JOHANNES WOTETE

1 Otwe mu shangela shi na sha naao a kala ko okudja pehovelo, oo twa uda, twa mona, twa konenena, twa kuma nokwe tu pa eendjovo domwenyo. 2 Otwa hololelwa omwenyo waalushe, twe u mona, twa udifa kombinga yao notwe u mu hepaululila. Omwenyo waalushe oo owa dja kuTate notwe u hololelwa. 3 Otwe mu lombwela osho twa mona notwa uda, opo mu kale mwa hangana nafye ngaashi nafye twa hangana naTate nosho yo nOmona waye Jesus Kristus. 4 Ohatu shange oinima ei, opo ehafo letu li hapupale.

5 Ohatu mu shiivifile etumwalaka olo twa uda kuJesus tali ti: Kalunga oye ouyelele, nomuye kamu na omilaulu nandenande.* 6 Ngeenge ohatu ti: “Otwa hangana naye,” ndele ohatu ende momilaulu, ohatu fufya nokatu li metwokumwe noshili. 7 Onghee hano, ngeenge ohatu ende mouyelele ngaashi ye e li mouyelele, ohatu ka kala twa hangana navakwetu, nohonde yOmona waye Jesus otai ke tu koshola omanyono etu aeshe.

8 Ndele ngeenge ohatu ti: “Ihatu nyono,” ohatu lifufya nokatu na oshili. 9 Ngeenge otwa hepaulula omanyono etu, Kalunga ote ke tu dimina po noku tu koshola okuhenouyuki akushe molwaashi omudiinini nomuyuki. 10 Ngeenge ohatu ti: “Inatu nyona,” otwa fa hatu ti Kalunga omunaipupulu, noinatu itavela eendjovo daye.

2 Ovamwange ovaholike, ohandi mu shangele shi na sha noinima ei, opo muha nyone. Ndele ngeenge umwe okwa nyono, otu na omukwafi* oo e li puTate, sha hala okutya omuyuki Jesus Kristus. 2 Oku li yo eyambo* loku tu kwatakanifa naKalunga omolwomatimba etu, hamatimba etu aeke, ndele naao yo ounyuni aushe. 3 Ohatu ka ulika kutya otu mu shii nawa ngeenge otwa twikile okudiinina oipango yaye. 4 Ngeenge ope na ou ta ti: “Ondi mu shii,” ndele iha diinine oipango yaye, ye omunaipupulu, noke na oshili. 5 Ndele ngeenge umwe oha diinine eendjovo daKristus, osha yela kutya oku hole filufilu Kalunga. Ngeenge nafye osho twa ningi ngaho, ohatu ka ulika kutya otu na ekwatafano naye. 6 Ou ta ti kutya oku na ekwatafano naye oku na okukala he lihumbata monghedi ya faafana noyaJesus.*

7 Ovamwatate ovaholike, oshipango eshi handi mu shangele kashipe, ndele osheshi mwa kala hamu diinine nale okudja pehovelo. Oshipango osho shikulu osho eendjovo odo mwa uda nale. 8 Molwaashi omilaulu otadi xulu po nouyelele washili otau vilima, natango ohandi mu shangele oshipango shipe, osho Kristus nosho yo nye mwa diinina.

9 Ou ta ti oku li mouyelele, ndele oku tonde omumwaxe, oku li natango momilaulu. 10 Ndele ou e hole omumwaxe oku li mouyelele, nokape na eshi tashi mu pundukifa.* 11 Ou e tonde omumwaxe oku li momilaulu nota ende momilaulu; ke shii apa a finda molwaashi okwa twikifwa komilaulu.

