OILONGA YOVAYAPOSTOLI

1 Membo lange lotete olo nde ku shangela Teofilus, onde ku lombwela kombinga yoinima aishe oyo Jesus a ninga nokwa honga 2 fiyo efiku olo a kufwa po, konima eshi a yandja omalombwelo okupitila momhepo iyapuki kovayapostoli ovo a hoolola. 3 Konima eshi a hepekwa fiyo omefyo, okwe ve lihololela luhapu opo va tomhwe filufilu kutya oku na omwenyo. Ove mu mona momukokomoko womafiku 40, nokwa kala ta popi kombinga yOuhamba waKalunga. 4 Eshi a li a ongala pamwe navo, okwe va lombwela ta ti: “Inamu dja mo muJerusalem, ndele kaleni mwa teelela osho nde mu lombwela, osho Tate e mu udanekela. 5 Ndele Johannes okwa ninginifa momeva, ashike nye mafiku otamu ka ninginifwa nomhepo iyapuki.”

6 Fimbo va li va ongala, ova pula Jesus tava ti: “Omwene, ouhamba waIsrael oto u tungulula tuu pefimbo eli?” 7 Okwa tya kuvo: “Tate womeulu oye aeke e na oufemba wokuufa* kutya efimbo peni oinima tai ka ningwa, ndele nye efimbo olo inamu pumbwa oku li shiiva. 8 Ndele otamu ka pewa eenghono ngeenge omwa tililwa omhepo iyapuki, opo nee otamu ka yandja oundombwedi kombinga yange muJerusalem, muJudea nomuSamaria ashishe nosho yo kombada yedu alishe.” 9 Konima eshi a popya ngaho, fimbo va li tave mu tale, okwa yelulwa po nokwa uvikwa koshilemo moipafi yavo. 10 Fimbo va li va tala keulu eshi Jesus ta i, ohaluka puvo ope uya ovalumenhu vavali va djala oikutu itoka, 11 ndele tava ti kuvo: “Ovalumenhu nye Ovagalilea, omolwashike mwa fikama tamu tale keulu? Jesus ou a kufwa po punye a ya meulu, ota ka aluka naanaa ngaashi mwe mu mona eshi ta i meulu.”

12 Opo nee ova shuna kuJerusalem okudja kOmhunda yEemono, opo pe na oshinano shokilometa.* 13 Eshi va fika, ova ya monduda yopombada omo va li hava kala. Monduda oyo omwa li Petrus, Johannes, Jakob, Andreas, Filippus, Tomas, Bartolomeus, Mateus, Jakob omonamati waAlfeus, Simon omuladi naJudas omonamati waJakob. 14 Aveshe ovo ova kala tava ilikana ve na ediladilo limwe, pamwe novakainhu vamwe nosho yo Maria ina yaJesus novamwainamati vaJesus.

15 Ndele efiku limwe fimbo ovanhu 120 lwaapo va li va ongala, Petrus okwa fikama mokati kavo nokwa tya kuvo: 16 “Ovamwatate, eendjovo odo David a li a popya a nwefwa mo komhepo iyapuki oda li di na okuwanifwa. Okwa popya kombinga yaJudas oo a li a kwatela komesho ovakwaita ovo va kwata po Jesus. 17 Okwa li umwe womufye, ha longo pamwe nafye moshilonga eshi. 18 (Omulumenhu oo okwa li a landa epya nondjabi oyo a li a pewa omolwoilonga yaye ihe li pauyuki; okwe lidenga po a fikila po omutwe ndele ta topa pokati, nomandjadja aye okwa wa mo. 19 Osho osha shiivika kOvajerusalem aveshe, nepya olo ove li luka melaka lavo Akeldama, sha hala okutya, “Epya lOhonde.”) 20 Embo lOmapsalme ola ti, ‘Onhele yaye otai ningi eputu, itamu ka kala nande omunhu,’ ‘noshinakuwanifwa shaye shoupashukili otashi pewa umwe e lili.’ 21 Onghee otwa pumbwa okuhoolola umwe womovalumenhu ovo va kala pamwe nafye efimbo alishe olo Omwene Jesus a kala ta longo oilonga yaye mokati ketu, 22 okudja eshi a ninginifwa kuJohannes fiyo efiku olo a ya meulu; omulumenhu oo na kale yo e na oumbangi kutya Jesus okwa nyumuka.”

23 Opo nee ova popila ovalumenhu vavali, Matias nosho yo Josef oo ha ifanwa Barsabas noha ifanwa vali Justus. 24 Ndele ova ilikana tava ti: “Jehova, oove u shii omitima dovanhu aveshe, tu ulikila kutya elipipo wa hoolola povalumenhu ava vavali 25 opo a ninge omuyapostoli noku longe oshilonga osho Judas a efa po ndele ta i neendjila daye.” 26 Opo nee ova ninga oshihoololifo pokati kovalumenhu ovo, nova hoolola Matias, nokwa li a valulilwa* pamwe novayapostoli 11.

2 Ndele eshi efiku loshivilo shOpentekoste la fika, ovahongwa aveshe ova li va ongala monhele imwe. 2 Fimbo va li omutumba, ohaluka ova uda epopomo la dja meulu la fa omhepo inene, naaveshe meumbo ova li ve udite epopomo olo. 3 Ndele ova mona omalaka a fa omundilo nokwa li a wila kombada yavo, keshe umwe elaka limwe. 4 Opo nee aveshe ova tililwa omhepo iyapuki noye va ningifa va dule okupopya omalaka a yoolokafana.

5 Pefimbo opo muJerusalem omwa li Ovajuda ovatilikalunga ovo va li ve lihanena moiwana aishe kombada yedu. 6 Konima yepopomo olo, ongudu yovanhu oya li ya ongala noya li ya kumwa molwaashi keshe umwe okwa uda eshi ovahongwa tava popi melaka laye loshidalelwamo. 7 Ovanhu ovo ova li va kumwa neenghono, ndele tava ti: “Taleni, aveshe ovo tava popi kave fi hamba Ovagalilea? 8 Osha enda ngahelipi opo atushe tu kale tu va udite eshi tava popi momalaka etu oshidalelwamo? 9 Vamwe vomufye Ovaparti, Ovamedia, Ovaelami, ovakalimo vomuMesopotamia, Ovajudea, Ovakappadokia, Ovapontus novanhu vomoshitukulwa shaAsia, 10 Ovafrigia, Ovapamfilia, Ovaegipiti novanhu vomoitukulwa yaLibia popepi naKireni, ovatalelipo va dja kuRoma, Ovajuda naavo va ninga veitavelo lOshijuda, 11 Ovakreta nOvaarabia. Otwa uda tava popi momalaka etu oshidalelwamo kombinga yoinenelonga yaKalunga.” 12 Oshinima osho osha li she va kumwifa neenghono aveshe, ndele tava pulafana tava ti: “Eshi osha hala okutya ngahelipi?” 13 Ndele vamwe ova li tave va sheke tava ti: “Ova kolwa komaviinyu.”

14 Petrus okwa fikama pamwe novayapostoli 11, ndele ta popi novanhu ovo mokule ta ti: “Ovajuda nye novakalimo amushe vomuJerusalem shiiveni oshinima eshi nokupwilikina nelitulemo kwaashi handi mu lombwele. 15 Ovanhu ava inava kolwa ngaashi tamu ti, osheshi paife omuwoi wongula.* 16 Kakele kaasho, osho osha xunganekwa okupitila momuprofeti Joel a ti: 17 ‘ “Ndele momafiku axuuninwa,” Kalunga okwa ti, “Ohandi ka tilila omhepo yange movanhu aveshe,* opo nee ovanamati novanakadona veni otava ka xunganeka, ovalumenhu ovanyasha otava ka mona omamoniko novalumenhu ovakulunhu otava ka twa eendjodi; 18 nokuli novapiya vange ovalumenhu novakainhu ohandi ke va tilila omhepo yange momafiku oo notava ka xunganeka. 19 Ndele ohandi ka holola oikumwifilonga keulu nomadidiliko ohonde, omundilo nomwifi kombada yedu. 20 Etango otali ka laula nomwedi otau ka shituka ohonde ofimbo efiku laJehova linene nolididilikwedi inali uya. 21 Ndele keshe ou ta ifana edina Jehova ota ka xupifwa.” ’

22 “Ovaisrael nye, pwilikineni eendjovo edi: Omulumenhu Jesus Omunasaret omwe mu ulikilwa kuKalunga moipafi okupitila moilonganghono, moikumwifilonga nomomadidiliko oo Kalunga a longa mokati keni okupitila muye ngaashi ashike mu shi shii. 23 Omulumenhu oo omwe mu kwata po nomwe mu yandja momake ovakolokoshi ovo ve mu valela komuti nove mu dipaa. Kalunga okwa efa osho shi ningwe molwaashi okwa li e shii osho tashi ka ningilwa Jesus. 24 Ndele Kalunga okwe mu nyumuna moku mu mangulula mo mefyo,* molwaashi efyo kali na eenghono doku mu kwatela mo. 25 David okwa popya kombinga yaJesus ta ti: ‘Molwaashi Jehova oha kala alushe pwaame* kolulyo lange, kape na nande osho tashi ningifa nge ndi tengauke. 26 Osho osha hafifa omutima wange nohandi popi nehafo linene. Onghee ohandi* kala ndi na eteelelo, 27 molwaashi ito ka efa nge* ndi kale mOmbila* noito ka efa omudiinini woye a olele mo. 28 Oto ka ulikila nge ondjila oyo tai twala komwenyo, noto ka hafifa nge unene koshipala shoye.’

29 “Ovamwatate, pitikei nge ndi popye nda manguluka kombinga yatatekulululwa David kutya okwa fya nokwa pakwa, nombila yaye oko i li fiyo okunena. 30 Ndele molwaashi okwa li omuprofeti nokwa li e shii kutya Kalunga okwe mu anena kutya umwe womoludalo laye* ota ka kala omutumba kolukalwapangelo laye, 31 okwa mona nokwa popya kombinga yenyumuko laKristus fimbo inali ningwa, kutya ina efiwa a kale mOmbila,* nombelela yaye inai olela mo. 32 Jesus okwa nyumunwa kuKalunga, nafye atusheni eembangi dasho. 33 Onghee hano, molwaashi okwa tumbalekwa a kale kolulyo laKalunga, nokwa pewa omhepo iyapuki kuXe oyo ya udanekwa, okwe tu tilila osho mu wete nomu udite. 34 David ina londa a ya keulu, ndele okwa popya ta ti: ‘Jehova okwa lombwela Omwene wange: “Kala omutumba kolulyo lange 35 fiyo handi ningi ovatondi voye oshilyatelo sheemhadi doye.”’ 36 Hano eumbo alishe laIsrael nali shiive kutya Jesus ou mwa valela komuti, Kalunga okwe mu ninga Omwene naKristus.”

37 Eshi va uda eendjovo odo, ode va kuma komitima, ndele tava ti kuPetrus nokovayapostoli vakwao: “Ovamwatate, oshike tu na okuninga po?” 38 Petrus okwa tya kuvo: “Lidilululeni, ndele amushe tamu ninginifwa medina laJesus Kristus mu diminwe po omatimba eni notamu ka pewa oshali yomhepo iyapuki. 39 Jehova Kalunga ote ke mu pa omhepo iyapuki amushe novana veni, naaveshe ovo ve li kokule nosho yo aveshe ovo ta ka ifana kuye.” 40 Ndele okwa popya navo, e va udifila nawanawa nokwe va kumaida ta ti: “Liyoololei ko kepupi eli lovakolokoshi opo mu xupifwe.” 41 Ovo va li va tambula ko nehafo eendjovo daye ova li va ninginifwa, nomefiku olo momuvalu wovaitaveli omwa li mwa wedwa ovanhu* 3 000. 42 Ndele ova kala va diinina ehongo lovayapostoli, okukala pamwe, okulya nokwiilikana.

43 Ovayapostoli ova longa oikumwifilonga ihapu nomadidiliko, novanhu aveshe* ova li va kwatwa koumbada. 44 Aveshe ovo va ninga ovaitaveli ova kala pamwe nova li va tukulilafana oinima oyo va li ve na. 45 Ova li va landifa po oinima yavo nokutukulilafana oimaliwa she likolelela keemhumbwe dakeshe umwe. 46 Ndele efiku keshe ova li hava ongala kotembeli ve na elalakano limwe, nohava i noikulya komaumbo e lili noku lili, ndele tave i tukulilafana nehafo linene nonehalo liwa. 47 Ova kala yo hava tange Kalunga nova li va hokiwa kovanhu aveshe. Pefimbo opo tuu opo, efiku keshe Jehova okwa kala nokuhapupalifa omuvalu waavo tava ka xupifwa.

3 Petrus naJohannes ova li tava i kotembeli pefimbo leilikano ponhatu* yomutenya lwaapo, 2 ndele opa li omulumenhu a dalwa oshingudu ha humbatwa. Efiku keshe okwa li ha tulwa popepi noshivelo shotembeli osho hashi ifanwa Shawapala, opo a dule okweehela oikwafa kwaavo tava i motembeli. 3 Eshi a mona Petrus naJohannes tava i motembeli, okwa hovela oku va ehela oikwafa. 4 Opo nee Petrus naJohannes ova tala kuye, ndele tava ti: “Tala kufye.” 5 Onghee okwe va dakamena omesho a teelela ve mu pe sha. 6 Petrus okwa ti: “Kandi na oshisilveri noshingoli, ndele ohandi ku pe eshi ndi na. Medina laJesus Kristus Omunasaret, ohandi ku lombwele, enda!” 7 Opo nee Petrus okwe mu kwata meke lokolulyo, ndele te mu fikamifa. Diva eemhadi neemhando daye oda veluka, 8 ndele ta kala ofika, nokwa hovela okweenda pamwe navo va finda motembeli, ta ende ta nhuka nota hambelele Kalunga. 9 Ovanhu aveshe ove mu mona ta ende nota hambelele Kalunga. 10 Ova dimbuluka kutya omulumenhu oo oye winya a li ha kala poshivelo shotembeli osho hashi ifanwa Shawapala, ta ehela oikwafa. Onghee ova li va kumwa neenghono eshi ve mu mona ta ende.

11 Ofimbo omulumenhu oo a li natango e kwete Petrus naJohannes momake, ovanhu aveshe ova tondokela kuvo mOmukala waSalomo, nova li va kumwa neenghono. 12 Eshi Petrus e va mona, okwa tya kuvo: “Ovaisrael nye, omolwashike mwa kumwa eshi omulumenhu ou ta ende, nomolwashike mwe tu kuminwa twa fa ngeno twe shi ninga keenghono detu vene ile molwaashi ashike tu na etilokalunga? 13 Kalunga kaAbraham, Kalunga kaIsak, Kalunga kaJakob naKalunga kootatekulululwa okwa tumbalekifa Omupiya waye Jesus, oo mwe mu yandja nomwe mu lidimbika koshipala shaPilatus, nonande okwa li a hala oku mu mangulula. 14 Omwe lidimbika omuyapuki nomuyuki oo, nomwa indila mu mangululilwe omulumenhu oo a li omudipai, 15 ofimbo mwa dipaifa oo ta ka pefa ovanhu omwenyo. Ndele Kalunga okwe mu nyumuna koufi, notu li eembangi doshinima osho. 16 Ndele okupitila medina laJesus, nokukala tu na eitavelo medina laye, omulumenhu ou mu wete nomu mu shii okwa veluka. Eitavelo letu muJesus olo la ningifa omulumenhu ou a veluke filufilu moipafi yeni. 17 Ovamwatate, ondi shi shii nokutya omwe shi ninga omolwokuhashiiva sha ngaashi ashike ovapangeli veni va ninga. 18 Ndele osho osha ningwa opo ku wanifwe osho Kalunga a xunganeka okupitila movaprofeti aveshe kutya Kristus ota ka hepekwa.

19 “Onghee hano, lidilululeni nokulialuluka omatimba eni a dimwe po, opo Jehova e mu pe ehekeleko 20 noku mu tumine Kristus oo a nangeka po, sha hala okutya Jesus. 21 Jesus oku na okuteelela meulu fiyo osheshi oinima aishe ya ningwa ipe ngaashi Kalunga a xunganeka okupitila movaprofeti vaye vonale ovadiinini. 22 Moses okwa ti: ‘Jehova Kalunga keni ota ka nangeka po omumwaxo umwe mokati keni a ninge omuprofeti ngaashi ame. Pwilikineni kuye mukeshe osho te mu lombwele. 23 Keshe ou* ita pwilikine komuprofeti oo ota ka hanaunwa po filufilu.’ 24 Ovaprofeti aveshe okudja komuprofeti Samuel, ova xunganeka shi na sha nefimbo olo. 25 Nye oludalo lovaprofeti novafyuululi vehangano olo Kalunga a udanekela ooxokulululwa eshi a lombwela Abraham a ti: ‘Omapata aeshe kombada yedu otaa ka nangekwa noupuna okupitila moludalo loye.’* 26 Konima eshi Kalunga a nyumuna Omupiya waye, tete okwe mu tuma kunye e mu nangeke noupuna ngeenge keshe umwe womunye okwe lialuluka koilonga yaye ii.”

4 Ofimbo Petrus naJohannes va li tava popi novanhu, ovapristeri, omukulunhu wotembeli nOvasadukai ove uya kuvo. 2 Ova li va handuka molwaashi ovayapostoli ova li tava hongo ovanhu noku va hepaululila moipafi enyumuko laJesus. 3 Ndele ova li ve va kwata po nove va tula modolongo fiyo efiku la landula ko molwaashi okwa li kwa toka. 4 Vahapu ovo va li va pwilikina kuvo ova ninga ovaitaveli, nomuvalu wavo owa li 5 000 lwaapo.

5 Mefiku la landula ko, ovapangeli, ovakulunhu voshiwana novanongo vomishangwa ova li va ongala muJerusalem 6 pamwe naHannas omupristeri omukulunhu, Kajafas, Johannes, Aleksander nosho yo ovapambele aveshe vomupristeri omukulunhu. 7 Opo nee ova fikamifa Petrus naJohannes mokati kavo ndele tava hovele oku va pula tava ti: “Okeenghono dilipi ile omedina lalyelye mwa longa oshilonga osho?” 8 Petrus okwa li a tililwa omhepo iyapuki ndele ta ti kuvo:

“Ovapangeli nye novakulunhu voshiwana, 9 ngeenge omwa hala okushiiva kombinga yoshinima shiwa osho twa longela omulumenhu ou oshingudu nanghee sha enda opo a veluke, 10 shiiveni amushe nosho yo Ovaisrael aveshe kutya omulumenhu ou e li ofika moipafi yeni e li nawa okwa velulwa okupitila medina laJesus Kristus Omunasaret, oo mwa valela komuti, ndele Kalunga te mu nyumuna. 11 ‘Emanya olo nye ovatungi mwa ekelashi ola ninga emanya la fimanenena.’* 12 Kakele kaasho, exupifo itali tu dile vali pamwe pe lili molwaashi kape na vali edina limwe kombada yedu olo Kalunga a hoolola tu dule okuxupifwa okupitila mulo.”

13 Eshi va mona Petrus naJohannes tava popi nouladi nova didilika kutya ovanhu vongaho inava hongwa,* ova li va kumwa. Ndele ova li va didilika kutya ova li hava kala naJesus. 14 Eshi va li tava tale omulumenhu oo a velulwa e li ofika pamwe novahongwa ovo vavali, kava li va dula okutya sha. 15 Opo nee ove va lombwela va dje mo monhele yOmhangu yoPombada yOvajuda, nova li va hovela okukundafana 16 tava ti: “Ovalumenhu ava natu va ningile shike? Osheshi ova longa oshikumwifilonga shididilikwedi osho sha monika kovakalimo aveshe vomuJerusalem, noitatu dulu oku shi pataneka. 17 Ndele opo oshinima osho shiha tandavele, natu va ningileni omatilifo noku va lombwela vaha popye vali nande onomunhu kombinga yedina laJesus.”

18 Opo nee ove va ifana nove va kunghilila vaha popye sha vali ile vaha honge ovanhu kombinga yedina laJesus. 19 Petrus naJohannes ove va nyamukula va ti: “Tokoleni nye vene ngeenge osha yuka koshipala shaKalunga okupwilikina kunye ponhele yokupwilikina kuKalunga. 20 Ndele fye itatu efa okupopya kombinga yoinima oyo twa mona notwa uda.” 21 Konima eshi ve va ningila vali omatilifo, ove va mangulula shaashi kava li ve va mona ondjo nomolwovanhu ovo va li tava tange Kalunga molwaasho sha ningwa po. 22 Omulumenhu oo a li a velulwa pashikumwifilonga okwa li e na omido 40 nasha.

23 Eshi va mangululwa, ova ya kovaitaveli vakwao nove va hokololela osho va lombwelwa kovapristeri ovakulunhu nokovakulunhu voshiwana. 24 Eshi ve shi uda, ova ilikana pamwe kuKalunga tava ti:

“Omwene Omunamapangelo aeshe, Oove wa shita eulu nedu nefuta noinima aishe i li mo, 25 nowa li wa popya okupitila momhepo iyapuki wa longifa tatekulululwa David, omupiya woye, wa ti: ‘Omolwashike oiwana ya handuka nomolwashike ovanhu tava diladila oinima yongaho? 26 Eehamba dokombada yedu novapangeli ove liunganeka va lwife Jehova nomuvaekwa waye.’* 27 Ndele Herodes naPontius Pilatus nosho yo ovanhu vomoiwana imwe nOvaisrael ova li va ongala moshilando eshi va kondjife omupiya woye omuyapuki Jesus, oo wa vaeka, 28 nova wanife po osho wa li wa xunganeka. 29 Jehova, pwilikina komatilifo avo, nou kwafele ovapiya voye va twikile okupopya eendjovo doye nouladi, 30 ofimbo to velula ovanaudu noto longo oikumwifilonga medina lomupiya woye omuyapuki Jesus.”

31 Eshi va mana okwiilikana va mana mo, onhele opo va li va ongala oya kakama ndele aveshe ova li va tililwa omhepo iyapuki nova li va popya eendjovo daKalunga nouladi.

32 Ndele ovanhu ovo va li va itavela ova li va hangana filufilu, nokava li hava ningi keshe umwe oshaye, ashike ova li hava tukulilafana keshe shimwe. 33 Ovayapostoli ova li va twikila okuyandja oundombwedi nomupondo kombinga yenyumuko lOmwene Jesus, na Kalunga okwa li e va nangeka noupuna munene. 34 Kape na nande oumwe womuvo a li a hepa sha, shaashi aveshe ovo va li ve na omapya ile omaumbo ove a landifa po, ndele tava ongele osho va mona mo 35 noku shi twala kovayapostoli. Opo nee ova li hava tukulilafana oinima oyo she likolelela keemhumbwe dakeshe umwe womuvo. 36 Josef, oo a li yo ha ifanwa kovayapostoli Barnabas (sha hala okutya “omona wehekeleko”), Omulevi a dalelwa kuKipro, 37 okwa li e na epya, ndele te li landifa po nokwa eta oimaliwa kovayapostoli.

