OVATESSALONIKA VOTETE

1 Ame Paulus, pamwe naSilvanus* naTimoteus, ohatu shangele eongalo laKalunga Tate nolOmwene Jesus Kristus lokuTessalonika:

Ombili nefilonghenda laKalunga nai kale pamwe nanye.

2 Ohatu pandula alushe Kalunga ngeenge hatu mu tumbula amushe momailikano etu, 3 nohatu dimbuluka alushe koshipala shaKalunga Tate yetu oilonga oyo mwa longa omolweitavelo nohole yeni, nanghee mwe lididimikila omaudjuu mahapu omolweteelelo leni mOmwene wetu Jesus Kristus. 4 Ovamwatate, otu shi shii kutya Kalunga oku mu hole nokwe mu hoolola, 5 molwaashi onghundana iwa inamu i uda ashike okupitila meendjovo, ndele omwa kwafelwa yo komhepo iyapuki. Otwa tomhwa filufilu kutya osho twe mu udifila oshoshili, netumwalaka letu ole mu kwafela neenghono. 6 Omwa ninga ovahopaeneni vetu novOmwene eshi mwa tambula ko eendjovo daKalunga nehafo olo hali etifwa komhepo iyapuki, nonande otamu piti meenghalo didjuu. 7 Kungaho omwa tulila po ovaitaveli aveshe vomuMakedonia novomuAkaia oshihopaenenwa.

8 HamuMakedonia ashike nomuAkaia mwa udifila eendjovo daJehova, ndele omoitukulwa aishe, neitavelo leni muKalunga ola udika apeshe, opo tuha kale vali twa pumbwa okupopya sha. 9 Osheshi ova kala tava popi shi na sha nanghee twe mu udifila oshikando shotete nonghee mwa efa po okulongela oikalunga yeni, ndele tamu ningi ovapiya vaKalunga kashili omunamwenyo, 10 nomwa teelela Omona waye ta di meulu oo a nyumuna koufi, sha hala okutya Jesus, oo te ke tu xupifa mehandu laKalunga olo tali uya.

2 Ovamwatate, omu shi shii nawa kutya etalelepo letu ola eta oidjemo iwa. 2 Nonande otwa hangwa opo twa monifwa oixuna nokuningwa nai muFilippi, Kalunga okwe tu pa ouladi,* opo tu dule oku mu udifila onghundana iwa nonande otwa li twa taalela omapataneko mahapu.* 3 Omakumaido oo hatu mu pe inaa puka noitatu a yandje nomalinyengotomheno a puka ile opo ngeno tu mu pukife. 4 Ndele ohatu popi nanye ngaashi ovo twa tulwa po kuKalunga tu mu udifile onghundana iwa. Itatu popi nanye opo tu hafife ovanhu, ndele opo tu hafife Kalunga oo ha konakona omitima.

5 Omu shi shii kutya inatu uya kunye neendjovo domaheka noinatu liningifa twa fa ngeno ovanhu vawa opo tu mone ouwa washa kunye, naasho Kalunga oku shi shii nawa. 6 Nonande otwa li ngeno hatu dulu oku mu twika omutengi mudjuu tu li ovayapostoli vaKristus, inatu konga efimano kovanhu, kutya nee okunye ile okovanhu vamwe. 7 Mepingafano naasho, eshi twa li mokati keni, otwa ungaunga nanye pahole nosho yo nolukeno ngaashi omudalakadi ta file oshisho pahole ovana vaye. 8 Molwaashi otu mu hole neenghono, otwa halelela* oku mu udifila onghundana iwa yaKalunga nokuyamba po eemwenyo detu opo tu mu kwafele.

9 Ovamwatate, omu shii nawa oilonga yetu youdiinini neenghendabala detu da mana mo. Osheshi eshi twe mu udifila onghundana iwa yaKalunga, otwa longa omutenya noufiku tu file oshisho eemhumbwe detu, opo tuha twike nande oumwe womunye omutengi. 10 Ngaashi Kalunga e shi shii, nanye omu shi shii kutya otwa kala ovadiinini, ovayuki notuhe na oshipo mokati keni nye ovaitaveli. 11 Omu shi shii nawa nghee twa kala hatu mu tu omukumo, hatu mu hekeleke noku mu londwela amushe ngaashi xe ha ungaunga novana vaye. 12 Osho otwe shi ninga opo mu twikile okulihumbata monghedi oyo tai wapalele Kalunga, oo e mu ifanena Ouhamba nefimano laye.

13 Ohatu pandula Kalunga tuhe na edimbuko, molwaashi eshi mwa uda eendjovo daye kufye, inamu di tambula ko ngaashi eendjovo dovanhu, ndele ongaashi di li lela eendjovo daKalunga odo tadi longo munye mu li ovaitaveli. 14 Ovamwatate, omwa shikula oshihopaenenwa shomaongalo opaKriste omuJudea, oo e li omaongalo aKalunga, molwaashi omwa hepekwa kovanhu vomoshilongo sheni ngaashi yo navo va hepekwa kOvajuda, 15 ovo va dipaa nokuli Omwene Jesus nosho yo ovaprofeti, nove tu hepeka yo. Shimwe vali, ihava hafifa Kalunga nokave na ko nasha nouwa wavamwe, 16 molwaashi ohava kendabala oku tu kelela tu udifile ovanhu vomoiwana, opo va ka xupifwe. Nokungaho ohava weda ko alushe komanyono avo, na Kalunga okwa li e li poku va handukila.

