TIMOTEUS WOTETE

1 Ame Paulus, omuyapostoli waKristus Jesus palombwelo laKalunga Omuxupifi wetu nolaKristus Jesus, oo okupitila muye tu na eteelelo, 2 ohandi shangele Timoteus* omwiitaveli mukwetu oo e li ngaashi omona wange:

Efilonghenda nombili yaKalunga Tate noyOmwene wetu Jesus Kristus nai kale pamwe naave.

3 Ngaashi ashike nda li nde ku ladipika u kale muEfeso eshi nda li pokuya kuMakedonia, paife ohandi ku indile u kumaide oohandimwe vaha tandavelife omahongo oipupulu, 4 novaha pwilikine komahokololo oipupulu nokeendjokonona di na sha nomapata. Oinima ya tya ngaho inai fimana, ndele ohai twala meenghundafana dihe na ekwafo lasha, ponhele yokukundafana oinima oyo va pewa kuKalunga i pameke eitavelo lavo. 5 Eshi nda yandja elombwelo olo,* onda hala tu kaleni tu na ohole yashili tai di komutima, eliudo liwa nosho yo eitavelo lashili. 6 Vamwe ova efa po oinima oyo, nove lininga ovapopi voinima yongaho. 7 Ova hala okukala ovahongimhango, ashike kave udite ko oinima oyo tava popi notava komangele.

8 Otu shi shii kutya Omhango oiwa ngeenge oya tulwa nawa* moilonga. 9 Ashike otu shi shii yo kutya omhango inai nuninwa ovayuki, ndele oya nuninwa ovadinimhango novanashibofa, ovahenakalunga novalunde, ovo vehe fi ovadiinini,* ovo ve tonde osho shiyapuki, ovadipai vooxe novadipai vooina, ovadipai vovanhu, 10 ovahaeli,* ovahaeli vomashenge,* ovo hava kwata po ovanhu ombabyona, ovanaipupulu, ovaani voipupulu, naashishe osho shi li omhinge nomahongo a yuka* 11 oo e li metwokumwe nonghundana iwa oyo nde lineekelelwa, oyo ya dja kuKalunga oo ha kala alushe a hafa.

12 Ohandi pandula Omwene wetu Kristus Jesus, oo a pa nge eenghono nokwa pa nge oshilonga shiyapuki molwaashi okwa tala nge ko ndi li omudiinini 13 nonande nale onda li omusheki, omuhepeki woshiwana shaKalunga nomuhayavala. Ashike onda li nda filwa onghenda molwaashi kanda li ndi shii osho handi ningi nokanda li ndi na eitavelo. 14 Omwene wetu okwa ulikila nge efilonghenda linene nondi na eitavelo nohole molwaashi ondi li omuhongwa waKristus Jesus. 15 Eendjovo edi odoshili nohatu dulu oku di lineekela filufilu, odo tadi ti: Kristus Jesus okwe uya mounyuni opo a xupife ovalunde. Naame, aame omulunde a shiya ko. 16 Ndele nande ongaho, onda filwa onghenda opo Kristus Jesus a ulike okupitila mwaame ou ndi li omulunde a shiya ko kutya oku na onheni filufilu, nondi kale oshihopaenenwa kwaaveshe ovo ve mu itavela opo va ka mone omwenyo waalushe.

17 Ndele Kalunga aeke, oo iha xulu po noiha monika, Ohamba yaalushe, na fimanekwe nokutumbalekwa fiyo alushe. Amen.

18 Omumwange Timoteus, ohandi ku pe omalombwelo oo e li metwokumwe neendjovo odo da popiwa nale kovaprofeti di na sha naave, notadi ku kwafele u twikile okukondja ekondjo liwa, 19 nou diinine eitavelo neliudo liwa olo la ekelwashi kuvamwe, naasho osha nyona po eitavelo lavo ngaashi oshikepa ya teka. 20 Vamwe vomuvo oHimeneus naAleksander, nonde va yandja momake aSatana, opo va mone outekuduliko vaha sheke vali.

