ONHUMWAFO YA SHANGELWA OVAKOLOSSI

1 Ame Paulus, omuyapostoli waKristus Jesus pahalo laKalunga, pamwe nomumwatate Timoteus, 2 ohatu shangele ovayapuki novamwatate ovadiinini ovo ve li ovahongwa vaKristus, ovo ve li muKolossi:

Efilonghenda nombili yaKalunga Tate yetu nai kale pamwe nanye.

3 Ngeenge hatu mu ilikanene, ohatu pandula alushe Kalunga, Xe yOmwene wetu Jesus Kristus, 4 molwaashi otwa uda kutya omu na eitavelo muKristus Jesus nomu hole ovayapuki aveshe, 5 nomolwaashi mwa teelela ondjabi oyo mwa tuvikililwa meulu. Eteelelo olo omwe li uda okupitila metumwalaka loshili i na sha nonghundana iwa 6 oyo ye uya kunye. Ngaashi ashike onghundana iwa ya tandavela notai imike oiimati mounyuni aushe, oya tandavela yo nomokati keni okudja kefiku olo mwe i uda nomwa shiiva nawa efilonghenda laKalunga lashili. 7 Efilonghenda olo omwe li uda komumwatate omuholike nomudiinini Epafras, oo ta yakula ponhele yetu e li omupiya waKristus. 8 Okwe tu shiivifila yo kombinga yohole oyo mwa kulika kekwafo lomhepo yaKalunga.

9 Eshi twa uda kombinga yohole neitavelo leni, otwa kala noku mu ilikanena, opo mu shiive nawa ehalo laKalunga, mu kale mu na ounongo aushe neudeko loinima yopakalunga, 10 opo mu wapalele Jehova nomu mu hafife moinima aishe eshi tamu imike oiimati moilonga aishe iwa notamu hapupalifa eshiivo leni loku mu shiiva. 11 Ohatu ilikana yo opo Kalunga a longife eenghono daye dinenenene e mu pe eenghono mu dule okulididimika filufilu mu na eteelelo nehafo 12 eshi tamu pandula Tate, oo e mu kwafela mu kale mwa wana oku ka ninga ovafyuululi pamwe novayapuki ovo ve li mouyelele.

13 Okwe tu mangulula mepangelo lomilaulu nokwe tu twala mouhamba wOmona waye omuholike, 14 oo e tu mangulula okupitila mekuliloyambo laye, opo tu dule okudiminwa po omatimba etu. 15 Oye olupe laKalunga iha monika, oye a shitwa tete koishitwa aishe, 16 noinima aishe oya shitwa okupitila muye, oinima yomeulu noyokombada yedu, oyo i wetike naayo ihe wetike, kutya nee ovapangeli, ile ovovo ve na eenghonopangelo ile omapangelo. Oinima aishe oya shitwa okupitila muye noye mu shitilwa. 17 Okwa kala ko nale fimbo oinima aishe inai shitwa, noinima aishe oya shitwa okupitila muye. 18 Oye omutwe wolutu, sha hala okutya weongalo. Oku li yo ehovelo loinima aishe noye a nyumunwa tete koufi, opo a kale wotete moinima aishe, 19 molwaashi Kalunga okwa hala Omona a kale a wana moinima aishe. 20 Kalunga okwa hala yo okuhanganifa nokupanga ombili noinima aishe, kutya nee oyokombada yedu ile oyomeulu, okupitila mohonde yaKristus oyo ya tika komuti womahepeko.*

21 Omwa li mwa tukauka ko kuKalunga nomwa li ovatondi vaye molwaashi omwa li hamu diladila okulonga owii. 22 Ndele paife Kalunga okwe mu hanganifa naye mwene okupitila mefyo lOmona waye oo a yamba po olutu laye lopanhu, opo mu kale ovayapuki, muhe na oshipo, nopehe na ou te mu pe oushima koshipala shaKalunga. 23 Onghee hano, kaleni mu na eitavelo, mwa tungila kekanghameno, mwa pamenena nomu na eteelelo la twa la kanghamena konghundana iwa oyo mwa uda noya udifilwa oishitwa aishe kombada yedu. Ame Paulus, onda nangekwa po ndi udife onghundana oyo iwa.

