OVATESSALONIKA OVATIVALI

1 Ame Paulus, pamwe naSilvanus* naTimoteus, ohatu shangele eongalo laKalunga Tate nolOmwene Jesus Kristus lokuTessalonika:

2 Efilonghenda nombili yaKalunga Tate noyOmwene Jesus Kristus nai kale pamwe nanye.

3 Ohatu pandula alushe Kalunga omolweni ovamwatate. Osho osha yeleka molwaashi eitavelo leni otali ende tali pame, nohole yeni yokuholafana otai ende tai kulu. 4 Osho oshe tu ningifa tu mu tange momaongalo aKalunga omolweitavelo leni naashi tamu lididimikile omahepeko nomaudjuu* aeshe oo tamu shakeneke.* 5 Osho otashi ulike kutya Kalunga oha tokola pauyuki, noku wete kutya omwa wana okuya mOuhamba waye, oo tamu hepekelwa.

6 Molwaashi Kalunga omuyuki, ota ka handukila ovahepeki veni. 7 Ndele nye ovo tamu hepekwa otamu ka mangululwa pamwe nafye eshi Omwene Jesus ta ka holoka okudja meulu pamwe novaengeli vaye ovanaenghono, 8 e na omundilo wa xwama, nota ka handukila ovo inava shiiva Kalunga nosho yo ovo ihava dulika konghundana iwa i na sha nOmwene wetu Jesus. 9 Omwene ote ke va tokola noku va hanauna po fiyo alushe, opo ehe va mone vali novaha mone vali eenghono daye dinene. 10 Eshi Omwene ta ka tumbalekwa pamwe novayapuki vaye, aveshe ovo ve mu itavela otave ke mu fimaneka. Ndele molwaashi omwa itavela oinima oyo twe mu lombwela, nanye otamu ka kala mokati kavo.

11 Onghee ohatu mu ilikanene alushe nokwiindila Kalunga e mu tale ko mwa wana okumona omwenyo oo e mu ifanena, a wanife po filufilu neenghono daye ouwa aushe oo a hala oku mu ningila noku manife oilonga oyo tamu longo omolweitavelo. 12 Kungaho edina lOmwene wetu Jesus otali ka tumbalekwa omolweni, nanye otamu ka tumbalekwa yo eshi mu na ekwatafano naye omolwefilonghenda laKalunga ketu nolOmwene Jesus Kristus.

2 Ovamwatate, shi na sha nokukala po kwOmwene wetu Jesus Kristus nokwoongelwa kwetu tu ka kale pamwe naye, ohatu mu indile 2 muha ngwangwane ngeenge vamwe tava ti kutya efiku laJehova ole uya. Inamu limbililwa ngeenge tava ti kutya etumwalaka olo ola dja kuKalunga ile kutya ove li lesha monhumwafo ya dja kufye.

3 Inamu pukifwa nande okomunhu molwaashi fimbo efiku olo inali uya, otapa ka holoka tete ovashunimonima opo nee omudinimhango ota ka hololwa. Omunhu a tya ngaho ota ka hanaunwa po. 4 Oku li omutondi nohe linenepeke a kale e dule oikalunga aishe ile oinima oyo hai longelwa* kovanhu, opo a kale ngeno a fa e li motembeli yaKalunga nokuliulika moipafi onga Kalunga. 5 Mbela itamu dimbuluka kutya eshi nda li pamwe nanye onda li handi mu lombwele shi na sha noinima oyo?

6 Omu shi shii kutya oshike tashi imbi a hololwe paife, opo a ka hololwe pefimbo la wapala. 7 Oilonga yowii yomunhu oo otai longwa meholeko, ndele otai kala meholeko fiyo osheshi ou te mu imbi a hololwe ta kala ehe po vali. 8 Opo nee omudinimhango oo ota ka hololwa nota ka hanaunwa po kOmwene Jesus nomufudo womokanya kaye nokuxulifwa po filufilu pefimbo lokukala po kwaJesus.* 9 Ndele omudinimhango oo eshi ta ka holoka, ota ka pewa eenghono kuSatana opo a longe oikumwifilonga ihapu nomadidiliko oipupulu, 10 okuhenouyuki akushe nokupukifa ovo tava ka hanaunwa po. Otava ka hanaunwa po filufilu molwaashi kave hole oshili noinave i tambula ko opo ngeno va ka xupifwe. 11 Nomolwaasho Kalunga a efa va pukifwe komahongo oipupulu nova itavele eendjovo doipupulu, 12 opo aveshe va ka tokolwe molwaashi inava itavela oshili, ndele ova hokwa okuhenouyuki.

