Djaleni elininipiko
1 Omumati omufita okwa li e lineekela Jehova nokwa finda omukwaita omunaenghono. (1 Sam. 17:45-47) Omulumenhu oshipuna okwe lididimikila oupyakadi. (Job 1:20-22; 2:9, 10) Omona waKalunga okwa pa Xe efimano alishe omolwehongo laye. (Joh. 7:15-18; 8:28) Moihopaenenwa aishe oyo, elininipiko ola li tali dana onghandangala ya fimana. Sha faafana kunena, elininipiko ola fimanenena meenghalo odo twa taalela.—Kol. 3:12.
2 Ngeenge hatu udifa: Tu li ovakalele Ovakriste, ohatu lombwele nelininipiko ovanhu aveshe onghundana iwa, ihatu va pangula she likolelela komuhoko wavo ile keputuko lavo. (1 Kor. 9:22, 23) Ngeenge vamwe kave na omikalo ile tava ekeleshi etumwalaka lOuhamba nounhwa, ihatu va alule owii wavo ndele ohatu twikile nelidiiniko okukonga ovo va wana. (Mat. 10:11, 14) Ponhele yokukendabala okukumwifa vamwe neshiivo ile nehongo letu, ohatu yukifa elitulemo kEendjovo daKalunga, twa dimina kutya ohadi tomho di dule keshe osho hatu popi. (1 Kor. 2:1-5; Heb. 4:12) Eshi hatu hopaenene Jesus, ohatu yandje efimano alishe kuJehova.—Mark. 10:17, 18.
3 Meongalo: Ovakriste ove na yo ‘okudjala elininipiko mokukalafana kwavo.’ (1 Pet. 5:5) Ngeenge ohatu tale ko vamwe ve tu dule, ohatu ka konga eemhito okuyakula ovamwatate ponhele yokuteelela ve tu yakule. (Joh. 13:12-17; Fil. 2:3, 4) Itatu ka kala tu wete twa tumbala nokulonga oilonga ngaashi okuwapaleka Olupale lOuhamba.
4 Elininipiko otali tu kwafele tu ‘lididimikilafane mohole’ nokungaha ohatu xumifa komesho ombili noukumwe meongalo. (Ef. 4:1-3) Otali tu kwafele tu dulike kwaavo va nangekwa po va kwatele komesho. (Heb. 13:17) Otali tu linyengifa tu tambule ko omapukululo ile outekuduliko oo tashi dulika hatu pewa. (Eps. 141:5) Elininipiko otali tu linyengifa yo tu lineekele Jehova ngeenge hatu wanifa po omaufembanghenda onhumba oo tashi dulika hatu pewa meongalo. (1 Pet. 4:11) Ngaashi David, otwa dimina kutya okupondola okwe likolelela komanangeko noupuna aKalunga ndele hakokudula kwovanhu.—1 Sam. 17:37.
5 Koshipala shaKalunga ketu: Komesho yaaishe, otwa pumbwa ‘okulininipika koshi yeke li neenghono laKalunga.’ (1 Pet. 5:6) Ngeenge ohatu kondjo neenghalo didjuu, otashi dulika tu kale twa hala epepelelwo olo tali ka etwa kOuhamba. Ndele ohatu lidiinike nelininipiko, twa teelela Jehova a wanife po omaudaneko aye peufwafimbo laye. (Jak. 5:7-11) Ngaashi omukanyateli woudiinini Job, nafye otu na ko nasha unene ‘nokuhambelelwa kwedina lOmwene.’—Job 1:21.
6 Omuprofeti Daniel ‘okwa li e lininipika koshipala shaKalunga kaye’ nokwa li a nangekwa noupuna mokuhokiwa kuJehova nosho yo nomaufembanghenda mahapu. (Dan. 10:11, 12) Nafye natu djaleni elininipiko, tu shi shii kutya “ondjabi yelininipiko noyokutila Omwene oyo oupuna nefimano nomwenyo.”—Omayel. 22:4.