ONHUMWAFO YA SHANGELWA OVAEFESO

1 Ame Paulus, omuyapostoli waKristus Jesus oo nda nangekwa po kuKalunga, ohandi shangele ovayapuki vomuEfeso ovo ve li ovadiinini nove li ovahongwa vaKristus Jesus:

2 Efilonghenda nombili yaKalunga Tate yetu noyOmwene Jesus Kristus nai kale pamwe nanye.

3 Kalunga oo e li Xe yOmwene wetu Jesus Kristus na hambelelwe eshi e tu nangeka noupuna okupitila momhepo iyapuki nokwe tu pa eenhele meulu tu li ovahongwa vaKristus. 4 Okwe tu hoolola tu ninge ovahongwa vaKristus fimbo ounyuni inau shitwa, opo tu ulike ohole, tu kale ovayapuki notuhe na oshipo koshipala shaYe. 5 Okwe tu hoolola komesho yefimbo tu ninge ovana vaye okupitila muJesus Kristus, metwokumwe nehalo laye. 6 Osho Kalunga okwe shi ninga opo ovanhu ve mu tange eshi e tu ulikila efilonghenda laye linene okupitila mOmona waye omuholike. 7 Kalunga okwa yandja ekulilo okupitila mohonde yOmona waye omolwefilonghenda laye linene opo tu dule okudiminwa po omatimba etu.

8 Omolwefilonghenda linene, Kalunga okwe tu pa ounongo neshiivo* alishe, 9 opo tu shiive oshiholekwa shiyapuki shi na sha nehalo laye. Oshiholekwa osho oshi na sha naasho a li a lalakanena okuninga 10 omolwelongekido* olo a li ta ka wanifa po peufwafimbo, opo a ongele oinima aishe yomeulu nosho yo yokombada yedu okupitila muKristus. Oinima aishe otai ka ongelwa okupitila muKristus 11 oo hatu ka fyuulula pamwe naye osho twa udanekelwa nale kuKalunga oo ha wanifa po oinima aishe oyo a udaneka metwokumwe nehalo laye, 12 opo a hambelelwe nokufimanekwa okupitila mufye ovo twa itavela tete muKristus. 13 Eshi mwa uda oshili, onghundana iwa i na sha nexupifo leni, nanye omwe mu itavela. Konima eshi mwe mu itavela, omwa didilikwa nomhepo iyapuki oyo mwa li mwa udanekelwa. 14 Omhepo iyapuki oi li eshilipaleko kutya Kalunga ota ka wanifa po ashishe osho e tu udanekela, nota ka mangulula oshiwana shaye okupitila mekuliloyambo opo a fimanekwe.

15 Eshi nda uda eitavelo leni mOmwene Jesus nohole oyo mwa ulikila ovayapuki aveshe, 16 ohandi pandula alushe Kalunga omolweni. Ohandi twikile yo oku mu tumbula momailikano ange 17 opo Kalunga kOmwene wetu Jesus Kristus, Xe yefimano, e mu pe ounongo mu dule okuuda ko oinima oyo ta holola opo mu mu shiive nawa. 18 Kalunga okwa patulula omitima deni opo mu mone nomu shiive eteelelo olo e mu pa nosho yo oinima iwa kuhe na vali oyo a udanekela ovayapuki. 19 Tu li ovaitaveli, okwe tu hololela eenghono daye dinenenene okupitila moilonga yaye oyo a longa 20 eshi a nyumuna Kristus koufi nokwe mu kaleka kolulyo laye meulu, 21 nokwe mu pa ondodo ya tumbala i dule yovapangeli aveshe, yaavo ve na eenghonopangelo, yaavo ve na eenghono noyovanamadina aveshe, havomounyuni ashike ou,* ndele novomwaau tau uya. 22 Kalunga okwa tula oinima aishe koshi yeemhadi daKristus nokwe mu ninga omutwe woinima aishe meongalo 23 olo li li olutu laye noli na omaukwatya aye aeshe.