5 Omulumenhu wedina Ananias pamwe nomukulukadi waye Safira ova landifa po epya lavo. 2 Ndele oimaliwa imwe okwe i holeka po, nomukulukadi waye okwa li e shi shii, opo nee ei ya xupa po okwe i yandja kovayapostoli. 3 Petrus okwa tya kuye: “Ananias, omolwashike wa efa Satana e ku pukife u fufye omhepo iyapuki nou holeke po oimaliwa imwe oyo wa landifa po epya? 4 Epya olo kala li loye hano fimbo ino li landifa po? Naashi we li landifa po, oimaliwa kaya li yoye? Omolwashike wa diladila okuninga oshinima osho sha puka? Havanhu wa fufya, ndele oKalunga.” 5 Ananias eshi a uda eendjovo odo, okwa ongotela pedu nokwa fya. Ndele ovanhu aveshe eshi ve shi uda, ova li va tila unene. 6 Opo nee ope uya ovalumenhu vamwe ovanyasha, tave mu dingile momalapi nove mu tumba po ve ke mu pake.

7 Konima yeevili nhatu lwaapo, omukulukadi waye okwe uya po yo, ndele ka li e shii kutya oshike sha ningwa po. 8 Petrus okwa tya kuye: “Lombwele nge, oimaliwa ei i fike apa oyo mwa landifa po epya leni?” Okwa ti: “Heeno, opo i fike opo.” 9 Onghee Petrus okwa tya kuye: “Omolwashike mwa udafana okushinda omhepo yaJehova? Tala, eemhadi odo da enda poshivelo odaavo va ka paka omushamane woye, naave otave ku ile.” 10 Opo nee okwa wila diva peemhadi daPetrus nokwa fya. Eshi ovalumenhu ovanyasha va aluka, ova hanga a fya, ndele tave mu tumbu po noku ke mu paka popepi nomushamane waye. 11 Eongalo alishe nosho yo ovanhu aveshe ovo va uda oshinima osho ova li va tila neenghono.

12 Ndele ovayapostoli ova twikila okulonga oikumwifilonga ihapu nomadidiliko mokati kovanhu, nova kala hava ongala aveshe mOmukala waSalomo. 13 Ovanhu vamwe ova li va tila okuwaimina ovahongwa; ndele vamwe ova li tave va popile mouwa. 14 Kakele kaasho, omuvalu wovalumenhu novakainhu ovo va li va itavela Omwene owa enda tau hapupala neenghono. 15 Ovanhu ova li nokuli va eta ovanaudu vavo momapandavanda ve va nangeka koumbete nokomalutala. Ova li ve lineekela kutya ngeenge Petrus okwa ende po, omudidimbe waye otau va hange ndele tava veluka. 16 Ndele eengudu dovanhu da dja moilando oyo ya dingilila Jerusalem oda kala tadi eta ovanaudu naavo va hepekwa keemhepo da nyata, naaveshe ovo va etwa ova li va velulwa.

17 Opo nee omupristeri munene naaveshe ovo a li pamwe navo vongudu yelongelokalunga lOvasadukai, ova fikama nova li va handuka unene. 18 Ndele ova kwata po ovayapostoli nove va tula modolongo. 19 Opo nee omweengeli waJehova okwe uya oufiku nokwa yeulula omivelo dodolongo ndele ta ti: 20 “Indeni kotembeli ndele tamu twikile okulombwela ovanhu kutya oshike ve na okuninga opo va ka mone omwenyo waalushe.” 21 Eshi ve shi uda, ova ya kotembeli ongula inene nova li va hovela okuhonga ovanhu.

Ndele eshi omupristeri munene naavo a li pamwe navo va fika, ova ifana oilyo aishe yOmhangu yoPombada yOvajuda nosho yo ovakulunhu aveshe voshiwana shOvaisrael ndele tava tumu kodolongo va ka etelwe ovayapostoli. 22 Eshi ovakeleli votembeli va fika kodolongo, inave va hanga mo. Onghee ova aluka 23 ndele tava ti: “Odolongo otwa hanga ya patwa novanangeli vayo ova fikama pomivelo, ndele eshi twa yeulula po, inatu hanga mo nande oumwe.” 24 Omukulunhu wotembeli nosho yo ovapristeri ovakulunhu eshi va uda eendjovo odo, ova li tave lipula kutya oshike vali tashi ka ningwa po. 25 Opo nee okwa dja umwe ndele te va lombwele ta ti: “Taleni, ovalumenhu venya mwa tula modolongo ove li motembeli tava hongo ovanhu.” 26 Ndele omukulunhu oo nosho yo ovakeleli votembeli ove ke va tala ko nopehe na oku va kondjifa, molwaashi ova li va tila okudengwa nomamanya.

27 Onghee ove va eta nove va fikamifa komesho yOmhangu yoPombada yOvajuda. Ndele omupristeri munene okwe va pula nokwe va lombwela 28 ta ti: “Otwe mu kunghilila muha twikile vali okuhonga ovanhu medina lomulumenhu oo, ndele taleni, natango otamu yadifa Jerusalem nehongo leni, nomwa hala tu kale tu na etimba omolwefyo lomulumenhu oo.” 29 Opo nee Petrus novayapostoli vakwao ova tya kuvo: “Otu na okudulika kuKalunga e li omupangeli ponhele yokudulika kovanhu. 30 Kalunga kootatekulululwa okwa nyumuna Jesus, oo mwa dipaa nomwe mu endjelelifa komuti. 31 Kalunga okwe mu tumbaleka eshi e mu tula kolulyo laye a ninge Nakupefa ovanhu omwenyo nOmuxupifi opo Ovaisrael ve lidilulule nova diminwe po omatimba avo. 32 Ndele fye eembangi doinima oyo, nomhepo iyapuki oyo Kalunga a yandja kwaavo hava dulika kuye oye tu kwafela tu koleke oushili waasho.”

33 Eshi va uda ngaho, ova li va handuka neenghono* nova li va hala oku va dipaa. 34 Opo nee Omufarisai wedina Gamaliel, oo a li omuhongimhango nokwa tumbalekwa kovanhu aveshe, okwa fikama mOmhangu yoPombada yOvajuda, ndele ta yandje elombwelo opo ovayapostoli ovo va ye manga pondje. 35 Okwa ti: “Ovalumenhu nye Ovaisrael, lungameni osho tamu diladila okuningila ovalumenhu ava. 36 Pashihopaenenwa, pefimbo linya opa li pa holoka omulumenhu Teodas, oo a li te liti kutya oye nhumba yangadi, nokwa li a waiminwa kovalumenhu 400 lwaapo. Ndele okwa li a dipawa, novashikuli vaye aveshe ova li va halakanifwa po. 37 Konima yaTeodas, opa ka holoka vali Judas Omugalilea pefimbo lomavalulo ovanhu, ndele ta nwefa mo ovanhu vamwe ve mu shikule. Omulumenhu oo naye okwa fya novashikuli vaye aveshe ova halakanifwa po. 38 Ohandi mu lombwele, ovalumenhu ovo va efeni, inamu va piyaaneka. Ngeenge omhangela ile oilonga oyo oya dja movanhu, otai xulu po, 39 ndele ngeenge oya dja kuKalunga, itamu dulu oku i xulifa po. Onghee lungameni, ngeenge hasho, otamu ke lihanga tamu lwifa Kalunga.” 40 Ova tambula ko omayele oo, ndele tava ifana ovayapostoli, tave va dengifa, nove va lombwela vaha popye vali kombinga yedina laJesus, ndele tave va efa va ye.

41 Opo nee ovayapostoli ova dja mo mOmhangu yoPombada yOvajuda va hafa eshi va talika ko va wana okuhepekwa omolwedina laJesus. 42 Ndele ova twikila efiku keshe okuhonga ovanhu noku va udifila onghundana iwa kombinga yaKristus Jesus motembeli nosho yo eumbo neumbo nopehe na okusholola.

6 Ndele pefimbo linya eshi omuvalu wovahongwa tau hapupala, Ovajuda ovo hava popi Oshigreka ova li tava ngongotele Ovajuda ovo hava popi Oshiheberi, molwaashi ovafiyekadi vavo ova li hava lumbulwa oikulya. 2 Opo nee ovayapostoli 12 ova ifana ovahongwa aveshe, ndele tava ti: “Inashi yuka* kufye tu efe po okulipyakidila neendjovo daKalunga tu ka tukule oikulya. 3 Onghee ovamwatate, hoololeni ovalumenhu vaheyali mokati keni ve shii okulineekelwa,* ve yadi omhepo iyapuki nounongo opo tu va nangeke po va wanife po oshinakuwanifwa osho; 4 ofimbo fye hatu twikile okwiilikana nokulipyakidila neendjovo daKalunga.” 5 Ovahongwa aveshe ova li va hafela etokolo olo, ndele tava hoolola Stefanus omulumenhu oo e na eitavelo la kola nomhepo iyapuki, Filippus, Prokorus, Nikanor, Timon, Parmena naNikolaus wokuAntiokia oo a ninga weitavelo lOshijuda. 6 Opo nee ovahongwa ove va eta kovayapostoli, nokonima eshi ovayapostoli va ilikana, ove va tenheka omake.

7 Ndele eendjovo daKalunga oda twikila okutandavela, nomuvalu wovahongwa owa kala nokuhapupala neenghono muJerusalem; nongudu inene yovapristeri oya li ya ninga ovaitaveli.

8 Stefanus okwa li e na onghenda nokwa pewa eenghono kuKalunga, ndele ta longo oikumwifilonga nomadidiliko mokati kovanhu. 9 Ovalumenhu vamwe vongudu hai ifanwa Ovamangululwa ove uya navamwe vomOvakireni, Ovaaleksandria nosho yo vamwe va dja kuKilikia nokuAsia, nova li tava pataneke Stefanus. 10 Ndele kava li va dula oku mu tomha, molwaashi okwa li ta popi nounongo nokekwafo lomhepo iyapuki. 11 Opo nee ova heka ovalumenhu vamwe meholeko va tye: “Otwe mu uda ta sheke Moses naKalunga.” 12 Ovapataneki ovo ova xwaxwameka ovanhu, ovakulunhu voshiwana novanongo vomishangwa, ndele tave uya diva kuStefanus, tave mu kwata po nove mu twala kOmhangu yoPombada yOvajuda. 13 Onghee ove uya neembangi doipupulu, tadi ti: “Omulumenhu ou ota twikile okupopila mowii Omhango nosho yo onhele ei iyapuki. 14 Pashihopaenenwa, otwa uda ta popi kutya Jesus Omunasaret ota ka ngumauna po onhele ei nokulundulula eenghedimhango odo twa pewa kuMoses.”

15 Eshi aveshe ovo va li omutumba mOmhangu yoPombada yOvajuda ve mu tala, oshipala shaye osha li tashi monika sha fa shomweengeli.

7 Omupristeri munene okwa ti: “Oinima oyo tai popiwa oyoshili tuu?” 2 Stefanus okwa ti: “Ovamwatate nootate, pwilikineni. Kalunga koshinge okwe lihololela tatekulululwa Abraham eshi a li muMesopotamia fimbo ina ya a ka kale kuHaran, 3 ndele ta ti kuye: ‘Dja mo medu leni nokufiya po ovapambele voye u ye koshilongo osho handi ke ku ulikila.’ 4 Opo nee okwa dja mo medu lOvakaldi nokwa ya a ka kale kuHaran. Konima eshi xe a fya, Kalunga okwe mu lombwela a tembukile moshilongo omo mu li paife. 5 Ndele Kalunga ine mu pa nande okatukulwa kanini kedu, ashike okwe mu udanekela kutya otali ningi laye, nokonima ololudalo laye,* nonande pomhito opo ka li e na oludalo. 6 Kakele kaasho, Kalunga okwe mu lombwela kutya oludalo laye* otali ka ninga ovanailongo novanhu otave ke va ninga ovapika noku va hepeka oule womido 400. 7 Kalunga okwa ti: ‘Ohandi ka tokola oshiwana osho tashi ke va ninga ovapika. Opo nee otava ka dja mo notava ka longela nge oilonga iyapuki monhele ei.’

8 “Kalunga okwa ninga eudafano naAbraham kutya ye novanamati aveshe otava ka pita etanda. Onghee Abraham okwa pitifa Isak etanda konima yomafiku 8 okudja eshi a dalwa. Ndele Isak okwa dala Jakob, na Jakob okwa dala ootatekulululwa 12. 9 Ootatekulululwa ovo ova li va twila omumwaxe Josef ondubo, ndele tave mu landifa po kuEgipiti. Ashike Kalunga okwa kala pamwe naye, 10 ndele okwe mu xupifa momaudjuu aye aeshe nokwe mu pa ounongo opo a kale a hokiwa kuFarao ohamba yaEgipiti. Opo nee Farao okwe mu nangeka po a pashukile Egipiti neumbo laye alishe. 11 Ndele muEgipiti nomuKanaan ashishe omwa li mwa holoka ondjala inene, nootatekulululwa kava li ve na eshi tava li. 12 Eshi Jakob a uda kutya kuEgipiti oku na oikulya,* okwa tuma ko ootatekulululwa oshikando shotete. 13 Oshikando oshitivali, Josef okwe lihololela ovamwaxe, opo nee Farao okwa shiiva ovapambele vaJosef. 14 Josef okwa tumina xe Jakob etumwalaka opo e uye kuEgipiti novapambele vaye aveshe; kumwe aveshe ova li 75.* 15 Opo nee Jakob okwa ya kuEgipiti ndele oko a fila, nootatekulululwa oko yo va fila. 16 Ndele ove va twala kuSikem noku va paka mombila oyo Abraham a li a landa kovanamati vaHamor muSikem.

17 “Eshi efimbo laKalunga lokuwanifa po eudaneko olo a li a udanekela Abraham la li pokufika, Ovaisrael ovo va li muEgipiti ova li va hapupala neenghono 18 fiyo osheshi muEgipiti mwe uya ohamba imwe oyo inai shiiva Josef. 19 Ohamba oyo oya li ya kengelela ootatekulululwa noye va lombwela va ekeleshi ounona vavo opo va fye. 20 Pefimbo opo opo pa dalwa Moses nokwa li muwa koshipala shaKalunga. Okwa kala* meumbo laxe oule weemwedi nhatu. 21 Eshi ovadali vaye va li va fininikwa ve mu ekeleshi, omonakadona waFarao okwe mu kufa po ndele te mu tekula e li onga omonamati waye. 22 Onghee Moses okwa li a hongwa ounongo aushe wOvaegipiti. Okwa li ha popi nouladi nokwa longa oilonga inene.

23 “Moses eshi a wanifa omido 40, okwa li a tokola a ka talele po ovamwaxe Ovaisrael.* 24 Eshi a mona Omuegipiti umwe ta ungaunga naumwe womovamwaxe shihe li pauyuki, okwa popila omumwaxe mokudipaa Omuegipiti. 25 Moses okwa li ta diladila kutya ovamwaxe otave shi didilike mo kutya oye ta longifwa kuKalunga opo va xupifwe, ashike kava li ve shi didilika mo. 26 Efiku la landula ko, okwe uya kovamwaxe nokwa hanga vavali vomuvo tava lwifafana, opo nee okwe va anuna va pange ombili, ta ti: ‘Ovalumenhu nye, nye ovamwainafana. Omolwashike tamu ningafana nai?’ 27 Ndele ou a li ta ningi nai mukwao okwa undula Moses, ta ti: ‘Olyelye e ku tula po u ninge omupangeli nomutokoli wetu? 28 Hano owa hala okudipaa nge ngaashi wa dipaele Omuegipiti onghela?’ 29 Eshi Moses a uda ngaho, okwa faduka po ndele ta i a ka kale omunailongo kuMidian, oko a dalela ovanamati vavali.

30 “Eshi pa pita omido 40, Moses okwa li a holokelwa komweengeli moshixwa sheno sha tema mombuwa i li popepi nomhunda yaSinai. 31 Moses eshi e shi mona, okwa li e shi kuminwa. Ndele fimbo a li ta ehene popepi nasho e shi tale nawa, okwa uda ondaka yaJehova tai ti: 32 ‘Aame Kalunga kooxokulululwa, Kalunga kaAbraham, Kalunga kaIsak naKalunga kaJakob.’ Moses okwa li a hovela okukakama noka li vali a hala oku shi tala nawa. 33 Jehova okwa tya kuye: ‘Dula ko eenghaku doye osheshi onhele apa u li oiyapuki. 34 Ondi wete omahepeko oshiwana shange osho shi li muEgipiti, nondi udite omakemo asho, onghee onde uya oku shi xupifa. Paife ohandi ku tumu kuEgipiti.’ 35 Moses oo va li va dina, tava ti: ‘Olyelye e ku tula po u ninge omupangeli nomutokoli?’ oye a li omupangeli nomumangululi wavo a tumwa kuKalunga okupitila momweengeli oo a li e mu holokela poshixwa sheno. 36 Omulumenhu oo okwe va pitifa mo, nokwa longa oikumwifilonga muEgipiti, pEfuta Litilyana nosho yo mombuwa oule womido 40.

37 “Moses ou oye a lombwelele Ovaisrael ta ti: ‘Kalunga ota ka nangeka po omumwaxo umwe mokati keni a ninge omuprofeti ngaashi ame.’ 38 Oye tuu ou a li pamwe noshiwana shaIsrael mombuwa, a li nomweengeli komhunda yaSinai nosho yo nootatekulululwa. Okwa li a pewa etumwalaka kuKalunga e li tu shiivifile. 39 Ootatekulululwa kava li va dulika kuye, kava li ve mu tambula ko nova li va diladila okushuna kuEgipiti, 40 eshi va ti kuAron: ‘Tu ningila ookalunga ve tu kwatele komesho. Osheshi katu shi shii kutya oshike sha ningilwa Moses oo e tu kufa muEgipiti.’ 41 Opo nee pefimbo olo ova li va ninga oshikalunga sha fa onhana, ndele tave shi yambele omayambo nova li va hovela okuhafela oilonga yomake avo. 42 Onghee Kalunga okwe va pilamena nokwe va efa va longele oinima yokeulu, ngaashi sha shangwa kovaprofeti, va ti: ‘Eumbo nye laIsrael, haame mwa kala hamu yambele omayambo mombuwa oule womido 40. 43 Ndele ohamu longele oihongwafano oyo mwe lihongela ngaashi etwali loshikalunga Molok noshikalunga shonyofi Refan oyo hamu humbata. Onghee ohandi ke mu twala kokule nokuli naBabilon.’

44 “Eshi ootatekulululwa va li mombuwa, ova li ve na etwali olo tali ulike kutya Kalunga oku li pamwe navo, na Moses okwa li e li tunga ngaashi naanaa Kalunga a li e mu lombwela nokwe mu ulikila. 45 Opo nee ootatekulululwa ove li pewa li li efyuululo nove li twala pamwe naJosua kedu omo mwa li oiwana oyo Kalunga a ta mo moipafi yootatekulululwa. Ndele ova kala nalo fiyo opefimbo laDavid. 46 David okwa li a hokiwa kuKalunga nokwa li a pula a pewe oufembanghenda wokutungila Kalunga kaJakob onhele. 47 Ndele Salomo oye a li a tungila Kalunga onhele. 48 Ashike Omukombadambada iha kala meenhele da tungwa nomake, ngaashi ashike omuprofeti umwe a ti: 49 ‘Eulu olo olukalwa lange, nedu olo oshilyatelo sheemhadi dange. Jehova okwa ti: Otamu ka tungila nge onhele ya tya ngahelipi? Ile onhele yange yokukala oi li peni? 50 Mbela haame nda shita oinima aishe oyo?’

51 “Oohamitwe dikukutu nye, ovo mwa fitika omatwi eni noinamu pita etanda momitima deni, alushe otamu kondjifa omhepo iyapuki, ngaashi ooxokulululwa va li hava ningi. 52 Omuprofeti elipi po ina hepekwa kooxokulululwa? Ova dipaa ovaprofeti ovo va shiivifa komesho yefimbo okuuya kwomuyuki oo mwa kengelela nomwa dipaa. 53 Omwa pewa Omhango okupitila movaengeli, ndele inamu i diinina.”

54 Eshi va uda eendjovo odo, ova li va handuka unene* nova li va hovela okulikwesha komayoo. 55 Ndele Stefanus, oo a li e yadi omhepo iyapuki, okwa tala keulu nokwa mona oshinge shaKalunga naJesus e li ofika kolulyo laKalunga, 56 ndele ta ti: “Taleni, ondi wete eulu la yeuluka nOmona womunhu e li ofika kolulyo laKalunga.” 57 Opo nee ova ingida pombada nove likwata komatwi ndele tave mu totele aveshe. 58 Ove mu umbila kondje yoshilando nova hovela oku mu denga nomamanya. Eembangi odo da li tadi mu pataneke oda li da tula oikutu yado yokombada peemhadi domulumenhu omunyasha wedina Saul. 59 Fimbo va li tava denge Stefanus nomamanya, okwa indila ta ti: “Omwene Jesus, tambula omwenyo wange.”* 60 Opo nee okwa twa eengolo, ndele ta ingida pombada ta ti: “Jehova, ino va valulila etimba olo.” Konima eshi a popya ngaho, okwa fya.

8 Saul okwa li a hokwa okudipawa kwaStefanus.

Ndele okudja mefiku olo eongalo lomuJerusalem ola li la hovela okuhepekwa neenghono, novahongwa aveshe, kakele kovayapostoli, ova li ve lihanena moitukulwa yaJudea naSamaria. 2 Ovalumenhu ovatilikalunga ova kufa po oshimhu shaStefanus opo ve ke shi pake, nova li tave mu lili neenghono. 3 Ndele Saul okwa li a hovela okuponokela eongalo nonyanya. Okwa li ha ponokele momaumbo avo, ta kokolola mo ovalumenhu novakainhu noku va tulifa modolongo.

