Ovaleshi tava pula . . .
Edu otali xulu po ngoo shili mo 2012?
▪ O-BBC oya kundaneka kutya ope na “ovanhu vahapu ovo va ya komukunda u li moFransa, ovo va itavela kutya ounyuni ou li pokuxula po . . . Ova itavela kutya ounyuni otau xulu po mo 21 Desemba 2012, exulilo lomukokomoko womido 5 125 dokalindeli kopefimbo lonale kOvamaya.”
Nonande ovawiliki vomalongelokalunga novanhu ovo ve litala ko ve li ovanongononi nosho yo ovatengeneki vonakwiiwa vokunena otava lombwele ovanhu kutya edu otali ka hanaunwa po, edu kali na fiku li hanaunwe po; otali ka kala po fiyo alushe. Nomolwaasho ohatu dulu okukala noushili oo kutya itali hanaunwa po mo 2012.
Ombibeli oya ti: “Epupi limwe tali piti po nepupi likwao tali uya po. Edu tali kala po fiyo alushe.” (Omuudifi 1:4) Diladila vali keendjovo odo di li muJesaja 45:18 tadi ti: “Omwene ou a shita omaulu osho ta ti: . . . ou a ma edu ndee te li wapaleke; okwe li pameka, Ye ine li shita li kale ombuwa, ndelenee okwe li ma li kalwe; Aame Omwene, nokape na vali umwe.”
Mbela ope na ngoo xe omunahole oo ta longifa efimbo mokuningila omona okadanaukifo ndele te ka hanauna po konima eshi e ke mu pa? Osho otashi ka kala shihe li pahole. Sha faafana, Kalunga okwa shita edu opo ovanhu va kale ko nove li hafele. Kalunga okwa li a lombwela ovalihomboli votete Adam naEva a ti: “Dalafaneni nokuhapupala ndee yadifeni edu, lo nali kale mepangelo leni.” Konima yaasho, “Kalunga [okwa] tala aishe ei e i ninga, ndele yo ya li ya wapala unene.” (Genesis 1:27, 28, 31) Elalakano laKalunga li na sha nedu inali lunduluka noita ka efa li hanaunwe po. Jehova okwa popya shi na sha nomaudaneko aeshe oo a ninga, a ti: “Ondjovo yange tai di mokanya kange: itai alukile kuame oshimha, ndelenee otai longo osho sha wapalela nge, ndee tai wanifa eshi nde i tumina.” — Jesaja 55:11.
Ndele Jehova okwa hala ‘okunyonauna po ava hava nyono edu.’ (Ehololo 11:18) Okwa udaneka mEendjovo daye a ti: “Ovanashili tava ka nangala oshilongo, naava ve he noshipo tava ka kala mo. Ndelenee ovahenakalunga tava ka dudwa mo moshilongo, novaliteeki tava ka kufwa mo musho.” — Omayeletumbulo 2:21, 22.
Osho otashi ka ningwa naini? Kape na omunhu e shi shii. Jesus okwa ti: “Efiku olo, ile otundi ei kaku na ou e i shii, nande ovaengeli meulu ile Omona, Tate Oye aeke.” (Markus 13:32) Eendombwedi daJehova ihadi kendabala okutengeneka kutya Kalunga ota ka hanauna po naini ovakolokoshi. Nonande odi wete ‘omadidiliko’ exulilo noda itavela kutya otu li ‘momafiku axuuninwa’ oo a popiwa mOmbibeli, itadi dulu okushiiva kondadalunde kutya “exulilo” otali uya naini. (Markus 13:4-8, 33; 2 Timoteus 3:1) Odi shii kutya Xe yado womeulu nOmona ovo ve shii kutya exulilo otali uya naini.
Eendombwedi daJehova ohadi longifa efimbo lado mokuudifa onghundana iwa yOuhamba waKalunga, epangelo lomeulu olo tali ka pangela nokuninga edu oparadisa, olo ‘ovayuki tava ka fyuulula ndele tava kala mo alushe.’ — Epsalme 37:29.
[Odjo yefano pepandja 12]
Image Science and Analysis Laboratory, NASA-Johnson Space Center