PETRUS WOTETE

1 Ame Petrus, omuyapostoli waJesus Kristus, ohandi mu shangele ovo mwe lihanena muPontus, muGalatia, muKappadokia, muAsia nomuBitinia, ovo mu li ovanailongo nomwa hoololwa 2 kuKalunga Tate metwokumwe naasho a ufa komesho yefimbo. Okwe mu pa omhepo iyapuki opo mu kale ovayapuki. Osho okwe shi ninga opo mu kale hamu dulika kuye, nokwe mu koshola nohonde yaJesus Kristus:

Efilonghenda nombili yaKalunga oyo mu na nai hapupale.

3 Kalunga Xe yOmwene wetu Jesus Kristus na hambelelwe, omolwonghenda yaye inene eshi e shi ningifa tashi shiiva opo tu dalululwe okupitila menyumuko laJesus Kristus notu kale neteelelo la twa 4 li na sha nefyuululo olo itali xulu po. Efyuululo olo omwe li tuvikililwa meulu, 5 nye ovo tamu amenwa keenghono daKalunga omolweitavelo leni, opo mu ka mone exupifo olo tali ka hololwa pefimbo lexulilo. 6 Osho oshe mu etela ehafo linene, nonande otamu shakeneke eenghalo didjuu oule wokafimbo kanini, 7 opo eitavelo leni la yelekwa li mu ningife mu tangwe, mu tumbalekwe nomu fimanekwe pokuhololwa kwaJesus Kristus. Eitavelo leni oli na ongushu li dulife oshingoli osho hashi hanauka po nonande osha pita* momundilo. 8 Omu hole Kristus nonande inamu mu mona nandenande. Nonande kamu mu wete paife, omwe mu itavela nomwa hafa neenghono, 9 molwaashi omu shii kutya otamu* ka xupifwa omolweitavelo leni.

10 Ovaprofeti ovo va hepaulula kombinga yefilonghenda linene laKalunga olo mwa ulikilwa ova kala tava diladila moule nokukonakona noukeka kombinga yexupifo olo. 11 Kalunga okwe va lombwela komesho yefimbo okupitila momhepo iyapuki kutya Kristus ota ka mona oixuna, nolwanima ota ka tumbalekwa. Osho osho she va ningifa va kendabale okumona kutya Kristus ota ka ningilwa shike nonaini tashi ka ningwa. 12 Kalunga okwe va kwafela va shiive kutya osho va hepaulula ove shi ninga molweni, ndele hamolwavo vene, naasho va hepaulula osho sha shiivifwa kwaavo ve mu udifila onghundana iwa okupitila momhepo iyapuki ya dja meulu. Ovaengeli navo ova halelela okushiiva kombinga yoinima oyo.

13 Longekidileni omadiladilo eni oilonga idjuu; kaleni ovanaendunge elela; lineekeleni efilonghenda laKalunga olo tamu ka ulikilwa pokuhololwa kwaJesus Kristus. 14 Ngaashi ovana ovaduliki, inamu shikula vali omahalo mai oo mwa li mu na eshi mwa li muhe shii Kalunga, 15 ndele ngaashi Omuyapuki ou e mu ifana, nanye kaleni ovayapuki moinima aishe, 16 osheshi opa shangwa: “Kaleni ovayapuki, molwaashi ame omuyapuki.”

17 Ndele ngeenge otamu ifana Tate ou ha tokola keshe umwe she likolelela koilonga yaye nopehe na okatongo, elihumbato leni eshi mu li ovaenda mounyuni ou nali ulike kutya omu na etilokalunga. 18 Osheshi omu shi shii kutya monghalamwenyo inai koshoka oyo mwa fyuulula kooxokulululwa inamu mangululwa* mo noinima oyo hai xulu po ngaashi oshisilveri ile oshingoli. 19 Ndele onohonde i na ondilo, ya fa yodjona ihe na edilo noya koshoka filufilu, sha hala okutya yaKristus. 20 Okwa kala e shiivike nale ofimbo ounyuni inau shitwa, ndele okwa li a hololwa pefimbo lexulilo omolweni. 21 Omwa itavela muKalunga okupitila muKristus oo a nyumunwa koufi nokwa pewa efimano, opo mu kale mwa itavela nomwe lineekela Kalunga.

