TIMOTEUS OMUTIVALI

1 Ame Paulus, omuyapostoli waKristus Jesus pahalo laKalunga nometwokumwe nomwenyo oo twa udanekelwa okupitila muKristus Jesus, 2 ohandi shangele omumwange omuholike Timoteus:

Efilonghenda nombili yaKalunga Tate noyOmwene wetu Kristus Jesus nai kale pamwe naave.

3 Ohandi pandula unene Kalunga, ou handi longele oilonga iyapuki ngaashi ootatekulululwa va li hava ningi, ndi na eliudo la koshoka noihandi dimbwa oku ku tumbula momaindilo ange omutenya noufiku. 4 Ngeenge handi dimbuluka omahodi oye, ohashi ningifa nge ndi kale nda halelela oku ku mona, opo ndi kale nda hafa neenghono. 5 Osheshi ohandi dimbuluka eitavelo loye lihe na oihelele, olo nyokokulu Loide nanyoko Eunike ve na, nonde lineekela kutya natango ou li na.

6 Onghee ohandi ku dimbulukifa u kale wa xwama ngaashi omundilo eshi to longifa oshali oyo wa pewa kuKalunga eshi nde ku tenheka omake. 7 Osheshi Kalunga ine tu pa omhepo youmbada, ndele oyeenghono, yohole noyeendunge dokuyoolola. 8 Onghee ino fya ohoni okuudifa kombinga yOmwene wetu ile u fye nge ohoni eshi ndi li modolongo omolwaye, ndele lididimikila omaudjuu omolwonghundana iwa nokukala we lineekela meenghono daKalunga. 9 Okwe tu xupifa nokwe tu ifana tu kale ovayapuki, hamolwoilonga yetu, ndele omolwefilonghenda nomolwelalakano laye. Okwe tu ulikila nalenale efilonghenda laye okupitila muKristus Jesus. 10 Ashike paife oli liwetikile nawanawa okupitila mokuhololwa kwOmuxupifi wetu, Kristus Jesus, oo a xulifa po efyo nokwe tu hololela nghee hatu dulu okukala nomwenyo nosho yo nomalutu ihaa xulu po okupitila monghundana iwa, 11 oyo nda nangekwa po ndi kale omuudifi, omuyapostoli nomuhongi wayo.

12 Ohandi mono oixuna omolwoilonga oyo handi longo, ndele inandi fya ohoni. Osheshi Kalunga oo nda itavela ondi mu shii nonde lineekela kutya ota dulu okupashukila oinima aishe oyo nde mu lineekelela fiyo okefiku letokolo. 13 Diinina oshihopaenenwa shi na sha neendjovo diwa* odo wa uda kwaame, nokuulika ohole neitavelo olo u na eshi u na ekwatafano naKristus Jesus. 14 Pashukila emona olo we lineekelelwa okupitila momhepo iyapuki, oyo i li mufye.

15 Ou shi shii kutya ovanhu aveshe moshitukulwa shaAsia ova amuka ko kwaame, mwa kwatelwa Figelus naHermogenes. 16 Omwene na file onghenda ovaneumbo laOnesiforus, osheshi okwa kala ha hekeleke nge alushe, noina fya nge ohoni eshi ndi li modolongo. 17 Kakele kaasho, eshi a li muRoma, okwa li a konga nge noudiinini fiyo osheshi a mona nge. 18 Omwene Jehova ne mu file onghenda mefiku letokolo. Ou shii oilonga aishe oyo a longela nge muEfeso.

2 Omumwange, lipameka mefilonghenda olo wa ulikilwa kuKristus Jesus, 2 noinima oyo wa uda kwaame noya kolekwa keembangi dihapu i lineekelela ovalumenhu ovadiinini ovo va wana filufilu okuhonga vakwao. 3 U li omukwaita muwa waKristus Jesus, lididimikila omaudjuu. 4 Omukwaita ita dulu okulonga vali oilonga imwe i lili* opo a mone ouxupilo, molwaashi okwa hala okuhafifa ou e mu pa oilonga youkwaita. 5 Sha faafana, hakeshe ou ha kufa ombinga momaudano ha pewa oshishani, kakele ngeenge a dulika keemhango domaudano. 6 Omunamapya oo ha longo noudiinini oye e na okulya tete oilikolomwa yomepya laye. 7 Kala ho diladila moule kombinga yaashi handi ku lombwele; Omwene ote ke ku kwafela u ude ko oinima aishe.

