Mbela owa tokola ngoo okulonga ehalo laJehova?

Otwa hafa eshi wa ninga eenghendabala opo u konakone oshishangomwa eshi, osho tashi kwafele ovanhu ve lihonge kutya fye Eendombwedi daJehova ovanhu va tya ngahelipi, nosho yo shi na sha noilonga yetu yomounyuni aushe nonghee ehangano letu la unganekwa. Otwe lineekela kutya oshishangomwa eshi oshe ku kwafela yo u mone kutya ofye hatu longo ehalo laJehova kunena. Kakele kaasho, ohatu ku ladipike opo u twikile okulihonga shihapu kombinga yaKalunga, Jehova, u kale to lombwele ovapambele nookaume koye kombinga yaasho to lihongo, nou kale ho i kokwoongala kwetu kwopaKriste nopehe na okufaula. — Ovaheberi 10:23-25.

Ngeenge owe lihongo shihapu kombinga yaJehova, oto ke shi mona mo kutya oku ku hole shili. Osho otashi ke ku linyengifa u mu longele nomutima aushe opo naave yo u ulike kutya ou mu hole shili. (1 Johannes 4:8-10, 19) Ndele ongahelipi to dulu oku shi ulika pailonga efiku keshe kutya ou mu hole? Omolwashike shi na ouwa kwoove okudulika komifikamhango daye dopaenghedi? Oshike tashi ke ku kwafela opo u kale u na ehalo okulongela Kalunga pamwe nafye? Oo hamu konakona naye Ombibeli ota ka kala a hafa oku ku kwafela opo u mone omanyamukulo omapulo oo, naasho otashi ke ku kwafela nosho yo oukwaneumbo weni opo “mu likaleke mohole yaKalunga nokuteelela . . . [omwenyo] waalushe.” — Judas 21.

Opo u twikile okulihonga shihapu kombinga yoshili yOmbibeli noku i tula moilonga, ohatu ku ladipike opo u konakone oshishangomwa ‘Likalekeni mohole yaKalunga’ eshi sha ulikwa pedu.