22 Molwaashi ohamu dulika kehongo loshili, omwe liyapula* nomolwaasho mu na ohole youmwainafana ihe na oihelele; onghee kaleni mu holafane tashi di komutima. 23 Inamu dalululwa kombuto oyo tai xulu po, ndele okombuto oyo tai kalelele,* nosha ningwa okupitila meendjovo daKalunga omunamwenyo oo e li po fiyo alushe. 24 “Ovanhu aveshe* ove li ngaashi omwiidi, nefimano lavo ola fa eengala domoixwa; omwiidi neengala ohai kukuta po, 25 ndele eendjovo daJehova otadi kala po fiyo alushe.” ‘Neendjovo’ odo odo onghundana iwa oyo mwa udifilwa.

2 Efeni po owii aushe, oukengeleledi, oihelele, efupandubo nosho yo omatukano. 2 Ndele ngaashi ouhanana hava kala va halelela okunyama, nanye kaleni mwa halelela okulihonga oshili yeendjovo daKalunga odo da fa omashinishini, opo mu kule nomu ka xupifwe, 3 molwaashi omwa mona* kutya Omwene oku na olune.

4 Eshi tamu ehene popepi nOmwene, oo e li emanya li na omwenyo la ekelwashi kovanhu, ndele Kalunga okwe mu hoolola nokwe mu tala ko a fimana, 5 mu li omamanya e na omwenyo otamu tungilwa keumbo la tungwa pawiliko lomhepo yaKalunga* mu kale ovapristeri ovayapuki, opo mu dule okuyamba omayambo oo a hokiwa kuKalunga tamu shi ningi metwokumwe newiliko lomhepo yaKalunga okupitila muJesus Kristus. 6 Omushangwa owa ti: “Tala, ohandi diki muSion emanya olo nda hoolola, emanya la fimanenena* olo li li ekanghameno, ndele keshe ou e na eitavelo mulo ita ka nyematekwa.”*

7 Okwa fimana kunye ovo mwa itavela, ndele kwaavo inava itavela, “oku li emanya olo la ekelwashi kovatungi, olo la ninga emanya la fimanenena”* 8 nosho yo “emanya lepundukifo.” Ohava pundukifwa molwaashi ihava dulika keendjovo daKalunga. Ovanhu va tya ngaho osho tava ningilwa ngaho. 9 Ndele nye omu li “epata la hoololwa, eehamba novapristeri, oshiwana shiyapuki noshi li emona le likalekelwa, opo mu udife keshe pamwe shi na sha nouwa waKalunga,”* ou e mu ifana mo momilaulu mu ye mouyelele waye wa twa. 10 Osheshi nale kamwa li oshiwana shaKalunga, ndele paife omwa ninga oshiwana shaye; nale kamwa li mwa filwa onghenda, ndele paife omwa filwa onghenda.

11 Ovamwatate ovaholike, ohandi mu kumaida mu li ovanailongo novaenda mounyuni ou mu likaleke kokule nomahalo opambelela oo hae mu kondjifa.* 12 Kaleni mu na elihumbato liwa mokati kovanhu vomounyuni, opo ngeenge tave mu lundile kutya omu li ovalongi vowii, va mone oilonga yeni iwa nova fimaneke Kalunga eshi te uya okutokola.

13 Dulikeni komapangelo aeshe opanhu omolwOmwene, kutya nee okohamba, molwaashi oi na ondodo yopombada, 14 ile okoongoloneya ovo va nangekwa po kohamba, opo va handukile ovalongi vowii nokupandula ovo tava longo ouwa. 15 Osheshi Kalunga okwa hala mu longe ouwa, opo mu mweneke* omalai oo haa popi eendjovo dongaho. 16 Kaleni ngaashi ovamangululwa; inamu longifa emanguluko leni li li elipopilo* lokulonga owii, ndele ongaashi ovapiya vaKalunga. 17 Fimanekeni ovanhu vomaludi aeshe, kaleni mu hole ovamwatate aveshe, tileni Kalunga nokufimaneka ohamba.

