ONHUMWAFO YA SHANGELWA OVAHEBERI

1 Pefimbo lonale, Kalunga okwa kala ha popi nootatekulululwa peemhito dihapu okupitila movaprofeti nomeenghedi vali dimwe di lili. 2 Ndele paife oha popi nafye okupitila mOmona waye, oo a nangeka po a ninge omufyuululi waaishe, nokwe mu longifa eshi a shita eulu nedu.* 3 Oku na oshinge nosho yo omaukwatya a fa aKalunga filufilu. Oha kaleke po oinima aishe okupitila meenghono deendjovo daye. Ndele konima eshi e tu yelifa komanyono etu, okwa ka kala omutumba meulu kolulyo laKalunga Omunefimano alishe. 4 Molwaashi okwa pewa edina la tumbala li dule omadina ovaengeli, kungaho oshe mu ningifa a kale e va dule.

5 Pashihopaenenwa, omweengeli elipi a lombwelwa kuKalunga taku ti: “Ove omona wange; okudja nena onda ninga xo”? Ile taku ti: “Ohandi ka ninga xo, noto ka ninga omona wange”? 6 Eshi a tuma Omona waye oshiveli kombada yedu, okwa ti: “Ovaengeli vaKalunga aveshe nave mu linyongamene.”*

7 Kakele kaasho, okwa ti vali shi na sha novaengeli vaye: “Ota pe ovaengeli vaye eenghono, nota tumu ovapiya* vaye ve li ngaashi omalaka omundilo.” 8 Ndele shi na sha nOmona, okwa ti: “Kalunga oye e ku pa eenghonopangelo u pangele fiyo alushe,* nodibo yOuhamba woye oyo odibo youyuki. 9 Ou hole ouyuki nou tonde okuhenouyuki, nomolwaashi Kalunga koye e ku vaeka nomaadi, opo u kale u na ehafo linene li dule leehamba dikweni.”* 10 Okwa ti vali: “Omwene, owa dika po ekanghameno ledu okudja pehovelo, neulu oli li oilonga yomake oye. 11 Oinima oyo otai xulu po notai kulupa ngaashi oshikutu, ndele ove oto kala po alushe; 12 oto i tonyo noto i lundulula ngaashi omunhu ta djalulula oshikutu. Ndele ove ito lunduluka, noito xulu po nandenande.”

13 Mbela omweengeli elipi a lombwelelwe kutya: “Kala omutumba kolulyo lange fiyo handi ningi ovatondi voye oshilyatelo sheemhadi doye”? 14 Mbela ovaengeli aveshe kave fi oishitwa yopamhepo oyo hai yakula Kalunga? Mbela havo hava tumwa kuKalunga va ka kwafele ovo tava ka xupifwa?

2 Otwa pumbwa okukala hatu yandje elitulemo shi dulife shito koinima oyo twa uda opo tuha twalwaatwalwe. 2 Ngeenge eendjovo odo da popiwa kovaengeli oda kolekwa, naaveshe ovo va li va nyona noinava dulika ova li va handukilwa pauyuki, 3 ongahelipi hatu ka dula okuya onhapo ehandukilo ngeenge otwa dini elongekido laKalunga la fimana li na sha nexupifo? Omwene wetu oye a popya tete kombinga yalo, naavo ve li uda kuye ove li tu lombwela, 4 na Kalunga okwe li koleka okupitila momadidiliko, moikumwifilonga nomoilonganghono i lili noku lili, naashi a tilila ovapiya vaye omhepo iyapuki pahalo laye.

5 Kalunga ina tula po ovaengeli va ka pangele edu olo hatu popi tali ke uya. 6 Ndele omulumenhu umwe okwa shanga ta ti: “Omunhu oshike opo u mu diladile, ile omona womunhu oshike opo u mu file oshisho? 7 Owe mu ninipika a kale e dulike kovaengeli; we mu dika oshishani shoshinge noshefimano, nowe mu nangeka po a pashukile oilonga yomake oye. 8 Oinima aishe owe i tula koshi yeemhadi daye.” Eshi Kalunga a tula oinima aishe mepangelo laye, ina fiya ko sha nandenande. Ashike fiyo opaife katu wete Jesus ta pangele oinima aishe. 9 Ndele Jesus oo a li a ninipikwa a kale e dulike kovaengeli, paife otu mu wete a dikwa oshishani shoshinge noshefimano konima eshi a mona oixuna nokufya, opo a lole efyo ponhele yaaveshe omolwefilonghenda laKalunga.

10 Oinima aishe oi li po omolwaKalunga nomolwefimano laye. Onghee hano, opo Kalunga a fimanekife ovana vahapu, oku wete sha yuka a pitike oo ta ka pefa ovanhu omwenyo a mone oixuna, opo a kale a wana oku va xupifa. 11 Jesus nosho yo aveshe ovo a ninga ovayapuki ove na xe umwe, nomolwaasho ita fi ohoni oku va ifana ovamwaxe, 12 onghee okwa ti: “Edina loye ohandi ke li shiivifila ovamwatate, nohandi ke ku tanga nomaimbilo meongalo.” 13 Okwa ti vali: “Ohandi mu lineekele.” Natango okwa ti: “Taleni, aame ou nounona ovo Jehova a pa nge.”

14 Onghee hano, ngaashi “ounona” ve li pambelela, naye okwa ninga omunhu wopambelela, opo okupitila mefyo laye a dule okuxulifa po omweetifi wefyo, sha hala okutya Ondiaboli, 15 noku dule okumangulula aveshe ovo ve li moupika woumbada wokutila efyo. 16 Osheshi havaengeli lela ta kwafele, ndele ota kwafele oludalo* laAbraham. 17 Onghee okwa faafana “novamwaxe” moinima aishe, opo a ninge omupristeri munene omunanghenda nomudiinini moinima i na sha naKalunga, opo a yandje eyambo* olo tali kwafele ovanhu va kale ve na ekwatafano liwa naKalunga nova diminwe po omatimba avo. 18 Ota dulu okukwafela ovo tava yelekwa, molwaashi naye okwa li a mona oixuna eshi a yelekwa.

3 Ovamwatate ovayapuki, ovo mwa ifanwa* mu ye meulu, taleni koshihopaenenwa shaJesus oo twa tala ko* e li omuyapostoli nomupristeri munene. 2 Okwa kala omudiinini kuKalunga oo e mu nangeka po, ngaashi ashike Moses naye a li omudiinini eshi a li ha longo meumbo laKalunga. 3 Ndele Jesus okwa wana okupewa efimano linene e dule Moses, molwaashi omutungi weumbo okwa fimana e dule eumbo lo vene. 4 Eumbo keshe oli na omutungi walo, ndele Kalunga oye a shita oinima aishe. 5 Moses okwa li ha yakula noudiinini meumbo laKalunga, osho tashi yandje oumbangi woinima oyo Kalunga a ka popya lwanima, 6 ndele Kristus okwa kala e li omona omudiinini meumbo laKalunga. Fye eumbo laKalunga, ngeenge otwa kala alushe tu na emanguluko lokupopya nosho yo eteelelo la twa olo hatu litangele.

