Oshileshwa 14

Nghee Eendombwedi daJehova Da Unganekwa

Onaini Eendombwedi daJehova da tameka pefimbo lopaife? (1)

Okwoongala kwEendombwedi daJehova ohaku ningwa ngahelipi? (2)

Oinima ohai futwa ngahelipi? (3)

Oolyelye hava kwatele komesho meongalo keshe? (4)

Okwoongala kwa kula kulipi haku ningwa omudo keshe? (5)

Oilonga ilipi hai longwa peembelewa da kula nopoitaimbelewa yado? (6)

1. Eendombwedi daJehova pefimbo lopaife oda tameka momudo 1870 nasha. Tete, okwa li hadi ifanwa Ovakonakoni vOmbibeli. Ndelenee mo 1931 oda tambula edina lopamishangwa Eendombwedi daJehova. (Jesaja 43:10, NW) Ehangano ola kula okudja pehovelo linini fiyo opEendombwedi omamiliyona, odo di li de lipyakidila moilongo i dule 230.

2. Omaongalo mahapu Eendombwedi daJehova ohaa kala e na okwoongala lutatu oshivike keshe. Oto shivwa u kale po pukeshe kumwe kwomuko. (Ovaheberi 10:24, 25, OB-1986) Ombibeli oyo ekanghameno laasho hashi hongwa. Okwoongala ohaku tamekwa nohaku xulifwa neilikano. ‘Omalwiimbo opamhepo’ taa di komutima ohaa imbwa yo pokwoongala kuhapu. (Ovaefeso 5:18, 19) Omuvelo owa patuluka oshali, noihapu ningwa eengalo.—Mateus 10:8.

3. Omaongalo mahapu ohaa ongalele mOlupale lOuhamba. Aa luhapu oo omatungo anafangwa a tungwa kEendombwedi ovalongi vehalo liwa. Ito ka mona oihongwafano yasha, omishiyakano, ile oinima imwe ya fa ei pOlupale lOuhamba. Oinima ohai futwa nomayambidido ehalo liwa. Kwaavo va hala okuyandja eyambidido, ope na okakefa komayambidido.—2 Ovakorinto 9:7.

4. Meongalo keshe, omu na ovakulunhuongalo, ile ovapashukili. Vo otava kwatele komesho okuhonga meongalo. (1 Timoteus 3:1-7, yelekanifa NW; 5:17.) Ohava kwafelwa kovayakuliongalo. (1 Timoteus 3:8-10, 12, 13) Ovalumenhu ava inava tumbala ve dule oshixupe sheongalo. (2 Ovakorinto 1:24) Ihava pewa omadinafimaneko e likalekelwa. (Mateus 23:8-10) Ihava djala pamushingo umwe u lili. Noihava futilwa oilonga yavo. Ovakulunhuongalo ohava pashukile nehalo liwa eemhumbwe dopamhepo deongalo. Otava dulu okuyandja ehekeleko nomayele pefimbo loudjuu.—Jakob 5:14-16; 1 Petrus 5:2, 3.

5. Eendombwedi daJehova ohadi ningi yo oyoongalele ya kula omudo keshe. Pomafimbo aa omaongalo mahapu ohaa ongala pamwe omolwoprograma ye likalekelwa yehongo lOmbibeli. Eninginifo lovahongwa vape olo oshitukulwa shaalushe shoprograma keshe yoshoongalele.—Mateus 3:13-17; 28:19, 20.

6. Eembelewa da kula dEendombwedi daJehova odi li koNew York. Oko ku na Olutuwiliki, ongudumutima yovakulunhuongalo ovanawino ovo hava pashukile ehangano mounyuni aushe. Mounyuni aushe omu na yo oitaimbelewa i dulife 100. Pomatungo aa, ovalongi vehalo liwa ohava kwafele okunyanyangida nokutuma oishangomwa yOmbibeli. Ewiliko ohali yandjwa yo mokuunganeka oshilongaudifo. Omolwashike ito ningi elongekido lokutalela po oshitaimbelewa osho shi li popepi naave?