Omolwashike eehombo dihapu hadi teka?

“Ovafarisai ove uya [kuJesus] oku mu yeleka ndee tava ti: Osha wapala tuu omulumenhu ta henge po omukainhu waye omolwondjovo keshe?” — Mateus 19:3.

OVANHU vamwe vopefimbo laJesus ova li va limbililwa ngeenge ohombo oi na ngoo okukalelela ile hasho. Jesus okwa li e va nyamukula a ti: “Inamu lesha hamba, Omushiti okwe va shita pehovelo omulumenhu nomukainhu. ndee ta ti: [onghee] hano omulumenhu e nokufiya po [xe] naina nokulimangeleka komukainhu waye, ndele ava vavali otava ningi omunhu umwe? Osho hano kave fi vali vavali, ndelenee ombelela imwe. Hano osho Kalunga e shi tula kumwe, inashi kufwa kumwe komunhu.”a (Mat. 19:4-6) Onghee hano, Kalunga okwa tota po ohombo nelalakano opo i kalelele.

Kunena, eehombo dovanhu vomoilongo ihapu di fike peepersenda 40 lwaapo ile di dulife po, ohadi ‘kufwa kumwe,’ nohauxuuninwa, ohadi teka. Mbela osho osha hala kutya omayele Ombibeli e na sha nohombo okwa kwisha? Mbela eehombo ohadi teka molwaashi elongekido lohombo olo li na epuko mulo vene?

Oku shi faneka: Natu tye nee ngeno ovalihomboli vane ova landa eehauto mbali da faafana. Vavali vomuvo ohava file ohauto yavo oshisho noihave i shingi nouhasha. Ohauto yavo ihai teka. Ashike ovalihomboli vakwao venya vavali ihava file oshisho ohauto yavo nohave i shingi nouhasha. Ohauto yavo oya teka ndele tave i hauluka. Ndele ngeenge hatu tale, mbela olyelye e na okupewa oushima molwoupyakadi oo wa ka holoka po moshihopaenenwa oshitivali, ohauto ile oovene vayo? Osha yela kutya oovene vohauto ovo unene ve na ombedi moshinima osho.

Sha faafana, nonande eehombo dihapu ohadi teka shili, osho inashi hala kutya elongekido lohombo olo li na epuko, molwaashi ope na eehombo omamiliyona daavo va pondola. Eehombo da tya ngaho ohadi etele oohandimwe omaukwaneumbo nosho yo ovanhu momudingonoko ehafo nombili. Ndele ngaashi ashike ohauto, ohombo nayo oya pumbwa okukala hai filwa oshisho pandjikilile opo i kalelele.

Kashi na nee mbudi kutya opo mwa hombola ile omwa hombola pa pita omido omilongo, omayele Ombibeli ohaa dulu shili okukaleka po eehombo nohadi kala da pama. Tala koihopaenenwa yonhumba, eshi to lesha oshitukulwa tashi landula ko.

[Eshangelo lopedu]