2 Tetetete ohandi mu ladipike mu ilikanene ovanhu aveshe mwa mana mo, tamu pandula Kalunga nokupula ekwafo kuye. 2 Ilikaneneni yo eehamba novapangeli aveshe,* opo tu dule okulongela Kalunga nomutima aushe tu na engungumano nombili. 3 Osho osha yuka nosha wapalela Kalunga Omuxupifi wetu, 4 oo a hala ovanhu vomaludi aeshe va xupifwe nova shiive nawa oshili. 5 Osheshi ope na ashike Kalunga umwe aeke, nopokati kaKalunga novanhu ope na omupokati umwe, Kristus Jesus, 6 oo e liyandja a ninge oikulila ya yeleka okukulila aveshe;* ovanhu otava ka hepaulula kombinga yoshinima osho pefimbo la wapala. 7 Nomolwaasho Kalunga a hoolola nge ndi udife nondi ninge omuyapostoli, opo ndi dule okuhonga oshili ovo vehe fi Ovajuda va kale ve na eitavelo. Eshi handi popi oshoshili; itandi fufya.

8 Onghee hano, onda hala ovalumenhu keshe pamwe va twikile okwiilikana noudiinini va yelula omake avo pombada, vehe na ehandu neemhata. 9 Mepingafano naasho, ovakainhu ove na okudjala monghedi yefimaneko, oikutu tai wapalele* noi li pandjele, hakupandwa monghedi ya kitakana, ile okudjala oikutu yondilo ile oinima ya longwa moingoli noumanya vondilo, 10 ndele ove na okuliwapeka monghedi oyo tai ulike kutya ovatilikalunga, nokulonga oilonga iwa.

11 Omukainhu na kale a mwena* nokudulika filufilu ngeenge ta hongwa. 12 Omukainhu ina pitikwa a honge ile a pangele omulumenhu, ndele oku na okukala a mwena.* 13 Osheshi Adam oye a shitwa tete, opo nee taku shikula Eva. 14 Shikwao vali, Adam ina pukifwa, ashike omukainhu oye a pukifwa filufilu, ndele ta nyono. 15 Omukainhu ota ka kala a amenwa ngeenge okwa kala e lipyakidila nokufila oshisho ovana vaye, e* na eitavelo, ohole, a koshoka koshipala shaKalunga noku na eendunge dokuyoolola.

3 Eendjovo edi odi shii okulineekelwa, edi tadi ti: Ngeenge ope na ou ta lalakanene okuninga omukulunhuongalo, okwe lihalela oshilonga shiwa. 2 Omukulunhuongalo oku na okukala e na elihumbato liwa, omushamane e na omukulukadi umwe, e na ondjele, eendunge,* elandulafano, e shii okuyakula ovaenda, e shii okuhonga, 3 ke na okukala ongholwe, omukwanyanya, e hole okutanguna ile e na olwisho loimaliwa, ndele oku na okukala e na ondjele, 4 omulumenhu ha file oshisho* ovaneumbo laye, e na ounona hava dulika nove na elihumbato liwa. 5 (Osheshi ngeenge omulumenhu ita dulu okufila oshisho* ovaneumbo laye, ongahelipi ta ka dula okufila oshisho eongalo laKalunga?) 6 Ke na okukala opo a ningi omwiitaveli, opo aha kwatwe kounhwa, ndele ta tokolwa ngaashi Ondiaboli. 7 Oku na yo okukala ha popilwa mouwa* kwaavo vehe fi ovaitaveli, opo aha shekwe kovanhu nokuwila momwiyo wOndiaboli.

8 Ovayakuliongalo nava kale ve shii okulineekelwa, vehe na eendaka mbali,* kave na okukala hava nu oikolwifa sha pitilila, vehe fi ovanalwisho voimaliwa noihava kongo ouwa wavo vene, 9 ndele ove na okudiinina eitavelo olo li li oshiholekwa shiyapuki shaKalunga ve na eliudo la koshoka.

10 Kakele kaasho, nava talike tete ngeenge ova wana okuyakula, nongeenge ova wana, nava ninge ovayakuliongalo molwaashi ove na elihumbato liwa.

