Ouyelele wa fimanenena wondjokonona yEendombwedi daJehova
‘Okatemba kokuhumbatela oileshomwa oka li haka didilikifa nge mo noupu’
Ovanhu ova li va kumwa neenghono eshi va mona omulongi wefimbo li yadi wedina Charlotte White a li e uya muLouisville, shomuKentucky, muU.S.A. ta undula okatasi kokokatemba.
Mo 1908, omumwameme Charlotte White okwa li a kumwifa ovanhu vomodoolopa eshi a li e uya mo nokatasi kokokatemba, oko ka li inaka monika nande onale, haka ifanwa Dawn-Mobile. Omumwameme oo okwa ti: “Ovanhu vamwe okwa li hava popi kombinga yako, naasho osha li hashi didilikifa nge mo noupu.”
Ovakonakoni vOmbibeli ovo va ka shiivika nedina Eendombwedi daJehova ova li ve lihonga eeshili di na ondilo eshi va kala tava konakona Ombibeli noukeka nova li va mona kutya ova pumbwa okuudifila vamwe. Ova li va mona eshiivo lOmbibeli okupitila mokukonakona omambo a landulafana e na oshipalanyole: Millennial Dawn (oo lwanima a ka kala yo haa ifanwa Studies in the Scriptures). Ovakriste ovo ve na ehalo notava dulu okuya keenhele neenhele, okwa li hava i keedoolopa, momikunda nokoitukulwa yokomikandi, va ka yandje omambo oo kovanhu ovo ve na ohokwe ve lihonge Ombibeli.
Mo 1908, omumwameme White nosho yo ovaudifi vakwao vOuhamba ovaladi okwa li hava yandje embo olo etihamano kondado yodola yaAmerika 1.65. Ponhele yokuyandja embo komuneumbo pefimbo opo, ovaudifi okwa li hava shange edina laye nohave li eta kuye komufilo womwedi opo a dule okuyandja oshimaliwa sha yeleka ondado yembo olo. Omulumenhu umwe oo a li omhinge okwa li ta tanguna kutya omambo ohaa yandjelwa unene omayambidido manini.
Malinda Keefer ota dimbuluka kutya okwa li ha dulu okushanga omadina omafele avali ile omafele atatu koshivike aavo va hala omambo. Ndele nonande vahapu ova li va ulika ohokwe inene membo olo, ola li yo la etifa po oupyakadi wonhumba. Embo olo etihamano ola li li na omapandja 740. O-The Watch Tower oya dimina kutya embo olo olidjuu okuhumbatwa unene tuu kovamwameme, molwaashi “omambo 50 oku na ondjudo yeekilograma 18,” nosha li “shidjuu neenghono” okutwala omambo oo koovene.
Ndele opo oupyakadi oo u kandulwe po, omumwatate James Cole okwa li a nduluka po okatemba komaulu avali haka tonywa, oko kwa li haku fetelwa okatasi komambo. Molwaashi ovaudifi kava li tava ka humbata vali oipakete yomambo idjuu, omunduluki oo wokatemba okwa ti: “Ame itandi teka vali epepe.” Oshilongifo shipe osho a nduluka po osha li sha kumwifa ovakalipo voposhoongalele shOvakonakoni vOmbibeli shomo 1908, osho sha li sha ningilwa muCincinnati, shomuOhio. Keexulo doitenda yokatemba oko okwa li kwa shangwa edina Dawn-Mobile, tashi ulike kutya oilonga yako oya li okuhumbatela omambo edina Millennial Dawn. Omunhu okwa li ashike ha pumbwa okuliendifa po kanini nohashi ka kala shipu okushinga okatemba oko ke na okatasi ke yadi omambo nande onokwooko ashike kamwe. Okwa li haka dulu okushitelwa she likolelela komufika womuudifi, nomalola ako okwa li haa ngongola nawa meendjila keshe. Konima yokulonga efiku alishe moukalele, omalola ako okwa li haa dulu okutonywa ndele omunhu te ka humbata po e kwete moshikongo shokatasi kehe na sha ile e ka londeke momashina omodoolopa okuhumbata ovanhu.
Okatemba oko oka li haka kosho $2.50 daAmerika, ashike ovamwameme ovo ve li moilonga yefimbo li yadi okwa li hava dulu oku ka pewa oshali. Mefano omo otamu monika omumwameme Keefer ta shingi okatemba kaye nokwooko ashike kamwe, ofimbo keke likwao a humbata okandjato ke na omambo. Omumwameme Keefer okwa li ha twaalele ovapwilikini vahapu omambo vomodoolopa imwe mu na omina yomuPennsylvania, shomuU.S.A. nokwa li ha dulu okushuna ko lwoikando itatu ile ine mefiku nonande okwa li e na okutaulula onhopa.
Lwopexulilo lomudo 1980 nasha, omushingi wodila umwe okwa ka nduluka po okatemba komalola haka humbata omitwalo, oko haka longifwa paife luhapu poupale veedila nosho yo momapandavanda omeedoolopa odo de lipyakidila. Ashike Ovakonakoni vOmbibeli ovaladi ova hangwa nale kwa li hava longifa okatemba kokomalola omido hanga efele da tetekela, oko kwa li haka ningifa ovo ve na okatalekonawa va kale va dakamena omesho kovaudifi eshi tava ende tava kunu eembuto doshili yOmbibeli.
[Eendjovo dididilikwedi pepandja 32]
Omumwameme Keefer okwa li ha taulula onhopa oikando itatu ile ine mefiku ta twaalele ovanhu omambo
[Eendjovo dididilikwedi pepandja 32]
Oupyakadi wokuhumbata omambo wa kandulwa po