2 Omwa li mwa fa mwa fya omolwomanyono nomatauluko eni, ndele Kalunga okwe mu nyumuna. 2 Omwa li hamu ende ngaashi ovanhu vomounyuni ou* nomwa li hamu longo ehalo lomupangeli wounyuni ou oo ta xwaxwameke omhepo oyo hai ningifa ovanhu kunena vaha dulike. 3 Nafye otwa li hatu shikula omahalo opambelela noku a wanifa po, twa li hatu katuka metwokumwe nomadiladilo etu vene, notwa li twa wana okuhandukilwa kuKalunga ngaashi ashike ovanhu aveshe. 4 Ndele omolwefilonghenda laKalunga linene nomolwohole yaye inene yoku tu hola, 5 okwe tu nyumuna nokwe tu hanganifa naKristus nonande otwa li twa fya omolwomanyono; omwa xupifwa omolwefilonghenda laye. 6 Onghee okwe tu nyumuna nokwe tu pa eenhele dokukala meulu tu li ovahongwa vaKristus Jesus, 7 opo e ke tu ulikile efilonghenda laye linene mounyuni mupe oo tau uya,* eshi te ke tu ningila oinima iwa fye ovo tu li ovahongwa vaKristus Jesus.

8 Ovo mu na eitavelo omwa xupifwa omolwefilonghenda nomolwoshali yaKalunga, ndele hamolwoilonga yeni. 9 Hamolwoilonga yeni, opo paha kale nande oumwe te litange. 10 Molwaashi otu li oilonga yomake aKalunga notu li ovahongwa vaKristus Jesus, otwa shitwa tu longe oilonga iwa oyo Kalunga e tu pa komesho yefimbo.

11 Ndele dimbulukeni kutya nye kamu fi Ovajuda, naavo va pitifwa etanda kovanhu ova li have mu ula kutya nye inamu pita etanda. 12 Eshi mwa li mounyuni, kamwa li mu shii Kristus nosho yo Kalunga; omwa li mwa tukauka ko koshiwana shaIsrael, mwa li muhe li oshitukulwa shomahangano e na sha neudaneko laKalunga nokamwa li mu na eteelelo. 13 Ndele omolwohonde yaKristus, nye ovo mwa li mu shii Kalunga naavo mwa li muhe mu shii, omwa ninga ovahongwa vaKristus Jesus. 14 Kristus, oo a hanganifa eengudu dopavali nokwa ngumauna po ekuma olo la li pokati kado, okwe tu etela ombili. 15 Eshi a yamba po olutu laye, okwa xulifa po outondwe pokati keengudu odo, oo wa etifwa kOmhango oyo ya kwatela mo oipango. Eshi e di hanganifa, oda ninga ovahongwa vaye nokwa panga ombili nado, 16 opo e di hanganife naKalunga okupitila momuti womahepeko,* molwaashi okwe liyandja ye mwene, opo a xulife po outondwe oo. 17 Okwe uyile a udifile ovanhu onghundana iwa yombili, ovo ve shii Kalunga naavo inave mu shiiva. 18 Eyambo laye ole shi ninga tashi shiiva, opo ovanhu aveshe va dule okwiilikana kuTate womeulu molwaashi atushe otwa pewa omhepo iyapuki.

19 Onghee hano, kamu fi vali ovaenda novanailongo, ndele omu na oukwashiwana umwe novayapuki nomwa ninga ovaneumbo vaKalunga. 20 Omwa tungilwa kekanghameno lovayapostoli nolovaprofeti, na Kristus Jesus oye emanya la fimanenena lekanghameno olo. 21 Ndele molwaashi etungo alishe oli na ekwatafano naKristus, noitukulwa yalo aishe oi li kumwe, otali ningi otembeli iyapuki yaJehova. 22 Molwaashi nanye omwa hangana naKristus, Kalunga okwe mu ninga mu kale mwa fa oitukulwa yonhele omo ha kala okupitila momhepo yaye.

