PETRUS OMUTIVALI

1 Ame Simon Petrus, omupiya nomuyapostoli waJesus Kristus, ohandi mu shangele ovo mu na eitavelo ngaashi fye* li na ondilo olo tu na omolwouyuki waKalunga nowOmuxupifi wetu Jesus Kristus:

2 Efilonghenda nombili yaKalunga oyo mu na nai mu hapupalifilwe okupitila meshiivo lokushiiva Kalunga naJesus Omwene wetu, 3 molwaashi kungaho ote tu pe eenghono,* opo tu kale tu na oinima aishe oyo tai tu kwafele tu kale tu na etilokalunga omolweshiivo lashili lokushiiva Kalunga, oo e tu ifanena oshinge shaye nosho yo ouwa waye. 4 Kalunga okwe tu pa* omaudaneko a denga mbada okupitila moinima oyo, opo mu ka kale nomaukwatya a fa aye mu li oishitwa yopamhepo, nomwa manguluka ko kenyonauko lounyuni olo hali etifwa komahalo mai.*

5 Onghee hano, ningeni eenghendabala da mana mo, opo keitavelo leni mu wede ko ouwa, nokouwa eshiivo, 6 keshiivo elipangelo, kelipangelo elididimiko, kelididimiko etilokalunga, 7 ketilokalunga ohole youmwainafana, nokohole youmwainafana ohole yokuhola ovanhu aveshe. 8 Ngeenge omwa kala mu na omaukwatya oo pauyadi, otamu ka longifa eshiivo leni lashili li na sha nOmwene wetu Jesus Kristus, opo mu kale hamu imike oiimati nomuha sholole.

9 Ngeenge ope na umwe ehe na omaukwatya oo, okwa twika, ke wete ouyelele* nokwa dimbwa kutya okwa diminwa po omanyono aye onale. 10 Onghee hano, ovamwatate, longeni noudiinini opo mu kale vamwe vomwaavo va ifanwa nova hoololwa kuKalunga, osheshi ngeenge omwa kala tamu kulike omaukwatya oo, otamu kala ovadiinini. 11 Kungaho otamu ka mona filufilu* omhito yokuya mOuhamba waalushe wOmwene nOmuxupifi wetu Jesus Kristus.

12 Onghee onda kala alushe nda hala oku mu dimbulukifa oinima oyo, nonande omu i shii nale nomwa pamenena moshili oyo mwe lihonga. 13 Ndele ondi wete sha yuka oku mu dimbulukifa vali oinima oyo ofimbo ndi li molutu* eli, 14 molwaashi ondi shi shii kutya olutu* eli ohandi li fiye po mafiku, ngaashi Omwene wetu Jesus Kristus a shiivifila nge. 15 Ohandi longo alushe noudiinini, opo mu dule okudimbuluka kunye vene oinima oyo eshi handi ka ya.

16 Eshi twe mu shiivifila shi na sha neenghono nosho yo okukala po kwOmwene wetu Jesus Kristus inashi kanghamena komahokololo oipupulu a totwa kovanhu, ndele otwa mona efimano laye linene. 17 Okwa pewa efimano noshinge kuKalunga kefimano Tate, eshi a ti kuye: “Ou Omona wange omuholike, ou nde mu hokwa.” 18 Eendjovo odo da dja meulu otwe di uda eshi twa li pamwe naye komhunda iyapuki.

19 Otu na oushili kutya omaxunganeko otaa ka wanifwa po, nomolwaasho sha yuka okuyandja elitulemo komaxunganeko oo e li ngaashi olamba tai minikile momilaulu, sha hala okutya momitima deni, fiyo osheshi kwa sha, nonyofi yongula ya pita. 20 Omu shi shii kutya kape na exunganeko lopaMishangwa la kanghamena komadiladilo opanhu. 21 Osheshi kape na nande exunganeko la etwa po kehalo lomunhu, ndele ovanhu ova popya eendjovo daKalunga tava wilikwa komhepo iyapuki.