4 Ovahongwa ovo va halakanifwa moitukulwa yaJudea naSamaria ova li tava udifa onghundana iwa yeendjovo daKalunga. 5 Ndele Filippus okwa ya koshilando shaSamaria nokwa li a hovela okuudifila ovanhu kombinga yaKristus. 6 Eengudu dovanhu oda li tadi yandje elitulemo kwaasho Filippus a li ta popi, noda li yo tadi tale oikumwifilonga oyo a li ta longo. 7 Vahapu ova li ve na eemhepo da nyata, noda ingida pombada ndele tadi di mo muvo. Kakele kaasho, oingudu navahapu ovo va li va fya ombada ova li va velulwa. 8 Onghee ovanhu vomoshilando osho ova li va hafa neenghono.

9 Ndele moshilando osho omwa li omulumenhu wedina Simon oo a kala omhule nokwa li ha kumwifa Ovasamaria noumhulile waye; okwa li yo he liti kutya okwa fimana. 10 Ovanhu aveshe, oipuna neehepele, ova li hava yandje elitulemo kuye tava ti: “Omulumenhu ou oku na eenghono dinene da dja kuKalunga.” 11 Ova li hava yandje elitulemo kuye molwaashi okwa kala he va kumwifa noumhulile waye oule wefimbo. 12 Ndele eshi va itavela Filippus, oo a li te va udifile onghundana iwa yOuhamba waKalunga nedina laJesus Kristus, ovalumenhu novakainhu ova li va ninginifwa. 13 Simon naye okwa ninga omwiitaveli, nokonima eshi a ninginifwa okwa kala naFilippus nokwa li a kuminwa oikumwifilonga noilonganghono oyo Filippus a longa.

14 Eshi ovayapostoli ovo va li muJerusalem va uda kutya Ovasamaria ova tambula ko eendjovo daKalunga, ova tuma ko Petrus naJohannes; 15 ndele eshi va ya kuvo ove va ilikanena va pewe omhepo iyapuki. 16 Osheshi kapa li nande oumwe womuvo a li e i pewa, ndele ova li ashike va ninginifwa medina lOmwene Jesus. 17 Opo nee Petrus naJohannes ove va tenheka omake, ndele tava pewa omhepo iyapuki.

18 Eshi Simon a mona ovanhu va pewa omhepo iyapuki eshi va tenhekwa omake kovayapostoli, okwa pa ovayapostoli oimaliwa, 19 ta ti: “Naame pei nge eenghono odo opo keshe ou handi ka tenheka omake a pewe omhepo iyapuki.” 20 Opo nee Petrus okwa tya kuye: “Oimaliwa yoye nai ye pamwe naave mekano, osheshi oto diladila kutya oshali yaKalunga otai landwa. 21 Moshinima eshi ku na mo ombinga noito pewa sha shaashi omutima woye inau yuka koshipala shaKalunga. 22 Lialuluka kowii woye nokwiindila Jehova e ku dimine po omolwomadiladilo mai omutima woye; 23 ondi wete kutya ou na oudiyo* nowa pikwa koulunde.” 24 Simon okwa tya kuvo: “Indililei nge kuJehova opo ndiha ningilwe nande oshimwe shomoinima oyo mwa popya.”

25 Eshi va popya eendjovo daJehova nova yandja oundombwedi nawanawa, ova shuna kuJerusalem nova enda tava udifa onghundana iwa momikunda dihapu domuSamaria.

26 Ndele omweengeli waJehova okwa lombwela Filippus ta ti: “Fikama u ye kolukadi kondjila oyo ya dja muJerusalem ya finda kuGasa.” (Ondjila oyo oya enda mombuwa.) 27 Opo nee okwa fikama nokwa ya. Ndele tala, elenga* lokuEtiopia, omulumenhu oo a li e na ondodo ya kula mepangelo laKandake, ohambakainhu yaEtiopia, nokwa li ha pashukile emona layo alishe, okwa li a ya kuJerusalem a ka longela Kalunga. 28 Ndele eshi a li ta shuna e li omutumba metemba laye, okwa li ta lesha mokule membo lomuprofeti Jesaja. 29 Kalunga okwa lombwela Filippus okupitila momhepo yaye, ta ti: “Inda popepi netemba olo.” 30 Opo nee Filippus okwa tondokela ko nokwa uda elenga tali lesha mokule embo lomuprofeti Jesaja, ndele ta ti kulo: “Ou udite ko ngoo osho to lesha?” 31 Elenga ola ti: “Ohandi udu ko ngahelipi ngeenge kape na ou ta yelifile nge?” Opo nee ola lombwela Filippus a londe, ndele ta kala omutumba pulo. 32 Okwa li tali lesha oshitukulwa shOmushangwa ou tau ti: “Okwa twalwa koshidipaelo ngaashi odi, ndele ina makula okanya kaye ngaashi odi hai kala ya mwena ngeenge tai kululwa. 33 Kava li va ungaunga naye pauyuki eshi a li ta shekwa. Ndele molwaashi okwa li ta ka dipawa, olyelye a li ta ka popya kombinga yonakudiwa yaye?”

34 Ndele elenga ola pula Filippus la ti: “Lombwele nge, omuprofeti ou ota popi kombinga yalyelye? Okombinga yaye mwene ile oyaumwe e lili?” 35 Filippus okwa hovela nomushangwa oo, nokwe mu udifila onghundana iwa kombinga yaJesus. 36 Fimbo ve li mondjila, ove uya ponhele i na omeva, nelenga ola ti: “Tala, omeva oo aa, oshike tashi imbi nge ndi ninginifwe?” 37 —⁠— 38 Elenga ola yandja elombwelo etemba li kanghame, ndele aveshe naFilippus tava di mo nova ya momeva, na Filippus okwa li a ninginifa elenga olo. 39 Eshi va dja mo momeva, omhepo yaJehova oya kufa po diva Filippus, nelenga inali mu mona vali, ndele ola twikila nondjila yalo la hafa. 40 Ndele Filippus okwa ya kuAsdod, nokwa twikila okuudifa onghundana iwa moilando aishe fiyo okuKesarea.

9 Saul okwa li ta ningile ovahongwa omatilifo nokwa li a halelela oku va dipaa, onghee okwa ya komupristeri munene, 2 ndele te mu pula ku shangelwe eenhumwafo koinagoga yokuDamaskus opo ovalumenhu novakainhu aveshe ovo ta hange ve li mOndjila yOmwene* va mangwe po nova twalwe kuJerusalem.

3 Ofimbo a li mondjila popepi naDamaskus, ohaluka okwa twiywa kouyelele wa twa wa dja meulu, 4 ndele ta wile poshi nokwa uda ondaka tai ti: “Saul, Saul, omolwashike to hepeke nge?” 5 Opo nee okwa pula ta ti: “Omufimanekwa, oove lyelye?” Okwa ti: “Aame Jesus ou to hepeke. 6 Fikama u ye moshilando, opo nee oto ka lombwelwa osho u na okuninga.” 7 Ovalumenhu ovo va li tava ende pamwe naSaul ova li ofika va kumwa eshi va li ve udite ashike ondaka ndele kave wete omunhu. 8 Opo nee Saul okwa fikama po, ndele nonande omesho aye okwa li a pashuka, ka li e wete ko. Onghee ove mu kwata mokwooko nove mu twala muDamaskus. 9 Ndele okwa ninga oule womafiku atatu ehe wete ko, ina lya sha noina nwa.

10 MuDamaskus omwa li omuhongwa wedina Ananias, ndele Omwene okwe mu ifana memoniko ta ti: “Ananias!” Ananias okwa ti: “Aame ou Omwene.” 11 Omwene okwa tya kuye: “Fikama u ye kepandavanda hali ifanwa Yukilila, ndele to i meumbo laJudas to pula omulumenhu wedina Saul wokuTarsus. Tala, ota ilikana 12 nokwa mona memoniko omulumenhu wedina Ananias te uya kuye, ndele te mu tenheke omake opo a twikuluke.” 13 Opo nee Ananias okwa nyamukula ta ti: “Omwene, omulumenhu oo onde mu uda kuvahapu, nonda uda nghee ta hepeke neenghono ovayapuki voye ovo ve li muJerusalem. 14 Omulumenhu oo okwa pewa oufemba kovapristeri ovakulunhu e uye oku a kwate po aveshe ovo tava ifana edina loye.” 15 Omwene okwa tya kuye: “Inda, molwaashi omulumenhu oo onde mu hoolola a udifile oiwana, eehamba nOvaisrael kombinga yange. 16 Ohandi ke mu ulikila filufilu kutya ota ka shakeneka omahepeko e fike peni omolwedina lange.”

17 Ananias okwa ya meumbo laJudas nokwa tenheka Saul omake ndele ta ti: “Omumwatate Saul, Omwene Jesus oo a li e ku holokela eshi wa li mondjila wa finda oku okwa tuma nge ndi uye kwoove opo u twikuluke nou tililwe omhepo iyapuki.” 18 Ndele diva momesho aye omwa dja oinima nokwa twikuluka. Opo nee okwa fikama nokwa ninginifwa, 19 ndele ta li nokwa mona eenghono.

Okwa kala oule womafiku onhumba pamwe novahongwa muDamaskus. 20 Opo nee okwa hovela diva okuudifa moinagoga kombinga yaJesus kutya Omona waKalunga. 21 Ndele aveshe ovo ve mu uda ova li va kumwa nova tya: “Hano omulumenhu ou haye a li ha hepeke ovashikuli vaJesus* muJerusalem? Mbela eshi e uya oku ine uya ko nelalakano loku va kwata po noku va twala kovapristeri ovakulunhu?” 22 Mokweendela ko kwefimbo Saul okwa ka kala e na ouladi nowino muhapu wokuudifa. Okwa li a kumwifa Ovajuda ovo va li muDamaskus eshi e va tomha filufilu kutya Jesus oye Kristus.

23 Eshi pa pita omafiku, Ovajuda ova li va pangela omhangela ve mu dipae. 24 Opo nee Saul okwa uda omhangela yavo. Ndele ova li yo va kelela poivelo yoshilando omutenya noufiku opo va dule oku mu dipaa. 25 Ovahongwa vaye ove mu kulukifila mombululu yekuma loshilando oufiku, e li moshimbaba.

26 Eshi a fika muJerusalem, okwa ninga eenghendabala a waimine ovahongwa, ashike ova li ve mu tila molwaashi kava li va itavela kutya okwa ninga shili omuhongwa. 27 Onghee Barnabas okwe uya, ndele te mu kwafele nokwe mu twala kovayapostoli, ndele te va lombwele nghee Omwene a holokela Saul nokwa popya naye mondjila, nonghee Saul a li a popya nouladi kombinga yedina laJesus muDamaskus. 28 Ndele okwa kala pamwe navo muJerusalem ta ende a manguluka* nota popi nouladi kombinga yedina lOmwene. 29 Okwa li ta popi nokutomhafana nOvajuda ovo hava popi Oshigreka, ndele ova li tava kendabala oku mu dipaa. 30 Eshi ovamwatate ve shi didilika, ove mu twala kuKesarea ndele tave mu tumine kuTarsus.

31 Ndele Ovakriste aveshe muJudea, muGalilea nomuSamaria ashishe ova li ve na ombili nova li va pamekwa. Eshi va kala hava tila Jehova nova kala metwokumwe newiliko lomhepo iyapuki, ova li va hapupala.

32 Petrus okwa li a endaenda noshitukulwa ashishe, nokwa ya yo kovahongwa ovo va li hava kala muLidda. 33 Okwa hanga ko omulumenhu wedina Eneas, oo a kala iha di mombete oule womido hetatu, molwaashi okwa li a fya ombada. 34 Petrus okwa tya kuye: “Eneas, Jesus Kristus okwe ku velula. Fikama, yala ombete yoye.” Opo nee okwa fikama diva. 35 Eshi ovakalimo aveshe vomuLidda novomuSaroni va mona osho sha ningilwa Eneas, ova itavela Omwene.

36 Ndele muJoppa omwa li omuhongwa wedina Tabita, tali ti, “Dorkas.”* Okwa li ha longo oilonga ihapu iwa nokwa li ha kwafele eehepele. 37 Eshi Petrus a li muLidda, Tabita okwa kwatwa kouvela nokwa fya. Opo nee ovahongwa vomuJoppa ova kosha oshimhu shaye nove shi tula monduda yopombada. 38 Molwaashi Lidda osha li popepi naJoppa, eshi ovahongwa va uda kutya Petrus oku li muLidda ova tuma ko ovalumenhu vavali ve ke mu lombwele tava ti: “Ila divadiva kufye.” 39 Opo nee Petrus okwa fikama, ndele ta i pamwe navo. Eshi a fika, ove mu twala monduda yopombada, novafiyekadi aveshe ove uya kuye tava lili noku mu ulikila oikutu ihapu oyo va hondjelwa kuDorkas eshi a li e na omwenyo. 40 Petrus okwa lombwela aveshe va ye pondje opo nee okwa twa eengolo ndele ta ilikana. Okwa pilukila oko ku na oshimhu nokwa tya: “Tabita, penduka.” Tabita okwa pashuka, naashi a mona Petrus, okwa kala omutumba. 41 Okwe mu kwata meke, te mu fikamifa nokwa ifana ovahongwa novafiyekadi ndele te mu yandje kuvo e na omwenyo. 42 Oshinima osho osha shiivika muJoppa ashishe, navahapu ova li va itavela Omwene. 43 Ndele Petrus okwa kala muJoppa oule womafiku manini pamwe naSimon, omushiki woipa.

10 MuKesarea omwa li omulumenhu wedina Kornelius, omukulunhu wetangakwaita* olo la li hali ifanwa etangakwaita laItali.* 2 Okwa li ha tila Kalunga pamwe novaneumbo vaye aveshe, a li ha yandje oikwafa ihapu kovanhu nokwa kala ha ilikana kuKalunga. 3 Efiku limwe ponhatu yomutenya lwaapo,* okwa mona memoniko omweengeli waKalunga te uya kuye, ndele te mu ifana ta ti: “Kornelius!” 4 Kornelius okwe mu tala a tila, ndele te mu pula ta ti: “Omwene, oshike?” Omweengeli okwa tya kuye: “Kalunga okwe ku dimbuluka omolwoikwafa yoye nomailikano oye. 5 Tuma paife ovalumenhu kuJoppa va ka tale omulumenhu wedina Simon oo ha ifanwa Petrus. 6 Omulumenhu oo ota talele po meumbo laSimon, omushiki woipa, oo e na eumbo li li popepi nefuta.” 7 Diva eshi omweengeli oo a li ta popi naye a dja po, Kornelius okwa ifana ovapiya vaye vavali nomukwaita umwe omutilikalunga, 8 ndele te va hokololele oinima aishe nokwe va tuma kuJoppa.

9 Mefiku la landula ko, fimbo va li natango molweendo nova li pokufika moshilando, Petrus okwa ya konduda yopombada po 12 womutenya lwaapo* a ka ilikane. 10 Ndele okwa li a fya ondjala unene nokwa li a hala okulya. Ofimbo kwa li taku longekidwa oikulya, okwa mona memoniko 11 eulu la yeuluka noshinima* tashi kulukifwa sha fa elapi la kula loliina li kwetiwe keembinga nhee. 12 Moshinima osho omwa li oinamwenyo aishe yomaulu ane, oilipwedi* yokombada yedu needila dokeulu. 13 Opo nee okwa uda ondaka tai ti: “Petrus, fikama, dipaa ndele to li!” 14 Petrus okwa ti: “Ahowe Omwene, inandi lya nande onale oinima ya nyata noinai koshoka.” 15 Okwa uda vali ondaka oyo oshikando oshitivali tai ti: “Oinima oyo Kalunga a koshola ino tya kutya oya nyata.” 16 Okwa uda vali ondaka oyo oshikando oshititatu, ndele diva oshinima* osho osha shunifwa meulu.

17 Fimbo Petrus a li natango te lipula kutya emoniko olo a mona otali ti ngahelipi, ovalumenhu ovo va li va tumwa kuKornelius ova li ofika poshivelo tava pula kutya eumbo laSimon oli li peni. 18 Ova ingida tava pula ngeenge meumbo olo omu na omweenda Simon oo ha ifanwa Petrus. 19 Fimbo Petrus a li natango ta dilonga kemoniko olo, Kalunga okwa popya naye okupitila momhepo yaye ta ti: “Tala, ope na ovalumenhu vatatu tave ku pula. 20 Fikama, ndele to i pedu u ye pamwe navo; ino kala wa limbililwa nandenande molwaashi aame nde va tuma.” 21 Opo nee Petrus okwa ya pedu kovalumenhu ovo, ndele ta ti: “Aame ou tamu kongo. Otamu kwafelwa shike?” 22 Ova ti: “Kornelius, omukulunhu wetangakwaita, omulumenhu omuyuki nomutilikalunga oo e lineekelwa koshiwana ashishe shOvajuda, okwa pewa omalombwelo kuKalunga okupitila momweengeli omuyapuki e ku tume uye keumbo laye opo a ka ude osho to mu lombwele.” 23 Opo nee Petrus okwe va ifana meumbo, ndele te va tambula ko ve li ovaenda vaye.

Mefiku la landula ko, okwa fikama, ndele ta i pamwe novalumenhu ovo nosho yo ovamwatate vamwe va dja kuJoppa. 24 Ova fika muKesarea mefiku la landula ko. Kornelius okwa hangwa e va teelela nokwa li a ifana ovapambele vaye nookaume kopofingo. 25 Eshi Petrus a fika peumbo, Kornelius okwe mu shakeneka, ndele ta tu eengolo peemhadi daye noku mu linyongamena. 26 Petrus okwa ti: “Fikama, ame naame omunhu ashike ngaashi ove.” 27 Ndele fimbo va li tava popi, okwa ya meumbo nokwa hanga mo ovanhu vahapu va ongala. 28 Petrus okwa tya kuvo: “Omu shi shii kutya kashi li pamhango kOmujuda okweendafana ile okupopya novanhu vomihoko dimwe di lili, ndele Kalunga okwa lombwela nge kutya inandi ula omunhu nande oumwe kutya ina koshoka. 29 Eshi wa tuma nge ndi uye kwoove, onde uya ndihe na omalimbililo. Onghee onda hala okuuda kutya owa ifanena nge shike.”

30 Kornelius okwa ti: “Omafiku ane a tetekela, pefimbo eli, ponhatu* yomutenya lwaapo, onda li meumbo lange handi ilikana. Opo nee omulumenhu umwe a djala oikutu tai vema okwa li ofika pwaame, 31 ndele ta ti: ‘Kornelius, Kalunga okwa uda omailikano oye noikwafa yoye okwe i didilika. 32 Onghee tuma kuJoppa u ka talelwe Simon oo ha ifanwa Petrus. Omulumenhu oo oku li omweenda meumbo laSimon, omushiki woipa, oo e na eumbo li li popepi nefuta.’ 33 Opo nee onda tuma u ka talwe, nowa ninga nawa e shi we uya. Ndele atushe otu li apa koshipala shaJehova tu ude oinima aishe oyo e ku lombwela u tu shiivifile.”

34 Petrus okwa popya ta ti: “Paife ondi shi shii kutya Kalunga ke na okatongo, 35 ndele oha tambula ko omunhu womoshiwana keshe oo he mu tila noha longo osho sha yuka. 36 Kalunga okwa tumina Ovaisrael eendjovo opo e va udifile onghundana iwa yombili okupitila muJesus Kristus, oo e li Omwene waaveshe. 37 Omu shii eendjovo odo da popiwa okudja muGalilea fiyo omuJudea ashishe konima yeninginifo olo la li tali udifwa kuJohannes 38 li na sha naJesus Omunasaret nanghee Kalunga e mu vaeka nomhepo iyapuki nokwe mu pa eenghono. Molwaashi Kalunga okwa li pamwe naye, okwa ya moshitukulwa ashishe ta longo ouwa nokuvelula aveshe ovo va hepekwa kOndiaboli. 39 Fye eembangi doinima aishe oyo a longa moitukulwa omo mwa li Ovajuda nomuJerusalem; ndele ove mu dipaa eshi ve mu valela komuti. 40 Kalunga okwe mu nyumuna mefiku etitatu nokwe mu hololela ovanhu, 41 havanhu aveshe, ndele ofye ava twa hoololwa kuKalunga komesho yefimbo, twa lya notwa nwa pamwe naye konima eshi a nyumunwa koufi. 42 Okwe tu lombwela yo tu udifile ovanhu nokuyandja oundombwedi nawanawa kutya ou oye a nangekwa po kuKalunga a ninge omutokoli wovanamwenyo novafi. 43 Ovaprofeti aveshe ova popya kombinga yaye. Ova ti kutya keshe ou te mu itavele ota diminwa po omatimba okupitila medina laye.”

44 Fimbo Petrus a li natango ta popi oinima oyo, aveshe ovo va li tava pwilikine eendjovo daKalunga ova tililwa omhepo iyapuki. 45 Ndele ovaitaveli ovadiinini* ovo va li ve uya naPetrus ova li va kumwa eshi ovanhu vomoiwana imwe navo va li va tililwa oshali yomhepo iyapuki. 46 Ove va uda tava popi omalaka oshinailongo notava tange Kalunga. Opo nee Petrus okwa ti: 47 “Ovanhu ava ova tililwa omhepo iyapuki ngaashi fye, olyelye ta dulu oku va kelela va ninginifwe momeva?” 48 Ndele okwa yandja elombwelo opo va ninginifwe medina laJesus Kristus. Opo nee ove mu pula a kale puvo omafiku manini.

11 Ndele ovayapostoli nosho yo ovamwatate ovo va li muJudea ova uda kutya ovanhu vomoiwana imwe navo ova tambula ko eendjovo daKalunga. 2 Eshi Petrus e uya kuJerusalem, ovanhu ovo va li hava diinine omhango i na sha nepitotanda ova hovela oku mu kembaula,* 3 tava ti: “Owa ile meumbo lovanhu ovo inava pita etanda, ndele to li pamwe navo.” 4 Opo nee Petrus okwe va yelifila moule kombinga yoshinima osho, ta ti:

5 “Fimbo nda li handi ilikana muJoppa, onda mona memoniko oshinima* tashi kulukifwa okudja meulu sha fa elapi la kula loliina shi kwetiwe keembinga nhee nosha li sha yukifwa kwaame. 6 Eshi nde shi tala nawa, onda mona mo oinamwenyo yomaulu ane yokombada yedu, oilyani, oilipwedi* needila dokeulu. 7 Onda uda yo ondaka tai ti: ‘Petrus, fikama, dipaa ndele to li!’ 8 Opo nee onda ti: ‘Ahowe Omwene, inandi lya nande onale oinima ya nyata noinai koshoka.’ 9 Ondaka oyo oya tya vali oshikando oshitivali: ‘Oinima oyo Kalunga a koshola ino tya kutya oya nyata.’ 10 Ondaka oyo oya popya vali oshikando oshititatu, opo nee oinima aishe oya shunifwa meulu. 11 Pefimbo opo tuu opo, ovalumenhu vatatu va dja kuKesarea ova li ofika peumbo omo twa li hatu di, va tumwa nge. 12 Opo nee Kalunga okwa popya naame okupitila momhepo iyapuki ndi ye pamwe navo, nondiha limbililwe nandenande. Ndele onda ya yo pamwe novamwatate vahamano, notwa ya meumbo laKornelius.

