ONHUMWAFO YA SHANGELWA OVAFILIPPI

1 Ame Paulus naTimoteus, tu li ovapiya vaKristus Jesus, ohatu shangele ovayapuki vomuFilippi, ovo ve li ovahongwa vaKristus Jesus, nosho yo ovakulunhuongalo novayakuliongalo:

2 Efilonghenda nombili yaKalunga Tate yetu noyOmwene Jesus Kristus nai kale pamwe nanye.

3 Ohandi pandula alushe Kalunga ngeenge handi mu tumbula 4 momailikano ange aeshe, nohandi ilikana nehafo linene, 5 molwaashi ohamu yambidida onghundana iwa* okudja kefiku olo mwe i tambula ko fiyo opaife. 6 Onde lineekela kutya Kalunga ote ke mu kwafela mu manife oshilonga shiwa osho a hovela mokati keni fiyo okefiku laKristus Jesus. 7 Ondi wete sha yuka okudiladila ngaho kombinga yeni, molwaashi onda kala ndi mu hole amushe nomutima aushe nye ovo mwa kala tamu yambidida nge eshi ndi li modolongo naashi handi popi novapangeli, opo ndi dule okupopila paveta onghundana iwa.

8 Kalunga oku shi shii kutya onde mu djuulukwa amushe, nondi mu hole unene ngaashi Kristus Jesus e mu hole. 9 Ohandi ilikana opo ohole yeni i hapupale nomu kale mu na eshiivo lashili, eendunge dokuyoolola, 10 mu shiive oinima oyo ya fimanenena nomu kale mwa koshoka, opo muha pundukife vamwe fiyo okefiku laKristus. 11 Kungaho, otamu ka mona oshiimati shouyuki okupitila muJesus Kristus, opo Kalunga a fimanekwe noku hambelelwe.

12 Ovamwatate, onda hala mu shiive kutya onghalo yange oye shi ningifa tashi shiiva, opo onghundana iwa i tandavele, 13 nokutulwa kwange modolongo omolwaKristus ku shiivike apeshe mokati ketangakwaita lohamba yaRoma nokovanhu aveshe. 14 Eshi ovamwatate vahapu ovo tava longele Omwene va uda kutya onda tulwa modolongo, oshe va pameka nova kala tava udifa nouladi eendjovo daKalunga nopehe na oumbada.

15 Nonande ovanhu vamwe otava udifa kombinga yaKristus nehalo liwa, vamwe otave shi ningi omolwondubo nokulihalela komesho. 16 Ovo tava udifa nehalo liwa otave shi ningi omolwohole yaKristus, osheshi ove shi shii kutya onda hoololwa ndi popile onghundana iwa. 17 Ndele ovo tava udifa omolwondubo otave shi ningi, opo va etife po omapataneko, ashike itave shi ningi nehalo liwa, osheshi ova hala okweetela nge omaudjuu eshi ndi li modolongo. 18 Osha etifa oidjemo ilipi? Kashi na nee mbudi kutya ovanhu otava udifa nehalo liwa ile hasho, onghundana iwa kombinga yaKristus otai udifwa, naasho ohashi etele nge ehafo. Onghee ohandi twikile okukala nda hafa, 19 osheshi ondi shi shii kutya ohandi ka xupifwa omolwomaindilo eni nokekwafo lomhepo iyapuki oyo twa pewa kuJesus Kristus. 20 Osho oshi li metwokumwe naasho nda kala nda teelela nonde lineekela kutya itandi ka fifwa ohoni nandenande. Ndele omolwemanguluko lange lokupopya, ohandi fimanekifa Kristus paife, ngaashi handi ningi nale. Ota ka fimanekifwa okupitila mwaame,* kutya nee ondi na omwenyo ile onda fya.

21 Fimbo ndi li momwenyo, ohandi hopaenene Kristus, nongeenge onda fi, ohandi ka mona ondjabi. 22 Ndele ngeenge onda twikile okukala nomwenyo pambelela, ohandi longo shihapu omolwaKristus. Onghee itandi popi kutya ohandi hoolola po shike. 23 Oinima oyo ivali oya limbililika nge, osheshi onda hala okumangululwa noku ka kala pamwe naKristus; kwaame osho osho sha denga mbada. 24 Mepingafano naasho, ondi wete yo sha fimana okukala nomwenyo pambelela omolwouwa weni. 25 Ndele ondi na elineekelo nondi shi shii kutya ohandi twikile okukala nomwenyo pamwe nanye amushe, opo mu ninge exumokomesho nomu kale mwa hafa nomu na eitavelo. 26 Opo eshi handi ka alukila kunye, ehafo leni otali hapupala molwaashi omu li ovashikuli vaKristus Jesus.