24 Onda hafa nonande ohandi mono oixuna omolweni. Ohandi mono oixuna ngaashi Kristus, nohandi twikile okumona oixuna omolwolutu laKristus, sha hala okutya eongalo. 25 Kalunga okwa nangeka nge po ndi yakule eongalo eli omolwouwa weni. Nomolwaasho handi udifa nomutima aushe eendjovo daye, 26 odo da kwatela mo oshiholekwa shiyapuki osho sha li sha holekwa omapupi onale nomounyuni wonale.* Ndele paife okwe shi hololela ovayapuki vaye, 27 ovo a kala a hala okuhololela emona la denga mbada loshiholekwa osho shiyapuki osho sha kala tashi hololwa mokati koiwana. Oshiholekwa osho oKristus oo mu na ekwatafano naye, nomwa teelela oku ka tumbalekwa pamwe naye. 28 Ohatu udifa kombinga yaye, hatu kumaida nokuhonga ovanhu ounongo aushe, opo tu kwafele ovahongwa aveshe vaKristus va kale va pyokoka pamhepo noku va yandja kuKalunga. 29 Fiyo opaife ohandi longo noudiinini, handi kendabala nda mana mo omolweenghono daye odo tadi longo mwaame.

2 Onda hala mu shiive nghee handi longo noudiinini, opo ndi mu kwafele nosho yo ovo vokuLaodikea naaveshe ovo inava mona nge komudidi.* 2 Osho ohandi shi ningi, opo va hekelekwe nova hanganifwe kohole. Kungaho otava ka kala ve na eudeko lomoule notava ka shiiva filufilu oshiholekwa shiyapuki shaKalunga, noshiholekwa osho oKristus. 3 Ounongo wa denga mbada neshiivo alishe oya tuvikilwa muye. 4 Ohandi popi ngaho opo muha yulwe neendjovo domaheka. 5 Nonande kandi li pamwe nanye palutu, pamhepo otu lyeni pamwe, nonda hafa eshi mu na elandulafano naashi mu na eitavelo la kola muKristus.

6 Molwaashi omwa itavela muKristus Jesus, Omwene wetu, twikileni oku mu hopaenena. 7 Ndele ngaashi mwe lihonga, kaleni mu na eitavelo la pama nokutungila kuKristus oo e li ekanghameno; kaleni yo alushe hamu pandula Kalunga.

8 Lungameni opo muha yulwe* nande okomunhu nomahongo opanhu nosho yo omatomhafano oipupulu oo a kanghamena keenghulunghedi dovanhu nokomadiladilo oo taa dana onghandangala mounyuni, ndele hakuKristus, 9 molwaashi Kristus oku na omaukwatya aeshe aKalunga. 10 Omu na keshe shimwe omolwaau e li omutwe womapangelo noweenghonopangelo adishe. 11 Omu na ekwatafano naye molwaashi inamu pitifwa etanda kovanhu, ndele omwa pita etanda eshi mwa efa po omahalo opambelela, osheshi ovapiya vaKristus ove na okupita etanda monghedi ya tya ngaho. 12 Omwa li mwa pakwa* pamwe naye eshi mwa ninginifwa ngaashi ye, nomwa nyumunwa molwaashi omu na ekwatafano naye nomolweitavelo leni moilonganghono yaKalunga oo a nyumuna Kristus koufi.

13 Kakele kaasho, nonande omwa li mwa fya omolwomanyono eni nomolwokuhapita etanda, Kalunga okwe mu nyumuna pamwe naKristus. Kalunga okwe tu dimina po nehalo liwa omanyono etu aeshe 14 nokwa xulifa po* omhango oyo twa li twa shangelwa tai tu tokola. Kalunga okwe i xulifa po okupitila mefyo laKristus komuti womahepeko.* 15 Okwa finda omapangelo nosho yo eenghonopangelo okupitila mulo,* nokwa ulika moipafi kutya okwe a finda filufilu.

