ONHUMWAFO YAJAKOB

1 Ame Jakob, omupiya waKalunga nowOmwene Jesus Kristus, ohandi kundile po omapata 12 oo e lihanena meenhele di lili noku lili.

2 Ovamwatate, kaleni mwa hafa ngeenge tamu shakeneke omayeleko e lili noku lili, 3 osheshi omu shi shii kutya ngeenge eitavelo leni tali yelekwa, eshi tamu piti meenghalo didjuu, otashi mu kwafele mu lididimike. 4 Eshi tamu lididimike, otamu lideula nye vene, opo mu kale muhe na oshipo nomu kale hamu shi endifa nawa moinima aishe.

5 Ngeenge ope na umwe womunye a pumbwa ounongo, na kale he u indile kuKalunga opo e u pewe, osheshi Kalunga oha yandje nehalo liwa kwaaveshe nopehe na okungongota.* 6 Omunhu oo na kale ha indile e na eitavelo, ndele ina kala e na omalimbililo nandenande, osheshi ou e na omalimbililo okwa fa ekufikufi lomefuta tali telaanifwa komhepo. 7 Omunhu oo e na omalimbililo, ina teelela a pewe sha kuJehova. 8 Oha ongaonga okuninga omatokolo noha tengauka meendjila daye adishe.

9 Omumwatate ohepele na kale a hafa* eshi a nenepekwa, 10 noshipuna nashi hafe eshi sha ninipikwa, molwaashi oipuna otai ka kana po ngaashi eengala domoixwa. 11 Ngaashi ashike etango hali xwike oimeno ngeenge tali piti, ndele eengala dayo tadi yaumuka ko, noihai monika vali nawa, oipuna nayo otai ka kana po ofimbo ya pwila mokulalakanena oupuna.

12 Ou te lididimikile eyeleko ota kala a hafa, osheshi ngeenge okwa kala a hokiwa kuJehova, ota ka pewa ondjabi yomwenyo oo Kalunga a udanekela ovo tava twikile okukala ve mu hole. 13 Ngeenge umwe ta yelekwa, ina tya: “Ohandi yelekwa kuKalunga.” Osheshi Kalunga iha dulu okuyelekwa nowii, noiha yeleke omunhu nowii. 14 Ndele omunhu keshe oha yelekwa komahalo aye mwene oo hae mu xwaxwameke noku mu hongaula.* 15 Ngeenge omahalo okwa fimbapala, ohaa dala oulunde, noulunde ngeenge owa wanifwa, ohau twala mefyo.

16 Ovamwatate ovaholike, inamu pukifwa. 17 Oshali keshe noinima aishe iwa ohai di meulu kuTate oo a shita ouyelele noiha lunduluka a fa omididimbe.* 18 Okwe tu shita a longifa eendjovo daye doshili, osho shi li metwokumwe nehalo laye, opo tu kale oiimati yotete yoishitwa yaye.

19 Ovamwatate ovaholike, shiiveni kutya: Omunhu keshe na kale ha endelele okupwilikina, he liteelele mokupopya noiha handuka diva, 20 osheshi omunhu oo ha handuka diva iha katuka metwokumwe nouyuki waKalunga. 21 Onghee hano, efeni po onyata nowii aushe, nye mu tambule ko nelininipiko* eendjovo odo da kunwa munye, odo tadi dulu oku mu xupifa.*

22 Kaleni ovawanifi veendjovo, ndele havapwilikini ashike vongaho, noinamu lipukifa nomatomhafano ongaho. 23 Osheshi ngeenge ope na umwe ha udu eendjovo daKalunga, ndele ihe di tula moilonga, okwa fa omunhu te litalele mesipili. 24 Ohe litalele mo, ndele shimha a di po, oha dimbwa diva kutya okwa tya ngahelipi. 25 Ndele ou ha konakona moule omhango yaKalunga ya wanenena, oyo tai eta emanguluko, nohe shi ningi e lipaka mo, ota ka kala omuduliki, ndele hamupwilikini ha dimbwa, nota ka hafela keshe osho ta longo.

26 Ngeenge ope na ou ta diladila kutya oku li omulongelikalunga, ndele iha pangele elaka laye,* ota pukifa omutima waye, nokulongela Kalunga kwaye okwongaho. 27 Elongelokalunga olo la koshoka nolihe na edilo pataleko laKalunga Tate yetu oli na okufila oshisho eefiye novafiyekadi momaudjuu avo, noli na okulikaleka kokule nokuhenoukoshoki kwounyuni ou.