7 Opa shangwa okupitila momhepo iyapuki taku ti: “Ngeenge omwa udu ondaka yaye nena, 8 inamu kukutika omitima deni ngaashi ooxokulululwa va li hava handukifa nge neenghono omafimbo amwe mombuwa, 9 eshi va li va yeleka nge nonande ova li va mona oilonga yange oule womido 40. 10 Molwaashi epupi olo ola li la handukifa nge, onda ti: ‘Ohava shikula alushe omahalo omitima davo, noinava shiiva eendjila dange.’ 11 Onghee onda li nda ana nehandu, nda ti: ‘Itava ka ya mo metulumuko lange.’”

12 Ovamwatate, kaleni mwa lungama opo paha kale nande oumwe womunye ta efa po Kalunga omunamwenyo omolwokuheneitavelo nokukala nomutima mwii. 13 Ndele kaleni hamu twaafana omukumo efiku keshe, ofimbo tapa tiwa “Nena,” opo paha kale nande oumwe womunye ta kukutike omutima waye nokuyulwa keenghono doulunde. 14 Ohatu ka pewa ashike osho Kristus a pewa ngeenge otwa diinine fiyo okexulilo eitavelo olo twa kala tu na okudja pehovelo. 15 Omishangwa oda ti: “Ngeenge omwa udu ondaka yaye nena, inamu kukutika omitima deni ngaashi ooxokulululwa va li hava handukifa nge neenghono omafimbo amwe.”

16 Oolyelye va li va handukifa Kalunga neenghono nonande ova li va uda ondaka yaye? Mbela havovo va li va dja muEgipiti tava wilikwa kuMoses? 17 Shimwe vali, oolyelye va li va handukifa Kalunga oule womido 40? Mbela havovo va li va nyona nova fila mombuwa? 18 Oolyelye a li a anena kutya itava i mo metulumuko laye? Mbela havovo va li inava dulika? 19 Onghee otu wete kutya inava ya mo metulumuko laye molwaashi kava li ve na eitavelo.

4 Ndele molwaashi natango ope na eudaneko lokuya metulumuko laKalunga, natu kaleni oupafi* opo tuha xutwife omhito oyo. 2 Osheshi nafye otwa udifilwa onghundana iwa ngaashi ootatekulululwa, ndele vo kava li va mona ouwa mwaasho va li va uda, molwaashi kava li ve na eitavelo ngaashi ovo va li va dulika. 3 Ndele fye ovo tu na eitavelo* ohatu i metulumuko laye, molwaashi konima eshi a mana oilonga yaye nokwa kala a tulumukwa okudja pehovelo leshito lounyuni, okwa tile shi na sha navo: “Onda li nda ana nehandu kutya, ‘Itava ka ya mo metulumuko lange.’” 4 Okwa popya momushangwa umwe shi na sha nefiku etiheyali a ti: “Kalunga okwa tulumukwa koilonga yaye aishe mefiku etiheyali.” 5 Okwa ti vali: “Itava ka ya mo metulumuko lange.”

6 Ovo va udifilwa tete onghundana iwa inava ya mo metulumuko olo molwaashi kava li va dulika, ndele natango ope na ovo tava dulu okuya mo, 7 nomolwaasho Kalunga a ka popya lwanima mepsalme laDavid shi na sha nefiku lonhumba a ti: “Nena”; ngaashi sha popiwa metetekelo kwa tiwa: “Ngeenge omwa udu ondaka yaye nena, inamu kukutika omitima deni.” 8 Ngeno Josua okwa li e va twala monhele yetulumuko, ngeno Kalunga ina ka popya lwanima shi na sha nefiku limwe vali. 9 Onghee hano, natango ope na efiku letulumuko ngaashi efiku leshabata loshiwana shaKalunga. 10 Osheshi omunhu ou a ya metulumuko laKalunga okwa tulumukwa yo koilonga yaye, ngaashi ashike Kalunga a tulumukwa kuyaye.

11 Onghee hano, natu longeni noudiinini tu ye metulumuko olo, opo paha kale nande oumwe ta shikula oshihopaenenwa shaavenya inava dulika. 12 Eendjovo daKalunga odi na omwenyo neenghono, nodi na eememo di dule eongamukonda leememo keembinga mbali, notadi dulu okutwa nokutongola omwenyo* nomhepo,* omakipa nomungo; notadi dulu okuholola omadiladilo nomahalo omutima. 13 Kape na oshishitwa shihe wetike kuKalunga, ndele aishe oi li poluhaela noi wetike filufilu kwaao hatu ke lihokolola kuye.

14 Onghee hano, eshi tu na omupristeri munenenene, Jesus, Omona waKalunga, ou a ya meulu, natu twikileni okuhepaulula moipafi eitavelo letu muye. 15 Omupristeri wetu munene oku tu uditile oukwao wananghali omolwomaunghundi etu, molwaashi naye okwa pita momayeleko mahapu ngaashi fye, nonande ina nyona sha. 16 Onghee hano, natu eheneni popepi nolukalwapangelo laKalunga omunefilonghenda nokwiilikana kuye tu na emanguluko lokupopya, opo tu kenukilwe notu kwafelwe pafilonghenda laye pefimbo la wapala.

5 Keshe oo a nangekwa po e li omupristeri munene ota yakula ovanhu moinima i na sha naKalunga mokuyandja eeshali nosho yo omayambo omolwomatimba avo. 2 Omupristeri oo ota dulu okufila onghenda* ovo tava nyono* shaashi otave shi ningi omolwokuhashiiva sha. Ndele molwaashi naye omulunde, 3 oku na okuyandja omayambo omolwomatimba aye mwene ngaashi ashike ha yambe omolwomatimba ovanhu.

4 Omunhu ita dulu okuninga omupristeri pahalo laye mwene, ndele Kalunga oye ashike ta dulu oku mu nangeka po, ngaashi a li a nangeka po Aron. 5 Sha faafana, Kristus haye mwene e litula pondodo yokukala omupristeri munene, ndele okwa tulwa po kuKalunga oo a popya kombinga yaye ta ti: “Ove omona wange; nena onda ninga xo.” 6 Okwa popya yo momushangwa umwe ta ti: “Ove omupristeri panghedi yaMelkisedek, noto kala omupristeri fiyo alushe.”

7 Eshi Kristus a li kombada yedu,* okwa li ha indile nokwiilikana a mana mo, nokwiingida pombada a nyika oluhodi kwaau ta dulu oku mu xupifa mefyo, nokwa li a udika molwaashi okwa li e na etilokalunga. 8 Nonande okwa li omona waKalunga, okwe lihonga okudulika eshi a li ta mono oixuna. 9 Konima eshi a ulika kutya omuduliki filufilu, oshe mu ningifa a kale a wana okuxupifa aveshe ovo hava dulika kuye, 10 molwaashi okwa nangekwa po kuKalunga e li omupristeri munene panghedi yaMelkisedek.