3 Ame Paulus, onda tulwa modolongo molwaashi ndi li omushikuli waKristus Jesus nomolwaashi handi mu kwafele nye ovo muhe fi Ovajuda. 2 Omwa uda shili kutya onda pewa oufembanghenda woku mu kwafela mu mone ouwa mefilonghenda laKalunga, 3 nonda hololelwa oshiholekwa shiyapuki, ngaashi nda li nde mu shangela nale. 4 Eshi tamu lesha osho nde mu shangela, otamu ka mona kutya ondi na eudeko li na sha noshiholekwa shiyapuki kombinga yaKristus. 5 Kalunga ka li a hololela omapupi onale oshiholekwa osho, ngaashi e shi hololela paife ovayapostoli novaprofeti vaye okupitila momhepo iyapuki. 6 Oshiholekwa osho osheshi kutya: Ovo vehe fi Ovajuda nove li ovashikuli vaKristus Jesus otava ka ninga ovafyuululi pamwe naKristus notava ningi olutu limwe. Otava ka pewa yo osho Kalunga e tu udanekela okupitila monghundana iwa. 7 Onda ninga omuyakuli woshiholekwa osho shiyapuki omolwefilonghenda laKalunga linene, nokwa pa nge oshali oyo omolweenghono daye.

8 Ame, ou ndi dulike kovayapuki aveshe, onda pewa efilonghenda olo opo ndi udifile oiwana onghundana iwa kombinga yomanangeko noupuna aKristus oo itaa dulu okuyelekwa nasha, 9 nondi kwafele ovanhu va mone nghee Kalunga ou a shita oinima aishe a holola oshiholekwa osho sha kala sha holekwa oule wefimbo. 10 Osho osha ningwa opo eenghonopangelo nomapangelo omeulu a shiive nghee ounongo waKalunga wa hololwa meenghedi dihapu da yoolokafana okupitila meongalo. 11 Osho oshi li metwokumwe nelalakano laalushe laKalunga olo a lalakanena okuwanifa po okupitila muKristus Jesus Omwene wetu. 12 Ndele omolweitavelo letu muKristus, otu na emanguluko lokupopya nohatu dulu okwiilikana kuKalunga twa manguluka notu na elineekelo muye. 13 Onghee ohandi mu indile muha teke omukumo omolwomaudjuu oo handi piti muo omolweni, osheshi osho otashi mu etele efimano.

14 Ohandi tu eengolo ndi ilikane kuTate, 15 opo ndi mu pandule molwaashi oukwaneumbo keshe meulu nokombada yedu ou li po omolwaye. 16 Ohandi ilikana kuKalunga oo e na oshinge shinene e mu pe eenghono okupitila momhepo yaye, opo di pameke omitima nomadiladilo eni. 17 Ndele omolweitavelo leni, ohandi ilikana yo kuKalunga, opo mu kale mu na Kristus momitima deni nomu kale mu hole ovanhu vakweni. Kaleni mwa twama nomwa pamenena kekanghameno, 18 opo mu shiive nawanawa pamwe novayapuki aveshe ounene, oule womukokomoko, oule wopombada noule wopedu woinima yopakalunga. 19 Shiiveni yo ohole yaKristus oyo i dule eshiivo, opo Kalunga e mu kwafele mu kale mu na pauyadi omaukwatya a fa aye.

20 Omolweenghono daKalunga odo tadi longo mufye, ote ke tu pa shihapu neenghono shi dulife pwaasho hatu pula ile hatu diladila. 21 Onghee hano, Kalunga okwa wana okutangwa fiyo alushe komapupi aeshe omolweongalo laye nomolwaKristus Jesus. Amen.

4 Ame Paulus, oo ndi li modolongo omolwOmwene wetu, ohandi mu indile mu kale metwokumwe naasho mwa ifanenwa. 2 Kaleni alushe ovalininipiki, mu na omwenyo muwa, mu na onheni nohamu lididimikilafana pahole. 3 Kaleni mu na ombili nokukaleka po oukumwe oo mu na omolwomhepo iyapuki. 4 Ndele ngaashi pe na eteelelo limwe olo mwa ifanenwa, ope na yo olutu limwe, omhepo imwe, 5 Omwene umwe, eitavelo limwe, eninginifo limwe 6 naKalunga Xe yaaveshe umwe, oo e li omupangeli waaishe, ha longifa oinima aishe noha kala mwaaishe.