16 Onghee hano, inamu efa mu tokolwe nande okomunhu shi na sha naasho tamu li ile osho tamu nu ile shi na sha nokudana oivilo yokomudo ile eshabata ile omwedi mupe. 17 Oinima oyo oi li omudidimbe waayo tai ke uya, ndele olutu lo vene oKristus. 18 Lungameni ovanhu ovo have liningifa va fa ovalininipiki, opo va monike kovanhu nohava kala va fa ovaengeli tava longele Kalunga, opo vehe mu imbe oku ka mona ondjabi. Ovanhu ovo ohava diinine oinima oyo ve wete nohave litangele omadiladilo avo ongaho. 19 Ovanhu va tya ngaho kave na ekwatafano nomutwe, sha hala okutya kave na ekwatafano naau ha pe olutu alishe osho la pumbwa noha kwatakanifa kumwe oilyo aishe yolutu, na Kalunga oha kulike olutu alishe okupitila muye.

20 Omwa fya pamwe naKristus eshi inamu tambula ko omadiladilo ounyuni ou. Ngeenge osho shi li ngaho, omolwashike natango hamu lihumbata mwa fa mu li oshitukulwa shounyuni ou, nohamu diinine oipango ei: 21 “Ino shi kufa po, ino shi makela ile ino shi kuma”? 22 Oinima oyo otai xulu po nosho yo okulongifwa kwayo, noi li oipango nomahongo opanhu. 23 Oipango oyo otai monika ya fa i na ounongo, ndele itai kwafele ovanhu va kondjife omahalo avo opambelela. Osho osho shi li ngaho molwaashi ovanhu ova hoolola vo vene onghedi yavo yokulongela Kalunga, have liningifa va fa ovalininipiki nohava hepeke omalutu avo vene.

3 Shaashi omwa nyumunwa pamwe naKristus, lalakaneneni oinima yomeulu, omo Kristus e li omutumba kolulyo laKalunga. 2 Kaleni hamu yandje elitulemo koinima yomeulu, ndele hakoinima yokombada yedu. 3 Osheshi omwa fya, neemwenyo deni odi li mepashukilo laKristus molwaashi osho oshi li metwokumwe nehalo laKalunga. 4 Ngeenge Kristus, oo e li omwenyo wetu, okwa holola eenghono daye,* nanye otamu ka tumbalekwa pamwe naye.

5 Onghee hano, dipaeni omahalo eni mai opambelela ngaashi oluhaelo,* okuhenoukoshoki, omahalo opamilele a pitilila, okahalu nosho yo olwisho olo tali faafanifwa nokulongela oikalunga. 6 Kalunga ota ka handukila ovanhu ovo hava longo oilonga ya tya ngaho. 7 Nanye omwa li hamu longo oilonga ya tya ngaho.* 8 Ndele paife omu na okweefa po filufilu oinima ngaashi: ehandu, efulakato, owii, omatukano nomashendjo oulai. 9 Inamu lombwelafana oipupulu. Liduleni omunhu mukulu pamwe noilonga yaye, 10 ndele tamu djala omunhu mupe oo a shitululwa a ninge mupe okupitila meshiivo lashili, opo a kale a fa Omushiti waye. 11 Kungaho itapa ka kala vali eyooloko pokati kOmugreka nOmujuda, kaao a pita etanda naao ina pita etanda, komunailongo nOmuskiti* nopokati komupika nomudalwa, osheshi amushe omwa hangana muKristus.

12 Molwaashi omu li ovahoololwa vaKalunga, ovayapuki vaye novana vaye ovaholike, djaleni ohole, olukeno, olune, elininipiko, omwenyo muwa nosho yo onheni. 13 Twikileni okulididimikilafana nokudiminafana po nehalo liwa ngeenge mwa ningafana nai. Ngaashi Jehova he mu dimine po nehalo liwa, nanye yo osho mu na okuninga. 14 Kakele koinima aishe oyo, djaleni ohole molwaashi oyo hai hanganifa ovanhu filufilu.

15 Ombili yaKristus nai pangele momitima deni, osheshi Kalunga okwe mu ifana mu ninge olutu limwe nomu kale mu na ombili. Kaleni yo mu na olupandu. 16 Eendjovo daKristus nadi longe munye pauyadi, opo di mu pe ounongo aushe. Twikileni okuhongafana nokutwaafana omukumo* neendjovo domapsalme, tamu tange Kalunga, tamu imbi nolupandu omaimbilo opamhepo nokwiimbila Jehova momitima deni. 17 Keshe osho tamu popi ile tamu ningi, ashishe shi ningeni okupitila medina lOmwene Jesus, tamu pandula Kalunga Tate okupitila muye.

