Ondi na oinima ihapu natango oku mu lombwela, ndele itamu dulu oku i uda ko paife. 13 Ndele ngeenge omhepo iyapuki* oye uya, otai ke mu wilika noku mu kwafela mu ude ko oshili pauyadi, osheshi hayo tai ka popya kuyo vene, ndele otai ka popya osho ya uda notai ke mu shiivifila oinima oyo tai ke uya. 14 Otai ka tumbalekifa nge molwaashi otai ke mu shiivifila osho ya uda kwaame. 15 Oinima aishe oyo Tate e na oyange, nomolwaashi nda ti kutya omhepo iyapuki otai ke mu shiivifila osho ya uda kwaame. 16 Ngeenge pa piti okafimbo kanini, itamu ka mona nge vali, ndele natango konima yokafimbo kanini, otamu ka mona nge.”

17 Ndele vamwe vomovahongwa vaye ova pulafana tava ti: “Okwa hala okutya ngahelipi eshi ta ti, ‘Ngeenge pa piti okafimbo kanini itamu ka mona nge vali, ndele konima yokafimbo kanini otamu ka mona nge,’ nosho yo kutya ‘ohandi i kuTate’?” 18 Onghee ova tya: “Okwa hala okutya ngahelipi eshi ta ti, ‘okafimbo kanini’? Katu shi shii kutya ota popi kombinga yashike.” 19 Eshi Jesus a didilika kutya ova hala oku mu pula, okwa tya kuvo: “Otamu pulafana molwaashi nda ti: ‘Ngeenge pa piti okafimbo kanini itamu ka mona nge, ndele konima yokafimbo kanini otamu ka mona nge vali’? 20 Oshili ohandi mu lombwele, otamu ka lila nokulililila, ndele ounyuni otau ka hafa; otamu ka nyika oluhodi, ashike oluhodi leni otali ka shituka ehafo. 21 Ngeenge omukainhu e li pokumona okaana oha kala e udite ouyahame omolwoshifeta, ndele ngeenge okaana oka dalwa iha dimbuluka vali ouyahame oo molwaashi oha kala a hafa eshi a mona okaana. 22 Paife nanye omwa nyika oluhodi, ndele eshi tamu ka mona nge vali, otamu ka kala mwa hafa, nokape na ou te ke mu kufa ehafo leni. 23 Mefiku olo itamu ka pula nge sha nandenande. Oshili ohandi mu lombwele, ngeenge omwa pula sha Tate, ote ke shi mu pa medina lange. 24 Fiyo opapa kamu na eshi mwa pula medina lange. Puleni ndele tamu pewa opo mu kale nehafo linene.

25 “Oinima oyo onde i mu lombwela momafaneko. Ndele efimbo otali uya eshi itandi ka popya vali nanye momafaneko, ashike ohandi ke mu lombwela kombinga yaTate sha yukilila. 26 Mefiku olo otamu ka indila Tate medina lange. Eshi nda popya ngaho inandi hala kutya ohandi ke mu indilila ko. 27 Tate oku mu hole, molwaashi omu hole nge nomwa itavela kutya ondi li omukalelipo waye. 28 Onde uya mounyuni ndi li omukalelipo waTate. Ndele ohandi fiye po ounyuni nohandi i kuTate.”

29 Ovahongwa vaye ova ti: “Tala, paife owa popya oinima ya fatuka eshi ino longifa omafaneko. 30 Paife otu shi shii kutya oinima aishe ou i shii nokape na ou a pumbwa oku ku pula sha. Osho oshe tu ningifa tu itavele kutya owa dja kuKalunga.” 31 Jesus okwa tya kuvo: “Mbela paife omwa itavela? 32 Taleni, efimbo otali uya, notali uya diva eshi amushe tamu ka fiya nge po, ndele keshe umwe ta i keumbo lavo. Ndele itandi ka fyaala po aame andike molwaashi Tate oku li pamwe naame. 33 Oinima oyo onde i mu lombwela opo mu kale mu na ombili omolwange. Otamu ka shakeneka omaudjuu mounyuni, ashike kaleni mu na omukumo. Ame onda finda ounyuni.”