7 Keshe umwe womufye okwa pewa efilonghenda laKalunga, na Kristus oye a pa keshe umwe womufye oshali oyo. 8 Omishangwa oda ti: “Eshi a londa meulu okwa ya pamwe neenghwate, nokwa yandja ovalumenhu ve li eeshali.” 9 Eshi taku ti “okwa londa” osha hala okutya ngahelipi? Osha hala okutya okwa li yo a londoloka e uya kombada yedu. 10 Ou a londoloka e uya kedu, oye ngoo a londa a ya meulu, opo oinima aishe i wanifwe.

11 Ovalumenhu ovo a yandja, vamwe ovayapostoli, vamwe ovaprofeti, vamwe ovaudifi,* vamwe ovafita navamwe ovahongi. 12 Okwe va yandja opo va kwafele* ovayapuki va ende mondjila ya yuka, va yakule vamwe nova tunge olutu laKristus,* 13 opo tu hangane* atushe meitavelo limwe nokumona eshiivo lashili li na sha nOmona waKalunga, tu ninge ovakulunhu* pamhepo fiyo twa kulika filufilu omaukwatya a fa aKristus. 14 Onghee hano, inatu kaleni vali ngaashi ounona nongaashi omakufikufi oo haa telaanifwa komhepo, opo tuha twalwaatwalwe nokushikula omahongo opanhu oipupulu oo a nuninwa oku tu pukifa noku tu yula. 15 Natu kaleni hatu popi oshili nokuulika ohole opo tu dule okukala ovakulunhu pamhepo moinima aishe oyo i li metwokumwe naKristus oo e li omutwe wetu. 16 Okupitila muye, oilyo aishe yolutu oya tulwa kumwe, ya kwatakanifwa komatwikililo, nohai longele kumwe, opo oshilyo keshe shi wanife po oshilonga shasho. Ngeenge oilyo aishe otai longo nawa, olutu otali ka kula nawa notali ke litunga pahole.

17 Onghee hano, ohandi mu lombwele noku mu kumaida koshipala shOmwene kutya inamu enda vali ngaashi ovanhu vomoiwana ovo hava diladila oinima yongaho. 18 Ove li momilaulu pamadiladilo noitava ka mona omwenyo oo Kalunga te tu pe molwaashi kave na ko nasha nova kukutika omitima davo. 19 Ova dina omifikamhango dopaenghedi, hava nyono nopehe na ouxwenge* nova duka mokulonga owii keshe.

20 Ndele omu shi shii kutya Kristus hasho e li ngaho 21 ngeenge omwa uda nomwa hongwa oshili oyo a honga. 22 Omwa hongwa mu lidule omunhu mukulu molwaashi omwa li hamu shikula elihumbato leni lonale inali koshoka eshi mwa li mwa efa mu pukifwe komahalo eni. 23 Twikileni okulundulula onghedi yeni yokudiladila* 24 nokudjala omunhu mupe oo a shitwa metwokumwe nehalo laKalunga, mouyuki nomoudiinini washili.

25 Onghee hano, molwaashi amushe omu li oilyo yolutu limwe, efei po okupopya oipupulu, ndele kaleni hamu lombwelafana oshili. 26 Handukeni, ndele inamu nyona; inamu efa etango li ningine mwa handuka. 27 Inamu pa Ondiaboli omhito. 28 Ou ha vake ina vaka vali, ndele na longe noudiinini oilonga iwa nomake aye opo a dule okutukulilafana naao e na omhumbwe. 29 Momakanya eni inamu pita nandenande eendjovo dii, ndele popyeni eendjovo diwa opo di pameke ovo tava pwilikine kudo. 30 Inamu nyikifa oluhodi omhepo iyapuki yaKalunga, osheshi oyo mwa didilikifwa opo mu xupifwe okupitila mekuliloyambo.

31 Henukeni oinima ei, onya, ehandu, efulakato, ehanyauko, okupopya inaku koshoka nosho yo owii aushe. 32 Ndele kaleni hamu kenukilafana, hamu filafana onghenda nokudiminafana po nehalo liwa ngaashi Kalunga he mu dimine po nehalo liwa okupitila muKristus.

5 Ningeni ovahopaeneni vaKalunga, ngaashi ovana ovaholike. 2 Kaleni mu na ohole ngaashi Kristus a kala e tu* hole nokwe liyandja molwetu* e li eyambo li li edimba liwa kuKalunga.

