Oshitukulwa 2: Onghalamwenyo Yovakriste

Eshi wa konakona Ombiibeli, owa shiiva kutya ehalo laJehova olilipi nonghee u na okukala metwokumwe nomifikamhango daye douyuki. Otashi dulika wa ninga omalunduluko mahapu monghalamwenyo yoye e na sha nelihumbato loye nowa lundulula etaleko loye li na sha nonghalamwenyo konima eshi we lihonga Ombiibeli. Molwaashi paife owa tokola toko okukala metwokumwe nomifikamhango daJehova douyuki, oto dulu okulongela Jehova oilonga iyapuki u li omuudifi wonghundana iwa.

Okweendulula omapulo taa shikula otashi ke ku kwafela u kaleke momadiladilo oiteelelwa yaJehova youyuki notashi ke ku dimbulukifa oinima imwe oyo u na okuninga opo u kale wa hokiwa kuYe. Ouyelele wa tya ngaho otau ke ku kwafela u mone kutya osha fimana okuninga oinima neliudo la yela nomonghedi oyo tai fimanekifa Jehova. — 2 Kor. 1:12; 1 Tim. 1:19; 1 Pet. 3:16, 21.

Ngeenge owa fiki poshitwa osho mekonakono loye, oto ka kala wa halelela okudulika koipango aishe yaJehova nokukala oshitukulwa shehangano laye. Omapulo nOmishangwa odo da etwa mo otadi ke ku kwafela u konakone eudeko loye li na sha nokudulika filufilu kelongekido laJehova, kutya nee omeongalo, moukwaneumbo ile omoinima yopapolotika monghalelo ei yoinima. Oto ka kala u na olupandu li na sha nelongekido laJehova lokuhonga nokupameka oshiwana shaye pamhepo. Osho osha kwatela mo okukala pokwoongala nokukufa ombinga muko ngeenge eenghalo otadi shi pitike.

Shikwao vali, oshitukulwa eshi otashi ka kundafana nghee sha fimana okukufa ombinga moilonga yokuudifa pandjikilile nokukwafela ovanhu va shiive Jehova nosho yo osho te va ningile. (Mat. 24:14; 28:19, 20) Otashi ke ku kwafela yo u mone nghee okuliyapulila kwoye Jehova nosho yo eninginifo ya kwata moiti. Oto dulu okukala noushili kutya Jehova okwa lenga eenghendabala doye eshi wa tambula ko efilonghenda laye olo e ku ulikila.

1. Ovakriste ohava tale ko ngahelipi ohombo? Etomheno limwe alike lopamishangwa lilipi tali ufa kutya omunhu ota dulu okuteya ohombo?

• “Inamu lesha hamba, Omushiti okwe va shita pehovelo omulumenhu nomukainhu, ndele ta ti: ‘Onghee hano omulumenhu e nokufiya po xe naina nokulimangeleka komukainhu waye, ndele ava vavali otava ningi omunhu umwe’? Osho hano kave fi vali vavali, ndelenee ombelela imwe. Hano osho Kalunga e shi tula kumwe, inashi kufwa kumwe komunhu . . . Ou ta henge po omukainhu waye omolwoshinima shimwe shihe fi oluhaelo, ndele ta hombola umwe, ye ta haele; naau ta hombola po omuhengwa, ye ota haele.” — Mat. 19:4-6, 9.

2. Omolwashike ovanhu ovo hava kala ashike pamwe inava hombola ve na okuhombola paveta? Ngeenge owa hombola ile wa hombolwa, ohombo yeni oi li ngoo paveta?

• “Va dimbulukifa, va dulike kovapangeli nokovakulunhu voshilongo noku va fimaneka.” — Tit. 3:1.

• “Ohombo nai fimanekwe kwaaveshe, nomutala wohombo nau kale uhe noshipo; osheshi ovaholi voipala novateihombo Kalunga te va tokola.” — Heb. 13:4.