17 Eshi Jesus a popya oinima oyo, okwa tala keulu ndele ta ti: “Tate, efimbo ola fika. Fimanekifa omona woye opo naye e ku fimanekife, 2 ngaashi ashike we mu pa eenghonopangelo dokupangela ovanhu aveshe. Ndele aveshe ovo we mu pa ote ke va pa omwenyo waalushe. 3 Opo ovanhu va ka mone omwenyo waalushe, ove na okushiiva kutya oove auke Kalunga kashili naau wa tuma, Jesus Kristus. 4 Onde ku fimanekifa kombada yedu, nonda mana oilonga oyo wa li wa pa nge. 5 Ndele paife Tate fimanekife nge yo nefimano olo nda li ndi na eshi nda li pwoove fimbo ounyuni inau shitwa.

6 “Ovanhu ava wa pa nge mounyuni onde va hololela* edina loye. Ova li voye, ndele owe va pa nge nova diinina* eendjovo doye. 7 Ndele paife ove shi shii kutya oinima aishe oyo ndi na oya dja kwoove 8 molwaashi onde va lombwela oinima oyo wa lombwela nge nove i tambula ko. Ova shiiva kutya ondi li omukalelipo woye nova itavela kutya oove wa tuma nge. 9 Onda ilikanena ava wa pa nge molwaashi ovoye, ndele inandi ilikanena ounyuni; 10 oinima aishe oyo ndi na oyoye naai yoye oyange, nonde ku fimanekifa mokati kavo.

11 “Ame kandi li vali mounyuni shaashi ohandi uya kwoove, ndele vo ove li mounyuni. Tate Omuyapuki, va amena omolwedina loye olo wa pa nge opo va kale va hangana ngaashi fye naave twa hangana. 12 Eshi nda li navo onda kala handi va amene omolwedina loye olo wa pa nge; onde va amena nokape na nande oumwe womuvo a hanaunwa po kakele komona wehanauno opo omushangwa u wanifwe. 13 Ndele ohandi uya kwoove, noinima ei ohandi i popi mounyuni opo va kale ve na ehafo olo ndi na. 14 Onde va lombwela eendjovo doye, ndele ounyuni ou va tonde molwaashi kave fi oshitukulwa shounyuni, ngaashi ashike ame ndihe fi oshitukulwa shao.

15 “Itandi indile u va kufe mo mounyuni, ndele ou va amene komunawii. 16 Kave fi oshitukulwa shounyuni, ngaashi ashike ame ndihe fi oshitukulwa shao. 17 Va yapula noshili yoye; eendjovo doye odo oshili. 18 Ngaashi ashike wa tuma nge mounyuni, naame onde va tuma yo mounyuni. 19 Ohandi liyapula molwavo opo navo va yapulwe noshili yoye.

20 “Itandi ilikanene ashike ava, ndele naaveshe yo ovo tava ka itavela nge omolweendjovo davo, 21 opo aveshe va kale va hangana, ngaashi fye naave Tate tu na ekwatafano. Navo nava kale yo ve na ekwatafano nafye opo ounyuni u itavele kutya oove wa tuma nge. 22 Onde va pa efimano olo wa pa nge opo va kale va hangana ngaashi fye naave twa hangana. 23 Ngaashi u na ekwatafano naame, naame ondi na ekwatafano navo opo va kale va hangana filufilu, nounyuni u shiive kutya oove wa tuma nge nonokutya ou va hole ngaashi u hole nge. 24 Tate, onda hala ava wa pa nge va ka kale apa handi ka kala opo va ka mone efimano olo wa pa nge molwaashi owa kala u hole nge fimbo ounyuni inau shitwa. 25 Tate Omuyuki, ounyuni kau ku shii, ndele ame ondi ku shii, naava ova shiiva kutya oove wa tuma nge. 26 Onde va shiivifila edina loye nohandi ke li shiivifa natango opo u kale u va hole ngaashi u hole nge, nondi kale nekwatafano navo.”

18 Konima eshi Jesus a popya oinima oyo, okwa ya koshikunino pamwe novahongwa vaye va tauluka olufilu laKidron.* 2 Ashike Judas, omukengeleli waye, naye okwa li e shii onhele oyo molwaashi Jesus oko a li ha kala luhapu novahongwa vaye. 3 Ndele Judas okwe uya pamwe nongudu yovakwaita nosho yo ovakeleli votembeli va tumwa kovapristeri ovakulunhu nokOvafarisai, nove uya ve na eenyika, eelamba noilwifo. 4 Molwaashi Jesus okwa li e shii ashishe osho sha li poku ke mu ningilwa, okwa ehena komesho, ndele ta ti kuvo: “Olyelye tamu kongo?” 5 Ova ti: “OJesus Omunasaret.” Okwa tya kuvo: “Aame ou.” Ndele Judas omukengeleli waye naye okwa li pamwe nongudu oyo.