18 Ovapiya nava dulike nokufimaneka oovene vavo; kave na ashike okudulika kwaavo ve li nawa nove na ondjele, ndele nokwaavo yo ve na onyanya. 19 Osha yuka ngeenge umwe te lididimikile omaudjuu* nokuhepekwa shihe li pauyuki molwaashi a hala okukala e na eliudo liwa koshipala shaKalunga. 20 Osheshi otashi kwafa shike ngeenge to lididimikile okudengwa molwaashi wa nyona? Ohashi hafifa Kalunga ngeenge to lididimikile okumona oixuna molwaashi to longo ouwa.

21 Omwa ifanwa mu hepekwe shihe li pauyuki molwaashi Kristus naye okwe mu hepekelwa nokwe mu tulila po oshihopaenenwa mu shikule filufilu eenghatu daye. 22 Ka li a nyona sha, noina popya oipupulu nandenande. 23 Eshi a li ta tukwa,* ine va shunifila omatukano.* Eshi a li ta hepekwa, ka li e va ningila omatilifo, ndele okwa li e lineekela filufilu Kalunga oo ha tokola pauyuki. 24 Okwa kufa po omatimba etu eshi a valelwa komuti, opo tu mangululwe mo moulunde notu kale ovayuki. “Omwa veluka omolwoipute yaye.” 25 Osheshi omwa li mwa twalwaatwalwa mwa fa eedi, ndele paife omwa alukila komufita nomupashukili weemwenyo deni.

3 Ovakulukadi, dulikeni kovashamane veni, opo ovashamane ovo ihava dulika keendjovo daKalunga, va findwe kelihumbato leni nonande kape na eendjovo, 2 molwaashi ove wete elihumbato leni liwa naashi hamu va fimaneke neenghono. 3 Inamu kala ashike tamu yandje elitulemo kewapalo lokombada, ngaashi okupandwa, okudjala oulyenge voshingoli ile oikutu yondilo, 4 ndele yandjeni elitulemo kewapalo olo itali xulu po, ounhu womeni womomutima, sha hala okutya okukala nengungumano nomwenyo muwa, omaukwatya oo Kalunga a tala ko a fimanenena. 5 Osheshi novakainhu ovayapuki vonale, ovo va li ve lineekela Kalunga, navo ova li hava yandje elitulemo kewapalo olo itali xulu po, va li hava dulika kovashamane vavo, 6 ngaashi ashike Sara a li ha dulika kuAbraham nokwe mu ifana omwene. Ndele nye otamu ningi ovana vaSara, ngeenge omwa twikile okulonga ouwa muhe na oumbada.

7 Ovashamane, kaleni hamu ungaunga novakulukadi veni neendunge,* opo omailikano eni a udike kuKalunga. Ungaungeni navo nefimaneko ngaashi tamu ungaunga noiyuma inai pama molwaashi navo otava ka fyuulula omwenyo pamwe nanye omolwefilonghenda laKalunga.

8 Shimwe vali, amushe kaleni mu na ediladilo limwe,* oukwao wananghali, ohole youmwainafana, olukeno nelininipiko. 9 Inamu lishunifila owii ile omatukano. Ndele ponhele yaasho, nangekeni noupuna vakweni molwaashi Kalunga okwe mu hoolola mu ninge ngaho, opo nanye e ke mu nangeke noupuna.

10 “Keshe oo e hole omwenyo nokwa hala okukala a hafa na henuke okupopya owii, nomokanya kaye inamu dja eendjovo doukengeleledi. 11 Na efe po owii, ndele ta longo ouwa; na lalakanene ombili noku i kaleka po. 12 Osheshi omesho aJehova ohaa tale ovayuki, nomatwi aye ohaa pwilikine komaindilo avo, ndele Jehova oku tonde ovo hava longo owii.”