3. Onghandangala ilipi to dana moukwaneumbo?

• “Omumwange, pwilikina outekuduliko waxo, ndele ino ekelashi elongo lanyoko.” — Omayel. 1:8.

• “Omulumenhu oye omutwe womukainhu, ngaashi Kristus yo Oye omutwe weongalo . . . Ovalumenhu, holeni ovakainhu veni ngaashi Kristus.” — Ef. 5:23, 25.

• “Ooxe, inamu shinda ovana veni noku va handukifa, va tekuleni meduliko nomekumaido lOmwene.” — Ef. 6:4.

• “Ounona nye, dulikeni kovakulunhu veni moinima aishe, Osheshi osho sha wapalela mOmwene.” — Kol. 3:20.

• “Ovakainhu, dulikeni kovalumenhu veni.” — 1 Pet. 3:1.

4. Omolwashike tu na okuulika kutya otwa fimaneka omwenyo?

• Kalunga “oye ha yandjele ovanhu aveshe omwenyo nomufudo noinima aishe . . . Muye tu li mo tu nomwenyo, ndele hatu linyenganyenga.” — Oil. 17:25, 28.

5. Omolwashike tuhe na okudipaa, mwa kwatelwa okulikufa edimo?

• ‘Novalumenhu ngeenge tava dengafana ndele tava ngwadjula omukainhu omufimba ndele ta mono oshiponga shefyo, hano omwenyo nau yandjelwe omwenyo omukwao.’ — Ex. 21:22, 23.

• “Omesho oye okwa li taa shipununa nge, fimbo nda li engwili inandi tongoka, nomembo loye omo omwa nyolelwa omafiku ange aeshe, aa nda sheyelwa, fimbo inapa holoka nande limwe lao.” — Eps. 139:16.

• ‘Omwene ta tondo omake taa tileshi ohonde ihe netimba.’ — Omayel. 6:16, 17.

6. Oshipango shaKalunga shi na sha nohonde oshilipi?

• ‘Lidilikeni ohonde nombelela ya fya oshuunguungu.’ — Oil. 15:29.

7. Omolwashike tu na okukala tu hole ovamwatate novamwameme?

• “Oshipango shipe handi shi mu pe: mu holafane ngaashi Ame nda kala ndi mu hole, osho nanye yo mu holafane. Opo tuu opo aveshe tave mu koneke kutya, nye ovalongwa vange, ngeenge mu holafane.” — Joh. 13:34, 35.

8. Ngeenge ou na oudu wolutapo ile omukifi oo tau dulu okutula eemwenyo davamwe moshiponga, (a) Omolwashike uhe na okupapatela ovanhu ile oku va xupita? (b) Omolwashike uhe na okuuda nai ngeenge vamwe inave ku shiva komaumbo avo? (c) Omolwashike omunhu oo a li monghalo omo tashi dulika a kwatelwa mo komikifi odo hadi tandavele okupitila momilele e na oku ke likonakonifa ofimbo ina hovela okweendelafana naumwe? (d) Ngeenge ou na oudu wolutapo, omolwashike u na okulombwela omuunganeki wolutu lovakulunhuongalo ofimbo ino ninginifwa?   

• “Inamu kala noshikolo nomunhu, ndele noshikolo shokuholafana . . . ‘Hola mukweni ngaashi ove u lihole mwene.’ Ohole itai ningile mukwao owii nande washa.” — Rom. 13:8-10.

• “Muha tale keshe tuu osho shaye ashike, ndelenee shomukwao yo.” — Fil. 2:4.

9. Omolwashike Jehova a teelela tu dimine po vamwe?

• “Lididimikilafaneni, diminafaneni po omanyono, ngeenge mwa ningafana nomukweni, ngaashi Kristus e mu dimina po, osho nanye yo mu ninge.” — Kol. 3:13.

