Ehena popepi naKalunga
Kalunga oha tale komaukwatya mawa ovanhu
“OMWENE [ota] panaapana omitima adishe nediladilo keshe lomomwenyo ye e li shii.” (1 Omafimbo 28:9) Eendjovo odo da nwefwa mo otadi tu kwafele tu kale tu na olupandu omolwohokwe inene oyo Jehova e na movanhu. Nonande inatu wanenena, Jehova oha tale komaukwatya mawa omitima detu. Oumbangi wa tya ngaho ou liwetikile meendjovo daye di na sha naAbia, odo tadi hangwa mEehamba dotete 14:13.
Abia okwa li ha kala moukwaneumbo hamu longwa oukolokoshi. Xe, Jerobeam, oye a li omutwe wouhamba wovashunimonima.a Jehova okwa li a lalakanena okukomba po filufilu epata laJerobeam, “ngaashi oimbodi tai kombwa po.” (1 Eehamba 14:10) Ndele Jehova okwa ti kutya oshilyo shimwe shoukwaneumbo waJerobeam, Abia, oo a li ta vele nai, na pakwe monghedi yefimaneko.b Omolwashike mbela? Kalunga okwa yelifa kutya omolwashike, a ti: “Osheshi mepata alishe laJerobeam muko akeke mwa monika sha, osho tashi wapalele Omwene, Kalunga kaIsrael.” (1 Eehamba 14:1, 12, 13) Eendjovo odo mbela otadi tu lombwele shike kombinga yaAbia?
Ombibeli inai popya kutya Abia okwa li ha longele Kalunga noudiinini. Ndele nande ongaho, Abia okwa li e na omaukwatya mawa onhumba. Oukwatya muwa waAbia owa li tau “wapalele Omwene,” tashi dulika wa kwatela mo elongelokalunga. Ovashangi Ovarabbi otava tengeneke kutya Abia okwa li ha i kotembeli kuJerusalem ile kutya okwa taataa ovakeleli ovo va li va tulwa po kuxe va kelele Ovaisrael opo vaha ye kuJerusalem.
Nonande katu shii lelalela kutya Abia okwa li e na omaukwatya mawa elipi, oukwatya waye muwa owa li udidilikwedi. Shotete, oukwatya waye wouwa owa li hau ulikwa paushili. Oukwatya muwa wa tya ngaho owa li ‘muye,’ sha hala okutya, owa li momutima waye. Oshitivali, oukwatya waye owa li we likalekelwa. Abia okwa li e na omaukwatya mawa nokuli nonande okwa li ‘womepata laJerobeam.’ Omuhongwanhu umwe okwa ti: “Oshi shii okupandulwa neenghono ngeenge omunhu okwa kala ha longo ouwa nonande oku kale ha di monhele ile moukwaneumbo omo ihamu longwa ouwa.” Omuhongwanhu umwe vali okwa ti kutya oukwatya muwa waAbia owa li “u didilikwedi . . . , ngaashi ashike eenyofi hadi vilima oufiku, nongaashi omiti domisedeli hadi kala da wapala neenghono ngeenge da dingililwa komiti da yaumuka.”
Ndele osho sha fimanenena oshosho kutya, eendjovo odo di li mEehamba dotete 14:13 otadi tu hongo sha kombinga youwa waJehova nosho yo kutya oshike ha tale kusho momitima detu. Dimbuluka kutya muAbia omwa li mwa ‘monika sha’ shiwa. Onghee hano, osha yela kutya Jehova okwa li ta panaapana omutima waAbia fiyo osheshi a mona mo oukwatya muwa wonhumba. Omuhongwanhu umwe okwa ti kutya Abia okwa li moukwaneumbo wavo ngaashi okawe ke li “mokati konduba yomamanya.” Jehova okwa li a hokwa oukwatya muwa waAbia note ke mu pa ondjabi, ta file onghenda oshilyo shoukwaneumbo oo wa li u kolokoshi.
Mbela itashi mbilipaleke okushiiva kutya Jehova oha tale nokwa lenga omaukwatya etu mawa nonande inatu wanenena? (Epsalme 130:3) Osho oshi na oku tu linyengifa tu ehene popepi naJehova Kalunga, oo ha konakona omitima detu a tale ngeenge ota mono mo ouwa wonhumba, nokuli nande omunini.
[Omashangelo opedu]
a Jerobeam okwa li a tota po elongelokalunga lokwiilikana oshikalunga shonhana mouhamba wokolundume womapata omulongo aIsrael opo a kelele Ovaisrael vaha ye kuJerusalem va ka longele Jehova kotembeli.
b Pefimbo lOmbibeli, ngeenge omunhu ina pakwa monghedi yefimaneko osha li sha talwa ko kutya ina hokiwa kuKalunga. — Jeremia 25:32, 33.