6 Eshi Jesus a popya kutya, “Aame ou,” ova shuna konima ndele tave lidenge pedu. 7 Opo nee okwe va pula vali ta ti: “Olyelye tamu kongo?” Ova ti: “OJesus Omunasaret.” 8 Jesus okwa ti: “Onde mu lombwela kutya aame ou. Ngeenge aame tamu kongo, efeni ovalumenhu ava va ye.” 9 Osho osha wanifa po osho a popile ta ti: “Ovo wa pa nge inandi kanifa po nande oumwe.”

10 Ndele Simon Petrus, oo a li e na eongamukonda, okwe li pweya mo nokuteta ko okutwi kwokolulyo kwomupiya womupristeri munene. Edina lomupiya oo oMalkus. 11 Opo nee Jesus okwa tya kuPetrus: “Shunifa eongamukonda moshilaleko. Mbela nghi na okunwa eholo olo Tate a pa nge?”

12 Ndele ovakwaita, omukulunhu wetangakwaita nosho yo ovakeleli votembeli vOvajuda ova kwata po Jesus noku mu manga. 13 Opo nee ove mu twala kuHannas, xemweno yaKajafas, oo a li omupristeri munene omudo oo. 14 Kajafas oye a lombwelele Ovajuda kutya oshiwa kuvo omunhu umwe a fye ponhele yovanhu aveshe.

15 Simon Petrus nomuhongwa mukwao umwe ova li va landula Jesus. Omuhongwa oo okwa li e shiivike komupristeri munene nokwa li a ya pamwe naJesus momukala womupristeri munene, 16 ndele Petrus okwa li a fyaala pondje pomuvelo. Opo nee omuhongwa mukwao oo a li e shiivike komupristeri munene okwa ka popya nomupiya okakadona oo ha kelele pomuvelo opo Petrus e uye meni. 17 Omupiya okakadona oo okwa tya kuPetrus: “Hano naave ku fi omuhongwa womulumenhu ou?” Petrus okwa ti: “Ahowe.” 18 Ndele ovapiya nosho yo ovakeleli votembeli ova li va fikama pomundilo oo va tema tava xuxumukwa molwaashi okwa li ku na outalala. Petrus naye okwa li ofika ta xuxumukwa pamwe navo.

19 Opo nee omupristeri omukulunhu okwa pula Jesus kombinga yovahongwa vaye nosho yo ehongo laye. 20 Jesus okwa tya kuye: “Onda kala handi popi moipafi yovanhu. Onda kala handi hongo alushe moshinagoga nomotembeli, omo Ovajuda aveshe hava ongala, noinandi popya sha meholeko. 21 Omolwashike to pulile nge? Pula ovo va uda osho nde va lombwela. Ovo ve shii osho nda popya.” 22 Eshi Jesus a popya ngaho, umwe womovakeleli votembeli ovo va li ofika popepi okwe mu denga enghava moshipala, ndele ta ti: “Osho ngoo u na okunyamukula omupristeri omukulunhu ngaho?” 23 Jesus okwa tya kuye: “Ngeenge onda popya sha sha puka, shi lombwele nge, ndele ngeenge osho nda popya oshi li mondjila, oto dengele nge shike?” 24 Opo nee Hannas okwa mangifa Jesus, ndele te mu tumu komupristeri munene Kajafas.

25 Ndele Simon Petrus okwa li ofika ta xuxumukwa. Opo nee ovanhu ove mu pula tava ti: “Hano naave ku fi umwe vomovahongwa vaye?” Petrus okwe likala ta ti: “Ahowe.” 26 Umwe womovapiya vomupristeri munene, omupambele womulumenhu oo a li a tetwa okutwi kuPetrus, okwa ti: “Hano inandi ku mona u li naye moshikunino?” 27 Petrus okwe likala vali, ndele diva ekondobolo ola kwena.