10. Oshike u na okuninga po ngeenge omumwaxo okwe ku kengelela ile e ku lundila?

• “Omumwanyoko ngeenge ta nyono kwoove, inda u ke mu pukulule mu li po amuke vavali; ndele ngeenge te ku udu, opo nee ove wa likola omumwanyoko. Ndele ngeenge ita udu ko, ka ifane ko umwe ile vavali, eendjovo adishe opo di tokolwe komakanya [eendombwedi] mbali ile nhatu. Ndele ngeenge ite va udu, shi lombwela eongalo. Ndele ngeenge ita udu ko keongalo, opo nee u kale we mu tala ngaashi omupaani nongaashi omufutifi.” — Mat. 18:15-17.

11. Jehova okwa tala ko ngahelipi omanyono taa landula?

▪ Oluhaelo

▪ Okwiilikana oihongwafano

▪ Oushenge

▪ Okuvaka

▪ Okundobola

▪ Oukolwe

• “Inamu puka, ovahaeli novakaleli voikalunga, novanyoni vohombo nomashenge, novahaeli vomashenge, novalunga novanalwisho, neengholwe novasheki novanyeki ovo itava fyuulula ouhamba waKalunga.” — 1 Kor. 6:9, 10.

12. Shi na sha noluhaelo, mwa kwatelwa oinima i lili i na sha nomilele kondje yohombo, owa tokola okuninga po shike?

• “Kukumeni oluhaelo.” — 1 Kor. 6:18.

13. Omolwashike tu na okulidilika oingangamwifi aishe ile keshe tuu osho tashi dulu okukufa omadiladilo omunhu ponhele?

• “Yandjeni omalutu eni eyambo liyapuki li nomwenyo, la wapalela Kalunga; olo elongelokalunga leni lopandunge. Ndele nye inamu faafana nounyuni ou, ndelenee shitukeni vape momadiladilo eni, opo mu shiive okukonakona ehalo laKalunga olilipi, naashi shiwa, sha wapalela nosha wana.” — Rom. 12:1, 2.

14. Oinima i na sha neendemoni ilipi Kalunga a tokola?

• “Mokati keni muha kale nande umwe . . . ou ha diinine oundudu ile enyanekelo ile ta xunganeke omadidiliko ile ta pulike ile ta longifa oupule ile ta pula keemhepo dovafi ile komhepo yovashitukifi ile ta kongo omapukululo kovafi.” — Deut. 18:10, 11.

15. Ngeenge omunhu okwa nyona sha kwata moiti ndele okwa hala a kale a hokiwa vali kuJehova, mbela oku na okukatuka eenghatu dilipi nopehe na okwoongaonga?

• “Onde ku hepaululila omatimba ange, noulunde wange inandi u holeka, nda tya: Onda hala ndi hepaululile Omwene omanyono ange.” — Eps. 32:5.

• “Ope na tuu umwe mokati keni ta vele? Oye na ifane ovakulunhu veongalo, ndele vo nave mu ilikanene ndele nave mu vaeke omaadi medina lOmwene. Neilikano leitavelo otali xupifa omunaudu, Omwene note mu yambukifa po, ndele ngeenge okwa hangika a tula etimba, otae mu kufilwa po.” — Jak. 5:14, 15.

16. Oto ka ninga po shike ngeenge ou shii Omukriste mukweni oo a nyona enyono la kwata moiti?

• ‘Umwe ngeenge ta nyono ngaha, nokutya ye nande ta udu okwaana nokwa shiiva okuninga ondombwedi yoshinima e shi mona ile e shi shiivifilwa, ndele ite shi holola ye ota nyono.’ — Lev. 5:1.

17. Otu na okuungaunga naumwe ngahelipi ngeenge okwa ningwa eshiivifo kutya okwa kondwa?

• “Ngeenge pe na ou ha ifanwa omumwaxo, ye omuhaeli ile omunalwisho ile omukaleli woikalunga ile omusheki ile ongholwe ile omunyeki, muha endafane naye, nye muha lye nandenande naye.” — 1 Kor. 5:11.