8 Dimbuluka kutya Jesus Kristus okwa nyumunwa koufi nokwa dja moludalo laDavid,* naasho oshi li metwokumwe nonghundana iwa oyo handi udifa, 9 oyo handi hepekelwa noya tulifa nge modolongo onga omukolokoshi. Ashike nande ongaho, kape na ou ta dulu okuya moshipala eendjovo daKalunga. 10 Onghee ohandi lididimikile oinima aishe omolwovahoololwa, opo navo va ka xupifwe okupitila muKristus Jesus, nova ka mone efimano laalushe. 11 Eendjovo edi odi shii okulineekelwa edi tadi ti: Ngeenge otwa fya pamwe naye, ohatu ka kala yo nomwenyo pamwe naye; 12 ngeenge otwa twikile okulididimika, ohatu ka pangela pamwe naye tu li eehamba; ngeenge otwe mu lidimbike, naye ote ke tu lidimbika; 13 ngeenge otwa kala tuhe fi ovadiinini, ye ota kala omudiinini, osheshi iha longo osho shi li omhinge nomaukwatya aye nonelalakano laye.

14 Twikila oku va dimbulukifa kombinga yoinima oyo, noku va lombwela* koshipala shaKalunga vaha twe eemhata di na sha noitya, odo dihe na ekwafo lasha nohadi nyono po eitavelo laavo tave di pwilikine. 15 Longa noudiinini opo u kale wa hokiwa kuKalunga, u kale omunailonga ita fi ohoni oshilonga shaye, u shii okuyelifa nawa eendjovo doshili. 16 Kala yo kokule naavo hava popi eendjovo dongaho odo itadi fimanekifa Kalunga, osheshi otadi ku ehenifa kokule naye, 17 molwaashi eendjovo davo ohadi tandavele ngaashi oshipute tashi hoko. Vamwe vomuvo ongaashi Himeneus naFiletus. 18 Ovalumenhu ovo ova efa po oshili, tava ti kutya enyumuko ola ningwa nale, notava nyono po eitavelo lavamwe. 19 Kalunga okwa dika po ekanghameno la kola notali kala la pama, li na eshangelo tali ti: “Jehova ovo vaye oku va shii,” nosho yo “Keshe ou ta ifana edina Jehova na efe po okulonga owii.”

20 Meumbo la kula ihamu kala ashike oikwatelwa yoingoli noyoisilveri, ndele ohamu kala yo yoiti noyedu; imwe ohai kwatelwa oinima oyo ya fimana ofimbo imwe oyoyo inai fimana. 21 Keshe ou te likaleke kokule noikwatelwa yoinima oyo inai fimana ota kala ngaashi oikwatelwa yoinima ya fimana, ta yapulwa nota kala oshikwatelwa shiwa komwene waye nokukala a wana okulonga oshilonga keshe shiwa. 22 Onghee hano, inda onhapo okahalu kounyasha, ndele to lalakanene ouyuki, eitavelo, ohole nombili, pamwe naavo hava ifana edina lOmwene nomutima wa yela.

23 Shimwe vali, henuka eemhata dongaho noda nyika oulai, molwaashi ou shi shii kutya ohadi eta omalwoodi. 24 Osheshi omupiya wOmwene ke na okulwa, ndele okwa pumbwa okukala e na onghenda* novanhu aveshe, a wana okuhonga, iha shunifile vamwe owii 25 noha popi nomwenyo muwa naavo vehe hole okutambula ko omapukululo. Kalunga otashi dulika e ke va pe omhito ve lidilulule* nova shiive nawa oshili, 26 ndele tava ka mona kutya ova li va kwatwa ko nomwenyo kOndiaboli va longe ehalo layo, opo nee otava ka manguluka mo momwiyo wayo.

3 Kala u shi shii kutya momafiku axuuninwa otapa ka kala omafimbo madjuu okukaliwa muo. 2 Osheshi ovanhu otava ka kala ve lihole vo vene, ovanalwisho voimaliwa, ovalitangi, ovalinenepeki, ovasheki, ihava dulika kovadali, vehe shii okupandula, vehe fi ovadiinini, 3 vehe na ohole, vehe na elongelokumwe, ovalundili, vehe na elipangelo, ovakwanyanya, ovatondi vouwa, 4 ovakengeleledi, ve na omitwe dikukutu,* ve na ounhwa, ve hole omalihafifo ponhele yokuhola Kalunga, 5 have limonikifa va fa ovatilikalunga, ndele ihava kala metwokumwe nonghedi omo Kalunga a hala okulongelwa; ovanhu va tya ngaho va kala kokule. 6 Mokati kovanhu ovo otamu ka dja ovalumenhu ovapukifi ovo tave ke livakela momaumbo ovakainhu ovo va nghundipala nova pikwa koulunde nokomahalo e lili noku lili, ndele tava yulu omitima davo. 7 Nonande ovanhu ovo alushe ohave lihongo, ihava kala ve udite ko nandenande oshili.