11 Otu na shihapu okupopya kombinga yaye, ndele oshidjuu oku mu yelifila molwaashi ihamu udu ko oinima diva. 12 Okutala kefimbo olo la pita po, omwa li mwa wana ngeno okukala ovahongi, ndele omwa pumbwa vali umwe e mu honge omahovelohongo eendjovo daKalunga, osheshi ponhele yokulya eendja da pama omwa shuna komashini. 13 Keshe ou ta twikile okunyama omashini, ina shiiva eendjovo daKalunga douyuki, osheshi oye okahanana. 14 Ndele eendja da pama odaava va kula, ovo eendunge davo dokuyoolola da deulwa, opo va dule okutongola ouwa nowii.

6 Molwaashi otwa itavela nale omahovelohongo e na sha naKristus, natu lalakaneneni oukulunhu wopamhepo, ndele hakukanyatela ashike komahovelohongo, ngaashi okulidilulula koilonga yongaho, eitavelo muKalunga, 2 ehongo li na sha neninginifo, okutenheka omake, enyumuko lovafi nosho yo etokolo laalushe. 3 Ndele ohatu ka kula pamhepo kekwafo laKalunga.

4 Ovo va pewa ouyelele kuKalunga, oshali ya dja meulu nosho yo omhepo iyapuki, 5 va pewa eendjovo diwa daKalunga nova makela omanangeko noupuna omounyuni mupe,* 6 ndele tava efa po eitavelo, itava dulu okukwafelwa ve lidilulule vali, molwaashi ova fa va valela vali Omona waKalunga komuti nove mu fifa ohoni moipafi. 7 Oshi li enangeko noupuna la dja kuKalunga ngeenge edu tali lokwa alushe, molwaashi ohali pona omeva nokumenifila oimeno ovo ve li longa. 8 Ndele ngeenge otali menifa omakiya neeshosholo, kali na ongushu yasha, nomokweendela ko kwefimbo otali fingwa, nolwanima otali ka xwikwa po.

9 Ovamwatate ovaholike, nonande ohatu popi ngaho, otu na elineekelo kutya otamu shi endifa nawa, naasho otashi mu etele exupifo. 10 Osheshi Kalunga ke fi omuhenouyuki a dimbwe ngeno oilonga yeni nohole oyo mwa ulika omolwedina laye eshi mwa yakula notamu twikile okuyakula ovayapuki. 11 Ndele otwa hala amushe mu twikile okukala hamu longo noudiinini ngaashi mwa kala hamu shi ningi shito, mu kale mu na eteelelo la twa fiyo okexulilo, 12 opo muha kale mu na ondede, ndele mu hopaenene ovo va wanifilwa osho sha li sha udanekwa omolweitavelo nelididimiko lavo.

13 Eshi Kalunga a li a udanekela Abraham eudaneko, molwaashi kape na oo e mu dule ta dulu okwaana kuye, okwa li a ana kuye mwene, 14 ta ti: “Ohandi ke ku nangeka noupuna nohandi ka hapupalifa oludalo loye.” 15 Onghee hano, Abraham okwa li a wanifilwa eudaneko olo omolwelididimiko laye. 16 Ngeenge omunhu ta ningi eudaneko, oha ane kwaao e mu dule, naasho ohashi kelele eenhamanana, molwaashi eano oli li oumbangi oo tau koleke kutya osho a popya oshoshili. 17 Sha faafana, eshi Kalunga a ulikila ovo tava ka wanifilwa eudaneko kutya elalakano laye itali lunduluka, okwe shi koleka neano. 18 Oinima oyo ivali Kalunga a ninga* itai lunduluka, na Kalunga iha fufya; noinima oyo otai tu pameke ovo twe lineekela muye, opo tu kale twa diinina eteelelo olo tu na. 19 Nafye otu na eteelelo olo li li ngaashi ekanghamifo leemwenyo detu olo tali tu kwafele tu kale twa pama notuhe na omalimbililo, noku tu pitifa metukulifolapi, 20 omo Jesus e tu tetekela nokwa ya mo ponhele yetu, oo a ninga omupristeri munene panghedi yaMelkisedek, nota kala omupristeri fiyo alushe.

7 Ndele Melkisedek, ohamba yaSalem, omupristeri waKalunga Omukombadambada, okwa shakena naAbraham ta di kolwoodi eshi a finda eehamba, nokwa nangeka Abraham noupuna, 2 opo nee Abraham okwe mu pa* oshitimulongo shomoinima yaye aishe. Edina laMelkisedek otali ti, “Ohamba youyuki” nosho yo ohamba yaSalem, sha hala okutya, “Ohamba yombili.” 3 Xe naina kava li ve shiivike nokapa li ondjokonona yepata laye, nokaku shiivike kutya okwa dalwa naini nokwa fya naini. Ndele molwaashi okwa li ngaashi Omona waKalunga, okwa kala omupristeri fiyo alushe.

4 Omulumenhu oo okwa li a tumbala nomolwaasho tatekulululwa Abraham a li e mu pa oshitimulongo shomoinima ya denga mbada oyo a li a likola kolwoodi. 5 Metwokumwe nOmhango, ovana vaLevi ovo va nangekwa po ve li ovapristeri ova li va lombwelwa va pewe oitimulongo kovanhu, sha hala okutya kovamwaxe, nonande ove li oludalo* laAbraham. 6 Ndele omulumenhu oo a li ehe fi womoludalo laLevi okwa pewa oitimulongo kuAbraham nokwa nangeka noupuna Abraham oo a li ta ka wanifilwa omaudaneko. 7 Osho oshi li oumbangi wa kola kutya ou munini okwa nangekwa noupuna kwaao munene. 8 Ovalevi otava fi nonande ova pewa oitimulongo, ndele shi na sha nomulumenhu oo a pewa oitimulongo, Omishangwa oda ti kutya ota kala nomwenyo. 9 Onghee otaku dulu okutiwa kutya Levi oo a pewa oitimulongo naye okwa yandja oitimulongo okupitila muAbraham, 10 molwaashi ka li natango a dalwa* eshi xekulululwa a li a shakena naMelkisedek.

11 Ngeenge ovapristeri vomepata laLevi, ovo va li koshi yOmhango oyo ya li ya pewa Ovaisrael, ova li tava dulu okweetela ovanhu ewaneneno, mbela ngeno otwa pumbwa ngoo omupristeri panghedi yaMelkisedek? Ile hano osha wana ashike okukala nomupristeri panghedi yaAron? 12 Molwaashi elongekido li na sha noupristeri ola lunduluka, Omhango nayo oya li ya pumbwa okulunduluka. 13 Omulumenhu oo ta popilwa oinima oyo okwa dja mepata limwe li lili, omo inamu dja nande oumwe a li ha yakula koaltari. 14 Osha yela kutya Omwene wetu okwa dja mepata laJuda, ashike Moses ina popya sha shi na sha novapristeri va dja mepata olo.