3 Ndele ngaashi tashi wapalele ovayapuki, mokati keni inamu tumbulwa oluhaelo, owii keshe ile olwisho, 4 elihumbato lififa ohoni, okupopya kwa nyika oulai ile omashendjo oulai. Osheshi oinima oyo inai wapala, ndele kaleni hamu pandula Kalunga. 5 Omu shi shii nomwa didilika kutya ovahaeli,* ovalongi vowii ile ovanalwisho ovo ve li onga ovalongeli voikalunga, itava ka fyuulula Ouhamba waKristus naKalunga.

6 Inamu efa mu pukifwe kovanhu ovo hava popi eendjovo dongaho, osheshi omolwoinima oyo, Kalunga ota ka handukila ovo ihava dulika. 7 Onghee hano, inamu va hopaenena;* 8 osheshi nale omwa li momilaulu, ndele paife omu li mouyelele eshi mu na ekwatafano nOmwene. Kaleni hamu ende ngaashi ovana vouyelele, 9 osheshi ngeenge omwa kala hamu ende mouyelele, otamu ka kala hamu longo ouwa, ouyuki nokukala metwokumwe noshili. 10 Kaleni hamu konakona oinima mu tale kutya ilipi po tai wapalele Omwene. 11 Efeni okulonga oilonga yongaho yomilaulu; ndele ponhele yaasho, i nyanekeni pomutenya. 12 Osheshi oinima oyo ovanhu hava ningi meholeko oi fifa ohoni okutumbula. 13 Oinima aishe oya hololwa* kouyelele, noinima aishe oyo ya hololwa oya ninga ouyelele. 14 Onghee Omishangwa oda ti: “Penduka ove ou wa kofa nokunyumuka koufi opo u minikilwe kouyelele waKristus.”

15 Pashukileni eenghatu deni muha ende ngaashi omalai, ndele ongaashi ovanaendunge. 16 Longifeni nawa efimbo,* osheshi omafiku omai. 17 Inamu kala ngaashi omalai, ndele kaleni hamu konakona kutya ehalo laJehova olilipi. 18 Shimwe vali, inamu kolwa komaviinyu, osheshi oukolwe ohau ningifa omunhu a katuke shihe li pandunge,* ndele kaleni nokuyadifwa omhepo iyapuki. 19 Ngeenge tamu popi, popyeni neendjovo domapsalme, tamu tange Kalunga nomaimbilo opamhepo. Imbileni Jehova omaimbilohambelelo momitima deni. 20 Kaleni alushe hamu pandula Kalunga Tate yetu okupitila medina lOmwene wetu Jesus Kristus omolwoinima aishe.

21 Keshe umwe na kale ha dulika kumukwao molwaashi omwa fimaneka neenghono Kristus. 22 Ovakulukadi nava kale hava dulika kovashamane vavo ngaashi kOmwene, 23 osheshi omushamane oye omutwe womukulukadi waye ngaashi ashike Kristus e li omutwe weongalo, olo li li olutu laye, noku li omuxupifi walo. 24 Ngaashi eongalo hali dulika kuKristus, ovakulukadi navo nava kale hava dulika kovashamane vavo moinima aishe. 25 Ovashamane, kaleni mu hole ovakulukadi veni ngaashi Kristus yo e hole eongalo nokwe liyandja molwalo, 26 e li yapula nokwe li kosha nomeva, sha hala okutya, neendjovo daKalunga, 27 opo li kale la koshoka koshipala shaye, liyapuki nolihe na edilo lasha.

28 Ovashamane nava kale ve hole ovakulukadi vavo ngaashi omalutu avo. Omulumenhu ou e hole omukulukadi waye oku lihole ye mwene, 29 osheshi kape na omulumenhu e tonde olutu laye* mwene, ndele ohe li palula nohe li file oshisho, ngaashi Kristus ha file oshisho eongalo, 30 molwaashi otu li oilyo yolutu laye. 31 “Nomolwaasho omulumenhu oku na okufiya po xe naina, ndele ta kanyatele* komukulukadi waye, ndele tava ningi onhumba imwe.” 32 Oshiholekwa osho shiyapuki osha fimana. Ohandi popi kombinga yaKristus nosho yo eongalo. 33 Onghee hano, keshe umwe womunye oku na okukala e hole omukulukadi waye ngaashi e lihole ye mwene. Kakele kaasho, omukulukadi oku na okukala a fimaneka neenghono* omushamane waye.