8 Ndele ngaashi Jannes naJambres va li omhinge naMoses, ovanhu ovo navo ove li omhinge noshili. Ovanhu va tya ngaho ove na omadiladilo mai, na Kalunga ine va hokwa molwaashi kave na eitavelo. 9 Kakele kaasho, itava ka ninga exumokomesho molwaashi oulai wavo otau ka kala u liwetikile kwaaveshe, ngaashi wovalumenhu ovo vavali. 10 Ndele ove owa landula filufilu ehongo lange, eenghedi dange, elalakano, eitavelo, onheni, ohole nelididimiko lange. 11 Kakele kaasho, ou shii nghee nda li handi hepekwa nokumona oixuna muAntiokia, muIkonium nomuListra. Ashike onde lididimikila omahepeko oo, nOmwene okwa xupifa nge mo muo aeshe. 12 Aveshe ovo va hala okulongela Kalunga ve li ovahongwa vaKristus Jesus navo otava ka hepekwa. 13 Ovakolokoshi novapukifi otava ka xuma komesho mokulonga owii, notava ka pukifwa nokupukifa ovanhu vakwao.

14 Ndele ove diinina oinima oyo we lihonga nowa tomhwa u itavele, osheshi ou shii ou e i ku honga 15 nou shii omishangwa diyapuki okdja kounona, odo tadi ku kwafele u kale u na eendunge opo u dule okuxupifwa omolweitavelo loye muKristus Jesus. 16 Omishangwa adishe oda nwefwa mo kuKalunga, notadi dulu okuhonga, okupukulula, okuyukifa oinima nokutekula mouyuki, 17 opo omupiya waKalunga a kale a wana okulonga filufilu oshilonga keshe shiwa.

4 Ohandi ku anifa koshipala shaKalunga noshaKristus Jesus, oo ta ka tokola ovanamwenyo novafi pokuhololwa kwaye naashi ta ka pangela mOuhamba waye: 2 Udifa eendjovo daKalunga nopehe na okwoongaonga momafimbo mawa nomomafimbo madjuu; pukulula, kunghilila nokukumaida nonheni ngaashi omuhongi muwa. 3 Osheshi otapa ka kala efimbo olo eshi ovanhu itava ka pwilikina vali komahongo a yuka,* ndele omolwomahalo avo, otave ke likongela ovahongi ovo tava hongo oinima oyo tai nyuwifa omatwi avo.* 4 Otava ka efa po okupwilikina koshili notava ka pwilikina komahokololo oipupulu. 5 Ndele ove kala omunaendunge moinima aishe, lididimikila omaudjuu, kala to udifa onghundana iwa* nokuwanifa po nawanawa oilonga yaKalunga.

6 Ohandi tilwashi nale ngaashi oshikunwayambo nonda hala okumangululwa diva ndi ka kale pamwe naKristus. 7 Onda kondja ekondjo liwa, nda tondoka fiyo okefikilo mefiyafano, sha hala okutya nda diinina eitavelo lange. 8 Paife Omwene oo ha tokola pauyuki okwa tuvikilila nge oshishani shouyuki, osho ta ka pa nge mefiku letokolo shi li onga ondjabi. Haame andike handi ke shi pewa, ndele otashi ka pewa aveshe ovo va teelela nodjuulufi okuhololwa kwaye.

9 Ninga eenghendabala u uye kwaame diva. 10 Osheshi Demas, molwaashi oku hole ounyuni ou,* okwa fiya nge po a ya kuTessalonika, ofimbo Kreskens a ya kuGalatia, naTitus okwa ya kuDalmatia. 11 Ondi li po ashike naLukas. Onghee hano, ila pamwe naMarkus, opo e uye a kwafele nge moilonga yange oyo handi longele Kalunga. 12 Tikikus onde mu tuma kuEfeso. 13 Eshi to uya, etelela ondjafa yange nde i fiile meumbo laKarpus muTroas, nosho yo omishangwatonywa, unene tuu odo da longwa moshipa.*

14 Aleksander, omuhambwidi wongopolo, okwa yahameka nge unene. Jehova ote ke mu alulila shi fike poilonga yaye. 15 Naave yo mu lungamena, osheshi oku li omhinge filufilu netumwalaka letu.

16 Eshi nda li handi lipopile oshikando shotete koshipala shovapangeli, kapa li nande oumwe a popila nge, aveshe ova li va fiya nge po. Ohandi indile opo Kalunga ehe va shunifile owii wavo. 17 Ndele Omwene okwa kwafela nge nokwa pa nge eenghono opo etumwalaka li udifwe nawanawa okupitila mwaame noli udike koiwana aishe, nokwa li a xupifa nge mokanya konghoshi. 18 Omwene ota ka xupifa nge kowii aushe nokwaamena nge fiyo a twala nge mOuhamba waye womeulu. Onghee okwa wana okufimanekwa fiyo alushe. Amen.

19 Kundila po Priskila naAkwila nosho yo ovaneumbo vaOnesiforus.

20 Erastus oku li muKorinto, ofimbo Trofimus nde mu fiya muMileto ta vele. 21 Ninga eenghendabala u uye fimbo okufu inaku uya.

Oto kundilwa po kuEubulus, kuPudens, kuLinus, kuKlaudia nokovamwatate aveshe.

22 Omwene na kale pamwe naave omolwomhepo yoye iwa. Efilonghenda laye nali kale pamwe nanye.