2 Ovamwatate, mbela omwa diinina ngoo eitavelo mOmwene wetu Jesus Kristus oo a tumbalekwa, ngeenge omu na okatongo? 2 Ngeenge mokati keni omwe uya ovanhu vavali, umwe okwa djala eelinga doingoli noikutu yondilo, ofimbo umwe ohepele a djala oikutu ya kulupa, 3 mbela ohamu ungaunga nefimaneko naao a djala oikutu yondilo, ndele tamu ti: “Kala omutumba koipundi ei yovafimanekwa,” ofimbo tamu ti kohepele, “Kala wa fikama” ile, “Kala omutumba peemhadi dange”?* 4 Ngeenge ohamu ningi ngaho, mbela osho itashi ulike kutya omu na okatongo nomwa fa ovatokoli ovo ihava tokola pauyuki?

5 Ovamwatate ovaholike, pwilikineni. Mbela Kalunga ina hoolola ovo eehepele pataleko lounyuni va ninge oipuna yeitavelo nova ka fyuulule Ouhamba oo a udanekela ovo ve mu hole? 6 Ndele omwa dina eehepele. Mbela oipuna hayo hai mu hepeke noku mu twala keemhangu? 7 Mbela hayo hai sheke edina liwa olo mwa humbata? 8 Otamu ningi nawa ngeenge ohamu dulika komhango yOhamba oyo ya popiwa momushangwa taku ti: “Hola mukweni ngaashi u lihole mwene.” 9 Ndele ngeenge otamu twikile okukala mu na okatongo, otamu nyono, nomhango otai ulike kutya omu na ondjo.

10 Ngeenge omunhu oha dulika kOmhango aishe, ndele ta nyono oshipango shimwe shomOmhango, kungaho okwa nyona Omhango aishe. 11 Osheshi ou a ti: “Ino nyona ohombo,” oye yo a ti: “Ino dipaa.” Ngeenge iho nyono ohombo, ndele oho dipaa, kungaho owa nyona omhango. 12 Kaleni hamu popi nokulihumbata ngaashi ovanhu ovo tava ka tokolwa komhango yemanguluko.* 13 Ou ehe na onghenda ota ka tokolwa nopehe na onghenda. Osheshi onghenda oi dule etokolo.

14 Ovamwatate, otashi kwafa shike ngeenge umwe ota ti kutya oku na eitavelo, ndele ite li ulike pailonga? Mbela eitavelo la tya ngaho otali dulu ngoo oku mu xupififa? 15 Ngeenge ope na ovamwatate ile ovamwameme vehe na oikutu* noikulya ya wana oule wefiku, 16 mbela otashi kwafa shike ngeenge umwe womunye okwa kala ine va pa osho va pumbwa, ndele ta ti kuvo: “Indeni nombili; otamu ka mona oikutu noikulya”? 17 Sha faafana, eitavelo lihe na oilonga ola fya.

18 Ndele umwe otashi dulika a tye: “Ove ou na eitavelo alike, ndele lange oli na oilonga. Ulikile nge eitavelo loye lihe na oilonga, ofimbo ame handi ku ulikile lange okupitila moilonga.” 19 Mbela owa itavela kutya oku na Kalunga umwe aeke? Ou li mondjila lela. Eendemoni nado ode shi itavela, nohadi kakama. 20 Elai ove, mbela ku shi shii kutya eitavelo lihe na oilonga olongaho? 21 Mbela tate yetu Abraham ka li a talika ko omuyuki omolwoilonga yaye eshi a li ta ka yamba po omona waye Isak koaltari? 22 Osha yela kutya eitavelo laye ola li tali endele pamwe noilonga nola li la ulikwa koilonga yaye, 23 nomushangwa owa wanifwa oo tau ti: “Abraham okwa itavela muJehova, nokwa talwa ko omuyuki,” ndele ta ifanwa kaume kaJehova.

24 Osha yela kutya omunhu ita talika ko omuyuki omolweitavelo alike, ndele oku na oku li ulika pailonga. 25 Sha faafana, mbela Rahab oo a li ombwada naye ka li a talika ko omuyuki omolwoilonga eshi a li a yakula eendadi* noku di lekela di ye nondjila imwe i lili? 26 Ngaashi ashike olutu lihe na omufudo* la fya, eitavelo lihe na oilonga nalo ola fya.

3 Ovamwatate, vahapu vomunye kave na okuninga ovahongi, molwaashi omu shi shii kutya ohatu ka tokolwa sha kwata moiti. 2 Osheshi atusheni ohatu ningi omapuko* luhapu. Ngeenge ope na ou iha ningi epuko mokupopya, okwa wanenena nota dulu yo okupangela olutu laye alishe. 3 Onghambe ngeenge otwe i tula oshitomo mokanya i dulike kufye, ohatu dulu yo okupangela olutu layo alishe. 4 Sha faafana, nonande oshikepa oshinima sha kula, nohai telaanifwa komhepo idjuu, ohai wilikwa komushingi nokayukifo kanini, nohe i yukifa keshe oko a hala i ye.