15 Osho osha ka yela mo nawa eshi pe ke uya omupristeri umwe a fa Melkisedek, 16 oo a li ta yakula e li omupristeri, ashike inashi likolelela kepata omo a dja ngaashi sha li paMhango, ndele omolwaashi a li e na eenghono odo de mu pa omwenyo oo itau dulu okuhanaunwa po. 17 Omushangwa umwe owa popya shi na sha naye, wa ti: “Ove omupristeri panghedi yaMelkisedek, noto kala omupristeri fiyo alushe.”

18 Ndele omhango yotete oya xulifwa po molwaashi oya ngabekwa nokai na ekwafo lasha. 19 Omhango inai etifa po ewaneneno, ndele eteelelo olo tu na ole shi ninga, nohatu ehene popepi naKalunga okupitila mulo. 20 Kakele kaasho, omupristeri oo ine uya po ashike nopehe na eano lasha, 21 (osheshi ope na ovalumenhu vamwe va ninga ovapristeri nopehe na eano, ndele ou okwa ninga omupristeri okupitila meano olo la anwa kuKalunga, oo a popya shi na sha naye a ti: “Jehova okwa ana, noita lundulula omadiladilo aye* oo kutya, ‘Ove oto kala omupristeri fiyo alushe’ ”). 22 Jesus oku li onga oumbangi oo tau ulike kutya ehangano la denga mbada otali ka tulwa moilonga. 23 Shimwe vali, ovapristeri ohava fi noihava dulu vali okutwikila noilonga yavo, nomolwaasho hava pingenwa po, 24 ndele molwaashi ye ota kala fiyo alushe, ita pingenwa po e li omupristeri. 25 Onghee ota dulu filufilu okuxupifa ovo hava ilikana kuKalunga okupitila muye, molwaashi ota kala nomwenyo fiyo alushe opo e va indilile kuKalunga.

26 Osha yeleka eshi tu na omupristeri munene oo omudiinini, ehe na oshipo, a koshoka, a yooloka ko kovalunde nokwa tumbalekwa e dulife eulu.* 27 Mepingafano novapristeri vanene vakwao, ye ina pumbwa okuyamba omayambo efiku keshe, amwe ngeno oomatimba aye ofimbo amwe oomatimba ovanhu, molwaashi ye okwe shi ninga lumwe aluke eshi a yamba po omwenyo waye. 28 PaMhango, opa li hapa nangekwa ovapristeri vanene ve na omaunghundi, ndele metwokumwe neano olo la ka ningwa konima yOmhango, opa nangekwa Omona waKalunga, oo ta kala a wanenena fiyo alushe.

8 Oshitwa sha fimanenena shi na sha naasho hatu popi osheshi: Otu na omupristeri munene, oo e li omutumba meulu kolulyo lolukalwapangelo laKalunga Omunefimano alishe, 2 ta yakula monhele iyapuki nosho yo metwali lashili olo la dikwa po kuJehova, ndele hakovanhu. 3 Molwaashi omupristeri munene keshe a nangekwa po okwa li e na okuyandja eeshali nokuyamba omayambo, osha li yo sha pumbiwa kwaau naye a yambe eyambo. 4 Ngeno okwa li kombada yedu, ngeno ke fi omupristeri, molwaashi ope na nale ovalumenhu ovo hava yandje eeshali metwokumwe nOmhango. 5 Oilonga oyo ya li hai longwa kovalumenhu ovo oya li omudidimbe noi lile po oinima yomeulu. Osho osha li sha ulikwa eshi Kalunga a li a lombwela Moses nghee e na okutunga etwali, a ti: “Dimbuluka nokuninga naanaa oinima aishe ngaashi nde ku ulikila eshi wa li komhunda.” 6 Ndele Jesus okwa pewa oilonga ya denga mbada, molwaashi oku li yo omupokati wehangano liwa, nehangano olo ola kolekwa pamhango nola dikwa po pakanghameno lomaudaneko.

7 Ngeno ehangano lotete ola li lihe na oshipo, ngeno inapa pumbiwa vali ehangano etivali. 8 Jehova okwa li a mona epuko movanhu nomolwaashi a li a popya ta ti: “‘Taleni, omafiku otae uya, eshi handi ka ninga ehangano lipe neumbo laIsrael nosho yo laJuda.’ 9 Jehova okwa ti vali: ‘Ehangano olo itali ka kala la fa olo nda ningile nooxekulululwa eshi nde va kwata meke noku va kufa mo muEgipiti. Molwaashi kava li ovadiinini kehangano lange, onda li nda efa oku va fila oshisho.’

10 “Jehova okwa ti: ‘Ehangano eli olo handi ka ninga neumbo laIsrael okudja pomafiku oo. Ohandi ka tula eemhango dange momadiladilo avo noku di shangela momitima davo. Ohandi ka ninga Kalunga kavo, notava ka ninga oshiwana shange.

11 “‘Kape na vali ou ta ka honga omukwashiwana mukwao ile omumwaxe, ta ti: “Shiiva Jehova.” Osheshi ovanhu aveshe otava ka kala ve shii nge, kashi na nee mbudi kutya olyelye. 12 Ohandi ke va dimina po omolwoilonga yavo ii, noitandi ka dimbuluka vali omatimba avo.’”

13 Eshi a popya “ehangano lipe,” osha hala okutya eli lotete okwe li ninga likulu. Eli likulu otali kulupa noli li pokuxula po.

9 Ehangano likulu ola li li na eemhango odo da li hadi wilike ovo tava longo oilonga iyapuki nosho yo di na sha nonhele iyapuki oyo ya li kombada yedu. 2 Etwali ola li la tungwa li na omadimo avali; edimo lotete ola li hali ifanwa Onhele Iyapuki nomwa li mu na oshikwatelwalamba, oshitaafula nomingome detaliko. 3 Ndele konima yetukulifolapi etivali okwa li ku na edimo hali ifanwa Ouyapukielela. 4 Medimo olo omwa li oshikwatelwa shomundilo nosho yo oshikefa shehangano shoshingoli, omo mwa li oshimbudju shoshingoli mu na omanna, odibo yaAron ya tutuma eengala nosho yo oipelende yehangano; 5 kombada yasho okwa li kwa tulwa ovakerubi tava vadima va uvika nomavava avo oshituviko shoshikefa.* Ndele paife halo efimbo lokupopya moule shi na sha noinima oyo.