12 Ovamwange ovaholike, ohandi mu shangele molwaashi omatimba eni okwa dimwa po omolwedina laye.* 13 Ootate, ohandi mu shangele molwaashi omwa shiiva ou a kala ko okudja pehovelo. Ovalumenhu ovanyasha, ohandi mu shangele molwaashi omwa finda omunawii. Ovamwange ovaholike, ohandi mu shangele molwaashi omwa shiiva Tate. 14 Ootate, onde mu shangela molwaashi omwa shiiva ou a kala ko okudja pehovelo. Ovalumenhu ovanyasha, onde mu shangela molwaashi omwa pama, mwa itavela meendjovo daKalunga nomwa finda omunawii.

15 Inamu kala mu hole ounyuni nakeshe eshi shi li mo. Ngeenge ope na ou e hole ounyuni, ke hole Tate, 16 molwaashi oinima aishe oyo i li mounyuni, ngaashi okahalu kombelela, okahalu komesho nosho yo oikala yokuliulika* inai dja kuTate, ndele oya dja mounyuni. 17 Shimwe vali, ounyuni otau xulu po pamwe nokahalu kao, ndele ou ta longo ehalo laKalunga ota kala fiyo alushe.

18 Ovamwange ovaholike, eli olo efimbo laxuuninwa, ndele ngaashi mwa uda kutya otaku ka holoka ooantikristus,* paife vahapu vomuvo ova holoka, naasho otashi ulike filufilu kutya eli olo efimbo laxuuninwa. 19 Ova dja mo mufye, ashike kava li ve na ekwatafano nafye;* molwaashi ngeno ova li ve na ekwatafano nafye, ngeno ova kala pamwe nafye. Ndele ova dja mo mufye, opo shi limonikile kutya haaveshe ve na ekwatafano nafye. 20 Omwa vaekwa kOmuyapuki, nomu shii oshili amushe. 21 Itandi mu shangele ngeno molwaashi muhe shii oshili, ndele omolwaashi mu i shii nomolwaashi kape na oipupulu ya dja moshili.

22 Olyelye omunaipupulu noina itavela kutya Jesus oye Kristus? Oantikristus,* noina itavela muTate nomOmona. 23 Keshe oo ehe fi omuhongwa wOmona ke fi omupiya waKalunga. Ndele keshe oo a tambula ko Omona, okwa tambula ko yo Tate. 24 Ndele nye twikileni okudiinina osho mwa uda okudja pehovelo. Ngeenge omwa twikile okudiinina osho mwa uda okudja pehovelo, otamu kala mu na ekwatafano nOmona nosho yo naTate. 25 Kakele kaasho, Kalunga okwe tu udanekela omwenyo waalushe.

26 Onde mu shangela oinima oyo i na sha naavo tava kendabala oku mu pukifa. 27 Kalunga okwe mu vaeka nomhepo yaye, nomhepo oyo otai kala munye, onghee inamu pumbwa vali umwe e mu honge sha. Ashike Kalunga ote mu hongo oinima aishe okupitila momhepo oyo e mu vaeka nayo; evaeko olo oloshili, ndele kali fi loipupulu. Kaleni mu na ekwatafano naye ngaashi mwa hongwa. 28 Ovamwange ovaholike, kaleni mu na ekwatafano naye, opo eshi ta ka hololwa tu ka kale tu na emanguluko lokupopya, tuha ka sholole nokufya ohoni pefimbo lokukala po kwaye. 29 Ngeenge omu shi shii kutya ye omuyuki, omu shi shii yo kutya keshe ou ta longo ouyuki omona waye.

3 Diladileni kohole inene oyo Tate e tu ulikila eshi e tu pa oufembanghenda wokwiifanwa ovana vaye,* notu li shili ovana vaye. Ndele ounyuni inau tu shiiva, molwaashi inau shiiva Kalunga. 2 Ovamwatate ovaholike, paife otwa ninga ovana vaKalunga, ashike inatu hololelwa natango kutya ohatu ka kala twa tya ngahelipi. Ndele otu shi shii kutya ngeenge okwe liholola, ohatu ka kala twe mu fa, molwaashi ohatu ke mu mona e li ngaashi e li. 3 Keshe oo e na elineekelo muye na kale a koshoka, molwaashi naye omukoshoki.