28 Ndele ongula inene ova kufa Jesus meumbo laKajafas nove mu twala keumbo langoloneya Pilatus. Ashike vo inava ya mo meumbo langoloneya opo vehe linyateke va dule oku ka lya Opaasa. 29 Pilatus okwe uya kuvo pondje, ndele ta ti: “Omulumenhu ou okwa longa owii washike?” 30 Ove mu nyamukula tava ti: “Ngeno omulumenhu ou ka li a longa owii washa,* ngeno inatu mu eta kwoove.” 31 Opo nee Pilatus okwa tya kuvo: “Mu kufei po mu mu tokole pamhango yeni.” Ovajuda ova tya kuye: “Pamhango inatu pitikwa tu dipae omunhu.” 32 Osho osha li tashi wanifa po eendjovo odo da popiwa kuJesus opo a ulike kutya ota ka fya efyo la tya ngahelipi.

33 Pilatus okwa shuna vali meumbo, ndele ta pula Jesus ta ti: “Oove Ohamba yOvajuda?” 34 Jesus okwe mu nyamukula ta ti: “Oto pula nge ngoo shili wa hala okushiiva ile osheshi wa uda nge kuvamwe?” 35 Pilatus okwa ti: “Ame nghi fi Omujuda. Oshiwana sheni novapristeri ovakulunhu ovo ve ku yandja momake ange. Owa ninga shike?” 36 Jesus okwa nyamukula ta ti: “Ouhamba wange kau fi oshitukulwa shounyuni ou. Ngeno owa li oshitukulwa shounyuni ou, ovashikuli vange ngeno ova lwa opo ndiha yandjwe momake Ovajuda. Ashike Ouhamba wange kau fi womounyuni ou.” 37 Pilatus okwa tya kuye: “Tashi ti ove ohamba?” Jesus okwe mu nyamukula ta ti: “Osho naanaa ngaashi wa popya kutya ame ohamba. Onda dalwa nonde uya mounyuni opo ndi hepaulule oshili. Ndele keshe ou ta kala metwokumwe noshili ota dulika kondaka yange.” 38 Opo nee Pilatus okwa tya kuye: “Oshili oshike?”

Konima eshi a popya ngaho, okwa ya vali pondje kOvajuda ndele ta ti kuvo: “Inandi mu mona ondjo yasha. 39 Ndele oshi li onghedindjikilile oku mu mangululila omulumenhu umwe pOpaasa. Inamu hala ndi mu mangululile Ohamba yOvajuda?” 40 Ova ingida vali tava ti: “Tu mangululila Barabas, ponhele yomulumenhu ou!” Ndele Barabas okwa li omukolokoshi.

19 Pilatus okwa kufa Jesus nokwe mu dengifa. 2 Opo nee ovakwaita ova tunga oshishani shomakiya noku shi tula komutwe waJesus, nove mu dika oshikutu sholuvala lopeepela. 3 Ova kala tave uya puye tava ti: “Kundwa, oove Ohamba yOvajuda!” Ova kala yo tave mu denge nomanghava moshipala. 4 Pilatus okwe uya vali pondje ndele ta ti kOvajuda: “Taleni, omulumenhu ou ohandi mu eta kunye opo mu shiive kutya ame inandi mu mona ondjo yasha.” 5 Opo nee Jesus okwe uya pondje a djala oshishani shomakiya komutwe noshikutu sholuvala lopeepela. Ndele Pilatus ta ti kuvo: “Taleni, omulumenhu oye ou!” 6 Eshi ovapristeri ovakulunhu novakeleli votembeli ve mu mona, ova ingida mokule tava ti: “Mu valela komuti! Mu valela komuti!” Pilatus okwa tya kuvo: “Mu kufeni po ndele tamu ke mu valela nye vene, shaashi ame inandi mu mona ondjo yasha.” 7 Ovajuda ova tya kuye: “Metwokumwe nomhango yetu, okwa wana okufya molwaashi ote liti kutya omona waKalunga.”

8 Eshi Pilatus a uda osho va li tava ti, okwa kwatwa unene koumbada, 9 nokwa shuna mombala yaye ndele ta pula Jesus ta ti: “Owa dja peni?” Ashike Jesus ine mu nyamukula. 10 Onghee Pilatus okwa tya kuye: “Ino hala okupopya naame? Ku shi shii kutya ondi na eenghonopangelo doku ku mangulula nosho yo doku ku valelifa komuti?” 11 Jesus okwe mu nyamukula ta ti: “Ngeno kwa li wa pewa eenghonopangelo kuKalunga dokupangela, ngeno ku di na. Nomolwaasho omunhu ou a yandja nge kwoove oye unene e na ondjo.”