6 Konima eshi oinima aishe oyo ya pwa okulongekidwa, ovapristeri ohava i alushe medimo lotete va ka longe oilonga iyapuki, 7 ndele omupristeri munene oha i oye aeke medimo etivali lumwe momudo e na ohonde, oyo ha ka yamba omolwaye mwene nomolwomatimba ovanhu eshi va nyona omolwokuhashiiva sha. 8 Onghee omhepo iyapuki oya ulika kutya eshi pa li natango etwali lotete, kapa li ou a ulikilwa ondjila yokuya monhele iyapuki. 9 Etwali olo ola li tali faneke oinima oyo tai ningwa paife, nohaku yambwa omayambo nokuyandjwa eeshali metwokumwe nelongekido olo. Oinima oyo ihai ningifa omunhu oo ta longo oilonga iyapuki a kale e na eliudo la yela. 10 Ndele oi na sha ashike noikulya, oikunwa nosho yo neenghulunghedi di lili noku lili dokukosha oinima.* Eemhango odo oda li di na sha noinima yokombada yedu,* noda li di na okutulwa moilonga fiyo eufwafimbo lokuyukifa oinima la fika.

11 Eshi Kristus a ninga omupristeri munene woinima iwa oyo tai ningwa paife, okwa ya metwali olo linene noliwa olo inali tungwa kovanhu nokali li kombada yedu. 12 Okwa ya monhele iyapuki, hanohonde yoikombo ile yeemhedi, ndele onohonde yaye mwene lumwe aluke opo e tu xupife* fiyo alushe. 13 Ngeenge ovanhu ovo inava koshoka ova li hava yapulwa nokukosholwa pambelela shimha va shaminwa ohonde yoikombo noyeemhedi nosho yo omute wongobe yondema, 14 mbela ohonde yaKristus, oo okupitila momhepo iyapuki yaalushe e liyandja ye mwene kuKalunga ehe na oshipo, itai ke tu kwafela tu kale tu na eliudo la koshoka notuha longe vali oilonga yongaho* opo tu longele Kalunga omunamwenyo oilonga iyapuki?

15 Onghee hano, Kristus okwa ninga omupokati wehangano lipe, opo ovo va ifanwa va pewe eudaneko lomwenyo waalushe. Oinima aishe oyo otai shiiva omolwefyo laye olo le va mangulula komanyono oo va li va nyona eshi va li koshi yehangano likulu. 16 Ngeenge opa ningwa ehangano, oo te li koleke oku na okufya, 17 molwaashi ehangano ohali kolekwa okupitila mefyo. Onghee ehangano ihali i moilonga ofimbo oo te li koleke e li momwenyo. 18 Kakele kaasho, ehangano likulu kala li la tulwa* moilonga nopehe na ohonde. 19 Eshi Moses a lombwela ovanhu aveshe oipango aishe yOmhango, okwa kufa ohonde yeemhedi noyoikombo, omeva, olududi litilyana nokaxwa koisopi, ndele ta shamine omushangwatonywa* novanhu aveshe, 20 ta ti: “Ohonde ei oyehangano olo Kalunga e mu lombwela mu diinine.” 21 Okwa shamina yo nohonde etwali nosho yo oikwatelwa aishe oyo hai longifwa oilonga iyapuki. 22 Metwokumwe nOmhango, oinima aishe oya li hai koshwa nohonde, nokapa li edimepo lomatimba ngeenge inapa tika ohonde.

23 Osha li sha pumbiwa opo oinima oyo ya li tai faneke oinima yomeulu i kosholwe monghedi ya tya ngaho, ndele oinima yomeulu oya pumbwa omayambo a denga mbada e dulife opo. 24 Nomolwaasho Kristus ina ya monhele iyapuki ya tungwa kovanhu, oyo i li omudidimbe waasho sholela, ndele okwa ya meulu, opo a ka holoke koshipala shaKalunga omolwetu. 25 Osho ine shi ninga a kale ngeno te liyandje lwoikando, ngaashi omupristeri munene a li ha i monhele iyapuki omudo keshe nohonde yoinamwenyo, ndele kai fi yaye mwene. 26 Ngeno osho sha li ngaho, ngeno okwa hepekwa lwoikando okudja pehovelo lounyuni. Ndele paife okwa holoka lumwe aluke pomafiku axuuninwa ounyuni ou,* opo a xulife po oulunde eshi a yamba po omwenyo waye. 27 Ngaashi ashike ovanhu va li ve na okufya lumwe aluke, ndele tava ka tokolwa, 28 Kristus naye okwa li e na okuliyandja lumwe aluke, opo a dime po omatimba avahapu; naashi te ke uya oshikando oshitivali ite ke uya okudima po omatimba, ndele ota ka monika kwaavo tave mu kongo va mana mo omolwexupifo lavo.

10 Omhango itai dulu okuningifa ovalongelikalunga va kale va wanenena okupitila momayambo oo haa yambwa omudo keshe, molwaashi oi li omudidimbe woinima iwa oyo tai ke uya, ndele hayo oinima yolela. 2 Ngeno oya li tai dulu okuningifa ovanhu va kale va wanenena, mbela ngeno okuyamba omayambo inaku xula po nale? Natango ngeno itava kala ve na eliudo li udite etimba konima eshi va kosholwa. 3 Mepingafano naasho, omayambo oo ohaa dimbulukifa ovanhu omanyono avo omudo keshe, 4 molwaashi ohonde yeemhedi noyoikombo itai dulu okukufa po omanyono.

5 Eshi Kristus e uya mounyuni, okwa ti kuKalunga: “‘Ino hala omayambo, ndele owa longekidila nge olutu. 6 Ino hokwa omaxwikiloyambo nomatimbayambo.’ 7 Opo nee onda ti: ‘Tala, Kalunga kange, onde uya (ngaashi sha popiwa momushangwatonywa* shi na sha naame) ndi longe ehalo loye.’” 8 Eshi a popya tete a ti: “Ino hala noino hokwa omayambo, omaxwikiloyambo nomatimbayambo,” sha hala okutya omayambo oo haa yambwa paMhango, 9 okwa ti vali: “Tala, onde uya okulonga ehalo loye.” Okwa xulifa po osho shotete, opo a tote po oshitivali. 10 Otwa yapulwa okupitila mekuliloyambo lolutu laJesus Kristus palumwe metwokumwe ‘nehalo’ laKalunga.

11 Shimwe vali, omupristeri keshe okwa li ha longo oilonga iyapuki efiku keshe noha yambe omayambo luhapu, ashike osho itashi kufa po filufilu omanyono. 12 Ndele omulumenhu ou okwa yamba eyambo palumwe omolwomanyono, nokwa ka kala omutumba kolulyo laKalunga, 13 nokudja opo okwa kala a teelela fiyo osheshi ovatondi vaye va ningwa oshilyatelo sheemhadi daye. 14 Eyambo olo a yamba ola ningifa ovo va yapulwa va kale va wanenena fiyo alushe. 15 Onghee hano, omhepo iyapuki oye tu hepaululila ya ti: 16 “Jehova okwa ti: ‘Ehangano eli olo handi ka ninga navo okudja pomafiku oo. Ohandi ka tula eemhango dange momadiladilo avo noku di shangela momitima davo.’” 17 Oya ti vali: “Itandi ka dimbuluka vali omatimba avo nosho yo oilonga yavo ii.” 18 Ngeenge ova diminwa po omolwoilonga aishe oyo ii, itapa ka yambwa vali omayambo omolwomanyono.

