Etukulwa 70

Jesus ta twikulula omulumenhu oo a li a dalwa omupofi

JESUS ka li a dja mo muJerusalem eshi Ovajuda va li va hala oku mu dipaa nomamanya. MEshabata limwe, Jesus novahongwa vaye ova li tava ende moshilando ndele tava mono omulumenhu umwe oo a li a dalwa omupofi. Ovahongwa ova li va pula Jesus va ti: “Rabbi, olyelye a nyona, oye mwene ile ovakulunhu vaye, eshi a dalwa omupofi?”

Otashi dulika ovahongwa va li va itavela kutya omunhu ota dulu okunyona fimbo e li moshidalelo shaina, ngaashi oorabbi vamwe va li va itavela. Jesus okwa li e va nyamukula a ti: “Haye a nyona ile ovakulunhu vaye, ndelenee oilonga yaKalunga opo i hololwe muye.” Omulumenhu oo ka li a ninga omupofi omolwenyono lonhumba lokondadalunde ile molwaashi ye mwene ile ovadali vaye ovo va nyona. Oulunde oo wa etifwa komunhu wotete Adam oo wa etifa okuhawanenena keshe oko ku li movanhu, nomolwaasho ovanhu hava dulu okudalwa nomaunghundi ile nomaulema, ngaashi oupofi. Oupofi womulumenhu oo owa li wa pa Jesus omhito opo a holole oilonga yaKalunga.

Jesus okwa li a divilika kutya okulonga oilonga yaKalunga osha li oshinima sha endelela. Okwa ti: “Ame ndi nokulonga oilonga yaau a tuma nge, fimbo omutenya; oufiku tau uya, ndele kape na ou ta dulu okulonga. Fimbo ndi li mounyuni, Aame ouyelele wounyuni.” Meni lefimbo lixupi, Jesus okwa li ta ka fya, nefyo olo ola li tali mu twala momilaulu domombila omo ita ka dula okulonga sha. Ndele pefimbo opo okwa li e li odjo youyelele wounyuni.

Konima eshi Jesus a mana okupopya oinima oyo, okwa li a fiila omate pedu ndele ta lungu onhata oyo a li a vaeka pomesho omulumenhu oo a li omupofi. Opo nee okwa li a lombwela omulumenhu oo a ti: “Inda u ke likoshe metale laSiloa.” Omulumenhu oo okwa li a dulika kelombwelo laJesus. Naashi omulumenhu oo a li eshi ninga, okwa li a twikuluka. Omulumenhu oo eshi a aluka okwa li a hafa neenghono molwaashi osho oshikando shotete a li e wete ko.

Ovashiinda shomulumenhu oo nosho yo ovanhu ovo va li ve mu shii ova li va kumwa. Ova ti: “Ou haye tuu ou kwa li ha kala omutumba ta ehela? Vamwe va tya: Oye.” Ashike ovanhu vamwe kava li va itavela kutya oye, va ti: ‘Ahowe, oumwe e mu fa.’ Ndele omulumenhu oo okwa li a tya: “Aame.”

Ovanhu ova li ve mu pula va hala okushiiva tava ti: “Omesho oye a twikuluka ngahelipi?”

Omulumenhu oo okwa li a nyamukula a ti: “Omulumenhu ou ha ifanwa Jesus, okwa pilula onhata, ndee te i vaeke pomesho ange, ndele okwa tya kuame: Inda ketale laSiloa u likoshe mo; ndele ame nda ya ko ndee handi likosho mo nonda twikuluka.”

Ovanhu ovo ova li ve mu pula va ti: “Oku li peni?”

Omulumenhu oo okwa li e va nyamukula a ti: “Nghi shii po.”

Ovanhu ovo ova li va lombwela omulumenhu oo a ye kovawiliki vavo velongelokalunga, Ovafarisai. Ovafarisai navo ova li ve mu pula kutya osha enda ngahelipi opo a twikuluke. Omulumenhu oo okwa li e va lombwela a ti: “Okwa tula nge onhata pomesho, ndee handi likosho, ndele ndi wete ko.”

Doshili, Ovafarisai ovo ova li va wana okukala va hafa pamwe nomweeheli oo a li a twikululwa. Ndele ponhele yaasho, ova li va tokola Jesus tava ti: “Omulumenhu ou ke fi womuKalunga.” Omolwashike mbela va li ve mu tokola? Ova ti: “Osheshi iha yapula eshabata.” Ndele Ovafarisai vamwe ova li tave lipula tava ti: “Omunhu omulunde ota dulu ngahelipi okulonga oikumifilonga i fike apa?” Osho osha li sha etifa olutandu mokati kavo.

Onghee hano, ova li va pula vali omulumenhu oo a li omupofi va ti: “Ove oto mu tongo ngahelipi, eshi a twikulula omesho oye?”

Omulumenhu oo kwa ti: “Ye omuprofeti.”

Ovafarisai kava li va hala okwiitavela kutya Jesus omuprofeti. Ova li tava diladila kutya ope na eudafano lomeholeko pokati kaJesus nomulumenhu oo opo a kale ta fufya ovanhu. Onghee hano, opo va kandule po oupyakadi oo, ova li va ifanifa ovadali vomulumenhu oo opo ve va pule. Johannes 8:59; 9:1-18.

▪ Oshike sha li sha etifa oupofi womulumenhu oo a li a twikululwa kuJesus?

▪ Jesus okwa li ta popi shi na sha noufiku ulipi omo pehe na omunhu ta longo sha?

▪ Eshi omulumenhu oo a li a twikululwa, ovanhu ovo va li ve mu shii ova li ve linyenga ngahelipi?

▪ Ongahelipi mokati kOvafarisai mwa li mwa holoka olutandu omolwomulumenhu oo a li a twikululwa?