17 Ovamwatate, diva eshi twa tukaukeni (palutu, ndele hapamadiladilo), otwa li twa ninga eenghendabala tu uye kunye molwaashi otwa li twa halelela oku mu mona.* 18 Onghee hano, otwa li twa hala okuuya kunye, ashike ame Paulus onda kendabala lwoikando ivali, ndele Satana okwa li a tula einda mondjila yetu. 19 Oshike tashi ka kala eteelelo, ehafo nosho yo oshishani osho hatu ka hafela pokukala po kwOmwene Jesus? Hanye mbela? 20 Onye lela tamu ka kala efimano nehafo letu.

3 Molwaashi otwa li twa halelela okuuda kutya otamu shi endifa ngahelipi, otwa diladila okukala muAtena 2 nokutuma kunye omumwatate Timoteus oo e li omupiya waKalunga* nomuudifi wonghundana iwa i na sha naKristus, e mu pameke noku mu hekeleke omolweitavelo leni, 3 opo muha wililwe po* komaudjuu oo. Osheshi omu shi shii kutya itatu dulu okuhenuka omaudjuu a tya ngaho.* 4 Ngaashi mu shi shii, eshi twa li punye, otwa li hatu mu lombwele kutya ohatu ka hangwa komaudjuu, naasho osho tashi ningwa paife. 5 Onghee hano, molwaashi inandi dula vali okuteelela, onda tuma kunye Timoteus opo a lombwele nge kombinga youdiinini weni, nongeenge omwa hongaulwa kOmuhongauli, oilonga yetu oyongaho.

6 Timoteus okwa alukila kufye paife nokwe tu lombwela onghundana iwa i na sha nohole noudiinini weni, nanghee hamu tu dimbuluka alushe nehafo nomwa djuulukwa oku tu mona ngaashi ashike nafye twe mu djuulukwa yo. 7 Onghee hano, ovamwatate, nonande otwa li momaudjuu nokumona oixuna,* otwa hekelekwa omolwoudiinini weni oo mwa ulika. 8 Otwa pamekwa* eshi mwa diinina mOmwene. 9 Ohatu pandula Kalunga molweni, molwaashi omwe tu hafifa neenghono. 10 Ohatu ilikana twa mana mo omutenya noufiku, opo tu mu mone komudidi* notu mu kwafele mu pameke eitavelo leni.

11 Kalunga Tate nOmwene wetu Jesus nave tu kwafele tu uye kunye. 12 Omwene ne mu kwafele yo mu kale mu holafane amushe nohole ya xwama, ngaashi ashike nafye tu mu hole. 13 Kungaho omitima deni otadi ka kala da pama notamu ka kala muhe na oshipo nomwa koshoka koshipala shaKalunga Tate yetu eshi Omwene wetu Jesus ta ka aluka pamwe novayapuki vaye aveshe.

4 Ovamwatate, otwe mu honga nghee mu na okulihumbata monghedi oyo tai hafifa Kalunga, naasho osho tamu ningi. Ndele natango ohatu mu ladipike nohatu mu indile okupitila medina lOmwene Jesus mu twikile okuninga ngaho pauyadi. 2 Osheshi omalombwelo oo twe mu pa okupitila mOmwene Jesus omu a shii.

3 Kalunga okwa hala mu kale ovayapuki nomu likaleke kokule noluhaelo.* 4 Keshe umwe na kale e shii okupangela olutu laye,* opo a kale a koshoka nokwa hokiwa kuKalunga.* 5 Inamu kala ngaashi ovanhu vomoiwana ovo vehe shii Kalunga, va kulika omahalo opamilele a pitilila nove na olwisho. 6 Inapa kala nande oumwe ta longo osho inashi yuka nokuyahameka omumwaxe, molwaashi Jehova ota ka handukila keshe oo ta longo oilonga oyo, ngaashi ashike twe mu lombwela nale notwe mu londwela sha kwata moiti. 7 Osheshi Kalunga ine tu ifanena okuhenoukoshoki, ndele otu kale ovayapuki. 8 Onghee hano, ou ta dini oinima oyo, havanhu ta dini, ndele oKalunga ou e mu pa omhepo yaye iyapuki.

9 Inatu pumbwa oku mu shangela shi na sha nohole youmwainafana molwaashi Kalunga okwe mu honga mu kale mu holafane. 10 Osho osho tamu ningi nale eshi mu hole ovamwatate aveshe vomuMakedonia, ashike ohatu mu ladipike ovamwatate mu twikile okuninga ngaho pauyadi. 11 Kaleni mu na engungumano, inamu lidopa moinima yavamwe, ndele longeni nomake eni ngaashi twe mu lombwela, 12 opo mu kale mu na elihumbato liwa mokati kaavo vehe fi ovaitaveli nomuha kale mwa pumbwa sha.