27 Kaleni hamu lihumbata metwokumwe nonghundana iwa i na sha naKristus, opo ngeenge onde uya oku mu talela po ile onda kala inandi uya, otamu kala mwa pama, mwa hangana,* mu na ediladilo limwe* notamu ka kala neitavelo la kola monghundana iwa, 28 ndele itamu ka tilifwa kovapataneki veni. Osho oshi li oumbangi kuvo nokunye, wa dja kuKalunga, kutya vo otava ka hanaunwa po, ndele nye otamu ka xupifwa. 29 Nye inamu pewa ashike oufembanghenda wokwiitavela muKristus, ndele omu na yo okuhepekwa omolwaye. 30 Osheshi nanye otamu ka shakeneka omaupyakadi a faafana naao nda pita muo nonda taalela natango.

2 Ngeenge omu na eendjovo detwomukumo mwa hala oku di lombwela vamwe okupitila muKristus ile oku va hekeleka pahole, mu na ko nasha navo, mu va hole nomu va uditile olukeno, 2 shi ningeni opo mu hapupalife ehafo lange eshi tamu ulike kutya ohamu diladila monghedi imwe, mu holafane, mwa hangana filufilu nomu na etaleko la faafana. 3 Henukeni eenhamanana nokuninga oinima omolwokuliholamwene, ndele omolwelininipiko, kaleni hamu tale ko vakweni ve mu dule. 4 Inamu lalakanena ashike ouwa weni vene, ndele lalakaneneni yo ouwa wavakweni.

5 Kaleni hamu diladila nokulihumbata ngaashi Kristus Jesus, 6 oo nonande okwa li a fa Kalunga, ka li a diladila a kale e fike puye ile a kufe po ondodo yaye. 7 Mepingafano naasho, okwa efa po aishe oyo a li e na nokwa ninga omunhu* e li ngaashi omupika. 8 Okwe lininipika eshi e uyile molupe lopanhu, nokwa kala ha dulika fiyo omefyo laye komuti womahepeko.* 9 Onghee hano, Kalunga okwe mu lenga eshi e mu pa ondodo yopombada elela, nokwe mu luka edina li dule omadina aeshe, 10 opo keshe shimwe kutya nee omeulu ile okombada yedu ile okoshi yedu shi twe eengolo okupitila medina laJesus, 11 opo omunhu keshe* a hepaulule moipafi kutya Jesus Kristus oye Omwene, nopo Kalunga Xe a fimanekwe.

12 Ovamwatate ovaholike, ngaashi hamu dulika alushe ngeenge ndi li mokati keni naunene tuu ngeenge ndihe po, twikileni okulonga noudiinini, tamu shi ningi nokutila nokukakama opo mu ka xupifwe. 13 Osheshi Kalunga oye te mu pameke, te mu pe eenghono noku mu kwafela mu kale mwa hala okulonga ehalo laye. 14 Kaleni hamu ningi oinima aishe nopehe na okungongota nokutanguna, 15 opo mu kale mwa koshoka nomuhe na edilo lasha, ngaashi ovana vaKalunga ovo vehe na edilo lasha mokati kepupi eli la nyonauka nola pilalala, omo mu li tamu vilima ngaashi eenyofi mounyuni. 16 Kaleni mwa diinina eendjovo odo tadi mu pefa omwenyo, opo ndi kale nda hafa mefiku laKristus, molwaashi ondi shi shii kutya inandi tondoka epwanga noinandi longa noudiinini oshimha. 17 Nonande ohandi tilwashi ngaashi oshikunwayambo eshi handi yambidida oshilonga shiyapuki,* onda hafa unene pamwe nanye amushe molwaashi eitavelo leni ole mu linyengifa mu kufe ombinga musho. 18 Sha faafana, nanye hafeni nokunyakukwa pamwe naame.

19 Ndele molwaashi onde lineekela Omwene Jesus, ohandi mu tumine diva Timoteus, opo ndi uye ndi tuwe omukumo ngeenge okwa lombwele nge kombinga yeni. 20 Nghi wete pe na vali umwe e na omaukwatya a fa aye ou ta dulu oku mu fila oshisho. 21 Osheshi aveshe ohava lalakanene ouwa wavo vene, ndele hauwa waJesus Kristus. 22 Ndele ngaashi mu shi shii, Timoteus okwa ulika kutya hasho e li ngaho, molwaashi otwa longa pamwe naye ngaashi omona e li naxe mokutandavelifa onghundana iwa. 23 Onghee hano, oye nde lineekela nohandi mu tumu diva ngeenge nda mono kutya oshike handi ka ningilwa. 24 Ondi na elineekelo mOmwene kutya naame yo ohandi ke uya kunye diva.