12 Pilatus okwa kala ta diladila kutya ote shi ende ngahelipi opo e mu mangulule, ashike Ovajuda ova ingida tava ti: “Omulumenhu oo ngeenge owe mu mangulula, ku fi vali kaume kOmukesari. Keshe oo te liti kutya ohamba oku li omhinge nOmukesari.” 13 Eshi Pilatus a uda eendjovo odo, okwa eta Jesus pondje ndele ye ta kala omutumba kolukalwatokolo, monhele hai ifanwa Olupale lOmamanya, mOshiheberi Gabbata. 14 Ndele pomulongo nambali womutenya lwaapo,* mefiku lokulilongekidila Opaasa, Pilatus okwa lombwela Ovajuda ta ti: “Taleni, ohamba yeni oyo ei!” 15 Opo nee ova ingida tava ti: “Mu kufa po! Mu kufa po! Mu valela komuti!” Pilatus okwa tya kuvo: “Omwa hala ndi dipae ohamba yeni?” Ovapristeri ovakulunhu ova nyamukula va ti: “Fye katu na ohamba, ndele otu na Omukesari.” 16 Ndele okwe mu yandja kuvo ve ke mu valele komuti.

Opo nee ova kufa po Jesus. 17 Ova ya naye a humbata omuti waye womahepeko* konhele hai ifanwa Onhele yOmakolotwe, mOshiheberi Golgata. 18 Ove mu valela komuti pamwe novalumenhu vavali, umwe okolulyo naumwe okolumosho laye. 19 Pilatus okwa shanga eshangelo ndele te li tula komuti womahepeko.* Eshangelo olo ola li tali ti: “Jesus Omunasaret, Ohamba yOvajuda.” 20 Ovajuda vahapu ova li va lesha eshangelo olo molwaashi onhele opo Jesus a li a valelwa komuti oya li popepi noshilando, nola li la shangwa mOshiheberi, mOshilatina nomOshigreka. 21 Opo nee ovapristeri ovakulunhu vOvajuda ova tya kuPilatus: “Ku na okushanga kutya, ‘Ohamba yOvajuda,’ ndele oto shange kutya okwa ti, ‘Ame Ohamba yOvajuda.’” 22 Pilatus okwa ti: “Osho nda shanga nashi kale ngaho.”

23 Eshi ovakwaita va valela Jesus komuti, ova kufa oikutu yaye yokombada ndele tave i tukula moitukulwa ine, nove litukulila keshe umwe oshaye. Ova kufa ko yo oshikutu shaye shokoshi. Ndele oshikutu shokoshi kasha li shi na omuhondjo, ashike osha li sha tungwa okudja pombada fiyo opedu. 24 Opo nee ova lombwelafana tava ti: “Inatu shi pombola, natu shi ningileni oshihoololifo tu taleni kutya otashi ningi shalyelye.” Osho osha wanifa omushangwa oo tau ti: “Ove litukulila oikutu yange, nove i ningila oshihoololifo.” Osho osho naanaa ovakwaita va li va ninga.

25 Pomuti womahepeko* waJesus opa li pa fikama ina nomumwaina waina; Maria omukulukadi waKlopas nosho yo Maria Magdalena. 26 Eshi Jesus a mona ina nosho yo omuhongwa oo a li e hole va fikama popepi, okwa tya kuina: “Meme, okudja paife oo ota ningi omonamati woye.” 27 Ndele okwa tya komuhongwa oo: “Okudja paife oo ota ningi nyoko.” Opo nee omuhongwa oo okwa kufa po Maria a ka kale wambulaye.

28 Eshi Jesus a mona kutya oinima aishe oya wanifwa; opo omushangwa u wanifwe, okwa ti: “Onda fya enota.” 29 Ndele opa li oshitoo shi yadi omaviinyu malula. Opo nee ova yaveka okayavo momaviinyu malula ndele tave ka tula kokatai ka-isopi* nove mu pa a nwe. 30 Eshi Jesus a makela omaviinyu oo malula, okwa ti: “Osha wanifwa,” nokwa fidimika omutwe waye, ndele ta fi.