11 Ovakainhu navo nava kale ve shii okulineekelwa, havalundili, ndele nava kale ve na ondjele novadiinini moinima aishe.

12 Omuyakuliongalo oku na okukala omushamane e na omukulukadi umwe, e shii okufila oshisho nawa ovana novaneumbo laye aveshe. 13 Osheshi ovalumenhu ovo tava yakula nawa otave liningile edina liwa notava kala ve na emanguluko lokupopya shi na sha neitavelo lavo muKristus Jesus.

14 Ohandi mu shangele kombinga yoinima ei nonande onda diladila okuuya kunye diva, 15 ndele ngeenge onda kala inandi uya, omu shii nghee mu na okukala meumbo laKalunga, sha hala okutya meongalo laKalunga omunamwenyo, olo tali yambidida nokupopila oshili. 16 Oshiholekwa shiyapuki shi na sha netilokalunga sha fimanenena osheshi: ‘Jesus okwa li a ninga omunhu wopambelela, naashi a ninga vali omunhu wopamhepo, Kalunga okwe mu tala ko omuyuki, a holoka moipafi yovaengeli, a udifilwa oiwana, a itavelwa kovanhu mounyuni, a ya meulu nokwa tumbalekwa.’

4 Eendjovo da nwefwa mo* oda popya sha yela kutya monakwiiwa ovanhu vamwe otava ka efa po eitavelo notava ka pwilikina keendjovo doipupulu* odo tadi monika da fa da dja kuKalunga notava ka pwilikina komahongo eendemoni. 2 Otava ka pwilikina yo komapopyo oipupulu ovalumenhu ovanaihelele, ovo va dipaa eliudo lavo la fa la xwikwa noshixwikifo. 3 Ovalumenhu ovo ohava kelele ovanhu vaha hombole nohave va lombwele ve lidilike oikulya nonande Kalunga okwe i shita, opo i liwe nolupandu kwaavo ve na eitavelo nove shii nawanawa oshili. 4 Keshe osho Kalunga a shita oshiwa, nokape na osho tashi dulu okweekelwashi ngeenge osha tambulwa ko nolupandu, 5 osheshi osha yapulwa okupitila meendjovo daKalunga nokeilikano.

6 Ngeenge owa kala ho yandje omayele oo kovamwatate, oto ka kala omuyakuli muwa waKristus Jesus, wa palulwa keendjovo doshili* nokomahongo a yuka oo ho tula moilonga filufilu. 7 Henuka omahokololo oipupulu neendjovo domasheko, ngaashi odo hadi popiwa kovakainhu vamwe ovanamido. Ndele lideula okukala u na etilokalunga. 8 Edeulo lopalutu oli na ekwafo linini, ndele okulideula metilokalunga otaku kwafele moinima aishe molwaashi otaku eta omanangeko noupuna monghalamwenyo paife nosho yo monakwiiwa. 9 Eendjovo odo odoshili nohatu dulu oku di lineekela filufilu. 10 Nomolwaasho hatu longo noudiinini nohatu kendabala twa mana mo molwaashi otwe lineekela muKalunga omunamwenyo, Omuxupifi wovanhu vomaludi aeshe, unene tuu ovo ve li ovadiinini.

11 Kala ho va pe omalombwelo oo noku va honga. 12 Ino efa nande oumwe a kale e ku dina eshi u li omunyasha. Ndele tulila po ovadiinini oshihopaenenwa shiwa ngeenge tashi uya pokupopya, elihumbato, ohole, eitavelo nosho yo oukoshoki. 13 Twikila okukala ho lesha moipafi nelitulemo, okukumaida* nokuhonga fiyo osheshi handi uya. 14 Ino hepifa oshali oyo wa pewa eshi ovakulunhuongalo ve ku tenheka omake avo, oyo wa xunganekelwa kovaprofeti. 15 Dilonga kombinga yoinima oyo noku i diinina, opo exumokomesho loye li monike filufilu kovanhu aveshe. 16 Lipashukila ove mwene nosho yo ehongo loye. Kendabala okuwanifa po oinima oyo, molwaashi ngeenge owa ningi ngaho, oto lixupifa ove mwene nosho yo ovo tave ku pwilikine.