6 Ounona, dulikeni kovakulunhu veni metwokumwe nehalo laKalunga, osheshi osho sha yuka. 2 “Fimaneka xo nanyoko;” eshi osho oshipango shotete shi na eudaneko: 3 “Opo u kale nonghalamwenyo iwa* nou kale nomwenyo mule kombada yedu.” 4 Ootate, inamu nyemateka ovana veni, ndele va tekuleni noku va deula metwokumwe newiliko* laJehova.

5 Ovapiya, dulikeni koovene veni vopanhu,* tamu shi ningi netilo nokukakama nokudulika nomutima aushe, ngaashi kuKristus, 6 hangeenge ashike mu wetike kovanhu opo mu va hafife, ndele ongaashi ovapiya vaKristus ovo hava longo ehalo laKalunga nomutima aushe. 7 Longeleni oovene veni nehalo liwa, ngaashi tamu longele Jehova, ndele havanhu. 8 Osheshi omu shi shii kutya keshe umwe, kutya nee omupika ile omudalwa, ota ka pewa ondjabi kuJehova omolwoilonga yaye iwa. 9 Oovene nye, inamu ungaunga nai novapiya veni, noinamu va ningila omatilifo, osheshi omu shi shii kutya Omwene wavo noweni oku li meulu noke na okatongo.

10 Xuuninwa, Omwene ne mu pe eenghono omolweenghono daye dinene. 11 Djaleni oilwifo aishe oyo mwa pewa kuKalunga opo mu dule okukondja mwa pama muha yulwe* kOndiaboli, 12 molwaashi otu li molwoodi,* ndele itatu lwifa ovanhu, ashike ohatu lwifa omapangelo, ovawiliki novapangeli vounyuni ou womilaulu, sha hala okutya eemhepo dowii odo di li mevalelwa. 13 Onghee hano, djaleni oilwifo aishe oyo mwa pewa kuKalunga opo mu dule okuliamena momafimbo mai, nokonima eshi mwa mana okulilongekidila aishe, kaleni mwa pama.

14 Kaleni mwa pama, nomwe limanga ekwamo loshili moiya yeni, djaleni oshipapa shouyuki peenhulo deni, 15 djaleni yo eenghaku keemhadi deni, mwe lilongekida okuudifa onghundana iwa yombili. 16 Kakele kaasho, kufeni oshikelelifo sha kula sheitavelo, opo mu dule okudima po nasho oikuti* aishe yomunawii ya xwama omundilo. 17 Djaleni yo embale lexupifo nokuhomata eongamukonda lomhepo, sha hala okutya eendjovo daKalunga. 18 Kaleni hamu ilikana omailikano e lili noku lili nokwiindila efimbo keshe momhepo. Kakele kaasho, kaleni oupafi nokwiindilila ovayapuki aveshe. 19 Ilikanenei nge yo ndi pewe eendjovo diwa, opo ndi dule okupopya nouladi eshi handi udifa kombinga yoshiholekwa shiyapuki shi na sha nonghundana iwa. 20 Osheshi onda tumwa kuKalunga ndi udife onghundana iwa, nomolwaasho nda mangwa nomalyenge. Onghee ilikanenei nge opo ndi udife nouladi.

21 Omumwatate omuholike nomupiya wOmwene omudiinini, Tikikus, ote ke mu shiivifila shi na sha noilonga yange nonghee handi shi endifa. 22 Ohandi mu tumu e uye kunye opo e mu shiivifile kutya ohatu shi endifa ngahelipi noku mu hekeleke.

23 Ovamwatate nava kale nombili, neitavelo nohole yaKalunga Tate noyOmwene Jesus Kristus. 24 Efilonghenda laKalunga nali kale pamwe naaveshe ovo ve hole Omwene wetu Jesus Kristus nohole yaalushe.