Omapulo a dja kovaleshi

Omangabeko oo e li mOmhango yaMoses e na sha nohombo pokati kovapambele otaa longo fiyo openi kOvakriste kunena?

Omhango yaJehova koshiwana shaIsrael inai tonga shihapu kombinga yoivilo nosho yo omilandu di na sha nomahombolo. Ndele nande ongaho, oya dilika omakwatafano opahombo onhumba. Pashihopaenenwa, ope na omusholondodo oo tau hangika muLeviticus 18:6-20, womakwatafano oo a shilikwa e na sha ‘novakwanepataelela.’ Oshitukulwa osho otashi popi kondadalunde kutya ovapambele velipi ve he na okunangalafana. Doshili, Ovakriste kave li koshi yOmhango yaMoses noinava ngabekwa komaufomhango ayo. (Ovaefeso 2:15; Ovakolossi 2:14) Ndele nande ongaho, eshi itashi ti kutya Ovakriste otava dulu ashike okulipwililikila oshinima eshi ngeenge tashi uya pokukonga kaume komohombo. Ope na omatomheno mahapu kutya omolwashike eshi shi he na okulipwililikilwa.

Lotete, ope na eemhango dopapangelo odo tadi pangele ohombo pokati kovapambele, nOvakriste ova teelelwa va dulike keemhango doshilongo omo ve li. (Mateus 22:21; Ovaroma 13:1) Doshili, eemhango da tya ngaho oda yooloka meenhele di lili noku lili. Eemhango dihapu dopashinanena doludi eli ode likolelela unene komakonakono e na sha noushitwe womunhu. Oshi li oshinima sha shiivika nawa kutya ohombo pokati kovapambele luhapu otashi dulika i etife omapuko opaushitwe nomikifi mounona vavo. Omolwetomheno eli ‘nomolwokudulika kwavo kovapangeli,’ Ovakriste ovo tava hombola ohava dulika keemhango doitukulwa di na sha nohombo.

Ope na yo oshinima osho kutya oshike sha talika ko sha wapala nosho yo osho inashi wapala momudingonoko omo omunhu e li. Konyala eputuko keshe oli na eemhango neenghedindjikilile odo tadi tokola eehombo pokati kovanhu ovo va pambafana. Nonande omakwatafano onhumba oo a tokolwa otaa dulu okukala a yooloka momaputuko e lili noku lili, The Encyclopædia Britannica otai ti: “Etaleko lavahapu ololo kutya, apa pe fike okulyaafane popepi moupambele wovanhu vavali, opo pe fike okutalika ko shi li oshidila tashi dilike ile itashi ladipike enangalafano pokati kavo.” Onghee hano, nokuli naapa pe he na eemhango tadi dilike omakwatafano onhumba, Ovakriste inava hala nande okukala ve he na ko nasha neenghedindjikilile da tulwa po ile nomadiladilo taa ti sha oulipamwe wovanhu, opo va ha dinife eongalo lopaKriste ile edina laKalunga.—2 Ovakorinto 6:3.

Osho shi he fi okulipwililikilwa, omaliudo etu oo twa pewa kuKalunga. Ovanhu aveshe ova dalwa noukwatya wokuyoolola eshi shi li mondjila naashi sha puka, osho shiwa naashi shii. (Ovaroma 2:15) Omaliudo avo ohae va lombwele eshi shi li nawa nosha yuka naashi shi he li nawa noshitondifa, okuninga shapo omaliudo avo a fifwa nokwa kukutikwa koilonga ya pilalala. Jehova okwa li ta ulike koushili ou eshi a pa Ovaisrael omhango yaye i na sha nohombo pokati kovapambele. Otai ti: “Inamu ninga ngaashi tashi ningwa medu laEgipti, omo nye mwa kala, noinamu ninga ngaashi tashi longwa medu laKanaan, oko handi mu twala. Inamu enda paenghedimhango davo.” (Leviticus 18:3) Ovakriste ohava tale ko omaliudo avo e likolelela kOmbibeli e na ondilo noihava pitike a nyonaunwe ketaleko la penga loiwana laashi shi li mondjila naashi sha puka.—Ovaefeso 4:17-19.

Hano, otu na okuuya pexulifodiladilo lilipi? Nonande Ovakriste kave li koshi yOmhango yaMoses, omaliudo avo otae va lombwele sha yela kutya ohombo pokati kaxe nomonakadona, ina nomonamati, omumwaina omulumenhu nomumwaina omukainhu nosho tuu, oya dilikwa filufilu moulipamwe wOvakriste.a Apa oupambele u li li kokule, Ovakriste ova dimina kutya ope na eemhango neenghedimhango odo tadi pangele ehombolo lopaveta nosho yo kutya ope na omifikamhango odo da tambulwa ko moulikumwe wovanhu nomomaputuko avo. Oinima ei oi na okudiladilwa nawa opo tu twe kumwe nelombwelo lopamishangwa olo tali ti: “Ohombo nai fimanekwa kuaveshe.”—Ovaheberi 13:4.

[Omashangelo opedu]