4 Keshe oo ta longo oulunde ota nyono yo omhango, molwaashi oulunde oo okunyona omhango. 5 Omu shi shii yo kutya Jesus okwe uyile okudima po omatimba etu, noina nyona sha. 6 Keshe oo e na ekwatafano naye iha longo oulunde; kape na oo ha longo oulunde e mu mona ile e mu shiiva. 7 Ovamwange ovaholike, inamu pukifwa nande okuumwe, osheshi keshe oo ha longo ouyuki oye omuyuki, ngaashi ashike ye omuyuki. 8 Keshe oo ha longo oulunde okwa nwefwa mo kOndiaboli, molwaashi Ondiaboli oya kala tai nyono okudja pehovelo.* Nomolwaasho Omona waKalunga a li e uya okuxulifa po* oilonga yOndiaboli.

9 Keshe oo e li omona waKalunga iha longo oulunde, molwaashi oku na omhepo* yaKalunga noita dulu okulonga oulunde molwaashi oku li omona waKalunga. 10 Eyooloko pokati kovana vaKalunga novana vOndiaboli oleli: Keshe oo iha longo ouyuki ile ehe hole omumwaxe ke fi omona waKalunga. 11 Diladileni koshipango osho mwa uda nale, osho tashi ti kutya otu na okukala tu holafane. 12 Inatu kaleni twa fa Kain oo a nwefwa mo komunawii nokwa dipaa mumwaina. Okwe mu dipaela shike? Omolwaashi mumwaina okwa li ha longo ouyuki, ofimbo ye a li ha longo oilonga ii.

13 Ovamwatate, inashi mu kumwifa eshi ounyuni u mu tonde. 14 Otu shi shii kutya otwa li twa fa twa fya, ndele paife otwa nyumuka molwaashi otu hole ovamwatate. Ou ehe hole omumwaxe, natango okwa fa a fya. 15 Keshe ou e tonde omumwaxe oye omudipai, nomu shi shii kutya kape na omudipai ta ka mona omwenyo waalushe. 16 Otu na eshiivo kombinga yohole omolwaau e tu yandjela omwenyo waye, nomolwaasho nafye tu na okuyandjela ovamwatate eemwenyo detu. 17 Ngeenge ope na oo e na omaliko ounyuni ou, ndele ta mono omumwaxe a hepa, ashike ite mu kenukile, mbela ota dulu ngoo okutya oku hole Kalunga? 18 Ovamwange ovaholike, inatu ulikeni ashike ohole okupitila meendjovo, ndele nai kale yashili noi liwetikile moilonga.

19 Kungaho ohatu ka kala tu shii kutya ohatu yambidida oshili, nohatu ka kala twa tomhwa momitima detu kutya Kalunga oku tu hole 20 nonande omitima detu otadi tu hokololifa, molwaashi Kalunga oku dule omitima detu noku shii oinima aishe. 21 Ovamwatate ovaholike, ngeenge omitima detu itadi tu hokololifa, ohatu dulu okupopya naKalunga twa manguluka; 22 nakeshe eshi hatu mu indile ote shi tu pe, molwaashi ohatu diinine oipango yaye nohatu longo eshi tashi mu wapalele. 23 Oshipango shaye osheshi: tu kale tu na eitavelo medina lOmona waye Jesus Kristus nokukala tu holafane, ngaashi e tu lombwela tu ninge. 24 Shimwe vali, keshe oo ta diinine oipango yaKalunga ota kala e na ekwatafano naKalunga, na Kalunga ota kala e na ekwatafano naye. Otu shi shii kutya otu na ekwatafano naye molwaashi okwe tu pa omhepo yaye.