31 Molwaashi osha li efiku lelilongekido, opo ovo va valelwa vaha kale komiti domahepeko mefiku lEshabata (Eshabata ola li efiku la fimana), Ovajuda ova pula Pilatus a teyaulife omaulu avo opo va kufwe ko. 32 Opo nee ovakwaita ove uya ndele tava teyaula omaulu ovalumenhu ovo va li va valelwa komuti pamwe naJesus. 33 Eshi ve uya puJesus, ova hanga nale a fya, onghee inava teyaula omaulu aye. 34 Opo nee umwe womovakwaita okwe mu twa neonga molupati, ndele diva okwa dja ohonde nomeva. 35 Ndele ou e shi mona okwe shi hepaulula, nehepaululo laye olashili noku shi shii kutya osho a popya oshoshili opo nanye yo mu itavele. 36 Oinima oyo oya ningwa opo omushangwa u wanifwe ou tau ti: “Kape na nande ekipa laye limwe tali ka teywa.”* 37 Omushangwa umwe vali owa ti: “Otava ka tala kwaau va twa neonga.”

38 Konima yaasho, Josef Omuarimatia, oo a li omuhongwa waJesus ndele ina holola eitavelo laye moipafi molwaashi a li a tila Ovajuda, okwa pula Pilatus ngeenge ota dulu okukufa ko oshimhu shaJesus, na Pilatus okwe mu pa epitikilo. Onghee okwa ya ndele ta kufa ko oshimhu. 39 Nikodemus, omulumenhu oo e uyile kuJesus oufiku, naye okwe uya a etelela oidimba iwa* ya lumbakanifwa nendobo leekilograma 30 lwaapo.* 40 Opo nee ova kufa oshimhu shaJesus ndele tave shi dingile nomalapi oliina va tula mo oidimba iwa, panghedi yokupaka yOvajuda. 41 Ndele ponhele opo a valelwa komuti* opa li oshikunino, nomoshikunino osho omwa li ombila* ipe omo inamu pakwa nande omunhu. 42 Ova paka Jesus mombila oyo molwaashi oya li popepi nosha li efiku lelilongekido lOvajuda.

20 Ndele mefiku lotete koshivike, Maria Magdalena okwa ya kombila* ongula inene fimbo inaku sha, nokwa hanga nale emanya la kufwa ko. 2 Onghee okwa tondoka ndele ta i kuSimon Petrus nokomuhongwa oo a li e holike unene kuJesus, ndele ta ti kuvo: “Omwene ove mu kufa mo mombila, ashike katu shi shii kutya ove mu paka peni.”

3 Ndele Petrus nomuhongwa mukwao ova li va tokola okuya kombila. 4 Opo nee aveshe ova hovela okutondoka, nomuhongwa mukwao okwa pitilila Petrus nokwa fika tete kombila. 5 Eshi a vandamena mo, okwa mona mo omalapi oliina, ashike ina ya mo. 6 Simon Petrus naye okwa fika, nokwa ya mo mombila. Ndele okwa mona mo omalapi oliina. 7 Elapi olo la li komutwe waJesus kala li pamwe namakwao, ndele ola li le litulilwa la tonywa. 8 Omuhongwa oo a fika tete kombila naye okwa ya mo ndele ta mono osho va lombwelwa noku shi itavela. 9 Ashike kava li ve udite ko natango omushangwa ou tau ti kutya ota ka nyumuka koufi. 10 Onghee ovahongwa ovo ova shuna komaumbo avo.

11 Ndele Maria okwa kala e li ofika popepi nombila ta lili. Fimbo a li ta lili, okwa vandamena mombila, 12 nokwa mona mo ovaengeli vavali va djala oikutu itoka ve li omutumba apa pa li oshimhu shaJesus, umwe okwa ama apa pa li omutwe naumwe okeemhadi. 13 Opo nee ovaengeli ovo ova tya kuye: “Oto lili shike?” Okwa tya kuvo: “Ova kufa mo Omwene wange, ndele kandi shi shii kutya ove mu paka peni.” 14 Eshi a popya ngaho, okwa punguluka nokwa mona omunhu e li ofika, ashike ka li a didilika kutya oJesus. 15 Jesus okwa tya kuye: “Oto lili shike? Olyelye to kongo?” Molwaashi Maria okwa li ta diladila kutya omulongi womoshikunino, okwa tya kuye: “Omufimanekwa, ngeenge oove we mu kufa mo, lombwele nge kutya owe mu paka peni opo ndi ke mu kufe po.” 16 Jesus okwe mu ifana ta ti: “Maria!” Opo nee Maria okwa punguluka ndele ta ti kuye mOshiheberi: “Rabboni!” (tashi ti “Omuhongi!”) 17 Jesus okwa tya kuye: “Efe nge, osheshi inandi ya natango kuTate. Ndele inda kovamwatate u ke va lombwele kutya, ‘Ohandi i kuTate, oo e li Xo yeni nokuKalunga kange, oo e li yo Kalunga keni.’” 18 Maria Magdalena okwa ya ndele ta lombwele ovahongwa ta ti: “Onda mona Omwene!” Opo nee okwe va lombwela osho Jesus e mu lombwela.