19 Onghee hano, ovamwatate, omolwohonde yaJesus, katu na oumbada* wokuya mondjila oyo ya finda monhele iyapuki, 20 oyo e tu yeululila i li ondjila ipe tai twala komwenyo okupitila metukulifolapi, sha hala okutya mombelela yaye, 21 naashi yo tu na omupristeri munene oo ta pashukile eumbo laKalunga. 22 Natu longeleni Kalunga nomutima aushe, tu na eitavelo la kola, omitima da kosholwa,* eliudo la yela nomalutu a koshwa nomeva ma yela. 23 Natu hepaululeni noudiinini moipafi eteelelo letu nopehe na okutengauka, molwaashi oo a udaneka omudiinini. 24 Natu kaleni tu na ko nasha* navakwetu nokuladipikafana, opo tu kale* tu holafane nokulonga oilonga iwa; 25 inatu efa po okwoongala pamwe, ngaashi vamwe have shi ningi, ndele tu twaafaneni omukumo, unene tuu eshi tu wete efiku tali ehene popepi.

26 Ngeenge otwa nyonene owina konima eshi twa mona eshiivo lashili li na sha noshili, kape na vali eyambo limwe tali ka yambwa omolwomanyono etu, 27 ndele ohatu ka teelela noumbada etokolo nehandu la xwama la fa omundilo, olo tali ka hanga ovo ve li omhinge naKalunga. 28 Keshe oo a li a dina Omhango yaMoses okwa li ha dipawa nopehe na onghenda ngeenge ope na eembangi mbali ile nhatu. 29 Mbela omunhu ota ka mona ehandukilo li fike peni oo ta lyata Omona waKalunga nokwa dina ongushu yohonde yehangano oyo ye mu yapula, nota sheke omhepo yaKalunga oo e mu ulikila efilonghenda? 30 Otu shii ou a ti: “Ehandu olange; aame handi handukile ou ta nyono.” Navali: “Jehova ota ka tokola oshiwana shaye.” 31 Kashi fi tuu oshinima shitilifa umwe ngeenge okwa handukilwa kuKalunga omunamwenyo!

32 Onghee hano, kaleni nokudimbuluka omafimbo onale, eshi mwa li mwa pewa ouyelele nomwa dula okulididimikila oinima ihapu nonande omwa li tamu mono oixuna. 33 Omafimbo amwe omwa li hamu ningwa nai moipafi,* hamu shekwa nokumonifwa oixuna nomwa li hamu hepekwa pamwe* naavo tava hepekwa. 34 Osheshi omwa udila oukwao wananghali ovo ve li modolongo noinamu kanifa ehafo leni eshi mwa nyekwa oinima yeni, molwaashi omu shi shii kutya omu na emona liwa notali kalelele.

35 Onghee hano, inamu efa po ouladi weni,* molwaashi otau ke mu pefa ondjabi inene. 36 Ndele omwa pumbwa elididimiko, opo mu longe ehalo laKalunga mu ka wanifilwe eudaneko. 37 Osheshi “oku na okafimbo kaxupi,” opo “ou te uya a fike diva, noita ka shelelelwa.” 38 “Omuyuki ota ka kala nomwenyo omolweitavelo,” ndele “ngeenge okwa sholola, itandi* ka kala vali nde mu hokwa.” 39 Fye itatu sholola tu ka hanaunwe po, ndele otu na eitavelo olo tali ka xupififa eemwenyo detu.

11 Eitavelo olo okukala nelineekelo la kola, okulineekela kutya osho sha teelelwa otashi ka wanifwa; okukala noumbangi wa yela kutya osho shihe wetike oshoshili. 2 Omolweitavelo, ovanhu vopefimbo lonale* ova li va pewa ehepaululo liwa.

3 Omolweitavelo, otu shi shii kutya oinima yomeulu noyokombada yedu* oya tulwa peenhele palombwelo laKalunga, opo oinima oyo i wetike i uye po okupitila moinima oyo ihe wetike.

4 Omolweitavelo, Abel okwa yambela Kalunga eyambo la denga mbada li dule laKain, nomolweitavelo okwa shilipalekwa kutya omuyuki osheshi Kalunga okwa li a hokwa* eeshali daye. Nonande okwa fya, ota popi natango omolweitavelo laye.

5 Omolweitavelo, Henok okwa li a kufwa po kuKalunga opo aha mone efyo noka li a shiivika kutya okwa twalwa peni; fimbo ina kufwa po, okwa li a shilipalekwa kutya okwa hafifa Kalunga. 6 Osha yela kutya omunhu ngeenge ke na eitavelo, ita dulu okuhafifa Kalunga, osheshi keshe ou ta ehene kuKalunga oku na okwiitavela kutya oko e li nonokutya oha yandje ondjabi kwaavo tave mu kongo va mana mo.

7 Omolweitavelo, Noa, eshi a pewa elondwelo kuKalunga li na sha noinima oyo ya li inai monika natango, okwa ulika etilokalunga nokwa tunga onguluwato opo a xupife ovaneumbo laye, nomolweitavelo laye okwa tokola ounyuni nokwa talika ko omuyuki.

8 Omolweitavelo, Abraham, eshi a ifanwa kuKalunga, okwa dulika eshi a ya konhele oyo a li ta ka pewa i li efyuululo; okwa ya, nonande ka li e shii oko ta i. 9 Omolweitavelo, okwa kala omunailongo medu olo a li a udanekelwa, a li momatwali pamwe naIsak naJakob ovo navo va li tava ka wanifilwa eudaneko la faafana. 10 Osheshi okwa li a teelela oshilando osho shi na omakanghameno a pama, na Kalunga oye omuduti nomutungi washo.

11 Omolweitavelo, Sara okwa li a ninga oufimba* nonande okwa li omunamido, molwaashi okwa li a itavela kutya oo a udaneka omudiinini.* 12 Onghee omulumenhu oo a li omunamido,* okwa li a dalelwa oludalo lihapu li fike peenyofi dokeulu nola nyengana okuvalulwa ngaashi ehekedu lopomunghulofuta.

13 Nonande aveshe ovo ova fya ve na eitavelo, inava wanifilwa omaudaneko, ndele ova fa ve a mona nove a tambula ko nehafo, nova li va hepaulula moipafi kutya vo ovaenda novanailongo medu omo va li. 14 Ovo va hepaulula ngaho ova ulika kutya otava kongo va mana mo onhele yavo vene omo tava ka kala. 15 Ngeno ova kalele hava diladila konhele oko va dile, ngeno ova mona omhito yokushuna ko. 16 Ndele paife ova halelela onhele iwa, sha hala okutya ya pamba eulu. Onghee Kalunga ina fya ohoni okwiifanwa Kalunga kavo, molwaashi okwe va longekidila oshilando.