13 Ovamwatate, otwa hala mu shiive kombinga yoonakufya opo muha nyike unene oluhodi omolwavo mwa fa ovo vehe na eteelelo. 14 Ngeenge otwa itavela kutya Jesus okwa file nokwa nyumunwa, otu na yo eitavelo kutya Kalunga ota ka nyumuna ovo va fya ve li ovashikuli vaJesus, opo va ka kale pamwe naJesus. 15 Otwe mu lombwela metwokumwe neendjovo daJehova kutya ovo va fya otava ka nyumunwa va ye meulu tete kufye ovo hatu ka hangwa momwenyo pokukala po kwOmwene. 16 Osheshi Omwene ota ka ifana okudja meulu nondaka ya kola yomweengeli omukulunhu nonenghuma laKalunga, opo nee ovo va fya ve li ovashikuli vaKristus otava ka nyumuka tete. 17 Lwanima, ovo hatu ka hangwa nomwenyo, ohatu ka twalwa moilemo, opo tu ka kale pamwe naavo va nyumunwa tete notu ka shakeneke Omwene mewangadjo, nohatu ka kala alushe pamwe naye. 18 Onghee hano, kaleni nokuhekelekafana neendjovo odo.

5 Ovamwatate, inamu pumbwa okushangelwa shi na sha nomaufwafimbo.* 2 Osheshi omu shi shii nawa kutya efiku laJehova otali uya naanaa ngaashi ombudi hai uya oufiku. 3 Fimbo tava ti: “Ope na ombili neameno,” ehanauno otali va hange ombadilila ngaashi omufimba ta hangwa kouyahame woshifeta shokudala, noitava ka dula okuya onhapo. 4 Ndele nye ovamwatate, kamu li momulaulu opo efiku olo li mu hange ngeno ombadilila ngaashi ombudi tai hangwa ombadilila kouyelele wetango, 5 osheshi nye amushe ovana vouyelele novomutenya. Fye katu fi ovana voufiku ile vomulaulu.

6 Onghee hano, inatu kaleni twa kofa ngaashi vamwe, ndele natu kaleni oupafi novanaendunge. 7 Osheshi ovo hava kofa, ohava kofa oufiku, naavo hava kolwa, ohave shi ningi oufiku. 8 Ovo hatu ende mouyelele,* natu kaleni ovanaendunge, tu na eitavelo nohole ngaashi omunhu a djala oshipapa shoshivela ponhulo notu na eteelelo lexupifo ngaashi embale. 9 Osheshi Kalunga ine tu hoolola e tu handukile, ndele okwe tu hoolola opo tu xupifwe okupitila mOmwene wetu Jesus Kristus. 10 Jesus okwa fya omolwetu, opo tu ka kale pamwe naye, kutya nee otwa hangwa tu li oupafi ile otwa kofa.* 11 Onghee hano, ngaashi hamu shi ningi, twikileni okutwaafana omukumo* nokutungafana.

12 Ovamwatate, ohatu mu indile mu fimaneke ovo hava longo noudiinini mokati keni, have mu kwatele komesho noku mu kumaida mOmwene. 13 Kaleni yo mu va hole nomwe va lenga omolwoilonga yavo. Kalafaneni nombili. 14 Kakele kaasho, ovamwatate, ohatu mu ladipike mu londwele* ovo vehe na elandulafano, mu hekeleke ovo va polimana,* mu yambidide ovo va nghundipala nokutala onheni aveshe. 15 Inamu alulilafana owii, ndele kaleni alushe hamu ningilafana ouwa nokuningila yo ouwa ovanhu aveshe.

16 Kaleni alushe mwa hafa. 17 Ilikaneni muhe na edimbuko. 18 Kaleni hamu pandula Kalunga moinima aishe. Eshi osho Kalunga a hala ovashikuli vaKristus Jesus va ninge. 19 Inamu kelela omhepo iyapuki i longe munye.* 20 Inamu kala mwa dina ovaprofeti. 21 Konakoneni oinima aishe nokutala eshi shiwa, ndele tamu shi diinine. 22 Kaleni kokule nowii aushe.

23 Kalunga kombili ne mu kwafele mu kale ovayapuki omolwoilonga yaye. Ovamwatate, omhepo, omwenyo nomalutu eni naa kale ehe na oshipo nokwa koshoka fiyo opokukala po kwOmwene wetu Jesus Kristus. 24 Oo e mu ifana ota ka ninga ngaho molwaashi omudiinini.

25 Ovamwatate, twikileni oku tu ilikanena.

26 Kundilei po ovamwatate aveshe nokuxupitafana pahole.

27 Ohandi mu indile nda mana mo medina lOmwene opo onhumwafo ei i leshelwe ovamwatate aveshe.

28 Efilonghenda lOmwene wetu Jesus Kristus nali kale pamwe nanye.