ONHUMWAFO YA SHANGELWA TITUS

1 Ame Paulus, omupiya waKalunga nomuyapostoli waJesus Kristus metwokumwe neitavelo lovahoololwa vaKalunga nosho yo neshiivo lomoule loshili i na sha netilokalunga 2 nola kanghamena keteelelo lomwenyo waalushe oo wa udanekwa nalenale kuKalunga oo iha fufya 3 nokwa shiivifa eendjovo daye peufwafimbo laye eshi a nangeka nge po ndi udife onghundana iwa palombwelo laye e li Omuxupifi wetu, 4 ohandi shangele omwiitaveli mukwetu Titus, oo e li ngaashi omona wange:

Efilonghenda nombili yaKalunga Tate noyOmuxupifi wetu Kristus Jesus nai kale pamwe naave.

5 Onde ku fiya muKreta, opo u yukife oinima oyo ihe li melandulafano* nou nangeke po ovakulunhuongalo moilando i lili noku lili ngaashi nde ku lombwela: 6 ovalumenhu ovo hava popilwa mouwa, omushamane e na omukulukadi umwe noku na ovana ovaitaveli, ve na elihumbato liwa* novehe fi ovanashibofa. 7 Osheshi omupashukili weongalo, e li elenga laKalunga, oku na okukala ha popilwa mouwa, ehe fi hamutwemukukutu, iha handuka diva, ehe fi ongholwe, ehe fi omukwanyanya, iha kongo ouwa waye mwene, 8 ha yakula ovaenda, e hole ouwa, omunaendunge,* omuyuki, omudiinini, e na elipangelo, 9 nehongo laye oli na okukala la kanghamena keendjovo di shii okulineekelwa opo a dule okuladipika* okupitila mehongo olo liwa* nokupukulula ovo ve li omhinge nalo.

10 Ndele ope na ovo hava popi oinima yongaho, ovanashibofa vahapu nosho yo ovapukifi, unene tuu ovo va kanyatela kepitotanda. 11 Ovanhu ovo ova pumbwa okumwena filufilu molwaashi otava nyono po eitavelo lomaukwaneumbo aeshe eshi tave va hongo omolwouwa wavo vene oinima oyo vehe na okuhonga. 12 Omuprofeti wavo umwe Omukreta okwa ti: “Ovakreta ohava popi alushe oipupulu, ova fa oilyani novafukenhu.”

13 Eendjovo odo odoshili. Onghee hano, va pukulula wa mana mo, opo va kale ve na eitavelo la kola 14 novaha yandje elitulemo komahokololo oipupulu Ovajuda nokoipango yovanhu ovo va efa po oshili. 15 Kovakoshoki, oinima aishe oya koshoka, ndele kwaavo inava koshoka novehe na eitavelo, oinima aishe inai koshoka molwaashi omadiladilo neliudo lavo inali koshoka. 16 Ohava hepaulula moipafi kutya ove shii Kalunga, ndele oilonga yavo ohai ulike kutya kave mu shii, molwaashi oilonga yavo oitondifa, ihava dulika noinava talika ko va wana okulonga oilonga keshe iwa.

2 Kala ho popi oinima oyo i li metwokumwe nehongo la yuka.* 2 Ovalumenhu ovakulunhu nava kale ve na ondjele, ve shii okulineekelwa, ve na eendunge, ve na eitavelo la kola, ohole nelididimiko. 3 Sha faafana, ovakainhu ovakulunhu nava kale ve na elihumbato olo tali fimanekifa Kalunga, havapika vomaviinyu, ndele ovahongi vaasho shiwa, 4 opo va dule okuyandja omayele* kovakainhu ovanyasha va kale ve hole ovashamane vavo novana vavo, 5 ve na eendunge, va koshoka, va file oshisho omaumbo avo, va longe ouwa nova dulike kovashamane vavo, opo eendjovo daKalunga diha shekwe.

