Etukulwa 72

Jesus ta tumu ovahongwa vaye 70

OSHA li exulilo lomudo 32 O.P., nopa li pa pita omido nhatu okudja eshi Jesus a li a ninginifwa. Jesus novahongwa vaye ova li opo va di kOshivilo shOmatwali kuJerusalem, notashi dulika va li natango popepi naJerusalem. Jesus okwa li a longifa eemwedi hamano doukalele waye odo da li da xupa ko muJudea ile kombinga ikwao yomulonga waJordan, koshitukulwa shaPerea. Oshitukulwa osho nasho osha li shi na okuudifilwa.

Konima yOpaasa yomo 30 O.P., Jesus okwa li a kala ta udifile muJudea eemwedi hetatu lwaapo. Ndele konima eshi Ovajuda va li va kendabala oku mu dipaa pOpaasa yomo 31 O.P., okwa li a kala ta udifile muGalilea omo amuke oule womudo umwe netata. Pefimbo opo, okwa li a deula nawa ovahongwa vahapu va unganekwa va ka udife, oshinima osho a li ina ninga nande onale. Kungaho, okwa li ta hovele oshikonga shinene shaxuuninwa shokuudifa muJudea.

Jesus okwa li a hovela oshikonga osho mokuhoolola ovahongwa 70, ndele te va tumu oovavali. Kungaho, ovahongwa ovo ova li eengudu 35 dovaudifi vOuhamba ovo va li tava ka longa oshitukulwa shaJudea. Ovahongwa ovo ova li va tetekela okuya koilando nokeenhele adishe oko Jesus a li a diladila okuya pamwe novayapostoli vaye.

Ponhele yokutuma ovahongwa ovo 70 koshinagoga, Jesus okwa li e va lombwela va ka udife momaumbo, a ti: “Ngenge tamu i meumbo, tyeni tete: Ombili nai kale meumbo eli. Ndele ngenge omu na omona wombili, ombili yeni otai mu [kalele].” Ovahongwa ovo ova li tava ka udifa kombinga yashike? Jesus okwa li e va lombwela a ti: “Nye mu va lombwele: ouhamba waKalunga wa ehena popepi nanye.” Embo Matthew Henry’s Commentary ola popya shi na sha noilonga yovahongwa ovo 70 la ti: “Ngaashi Omwene wavo, ova li va udifila eumbo neumbo keshe opo va li va ya.”

Jesus okwa li a lombwela ovahongwa vaye 70 ngaashi a li a lombwela vakwao 12 eshi a li te va tumu va ka udife muGalilea konima yomudo umwe. Ka li ashike a londwela ovahongwa ovo 70 kombinga yomapataneko oo va li tava ka shakeneka noku va deula nghee ve na okuudifila ovaneumbo, ndele okwa li yo e va pa eenghono opo va velule ovanaudu. Opo nee eshi Jesus ta ka fika moshitukulwa osho konima yokafimbo, ovanhu vahapu otava ka kala va hala okumona Omwene oo ovahongwa vaye hava dulu okulonga oikumwifilonga ya tya ngaho.

Oilonga yokuudifa yovahongwa 70 nosho yo yaJesus kaya li ya kwata efimbo lile. Diva, eengudu 35 dovaudifi vOuhamba oda li da hovela okwaalukila kuJesus. Ova li ve mu lombwela nehafo va ti: “Omwene, eendemoni oda dulika kufye omolwedina loye.” Ehokololo loilonga iwa ya tya ngaho ola li la hafifa Jesus, molwaashi okwa li a nyamukula ovahongwa vaye a ti: “Onda mona Satana a wa meulu ngaashi oluvadi. Taleni, onde mu pa eenghono okulyata omayoka neendye.”

Jesus okwa li e shi shii kutya konima yokudalwa kwOuhamba waKalunga pefimbo lexulilo, Satana neendemoni daye ova li tava ka umbwa mo meulu. Ndele eshi ovanhu vongaho va li tava te mo eendemoni ihadi monika, osha li eshilipaleko la wedwa po li na sha noshiningwanima osho sha li tashi ka ningwa. Onghee hano, Jesus okwa li ta popi kutya Satana okwa li ta ka tewa mo filufilu meulu. Jesus okwa li ta popi pafaneko eshi a li a popya kutya ovahongwa ovo 70 ova pewa eenghono okulyataula omayoka neendje. Ndele nande ongaho, Jesus okwa li a popya a ti: “Inamu hafela eshi eemhepo tadi dulika kunye, hafeni omadina eni eshi a shangelwa meulu.”

Jesus okwa li a hafa neenghono ndele ta tange Xe moipafi eshi a longifa ovapiya vaye ovo ovalininipiki va longe oilonganghono ya tya ngaho. Opo nee okwa li a pungulukila kovahongwa vaye ndele ta ti: “Omesho taa mono ei mwe i tala oku na elao. Osheshi handi mu lombwele, ovaprofeti vahapu neehamba va li va hala okumona ei tamu i tale, vo inave i mona, nokuuda ei tamu i udu, vo inave i uda.” Lukas 10:1-24; Mateus 10:1-42; Ehololo 12:7-12.

▪ Jesus okwa li a udifila peni pefimbo lomido nhatu doukalele waye, nokwa li a udifila oshitukulwa shilipi moule weemwedi hamano daxuuninwa doukalele waye?

▪ Jesus okwa li a tuma ovahongwa vaye 70 va ka udifile peni?

▪ Omolwashike Jesus a li a popya kutya okwa mona Satana a wa mo nale meulu?

▪ Omeityo lilipi ovahongwa 70 va li tava dulu okulyataula omayoka neendje?