Eenghundafana nomuneumbo—Mbela ovanhu aveshe ovo hava longo ouwa otava i meulu?
EENDOMBWEDI DAJEHOVA ohadi hafele okukundafana Ombibeli novanhu vakwao. Mbela ou na epulo lonhumba lopaMbibeli olo ho kala to lipula nalo? Mbela oho kala wa limbililwa shi na sha neitavelo ile elongelokalunga lEendombwedi daJehova? Ngeenge osho, ino tila oku di pula shi na sha naasho, ngeenge we di shakeneke. Otadi ka kala da hafa okukundafana naave kombinga yomapulo oye.
Eenghundafana tadi landula otadi ulike kunghee Eendombwedi daJehova hadi kundafana navamwe. Natu tye nee ngeno Ondombwedi yedina Marcus otai kundafana nomuneumbo wedina Robert.
Ovo tava i meulu otava ka ninga mo shike?
Marcus: Ngeenge to lipula shi na sha nonakwiiwa, mbela oho diladila kutya eenghalo otashi dulika di ka xwepopala, di ka naipale ile kutya itadi ka lunduluka sha?
Robert: Ondi wete kutya otadi ka xwepopala. Onda teelela nodjuulufi oku ka ya meulu ndi ka kale nOmwene wange.
Marcus: Olo eteelelo litunhula shili. Ombibeli oya popya shihapu kutya eulu ola tya ngahelipi nosho yo kombinga youfembanghenda wokuya mo. Mbela owa diladila nale moule kombinga yaasho tashi ka ningwa kwaavo tava i meulu?
Robert: Ohatu ka kala pamwe naKalunga nohatu ke mu tanga fiyo alushe.
Marcus: Olo eteelelo lihokwifa shili. Shihokwifa, Ombibeli inai popya ashike kombinga youfembanghenda oo tau ka pewa ovo tava ka ya meulu, ndele oya popya yo kombinga yoshinakuwanifwa sha fimana osho ve na.
Robert: Oshinakuwanifwa osho oshilipi?
Marcus: Oshinakuwanifwa osho osha tumbulwa mEhololo 5:10. Omushangwa oo otau ti: ‘We va ningila [Jesus] ouhamba novapristeri, ndele tava ka kala nokupangela kombada yedu.’ Robert, owa didilika ngoo kutya ovanhu ovo tava ka ya meulu ove na oshinakuwanifwa shilipi?
Robert: Ovelishe oya ti kutya otava ka pangela ombada yedu ve li eehamba.
Marcus: Olo kali fi tuu ediladilo lihokwifa shili!
Mbela otava ka pangela oolyelye?
Marcus: Mbela ito dimine kutya ngeenge ovo tava i meulu otava ka pangela ve li eehamba, ope na yo okukala ovapangelwa ovo tava ka pangelwa? Shimwe vali, otapa dulu ngoo okukala epangelo ngeenge kape na ovapangelwa?
Robert: Oo omapulo mahokwifa shili.
Marcus: Onghee hano, oshi li pandunge okulipula kutya, Mbela otava ka pangela oolyelye?
Robert: Ondi wete kutya ohatu ka pangela ovanhu ovo tava ka kala kombada yedu, ovo inava fya noinava ya meulu natango.
Marcus: Ediladilo olo oli li pandunge, ngeenge ngeno ovanhu aveshe ovo hava longo ouwa otava i meulu. Ndele otwa pumbwa okudiladila koshinima shimwe vali. Mbela otashi dulika pe na ovanhu vamwe ovo hava longo ouwa ovo itava i meulu?
Robert: Inandi uda nande onale ngeenge ope na Ovakriste va itavela oshinima sha tya ngaho.
Marcus: Eendjovo odo di li mEpsalme 37:29 odo da ningifa nge ndi pule epulo olo. Kwafele nge u leshe ovelishe oyo.
Robert: Eewa. Otai ti: “Ovayuki, vo otava ka fyuulula oshilongo [“edu,” NW], ndee tava kala mo alushe.”