25 Ndele paife ondi wete sha yuka oku mu tumina omumwatate Epafroditus, oo e li omulongi pamwe naame, omukwaita mukwetu noku li omutumwa oo hamu tumu e uye a yakule nge, 26 molwaashi okwe mu djuulukwa amushe nokwa polimana eshi mwa uda kutya okwa li ta vele. 27 Okwa li ta vele unene, hanga a fya nokuli, ndele Kalunga okwe mu fila onghenda. Ashike haye aeke a fila onghenda, ndele naame yo opo oluhodi lange liha wedelwe. 28 Onghee hano, ohandi mu tumu meendelelo kunye, opo ngeenge mwa monafana mu hafe natango, naame opo ndiha kale noshisho. 29 Mu tambulei ko nomutima aushe ngaashi hamu shi ningile ovashikuli vOmwene. Kaleni yo mwa fimaneka ovalumenhu ngaashi ye 30 molwaashi hanga a fye omolwokuyakula Kristus,* a tula omwenyo waye moshiponga, opo a yakule nge ponhele yeni shaashi katu lyeni pamwe.

3 Ovamwatate, twikileni okukala mwa hafa molwaashi omwa hangana nOmwene. Itandi loloka oku mu shangela oinima oyo nde mu shangela nale, molwaashi oshi li eameno leni.

2 Lungameni ovanhu ovo inava koshoka;* lungameni ovo hava longo owii; lungameni ovo va hala mu pitifwe etanda.* 3 Osheshi fye otwa pita etanda lashili, hatu longo oilonga iyapuki kekwafo lomhepo yaKalunga, hatu litange omolwaKristus Jesus noinatu lineekela moinima yopanhu. 4 Ngeenge ope na ou te litange omolwoinima yopambelela, ame ohandi dulu okulitanga ndi mu dule, 5 molwaashi onda pita etanda mefiku etihetatu, nda dja moshiwana shOvaisrael, nda dja mepata laBenjamin; ame Omuheberi nda dalwa kOvaheberi; Omufarisai handi diinine omhango; 6 onda li omuladi mokuhepeka eongalo, nonda li nda ulika filufilu kutya ohandi diinine osho sha popiwa momhango. 7 Oinima oyo nda li nda tala ko ya fimanenena, paife onde i tala ko yongaho elela* omolwaKristus. 8 Onda li nda tokola okweefa po oinima aishe omolweshiivo la denga mbada olo nda mona li na sha naKristus Jesus Omwene wange. Onghee omolwaye onda efa po oinima aishe nonde i tala ko ngaashi oimbodi yongaho, opo ndi kale ndi na ekwatafano* naKristus 9 nondi talike ko ndi li omushikuli waye. Itandi ti kutya ame omuyuki molwaashi handi dulika kOmhango, ndele omolwaashi ndi na eitavelo muKristus. Ovo ve na eitavelo muKristus, Kalunga okwe va tala ko ovayuki. 10 Onda hala okushiiva Kristus nokushiiva eenghono odo de mu nyumuna koufi, okumona oixuna nokufya ngaashi ye, 11 opo ndi tale ngeenge ohandi mono omhito menyumuko lotete.

12 Inandi hala okutya ngeno onda mona nale ondjabi ile onda fika mewaneneno, ndele ohandi kendabala nda mana mo, opo ndi ka mone ondjabi molwaashi oyo nda ifanenwa kuKristus Jesus. 13 Ovamwatate, ame inandi litala ko nda fa nda mona ondjabi, ndele ope na oshinima shimwe handi longo: Ohandi lalakanene okuhanga oinima yokomesho nohandi dimbwa ei yokonima. 14 Ohandi kendabala nda mana mo, opo ndi ka mone ondjabi oyo Kalunga ta ka yandja kwaavo a ifanena meulu okupitila muKristus Jesus. 15 Onghee hano, atusheni ovo twa pyokoka pamhepo natu diladileni metwokumwe noinima oyo nde mu lombwela, ndele ngeenge hasho hamu diladila ngaho, Kalunga ote ke mu kwafela mu diladile metwokumwe noinima oyo. 16 Kakele kaasho, ngaashi twa kala nokuninga exumokomesho, natango natu twikileni okweenda mondjila imwe.