18 Ovakulukadi, dulikeni kovashamane veni ngaashi sha wapalela Omwene. 19 Ovashamane, kaleni mu hole ovakulukadi veni, ndele inamu ungaunga navo nonyanya.* 20 Ounona, dulikeni kovakulunhu veni moinima aishe, osheshi osho osha wapalela Omwene. 21 Ootate, inamu nyemateka* ovana veni, opo vaha teke omukumo. 22 Ovapiya, dulikeni koovene veni vopanhu* moinima aishe, hangeenge ashike ve mu wete opo mu hafife ovanhu, ndele shi ningeni nomutima aushe nokutila Jehova. 23 Keshe osho tamu longo, shi longeni nomutima aushe ngaashi tamu longele Jehova, ndele havanhu, 24 osheshi omu shi shii kutya otamu ka pewa efyuululo kuJehova li li ondjabi. Longeleni Omwene weni, Kristus. 25 Keshe ou ta longo owii ota ka handukilwa omolwowii oo a longa, osheshi Kalunga ke na okatongo.

4 Oovene, ungaungeni novapiya veni nawa nosho yo pauyuki, molwaashi omu shii kutya nanye omu na Omwene weni e li meulu.

2 Kaleni nokwiilikana nopehe na olufuwo tamu shi ningi nokupandula. 3 Omu tu ilikanena yo opo Kalunga e tu pe omhito tu udife eendjovo daye nosho yo oshiholekwa shiyapuki shi na sha naKristus, osho sha tulifa nge modolongo, 4 nondi udife nawanawa kombinga yasho ngaashi ndi na okuninga.

5 Kaleni hamu ungaunga pandunge naavo vehe fi ovaitaveli; longifeni nawa efimbo leni.* 6 Eendjovo deni nadi kale alushe donghenda, da fingala omongwa, opo mu kale mu shii nghee mu na okunyamukula keshe umwe.

7 Omumwatate omuholike nomupiya mukwetu mOmwene omudiinini, Tikikus, ote ke mu lombwela ashishe kombinga yange. 8 Ohandi mu tumu kunye opo mu shiive nghee hatu shi endifa noku hekeleke omitima deni. 9 Ote uya pamwe naOnesimus, omumwatate omuholike nomudiinini, oo a li ha kala nanye, notave ke mu lombwela ashishe osho tashi ningwa oku.

10 Aristarkus, omukwatwa mukwetu otave mu kundile po vo naMarkus, omupambele waBarnabas (Markus oo oye ou mwa li mwa lombwelwa mu mu tambule ko ngeenge okwe uya kunye). 11 Otamu kundilwa po yo kuJesus oo ha ifanwa Justus, umwe womwaavo va pita etanda. Ava ovo aveke ovalongi pamwe naame omolwOuhamba waKalunga nova hekeleka* nge neenghono. 12 Omupiya waKristus Jesus, Epafras, oo a li ha kala nanye, naye ote mu kundile po. Oha kala alushe te mu ilikanene a mana mo, opo mu kale mwa pama nomwa tomhwa filufilu koinima aishe oyo Kalunga ta ka ninga. 13 Ohandi mu lombwele oshili kutya oha ningi eenghendabala da mana mo omolweni nomolwovamwatate ovo ve li muLaodikea nomuHierapolis.

14 Omuhakuli omuholike Lukas vo naDemas otave mu kundile po. 15 Kundilei po ovamwatate vokuLaodikea nosho yo omumwameme Nimfas neongalo olo hali ongalele meumbo laye. 16 Ngeenge omwa lesha onhumwafo ei, ningeni yo elongekido opo i ka leshwe meongalo laLaodikea, nanye lesheni yo oyo ya dja kuLaodikea. 17 Lombweleni yo Arkippus tamu ti: “Twikila okulonga noudiinini u wanife po oilonga oyo wa pewa kOmwene.”

18 Ame Paulus, ohandi mu tumine omakundo oo nda shanga ame mwene. Dimbulukeni kutya ondi li modolongo. Efilonghenda laKalunga nali kale pamwe nanye.