13 “Okwe tu hokololela nghee a mona omweengeli meumbo laye oo e mu lombwela ta ti: ‘Tuma ovalumenhu kuJoppa va ka ifane Simon oo ha ifanwa Petrus, 14 note ke ku lombwela osho mu na okuninga novaneumbo loye aveshe opo mu xupifwe.’ 15 Eshi nda hovela okupopya, ova tililwa omhepo iyapuki ngaashi ashike nafye twa li twe i tililwa pehovelo. 16 Opo nee onda dimbuluka eendjovo dOmwene, eshi a li ha ti: ‘Johannes okwa li ha ninginifa momeva, ndele nye otamu ka ninginifwa nomhepo iyapuki.’ 17 Ngeenge Kalunga okwe va pa oshali ya faafana naayo e tu pa ovo twa itavela mOmwene Jesus Kristus, aame lyelye ndi kelele Kalunga aha longe ehalo laye?”*

18 Eshi va uda oinima oyo, ova efa oku mu pataneka,* ndele tava tange Kalunga tava ti: “Kalunga okwa pa ovanhu vomoiwana imwe omhito ve lidilulule opo va ka mone omwenyo.”

19 Ndele ovahongwa ovo va li ve lihanifwa komahepeko oo a ningwa pefimbo laStefanus ova ya kuFoinikia, kuKipro nokuAntiokia, nova li va udifila Ovajuda aveke. 20 Ovahongwa vamwe vomuvo va dja kuKipro nokuKireni ove uya kuAntiokia nova hovela okupopya novanhu ovo hava popi Oshigreka, tava udifa onghundana iwa yOmwene Jesus. 21 Onghee eke laJehova ola li pamwe navo, novanhu vahapu ova li va ninga ovaitaveli nova shikula Omwene.

22 Ndele ehokololo li na sha navo ola udika meongalo lomuJerusalem, nova tuma Barnabas kuAntiokia. 23 Eshi a fika ko, okwa mona nghee Kalunga e va fila onghenda, nokwa li a hafa, ndele te va tu omukumo aveshe va kale hava dulika kOmwene nomutima aushe. 24 Barnabas okwa li e na onghedi iwa, e yadi omhepo iyapuki nokwa li e na eitavelo la kola. Osho osha li sha ningifa ovanhu vahapu va itavele Omwene. 25 Ndele okwa ya kuTarsus a ka konge Saul. 26 Eshi e mu mona, ove uya naye kuAntiokia. Omudo aushe ova kala hava ongala pamwe meongalo lomuAntiokia nokuhonga ovanhu vahapu, naamo omo ovahongwa va ifanwa tete edina Ovakriste pawiliko laKalunga.

27 Ndele pefimbo opo muJerusalem omwa dja ovaprofeti va ya kuAntiokia. 28 Opo nee umwe womuvo wedina Agabus okwa xunganeka okupitila momhepo iyapuki kutya kombada yedu alishe otaku ke uya ondjala inene, oyo ye ke uya pefimbo lepangelo laKlaudius. 29 Ovahongwa ova pangela omhangela va yandje oikwafa* keshe umwe shi fike pwaasho ta dulu, opo ve i tumine ovamwatate vokuJudea. 30 Onghee ova tuma Barnabas naSaul va twale oikwafa oyo kovakulunhuongalo.

12 Pefimbo opo ohamba Herodes oya li ya hovela okuhepeka oilyo imwe yeongalo. 2 Herodes okwa dipaifa Jakob omumwaina waJohannes neongamukonda. 3 Eshi a mona kutya Ovajuda ova li ve shi hafela, okwa kwatifa po yo Petrus. (Osho osha ningwa pefimbo loshivilo shomingome inadi ya efulika.) 4 Okwe mu kwatifa po nokwe mu tulifa modolongo, ndele ta tula po eengudu nhee dovakwaita di mu nangele tadi ningi omalufo, ongudu keshe oya li i na ovakwaita vane, nokwa li ta diladila oku mu kufa mo* noku mu eta komesho yovanhu konima yOpaasa. 5 Petrus okwa kala modolongo, neongalo ola kala tali mu ilikanene kuKalunga la mana mo.

6 Eshi Herodes a li poku mu kufa mo, oufiku oo Petrus okwa li a nangala pokati kovakwaita a mangwa nomalyenge avali, noposhivelo opa li ovanangeli ovo va li tava pashukile odolongo. 7 Ndele tala, opa holoka omweengeli waJehova, nomokanduda kodolongo omwa minikilwa kouyelele. Omweengeli okwa kuma Petrus molupati, te mu pendula, ta ti: “Fikama, endelela!” Opo nee omalyenge okwa wa ko komaoko aye. 8 Omweengeli okwa tya kuye: “Lilongekida ndele to djala eenghaku doye.” Petrus osho a ninga. Omweengeli okwa ti vali: “Djala oshikutu shoye shokombada, ndele to shikula nge.” 9 Opo nee okwa shikula omweengeli nova ya pondje. Ashike ka li e shi shii ngeenge osho tashi ningwa po oshinima sholela, ndele okwa li ta diladila kutya emoniko. 10 Ova pitilila ongudu yotete yovanangeli nonhivali, naashi va fika pomuvelo woshitenda oo wa ama koshilando, owe liyeulula. Eshi va dja mo, ova enda va lambalala epandavanda, nomweengeli okwa dja po puye ombadilila. 11 Petrus eshi a didilika osho sha ningwa po, okwa ti: “Paife ondi shi shii lela kutya Jehova okwa li a tuma omweengeli waye nokwa mangulula nge momake aHerodes nokoinima aishe oyo Ovajuda va li va teelela ndi ningilwe.”

12 Eshi e shi didilika mo, okwa ya keumbo laMaria ina yaJohannes oo ha ifanwa Markus, oko kwa li kwa ongala ovahongwa vamwe tava ilikana. 13 Eshi a konghola pomuvelo, omupiya umwe okakadona wedina Rode okwe uya a tale kutya olyelye ta konghola. 14 Rode eshi a dimbuluka ondaka yaPetrus, okwa li a hafa neenghono noka li e mu yeulula, ponhele yaasho, okwa tondokela meumbo, ndele ta lombwele ovo va li mo kutya Petrus oku li komuvelo. 15 Opo nee ova tya kuye: “Ou na ngoo oushili waasho to popi?” Ashike okwa kala ta ti kutya oPetrus. Ova ti: “Oo omweengeli.”* 16 Ndele Petrus okwa kala pomuvelo ta konghola. Eshi va yeulula po, ove mu mona nova li va kumwa. 17 Opo nee Petrus okwe va udikila neke va mwene nokwe va lombwela nghee Jehova e mu pitifa mo modolongo, ndele ta ti: “Oinima ei i lombweleni Jakob nosho yo ovamwatate.” Opo nee okwa dja po nokwa ya konhele imwe i lili.

18 Eshi kwa sha, ovakwaita ova li va limbililwa kombinga yaasho sha ningilwa Petrus. 19 Herodes okwa li ta kongo Petrus, ndele eshi ine mu mona okwa pula ovanangeli, nokwa yandja elombwelo va pewe ehandukilo. Opo nee Herodes okwa dja mo muJudea a ka kale kuKesarea oule wefimbo.

20 Ndele Herodes okwa li a handukila* ovanhu vomuTirus naSidon. Molwaashi ovanhu vokoitukulwa oyo ova li have uya okulanda oikulya koshitukulwa osho sha li koshi yepangelo laHerodes, ove limanga oukuni kumwe nove uya, ndele tava ehela Blastus, omulumenhu oo ha pashukile eumbo lohamba, opo va dule okupanga ombili nayo. 21 Efiku limwe fimbo ovanhu va li va ongala, Herodes okwa djala oshikutu shouhamba nokwa kala omutumba koshipundi shetokolo, ndele ta popi moipafi yavo. 22 Ovanhu ovo va li va ongala ova ingida mokule tava ti: “Ondaka oyo oyakalunga, ndele kai fi yomunhu!” 23 Omweengeli waJehova okwe mu handukila, ndele ta kwatwa koudu, molwaashi ka li a fimaneka Kalunga, opo nee okwa shitwa komainyo ndele ta fi.

24 Ndele eendjovo daJehova oda tandavela, novanhu vahapu ova ninga ovaitaveli.

25 Konima eshi Barnabas naSaul va fikifa oikwafa yovamwatate kuJerusalem, ova aluka ko pamwe naJohannes oo ha ifanwa yo Markus.

13 Meongalo lomuAntiokia omwa li ovaprofeti novahongi ava: Barnabas, Simeon oo a li ha ifanwa Nigeri, Lukius Omukireni, Manahen oo a fikola pamwe naHerodes omupangeli woshitukulwalongo nosho yo Saul. 2 Jehova okwa li a popya navo okupitila momhepo iyapuki fimbo va li tave mu longele nokulidilika oikulya, ta ti: “Hoololeni Barnabas naSaul opo va ka longe oshilonga osho handi va pe.” 3 Eshi ve lidilika nokwiilikana, ove va tenheka omake nove va lekela.

4 Ovalumenhu ovo va tumwa kuKalunga okupitila momhepo iyapuki ova ya kuSeleukia, naashi va dja oko ova ya noshikepa kuKipro. 5 Eshi va fika muSalamis, ova li va hovela okuudifa eendjovo daKalunga moinagoga yOvajuda. Ova li yo va ya naJohannes oo a li te va yakula.*

6 Eshi va dja muSalamis ova ya kuPafo nova shakena nomulumenhu Omujuda wedina Barjesus, oo a li omhulile nomuprofeti omunaipupulu. 7 Omulumenhu oo okwa li ha longele ngoloneya* Sirgius Paulus, oo a li omulumenhu omunaendunge. Molwaashi Sirgius Paulus okwa li a halelela okuuda eendjovo daKalunga, okwa li a ifana Barnabas naSaul. 8 Ndele omhulile oyo hai ifanwa Elimas (edina olo tali ti omhulile) oya li tai kendabala okukelela ngoloneya aha itavele Omwene. 9 Opo nee Saul oo a li yo ha ifanwa Paulus okwa li a tililwa omhepo iyapuki, ndele te mu tale noku mu konenena 10 ta ti: “Omulumenhu ove u yadi oihelele nowii aushe, omona wOndiaboli nou tonde ouyuki, omolwashike to pengifa omahongo aJehova? 11 Tala, Jehova ote ku handukile ndele to ningi omupofi noito ka mona ouyelele wetango oule wefimbo.” Diva okwa mona oshinima sha fa omwifi nokwa hangwa komilaulu, nokwa li ta pungauka ta kongo ou te mu kwata mokwooko. 12 Eshi ngoloneya a mona osho sha ningwa po, okwa ninga omwiitaveli molwaashi okwa li a kuminwa ehongo laJehova.

13 Paulus novaendi pamwe naye ova dja muPafo noshikepa va ya kuPerge muPamfilia. Ndele Johannes okwe va fiya ko nokwa shuna kuJerusalem. 14 Eshi va dja kuPerge ova ya kuAntiokia muPisidia. Opo nee ova ya ndele tava kala omutumba moshinagoga mefiku lEshabata. 15 Konima eshi Omhango nomambo ovaprofeti a leshwa, ovakulunhu voshinagoga ova lombwela Paulus naBarnabas tava ti: “Ovamwatate, ngeenge omu na ondjovo yetwomukumo i lombweleni ovanhu.” 16 Paulus okwa fikama nokwe va udikila neke va mwene, ndele ta ti:

“Ovaisrael nye, nanye yo ovo hamu tila Kalunga, pwilikineni. 17 Kalunga kOvaisrael okwa hoolola ootatekulululwa fimbo va li ovanailongo muEgipiti, nokwa longifa eenghono daye dinene e va mangulule mo. 18 Okwa kala te ve lididimikile mombuwa oule womido 40 lwaapo. 19 Konima eshi a hanauna po oiwana iheyali oyo ya li medu laKanaan, edu olo okwe li pa ootatekulululwa li li efyuululo. 20 Oinima aishe oyo oya ningwa moule womido 450 lwaapo.

“Konima yaasho, okwa nangeka po ovatokolipangeli ve va wilike fiyo opefimbo lomuprofeti Samuel. 21 Ndele lwanima ova ka pula va pewe ohamba, na Kalunga okwe va pa Saul omona waKis, omulumenhu womepata laBenjamin, oo e va pangela oule womido 40. 22 Konima eshi Kalunga a kufa Saul koshipundi, okwa nangeka po David a ninge ohamba, nokwa li a popya kombinga yaye ta ti: ‘David omona waIsai, omulumenhu oo ha hafifa omutima wange; ota ka longa ashishe osho nda hala.’ 23 Kalunga okwa li a udaneka kutya moludalo* lomulumenhu oo omo mwa li tamu ka dja Jesus, oo a li ta ka xupifa Ovaisrael. 24 Ndele fimbo oo i ne uya, Johannes okwa kala ta udifile Ovaisrael aveshe va ninginifwe opo va ulike kutya ove lidilulula. 25 Eshi Johannes a li ta wanifa po oshilonga shaye, okwa li ha ti: ‘Ame haame ou tamu diladila. Ndele taleni, ou te uya konima yange inandi wana nokuli okumangulula eemwiya deenghaku daye.’

26 “Ovamwatate nye, oludalo laAbraham nosho yo amushe ovo hamu tila Kalunga, otwa tuminweni ondjovo ei yexupifo. 27 Ovajerusalem novapangeli vavo inava didilika mo omuxupifi oo, ndele eshi ve mu tokola ova wanifa po osho sha popiwa kovaprofeti, osho sha li hashi leshwa moipafi alushe meshabata. 28 Nonande kava li va mona sha shoku mu dipaifa, ova li va pula Pilatus e mu valelife komuti. 29 Eshi va wanifa po oinima aishe oyo ya shangwa i na sha naye, ove mu kufa ko komuti* noku mu paka mombila.* 30 Ndele Kalunga okwe mu nyumuna koufi 31 nokwa monika omafiku mahapu kwaavo a li a ya pamwe navo kuGalilea nofiyo okuJerusalem. Naavo otava yandje oumbangi kovanhu u na sha naye.

32 “Onghee ohatu mu udifile onghundana iwa i na sha neudaneko olo la udanekelwa ootatekulululwa. 33 Kalunga okwe li tu wanifila filufilu tu li oludalo lavo eshi a nyumuna Jesus, ngaashi sha popiwa mepsalme etivali, la ti: ‘Ove omona wange, nonena onda ninga xo.’ 34 Ndele molwaashi okwe mu nyumuna koufi noita ka ola vali, okwa ti: ‘Nye ohandi ke mu ulikila ohole i na oudiinini oyo nda udanekela David.’ 35 Epsalme limwe vali ola ti: ‘Ito ka efa olutu lomudiinini li ole.’ 36 Kakele kaasho, David okwa longa ehalo laKalunga pefimbo laye, okwa fya ndele ta pakwa pooxekulululwa nokwa ola. 37 Ashike ou a nyumunwa kuKalunga ina ola.

38 “Ovamwatate, ohandi mu udifile opo mu shiive kutya Kalunga ote ke mu dimina po omatimba omolwefyo lomulumenhu ou. 39 Omhango yaMoses kaya li ye mu ningifa mu kale ovayuki, ndele omolwefyo lomulumenhu ou, Kalunga ota ka tala ko aveshe ovo tava itavele ve li ovayuki. 40 Onghee kaleni mwa lungama opo muha ningilwe osho sha popiwa momambo ovaprofeti, kwa tiwa: 41 ‘Ovasheki nye, taleni oilonga oyo handi longo pefimbo leni. Itamu ka itavela kutya aame nde i longa nande omu i yelifilwe moule, ndele otamu ke i kuminwa notamu ka kana po.’”

42 Eshi Paulus naBarnabas va li tava di moshinagoga, ovanhu ove va indila opo va popye vali kombinga yoinima oyo mEshabata tali landula. 43 Konima eshi va dimbuka moshinagoga, Ovajuda vahapu naavo va ninga veitavelo lOshijuda, ovo va li hava longele Kalunga, ova shikula Paulus naBarnabas ovo ve va ladipika va diinine efilonghenda laKalunga.

44 MEshabata la landula ko, ovanhu aveshe moshilando ova li va ongala opo va pwilikine eendjovo daJehova. 45 Eshi Ovajuda va mona eengudu dovanhu, ova li va handuka unene nova li va hovela okusheka nokupataneka osho Paulus a li ta popi. 46 Paulus naBarnabas ove va lombwela nouladi tava ti: “Onye mwa li mu na okulombwelwa tete eendjovo daKalunga. Ndele molwaashi inamu hala oku di tambula ko notamu ulike kutya inamu wana oku ka mona omwenyo waalushe, taleni, paife ohatu ka udifila oiwana imwe. 47 Jehova okwe tu lombwela ta ti: ‘Onde ku nangeka po u li ouyelele koiwana u udife kombada yedu alishe osho tashi ka etela ovanhu exupifo.’”*

48 Eshi ovanhu vomoiwana imwe va uda ngaho, ova li va hafa nova hovela okutanga Jehova omolweendjovo daye, naaveshe ovo va li va halelela shili omwenyo waalushe ova ninga ovaitaveli. 49 Ndele eendjovo daJehova oda li da tandavela moshilongo ashishe. 50 Opo nee Ovajuda ova xwaxwameka ovakainhu ovanamadina ovo va li hava tila Kalunga, novalumenhu ovanenenhu vomoshilando opo va hepeke Paulus naBarnabas noku va taataa mo moshilando shavo. 51 Paulus naBarnabas ove lipupula ondwi keemhadi nova ya kuIkonium. 52 Ndele ovahongwa ova li va twikila okutililwa omhepo iyapuki nova li va hafa unene.

14 Eshi Paulus naBarnabas va li muIkonium, ova ya moshinagoga shOvajuda nova popya monghedi oyo ye linyengifa Ovajuda nOvagreka vahapu va ninge ovaitaveli. 2 Opo nee Ovajuda ovo va li inava itavela ova xwaxwameka ovanhu* vomoiwana imwe va tonde Paulus naBarnabas. 3 Ndele ova kala mo oivike yonhumba, na Jehova okwa li e va pa eenghono va udife nouladi etumwalaka laye lefilonghenda nova longe oikumwifilonga nomadidiliko. 4 Ovanhu vahapu moshilando ova li va tukauka; vamwe ova li va ama kombinga yOvajuda ofimbo vamwe okombinga yovayapostoli. 5 Eshi ovanhu vomoiwana imwe nOvajuda pamwe novapangeli vavo va li va diladila oku va hepeka noku va denga nomamanya, 6 ove shi uda, ndele tava i kuLikaonia, kuListra, kuDerbe nokomikunda odo di li popepi noilando oyo. 7 Opo nee ova ya oko va ka udife onghundana iwa.

8 Ndele muListra omwa li omulumenhu a li omutumba, a dalwa oshingudu noka li ha dulu okweenda. 9 Omulumenhu oo okwa li ta pwilikine keendjovo daPaulus. Paulus okwe mu tala nawa, naashi a mona kutya oku na eitavelo kutya ota veluka, 10 okwa ingida ta ti: “Fikama!” Opo nee omulumenhu oo okwa fikama nokwa hovela okweenda. 11 Eshi eengudu dovanhu da mona osho Paulus a ninga, oda ingida mOshilikaonia tadi ti: “Ookalunga ove lifefa ovanhu nove uya kufye!” 12 Eengudu dovanhu oda luka Barnabas Zeus, ndele molwaashi Paulus oye a li ta popi unene, ode mu luka Hermes. 13 Omupristeri woshikalunga Zeus, osho sha li shi na otembeli i li popepi nomuvelo woshilando, ye neengudu dovanhu ova eta eengobe neengala opo va yambele Paulus naBarnabas.

14 Ndele omuyapostoli Barnabas naPaulus eshi ve shi uda, ova pombaula oikutu yavo nova tondokela mongudu yovanhu tava ingida tava ti: 15 “Ookaume, omolwashike tamu ningi ngaho? Nafye ovanhu ashike ngaashi nye. Ohatu mu udifile onghundana iwa opo mu efe po oilonga ii nomu alukile kuKalunga omunamwenyo ou a shita eulu, edu nefuta noinima aishe oyo i li mo. 16 Mefimbo lonale okwa li a efa oiwana aishe i landule eendjila dayo. 17 Ndele okwa li e mu ulikila kutya okwa tya ngahelipi eshi e mu longela ouwa. Okwe mu lokifila odula okudja meulu nokwe mu pa eloolo, e mu kutifa noikulya nokwa yadifa omitima deni nehafo.” 18 Nonande ova li va popya oinima oyo, ova li va kelela noudjuu eengudu dovanhu dihe va yambele.

19 Ndele Ovajuda ovo va dja kuAntiokia nokuIkonium ova xwaxwameka eengudu dovanhu, noda denga Paulus nomamanya noku mu kokololela kondje yoshilando, tadi diladila kutya okwa fya. 20 Fimbo ovahongwa ve mu ongalela, okwa fikama po nokwa ya moshilando. Mefiku la landula ko, okwa ya pamwe naBarnabas kuDerbe. 21 Konima eshi va udifa onghundana iwa moshilando osho nova kwafela ovanhu vonhumba va ninge ovahongwa, ova shuna kuListra, kuIkonium nokuAntiokia. 22 Ndele ova pameka ovahongwa,* nove va ladipika va kale neitavelo la pama, tava ti: “Otu na okupita momaudjuu mahapu opo tu ye mOuhamba waKalunga.” 23 Ova nangeka po ovalumenhu vamwe va ninge ovakulunhuongalo meongalo keshe, nova ilikana nokulidilika, ndele tave va yandje momake aJehova ou va itavela.

24 Ndele ove uya kuPamfilia va pitila muPisidia, 25 nokonima eshi va udifa eendjovo daKalunga muPerge, ova ya kuAtalia. 26 Okudja opo ova ya noshikepa kuAntiokia, oko Kalunga a li e va ulikila efilonghenda omolwoilonga oyo va longa.

27 Eshi va fika ova ongaleka eongalo, ndele tava hokolola oinima aishe oyo va longa kekwafo laKalunga nanghee a yeululila oiwana ondjila opo i dule okwiitavela. 28 Opo nee ova kala novahongwa oule wefimbo.