19 Ndele mefiku lotete koshivike eshi kwa toka, ovahongwa ova li va ongala meumbo limwe nova li ve lipatela mo molwaashi ova li va tila Ovajuda. Opo nee Jesus okwe va holokela nokwa kala ofika mokati kavo ndele ta ti kuvo: “Ombili nai kale nanye.” 20 Eshi a popya ngaho, okwe va ulikila omake aye nolupati laye. Ndele ovahongwa ova li va hafa unene eshi va mona Omwene. 21 Jesus okwa tya vali kuvo: “Ombili nai kale nanye. Naame ohandi mu tumu mounyuni ngaashi ashike Tate a tuma nge.” 22 Konima eshi a popya ngaho, okwe va fudila ndele ta ti kuvo: “Tambuleni omhepo iyapuki. 23 Ngeenge omwa dimine po umwe omanyono aye, Kalunga naye okwe mu dimina po, ndele ngeenge inamu mu dimina po, Kalunga naye ine mu dimina po.”

24 Ndele Tomas, umwe womovayapostoli 12, oo a li ha ifanwa Omukwanambwiyu, ka li po eshi Jesus a li e va holokela. 25 Onghee ovahongwa vakwao ove mu lombwela tava ti: “Otwa mona Omwene!” Tomas okwa tya kuvo: “Itandi shi itavele nandenande fimbo inandi mona oivadi yeembosha oyo i li momake aye nofimbo inandi kwata oshivadi osho shi li molupati laye.”

26 Ndele konima yomafiku ahetatu, ovahongwa vaye ova li va ongala natango meumbo, na Tomas okwa li pamwe navo. Nonande omivelo oda li da pata, Jesus okwe va holokela nokwa kala ofika mokati kavo ndele ta ti: “Ombili nai kale nanye.” 27 Opo nee okwa tya kuTomas: “Omake ange oyaa, kuma oivadi ei i li po, kwata yo oshivadi osho shi li molupati lange; ino kala vali wa limbililwa,* ndele itavela.” 28 Tomas okwa tya kuye: “Omwene wange naKalunga kange!” 29 Jesus okwa tya kuye: “Paife owa itavela nee eshi wa mona nge? Ava tava itavele nande inava mona otava kala va hafa.”

30 Jesus okwa longa yo oikumwifilonga ikwao ihapu moipafi yovahongwa vaye, oyo inai shangwa mo momushangwatonywa ou. 31 Ndele oinima oyo oya shangwa opo mu itavele kutya Jesus oye Kristus, Omona waKalunga, nongeenge omwa itavele, otamu kala nomwenyo omolwedina laye.

21 Ndele Jesus okwa li a holokela vali ovahongwa vaye pefuta laTiberias. Eshi e va holokela pomhito oyo, osha enda ngaha: 2 Simon Petrus ova li naTomas (oo ha ifanwa Omukwanambwiyu), Natanael oo a dja kuKana shaGalilea, ovanamati vaSebedeus nosho yo ovahongwa vakwao vavali. 3 Simon Petrus okwa li a lombwela vakwao ta ti: “Ohandi ka kwata eeshi.” Ova tya kuye: “Nafye ohatu i naave.” Opo nee ova ya ndele tava londo mowato, ashike oufiku oo inava kwata sha.

