Mbela oimaliwa ohai etele ngoo omunhu ehafo lashili?
SONIA oo a dalelwa muSpania, okwa li ha i naina kokwoongala kwEendombwedi daJehova fimbo a li okaana. Eshi a kula, okwa li a tembukila kuLondon, muEngland, nokwa li a hovela okulonga mehangano lokutuvikila oimaliwa.
Sonia okwa li e hole oilonga yaye. Okwa li ha kwata oimaliwa ihapu nokwa li ha etifa mo oimaliwa ihapu mehangano noha ungaunga noimaliwa ihapu yovayakulwa vaye. Oilonga yaye oya li ihafifa nokwa li a pondola moilonga oyo. Sonia okwa li ha longo alushe eevili 18 mefiku, nomaufiku amwe okwa li ashike ha kofa eevili mbali ile nhatu. Okwa li a kwatwa omboko neenghono koilonga yaye. Ombadilila, onghalamwenyo yaye oya li ya lunduluka neenghono. Sonia okwa li a kwatwa koudu wombada omolwokukala a wililwa po koisho neenghono, nopefimbo opo, okwa li ashike e na omido 30.
Olutu laSonia ola li la fya ombinga imwe, neendokotola kada li di shii ngeenge onaka popye ngoo vali. Ina okwa li a ya diva koEngland opo e ke mu file oshisho. Eshi Sonia a li a hovela vali okweenda, ina okwa li e mu lombwela efiku limwe a ti: “Ame ohandi i kokwoongala, ndele ondi na okuya naave molwaashi itandi dulu oku ku fiya po oove auke.” Sonia okwa li a dimina okuya pamwe naina. Mbela oshidjemo osha li shike?
Sonia okwa ti: “Keshe osho nda li nda uda pokwoongala osha li shoshili, nosha li shiwa neenghono. Onda li nda dimina nehafo okukonakona Ombibeli naumwe womwaavo va li va popifa nge efiku lotete eshi nda li nda ya kOlupale lOuhamba. Ovo nda li handi longo pamwe navo kava li vali have uya okutalela nge po, ashike ookaume kange vape ova li ve hole nge nova li hava file nge oshisho.”
Lwanima, Sonia okwa li vali a hovela okupopya, nokwa li yo a ninga exumokomesho lopamhepo meendelelo. Okwa li a ninginifwa meni lomudo umwe. Ookaume kaye vape vahapu meongalo lopaKriste ova li moilonga yefimbo li yadi, nokwa li a didilika kutya ova hafa. Sonia okwa ti: ‘Naame onda hala okukala ngaashi vo, onda hala okuyandja kuJehova Kalunga keshe osho handi dulu okuyandja.’ Paife Sonia oku li omukalele wefimbo li yadi.
Mbela Sonia okwe lihonga shike moshimoniwa shaye? Sonia okwa ti: “Nonande onda li handi kwata oimaliwa ihapu, oisho nokukala ndi udite ndihe na eameno moilonga, oya li ya etela nge omalipulo noya nyona po ehafo lange. Onda mona kutya osho sha fimanenena monghalamwenyo osho okukala ndi na ekwatafano liwa naTate yange womeulu, Jehova. Paife onda hafa shili.”
Omuyapostoli Paulus okwa ti: “Olwisho loimaliwa olo efina lowii aushe, nomoku li haluka vamwe va puka mo meitavelo, ve lityuulifa [nomaudjuu] mahapu.” (1 Timoteus 6:10) Sonia ota dulu okupopya kutya eendjovo odo odoshili omolwoshimoniwa shaye.