15 KuJudea okwa dja ovalumenhu vamwe, ndele tava hongo ovamwatate tava ti: “Kape na ou ta dulu oku ka xupifwa ngeenge ina pita etanda pamhango yaMoses.” 2 Ndele opa holoka eenhamanana pokati kavo nooPaulus naBarnabas, opo nee opa ningwa elongekido opo Paulus naBarnabas nosho yo ovamwatate vamwe va ye kovayapostoli nokovakulunhu kuJerusalem omolwoshinima osho.*

3 Ndele Paulus naBarnabas ova findikilwa ondjilakati keongalo, nova pita muFoinikia nomuSamaria tava hepaulula nghee ovanhu vomoiwana va hovela okulongela Kalunga, naasho osha li sha hafifa neenghono ovamwatate aveshe. 4 Eshi va fika muJerusalem, eongalo, ovayapostoli nosho yo ovakulunhu ova li ve va tambula ko nohamu. Opo nee Paulus naBarnabas ova hepaulula oilonga aishe oyo va longa kekwafo laKalunga. 5 Ndele vamwe vomongudu yelongelokalunga lOvafarisai ovo va ninga ovaitaveli ova fikama, ndele tava ti: “Ove na okupita etanda nomu na oku va kumaida va diinine Omhango yaMoses.”

6 Ovayapostoli novakulunhu ova ongala opo va konakone oshinima osho. 7 Konima eshi va kundafana oule wefimbo, Petrus okwa fikama ndele ta ti kuvo: “Ovamwatate, omu shi shii nawa kutya Kalunga okwa hoolola nge mokati keni mefimbo lonale opo ndi udifile ovanhu vomoiwana imwe onghundana iwa nova itavele. 8 Kalunga oo e shii osho shi li momutima okwa ulika kutya okwe va tambula ko eshi e va pa omhepo iyapuki ngaashi ashike e i tu pa. 9 Ina tongola pokati ketu navo, ndele okwa yelifa omitima davo omolweitavelo lavo. 10 Omolwashike tamu yeleke Kalunga eshi tamu twike ovahongwa ovo ondjoko idjuu oyo ootatekulululwa nafye inatu dula oku i humbata? 11 Otu na eitavelo kutya ngaashi ashike fye hatu ka xupifwa omolwefilonghenda lOmwene Jesus, navo yo otava ka xupifwa omolwalo.”

12 Ndele aveshe ovo va li va ongala ova li va mwena tava pwilikine kuBarnabas naPaulus eshi tava hepaulula kombinga yomadidiliko noikumwifilonga ihapu oyo va longa mokati koiwana kekwafo laKalunga. 13 Eshi va mana okupopya, Jakob okwa ti: “Ovamwatate, pwilikineni kwaame. 14 Simeon* okwa hepaulula nghee Kalunga a dimbuluka ovanhu vomoiwana imwe nanghee a hovela okuhoolola mokati kavo ovo tava ka ifanwa nedina laye. 15 Osho oshi li metwokumwe naasho sha shangwa kovaprofeti eshi va ti: 16 ‘Konima yoinima oyo, ohandi aluka ndi tungulule eumbo* laDavid olo la teka po; ohandi ka tungulula oikulukuma yalo, 17 opo ovo va xupa po nosho yo ovanhu vomoiwana aishe, ovo hava ifanwa nedina lange va konge Jehova va mana mo. Jehova osho ta ti ou ta ka wanifa po oinima oyo 18 a udaneka okudja nale.’ 19 Onghee inandi hala tu twike omutengi ovanhu vomoiwana imwe ovo va hala okulongela Kalunga, 20 ndele natu va shangele kutya nave likaleke kokule noinima oyo i na ekwatafano noikalunga, oluhaelo,* oinamwenyo ya fya oshuunguungu* nosho yo ohonde. 21 Okudja pefimbo lonale, moilando noilando omwa kala ovanhu ovo hava udifa okudja momambo aMoses, eshi va li have a lesha mokule efiku keshe leshabata moinagoga.”

22 Ndele ovayapostoli, eongalo alishe novakulunhu ova tokola okutuma ovalumenhu ovo va hoololwa mokati kavo va ye kuAntiokia pamwe naPaulus nosho yo Barnabas. Ova tuma Silas naJudas oo ha ifanwa Barsabas, ovo va li hava kwatele komesho mokati kovamwatate. 23 Ove va tuma nonhumwafo oyo va shanga tava ti:

“Fye ovamwaxo, ovayapostoli novakulunhu, ohatu mu shangele ovamwatate vokuAntiokia, vokuSiria nokuKilikia ovo mwa dja moiwana imwe. 24 Otwa uda kutya kunye okwe uya vamwe va dja kufye notave mu piyaaneke* noinima oyo tava popi va hala oku mu pukifa, ashike hafye twe va tuma. 25 Onghee otwa fika pexulifodiladilo tu hoolole ovalumenhu tu va tume kunye pamwe nomumwatate Barnabas naPaulus, 26 ovalumenhu ovo ve liyandja* omolwedina lOmwene wetu Jesus Kristus. 27 Ohatu tumu Judas naSilas, opo yo ve mu lombwele oshinima osho pakanya. 28 Ndele omhepo iyapuki oye tu kwafela tu mone kutya inatu pumbwa oku mu twika omutengi, kakele koku mu shiivifila oinima ei ya fimana: 29 henukeni oluhaelo,* likalekeni kokule nohonde, oinamwenyo ya fya oshuunguungu* nosho yo oinima oyo ya yambelwa oikalunga. Ngeenge omwe likaleke kokule noinima oyo, otamu ka kala nonghalamwenyo iwa. Kaleni po nawa.”

30 Eshi ovalumenhu ovo va lekelwa, ova ya kuAntiokia nova ongaleka ongudu aishe yovahongwa, ndele tave va pe onhumwafo oyo. 31 Konima eshi ve i lesha, ova li va hafa neenghono eshi va tuwa omukumo. 32 Ndele molwaashi Judas naSilas navo ova li ovaprofeti, ova li va twa omukumo ovamwatate neendjovo dihapu nove va pameka. 33 Eshi va kala ko oule wefimbo lonhumba, ovamwatate ove va lekela nombili va shune kwaavo va li ve va tuma. 34 —— 35 Ndele Paulus naBarnabas ova kala muAntiokia pamwe navakwao vahapu tava hongo nokuudifa onghundana iwa i na sha neendjovo daJehova.

36 Konima yomafiku onhumba, Paulus okwa lombwela Barnabas ta ti: “Natu shune paife* tu ka talele po ovamwatate koilando aishe oko twa udifila eendjovo daJehova, tu ka tale nghee tave shi endifa.” 37 Barnabas okwa li a tokola okuya pamwe naJohannes oo ha ifanwa Markus. 38 Ndele Paulus ka li e wete shi li pandunge okuya pamwe naJohannes molwaashi okwa li e va fiya muPamfilia noka li a ya pamwe navo moilonga yokuudifa. 39 Osho osha li sha etifa eenhamanana da kwata moiti pokati kavo, ndele tava tukauka; Barnabas okwa ya noshikepa kuKipro pamwe naMarkus. 40 Konima eshi ovamwatate va ilikana kuJehova opo a file oshisho Paulus, Paulus okwa hoolola Silas a ye pamwe naye. 41 Okwa enda ta pameke omaongalo muSiria nomuKilikia.

16 Eshi Paulus a fika muDerbe nomuListra, okwa hanga mo omuhongwa wedina Timoteus oo a dalwa komukainhu Omujuda omwiitaveli, naxe okwa li Omugreka. 2 Timoteus okwa li e na epopilo liwa mokati kovamwatate vomuListra nomuIkonium. 3 Paulus okwa li a halelela okuya naTimoteus, onghee okwe mu kufa nokwe mu pitifa etanda omolwOvajuda ovo va li moilando oyo, molwaashi aveshe ova li ve shii kutya xe Omugreka. 4 Ova enda noilando tava lombwele ovamwatate va diinine osho sha tokolwa kovayapostoli nokovakulunhu vomuJerusalem. 5 Opo nee eitavelo lovamwatate momaongalo oo ola li la pamekwa, nomuvalu wavo owa enda tau hapupala efiku keshe.

6 Ndele ova ya kuFrigia nokuGalatia molwaashi omhepo iyapuki oya li ye va kelela vaha udife eendjovo daKalunga moshitukulwa shaAsia. 7 Eshi ve uya kuMisia, ova li tava kendabala okuya kuBitinia, ndele Jesus okwe va kelela ko okupitila momhepo iyapuki. 8 Onghee ove uya kuTroas va pitila muMisia. 9 Paulus okwa mona emoniko oufiku omulumenhu Omumakedonia e li ofika puye te mu indile ta ti: “Ila kuMakedonia u tu kwafele.” 10 Diva eshi Paulus a mona emoniko olo, otwa ya kuMakedonia molwaashi otwa li twa didilika kutya Kalunga oye te tu tumu tu ke va udifile onghundana iwa.

11 Opo nee otwa dja noshikepa muTroas notwa ya twa yukilila kuSamotrake, ndele mefiku la shikula ko otwa ya kuNeapolis. 12 Okudja opo otwa ya kuFilippi, oshilando sha fimanenena shomuMakedonia osho sha li koshi youhamba waRoma. Moshilando osho otwa kala mo oule womafiku onhumba. 13 Ndele mefiku lEshabata otwa ya kondje yoshilando popepi nomulonga, oko twa li twa uda kutya oku na onhele yokwiilikanena. Onghee otwa kala omutumba ndele hatu hovele okuudifila ovakainhu ovo va li va ongala. 14 Omukainhu omutilikalunga wedina Lidia a dja kuTiatira, oo a li ha landifa oiyata* yoluvala lipeepela, okwa li ta pwilikine, na Jehova okwa li a patulula omutima womukainhu oo opo a yandje elitulemo keendjovo daPaulus. 15 Eshi Lidia novaneumbo laye va ninginifwa, okwe tu indila ta ti: “Ngeenge omu wete kutya ondi li omudiinini kuJehova, ileni mu kale meumbo lange.” Onghee okwa kala te tu lilile tu ye naye.

16 Ndele fimbo twa li hatu i konhele yokwiilikanena, otwa li twa shakeneka omupiya umwe okakadona oo a li e na ondemoni. Okakadona oko oka li haka xunganeke onakwiiwa,* noovene vako ova li hava likola oupuna muhapu mokuxunganeka kwako. 17 Oka kala ke tu landula taka ingida taka ti: “Ovalumenhu ovo ovapiya vaKalunga Omukombadambada notave mu udifile ondjila yexupifo.” 18 Oka kala taka ningi ngaho omafiku mahapu. Xuuninwa, Paulus okwa ka loloka, ndele ta piluka nokwa lombwela ondemoni oyo ya li muko ta ti: “Medina laJesus Kristus ohandi ku lombwele, dja mo muko.” Opo nee oya dja mo diva.

19 Eshi oovene vako va mona kutya omukalo wavo wokulikola owa iwa moshipala, ova kwata po Paulus naSilas, ndele tave va twala kovakulunhu voshilando konhele yomalandifilo. 20 Ova lombwela ovakulunhu voshilando tava ti: “Ovalumenhu ava otava piyaaneke unene oshilando shetu. Vo Ovajuda, 21 ndele otave tu udifile oinima oyo inatu pitikwa tu ninge tu li Ovaroma.” 22 Ongudu yovanhu oye va ponokela, novakulunhu voshilando ova pombaula oikutu yavo, ndele tava yandje elombwelo va dengwe neengola. 23 Konima eshi ve va hepeka neenghono, ove va tula modolongo nova lombwela omukeleli wodolongo e va pashukile. 24 Eshi a pewa elombwelo olo, okwe va tula mokanduda kodolongo komeni, ndele ta tula eemhadi davo meti.

25 Ndele mokati koufiku, ovanadolongo ova li tava pwilikine eshi Paulus naSilas tava ilikana notava imbi tava hambelele Kalunga. 26 Ohaluka opa ningwa ekakamo ledu linene, nodolongo oya li ya kakama. Opo nee omivelo adishe dodolongo oda yeuluka nomalyenge ovanadolongo okwa li a yululuka. 27 Eshi omukeleli wodolongo a penduka nokwa mona kutya omivelo oda yeuluka, okwa kufa eongamukonda laye e lidipae molwaashi okwa li ta diladila kutya ovanadolongo ova dja mo. 28 Paulus okwa ingida mokule ta ti: “Ino lidipaa; atushe omo tu li!” 29 Omukeleli wodolongo okwa pula a pewe olamba nokwa tondokela meni ta kakama unene, ndele ta tu eengolo peemhadi daPaulus naSilas. 30 Okwe va twala pondje, ndele te va pula ta ti: “Ovafimanekwa, oshike ndi na okuninga opo ndi xupifwe?” 31 Ova ti: “Itavela Omwene Jesus opo u ka xupifwe pamwe novaneumbo loye.” 32 Opo nee ove mu udifila eendjovo daJehova pamwe novaneumbo laye aveshe. 33 Oufiku oo tuu oo, okwa ya pamwe navo ndele ta hakula oipute yavo. Opo nee okwa ninginifwa diva pamwe novaneumbo laye aveshe. 34 Okwe va twala meumbo laye ndele te va longekidile oikulya, nokwa li a hafa neenghono pamwe novaneumbo laye aveshe eshi va itavela Kalunga.

35 Eshi kwa sha, ovakulunhu voshilando ova tuma ovanambelewa va ka lombwele omukeleli wodolongo tava ti: “Mangulula ovalumenhu ovo.” 36 Omukeleli wodolongo okwa lombwela Paulus eendjovo odo, ta ti: “Ovakulunhu voshilando ova tuma ovalumenhu opo nye vavali mu mangululwe. Djeni mo, ndele tamu i nombili.” 37 Paulus okwa tya kovanambelewa: “Ove tu dengifa moipafi yovanhu nove tu tula modolongo inatu tokolwa nonande fye Ovaroma. Omolwashike paife va hala oku tu mangulula mo meholeko? Osho itashi shiiva nandenande; nave uye vo vene ve tu pitife mo.” 38 Ovanambelewa ova ka lombwela ovakulunhu voshilando eendjovo odo. Eshi ovakulunhu voshilando va uda kutya ovalumenhu ovo Ovaroma, ova li va tila neenghono. 39 Opo nee ove uya ndele tave va pe ombili, nokonima eshi ve va mangulula mo, ove va lombwela va dje mo moshilando. 40 Eshi va dja modolongo, ova ya keumbo laLidia, naashi va mona ovamwatate, ove va twa omukumo, ndele tava i.

17 Paulus, Silas naTimoteus ova ya kuTessalonika oko kwa li oshinagoga shOvajuda, va pitila muAmfipolis nosho yo muApollonia. 2 Opo nee Paulus okwa ya moshinagoga ngaashi ha ningi shito, nokwa kundafana* novanhu Omishangwa momashabata atatu. 3 Okwe va yelifila noku va ulikila mOmishangwa kutya Kristus okwa li e na okuhepekwa nokunyumunwa koufi, ta ti: “Jesus ou handi mu udifile oye Kristus.” 4 Osho osha li she linyengifa vamwe vomuvo va ninge ovaitaveli nova kala hava endafana naPaulus naSilas. Ova li yo va waiminwa kongudu inene yOvagreka ovo va li hava longele Kalunga nosho yo ovakainhu vamwe ovanamadina.

5 Ndele Ovajuda ova li va handuka unene,* nova ifana ovalumenhu ovakolokoshi ovo va li hava kala pomalandifilo tava elaela opo va dundakanife ovanhu moshilando. Opo nee ovalumenhu ovo ova ponokela meumbo laJason va hala Paulus naSilas, ve va ete kongudu yovanhu. 6 Eshi inave va hanga mo, ova kokolola mo Jason novamwatate vamwe ndele tave va twala kovakulunhu voshilando, nova popya mokule tava ti: “Ovalumenhu ava tava piyaaneke ounyuni aushe omo ve li yo omu, 7 na Jason okwe va yakula ve li ovaenda meumbo laye. Ovalumenhu aveshe ovo ove li omhinge nomhango yOmukesari eshi tava ti oku na vali ohamba imwe, Jesus.” 8 Eshi ongudu yovanhu novakulunhu voshilando ve shi uda, ova li va tila, 9 nokonima eshi Jason novamwatate ve lifutila mo, ove va efa va ye.

10 Ndele diva eshi kwa toka, ovamwatate ova tuma Paulus naSilas kuBerea. Eshi va fika, ova ya moshinagoga shOvajuda. 11 Ovaberea ova li ovanaendunge ve dule Ovatessalonika molwaashi ova tambula ko eendjovo daKalunga nomutima aushe, nove di konakona noukeka efiku keshe va tale ngeenge osho va lombwelwa oshoshili tuu. 12 Vahapu vomuvo ova ninga ovaitaveli, mwa kwatelwa ovakainhu novalumenhu Ovagreka ovalineekelwa. 13 Eshi Ovajuda vomuTessalonika va uda kutya Paulus okwa udifila yo nomuBerea eendjovo daKalunga, ova ya ko ndele tava piyaaneke eengudu dovanhu. 14 Opo nee ovamwatate ova tuma diva Paulus a ye komunghulofuta, ashike Silas naTimoteus ova li va fyaala po. 15 Vamwe ova findikila Paulus kuAtena, ndele eshi va lombwelwa kutya Silas naTimoteus ova pumbwa okuya diva kuPaulus, ova shuna.

16 Fimbo Paulus a li e va teelela muAtena, okwa li a handuka neenghono eshi a mona kutya moshilando osho omu yadi oikalunga. 17 Opo nee okwa hovela okukundafana* nOvajuda moshinagoga nosho yo navamwe ovo va li hava tila Kalunga, nokwa li ha udifile aveshe ovo va li hava kala pomalandifilo efiku keshe. 18 Ndele ovafilosofi* vamwe Ovaepikuri nOvastoa ova hovela oku mu pataneka, vamwe ova li tava ti: “Omupopyaani ou okwa hala oku tu lombwela shike?” Vamwe vali ova ti: “Ota udifa kombinga yookalunga vokoilongo.” Ova popya ngaho molwaashi Paulus okwa li te va udifile onghundana iwa kombinga yaJesus nenyumuko. 19 Onghee ove mu twala kOareopagi,* ndele tava ti: “Tu lombwela kombinga yehongo lipe olo to popi. 20 Osheshi oto popi oinima inatu i uda nale, notwa hala okushiiva kutya otai ti ngahelipi.” 21 Ovaatena aveshe novanailongo ovo va li* muAtena, ngeenge va li vehe na eshi tava ningi, ova li hava i va ka kundafane nokuuda oinima ipe. 22 Paulus okwa kala ofika pokati kOareopagi ndele ta ti:

“Ovaatena nye, ondi wete kutya amushe otamu monika mu hole oinima yopakalunga, nomwa fimaneka ookalunga mu dule ovanhu vamwe. 23 Pashihopaenenwa, eshi nda enda moshilando nonda konenena eenhele deni diyapuki,* onda mona mo oaltari i na eshangelo tali ti, ‘OyaKalunga ehe shiivike.’ Onghee ohandi mu udifile kombinga yaKalunga ou hamu longele ndele kamu mu shii. 24 Kalunga ou a shita eulu nedu nakeshe eshi shi li mo iha kala meetembeli da tungwa nomake molwaashi oye mwene weulu nedu. 25 Iha kwafelwa kovanhu nomake a fa ngeno e na eshi a pumbwa, molwaashi ovanhu aveshe oye e va pa omwenyo nomufudo nakeshe shimwe. 26 Okwa shita oiwana aishe okudja momunhu umwe opo i lihanene kombada yedu alishe, nokwa tulila po ovanhu omaufwafimbo neengaba dokukala kwavo, 27 va dule okukonga Kalunga va mana mo fiyo otave mu mono, osheshi ke li kokule nakeshe umwe womufye. 28 Otu na omwenyo, hatu linyenge notu li po omolwaye, ngaashi ovashangi veni voitevo vamwe va tile, ‘Nafye yo oludalo* laye.’

29 “Ndele molwaashi fye oludalo* laKalunga, inatu diladila kutya Kalunga okwa fa oshingoli, oshisilveri ile emanya ile oshinima keshe sha hongwa nosha etwa po kovanhu. 30 Kalunga okwa kala te lididimikile ovanhu eshi va li vehe mu shii, ndele paife ote va shiivifile keshe pamwe kutya nave lidilulule, 31 molwaashi okwa tula po efiku omo ta ka tokola ounyuni pauyuki, te u tokolifa omulumenhu ou a nangeka po nokwe mu nyumuna opo a ulikile ovanhu aveshe kutya efiku olo otali ke uya shili.”

32 Eshi va uda kombinga yenyumuko lovafi, vamwe ove mu sheka, ofimbo vamwe va ti: “Otwa hala vali okuuda kwoove kombinga yoshinima osho moshikando tashi uya.” 33 Opo nee Paulus okwa dja po puvo, 34 novalumenhu vamwe ove mu shikula nova ninga ovaitaveli. Mokati kavo omwa li Dionisius, oo a li oshilyo shomhangu yOareopagi, nosho yo omukainhu wedina Damaris, navamwe vali.

18 Eshi Paulus a dja muAtena, okwa ya kuKorinto. 2 MuKorinto okwa hanga mo Omujuda wedina Akwila, odalele yaPontus, oo a hangika opo a di kuItali pamwe nomukulukadi waye Priskila, molwaashi Klaudius okwa lombwela Ovajuda aveshe va dje mo muRoma. Ndele Paulus okwa ya 3 a ka kale meumbo lavo nokwa li ha longo pamwe navo molwaashi ova li hava longo oilonga ya faafana yokuninga eetenda. 4 Meshabata keshe, okwa li ha i koshinagoga a ka yandje oipopiwa* nokukwafela Ovajuda nosho yo Ovagreka va itavele.

5 Eshi Silas naTimoteus va ya kuMakedonia, ova hanga Paulus a hovela okuudifa nouladi eendjovo daKalunga nokutomha Ovajuda kutya Jesus oye Kristus. 6 Ndele eshi va kala tave mu pataneke noku mu sheka, okwa pupula oikutu yaye ondwi, ndele ta ti: “Ohonde yeni nai kale kombada yeni; ame nghi na etimba. Paife ohandi i kovanhu vomoiwana imwe.” 7 Eshi a dja moshinagoga, okwa ya meumbo laTitius Justus, omulumenhu omutilikalunga, oo a li e na eumbo li li popepi noshinagoga. 8 Ndele Krispus omukulunhu woshinagoga okwa itavela Omwene pamwe novaneumbo laye aveshe. NOvakorinto vahapu ovo va uda onghundana iwa ova itavela, ndele tava ninginifwa. 9 Omwene okwa lombwela Paulus oufiku memoniko ta ti: “Ino tila, ove ino sholola, ndele twikila okuudifa 10 osheshi moshilando eshi ondi na mo ovanhu vahapu. Ondi li pamwe naave, nokape na ou te ke ku ponokela noku ku yahameka.” 11 Onghee okwa kala muMakedonia oule womudo neemwedi hamano, te va hongo eendjovo daKalunga.