4 Ndele eshi eluwa tali tende, Jesus okwa li e li ofika komunghulofuta, ashike ovahongwa vaye kava li va didilika kutya oye. 5 Opo nee okwa tya kuvo: “Ovamwange, omu na ngoo oikulya?”* Ova nyamukula tava ti: “Ahowe.” 6 Okwa tya kuvo: “Umbileni onete yeni kolulyo lowato notamu ka kwata eeshi.” Opo nee ove i umbila mo, ashike kava li tava dulu oku i shila mo molwaashi ova li va kwata eeshi dihapu. 7 Omuhongwa oo a li e holike kuJesus okwa tya kuPetrus: “Mboli Omwene!” Eshi Simon Petrus a uda kutya Omwene, okwa djala oshikutu shaye shokombada molwaashi okwa li e li hamunghele,* ndele ta nhukile mefuta. 8 Ndele ovahongwa vamwe ove uya nowato tava shili onete i yadi eeshi, molwaashi kava li kokule unene nomutunda; ova li ashike kokule oshinano sheemeta 100 lwaapo.*

9 Eshi ve uya komutunda, ova hanga ko omakala omundilo ku na eeshi nomungome. 10 Jesus okwa tya kuvo: “Eteni eeshi dimwe odo mwa kwata.” 11 Opo nee Simon Petrus okwa ya mowato ndele ta kokolola mo onete i yadi eeshi da kula, di li 153. Ashike nande eeshi oda li dihapu, onete inai tauka. 12 Jesus okwa tya kuvo: “Ileni mu lye oshuumbululwa.” Ndele molwaashi ovahongwa ova li ve shii kutya Omwene, kape na nande oumwe e mu pula kutya: “Oove lyelye?” 13 Jesus okwa kufa omungome ndele te va pe, nokwe va pa yo eeshi. 14 Osho osha li oshikando oshititatu Jesus a holokela ovahongwa vaye konima eshi a nyumunwa koufi.

15 Eshi va mana okulya oshuumbululwa, Jesus okwa tya kuSimon Petrus: “Simon omona waJohannes, ou hole nge tuu shi dulife edi?” Okwa tya kuye: “Heeno Omwene, ou shi shii kutya ondi ku hole.” Jesus okwa tya kuye: “Lifa eedi dange.” 16 Jesus okwa tya vali oshikando oshitivali kuSimon: “Simon omona waJohannes, ou hole nge tuu?” Okwa ti: “Heeno Omwene, ou shi shii kutya ondi ku hole.” Jesus okwa tya kuye: “Lifa eedjona dange.” 17 Okwe mu pula vali oshikando oshititatu ta ti: “Simon omona waJohannes, ou hole nge tuu?” Petrus okwa nyika oluhodi eshi a pulwa oshikando oshititatu kutya: “Ou hole nge tuu?” Onghee okwa tya kuye: “Omwene, oinima aishe ou i shii; ou shii kutya ondi ku hole.” Jesus okwa tya kuye: “Lifa eedjona dange. 18 Oshili ohandi ku lombwele, eshi wa li omunyasha, owa li ho djala ove mwene noho i keshe opo wa hala. Ndele shimha wa kulu, oto yandje omaoko oye noto dikwa kuumwe note ku twala apa ino hala.” 19 Okwa popya ngaho a ulike kutya Petrus ota ka fya efyo la tya ngahelipi opo a fimanekife Kalunga. Eshi a popya ngaho, okwa tya kuye: “Twikila okushikula nge.”

20 Petrus okwa keuka nokwa mona omuhongwa oo a li e holike kuJesus te va shikula, oo a li a yaamena ponhulo yaJesus eshi va li tava li ouvalelo wOmwene nokwa li e mu pula ta ti: “Omwene, olyelye hano te ku kengelele?” 21 Eshi Petrus e mu mona, okwa pula Jesus ta ti: “Omwene, oshike tashi ka ningilwa omulumenhu ou?” 22 Jesus okwa tya kuye: “Ngeenge onda hala a kale po fiyo osheshi handi uya, omolwashike wa hala oku shi shiiva? Ove twikila ashike okushikula nge.” 23 Eendjovo odo kutya omuhongwa oo ita fi oda li de lihanena movamwatate. Ndele Jesus ine mu lombwela kutya ita fi, ashike okwa ti: “Ngeenge onda hala a kale po fiyo osheshi handi uya, omolwashike wa hala oku shi shiiva?”

24 Omuhongwa oo oye a hepaulula kombinga yoinima ei noye a shanga kombinga yayo, notu shi shii kutya ehepaululo laye oloshili.

25 Ope na oinima ihapu Jesus a ninga oyo inai shangwa, nondi wete kutya ngeno aishe oya shangelwe, ngeno omishangwatonywa itadi wana mo mounyuni.