2 Ndele ngaashi pa holokele ovaprofeti ovanaipupulu mokati koshiwana shaKalunga, otapa ka holoka yo ovahongi ovanaipupulu mokati keni. Ovanhu va tya ngaho otava ka eta etukauko,* tave ke lidimbika ou e va kulila,* notava ka hanaunwa po diva omolweenghatu davo da tya ngaho. 2 Kakele kaasho, vahapu otava ka shikula oikala yavo yokunyona nopehe na ouxwenge,* noshili otai ka shekwa omolwavo. 3 Shimwe vali, otave ke mu kengelela neendjovo doipupulu omolwolwisho. Ndele ehandukilo lavo, olo va tokolelwa nale itali kala ko, nehanauno lavo otali uya shili.

4 Kalunga ina efa nandenande ovaengeli ovo va nyona, ndele okwe va handukila nokwe va ekela moTartarus,* e va manga nomalyenge* va kale momilaulu, opo va teelele etokolo lavo. 5 Okwa li yo a handukila ounyuni wonale eshi a li a eta eyelu mounyuni wovahenakalunga, ndele okwa xupifa Noa, omuudifi wouyuki, pamwe navakwao vaheyali. 6 Okwa li a tokola Sodom naGomorra eshi e i xwika po filufilu, naasho oshi li elondwelo kovahenakalunga li na sha naasho tashi ka ningwa po. 7 Okwa xupifa omuyuki Lot, oo a li ha nyematekwa neenghono koikala yovakolokoshi yokunyona nopehe na ouxwenge.* 8 Omulumenhu oo omuyuki eshi a li mokati kovakolokoshi ovo, okwa li ha mono onghedi yavo yokukalamwenyo noha udu oinima oyo tava popi, naasho osha li hashi mu yahameke efiku keshe. 9 Jehova oku shii okuxupifa ovatilikalunga momayeleko, ndele ota ka hanauna po ovahenakalunga mefiku letokolo, 10 unene tuu ovo hava lalakanene okushundula* omalutu avamwe nova dina eenghonopangelo.

Ovahongi ovanaipupulu ihava yavala okulonga owii nove na omitwe dikukutu, noihava tila okupopila mowii ovo va tumbalekwa kuKalunga, 11 ofimbo ovaengeli, nonande ove na eenghono dinene ve va dule, ihave va ula omalaka mai molwaashi ova fimaneka Jehova. 12 Ovahongi ovanaipupulu ovo ohava popile mowii oinima vehe i shii. Ndele otava ka hanaunwa po omolwoilonga yavo youkolokoshi, ngaashi ashike oinamwenyo ihe na eendunge oyo hai dalwa,* opo i kwatwe nokudipawa. 13 Otava ka handukilwa ngaho omolwoilonga yavo youkolokoshi.

Ohava hafele okuwanifa po omahalo avo opambelela nokuli nomutenya. Ova fifa ohoni va fa onhongo i li koikutu noipute moshipala, eshi hava xumifa komesho omahongo oipupulu nohava hafele okupukifa vamwe. 14 Ohava kala va halelela okunyona ohombo,* ihava efa po okulonga owii nohava pukifa ovo inava pama.* Ove yadi olwisho momitima davo.* Onghee Kalunga ote ke va handukila. 15 Ova efa po ondjila ya yuka nova twalwaatwalwa. Ova shikula ondjila yaBileam omona waBeor, oo a li e hole okulonga owii, opo a pewe ondjabi, 16 ndele okwa li a hanyenwa molwaashi okwa li a nyona omhango. Ondongi oya li ya popya ngaashi omunhu tai kelele omuprofeti oo aha shikule ondjila ya puka.

17 Ova fa eefifiya dihe na omeva nosho yo oilemo tai twalwaatwalwa koshikungulu shomhepo, nova tuvikililwa omilaulu fokofoko. 18 Ohava popi oinima ya fa ya fimana, ndele oyongaho elela. Ohava pukifa ovanhu ovo tava kendabala okweefa po okulonga owii mokuxwaxwameka omahalo avo opambelela nokunyona nopehe na ouxwenge.* 19 Ohava udanekele ovanhu emanguluko ofimbo vo ve li ovapika voulunde, osheshi keshe oo a findwa kuumwe oha ningi omupika waye.* 20 Ova li va efa po okulonga oilonga ii younyuni omolweshiivo lokushiiva Omwene nOmuxupifi Jesus Kristus, ndele ova shuna vali mokulonga owii, nowii ohau va findi; onghee onghalo yavo yaxuuninwa oya naipala i dule ei yotete. 21 Oshixwepo ngeno va li inava shiiva ondjila youyuki shi dulife eshi ve i shiiva, ndele tava efa po oipango iyapuki oyo va pewa. 22 Ova wanifilwa eyeletumbulo eli tali ti: “Ombwa oya alukila onghungo yayo, noshingulu sha koshwa otashi alangata monhata.”

