Oumbangi oo tau ulike kutya otu na eitavelo
1. Oinima itilifi ilipi Jesus a li a xunganeka?
1 Ovayapostoli ova li va pwilikina nelitulemo eshi Jesus a li te va lombwele shi na sha nedidiliko lokukala po kwaye nolefimbo lexulilo longhalelo yoinima. Jesus okwa li a popya kombinga yoinima itilifi oyo ya li tai ka hanga ovanhu ngaashi, oita, ondjala, omakakamo edu nosho yo omikifi. Opo nee okwa londwela ovashikuli vaye a ti kutya otava ka tondwa, otava ka hepekwa nokudipawa. Okwa tile yo kutya otaku ke uya ovaprofeti ovanaipupulu ovo tava ka pukifa ovanhu vahapu nonokutya ohole yavahapu otai ka talala.
2. Omolwashike tashi kumwifa eshi onghundana iwa tai udifwa mounyuni aushe?
2 Nopehe na omalimbililo, ovayapostoli ova li va kumwa eshi Jesus e va lombwela kutya onghundana iwa yOuhamba waKalunga otai ka udifwa mounyuni aushe nonande opa li tapa ka kala eenghalo odo da popiwa metetekelo. (Mat. 24:3-14) Kunena otu wete nghee exunganeko olo litunhula tali wanifwa monghedi ikumwifi. Nonande otu li momafimbo aa a piyaana, Eendombwedi daJehova otadi udifa onghundana iwa nouladi. Ofimbo ohole yovanhu mounyuni tai ende tai talala, ohole yetu yokuholafana otai ende tai xwamenene. Nonande otu tondike “koiwana aishe,” ohatu udifile ovanhu vomoiwana aishe.
3. Oshike tashi tu omukumo molaporta yoilonga yetu yomounyuni aushe?
3 Itashi tu tuu omukumo okutala nghee Eendombwedi daJehova de shi endifa momudo woilonga wa pita ngaashi sha ulikwa moshimhungu osho shi li pepandja eti-3 fiyo eti-6! Eendombwedi daJehova oda kala tadi longo eevili di dule pebiliyona limwe omudo keshe moilonga yokuudifa nokuninga ovanhu ovahongwa omido 16 da pita. Kau fi tuu oumbangi wa kola oo tau ulike kutya otu na eitavelo li na oilonga! Momukokomoko womudo woilonga oo wa pita opa li ekulo leepersenda 8,7 dovakokolindjila vondjikilile, eepersenda 3,1 dovaudifi, eepersenda 4,4 domakonakonombibeli, neepersenda 20, 1 dovaninginifwa. Kashi hafifa tuu okukala tu shii kutya ope na ovanhu omamiliyona a-7 lwaapo ovo tava longele Jehova noudiinini! Inapa kala nande onale ovanhu ve fike opo tava longele Jehova pefimbo limwe. Oshike wa mona tashi ku tu omukumo moshimhungu osho shi li pepandja eti-3 fiyo eti-6?
4. Omandangalati elipi omulumenhu umwe a li e na okutauluka opo a dule okuninginifwa?
4 Nonande molaporta oyo omu na omivalu dinene, inatu dimbwa kutya otadi ulike keitavelo loohandimwe ovo va longa noudiinini. Pashihopaenenwa, diladila kuGuillermo wokuBolivia a dalwa mo 1935. Okudja eshi a li e na omido 9, okwa kala ta longo mepya loshimbodi hashi ifanwa coca, omo hamu longwa oshingangamwifi hashi ifanwa cocaine. Okwa kala ha taafina omafo oshimbodi osho okudja kounona waye, opo a lotife omadiladilo ile omaliudo aye omolwoilonga idjuu oyo kwa li ha longo. Lwanima okwa ka kala yo ha nu oikolwifa sha pitilila nokushila omakaya. Ndele konima eshi Guillermo e lihonga kombinga yoiteelelwa yaJehova, okwa efa po okushila omakaya nokunwa sha pitilila. Ashike osha li eshongo linenenene kuye okweefa po okutaafina omafo oshimbodi osho hashi ifanwa coca. Osha li shidjuu neenghono, molwaashi okwa kala ha taafina omafo oshimbodi osho okudja kounona. Ndele nande ongaho, okwa kala ta ilikana ehe na edimbuko fiyo a pondola. Okwa ka ninginifwa konima eshi a efa po oinima aishe oyo ii. Okwa popya a ti: “Paife ondi udite nda koshoka nonda hafa neenghono.”
5. Oshike osho twa hala ovanhu aveshe ngeno va ninge?
5 Jehova oku na ko nasha shili novanhu aveshe nomolwaasho okwa hala ovanhu aveshe ve lidilulule. (2 Pet. 3:9) Nafye otwa hala yo ovanhu aveshe ve lidilulule. Onghee hano, omitima detu nadi tu linyengife tu ninge ngaashi hatu dulu opo tu twikile okukwafela ovanamitimadiwa va shiive Jehova nova kale ve mu hole ngaashi fye.