5 Elaka nalo oli li oshilyo shinini sholutu, ndele ohali litangele oinima inene. Sha faafana, omundilo ou li oshinima shinini, ndele ohau dulu okuxwika ofuka inene. 6 Elaka nalo ola fa omundilo. Ohali dulu okunyateka olutu alishe nokulonga owii muhapu li dule oitukulwa aishe yolutu. Ohali dulu okuhanauna po onghalamwenyo yomunhu aishe ngaashi Gehenna.* 7 Oinamwenyo aishe yomoixwa, oudila, oilipwedi noinamwenyo yomefuta ohai deulwa noya kala hai deulwa kovanhu. 8 Ndele kape na omunhu ta dulu okudeula elaka. Itali dulu okupangelwa, ohali longo owii noli yadi oudiyo. 9 Olo hatu longifa okutanga Tate yetu Jehova, ndele natango olo yo hatu longifa okutuka ovanhu vakwetu ovo va shitwa “oshifeka shaKalunga.” 10 Mokanya omo hamu di enangeko noupuna omo yo hamu di omatukano.

Ovamwatate, hasho shi na okukala ngaho. 11 Mbela mofifiya otamu dulu ngoo okudja omeva mawa nomeva malula oshita? 12 Ovamwatate, mbela komukwiyu otaku dulu ngoo okwiima eemono, ile komundjebele otaku dulu ngoo okwiima eenghwiyu? Sha faafana, ofifiya yomeva malula itai dulu okudja omeva mawa.

13 Mbela mokati keni omu na omunaendunge? Ngeenge osho, ne shi ulike okupitila melihumbato laye liwa, mokulonga oilonga nelininipiko* olo hali di mounongo. 14 Ndele ngeenge omu na eenhamanana* nondubo momitima deni, inamu litangela ounongo weni, molwaashi kungaho omu li ovanaipupulu. 15 Ounongo wa tya ngaho inau dja pombada, ndele owomounyuni ou, wopambelela noweendemoni. 16 Osheshi keshe apa pe na ondubo neenhamanana,* ope na yo edundakano nowii aushe.

17 Ounongo wopombada tete ohau ningifa omunhu a kale a koshoka, nosho yo a kale e na ombili, ondjele, onghenda, ha dulika nehalo liwa, ha longo oilonga iwa,* ehe na okatongo nokuhe na oihelele. 18 Kakele kaasho, ovo hava lalakanene ekwatafano liwa navamwe ohashi va kwafele va xumife komesho ombili nova longe ouyuki.

4 Oshike tashi etifa omashilafano nomalwoodi mokati keni? Mbela itaa etwa komahalo eni mai opambelela oo taa pangele omalutu eni?* 2 Osho mwa hala ihamu shi pewa. Omu tondafane* nomu na efupandubo, ashike inamu dula okumona sha. Ohamu kondjifafana nokulwifafana. Inamu mona sha molwaashi inamu pula sha. 3 Ngeenge tamu pula sha, ihamu shi pewa molwaashi ohamu indile nomalinyengotomheno a puka, opo mu wanife po omahalo eni opambelela.

4 Ovanyoni vohombo nye,* mbela kamu shi shii kutya ngeenge omwa pange oukaume nounyuni otamu ningi ovatondi vaKalunga? Onghee hano, keshe oo a hala okukala kaume kounyuni ote liningi omutondi waKalunga. 5 Ile otamu diladila kutya omushangwa owa popya oinima yongaho ou tau ti: “Oikala yondubo oyo i li mufye ohai tu xwaxwameke tu kale twa hala keshe shimwe”? 6 Kalunga oku na efilonghenda linene. Omushangwa owa ti: “Kalunga oha katukile onghatu ovalinenepeki, ndele oha file onghenda ovalininipiki.”

7 Onghee hano, dulikeni kuKalunga; kondjifeni Ondiaboli, ndele tai mu i onhapo. 8 Eheneni popepi naKalunga, opo nee ota ka ehena popepi nanye. Yelifeni omake eni nye ovalunde; yelifeni omitima deni nye ovanamitimambali. 9 Kaleni mwa nyika oluhodi nokulila. Okuyola kweni naku shituke oluhodi, nehafo leni nali shituke enyeme. 10 Lininipikeni koshipala shaJehova, opo e mu nenepeke.