13 Olyelye te ke mu ningila owii ngeenge omu na ouladi wokulonga ouwa? 14 Ndele nonande otamu hepekelwa ouyuki, kaleni mwa hafa. Onghee hano, inamu tila osho ovanhu hava tila,* noinamu piyaanekwa kusha. 15 Yapuleni Kristus momitima deni e li Omwene, opo mu kale mu shii okunyamukula keshe oo te mu pula ekanghameno leteelelo olo mu na, tamu shi ningi nomwenyo muwa nonefimaneko linene.

16 Kaleni mu na eliudo liwa nonande otamu popilwa mowii, opo ovo tave mu popile mowii va fifwe ohoni molwaashi omu na elihumbato liwa mu li ovashikuli vaKristus. 17 Osheshi oshiwa okuhepekwa molwaashi tamu longo ouwa, ngeenge Kalunga okwe shi pitika, shi dulife okuhepekwa molwaashi tamu longo owii. 18 Omuyuki Kristus okwa fya palumwe, opo a mangulule moulunde ovo vehe fi ovayuki noku va ehenifa popepi naKalunga. Okwa dipawa e li omunhu wopambelela, ndele okwa nyumunwa e li omunhu wopamhepo. 19 E li omunhu wopamhepo, okwa ya a ka udifile ovaengeli ovo va li modolongo, 20 ovo va li inava dulika pefimbo laNoa. Kalunga okwa li e va tala onheni ofimbo onguluwato ya li tai tungwa, omo ovanhu vanini, sha hala okutya ovanhu* vahetatu va xupifilwa omolwomeva.

21 Osho otashi faneke eninginifo olo tali mu xupififa kunena okupitila menyumuko laJesus Kristus, (eninginifo itali kufa po onyata yombelela, ndele otali mu kwafele mu kale mu na eliudo liwa koshipala shaKalunga). 22 Kristus okwa ya meulu, noku li omutumba kolulyo laKalunga, onghee ovaengeli, ovapangeli novanaenghono otava dulika kuye.

4 Ndele molwaashi Kristus okwa hepekwa eshi a li molutu lopambelela, nanye kaleni mwe lilongekida* okukala hamu diladila ngaashi Kristus, osheshi keshe oo a hepekwa okwa efa po okulonga oulunde, 2 opo a longe ehalo laKalunga okukalamwenyo kwaye akushe e li molutu lopambelela, ndele hakuwanifa po omahalo opanhu. 3 Osheshi osha wana eshi mwa kala hamu wanifa po omahalo ovanhu vomounyuni mokunyona nopehe na ouxwenge,* okuhapangela omahalo eni, okunwa sha pitilila, okukufa ombinga moivilo ihe na elandulafano* nomomafiyafano okunwa oikolwifa nosho yo okulongela oikalunga. 4 Ndele ohashi va kumwifa eshi ihamu longo vali owii pamwe navo, nomolwaasho have mu popile mowii. 5 Ovanhu va tya ngaho otave ke lihokolola kwaao ta ka tokola ovanamwenyo novafi. 6 Nomolwaasho onghundana iwa ya udifilwa yo novafi,* opo va kale nomwenyo pataleko laKalunga nokuwilikwa komhepo yaye nonande ova tokolwa pambelela pataleko lopanhu.

7 Exulilo loinima aishe ola ehena popepi. Onghee hano, kaleni mu na eendunge nomwe lilongekida* okwiilikana. 8 Komesho yaaishe, kaleni mu holafane nohole yomoule, molwaashi ohole ohai tuvikile onduba yomatimba. 9 Yakulafaneni nopehe na okungongota. 10 Ngaashi omalenga oo haa longo noudiinini nokwa ulikilwa efilonghenda laKalunga meenghedi di lili noku lili, yakulafaneni keshe umwe she likolelela koshali oyo a pewa. 11 Keshe ou ta popi, ne shi ninge ngaashi ta popi etumwalaka laKalunga, naau ta yakula, ne shi ninge ngaashi oo a pewa eenghono kuKalunga, opo Kalunga a fimanekwe moinima aishe okupitila muJesus Kristus. Efimano neenghono odaKalunga alushe fiyo alushe. Amen.