17 Omolweitavelo, Abraham, eshi a li a yelekwa, okwa li a tokola okuyamba po Isak. Abraham oo a li a tambula ko nehafo omaudaneko okwa li pokuyamba po omona waye ewifa 18 nonande okwa li a lombwelwa kutya: “Oludalo loye* otali ka dja muIsak.” 19 Okwa li a itavela kutya Kalunga ota dulu okunyumuna omona waye, nomolwaasho a li e mu pewa a fa a dja mefyo, osho tashi ulike osho tashi ka ningwa monakwiiwa.

20 Omolweitavelo, Isak okwa li a nangeka noupuna Jakob naEsau omolwoinima oyo ya li tai ke uya.

21 Omolweitavelo, eshi Jakob a li pokufya, okwa li a nangeka noupuna ovanamati aveshe vaJosef nokuhambelela Kalunga e likolelela kodibo yaye.

22 Omolweitavelo, eshi Josef a li pokufya, okwa li a popya shi na sha netembu lOvaisrael nokwa li a yandja omalombwelo* e na sha nomakipa aye.*

23 Omolweitavelo, ovadali vaMoses ova li ve mu holeka oule weemwedi nhatu okudja eshi a dalwa, molwaashi ova li va mona kutya okwa li okahanana kawa, nokava li va tila elombwelo lohamba. 24 Omolweitavelo, eshi Moses a kula, okwa anya okwiifanwa omona wokamonakadona kaFarao, 25 nokwa hoolola okuhepekwa pamwe noshiwana shaKalunga ponhele yokuhafela ouwa woulunde wopakafimbo, 26 molwaashi okwa li a tala ko okushekwa e li Kristus kwa denga mbada ku dule oupuna womuEgipiti, nokwa li a tala kondjabi oyo a li ta ka mona. 27 Omolweitavelo, Moses okwa fiya po Egipiti, hamolwaashi a tila ehandu lohamba, ndele okwa kala te lididimikile omaudjuu a fa e wete oo iha monika. 28 Omolweitavelo, okwa dana Opaasa, ndele ta shamine ohonde komivelo, opo omweengeli waKalunga aha dipae* oiveli yavo.

29 Omolweitavelo, ova taulula Efuta Litilyana va enda poukukutu, ndele eshi Ovaegipiti ve va shikula, ova fya omeva.

30 Omolweitavelo, ekuma laJeriko ola teka po konima eshi ovanhu va li ve li dingonoka omafiku aheyali. 31 Omolweitavelo, Rahab, oo a li ombwada, ka li a hanaunwa po pamwe naavo va li ihava dulika molwaashi okwa li a tambula ko nombili eendadi.

32 Mbela nandi tye vali shike? Efimbo itali pitike nge ndi popye kombinga yaGideon, Barak, Simson, Jefta, David, Samuel nosho yo ovaprofeti vakwao. 33 Omolweitavelo, ova finda omauhamba, ova xumifa komesho ouyuki, ova wanifilwa omaudaneko, ova pata omakanya eenghoshi, 34 ova xupa momundilo wa hanya, ova ya onhapo eongamukonda, ova nghonopalekwa eshi va li ovanghundi, ova pewa eenghono molwoodi nova finda omatangakwaita oo a li e va ponokela. 35 Ovakainhu vamwe ova li va nyumuninwa ovafi vavo, ndele ovanhu vamwe ova li va hepekwa molwaashi inava hala okweefa po eitavelo lavo mokumangululwa, opo va ka mone enyumuko la denga mbada. 36 Kakele kaasho, vamwe ova li va shekwa, va dengwa, va mangwa nomalyenge nova tulwa meedolongo. 37 Ova li va dengwa nomamanya, va li momayeleko, va li va shaaxwa pomakati, va dipawa neongamukonda, va li va djala oikafa yeedi noyoikombo, va li moluhepo, momaudjuu, va ungaungiwa navo nai, 38 nokava li va talwa ko va wana okukala mounyuni. Ova li yo hava kala meembuwa, keemhunda, momakololo nosho yo komikwena.

39 Nonande aveshe ovo ova li va mona ehepaululo liwa omolweitavelo lavo, kava li va wanifilwa osho sha udanekwa, 40 molwaashi Kalunga okwe tu longekidila sha sha denga mbada, opo vaha kale va wanenena tete kufye.

12 Ndele molwaashi otu na ongudu oyo inene* yeendombwedi ye tu dingilila, natu tulei po omutengi keshe noulunde oo hau tu dingatele noupu nokutondoka nelididimiko mefiyafanepo olo tu li mulo, 2 ofimbo twa tala nelitulemo kuJesus, oo ta ka pefa ovanhu omwenyo noku li oshihopaenenwa dingi sheitavelo. Okwe lididimikila omuti womahepeko,* a li ehe na ko nasha nomasheko omolwehafo olo a li ta ka mona, nokwa ka kala omutumba kolukalwapangelo kolulyo laKalunga. 3 Diladileni kombinga yaao e lididimikila omasheko ovalunde ovo ve litokola vo vene, opo muha loloke nokusholola.*

4 Eshi mwa kala tamu kondjifa oulunde oo, kape na nande oumwe womunye e u kondjifa fiyo omefyo. 5 Omwa dimbwa filufilu ekumaido olo mwa pewa kuKalunga mu li ovana vaye, a ti: “Omumwange, ino dina outekuduliko oo to pewa kuJehova, ino sholola ngeenge te ku pukulula; 6 osheshi Jehova oha yandje outekuduliko kwaavo e hole noha handukile* keshe oo a tala ko e li omona waye.”

7 Elididimiko oli li oshitukulwa shoutekuduliko weni.* Kalunga ota ungaunga nanye ngaashi ovana vaye. Osheshi omona elipi iha pewa outekuduliko kuxe? 8 Ngeenge Kalunga ihe mu pe outekuduliko ngaashi he shi ningile vamwe, kamu fi lela ovana vaye, ndele oludalo lokondje yohombo. 9 Shimwe vali, ootate vopanhu* ohave tu pe outekuduliko notwe va fimaneka. Mbela katu na okudulika filufilu kuTate yetu oo e tu vaeka nomhepo iyapuki nokwe tu pa omwenyo? 10 Osheshi outekuduliko oo have tu pe owopakafimbo nowe likolelela kwaasho va tala ko sha yuka, ndele Kalunga ohe u tu pe omolwouwa wetu, opo tu kale ovayapuki ngaashi ye. 11 Outekuduliko ihau kala u hafifa pefimbo opo tau yandjwa, ndele ou nyikifa oluhodi, ashike lwanima ovo va deulwa kuo, ohava kala ovayuki novanambili.

12 Onghee hano, pamekeni omaoko neengolo odo dihe na eenghono, 13 yukifeni eemhadi deni mondjila, opo oilema iha naipale, ndele i veluke. 14 Lalakaneneni ombili novanhu aveshe nosho yo ouyapuki, osheshi ngeenge omunhu ke fi omuyapuki, ita ka mona Omwene. 15 Lungameni opo paha kale nande oumwe ta xutwifa efilonghenda laKalunga; paha twiyuke omudi u na oudiyo oo tau eta omaupyakadi nokunyateka vahapu. 16 Lungameni yo opo mokati keni muha kale omuhaeli* ile oo ehe na olupandu loinima iyapuki, ngaashi Esau oo a li a yandja po oushiveli waye, opo a pewe oikulya. 17 Osheshi omu shi shii kutya lwanima eshi a li a hala okunangekwa noupuna, okwa li a talika ko ina wana. Nonande okwa li ta lili nota kendabala okwiitavelifa xe, ka li a pondola.