11 Ovamwatate, efeni po okupopilafana mowii. Keshe ou ha popile mowii noha tokola omumwaxe ota sheke nota tokola omhango. Ngeenge oho tokola omhango, kungaho iho dulika kuyo, ndele ou li omutokoli. 12 Oku na ashike Omuyandjimhango nOmutokoli umwe aeke, oo ta dulu okuxupifa nokuhanauna. Ndele oove lyelye eshi to tokola mukweni?

13 Pwilikineni nye ovo hamu ti: “Ohatu i koshilando shonhumba nena ile mongula, hatu ka kala ko omudo aushe, opo tu ka landife tu mone oimaliwa,” 14 ofimbo muhe shii kutya oshike tashi ke mu ningilwa mefiku lomongula. Osheshi omwa fa omwifi oo hau holoka po okafimbo kanini, ndele tau kana po. 15 Ponhele yaasho, omu na okutya: “Ngeenge Jehova e shi hala, ohatu kala nomwenyo, ndele hatu ningi eshi naashinya.” 16 Paife ohamu litange omolwounhwa weni, ashike elitango la tya ngaho kaliwa. 17 Onghee hano, ngeenge ope na ou e shii okulonga ouwa, ndele ite u longo, ota nyono.

5 Oipuna nye, pwilikineni, lileni nokunyika oluhodi omolwomaudjuu oo tae ke mu hanga. 2 Eliko leni ola kwisha* noikutu yeni oya lika keenhwishi. 3 Oshingoli noshisilveri sheni osha ninga olushu, nolushu layo otali ka holola kutya omwa puka notali ke mu hanauna po. Osho mwe lituvikilila otashi ka kala ngaashi omundilo momafiku axuuninwa. 4 Taleni, ovanailonga ovo va longa momapya eni otava lili molwaashi inamu va futa, nokulila kwavo okwa udika kuJehova womatanga ovakwaita. 5 Omu li oipuna kombada yedu notamu lihafifa. Omwa fa oinamwenyo oyo hai li, ndele tai ondoka fiyo efiku lokudipawa. 6 Omwa tokola omuyuki nomwe mu dipaa. Mbela itamu ka katukilwa onghatu?

7 Ovamwatate, lididimikeni fiyo okukala po kwOmwene. Taleni, omunepya oha kala a teelela oiimati iwa yedu, nohe i teelele nelididimiko fiyo oshihomo shotete shodula noshaxuuninwa she uya. 8 Nanye teeleleni nelididimiko; pamekeni omitima deni molwaashi okukala po kwOmwene okwa ehena popepi.

9 Ovamwatate, inamu kala tamu ngongotelafana, opo muha tokolwe. Taleni, omutokoli oku li ofika poshivelo. 10 Ovamwatate, taleni kovaprofeti ovo va popya medina laJehova nokulandula oshihopaenenwa shavo shelididimiko eshi va hepekwa shihe li pauyuki. 11 Taleni, ovo have lididimike ova hafa.* Omwa uda shi na sha nelididimiko laJob, nomu shii omanangeko noupuna oo Jehova e mu pa, osho tashi ulike kutya Jehova omunalukeno nomunanghenda.

12 Ovamwatate, komesho yaaishe, inamu ana vali, kutya nee okeulu, okedu ile okushimwe shi lili. Ndele “Heeno” yeni nai kale heeno, na “Ahowe” yeni nai kale ahowe, opo muha tokolwe.

13 Mbela ope na umwe womunye ta mono oixuna omolweenghalo didjuu? Na kale ta ilikana. Mbela ope na umwe a hafa? Na imbe omaimbilohambelelo. 14 Mbela ope na umwe mokati keni ta vele? Na ifane ovakulunhuongalo ve uye kuye, opo nee otave ke mu ilikanena noku mu vaeka omaadi medina laJehova. 15 Eilikano lovaitaveli otali ka velula oo ta vele,* na Jehova ote ke mu yambula po. Nongeenge okwa nyona, ota ka diminwa po.

16 Onghee hano, hepaululilafaneni omanyono eni nokwiilikanenafana, opo mu velulwe. Eindilo lomuyuki oli na eenghono notali dulu okukwafela. 17 Elia okwa li omunhu ngaashi fye, ndele okwa li a ilikana a mana mo opo odula iha loke, noya kala inai loka oule womido nhatu neemwedi hamano. 18 Opo nee okwa li a ilikana vali, nodula oya li ya hovela okuloka, ndele edu tali menifa oimeno.

19 Ovamwatate, ngeenge umwe womunye okwa efa po oshili, ndele umwe te mu kwafele a aluke, 20 shiiveni kutya oo e mu alula menyono okwe mu xupifa* mefyo nokwe mu kwafela a diminwe po omanyono aye.