• “Ngeenge ku na hano ou te uya kunye, ndele ite uya e nelongo eli, inamu mu tambula meumbo, nye inamu mu kunda.” — 2 Joh. 10.

18. Omolwashike ookaume koye kopofingo ve na okukala ve hole Jehova?

• “Kala nokweenda novanongo, opo nee naave yo u ninge omunongo. Ndelenee ou ha endafana novashima, ota ka laipala.” — Omayel. 13:20.

• “Inamu puka: ‘Ookaume vai otava nyono po eenghedi diwa.’” — 1 Kor. 15:33.

19. Omolwashike Eendombwedi daJehova dihe na okukufa ombinga moinima yopapolotika?

• “Vo kave fi vomounyuni, ngaashi Ame [Jesus] ndihe fi womounyuni.” — Joh. 17:16.

20. Omolwashike u na okudulika kepangelo?

• “Omunhu keshe na dulike kovapangeli ava have mu pangele. Osheshi kape na nande epangelo inali dja kuKalunga; ovapangeli ava ve li po, ova tulwa po kuKalunga.” — Rom. 13:1.

21. Oshike tu na okuninga po ngeenge omhango yepangelo oi li omhinge nomhango yaKalunga?

• “Okudulika kuKalunga ku dule okudulika kovanhu.” — Oil. 5:29.

22. Omishangwa dilipi tadi dulu oku ku kwafela u kale wa yooloka ko kounyuni ngeenge to hoolola oilonga?

• “Oshiwana itashi yelulile vali eongamukonda oshiwana shikwao, ndele itave ke lilonga vali oukwaita.” — Mika 4:3.

• “Djeni mo [muBabilon Shinene], nye ovanhu vange, mu ha kwatafane noulunde washo, mu ha hangike komahepeko asho.” — Eh. 18:4.

23. Omalihafifo oludi lilipi tu na okuhoolola, na elipi tu na okuhenuka?

• ‘Omwene oku tonde oo e hole owii.’ — Eps. 11:5.

• “Tileni owii, dameni ouwa.” — Rom. 12:9.

• “Oinima aishe oyo yoshili, oinima aishe oyo ya fimana, oinima aishe oyo ya yuka, oinima aishe oyo ya koshoka, oinima aishe oyo i holike, oinima aishe oyo hai popiwa nawa, ouwa keshe noshinima keshe osho shi shii okupandulwa, twikileni okudiladila oinima ei.” — Fil. 4:8.

24. Omolwashike Eendombwedi daJehova ihadi waimine omalongelokalunga makwao?

• “Itamu dulu okulya koshililo shOmwene nokoshililo sheendemoni.” — 1 Kor. 10:21.

• “Nye mu liyoolole mo muvo, Omwene osho ta ti, nye inamu kuma eshi sha nyata; opo Ame ohandi mu tambula.” — 2 Kor. 6:17.

25. Omafinamhango elipi taa dulu oku ku kwafela ngeenge to ningi etokolo li na sha nokuya koshivilo shonhumba?

• “Ova lumbakana mumwe novapaani, ndele tave liikifa eenghedi davo. Ndele tava longele oikalunga yavo; yo oye va pundukifa nokuli.” — Eps. 106:35, 36.

• “Ndelenee noonakufya inava shiiva nande osha.” — Omuud. 9:5.

• “Vo kave fi vomounyuni, ngaashi Ame ndihe fi womounyuni.” — Joh. 17:16.

• “Osha wana eshi mwa wanifa ehalo lovapaani mefimbo eli la pita, eshi mwa li mwa kala moluhaelo, momalwisho, moukolwe, moivilo youfiku, moufukenhu woikunwa nomoixuna yokulongela oikalunga.” — 1 Pet. 4:3

26. Oihopaenenwa yopaMbiibeli otai ku kwafele ngahelipi shi na sha nokudana omafiku omadalo?

• “Mefiku etitatu, efiku lokudimbulukwa okudalwa kwaFarao, ye okwa telekela ovapiya vaye oshitelekela nokwa yela mokati kovapiya vaye omukulunhu wovapindi nomukulunhu wovateleki vomingome. Okwa shunifa omukulunhu wovapindi moshilonga shaye shoupindi . . . Ndelenee omukulunhu wovateleki vomingome okwe mu endjelelifa momuti.” — Gen. 40:20-22.