12 Eshi Gallio a li ngoloneya* waAkaia, Ovajuda ova li ve limanga kumwe va kwate po Paulus ndele tave mu twala komhangu, 13 tava ti: “Omulumenhu ou ota hongo ovanhu va longele Kalunga monghedi oyo i li omhinge nomhango yoshilongo.” 14 Ndele fimbo Paulus ina popya, Gallio okwa tya kOvajuda: “Ngeno okwa li a longa omunyonena ile owii washa, ngeno ohandi pwilikine ngoo kunye. 15 Ashike ngeenge otamu tu eemhata di na sha neendjovo, nomadina nosho yo nomhango yeni, di pongololeni po nye vene. Inandi hala okuninga omutokoli woinima oyo.” 16 Opo nee okwe va taataa mo momhangu. 17 Ndele aveshe ova ponokela Sostenes omukulunhu woshinagoga, ndele tave mu dengele komesho monhele yomhangu. Ashike Gallio ka li a ya mo olunyala nandenande moinima oyo.

18 Eshi Paulus a kala muMakedonia oule womafiku onhumba, okwa lekela ovamwatate, ndele ta i noshikepa kuSiria pamwe naPriskila naAkwila. Ndele okwa li a kululifa ko eexwiki daye muKenkrea molwaashi okwa li a ana kuKalunga. 19 Eshi va fika muEfeso, Paulus okwe va fiya po nokwa ya moshinagoga, ndele ta tomhafana nOvajuda. 20 Nonande ova kala tava indile Paulus a kale puvo natango, ka li e shi dimina, 21 ashike okwe va lekela, ndele ta ti kuvo: “Ngeenge Jehova okwe shi hala, ohandi ka alukila vali kunye.” Opo nee okwa dja noshikepa muEfeso, 22 ndele ta i kuKesarea. Okudja opo okwa ya kuJerusalem nokwa talela po eongalo, ndele ta i kuAntiokia.

23 Konima eshi a kala muAntiokia efimbo lonhumba, okwa dja mo ndele ta talele po eenhele di lili noku lili muGalatia nomuFrigia nokwa li a pameka ovahongwa aveshe.

24 Ndele Omujuda wedina Apollos, odalele yomuAleksandria, oo a li omunongo mokupopya nokwa li e shii nawa Omishangwa, okwa li e uya kuEfeso. 25 Omulumenhu oo okwa li a hongwa kombinga yaJehova, nomhepo iyapuki oya li ye mu kwafela a honge noku popye nouladi oinima i li paushili kombinga yaJesus; ndele okwa li ashike e shii eninginifo laJohannes. 26 Okwa li a hovela okupopya nouladi moshinagoga, ndele eshi Priskila naAkwila ve mu uda, ove mu ifana po nove mu yelifila filufilu oinima i li paushili kombinga yaKalunga. 27 Eshi Apollos a li a hala okuya kuAkaia, ovamwatate vokuEfeso ova shangela ovamwatate vokuAkaia ve mu tambule ko nohamu. Eshi a fika, okwa li a kwafela neenghono ovo va ninga ovaitaveli omolwefilonghenda laKalunga, 28 nokwa li ta popi nouladi nokutomha filufilu Ovajuda kutya ova puka eshi e va leshela moipafi Omishangwa odo tadi ulike kutya Jesus oye Kristus.

19 Eshi Apollos a li muKorinto, Paulus okwa tavakana moitukulwa yokeemhunda ndele ta i kuEfeso. Okwa hanga ko ovahongwa vamwe, 2 ndele te va pula ta ti: “Omwa tililwa ngoo omhepo iyapuki eshi mwa ninga ovaitaveli?” Ove mu nyamukula tava ti: “Inatu uda sha nande onale kombinga yomhepo iyapuki.” 3 Opo nee okwa tya kuvo: “Omwa ninginifwa eninginifo lilipi?” Ova ti: “Eninginifo laJohannes.” 4 Paulus okwa ti: “Johannes okwa li ha ninginifa ovanhu shi li euliko kutya ove lidilulula, nokwa kala te va lombwele va itavele Jesus oo a li te ke uya konima yaye.” 5 Eshi ve shi uda, ova ninginifwa medina lOmwene Jesus. 6 Ndele eshi Paulus e va tenheka omake, ova tililwa omhepo iyapuki nova hovela okupopya momalaka oshinailongo nokuxunganeka. 7 Aveshe kumwe ova li ovalumenhu 12.

8 Paulus okwa kala oule weemwedi nhatu he uya moshinagoga, ta tomhafana novanhu nokupopya nouladi kombinga yOuhamba waKalunga. 9 Vamwe ova li va kukutika omitima davo nova anya okwiitavela, ndele tava hovele okusheka Ondjila yOmwene moipafi yongudu yovanhu. Opo nee Paulus okwa dja po puvo pamwe naavo va itavela, nokwa kala he va pe oipopiwa efiku keshe pokapale kofikola yaTirannus. 10 Okwa kala te shi ningi oule womido mbali, nokungaho Ovajuda nOvagreka aveshe ovo va li muAsia ova uda eendjovo dOmwene.

11 Paulus okwa longa yo oikumwifilonga kekwafo laKalunga, 12 noikutu nosho yo outetahema ovo a li ha djala ova twaalelwa ovanaudu, nova li va veluka; neemhepo da nyata odo da li muvo oda dja mo. 13 Ovajuda vamwe ovo yo va li hava endaenda tava te mo eendemoni, ova li hava kendabala oku shi ninga tava longifa edina lOmwene Jesus; ova li hava ti: “Ohandi mu te mo medina laJesus oo ha udifwa kuPaulus.” 14 Vamwe vomwaavo va li tava ningi ngaho ova li ovanamati vaheyali vaSkeva omupristeri omukulunhu wOvajuda. 15 Pomhito imwe eshi va li tava te mo omhepo ya nyata, oya tya kuvo: “Ondi shii Jesus naPaulus, ndele nye onye oolyelye?” 16 Opo nee omulumenhu oo a li e na omhepo ya nyata okwe va ponokela, ndele te va dulu eenghono, nomeumbo omo ova dja mo onhapo ve li hamunghele* nove na oipute. 17 Eshi Ovajuda nOvagreka aveshe ovo va li muEfeso ve shi uda, ova kwatwa koumbada, nedina lOmwene Jesus ola li la fimanekwa. 18 Ndele vahapu ovo va ninga ovaitaveli ova li ve uya nova hepaulula oilonga yavo moipafi. 19 Opo nee vahapu ovo va li eemhule ova ongela omambo avo nove a eta ndele tave a xwike po moipafi yaaveshe. Eshi ve a valula, okwa li e na ongushu i fike poisilveri 50 000. 20 Omolweenghono daJehova, eendjovo daye oda kala nokutandavela noda holola eenghono dado.

21 Konima yoinima aishe oyo, Paulus okwa li a tokola kutya ota piti muMakedonia nomuAkaia ndele ta i kuJerusalem. Okwa ti: “Ngeenge onda i kuJerusalem, ohandi ka ya yo kuRoma.” 22 Opo nee okwa tuma kuMakedonia ovalumenhu vavali ovo va li tave mu kwafele, Timoteus naErastus, ndele ye okwa kala kuAsia oule wefimbo.

23 Ndele pefimbo opo opa tukuluka omapiyaano omolwOndjila yOmwene. 24 Opa li omulumenhu omuhambwidi wedina Demetrius oo a li ha hambula outembeli vanini va fa otembeli yoshikalunga Artemis, nokwa kala ha likolifa ovahambwidi vakwao. 25 Okwa ongela ovo va li have mu longele novahambwidi vakwao vamwe, ndele ta ti: “Ovalumenhu nye, omu shi shii kutya oupuna wetu owa dja moilonga ei. 26 Omu wete nomwa uda nghee Paulus a itavelifa ovanhu vahapu muEfeso nomuAsia ashishe kutya ookalunga ovo va longwa nomake kave fi ookalunga vashili. 27 Osho osha puka molwaashi ovanhu otashi dulika va ka sheke ongeshefa yetu. Otava ka tala ko yo otembeli yakalunga omukainhu omufimanekwa Artemis i li oshinima shongaho. Ovanhu muAsia ashishe nomounyuni aushe ohava longele kalunga omukainhu Artemis, ndele itave ke mu fimaneka vali omolweendjovo daPaulus.” 28 Eshi ovalumenhu ovo ve shi uda, ova handuka neenghono ndele tava ingida tava ti: “Artemis wOvaefeso na fimanekwe!”

29 Ndele moshilando osho omwa tukuluka omapiyaano, novanhu aveshe ova lotokela monhele yomaudano, nova kokololela mo Gaius naAristarkus, Ovamakedonia ovo va enda pamwe naPaulus. 30 Paulus okwa li a hala okuya kovanhu ovo va li meni, ashike ovahongwa kava li ve mu pitika. 31 Vamwe vomovaunganeki voivilo yokomudo novomaudano, ovo va li ookaume kaye, navo ova li ve mu londwela aha ye monhele yomaudano. 32 Ndele ovanhu ovo va li va ongala ova li va lyalyakana, navamwe ova li va hovela okwiingida keshe umwe ta popi shi lili, navahapu vomuvo kava li ve shii kutya ova ongala nelalakano lashike. 33 Onghee Aleksander okwa shilwa mo mongudu yovanhu ndele Ovajuda tave mu undulile komesho, opo nee okwa udikila ongudu yovanhu neke i mwene opo a dule oku i lombwela sha. 34 Eshi va didilika kutya Aleksander Omujuda, aveshe ova hovela okwiingida oshita oule weevili mbali lwaapo tava ti: “Artemis wOvaefeso na fimanekwe!”

35 Eshi omukulunhu woshilando a mweneka ongudu yovanhu, okwa ti: “Ovalumenhu nye Ovaefeso, olyelye womunye ehe shii kutya oshilando shOvaefeso ohashi pashukile otembeli yaArtemis noyoshihongwafano shaye osho sha dja meulu? 36 Ngungumaneni muha longe owii, osheshi oinima oyo itai dulu okupatanekwa. 37 Ndele omwa eta ovalumenhu ava oku nonande kave fi ovateyi veetembeli novasheki vakalunga ketu. 38 Ngeenge Demetrius novahambwidi vakwao ove na oupyakadi nomunhu wonhumba, otava dulu okuya komhangu nokoongoloneya* oko va ka hokolole omaupyakadi avo. 39 Ndele ngeenge ope na vali shimwe shi lili, oshi na okutokolwa metwokumwe nomhango. 40 Oshiningwanima eshi shonena otashi dulu oku tu twala moshiponga, nohatu ka talika ko ovanashibofa molwaashi katu na lela etomheno kutya omolwashike ongudu yovanhu ya ongala notai ningi omaweelelo.” 41 Konima eshi a popya ngaho, okwa lekela ovanhu ovo va li va ongala.

20 Konima eshi ovanhu ovo va li tava weelele va mwena, Paulus okwa ifana ovahongwa, ndele te va tu omukumo noku va lekela, opo nee okwa ya kuMakedonia. 2 Okwa endaenda moitukulwa oyo nokwa pameka ovahongwa ovo va li mo neendjovo dihapu, ndele ta i kuGreka. 3 Okwa kala ko oule weemwedi nhatu, ndele eshi a li pokuya kuSiria okwa didilika kutya Ovajuda ova li va pangela omhangela ve mu dipae, onghee okwa li a tokola okushuna ta pitile muMakedonia. 4 Okwa ya pamwe naSopater omonamati waPirrus wokuBerea, Aristarkus naSekundus vokuTessalonika, Gaius wokuDerbe, Timoteus, nosho yo Tikikus naTrofimus vokuAsia. 5 Ovalumenhu ovo ove tu tetekela notwa hanga ve tu teelela muTroas. 6 Konima yOshivilo shOmingome Inadi Ya Efulika, otwa dja muFilippi noshikepa, nokonima yomafiku atano otwa ya kuvo kuTroas, ndele hatu ningi ko omafiku aheyali.

7 Mefiku lotete loshivike, eshi va li va ongala va lye pamwe, Paulus okwa li a hovela oku va pa omayele nokwa popya navo efimbo lile fiyo omokati koufiku molwaashi okwa li e na okuya ngomongula. 8 Ndele monduda yopombada omo twa li twa ongalela omwa li eelamba da wana. 9 Fimbo Paulus a li ta popi, omunyasha wedina Eutikus okwa li e li omutumba mekende londuda oyo onhinhatu yopombada, ndele ta kwatwa keemhofi doshitula nokwa wa po, naashi va ya kuye ova hanga a fya. 10 Paulus okwa ya pedu nokwe liwitika kuye noku mu papatela ndele ta ti: “Inamu weelela vali; omunyasha oku na omwenyo.” 11 Opo nee Paulus okwa shuna ponduda yopombada ndele ta pambula komungome nokwa lya. Okwa twikila okupopya oule wefimbo fiyo taku shi, nokudja opo okwa ya. 12 Ova kufa po omunyasha oo nova li va hafa neenghono eshi e na omwenyo.

13 Ndele Paulus okwa ya kolupadi kuAssos ofimbo fye twa tetekela noshikepa tu mu teelele moshilando osho opo tu ye pamwe navo noshikepa ngaashi e tu lombwela. 14 Eshi e uya kufye muAssos, otwe mu londeka po ndele hatu i navo noshikepa kuMitilene. 15 Mefiku la landula ko, otwa tula muKios, nomefiku la ka landula ko, otwa ka tula muSamos, nomefiku vali likwao, otwa ka fika kuMileto. 16 Molwaashi Paulus okwa li a hala okuya diva kuJerusalem opo eshi efiku lOshivilo shOpentekoste tali ka fika oko e li nale, okwa li a tokola a pitilile po puEfeso opo aha shelelelwe moitukulwa yaAsia.

17 Fimbo a li muMileto, okwa tuma etumwalaka kuEfeso opo ovakulunhuongalo ve uye kuye. 18 Eshi ve uya kuye, okwe va lombwela ta ti: “Omu shi shii nawa nghee nda kala mokati keni okudja kefiku lotete olo nde uya muAsia. 19 Onda kala handi longele Omwene nelininipiko ngaashi omupiya nonda kala nda nyika oluhodi nokumona oixuna omolwOvajuda ovo va li va hala okudipaa nge. 20 Omu shi shii yo kutya ngha li nda fya ounye oku mu lombwela ashishe osho tashi mu etele ouwa, oku mu honga moipafi nosho yo eumbo neumbo. 21 Onda udifila Ovajuda nOvagreka kutya nave lidilulule opo va longele Kalunga nokukala ve na eitavelo mOmwene wetu Jesus. 22 Ndele taleni, paife ohandi i kuJerusalem handi wilikwa* komhepo iyapuki nonande nghi shii osho handi ka ningilwa, 23 kakele ashike kaasho Kalunga a lombwela nge lwoikando okupitila momhepo iyapuki kutya ohandi ka tulwa modolongo nokushakeneka omaudjuu moshilando noshilando. 24 Ashike omwenyo wange hao wa fimana, ndele osho sha fimana okumanifa oshilonga shange osho nda pewa kOmwene Jesus shokuudifa onghundana iwa yefilonghenda laKalunga.

25 “Taleni, onda kala mokati keni handi mu udifile Ouhamba waKalunga, ashike okudja paife itamu ka mona nge vali. 26 Onda hala mu shiive kutya ame kandi na etimba lohonde yomunhu nande oumwe, 27 osheshi onda kala handi mu lombwele elalakano laKalunga alishe. 28 Lipashukileni nye vene nosho yo oufita aushe oo Kalunga e mu pa eshi e mu nangeka po okupitila momhepo yaye iyapuki mu li ovapashukili mu life eongalo laye, olo a landa nohonde yOmona waye. 29 Ondi shi shii kutya shimha nda di po, omambungu haa lyana otae ke uya mokati keni noitaa ka fila onghenda oufita, 30 nomokati keni otamu ka dja ovalumenhu tava popi oinima inai yuka notava ka hongolola ovahongwa ve va shikule.

31 “Onghee kaleni oupafi, nokudimbuluka nghee inandi fya ounye oku mu kumaida nda nyika oluhodi oule womido nhatu oufiku nomutenya. 32 Paife ohandi mu yandje meke laKalunga nokeendjovo daye odo da popya efilonghenda laye, odo tadi dulu oku mu pameka noku mu pa efyuululo pamwe novayapuki. 33 Inandi kufa nande omunhu oshisilveri, oshingoli ile oikutu. 34 Onda longa nomake ange opo ndi wanife po eemhumbwe dange nodaavo ndi li navo. 35 Onde mu ulikila moinima aishe nghee mu na okulonga noudiinini nokukwafela oingone. Omu na yo okudimbuluka eendjovo dOmwene Jesus eshi a tile: ‘Okuyandja ohaku eta ehafo shi dulife okupewa.’ ”

36 Eshi Paulus a mana okupopya eendjovo odo, okwa twa eengolo pamwe navo aveshe nokwa ilikana. 37 Ndele aveshe ova lila, nove mu papatela* noku mu xupita 38 molwaashi ova li va nyika oluhodi keendjovo daye, unene tuu eshi a ti kutya itave ke mu mona vali. Opo nee ove mu findikila koshikepa.

21 Konima eshi twa tukauka navo twa nyika oluhodi, otwa londa oshikepa ndele hatu i twa yukilila kuKos, nomefiku la shikula ko otwa ya kuRodos, nokudja opo otwa ya kuPatara. 2 Eshi twa fika muPatara, otwa londa moshikepa oyo twa hanga ya finda kuFoinikia. 3 Eshi twa mona onhunhu yaKipro, otwe i enda kolumosho* twa finda kuSiria ndele hatu ka tula muTirus, omo oshikepa ya ka yelula eendongelwa. 4 Opo nee otwa konga ovahongwa notwe va mona ndele hatu kala puvo omafiku aheyali. Ovahongwa ova kala tava lombwele Paulus aha ye kuJerusalem ngaashi va shiivifilwa okupitila momhepo iyapuki. 5 Eshi efimbo letu lokuya la fika, otwa ya, ndele aveshe, mwa kwatelwa ovakainhu nounona, ove tu findikila fiyo okondje yoshilando. Opo nee otwa twa eengolo pomunghulofuta, notwa ilikana, 6 ndele hatu lekelafana. Okudja opo otwa londa oshikepa, ofimbo vo va shuna komaumbo avo.

7 Otwa dja noshikepa muTirus ndele hatu i kuPtolemais; otwa talela po ovamwatate notwa kala navo oule wefiku limwe. 8 Mefiku la shikula ko, otwa ya kuKesarea ndele hatu kala meumbo laFilippus omuudifi wonghundana iwa, oo a li umwe womovalumenhu vaheyali ovo va li va hoololwa kovayapostoli muJerusalem. 9 Filippus okwa li e na ovanakadona vane inava hombolwa* ovo va li hava xunganeke. 10 Ndele eshi twa kala muKesarea omafiku mahapu, omwe uya omuprofeti Agabus a dja kuJudea. 11 Okwe uya kufye nokwa kufa omwiya waPaulus nokwe u limanga keemhadi nokomaoko ndele ta ti: “Kalunga okwa popya okupitila momhepo iyapuki ta ti, ‘Mwene womwiya ou osho ta ka mangwa ngaha kOvajuda muJerusalem, notave ke mu yandja momake ovanhu vomoiwana imwe.’” 12 Eshi fye nosho yo ovo va li po twe shi uda, otwe mu kunghilila aha ye kuJerusalem. 13 Paulus okwa ti: “Omolwashike tamu lili notamu teya nge omukumo?* Kaleni mu shi shii kutya inandi lilongekidila ashike oku ka mangwa po, ndele onde lilongekidila yo oku ka dipaelwa kuJerusalem omolwedina lOmwene Jesus.” 14 Ndele molwaashi inatu dula oku mu kelela, otwe mu efa,* ndele hatu ti: “Ehalo laJehova nali wanifwe.”

15 Okudja opo, otwe lilongekida ndele hatu i kuJerusalem. 16 Ovahongwa vamwe vokuKesarea ova li yo va ya pamwe nafye, nove tu findikila keumbo laMnason Omukipro, umwe womovahongwa votete, oko twa ka kala hatu di. 17 Eshi twa fika muJerusalem, ovamwatate ova li ve tu tambula ko nehafo. 18 Ndele mefiku la shikula ko, Paulus okwa ya pamwe nafye kuJakob, oko twa hanga ovakulunhu aveshe voshiwana. 19 Opo nee Paulus okwe va popifa nokwe va lombwela kombinga yoinima aishe oyo Kalunga a longa mokati koiwana okupitila moilonga yokuudifa yaPaulus.

20 Eshi va uda ngaho, ova hovela okutanga Kalunga, ndele tava ti kuPaulus: “Omumwatate, ope na Ovajuda omayovi mahapu ovo va ninga ovaitaveli, naaveshe ohava diinine Omhango. 21 Ndele ova uda omutotolombo kutya oto hongo Ovajuda aveshe ovo ve lihanena moiwana vaha diinine Omhango yaMoses, eshi to va lombwele vaha pitife ovana vavo etanda ile vaha shikule eenghedindjikilile davo. 22 Ndele molwaashi otava ka uda kutya owa fika muJerusalem, oshike tu na okuninga po? 23 Ninga ngaashi hatu ku lombwele: Otu na ovalumenhu vane va ninga eano. 24 Inda navo mu ka yelifwe metwokumwe nomhango noku va futila va kululife omitwe davo. Opo nee keshe umwe ota ka mona kutya ou na elihumbato liwa noho diinine Omhango, nonokutya oinima oyo to popilwa kai fi yoshili. 25 Ashike ovaitaveli ovo va dja moiwana imwe otwe va tumina onhumwafo omo twa shanga etokolo olo twa ninga kutya nava henuke oluhaelo,* nokulikaleka kokule nohonde, oinamwenyo ya pondwa* nosho yo oinima oyo ya yambelwa oikalunga.”

26 Ndele mefiku la shikula ko, Paulus okwa ya pamwe novalumenhu ovo nove liyelifa metwokumwe nomhango. Opo nee ova ya motembeli nova shiivifa kutya omafiku okuliyelifa otaa xulu naini opo ku dule okuyambwa omayambo ponhele yavo aveshe mefiku olo.