4 Ovamwatate ovaholike, inamu itavela ondjovo* keshe oyo taku tiwa oya nwefwa mo, ndele konakoneni eendjovo* odo mu tale ngeenge oda dja kuKalunga molwaashi mounyuni omwa holoka ovaprofeti vahapu ovanaipupulu.

2 Eendjovo odo taku tiwa kutya oda nwefwa mo otamu ka mona kutya oda dja kuKalunga ngeenge otadi yambidida ediladilo olo kutya Jesus Kristus okwe uyile kombada yedu e li omunhu. 3 Ndele ondjovo keshe oyo taku tiwa oya nwefwa mo, ashike itai popi kombinga yaJesus, inai dja kuKalunga. Kakele kaasho, eendjovo odo odooantikristus* ovo mwa li mwa uda kutya otave ke uya, nove li mounyuni paife.

4 Ovamwange ovaholike, nye omwaKalunga nomwa finda ovaprofeti ovanaipupulu, molwaashi Kalunga ote mu yambidida noku na eenghono e dule Ondiaboli oyo tai nwefa mo ounyuni. 5 Ovaprofeti ovo ovanaipupulu ova dja mounyuni, onghee ohava popi oinima oyo ya tambulwa ko kounyuni, nounyuni ohau va pwilikine. 6 Fye otwaKalunga, nakeshe oo e shii Kalunga oha pwilikine kufye. Keshe oo ehe fi waKalunga iha pwilikine kufye. Kungaho ohatu ka mona kutya eendjovo odo taku tiwa oda nwefwa mo odoshili ile odoipupulu.

7 Ovamwatate ovaholike, natu kaleni tu holafane, osheshi ohole oya dja kuKalunga, nakeshe oo e na ohole oye omona waKalunga noku shii Kalunga. 8 Keshe oo ehe na ohole ina shiiva Kalunga, osheshi Kalunga oye ohole. 9 Kalunga okwa ulika kutya oku tu hole eshi a tuma Omona waye ewifa mounyuni, opo tu mone omwenyo waalushe okupitila muye. 10 Kalunga okwa tuma Omona waye e li eyambo lekwatakanifo* omolwomatimba etu, hamolwaashi tu mu hole, ndele omolwaashi e tu hole.

11 Ovamwatate ovaholike, ngeenge Kalunga oku tu hole monghedi ya tya ngaho, nafye otu na okukala tu holafane. 12 Kape na ou a mona Kalunga nandenande. Ngeenge otwa kala tu holafane, Kalunga ota ka kala pamwe nafye note ke tu ulikila ohole yaye pauyadi. 13 Kungaho ohatu ka mona kutya otu na ekwatafano naye nonokutya naye oku na ekwatafano nafye, molwaashi okwe tu pa omhepo yaye. 14 Kakele kaasho, otwa mona notwa hepaulula kutya Tate okwa tuma Omona waye e li omuxupifi wounyuni. 15 Keshe oo a dimina kutya Jesus Omona waKalunga ota kala e na ekwatafano naKalunga, na Kalunga ota kala e na ekwatafano naye. 16 Otu shi shii notwa itavela kutya Kalunga oku tu hole.

Kalunga oye ohole, naao ha ulike alushe ohole ota kala e na ekwatafano naKalunga, na Kalunga ota kala e na ekwatafano naye. 17 Otwa ulikilwa ohole pauyadi, opo tu ka kale tu na emanguluko lokupopya* mefiku letokolo, molwaashi mounyuni ou otu li mo ngaashi Jesus Kristus. 18 Mohole kamu na oumbada, ndele ohole yashili ohai findi* oumbada, molwaashi oumbada ohau tu ngabeke. Ou e na oumbada ke na ohole yashili. 19 Otu na ohole, molwaashi Kalunga okwa kala e tu hole tete.