6 Kala ho kumaida yo ovalumenhu ovanyasha va kale ve na eendunge. 7 Va tulila po oshihopaenenwa mokulonga alushe oilonga iwa. Honga nomutima aushe* oinima yoshili, 8 to popi eendjovo da yuka* odo itadi dulu okupatanekwa, opo ovapataneki vetu va fifwe ohoni novehe tu popile mowii. 9 Ovapiya nava dulike koovene vavo moinima aishe, nava kendabale oku va hafifa, haku va nyamukula nai, 10 hakuvaka po oinima yavo, ndele nava kale ovalineekelwa filufilu, opo va fimanekife omahongo aKalunga Omuxupifi wetu.

11 Osheshi efilonghenda laKalunga ola hololwa, opo li etele ovanhu vomaludi aeshe exupifo. 12 Otali tu deula tu efe po ouhenakalunga nosho yo omahalo oinima ii yomounyuni ou, tu kale ovanaendunge, ovayuki notu kale netilokalunga mounyuni ou,* 13 ofimbo twa teelela nehafo omanangeko noupuna nosho yo okuhololwa kwoshinge shaKalunga Omunaenghono adishe noshOmuxupifi wetu Jesus Kristus, 14 oo e tu yandjela omwenyo waye e tu mangulule* koilonga ii noku tu yelife tu ninge emona laye le likalekelwa, opo tu dule okulonga nouladi oilonga iwa.

15 Kala noku va honga oinima oyo, va kumaida* noku va pukulula molwaashi ou na oufemba filufilu woku shi ninga. Ino efa nande oumwe e ku dine.

3 Twikila okudimbulukifa ovamwatate va kale hava dulika kovapangeli nokwaavo ve na eenghonopangelo, va kale ve lilongekida okulonga oshilonga keshe shiwa, 2 vaha popile vamwe mowii, vaha kale hava tanguna, ndele va kale ve na ondjele nomwenyo muwa eshi tava ungaunga novanhu aveshe. 3 Osheshi nafye katwa li tu na eudeko, katwa li hatu dulika, otwa li twa twalwaatwalwa, otwa li ovapika vomahalo e lili noku lili nosho yo vomalihafifo, twa li hatu longo owii, tu na efupandubo, hatu longo oilonga itondifa notwa li tu tondafane.

4 Ndele eshi Kalunga Omuxupifi wetu a ulikila ovanhu efilonghenda nohole yaye 5 (hamolwaashi ngeno twa longo oilonga youyuki, ndele omolwonghenda yaye), okwe tu xupifa eshi e tu yelifa opo tu kale nomwenyo nokwe tu shitulula okupitila momhepo iyapuki. 6 Okwe tu tilila omhepo iyapuki pauyadi* okupitila muJesus Kristus Omuxupifi wetu, 7 opo tu kale tu na eteelelo loku ka fyuulula omwenyo waalushe molwaashi otwa talika ko ovayuki omolwefilonghenda laye.

8 Eendjovo odo odi shii okulineekelwa, nonda hala u kale to divilike oinima oyo, opo ovo va itavela muKalunga va kale tava yandje elitulemo kokulonga oilonga iwa. Oinima oyo oiwa notai etele ovanhu ouwa.

9 Henuka omatomhafano a nyika oulai, eendjokonona di na sha nomapata nosho yo eemhata di na sha nOmhango, osheshi oinima oyo oyongaho nokai na ekwafo lasha. 10 Omunhu oo ta xumifa komesho omahongo oipupulu mu kumaida* oshikando shotete noshitivali, ndele ngeenge ita pwilikine kwoove, henuka okweendafana naye, 11 molwaashi ou shi shii kutya okwa kanduka mo mondjila ya yuka, a nyona nokwe litokola ye mwene.

12 Ngeenge onda tumu Artemas ile Tikikus kwoove, kendabala u uye kwaame kuNikopolis, osheshi oko nda diladila oku ka kala pefimbo lokufu. 13 Kendabala u kwafele Senas, oo e shii nawa Omhango, nosho yo Apollos shi na sha nolweendo lavo. 14 Ndele lombwela ovaitaveli vakwetu navo ve lihonge okukala hava longo oilonga iwa opo va kwafele ngeenge pa holoka omhumbwe ya endelela, nokungaho otava imike oiimati.

15 Aveshe ovo ndi li navo otave ku kundile po. Kundila po ovo ve tu hole nove na eitavelo.

Efilonghenda laKalunga nali kale pamwe nanye amushe.