5 Ino hanyena unene omulumenhu omukulunhu, ndele popya naye ngaashi to popi naxo, ovalumenhu ovanyasha ongaashi ovamwanyoko ovamati, 2 ovakainhu ovakulunhu ongaashi oonyoko, novakainhu ovanyasha ongaashi ovamwanyoko oukadona; kala we va fimaneka neenghono.

3 Kala wa fimaneka* ovafiyekadi ovo va pumbwa lela ekwafo.* 4 Ngeenge omufiyekadi oku na ovana ile ovatekulu, nava ulike kutya ove na etilokalunga mokufila oshisho tete ovaneumbo lavo, nokuyandja kovadali nosho yo kooxekulu nokooinakulu osho ve na okuyandja, osheshi osho otashi wapalele Kalunga. 5 Ndele omufiyekadi ou e na omhumbwe nokwa fiwa po hamakasha oha kala e lineekela muKalunga noha indile alushe nokwiilikana omutenya noufiku. 6 Omufiyekadi ou ta lalakanene okuwanifa po omahalo* aye okwa fya pamhepo nonande oku na omwenyo. 7 Twikila oku va pa omalombwelo aa,* opo paha kale nande oumwe te va sheke. 8 Ngeenge ope na ou iha file oshisho ovakwao, unene tuu ava vambulaye, ote lidimbike eitavelo, nomunhu a tya ngaho oku dulike kwaao ehe na eitavelo.

9 Omufiyekadi oo e na okutulwa momusholondodo wovafiyekadi ovo va pumbwa ekwafo oku na okukala e na omido di dulife 60, a li e na omushamane umwe, 10 e li oshihopaenenwa shoilonga iwa, a tekula nawa ovana vaye, a li ha yakula ovaenda, a li ha kosho eemhadi dovayapuki, a li ha kwafele ovafininikwa nokwa li ha longo noudiinini oilonga keshe iwa.

11 Kakele kaasho, inamu tula momusholondodo ovafiyekadi ovanyasha, osheshi ngeenge omahalo avo opamilele tae va imbi okulongela Kristus, otava ka kala va hala okuhombolwa. 12 Osho otashi ke va ningifa va kale ve na ondjo molwaashi inava wanifa po eudaneko lavo lotete. 13 Shimwe vali, otashi dulika va kale ve na ondede nokukala tava endaenda nomaumbo, handede ashike, ndele otashi dulika va kale tava ambe vakwao, tave lidopo moinima yavamwe nokupopya oinima oyo inai va pamba. 14 Onghee hano, onda hala ovafiyekadi ovanyasha va hombolwe, va dale ounona nova file oshisho ovaneumbo lavo, opo vaha yandje omhito kovapataneki ve tu sheke. 15 Ashike ovafiyekadi vamwe ova efa po nale oshili, ndele tava shikula Satana. 16 Ngeenge ope na omukainhu omwiitaveli e na ovapambele ovafiyekadi, ne va kwafele opo shiha kale omutengi keongalo. Opo nee eongalo otali dulu okukwafela ovafiyekadi ovo ve na lela omhumbwe.*

17 Ovakulunhuongalo ovo hava kwatele komesho ova wana okufimanekwa filufilu, unene tuu ovo hava longo noudiinini mokupopya nomokuhonga. 18 Osheshi omushangwa owa ti: “Ino manga ongobe komulungu ngeenge tai xu oilya.” Shimwe vali, “Omunailonga okwa wana okupewa ondjabi yaye.” 19 Ino tambula ko eendjovo daao ta hokololifa omulumenhu omunamido,* okuninga pe na eembangi mbali ile nhatu. 20 Pukulula moipafi ovo tava nyono, opo shi kale elondwelo kwaaveshe.* 21 Ohandi ku anifa koshipala shaKalunga, shaKristus Jesus noshovaengeli ovayapuki,* u diinine omalombwelo aa nouha tongole ile u ninge omatokolo ofimbo ino konakona oinima aishe.

22 Ino nangeka po diva omulumenhu.* Ino kufa ombinga momanyono avamwe, ndele kala wa koshoka.

23 Ino nwa vali omeva aeke, ndele kala yo ho nu omaviinyu manini omolwoupyakadi woye womedimo nomolwouvela oo hau ku hange efimbo nefimbo.

