Oshileshwa 12
Fimaneka Omwenyo nOhonde
Ongahelipi tu na okutala ko omwenyo? (1) okulikufa edimo? (1)
Ovakriste ohava ulike ngahelipi kutya ove na ko nasha neameno? (2)
Osha puka mbela okudipaa oinamwenyo? (3)
Eenghedi dimwe dilipi odo itadi ulike efimaneko lomwenyo? (4)
Omhango yaKalunga i na sha nohonde oilipi? (5)
Eshi osha kwatela mo mbela omatulwo ohonde? (6)
1. Jehova oye Odjo yomwenyo. Oinima aishe oyo i na omwenyo oi na oshikolo shomwenyo kuKalunga. (Epsalme 36:10) Omwenyo oo uyapuki kuKalunga. Nokuli nomwenyo wokaana inaka dalwa ke li meni laina ou na ondilo kuJehova. Okudipaa owina ohanana ya tya ngaha tai kulu osha puka momesho aKalunga.—Exodus 21:22, 23; Epsalme 127:3.
2. Ovakriste vashili ove na ko nasha neameno. Vo ohava fi oshisho opo oihauto yavo nomaumbo avo a kale itaa eta oshiponga. (Deuteronomion 22:8) Ovapiya vaKalunga ihava tula eemwenyo davo moshiponga inashi pumbiwa molwelihafifo ile enyaku ashike. Onghee hano vo ihava kufa ombinga momaudano elongifo leenghono oo taa ehameke ovanhu vamwe owina. Vo ohava henuka elihafifo olo tali ladipike elongifo leenghono.—Epsalme 11:5, NW; Johannes 13:35.
3. Omwenyo woshinamwenyo nao yo ouyapuki kOmushiti. Omukriste ota dulu okudipaa oinamwenyo opo a mone oikulya noidjalomwa ile e liamene ye mwene komukifi nokoshiponga. (Genesis 3:21; 9:3; Exodus 21:28) Ndelenee osha puka okuhepeka oinamwenyo ile oku i dipaa omolwoudano ile elihafifo ashike.—Omayeletumbulo 12:10.
4. Okunwa omakaya, okutaafina omaxuku abetel nokulongifa oingangamifi molwelihafifo kaku li mondjila kOvakriste. Eenghedi edi oda puka molwaashi (1) otadi tu ningi ovapika vado, (2) otadi etele omalutu etu oshiponga, na (3) oda nyata. (Ovaroma 6:19; 12:1; 2 Ovakorinto 7:1) Otashi dulika shi kale shidjuu unene okweefa po eenghedindjikilile edi. Ndelenee otu na oku shi ninga opo tu hafife Jehova.
5. Ohonde nayo oiyapuki momesho aKalunga. Kalunga ota ti kutya omwenyo ou li mohonde. Onghee hano osha puka okulya ohonde. Osha puka yo okulya ombelela yoshinamwenyo osho inashi dja ohonde filufilu. Ngeenge oshinamwenyo osha pondwa ile sha fila momwiyo, kashi na okuliwa. Ngeenge osha dipawa neonga ile osha yashwa, oshi na okudja ohonde diva ngeenge otashi ka liwa.—Genesis 9:3, 4; Leviticus 17:13, 14; Oilonga 15:28, 29.
6. Osha puka mbela okwiitavela etulwo lohonde? Dimbuluka kutya Jehova ote tu pula opo tu lidilike ohonde. Eshi otashi ti kutya ohonde katu na oku i tulwa momalutu etu panghedi yonhumba ile yongadi kutya nee oyovanhu vamwe ile nokuli oyetu vene oyo ya tuvikilwa. (Oilonga 21:25) Onghee hano Ovakriste vashili itava ka itavela etulwo lohonde. Vo otava ka itavela omaludi amwe okuhakula opaunamiti, ngaashi okutulwa oihakulifo oyo i he na ohonde. Vo ova hala okukala nomwenyo, ndelenee itava ka kendabala okuxupifa eemwenyo davo mokunyona oipango yaKalunga.—Mateus 16:25.
Opo tu hafife Kalunga, otu na okuhenuka omatulwo ohonde, eenghedindjikilile da nyata nokulitula moshiponga inashi pumbiwa