Oshilyo shipe sholutuwiliki

METITATU efimbo longula, mo 24 Januali 2018, oukwaneumbo waBetel wokuAmerica nosho yo wokuKanada owa li wa tunhukwa okuuda eshiivifo le likalekelwa kutya: Omumwatate Kenneth Cook, Jr., okwa ninga oshilyo shOlutuwiliki lEendombwedi daJehova.

Omumwatate Cook okwa dalelwa nokwa putukila moPennsylvania, shaAmerica. Okwa hongwa oshili komunafikola womongudu yavo ofimbo ina mana ofikola yaye yopombada nokwa ninginifwa mo 7 Juni 1980. Okwa hovela oilonga yefimbo li yadi me 1 Septemba 1982, e li omukokolindjila wondjikilile. Eshi a kokola ondjila oule weedula mbali, okwa li a shivwa kObetel. Okwa hovela oilonga yaBetel koWallkill, shaNew York, mo 12 Oktoba 1984.

Oule womido 25 da ka shikula ko, okwa longa oinakuwanifwa ya yoolokafana koshinyanyangido nomeembelewa daBetel. Mo 1996, okwa hombola omukulukadi waye, Jamie, nokwa hovela oilonga yaBetel koWallkill. MuDesemba 2009, omumwatate nomumwameme Cook ova li va tuminwa koPatterson, shaNew York, oko haku ningilwa eefikola dehangano, nomumwatate Cook okwa li ha longele kOshikondo shOkuungaunga nOmapulo. MuAprili 2016, eshi omumwatate nomumwameme Cook va shuna koWallkill, ova li va tuminwa koBrooklyn, shaNew York. Konima yeemwedi nhano, ova li va tembukila keembelewa detu da kula koWarwick, shaNew York. MuJanuali 2017, omumwatate Cook okwa li a nangekwa po e li omukwafeli wOkomitiye yOkushanga yOlutuwiliki.