Marcus: Onda pandula. Mbela owa didilika kutya ovayuki vahapu otava ka kala peni?
Robert: Ovelishe oya ti kutya otava ka kala kombada yedu.
Marcus: Ou li mondjila, ashike itava ka kala ko ashike oule wokafimbo. Didilika kutya ovelishe oya ti: ‘Otava ka kala mo alushe.’
Robert: Kashiimba osho osha hala ashike kutya kombada yedu otaku ka kala alushe ovayuki. Ngeenge otwa fi ndele hatu i meulu, ohatu ka pingenwa po kovayuki vamwe ovo tava ka dalwa.
Marcus: Ovanhu vahapu otashi dulika osho hava yelifa ovelishe oyo ngaho. Ndele mbela ovelishe oyo osho ngoo shili tai ti ngaho? Mbela itai ti kutya ovayuki otava ka kala kombada yedu fiyo alushe?
Robert: Nghi na oushili, kwafele nge u yelifile nge.
Eduparadisa lomonakwiiwa
Marcus: Tala vali kutya Omushangwa umwe owa ti ngahelipi kombinga yoku ka kala nomwenyo kombada yedu monakwiiwa. Natu leshe Ehololo 21:4. Ovelishe oyo oya popya kombinga yaavo tava ka kala nomwenyo pefimbo opo ya ti: “[Kalunga] ota feta po omahodi momesho avo, nefyo itali kala po vali ile oluhodi ile okulila ile ouyahame itau kala po vali, osheshi eshi shotete osha xula po.” Olo kali fi tuu etimaumbwile litunhula!
Robert: Olitunhula shili. Ndele ohandi diladila kutya ovelishe oyo otai popi kombinga yeenghalo odo tadi ka kala meulu.
Marcus: Oshoshili kutya ovanhu ovo tava ka ya meulu navo otava ka hafela omanangeko noupuna a tya ngaho. Ndele tala vali kovelishe oyo. Mbela oya ti kutya oshike tashi ka ningwa po shi na sha nefyo?
Robert: Oya ti kutya ‘efyo itali ka kala po vali.’
Marcus: Osho naanaa. Ondi wete kutya oto dimine kutya ngeenge otaku tiwa oshinima shonhumba itashi kala po vali, osha yela kutya opo sha li.
Robert: Ou li mondjila.
Marcus: Ndele meulu ihamu fiwa, ile hasho? Kombada yedu oko akuke haku fiwa.
Robert: Uhm. Ondi na okudiladila kombinga yoshinima osho.
Marcus: Robert ou wete, Ombibeli otai hongo kutya ovanhu vamwe ovo hava longo ouwa otava ka ya meulu, ndele vahapu otava ka kala kombada yedu fiyo alushe. Onde lineekela owa uda nale eendjovo edi da shiivika nawa, edi tadi ti: “Ovanelao ovananheni, osheshi ovo tava ka fyuulula edu.”— Mateus 5:5.
Robert: Onda kala handi udu eendjovo odo lwoikando tadi leshwa kongeleka.
Marcus: Ngeenge ovananheni otava ka fyuulula edu, mbela osho itashi ulike kutya ovanhu otava ka kala nomwenyo kombada yedu? Ovo tava ka kala nomwenyo kombada yedu otava ka mona omanangeko noupuna oo a xunganekwa mEhololo. Otava ka mona ounyuni ou wa lunduluka filufilu molwaashi Kalunga ota ka xulifa po oinima aishe ii, mwa kwatelwa nefyo.
Robert: Ondi ku udite, ndele nghi wete ngeenge Omushangwa umwe ile mbali oda wana okuyelifa oshitwa shoye.
Marcus: Ou li mondjila. Ope na omishangwa dihapu odo tadi popi kombinga yanghee onghalamwenyo tai ka kala kombada yedu monakwiiwa. Pamwe nandi ku ulikile omushangwa umwe oo ndi hole ngeenge ou na omhito?
Robert: Eewa, ondi na ominute dinini.