13 Ohatu pandula alushe Jehova omolweni ovamwatate ovo mu holike kuye, molwaashi okwe mu hoolola nale, opo e mu xupife eshi e mu yapula nomhepo yaye molwaashi omwa itavela oshili. 14 Okwe mu hoolola mu xupifwe okupitila monghundana iwa oyo hatu mu udifile, opo mu ka tumbalekwe pamwe nOmwene wetu Jesus Kristus. 15 Onghee hano, ovamwatate, kaleni mwa pama nokudiinina oinima oyo mwa hongwa, kutya nee opakanya ile okupitila monhumwafo ya dja kufye. 16 Kalunga Tate yetu, oo e tu hole, okwe tu pa ehekeleko laalushe neteelelo la twa omolwefilonghenda laye. Ohatu indile opo Kalunga nOmwene wetu Jesus Kristus 17 ve mu hekeleke noku mu pameka, opo mu kale alushe hamu popi nohamu longo osho shiwa.

3 Ovamwatate, kaleni hamu tu ilikanene opo eendjovo daJehova di twikile okutandavela meendelelo nodi fimanekwe ngaashi tadi fimanekwa mokati keni. 2 Tu ilikaneneni yo, opo Kalunga e tu amene kovakolokoshi, osheshi havanhu aveshe ve na eitavelo. 3 Ndele molwaashi Omwene omudiinini, ote ke tu pameka noku tu amena komunawii. 4 Tu li ovashikuli vOmwene, otwe lineekela kutya ohamu wanifa po omalombwelo etu notamu ka twikila okuninga ngaho. 5 Ohatu ilikana opo Omwene a twikile oku mu wilika mu kale mu hole Kalunga nomu kale mu na elididimiko olo mwa pumbwa, opo mu dule okushikula Kristus.

6 Ovamwatate, ohatu mu lombwele okupitila medina lOmwene wetu Jesus Kristus, opo muha endafane nomumwatate keshe oo ehe na elandulafano noiha kala metwokumwe nomalombwelo oo twe mu pa.* 7 Osheshi omu shi shii nhumbi mu na oku tu hopaenena, molwaashi otwa kala hatu lihumbata nawa eshi twa li mokati keni 8 noinatu lya oikulya yeni oshali.* Mepingafano naasho, otwa kala hatu longo noshinhwi moipala yetu omutenya noufiku, opo tuha twike nande oumwe womunye omutengi. 9 Nonande otu na oufemba wokupewa oinima, ihatu u longifa, opo tu mu tulile po oshihopaenenwa. 10 Eshi twa li mokati keni, otwa li hatu mu lombwele kutya: “Ou ina hala okulonga ina lya.” 11 Otwa uda kutya mokati keni omu na vamwe vehe na elandulafano, itava longo sha nandenande, ndele otave lidopo moinima yavamwe. 12 Ovanhu va tya ngaho ohatu va lombwele noku va kumaida okupitila mOmwene Jesus Kristus kutya nava longe nengungumano nokulya oikulya oyo va longa vo vene.

13 Ndele nye ovamwatate, inamu sholola okulonga ouwa. 14 Ngeenge ope na umwe ita dulika keendjovo detu edi di li monhumwafo ei, lungameni* omunhu a tya ngaho noinamu endafana naye, opo a fye ohoni. 15 Ashike inamu mu tala ko e li omutondi, ndele twikileni oku mu pukulula e li omumwaxo.

16 Omwene oo ha yandje ombili na twikile oku mu pa ombili moinima aishe, na kale yo pamwe nanye amushe.

17 Ame Paulus, ohandi mu tumine omakundo oo nda shanga ame mwene. Alushe meenhumwafo dange osho handi shange mo ngaho, opo mu shiive kutya aame nde di shanga.

18 Efilonghenda lOmwene wetu Jesus Kristus nali kale pamwe nanye amushe.