18 Nye kamwa li mwa ehena popepi nomhunda oyo hai dulu okukumwa, oyo ya xwama omundilo, ya uvikwa koshilemo shilaula, komulaulu, koshikungulu shomhepo, 19 nokwa li kwa udika ewi lenghuma nondaka ya popya novanhu okudja meulu, ndele eshi ve i uda, ova li va indila Moses vaha pwilikine vali kuyo. 20 Ova li va tilifwa kelombwelo olo tali ti: “Nokuli noshinamwenyo tashi kumu komhunda, oshi na okudipawa nomamanya.” 21 Moses naye okwa li a tilifwa kemoniko olo, nokwa ti: “Onda tila nohandi kakama.” 22 Ndele nye omwa ehena popepi nomhunda Sion, oshilando shaKalunga omunamwenyo, Jerusalem shomeulu nosho yo ongudu yovaengeli omayovi omilongo 23 va ongala pamwe. Omwa ehena popepi neongalo loiveli oyo ya shangelwa meulu nosho yo naKalunga Omutokoli waaveshe nowaavo va vaekwa nomhepo iyapuki nova ningwa va wanenena, 24 nomwa ehena yo popepi naJesus, omupokati wehangano lipe, oo e tu shamina nohonde yaye oyo i dule yaAbel.

25 Lungameni muhe lipwililikile ou ta popi nanye. Ngeenge ovo va li inava pwilikina kwaao a li e va pa elondwelo lopakalunga kombada yedu ova li va handukilwa, mbela fye itatu ka handukilwa sha kwata moiti ngeenge otwa kala inatu pwilikina kwaao ta popi nafye okudja meulu? 26 Pefimbo linya ondaka yaye oya li ya kakamifa edu, ashike paife okwa ti: “Itandi ka kakamifa vali edu alike, ndele ohandi ka kakamifa yo eulu.” 27 Outumbulilo “kakamifa vali” otau ulike kutya Kalunga ota ka xulifa po oinima oyo ya kakamifwa, oinima oyo ina shita, opo oyo inai kakamifwa i kale po. 28 Onghee hano, molwaashi ohatu ka mona Ouhamba oo itau dulu okukakamifwa, natu twikileni okumona ouwa mefilonghenda laKalunga, opo tu dule okulongela Kalunga oilonga iyapuki tu na etilokalunga nefimaneko. 29 Kalunga ketu oku li ngaashi omundilo oo hau lungwinifa filufilu.

13 Twikileni okukala mu holafane mu li ovamwainafana. 2 Inamu dimbwa okuyakula ovaenda,* osheshi vamwe ova yakula ovaengeli inave shi shiiva. 3 Dimbulukeni ovo ve li modolongo,* mwa fa mu li navo modolongo, naavo tava hepekwa, mwa fa tamu hepekwa pamwe navo. 4 Ohombo nai fimanekwe kwaaveshe, nomutala* wohombo nau kale uhe na oshipo, osheshi Kalunga ota ka tokola ovahaeli* novanyoni vohombo. 5 Inamu kala mu hole oimaliwa, ndele kaleni mwa wanenwa kwaasho mu na. Osheshi Kalunga okwa ti: “Itandi ku efa noitandi ku fiye po.” 6 Kungaho ohatu ka dula okupopya nomukumo hatu ti: “Jehova oye omukwafi wange; itandi tila sha. Omunhu ota ningi nge shike?”

7 Dimbulukeni ovo tava kwatele komesho mokati keni, ovo have mu hongo eendjovo daKalunga; taleni koidjemo iwa yelihumbato lavo nokuhopaenena eitavelo lavo.

8 Jesus Kristus oku li ngaashi a li onghela nonena, nosho ta kala fiyo alushe.

9 Inamu twalwaatwalwa komahongo amwe e lili noku lili, ndele pamekeni omitima deni nefilonghenda laKalunga ponhele yoku di pameka noikulya,* oyo ihai etele ouwa ovo ve i lenga sha pitilila.

10 Otu na oaltari oko inaku pitikilwa okulilwa kwaavo tava longo oilonga iyapuki metwali. 11 Omupristeri munene oha twala ohonde yoinamwenyo monhele iyapuki i li etimbayambo, nomalutu oinamwenyo oyo ohaa ka xwikilwa kondje yonhanda. 12 Onghee hano, Jesus naye okwa hepekelwa kondje yoshilando* opo a yapulife ovanhu nohonde yaye. 13 Natu yeni hano kuye kondje yonhanda tu ka shekwe ngaashi ye a li a shekwa, 14 osheshi katu na oshilando osho tashi kalelele, ndele otwa teelela nodjuulufi osho tashi uya. 15 Natu kaleni alushe hatu yambe omayambo kuKalunga moku mu tanga okupitila muJesus, hatu shi ningi mokuhepaulula edina laye moipafi hatu longifa omakanya etu.* 16 Shimwe vali, inamu dimbwa okulonga ouwa nokutukulilafana navamwe osho mu na, osheshi omayambo a tya ngaho ohaa hafifa unene Kalunga.

17 Dulikeni kwaavo tava kwatele komesho mokati keni nokuliyandja kuvo nehalo liwa, osheshi otave mu pashukile,* molwaashi otave ke mu pulwa, opo ve shi ninge nehafo, ndele hanokukema, molwaashi kungaho itashi ke mu etela ouwa.

18 Kaleni noku tu ilikanena, molwaashi otwe lineekela kutya otu na eliudo la yela,* notwa hala okukala ovanashili moinima aishe. 19 Ndele ohandi mu ladipike mu ilikane opo ndi uye kunye diva.

20 Kalunga kombili, oo a nyumuna omufita munene weedi, Omwene wetu Jesus, oo e na ohonde yehangano laalushe, 21 ne mu pe keshe osho shiwa opo mu longe ehalo laye; ne mu linyengife yo okupitila muJesus Kristus mu longe osho tashi mu hafifa. Kalunga na fimanekwe fiyo alushe. Amen.

22 Ovamwatate, ohandi mu ladipike mu pwilikine nelididimiko keendjovo edi detwomukumo, osheshi onde mu shangela onhumwafo i li pauxupi. 23 Onda hala mu shiive kutya omumwatate Timoteus okwa mangululwa. Ngeenge okwa fiki diva, ohatu uya kunye pamwe naye.

24 Kundileni po aveshe ovo hava kwatele komesho mokati keni novayapuki aveshe. Otamu kundilwa po kwaavo ve li muItali.

25 Efilonghenda laKalunga nali kale pamwe nanye amushe.