12 Ovamwatate ovaholike, inamu kumwa ngeenge tamu shakeneke omayeleko a kwata moiti,* mwa fa ngeno tamu ningilwa oshinima inashi ningwa nale. 13 Mepingafano naasho, kaleni mwa hafa eshi tamu hepekelwa osho Kristus a hepekelwa, opo mu ka mone ehafo linene pefimbo lokuhololwa kwoshinge shaye. 14 Ngeenge tamu shekelwa* edina laKristus, kaleni mwa hafa, molwaashi omhepo yoshinge, sha hala okutya omhepo yaKalunga, oi li pamwe nanye.

15 Onghee hano, inandi hala nande oumwe womunye a hepekwe molwaashi e li omudipai, ombudi, ha longo owii ile he lidopo moinima yavamwe. 16 Ngeenge ope na ou ta hepekwa molwaashi e li Omukriste, ina fya ohoni, ndele na twikile okufimanekifa Kalunga e li Omukriste. 17 Osheshi eli olo efimbo olo la tulwa po, opo etokolo li hovele meumbo laKalunga. Ndele ngeenge ola hovele tete mufye, oshike tashi ka ningilwa ovo ihava dulika konghundana iwa yaKalunga? 18 “Ngeenge omuyuki oku na okulonga noudiinini opo a xupifwe, mbela oshike tashi ka ningilwa omuhenakalunga nomulunde?” 19 Onghee hano, ovo tava hepekwa molwaashi tava longo ehalo laKalunga nava twikile okulonga ouwa nokulineekela* Omushiti oo e li omudiinini.

5 Ndi li omukulunhuongalo, nonda mona nghee Kristus ta hepekwa nohandi ka pewa yo oshinge osho tashi ka hololwa, ohandi kumaida ovakulunhuongalo ovo ve li mokati keni kutya: 2 Lifeni oufita waKalunga oo mwe lineekelelwa, mu li ovapashukili,* hakefininiko, ndele onehalo liwa koshipala shaKalunga; hakukala mwa hala okulikola, ndele shi ningeni tashi di komutima; 3 inamu pangela ovo ve li efyuululo laKalunga, ndele kaleni oshihopaenenwa koufita. 4 Ngeenge omufita munene okwa hololwa, otamu ka pewa oshishani shefimano tashi kalelele.

5 Kakele kaasho, ovalumenhu ovanyasha, dulikeni kovalumenhu ovanamido. Ashike amushe kaleni ovalininipiki* eshi tamu ungaungafana navakweni, molwaashi Kalunga oha katukile onghatu ovalinenepeki, ndele oha file onghenda ovalininipiki.

6 Onghee hano, lininipikeni koshi yeke laKalunga li na eenghono, opo e mu nenepeke pefimbo la wapala, 7 mu shiivifileni oisho* yeni aishe, molwaashi oku na ko nasha nanye. 8 Kaleni ovanaendunge nomu li oupafi. Osheshi omutondi weni, Ondiaboli, ohe mu dingilile ngaashi onghoshi tai kumbu ya hala okuxwaka po umwe.* 9 Mu lwifeni mwa mana mo, mwa pama meitavelo, nokukala mu shi shii kutya ovamwaxo aveshe mounyuni navo otave lididimikile omaudjuu a faafana. 10 Ndele konima eshi mwa hepekwa oule wokafimbo kanini, Kalunga omunefilonghenda alishe, oo e mu ifanena efimano laalushe omolwaKristus, ota ka manifa oku mu deula. Ote ke mu pa eenghono, te mu kwafele mu kale ovadiinini nomwa pamenena. 11 Eenghono odaye fiyo alushe. Amen.

12 Onde mu shangela onhumwafo i li pauxupi okupitila muSilvanus,* omumwatate omudiinini, opo ndi mu twe omukumo noku mu shilipaleka kutya eli olo efilonghenda lashili laKalunga. Efilonghenda olo inamu li kwata okahetengi. 13 Omumwameme oo e li muBabilon, omuhoololwa mukweni, nosho yo omumwange Markus, otave mu kundile po. 14 Kundilafaneni po nokuxupitafana pahole.

Amushe ovo mu li ovahongwa vaKristus kaleni nombili.