3 Ovamwatate ovaholike, ngaashi nde mu shangela nale monhumwafo yange yotete, ohandi mu dimbulukifa monhumwafo onhivali shi na sha noinima oyo tai mu kwafele mu diladile moule, 2 opo mu dimbuluke eendjovo odo da popiwa* nale kovaprofeti ovayapuki nosho yo oshipango shOmwene oo e li Omuxupifi wetu, osho mwa pewa okupitila movayapostoli veni. 3 Tetetete, onda hala mu shiive kutya momafiku axuuninwa otapa ka holoka ovasheki ovo tava xwaxwamekwa komahalo avo nokusheka 4 tava ti: “Eudaneko li na sha nokukala po kwaye otali wanifwa naini? Osheshi okudja eshi ootatekulululwa va fya, oinima aishe oi li ngaashi ya kala okudja pehovelo leshito.”

5 Otave lipwililikile owina oushili oo kutya eulu nedu oya holoka po okupitila mondjovo yaKalunga, nedu ole uya po okudja momeva noli li kombada yomeva; 6 nonokutya ounyuni wonale owa li wa hanaunwa po nomeva pefimbo leyelu. 7 Sha faafana, natango okupitila mondjovo yaKalunga, eulu nedu lopaife oya tuvikililwa omundilo fiyo okefiku letokolo nolehanauno lovahenakalunga.

8 Ovamwatate ovaholike, dimbulukeni kutya efiku limwe kuJehova oli fike pomido eyovi, nomido eyovi odi fike pefiku limwe. 9 Jehova ina fya ounye okuwanifa po eudaneko laye ngaashi vamwe hava diladila, ashike ohe mu tale onheni molwaashi ina hala nande oumwe a hanaunwe po, ndele okwa hala ovanhu aveshe ve lidilulule. 10 Efiku laJehova otali ke uya ngaashi ombudi, neulu otali ka hanaunwa po nomipwalakato, ndele oitungifo aishe otai ka hengumunwa koupyu wa hanya, nedu noilongwanima aishe i li ko otai ka pya po.

11 Ndele molwaashi oinima aishe otai ka hengumunwa monghedi ya tya ngaho, diladileni kutya omu na okuhangika mwa tya ngahelipi. Kaleni mu na elihumbato la koshoka nokulonga oilonga yometilokalunga, 12 ofimbo mwa teelela nokukaleka momadiladilo* efiku laJehova, omo eulu tali ka hanaunwa po nomundilo, noitungifo aishe otai ka hengumuka komundjene woupyu wa hanya. 13 Ndele metwokumwe neudaneko laye, otwa teelela eulu lipe nedu lipe omo tamu ka kala ouyuki.

14 Onghee hano, ovamwatate ovaholike, molwaashi omwa teelela oinima oyo, kendabaleni mwa mana mo, opo mu kale muhe na edilo, mwa koshoka koshipala shaKalunga nomu na ombili. 15 Shikwao vali, onheni yOmwene wetu i taleni ko i li omhito yexupifo, ngaashi omumwatate omuholike Paulus naye a li e mu shangela metwokumwe nounongo oo a li a pewa, 16 ta popi kombinga yoinima oyo meenhumwafo daye adishe. Imwe yomoinima oyo a shanga oidjuu okuudiwa ko, onghee ovo vehe i udite ko nawa* naavo inava pama ove i pengifa ngaashi va pengifa yo Omishangwa dikwao, naasho otashi ke va hanaunifa po.

17 Ndele nye ovamwatate ovaholike, omolweshiivo la denga mbada olo mu na, lipashukileni opo muha pukifwe pamwe navo komahongo oipupulu ovakolokoshi nokweefa po oudiinini weni. 18 Mepingafano naasho, twikileni okumona ouwa mefilonghenda laKalunga nokumona eshiivo lokushiiva Omwene nOmuxupifi wetu Jesus Kristus. Oye e na okufimanekwa paife nofiyo alushe. Amen.