• “Oshivilo shefiku lokudalwa kwaHerodes eshi sha dana, omona okakadona kaHerodias oka tutula oudano moipafi yavo, ndele oo owa hafifa Herodes; onghee okwe mu udanekela neano e mu pe keshe eshi a hala. Ndele ye okwa tya ngaashi a hekelwa kuina: ‘Pe nge omutwe waJohannes [Omuninginifi, NW] moshiyaxa eshi.’ Ndele oya tuma okutetifa ko omutwe waJohannes modolongo.” — Mat 14:6-8, 10

27. Omolwashike wa hala okushikula omayele ovakulunhuongalo?

• “Shikuleni ovakwatelikomesho veni, nye mu dulike kuvo, osheshi ovo hava pashukile eemwenyo deni ngaashi ovo tave ke di pulwa, opo ve shi ninge nehafo, hanokukema, osheshi osho itashi mu wapalele.” — Heb. 13:17.

28. Omolwashike sha fimana koukwaneumbo okukonga efimbo lokulesha nokukonakona Ombiibeli pamwe?

• “Ha hokwa omhango yOmwene noku i diladila omutenya noufiku. Ndele ye ota ka kala ngaashi omuti, ou wa twikwa pomatondokelo omeva ndele tau imifa oiimati yao pefimbo lao, nomafo ao ihaa lembe. Naashishe eshi ta ningi, osha fewa.” — Eps. 1:2, 3.

29. Omolwashike u hole okukala pokwoongala nokukufa ombinga muko?

• “Edina loye onda hala oku li shiivifila oovakwetu, nomokati keongalo ohandi ku hambelele.” — Eps. 22:22.

• “Ndele tu filafaneni oshisho fye tu twaafane omukumo mohole nomoilonga iwa. Tuha efe eongalo letu vene, ngaashi vamwe ve li po hava ningi, ndelenee tu kumaidafaneni, unene eshi tamu mono efiku olo tali ehene popepi.” — Heb. 10:24, 25.

30. Jesus okwe tu pa oilonga ilipi ya fimanenena?

• “Indeni hano ka ningeni ovanhu aveshe ovalongwa vange, noku va [ninginifa, NW] . . . , noku va longa okudiinina aishe ei nde i mu lombwela.” — Mat. 28:19, 20.

31. Oikala ilipi hai hafifa Jehova ngeenge hatu yandje omayambidido opashimaliwa opo tu yambidida oilonga yOuhamba ile hatu kwafele ovamwatate novamwameme?

• “Omwene mu fimaneka neliko loye.” — Omayel. 3:9.

• “Keshe tuu na yandje ngaashi omutima waye tau mu lombwele, hanomunyengutima ile kefininiko, osheshi Kalunga e hole ou ta yandje nehafo.” — 2 Kor. 9:7.

32. Ovakriste ova teelela okuhanga omaudjuu elipi?

• “Ovanelao ava, tava hepekelwa ouyuki, osheshi ouhamba weulu owavo. Ovanelao onye, ovanhu ngeenge tave mu sheke ndele tave mu taataa ndele tave mu popile mowii aushe nokufufya molwange. Hafeni nye mu nyakukwe pombada, osheshi ondjabi yeni oinene meulu; osho ngaha va li va taataa ovaxunganeki, ve mu tetekela.” — Mat. 5:10-12.

33. Omolwashike shi li oufembanghenda okuninginifwa u li Ondombwedi yaJehova?

• “Eendjovo doye oda li kwaame enyaku nehafo lomutima wange, osheshi ame onda lukilwa edina loye, Omwene, Kalunga.” — Jer. 15:16.