27 Eshi omafiku aheyali okuliyelifa a li pokupwa ko, Ovajuda ovo va dja kuAsia eshi va mona Paulus e li motembeli, ova xwaxwameka ongudu yovanhu, ndele tave mu kwata po. 28 Opo nee ova ingida tava ti: “Ovaisrael nye, tu kwafeleni! Omulumenhu ou oye ta hongo ovanhu keshe pamwe va kale ve li omhinge noshiwana shetu, nOmhango yetu nosho yo nonhele ei. Kakele kaasho, okwa eta yo Ovagreka motembeli nokwa nyateka onhele ei iyapuki.” 29 Ova popya ngaho molwaashi ova li va mona Trofimus Omuefeso ta ende pamwe naPaulus moshilando, nova li tava diladila kutya Paulus okwe mu eta motembeli. 30 Ndele moshilando ashishe omwa tukuluka omapiyaano, novanhu ove uya tava tondoka, ndele tava kwata po Paulus nove mu kokololela pondje yotembeli, opo nee ova idila diva omivelo. 31 Fimbo va li va hala okudipaa Paulus, omukulunhu wetangakwaita okwa shiivifilwa kutya muJerusalem ashishe omu na omapiyaano. 32 Opo nee okwa ya diva pamwe novakwaita nosho yo novanambelewa vavo, ndele tava tondokele kuvo. Eshi ovanhu va mona omukulunhu wetangakwaita novakwaita, ova efa okudenga Paulus.

33 Ndele omukulunhu wetangakwaita okwa kwatifa po Paulus nokwa yandja elombwelo a mangwe nomalyenge avali, opo nee okwe mu pula kutya oye lyelye nokwa ninga shike. 34 Vamwe vomongudu oyo ova li va hovela okwiingida tava popi oinima i lili noku lili. Ndele molwaashi ova li tava weelele unene, omukulunhu wetangakwaita ka li a dula okumona kutya oshike sha ningwa po, onghee okwa yandja elombwelo Paulus a twalwe kokamba yovakwaita. 35 Eshi a fika peetalapa, okwa tumbwa po kovakwaita molwaashi ovanhu ova li va hala oku mu denga, 36 nova kala ve va landula tava ingida tava ti: “Mu dipaeni!”

37 Fimbo Paulus a li pokutwalwa mokamba yovakwaita, okwa pula omukulunhu wetangakwaita ta ti: “Ohandi dulu okupopya naave?” Omukulunhu wetangakwaita okwa ti: “Oho popi Oshigreka? 38 Hano haave Omuegipiti oo a li a xwaxwameka mombuwa ovalumenhu 4 000, va homata va twe ondubo nepangelo?” 39 Paulus okwa ti: “Ame Omujuda wokuTarsus muKilikia, odalele yomoshilando sha shiivika nawa. Onghee ohandi ku indile u pitike nge ndi popye novanhu.” 40 Eshi Paulus a pewa epitikilo, okwa kala ofika peetalapa ndele ta udikile ovanhu neke va mwene. Eshi va mwena, okwa popya navo mOshiheberi ta ti:

22 “Ovalumenhu nye, ovamwatate nootate, pwilikineni ndi mu lombwele osho sha ningwa po.” 2 Eshi va uda Paulus ta popi navo mOshiheberi, ova mwena filufilu, opo nee okwa ti: 3 “Ame Omujuda, nda dalelwa muTarsus muKilikia. Onda fikola muJerusalem nonda hongwa kuGamaliel, nda hongwa okudiinina Omhango yootatekulululwa nokulongela Kalunga nouladi ngaashi nye amushe hamu shi ningi kunena. 4 Onda li handi mangifa po ovalumenhu novakainhu ovo hava shikula Ondjila yOmwene nohandi va tulifa meedolongo, handi va hepeke noku va dipaifa. 5 Omupristeri munene nongudu aishe yovakulunhu voshiwana otai dulu okukoleka oshinima osho. Ova li va pa nge eenhumwafo ndi ye nado kOvajuda vakwetu kuDamaskus ndi ka kwate po ovaitaveli ovo va li ko, ndi va ete kuJerusalem va mangwa opo ve uye va handukilwe.

6 “Ndele fimbo nda li popepi naDamaskus, efimbo lomutenya, ohaluka onda minikilwa kouyelele wa twa wa dja meulu, 7 opo nee onde lidenga po nonda uda ondaka tai ti: ‘Saul, Saul, omolwashike to hepeke nge?’ 8 Onda ti: ‘Omufimanekwa, oove lyelye?’ Opo nee okwa ti: ‘Aame Jesus Omunasaret ou to hepeke.’ 9 Ovalumenhu ovo va li pamwe naame ova mona ouyelele, ashike inava uda ondaka oyo ya li tai popi naame. 10 Onde mu pula nda ti: ‘Omufimanekwa, oshike ndi na okuninga?’ Okwa lombwela nge ta ti: ‘Fikama u ye muDamaskus, opo nee oto ka lombwelwa ashishe osho u na okuninga.’ 11 Ndele muDamaskus onda ya mo ndi kwetiwe kovalumenhu ovo va li pamwe naame molwaashi kanda li ndi wete ko omolwouyelele oo wa li wa twikifa nge.

12 “Opo nee omulumenhu wedina Ananias, omutilikalunga, ha diinine Omhango noku na epopilo liwa mokati kOvajuda aveshe ovo va li muDamaskus, 13 okwa li e uya kwaame. Okwa fikama pwaame, ndele ta ti: ‘Omumwatate Saul, twikuluka!’ Pefimbo opo tuu opo, onda twikuluka nonde mu mona. 14 Okwa ti: ‘Kalunga kootatekulululwa okwe ku hoolola u shiive ehalo laye nou mone omuyuki nokuuda ondaka yaye, 15 osheshi oto ka hepaululila ovanhu aveshe oinima oyo wa mona nowa uda kuye. 16 Omolwashike to ongaonga? Inda u ka ninginifwe; nongeenge oto ifana edina laye, omatimba oye otaa dimwa po.’

17 “Ndele eshi nda shuna kuJerusalem, nonda li handi ilikana motembeli, onda mona memoniko 18 Omwene ta ti: ‘Dja mo diva muJerusalem molwaashi ovanhu itava ka pwilikina kwaasho to va hepaululile kombinga yange.’ 19 Opo nee onda tya kuye: ‘Omwene, ove shi shii nawa kutya onda kala handi tulifa ovanhu aveshe modolongo ovo ve ku itavela noku va dengifa moinagoga. 20 Eshi ondombwedi yoye Stefanus ya li tai dipawa, naame onda li nde shi panda nonda li handi pashukile oikutu yokombada yaavo va li tave mu dipaa.’ 21 Okwa tya vali kwaame: ‘Inda, osheshi ohandi ke ku tuma koiwana yokokule.’”

22 Ova kala tava pwilikine kuPaulus fiyo osheshi a mana okupopya eendjovo odo. Opo nee ova ingida tava ti: “Omulumenhu oo ina wana vali okukala nomwenyo, mu dipaeni!” 23 Molwaashi ova li tava ingida, tava kupulashi oikutu yavo yokombada nokufunda omadu, 24 omukulunhu wetangakwaita okwa yandja elombwelo Paulus a etwe mokamba yovakwaita a pulwapulwe noku dengwe, opo omukulunhu wetangakwaita a mone kutya omolwashike naanaa ovanhu va li tava ingida Paulus a dipawe. 25 Ndele eshi ve mu manga opo ngeno ve mu denge, Paulus okwa tya komunambelewa wetangakwaita oo a li a fikama puye: “Oshi li tuu pamhango okudenga Omuroma* ofimbo ina tokolwa?” 26 Eshi omunambelewa oo e shi uda, okwa ya komukulunhu wetangakwaita, ndele te mu pula ta ti: “Oshike wa hala okuningila omulumenhu ou Omuroma?” 27 Opo nee omukulunhu wetangakwaita okwa ehena kuPaulus, ndele ta ti kuye: “Lombwele nge, tashi ti ove Omuroma?” Paulus okwa ti: “Heeno.” 28 Omukulunhu wetangakwaita okwa ti: “Ame oukwashiwana waRoma onde u landa oimaliwa ihapu.” Paulus okwa ti: “Ashike ame odalele yaRoma.”

29 Opo nee ovalumenhu ovo va li poku mu pulapula ove mu efa diva, nomukulunhu wetangakwaita okwa li a tila eshi a uda kutya Paulus Omuroma nokwa hangwa e mu mangifa nomalyenge.

30 Ndele molwaashi okwa li a hala okushiiva kutya omolwashike Paulus a li ta patanekwa kOvajuda, okwe mu mangulula mo mefiku la landula ko, nokwa yandja elombwelo opo ovapristeri ovakulunhu noilyo aishe yOmhangu yoPombada yOvajuda i ongale. Opo nee okwa eta Paulus nokwe mu fikamifa komesho yavo.

23 Eshi Paulus a tala oilyo yOmhangu yoPombada yOvajuda, okwa ti: “Ovalumenhu nye ovamwatate, ondi na eliudo la yela filufilu koshipala shaKalunga fiyo okunena.” 2 Opo nee omupristeri munene Ananias okwa lombwela ovo va li va fikama puPaulus ve mu denge komulungu. 3 Paulus okwa tya kuye: “Kalunga ote ku handukile, omunaihelele ove.* Oto tokola nge metwokumwe nOmhango, ndele pefimbo opo tuu opo oto nyono Omhango eshi to ti nandi dengwe.” 4 Ovo va li po ofika ova ti: “Oto tuku omupristeri munene waKalunga?” 5 Paulus okwa ti: “Ovamwatate, ngha li ndi shii ngeenge oye omupristeri munene. Omishangwa oda ti: ‘Ino sheka omupangeli woshiwana sheni.’”

6 Molwaashi Paulus okwa li e shii kutya mongudu omo omwa li Ovasadukai nOvafarisai, okwa popya mokule mOmhangu yoPombada yOvajuda ta ti: “Ovalumenhu nye ovamwatate, ame Omufarisai, omona wOvafarisai. Ohandi pangulwa molwaashi nda itavela menyumuko.” 7 Eshi a popya ngaho, pokati kOvafarisai nOvasadukai opa holoka eenhamanana, ndele oshoongalele tashi tukauka. 8 Ovasadukai ova li va itavela kutya kaku na enyumuko, ovaengeli ile oishitwa yopamhepo, ashike Ovafarisai ova li va itavela* kutya oinima aishe oyo oko i li. 9 Opo nee opa holoka omapiyaano, ndele vamwe vomovanongo vomishangwa vOvafarisai ova fikama va handuka neenghono, tava ti: “Omulumenhu ou inatu mu mona epuko lasha. Pamwe okwa popya nomweengeli ile noshishitwa shopamhepo?” 10 Eshi omapiyaano a hapupala, omukulunhu wetangakwaita okwa lombwela ovakwaita va ka kufe mo Paulus mokati kovanhu ve mu twale kokamba yovakwaita molwaashi okwa li a tila kutya pamwe otave mu dipaa.

11 Opo nee oufiku wa landula ko, Omwene okwa fikama puPaulus, ndele ta ti: “Kala u na omukumo! Ngaashi wa hepaulula nge nawanawa muJerusalem, ou na yo okuhepaulula nge nomuRoma.”

12 Eshi kwa sha, Ovajuda ova pangela omhangela nokwaana kutya, tashi ya nashi uye, itava li sha ile va nwe sha fimbo inava dipaa Paulus. 13 Eano olo ola li la ningwa kovalumenhu ve dule 40. 14 Ovalumenhu ovo ova ya kovapristeri ovakulunhu nokovakulunhu voshiwana, ndele tava ti: “Otwa ana kutya, tashi ya nashi uye, itatu li sha fimbo inatu dipaa Paulus. 15 Ndele paife nye nosho yo oilyo yOmhangu yoPombada yOvajuda lombweleni omukulunhu wetangakwaita a ete Paulus kunye mwa fa ngeno mwa hala oku mu pulapula vali. Opo nee fimbo e li mondjila, fye ohatu mu dipaa.”

16 Eshi omutekulu waPaulus a uda omhangela yavo, okwa ya a ka lombwele Paulus kokamba yovakwaita. 17 Opo nee Paulus okwa ifana umwe womovanambelewa vetangakwaita, ndele ta ti kuye: “Twala omunyasha ou komukulunhu wetangakwaita, osheshi okwa hala oku mu lombwela sha.” 18 Omunambelewa oo okwa twala omunyasha oo komukulunhu wetangakwaita, ndele ta ti: “Omunadolongo Paulus okwa pula nge ndi ku etele omunyasha ou opo e ku lombwele sha.” 19 Omukulunhu wetangakwaita okwe mu kwata mokwooko nokwe mu kufa po, ndele te mu pula ta ti: “Owa hala okulombwela nge shike?” 20 Okwa ti: “Ovajuda ova hala oku ku indila u twale Paulus kOmhangu yoPombada yOvajuda mongula, va fa ngeno va hala oku mu pulapula vali. 21 Ndele ino shi pitika nande, osheshi ope na ovalumenhu ve dulife po 40 ve mu nangela, nova ana kutya, tashi ya nashi uye, itava li sha ile va nwe sha fimbo inave mu dipaa. Paife ova teelela ashike u va pe epitikilo.” 22 Omukulunhu wetangakwaita okwa kunghilila omunyasha oo, nokwe mu lekela ta ti: “Ino lombwela nande omunhu kutya owa shiivifila nge kombinga yoshinima eshi.”

23 Opo nee omukulunhu wetangakwaita okwa ifana ovanambelewa vavali ndele ta ti: “Longekideni ovakwaita 200, ovalondinghambe 70 novalumenhu 200 va homata omaongamukonda va ye kuKesarea pomuwoi woufiku.* 24 Kakele kaasho, longekidileni Paulus onghambe, opo a dule okuya kungoloneya Feliks e li meameno.” 25 Opo nee omukulunhu wetangakwaita okwa shanga onhumwafo tai ti:

26 “Aame Klaudius Lisias, handi ku shangele onhumwafo ei omufimanekwa ngoloneya Feliks. 27 Omulumenhu oo okwa li a kwatwa po kOvajuda nova li poku mu dipaa, ndele onda endelela novakwaita vange ndi mu xupife molwaashi onda uda kutya Omuroma. 28 Onda li nda hala okuuda kutya omolwashike tave mu pataneke, nomolwaasho nda li nde mu twala kOmhangu yoPombada yOvajuda. 29 Onda mona kutya ota patanekwa omolwoinima i na sha nOmhango yOvajuda, ndele kape na sha sha wana oku mu dipaifa ile oku mu tulifa modolongo. 30 Molwaashi onda uda omhangela oyo va pangela shi na sha naye, onde mu tuma kwoove diva nonda lombwela ovapataneki vaye ve uye ve ku lombwele oupyakadi wavo.”

31 Opo nee ovakwaita ova ya naPaulus ngaashi va lombwelwa, noku mu twala oufiku kuAntipatria. 32 Mefiku la landula ko, Paulus okwa li a ya pamwe novalondinghambe, ashike ovakwaita vamwe ova li va shuna kokamba yavo. 33 Ovalondinghambe ova ya kuKesarea, ndele tava twala onhumwafo naPaulus kungoloneya. 34 Eshi ngoloneya e i lesha, okwa pula Paulus kutya okwa dja koshitukulwalongo shilipi, ndele Paulus ta ti kutya okwa dja kuKilikia. 35 Ngoloneya okwa ti: “Ohandi ka pwilikina kwoove ngeenge ovapataneki voye va fiki.” Opo nee okwa yandja elombwelo opo Paulus a nangelwe mombala yaHerodes.

24 Konima yomafiku atano, omupristeri munene Ananias novakulunhu vamwe voshiwana nosho yo hahende wedina Tertullus ove uya okulombwela ngoloneya Feliks osho tava hokololifa Paulus. 2 Eshi Tertullus a pewa omhito a popye, okwa hovela okuhokololifa Paulus koshipala shangoloneya ta ti:

“Feliks, ohatu ku pandula eshi tu na ombili naashi oshiwana tashi xumu komesho molwaashi oho pangele nawa. 3 Ohatu pandula alushe neenghono omufimanekwa Feliks omolwoinima aishe oyo ho longo keshe pamwe. 4 Ndele opo ndiha mane po efimbo loye, ohandi ku indile u tu pwilikine pauxupi nelididimiko. 5 Otwa hala oku ku shiivifila kutya omulumenhu ou okwa nyika oshiponga* molwaashi ota xwaxwameke Ovajuda aveshe va twe ondubo nepangelo nota kwatele komesho oshimhanga shOvanasaret. 6 Otwe mu kwata po molwaashi okwa li yo ta kendabala okunyateka otembeli. 7 —— 8 Ngeenge owe mu pula, oto ka mona kutya oinima aishe oyo hatu popi kombinga yaye oyoshili.”

9 Opo nee Ovajuda navo ova yambidida eendjovo odo, tava koleke kutya oinima oyo oyoshili. 10 Eshi ngoloneya a udikila Paulus nomutwe a popye, Paulus okwa ti:

“Ondi shi shii kutya owa kala omutokoli woshiwana eshi oule womido dihapu, onghee ohandi lipopile ndi na omukumo. 11 Oto dulu okupula u shilipaleke ngeenge eshi handi popi oshoshili; opa pita ashike omafiku 12 okudja eshi nda ile kuJerusalem ndi ka longele Kalunga. 12 Ndele inava hanga nge handi tanguna nomunhu motembeli ile handi xwaxwameke ovanhu va twe ondubo nepangelo, kutya nee omoinagoga ile omoshilando ashishe. 13 Onghee kave na oumbangi woinima oyo tava hokololifa nge. 14 Ndele ohandi ku lombwele oshili kutya ame ohandi longele Kalunga kootatekulululwa monghedi oyo tava ti oshimhanga, nonda itavela oinima aishe oyo ya popiwa mOmhango nokOvaprofeti. 15 Ondi na eteelelo olo yo navo ve na kutya Kalunga ota ka nyumuna ovayuki novalunde. 16 Onghee ohandi kendabala alushe okukala ndi na eliudo la yela* koshipala shaKalunga noshovanhu. 17 Ndele konima yomido donhumba, onda twalele oikwafa kuJerusalem noku ka yamba omayambo. 18 Fimbo nda li oko, ova hanga nge motembeli handi liyelifa metwokumwe nOmhango, ndele kapa li ongudu yovanhu ile omapiyaano. Ashike ope na Ovajuda vamwe va dja kuAsia 19 ovo va li ve na ngeno okuuya kwoove va hokololife nge, ngeno ova monene nge epuko. 20 Ovalumenhu ava ve li apa nava popye kutya ova mona nge epuko lashike eshi nda li mOmhangu yoPombada yOvajuda, 21 shapo osheshi nda ingida mokati kavo kutya: ‘Ohandi pangulwa molwaashi nda itavela menyumuko!’”

22 Ndele molwaashi Feliks oku shii oinima ya pamba Ondjila yOmwene, okwe va lekela ta ti: “Ohandi ka ungaunga ashike noinima oyo ngeenge Lisias, omukulunhu wetangakwaita, e uya.” 23 Opo nee okwa lombwela omunambelewa wetangakwaita kutya Paulus na kale modolongo, ashike na pewe emanguluko lonhumba opo ookaume kaye va kale have uya oku mu kwafela.

24 Konima yomafiku onhumba, Feliks okwe uya nomukulukadi waye Drusila, oo a li Omujuda, ndele ta ifana Paulus opo va pwilikine kombinga yeitavelo laye muKristus Jesus. 25 Eshi Paulus a popya kombinga youyuki, elipangelo nosho yo etokolo olo tali ke uya, Feliks okwa li a tila ndele ta ti: “Inda manga; ohandi ke ku ifana vali ngeenge nda mono omhito.” 26 Feliks okwa li yo ta diladila kutya Paulus ote mu pe ombubo. Onghee okwa kala he mu ifana lwoikando nokukundafana naye. 27 Eshi pa pita omido mbali, Feliks okwa pingenwa po kuPorkius Festus; ndele molwaashi Feliks okwa li a hala okukala a hokiwa kOvajuda, okwa fiya Paulus modolongo.

25 Konima yomafiku atatu eshi Festus a ninga omupangeli woshitukulwalongo* shaJudea, okwa dja kuKesarea ndele ta i kuJerusalem. 2 Opo nee ovapristeri ovakulunhu novalumenhu ovanenenhu vOvajuda ove mu hepaululila kombinga yoinima oyo tava hokololifa Paulus. Ova indila Festus 3 e va file onghenda opo a tume Paulus e uye kuJerusalem. Ashike ova li va diladila okunangela Paulus mondjila opo ve mu dipae. 4 Festus okwa li e va lombwela kutya Paulus ke na okudja ko kuKesarea molwaashi ye ota shuna ko diva. 5 Okwa ti vali, “ovawiliki ovo ve li mokati keni nave uye tu ye navo va ka hokololife omulumenhu oo ngeenge oku na eshi a longa sha puka.”

6 Festus okwa kala puvo oule womafiku ahetatu ile omulongo lwaapo, ndele ta shuna kuKesarea. Opo nee mefiku la landula ko, okwa ya koshipundi shetokolo ndele ta tumu Paulus a etwe kuye. 7 Eshi Paulus e uya, Ovajuda ovo va dja kuJerusalem ova fikama ve mu dingilila tave mu hokololifa oinima ihapu ya kwata moiti oyo vehe na oumbangi muyo.

8 Paulus okwe lipopila ta ti: “Ame inandi nyona sha nande, kutya nee Omhango yOvajuda, okotembeli ile okOmukesari.” 9 Ndele molwaashi Festus okwa li a hala okuhokiwa kOvajuda, okwa tya kuPaulus: “Owa hala okuya kuJerusalem u ka tokolwe moipafi yange omolwoinima ei?” 10 Opo nee Paulus okwa ti: “Onda fikama komesho yoshipundi shetokolo shOmukesari oko ndi na okutokolelwa. Ame inandi nyona sha kOvajuda, ngaashi ashike u shi shii nawa. 11 Ngeenge ame omunyoni shili nonda nyona sha tashi pula ndi fye, itandi indile ndiha dipawe. Ndele ngeenge oinima ei handi hokololifwa kovalumenhu ava kai fi yoshili, kape na ou ta dulu okuyandja nge momake avo. Onghee ohandi indile ndi ka pangulwe kOmukesari.” 12 Eshi Festus a mana okukundafana novayandjimayele vaye, okwa ti: “Oto ka tokolwa kOmukesari molwaashi oye wa indila e ke ku tokole.”