20 Ngeenge ope na ou ta ti: “Ondi hole Kalunga,” ndele oku tonde omumwaxe, ye omunaipupulu. Osheshi ou ehe hole omumwaxe oo e wete, ita dulu okukala e hole Kalunga oo ehe wete. 21 Ndele Kalunga okwe tu pa oshipango eshi tashi ti kutya, keshe oo e hole Kalunga oku na yo okukala e hole omumwaxe.

5 Keshe oo a itavela kutya Jesus oye Kristus oye omona waKalunga, nakeshe oo e hole Kalunga oku hole yo ovana vaKalunga. 2 Kungaho ohatu ka mona kutya otu hole ovana vaKalunga ngeenge otu hole Kalunga nohatu dulika koipango yaye. 3 Ohole yokuhola Kalunga oyo ei kutya, tu diinine oipango yaye, noipango yaye kai fi idjuu, 4 osheshi keshe ou* e li omona waKalunga ota findi ounyuni. Otwa dula okufinda ounyuni omolweitavelo letu.

5 Olyelye ta dulu okufinda ounyuni? Mbela haye ou a itavela kutya Jesus Omona waKalunga? 6 Jesus Kristus okwe uyile nomeva nosho yo nohonde, ke uyile nomeva aeke, ndele okwe uyile nomeva nosho yo nohonde. Omhepo otai yandje oumbangi kombinga yaasho, molwaashi omhepo ohai holola oshili.* 7 Ope na oinima itatu oyo tai hepaulula kombinga yaJesus: 8 omhepo, omeva nohonde; noinima oyo itatu otai hepaulula oshinima sha faafana.

9 Ngeenge ohatu tambula ko ehepaululo lovanhu, ongahelipi shi na sha nehepaululo laKalunga olo linene? Kalunga okwa hepaulula kombinga yOmona waye. 10 Omunhu oo a itavela mOmona waKalunga okwa tambula ko nomutima aushe osho a hongwa kuKalunga. Oo ina itavela muKalunga okwa fa ta ti kutya Kalunga omunaipupulu, molwaashi ina itavela ehepaululo olo Kalunga a yandja kombinga yOmona waye. 11 Ehepaululo olo oleli kutya Kalunga okwe tu pa omwenyo waalushe, nokwe u tu pa okupitila mOmona waye. 12 Ou a tambula ko Omona waKalunga oku na omwenyo waalushe, naau ine mu tambula ko ke na omwenyo waalushe.

13 Onde mu shangela oinima oyo, opo mu shiive kutya omu na omwenyo waalushe nye ovo mwa itavela medina lOmona waKalunga. 14 Onghee otu na elineekelo* muKalunga kutya keshe osho hatu mu indile pahalo laye ote tu udu. 15 Ngeenge otu shi shii kutya ohe tu udu ngeenge twe mu indila sha, otu na elineekelo kutya ote ke tu pa oinima oyo twe mu indila.

16 Ngeenge umwe okwa mono omumwaxe ta nyono enyono olo itali twala mefyo, ne mu indilile kuKalunga, opo e ke mu pe omwenyo; osho otashi ningilwa ovo va nyona enyono itali twala mefyo. Oku na omanyono oo taa twala mefyo, naavo va nyona omanyono oo havo handi popi va indililwe. 17 Okuhenouyuki akushe oko oulunde, ashike ope na omanyono oo itaa twala mefyo.

18 Otu shi shii kutya keshe oo e li omona waKalunga iha longo oulunde, ndele oha amenwa kOmona waKalunga,* nomunawii* ita dulu oku mu kuma. 19 Otu shi shii kutya fye otwaKalunga, ndele ounyuni aushe ou li mepangelo lomunawii. 20 Otu shi shii kutya Omona waKalunga okwe uya nokwe tu pa eendunge opo tu shiive Kalunga kashili. Otu na ekwatafano naKalunga okupitila mOmona waye Jesus Kristus. Kalunga oo oye Kalunga kashili nodjo yomwenyo waalushe. 21 Ovamwange ovaholike, kaleni kokule noikalunga.*