24 Omanyono ovanhu vamwe oku li poluhaela, novanhu va tya ngaho otava tokolwa diva, ndele avamwe otaa ka hololwa lwanima. 25 Sha faafana, oilonga iwa oi liwetikile kukeshe umwe, naayo ihe wetike otai ka hololwa.

6 Ovapiya nava kale va fimaneka neenghono oovene vavo, opo edina laKalunga nomahongo aye aha shekwe. 2 Ovo ve na oovene ve li ovaitaveli inave va dina molwaashi ve li ovamwaxe. Ndele ove na okulonga noudiinini molwaashi ovaitaveli vakwao ovo ve li ovamwaxe ovaholike ovo tava mono ouwa moilonga yavo iwa.

Twikila oku va honga oinima ei noku va kumaida. 3 Ngeenge ope na ou ta tandavelifa omahongo oipupulu noitatu kumwe nomalombwelo a yuka,* oo a dja kOmwene wetu Jesus Kristus nosho yo nomahongo oo e li metwokumwe netilokalunga, 4 ote linenepeke noke na eudeko lasha. Oku hole unene eemhata nosho yo eenhamanana di na sha noitya. Oinima ya tya ngaho ohai ningifa ovanhu va kale ve na ondubo, ve hole omashilafano, hava popile mowii vakwao noinave lineekelafana. 5 Osho osha ningifa ovo ve na omadiladilo mai nova efa po oshili va diladile kutya etilokalunga otali va etele ouwa. 6 Oshoshili kutya etilokalunga otali etele omunhu ouwa muhapu ngeenge okwa wanenwa kwaasho e na. 7 Osheshi mounyuni inatu eta mo sha noitatu di mo na sha. 8 Onghee hano, ngeenge otu na oikulya* noikutu,* natu kale twa wanenwa koinima oyo.

9 Ndele ovo va hala okupunapala otava wile momwiyo notava hangwa komayeleko, komadiladilo nokomahalo mai oo tae va twala mehanauno. 10 Osheshi olwisho loimaliwa olo efina lowii aushe, naavo va hala okupunapala ova efa po eitavelo lavo nove lietela omaudjuu mahapu.

11 U li omupiya waKalunga, inda onhapo oinima oyo. Ndele lalakanena ouyuki, etilokalunga, eitavelo, ohole, elididimiko nomwenyo muwa. 12 Kondja ekondjo liwa leitavelo; diinina omwenyo waalushe oo wa ifanenwa nowa udifa kombinga yao moipafi yovanhu vahapu.

13 Ohandi ku lombwele koshipala shaKalunga ou oinima aishe i na omwenyo omolwaye noshaKristus Jesus ou a yandja oundombwedi koshipala shaPontius Pilatus, 14 u dulike koipango nou kale uhe na oshipo nowa koshoka fiyo opokuhololwa kwOmwene wetu Jesus Kristus, 15 oo e na alushe ehafo noye aeke Omupangeli e na eenghono, oo ta ka holola eenghono daye peufwafimbo. Oku li Ohamba yeehamba adishe nOmwene woovene aveshe. 16 Oye aeke ita dulu okufya,* noha kala mouyelele omo itamu dulu okwiiwa, nokape na oo a mona mo ile ta dulu okumona mo. Oye a wana okufimanekwa nokupewa eenghonopangelo daalushe. Amen.

17 Kunghilila oipuna yomounyuni ou* ihe linenepeke,* iha tule elineekelo layo moinima oyo tai xulu po, ndele nai lineekele Kalunga, oo he tu pe pauyadi oinima aishe oyo hatu hafele. 18 I lombwela i ninge oipuna yoilonga iwa, i kale hai longo ouwa, hai yandje, hai tukulilafana navakwao 19 noi lituvikilile emona li kale ekanghameno liwa lonakwiiwa, opo i diinine omwenyo washili.

20 Timoteus, pashukila osho we lineekelelwa, henuka eendjovo dongaho odo itadi fimanekifa Kalunga notadi di kwaavo ve litala ko ve na eshiivo, ashike eshiivo lavo otali kondjifa oshili. 21 Vamwe ovo have litangele eshiivo la tya ngaho, ova efa po eitavelo.

Efilonghenda laKalunga nali kale pamwe nanye.