Omolwashike twa pumbwa

1 Okwiilikana?

EILIKANO. MOmbibeli omu na oinima yonhumba oyo hai hokwifa ovanhu neenghono nohai va ningifa va kale va hala okuuda shihapu. Natu ka konakoneni nghee Ombibeli tai nyamukula omapulo aheyali e na sha neilikano, oo haa pulwa luhapu. Oitukulwa ei oya nyanyangidwa nelalakano loku ku kwafela ngeenge to ilikana, sha hala okutya, nghee u na okuhovela okwiilikana ile okwiilikana monghedi tai ti sha.

MOUNYUNI aushe, ovanhu vomomaputuko aeshe novomomalongelokalunga aeshe, ohava ilikana. Ovanhu ohava ilikana ngeenge ve li ovo aveke ile ve li meengudu. Ohava ilikanene meengeleka davo, meetembeli, meeshinagoga, meenhele delongelokalunga lOvamoslema nosho yo meenhele delongelokalunga dokwiilikana kovayapuki. Ovanhu ngeenge tava ilikana otashi dulika va longife oinima ngaashi oumate vokwiilikanena, olusaalia yomailikano yOvakatolika, oulola veilikano, oihongwafano, omambo omailikano ile omailikano a shangwa koupelende ovo hava tulikwa ponhele yonhumba.

Eilikano olo la ningifa ovanhu va kale va yooloka ko koinima aishe yokombada yedu oyo i na omwenyo. Oshoshili kutya otwa faafana noinamwenyo moinima yonhumba. Pashihopaenenwa, ngaashi oinamwenyo, nafye otwa pumbwa oikulya, omhepo yohapi nomeva. Natango, ngaashi oinamwenyo, nafye ohatu dalwa, ohatu kala momwenyo nohatu fi. (Omuudifi 3:19) Ndele ovanhu ovo ashike hava ilikana. Omolwashike mbela?

Enyamukulo lanafangwa ololo kutya ovanhu ove na omhumbwe yokwiilikana. Eilikano ohali longifwa unene onga onghedi omo ovanhu tava dulu okukwatafana noinima oyo va tala ko kutya oiyapuki notai kalelele. Ombibeli otai ulike kutya otwa shitwa tu na omhumbwe yokwiilikana. (Omuudifi 3:11) Jesus Kristus okwa tile: “Ovanelao ovovo ve shii omhumbwe yavo yopamhepo.” — Mateus. 5:3, NW.

Ngeenge hatu tale keenhele domalongelokalunga, koihongwafano nosho yo kefimbo lihapu olo ovanhu hava kala tava ilikana, mbela osho itashi ulike kutya ovanhu ove na ‘omhumbwe yopamhepo’? Doshili, ovanhu vamwe ohava kendabala okuwanifa po omhumbwe yavo yopamhepo kuvo vene ile va pule ekwafo lopamhepo kuvamwe. Mbela ino didilika kutya okudula kwovanhu okwa ngabekwa? Otu li ovanghundi, ihatu kalelele noihatu shiiva osho tashi ka ningwa po monakwiiwa. Omunhu oo e na ounongo wa shiya ko, omunaenghono nomulididimiki e tu dule, oye aeke ta dulu oku tu pa osho twa pumbwa. Ndele mbela eemhumbwe dopamhepo dilipi tu na odo hadi tu linyengifa tu ilikane?

Diladila kwaashi: Mbela kape na efimbo olo wa li wa halelela okupewa omayele, ounongo ile omanyamukulo komapulo oo taa monika a fa itaa dulu okunyamukulwa kovanhu? Mbela kapa li efimbo limwe olo wa li u udite wa pumbwa ehekeleko eshi tashi dulika wa li wa filwa, ile okupewa omayele opo u ninge etokolo la kwata moiti ile okudiminwa po eshi eliudo loye la li li udite etimba?

Ombibeli otai ulike kutya aeshe oo omatomheno mawa okwiilikana. Ombibeli embo olo li shii okulineekelwa neenghono ngeenge tashi uya pokwiilikana noina oihopaenenwa ihapu yomailikano ovalumenhu novakainhu ovadiinini ovo va li hava ilikana. Ova li va ilikana opo va hekelekwe, va pewe ewiliko, va diminwe po nova mone omanyamukulo komapulo madjuu. — Epsalme 23:3; 71:21; Daniel 9:4, 5, 19; Habakuk 1:3.

Nonande omailikano avo okwa yoolokafana, aeshe okwa faafana monghedi yonhumba. Aveshe ovo va li va ilikana ova li ve shii oshinima shonhumba sha fimanenena osho hashi ningifa omailikano a kale taa ti sha, osho inashi shiivika kuvahapu mounyuni kunena ile vehe na nasho. Ova li ve shii kutya ove na okwiilikana kulyelye.