13 Konima yomafiku onhumba, ohamba Agrippa nosho yo Bernike ova li ve uya okutalela po Festus muKesarea. 14 Ndele molwaashi ova kala po oule womafiku, Festus okwa hepaululila ohamba shi na sha naasho Paulus ta hokololifwa, ta ti:

“Ope na omulumenhu umwe oo a fiwa modolongo kuFeliks, 15 ndele eshi nda li kuJerusalem, ovapristeri ovakulunhu novakulunhu vOvajuda ova lombwela nge kombinga yaye, tava pula nge ndi mu tokole. 16 Ndele onde va lombwela kutya pamhango yOvaroma inashi pitikwa omunhu a yandjwe kovapataneki vaye ofimbo ina shakena navo ndele ta pewa omhito e lipopile shi na sha naasho ta hokololifwa. 17 Eshi ve uya oku, inandi ongaonga, onda ya koshipundi shetokolo mefiku la landula ko ndele handi tumu omulumenhu oo a etwe kwaame. 18 Onghee ovapataneki vaye ova fikama nova hovela oku mu tamanekela oinima ihapu, ndele inava popya kombinga yoinima ii oyo ngeno nda li handi diladila a ninga. 19 Ova li ashike tave mu pataneke omolwelongelokalunga lavo vene, nomolwomulumenhu wedina Jesus oo a fya, ndele Paulus ota ti oku na omwenyo. 20 Ndele molwaashi kanda li ndi shii kutya nandi ungaunge ngahelipi noshinima osho, onda pula omulumenhu oo ngeenge okwa hala shi ka tokolelwe kuJerusalem. 21 Eshi Paulus a indila a kale modolongo ofimbo a teelela etokolo olo tali ka ningwa kOmukesari, onda yandja elombwelo opo a kale mo fiyo osheshi nde mu tumina kuye.”

22 Agrippa okwa lombwela Festus ta ti: “Onda hala okuuda komulumenhu oo ye mwene eshi ta ti.” Festus okwa ti: “Oto udu kuye mongula.” 23 Mefiku la landula ko, Agrippa naBernike ove uya tave lishiti nova ya momhangu pamwe novakulunhu vetangakwaita nosho yo novanenenhu vomoshilando. Opo nee Paulus okwa etwa mo palombwelo laFestus. 24 Festus okwa ti: “Ohamba Agrippa nosho yo amushe ava mwa ongala apa, taleni omulumenhu ou. Ovajuda aveshe ovo ve li muJerusalem naavo ve li omu ova indila nge tava ingida va hala a dipawe. 25 Ndele onda mona kutya ina nyona sha shoku mu dipaifa. Eshi a indila a ka tokolwe kOmukesari, onda tokola oku mu tuma kuye. 26 Ashike kanda li ndi na eshi handi dulu okushangela Omwene wange kombinga yomulumenhu ou. Onghee onde mu eta kunye amushe, unene tuu kwoove ohamba Agrippa, opo ndi dule okushanga sha ngeenge a pulwapulwa. 27 Onghee nghi wete shi li pandunge okutuma omunadolongo nopehe na kutya oshike ta tamanekelwa.”

26 Agrippa okwa tya kuPaulus: “Owa pewa omhito u lipopile.” Opo nee Paulus okwa yelula eke laye, ndele te lipopile ta ti:

2 “Ohamba Agrippa, onda hafa eshi ndi li koshipala shoye opo ndi lipopile mefiku eli lonena shi na sha noinima aishe oyo Ovajuda tava hokololifa nge. 3 Ndele molwaashi ou shii nawa eenghedindjikilile noinima aishe oyo hai tuwa eemhata kOvajuda, ohandi ku indile u pwilikine nge nelididimiko.

4 “Ovajuda vahapu ove shii nge nawa okudja kounyasha naashi nda li muJerusalem. 5 Ngeenge ova hala oku shi koleka, otava dulu okupopya kutya ame onda li Omufarisai. Ovafarisai ohava diinine omhango ve dule Ovajuda vakwao. 6 Ndele paife ohandi hokololifwa omolweteelelo leudaneko olo Kalunga a li a udanekela ootatekulululwa. 7 Omapata 12 oshiwana shetu nao okwa teelela okumona ewanifo leudaneko olo, nomolwaasho hae mu longele noudiinini oilonga iyapuki. Ohamba, ohandi hokololifwa kOvajuda omolweteelelo olo.

8 “Omolwashike tamu diladila* kutya Kalunga ita dulu okunyumuna ovafi? 9 Ame onda li nda tomhwa kutya ondi na okukondjifa filufilu Jesus Omunasaret. 10 Osho osho nda ningile muJerusalem eshi nda pewa epitikilo kovapristeri ovakulunhu. Onda li nda idililifa meedolongo ovayapuki vahapu, naashi va li tava dipawa, onda li nde shi yambidida. 11 Ndele molwaashi onda li nde va handukila unene, onda li nde va hepeka moinagoga aishe noku va fininika va efe po eitavelo lavo. Onda li yo handi i koilando imwe ndi ke va hepeke.

12 “Pomhito imwe, fimbo nda li mondjila handi i kuDamaskus nda tumwa kovapristeri ovakulunhu ndi ka ninge ngaho, 13 onda mona mokati komutenya ouyelele wa twa u dule eenhe detango wa shela okudja meulu nowe tu dingilila atushe naavo twa li hatu ende navo. 14 Ndele eshi twe lidenga pedu atushe, onda uda ondaka tai ti kwaame mOshiheberi: ‘Saul, Saul, omolwashike to hepeke nge? Oto lietele oupyakadi eshi to kondjifa nge.’* 15 Opo nee onda ti: ‘Omufimanekwa, oove lyelye?’ Okwa nyamukula ta ti: ‘Aame Jesus ou to hepeke. 16 Penduka ndele to kala ofika. Onde ku lihololela opo ndi ku hoolole u ninge omupiya wange nou hepaulule oinima oyo wa mona naayo handi ke ku ulikila i na sha naame. 17 Ohandi ke ku xupifa momake ovanhu ava nosho yo oiwana omo handi ke ku tuma 18 u twikulule omesho avo opo va dje momilaulu ve uye mouyelele, nova dje mepangelo laSatana ve uye kuKalunga. Opo nee Kalunga ote ke va dimina po omatimba avo, note ke va pa ondjabi noku va yukipalifa ngaashi e shi ningila ovadiinini vaye.’

19 “Onghee ohamba Agrippa, onda ninga osho Jesus a lombwela nge okupitila memoniko. 20 Tete onda udifila ovo ve li muDamaskus, opo nee Ovajerusalem, Ovajudea aveshe nosho yo ovanhu vomoiwana imwe opo ve lidilulule nova ehene popepi naKalunga mokulonga oilonga oyo tai ulike elidilululo. 21 Osho osho sha ningifa Ovajuda va kwate nge po eshi nda li motembeli nova li va hala okudipaa nge. 22 Ndele kekwafo laKalunga ohandi udifile eehepele noipuna fiyo okunena. Kakele kaasho, ohandi udifa osho Moses novaprofeti va popya shi na sha naasho sha li tashi ke uya. Ova ti kutya 23 Kristus okwa li ta ka mona oixuna noye a li ta ka nyumunwa tete koufi nota ka udifila oshiwana eshi nosho yo oiwana imwe nokuyandja ouyelele.”

24 Fimbo Paulus a li ta popi ngaho, Festus okwa popya mokule ta ti: “Paulus owa pilalala! Owa pilalala momutwe omolwehongo lihapu unene olo wa mona!” 25 Opo nee Paulus okwa ti: “Omufimanekwa Festus, ame inandi pilalala, ndele ohandi popi eendjovo doshili notadi ti sha. 26 Ohamba oyo handi hokololele oi shii nawa oinima aishe oyo molwaashi kape na nande oshimwe shomuyo sha ningwa meholeko. 27 Ohamba Agrippa, mbela owa itavela ngoo mOvaprofeti? Ondi shi shii kutya owe va itavela.” 28 Ndele Agrippa okwa tya kuPaulus: “Owa hala okwiitavelifa nge moule wefimbo lixupi ndi ninge Omukriste.” 29 Paulus okwa ti: “Ohandi ilikana kuKalunga u ninge Omukriste ngaashi ame, kutya nee omeni lefimbo lixupi ile olile; haave auke ndele naaveshe ovo tava pwilikine kwaame nena eli. Ashike inandi hala mu ka kale momalyenge ngaashi ame.”

30 Ndele ohamba, ngoloneya, Bernike nosho yo ovalumenhu ovo va li omutumba pamwe navo ova fikama. 31 Fimbo va li tava i, ova hovela okukundafana tava ti: “Omulumenhu ou ina longa sha shoku mu dipaifa ile shoku mu twalifa modolongo.” 32 Opo nee Agrippa okwa tya kuFestus: “Omulumenhu ou ngeno ka li a indila a ye kOmukesari, ngeno ota mangululwa.”

27 Eshi kwa tokolwa kutya ohatu i noshikepa kuItali, Paulus novanadolongo vakwao vamwe ova li va yandjwa momake aJulius, omunambelewa wetangakwaita hali ifanwa Augustus. 2 Opo nee otwa ya noshikepa ya dja muAdramiti oyo ya ka tula petuliloshikepa laAsia. Otwa li pamwe naAristarkus Omumakedonia a dja kuTessalonika. 3 Mefiku la landula ko, otwa tula muSidon, na Julius okwa ungaunga nawa* naPaulus nokwe mu pitika a ye nookaume kaye va kale tave mu kwafele.

4 Eshi twa dja oko noshikepa, otwa kunghula naKipro molwaashi omhepo oya li tai tu di komesho. 5 Opo nee otwa taulula pokati kefuta laKilikia naPamfilia ndele hatu ka tula petuliloshikepa laMira muLikia. 6 Ndele omunambelewa wetangakwaita okwa hanga po oshikepa ya dja kuAleksandria ya finda kuItali, nokwe tu lombwela tu londe mo. 7 Okudja opo otwa enda hatu lififida noudjuu oule womafiku onhumba, nolwanima otwa ka fika muKnidus. Ndele molwaashi omhepo inai tu pitika tu ye komesho, otwa kunghula naKreta muSalmone. 8 Eshi twa kala hatu ende noudjuu hatu kunghula nomunghulofuta, otwe uya ponhele hai ifanwa Omatuliloshikepa Mawa, oyo ya li popepi noshilando shaLasea.

9 Eshi pa pita omafiku mahapu, nonghalo yomhepo oya li ya naipala, nefimbo lokulidilika oikulya mEfiku lEkwatakanifo ola li la pita, Paulus okwe va londwela 10 ta ti: “Ookaume, ondi wete kutya inashi wapala tu yeni, molwaashi ngeenge otwa yeni, otashi dulika oshikepa i ka ningine, ndele hatu kanifa oinima yetu neemwenyo detu.” 11 Omunambelewa wetangakwaita ka li a pwilikina kuPaulus, ashike ponhele yaasho okwa pwilikina kwaasho omushingi namwene woshikepa tava ti. 12 Ndele molwaashi petuliloshikepa olo kapa li pawa okukala pefimbo lokufu, vahapu ova li va hala okudja po opo ngeenge otashi shiiva pokufu va ka kale kuFoiniks, etuliloshikepa laKreta olo la taalela koushilo.

13 Eshi okamhepo ka hovela okupepa okudja kolukadi, ova li tava diladila kutya otava ka fika kuFoiniks, onghee ova shila mo omakanghamifo, ndele tava hovele okushinga oshikepa tava kunghula nomunghulofuta waKreta. 14 Konima yokafimbo, opa tukuluka omhepo idjuu ya dja koushilolundume.* 15 Ndele molwaashi omhepo oyo oya li idjuu neenghono, nokatwa li hatu dulu okuyukifa oshikepa, otwa li twa efa i twalwaatwalwe. 16 Opo nee otwa li twa yaama omhepo oyo konima yokanhunhu kedina Kauda, notwa li hatu kendabala okunanena moshikepa okambautu* oko ka li taka nanwa koshikepa. 17 Konima eshi twe ka nanena mo, ova li va kendabala okupameka oshikepa moku i manga neengodi da enda koshi molwaashi ova li va tila i ke lidenge komutunda waSirti.* Ova li va kulukifa eefaila dokushingifa, noshikepa oya twalwaatwalwa. 18 Mefiku la landula ko, ova li va ekelashi oinima imwe opo oshikepa i kale ya kaama molwaashi oshikungulu osha li shidjuu neenghono. 19 Ndele mefiku etitatu, ova li va ekelashi oilongifo imwe yoshikepa.

20 Eshi twa kala omafiku mahapu tuhe wete etango neenyofi, noshikungulu osha li shidjuu neenghono, katwa li vali tu na elineekelo ngeenge ohatu xupu. 21 Ndele eshi va ninga omafiku inava lya, Paulus okwa fikama mokati kavo ta ti: “Ookaume, ngeno omwa pwilikinine kwaasho nda li nde mu lombwela, ngeno inatu dja mo muKreta tu mone oixuna ngaha nokukanifa oinima yetu. 22 Paife ohandi mu ladipike mu kale mu na omukumo osheshi kape na umwe womufye* ta ka fya, oshikepa oyo ashike tai ka tekauka. 23 Oufiku wonena, Kalunga ou handi longele oilonga iyapuki okwa tuma omweengeli waye oo a kala ofika pwaame, 24 ndele ta ti: ‘Paulus ino tila, ou na okuya koshipala shOmukesari, tala, Kalunga ote ke ku xupifa nosho yo aveshe ovo u li pamwe navo moshikepa.’ 25 Onghee hano, ookaume, kaleni mu na omukumo molwaashi onda itavela kutya Kalunga ota ka ninga naanaa ngaashi a lombwela nge. 26 Kakele kaasho, ohatu ka twalwaatwalwa fiyo okonhunhu yonhumba.”

27 Otwa kala mefuta oule womafiku 14, notwa kala hatu twalwaatwalwa mefuta laAdria, ndele mokati koufiku ovalongi vomoshikepa ova li tava diladila kutya ove li pokufika komutunda. 28 Ova yeleka oule wefuta, nova mona kutya ope na oule weemeta 36, opo nee ova ya komesho kanini, ndele tava yeleke vali oule wefuta nova mona kutya ope na oule weemeta 27. 29 Ndele molwaashi ova li va tila tu ke lidenge momamanya, ova kulukifila momeva omakanghamifo ane okonima, notwa li twa halelela ku she. 30 Molwaashi ovalongi vomoshikepa ova li tava kendabala okulivaka mo, nova kulukifila okambautu mefuta va fa va hala oku ka kulukifila momeva omakanghamifo okomesho, 31 Paulus okwa lombwela omunambelewa wetangakwaita novakwaita ta ti: “Otamu ka xupifwa ashike ngeenge ovalumenhu ava ova kala moshikepa.” 32 Opo nee ovakwaita ova teta eengodi odo da li da manga okambautu ndele taka wile mefuta.

33 Ndele eshi kwa li taku hale okusha, Paulus okwa ladipika ovanhu aveshe va lye, ta ti: “Omwa kala omafiku 14 inamu lya sha nomwa teelela nodjuulufi mu xupifwe. 34 Onghee ohandi mu ladipike mu lye omolwouwa weni osheshi kape na nande oumwe womunye ta ka fya.” 35 Konima eshi a popya ngaho, okwa kufa omungome ndele ta ilikana kuKalunga moipafi yaaveshe, te u pambula nokwa lya. 36 Opo nee aveshe ova li ve na omukumo, ndele tava kufa oikulya va lye. 37 Atushe kumwe ovo twa li moshikepa otwa li 276.* 38 Eshi ovalongi vomoshikepa va lya va kuta, ova ekela omitwalo doilya mefuta, opo va pupaleke oshikepa.

39 Eshi kwa sha, kava li ve shii kutya ove li peni, ndele ova mona omunghulofuta nova li va tokola okukanghameka po oshikepa ngeenge otashi shiiva. 40 Opo nee ova teta ko omakanghamifo nokwa wila mefuta, nova mangulula ko oipungululifo yoshikepa, nokonima eshi va yelula ofaila yokomesho i kwate omhepo, ova yukifa oshikepa komutunda. 41 Eshi va kendabala okuyukifa oshikepa komutunda, oya li ya dama komesho nokaya li tai dulu okulinyenga, opo nee oya hovela okutekauka konima omolwomakufikufi oo a li tae lidenge muyo. 42 Ovakwaita ova li va tokola okudipaa ovanadolongo opo vaha yowe va ye onhapo. 43 Ndele molwaashi omunambelewa wetangakwaita okwa li a hala okwaamena Paulus, okwa li e va kelela vaha ninge ngaho. Okwa lombwela ovo tava dulu okuyowa va nhukile mefuta opo va ka fike tete komutunda. 44 Opo nee vakwao ova landula ko, vamwe ova londa koipilangi ofimbo vamwe okoipambu yoshikepa. Onghee aveshe ova li va fika komutunda ve li nawa.

28 Konima eshi twa fika komutunda tu li nawa, otwa ka mona kutya onhunhu oyo ohai ifanwa Malta. 2 Ndele ovanhu vomoshitukulwa osho* ove tu ulikila olune linene.* Ove tu tambula ko atushe nohamu, nova tema omundilo molwaashi odula oya li tai loko nokwa li ku na outalala. 3 Paulus okwa li a tyava oikuni ihapu nokwe i tula pediko, neyoka leuta ola dja mo omolwoupyu, ndele tali mu dame konyala. 4 Eshi ovanhu vomoshitukulwa osho va mona euta la endjelela konyala yaye, ova hovela okulombwelafana tava ti: “Oshili omulumenhu ou omudipai, nonande a xupa mefuta, osha yela kutya okwa tokolelwa efyo.” 5 Eyoka okwe li nipila mediko, nokala li le mu ninga sha. 6 Ova li va teelela ngeno a dinde ile a fye pefimbo opo. Konima eshi pa pita efimbo lile nova mona kutya kape na osho she mu ningilwa, ova lundulula etaleko lavo, ndele tava ti kutya Paulus okalunga.

7 Popepi naapo twa li opa li omapya omupangeli wonhunhu oyo wedina Publius, nokwa li e tu tambula ko noku tu yakula nawa oule womafiku atatu. 8 Ndele xe yaPublius okwa li a nangala e kwetwe koshidu nokoshimela shohonde, opo nee Paulus okwa ya mo monduda omo a li nokwa ilikana, te mu tenheke omake ndele ta veluka. 9 Konima yoshiningwanima osho, ovanhu aveshe vokonhunhu oyo ovo va li tava vele ove uya kuye, nokwe va velula. 10 Eshi twa li pokuya, ovanhu ovo ova li ve tu pa oinima aishe oyo twa li twa pumbwa nove i londeka moshikepa.

11 Konima yeemwedi nhatu otwa ya noshikepa oyo ya li ya fanekwa ovanamati vaZeus. Oshikepa oyo oya dja kuAleksandria noya kala monhunhu oyo efimbo lokufu. 12 Okudja opo otwa ka tula ketuliloshikepa laSirakusa notwa kala po oule womafiku atatu. 13 Opo nee otwa ya hatu kunghula nomunghulofuta oo, ndele hatu ka fika kuRegio. Ngomongula, opa tukuluka omhepo ya dja kolukadi, nomefiku la landula ko otwa fika muPuteoli. 14 Ndele kuPuteoli otwa hanga ko ovamwatate nove tu lombwela tu kale navo oule womafiku aheyali, opo nee otwa ya twa finda kuRoma. 15 Eshi ovamwatate va uda kombinga yetu, ove uya oku tu shakeneka komalandifilo aAppius nokonhele hai ifanwa Omaumbo Atatu Ovaenda.* Paulus eshi e va mona, okwa pandula Kalunga nosha li she mu twa omukumo. 16 Eshi twa fika muRoma, Paulus okwa li a pitikwa a kale ha di meumbo te li futile nota pashukilwa komukwaita.

17 Konima yomafiku atatu, Paulus okwa ifana ovakulunhu vOvajuda. Ndele eshi va ongala, okwa tya kuvo: “Ovalumenhu nye, ovamwatate, nonande kandi na eshi nda nyona kovanhu ile eenghulunghedi dootatekulululwa, onda yandjwa momake Ovaroma okudja kuJerusalem ndi li omunadolongo. 18 Konima eshi va pulapula nge, ova li va tokola okumangulula nge molwaashi kapa li etomheno lokudipaifa nge. 19 Eshi Ovajuda ve shi anya, onda pula oshinima osho shi talululwe kOmukesari, ndele hamolwaashi ngeno ndi li omhinge noshiwana shetu. 20 Osho osho sha ningifa nge ndi pule ndi popye nanye, molwaashi onda mangwa nomalyenge aa omolweteelelo olo Ovaisrael va kala ve na.” 21 Opo nee ova tya kuye: “Inatu yakula nande omukanda wa dja kuJudea tau popi kombinga yoye, noinaku dja nande omumwatate ta popi sha shii shi na sha naave. 22 Ndele otu wete shi li pandunge okuuda kutya ove oto ti ngahelipi, molwaashi otu shi shii lela kutya oshimhanga sheni otashi popiwa keshe pamwe.”

23 Ndele ova ninga elongekido va shakene naye efiku limwe. Opo nee vahapu ova ya konhele oko a li ha di nokwa kala te va yelifile okudja ongula fiyo okomatango kombinga yoshinima osho moku va pa oundombwedi nawanawa kombinga yOuhamba waKalunga, nokwa kendabala oku va tomha va itavele oinima oyo ya popiwa kombinga yaJesus mOmhango yaMoses nokOvaprofeti. 24 Vamwe ova li va itavela oinima oyo a li ta popi, ashike vamwe kava li va itavela. 25 Ndele molwaashi ova li tava kondjifafana, ova dja po puye, opo nee Paulus okwa popya ta ti:

“Jesaja okwa li a lombwelwa sha yuka okupitila momhepo iyapuki a lombwele ooxokulululwa, 26 taku ti: ‘Inda koshiwana osho ndele to ti: “Otamu ka pwilikina, ndele itamu ka uda ko, notamu ka tala, ndele itamu ka mona ko. 27 Osheshi ovanhu ava ove na omitima dikukutu, nomatwi avo ove a fitika, nomesho avo ove a fifikinifa opo vaha mone ko nomesho avo novaha ude ko nomatwi avo, opo vaha koneke nomitima davo, ndele tave lidilulula opo ndi va velule.” ’ 28 Onghee shiiveni kutya exupifo laKalunga otali udifilwa oiwana notai ka pwilikina kulo.” 29 ——

30 Paulus okwa kala oule womido mbali meumbo olo a li ha futile, nokwa kala ha yakula nawa aveshe ovo have uya kuye, 31 he va udifile kombinga yOuhamba waKalunga noku va honga kombinga yOmwene Jesus Kristus, te shi ningi nexwamo* nopehe na omaimbo asha.