“Omuhenakalunga ita kala po vali”
Marcus: Metetekelo otwa li twa lesha Epsalme 37:29. Paife natu pandje kEpsalme 37:10, 11. Kwafele nge u leshe po.
Robert: Eewa. “Ngenge pa pita okafimbo kaningholi, omuhenakalunga ita kala po vali, nonganga to talaatala onhele yaye, ke po vali nande. Ndelenee ovananheni vo otava ka fyuulula edu, ndee tava ka hafela ombili inene.”
Marcus: Tangi unene. Mbela ovelishe 11 oya ti kutya “ovananheni” ile tu tye ovo hava longo ouwa otava ka kala peni?
Robert: Oya ti kutya otava “ka fyuulula edu.” Ashike ondi wete kutya ovelishe oyo otai wanifwa kunena; kakele kaasho, ovo hava longo ouwa ove li kombada yedu kunena.
Marcus: Ou li mondjila. Ndele didilika kutya ovelishe oya ti yo kutya ovo hava longo ouwa otava ka hafela “ombili inene.” Kunena mounyuni kamu na ombili inene, hasho mbela?
Robert: Osho.
Marcus: Hano eudaneko olo otali ka wanifwa ngahelipi? Oku shi faneka, natu tye nee ngeno ou na oufuleta. Ovanhu vamwe ovo hava di moufuleta ovo ove na eenghedi diwa, hava file nawa oshisho onhele yoye nohava kala navakwao nombili. Onghee hano, owa hafa eshi wa pitika va kale mo. Ndele ovanhu vamwe ove na eenghedi dii. Ohava teyaula oinima moufuleta nohava ungaunga nai navakwao. Mbela oto ka ninga po shike ngeenge ovanhu ovo itava lundulula oikala yavo?
Robert: Ohandi va te mo.
Marcus: Kalunga naye osho naanaa ta ka ningila ngaho ovakolokoshi ovo ve li ko kunena. Tala vali movelishe 10. Otai ti: “Omuhenakalunga ita kala po vali.” Oku shi popya noitya imwe, Kalunga ota ka taataelashi ovanhu ovo tava etele vakwao omaupyakadi. Opo nee, ovo hava longo ouwa otava ka dula okuhafela ombili kombada yedu. Onda didilika kutya ediladilo olo kutya ovo hava longo ouwa otava ka kala nomwenyo fiyo alushe kombada yedu otashi dulika la yooloka ko kwaasho wa kala wa hongwa.
Robert: Osho, ediladilo olo inandi li uda nale kongeleka yetu.
Marcus: Ndele ngaashi wa popya metetekelo, inashi wana ashike okukonakona omushangwa umwe ile mbali di na sha noshikundafanwa shonhumba. Otwa pumbwa shili okukonakona osho Ombibeli aishe ya ti kombinga yonakwiiwa yaavo hava longo ouwa. Ndele mokutala komishangwa odo twa lesha nena, mbela oto diladila kutya otashi shiiva ngoo ovanhu vamwe ovo hava longo ouwa va ye meulu, ofimbo vahapu vomuvo tava ka kala kombada yedu fiyo alushe?
Robert: Nghi na lela oushili. Ashike onda dimina kutya omishangwa odo twa lesha osho tadi ti ngaho. Onda pumbwa natango okudiladila kombinga yoshinima osho.
Marcus: Eshi to ka konakona oshikundafanwa osho moule, otashi dulika u ka kale u na omapulo amwe vali. Pashihopaenenwa, oshike tashi ka ningwa po shi na sha novayuki ovo va fya nale? Mbela aveshe ova ya meulu? Ngeenge hasho, ove li peni paife?
Robert: Oo omapulo mahokwifa shili.
Marcus: Pamwe nandi ku ningile oinima ivali. Shotete, nandi ku shangele omishangwa donhumba odo tadi popi kombinga yoshikundafanwa osho.a Oshitivali, onda hala okwaaluka tu kundafane omishangwa odo konima ngeenge owe di lesha nokudilonga kombinga yado. Oto ti ngahelipi?
Robert: Eewa, oshi li nawa. Tangi unene.
[Eshangelo lopedu]