Ovanhu otava ka nyumunwa omolwekuliloyambo

Edimbuluko ohali tu pe omhito iwa yokudilonga komanangekonoupuna omonakwiiwa oo ovanhu tava ka mona okupitila mekuliloyambo, ngaashi enyumuko. Jehova ka li a shita ovanhu nelalakano va kale hava fi. Nomolwaasho hatu kala tu udite oluhodi linene ngeenge twa filwa omunhu oo tu hole. (1Kor 15:26) Jesus okwa li a uda nai eshi a mona ovahongwa vaye tava lili omolwefyo laLasarus. (Joh 11:33-35) Molwaashi Jesus okwa li a wanenena ngaashi Xe, ohatu dulu okukala noushili kutya Jehova naye oha kala e udite nai ngeenge e tu wete twa nyika oluhodi omolwefyo laavo tu hole. (Joh 14:7) Ngaashi Jehova, nafye otwa teelela nodjuulufi efimbo olo eshi ta ka nyumuna ovapiya vaye. — Job 14:14, 15.

Molwaashi Jehova oKalunga kelandulafano, oshili pandunge okukala twa itavela kutya enyumuko otali ka ningwa palandulafano. (1Kor 14:33, 40) Ponhele yokukala hatu pake ovafi, otashi dulika omhito oyo tai ka kala yokuhambelela ovanyumunwa. Mbela oho dilonga ngoo kenyumuko, unene tuu ngeenge u li moluhodi? (2Kor 4:17, 18) Oho pandula ngoo Jehova eshi a yandja ekuliloyambo nosho yo eshi a holola mOmishangwa kutya oonakufya otava ka kala vali nomwenyo? — Kol 3:15.

• Ookaume ile ovapambele voye velipi wa hala oku ka mona vali?

• Mwaavo va popiwa mOmbiibeli, oolyelye wa hala oku ka mona nokupopya navo?