17 Ovamwatate, ningeni ovahopaeneni vange nokutala kwaavo hava ende metwokumwe noshihopaenenwa osho twe mu tulila po. 18 Ndele ngaashi nde mu lombwela nale, ohandi mu lombwele vali nda nyika oluhodi kutya ope na ovanhu vahapu ovo ve li ovatondi vomuti womahepeko* waKristus. 19 Exulilo lavo ehanauno, edimo lavo olo kalunga kavo, efimano lavo ohoni yavo; nohava diladila oinima yokombada yedu. 20 Ndele fye otu na oukwashiwana womeulu, notwa teelela nodjuulufi omuxupifi wetu, Omwene Jesus Kristus. 21 Ota ka longifa eenghono daye dinene odo a pewa a pangele oinima aishe, nota ka shitulula omalutu etu oo e na ounghundi, opo a kale e na oshinge ngaashi olutu laye.

4 Ovamwatate ovaholike, ondi mu hole nonde mu djuulukwa, molwaashi omu li ngaashi oshishani nehafo lange, kaleni mwa pama mOmwene.

2 Ohandi ladipike Euodia naSintike va kale ve na ediladilo limwe eshi tava longele Omwene. 3 U li omulongi pamwe naame omudiinini,* ohandi ku indile u kale ho kwafele ovakainhu ovo. Ovakainhu ovo ova kala hava longo noudiinini* pamwe naame, naKlemens nosho yo vakwao mokuudifa onghundana iwa, nomadina avo aveshe okwa shangwa membo lomwenyo.

4 Hafeni alushe mOmwene. Natango ohandi ti, hafeni! 5 Ovanhu aveshe nava shiive kutya omu na ondjele. Inamu dimbwa kutya Omwene oku li popepi. 6 Inamu kala mu na oshisho shasha, ndele oisho yeni aishe i shiivifileni Kalunga momailikano, nokwiindila mwa mana mo nokupandula. 7 Opo nee ombili yaKalunga oyo i dule eendunge adishe otai ka amena omitima nomadiladilo eni okupitila muKristus Jesus.

8 Onghee hano, ovamwatate, kaleni hamu diladila* kombinga yoinima aishe oyo yoshili, oyo ya fimana, oyo ya yuka, oyo ya koshoka, oyo i holike, oyo i na epopilo liwa, oyo iwa naayo ya wana okupandulwa. 9 Ningeni oinima oyo mwe lihonga kwaame nomwe i tambula ko, naayo mwa uda handi popi nosho yo oyo mwa mona handi ningi, opo Kalunga kombili a kale pamwe nanye.

10 Ndi li omupiya wOmwene, onda hafa unene eshi nda mona kutya natango ohamu lipula kombinga yange. Ndele natango inamu mona omhito mu kwafele nge. 11 Itandi popi ngaho molwaashi ngeno ndi na omhumbwe, osheshi onde lihonga okukala nda wanenwa monghalo keshe. 12 Ondi shii okukala ndi na shinini nosho yo okukala ndi na shihapu. Moinima aishe nomonghalo keshe onde lihonga oshiholekwa shokukala nda kuta nokukala nda fya ondjala, okukala ndi na shihapu nokukala ndihe na sha. 13 Ohandi dulu okufinda onghalo keshe omolwaau ta pe nge eenghono.

14 Kakele kaasho, omwa ninga nawa eshi mwa kwafela nge momaudjuu ange. 15 Ovamwatate nye Ovafilippi, omu shi shii kutya eshi mwa uda tete onghundana iwa, eshi nda dja muMakedonia, kape na nande eongalo limwe la kwafela nge ile la tambula ko ekwafo lange, ndele onye amuke. 16 Osheshi eshi nda li muTessalonika, omwa li mwa tumina nge sha, opo ndi li kwafele nasho, hashikando ashike shimwe, ndele ivali. 17 Itashi ti kutya ngeno onda hala eeshali, ndele onda hala mu longe oilonga iwa, opo i mu etele ouwa. 18 Ame inandi pumbwa sha; ondi na shi dulife pwaasho nda pumbwa molwaashi onda yakula oinima oyo mwa tumina nge ye uya naEpafroditus, eyambo olo li li edimba liwa la tambulwa ko nola hokiwa kuKalunga. 19 Kalunga oo e na shihapu naye ote ke mu pa ashishe osho mwa pumbwa okupitila muKristus Jesus. 20 Kalunga Tate yetu na fimanekwe fiyo alushe. Amen.

21 Kundilei po ovayapuki aveshe ovo ve li ovahongwa vaKristus Jesus. Otamu kundilwa po yo kovamwatate ava ndi li navo. 22 Otamu kundilwa po yo kovayapuki aveshe, unene tuu ovo hava di meumbo lOmukesari.

23 Efilonghenda lOmwene wetu Jesus Kristus nali kale pamwe nanye omolwomhepo yeni iwa.