Va hangana mehafo pamwe naJehova nosho yo Omona waYe
Oshiningwanima shokomudo sha fimanenena otashi ka danwa mo 28 Marsa
1 Mokudana kwetu Ouvalelo wOmwene konima eshi etango la ningina mo 28 Marsa 2002, ohatu ulike kutya otwa hafa eshi twa hangana moukumwe pamwe naJehova Kalunga nosho yo Jesus Kristus. Pomhito oyo tuu oyo ye likalekelwa, oixupe yOvakriste ovavaekwa otai ka hafela “okukufa ombinga” kwe likalekelwa oko ve na novafyuululi vakwao vOuhamba, naXe nosho yo nOmona waye. (1 Joh. 1:3, NW; Ef. 1:11, 12) Omamiliyona “eedi dimwe” otaa ka ulika oufembanghenda wavo u kumwifi wokukala va hangana naJehova nosho yo nOmona waye, okukala nomutima umwe nosho yo nomadiladilo amwe navo mokulonga oilonga yaKalunga.—Joh. 10:16.
2 Okulonga pamwe mekwatafano lopofingo: Jehova naJesus ova kala alushe va hangana mehafo. Ova kala va hafela ekwatafano lopofingo oule wefimbo itali dulu okuvalulwa fimbo omunhu ina shitwa. (Mika 5:2) Kungaha ekwatafano lomoule lohole yavo ola kula pokati kavo vavali. E li omunhu e na ounongo, Omona oshiveli ou fimbo a li ina ninga omunhu kombada yedu okwa dula okupopya ta ti: “Opo nee ame onda kala ndi holike [kuJehova] efiku nefiku, onda nyakukilwa puye efimbo alishe.” (Omayel. 8:30, NW) Okukala pamwe oule womido di he fi okuvalulwa mekwatafano lopofingo nOdjo yohole okwa li ku na enwefemo linene kOmona waKalunga.—1 Joh. 4:8.
3 Mokushiiva omhumbwe yovanhu yokukulilwa, Jehova okwa hoolola Omona ewifa, oo a li e hole ovanhu unene, a yandje ekuliloyambo olo alike tali yandje eteelelo. (Omayel. 8:31) Ngaashi ashike Jehova nosho yo Omona waye va hangana mokuwanifa elalakano limwe, nafye otwa hangana navo nosho yo nakeshe umwe mekwamo lohole ya pama, hatu longo ehalo laKalunga nehafo.
4 Natu ulike olupandu letu tali di komutima: Mokukala pEdimbuluko nokupwilikina nawa nonefimaneko, ohatu dulu okuulika olupandu letu lashili lokupandula ohole yaJehova nosho yo eyambo lOmona waye omolwetu. Osho tashi ka divilikwa otashi ka kala oshihopaenenwa shaJesus shopahole, oudiinini waye fiyo okefyo mokuyandja ekulilo, nepangelo laye e li Ohamba yOuhamba waKalunga wa dikwa po nosho yo omanangeko noupuna oo Ouhamba tau ka etela ovanhu. Ohatu ka dimbulukifwa yo omhumbwe yokukala hatu ulike eitavelo letu alushe, okulonga nouladi metwokumwe nehalo laJehova tu li “ovayakuli pamwe navo molwoshili.”—3 Joh. 8; Jak. 2:17.
5 Kwafela vamwe va kale pamwe nafye: Olutu lovakulunhuongalo oli na okuninga eenghendabala de likalekelwa okutwa omukumo Eendombwedi odo ihadi longo vali momapya moshitukulwa shavo di kale pEdimbuluko lefyo laKristus. (Mat. 18:12, 13) Nava ninge omusholondodo waavo va pumbwa okutalelwa po opo pa ha dimbuwe umwe womuvo nosho yo opo aveshe va shivwe paumwene.
6 Mbela ou shii vamwe ovo tava dulu okuuya kEdimbuluko? Katuka onghatu u tunge olupandu lavo okupandula omhito oyo. Va shiva nomutima aushe noku va lombwela kutya otava ka tambulwa ko. Natu ninge ngaashi hatu dulu tu shive ovakonakonimbibeli vetu aveshe, naaveshe ovo ve na ohokwe nosho yo oilyo youkwaneumbo wetu novashiivikile vetu koshiningwanima eshi shokomudo sha fimanenena. Omauwa ekulilo okwa yeulukila aveshe ovo tave lihongo “ongushu ya denga mbada yeshiivo lokushiiva Kristus Jesus.” (Fil. 3:8, NW) Ovo ve na eitavelo tali longo meyambo laKristus otava dulu okumona eteelelo la pama lomwenyo waalushe.—Joh. 3:16.
7 Inatu dina nande oshidjemo osho Edimbuluko tali dulu okweeta movanamitima diwa. Omido mbali da pita moshilongo shokonhunhu shaPapua New Guinea, ovanhu 11 ve na ohokwe ova enda nokambautu kanini oule weevili 17 okupitila moikungulu yefuta opo va dule oku ka kala pulo. Omolwashike? Ova ti: “Otwa li twa hala okudana Edimbuluko laKristus pamwe novailikani vaJehova vakwetu; onghee hano olweendo ola li li na oshilonga.” Diladila kouladi oo wa ulikwa kwaavo ve na ohokwe nosho yo olupandu lavo lokukala va hangana nehafo pamwe naJehova, Omona waye nosho yo oumwainafana wopaKriste.
8 Ninga ekonakonombibeli naaveshe ovo ve na ohokwe. Va ladipika va kale pokwoongala kweongalo nope he na okufaula nosho yo okutukulilafana navamwe oshili oyo tave lihongo. Va kwafela va “ende mouyelele” nova ‘longe oshili’ mokutula moilonga omafinamhango Ombibeli monghalamwenyo yavo. (1 Joh. 1:6, 7) Va kwafela va kulike ekwatafano lopofingo naJehova nova twikile okukulika olupandu lokupandula oufembanghenda wokukala va hangana mokulonga ehalo laye.
9 Kashi fi tuu oufembanghenda ukumwifi okukala twa hangana mehafo ‘momhepo imwe, tu li omuko umwe mokukondjela eitavelo levangeli!’ (Fil. 1:27, 28) Natu teelele nehafo keendafano letu liwa pEdimbuluko mo 28 Marsa, hatu pandula alushe Jehova nosho yo Omona waye!—Luk. 22:19.